| e-texts navigator |
| Wylie |
271a1 གླེང་གཞི་ནི་མཉན་ཡོད་ནའོ།། སྦོམ་དགའ་མོས་མང་དུ་ཟོས་ཤིང་མང་དུ་འཐུངས་པས་དེ་མཚན་མོ་གཅི་བས་ཐེབས་ནས་དེས་ཤོལ་ཟངས་བཞག་སྟེ་གཅིས་སོ།། དེ་ནས་ཡང་གླང་པོའི་སྣ་ཆེན་པོ་ལ་གཏོགས་པ་དཔལ་སྐྱེད་ཅེས་བྱ་བ། རྒྱལ་པོ་གསལ་རྒྱལ་གྱིས་ཆད་པས་བཅད
271a2 པ་ཞིག་ཡོད་པ་དེ་ནང་པར་གྱི་དུས་སུ་དབྱར་ཁང་དང་ཉེ་བ་ཞིག་ནས་རྒྱལ་པོའི་ཕོ་བྲང་དུ་སོང་བ་ལས་སྦོམ་དགའ་མོ་དེས་ཤོལ་ཟངས་གཅིན་གྱིས་བཀང་བ་མ་བརྟགས་པར་གཏོར་བས་མགོ་ལ་ཕོག་པར་གྱུར་ཏོ་ཞེས་བྱ་བ་ནས་དེ་རིང་བདག་ལ་བཀྲ་ཤིས་པར་འགྱུར་རམ། འོན་ཏེ་བཀྲ་མི་ཤིས
271a3 པར་འགྱུར་སྙམ་པ་ལས་ཇི་ཙམ་ན་འཛིན་གྱིས་རྒྱལ་པོ་དཔལ་སྐྱེད་ལ་བཟོད་པ་བྱེད་དུ་བཅུག་ནས། འདི་ལྟར་རྒྱལ་པོས་གླང་པོ་ཆེ་པད་མ་དཀར་པོ་ཞེས་བྱ་བ་ཅིག་དང་། དེའི་དབང་ཐང་ཉིད་ཀྱང་སླར་བྱིན་ནོ།། དེ་ནས་དཔལ་སྐྱེད་ཀྱིས་རས་ཡུག་པོ་ཆེ་ཞིག་ཁྱེར་ཏེ་དགེ་སློང་མའི
271a4 དབྱར་ཁང་དུ་ཕྱིན་པ་ཇི་ཙམ་ན་སྦོམ་དགའ་མོས་ཐོས་ནས་སྐྲག་པར་གྱུར་པ་དང་ཞེས་བྱ་བ་ནས་དཔལ་སྐྱེད་ཀྱིས་འདི་སྐད་ཅེས་སྨྲས་སོ། ། གང་གིས་ནང་པར་གྱི་དུས་སུ་ཁོ་བོ་ལ་གཅིན་གཏོར་བའི་དེའི་གཅིན་ནི་བཀྲ་ཤིས་པ་དགའ་བར་བྱེད་པ་ཡིན་པས། དེ་ལ་ཁོ་བོ་དེ་རིང་བསྐོན་པ་རས་ཡུག་པོ
271a5 ཆེ་འབུལ་ན་དགེ་སློང་མ་དེ་གང་ལགས། དེ་ནས་སྦོམ་དགའ་མོས་འདི་སྐད་ཅེས། ཁོ་མོ་ཡིན་ནོ་ཞེས་སྨྲས་པ་དང་། དེས་དེ་ལ་རས་ཡུག་པོ་ཆེ་ཅིག་བསྐོན་ནོ།། ཇི་ཙམ་ན་སྦོམ་དགའ་མོ་དགེ་སློང་མ་རྣམས་དང་ལྷན་ཅིག་འཐབ་མོ་བྱུང་བ་དེའི་ཚེ་དེ་ན་རེ་ངན་སྐྱུགས་ཀྱང་ཁྱེད་དང་མི་མཚུངས
271a6 སོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མ་བརྟགས་པར་དོར་བར་མི་བྱའོ།། འདོར་ན་དེ་ལྟུང་བྱེད་དོ།། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མ་བརྟགས་པར
271a7 བཤང་བ་དང་། གཅི་བ་འདོར་ན་ལྟུང་བྱེད་དོ།། ཡང་གང་ཞེས་བྱ་བ་ནི་སྦོམ་དགའ་མོའོ།། མ་བརྟགས་པར་ཞེས་བྱ་བ་ནི་བརྟགས་པར་མ་བྱས་པར་རོ།། བཤང་བའམ། གཅི་བ་འདོར་ན་ཞེས་བྱ་བ་ནི་འདོར་བར་བྱེད་ནའོ།། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ
iiif viewer powered by OpenSeadragon
