| e-texts navigator |
| Wylie |
277b1 ཉེ་བར་བཞག་ནས་ན་བ་ན་རིམ་གྲོ་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། ། ལྟུང་བྱེད་བཅུ་གསུམ་པའི་གཉིས་པ་རྫོགས་།། །། གླེང་གཞི་ནི་མཉན་ཡོད་ནའོ།། དེ་ནས་སྦོམ་དགའ་མོས་བསམས་པ། བདག་གིས་དགེ་སློང་མ་གང་ཞིག་དབྱར་ཁང་འདི་ནས་བསྐྲད་པར་བྱ
277b2 སྙམ་པ་ལས་འདི་སྙམ་དུ་སྐྱེ་དགུའི་བདག་མོ་ཆེན་མོ་འདི་ནི་སྤོང་བ་པ་འཁོར་རྒྱ་ཆེན་པོ་ཅན་ཡིན་ནོ། ། ཆོས་སྦྱིན་མ་འདི་ཡང་ལུང་འབོགས་པ་པ་འཁོར་རྒྱ་ཆེན་པོ་ཅན་ཡིན་ནོ།། གཽ་ཏ་མཱི་སྐེམ་མོ་འདི་ནི་དོན་ཉུང་བ། འཁོར་དོན་ཉུང་བ་ཅན་ཡིན་གྱིས། གཽ་ཏ་མཱི་ཆུང་ངུ་བསྐྲད་པར་བྱའོ་སྙམ་དུ
277b3 དེས་བསམས་སོ། ། དེ་ནས་སྦོམ་དགའ་མོ་སྔ་དྲོའི་ཚེ་ལྟོའི་གཏམ་དག་གླེངས་ནས་སྔ་དྲོ་ཤམ་ཐབས་བགོས་ཏེ་མ་ལུས་པར་ཆས་ཏེ་དོང་ངོ་།། ཇི་ཙམ་ན་གཽ་ཏ་མཱི་སྐེམ་མོས་དགེ་སློང་མ་དེ་དག་དགེ་བའི་ཕྱོགས་ལ་སྦྱར་ནས། དེ་ནས་གཽ་ཏ་མཱི་སྐེམ་མོ་འདི་སྙམ་དུ་མ་ལ་བདག་གིས་སྦོམ་དགའ་མོ
277b4 ལ་ཡང་ཆོས་བཤད་པར་བྱའོ་སྙམ་དུ་བསམས་སོ། ། དེ་ནས་གཽ་ཏ་མཱི་སྐེམ་མོས་སྦོམ་དགའ་མོ་ལ་ཕུ་ནུ་མོ་ཅི་ཁྱོད་ལྟོ་ཁོ་ན་སེམས་ཤིང་འདུག་གི། དགེ་བའི་ཕྱོགས་ལ་མ་ཡིན་ནམ་ཞེས་ཆོས་བཤད་པར་བརྩམས་པ་དང་། དེ་ནས་སྦོམ་དགའ་མོ་འདི་སྙམ་དུ་བདག་གིས་ཡུན་རིང་མོ་ཞིག་ལོན
277b5 ནས་གླགས་རྙེད་དོ་སྙམ་དུ་བསམས་ཏེ། དེས་དེ་ལ་བུའི་ཤ་ཟན་མོ། སེམས་འཁྲུགས་མ། དུར་དུ་བཅུག་མ་ཞེས་སྤྱོས་ནས་དབྱར་གྱི་ནང་ལོགས་སུ་དབྱར་ཁང་ནས་བསྐྲད་པ་དང་། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ།། དེ་ནས
277b6 བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས་འཁྲུགས་རྔམ་ཡི་མ་རངས་པར་གྱུར་ནས། དགེ་སློང་མ་དབྱར་ཁང་ནས་སྐྲོད་ན་ལྟུང་བྱེད་དོ།། ཡང་གང་ཞེས་བྱ་བ་ནི་སྦོམ་དགའ་མོའོ།། ཁྲོས་འཁྲུགས་རྔམ
277b7 ཞེས་བྱ་བ་ནི་ཁྲོ་བའི་ཀུན་ནས་དཀྲིས་པ་གནས་ནས་སོ། ། དགེ་སློང་མ་ཞེས་བྱ་བ་ནི་གཽ་ཏ་མཱི་སྐེམ་མོའོ།། དབྱར་ཁང་ནས་ཞེས་བྱ་བ་ནི་གནས་ནས་སོ།། སྐྲོད་ན་ཞེས་བྱ་བ་ནི་འབྱིན་ནའོ།། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན། ལུས་སྐྱོད
iiif viewer powered by OpenSeadragon
