| e-texts navigator |
| Wylie |
25a1 སྟེ། ། ངག་གི་སྡོམ་པ་ལེགས་པ་ཡིན།། ཡིད་ཀྱི་སྡོམ་པའང་ལེགས་པ་སྟེ།། ཐམས་ཅད་དུ་ནི་སྡོམ་པ་ལེགས།། ཀུན་དུ་བསྡམས་པའི་དགེ་སློང་ནི།། སྡུག་བསྔལ་ཀུན་ལས་རབ་ཏུ་གྲོལ།། ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ།། ལུས་ཀྱིས་མི་དགེ
25a2 བ་དག་མི་བྱེད་ཅིང་། ། ལས་ལམ་བཅུ་པོ་འདི་དག་རབ་སྦྱངས་ན།། དྲང་སྲོང་གསུངས་པའི་ལམ་ནི་ཐོབ་པར་འགྱུར།། སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ།། འཁོར་བ་འཇིག་དང་གསེར་ཐུབ་འོད་སྲུང་དང་།། ཤཱཀྱ་ཐུབ་པ་གཽ་ཏམ་ལྷ་ཡི་ལྷ།། མི་འདུལ་ཁ་ལོ་སྒྱུར་བ
25a3 བླ་ན་མེད། ། འཇིག་རྟེན་མགོན་པོ་སྐྱོབ་པ་མཆོག། སངས་རྒྱས་དཔའ་བོ་བདུན་པོ་དག། གྲགས་ལྡན་རྣམས་ཀྱི་སོ་སོར་ཐར།། འདི་ནི་རབ་ཏུ་རྒྱས་པར་བཏོན།། འདི་ལ་སངས་རྒྱས་རྣམས་དང་གང་།། སངས་རྒྱས་ཉན་ཐོས་རྣམས་ཀྱང་གུས།། འདི་ལ་གུས་དང་བཅས་གྱུར་པས།། འདུས
25a4 མ་བྱས་པ་ཐོབ་པར་གྱིས། ། བརྩམ་པར་བྱ་ཞིང་འབྱུང་བར་བྱ།། སངས་རྒྱས་བསྟན་ལ་འཇུག་པར་བྱ།། འདམ་བུའི་ཁྱིམ་ལ་གླང་ཆེན་བཞིན།། འཆི་བདག་སྡེ་ནི་གཞོམ་པར་བྱ།། གང་ཞིག་རབ་ཏུ་བག་ཡོད་པར།། ཆོས་འདུལ་འདི་ལ་སྤྱོད་གྱུར་པ།། སྐྱེ་བའི་འཁོར་བ་རབ་སྤངས
25a5 ནས། ། སྡུག་བསྔལ་ཐ་མར་བྱེད་པར་འགྱུར།། ཕན་ཚུན་ཚུལ་ཁྲིམས་བསྲུང་བ་དང་།། བསྟན་པ་འཕེལ་བར་བྱ་བའི་ཕྱིར།། སོ་སོར་ཐར་པ་འདི་བཏོན་པས།། དགེ་འདུན་གྱིས་ནི་གསོ་སྦྱོང་བྱས།། གང་གི་ཕྱིར་ནི་མདོ་བཏོན་དང་།། གང་ཕྱིར་གསོ་སྦྱོང་བྱས་གྱུར་པས།། ཚུལ
25a6 ཁྲིམས་དེ་ནི་བསྲུང་བྱ་སྟེ། ། གཡག་རྔའི་རྩེ་མོ་ཇི་བཞིན་ནོ།། སོ་སོར་ཐར་པ་བཏོན་པ་ཡི།། བསོད་ནམས་གྲུབ་པ་གང་ཡོད་པ།། དེས་ནི་འཇིག་རྟེན་མ་ལུས་པ།། ཐུབ་དབང་གོ་འཕང་ཐོབ་པར་ཤོག། དགེ་སློང་མའི་སོ་སོར་ཐར་པའི་མདོ་རྫོགས་།། །། དབང་ཕྱུག་དམ་པའི
25a7 མངའ་བདག་དཔལ་ལྷ་བཙན་པོའི་བཀའ་ལུང་གིས་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཁ་ཆེ་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང་། ཞུ་ཆེན་གྱི་ལོཙྪ་བ་ཅོག་རོ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
iiif viewer powered by OpenSeadragon
