| e-texts navigator |
| བོད་ཡིག |
133b1 cad yongs su bzung bas dam pa'i chos yongs su bzung ba yin no/ /blo gros chen po dam pa'i chos yongs su bzung bas sangs rgyas kyi rigs mi 'chad par byas pa yin no/ /sangs rgyas kyi rigs mi 'chad pa'i phyir skye gnas kyi bye brag rab tu 'thob par shes so/ /de bas na skye gnas
133b2 dam pa 'thob pa de dag tu byang chub sems dpa' sems dpa' chen po rnams skye ba yongs su 'dzin cing theg pa chen po rab tu bzung ba'i phyir dbang bcus gzugs dang / cha byad sna tshogs 'dzin par gyur te/ sems can gyi cha byad dang / bag la nyal gyi mtshan nyid rtogs par khong du
133b3 chud pas de bzhin nyid du chos ston to/ /de la de bzhin nyid dang / gzhan ma yin pa nyid dang / de kho na nyid dang / blang ba med pa dang / dor ba med pa'i mtshan nyid dang / spros pa thams cad nye bar zhi ba ni de kho na nyid ces bya'o/ /blo gros chen po de kho na nyid la yi ge med pa'i phyir
133b4 rigs kyi bu'am/ rigs kyi bu mos sgra ji bzhin gyi don du chags pa la mkhas par mi bya ste/ sor mo lta ba lta bur mi bya'o/ /'di lta ste/ blo gros chen po la las kha cig la sor mo'i rtse mos ci zhig bstan na/ de sor mo'i rtse mo nyid la lta zhing 'brang ba de bzhin du/ blo gros chen po
133b5 byis pa so so'i skye bo'i sde rnams byis pa'i rang bzhin can lta bur sgra ji bzhin gyi sor mo'i rtse mo la mngon par chags shing zhen to/ /de ltar sgra'i sor mo'i rtse mo la mngon par chags bzhin du 'chi ba'i dus byed par 'gyur te/ sgra ji bzhin gyi sor mo'i rtse mo'i don spangs la/ don dam pa
133b6 khong du chud par bya ba ni mi byed do/ /'di lta ste/ blo gros chen po byis pa rnams kyi zas dang / skom ni g.yos ma byas par su yang za ba med de/ la la g.yos su ma byas par za na yang kha zas mthar gyis g.yos su bya ba mi shes pas de smyon par brtag par 'gyur ro/ /de bzhin du blo
133b7 gros chen po skye ba med pa dang / 'gog pa med pa yang mngon par 'dus ma byas na mdzes par mi 'gyur gyi/ 'di la gdon mi za bar mngon par 'du bya bar 'gyur te/ sor mo'i rtse mo'i don mthong ba bzhin du tshig tsam ni ma yin no/ /des na de'i phyir blo gros chen po don la brtson par bya'o/
iiif viewer powered by OpenSeadragon
Texts on this page
D107 - 'phags pa lang kar gshegs pa'i theg pa chen po'i mdo