rKTs

e-texts navigator

Volume

Page

118b₁ stong gis bla na med pa yang dag par rdzogs pa'i byang chub tu sems bskyed do/ /lha'i bu sum khri drug stong rnams kyis ye shes mngon par rtogs par gyur to/ /dge slong lhag pa'i nga rgyal can drug cu po de dag rnams
118b₂ kyang nye bar len pa med par zag pa rnams las sems rnam par grol lo/ /de dag sems rnam par grol nas mgrin gcig tu tshig smras pa/ bcom ldan 'das bdag cag ni deng slan chad ston pa drug rnams kyi
118b₃ rjes su rab tu byung ngo / /deng slan cad bdag cag gi ston pa sangs rgyas ma lags/ chos la mi rten/ dge 'dun la mi rten to/ /deng phan chad bdag cag bya ba ma mchis par smra ba/ rgyu ma mchis par smra ba/
118b₄ las ma mchis par smra ba/ rnam par smin pa ma mchis par smra ba/ 'dul ba ma lags par smra ba'o/ /de'i tshe 'khor de na srog chags stong phrag mang po rnams 'di snyam du gyur te/ 'di ltar dge slong 'di
118b₅ dag 'di dag 'di lta bu yang dag pa ma yin pa'i tshig smra ba las na/ bcom ldan 'das kyi bslab pa phul nas mu stegs can gyi mtshan ma 'dzin par mi 'gyur ram snyam du gyur to/ /de nas tshe dang ldan pa
118b₆ shA ri'i bu'i sems kyis 'khor de dag gi sems kyi rtog pa shes nas dge slong de dag la smras pa/ tshe dang ldan pa dag ci las bsams te/ deng phan chad bdag cag ston pa drug gi rjes su rab tu byung ngo
118b₇ zhes de skad smra/ de dag gis smras pa/ tshe dang ldan pa shA ri'i bu deng phan chad bdag cag gi ston pa thams cad ston pa drug dang mnyam zhing mtshan nyid gcig cing bye brag med par rnam par rig go/ /bdag cag gis
118b₈ ston pa thams cad tha dad pa med par rig nas rnam par mi rtog par rab tu byung ba'i rjes su rab tu byung ngo / /smras pa ci las bsams nas deng phan chad bdag cag gi ston pa sangs rgyas ma yin no zhes de skad smra/

_{iiif viewer powered by OpenSeadragon}

118a - 119a

Texts on this page