| e-texts navigator |
| Wylie |
167b1 ཞལ་ཏ་བྱེད་པ་བསྟན་པར་བྱ་སྟེ་ཞེས་བྱ་བ་ལ། ཀུན་དགའ་ར་བ་པ་ཞེས་བྱ་བ་ནི་རུང་བ་བྱེད་པའོ།། དགེ་བསྙེན་ཞེས་བྱ་བ་ནི་བསླབ་པའི་གཞི་ལྔ་པའོ།། འདི་དག་ནི་དགེ་སློང་མ་རྣམས་ཀྱི་ཞལ་ཏ་བྱེད་པ་ཡིན་ནོ།། ཞེས་བྱ་བ་ནི་འདི་དག་གིས་དགེ་སློང་མ་དེ
167b2 རྣམས་ཀྱི་ཞལ་ཏ་བྱེད་པ་ཉམས་སུ་མྱོང་བའི་ཕྱིར་རོ། ། གལ་ཏེ་ཕོ་ཉ་དེ་ཞལ་ཏ་བྱེད་པ་གང་ན་བ་དེར་འགྲོ་བར་བྱ་སྟེ་ཕྱིན་ནས་ཞེས་བྱ་བ་ནི་དེ་ལ་དགོས་པར་རིག་པར་བྱ་བའི་ཕྱིར་ཕྱིན་པའོ།། ཞལ་ཏ་བྱེད་པ་ཤེས་པར་གྱིས་ཤིག། གོས་ཀྱི་རིན་འདི་དག་ནི་ཞེས
167b3 བྱ་བ་ནི་གསེར་དང་དངུལ་དག་རྒྱལ་པོའི་བར་གྱིས་བསྐུར་བ་དག་གོ། ། དགེ་སློང་མ་མིང་འདི་ཞེས་བྱ་བའི་ཆེད་དུ་ཞེས་བྱ་བ་ནི་ཤཱཀྱའི་བུ་མོ་ཉེ་དགའ་མོའོ།། དེ་ནས་ཕོ་ཉ་དེ་ཞེས་བྱ་བ་ནི་སྐྱེས་པ་དང་། བུད་མེད་དང་། མ་ནིང་ངོ་།། ཞལ་ཏ་བྱེད་པ་ཀུན་དགའ་ར་བའམ།
167b4 དགེ་བསྙེན་ལ་ཤིན་ཏུ་ལེགས་པར་ཡང་དག་པར་བསྒོ་ནས་ཞེས་བྱ་བ་ནི་རྣམ་གྲངས་དུ་མས་སོ།། དགེ་སློང་མ་དེ་ཞེས་བྱ་བ་ནི་ཤཱཀྱའི་བུ་མོ་ཉེ་དགའ་མོའོ།། གང་ན་བ་དེར་འགྲོ་བར་བྱ་སྟེ་ཕྱིན་ནས་ཞེས་བྱ་བ་ནི་སོན་ནས་སོ།། འདི་སྐད་ཅེས་སྨྲ་བར་བྱ་སྟེ། འཕགས་མ
167b5 རྣམས་ཀྱི་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་ལགས་ཀྱིས་བཞུད་ཅིག་དང་། དེས་ཁྱོད་ལ་གོས་བསྐོན་པར་འགྱུར་རོ་ཞེས་བྱ་བ་ནི་བདུན་པོ་གང་ཡང་རུང་བའོ།། རུང་བ་ཞེས་བྱ་བ་ནི་ལོངས་སྤྱད་པར་འོས་པའོ།། དགེ
167b6 སློང་མ་གོས་འདོད་པ་ཞེས་བྱ་བ་ནི་གལ་ཏེ་གོས་དོན་དུ་གཉེར་བར་གྱུར་ནའོ། ། སོང་སྟེ་ཞེས་བྱ་བ་ནི་སོང་ནས་སོ།། ལན་གཉིས་ཞེས་བྱ་བ་ནི་ལན་གཉིས་ཀྱི་བར་དུའོ།། ལན་གསུམ་དུའོ་ཞེས་བྱ་བ་ནི་ལན་གསུམ་གྱི་བར་དུའོ།། བསྐུལ་བར་བྱ་དྲན་པར་བྱའོ།།
167b7 དོན་དེ་གལ་ཏེ་གྲུབ་ན་དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་པོའོ།། ཇི་སྟེ་མ་གྲུབ་ན་ལན་བཞི་ལན་ལྔ་ལན་དྲུག་གི་མཐར་ཐུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པར་བྱའོ།། ཞེས་བྱ་བ་ནི་ཕྱོགས་སུ་བསྡད་པ་བཞི་དང་། བསྐུལ་བའི་སྒོ་དྲུག་པོ་དག
iiif viewer powered by OpenSeadragon
