| e-texts navigator |
| Wylie |
106a1 འབྲས་བུ་ཐོབ་པ་དེ་དག་ནི་ཕྱིར་མི་འོང་བ་རྣམས་དང་ལྷན་ཅིག། ཕྱིར་མི་འོང་བ་རྣམས་ནི་དགྲ་བཅོམ་པ་རྣམས་དང་ལྷན་ཅིག་སྟེ། དེ་ལྟར་དགེ་སློང་དེ་རྣམས་ལྷག་པར་ཕན་ཚུན་དུ་འབེལ་བའི་གཏམ་རྣམ་པར་གཏན་ལ་དབབ་པ་དང་། དགེ་བའི་ཕྱོགས
106a2 འཕེལ་བར་འགྱུར་བ་དེ་ལྟར་གནས་མལ་མཐུན་པར་གཞན་དང་གཞན་དུ་བསྐོས་སོ། ། དེའི་ཚེ་ན་ཚེ་དང་ལྡན་པ་གྱད་བུ་ནོར་རྫུ་འཕྲུལ་གྱིས་གནས་མལ་འབོགས་པར་བྱེད་དོ།། གང་དག་མཚན་མོ་སྔར་འོང་བ་དེ་དག་ལ་ནི་སོར་མོ་གཅིག་ལས་འོད་སྦར་ཏེ་གནས་མལ
106a3 འབོགས་པར་བྱེད་དོ། ། གང་དག་མཚན་མོ་ཆེས་ཕྱིས་འོང་བ་དེ་དག་ལ་ནི་སོར་མོ་གཉིས་ལས་འོད་སྦར་ཏེ་འབོགས་པར་བྱེད་དོ།། དེ་བཞིན་དུ་གསུམ་པ་དང་། བཞི་པ་དང་། ལྔ་པ་ལས་འོད་སྦར་ཏེ་ཞེས་བྱ་བའི་བར་དུའོ།། དེ་ནས་དགེ་སློང་དེ་དག་འདི་སྙམ་དུ
106a4 འདི་ནི་ཆོས་དང་ལྡན་པས་ལས་བྱས་པ་ཡིན་ཏེ་ཞེས་བྱ་བ་ནས། ཁོང་དུ་མ་ཆུད་པ་ནི་ཁོང་དུ་ཆུད་པར་གྱུར། ཁོང་དུ་ཆུད་པ་ནི་ལྷག་པར་ཁྱད་པར་དུ་ཁོང་དུ་ཆུད་པར་གྱུར་ཏོ།། དེ་ལྟར་བྱས་པ་ནས་འདི་ལྟར་ཚེ་དང་ལྡན་པ་གྱད་བུ་ནོར་གྱིས་རྫུ་འཕྲུལ་གྱི་ཆོ་འཕྲུལ་བསྟན་ཏེ
106a5 གནས་མལ་འབོགས་པར་བྱེད་ཅེས་ཕྱོགས་བཞི་དག་ཏུ་དེའི་སྒྲ་གྲགས་པར་གྱུར་ཏོ། ། དེའི་ཚེ་གང་དག་ངོ་མཚར་དུ་གྱུར་པ་དེ་དག་གིས་ནི་མངོན་སུམ་དུ་བྱ་བའི་ཕྱིར་ཉིན་པར་འོངས་ནས་འོད་མའི་ཚལ་གྱི་ཉེན་ཀོར་དུ་འདུག་སྟེ་ཉི་མ་ནུབ་པ་དང་མཚན་མོ་འོང་བར་བྱེད་དོ།། དེ
106a6 རྣམས་ལ་ཡང་ཚེ་དང་ལྡན་པ་དེས་དེ་བཞིན་དུ་རྫུ་འཕྲུལ་གྱི་ཆོ་འཕྲུལ་བསྟན་ནས་གནས་མལ་འབོགས་པར་བྱེད་དོ། ། རེ་ཞིག་ན་རྒྱལ་པོའི་ཁབ་དེ་ན་སྦྱིན་པ་པོ་དང་། སྦྱིན་བདག་དེ་དག་དགེ་འདུན་ལ་ཟས་རྣམ་པ་གསུམ་དུ་ཤོམ་པར་བྱེད་དེ། ཁ་ཅིག་ནི་བསོད་པ་སྦྱིན
106a7 པར་བྱེད་པའོ། ། ཁ་ཅིག་ནི་འབྲིང་དག་སྦྱིན་པར་བྱེད་པའོ།། ཁ་ཅིག་ནི་ངན་པ་དག་སྦྱིན་པར་བྱེད་པའོ།། ཁྱིམ་གང་ན་བསོད་པ་དག་སྦྱོར་བ་དེ་དག་ནི་དྲུག་སྡེ་རྣམས་ཀྱི་སྔོན་ངོ་ཤེས་པ་ཡིན་པས་དེར་ནི་རང་འབའ་ཞིག་འགྲོ་བར་བྱེད་དོ།། གང་ན་འབྲིང་སྦྱིན་པར་བྱེད་པ
iiif viewer powered by OpenSeadragon
