rKTs

e-texts navigator

Volume

Page

108b₁ chos dang / dge 'dun lta bur gyur cig /bdag dmus long dang 'dra ba'i dge 'dun rnams kyi mig lta bur gyur cig /bdag la nyan thos dang rang sangs rgyas sbrang bu dang 'dra ba thams cad skyabs su 'ong bar shog shig ces gyis shig /rigs kyi bu de ltar na byang chub sems dpa' sems
108b₂ dpa' chen po rnams ni byis pa rnams la sdig pa'i phung po zad mi shes pa lta bu yang yin no/ /mkhas pa rnams ni de dag nyid sangs rgyas lta bu yang yin no/ /dper na dpa' bo yang dag pa ni g.yul du 'thab pa na 'di snyam du sems te/ bdag gis dpa' bo thams cad pham
108b₃ par byas nas thams cad bdag la skyabs su 'ong bar bya'o snyam du sems pa dang / dper na rgyal po'i bu ni rgyal po brje ba'i skabs su rgyal po'i bu thams cad las 'das par byas te bdag gis rgyal po bya'o/ /bdag rgyal po'i bu thams cad kyi mnga' bdag tu 'gyur bar bya'o/ /
108b₄ bdag la de dag skyabs su 'ong bar bya'o/ /bdag gis dman pa'i sems bskyed par mi bya'o snyam du sems pa lta bu ste/ dpa' bo rnams dang / rgyal po dang / blon po yang rung ste/ shin tu mchog tu gyur pas khyad par du 'phags pa de lta bu'i rang bzhin can rnams ni rang gi
108b₅ yon tan dang 'tsham pa'i bya ba sgrub par byed do/ /rigs kyi bu de bzhin du byang chub sems dpa' sems dpa' chen po ni gzhi gsum las 'da' bar 'gyur ba'i sems dang ldan pa yin no/ /de bas na rgyal po'i bu dang dpa' bo bzhin du mi 'jigs par snying stobs skyed cig dang ngas
108b₆ gzhi gsum tha dad pa med pa dang / gsum gyi nang na de bzhin gshegs pa dam pa yin par ngas bstan to/ /lus thams cad kyi nang na mgo bo gtso bo yin pa de bzhin du sangs rgyas nyid gtso bo yin la/ ji ltar lus las mgo bo gud na 'dug pa yang ma yin/ lag pa gud na 'dug
108b₇ pa'ang ma yin/ rkang pa gud na 'dug pa'ang ma yin pa de bzhin du sangs rgyas gud na 'dug pa'ang ma yin/ chos gud na 'dug pa'ang ma yin/ dge 'dun gud na 'dug pa'ang ma yin no/ /'on kyang tha dad du dbye ba ni byis pa rnams nges par bsgral ba'i phyir them skas dang 'dra bar bstan

_{iiif viewer powered by OpenSeadragon}

108a - 109a

Texts on this page