| e-texts navigator |
| Wylie |
245a1 དུ་མཛད་དེ། ཡང་དགེ་སློང་མ་གང་རིན་པོ་ཆེ་འམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ། ལེན་དུ་འཇུག་ན་ཀུན་དགའི་ར་བར་གཏོགས་པ་ན་འདུག་པ་འམ། གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ལྟུང་བྱེད་དོ།། དགེ་སློང་མ་གང་ཞིག་གིས་ཀུན་དགའི་ར་བར
245a2 གཏོགས་པའམ། གནས་ཁང་དུ་གཏོགས་པ་ན་རིན་པོ་ཆེའམ། རིན་པོ་ཆེར་སྨོས་པ་འདུག་ན་འདི་སྙམ་དུ། འདི་སུའི་ཡིན་པ་དེ་ཉིད་ལེན་པར་འགྱུར་གྲང་ཞེས་བསམས་ནས་བླང་བར་བྱ་སྟེ། དེ་ལ་ཆོ་ག་ནི་དེ་ཡིན་ནོ།། ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག
245a3 གོ། ། རིན་པོ་ཆེ་འམ་རིན་པོ་ཆེར་སྨོས་པ་ནི་གཡུལ་ངོར་སྤྱད་པའི་ཡོ་བྱད་ཐམས་ཅད་དང་། སྐྱེད་མོས་ཚལ་གྱི་ཡོ་བྱད་ཐམས་ཅད་དོ།། ལེན་ན་ཞེས་བྱ་བ་ནི་རང་གིས་སོ།། ལེན་དུ་འཇུག་ན་ཞེས་བྱ་བ་ནི་གཞན་ནོ།། ཀུན་དགའི་ར་བར་གཏོགས་པ་ན་འདུག་པ་ནི
245a4 སྐྱེད་མོས་ཚལ་ན་འདུག་པའོ། ། གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ཞེས་བྱ་བ་ནི་གཙུག་ལག་ཁང་གི་ནང་ནའོ།། དེས་འདི་སྙམ་དུ་འདི་སུའི་ཡིན་པ་དེ་ཉིད་ལེན་པར་འགྱུར་གྲང་ཞེས་དེ་ཉིད་རྐྱེན་དུ་བྱས་ནས་བླང་བར་བྱའོ།། ཞེས་བྱ་བ་ནི་དེ་ཉིད
245a5 རྗེས་སུ་མཐུན་པར་བྱས་པའི་ཆོས་ཡིན་ནོ། ། དུས་མ་གཏོགས་ཏེ་ཞེས་བྱ་བ་ནི་བཞག་སྟེའོ།། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ནོར་བུ་ལེན་པར་བྱེད་ན་མིག་ཕུག་པ་ལེན་ན་ལྟུང་བྱེད་དོ།། མིག་མ
245a6 ཕུག་པ་ལེན་ན་ཉེས་བྱས་སོ། ། ནོར་བུ་ལ་ཇི་ལྟ་བ་དེ་བཞིན་དུ་མུ་ཏིག་དང་། རྡོ་རྗེ་དང་། བཻ་ཌཱུརྱ་དང་། དུང་དང་། མན་ཤེལ་དང་། བྱི་རུ་དང་། དངུལ་དང་། རིན་པོ་ཆེ་དང་། དམར་པོ་དང་། དུང་གཡས་སུ་འཁྱིལ་པ་ཕུག་པ་ལེན་ན་ལྟུང་བྱེད་དོ།། མ་ཕུག
245a7 པ་ལེན་ན་ཉེས་བྱས་སོ། ། ཐ་ན་ནོར་བུ་མཆིང་བུ་ལེན་ན་ཡང་ཉེས་བྱས་སོ།། མགུལ་གདུབ་ལེན་ན་ལྟུང་བྱེད་དོ།། དེ་བཞིན་དུ་གདུ་བུ་རྒྱན་ཅན་དང་དཔུང་རྒྱན་དང་། དོ་ཤལ་དང་། སེ་མོ་དོ་ལ་སོགས་པ་ལ་ཡང་ལྟུང་བྱེད་དོ།། ཐ་ན་ནོར་བུ་དོ་ཟན་ལེན་ན་ཡང
iiif viewer powered by OpenSeadragon
