rKTs

e-texts navigator

Volume

Page

30b₁ yi ge'i pha rol du son cing / de'i tshe na bram ze'i spyod tshul dang / spyod pa dang / gtsang sbra dang / kun du spyod pa dang / thal ba blang ba dang / bya ma bum blang ba dang / sa blang ba dang / rab bsngags bya ba dang / 'thor 'thung bya ba dang / bzlas brjod bya ba dang / yang dag par sdom
30b₂ pa dang / nges par bya ba dang / dus mtshams su nye bar spyad par bya ba dang / nges brjod kyi rig byed dang / mchod sbyin gyi rig byed dang / snyan tshig gi rig byed dang / srid srung gi rig byed dang / bram ze'i las drug po mchod sbyin byed pa dang / mchod sbyin byed
30b₃ du 'jug pa dang / klog pa dang / klog du 'jug pa dang / sbyin pa dang / len pa la mkhas par gyur to/ /rig pa'i gnas bcwa brgyad dag la mkhas par gyur te/ 'di lta ste/ gsang sngags dang / rgyud dang / cho ga zhib mo dang / gtan tshigs kyi
30b₄ rig pa dang / rig byed dang / brda sprod pa dang / sgra nges par sbyor ba dang / shes gsal dang / nges pa'i tshig dang / bsdeb sbyor bsdus pa dang / skar ma'i rig pa dang / rtogs byed kyi rig pa dang / chur lhung gi rig pa dang / cher spyod kyi rig pa dang / 'jig
30b₅ rten rgyang phan pa'i rig pa dang / bye brag pa'i rig pa dang / brgyud drug bcu pa dang / khyur mid kyi rig pa dang / gnas 'dug gi rig pa dang / rig pa'i gnas bcwa brgyad po 'di dag thams cad la blo shin du rno bar gyur to/ /re shig na phas de la
30b₆ bram ze'i khye'u lnga brgya bram ze gtsang sbra can gyis ji snyed thos pa 'don pa byed du gtad pa dang / des de ltar bgyi'o zhes pha'i tshig mnyan nas de bzhin du byas so/ /de nas bram ze shing sA la chen po lta bu n+ya gro d+ha 'di snyam du bdag gi
30b₇ rigs rgyud ni che/ bdag nor rgya chen po dang ni ldan pa yin te/ khyim 'di lta bur rgyu med par bu dag nying mtshams sbyor ba mi len la/ bram ze rnams kyi lugs ni lo bzhi bcu rtsa brgyad du tshangs par spyod pa yongs su bsrung ba byas te/
30b₈ rgas pa'i gnas skabs na chung ma dang lhan cig rtse bar byed/ dga' bar byed/ dga' mgur spyod par byed pa yin na/ bdag gis ni thog ma nyid nas bu bag ma blang bar bya'o/ /snyam du bsams nas/ des n+ya gro d+hA skyes de la smras pa/

_{iiif viewer powered by OpenSeadragon}

30a - 31a

Texts on this page