rKTs

e-texts navigator

Volume

Page

96b₁ 'di ni ngo mtshar te/ bcom ldan 'das bdag cag gis steng gi phyogs na sangs rgyas stong phrag brgyad cu rtsa bzhi mthong ste/ de bzhin gshegs pa de dag thams cad bdag cag la bla na med pa yang dag par rdzogs pa'i byang chub tu lung ston to/ /de nas 'jam dpal gzhon nur gyur
96b₂ pas bcom ldan 'das la 'di skad ces gsol to/ /bcom ldan 'das gang slad ma'i dus lnga brgya tha ma la 'dzam bu gling 'dir chos kyi rnam grangs 'di rab tu spyod pa dang / yun ring du gnas par 'gyur ba dang / rigs kyi bu dang rigs kyi bu mo gang dag go cha chen po bgos pa
96b₃ dag gi rna lam du gda' bar 'gyur ba dang / rigs kyi bu dang rigs kyi bu mo de dag bdud kyi las skyes shing byung ba rnams kyi dbang du mi mchi ba dang / de dag la bdud dam bdud kyi ris kyi lha dag gis glags rnyed par mi 'gyur ba dang / chos kyi rnam grangs 'dis yongs su bzung zhing
96b₄ go cha chen po bgos te/ bla na med pa yang dag par rdzogs pa'i byang chub yongs su mi nyams par byin gyis brlabs par gsol/ bcom ldan 'das kyis bka' stsal pa/ 'jam dpal de bas na chos kyi rnam grangs 'di byin gyis brlab pa dang / yun ring du gnas par bya ba'i phyir/
96b₅ lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / grul bum 'bebs pa zhes bya ba'i rig pa dang sngags kyi tshig 'di bshad kyis nyon cig /rig pa dang sngags kyi tshig de bcangs pas rigs kyi bu 'am rigs kyi
96b₆ bu mo chos smra ba de lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / grul bum rnams kyis yongs su srung ba rab tu thob ste/ rigs kyi bu 'am rigs kyi bu mo de dag lam mam/ lam log par song ngam/ gtsug
96b₇ lag khang du song ngam/ gnas khang du song ngam/ 'chag pa la zhugs sam/ 'khor gyi nang du song yang rung ste srung bar byed do/ /spobs pa skyed par byed/ dran pa dang / blo gros dang / rtog pa'i stobs bskyed pa nye bar sbyor te/ de la pha rol gyi rgol ba'am/ phas kyi dgra glags tshol

_{iiif viewer powered by OpenSeadragon}

96a - 97a

Texts on this page