rKTs

e-texts navigator

Volume

Page

253a₁ der 'ongs te/ byang chub sems dpa' la 'di skad ces smras so/ /'di ltar shin tu spyad pa dka' ba 'dis rnam par smin pa'i las ci zhig 'dod/ byang chub sems dpas smras pa bdud kyi rgyal po'am/ tshangs pa'am/ brgya byin nam/ rgyal chen
253a₂ bzhi'am/ 'khor los sgyur ba'i rgyal po la sogs te/ khams gsum gyi bde ba 'dod pa ma yin gyis/ bsod nams 'dis mngon par byang chub nas/ sems can thams cad mya ngan las 'das pa'i bde ba la 'god pa'i phyir ro/ /brgya byin gyis smras pa/
253a₃ 'di ltar mig phyung ba sdug bsngal bar gyur na/ 'gyod pa'am/ khro bo'i sems ma byung ngam/ rgyal pos smras pa/ 'gyod pa yang med do/ /khro bo'i bag kyang med do/ /brgya byin gyis smras pa/ bdag gis bltas na mig gnyis nas khrag gzag cing
253a₄ mdangs kyang 'gyur bzhin du/ 'gyod pa med ces byas pa ni yid ches par dka'o/ /rgyal pos smras pa/ bdag gi mig sbyin pa 'di la 'gyod pa yang med la/ bla na med pa'i byang chub thob par 'gyur zhe na bden par smra ba 'dis bdag gi mig gnyis sngon bzhin du
253a₅ mthong bar gyur cig ces smras ma thag tu mig gnyis kyang sngon bas gsal bar gyur pas/ de'i tshe na lha dang mi thams cad kyang rab tu dga' zhing mgu rangs par gyur to/ /de nas rgyal pos bram ze la bsgo ba/ ngas mig sbyin pas khyod kyang mthong bar 'gyur gyis/ nam
253a₆ sangs rgyas na yang khyod la chos kyi mig sbyin par bya'o/ /rin po che 'di dag kyang khyer la phyir song shig ces bsgo'o/ /bram ze mig dang rin po che thob nas phyir yul du phyin pa dang / rgyal po de nyid kyis kyang bsus nas phrad ma thag tu mig thob bam zhes dris
253a₇ so/ /bram zes smras pa/ mig kyang thob nas bdag kyang 'di ltar mthong bar gyur to/ /rgyal pos smras pa/ 'o na tshe 'phos sam ma 'phos smras pa/ da ltar lha rnams der lhags nas/ smon lam btab pas mig gnyis sngon bas gsal bar gyur to/ /

_{iiif viewer powered by OpenSeadragon}

252b - 253b

Texts on this page