| Wylie | e-texts produced with ocr Programm |
། ཀུན་མཁྱེན་ཡེ་ཤེས་རྣམ་བསྒོམ་པ།། འགྲོ་སྙིང་རྣམ་དག་ཅེས་བྱ་ལ།། ཐུབ་པ་ཆེན་པོ་བཞུགས་པ་ཡིན།། མ་རིག་པ་དང་འདུ་བྱེད་དང་།། རྣམ་པར་ཤེས་དང་མིང་དང་གཟུགས། ། སྐྱེ་མཆེད་དྲུག་དང་རེག་པ་དང་།། ཚོར་བ་དང་ནི་སྲེད་པ་དང་།། ཉེར་ལེན་སྲིད་པ་སྐྱེ་བ་དང་།། རྒ་ཤི་ཞེས་བྱ་རིག་མ་ཡིན།། ང་རྒྱལ་ཆེ་བའི་ང་རྒྱལ་དང་།། ངའོ་སྙམ་ང་རྒྱལ་མངོན་པ་རྒྱལ།། གཞན་ཡང་ང་རྒྱལ་ལས་ང་རྒྱལ།། ཅུང་ཟད་ང་རྒྱལ་ལོག་པར་བཅས།། འདི་དག་རྡོ་རྗེ་མཐའ་ཅན་མཆོག། བྱང་ཆུབ་སེམས་དཔའ་དེ་བཞིན་གཤེགས།། དེ་རྣམས་བརྗོད་མི་ལང་བའི་གྲངས།། བརྗོད་ཀྱིས་མི་ལང་ཉིད་དུ་གྱུར། ། སངས་རྒྱས་ཞིང་ནི་གྲངས་མེད་པའི།། རི་རབ་རྡུལ་ཕྲན་གྲངས་མཉམ་པ།། བྱང་ཆུབ་སེམས་དཔའ་སེམས་དཔའ་ཆེ།། ཏིལ་གྱི་གང་བུ་མཚུངས་པ་དང་།། དེ་བཞིན་གཤེགས་པ་རྣམས་ཀྱིས་ཀྱང་། ། ནམ་མཁའི་ཁམས་ཀུན་གང་བར་སྣང་།། དེ་ནས་དཔལ་ལྡན་རྣམ་སྣང་མཛད།། སྐུ་གསུང་ཐུགས་ཀྱི་རྡོ་རྗེ་ཅན།། འཁོར་གྱི་དཀྱིལ་འཁོར་ལ་གཟིགས་ནས།། དེ་ཉིད་གསུམ་སྐྱེས་སྐུར་མཛད་དོ། ། ཚངས་པ་ཁྱབ་འཇུག་ལྷ་ཆེན་དང་།། འདོད་དང་རིག་བྱེད་དེ་བཞིན་ཟུང་།། ཚངས་ལྷ་དེ་བཞིན་ཟླ་བ་སྟེ།། ཕུང་པོ་ལ་སོགས་གྲངས་དང་མཉམ།། སྒྲ་སྒྲོགས་དེ་བཞིན་དགའ་བྱེད་དང་།། སྐྱ་བསིང་སྐེམ་བྱེད་ཐུབ་པ་དང་། ། སྣ་ཡོན་དང་ནི་དཀོན་མཆོག་གསུམ།། དེ་བཞིན་གཤེགས་ཀུན་གཅིག་པུ་ཉིད།། དེ་ཚེ་ཕྱུང་ལ་གསོལ་བ་ཡི།། གསང་སྔགས་གསུངས་པ་དང་པོ་ཉིད།། ཐུབ་ཆེན་བྱང་ཆུབ་སེམས་ཚུལ་དུ། ། མཛད་པ་གཉིས་པ་ཡིན་པར་བཤད།། རྣམ་ལྔ་མངོན་པར་བྱང་ཆུབ་པའི།། ཕྲ་མོ་རྣལ་འབྱོར་གསུམ་པ་ཡིན།། དབང་བསྐུར་བ་ནི་རྣམ་པ་བཞི།། གཟུགས་ཀྱི་དཀྱིལ་འཁོར་ཉིད་བཞི་པ། སྲུང་བའི་བསླབ་བཞི་རྣམ་བཞི་དང་།། སྤྱོད་པའང་འདིར་ནི་ལྔ་པ་སྟེ།། དྲུག་པ་རང་སངས་རྒྱས་ཉིད་ཀྱི།། ཏིང་འཛིན་ཕྲ་མོའི་རྣལ་འབྱོར་རོ།། བདུན་པ་དེ་ཉིད་མཆོད་པར་བཤད།། གསང་བའི་དབང་དུ་གཙོ་བོས་མཛད། ། ཕྱག་རྒྱས་དབང་བསྐུར་བརྒྱད་པ་བསྟན།། དམ་ཚིག་བཞི་པོ་དགུ་པ་ཡིན།། རྣམ་པ་བཅུར་ཕྱེ་ཡང་དག་རྟོག། བཟླས་པའི་སྔགས་ཀྱང་གསུངས་པ་ཡིན།། བཅུ་གཅིག་མིང་དུ་བྱུང་བ་ནི། ། ཕྱག་རྒྱ་གཅིག་པར་བཤད་དཀྱིལ་འཁོར།། བཅུ་གཉིས་པ་ཡི་བདག་ཉིད་སྐུ།། ཉན་ཐོས་བྱང་ཆུབ་སྟོན་པར་མཛད།། དེ་བཞིན་རིག་པ་སྤྱོད་གྲུབ་པ།། མངོན་ཤེས་ལྔ་ནི་བཅུ་གསུམ་པ།། བཅུ་དང་བཞི་པར་བཞི་པོ་དང་། ། འཕྲེང་སྔགས་བླ་མ་སྟོན་པར་མཛད།། ཕྱོགས་དང་སྐྱ་བསེང་ཉིད་གྱུར་པ།། དངོས་གྲུབ་དཀྱིལ་འཁོར་བུ་མེད་པའོ།། སྒྲ་སྒྲོགས་དུས་དང་ཡང་དག་ལྡན།། དཀྱིལ་འཁོར་རྡུལ་ཚོམ་ལྡན་པའོ། ། སློབ་མ་དབང་བསྐུར་ཉི་ཟླ་དག། ཆགས་བྲལ་སྣ་ཚོགས་ཉིད་གྱུར་པ།། སྣ་ཚོགས་ཚིག་གི་དོན་གྱི་བརྡ།། སྣ་ཚོགས་མིང་ཅན་མིང་གཅིག་པུ།། དེ་ལྟར་རྣམ་པ་སྣ་ཚོགས་པའི།། སོ་སོར་སྡུད་པ་རབ་ཏུ་བསྟན། ། གཅིག་དང་དུ་མ་ལས་གྲོལ་བ།། ཡང་དག་མཐོང་ནས་ཡོངས་སུ་བསྒོམ།། ཡོངས་སུ་བསྒོམས་པར་གྱུར་པའི་བདག། རྟེན་འབྲེལ་དུ་ཡང་བསྟན་པར་བྱ།། དེ་ནས་མ་སྐྱེས་སྦྱོར་བ་ལ། ཐུབ་པ་རྣམ་པ་སྣང་མཛད་ཆེ། ། རྟེན་འབྲེལ་ཡན་ལག་བཅུ་གཉིས་པའི།། ཏིང་འཛིན་དེ་འོག་སྟོན་པར་མཛད།། འདོད་པའི་ཡན་ལག་འགྲོ་བའི་ཚོགས།། གཉིས་པ་ཐམས་ཅད་དེ་བཞིན་གཤེགས། ། འདོད་ཆགས་ཆེ་ཚུལ་ཞེས་བྱ་བའི།། ཏིང་ངེ་འཛིན་ལ་སྙོམས་པར་ཞུགས།། དེ་བཞིན་གཤེགས་ཀུན་གཙོ་བོ་ཡི།། རང་གི་སྐུ་ལ་ཞུགས་པར་མཛད།། བྱང་ཆུབ་སེམས་དཔའ་སེམས་དཔའ་ཆེ། ། རྒྱུན་དེ་ལ་ནི་སྦྱོར་བར་གྱུར།། དེ་ནས་དེ་བཞིན་གཤེགས་ཀུན་དང་།། དེ་བཞིན་བྱང་ཆུབ་སེམས་དཔའ་རྣམས།། དེ་བཞིན་གཤེགས་བདག་མཉེས་བྱའི་ཕྱིར།། དེ་རྣམས་ཞུགས་ནས་བྱུང་གྱུར་པ། ། སྲོག་དང་གྱེན་རྒྱུ་ཐུར་སེལ་དང་།། མཉམ་གནས་ཁྱབ་བྱེད་ཅེས་བྱ་དང་།། ཀླུ་དང་རུས་སྦལ་རྩངས་པ་དང་།། ལྷ་སྦྱིན་གཞུ་རྒྱལ་ཞེས་བྱ་བ།། འདི་དག་ཏུ་ནི་ཉིད་སྐུ་མཛད།། བུད་མེད་གཟུགས་སུ་སླར་སྤྲུལ་ཏེ།། རང་གི་ངོ་བོ་ཇི་བཞིན་དུ།། དེ་ཡི་སྐུ་ལས་བྱུང་བར་གྱུར།། དེ་ཉིད་གསུམ་ནི་མཉམ་སྦྱོར་ལས།། རང་གི་གསང་སྔགས་དེ་དག་བསྒོམ།། ཡན་ལག་ཀུན་ལས་ངེས་གྲོལ་ཞིང་། ། ཤིན་ཏུ་ཕྲ་བ་ཉིད་དུ་གྱུར།། དབུ་དགོས་མིང་ལས་བྱུང་བ་ནི།། ཞི་གནས་དང་ནི་ལྷག་མཐོང་སྟེ།། དངོས་མེད་ངོ་བོ་ཉིད་ཡིན་པས།། རང་ཉིད་ཀྱང་ནི་མི་ཤེས་སོ།། འོན་ཀྱང་འདི་ལྟར་ཐུབ་པ་ལ།། དེ་བཞིན་གཤེགས་རྣམས་གསོལ་བ་འདེབས།། བཅོམ་ལྡན་དགོངས་པ་ལུང་བསྟན་པ།། ཆོས་ཀྱི་མཆོག་ནི་བསྟན་དུ་གསོལ།། ཁྱབ་བདག་ཁྱེད་ནི་ཆོས་འདི་རྣམས། ། དངོས་མེད་ཉིད་ནི་ཐུགས་སུ་ཆུད།། འགྲོ་བའི་དོན་ནི་རབ་གྲུབ་པས།། ཡིད་བཞིན་ནོར་བུ་ལྟ་བུར་མཛེས།། གང་ཞིག་ཡང་དག་ཤེས་གྱུར་ན།། འཇིག་རྟེན་པ་དང་རྩོད་མེད་ཅིང་།། དེ་བཞིན་འཇིག་རྟེན་འདས་པ་དང་།། འཇིག་རྟེན་ཤིན་ཏུ་འདས་དེ་བཞིན།། གང་འདི་ཞི་བ་ཉིད་ཀྱི་ཆོས།། ཞི་གནས་ཤིན་ཏུ་སྔོན་འགྲོ་བ།། བྱང་ཆུབ་སེམས་དཔས་ཐོས་ན་ཡང་།། དེ་བཞིན་ཉིད་ཀྱི་བདེ་བ་བྱེད། ། དེ་ནས་ས་སྙིང་ལ་སོགས་པའི།། བྱང་ཆུབ་སེམས་དཔའ་སེམས་དཔའ་ཆེ།། མགོན་པོ་རྣམ་སྣང་ཆེན་པོ་ལ།། དེ་དག་གིས་ནི་ཞུས་གྱུར་པ།། གང་ཤེས་བླ་མེད་བྱང་ཆུབ་ནི།། མ་འོངས་སྐྱེ་བོས་ཐོས་འགྱུར་བའི།། གསང་སྔགས་དེ་ཉིད་དོན་འབྱུང་བ།། རྣལ་འབྱོར་བཅོམ་ལྡན་བཤད་དུ་གསོལ།། ལན་གཉིས་གསོལ་ཡང་མགོན་པོ་ནི།། མི་གསུང་བར་ནི་རྣམ་པར་བཞུགས།། རྡོ་རྗེ་ཅན་གྱིས་དེ་ཤེས་ནས།། དེ་ནས་སླར་ཡང་ཞུས་པར་གྱུར།། གང་འདི་ཞི་གནས་ལ་སོགས་པའི།། རྣལ་འབྱོར་ཟབ་མོ་བྲ་མེད་པ།། འདི་ནི་འདི་ལྟར་སྔགས་པས་བསྔགས།། འཚལ་འགྱུར་དེ་ནི་གཙོ་བོས་གསུངས། ། བྱ་བ་དག་བྱའི་རྣལ་འབྱོར་དང་།། རྣལ་འབྱོར་འབའ་ཞིག་པ་ཉིད་དང་།། ལུང་ནི་ཡང་དག་གང་ཡིན་པ།། དེ་ནི་བསྟན་པར་མཛད་པའི་རིགས།། ཞུས་པའི་དོན་ནི་མཁྱེན་ནས་ནི། ། བཅོམ་ལྡན་རྡོ་རྗེ་ཅན་གྱིས་གསུངས།། གསང་སྔགས་ཚུལ་ནི་མཆོག་འགྱུར་འདི།། གསང་བ་ཁྱོད་ལ་བསྟན་པར་བྱ།། འདི་སྐད་ཅེས་བྱའི་གསང་སྔགས་ཆེ།། གསང་སྔགས་ཀུན་དོན་སྔར་སྟེར་བའོ།། དེར་ནི་ལྔ་ཡི་བདག་གྱུར་ཅིང་།། སྦྱོར་བ་བཞི་དང་བཅུ་ཡི་བདག། ལྔ་པ་ལྔ་པོའི་མིང་འདི་ནི།། གསལ་དང་མི་གསལ་དག་ཏུ་སྦྱར། རྒྱུ་མངོན་ཕྱོགས་པའི་སྦྱོར་བཤད་པ།། དཀྱིལ་འཁོར་ལྔ་ཡིས་བརྒྱན་པ་ཡིན།། བཅུ་བདུན་ཞེས་ནི་བཤད་པ་འདིའི།། གསུངས་པའི་དོན་དེ་མ་ཤེས་པས།། སྔགས་པས་གསང་སྔགས་སྦྱོར་བ་དག་དེཚེ་ཇི་ལྟར་བྱེད་པར་འགྱུར། ། དོན་འདི་རྟོགས་པར་གྱུར་ནས་ནི།། སྣ་ཚོགས་དོན་ནི་སྟོན་པ་དང་།། འགྲོ་བའི་དོན་ནི་རབ་སྒྲུབ་པ།། གསང་སྔགས་རིག་པ་མཆོག་རྣམས་བྱེད།། བདག་ནི་སྟོང་དང་ཡང་དག་སྦྱར། ། ཡི་གེ་ཨ་ནི་སྟེང་དུ་གནས།། ཕྱེ་མ་ཞེས་བྱ་གནས་བྱས་ལ།། སྔགས་པས་སེམས་ཅན་དོན་རྣམས་བྱ།། ཡི་གེ་ཨ་གཉིས་སྦྱོར་བ་གང་།། ཨ་སྒོ་ལས་སྐྱེས་ཉིད་དུ་འགྱུར།། སྟེང་འོག་ཕྱོགས་ཀྱི་རྣམ་པ་དེ། ། དངོས་པོ་མེད་པའི་ངོ་བོ་ཉིད།། གང་ཞིག་འདི་ལས་གསུངས་པ་ནི།། བསམ་མི་ཁྱབ་པའི་ཐབས་ཆོས་ཉིད།། བདག་གིས་ཞེས་རྟོགས་དེ་འགྱུར་བ།། ཐོགས་མེད་རྟོག་པ་འདི་གནས་སོ།། ། སྟོན་པ་པོ་དང་བསྟན་དང་གནས།། ཕྲ་རབ་ཙམ་གྱི་ངོ་བོ་ཉིད།། ཀུན་རྫོབ་དུས་གསུམ་སྦྱོར་གཅིག་ལ།། སྔགས་པ་རྣམས་ཀྱིས་ཐོས་དེ་འགྱུར།། ཤིན་ཏུ་གྲངས་མེད་བསྐལ་པ་རུ།། སངས་རྒྱས་རྣམས་ཀྱིས་གང་མཁྱེན་པ། ། སྔགས་པ་རྣམས་ཀྱིས་དུས་གཅིག་ན།། སྐད་ཅིག་ལ་རྫོགས་བྱང་ཆུབ་ཐོབ།། ཀུན་མཁྱེན་ཀུན་རིག་ཐུགས་ཆུད་པ།། གསང་སྔགས་སྟོན་པའི་ཆོས་ཅན་ཏེ།། དེ་ཉིད་ཁོ་ན་བཅོམ་ལྡན་མཆོག། སྐུ་གསུང་ཐུགས་རྡོ་རྗེ་ལས་སྐྱེས།། མི་རྟོག་ནམ་མཁའ་ཇི་བཞིན་དེ།། གསང་སྔགས་ཐམས་ཅད་ཉི་མ་འདྲ།། ས་ལ་རླུང་བཞིན་སྔགས་པ་ནི།། འདོད་པ་ཀུན་ལ་ཉེ་བར་སྤྱོད།། ཐམས་ཅད་འགྱུར། བ་གང་གང་ཡིན།། དེ་དེ་སྟོང་པ་ཉིད་དུ་འགྱུར།། དེ་བཞིན་སྦྱོར་བ་དེ་མཐོང་བས།། ཀུན་རིག་དེ་ནི་དེ་བཞིན་གཤེགས།། དེ་བཞིན་ཉིད་གཟུགས་བརྙན་གྱུར་པ།། དེ་ནི་སྐུ་ཡི་རྡོ་རྗེར་གྱུར།། འགྲོ་བ་ཡང་དག་ཚིམ་པར་འབྱུང་། ། མི་ཕྱེད་གསུང་གི་རྡོ་རྗེར་གྱུར།། ནམ་མཁའི་གནས་ཀྱི་སྦྱོར་བ་གང་།། བསམ་མི་ཁྱབ་པར་སྤྲོ་བདག་ཉིད།། དེ་ཉིད་ཡེ་ཤེས་རྒྱ་མཚོ་ལ།། ཐུགས་ཀྱི་རྡོ་རྗེ་ཡང་དག་འབྱུང་།། སེམས་ཅན་ཀུན་གྱི་སེམས་གང་ཡིན།། ནམ་མཁའ་ཡོངས་སུ་བརྟག་པ་སྟེ།། དེ་ཡང་དེ་རུ་ཀུན་གནས་པས།། བུད་མེད་ཆོས་གཅིག་པུ་ཡི་གཟུགས།། སངས་རྒྱས་ཀུན་གྱིས་གང་བརྟེན་པ།། སར་གྱུར་དེ་ནི་བཅུ་གསུམ་པ།། དེ་ནི་བུད་མེད་ཅེས་བཤད་དེ།། དེ་བས་ཆོས་དེ་བྷ་ག་ཡིན།། བྱ་བ་ལ་སོགས་ཇི་སྐད་བཤད།། དམ་ཚིག་གསུམ་པོ་གཅིག་ཏུ་གྱུར།། དངོས་མེད་ཆོས་ཉིད་གཅིག་པུ་རུ། ། འདི་ནི་དེ་དག་མཉམ་པར་འགྱུར།། དམ་ཚིག་སྐུ་གསུང་ཐུགས་དང་ནི།། ཏིང་འཛིན་དེ་བཞིན་རྒྱལ་བ་དང་།། ས་དང་ཆུ་དང་དེ་བཞིན་མེ།། རླུང་དང་ནམ་མཁའ་ཉིད་དག་དང་།། གཟུགས་དང་སྒྲ་དང་དྲི་དང་རོ། ། རེག་དང་དེ་བཞིན་ཆོས་ཀྱི་དབྱིངས།། འདི་རྣམས་རྡོ་རྗེའི་མཐའ་ཅན་བྱུང་།། བྱང་ཆུབ་སེམས་དཔའ་རྫུ་འཕྲུལ་ཆེ།། དེ་ལྟར་བརྗོད་མི་ལང་ཞེས་པ།། བརྗོད་མི་ལང་བ་ཉིད་གྱུར་རྣམས། ། སངས་རྒྱས་ཞིང་གི་རི་རབ་ཀྱི།། རྡུལ་ཕྲན་གྱི་ནི་གྲངས་མཉམ་པའི།། བྱང་ཆུབ་སེམས་དཔའ་སེམས་ཆེན་དང་།། ནམ་མཁའ་མཉམ་པའི་དེ་བཞིན་གཤེགས།། མི་བསྐྱོད་རྣམ་སྣང་མཛད་རིན་ཆེན།། དཔག་མེད་ཚེ་དང་གདོན་མི་ཟ།། འདི་དག་ནམ་མཁའི་ཁམས་མཉམ་པའི།། རྡོ་རྗེ་སྙིང་པོ་དེ་བཞིན་གཤེགས།། དཔེར་ན་ཏིལ་འབྲུ་མཚུད་པ་ཡི།། དེ་བཞིན་གཤེགས་པ་ཐམས་ཅད་ཀྱིས། ། ནམ་མཁའི་ཁམས་ནི་ཡོངས་ཁེངས་པ།། དེ་རྣམས་དེར་ནི་ཡང་དག་སྣང་།། དེ་ནས་མགོན་པོ་རྣམ་སྣང་མཛད།། དེ་བཞིན་ཉིད་དང་གཅིག་ཏུ་གྱུར།། གང་ཡང་དམ་ཚིག་སྔོན་འགྲོ་དང་། ། སྐུ་རྡོ་རྗེ་སོགས་མིང་ཅན་གྱིས།། བྱང་ཆུབ་སེམས་དཔའ་སེམས་ཆེན་དང་།། དོན་ཡོད་ཐམས་ཅད་དེ་བཞིན་གཤེགས།། འདི་རྣམས་སྐུ་ཡི་ཡན་ལག་གྲགས།། ཞི་གནས་བསམ་མི་ཁྱབ་ལས་བྱུང་། ། མ་སྐྱེས་གཅིག་པུ་གཟིགས་པ་ནི།། འདོད་ཆགས་ཆེན་པོའི་ཚུལ་དུ་གྱུར།། འདོད་ཆགས་ཆེན་པོའི་ཚུལ་མཆོག་གི། ཏིང་ངེ་འཛིན་ལ་སྙོམས་ཞུགས་ཏེ།། དེ་བཞིན་གཤེགས་པ་ཀུན་གྱི་ཚོགས།། དེ་ནི་དེ་བཞིན་གཤེས་པ་ཀུན། ། དེ་ནི་རྣམ་པར་སྣང་མཛད་ཆེ།། འདི་ཉིད་མཉེས་པར་བྱ་བའི་ཕྱིར།། ཉིད་སྐུ་བུད་མེད་ཉིད་དུ་མཛད།། དེ་ནས་མགོན་པོ་བསམ་ཡས་ལས།། བུད་མེད་གཟུགས་སུ་བྱུང་བར་གྱུར།། དེ་ནི་སངས་རྒྱས་སྤྱན་འདྲ་དང་། ། མཱ་མ་ཀཱི་འདྲ་སྦྱོར་བ་དང་།། གོས་དཀར་མོ་འདྲའི་གཟུགས་དང་ནི།། སྒྲོལ་མའི་གཟུགས་སུ་ཡང་དག་གནས།། སྒྲ་ཡི་ངོ་བོའི་གཟུགས་ཅན་དང་།། དྲི་ཡི་ངོ་བོའི་གཟུགས་དང་ནི། ། དེ་བཞིན་རོ་ཡི་ངོ་བོའི་གཟུགས།། རེག་གི་ངོ་བོའི་གཟུགས་ཅན་དང་།། ལ་ལ་གཟུགས་ཀྱི་ངོ་བོ་ཡིས།། དེ་བཞིན་གཤེགས་པ་དེ་རྣམས་བཞུགས།། དེ་ནས་ཚུལ་གསུམ་དོན་གཅིག་དང་། ། མི་བསྐྱོད་པ་ཡང་བསྟན་ཕྱིར་དང་།། འཇིག་རྟེན་རྒྱང་འཕན་གདུལ་དོན་དུ།། འཇིག་རྟེན་འདས་པའི་ཚུལ་བྱུང་ངོ་།། གཉིས་མེད་མཉམ་པ་ཉིད་རྣལ་འབྱོར།། རྡོ་རྗེ་བུད་མེད་བྷ་ག་མཆོག། དམ་