| e-texts navigator |
| Wylie |
128a1 གཉིས་སུ་གྱུར་པ་ནའོ། ། ཁྲོས་ནས་ཞེས་བྱ་བ་ནི་ཡིད་མི་བདེ་ནས་སོ།། འདི་སྐད་ཅེས་རེ་ཞིག་ཤཱཀྱའི་བུའི་དགེ་སྦྱོང་འདི་དག་འབའ་ཞིག་ཅེས་བྱ་བ་ནི་འདི་དག་ཁོ་ནའོ།། ཚུལ་ཁྲིམས་དང་ལྡན་པ་ཞེས་བྱ་བ་ནི་ཇི་སྐད་གསུངས་པའི་ཚུལ་ཁྲིམས་དང
128a2 ལྡན་པའོ། ། ཡོན་ཏན་དང་ལྡན་པ་ཞེས་བྱ་བ་ནི་ཐོས་པ་ལ་སོགས་པའི་ཡོན་ཏན་དང་ལྡན་པའོ།། དགེ་སྦྱོང་གཞན་ཡང་ཞེས་བྱ་བ་ནི་འདི་ལས་ཕྱི་རོལ་དུ་གྱུར་པའོ།། དེ་དག་གི་དྲུང་དུ་ཞེས་བྱ་བ་ནི་དེ་དག་གི་ཐད་དུའོ།། ཚངས་པར་སྤྱོད་པ་སྤྱད་པར་ཟད་ཀྱིས་ཞེས
128a3 བྱ་བ་ནི་རབ་ཏུ་བྱུང་བར་ཟད་ཀྱིས་སོ། ། སངས་རྒྱས་གཏོང་ངོ་ཞེས་བྱ་བ་ནི་རྐང་གཉིས་ཀྱི་མཆོག་གོ།། ཆོས་དང་དགེ་འདུན་གཏོང་ངོ་ཞེས་བྱ་བ་ནི་འདོད་ཆགས་དང་བྲལ་བའི་མཆོག་དང་། ཚོགས་རྣམས་ཀྱི་མཆོག་གོ།། ཟེར་བའི་དགེ་སློང་མ་དེ་ལ་ཞེས་བྱ་བ་ནི
128a4 ནག་མོ་ལའོ། ། དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ།། འདི་སྐད་ཅེས་བྱ་བ་ནི་བཞམས་ཏེ་བསྒོ་བ་སྔ་མ་ཇི་ལྟ་བ་བཞིན་དུ་བསྒོ་བར་བྱ་བའོ།། བཞམས་ཏེ་བསྒོ་བ་ན་གཞི་དེ་གཏོང་བ་དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ།།
128a5 ཇི་སྟེ་གཏོང་བར་མི་བྱེད་ན་ཞེས་བྱ་བ་ནི་སྡིག་པ་ཅན་གྱི་ལྟ་བར་གྱུར་པ་དེའོ།། ལན་གཉིས་ལན་གསུམ་གྱི་བར་དུ་ཡང་དག་པར་བསྒོ་ཡང་དག་པར་བསྟན་པ་ན་ཞེས་བྱ་བ་ནི་སྔར་གསོལ་བ་དང་བཞིའི་ལས་ཀྱིས་ཇི་སྐད་བསྒོ་བ་བཞིན་དུའོ།། དེ་ལ་ལྟུང་བར་ཇི་ལྟར་འགྱུར
128a6 ཞེ་ན། དགེ་སློང་མ་གང་འཐབ་པ་ན་ཁྲོས་ནས་འདི་སྐད་ཅེས་རེ་ཞིག་ཤཱཀྱའི་བུའི་དགེ་སྦྱོང་འདི་དག་འབའ་ཞིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི། དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ
128a7 དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ་། ། ཆོས་དང་དགེ་འདུན་གཏོང་ངོ་ཞེས་ཟེར་ན་ཇི་ལྟར་ཡང་རུང་སྟེ་ཐམས་ཅད་དུ་ཉེས་བྱས་སུ་འགྱུར་རོ།། བཞམས་ཏེ་བསྒོ་བ་ན་གལ་ཏེ་གཞི་དེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར
iiif viewer powered by OpenSeadragon
