| e-texts navigator |
| Wylie |
280a1 ཅན་དག་དང་རྩོད་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། ། ལྟུང་བྱེད་བཅུ་བཞི་པའི་ལྔ་པ་རྫོགས་།། །། གླེང་གཞི་ནི་མཉན་ཡོད་ནའོ།། གང་གི་ཚེ་ལྷ་ཁང་བལྟ་བ་དགག་པ་མཛད་པ་དེའི་ཚེ་རི་མོ་མཁན་གྱི་ཁང་པ་བལྟ་བའི་ཕྱིར་འགྲོ་བ་དང་། གར
280a2 མཁན་གྱི་ཁང་པ་བལྟ་བའི་ཕྱིར་འགྲོ་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རི་མོ་མཁན་གྱི་ཁང་པའམ།
280a3 གར་མཁན་གྱི་ཁང་པ་བལྟ་བའི་ཕྱིར་འགྲོ་ན་ལྟུང་བྱེད་དོ།། ཡང་གང་ཞེས་བྱ་བ་ནི་སྦོམ་དགའ་མོའོ།། རི་མོ་མཁན་གྱི་ཁང་པའམ། གར་མཁན་གྱི་ཁང་པ་ཞེས་བྱ་བ་ནི་དགེ་སློང་མ་རྣམས་འཇུག་པར་བྱ་བ་མ་ཡིན་པའི་ཁྱིམ་གང་དག་ཡིན་པའོ།། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ
280a4 ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རི་མོ་མཁན་གྱི་ཁང་པའམ། གར་མཁན་གྱི་ཁང་པ་བལྟ་བའི་ཕྱིར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ།། ལྟུང་བྱེད་བཅུ་བཞི་པའི་ཚིགས་སུ་བཅད་པའི་སྡོམ་རྫོགས་།། །། དགེ་སློང་མའི་འདུལ་བ་རྣམ་པར
280a5 འབྱེད་པ། བམ་པོ་ཉི་ཤུ་བཞི་པ། སྡོམ་ལ། ལོ་ནི་བཅུ་གཉིས་མ་ལོན་དང་།། ལོན་ཡང་བསྒོ་བ་མ་བྱས་དང་།། ཁྱིམ་སོ་བཟུང་བ་ལོ་བཅུ་གཉིས།། དེ་ཡང་དགེ་འདུན་མ་བསྐོས་ནའོ།། གླེང་གཞི་ནི་མཉན་ཡོད་ནའོ།། དེ་ནས་བཅུ་གཉིས་སྡེ་དག་གིས་དགེ་སློང་རྣམས་ལ
280a6 དྲིས་པ། ཁྱེད་ཅག་ལོ་དུ་ལོན་ན་བསྙེན་པར་རྫོགས་པར་བྱེད། དེ་དག་གིས་འདི་སྐད་ཅེས་སྨྲས་སོ།། ལོ་བཅུ་ལོན་ནའོ།། དེ་ནས་བཅུ་གཉིས་སྡེ་རྣམས་ཀྱིས་དགེ་སློང་རྣམས་ལ་འདི་སྐད་ཅེས་ཁོ་མོ་ཅག་ཀྱང་ལོ་བཅུ་ལོན་ན་བསྙེན་པར་རྫོགས་པར་བྱེད་ལ། ཁྱེད་ཀྱང་ལོ་བཅུ་ལོན་ན
280a7 བསྙེན་པར་རྫོགས་པར་བྱེད་ན། འདི་ལ་ཁྱེད་ཅག་དང་ཁོ་མོ་ཅག་ཏུ་ཁྱད་པར་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད་ཅེས་སྨྲས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས
iiif viewer powered by OpenSeadragon
