| e-texts navigator |
| Wylie |
181a1 རང་གི་ཆོས་གོས་འདུན་པ་ལ་བྱིན་ནོ། ། དེ་ནས་འདུན་མས་ཆོས་གོས་དེ་ཞག་མང་པོ་མ་ལོན་པར་དྲི་མ་ཅན་དུ་བྱས་སོ།། འདུན་པས་ཡང་ཆོས་གོས་དེ་ལེགས་པར་བཀྲུས་ཤིང་ལེགས་པར་ཁ་བསྒྱུར་བ་བྱས་ནས་ཡང་མ་བལྟ་བའི་ཕྱིར་སོང་བ་དང་།
181a2 དེ་ནས་འདུན་མས་མིང་པོ་ལ་འདི་སྐད་ཅེས་སྨྲས་སོ།། མིང་པོ་ཆོས་གོས་འདི་སུའི་ལགས། དེས་འདི་སྐད་ཅེས་སྨྲས་སོ།། འདི་དེའི་ཚེའི་ཁྱོད་ཀྱི་ཡིན་མོད་དེས་འདི་སྐད་ཅེས་སྨྲས་སོ།། རང་གི་ཆོས་གོས་འདི་སྣོམས་ལ་བདག་གི་ཆོས་གོས་ནི་ཚུར་སྩོལ་ཅིག། དེས་མ
181a3 བྱིན་པ་དང་། དེས་ཡང་མ་ལ་གསོལ་བ་བཏབ་པ་དང་། བུ་བྱིན་ཅིག། དེས་དེ་ལ་བྱིན་ནོ།། དེ་ནས་དགེ་སློང་མ་འདུན་མ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་ཀྱི་ཆོས་གོས་ལ་རྟག་པར་བཀྲུས་ཤིང་ལེགས་པར་ཁ་བསྒྱུར་བས་གནས་གཙང་མའི་བཞིན
181a4 དུ་གྱུར་ཏོ། ། དེས་སྐབས་དེ་དགེ་སློང་མ་རྣམས་ལ་སྨྲས་པ་དང་། དེ་ནས་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ།། ཅིའི་ཕྱིར་ཁྱོད་འཁོར་གྱི་གཙོ་བོ་དང་ལྷན་ཅིག་ཆོས་གོས་བརྗེ་བ་ཉམས་སུ་མྱོང་བར་བྱེད། དེས་འདི་སྐད་ཅེས་གལ་ཏེ་བརྗེར་རུང་ཡང་རུང
181a5 བརྗེར་མི་རུང་ཡང་རུང་བདག་གིས་བརྗེས་ལགས་སོ། ། ཞེས་སྨྲས་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ཏོ་ཞེས་བྱ་བ་ནས། བསླབ་པ
181a6 བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་དང་ལྷན་ཅིག་ཆོས་གོས་བརྗེས་ནས་དེའི་འོག་ཏུ་འདི་སྐད་ཅེས་འཕགས་པ་འཕགས་པའི་ཆོས་གོས་གང་ལགས་པ་འདི་བཞེས་ལ་བདག་གི་ཆོས་གོས་གང་ལགས་པ་དེ་སླར་སྩོལ་ཅིག་ཅེས་སྨྲ་ན་སྤང་བའི་ལྟུང་བྱེད
181a7 དོ། ། ཡང་དགེ་སློང་མ་གང་ཞེས་བྱ་བ་ནི་འདུན་མ་དང་། དགེ་སློང་འདུན་པར་རོ།། ཆོས་གོས་བརྗེས་པ་ཞེས་བྱ་བ་ནི་བདུན་པོ་གང་ཡང་རུང་བའོ།། སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི
iiif viewer powered by OpenSeadragon
