| e-texts navigator |
| Wylie |
232a1 བགྱིས་ན་ངེས་པར་འོ་སྐོལ་གཉིས་ཀ་དགེ་སྦྱོང་གི་ཚུལ་ལས་ཉམས་པར་འགྱུར་རོ། ཞེས་དེ་སྐད་སྨྲས་པ་དང་། འཆར་ཀས་སྦེད་མ་ལ་འདི་སྐད་ཅེས་སྨྲས་སོ།། སྦེད་མ་ལེགས་སོ་ལེགས་སོ།། བཅོམ་ལྡན་འདས་ཀྱིས་གང་བདག་བསྲུང་བ་དེ་ནི
232a2 གཞན་སྲུང་བ་ཡིན་ལ་གང་གཞན་སྲུང་བ་དེ་ནི་བདག་སྲུང་བ་ཡིན་ནོ་ཞེས་གསུངས་པ་ནི་ཐོག་ཏུ་བབ་སྟེ་འདི་ལྟར་ཡང་སྦེད་མ་ཁྱོད་ཀྱིས་རང་ཡང་བསྲུངས། ཁོ་བོ་ཡང་བསྲུངས་སོ།། དེ་ནས་སྦེད་མས་འཆར་ཀ་ལ་འདི་སྐད་ཅེས་སྨྲས་སོ།། ཁྱོད་ལམ་གྱིས་དུབ་སྟེ་བྱོན་གྱིས་གོས་དག
232a3 བདག་ལ་གཏོད་ཅིག་བཀྲུའོ། ། དེ་ནས་བྱིན་པ་དང་སྦེད་མས་མཐོང་ནས་འགྱོད་པ་སྐྱེས་ཏེ་བདག་གིས་ནི་བུད་མེད་ཀྱི་མི་བརྟན་པ་བྱས། བདག་གིས་ནི་དགེ་སྦྱོང་གི་མི་བརྟན་པ་དང་། བྲམ་ཟེའི་མི་བརྟན་པ་བྱས་ཏེ། བདག་གི་ལུས་ཀྱི་ཡན་ལག་དེ་འདི་ལྟ་སྟེ། འཆར་ཀས
232a4 མ་མཐོང་བའམ། མ་རེག་པའམ། སུས་ཀྱང་མི་ཤེས་པ་དེ་གང་ཞིག་ཡོད་ཅེས་དེ་ལྟར་སྨྲེ་སྔགས་མང་དུ་བཏོན་ནས་མི་གཙང་བ་རྨའི་ནང་དུ་བླུགས་སོ།། དེ་ནས་སྦེད་མས་འཆར་ཀའི་གོས་དག་བཀྲུས་ནས་དགེ་སློང་མའི་དབྱར་ཁང་གང་ན་བ་དེར་སོང་ངོ་།། དེ་ནས་སྦེད་མ
232a5 དུས་གཞན་ཞིག་ན་སེམས་ཅན་དང་ལྡན་པར་གྱུར་ཏོ། ། དེ་ནས་དགེ་སློང་མ་རྣམས་ཀྱིས་སྦེད་མའི་ལུས་ཀྱི་གྱུར་པ་དག་མཐོང་ནས་ཞེས་བྱ་བ་ནས་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ཏོ།།
232a6 བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་མ་དག་དགེ་སློང་ཉེ་དུ་མ་ཡིན་པའི་གོས་དག་འཁྲུ་བ་དང་། ཁ་དོག་བསྒྱུར་བ་དང་། འཆག་པ་ལས་གྱུར་ཏོ་སྙམ་མོ།། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ
232a7 པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་ཉེ་དུ་མ་ཡིན་པའི་གོས་རྙིང་པ་འཁྲུའམ། ཁ་དོག་བསྒྱུར་རམ། འཆག་ན་ལྟུང་བྱེད་དོ།། ཡང་དགེ་སློང་མ་གང་ཞེས་བྱ་བ་ནི་སྦེད་མའོ།། ཉེ་དུ་མ་ཡིན་པ་ཞེས་བྱ་བ་ནི་མ་མེས་དང་། ཕ་མེས་བདུན་རྒྱུད
iiif viewer powered by OpenSeadragon
