rKTs

e-texts navigator

Volume

Page

93a₁ skye ba'i chos la bzod pa thob pa 'thob pa dang / yon tan thams cad yang dag par 'dzin pa'i spyod pas myur du thams cad mkhyen pa thob pa 'thob pa ste/ rgyal po chen po rab tu byung bar gtogs pa'i byang chub sems dpa' la 'thob pa chen po nyi shu po 'di dag rnyed
93a₂ par dka' bar mi 'gyur ro/ /rgyal po chen po de lta bas na/ khyod legs par gsungs pa'i chos 'dul ba la rab tu byung shig /blo gros rgya mtsho de nas bcom ldan 'das des rgyal po yul shin tu rnam par dag pa rab tu 'byung ba yang dag par 'dzin du bcug pas rgyal srid thams
93a₃ cad spangs/ rgyal srid kyi dpal yang spangs te khyim na gnas pas yid byung bas skra dang kha spu bregs te gos ngur smrig bgos nas/ bcom ldan 'das de'i bstan pa la dad pas khyim nas khyim med par rab tu byung ngo / /de rab tu byung bar rig nas rgyal po'i btsun mo'i 'khor
93a₄ kyang rab tu byung ngo / /de dag rab tu byung bar rig nas rgyal bu gzhon nu rnams kyang rab tu byung ngo / /de dag rab tu byung bar rig nas rgyal po'i bu mo gzhon nu ma rnams kyang rab tu byung ngo / /de dag rab tu byung bar rig nas rgyal po'i yul na gnas pa'i srog chags bye ba khrag khrig
93a₅ brgya stong phrag dgu bcu rtsa dgu yang rab tu byung ngo / /de ltar de dag rab tu byung nas dge ba'i rtsa ba'i chos tshol ba la yongs su brtson pa'i brtson 'grus brtsams te gnas so/ /blo gros rgya mtsho sems can bsod nams byas pa thams cad kyi gnas su gyur pas ji tsam du bcom ldan 'das
93a₆ de'i gsung rab mdzes par gyur pa la ltos/ blo gros rgya mtsho de nas rgyal po chen po yul shin tu rnam par dag pa de ltar rab tu byung nas bcom ldan 'das de bzhin gshegs pa 'od zer snang ba mtha' yas de ga la ba der song ste phyin nas bcom ldan 'das de la 'di skad ces gsol to/ /
93a₇ bcom ldan 'das bdag gang la sgrub pa snying por bgyid par gnas shing don mchis par yul 'khor gyi bsod snyoms yongs su 'tshal bar 'gyur ba'i gdams ngag dang rjes su bstan pa bdag la stsal du gsol/ de skad ces gsol pa dang / bcom ldan 'das

_{iiif viewer powered by OpenSeadragon}

92b - 93b

Texts on this page