rKTs

e-texts navigator

Volume

Page

158a₁ pa'i chos can yin/ /ston pas de dag rab mkhyen nas/ /dge slong rnams la de yang bshad/ /kun dga' tshur shog khyod song la/ /nga'i nyan thos rnams la smros/ /lha'i mig gi mthar phyin pa/ /
158a₂ gnas brtan chen po ma 'gags dang / /gnas brtan chen po ka ta'i bu/ /gnas brtan gang po rab 'byor dang / /gsus po che ni chen po dang / /ba lang bdag dang dga' byed dang / /gro zhin don yod rgyal po dang / /chos
158a₃ gos ngan pa 'chang ba dang / /dga' bo dang ni sgra gcan bzang / /nga yi nyan thos gzhan rnams dang / /slob dang mi slob gnas brtan dang / /gzhan yang so so'i skye bo dag /nga ni mya ngan 'da' 'gyur gyis/ /thams cad shin
158a₄ tu myur bar sbron/ /slob dang so so'i skye bo yis/ /ma mthong sdug bsngal skye 'gyur bas/ /mya ngan 'das pa'i 'og tu ni/ /mya ngan zug rngus gzir mi bya/ /mya ngan ma byed 'du byed rnams/ /mi rtag rmi lam lta bu
158a₅ zhes/ /ji ltar chos kyi chos nyid kyis/ /de dag rnams ni dbugs dbyung bya/ /de skad ces bka' stsal pa dang / bcom ldan 'das la tshe dang ldan pa kun dga' bos slar tshigs su bcad de gsol pa/ mgon po
158a₆ sangs rgyas mya ngan las/ /'da' bar 'gyur bar thos nas bdag /phyogs slad bdag ni lus rma zhing / /bdag ni g.yar ngan shin tu che/ /lus nyams bde ba ma mchis shing / /sems nyams bde ba'ang ma mchis
158a₇ la/ /chags bral nyams bde'ang ma mchis na/ /spyan ldan bdag ni ji ltar mchi/ /bdag gi skyabs dang dpung gnyen dang / /'jig rten rnam 'dren gang lags pa/ /deng mthong slad kyis mi mthong zhes/ /gnas brtan
158a₈ rnams la ji skad bgyi/ /mya ngan gyur cing sdug bsngal bas/ /ji ltar mya ngan brjod par bgyi/ /bdag cag rnams kyi 'jig chen 'di/ /gnas brtan de dag ji ltar nyan/ /gang dag slob dang skye bo yi/ /dge slong mya ngan zug

_{iiif viewer powered by OpenSeadragon}

157b - 158b

Texts on this page