rKTs

e-texts navigator

Volume

Page

193b₁ de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo de lta bas na khyod kyis chos thams cad bsal ba med cing gzhag pa med pa la gnas pas sangs rgyas kyi byang chub 'di bdag
193b₂ nyid kyis yang dag par ston cig / chos gang yang dor du med pa dang / thob par byar med par chos ston cig /yongs su shes par byar med pa dang / spang du med pa dang / bsgom du med pa dang / mngon sum du byar med pa dang /
193b₃ mngon par rtogs par byar med pa dang / 'khor ba las bskyod du med pa dang / mya ngan las 'das par 'gror med pa dang / rgyun du zhugs pa'i 'bras bu thob par byar med pa dang / lan gcig phyir 'ong bar 'gyur ba dang /
193b₄ phyir mi 'ong bar 'gyur ba dang / dgra bcom pa nyid kyi 'bras bu thob par byar med par chos ston cig /de ci'i phyir zhe na/ kun dga' bo chos thams cad ni rgyun du zhugs pa dang / lan gcig phyir 'ong ba dang / phyir mi 'ong ba
193b₅ dang / dgra bcom pa'i chos yin te/ chos kyi dbyings mnyam pa nyid kyi phyir ro/ /kun dga' bo de lta bas na/ khyod kyis byang chub sems dpa'i theg pa pa'i gang zag rnams la nyan thos dang / rang sangs rgyas kyi sa las
193b₆ bzlar med pa dang / sangs rgyas kyi chos rnams thob par byar med par chos ston cig /de ci'i phyir zhe na/ kun dga' bo chos thams cad ni sangs rgyas kyi chos yin te/ chos kyi dbyings mnyam pa nyid kyi phyir ro/ /kun dga'
193b₇ bo gzhan yang khyod kyis rnal 'byor spyod pa'i dge slong dgra bcom pa nyid mngon sum du bya bar 'dod pa rnams la 'dod chags dang / zhe sdang dang / gti mug spang du med par chos ston cig /de bzhin gshegs pa bltar med pa dang /
193b₈ chos mnyan du med pa dang / dge 'dun la bsnyen bkur byar med par chos ston cig /kun dga' bo 'dod chags dang / zhe sdang dang / gti mug rnams ni spang du med pa kho na ste/ 'dod chags dang / zhe sdang dang / gti mug rnams ya ma brla yin pa'i phyir ro/ /

_{iiif viewer powered by OpenSeadragon}

193a - 194a

Texts on this page