| e-texts navigator |
| Wylie |
253b1 སློང་མ་གང་བུད་མེད་མེད་པར་སྐྱེས་པ་དང་ལྷན་ཅིག་འགྲོན་ལམ་དུ་ཞུགས་ཏེ་འགྲོ་ན་ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། ། ཡང་གང་ཞེས་བྱ་བ་ནི་སྦོམ་དགའ་མོའོ།། བུད་མེད་མེད་པར་སྐྱེས་པ་དང་ལྷན་ཅིག་ཅེས་བྱ་བ་ནི་གང་དུ་བུད་མེད་མེད་པར་རོ།།
253b2 འགྲོན་ལམ་དུ་ཞུགས་ཏེ་འགྲོ་ན་ཞེས་བྱ་བ་ནི་དགོན་པའི་ལམ་དུ་འགྲོ་ནའོ།། ཐ་ན་གྲོང་བར་དུ་ཡང་རུང་སྟེ་ཞེས་བྱ་བ་ནི་གྲོང་ནས་གྲོང་དུ་འགྲོ་ནའོ།། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི
253b3 ཙམ་ཅུང་ཟད་བུད་མེད་མེད་པར་སྐྱེས་པ་དང་ལྷན་ཅིག་གྲོང་ནས་གྲོང་བར་དུ་འགྲོ་ན་རྒྱང་གྲགས་ཕྱེད་ཕྱེད་དུ་སོང་ན་དེ་ལ་ཉེས་བྱས་སོ། ། རྒྱང་གྲགས་རྒྱང་གྲགས་སུ་ནི་ལྟུང་བྱེད་དོ།། ལྟུང་བྱེད་ལྔ་པའི་བཅུ་གཉིས་པ་རྫོགས་།། །། སྡོམ་ལ། རྐུན་མ་ལྷན
253b4 ཅིག་ཉི་ཤུ་མིན། ། མི་བརྐོ་འགྲོན་པོས་བསླབ་པ་དང་།། ཉན་རྣ་ལྡང་དང་མ་གུས་དང་།། ཆང་འཐུང་དུས་མིན་རྒྱུ་བའོ།། གླེང་གཞི་ནི་མཉན་ཡོད་ནའོ།། དེའི་ཚེ་སྦོམ་དགའ་མོ་རྒྱལ་པོའི་ཁབ་ནས་ཤོ་གམ་འདྲལ་བའི་ཚོང་པ་རྣམས་དང་ལྷན་ཅིག་མཉན
253b5 ཡོད་དུ་ཆས་ཏེ། དེ་ནས་ཤོ་གམ་འདྲལ་བའི་ཚོང་པ་དང་། ལམ་གོལ་བ་ནས་དོང་བ་ན་ཤོ་གམ་པ་དག་གིས་སླེབས་ནས། དེར་སྦོམ་དགའ་མོ་ཡང་བརྡེགས་སོ།། དེ་རིམ་གྱིས་མཉན་ཡོད་དུ་ཕྱིན་པ་དང་། དེ་ལ་དགེ་སློང་མ་རྣམས་ཀྱིས་འཕགས
253b6 མ་བྱོན་པ་ལེགས་སོ། ། ཤོ་གམ་པ་དག་གིས་མ་གཙེས་གྲང་ཞེས་དྲིས་པ་དང་། དེས་སྐབས་དེ་རྒྱས་པར་སྨྲས་པ་ལས་དགེ་སློང་མ་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་ཏོ།། དེ་ནས་བཅོམ་ལྡན་འདས་ཀྱིས་དགོངས་པ། ཉེས་དམིགས
253b7 གང་ཅི་བྱུང་བ་དེ་ཐམས་ཅད་ནི་དགེ་སློང་མ་གང་རྐུན་པོའི་དོན་མཐུན་དང་ལྷན་ཅིག་འགྲོན་ལམ་དུ་འགྲོ་བ་ལས་གྱུར་ཏོ་སྙམ་ནས་དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང
iiif viewer powered by OpenSeadragon
