| e-texts navigator |
| Wylie |
221a1 པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྟེང་གི་ཡང་ཐོག་ཏུ་ཁྲིའམ། ཁྲིའུ་རྩ་བ་འབྱུང་བ་ལ་ལྗིད་ཀྱིས་མནན་ཏེ་ཉལ་ལམ་འདུག་ན་ལྟུང་བྱེད་དོ།། ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ།། དགེ་འདུན་གྱི་ཞེས་བྱ་བ་ནི
221a2 དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། ། གཙུག་ལག་ཁང་ཞེས་བྱ་བ་ནི་གང་དུ་སྤྱོད་ལམ་བཞི་ཤོང་བའོ།། སྟེང་གི་ཞེས་བྱ་བ་ནི་ཁང་ཐོག་གི་སྟེང་ངོ་།། ཡང་ཐོག་ཅེས་བྱ་བ་ནི་གནས་ཁང་ངོ་།། རྩ་བ་འབྱུང་བ་ལ་ཞེས་བྱ་བ་ནི་རྐང་པ་འབྱུང་བའོ།།
221a3 འདུག་གམ་ཞེས་བྱ་བ་ནི་འདུག་པར་བྱེད་པའོ།། ཉལ་ལམ་ཞེས་བྱ་བ་ནི་ལུས་སྙོལ་བར་བྱེད་པའོ།། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྟེང་གི་ཁང་ཐོག་གི་ཡང་ཐོག་ཏུ་ཁྲིའམ། ཁྲིའུའི་རྩ་བ་འབྱུང་བ་ལ་འདུག་གམ་ཉལ་ན་ཐམས
221a4 ཅད་དུ་ལྟུང་བྱེད་དུ་འགྱུར་རོ། ། གལ་ཏེ་སོ་ཕག་གིས་གཡོགས་པའམ། སྤང་ལེབ་ཀྱིས་གཡོགས་པའམ། དྲལ་བུའམ། ཤིང་ལེབ་བམ། ཤིང་ལེབ་ཆུང་ངུས་གཡོགས་པའམ། ཞལ་ཞལ་བྱས་པའམ། རྐང་རྟེན་བཅུག་པ་ལ་ནི་ལྟུང་བ་མེད་དོ།། ལྟུང་བྱེད
221a5 གཉིས་པའི་བདུན་པ་རྫོགས་། ། །། གླེང་གཞི་ནི་མཉན་ཡོད་ནའོ།། དེའི་ཚེ་སྦོམ་དགའ་མོ་སྲོག་ཆགས་དང་བཅས་པའི་ཆུས་རྩཝ་ལ་འདེབས་པར་བྱེད་ས་དང་ལྕི་བ་ལ་ཡང་འདེབས་པར་བྱེད་ནས། དེ་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་སྲོག་ཆགས་དང
221a6 བཅས་པའི་ཆུས་རྩཝའམ་ལྕི་བ་ལ་མ་འདེབས་ཤིག། དེས་འདི་སྐད་ཅེས་ཅི་ཁོ་མོ་ལ་བགྲངས་ཏེ་གཏད་དམ། ཤར་གྱི་རྒྱ་མཚོ་ཆེན་པོར་འདོང་ན་ཅི་ཉེས། ལྷོ་དང་ནུབ་ཀྱི་རྒྱ་མཚོ་ཆེན་པོར་འདོང་ན་ཅི་ཉེས་ཞེས་སྨྲས་པ་དང་། དོན་ཉུང་བའི་དགེ་སློང་མ་དག་སྨོད་པར་བྱེད་པའི
221a7 སྐབས་དེ་བཅོམ་ལྡན་འདས་ལ་གསོལ་ཏོ། ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྲོག་ཆགས་དང་བཅས་པའི་ཆུས་རྩཝའམ། ལྕི་བའམ། ས་ལ་འདེབས་སམ། འདེབས་སུ
iiif viewer powered by OpenSeadragon
