rKTs

e-texts navigator

Volume

Page

213a₁ de bzhin gshegs pa dgra bcom pa yang dag par rdzogs pa'i sangs rgyas kyis ji lta bu'i sems kyi mtshan ma bstan pas/ skyes bu dam pa de gnyis 'jig rten gyi khams mi mjed 'dir mchi bar 'gyur ba dang / bde ba can gyi 'jig rten gyi khams de dang de bzhin
213a₂ gshegs pa dgra bcom pa yang dag par rdzogs pa'i sangs rgyas 'od dpag med de yang 'jig rten gyi khams 'di na gda' bar 'gyur ba de lta bu'i rdzu 'phrul mngon par 'du mdzad pa legs par mdzad du gsol/ de ci'i slad du zhe na/ bcom ldan 'das skyes bu dam pa de gnyis
213a₃ sangs rgyas kyi zhing 'dir mchis na/ byang chub sems dpa'i theg pa pa'i rigs kyi bu dang / rigs kyi bu mo rnams kyang dge ba'i rtsa ba yongs su rdzogs par 'gyur/ skyes bu dam pa de gnyis las chos 'dri ba'i lan thos pas/ sgyu ma lta bu'i ting nge 'dzin kyang thob par
213a₄ 'gyur/ sangs rgyas kyi zhing 'di nas 'jig rten gyi khams bde ba can de dang de bzhin gshegs pa dgra bcom pa yang dag par rdzogs pa'i sangs rgyas 'od dpag med de yang mthong ste/ mthong nas kyang rigs kyi bu'am rigs kyi bu mo dag bla na med pa yang dag par rdzogs pa'i
213a₅ byang chub tu sems bskyed nas/ sangs rgyas kyi zhing der skye bar smon lam 'debs pa dang / der skyes ma thag tu bla na med pa yang dag par rdzogs pa'i byang chub las phyir mi ldog par 'gyur ba'i slad du'o/ /de nas bcom ldan 'das kyis byang chub sems dpa' sems dpa' chen
213a₆ po pad ma'i dpal gyi snying pos gsol ba btab par mkhyen nas/ mdzod spu nas 'od rab tu bkye ste/ 'od des stong gsum gyi stong chen po'i 'jig rten gyi khams 'di gser gyi kha dog gi snang ba chen pos khyab par gyur to/ /stong gsum gyi stong chen po'i 'jig rten gyi khams
213a₇ 'di na/ ri'i tshogs dang shing ljon pa dang ri'i rgyal po ri rab dang / ri btang bzung dang btang bzung chen po dang khor yug dang khor yug chen po gang dag yod pa dang / gang dag 'jig rten gyi bar gyi mun pa mun nag de dag thams cad kyang gser gyi kha dog gi snang ba des khyab

_{iiif viewer powered by OpenSeadragon}

212b - 213b

Texts on this page