| e-texts navigator |
| Wylie |
121b1 གིས་འདི་སྐད་ཅེས་གལ་ཏེ་འགའ་ཞིག་གིས་ཁྱོད་བརྟུལ་ཞུགས་དང་ཕྲལ་ན་ཁྱོད་ཀྱིས་ཅི་བྱར་ཡོད་ཅེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ་ཞེས་བྱ་བ་ནས་བསླབ་པ་བཅས་པའི་བར་དུའོ། ། ཡང་དགེ་སློང་མ་གང་གཅིག་པུ་ཆུ་ཀླུང་གི་ཕ་རོལ
121b2 དུ་རྐྱལ་བར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། ། ཡང་དགེ་སློང་མ་གང་ཞེས་བྱ་བ་ནི་དགེ་སློང་མ་ནག་མོའོ།། གཅིག་པུ་ཞེས་བྱ་བ་ནི་གཉིས་པ་མེད་པར་རོ།། ཆུ་ཀླུང་གི་ཕ་རོལ
121b3 དུ་རྐྱལ་བར་བྱེད་ན་ཞེས་བྱ་བ་ནི་ཆུ་བོ་རྒལ་བར་བྱེད་ནའོ། ། གཞན་ནི་སྔ་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་གཅིག་པུ་ཆུ་ཀླུང་གི་ཕ་རོལ་དུ་རྐྱལ་བར་བྱེད་ན་དགེ་འདུན་ལྷག་མར་འགྱུར་རོ།། རྩང་ལག་རྒལ་བར་བྱེད་ན
121b4 ཉེས་པ་སྦོམ་པོར་འགྱུར་རོ། ། ཆུ་བྲན་རྒལ་བར་བྱེད་ན་ཉེས་པ་སྦོམ་པོར་འགྱུར་རོ།། ཡུར་ཆུ་རྒལ་བར་བྱེད་ན་ཉེས་བྱས་སོ།། དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་དགུ་པ་རྫོགས་།། །། གླེང་གཞི་ནི་མཉན་ཡོད་ནའོ།། དེའི་ཚེ
121b5 ན་རྒྱལ་པོ་གསལ་རྒྱལ་ལ་དམག་ཚོགས་མཐུ་སྟོབས་རྡུལ་དུ་རློག་པ་ཞེས་བྱ་བ་དང་། རིགས་བཟང་པོ་ཞེས་བྱ་བ་གཉིས་ཡོད་དེ་དེ་དག་རྒྱལ་པོ་གསལ་རྒྱལ་གྱི་མདུན་དུ་འགྲོ་ཞིང་རི་བྲགས་གང་ཡང་རུང་བ་ལོག་པར་གྱུར་ན་དེ་དག་དེར་སོང་ནས་གཡུལ་འགྱེད་པར་བྱེད་དོ།། དེ
121b6 དག་དེར་སོང་བ་ན་ཆུང་མ་རྣམས་གཡོན་ཅན་དང་། འཕྱོན་མ་དང་། ཟོལ་པ་རྣམས་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ནས་དེ་དག་གིས་འདི་སྙམ་དུ་བདག་ཅག་གིས་ནི་རི་བྲགས་པ་ལོག་པའི་རྣམས་འདུལ་བར་བྱེད་ན་རང་གི
121b7 ཆུང་མ་དག་གདུལ་བར་མི་ནུས་སམ་ཁྲིམས་བཅའ་གོར་མ་ཆག་སྙམ་དུ་བསམས་ནས། བདག་ཅག་གི་ཆུང་མ་གང་ཞིག་སྐྱེས་པ་གཞན་དང་ལྷན་ཅིག་མི་རིགས་པ་བྱེད་པར་གྱུར་པ་དེའི་མགོ་སྐེར་བཅད་ནས་དོར་བར་བྱའོ།། དེ་དག་ཁ་ཅིག་གིས་སྨྲས་པ། ཁྲིམས་འདི
iiif viewer powered by OpenSeadragon
