| e-texts navigator |
| བོད་ཡིག |
135b1 de'i ma ni yum lha mdzes lags so/ /de'i tshe de'i dus na rgyal bu rgyal tshab de ni bcom ldan 'das lags so/ /bcom ldan 'das de'i tshe de'i dus na yang / 'gro ba mang po bskyab pa'i slad du chos btsal na/ da yongs su rdzogs par gyur pa na/ ci'i slad du shin tu gdung bar
135b2 gyur pa'i sems can mang po la chos kyi char mi 'bebs par mya ngan las 'das par dgongs/ bcom ldan 'das gzhan yang bskal pa grangs med tshad med pa 'das pa'i pha rol na/ de'i tshe de'i dus na yul bA rA Na sI 'dir drang srong lnga brgya zhig gnas te/ drang srong de dag gis ston pa
135b3 ud pa la zhes bya ba de dam pa'i chos slob cing bsgom pa la dga' bas kun tu rgyu zhing / su la dam pa'i chos yod pa de bdag la smra na/ ci dang ci 'dod pa yid bzhin du sbyin zhing de'i g.yog bya'o zhes bya bar bsgrags pa dang / bram ze zhig der 'ongs nas de la 'di skad ces smras
135b4 so/ /bdag la dam pa'i chos yod de/ thos par 'dod na bstan par bya'o zhes smras pa dang / drang srong des thos nas thal mo sbyar te/ 'di skad ces gsol to/ /bdag la thugs brtse ba'i slad du dam pa'i chos bstan du gsol/ zhes smras pa dang / bram ze des smras pa/
135b5 chos lobs pa yang shin tu dka' ste/ sdug bsngal mang po myong bas chos lobs pa yin gyis/ 'di tsam gyis chos thos par 'dod par rigs pa ma yin no/ /khyod snying nas thos par 'dod na/ kho bos bsgo ba bzhin du byos shig /drang srong gis smras pa/ ston pa
135b6 chen po'i bka' bzhin du mi 'gal bar bgyi'o/ /zhes smras pa dang / de la 'di skad ces bsgo'o/ /gal te khyod kyi pags pa bshus te shog shog tu byas la/ rus pa ni smyu gur byas/ khrag ni snag tsar byas te/ ngas bstan pa'i chos yi ger bris na/ khyod la chos
135b7 bstan to/ /zhes smras so/ /de nas drang srong des de skad ces smras pa thos nas/ rab tu dga' mgu rangs te/ de bzhin gshegs pa'i bstan pa la bkur stir bya ba'i phyir/ pags pa bshus nas shog shog tu byas/ rus pa ni smyu gur byas/ khrag la snag tsar byas nas/
iiif viewer powered by OpenSeadragon
Texts on this page
D341 - mdzangs blun zhes bya ba'i mdo