rKTs

e-texts navigator

Volume

Page

99a₁ byang chub mnyam pa nyid pas chos thams cad mnyam pa nyid du khong du chud pa 'di ni de'i sgrub pa yang dag pa lags so/ /byang chub sems dpa' dus dpog rgyal pos gsol pa/ bcom ldan 'das chos thams cad dbyer ma mchis pa ni sgrub pa
99a₂ lags te/ bcom ldan 'das byang chub sems dpa' gang chos thams cad chos kyi dbyings su yang dag par 'du bar 'tshal nas chos gang yang 'byed par yang mi bgyid/ sbyor bar yang mi bgyid pa 'di ni de'i sgrub pa yang dag pa lags so/ /byang chub sems
99a₃ dpa' don legs sems kyis gsol pa/ bcom ldan 'das don la rton pa lags kyi tshig 'bru la ma lags te/ bcom ldan 'das byang chub sems dpa' gang don gyi rjes su zhugs pa'i blos chos kyi phung po brgyad khri bzhi stong kun tu 'dzin pa dang ston par
99a₄ bgyid kyang yang dag pa'i don brjod du ma mchis pa de las kyang mi g.yo ba 'di ni de'i sgrub pa yang dag pa lags so/ /byang chub sems dpa' blo gros rnam par dag pas gsol pa/ bcom ldan 'das lhag pa'i bsam pa ni sgrub pa lags te/ bcom ldan
99a₅ 'das byang chub sems dpa' gang lhag pa'i bsam pa la zhugs pa de ni skad dang tshig dang brjod pa lhur len pa ma lags kyi de ni yang dag pa'i sgrub pa tshol ba lags te/ ji ltar 'gro ba dang 'ong ba yang dag par rjes su mi mthong ba de ltar tshol ba 'di ni de'i sgrub pa yang
99a₆ dag pa lags so/ /byang chub sems dpa' shin tu dri med sems pas gsol pa/ bcom ldan 'das 'di lta ste dper na/ gos dri ma can bkru bar bgyi'i dri ma ma mchis pa ni ma lags so/ /bcom ldan 'das de bzhin du sems yongs su ma dag pa ni yang
99a₇ dag pa ji lta ba bzhin du so sor rtog pas yongs su sbyang bar bgyi'o/ /bcom ldan 'das byang chub sems dpa' gang gi sems dang yid la nyon mongs pa dang / nye ba'i nyon mongs pa thams cad mi 'jug pa de dag pa'o/ /dag pa gang lags pa de sgrub pa yang dag pa la

_{iiif viewer powered by OpenSeadragon}

98b - 99b

Texts on this page