rKTs

e-texts navigator

Volume

Page

49b₁ dag ni byang chub sems dpa' rnams kyi stobs te stobs de dag dang ldan na/ byang chub sems dpa' rnams sangs rgyas kyi chos zab mo dag la skrag par mi 'gyur ro/ /de nas bcom ldan 'das kyis byang chub sems dpa' blo gros rgya mtsho la legs so zhes bya ba byin te/ blo gros
49b₂ rgya mtsho khyod kyis byang chub sems dpa' rnams kyi/ stobs de dag legs par bshad pa ni legs so legs so/ /stobs 'di lta bu dang ldan pa'i byang chub sems dpa' ni gang thos nas skrag par 'gyur ba'i/ sangs rgyas kyi chos de dag gang yang med do/ /blo gros rgya
49b₃ mtshos bstan pa'i sgra de dag thams cad ni 'jigs pa'o/ /byang chub kyi don dam pa gang yin pa de yang brjod par mi nus so/ /de ci'i phyir zhe na/ brjod du med pa de ni bsnyad du med pa ste/ de la ni yi ge rnams kun tu mi rgyu'o/ /de la ni sems dang sems las byung ba'i chos rnams
49b₄ kyang kun tu mi rgyu na yi ge rnams kun tu rgyu bar 'gyur ba lta smos kyang ci dgos/ 'di ltar chos zab mo yi ge med pa/ bsnyad du med pa/ brjod du med pa/ smrar med pa 'di lta bu mngon par rdzogs par sangs rgyas kyang / yi ge'i rnam par rig pas sems can gzhan dag dang gang
49b₅ zag gzhan rnams la ston te/ sems can bsam gyis mi khyab pa dag la sangs rgyas bcom ldan 'das rnams kyi thugs rje chen po ji snyed 'jug pa la ltos/ blo gros rgya mtsho 'di lta ste dper na/ skyes bu gang la la zhig gis nam mkha' gzugs med pa/ bstan du med pa/
49b₆ thogs pa med pa/ rnam par rig pa med pa 'di la tshon sna tshogs kyis ri mo bris te rta pa dang glang po che dang shing rta dang dpung bu chung dang / bzhon pa rnams su 'dir nye bar ston tam/ lha dang klu dang gnod sbyin dang dri za'i gzugs rnams 'dir nye bar ston na/ blo gros rgya mtsho 'di la ji snyam
49b₇ du sems/ skyes bu de dka' ba byed pa ma yin nam/ gsol pa bcom ldan 'das dka' ba bgyid pa'o/ /bde bar gshegs pa mchog tu dka' ba bgyid pa'o/ /bcom ldan 'das kyis bka' stsal pa/ blo gros rgya mtsho sangs rgyas bcom ldan 'das gang dag brjod du med pa'i

_{iiif viewer powered by OpenSeadragon}

49a - 50a

Texts on this page