rKTs

e-texts navigator

Volume

Page

97a₁ bzhin gshegs dang mu stegs khyad par med/ /gang dag mchog tu rlom sems med pa de dag bde/ /gang la grangs dang bgrang ba'ang yod ma yin/ /nam mkha'i dbyings ltar mnyam nyid mi gtong la/ /bdag dang sems can tha dad mi sems pa/ /gang
97a₂ dag khyad par thob med de dag bde/ /gang dag sgyu mar gyur cing rmi lam spyod/ /rab tu ma rmongs mig yor lta bur gyur/ /'jig rten dag na chu zla bzhin du spyod/ /gang dag kun tu mi brtson de dag bde/ /sems can gang dag mkhas la don dam lta/ /brda dang tha snyad snying po med par
97a₃ shes/ /rab tu zhi ba'i chos rnams rjes su rtogs/ /gang dag mtshan ma'i spyod yul ma yin de dag bde'o/ /de nas bcom ldan 'das kyis tshe dang ldan pa sha ra dwa ti'i bu la legs so zhes bya ba byin te/ sha ra dwa ti'i bu 'di ltar shes rab zab pa la spyod pa'i chos la mchog tu gyur pa/
97a₄ de legs so legs so/ /shA ri'i bu de bas na bya rgod kyi phung po'i ri 'di la dge slong dang / byang chub sems dpa' ji snyed nang du yang dag 'jog la zhugs pa de dag thams cad khyod kyis sdus shig /shA ri'i bus gsol pa/ bcom ldan 'das bdag ni mi spro'o/ /de ci'i slad
97a₅ du zhe na/ glang po chen po dag ni mgu bar dka' ba'i slad du'o/ /de nas bcom ldan 'das kyis de'i tshe nyid kyi sku las 'od zer phyung nas des 'jig rten gyi khams mtha' yas mu med pa na gnas pa'i byang chub sems dpa' rnams la bskul ba dang / bya rgod kyi phung po'i ri gang na ba dang /
97a₆ bcom ldan 'das gang na ba der lhags nas bar snang gi nam mkha' la gnas par gyur to/ /dge slong dang byang chub sems dpa' sems dpa' chen po gang dag nang du yang dag 'jog la zhugs pa de dag thams cad kyang bcom ldan 'das gang na ba der lhags par gyur to/ /rgyal po'i khab
97a₇ kyi grong khyer chen po nas kyang srog chags brgya stong du ma bcom ldan 'das ga la ba der lhags par gyur to/ /de nas bcom ldan 'das kyis thams cad yod pa'i 'khor 'dus par mkhyen nas 'jam dpal gzhon nur gyur pa'i bzhin la gzigs so/ /gzigs nas kyang 'dzum pa mdzad

_{iiif viewer powered by OpenSeadragon}

96b - 97b

Texts on this page