| e-texts navigator |
| Wylie |
170b1 ཞེས་བྱ་བ་ནི་སྔ་མ་བཞིན་ནོ། ། སྣ་ཚོགས་ཞེས་བྱ་བ་ནི་རྣམ་པ་དུ་མའོ།། མངོན་མཚན་ཅན་ཞེས་བྱ་བ་ནི་དབྱིག་གམ། གསེར་རོ།། སྤྱོད་ན་ཞེས་བྱ་བ་ནི་ལྷག་པར་སྤྱོད་ནའོ།། སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར
170b2 ཇི་ལྟར་འགྱུར་ཞེ་ན། རྣམ་པ་བཞི་སྟེ། ཀུན་དུ་སྦྱོར་བར་བྱེད། རབ་ཏུ་སྦྱོར་བར་བྱེད། བུན་འགྱེད་པར་བྱེད། སྐྱེད་འགྱེད་པར་བྱེད་པའོ།། དེ་ལ་ཀུན་དུ་སྦྱོར་བར་བྱེད་པ་ནི་ཡུལ་གྱི་རྙེད་པའི་ཕྱིར་ཟོང་ལ་ཀུན་དུ་སྦྱོར་བར་བྱེད་པ་དང་། ཤིང་རྟ་ལ་ཀུན
170b3 དུ་སྦྱོར་བར་བྱེད་པ་དང་། མི་རྣམས་སྡུད་པར་བྱེད་པ་དང་། དེ་ནས་རྫས་འདི་ནི་ཁྱེད་ཀྱིའོ།། འདི་ནི་ཁོ་མོའིའོ་ཞེས་བྱ་བ་སྟེ། ཇི་སྲིད་དུ་རྙེད་པ་བདག་གིར་མི་བྱེད་པ་དེ་སྲིད་དུ་ཉེས་བྱས་སོ།། རྙེད་པ་བདག་གིར་བྱེད་ན་སྤང་བའི་ལྟུང་བྱེད་དོ།། དེ་ལྟ་བུ་ནི་ཀུན་དུ་སྦྱོར
170b4 བར་བྱེད་པ་ཡིན་ནོ། ། ཇི་ལྟར་རབ་ཏུ་སྦྱོར་བར་བྱེད་ཅེ་ན། གསེར་གྱི་རྙེད་པའི་ཟོང་གིས་བཅུ་ལས་བཅུ་གཅིག་ཏུ་བསྐྱེད་པའི་ཕྱིར་ཟོང་ལ་རབ་ཏུ་སྦྱོར་བར་བྱེད་ཅིང་དཔང་རྒྱའི་ཆེད་དུ་དེར་འགྲོ་བ་དང་། སྣག་ཚའམ། དཔང་པོ་ཚོལ་དུ་འགྲོ་བའོ།། ཇི་ཙམ་དུ་རྙེད་པ
170b5 བདག་གིར་མི་བྱེད་ན་ཉེས་བྱས་སོ། ། བདག་གིར་བྱེད་ན་སྤང་བའི་ལྟུང་བྱེད་དོ།། དེ་ལྟ་བུ་ནི་རབ་ཏུ་སྦྱོར་བར་བྱེད་པ་ཡིན་ནོ།། ཇི་ལྟར་བུན་འགྱེད་པར་བྱེད་ཅེ་ན། ནས་དང་གྲོ་གསར་ཐོག་གི་ཕྱིར་བུན་དགྱེ་བར་གཞལ་བའི་སྣོད་ཀྱིས་གྲོ་དང་ནས་སྐྱེད་དུ་གཏོང་བ་སྟེ།
170b6 དེར་དེ་དག་གཞལ་བའི་སྣོད་དང་། བྲེའུ་ཆུང་དང་། ཕུལ་དང་། འཇལ་བ་དང་། མི་དག་དོན་དུ་གཉེར་བར་འགྲོ་བ་ཡིན་ཏེ། ཇི་སྲིད་དུ་རྙེད་པ་བདག་གིར་མི་བྱེད་ན་ཉེས་བྱས་སོ།། བདག་གིར་བྱེད་ན་སྤང་བའི་ལྟུང་བྱེད་དོ།། དེ་ལྟ་བུ་ནི་བུན་འགྱེད་པར་བྱེད
170b7 པ་ཡིན་ནོ། ། ཇི་ལྟར་སྐྱེད་འགྱེད་པར་བྱེད་ཅེ་ན། དེ་དག་མུ་ཏིག་གི་སྐྱེད་ཉིད་ཀྱིས་སྐྱེད་འགྱེད་པར་བྱེད། གསེར་གྱི་སྐྱེད་ཉིད་ཀྱིས་སྐྱེད་འགྱེད་པར་བྱེད་པ་ཡིན། དེར་དེ་དག་གྲོ་ག་དང་། སྣག་ཚ་དང་། དཔང་པོ་དོན་དུ་གཉེར་བར་བྱེད་པ་ཡིན་ཏེ། ཇི་སྲིད
iiif viewer powered by OpenSeadragon
