| e-texts navigator |
| Wylie |
236b1 འདུག་ལ་བརྟེན་པར་བྱ་སྟེ་དེ་ལ་འགྱོད་པར་མི་བྱའོ། ། དེ་ནས་ཡང་ནུབ་མོར་གྱུར་པ་ན་དགེ་ཚུལ་མ་དེ་དག་བོར་ཏེ་དོང་བ་དང་། ནད་པ་དེ་ཡང་ནུབ་མོ་སྐོམ་སློང་བ་དང་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ཁོ་ནར་ལྷན་ཅིག་གནས་པར་བྱ་སྟེ་དེ་ལ་འགྱོད
236b2 པར་མི་བྱའོ། ། དེ་བཞིན་དུ་དགེ་སློང་མ་ན་ན་ཡང་དེར་དགེ་ཚུལ་མའམ། ནད་གཡོག་དག་གནས་པར་བྱ་ཞིང་སྣང་བ་དང་བཅས་པར་ཡང་གནས་པར་བྱ་སྟེ་དེ་ལ་འགྱོད་པར་མི་བྱའོ།། དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་བསླབ་པ་འདོད་པ་དང་། བསླབ་པ་ལ
236b3 གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས་སྔ་མ་ནི་བཅས་པའོ།། འདི་ནི་རྗེས་སུ་གནང་བ་སྟེ། ཉན་ཐོས་མ་རྣམས་ཀྱིས་ཡང་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་བསྙེན་པར་མ་རྫོགས་པ
236b4 དང་། ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་བར་བྱེད་ན་ལྟུང་བྱེད་དོ།། ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ།། བསྙེན་པར་མ་རྫོགས་པ་དང་ཞེས་བྱ་བ་ལ་བསྙེན་པར་རྫོགས་པ་ནི་གཉིས་ཏེ། དགེ་སློང་དང་དགེ་སློང་མའོ།། ལྷག
236b5 མ་ནི་བསྙེན་པར་མ་རྫོགས་པའོ། ། ནུབ་གཉིས་ལས་ལྷག་པར་ཞེས་བྱ་བ་ནི་ནུབ་གཉིས་འདས་པར་རོ།། གནས་གཅིག་ཏུ་ཉལ་བར་བྱེད་ན་ཞེས་བྱ་བ་ལ། གནས་བཞི་པོ་དག་ཏུ་ཉལ་བར་བྱེད་པ་སྟེ། ཐམས་ཅད་དུ་གཡོགས་ཤིང་ཐམས་ཅད་བསྐོར་བ་དང་།
236b6 ཐམས་ཅད་གཡོགས་ཤིང་ཕལ་ཆེར་མ་བསྐོར་བ་དང་། ཐམས་ཅད་ཕལ་ཆེར་མ་གཡོགས་ཤིང་ཕལ་ཆེར་མ་བསྐོར་བ་དང་། ཐམས་ཅད་ཕལ་ཆེར་གཡོགས་ཤིང་ཕལ་ཆེར་བསྐོར་བའོ།། ཐམས་ཅད་གཡོགས་ཤིང་ཐམས་ཅད་བསྐོར་བ་ནི་གནས་ཁང་ངམ།
236b7 འཁོར་གྱི་ཁྱམས་སམ། ཁང་པ་བརྩེགས་མ་དག་གོ།། ཐམས་ཅད་གཡོགས་ཤིང་ཕལ་ཆེར་མ་བསྐོར་བ་ནི་ཁྱམས་ཟླུམ་པོའམ། རིམ་གྲོའི་གནས་དག་གོ། ཐམས་ཅད་ཕལ་ཆེར་མ་གཡོགས་ཤིང་ཕལ་ཆེར་མ་བསྐོར་བ་ནི་ཁྱམས་ངོས་གསུམ་པའོ།། ཕལ
iiif viewer powered by OpenSeadragon
