| e-texts navigator |
| བོད་ཡིག |
131b1 bkur sti dang / btsun pa dang / ri mo dang / mchod pa dang / sti stang dang / rim gro byas nas / bcom ldan 'das la 'di skad ces gsol to/ /bcom ldan 'das tshe rabs gzhan de dang de dag la ga ya
131b2 mgo'i ri 'di nyid du chos kyi rnam grangs 'di sangs rgyas stong phrag bdun bcu rtsa gnyis kyis don 'di nyid dag dang / tshul 'di nyid dag dang / tshig dang yi ge 'di nyid dag gis bstan pa bdag gis mngon
131b3 par dran no/ /bcom ldan 'das kyis bka' stsal pa/ mi 'chi ba de ltar khyod kyis dkon mchog 'byung ba de lta bu thos par gyur pa ni khyod kyis thob par bya ba legs par thob bo/ /de nas 'khor der
131b4 tshogs pa'i nang na lha'i bu kha cig 'di snyam du sems par gyur te/ lha mo 'dis de srid cig nas chos kyi rnam grangs 'di thos nas de snyed kyi de bzhin gshegs pa mang po la bsnyen bkur byas kyang / 'di
131b5 bud med kyi lus las ma bsgyur snyam pa dang / de nas byang chub sems dpa' sems dpa' chen po sgrib pa thams cad rnam par sel bas/ lha'i bu de dag gi sems kyi rtog pa sems kyis yongs su
131b6 shes nas/ bcom ldan 'das la 'di skad ces gsol to/ /bcom ldan 'das de ltar lha mo mi 'chi ba 'dis chos kyi rnam grangs 'di ltar rdzu 'phrul che ba thob la/ de bzhin gshegs pa de snyed du mang ba
131b7 zhig bsnyen bkur bgyis na/ ci'i rgyu ci'i rkyen kyis bud med kyi lus ma bsgyur/ bcom ldan 'das kyis bka' stsal pa/ rigs kyi bu 'di la sems can gyi don ni rgyu'o/ /sems can gyi don ni rkyen to/ /
131b8 de ci'i phyir zhe na/ rigs kyi bu lha mo mi 'chi ba ni rnam par thar pa bsam gyis mi khyab pa la gnas pa/ rdzu 'phrul che ba/ mthu che ba ste/ rigs kyi bu lha mo mi 'chi bas gang yang dag par len du
iiif viewer powered by OpenSeadragon
Texts on this page
J174 - 'phags pa dkon mchog sprin zhes bya ba theg pa chen po'i mdo