rKTs

e-texts navigator

Volume

Page

81a₁ mdo sde 'di bzung ba/ /de dag rdzogs pa'i byang chub ste/ /bskal pa mtha' yas 'khor ba las/ /bdag nyid chen po de dag spong / /gang gis tshul 'di bzung ba dag /de dag dpa' bo nus pa ste/ /bdud kyi sde rnams rab tu 'joms/ /brtson 'grus che zhing shes rab
81a₂ che/ /mdo sde 'di la gang dga' ba/ /nga ni bzung la gnas pa'i tshe/ /mar me mdzad kyis lung bstan ltar/ /de tshe de dag lung bstan to/ /mdo sde 'di ni gang smra ba/ /de ni sangs rgyas skyob pa yi/ /'jig rten sgrol ba ma byung tshe/ /sangs rgyas mdzad pa byed par 'gyur/ /yang tshigs su
81a₃ bcad pa mngon par bsgrub pa 'di bshad pa na lha'i bu lnga stong byang chub tu sems skyes so/ /byang chub sems dpa' nyis stong mi skye ba'i chos la bzod pa skyes so/ /dge slong stong lhag tsam len pa med par zag pa las sems rnam par grol lo/ /srog chags sum khri nyis stong chos rnams
81a₄ la chos kyi mig rdul med cing dri ma dang bral ba rnam par dag go/ /de nas bcom ldan 'das la 'jam dpal gzhon nur gyur pas 'di skad ces gsol to/ /ji ltar bcom ldan 'das kyis bshad pa'i don bdag gis 'tshal ba ltar na gang byang chub kyi phyir smon pa ni log par lta ba la smon pa lags
81a₅ so/ /de ci'i slad du zhe na/ bcom ldan 'das dmigs pa ni log pa lags te/ de lta bas na byang chub la dmigs par bgyid cing / dmigs pa la smon pa de dag gis 'bad pa ni log pa lags so/ /de ci'i slad du zhe na/ bcom ldan 'das byang chub ni 'dod pa'i khams la mi gnas/
81a₆ gzugs kyi khams la mi gnas/ gzugs ma mchis pa'i khams la mi gnas te/ bcom ldan 'das byang chub ni mi gnas pa lags pas de la smon pa bgyid pa ma mchis so/ /bcom ldan 'das 'di lta ste dper na/ skyes bu la la zhig bdag gis nam mkha' thob par bgyi'o/ /
81a₇ zhes nam mkha' la smon na des nam mkha' thob par 'gyur ram/ bka' stsal pa/ 'jam dpal de ma yin no/ /'jam dpal gyis gsol pa/ /bcom ldan 'das de bzhin du gang byang chub nam mkha' dang mtshungs pa la smon pa de dag ni nam mkha' la smon pa lags so/ /bcom ldan 'das

_{iiif viewer powered by OpenSeadragon}

80b - 81b

Texts on this page