rKTs

e-texts navigator

Volume

Page

231b₁ bar 'tshang rgya'o/ /nam mngon par sangs rgyas pa na bdag kyang nye gnas mchog tu gyur te/ bsnyen bkur byed par shog shig ces smon lam btab bo/ /byang chub sems dpas kyang de bzhin du gyur cig ces smras so/ /nor bu rin po che 'di la mthu stobs ci tsam zhig yod ces
231b₂ dris so/ /klu'i rgyal pos smras pa/ nor bu rin po che 'di dpag tshad brgyad stong kho ra khor yug tu rin po che char bzhin du 'bebs te/ ci 'dod pa thams cad 'bebs so zhes smras pa dang / byang chub sems dpa' gdod dga' nas/ 'di snyam du 'dzam bu'i gling gi khyon ni
231b₃ dpag tshad bdun stong las med de/ nor bu rin po che 'dis ni bdag gi re ba skong ngo snyam bsams nas/ snga phyir rnyed pa'i nor bu rin po che gsum char gos kyi mthar phyung ste mkhar gyi sgor phyin pa dang / klu'i rgyal po 'khor dang bcas pas bskyal nas so sor dong ngo / /byang chub
231b₄ sems dpa' pha zad zhig tu phyin nas/ nor bu rin po che rnams lag par thogs te/ 'di skad ces smon lam btab bo/ /nor bu 'di yid bzhin gyi nor bu rin po che yin yang dag na/ bdag nam mkha' la 'phur bar gyur cig ces smras so/ /de skad ces smras ma thag tu
231b₅ nam mkha' la 'phur te/ rgya mtsho'i bgegs las thar nas/ rgya mtsho'i ngogs su phyin par gyur te/ de na cung zad bsti zhing ngal bsos pa'i lam du gnyid log pa dang de'i tshe na rgya mtsho'i klu phran rnams 'di skad ces bgros so/ /rgya mtsho 'di na nor bu rin po che 'di gsum las
231b₆ med de gsum char mi 'dis khyer te nor bu 'di ni yon tan dang ldan na/ bdag cag la yang dgos kyi phyir brku'o zhes bgros nas/ byang chub sems dpa' gnyid kyis log pa'i tshe yid bzhin gyi nor bu rin po che klu rnams kyis phyir brkus so/ /byang chub sems dpa' sad nas bltas na
231b₇ nor bu rin po che med pas 'di snyam du bsams so/ /'di ni gdon mi za bar rgya mtsho'i klus brkus kyis bdag gis mthu ci yod pas rgya mtsho'i chu bcus te bskam par bya'o snyam ste/ nor bu phyir ma thob kyi bar du lag pa stong par phyir mi 'gro snyam yi dam bcas so/ /rgya mtsho'i ngogs

_{iiif viewer powered by OpenSeadragon}

231a - 232a

Texts on this page