| e-texts navigator |
| བོད་ཡིག |
130a1 bdag med pa bsgom pa bsgom par bya'o/ /gang gi tshe de bzhin gshegs pa thar pa ni mtshan ma med pa dang / stong pa dang / ci yang med pa'o zhes ston na ni de'i tshe thar pa ni srid pa nyi shu rtsa lnga dang bral
130a2 ba yin no zhes ston par shes par bya ste/ de bas na stong pa zhes bya'o/ /gang gi phyir de la sdug bsngal med pas na de'i phyir sdug bsngal ci yang med pa dang / mchog tu bde ba dang / mtshan ma med pa yin no/ /gang gi phyir de la
130a3 mi rtag pa dang / mi brtan pa dang / ther zug ma yin pa dang / zhi ba'i rang bzhin ma yin pa med pas na de'i phyir thar pa ni rtag pa dang / brtan pa dang / ther zug dang / zhi ba ste de nyid de bzhin gshegs pa yin no/ /
130a4 gang gi tshe de bzhin gshegs pa sems can thams cad la de bzhin gshegs pa'i snying po yod do zhes ston na ni de'i tshe yang dag par rtag pa bsgom pa bsgom par bya'o/ /dge slong gang dag de ltar sgom pa de dag ni nga'i nyan thos yin no
130a5 zhes nga zer ro/ /rgyal po'i blon po bzhin du dgongs pa'i tshig la mkhas pa yin no zhes nga zer ro/ /de ltar rgyal po'i lugs la yang dgongs pa'i tshig yod na nga'i bstan pa la dgongs pa'i tshig ga la zhig med de/ mkhas pa mang
130a6 po dag gis de ltar rig par bya'o/ /nga'i bstan pa ni 'jig rten thams cad dang mi mthun no/ /rigs kyi bu gzhan yang dper na shing pa la sha dang / mya ngan 'tshang dang / dong ka'i shing rnams ni char pa dkon pa'i tshe me tog
130a7 kyang ngan par 'gyur/ 'bras bu yang ngan par 'gyur ro/ /chu dang thang las skyes pa'i me tog gzhan rnams kyang khrun thung ba dang / mdog ngan pa dang / gzi byin chung ba dang / dri chung bar 'gyur te/ de ltar
130a8 na ma 'ongs pa'i dus na me tog dang sman rnams gzi byin dang dri la sogs pa nyams par 'gyur ro/ /rigs kyi bu de bzhin du nga 'das pa'i 'og tu ma 'ongs pa'i dus na dus ngan pa 'byung ba'i tshe dam pa'i chos 'jig pa na
iiif viewer powered by OpenSeadragon
Texts on this page
J65 - 'phags pa yongs su mya ngan las 'das pa chen po theg pa chen po'i mdo