rKTs

e-texts navigator

Volume

Page

53b₁ chos rnams khams gsum las shin tu 'das pa ma yin nam/ blo gros rgya mtshos smras pa/ tshangs pa khams gsum gyi ngo bo nyid kyis mtshan ma nyid sangs rgyas kyi chos rnams so/ /de ci'i phyir zhe na/ tshangs
53b₂ pa sangs rgyas kyi chos mnyam pa nyid la tha ma 'am mchog gang yang med do/ /tshangs pa 'di lta ste dper na/ nam mkha' la ni tha ma 'am mchog gang yang med do/ /tshangs pa de bzhin du sangs rgyas kyi chos
53b₃ de dag ni nam mkha' dang mnyam ste/ de dag la tha ma 'am mchog gang yang med do/ /tshangs pa chos thams cad kyi rang bzhin gang yin pa de ni ngo bo nyid kyis stong pa nyid de de la yang tha ma 'am mchog gang yang med do/ /
53b₄ tshangs pa sangs rgyas kyi chos khong du chud par 'dod pa rigs kyi bu 'am rigs kyi bu mos/ rtogs pa med pa'i tshul gyis sangs rgyas kyi chos rnams de ltar rtogs par bya'o/ /tshangs pa gzhan yang sangs
53b₅ rgyas kyi chos rnams ni yul na mi gnas pa/ phyogs na mi gnas pa/ ma skyes pa/ ma 'gag pa/ sngon po ma yin pa/ ser po ma yin pa/ dmar po ma yin pa/ dkar po ma yin pa/ leb rgan ma yin
53b₆ pa/ shel dang dngul gyi kha dog lta bu ma yin pa dag ste/ de dag ni kha dog med pa/ dbyibs med pa/ rtags med pa dag go/ /de dag ni mtshan ma med pa dag go/ /tshangs pa mtshan ma med pa'i don ni sangs
53b₇ rgyas kyi chos kyi chos kyi don no/ /sangs rgyas kyi chos kyi chos kyi don ni 'chi 'pho med pa'i tshig gi don no/ /'chi 'pho med pa'i tshig gi don ni zhi ba'i don no/ /zhi ba'i don ni dben pa'i don no/ /dben pa'i
53b₈ don ni stong pa'i don no/ /stong pa'i don ni gnas med pa'i don no/ /gnas med pa'i don ni de kho na'i don no/ /de kho na'i don ni shin tu skye ba med pa'i don no/ /skye ba med pa'i don ni 'gag pa med pa'i don no/ /

_{iiif viewer powered by OpenSeadragon}

53a - 54a

Texts on this page