| e-texts navigator |
| Wylie |
279a1 འཕགས་མ་དགག་དབྱེ་བགྱིས་ལགས་ཀྱིས་རྒྱུ་ཞིང་བཞུད་དོ།། དེས་འདི་སྐད་ཅེས་སྨྲས་སོ།། ཁོ་མོ་སྡེ་སྣོད་གསུམ་པ་ཡིན་ཏེ། ད་དུང་རྒྱུ་བའི་དུས་ལ་མ་བབ་བོ།། དགེ་སློང་མ་དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་ཁྱེད་ཅག་དགག་དབྱེ་ནི་བྱས་ཟིན་ན
279a2 ཅིའི་ཕྱིར་རྒྱུ་ཞིང་མི་འདོང་། དེ་དག་གིས་འདི་སྐད་ཅེས་སྨྲས་སོ།། འཕགས་མ་སྦོམ་དགའ་མོ་ན་རེ་ཁོ་མོས་སྡེ་སྣོད་གསུམ་ཤེས་ཏེ་ད་དུང་རྒྱུ་བའི་དུས་ལ་མ་བབ་བོ་ཞེས་ཟེར་རོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ།།
279a3 དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་གནས་ནས་རྒྱུ་ཞིང་མི་འདོང་ན་ལྟུང་བྱེད་དོ།། ཡང་གང་ཞེས་བྱ་བ་ནི་སྦོམ་དགའ་མོའོ།། དབྱར་གནས་ནས་རྒྱུ་ཞིང་མི་འདོང་ན་ཞེས་བྱ་བ་ནི་དགག་དབྱེ་བྱས
279a4 ནས་སོ། ། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགག་དབྱེ་བྱས་ནས་རྒྱུ་ཞིང་མི་འདོང་ན་ཐམས་ཅད་དུ་ལྟུང་བྱེད་དུ་འགྱུར་རོ།། ཐ་ན་དབྱར་ཁང་གཅིག་ནས་ཅིག་ཤོས་སུ་ཡང་འདོང་བར་བྱའོ།། ལྟུང་བྱེད
279a5 བཅུ་བཞི་པའི་གཉིས་པ་རྫོགས་། ། །། གླེང་གཞི་ནི་རྒྱལ་པོའི་ཁབ་ནའོ།། དེའི་ཚེ་མ་སྐྱེས་དགྲས་སུ་ཡང་ཡངས་པ་ཅན་དུ་མ་འགྲོ་ཤིག་ཅེས་དྲིལ་བསྒྲགས་པ་བྱས་སོ།། དེ་ནས་དགེ་སློང་མ་རྣམས་རྒྱལ་པོའི་ཁབ་ནས་ཡངས་པ་ཅན་གང་ན་བ་དེར་རྒྱུ་ཞིང་དོང་ངོ་།། དེ་དག་དོང་བ་ན
279a6 ལམ་ཁར་ཆོམ་རྐུན་པ་དག་གིས་སུན་ཕྱུང་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་དོགས་པ་དང་བཅས་པའི་ཡུལ་འཁོར་དུ་འདོང་བར་མི་བྱའོ།། དེ་ནས་བཅོམ་ལྡན
279a7 འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དོགས་པ་དང་བཅས་པའི་ལམ་ནས་ནང་གི་ཡུལ་འཁོར་དུ་འགྲོ་ན་ལྟུང་བྱེད་དོ།། ཡང་གང་ཞེས་བྱ་བ་ནི་ཆོས་འདི་པའོ།། དོགས་པ་དང་བཅས་པའི་ལམ་ཞེས་བྱ
iiif viewer powered by OpenSeadragon