ཚིག་ཆེན་པོའི་དཀྱིལ་འཁོར་དུ།། དེ་ནི་མི་བསྐྱོད་ཡང་དག་བྲི།། ཟུར་བཞི་པ་ལ་སྒོ་བཞི་པ།། སྦྱོར་བཞི་གཅིག་ཏུ་སྦྱོར་བ་ཉིད།། དྲི་མ་མེད་པར་བྱིན་བརླབས་པ།། ཀུན་ནས་ཤིན་ཏུ་གསལ་བའི་གཟུགས། ། སངས་རྒྱས་སྤྲིན་གྱིས་ཀུན་ཏུ་ཁྱབ།། འབར་བ་མང་པོས་རྣམ་པར་འཁྲུག། གསལ་བ་ལ་སོགས་དཀྱིལ་འཁོར་ལྡན།། དེ་བཞིན་གཤེགས་པ་ཀུན་གྱི་གནས།། དེ་ནས་དེ་ནི་བཅོམ་ལྡན་འདས། ། དེ་བཞིན་གཤེགས་ཀུན་བདག་པོ་འདི།། དཀྱིལ་འཁོར་ཆེན་པོའི་དབུས་སུ་ཡང་།། རྣམ་པར་གཞག་སྟེ་བཞུགས་པར་གྱུར།། མི་བསྐྱོད་རིན་ཆེན་དཔག་མེད་དང་།། དོན་གྲུབ་རྣམ་སྣང་དེ་བཞིན་གཤེགས། ། དེ་རྣམས་བྱང་ཆུབ་སེམས་རྡོ་རྗེའི།། ཐུགས་ལ་རྣམ་པར་བཞུགས་པར་གྱུར།། དེ་རྣམས་ཟིལ་གྱིས་མནན་པའི་ཕྱིར།། དེ་བཞིན་གཤེགས་པ་བྱང་ཆུབ་སེམས།། དངོས་མེད་ངོ་བོར་གཅིག་པར་ནི།། མཁའ་འདྲ་རྡོ་རྗེ་ལས་བྱུང་གཟིགས།། ཤེས་རབ་ཏིང་འཛིན་གཞི་གཅིག་པུ།། དེ་ནི་གྲིབ་མ་ལྟར་ཐུགས་ཆུད།། རྡོ་རྗེའི་རང་བཞིན་སྐུར་མཛད་ནས།། འགྲོ་དོན་མཉམ་དང་མི་མཉམ་མཛད། ། ཇི་ལྟར་མཚམས་གནས་ཉི་མ་ཡིས།། འགྲོ་བ་གཉིད་ལོག་སད་པར་གྱུར།། དེ་བཞིན་དེ་བཞིན་གཤེགས་པ་ཀུན།། བྱང་ཆུབ་སེམས་ཀྱིས་སད་པར་བྱེད། ། སྐུ་གསུང་ཐུགས་ནི་རྡོ་རྗེ་གཅིག། དེ་རྣམས་སྐྱེ་བར་བཞེད་པ་ཡིས།། བྱང་ཆུབ་སེམས་ཀྱི་ངོ་བོ་ཡིས།། རྡོ་རྗེའི་སྔགས་སུ་མཛད་པར་གྱུར།། རིག་པ་སྐྱེས་བུའི་གཟུགས་དག་ནི།། སྔགས་ཀྱིས་བྱིན་རླབས་བླ་ན་མེད། ། དེར་ནི་ཞལ་གསུམ་པ་ལྟ་བུར།། དེ་བཞིན་གཤེགས་པ་ཀུན་གྱིས་གཟིགས།། དེ་ནས་མགོན་པོ་བཅོམ་ལྡན་གྱིས།། ཐུགས་རྗེས་བཞུགས་པ་ལས་བྱུང་སྟེ།། བྱང་ཆུབ་སེམས་ནི་རབ་བསྐོར་ལ། ། ལན་གསུམ་ཆེད་དུ་བརྗོད་པ་མཛད།། བསམ་མི་ཁྱབ་ཅིང་དཔག་མེད་གང་།། དེ་བཞིན་གཤེགས་པ་ཀུན་གྱི་གསང་།། རྡོ་རྗེ་བྱང་ཆུབ་སེམས་གཅིག་ལས།། སྤྱོད་ཡུལ་དེར་ནི་གྱུར་པ་ཡིན།། དེ་ནས་གསང་ཚུལ་ཐོས་པ་དང་།། དེ་འོག་གསང་བའི་བདག་པོས་ནི།། ཁྱབ་བདག་རྣམ་པར་སྣང་མཛད་ལ།། ཇི་བཞིན་ཚུལ་དུ་དེ་བཏུད་ཞུས།། ཕུང་པོ་ཁམས་ལ་སོགས་པའི་ཆོས།། འདུས་ལ་གང་ཞིག་གནས་པའི་རྣམས། ། རྟེན་འབྲེལ་ལས་སྐྱེས་ཡིན་པར་ནི།། ཁྱེད་ཆོས་སྟོན་པར་མཛད་པས་ཁུམས།། དམན་པའི་ཆོས་རྣམས་འདི་དག་ནི།། ཞེ་སྡང་ལ་སོགས་རྐྱེན་དང་ལྡན།། འདི་དག་ཇི་ལྟར་བདེ་གཤེགས་དང་།། ། རྫུ་འཕྲུལ་ཆེན་པོ་རིགས་མ་ལགས།། བྱང་ཆུབ་སེམས་དཔའ་སེམས་ཆེན་དེ།། ལུས་ལ་སོགས་པ་ཇི་ལྟར་འགྱུར།། གང་ཞིག་ཕྱི་དུས་སྐྱེ་བོ་ཡིས།། འདི་དག་འཚལ་བར་མི་འགྱུར་རོ།། དེ་ནས་བཅོམ་ལྡན་རྡོ་རྗེ་ཅན། ། འོད་ཆེན་ལྡན་པས་བཀའ་སྩལ་པ།། མ་འོངས་སྐྱེ་བོ་མཐོང་ནས་ནི།། གང་ཞིག་ཁྱོད་ཀྱིས་འདྲིས་པ།། ལེགས་སོ་ལེགས་སོ་སེམས་དཔའ་ཆེ།། གསང་བའི་བདག་པོ་ཁྱོད་ལེགས་སོ།། སྨྲས་དོན་ཇི་ལྟ་ཇི་ལྟ་བར། ། དེ་ལྟར་ཁྱོད་ལ་ལུང་བསྟན་བྱ།། མ་འོངས་དུས་ན་མི་རྣམས་ནི།། འཇིག་རྟེན་རྒྱང་འཕན་མཆོག་གཞོལ་འགྱུར།། ལོག་པར་ལྟ་བ་ལ་གནས་ཏེ།། ཅི་དགའ་བར་ཡང་སྤྱོད་པར་བྱེད།། ལ་ལ་གླུ་དང་གར་ལ་དགའ།། རྒོད་དང་སྒེག་ལ་མཆོག་ཏུ་གཞོལ།། དྲི་དང་འཕྲེང་བ་ལ་དགའ་ཞིང་།། དེ་བཞིན་འཁྲིག་པ་ལ་དགར་འགྱུར།། རྨོངས་པ་ལ་ལ་སྡང་བ་དང་།། དེ་བཞིན་གཏི་མུག་ལ་རབ་གཞོལ། ། ལ་ལ་དེ་བཞིན་འདོད་ཆགས་ཞེ་ན།། ཤེས་པ་གཞན་དག་འདོད་པར་འགྱུར།། ཉ་དང་ཤ་དང་དེ་བཞིན་ཆང་།། བཤང་གཅི་ཁུ་བ་ཁྲག་རྣམས་ནི།། སྐྱེས་བུ་གླེན་པ་ཟ་བྱེད་ཅིང་།། མེད་པར་སྨྲ་བ་ཆོས་སུ་སྒྲོགས།། མ་དང་སྲིང་མོ་ལ་སོགས་པ།། བགྲོད་མིན་ལ་ནི་བགྲོད་པ་དང་།། ཕ་དང་མ་ཡང་གསོད་པ་དང་།། དེ་བཞིན་སྲོག་ཆགས་གཞན་རྣམས་གསོད།། བརྫུན་གྱི་ཚིག་ཉིད་སྨྲ་བ་དང་། ། ཁྱད་པར་དུ་ཡང་རྐུ་བ་དང་།། གཞན་གྱི་ཆུང་མའི་ཐད་འགྲོ་ཞིང་།། སྨད་པ་གཞན་ཡང་བྱེད་པར་འགྱུར།། ལ་ལ་དམ་ཆོས་སྤོང་བ་དང་།། དེ་བཞིན་མཚམས་མེད་བྱེད་པ་སྟེ།། སྣ་ཚོགས་སྡིག་པ་བྱས་ནས་ཀྱང་། ། སྔགས་པ་དངོས་གྲུབ་འདོད་པར་འགྱུར།། གཟེར་ནད་དུག་དང་སྦྱར་བའི་དུག། སྣ་ཚོགས་ནད་ནི་མི་བཟད་པ།། འདི་རྣམས་ཀྱིས་ནི་གཟིར་གྱུར་ནས།། ཞི་བ་ཉིད་ནི་འདོད་པར་འགྱུར། ། འདོར་བར་བྱེད་པ་རྨོངས་པ་དེ།། མི་བཟད་སྡིག་པ་བྱས་པ་དང་།། ལོག་པར་ལྟ་ལ་མཆོག་གཞོལ་རྣམས།། ངན་སོང་གསུམ་དུ་འགྲོ་བར་འགྱུར།། དེ་རྣམས་རྗེས་སུ་གཟུང་པའི་ཕྱིར། ། གསང་བ་འདི་ལྟར་བསྟན་པ་ཡིན།། གང་ཞིག་ཡང་དག་ཐོབ་པ་ཉིད།། འདིར་ནི་དེ་བཞིན་གཤེགས་པར་འགྱུར།། གསང་བའི་བདག་པོ་མཁས་རྣམས་ཀྱིས།། ཚུལ་མཆོག་འདི་ནི་རྙེད་གྱུར་ནས། ། དོན་གསལ་ཡང་དག་རྙེད་པ་དང་།། དེ་ཡང་ང་རྒྱལ་དག་ཏུ་ལྟུང་།། དེ་རྣམས་ཏིང་འཛིན་ཞི་ཉིད་དང་།། ཤེས་རབ་ཉིད་ཀྱང་ཤིན་ཏུ་རིང་།། རབ་ཏུ་དགའ་དང་ལྡན་པ་ཡིས།། རྣལ་འབྱོར་པ་ནི་བདག་ཉིད་ཅེས། ། མངོན་པའི་ང་རྒྱལ་ལ་རྟག་དགའ།། རྒྱུ་དང་བཅོས་མའི་ཆོས་དང་ལྡན།། མྱ་ངན་འདས་དང་གཞན་འགྲོ་བ།། ཕན་ཚུན་དག་ནི་སུན་ཡང་འབྱིན།། གསང་སྔགས་སྨྲ་བ་ལ་བརྟེན་ནས།། གཅིག་ལ་གཅིག་ནི་རྩོད་པར་འགྱུར།། དེ་རྣམས་བདུད་ཀྱི་བྱིན་རླབས་ཀྱིས།། གལ་ཏེ་དངོས་གྲུབ་ཕྲ་ཐོབ་ན།། དེས་ནི་མངོན་པར་ང་རྒྱལ་བས།། མཁས་པ་སྙམ་དུ་ཤེས་པར་འགྱུར།། ཚོགས་པའི་ནང་དུ་རྩོད་པ་དང་། ། ཁྱི་བཞིན་ཁ་ཟས་ལ་སྤྱོད་ཡུལ།། རང་ལས་འབྲས་ལས་བྱུང་བ་ཡི།། ཕན་པ་ལ་ནི་གནོད་པ་བྱེད།། དེ་རྣམས་དགེ་དང་མི་དགེ་རྣམས།། བདག་ཅག་རྣམས་ཀྱི་སྟོབས་ཡིན་ཟེར།། མངོན་སུམ་སངས་རྒྱས་འདྲ་བ་ཡི། ། སློབ་དཔོན་སྨོད་ཅིང་བསྙེན་བཀུར་མེད།། སྐད་ཅིག་གཅིག་གིས་སྡང་བྱེད་ཅིང་།། དེ་ལ་སྐད་ཅིག་གིས་རྗེས་ཆགས།། ཁྱི་དང་ཕག་དང་ཁྭ་རྣམས་ཀྱི།། སྤྱོད་པ་དག་ནི་སྟོན་པར་བྱེད།། དེ་རྣམས་ཕན་ཚུན་རྣམ་འཚེ་བར།། མངོན་པར་དགའ་བར་བྱེད་པར་འགྱུར།། གསང་བ་འདུས་པ་མི་ཤེས་པར།། དམ་ཚིག་ལ་སོགས་བྱེད་པར་འགྱུར།། གསང་བ་སྲུང་བར་མི་བྱེད་པར།། ཐམས་ཅད་དུ་ནི་སྟོན་པར་བྱེད། ། འཇིག་རྟེན་ལ་ནི་སྨད་བྱས་ནས།། གཞན་དག་ལ་ནི་རབ་གསལ་བྱེད།། བདག་ཉིད་རྩ་བ་མེད་པ་ནི།། དམ་ཚིག་འདས་པར་བྱེད་པར་འགྱུར།། སྒྲ་བཅས་སྤྲོར་ལྡན་གྱིས་བསྐུལ་བས།། རང་ལ་རང་གིས་གླགས་རྙེད་མེད།། དེ་ཉིད་ཡེ་ཤེས་འབྱུང་བ་ཡི།། ཏིང་འཛིན་དེ་ཡིས་ཤེས་མི་འགྱུར།། ཉེས་པ་ཅུང་ཟད་ཙམ་གྱི་ཕྱིར།། མངོན་སྤྱོད་རབ་ཏུ་བྱེད་པར་འགྱུར།། རྣལ་འབྱོར་རབ་སྦྱོར་དམན་པ་ཡི། ། སྔགས་པ་རྣམས་ནི་འགྲུབ་མི་འགྱུར།། ཕྱི་རོལ་བསྟན་བཅོས་ལ་རྟག་དགའ།། དེ་ཡི་སྦྱོར་ལ་གཅིག་ཏུ་མཁས།། རང་གི་དམ་ཚིག་ཡོངས་སྤངས་ནས།། ལྕགས་ཀྱུ་མེད་པ་བཞིན་དུ་སྤྱོད། ། སྔགས་དང་ཕྱག་རྒྱའི་སྦྱོར་བ་ཡིས།། དེ་རྣམས་འཚོ་བ་བསྒྲུབ་པར་འགྱུར།། གང་དུ་རྙེད་པ་ཐོབ་འགྱུར་བར།། དམ་ཚིག་ཆོས་ནི་སྟོན་པར་བྱེད།། དེ་རྣམས་ཡང་དག་སྡུད་བྱེད་པའི།། གསང་བ་དགོངས་པས་བཤད་པ་ཡིན། ། དམ་ཚིག་ཉམས་ཏེ་གནས་པ་རྣམས།། འདི་ཡིས་ཐམས་ཅད་དགུག་པར་བྱ།། རང་གི་རྗེས་རིག་མི་ཤེས་ན།། དེ་རྣམས་ཞི་བར་ག་ལ་འགྱུར།། དེ་བས་རྗེས་སུ་གཟུང་དོན་དུ། ། ཚུལ་འདི་དག་ནི་གྱུར་པ་ཡིན།། དེ་ནས་བཅོམ་ལྡན་དེ་བཞིན་གཤེགས།། གཅིག་ཏུ་འདུས་པར་གྱུར་ནས་སུ།། དེ་བཞིན་གཤེགས་ཀུན་བདག་པོ་ལ།། རང་མཆོད་དེ་ཉིད་དམ་ཚིག་སྤྲིན།། ཡང་དག་འབྱུང་བས་ལེགས་མཆོད་དེ།། ཕྱག་འཚལ་ནས་ནི་འདི་སྐད་གསོལ།། དེ་བཞིན་གཤེགས་པ་གསང་བ་མཆོག། དེ་བཞིན་གཤེགས་པ་ཀུན་བསྡུས་པ།། འདུས་པ་གཉིས་མེད་རྣལ་འབྱོར་པའི། ། ཉམས་དགའ་རྡོ་རྗེ་སྙིང་པོ་འདི།། དེ་ཉིད་བསྡུས་པ་རྣམས་ཀྱི་མཆོག། དེ་ཉིད་བཅོམ་ལྡན་པ་ཤད་དུ་གསོལ།། དེ་ནས་དེ་བཞིན་གཤེགས་ཀུན་ལ།། བཅོམ་ལྡན་འདས་ཀྱིས་སླར་གསུངས་པ། ། གང་ཡང་འདི་ལྟར་གསོལ་འདེབས་པ།། དེ་བཞིན་གཤེགས་རྣམས་ལེགས་སོ་ལེགས།། འདི་ནི་དེ་བཞིན་གཤེགས་རྣམས་ཀྱང་།། ཐེ་ཚོམ་སྐྱེ་བར་བྱེད་ཡིན་ན། ། བྱང་ཆུབ་སེམས་གཞན་ཅི་སྨོས་ཤེས།། དེ་བཞིན་གཤེགས་དེ་རྣམས་ལ་གསུངས།། དེ་ནས་ངོ་མཚར་རྨད་བྱུང་ནས།། ཐེ་ཙོམ་ཐམས་ཅད་གཅོད་མཛད་པའི།། བཅོམ་ལྡན་དེ་བཞིན་གཤེགས་ཀུན་གྱི། ། བདག་པོ་ལ་ནི་འདི་སྐད་ཞུས།། བཅོམ་ལྡན་དེ་བཞིན་གཤེགས་ཀུན་གྱིས།། ཡོན་ཏན་ཀུན་གྱིས་ཕུལ་ཕྱུང་ཡང་།། གཙོ་བོ་འདིར་ནི་སྟོན་མཛད་པར།། ཇི་ལྟར་སྤྲོ་བ་མངའ་མ་གྱུར།། བྱིན་གྱིས་བརླབ་པའི་གནས་མཛད་དེ།། དེ་བཞིན་གཤེགས་ཡིད་བདེ་ལ་སོགས།། ཡེ་ཤེས་རྒྱུ་འབྲས་ཐོབ་པའི་ཕྱིར།། དེ་ནི་ཡང་དག་བཤད་དུ་གསོལ།། དེ་བཞིན་གཤེགས་ཀུན་བདག་པོ་ནི།། དེ་རྣམས་ཞུ་བར་མཁྱེན་ནས་སུ།། ཡེ་ཤེས་སྒྲོན་མ་རྡོ་རྗེ་གྲགས།། ཏིང་འཛིན་ཞེ་སྡང་རིགས་འབྱུང་བ།། གཙོ་བོས་མི་བསྐྱོད་སྙིང་པོ་ནི།། སྐུ་གསུང་ཐུགས་ནི་དཔལ་ལྡན་པས། ། དེ་ནས་ཡང་དག་ཕྱུང་བ་ནི།། བཛྲ་དྷྲྀཀ་ཅེས་བྱ་བའི་སྔགས།། དེ་ནས་འདི་ནི་གསུངས་ཙམ་གྱིས།། ཞེ་སྡང་རིགས་བྱུང་ལས་སྐྱེས་པ།། དེ་ནི་རིག་པ་སྐྱེས་བུར་འགྱུར། ། མི་བསྐྱོད་རྒྱ་ཆེན་ཐབས་ཀྱིས་སྦྱོར།། ཞལ་གསུམ་གནག་དང་དཀར་དང་དམར།། བདག་ཉིད་ཆེན་པོ་དེ་ཞལ་ཡིན།། རྡོ་རྗེ་གསུམ་འདིར་དེ་བཞིན་གཤེགས།། བཞུགས་པ་ཡེ་ཤེས་ཞེས་བྱའོ། ། དེ་ནས་དེ་བཞིན་གཤེགས་བདག་པོ།། དམ་ཚིག་འབྱུང་རྡོར་ཞེས་བྱ་ཡི།། ཏིང་ངེ་འཛིན་ལ་གཙོ་བོ་ནི།། སྙོམས་པར་ཞུགས་པ་ཉིད་དུ་མཛོད།། དེ་ནས་ཛི་ན་ཛིཀ་ཅེས་པའི།། སྙིང་པོ་དེ་བཞིན་ཡང་དག་ཕྱུང་།། དེ་ནས་གསུངས་པ་ཙམ་གྱིས་ཀྱང་།། གཏི་མུག་རིགས་བྱུང་ལས་སྐྱེས་པ།། རིག་བཅས་སྐྱེས་བུར་གྱུར་པ་ནི།། རྣམ་པར་སྣང་མཛད་དེ་བཞིན་གཤེགས།། དཀར་དང་གནག་དང་དམར་བཅས་པའི། ། ཞལ་གྱིས་མདུན་དུ་བཞུགས་པར་གྱུར།། དེ་ནས་རིན་ཆེན་བྱུང་བ་ཡི།། དཔལ་ཞེས་བྱ་བའི་ཏིང་འཛིན་ལ།། སྙོམས་པར་ཞུགས་ནས་བདེར་གཤེགས་ཀུན།། བདེ་དང་ཡིད་བདེར་གྱུར་པའི་ཕྱིར། ། ཡིད་བཞིན་ནོར་བུ་རིན་ཆེན་རིགས།། དེ་བཞིན་གཤེགས་ཀུན་བདག་པོ་འདི།། དེ་ནས་རཏྣ་དྷྲིཀ་ཅེས་བྱའི།། སྙིང་པོ་དཔལ་ལྡན་དེ་ཚེ་ཕྱུང་།། དེ་ནི་ཕྱུང་བ་ཙམ་གྱིས་ནི།། ། རིགས་དང་བཅས་པའི་སྐྱེས་བུར་གྱུར།། སེར་དང་དཀར་དང་གནག་པ་ཡི།། ཞལ་དང་རིན་ཆེན་འབྱུང་ལྡན་ནི།། རྡོ་རྗེ་གསུམ་གྱི་བདག་པོ་ཡི།། ལྷོ་ཕྱོགས་ལོགས་སུ་བཞུགས་པར་གྱུར།། དེ་ཡང་བྱང་དུ་གཟིགས་གྱུར་ཏེ། ། མཉམ་ཉིད་ཡེ་ཤེས་ཞེས་བྱའོ།། དེ་ནས་བཅོམ་ལྡན་བདག་པོ་དེ།། རྡོ་རྗེ་གསུམ་གྱི་དམ་ཚིག་བདག། འདོད་ཆགས་ཆེན་པོ་ལས་བྱུང་བ།། རྡོ་རྗེ་ཞེས་ནི་བྱ་བ་ཡི། ། ཏིང་ངེ་འཛིན་ལ་སྙོམས་ཞུགས་ཏེ།། འདོད་ཆགས་ཆེན་པོའི་རིགས་ལས་བྱུང་།། ཨཱ་རོ་ལིཀ་ཅེས་བྱ་སྙིང་པོ།། རྡོ་རྗེ་གསུམ་ལས་དེ་ནས་ཕྱུང་།། དེ་ནས་ཕྱུང་བ་ཙམ་གྱིས་ནི།། དེ་འོག་བཅོམ་ལྡན་གཙོ་བོ་ནི། ། རིགས་དང་བཅས་པའི་སྐྱེས་བུར་གྱུར།། འཇིག་རྟེན་དབང་པོ་འོད་དང་མཚུངས།། དམར་དང་དཀར་དང་གནག་པའི་ཞལ།། དཔལ་ལྡན་རིགས་ཆེན་པོ་ཡི་བདག། དེ་བཞིན་གཤེགས་པའི་བདག་པོ་ཡི། ། ནུབ་ཕྱོགས་སུ་ནི་བཞུགས་པར་གྱུར།། དེ་ནས་བཅོམ་ལྡན་སྣ་ཚོགས་པ།། དོན་ཡོད་དམ་ཚིག་ཅེས་བྱ་བའི།། ཏིང་འཛིན་རྡོ་རྗེ་ཡང་དག་ཕྱུང་།། གཙོ་བོ་དེ་ལ་སྙོམས་ཞུགས་ནས། ། སྙིང་པོ་མཆོག་གི་མཆོག་ཅེས་བྱའོ།། དམ་ཚིག་རྣམས་ནི་དགུག་པའི་རིགས།། སྙིང་པོ་པྲཛྙཱ་དྷྲྀཀ་ཅེས་པ།། རྡོ་རྗེ་གསུམ་ཞེས་བྱ་ལས་འབྱུང་།། དེ་ནས་ཕྱུང་བ་ཙམ་གྱིས་ནི།། དོན་ཡོད་རྡོརྗེ་སྦྱོར་བ་ཡི། ། དེ་ཉིད་མགོན་པོ་བཅོམ་ལྡན་འདས།། སྐུ་གསུང་ཐུགས་ཀྱི་རྡོ་རྗེ་ཅན།། རིགས་དང་བཅས་པའི་སྐྱེས་བུར་གྱུར།། ལྗང་དང་གནག་དང་དཀར་བའི་ཞལ།། དེ་བཞིན་གཤེགས་པའི་བདག་ཡིད་དབྱང་ཕྱོགས་སུ་ནི་བཞུགས་པར་གྱུར། ། ཞེ་སྡང་གཏི་མུག་རིགས་དང་ནི།། དེ་བཞིན་ཡིད་བཞིན་རིན་ཆེན་དང་།། འདོད་ཆགས་དམ་ཚིག་ཅེས་བྱ་བ།། འདོད་དང་ཐར་པ་རབ་བསྒྲུབས་པའོ།། དེ་ནས་ཁྱབ་འཛི། འདོ་ཆགས་དས་ཚིག་འབྱུང་བ་ཡི་ཞིང་ངེ་འཛིན་སུ་རློམས་ཞུགས་། རྡོ་རྗེ་འཛིན་པ་བཙུན་མོ་སྷོ།། ཐཱ་ཀྴས་གྱུལ་གི་རྫས། ད་ས་ཅན་ཐམགསས་པ། མ་ཞེས་ཀྱི་ས་ཡང་དག་བཤ། དོན་དེ་བཞིན་གཤེགས་བདག་པོ།། ག་བྱ་ལམ་བཙུན་སོ་ན་སོ།། སྲ་དང་གསུང་དང་ཐུགས་པ་བྱུང་ཧཱུཾ་ཞེས་བྱར་གྲགས། ། རིག་པ་སྐྱེས་བུ་ཞེས་བྱ་བའི།། དེ་ནི་བུད་མེ་གཟུགས་འཛིན་ནས།། ཞལ་གསུམ་ལྟ་བུའི་གཟུགས་ཀྱིས་ནི།། མ་ཡེ་ཕྱོགས་སུ་རྣམ་པར་བཞུགས།། དེ་ནས་རྗེས་རྡོ་རྗེ་ལགས། ། སྐུ་གསུང་ཐུགས་རྡོ་རྗེ་ལས་བྱུང་།། ཏིང་ངེ་འཛིན་ལ་སྙོམས་འཇུག་སྟེ།། རྡོ་རྗེ་གསུས་ལས་བྱུང་བ་ནི།། དེ་ནི་མོ་པར་འི་ཨུ0f7f།། གང་ཕྱིར་དེ་བཞིན་གཤེགས་པའི་ཡང་། རིག་བ་ཐ་བྱུང་བ་སྟེ། ། ཞལ་གསུམ་ཐའི་ནས་འབྱོར་ས།། གཉིས་མེད་མཉས་པའི་རྣལ་འབྱོར་པས།། སངས་རྒྱས་ཀུན་གྱི་ཡིད་འོང་ཞིག། གསང་བ་བསྡུས་པའི་སྦྱོར་བ་ཡིས།། བདེན་ཐལ་ཕྱོགས་རྣམ་པར་བཞུགས། ། དེནས་རྗེས་གས་རྗེན། ཐ་འདྨོ་རྗེག་ལ་སྐྱེས།། ཏིང་ངེ་འཛིན་པ་སྙོམས་གྲགས་ནས།། བདེ་བ་ཆེན་པོ་བྱུང་བ་ནི།། འདི་སྐད་དག་ཟུང་།། ནམ་མཐུགཔ་ཅན་ཏེ། ། གཙོ་བ་ཕུང་མེ་གཟུགས་འཛིན་པ།། ནནི་རིག་པ་སྐྱེས་པར་གྱུར།། གོས་མེད་པ་ཤེས་ལས་བྱུང་བ།། རྡོ་རྗེ་གསུམ་ཀྱིདམ་ཚིག་སོག། དེ་བཞིན་གི་གསས་པའི་དུ་པ་རླུང་གི་ཕྱོགས་སུ་རྣམ་པར་བཞུགས། ། དེ་ནས་བཅོམ་ལྡན་འདས་བདག་པོ།། རྡོ་རྗེ་གསུམ་གྱི་དམ་ཚིག་ཅན།། བསླུ་བ་རྡོ་རྗེ་ཞེས་བྱ་བའི།། ཏིང་ངེ་འཛིན་ལ་སྙོམས་ཞུགས་ནས། ། དེ་བཞིན་གཤེགས་ཀུན་བཙུན་མོ་མཆོག། ཞལ་གསུམ་ལྟ་བུའི་གཟུགས་ཅན་མ།། བཛྲ་ར་ཏི་ཞེས་བྱ་བ།། རྡོ་རྗེ་གསུམ་ལས་ཕྱུང་བར་འགྱུར།། དེ་ནི་ཕྱུང་མ་ཐག་ཏུ་ཡང་།། གཙོ་བོ་རིག་མ་སྐྱེས་བུར་གྱུར། ། བུད་མེད་ཀྱི་ནི་གཟུགས་འཛིན་ཏེ།། དབང་ལྡན་ཕྱོགས་སུ་རྣམ་པར་བཞུགས།། དེ་ནས་བཅོམ་ལྡན་མགོན་པོ་དེ།། རྣམ་སྣང་རྡོ་རྗེ་ལས་བྱུང་བའི།། ཏིང་ངེ་འཛིན་ལ་སྙོམས་ཞུགས་ཏེ། ། སྐུ་གསུང་ཐུགས་ཀྱི་རྡོ་རྗེ་ལ།། དཀྱིལ་འཁོར་འདིར་ནི་གཤིན་རྗེ་གཤེད།། ཁྲོ་བོ་ཆེན་པོ་ཕྱུང་བ་དང་།། ཕྱུང་ནས་དེ་བཞིན་གཤེགས་པ་རྣམས།། བསྙུངས་པར་བྱ་བའི་ཤར་ཕྱོགས་བཞུགས། ། དེ་ནས་བདག་པོ་བཅོམ་ལྡན་འདས།། དེ་བཞིན་གཤེགས་པ་ཐམས་ཅད་ཀྱི།། མངོན་བྱུང་རྡོ་རྗེ་ཞེས་བྱ་ཡི།། ཏིང་ངེ་འཛིན་ལ་སྙོམས་ཞུགས་ཏེ།། ཁྲོ་བོ་ཆེན་པོ་ཕྱུང་བ་ནི།། པྲཛྙཱནྟ་ཀྲིཏ་རྡོ་རྗེ་ཅན། ། དེ་ནས་དཔལ་ལྡན་ཕྱུང་བ་ནི།། རིག་པ་སྐྱེས་བུར་ཡང་དག་ཕྱུང་།། དཀྱིལ་འཁོར་ཆེན་པོའི་སྦྱོར་བ་ལས།། འོད་ཆེན་ཕུང་བུའི་གཟུགས་ལྟ་བུ།། རྡོ་རྗེ་དམ་ཚིག་བསྙེངས་བྱེད་པ།། ལྷོ་ཡི་སྒོར་ནི་རྣམ་པར་བཞུགས། ། དེ་ནས་རིན་ཆེན་འབྱུང་གནས་གྲགས།། ཏིང་ངེ་འཛིན་ལ་སྙོམས་ཞུགས་ཏེ།། གསུང་གི་དཀྱིལ་འཁོར་ཀུན་གྱི་གཙོར།། རྡོ་རྗེ་གསུམ་ལས་ཁྲོ་བོ་ཆེ།། པདྨཱནྟ་ཀྲྀཏ་འོད་པོ་ཆེ།། བདག་པོ་དེ་ནས་ཕྱུང་བར་གྱུར།། དེ་ནས་ཕྱུང་བ་ཙམ་གྱིས་འདིར།། གཙོ་བོའི་རིག་པ་སྐྱེས་བུར་བཅས།། དེ་བཞིན་གཤེགས་པ་ཐམས་ཅད་ཀྱིའང་།། གསུང་གི་ཚུལ་དུ་རྣམ་སྤྲུལ་ཞིང་།། གོས་མེད་ཡེ་ཤེས་བླ་མེད་པ། ། ནུབ་ཀྱི་སྒོར་ནི་བཞུགས་པར་གྱུར།། བཅོམ་ལྡན་དེ་ཉིད་སྣ་ཚོགས་པ།། ཐུགས་ཀྱི་རྡོ་རྗེ་ཏིང་འཛིན་ལ།། ཀུན་ནས་སྙོམས་པར་ཞུགས་ནས་ནི།། དེ་ནས་གཙོ་བོས་ཕྱུང་བར་གྱུར།། ཁྲོ་བོ་ཆེན་པོ་རྣམ་ཕྱུང་བ།། ཀུན་ནས་བགེགས་མཐར་བྱེད་པ་སྟེ།། ཐུགས་ཀྱི་དཀྱིལ་འཁོར་སྦྱོར་བ་ཡིས།། བྱང་གི་སྒོར་ནི་རྣམ་པར་བཞུགས།། དེ་ནས་དཔལ་ལྡན་རྡོ་རྗེ་འཛིན།། དཀྱིལ་འཁོར་མཆོག་འདི་ཐོས་པ་དང་། ། མགོན་པོ་རྣམ་པར་སྣང་མཛད་ཆེ།། དེ་ལ་སླར་ཡང་ཞུས་གྱུར་པ།། མཁའ་དང་དབྱེར་མེད་སྦྱོར་གཅིག་ཅིང་།། དངོས་མེད་དེ་བཞིན་གཤེགས་པ་རྣམས།། དགའ་བའི་མཆོག་སོགས་བགྱིས་ནས་ནི། ། ཇི་ལྟར་དེ་རྣམས་ཞུ་བར་འགྱུར།། འདི་དག་ཐོག་མཐའ་ཡོད་མིན་ན།། འདི་ཡི་གཙོ་བོ་ཇི་ལྟར་འགྱུར།། ཕྱོགས་ཀྱི་ཆ་རྣམས་བཞག་པ་ལ།། འདི་ནི་གང་གིས་རྣམ་པར་སྦྱང་། ། གསང་བ་འདི་ནི་མི་སྲིད་ཅེས།། ཐེག་པ་གསུམ་པོ་རྟོག་པ་དང་།། སོ་སོའི་སྐྱེ་བོའི་ཚིག་གིས་ཀྱང་།། སྤང་བ་དག་ཀྱང་བགྱིད་པར་འགྱུར།། གང་ཞིག་ཉན་ཐོས་རྣམས་དང་ནི།། དེ་བཞིན་མདོ་སྡེ་ལས་སྤངས་པའི།། ཞེ་སྡང་སོགས་དང་འདོད་ལྔ་སོགས།། དེ་བཞིན་གཤེགས་རྣམས་བསྟེན་མཛད་པ།། རྗེས་སུ་སྤྱོད་དང་ཐུན་མོང་བའི།། བྱ་བ་དེ་དག་ཕྱིན་ཅི་ལོག། དགའ་མཐའི་སྤྱོད་པ་དེ་རྣམས་ནི། ། དེ་བཞིན་གཤེགས་དེ་རྣམས་མཛད་པ།། ཚིག་གཅིག་ལ་ནི་དཔག་མེད་དོན།། གསང་བ་དམ་པ་འདི་དག་ནི།། མགོན་པོ་གང་ཞིག་མ་འོངས་པའི།། སྐྱེ་བོས་ཇི་ལྟར་འཚལ་བར་འགྱུར། ། དེ་ནས་བཅོམ་ལྡན་བཀའ་སྩལ་པ།། ཕྱག་ན་རྡོ་རྗེ་ཚུལ་འདི་ནི།། དགོངས་པ་གསང་བ་བླ་མེད་པ།། དྲིས་པ་རྣམས་ནི་བཤད་པར་བྱ།། ཞེ་སྡང་གཏི་མུག་དེ་བཞིན་ཆགས།། ལུས་ལ་སོགས་པའི་ཕུང་པོ་ལྔ།། འདི་དག་བདག་མེད་རྟོགས་ནས་ནི།། རྫོགས་སངས་རྒྱས་ནི་ཚུལ་གསུམ་གནས།། ཕ་ནི་ཞི་གནས་ཡིན་ཞེས་བྱ།། མ་ནི་ལྷག་མཐོང་ཡིན་པར་བཤད།། དེ་བཞིན་ཉིད་ཤེས་ལུས་སུ་གྱུར། ། ཞི་བ་རྣལ་འབྱོར་པ་ཡི་ཟས།། ཇི་ལྟར་བཟོ་བོས་བདེར་གཤེགས་ཀྱི།། སྐུ་ཡི་གཟུགས་བརྙན་བྱས་པ་ལྟར།། གང་ཞིག་སྐུ་ལྟ་བུ་ཡི་སྐུ།། དེ་བཞིན་གསུང་གི་རྣམ་པས་གསུང། ཐུགས་ཀྱི་རྣམ་པས་ཐུགས་སུ་ནི།། ཞི་གནས་ལ་སོགས་པ་ལས་བྱུང་།། ཕུང་པོ་ལ་སོགས་ཆོས་རྣམས་ནི།། སྟོང་ཞིང་རྟེན་འབྲེལ་ལས་བྱུང་མཐོང་།། ཡེ་ཤེས་ཉི་མ་ཤར་བའི་གཟུགས།། ཞི་ལས་རྣལ་འབྱོར་པ་རྣམས་བྱེད། ། དེ་བས་སྐུ་གསུང་ཐུགས་རྡོ་རྗེ།། གྲིབ་མ་ལྟ་བུར་བྱུང་བ་ཡིན།། དེ་བཞིན་ཕུང་པོ་ཁམས་ལ་སོགས།། དམ་ཚིག་གཅིག་ལ་རྣམ་པར་གནས།། དེ་ནས་ཚུལ་གསུམ་དོན་གཅིག་པ། ཞི་གནས་ལ་སོགས་པ་ལས་བྱུང་།། དེ་ནས་རྡོ་རྗེ་ཚུལ་ཡིད་འོང་།། གསང་བའི་བདག་པོ་མཉན་པར་གྱིས།། སྟོང་པ་རྟེན་འབྲེལ་ལས་བྱུང་བར།། རྣལ་འབྱོར་པ་ཡི་རྡོ་རྗེ་ཞེས།། ནམ་མཁའ་མཐའ་ཡས་རྣལ་འབྱོར་ནི། ། ཕུང་པོ་ལ་སོགས་ཆོས་བྱུང་བ།། ལུས་དང་ངག་སེམས་ཀུན་རྟོག་ནི།། ཕུང་པོ་སོགས་བྱུང་འབྱུང་ལས་གྱུར།། འདི་དག་དངོས་མེད་ཡང་དག་སྦྱར།། དེ་ལས་ཏིང་འཛིན་སྐྱེ་བར་འགྱུར།། ། འདི་དག་ཏིང་འཛིན་གཉིས་མེད་སྦྱོར།། མི་ཕྱེད་རྡོ་རྗེ་ཉིད་དུ་འགྱུར།། ཟབ་དང་རྒྱ་ཆེན་རྟོག་བྱང་ཆུབ།། དེ་རྟོགས་པས་ནི་སེམས་དཔར་གྱུར།། འདི་དག་ནམ་མཁའ་མཚུངས་གྱུར་པ།། ཆེན་པོ་ཞེས་བྱ་ཤེས་བྱེད་པའོ། ། དེ་ལ་རྟོགས་པ་མཐའ་ཡས་པ།། རྡོ་རྗེ་ཐེག་པར་སྟོན་པ་ཡིན།། ཏིང་ངེ་འཛིན་ནི་དེ་ཉིད་ལས།། རྡོ་རྗེའི་ཐེག་པ་བྱུང་བ་ཡིན།། འདི་ལས་འཇིག་རྟེན་འདས་འགྱུར་ཞིང་།། དེ་བཞིན་འཇིག་རྟེན་ཤིན་ཏུ་འདས།། དགོངས་དོན་དེ་བཞིན་ཉིད་གཅིག་པུ།། གསང་བ་འཇིག་རྟེན་པ་ཞེས་བཤད།། མ་སྐྱེས་པ་ལས་བྱུང་བ་ནི།། ཀུན་རྫོབ་དང་ནི་དོན་དམ་ཡིན།། བདུད་གྱུར་ལྷ་ཡི་བུར་བཤད་དེ། ། ཕུང་པོ་ཉོན་མོངས་འཆི་བདག་བཅས།། འདི་ལས་དངོས་མེད་པས་རྒྱལ་བས།། རྒྱལ་བའི་རྡོ་རྗེར་རྣམ་པར་བཤད།། ལུས་སོགས་ཕྱི་ཡི་ཕུང་པོར་བཤད།། འབྱུང་དང་འབྱུང་ལས་གྱུར་བཤད་གང་།། བྱང་ཆུབ་སེམས་དཔའ་སེམས་དཔའ་ཆེ།། འདི་དག་རྡོ་རྗེའི་རིགས་ཅན་འགྱུར།། དངོས་པོ་གང་དང་གང་དག་གིས།། ཕུང་པོ་ལྔ་པོ་བརྟགས་འགྱུར་བ། ། དེ་རྣམས་དེ་བཞིན་ཡང་དག་དམིགས།། དེ་བཞིན་གཤེགས་པ་རྣམས་སུ་འགྱུར།། ཇི་ལྟར་མེ་ལོང་མཚུངས་གསལ་བ།། དངོས་པོ་ཀུན་གྱི་བདག་ཉིད་ཅན།། དེར་ནི་བདག་གིས་བདག་ཉིད་མཐོང་། ། དཀྱིལ་འཁོར་མཆོག་འགྱུར་རྣལ་འབྱོར་པ།། ཕུང་པོ་དེ་བཞིན་གཤེགས་པར་འགྱུར།། དེ་བཞིན་ཉིད་ལས་སྤྲོ་བྱ་བ།། ཆོས་ཀྱི་སྐུ་ཅན་རྒྱལ་བ་ཡིད་མཆོད་པ་ཆེན་པོར་དེ་འགྱུར་རོ། ། འདི་ནི་སྤྲོས་དང་བསྡུས་པ་དག། དེ་ནི་དགའ་བར་ཡོངས་སུ་གྲགས།། སེམས་ཅན་གང་ཞིག་ལོངས་སྤྱོད་ཅིག། དེ་ནི་གསོལ་འདེབས་ཞེས་བཤད་དོ།། ཡང་དག་ཤེས་རབ་ཐབས་གཉིས་ཏེ།། མཁའ་དབྱིངས་དབྱེར་མེད་རབ་སྦྱོར་བའི།། དེ་ནི་འདོད་ཆགས་ཆེ་ཚུལ་འགྱུར།། རྣལ་འབྱོར་པ་ནི་མངོན་བཞུགས་པའོ།། རྡོ་རྗེ་ཐེག་པ་རྣལ་འབྱོར་ཆེར།། བདག་ཉིད་ངེས་པར་སྦྱོར་བ་གང་།། དབང་པོ་ཐམས་ཅད་བདེ་སྐྱེད་པའི།། ཡིད་བདེ་བ་ནི་སྐྱེ་བར་འགྱུར།། ཞལ་གསུམ་རྣམ་ཐར་གསུམ་དུ་གང་།། མཐོང་ཞིང་དེ་ལ་ཕུང་པོ་སོགས།། ལྷ་ཡི་བདག་ཉིད་རིག་འགྱུར་བ། ། དེ་ཉིད་གསུམ་དུ་བཤད་པ་ཡིན།། དངོས་མེད་པ་ནི་ལམ་གྱི་མཆོག། མྱ་ངན་འདས་པར་གཉིས་མེད་འཇུག། འོན་ཀྱང་སོ་སོར་འགྱུར་པ་སྟེ།། ཆོས་ཀྱི་སྐུ་ལས་ཞེ་སྡང་འགྱུར།། བཅོམ་ལྡན་བདག་པོ་དེ་ཉིད་ནི།། དེ་བཞིན་གངཤེགས་པའི་རིགས་འབྱུང་ཞིང་།། མྱ་ངན་འདས་ཚུལ་རྡོ་རྗེ་ཅན།། དེ་ཉིད་བདག་པོ་ཀུན་བྱེད་པའོ།། དམ་ཚིག་ལ་སོགས་འབྱུང་བའི་ཆོས།། རང་གིས་རིག་པར་མ་གྱུར་ཀྱང་། ། དེར་ནི་གནས་པ་ཡང་དག་བཤད།། དེ་ནི་གཏི་མུག་དེ་བཞིན་སེམས།། གང་གིས་ཇི་ལྟར་བརྟགས་ཆོས་ཀྱིས།། ལོངས་སྤྱོད་རྫོགས་ཞེས་བྱ་བྱེད་པ།། དེ་ནི་ཡིད་བཞིན་རིན་ཆེན་འབྱུང་། ། རིན་ཆེན་ཆེན་པོའི་རིགས་ཀྱི་གཙོ།། དེ་ཉིད་བཅོམ་ལྡན་འདོད་ཆགས་ནི།། ཀུན་མཁྱེན་ཡེ་ཤེས་ལས་བྱུང་བ།། གནས་མེད་གནས་པའི་སྦྱོར་གྱུར་པ།། འདོད་ཆགས་ཆེན་པོའི་ཚུལ་གྱི་མཆོག། ཇི་ལྟར་འདམ་དབུས་པདྨ་ནི།། དེ་ཡི་ཉེས་པས་ཀོས་མི་འགྱུར།། དེ་བཞིན་རྣལ་འབྱོར་རིག་པ་མཆོག། འདོད་པ་ཀུན་ལ་ཉེ་བར་སྤྱོད།། འགྲོ་བ་གཅིག་ཏུ་འདོད་པ་ཁྱབ།། དེ་ཉིད་རྡོ་རྗེ་རིགས་མཆོག་ཡིན།། ཆོས་དང་ལོངས་སྤྱོད་སྤྲུལ་པ་སྟེ།། གསུམ་པོ་དེ་དག་མདོར་བསྡུས་པའི།། ཞེ་སྡང་གཏི་མུག་དེ་བཞིན་ཆགས།། རྡོ་རྗེ་དགའ་བའི་མཐའ་ཅན་གཙོ།། ངན་འགྲོ་གསུམ་འདོན་པས་བུད་མེད། ། གཅིག་པུ་ཡིན་ཡང་དུ་མར་གྱུར།། གསུམ་པོ་ཡང་དང་འདུག་གྱུར་པ།། གཤིན་རྗེ་ཤེས་རབ་གྱུར་དེ་བཞིན།། པདྨ་བགེགས་འགྱུར་ཁྲོ་བོ་སྟེ།། མཐར་བྱེད་མཐའ་ཡི་མིང་ཅན་ནོ། ། འཇུག་པ་ལ་སོགས་གསུམ་ཉིད་ལ།། ཕུང་པོར་གྲགས་ཏེ་དེ་བཞིན་གཤེགས།། སྐྲག་བྱེད་གཤིན་རྗེ་གཤེད་ཀྱིས་ཀྱང་།། ཐམས་ཅད་འབྱུང་བའི་དཀྱིལ་འཁོར་རོ།། རྡོ་རྗེ་དམ་ཚིག་སྐྲག་པར་བྱེད། ། དེ་བཞིན་ཤེས་རབ་མཐར་བྱེད་གཙོ།། པདྨོའང་གསུང་ཞེས་བྱ་བར་གྱུར།། འཆི་བྲལ་རྣལ་འབྱོར་གྲུབ་པ་ཡིན།། བགེགས་མཐར་བྱེད་ཀྱང་ཐུགས་ཀྱི་གཙོ།། རགས་པའི་བདག་ཉིད་ཅན་བདག་པོ།། འདི་ལྟར་རྟག་སྤྱོད་རྣལ་འབྱོར་པ། ། གསང་བའི་ལུས་ཀྱིས་རྣམ་པར་སྤྱོད།། དགོངས་པ་ལུང་སྟོན་ལ་གནས་པར།། གང་ཞིག་ཡིད་ནི་བཟོད་གྱུར་པ།། དེས་ནི་དེ་བཞིན་བྱ་བ་དང་།། དེ་ནས་གསང་བ་ཡང་དག་འབྱུང་། ། ནུ་ཞོ་ཟས་ཀྱིས་བུ་གསོ་བཞིན།། སྲིད་པ་གསུམ་ན་བཅོམ་ལྡན་གཙོ།། སེམས་ཅན་བསམ་དབང་ཇི་བཞིན་དུ།། ཆོས་ཀྱི་བདུད་རྩིས་ཚིམ་པར་མཛད།། ཆོས་དང་ལོངས་སྤྱོད་སྤྲུལ་པ་ཡིས།། སྐུ་གསུམ་གཅིག་ཏུ་སྦྱོར་བ་ལས།། བཅོམ་ལྡན་གསང་བ་དགོངས་མཛད་པ།། བདེན་པ་མ་ཡིན་བརྫུན་པའང་མིན།། ཞེ་སྡང་གཏི་མུག་རིན་ཆེན་དང་།། འདོད་ཆགས་སྣ་ཚོགས་རིགས་བྱུང་བ།། དགོངས་པའི་རིགས་ཀྱི་བརྡར་གྱུར་པས།། གླེང་གཞི་ཡིན་ཏེ་དང་པོའོ།། །། དེ་ནས་དེ་བཞིན་གཤེགས་བདག་ལ།། སླར་ཡང་དེ་བཞིན་གཤེགས་པ་ཀུན། ། ལྷག་པར་མཆོད་པ་བྱས་ནས་ནི།། ཐུབ་ཆེན་དེ་ལ་འདི་སྐད་གསོལ།། དགོངས་པའི་རྡོ་རྗེ་དམ་པ་ནི།། དེ་བཞིན་གཤེགས་པ་ཀུན་ཡེ་ཤེས།། བྱང་ཆུབ་སེམས་ནི་བླ་མེད་པ། ། གསང་བ་བཅོམ་ལྡན་བཤད་དུ་གསོལ།། བཅོམ་ལྡན་འདས་ཀྱིས་དེ་རྣམས་ཀྱི།། ཞུ་བ་ཡང་དག་ཐུགས་ཆུད་ཅིང་།། བྱང་ཆུབ་སེམས་དཔའ་ཡོངས་རྟོག་པ།། ཐུབ་ཉིད་ཀྱིས་ནི་རྣམ་མཁྱེན་པ། ། དེ་ནས་བྱང་ཆུབ་སེམས་ཀུན་ལ།། བཅོམ་ལྡན་འདས་ཀྱིས་དེ་སྐད་གསུངས།། ལུས་སེམས་དེ་དང་འདྲ་བ་དང་།། དེ་བཞིན་ངག་ནི་ཚིག་བརྗོད་བལྟའི།། བྱང་ཆུབ་སེམས་ནི། ཟ་མེད་པ།། ཁྱེད་ཀུན་གྱིས་ནི་བསྐྱེད་པར་བྱ།། དེ་ལྟར་བྱང་ཆུབ་སེམས་དཔའ་ལ།། སྟོན་པས་ཇི་བཞིན་སྟོན་པར་མཛད།། དེ་ནས་དེ་བཞིན་གཤེགས་རྣམས་ཀྱིས།། སྐུ་དང་ཐུགས་དང་དེ་བཞིན་གསུང་། ། དེ་འདྲའི་ཚུལ་དུ་སྦྱར་ནས་ནི།། བྱང་ཆུབ་སེམས་དཔའ་སེམས་དཔའ་ཆེ།། སྐུ་གསུང་ཐུགས་རྡོ་རྗེ་ཅན་ལ།། ཆེད་དུ་བརྗོད་པ་ཆེད་དུ་བརྗོད།། ཨེ་མ་ཀུན་ཏུ་བཟང་པོ་ཡི།། རྟེན་ཅིང་འབྲེལ་འབྱུང་ལས་སྐྱེས་པ།། སྐྱེ་བ་མེད་པའི་ཚུལ་གྱིས་ནི།། སྐྱེ་བ་འདིར་ནི་རབ་ཏུ་བསྒྲགས།། དེ་ནས་དེ་བཞིན་གཤེགས་བདག་པོ།། དེ་བཞིན་གཤེགས་པའི་རྡོ་རྗེ་གསུམ།། དེ་བཞིན་གཤེགས་པ་ཐམས་ཅད་ཀྱི།། མངོན་རྫོགས་བྱང་ཆུབ་རྡོ་རྗེ་ཡི།། ཏིང་ངེ་འཛིན་ལ་སྙོམས་ཞུགས་ནས།། དཔལ་ལྡན་བྱང་ཆུབ་སེམས་འདི་གསུངས།། དངོས་པོ་མེད་པའི་དངོས་གནས་ན། ། དངོས་དང་དངོས་མེད་གཉིས་ཀའང་མིན།། དེ་ལྟར་དངོས་པོ་དངོས་མེད་པས།། སྒོམ་པ་དངོས་པོར་ཡོད་མ་ཡིན།། དེ་ནས་དཔལ་ལྡན་རྣམ་སྣང་མཛད།། དེ་བཞིན་གཤེགས་པ་ཐམས་ཅད་ཀྱི། ། གཉིས་མང་དམ་ཚིག་རྡོ་རྗེ་གྲགས།། ཏིང་ངེ་འཛིན་ལ་སྙོམས་པར་ཞུགས།། དེ་བཞིན་གཤེགས་པ་ཀུན་གྱི་མཆོག། གསང་བ་དགོངས་པ་རྡོ་རྗེ་ཅན།། བྱང་ཆུབ་སེམས་ནི་ཐམས་ཅད་ནས། ། འདི་ནི་ཡང་དག་བཀའ་སྩལ་ཏོ།། དག་པ་དེ་བཞིན་གཤེགས་ཀུན་གྱི།། ཕུང་པོ་ཁམས་སོགས་རྣམ་སྤངས་ཤིང་།། གཟུང་དང་འཛིན་པ་ལས་གྲོལ་བ།། ཆོས་བདག་མེད་པའི་སྟོང་ཉིད་ཅན། ། བྱང་ཆུབ་སེམས་ནི་འདི་གསུངས་པ།། རྟེན་ཅིང་འབྲེལ་འབྱུང་མིང་ཅན་ཏེ།། ཐོག་མ་མེད་ནས་མ་སྐྱེས་བདག། རང་སེམས་མཉམ་པ་ཉིད་ཀྱང་ཡིན།། དེ་ནས་མི་བསྐྱོད་དེ་བཞིན་སེམས། ། ཀུན་གྱི་གཉིས་མེད་མི་ཟད་པའི།། ཡེ་ཤེས་ཏིང་འཛིན་སྙོམས་ཞུགས་ཏེ།། བྱང་ཆུབ་སེམས་ནི་འདི་གསུངས་སོ།། དངོས་པོ་འདི་དག་མ་སྐྱེས་པས། ། ཕུང་པོར་གྲགས་པའི་ཆོས་ཉིད་མེད།། ནམ་མཁའ་ལྟ་བུར་བལྟ་དཀའ་བའི།། བདག་མེད་བྱང་ཆུབ་ཅེས་བྱའོ།། དེ་ནས་བཅོམ་ལྡན་དཀོན་མཆོག་དཔལ།། བདག་མེད་རྡོ་རྗེ་ཞེས་བྱ་བའི།། ཏིང་ངེ་འཛིན་ལ་སྙོམས་ཞུགས་ནས།། བྱང་ཆུབ་སེམས་འདི་རབ་ཏུ་གསུངས།། ཆོས་རྣམས་ཐམས་ཅད་དངོས་མེད་ཅིང་།། ཆོས་ཀྱི་མཚན་ཉིད་རྣམ་སྤངས་པ།། བདག་མེད་ཆོས་ལས་ཡང་དག་འབྱུང་།། བྱང་ཆུབ་ཚུལ་འདི་བསྟན་པའོ།། དེ་ནས་འོད་དཔག་མེད་མཚན་ཅན།། ཡེ་ཤེས་འབར་བ་སྒྲོན་རྡོ་རྗེའི།། ཏིང་ངེ་འཛིན་ལ་སྙོམས་ཞུགས་ཏེ།། བྱང་ཆུབ་སེམས་ནི་འདི་གསུངས་སོ།། མ་སྐྱེས་པ་ཡི་ཆོས་རྣམས་ལ།། དངོས་པོ་མེད་ཅིང་སྒོམ་པའང་མེད།། ནམ་མཁའི་ཚུལ་དུ་སྦྱོར་བ་ཡིས།། དངོས་པོ་ཞེས་ནི་རབ་ཏུ་བཤད།། དེ་ནས་དེ་བཞིན་གདོན་མི་ཟ།། ཟིལ་གྱིས་གནོན་པའི་རྡོ་རྗེ་ཡི།། ཏིང་ངེ་འཛིན་ལ་སྙོམས་ཞུགས་ཏེ།། བྱང་ཆུབ་སེམས་ནི་འདི་གསུངས་སོ།། ཆོས་འདི་རང་བཞིན་འོད་གསལ་ཞིང་།། གཟོད་ནས་དག་པས་མཁའ་དང་མཚུངས།། བྱང་ཆུབ་མེད་ཅིང་མངོན་རྟོགས་མེད།། བྱང་ཆུབ་སེམས་ནི་ཡིན་པར་བཤད།། དེ་ནས་དཔལ་ལྡན་རྡོ་རྗེ་འཛིན། ། བྱང་ཆུབ་སེམས་ནི་ཐོས་པ་དང་།། དགོངས་པའི་དོན་ནི་རབ་བཤད་པར།། རྣམ་པར་སྣང་མཛད་ཆེ་ལ་གསུངས།། དངོས་པོ་མེད་ཅིང་དམིགས་མེད་པ།། བྱང་ཆུབ་སེམས་དཔའ་མཁའ་དང་མཚུངས། ། གསང་བའི་ཚུལ་ནི་འདི་ཐོས་ནས།། དང་པོ་ཡི་ནི་རྟོག་པ་སྐྱེ།། ལུས་ལ་སོགས་པ་གསུང་སྦྱོར་བས།། སེམས་ནི་དེ་རྣམས་སྐྱེད་པར་བྱེད།། ཡང་དག་བྱང་ཆུབ་དུ་མའི་མཐར།། འདི་ལ་སོ་། སོ་སྐྱ་བོ་སྨྲ།། ཐུབ་པའི་གསུང་ནི་དེ་རྣམས་ལ།། རང་གི་སྒྲ་བཞིན་འཛིན་པར་བྱེད།། བསམ་པའི་དབང་ནི་ཇི་བཞིན་དུ།། འགྲོ་བའི་དོན་དུ་བཀའ་སྩོལ་ཅིག། དེ་ནས་བཅོམ་ལྡན་བདག་པོ་འདི།། རྣམ་བར་སྣང་མཛད་ཐུབ་པ་ཆེ། ། ལེགས་ཤེས་ལན་གསུམ་གསུངས་ནས་ནི།། ལག་ན་རྡོ་རྗེ་ལ་འདི་གསུངས།། རྣམ་པར་མི་རྟོག་དོན་དེ་ཉིད།། རབ་ཏུ་ཕྱེ་སྟེ་བཤད་པར་བྱ།། ཚིག་ཏུ་བརྗོད་པ་དམིགས་པར་བཤད། ། བརྡ་དང་དོན་དམ་པ་ཡིན་ནོ།། རྐྱེན་དང་ཉན་ཐོས་རྣམས་ཀྱིས་ཀྱང་།། མདོ་དང་གསང་སྔགས་སྤྱོད་རྣམས་ཀྱིས།། དེ་བཞིན་གཤེགས་པས་གསུངས་པ་ཡི།། བྱང་ཆུབ་སེམས་འདི་བླ་ན་མེད། ། དེ་བཞིན་ཡང་དག་སྦྱོར་བ་འདི།། དགོངས་པའི་གསང་བ་ཐ་ན་མེད།། གཉིས་མེད་དམ་ཚིག་རྡོ་རྗེ་དང་།། པདྨ་དེ་ལས་སྐྱེད་པར་བྱེད།། ཚིག་ཏུ་བརྗོད་པ་ཐུན་མོང་སྟེ།། སངས་རྒྱས་སྐུ་ནི་དམིགས་ཅན་ཡིན། ། གསང་སྔགས་དེ་ཉིད་ཅེས་བྱ་བརྡ།། དེ་བཞིན་ཉིད་ནི་དོན་དམ་པའོ།། དང་པོ་གཅིག་ནི་དགུ་དབུས་ན།། གང་ཞིག་བཅུ་ཡིས་མ་བཅིངས་པ།། དེ་ནི་བཅིངས་མེད་ཅེས་བྱ་སྟེ། དེ་ཤེས་པ་ནི་མཆོག་གི་གནས།། དབྱངས་དང་གསལ་བྱེད་ཡི་གེ་སྟེ།། གྲངས་དགུ་ཡི་ནི་རྗེས་འཇུག་པ།། ཨས་བཅིངས་ཕན་ཚུན་སྦྱོར་བ་ལས།། གང་གིས་ཤེས་ཏེ་འགྲོ་བའི་ཐ།། གང་ཞིག་ཤེས་པ་རྣམ་གྲོལ་བ། ། འབྲས་བུ་ཕུན་ཚོགས་གྲུབ་འདོད་པ།། དེ་ནི་དེ་ཉིད་གྲུབ་འདོད་པ།། གཟུགས་མེད་པ་ནི་གཟུགས་སྤངས་པ།། འབྱུང་བའི་མཐའ་ནི་ཡང་དག་ལྡན།། ཆ་ལ་སོགས་པ་བཅུ་དྲུག་གནས། ། ལྔ་པ་ལྔ་དང་ཡང་དག་ལྡན།། བཞི་ནི་གསུམ་དུ་ངེས་པར་སྦྱར།། ཡི་གེ་ཨཾ་བཅས་རིང་པོར་བཅས།། ཡོན་ཏན་སྦྱོར་སོགས་ཕྱིས་དང་མཚུངས།། ཐུང་ངུ་མ་ལུས་ངག་ཏུ་འགྲུར་གཅིག་མིན་དུ་མ་མ་ཡིན་ནོ། ། ཡ་ཡི་དོན་གྱིས་གང་ཡང་རུང་།། བྱ་བའི་དངོས་གྲུབ་འདོད་གྱུར་པ།། ར་ལ་སོགས་པ་གསུམ་ཉིད་ཀྱིས།། འགྲོ་བའི་དོན་ལ་རབ་ཏུ་འཇུག། ཡི་གེ་གང་ཞིག་སྔར་བཤད་དང་། ། གང་ཡང་མངོན་དུ་ཕྱོགས་པ་རྣམས།། བུད་མེད་སྐྱེས་པ་མ་ནིང་སྟེ།། ཁམས་ལ་སོགས་པར་རབ་ཏུ་བརྟག། འོག་ནས་སྟེང་དུ་བཅས་པར་ནི།། ཤེས་ནས་བློས་ནི་ངེས་པར་སྦྱར།། དྲུག་བཤད་བཞི་དང་གསུམ་དང་གཅིག། དངོས་མེད་ངོ་བོ་གཅིག་ལས་བྱུང་།། དེ་ནི་ཡ་སོགས་དོན་སྦྱར་ན།། དུས་གསུམ་ཤེས་པའང་འབྱུང་བར་འགྱུར།། མཁས་པས་སྒྱུ་མ་མིག་འཁྲུལ་བཞིན།། འགྲོ་བ་རྣམས་ནི་སྒྱུ་མཐར་བྱ། ། བརྗོད་པ་ཡི་ནི་སྔགས་འདི་དག། དངོས་མེད་ངོ་བོ་ལས་བྱུང་བ།། དེ་ནི་ཡོངས་སུ་གྱུར་པའི་གཟུགས།། ལྷ་རུ་ཉེ་བར་མཚོན་པ་གང་།། བརྡ་ཡིས་དེ་ཉིད་གསུམ་གནས་པ།། རང་བཞིན་བཟླས་པའི་མཚན་ཉིད་དོ། ། མིང་མེད་བརྗོད་དུ་མེད་པ་སྟེ།། བྱང་ཆུབ་སེམས་མཆོག་འདི་ཡིན་ནོ།། གསུམ་པོ་དེ་ཉིད་གཅིག་གྱུར་པ།། འགྲོ་བ་མེད་ཅིང་འོང་བ་མེད།། འགག་མེད་རབ་ཏུ་ཞི་བ་སྟེ།། རྟག་དང་ཆད་པ་རྣམས་སྤངས་པ། ། དུས་གསུམ་མཁྱེན་པས་མ་བྱས་པའི།། རྟོག་པ་ནམ་མཁའ་དབྱེར་མེད་མཚན།། འདི་ཉིད་ཁོ་ན་དོན་དམ་སྟེ།། སོ་སོར་རང་རིག་མཚན་ཉིད་དོ།། དེ་འདི་སེམས་ཅན་ཀུན་ཞེས་བྱའི། ། སངས་རྒྱས་བྱང་ཆུབ་ངོ་བོ་ཉིད།། བྱང་ཆུབ་སེམས་གཅིག་ཡང་དག་འབྱུང་།། རྟེན་ཅིང་འབྲེལ་འབྱུང་རང་བཞིན་ཅན།། གང་འདི་བྱང་ཆུབ་སེམས་དག་ཉིད།། རྣལ་འབྱོར་པ་ནི་ཉིད་འདྲར་འགྱུར།། འདི་ནི་རྣམ་རྟོག་ཀུན་བྲལ་ཡང་།། རིགས་ཀུན་ལ་ནི་འཇུག་པར་འགྱུར།། སྲེག་དང་སྐེམས་དང་བདེ་ཅན་དང་།། ཀུན་ཟར་འཇུག་པའི་མེ་བཞིན་ནོ།། འདི་ནི་ལྷས་ཀྱང་མཆོད་བྱ་བར།། སེམས་ཅན་ཀུན་ལ་རྣམ་པར་གནས། ། བྱང་ཆུབ་སེམས་འདོད་བདག་ཉིད་དེ།། འདྲ་བ་བུ་གཅིག་བཞིན་ལྟ་ཞིང་།། གང་ཞིག་བདག་དང་མཉམ་གནས་པ།། བྱམས་པ་ཆེན་པོ་དེ་བསྐྱེད་བྱ།། ཕྱིན་ཅི་མ་ལོག་འདི་མཐོང་ནས།། བྱང་ཆུབ་སེམས་ནི་ཡང་དག་འབྱུང་།། དེས་ནི་སྙིང་རྗེ་ཆེར་གྱུར་ནས།། དེས་ནི་འཁོར་བ་ངེས་པར་འཇོམས།། སེམས་ཅན་ཀུན་དང་དེ་བཞིན་བདག། བྱང་ཆུབ་སེམས་ལས་མ་མཐོང་ན།། འོན་ཀྱང་འགྲོ་བའི་དོན་བྱེད་པ། ། དེ་ལས་དགའ་བ་སྐྱེ་བར་འགྱུར།། འཁོར་བ་དངོས་པོ་ཡོད་མིན་ལ།། སེམས་ཅན་རྣམས་ཀྱང་དེ་དང་འདྲ།། བྱང་ཆུབ་སེམས་ནི་མཐོང་ནས་ནི།། བཏང་སྙོམས་ཆེན་པོར་གྱུར་པ་ཡིན།། དེ་ནས་རྡོ་རྗེ་འཛིན་པ་ཡིས། ། ཐོས་པའི་བྱང་ཆུབ་སེམས་དྲན་ཞིང་།། སླར་ཡང་དེ་དོན་མཚན་ཉིད་ནི།། རྣམ་པར་སྣང་མཛད་ཆེ་ལ་ཞུས།། འཁོར་དང་ཅིག་ཤོས་ཞེས་བྱ་བ།། འདི་ཀུན་བྱང་ཆུབ་སེམས་ཡིན་ན། ཇི་ལྟར་སོ་སོར་གྱུར་ནས་ནི།། ཕན་ཚུན་འགལ་བར་རབ་ཏུ་གནས།། བདག་ཉིད་ཀྱིས་ནི་བདག་ཉིད་ལ།། གཉིས་སུ་འགོག་བྱེད་གང་ཡང་མེད།། གང་ཞིག་ནོར་བུ་གཅིག་ལས་བྱུང་། ། མི་མཐུན་ཕྱོགས་སུ་ཇི་ལྟར་སྣང་།། དམན་དང་བར་མ་དེ་བཞིན་མཆོག། འཁོར་བར་ཉོན་མོངས་མི་བཟད་པས།། སེམས་ཅན་ཁ་ཅིག་གཟིར་བ་དང་།། བྱང་ཆུབ་སེམས་ལའང་སྦྱར་བར་གྱུར། ། དེ་ལྟའི་རྣམ་རྟོག་ཀུན་རྟོག་པར།། མ་འོངས་སྐྱེ་བོ་བགྱིད་འགྱུར་གྱི།། རྟེན་ཅིང་འབྲེལ་འབྱུང་ལས་བྱུང་བ།། འདི་དག་འཚལ་བར་མི་འགྱུར་རོ།། དངོས་པོ་མེད་པའི་ཆོས་རྣམས་ལ།། བྱིས་པ་རྣམས་ནི་བརྩོད་པར་འགྱུར།། དེ་རྣམས་རྩོད་པ་མེད་པའི་ཕྱིར།། དགོངས་པ་བཤད་པར་མཛད་དུ་གསོལ།། དེ་ནས་བདག་པོ་བཅོམ་ལྡན་འདས།། རྡོ་རྗེ་ཅན་ལ་གསང་དགོངས་པ།། ཤིན་ཏུ་རྙེད་དཀའ་བྱང་ཆུབ་སེམས། ། འདི་ནི་ཡང་དག་བཀའ་སྩལ་ཏོ།། ཕྱི་མའི་མཐའ་གང་སྟོང་པ་གཅིག། སྔོན་གྱི་མཐར་ཐུག་དེ་བཞིན་ཏེ།། སེམས་དེ་མངོན་དུ་བྱས་ནས་ནི།། ཅི་དགའ་བར་ནི་བྱ་བ་ཡིན། ། སེམས་ནི་དེ་ཡིས་མ་མཐོང་བས།། ལྟ་བ་སོ་སོར་གྱུར་པ་ཡིན།། དེ་བས་དེ་རྣམས་འཁོར་པ་རུ།། འགྲོ་བ་དྲུག་གི་མིང་དུ་གྱུར།། དེས་ན་ཚངས་པ་ཁྱབ་འཇུག་དང་།། དབང་ཕྱུག་ཆེ་ལ་ཀུན་ཏུ་བརྟེན། ། ཟླ་བ་ཉི་མ་བྱ་བ་ཡི།། ཀུན་ཏུ་སྤྱོད་པ་དེ་རྣམས་བྱེད།། སུམ་ཅུ་རྩ་གསུམ་པར་བཤད་དང་།། དགའ་ལྡན་གྱི་ནི་གནས་དག་དང་།། དེ་བཞིན་གཞན་དག་དམྱལ་བར་ཡང་།། ལྟ་བས་སྐད་ཅིག་དག་གིས་འགྲོ། ། ཡི་དགས་སུ་ཡང་འགྲོ་བ་དང་།། འགྲོ་བ་སྣ་ཚོགས་དག་ཏུ་འགྲོ།། གང་ཚེ་མ་རིག་ཀུན་བརྟེན་པས།། བདག་ཉིད་ཀྱང་ནི་མི་ཤེས་སོ།། འདུ་ཤེས་ཅན་དང་འདུ་ཤེས་མེད།། སེམས་ཅན་དུ་བརྟགས་འདི་གནས་པ། ། དེ་རྣམས་རླུང་ལས་བྱུང་བ་སྟེ།། རླུང་ལས་སླར་ཡང་འགག་པ་ཡིན།། ཉིན་དང་མཚན་མོའི་ཆ་ཡིས་ཀྱང་།། རང་གི་རྣམ་པར་རྟོག་པར་ལྟུང་།། དེ་ནས་འཁོར་བར་སྐྲག་བཞིན་དུ། ། སྣ་ཚོགས་འགྲོ་བར་དེ་དག་འགྲོ།། མི་རྟོག་པ་ཡི་སེམས་དེ་ནི།། འཁོར་བའི་རྒྱ་མཚོར་གནས་གྱུར་ཀྱང་།། དི་ནི་ཕྱིན་ཅི་ལོག་གྱུར་པས།། ཁྱི་དང་ཅེ་སྤྱད་གླང་པོ་དང་།། སེམས་དེ་ལྟར་ཡང་འགྲོ་བར་འགྱུར། ། དེ་བཞིན་དུ་ནི་ཕག་ཉིད་དང་།། མི་ཡི་རིགས་ནི་སྨིག་མཁན་དང་།། སྨེ་ཤ་ཅན་དང་རིགས་ངན་དང་།། བཟའ་དང་མི་བཟའ་བྱ་ཀུན་ཏུ།། བྱང་ཆུབ་སེམས་དེ་སྐྱེ་བར་འགྱུར།། བྲམ་ཟེ་ལ་སོགས་འཇིག་རྟེན་ཤེས། ། བྱང་ཆུབ་སེམས་ལས་འབྱུང་བར་འགྱུར།། ཕུང་སོགས་དངོས་པོ་མེད་འགྱུར་ལས།། རང་གི་མྱོང་བ་ཤེས་པར་འགྱུར།། དེ་ནི་འཇིག་རྟེན་ཤེས་ཞེས་བཤད།། འཇིག་རྟེན་པ་ནི་བྱང་ཆུབ་སེམས། ། ཉེ་བར་དམིགས་པའི་སྦྱོར་བ་ཡིས།། སངས་རྒྱས་སྐུ་རུ་འདི་འབྱུང་སྟེ།། སྒྱུ་མ་ལྟ་བུའི་རང་བཞིན་ཉིད།། ཚིག་གིས་བརྗོད་པ་ཙམ་དུ་འགྱུར།། དེ་ནས་བཅོམ་ལྡན་རྡོ་རྗེ་ཅན།། རྡོ་རྗེ་སྙིང་པོའི་དོན་གསུངས་པ། ། འགྲོ་བའི་བླ་མ་གཅིག་པུ་ལ།། ཕྱག་འཚལ་ནས་ནི་སླར་གསོལ་པ།། འཇིག་རྟེན་པ་ཡི་ལུང་ཉིད་ནི།། བྱང་ཆུབ་སེམས་ནི་རབ་གསུངས་ནས།། ཇི་ལྟར་འཇིག་རྟེན་ལས་འདས་པ། མ་འོངས་པ་ཡིས་ཇི་ལྟར་རྟོགས།། ལྟ་བ་ཐམས་ཅད་རབ་སྤང་ཕྱིར།། ཁྱེད་ཀྱི་ཆོས་རྣམས་སྟོན་མཛད་ན།། ཇི་ལྟར་བྱང་ཆུབ་སེམས་དེ་ཉིད།། ལྟ་བ་དེ་ནི་རབ་བསྟན་འགྱུར།། དགོངས་པའི་ཚིག་ལ་རྨོངས་པ་རྣམས།། གསུངས་པའི་དོན་ནི་མ་རྟོགས་ནས།། གསུངས་པ་འདི་ལས་གཞན་མིན་ཞེས།། དེ་ནི་ཇི་བཞིན་སླར་འཛིན་ཏོ།། དེ་ནས་བཅོམ་ལྡན་སྣ་ཚོགས་པས།། ལག་ན་རྡོ་རྗེ་ལ་གསུངས་པ། ། ཁྱེད་གསུང་དགོངས་པ་མ་རྟོགས་པ།། འདྲི་བར་བྱེད་པ་ལེགས་སོ་ཞེས།། བྱང་ཆུབ་སེམས་ནི་རླུང་གྱུར་ཅིང་།། ནམ་མཁའ་ལ་ནི་རྣམ་གནས་པ།། སེམས་ཅན་ཀུན་གྱི་སྲོག་གྱུར་གང་། ། ལྔ་ཡི་བདག་ཉིད་བཅུ་མིང་ཅན།། རྟེན་འབྲེལ་བཅུ་གཉིས་ཞེས་གྲགས་པ།། ངོ་བོ་ཉིད་རྣམ་གསུམ་དུ་འགྱུར།། རླུང་ཞེས་བྱ་བའི་བྱང་ཆུབ་སེམས།། དབང་པོ་ཀུན་གྱི་གཙོ་འདི་ཡིན།། ཇི་ལྟར་མི་མངོན་ཕྲ་བ་ལས།། རྟག་ཏུ་གསལ་བར་བརྗོད་པ་ཡིན།། འགྲོ་བ་ཡུལ་སོགས་ལས་བྱེད་པ།། འདིར་ནི་དེ་ལ་བརྟེན་པ་ཡིན།། ཞི་བ་དང་ནི་རྒྱས་པ་དང་།། དབང་དང་དེ་བཞིན་མངོན་སྤྱོད་རྣམས། ། དེ་ཉིད་གསུམ་གནས་ལ་བརྟེན་ནས།། དེ་ཀུན་བྱང་ཆུབ་སེམས་ཀྱི་བྱེད།། ཇི་སྲིད་འཇིག་རྟེན་བཏགས་པ་དང་།། དེ་བཞིན་བཏགས་པ་སྣ་ཚོགས་རྣམས།། རྣམ་རྟོག་བྱང་ཆུབ་སེམས་ཞེས་པའི། ། རླུང་ལས་རྟག་ཏུ་འབྱུང་བ་ཡིན།། བདེ་སྡུག་ལ་སོགས་ཆོས་རྣམས་ཀྱི།། ས་བོན་ལྟ་བུར་བཤད་པ་ཡིན།། བྱང་ཆུབ་སེམས་ཀྱི་ངོ་བོ་འདི།། ཕུང་སོགས་གཉིས་མེད་མཁའ་དང་མཉམ།། ། ཤེས་རབ་ཐབས་དང་སྦྱོར་བ་ཡིས།། བྱང་ཆུབ་སེམས་ནི་འགྲོ་བར་འགྱུར།། ཀློག་དང་བསམ་གཏན་རྣམ་སྤངས་པར།། བདག་པོར་བདག་ཉིད་ཟློས་པ་དེ།། ཉིན་དང་མཚན་མོའི་དབྱེ་བ་ཡིས།། ཉི་ཟླ་རབ་ཏུ་སྦྱོར་བ་ཡིས།། དངོས་པོ་མེད་པར་འགྲོ་ཁྱབ་པ།། བྱང་ཆུབ་སེམས་ཀྱི་རླུང་གཅིག་པུ།། དགེ་དང་མི་དགེ་འབྲས་སྤངས་ནས།། ནམ་མཁའ་འདྲ་བར་འགྱུར་བ་ཡིན།། འགྲོ་བའི་དོན་ནི་ཤེས་པས་ཀྱང་། ། མིང་ནི་དེ་བཞིན་ཉིད་ཅེས་བྱ།། དབྱངས་ཀྱི་ཐུང་ངུ་ཉིན་མོར་བཤད།། རིང་པོ་མཚན་མོ་ཡིན་པར་བཤད།། དབྱངས་དང་གསལ་བྱེད་དབྱེ་བ་ལས།། དེ་ཉིད་མིང་ལས་སྦྱར་བར་བྱ།། ཨེ་མའོ་འགྲོ་བའི་བྱ་བ་བྱུང་།། དེ་ཉིད་གཞན་ལས་དེ་ཉིད་གསལ།། དེ་ལས་འཇིག་རྟེན་པ་ཡི་བརྡ།། མྱུར་དུ་མངོན་པར་ཤེས་པར་འགྱུར།། དེ་ནས་གསང་བའི་བདག་པོས་ནི།། བྱང་ཆུབ་སེམས་འདི་ཐོས་པ་དང་། ། གཙོ་བོ་རྣམ་སྣང་ཆེན་པོ་ལས།། ཁྱབ་བདག་ལ་ནི་སླར་གསོལ་པ།། སེམས་ཅན་ཐམས་ཅད་སྐྱེད་པ་པོ།། སྣ་ཚོགས་གཟུགས་ཅན་སེམས་འདི་ནི།། དེ་བས་དངོས་པོ་མེད་གྱུར་ཀྱང་།། སྲིད་པ་དག་ཏུ་རབ་ཏུ་གྲགས།། བྱང་ཆུབ་སེམས་ནི་མཁའ་མཉམ་པ།། ལེགས་པར་རྗེས་སུ་མྱོང་མཛད་པ།། འགྲོ་བའི་དོན་ནི་མཛད་པ་པོ།། སྐྱེ་བོ་མཆོག་ལ་དེ་བསྟན་གསོལ།། སྒྲུབ་པ་ཡི་ནི་ཐབས་ཙས་ཞིག། ཤེས་ནས་རྒྱུད་ལ་རྒྱབ་ཀྱིས་ཕྱོགས།། འདི་ལྟར་བདག་ནི་སློབ་དཔོན་ཞེས།། མ་འོངས་པ་ན་སྨྲ་བར་འགྱུར།། བདག་གི་ཚིག་ནི་འདི་ཉིད་དག། ཡིན་ཞེས་སྨྲ་ཞིང་བྱས་པའཇིག། དེས་ནི་དགོངས་པའི་བྱང་ཆུབ་སེམས། ། ཇི་བཞིན་དོན་དུ་མི་ཤེས་སོ།། དེ་བཞིན་འཇིག་རྟེན་པ་རྣམས་ནི།། སྐལ་མེད་ཆོས་ཀུན་རྣམས་སྤངས་ལ།། རིག་པ་ཡང་ནི་མི་མཐོང་བས།། དེ་རྣམས་ལ་ཡང་གནས་མེད་འགྱུར། ། དེ་བས་བྱང་ཆུབ་སེམས་བདུད་རྩི།། དེ་ནི་སྨྲ་བར་རིགས་པ་ཡིན།། འབྲེལ་བའི་ཉི་མ་ཐོབ་པ་ནི།། མ་འོངས་པ་ན་འབྱུང་བར་འགྱུར།། དེ་ནས་བཅོམ་ལྡན་སྣ་ཚོགས་པས།། གྲགས་ལྡན་རྡོ་རྗེ་འཛིན་པ་ལས། བྱང་ཆུབ་སེམས་ཀྱིས་ངེས་པའི་དོན།། སླར་ཡང་དེ་ཉིད་ལ་གསུངས་པ།། ནང་ན་མ་ཡིན་ཕྱི་རོལ་མིན།། གཉིས་ཀ་མིང་དུའང་འགྱུར་མ་ཡིན།། རྟག་པ་མ་ཡིན་སྐད་ཅིག་མིན། ། དེ་ནི་སོ་སོ་རང་རིག་ཡིན།། མི་རྟོག་ནམ་མཁའ་ཇི་བཞིན་དུ། བྱང་ཆུབ་སེམས་ནི་རྡོ་རྗེ་འཛིན།། དེ་བཞིན་གཤེགས་པ་འགྲོ་བའི་དོན།། ཡིད་བཞིན་ནོར་བུ་ལྟ་བུར་བྱུང་།། འདས་དང་མ་འོངས་པ་ཉིད་དང་། ། ད་ལྟར་ཞེས་ནི་བྱ་བ་དང་།། སངས་རྒྱས་སྐུ་ཡང་འབྱུང་འགྱུར་བ།། དོན་དམ་གཅིག་ནི་ཀུན་རྫོབ་ཡིན།། རིག་བྱེད་དུས་དང་མེ་ཡི་སྒྲ།། ཉི་ཟླ་རླུང་གི་གཟུགས་ཅན་ཏེ།། བཞི་བྱེད་གསུམ་པ་དག་ལས་བྱུང་། ། བྱང་ཆུབ་སེམས་གཅིག་དབྱེ་བ་ཉིད།། དེ་ནི་ཤེས་རབ་ཐབས་ཟུང་འབྲེལ།། དེ་བཞིན་བདེ་བྱེད་འཛིན་པ་དང་།། ཧ་ནི་སོ་ལ་གནས་པ་ཡང་།། གནས་སྐབས་ཇི་སྙེད་དེ་བཞིན་དུ། ། མིང་ནི་ཡོད་པ་མ་ཡིན་པ།། དེ་འདི་བྱང་ཆུབ་སེམས་སུ་འགྱུར།། རྡོ་རྗེ་ནང་དུ་ཞུགས་གྱུར་པ།། བསམ་བྱའི་སྙིང་པོའང་དེ་ཉིད་ཡིན།། ལྷོད་པ་གནས་ཞེས་བྱ་བ་ནི།། ཚག་དྲག་བཅས་པའི་རླུང་ཡིན་ནོ། ། རང་ཉིད་ལྷོད་པར་བྱེད་པའི་མཆོག། དེ་ནི་སྲོག་དབང་ཡིད་ཀྱང་ཡིན།། ང་རྒྱལ་དང་ནི་དེ་བཞིན་ཐོ།། དེ་དང་ལྡན་པ་བྱང་ཆུབ་སེམས།། བཞིར་གྲགས་ཆ་ལས་ཡང་དག་བྱུང་།། ཡོད་མེད་རབ་ཏུ་ཞི་བ་ཅམ། དངོས་པོ་མེད་པའི་སེམས་འདི་ནི།། རང་རིག་གཅིག་པུའི་སྤྱོད་ཡུལ་ཡིན།། དེ་ཉིད་དོན་ནི་རིག་བྱེད་པ།། དགོངས་པས་ཡང་དག་བཤད་པ་ཡིན།། དེ་ནས་གསང་བའི་དགོངས་པ་འདི།། ཆོས་ཀྱི་ཡི་གེ་མཆོག་ཐོས་ནས། ། བྱམས་པ་ཞེས་ལ་སོགས་པ་ཡི།། བྱང་ཆུབ་སེམས་དཔའ་སེམས་དཔའ་ཆེ།། ངོ་མཚར་རྨད་བྱུང་ལེགས་སྐྱེས་ནས།། ཆེད་དུ་བརྗོད་པ་ཆེད་དུ་བརྗོད།། ཨེ་མའོ་སངས་རྒྱས་ཨེ་མའོ་ཆོས།། ཨེ་མའོ་ཆོས་ནི་སྟོན་མཛད་པ།། དངོས་ཀུན་དག་པའི་དོན་གཅིག་པུ།། དག་པའི་དེ་ཉིད་དོན་དག་སྟེ།། རྣམ་པར་མི་རྟོག་མཁའ་མཚུངས་བཤད།། བྱང་ཆུབ་སེམས་ལ་ཕྱག་འཚལ་ལོ།། བདག་མེད་ཆོས་ལས་ཡང་དག་བྱུང་། ། བྱང་ཆུབ་ཚོགས་ནི་རྫོགས་བྱེད་པ།། ངོ་བོ་མེད་ཅིང་དམིགས་སུ་མེད།། བྱང་ཆུབ་སེམས་ལ་ཕྱག་འཚལ་ལོ།། ཀུན་བཟང་གཅིག་ལས་ཡང་དག་བྱུང་།། དགོངས་དོན་བྱང་ཆུབ་སྟེར་བ་པོ།། ། བྱང་ཆུབ་སྤྱོད་མཆོག་རྡོ་རྗེ་མཆོག། བྱང་ཆུབ་སེམས་ལ་ཕྱག་འཚལ་ལོ།། དག་པ་དེ་བཞིན་གཤེགས་པའི་ཐུགས།། སངས་རྒྱས་བྱང་ཆུབ་རབ་སྒྲུབ་པ།། རྡོ་རྗེ་གསུམ་ནི་རང་བཞིན་གཅིག། བྱང་ཆུབ་སེམས་ལ་ཕྱག་འཚལ་ལོ། ། དགོངས་པ་ལུང་སྟོན་ལ་དད་པར།། གང་གིས་ཡིད་ནི་བཟོད་གྱུར་པ།། དམ་ཚིག་གསུམ་གྱི་རྡོ་རྗེ་ལས།། དེས་ནི་དེ་བཞིན་བྱ་བ་ཡིན།། དེ་བཞིན་གཤེགས་པ་ཐམས་ཅད་ཀྱི། ། མཁའ་དབུས་སངས་རྒྱས་དཀྱིལ་འཁོར་དུ།། དེ་རྣམས་ཀྱང་ནི་ཇི་ལྟར་འགྱུར།། ཅིག་ཤོས་ཕྱི་རོལ་དུ་བསྒོམས་པ།། དཀྱིལ་འཁོར་སངས་རྒྱས་མིང་ཅན་ནི། ། དངོས་པོ་མེད་པའི་དངོས་པོ་ལ།། སྒོམ་པ་པོ་རྣམས་ཇི་ལྟར་བརྟག། མགོན་པོ་ཕྲ་མོའི་རྣལ་འབྱོར་འདི།། དཀྱིལ་འཁོར་གང་ཞིག་བཀའ་སྩོལ་ཅེས།། གང་ཞིག་མ་འོངས་པ་རྣམས་ནི་འདི་ལྟར་མཆོག་ཏུའང་སོམ་ཉི་འཚལ། ། ལག་ན་རྡོ་རྗེ་གྲགས་ལྡན་པ།། ཕྲ་མོའི་རྣལ་འབྱོར་དེ་ཉིད་སྐྱེས།། འགྲོ་བ་གཉིས་མེད་སྦྱོར་བ་ཡིས།། ཕྲ་བ་དགོངས་པས་གསུངས་པ་ཡིན།། རྣམ་ལྔ་མངོན་པར་བྱང་ཆུབ་འདི། ། མ་འོངས་སྐྱེ་བོའི་རྒྱུར་གྱུར་ཏེ།། ཆོས་ནི་ཡང་དག་སྡུད་འགྱུར་གང་།། ཇི་ལྟ་ཇི་ལྟར་སྟོན་པར་བྱེད།། ཕུང་པོ་ཉིད་ནི་སངས་རྒྱས་གྱུར།། བྱང་ཆུབ་དོན་གྱི་རྐྱེན་ལས་བྱུང་།། དེ་ཡང་དེ་བཞིན་གཤེགས་བཤད་པ།། དེ་ཉིད་གཉིས་མེད་སྦྱོར་བས་སོ།། སྟོན་དང་འཇོག་པ་པོ་འདི་ནི།། བློ་ཡི་དངོས་གྲུབ་སྟོན་པ་པོ།། ཐོག་མཐའ་མེད་པ་རྣལ་འབྱོར་ནི།། ཕྲ་མོ་ཞེས་ནི་བྱ་བར་བརྟག། མི་གསལ་གསལ་བར་ཡང་དག་སྦྱོར།། དངོས་མེད་ངོ་བོ་ལས་སྐྱེས་པའོ།། གཟོད་མ་ཉིད་ནས་རང་གྲུབ་པ།། གཅིག་དང་དུ་མ་རྣམ་སྤངས་པ།། རྟེན་འབྲེལ་ཆོས་ཞེས་གྲགས་པ་སྟེ།། དངོས་པོ་ཐམས་ཅད་གཅིག་ཏུ་བྱུང་། ། བདག་ཉིད་འདི་འདྲར་བྱས་ནས་ནི།། ཆོས་ཀྱི་དཀྱིལ་འཁོར་ཡང་དག་བྲི།། དམར་དང་གནག་དང་དེ་བཞིན་སེར།། དཀར་པོ་ཉིད་ནི་མདོ་རུ་སྟེ།། བཞི་བཞི་གཅིག་ཏུ་སྦྱོར་བ་ཡང་། ། གོས་དཀར་ལ་སོགས་ཡང་དག་བྲི།། དེ་རྣམས་དབུས་སུ་ལྷ་མོར་བཅས།། ཞི་སྦྱོར་མཆོག་དང་མཆོག་མིན་དང་།། སྟེང་དང་ཐད་ཀ་མཉམ་དང་འོག། ཇི་ལྟ་ཇི་ལྟར་གོས་དཀར་སོགས། ། མེ་དང་རླུང་དང་དབང་ཆེན་དང་།། ཆུ་སྟེ་སོ་སོའི་དཀྱིལ་འཁོར་ལ།། བཅོ་བརྒྱད་དག་ཏུ་ཡང་དག་བཤད།། དེ་ཡང་འདི་ཉིད་དག་ལ་བཤད།། ཇི་ལྟར་འོ་མ་ཁྱད་པར་ནི།། མར་གསར་གནས་པར་གྱུར་པ་ཡིན། ། དེ་བཞིན་གོས་དཀར་ལ་སོགས་ལ།། ཞི་བ་ཉིད་ནི་དེ་གནས་སོ།། གཟུགས་ལ་སོགས་པ་ནང་གི་ཆོས།། མཐོང་བ་དེ་ནི་ལྷག་མཐོང་ཡིན།། མི་བསྐྱོད་ལ་སོགས་གྲངས་ཇི་བཞིན། ། རྟོག་པ་དག་ནི་ཞི་གནས་ཡིན།། འདི་གཉིས་དངོས་པོ་མེད་པའི་བདག། དེ་བཞིན་ཉིད་ནི་ཞི་ཞེས་བྱ།། དེ་བཞིན་ཉིད་ཀྱི་དཀྱིལ་འཁོར་དུ།། སངས་རྒྱས་ཐམས་ཅད་བཞུགས་པར་བྱ། ། རྣལ་འབྱོར་པ་ཡི་དབུགས་རྔུབ་དབྱུང་།། སྦྱོར་བ་དེ་ཉིད་གཅིག་པ་ཉིད།། ཤེས་རབ་ཐབས་ལ་གནས་ནས་ནི།། སྔགས་ཀྱི་ཡན་ལག་མ་ཉམས་བཟླས།། བྱ་བ་ཐམས་ཅད་ཉིད་དུ་ཡང་།། རྣལ་འབྱོར་རིག་པས་ཉལ་སོགས་ལ།། མིང་མེད་བརྗོད་དུ་མེད་པ་དང་།། དུས་གསུམ་འདས་པ་རྟག་ཏུ་བཟླ།། གོས་དཀར་ལ་སོགས་བཟླས་བཤད་པ།། བརྒྱ་ཕྲག་གཉིས་དང་ཉི་ཤུ་ལྔ། བཞི་པ་ལེགས་པར་བསྒྲེས་པ་ཡིས།། སྦྱོར་བཞིས་བསྡུས་པས་བརྒྱ་ཕྲག་དགུ།། དགུ་བརྒྱ་དག་ཏུ་གང་བསྟན་པ།། ཉི་ཤུ་རྩ་བཞིའི་རིམ་གྱིས་ནི།། དེ་ནི་སོ་སོར་འབྱུང་བ་ལས།། ཉི་ཤུ་ཚིག་སྟོང་དྲུག་བརྒྱའོ།། དེ་འདིར་གསང་བདགོངས་པ་ཡིས།། ཕྲ་མོའི་རྣལ་འབྱོར་བསྟན་པ་ཡིན།། སྲོག་དང་བསམ་གཏན་མེད་མོད་ཀྱི།། འོན་ཀྱང་བཟླས་པ་ཡིན་པར་བཤད།། དེ་ལྟར་རྣམ་པ་མང་པོ་ཡྀ། འགྲོ་ས་ཕན་པའི་གསུང་ཐོས་ནས།། དེ་བཞིན་གཤེགས་ཀུན་བདག་པོ་ལ།། རྡོ་རྗེ་ཆེན་གྱིས་སླར་ཡང་ཞུས།། གང་ཞིག་བསྒོམས་ན་མ་འོངས་འགྲོ།། ཐམས་ཅད་མི་རྟོག་པར་འགྱུར་བ།། རྡོ་རྗེ་གསུམ་ཀྱི་སྲིང་པོ་མཆོག། སྙིང་པོ་བཅོམ་ལྡན་བཤད་དུ་གསོལ།། དེ་ཉིད་གསུམ་གཉིས་མེད་སྦྱོར་བ།། དེ་ནི་ཕྲ་མོའི་རྡོ་རྗེ་སྒོམ།། མྱུར་བ་ལ་སོགས་གསུམ་སྤངས་པའི།། རྣལ་འབྱོར་པར་ཡང་བདག་ཅག་འགྱུར། དེ་ནི་བདག་རིག་ཡིད་ཆེས་ཤིང་།། ཞི་བ་ཉིད་ནི་མི་ཤེས་འགྱུར།། ཐ་མོའི་རྣལ་འབྱོར་གཙོ་སྤངས་ཏེ།། ལོག་པའི་རྣལ་འབྱོར་ཀུན་ཏུ་བསྟེན།། སྟོན་པ་པོ་ཡི་སྦྱོར་བ་བཞིན།། ཕྲ་མོ་ཞེས་བྱ་དེ་ཉིད་ནི། མ་འོངས་དུས་ན་སྤོངས་འགྱུར་བ།། དེ་ཉིད་དེ་ནི་ངེས་པར་བྱེད།། དེ་ནས་རྡོ་རྗེ་འཛིན་སྨྲ་བའི།། ལུང་བསྟན་པ་ནི་གསན་པ་དང་།། དེ་བཞིན་གཤེགས་པ་ཀུན་བདག་པོ།། ཆོས་ཉིད་ངོ་བོ་ཉིད་ཅེས་བྱའི།། ཏིང་ངེ་འཛིན་དེ་ཀུན་ནས་ནི། ། སྙོམས་པར་ཞུགས་པ་ཉིད་དུ་མཛད།། དཔལ་ལྡན་སྙོམས་པར་ཞུགས་མཛད་ནས།། གསང་སྔགས་འདི་ནི་བཀའ་སྩལ་ཏོ།། སྐུ་གསུང་ཐུགས་ནི་རྡོ་རྗེར་བཤད།། ཁྱད་པར་དུ་ནི་བྱིན་རླབ་པ། ། གཉིས་མེད་རྡོ་རྗེ་གསུམ་སྦྱོར་བས།། དེ་ནི་ཡང་དག་བཤད་པར་བྱ།། ཨོཾ་ནི་དང་པོར་ཤེས་པར་བྱ།། དྷརྨ་ཞེས་བྱ་གཉིས་པའོ།། དྷཱ་ཏུ་ཞེས་བྱ་གསུམ་པར་བཤད།། སྭ་བྷཱ་བར་གྲགས་བཞི་པའོ།། ཨཱཏྨ་ཀཿནི་ལྔ་པ་ཡིན།། ཨ་ཧཾ་དུ་གྱུར་དྲུག་པར་འདོད་།། སྔགས་འདི་བརྗོད་ནས་དེ་འོག་ཏུ།། སྒོམ་པ་བདག་ཉིད་ཅན་གྱིས་བསྒོམས།། རིན་ཆེན་ཁ་དོག་སྣ་ལྔ་པ།། ཡུངས་ཀར་གྱི་ནི་འབྲུ་ཚོད་ཙམ། ཉམས་དགའ་རི་རབ་རྩེ་མོ་རུ།། རྣལ་འབྱོར་པ་ཡིས་རྟག་པར་བསྒོམ།། རིན་ཆེན་མི་གཡོར་གྱུར་ནས་སྤྲོ།། མི་གཡོར་མ་གྱུར་སྤྲོ་མི་བྱ།། སངས་རྒྱས་འབར་བའི་འོད་འདྲ་བ།། མཆོག་རབ་སྤྲིན་རྣམས་སྤྲོ་བར་བྱ། ། འཁོར་ལོ་རྡོ་རྗེ་སྤྲིན་ཚན་དང་།། པདྨ་རལ་གྲི་མཚོན་ཆ་མཆོག། བྱང་ཆུབ་སེམས་དཔའི་སྤྲིན་ཆེན་རྣམས།། སྤྲོ་བའི་བདག་ཉིད་ཅན་གྱིས་སྤྲོ།། ཕྲ་མོའི་དཀྱིལ་འཁོར་དབུས་གནས་པར།། རྡོ་རྗེ་དཀྱིལ་འཁོར་བསྒོམ་པར་བྱ།། བཟླས་དང་སྒོམ་པའི་སྦྱོར་བ་ཡང་།། པདྨའི་དཀྱིལ་འཁོར་དག་ཏུ་བསྒོམ།། རིན་ཆེན་ལྟ་བུའི་དཀྱིལ་འཁོར་དུ།། དངོས་ལ་བརྩོན་པས་རིན་ཆེན་བསྒོམ།། དཀྱིལ་འཁོར་སྦྱོར་བ་ལས་བྱུང་བ། ། ནམ་མཁའི་དཀྱིལ་འཁོར་དུ་བྲི་བྱ།། འདི་དག་སངས་རྒྱས་རབ་མཆོག་གི། ཕྲ་མོ་རྡོ་རྗེ་གསུམ་སྒྲུབ་པའོ།། རྡོ་རྗེ་དཀྱིལ་འཁོར་ལས་བྱུང་བ།། ཐམས་ཅད་མཁྱེན་པའི་ཚུལ་ཐོབ་པའོ།། དགོངས་པ་གསང་བ་ཞེས་པ་ཡི།། ལུང་སྟོན་དམ་པ་འདི་ལ་ནི།། གང་གིས་སེམས་ནི་བཟོད་གྱུར་པ།། དེ་ནི་དེ་བཞིན་བྱེད་པ་ཡིན།། དེ་བཞིན་གཤེགས་པ་ཀུན་གྱི་གསང་།། རྡོ་རྗེ་ཕྲ་མོ་དེ་ཉིད་ལས།། འདི་ནི་རྡོ་རྗེ་དཀོད་པའི་མཆོག། ལེའུ་གསུམ་པ་ཉིད་ཡིན་ནོ།། །། དེ་ནས་བཅོམ་ལྡན་འདས་ཐམས་ཅད།། གཉིས་སུ་མེད་པར་གྱུར་ནས་ནི།། སླར་ཡང་རྡོ་རྗེ་གསུམ་བདག་ལ། བསྟོད་པས་དེ་རྣམས་གསོལ་བ་འདེབས།། དེ་བཞིན་གཤེགས་པ་ཐམས་ཅད་ཀྱི།། ཞི་བ་གནས་རྣམས་མཆོག་གྱུར་པ།། ཆོས་ཀུན་གཅིག་ཏུ་བདག་མེད་པ།། དཀྱིལ་འཁོར་མཆོག་འདི་བཤད་དུ་གསོལ། ། ཡོངས་སུ་རྫོགས་པར་ཡང་དག་བརྒྱན།། མཚན་རྣམས་ཀུན་གྱིས་མཚན་པའོ།། ཀུན་ཏུ་བཟང་པོ་སྐུ་ཡི་མཆོག། དཀྱིལ་འཁོར་དམ་པ་བཤད་དུ་གསོལ།། ཡེ་ཤེས་སྤྱོད་པའི་དོན་ལས་བྱུང་། ། ཞི་བའི་ཆོས་ནི་སྦྱོར་བ་པོ།། ཀུན་ཏུ་བཟང་པོ་གསུང་གི་མཆོག། དངོས་མཆོག་དཀྱིལ་འཁོར་བཤད་དུ་གསོལ།། རང་བཞིན་གྱིས་ནི་དྲི་མེད་དག། སེམས་ནི་ཀུན་ཏུ་བཟང་པོ་ཉིད། ། སེམས་ཅན་ཀུན་གཅིག་ཆེ་བའི་མཆོག། དཀྱིལ་འཁོར་སྙིང་པོ་བཤད་དུ་གསོལ།། དེ་ནས་སྟོན་པ་བཅོམ་ལྡན་འདས།། ཁམས་གཅིག་ཁམས་ནི་གསུམ་པ་པོ།། འཇིག་རྟེན་གསུམ་མཆོག་རྡོ་རྗེ་མཆོག། འཇིག་རྟེན་གསུམ་གྱི་སྟོན་པའོ།། ཉམས་དགའ་དེ་བཞིན་གཤེགས་པའི་གནས།། དེ་བཞིན་གཤེགས་པ་ཀུན་དག་ལ།། ཐུགས་དེ་དཀྱིལ་འཁོར་འདྲ་བ་སྟེ།། དཀྱིལ་འཁོར་དམ་པ་བཀའ་སྩལ་ཏོ། ། དེ་ནས་སེམས་ཀྱི་དཀྱིལ་འཁོར་མཆོག། རྡོ་རྗེ་ཡེ་ཤེས་རབ་འདྲ་བ།། སྐུ་དང་གསུང་དང་ཐུགས་རྣམས་ཀྱི།། དཀྱིལ་འཁོར་རབ་ཏུ་བཤད་པར་བྱ།། འདི་ནི་གསལ་བའི་བདག་ཉིད་མཆོག། ལེགས་སྒྲིལ་དེ་བཞིན་ཉིད་བསྟན་པའོ།། སྣ་ཚོགས་ལུང་གི་མཚན་མ་ནི།། མཚན་མ་བཟང་པོར་དེ་བཤད་དོ།། ཀུན་རྫོབ་དང་ནི་དོན་དམ་ངག། གཉིས་སུ་མེད་པ་མཛེས་པ་ཡིན།། ཤེས་རབ་འདི་ནི་ཐིག་ཡིན་ཏེ།། ཐབས་ནི་དེ་ཡི་རྗེས་འཇུག་པའོ།། ཤེས་རབ་ཐབས་ཀྱི་ཐིག་གཅིག་གིས།། ཆོས་དང་ལོངས་སྤྱོད་རྫོགས་མཆོག་ནི།། སེམས་ཀྱི་དཀྱིལ་འཁོར་ཐིག་གདབ་སྟེ། རྟེན་འབྲེལ་ཡན་ལག་བཅུ་གཉིས་པ།། འཕགས་པའི་བདེན་བཞི་ངོས་བཞི་སྟེ།། ཚངས་པའི་གནས་བཞི་གྲཝ་བཞི་ཡིན།། བསྡུ་དངོས་བཞི་གྲགས་སྒོ་ཡིན་ཏེ།། རེ་རེའང་བཞི་ཡི་མིང་ཅན་ནོ།། ། ཆོས་ཀྱི་དེ་ཉིད་དོན་གྱི་བརྡ།། འཁོར་ལོའི་ནང་གི་དཀྱིལ་འཁོར་རོ།། མི་ཕྱེད་ཡེ་ཤེས་མཚན་མ་སྟེ།། རྡོ་རྗེ་ཨིནྡྲ་ནཱི་ལ་རྒྱ།། རྣམ་པ་ལྔ་ཡིས་རབ་ཕྱེ་བའི།། རྩེ་མོ་འཁོར་བ་འཇིག་བྱེད་པའོ།། ཤར་ནས་མེ་ལོང་ངོ་བོ་ནི།། འཁོར་ལོ་འབར་བའི་འོད་ཀྱིས་བརྒྱན།། ལྷོ་རུ་ཀུན་མཉམ་ཡེ་ཤེས་ཡིན།། གཅིག་གི་མིང་ཅན་རིན་པོ་ཆེ།། ནུབ་ཏུ་སོ་སོར་རྟོག་པདྨ།། པདྨ་རཱ་གའི་འོད་འདྲ་བ། བྱང་དུ་གོང་མའི་སེམས་གང་ཡིན།། འགྲོ་བའི་རྣམ་རྟོག་འཇོམས་བྱེད་པ།། བྱ་བ་སྒྲུབ་པ་རལ་གྲིར་འགྱུར།། འོད་འཕྲོ་འབར་བ་འདྲ་བའི་མདོག། ཤར་ལྷོ་བྱམས་པའང་སྤྱན་ཡིན་ཏེ།། སྤྲིན་སྔོན་དང་ནི་མཉམ་པའི་འོད། ། ལྷོ་ནུབ་སྙིང་རྗེ་ཞེས་བྱ་བ།། མཱ་མ་ཀཱི་ནི་རིགས་རྡོ་རྗེ།། ནུབ་བྱང་པདྨ་ཞེས་བྱ་བ།། དགའ་བ་ལེགས་པར་གནས་པ་བཞིན།། བྱང་ཤར་ཨུཏྤལ་ལྟར་སྣང་བའི།། བཏང་སྙོམས་བཅས་པ་སྔོན་པོ་འདྲ། ། དེ་བཞིན་ཤར་སྒོར་སྦྱིན་པ་ནི།། ཐོ་བ་མདངས་ལྡན་འོད་དང་བཅས།། དེ་བཞིན་སྙན་སྨྲ་ཞེས་གྲགས་པ།། དབྱིག་པ་འོད་བཟང་རྡོ་རྗེ་འབར།། ནུབ་ཏུ་དོན་སྤྱོད་ཅེས་བྱ་བ།། རྟ་མགྲིན་གྱི་ནི་པདྨའོ།། དོན་འཐུན་པ་ནི་རྡོ་རྗེ་སྟེ།། རྡོ་རྗེ་འཁྱིལ་བའི་རྡོ་རྗེ་ཅན།། ཕྱག་རྒྱ་དགོད་པའི་མཚན་ཉིད་དེ།། འདིནི་ལེགས་པར་བཤད་པ་ཡིན།། ཇི་ལྟར་དབྱིབས་ཀྱིས་མཆོད་པ་ནི། ། རྣམ་གསུམ་བསྒོམས་པས་འགྱུར་བ་ཡིན།། དང་པོར་ཆེན་པོ་ཡོད་པ་ཡི།། ཕྱག་རྒྱའི་དཀྱིལ་འཁོར་ཡིན་པར་བཤད།། དེ་ལྟར་མཁའ་དང་མཚུངས་གྱུར་དང་།། ཤེས་ནས་འགྲོ་ལ་ཕན་པར་འགྱུར། ། རྡོ་རྗེ་གསུམ་དང་ལྷན་ཅིག་འབྱུང་།། དེ་ཚེ་ཟླ་གཟེར་འཕྲེང་བ་ཡི།། སྐད་ཅིག་ལ་སོགས་དུས་དབྱེ་བས།། ལོ་གྲངས་བཅུ་དྲུག་པ་ཡི་མིང་།། མ་སྐྱེས་པར་འབྱུང་ཞི་བ་ནི།། བུད་མེད་ཅེས་ནི་ངེས་པར་བཤད། ། ཞི་བའི་ཆོས་དང་རྗེས་དྲན་པ།། མདངས་བཟང་འོད་ནི་ཡིན་པར་གསུངས།། རྟེན་འབྲེལ་བག་ཆགས་དྲི་ཡིན་ཏེ།། ཡེ་ཤེས་ཁ་ཕྱེ་མེ་ཏོག་གོ།། དངོས་པོ་མེད་པར་རིགས་ཡིན་ཏེ།། ཀུན་མཁྱེན་ཡེ་ཤེས་དབུས་ཉིད་དོ། ། ཆོས་དབྱིངས་ཉིད་ཀྱི་བུད་མེད་ནི།། ཤེས་རབ་འདི་འདྲས་མཉེས་པར་བྱས།། ནང་ན་མ་ཡིན་ཕྱི་མ་ཡིན།། གཉིས་ཀར་མ་ཡིན་གཞན་ནས་མིན།། གནས་མེད་གནས་པའི་རྣལ་འབྱོར་གྱུར།། དེ་བས་མཱ་མ་ཀཱིར་བཤད་དོ། ། དེ་ཡི་ངོ་བོ་ཉིད་གཅིག་པ།། བྱིན་གྱིས་བརླབས་པས་དེ་བཤད་དོ།། ནམ་མཁའ་དང་ནི་གཅིག་ཏུ་གནས།། སངས་རྒྱས་ཞི་བའི་གནས་སུ་འགྱུར།། དེ་བས་ཡུལ་དུ་རྣམ་བརྟགས་པ།། བསྡུ་བ་དག་ནི་བཤང་བ་ཡིན། ། ཡེ་ཤེས་དབང་པོ་སྟོང་པ་གཅིན།། རྣམ་དག་ཆོས་ཉིད་ཁུ་བ་ཡིན།། ཐམས་ཅད་མཁྱེན་པའི་ཡེ་ཤེས་ཁྲག། རང་བཞིན་ཆོས་སུ་ཡོངས་བརྟགས་པ།། དེ་ཉིད་ལྷ་རྣམས་ཞེས་བྱ་སྟེ། དངོས་མེད་པ་ནི་དབུལ་བ་ཡིན།། དེ་བྱས་སངས་རྒྱས་སྲས་པོ་རྣམས།། ཁྱད་པར་དུ་ནི་མཉེས་པར་འགྱུར།། གང་ཡང་འཇིག་རྟེན་པས་བརྟགས་པ།། དེ་རྣམས་ཇི་སྐད་བཤད་པ་ཉིད།། མི་ཕྱེད་རྡོ་རྗེ་གསུམ་བསྒོམས་པ། ། གསར་བ་ཉིད་དུ་བཀལ་ལེགས་དང་།། ཤིན་ཏུ་ཚད་ལྡན་མཛེས་པ་ཡི།། ཐིག་གི་མཁས་པས་ཐིག་གདབ་བོ།། བློ་ལྡན་དཀྱིལ་འཁོར་བརྟག་བྱ་བ།། ཁྲུ་ནི་བཅུ་གཉིས་ཚད་ཙམ་ལ། ། དངོས་བཞི་དང་ནི་གྲཝ་བཞིར་ལྡན།། རྟ་བབས་ཀྱིས་ནི་མཛེས་པར་བྱ།། དེ་ཡིས་དབུས་སུ་འཁོར་ལོ་ནི།། དགོངས་པས་དང་པོར་བཤད་པ་སྟེ།། དེ་ལས་བཟློག་པའི་ཚུལ་གྱིས་ནི།། འདི་ན་འཇིག་རྟེན་པ་རྣམས་རྟོགས། ། གང་ཞིག་འཇིག་རྟེན་འདས་ལ་གནས།། དེ་ནི་གཟུངས་ཀྱིས་དབང་བསྐུར་བ།། དངོས་མེད་པ་ནི་འཛིན་པ་དག། ཡིད་ནི་རྟག་ཏུ་མཁའ་དང་མཚུངས།། དམ་པ་འཇིག་རྟེན་ཤིན་ཏུ་འདས། ། འཁོར་བ་དང་ནི་ཅིག་ཤོས་སྤང་།། ལེན་པ་མ་ཡིན་གཏོང་བ་མིན།། མེད་པ་མ་ཡིན་གནས་མ་ཡིན། ཁྲོ་ལྡན་ཀུན་ཏུ་འདི་ཤེས་པ།། རྣལ་འབྱོར་ཐམས་ཅད་རིག་པ་མཆོག། ཐུགས་ཀྱི་དཀྱིལ་འཁོར་ལེའུ་འདི་ནི། ། ངེས་པའི་རྣལ་འབྱོར་པ་ཞེས་བཤད།། དགོངས་པ་ལུང་བསྟན་ཡིད་འོང་ལ།། གང་ཞིག་ཡིད་ནི་བཟོད་གྱུར་པ།། དེ་རྣམས་ཤེས་རབ་ཐབས་དག་ནི།། ཇི་ལྟར་གནས་པ་དེ་ལྟར་བྱེད།། གསང་བའི་དགོངས་པ་ལུང་བསྟན་ལས།། ཐུགས་ཀྱི་དཀྱིལ་འཁོར་གྱི་ལེའུ་སྟེ་བཞི་པའོ།། ། དེ་ནས་དེ་བཞིན་གཤེགས་པ་མཆོག། རྡོ་རྗེ་གསུམ་བདག་འགྲོ་བའི་བླ། སླར་ཡང་རྡོ་རྗེ་འཛིན་པ་ལ།། སྔགས་སྤྱོད་དོན་གྱིས་དེ་ཉིད་ཞུས།། སྔགས་ཀྱི་བརྟུལ་ཞུགས་སྤྱོད་པ་ཅིག། ཁྱད་པར་དུ་ནི་བསྲུང་བསླབ་པ།། དེ་རྣམས་ཀྱི་ནི་དགོངས་པའི་གསུང་།། སྤྱོད་པ་བཅོམ་ལྡན་པ་ཤད་དུ་གསོལ།། དེ་ནས་བདག་པོ་དེ་བཞིན་གཤེགས།། རྡོ་རྗེ་འཛིན་པ་དག་གི་ཚིག། གསན་ནས་འགྲོ་བའི་དོན་གཅིག་པུ།། གསུངས་པའི་དོན་ཅན་བཀའ་སྩལ་ཏོ།། མི་རྟོག་དོན་ལས་ཡང་དག་བྱུང་། ། ཞེ་སྡང་ལ་འཇུག་མཚན་ཉིད་ཡིན།། དངོས་མེད་ལ་གནས་གཏི་མུག་སྟེ།། འདོད་ཆགས་འདོད་ཆགས་ལས་བྱུང་བ།། འདོད་ཆགས་ལྡན་པའི་མིང་ཅན་ཡིན།། ཐེག་པ་མཆོག་ནི་བླ་མེད་པ། ། འདོད་ཆགས་ཞེ་སྡང་གཏི་མུག་སྟེ།། འདི་དག་རིགས་སུ་ཡང་དག་བཤད།། དངོས་གྲུབ་དེ་ནི་འདི་སྒྲུབ་བོ།། རིགས་ངན་མྱུར་བར་ཤེས་པར་བྱ།། སྨིག་མཁན་དག་ནི་དལ་བ་ཡིན།། མཚམས་མེད་བྱེད་པ་གཉིས་ཀ་སྟེ། ། གསོད་པ་དོན་གཉེར་སེམས་པ་པོ།། ཐེག་པ་ཆེན་པོ་བླ་མེད་པའི།། ཐེག་པ་མཆོག་འདི་འགྲུབ་པར་འགྱུར།། སེམས་ཅན་སྡིག་ཆེན་བྱས་པ་དང་།། གཞན་ཡང་མཚམས་མེད་བྱེད་པ་པོས་གང་ཡང་སློབ་དཔོན་སྨོད་པ་ཡིས། ། བསྒྲུབས་ཀྱང་འགྲུབ་པར་མི་འགྱུར་རོ།། འདི་ཉིད་དད་པས་མྱུར་དུ་ནི།། ཞེ་སྡང་དག་ལ་གནས་པས་གནས།། གང་ཞིག་ཕུང་སོགས་དངོས་མེད་པར།། ཞི་གནས་ལས་བྱུང་སེམས་ཀྱིས་བྱས། ། དེ་ནི་སྲོག་གཅོད་བྱེད་པ་སྟེ།། ཐེག་པ་མཆོག་ལ་གནས་པ་ཡིན།། ནང་དང་དེ་བཞིན་ཕྱི་རོལ་དག། རྟེན་འབྲེལ་གཉིས་སུ་སྟོན་པ་ནི།། དེ་ནི་བརྫུན་སྨྲ་དགའ་བ་སྟེ།། གནས་མེད་ལ་གནས་རྣལ་འབྱོར་པའོ། ། རྫོགས་སངས་རྒྱས་ཀྱི་ཡེ་ཤེས་གང་། དེ་ནི་རྫས་སུ་ཤེས་བྱ་སྟེ།། དེ་འཕྲོག་དང་ཚུལ་གང་ཡིན་པ།། གཞན་གྱི་ནོར་ལ་ཆགས་པར་འདོད།། གང་ཞིག་དེ་ཉིད་དངོས་གཅིག་པ།། དེ་བཞིན་ཉིད་ལ་རྟག་སྦྱོར་བ།། སེམས་ཅན་དེ་དེ་འདོད་ལ་དགའ།། སྒྲུབ་པ་མཆོག་ལ་དམ་པར་འགྱུར།། དེ་ཡི་སྟོང་ཉིད་གཏི་མུག་ལ།། ཡུལ་ནི་བཤང་བ་ཞེས་གྲགས་ཏེ།། དབང་པོ་གཅི་བ་ཞེས་བྱ་ལ།། དེ་དག་ཞི་བ་ཟ་བ་ཡིན། ། ཐེག་པ་ཆེན་པོ་ཆོས་མཆོག་འདིར།། དེ་དག་སྒྲུབ་པའི་སྣོད་དུ་འགྱུར།། དེ་ཚེ་བརྫུན་དེ་འདོད་པ་དང་།། བཤང་གཅི་ཟས་སུ་བྱེད་པ་པོ།། ཤེས་རབ་ཕ་རོལ་ཕྱིན་ཤེས་རབ།། ཆོས་ཀྱི་སྐུ་ནི་མ་གཅིག་པུ། ། གཉིས་མེད་དེ་བཞིན་ཉིད་སྦྱོར་བ།། དངོས་མེད་ཅེས་བྱ་འདོད་སྤྱོད་པ།། ལོངས་སྤྱོད་རྫོགས་དང་མཉམ་གང་ཡིན།། དེ་ཉིད་སྲིང་མོ་ཡིན་པར་འདོད།། རང་ལྷའི་རྣལ་འབྱོར་ལྡན་པ་ཡིས།། གསང་སྔགས་ལུས་ཀྱིས་མཉེས་པར་བྱ། ། བཤང་གཅི་ཟས་སུ་བྱེད་པ་ཡི།། སྤྲུལ་སྐུའི་གཟུགས་ཅན་བུ་མོ་དེ།། སྒྲུབ་པ་པོས་ནི་བསྒོམ་པར་བྱ།། མ་དང་སྲིང་མོ་བུ་མོ་ནི།། འདི་འདྲ་རྣལ་འབྱོར་པས་མཉེས་བྱས།། ཐེག་པ་མཆོག་གི་ཆོས་ཉིད་ལ།། དངོས་གྲུབ་རྒྱ་ཆེན་དེས་ཐོབ་བོ།། ཇི་ལྟར་མི་རྟོག་ནམ་མཁའ་ནི།། ཀུན་ཏུ་ཁྱབ་པར་གནས་གྱུར་པ།། འདི་ནི་སྒོམ་པ་ཞེས་བཤད་དེ།། ཏིང་འཛིན་བསམ་མི་ཁྱབ་ཅེས་བྱ།། དེ་ཉིད་འཇིག་རྟེན་པར་བྱུང་བ། ། རྟོག་པ་དགའ་བའི་མིང་ཅན་ནོ།། སངས་རྒྱས་ཡུལ་གྱི་ཡེ་ཤེས་ལ།། འདོད་སྤྱོད་གོས་པར་མི་འགྱུར་ཏེ།། རྣམ་པར་མི་རྟོག་སྦྱོར་གཅིག་གིས།། མྱུར་དུ་སངས་རྒྱས་དེས་ཐོབ་འགྱུར།། དེ་ནས་བཅོམ་ལྡན་འདས་གསུངས་ནི།། སྒྲིབ་ཀུན་སེལ་བ་ལ་སོགས་པའི།། བྱང་ཆུབ་སེམས་དཔའ་སེམས་དཔའ་ཆེས།། ཐོས་ནས་ངོ་མཚར་རྨད་དུ་གྱུར།། འདི་ནི་བདག་པོ་བཅོམ་ལྡན་འདས། ། དེ་བཞིན་གཤེགས་པ་ཀུན་གྱི་བདག། ཅི་ཡི་སླད་དུ་ཚིག་ངན་པ།། དེ་བཞིན་གཤེགས་འཁོར་ནང་དུ་གསུང་།། འདོད་ཆགས་བྲལ་དང་ཆགས་བཅས་དང་།། གཏི་མུག་བྲལ་བ་རྨོངས་བཅས་དང་། ། ཞེ་སྡང་བྲལ་བ་སྡང་བཅས་པའོ།། རིགས་ཀྱི་དངོས་གྲུབ་སྟོན་མཛད་ཅིང་།། གང་གཞན་སྡིག་པའི་ཉེས་པ་དང་།། འཚེ་བ་ལ་སོགས་ཡོངས་སྤངས་པ།། འདི་ནི་དེ་བྱེད་སེམས་ཅན་རྣམས། ། སྣོད་ཡིན་ཞེས་ནི་ཐུབ་གསུང་ངམ།། དེ་ནས་མགོན་པོ་ཐུགས་རྗེ་ཅན།། སེམས་ཅན་ཀུན་ལ་ཕན་དགྱེས་པས།། དེ་བཞིན་གཤེགས་པ་ཐམས་ཅད་དང་།། བྱང་ཆུབ་སེམས་དཔའ་ལ་གསུངས་པབ་འདི་ནི་ས་ཁམས་དང་མཉམ་པ། ། སེམས་ཅན་ཀུན་འཛིན་གཅིག་པུ་པ།། ཆུ་ཁམས་རྟོག་དང་བྲལ་བ་པོ།། སྣ་ཚོགས་གསལ་བར་འགྱུར་བ་ཡིན།། བདག་པོ་མེ་ཡི་གཟུགས་ཅན་ཏེ།། ཐམས་ཅད་ཟ་བར་ཉེ་བར་སྦྱོར། ། དེ་བཞིན་ཕྱི་ནང་བདག་ཉིད་མཆོག། འགྲོ་ལ་གོས་པའི་དྲི་གཅིག་པུ།། བཅོམ་ལྡན་སྣ་ཚོགས་ནམ་མཁའ་མཚུངས།། ཐམས་ཅད་སྣང་ཞིང་ཟ་བ་པོ།། དེ་ཉིད་བདག་ཉིད་བདག་ཡིན་པར། ། བསྒོམས་ན་རྐང་གཉིས་མཆོག་ཏུ་འགྱུར།། སྙིང་པོ་ཞེས་བྱ་སངས་རྒྱས་ཀྱི།། ཆོས་ཉིད་དག་པ་འདི་ཡིན་ཞིང་།། སྔགས་ཀྱི་སྤྱོད་དོན་སྤྱོད་རྣམས་ཀྱིས།། བྱང་ཆུབ་སྤྱོད་པའི་མཆོག་འདི་ཡིན། ། དེ་ནས་བརྗོད་མི་ལང་ཞེས་པ།། བརྗོད་མི་ལང་བ་ཉིད་གྱུར་པ།། སངས་རྒྱས་ཞིང་རྡུལ་གྲངས་མཉམ་དེ།། སྒྲིབ་པ་ཐམས་ཅད་སེལ་ལ་སོགས།། བྱང་ཆུབ་སེམས་དཔའ་སེམས་དཔའ་ཆེས།། ཀུན་ནས་འཇིགས་ཤིང་སྐྲག་གྱུར་ནས།། འཁོར་གྱི་དཀྱིལ་འཁོར་དེ་ཐམས་ཅད།། གཅིག་ཏུ་བརྒྱལ་བ་ཉིད་གྱུར་ཏོ།། དེ་ནས་གསང་དབང་རྡོ་རྗེ་གསུང་།། གཉིས་མེད་དེ་བཞིན་གཤེགས་ཀུན་གྱིས། བྱང་ཆུབ་སེམས་དཔའ་རྒྱལ་བ་རུ།། གཟིགས་ནས་གཙོ་ལ་འདི་སྐད་གསོལ།། མགོན་པོ་སྒྲིབ་ཀུན་སེལ་ལ་སོགས།། བྱང་ཆུབ་སེམས་དཔའ་སེམས་དཔའ་ཆེ།། རང་བཞིན་ཆོས་ཉིད་ཇི་ལྟ་བར། ། འདི་རྣམས་བསླང་བར་མཛད་དུ་གསོལ།། མི་གཡོ་བ་འདི་གསང་བ་སྟེ།། ཞི་བ་གཅིག་པུ་བདེ་བའི་མཆོག། རྫོགས་པའི་བྱང་ཆུབ་ཐོབ་བྱེད་པ།། འདི་ནི་དགོངས་པས་གསུངས་པ་ཡིན།། དངོས་པོ་མེད་ཅིང་འཁྲུག་པ་མེད།། ཡིད་འོང་རྡོ་རྗེ་ཚིག་གཅིག་པུ།། འགྲོ་བའི་བསམ་པའི་དབྱེ་བ་ཡིས།། བྱེ་བྲག་མང་པོར་གྱུར་པ་ཡིན།། ནམ་མཁའ་མཐའ་ཡས་སྦྱོར་བ་ཡིས།། གཟུགས་ལ་སོགས་པ་མཐའ་ཡས་ཏེ། ། དེ་ཡང་དེ་བཞིན་གཤེགས་མཆོག་དང་།། བྱང་ཆུབ་སེམས་དཔའ་ཉིད་དུ་གྱུར།། དེ་ལས་སྤྲོ་ཞིང་བསྡུ་བ་དང་།། ཞི་བ་ཉིད་ལས་རབ་སྦྱོར་བས།། ཡེ་ཤེས་ལུས་ཅན་ཡེ་ཤེས་ཅན།། བརྒྱལ་ལོ་ཞེས་ནི་ཤེས་པ་ནི།། ཡན་ལག་དབྱེ་བ་གང་དང་གང་།། འགྲོ་བ་ཞེས་ནི་གྲགས་བདག་པ།། དེ་དེ་རང་ལྷའི་སྦྱོར་བ་ལས།། དཀྱིལ་འཁོར་མཆོག་ནི་འབྱུང་བར་འགྱུར།། དཀྱིལ་འཁོར་རང་ལུས་གང་ཡིན་པ། ། དེ་ཉིད་བསྡུས་པ་འདི་ལྟ་བུ།། འདི་ནི་འཇིག་ཚོགས་ལུས་རྟོག་ལ།། བྱང་ཆུབ་སེམས་དཔའ་བརྒྱལ་བར་གྱུར།། དེས་ནི་བདེན་འདི་མ་ཤེས་པས།། དབྱངས་བཅས་རྒྱལ་ལ་བསྐུལ་བ་ནི། ། བྱང་ཆུབ་སེམས་དཔའ་སེམས་དཔའ་ཚ། རྒྱལ་བ་ཞེས་ནི་བཤད་པ་ཡིན།། དེ་ནས་གསང་བ་རྡོ་རྗེ་གསུམ།། དགོངས་པའི་ཚིག་གིས་བཤད་པ་དག། རྡོ་རྗེ་འཛིན་པའི་ཚིག་གསན་ནས། ། ཏིང་ངེ་འཛིན་ནི་མངོན་དུ་མཛད།། གཉིས་སུ་མེད་པར་མཉམ་རྡོ་རྗེ།། འགྲོ་ལ་གཟིགས་པ་ཞེས་བྱ་བའི།། འདི་ཉིད་གསུམ་ཡུལ་འཇིག་པ་པོ།། ཏིང་ངེ་འཛིན་ལ་སྙོམས་པར་བཞུགས། མགོན་པོ་སྙོམས་པར་ཞུགས་པ་ཡི།། འོད་གང་ཆེན་པོར་གྱུར་པ་ཡིན།། བྱང་ཆུབ་སེམས་དཔའ་དེས་རེག་པས།། རང་གི་སྟན་ལ་གནས་པར་གྱུར།། དེ་ནས་དེ་བཞིན་གཤེགས་པ་ཀུན།། ངོ་མཚར་རྨད་དུ་གྱུར་སྤྱན་དང་། ། དགྱེས་ཤིང་མགུ་བ་སྐྱེས་གྱུར་ནས།། ཆོས་ཀྱི་དབྱངས་ནི་འདི་སྐད་གསུངས།། ཨེ་མའོ་ཆོས་ཨེ་མའོ་ཆོས།། ཨེ་མའོ་ཆོས་ཀྱི་དོན་བྱུང་བ།། བདག་མེད་ཆོས་ནི་ཡང་དག་དག། ཆོས་ཀྱི་རྒྱལ་པོ་ལ་ཕྱག་འཚལ། ། རྡོ་རྗེ་གསུང་གཅིག་དག་པའི་དོན།། དྲི་མེད་མཁའ་དང་མཉམ་པའོ།། མི་འགྱུར་དོན་ལས་ཡང་དག་བྱུང་།། རྡོ་རྗེ་སྐུ་ལ་ཕྱག་འཚལ་ལོ།། ཐུབ་མཆོག་གཅིག་པུ་དེ་བཞིན་གཤེགས། ། དུས་གསུམ་དག་གི་ལམ་དུ་བྱུང་།། རྡོ་རྗེ་དབྱིངས་གཅིག་རྫོགས་ལོངས་སྤྱོད།། ནམ་མཁའི་ལམ་གཅིག་ཕྱག་འཚལ་ལོ།། སྐུ་གསུང་ཐུགས་ནི་ནམ་མཁའ་སྟེ།། སྤྱོད་པའི་མཆོག་སྟེ། ཆོས་གཅིག་ལྡན།། དེ་ཉིད་གསུམ་སྟོན་སྣ་ཚོགས་པ།། སྤྱོད་པའི་གནས་ལ་ཕྱག་འཚལ་ལོ།། དགོངས་པ་ལུང་བསྟན་ལ་གནས་ནས།། གང་ཞིག་སྤྱོད་མཆོག་འདི་རྟེན་པ།། གསང་བ་ཡང་དག་སྲུང་བ་དག་དེ་ནི་ཅི་དགའ་བར་ཡང་བྱེད། ། དེ་བཞིན་གཤེགས་པ་ཐམས་ཅད་ཀྱི།། དམ་ཚིག་གསུམ་གྱི་རྡོ་རྗེ་མཆོག། སྔགས་རྣམས་ཀུན་གྱི་དམ་པ་ཡི།། སྤྱོད་པའི་ལེའུ་ལྔ་པ་ཡིན།། ། དེ་ནས་དཔལ་ཆེན་མི་བསྐྱོད་པ། ། སྐུ་གསུང་ཐུགས་ཀྱི་གསང་བ་ཅན།། ཏིང་ངེ་འཛིན་ལ་སྙོམས་ཞུགས་ནས།། ཐུགས་བྱིན་བརླབ་པ་ཞེས་བྱ་བའི།། གསང་སྔགས་འདི་ནི་གསུངས་པ་ཡིན།། ཨོཾ་ཞེས་བྱ་བ་དང་པོ་། ཡིན།། སརྦ་ཏ་ཐཱ་ག་ཏ་གཉིས།། ཙིཏྟ་གསུམ་པར་ཡོངས་སུ་བརྟག། བཛྲ་བཞི་པའི་གོང་མར་ལྡན།། སྭ་བྷཱ་ཝ་ཨཱཏྨ་ཀོ་ལྔ་པ།། ཨ་ཧཾ་དུས་ཀྱི་མིང་ཅན་ཡིན།། སྐུ་དྲུག་གསུམ་པའི་མིང་ཅན་ནོ།། དེ་ནས་དཔལ་ལྡན་རྣམ་སྣང་མཛད།། རྡུལ་ཕྲན་རྡོ་རྗེ་ཞེས་བྱ་ཡི།། ཏིང་ངེ་འཛིན་ལ་སྙོམས་ཞུགས་ནས།། སྐུ་ནི་བྱིན་གྱིས་བརླབ་པ་གསུང་།། ཨོཾ་ཞེས་བྱ་བ་ཚངས་པར་བཤད།། སརྦ་ཏ་ཐཱ་ག་ཏ་གཉིས། ཀཱ་ཡ་ཆགས་ཐོགས་དབང་ཕྱུག་སྟེ།། བཛྲ་རིག་བྱེད་ཡིན་པར་བསྒྲགས།། སྭ་བྷཱ་ཝ་ཨཱཏྨ་ཀོ་འདོད་ལྷ།། ཨ་ཧཻ་སྐེམ་བྱེད་ཅེས་བརྗོད་དེ།། དགོངས་པ་ཡིས་ནི་ཡང་དག་བརྟགས།། ཤེས་རབ་དབྱེ་བས་དབྱེ་བར་བྱ། ། དེ་ནས་ཚེ་དཔག་མེད་ཅེས་པའི།། ཀུན་ཏུ་མི་གཉིས་རྡོ་རྗེ་ཅན།། ཏིང་ངེ་འཛིན་ལ་སྙོམས་ཞུགས་ནས།། གསུང་ནི་བྱིན་གྱིས་རློབ་པ་གསུང་།། ཨོཾ་ནི་དང་པོར་བསྒྲགས་པ་ཡིན།། སརྦཏ་ཐཱ་ག་ཏ་གཉིས། ། བཱཀ་ཅེས་བྱ་བ་གསུམ་པ་ཡིན།། བཛྲ་དུས་ཀྱི་མིང་དུ་འགྱུར།། སྭ་བྷཱ་ཝ་ཨཱཏྨ་ཀོ་ལྔ་པ།། ཨ་ཧཾ་ཞེས་པ་དྲུག་པ་སྟེ།། གསུམ་པོ་འདི་དག་བཤད་པ་རྣམས།། རེ་རེ་ཞིང་དྲུག་གསུམ་དུ་བཤད། ། ཐུགས་དང་སྐུ་དང་དེ་བཞིན་གསུང་།། རིམ་དང་རིམ་གྱིས་མིན་པས་གསུང་།། བདག་པོ་ལས་ནི་གཅིག་པུ་ལས།། རྡོ་རྗེ་གསུམ་ཞེས་བྱ་བ་འབྱུང་།། ཡོན་ཏན་ཆོས་འདི་རྡོ་རྗེ་གསུང་།། དེ་ཉིད་གསུམ་གྱི་དམ་ཚིག་མཆོག། དེ་བས་འདི་ནི་སྒོམ་པ་མཆོག། གཡེལ་བ་མེད་པར་རྫོགས་པར་བྱ།། འདི་བཤད་པ་ཡི་བློ་ལྡན་པ།། རབ་མཆོག་རྡོ་རྗེ་གསུམ་བྱུང་བས།། སྒོམ་པའི་བདག་ཉིད་ཅན་གྱུར་ཅིང་། སྔགས་ཀྱི་མཚན་ཉིད་མཚན་མར་བྱ།། དེ་ནས་དཀོན་མཆོག་དཔལ་འདི་ཡང་།། སྒྲོན་མ་རྡོ་རྗེ་ཞེས་བྱ་བའི།། ཏིང་ངེ་འཛིན་ལ་སྙོམས་ཞུགས་ཏེ།། དེ་ནས་གསང་སྔགས་འདི་གསུངས་སོ།། ཨོཾ་ནི་ཟུང་གི་དང་པོར་ལྡན།། སརྦ་ཏ་ཐཱ་ག་ཏ་ཟུང་།། དེ་བཞིན་ཉིད་ནི་ཡེ་ཤེས་ཚོགས།། ཐམས་ཅད་མེ་ལོང་མིང་ཅན་ནོ།། ཨ་ནུ་རཱ་ག་སྐྱེ་མེད་དེ།། དེ་ནི་གསུམ་པ་ཡིན་པར་གསུངས།། རྐྱེན་དང་ཉན་ཐོས་ཀྱིས་བཤིག་དཀའི།། བཛྲ་ཡང་ནི་བཞི་བར་གྱུར། ། དངོས་མེད་བདག་ཉིད་ཅན་ཡེ་ཤེས།། སྭ་བྷཱ་ཝ་ཨཱཏྨ་ཀོ་ཞེས་བཤད།། ཡེ་ཤེས་ལྔ་པོ་ཉིད་ཀྱི་མིང་།། ཆོས་ཀྱི་དབྱིངས་ཀྱི་ངོ་བོ་ཉིད།། ཨ་ཧཾ་སོ་སོ་ན་རྫོགས་ལོངས་སྤྱོད།། དངོས་པོ་མེད་པའི་རང་བཞིན་ཅན། ། བདེ་བ་ཆེན་པོའི་མིང་གྱུར་པ།། མཆོད་པ་དྲུག་པའི་མིང་ཅན་ནོ།། དངོས་མེད་གནས་པའི་བདག་ཉིད་ཅན།། དེ་ཡི་རྗེས་སུ་མཉེས་བྱའི་མཆོག། དེ་ལྟའི་ཆགས་པའི་དེ་བཞིན་གཤེགས།། མགོན་པོ་ཐམས་ཅད་མཉེས་པར་བྱ།། དེ་ནས་དཔལ་ཆེན་གདོན་མི་ཟ།། དོན་ཡོད་རྡོ་རྗེ་ཞེས་བྱ་བའི།། ཏིང་ངེ་འཛིན་ལ་སྙོམས་ཞུགས་ཏེ།། དེས་ནི་གསང་སྔགས་འདི་གསུངས་སོ།། ཨོཾ་ཞེས་བྱ་བ་དང་པོར་། ལྡན།། སརྦ་ཏ་ཐཱ་ག་ཏ་གཉིས།། པཱུ་ཛ་རྣམ་པར་ཐར་པའི་མིང་།། བཛྲ་སེམས་ནི་རྣམ་སྒོམ་པ།། སྭ་བཱ་ཝ་ཨཱཏྨ་ཀོ་ཞེས་བཤད།། ཨ་ཧཾ་ཕ་རོལ་ཕྱིན་ཞེས་བྱ།། ལྔ་པོ་དྲུག་དང་གསུམ་དུ་བཤད།། གཟུགས་དང་སྒྲ་དང་དྲི་དང་རོ། ། རེག་བྱ་དང་ནི་ཆོས་ཀྱི་དབྱིངས།། དེ་དག་དངོས་མེད་གྱུར་བྱས་པ།། དེ་ནི་སངས་རྒྱས་མཆོད་མཆོག་ཡིན།། མིག་སོགས་ཞེས་ལས་ཡང་དག་བྱུང་།། མངོན་ཤེས་ལྔ་ཡིས་ཉེ་བར་མཛེས། མཆོད་པ་ལྔ་བཤད་འདི་རྣམས་ཀྱིས།། མྱུར་དུ་སངས་རྒྱས་ཉིད་ཐོབ་འགྱུར།། དེ་ནས་དཔལ་ལྡན་རྡོ་རྗེ་འཆང་།། སོ་སོར་བྱང་ཆུབ་སྟོན་མཛད་པ།། རྡོ་རྗེ་གསུམ་རིག་གསང་དབང་པོ།། ཐུབ་པ་ཆེན་པོས་ཡང་གསུངས་པ། ། སྐུ་གསུང་ཐུགས་ལ་དམིགས་པ་ལ།། གང་ཚེ་ཡིད་ནི་མགུ་གྱུར་པ།། དེ་ཉིད་གསུམ་ལ་ཉེར་སྦྱོར་བ།། དངོས་གྲུབ་རབ་མཆོག་དེ་ཐོབ་འགྱུར།། བདག་མེད་པར་ནི་སེམས་དམིགས་ཤིང་།། ལུས་དང་ངག་ཀྱང་རྣམ་པར་སྒོམ།། མཁའ་དང་མཉམ་པའི་གནས་སྒོམ་ཞིང་།། སྦྱོར་བ་རྣམ་གསུམ་རྫོགས་པར་བྱ།། རྡོ་རྗེ་དེ་ཉིད་གསུམ་དམིགས་ན།། ཤིན་ཏུ་ཕྲ་བའང་ཡོད་མ་ཡིན།། སྔགས་ཀྱི་རང་བཞིན་སྦྱོར་བ་ཡིས། ། སྒོམ་པ་མེད་ཅིང་བྱང་ཆུབ་མེད།། རྡོ་རྗེ་གསུམ་གཅིག་མཚན་ཉིད་དུ།། མདོར་ན་རྣམ་པར་བརྟགས་ནས་སུ།། སྔགས་ལ་སྦྱོར་བའི་ཏིང་ངེ་འཛིན།། གནས་ལ་གནས་མེད་བསྒོམ་པར་བྱ།། དེ་ནས་དེ་བཞིན་གཤེགས་དབང་པོའང་།། དེ་བཞིན་གཤེགས་པ་ཀུན་གྱིས་མཆོད།། ཀུན་མཁྱེན་སངས་རྒྱས་ཀུན་མཆོག་གིས།། བསྒོམ་པའི་མཆོག་འདི་བཀའ་སྩལ་ཏོ།། ནམ་མཁའི་དབྱིངས་ཀྱི་དབུས་གནས་པར། ། ཟླ་བའི་དཀྱིལ་འཁོར་བསྒོམ་པར་བྱ།། སངས་རྒྱས་གཟུགས་ནི་རྣམ་བསྒོམས་ནས།། ཕྲ་མོའི་རྣལ་འབྱོར་བརྩམ་པར་བྱ།། ཡུངས་ཀར་གྱི་ནི་འབྲུ་ཚོད་ཙམ།། སྣ་ཡི་རྩེ་མོའི་བདག་ཉིད་ཅན། ། རྒྱུ་དང་མི་རྒྱུར་ཡང་དག་ལྡན།། དེ་རུ་གནས་པར་མཁས་པས་བསམ།། བློ་ལྡན་ཡེ་ཤེས་ཀྱིས་བརྟགས་པའི།། གསང་བའི་ཡེ་ཤེས་གནས་བསྒོམ་མོ།། གསང་བ་མཆོག་ཅེས་བཤད་པ་སྟེ། དེ་ཉིད་གསུམ་ནི་དམ་ཚིག་མཆོག། ནམ་མཁའི་དབྱིངས་ཀྱི་དབུས་གནས་པར།། ཉི་མ་ཞེས་བྱའི་དཀྱིལ་འཁོར་སྒོམ།། སངས་རྒྱས་སྐུ་ནི་རྣམ་བསྒོམ་ཏེ།། དེ་ཡི་སྟེང་དུ་གནས་བཞག་གོ།། དབང་ཕྱུག་ཆེན་པོ་སྐེསྐམ་བྱེད་དེ། ། གཞི་ཕྱེད་ནམ་མཁའ་མཚོན་པ་དག། བདུད་རྩི་ཞེས་ནི་བཏགས་པ་གང་།། དེ་ནི་ཧཱུཾ་ཞེས་བྱ་བར་འགྱུར།། ནམ་མཁའི་དབྱིངས་ཀྱི་དབུས་གནས་པར།། འཁོར་ལོ་དཀྱིལ་འཁོར་ཡིད་འོང་སྒོམ།། སྤྱན་གྱི་གཟུགས་སུ་ཡང་དག་སྦྱོར།། རྡོ་རྗེ་པདྨོ་གཉིས་སྒོམ་པའོ།། ནམ་མཁའི་དབྱིངས་ཀྱི་དབུས་གནས་པར།། རིན་ཆེན་དཀྱིལ་འཁོར་བསྒོམ་པར་བྱ།། དང་པོའི་སྦྱོར་བ་ནན་ཏན་གྱིས།། དེ་ཡི་སྟེང་དུ་རྣམ་པར་སྒོམ།། ནམ་མཁའི་དབྱིངས་ཀྱི་དབུས་གནས་པར།། འོད་ཀྱི་དཀྱིལ་འཁོར་འདི་ཉིད་སྒོམ།། སངས་རྒྱས་ཞི་བའི་གནས་དགོད་པ།། འཁོར་རྣམས་ཀྱིས་ནི་ཀུན་ནས་བསྐོར།། ཨུཏྤལ་མཐོན་ཀའི་མདོག་འདྲ་བ།། རྩེ་མོ་ལྔ་པ་འོད་པོ་ཆེ། ། ནས་ཀྱི་འབྲུ་ཙམ་ནན་ཏན་གྱིས།། རི་རབ་རྩེ་མོར་རྣམ་པར་བསམ།། ཙ་ན་ཀ་ཡི་འབྲུ་ཚོད་ཙམ།། འདབ་མ་བརྒྱད་པ་གེ་སར་བཅས།། སྣ་ཡི་རྩེ་མོ་རི་རབ་རྩེ།། བྱང་ཆུབ་འདོད་པས་འདི་བསྒོམ་བྱ།། འཁོར་ལོ་ལ་སོགས་སྒོམ་པ་ནི།། དེ་ཡི་ཁྱད་པར་དག་ཏུ་བརྟག། ཡིད་འོང་དངོས་གྲུབ་ཀུན་གྱི་གནས།། བྱང་ཆུབ་གནས་མཆོག་བླ་མེད་པའོ།། སངས་རྒྱས་ཡང་དག་བྱང་ཆུབ་བཞུགས།། མདོར་ན་ད་ནི་སྤྲོ་བར་བྱ།། གང་ཚེ་ཆོས་ནི་ལེགས་མཚན་པ།། རྡོ་རྗེ་གཅིག་ནི་བསྒོམ་པར་བྱ།། དེ་ནས་དེ་བཞིན་གཤེགས་དབང་པོ།། དག་པ་ཆོས་རྣམས་ཀུན་གྱི་མཆོག། འགྲོ་ཀུན་དོན་དུ་སྟོན་པ་པོས།། གསང་བ་མཆོག་ནི་བཀའ་སྩལ་ཏོ། ། སྐད་ཅིག་ཐང་ཅིག་ཡུད་ཙམ་དང་།། ཟླ་ཕྱེད་ཟླ་བ་ལོ་ཡི་དུས།། བསྐལ་པ་གྲངས་མེད་གསུམ་པོ་ནི།། སྐད་ཅིག་གཅིག་ཏུ་མཉམ་པར་བཤད།། ཟླ་བ་དྲུག་བཤད་དེ་ཉིད་ཡིན།། དངོས་མེད་རྫོགས་པར་ལོངས་སྤྱོད་པའོ། ། སྐད་ཅིག་གཅིག་ཏུ་བསྔགས་པ་སྟེ།། དུས་གསུམ་ལས་འདས་ཡིན་པར་དགོངས།། གཟུགས་དང་སྒྲ་དང་རོར་ལྡན་པ།། རྣལ་འབྱོར་པས་ནི་ཟླ་དྲུག་སྒོམ།། མཆོད་ཆེན་དེ་ནི་བྱས་ནས་སུ། ། གསང་བའི་བདེ་ཉིད་རྣམ་པར་སྒོམ།། ཡུལ་དང་དབང་པོ་སེམས་པ་ནི།། བཤང་གཅི་ཟས་སུ་བྱེད་པ་པོ།། བྱས་ན་དེ་འདྲའི་དངོས་གྲུབ་ནི།། བཟའ་བ་རྣམ་རྟོག་མེད་པའོ།། དེ་ཉིད་འདི་ནི་བླ་མེད་པ། ། བྱང་ཆུབ་སེམས་གཅིག་ལས་བྱུང་བའོ།། རྟོག་མེད་འདུས་ནི་མ་བྱས་ཤིང་།། མི་རྟོག་དོན་ནི་འགྲུབ་པར་འགྱུར།། མ་ནི་མཱ་མ་ཀཱིར་བཤད་དེ།། ས་ནི་མངོན་པར་བྱང་ཆུབ་པའོ།། བསམ་གཏན་དེ་ནི་དགའ་སྤྱོད་པ། ། ཤ་ཞེས་བྱ་བར་དེ་བཤད་དོ།། ནམ་མཁའ་མཐའ་ཡས་རྣལ་འབྱོར་ནི།། ཤ་ཆེན་དེ་ནི་ཡིན་པར་བཤད།། གསང་བ་པ་ཡི་གོ་འཕང་མཆོག་རྡོ་རྗེ་གསུམ་ནི་མྱུར་དུ་འགྲུབ། ། དམ་ཚིག་ཆེན་པོ་གླང་ཆེན་རྟ།། དེ་བཞིན་ཁྱི་ལ་སོགས་པའི་ཤ།། ཕུང་པོ་ལ་སོགས་རིགས་དབྱེ་བས།། གང་གསུངས་མཉམ་པའི་གྲངས་ཀྱིས་སོ།། གང་ཞིག་རྣལ་འབྱོར་གཉིས་མེད་ཟས། ། བསམ་གཏན་དགའ་བའི་མིང་གཅིག་པུ།། འཇིག་རྟེན་རྒྱང་འཕན་འཇིག་རྟེན་པ།། བཟའ་བའི་རང་གི་ངོ་བོར་གྱུར།། དགེ་བའི་བཤེས་གཉེན་བརྟག་པ་དང་།། དེ་བཞིན་དྲོད་གཤེར་ལས་སྐྱེས་པ། ། འཇིག་རྟེན་འདས་དང་འཇིག་རྟེན་པའི།། འདི་དག་ཟས་སུ་ཀུན་ཏུ་བཤད།། དེ་ནས་རྡོ་རྗེ་གསུམ་དགོངས་པ།། བཅོམ་ལྡན་འདས་ལས་ཐོས་པ་དང་།། དེ་བཞིན་གཤེགས་པ་ཀུན་བདག་པོ། ། ལག་ན་རྡོ་རྗེས་ཚིག་གསོལ་བ།། ཉན་ཐོས་རྣམས་ཀྱི་དམ་ཚིག་ཀྱང་།། ཕྲ་མོའི་རྣལ་འབྱོར་སྟོན་མཛད་ཅིང་།། མགོན་ཁྱོད་འཇིག་རྟེན་པ་དང་ནི།། འཇིག་རྟེན་འདས་པ་དག་ཀྱང་གསུངས།། ཆུ་དང་འོ་མ་གཅིག་འགྱུར་བཞིན།། ཁྱོད་ནི་ཆོས་རྣམས་སྟོན་པར་མཛད།། འཇིག་རྟེན་འགའ་ལས་ཡང་དག་པ།། ངང་པས་འོ་མ་ཇི་བཞིན་ལེན།། ཇི་ལྟར་སྐོམ་པས་གདུངས་པ་ཡིན། སྐྱེས་བུ་ལ་ལ་དེ་བསྲེས་འཐུང་། ། དེ་བཞིན་འཇིག་རྟེན་ཤིན་ཏུ་འདུས།། ཆོས་ཀྱི་བདུད་རྩི་དེ་རྣམས་འཐུང་།། དགོངས་པས་སྔགས་ཀྱི་དེ་ཉིད་དུ།། གང་ཞིག་གསུམ་དུ་གསུངས་པ་འདི།། ཇི་ལྟ་ཇི་ལྟར་འཇིག་རྟེན་སོགས།། མགོན་པོ་གསལ་བར་བཤད་དུ་གསོལ། ། དེ་ནས་དེ་བཞིན་གཤེགས་མཆོག་གིས།། གྲགས་ལྡན་ལག་ན་རྡོ་རྗེ་ལ།། བུ་ཁྱེད་ལེགས་སོ་ཆེར་ལེགས་ཏེ།། བྱེ་བྲག་གསུམ་ཁྱོད་ལ་བཤད་བྱ།། རྐྱེན་དང་ཉན་ཐོས་ཞེས་གྲགས་དང་། ། དེ་བཞིན་མདོ་སྡེ་ལ་སྤྱོད་རྣམས།། འདི་དག་འཇིག་རྟེན་པ་རྣམས་ཏེ། བྱ་བ་སྦྱོར་བའི་བྱ་བར་གནས།། རྣལ་འབྱོར་གྲུབ་ནས་འཇིག་རྟེན་གནས།། འཇིག་རྟེན་འདས་པར་གྱུར་པ་ཡིན།། དེ་ནི་ཏིང་འཛིན་རྣལ་འབྱོར་ཡང་། ། དེ་དང་འདྲ་བར་བྱེད་མ་ཡིན།། གང་ཡང་འཇིག་རྟེན་ཤིན་ཏུ་འདས།། རྣམ་པར་མི་རྟོག་འཇིགས་མེད་པ།། དེ་ནི་དེ་བཞིན་ཉིད་དངོས་ཅིག། འཁོར་བ་དང་ནི་ཅིག་ཤོས་སྤངས།། བརྟུལ་ཞུགས་བཟང་པོའི་རྣལ་འབྱོར་འདིས།། སངས་རྒྱས་རྣམས་ནི་མཉེས་འགྱུར་ཞིང་།། བློ་ལྡན་བྱང་ཆུབ་སེམས་རྣམས་ཀྱིས།། བྱང་ཆུབ་མྱུར་དུ་ཐོབ་པར་འགྱུར།། འདོད་ཁམས་ཀྱི་ནི་དབང་ཕྱུག་དང་། རྣལ་འབྱོར་གོ་འཕང་འཐོབ་པར་འགྱུར།། གཟི་ལྡན་སྟོབས་ཀྱིས་ཕྱུག་པ་དང་།། མདངས་བཟང་མཐོང་ན་དགའ་བ་དང་།། མཐོང་ངམ་ཚིག་གི་བསྐུལ་བ་ཡིས།། འཇིག་རྟེན་འདི་དག་དབང་དུ་བྱེད།། གསང་བ་འདི་ནི་མཆོག་ཡིན་ཏེ། ། སངས་རྒྱས་བྱང་ཆུབ་དམ་པ་ཡིན།། དེ་ཉིད་སྔགས་ཀྱི་གསང་བ་འདི།། རྡོ་རྗེ་གསུམ་ལས་འདས་པའི་མཆོག། དགོངས་པ་ལུང་བསྟན་ཡིད་འོང་ལ།། སྐྱེས་བུ་གང་ཞིག་གནས་གྱུར་པ། ། གསང་བ་ཡང་དག་སྲུང་བ་པོ།། དེ་རྣམས་ཅི་དགར་བྱེད་པར་འགྱུར།། དེ་བཞིན་གཤེགས་ཀུན་དམ་པ་སྟེ།། དམ་ཚིག་ལས་ནི་དམ་ཚིག་མཆོག། རྡོ་རྗེ་གསུམ་གྱིས་བྱིན་བརླབ་པའི་ལེའུ་དྲུག་པ་ཡིན་པར་བ་ཤྭད། ། དེ་ནས་རྡོ་རྗེ་གསུམ་གསང་དབང་།། དམ་ཚིག་ཆེན་པོ་དེ་ཉིད་གཅིག། ཏིང་འཛིན་གསང་སྔགས་སྤྱོད་པའི་མཆོག། མངོན་རྫོགས་བྱང་ཆུབ་འདི་གསུངས་སོ། ། དེ་ཉིད་དམ་ཚིག་བཞི་པོ་གང་།། འདོད་པ་ཐམས་ཅད་ཙས་ཏེ་བཤད།། དེ་རྣམས་ལོངས་སྤྱོད་ལྡན་པ་ཡིས།། ཅི་འདོད་པར་ནི་བསྟེན་པར་བྱ།། རང་གི་ལྷར་ནི་བདག་སྦྱོར་བས། ། བདག་དང་གཞན་ནི་མཆོད་པར་བྱ།། དེ་ནི་འཇིག་རྟེན་མཆོད་འགྱུར་བ།། འཇིག་རྟེན་འདས་པ་ཞི་བ་ཉིད།། དཀའ་ཐུབ་མྱུར་བ་དེ་ཡིན་ལ།། སྡོམ་པ་དམ་པ་ཡིན་པར་འདོད།། མི་ཟད་པ་ནི་གཉིས་ཀ་སྟེ། ། འདོད་པའི་ལོངས་སྤྱོད་ཐམས་ཅད་ཀྱང་།། གཟུངས་སོགས་ལྷ་རྣམས་ཡིན་པར་འདོད།། དེ་དག་བསྒོམ་པའི་སྦྱོར་བ་ཡིས།། སྒྲུབ་པ་པོ་རྣམས་མྱུར་དུ་འགྲུབ།། ཐ་དད་ཡི་གེ་སློང་མོ་ཡིན། ། དེ་འདོན་པ་ནི་ཟ་བ་སྟེ།། གང་ཞིག་ཟློས་ལ་དགའ་བ་དེ།། དེ་དག་སློང་མོ་ཟ་བར་འདོད།། དཀའ་ཐུབ་དག་ནི་མི་བྱ་ཞིང་།། སྡོམ་པ་མི་བཟད་ཉིད་ཀྱང་མིན།། འདོད་གསུམ་དེ་ཉིད་ལོངས་སྤྱོད་ཅིང་།། སྔགས་ཀྱི་དེ་ཉིད་མ་ཉམས་བཟླས།། རྡོ་རྗེ་གསུམ་དབྱེ་བ་དེ་གནས་ན།། སྔགས་རིག་བྱང་ཆུབ་ཐོབ་པར་འགྱུར།། གཞན་དུ་དུས་མིན་འཆི་བ་དང་།། ཤི་ནས་དམྱལ་བར་འགྲོ་བར་འགྱུར།། སངས་རྒྱས་བྱང་ཆུབ་སེམས་དཔའ་དང་། ། གསང་སྔགས་སྤྱོད་པའི་མཆོག་རྣམས་གང་།། མི་འགྱུར་ཆོས་ནི་བརྙེས་པ་ཡང་།། རྫོགས་པའི་སངས་རྒྱས་རྐང་གཉིས་མཆོག། ཀུན་མཁྱེན་ཡེ་ཤེས་ཆགས་ལྡན་པས།། འདོད་པའི་ཡོན་ཏན་ལྔ་རྣམས་བསྟེན། ། བྱང་ཆུབ་སེམས་དཔའ་མཉེས་བྱ་ཞིང་།། བྱང་ཆུབ་ཕ་རོལ་ཕྱིན་ཆགས་བྱ།། དེ་ལྟར་གཟུགས་ལ་གསུམ་ཤེས་ནས།། མཁས་པ་ཡིས་ནི་མཆོད་པར་བྱ།། དེ་ཉིད་གཙོ་བོ་བཅོམ་ལྡན་འདས། ། སྣ་ཚོགས་རྣམ་པར་སྣང་མཛད་ཆེ།། སྒྲ་ལ་རྣམ་གསུམ་ཤེས་བྱས་ནས།། ལྷ་རྣམས་ལ་ནི་དབུལ་བར་བྱ།། འདི་ནི་བཅོམ་ལྡན་སྣ་ཚོགས་པ།། སངས་རྒྱས་རིན་ཆེན་འབྱུང་གནས་གཙོ། ། དྲི་ལ་རྣམ་གསུམ་ཤེས་བྱས་ནས།། ལྷ་རྣམས་ལ་ནི་དབུལ་བར་བྱ།། དེ་ཉིད་བཅོམ་ལྡན་སྣ་ཚོགས་པ།། འདོད་ཆགས་ཆོས་ནི་འཛིན་པའི་གཙོ།། རོ་ལ་རྣམ་གསུམ་ཤེས་བྱས་ནས། ། ལྷ་རྣམས་ལ་ནི་དབུལ་བར་བྱ།། དེ་ཉིད་དོན་ཡོད་རྡོ་རྗེ་གྲགས།། སྣ་ཚོགས་གཙོ་བོ་བཅོམ་ལྡན་འདས།། རེག་ལ་རྣམ་གསུམ་ཤེས་བྱས་ནས།། རང་གི་རིགས་ལ་དབུལ་བར་བྱ།། དེ་ཉིད་བཅོམ་ལྡན་རྡོ་རྗེ་ཅན། ། མི་བསྐྱོད་མེ་ལོང་གཟུགས་ཅན་ནོ།། ནང་དང་དེ་བཞིན་ཕྱི་རོལ་དང་།། གཉིས་ཀ་རྗེས་སུ་མི་དམིགས་པ།། གཟུགས་ལ་སོགས་གསུམ་དེ་ཡིན་ཏེ།། ལྷ་རྣམས་ལ་ནི་དབུལ་བར་བྱ།། གཟུགས་སྒྲ་རོ་ལ་སོགས་པ་ལ།། སེམས་ནི་རྟག་ཏུ་སྦྱར་བར་བྱ།། གསང་བ་བསྡུས་པར་གྱུར་པ་ནི།། སྙིང་པོ་སངས་རྒྱས་ཀུན་སྐྱེད་དེ།། མཁས་པས་གཟུགས་སྒྲ་ལ་སོགས་པ།། ལྷ་ཉིད་དུ་ནི་རྟག་ཏུ་སྒོམ།། དེ་བཞིན་རིགས་སུ་སྒོམ་པ་ནི།། སྒོམ་པས་དེར་ནི་བསྒོམ་པར་བྱ།། ནམ་མཁའི་རྡོ་རྗེ་སྦྱོར་བ་ནི།། སངས་རྒྱས་རྗེས་སུ་དྲན་པར་བཤད།། སངས་རྒྱས་རྗེས་དྲན་སྦྱོར་བས་ཀྱང་།། ཆོས་ནི་རྗེས་སུ་དྲན་པ་སྒོམ། རྡོ་རྗེ་གསུམ་སྒོམ་རྣལ་འབྱོར་པས།། རྡོ་རྗེ་རྗེས་དྲན་སྒོམ་པའོ།། རིགས་དབྱེ་ཇི་སྐད་བཤད་པས་ཀྱང་།། ཆོས་དང་ལོངས་སྤྱོད་སྤྲུལ་སྐུར་བྱུང་།། རིགས་ནི་རྗེས་དྲན་སྦྱོར་གྱུར་པ། དེ་བཞིན་ཁྲོ་བོ་རྗེས་དྲན་པའོ།། དེ་ཉིད་གསུམ་ཡོངས་གྱུར་པ་གཅིག། རྡོ་རྗེ་གསུམ་ཉིད་མེད་ཆོས་ཉིད།། ལྷ་རྣམས་རྗེས་དྲན་སྦྱོར་བ་སྟེ།། དེ་སྒོམ་བྱང་ཆུབ་ཐོབ་པར་འགྱུར།། བཞི་པོ་དག་ནི་རེ་རེ་བཞི།། ཇི་ལྟ་ཇི་ལྟར་མགུ་བཅས་སོགས། ། དེ་ཉིད་ལོ་ཡི་གྲངས་ཡིན་ཏེ།། བཅུ་དྲུག་པར་ནི་ཡོངས་སུ་བརྟག། སངས་རྒྱས་ཀུན་གྱིས་བསྟན་པ་ཡི།། བུད་མེད་ལོ་གྲངས་བཅུ་དྲུག་པ།། གཟུགས་བཟང་ཕྲ་དང་མཆོད་པ་ནི། ། དབེན་པ་ཞེས་བྱར་བརྩམ་པར་བྱ།། བྱིན་གྱིས་བརླབས་ནས་ཡིད་འོང་བ།། ཁྱད་པར་གསུམ་ཞེས་བྱ་བ་ཡི།། དེ་བཞིན་གཤེགས་པ་བཙུན་མོ་ཆེ།། སྤྱན་སོགས་ཉིད་ནི་བསྒོམ་པར་བྱ།། བསྒྲུབ་བྱ་དེ་ཉིད་ཡང་དག་སྦྱོར། ། དབང་པོ་གཉིས་ནི་མཉམ་སྦྱོར་བའི།། དང་པོར་སྦྱོར་བ་འདི་བསྒོམས་ན།། སངས་རྒྱས་དངོས་གྲུབ་ཐོབ་པར་འགྱུར།། ཡི་གེ་ཧཱུཾ་དང་དེ་བཞིན་ཨོཾ།། ཕཊ་ཀྱང་དེར་ནི་བསྒོམ་པར་བྱ།། དེ་ཉིད་གསུམ་ཚུལ་གསུམ་བདག་ཉིད།། ཅི་རིགས་པར་ནི་རྣམ་པར་སྤྲོ།། འོད་ཟེར་རྣམ་པ་ལྔས་ཁྱབ་པའི།། རྡོ་རྗེ་པདྨ་འདི་མཆོག་སྟེ།། གསང་དང་སྙིང་ཁ་སྣ་རྩེ་རུ།། རྣལ་འབྱོར་པས་ནི་འདི་བསྒོམ་བྱ།། འབར་བཅས་ཟླ་འོད་བཞིན་དཀར་བར།། ཤེས་རབ་དེ་ནི་རྟག་ཏུ་སྒོམ།། གང་ཕྱིར་ཡིད་ནི་དགར་གྱུར་པས།། དེ་བས་དེ་ནང་ཡིད་འོང་བའོ།། གནས་མེད་གནས་པར་ལེགས་སྦྱོར་བར།། བཞི་མཚུངས་གཅིག། ཏུ་སྦྱོར་བ་རིག། སངས་རྒྱས་རྗེས་དྲན་སྦྱོར་ལ་སོགས།། བྱང་ཆུབ་འདོད་པས་བསྒོམ་པར་བྱ།། ཉམས་དགའ་སངས་རྒྱས་ཀུན་གྱིས་བསྟེན།། བྷ་ག་ཞི་བ་གཅིག་པུའི་མིང་།། རང་གི་དེ་ཉིད་གཉིས་མེད་བྱུང་།། ། རྡོ་རྗེ་དེ་བདག་ཉིད་དུ་སྦྱོར།། སངས་རྒྱས་རྗེས་དྲན་སྦྱོར་བ་སྟེ། བྷ་ག་ལིང་ག་ཡིན་པར་བསྒྲགས།། གཞུག་པ་གཉིས་མེད་སྦྱོར་བ་སྟེ།། སངས་རྒྱས་གཟུགས་སུ་སྒོམ་པའོ།། དེ་ལས་ཟོ་ལྡན་གྱིས་སྤྲོ་བ། སྤུའི་བུ་གའི་རྩེ་མོར་གནས།། མཉམ་པ་མེད་པས་ཁྱད་པར་དུ།། སངས་རྒྱས་སྤྲིན་རྣམས་དེར་སྤྲོའོ།། ཆོས་རྗེས་དྲན་པའི་སྦྱོར་བ་ཡང་།། རྡོ་རྗེ་ཆོས་ཀྱི་རབ་སྦྱོར་བས།། རྡོ་རྗེ་པདྨ་ཡང་དག་སྦྱར།། བྷ་གའི་ལིང་གར་བརྟག་པའོ། ། དེ་ནས་པ་སྤུའི་བུ་ཀ་ལས།། འབད་པས་ཆོས་ཀྱི་སྤྲིན་རྣམས་སྤྲོ།། དེ་ཉིད་བསམ་ཀུན་རྫོགས་བྱེད་པའོ།། འདི་ན་ཆོས་ཀྱི་བདག་པོ་ཡིན།། རྡོ་རྗེ་རྗེས་སུ་དྲན་པ་སྒོམ།། དངོས་མེད་གཅིག་བུ་ལ་སྦྱོར་བ། ། སྟོང་ལ་རྡོ་རྗེ་རབ་སྦྱོར་འགྱུར།། བྷ་ག་ལིང་ག་ཞེས་བཤད་དོ།། དེ་ནས་བ་སྤུའི་བུ་ག་ནས།། རྡོ་རྗེ་སྤྲིན་རྣམས་ཀུན་ཏུ་སྤྲོ།། རྡོ་རྗེ་བྱང་ཆུབ་སེམས་སྒོམ་ཉིད།། མྱུར་དུ་དངོས་གྲུབ་འཐོབ་བར་འགྱུར། ། རིགས་རྗེས་དྲན་པའི་སྦྱོར་བ་ཡིས།། མཁས་པས་སྟོང་ཉིད་རྡོ་རྗེ་ལས།། དེ་བཞིན་རྣལ་འབྱོར་པས་སྤྲོས་ནས།། རིགས་ཀྱི་དངོས་གྲུབ་འཐོབ་པར་འགྱུར།། ཁྲོ་བོ་རྗེས་དྲན་སྦྱོར་བ་ལའང་། ། སྟོང་དང་རྡོ་རྗེ་གཉིས་ལྡན་པའི།། ཁྲོ་བོའི་བ་སྤུའི་བུ་ག་ནས།། ཁྲོ་བོའི་སྤྲིན་རྣམས་སྤྲོ་བར་བྱ།། དེ་ནས་དཔལ་ལྡན་རྡོ་རྗེ་འཛིན།། ཁྱབ་བདག་རྣམ་སྣང་མཛད་ཆེན་ལ།། རྗེས་དྲན་སྦྱོར་བའི་དགོངས་པ་ནི། ། ཐུབ་པ་ཆེ་ལ་སླར་ཞུས་པ།། ཐུབ་ཁྱོད་ཀྱིས་ནི་གང་གསུངས་པ།། བྷ་གའི་ལིང་གའི་སྦྱོར་བ་ནི།། འཇིག་རྟེན་འདས་པའི་སྦྱོར་འདི་ལས།། སངས་རྒྱས་ལ་སོགས་སྤྲོ་གྱུར་པ། ། ཚུལ་འདི་མ་འོངས་སྐྱེ་བོ་ལ།། ཕྱི་དུས་ཀུན་རྨོངས་སྐྱེས་པ་སྟེ།། བདེ་གཤེགས་རྣམས་ཀྱི་བདག་པོས་ནི།། ཅི་ཕྱིར་གསུངས་ཞེས་དེ་རྣམས་སྨྲ།། འགྲོ་བས་ནམ་མཁའ་མཚན་མ་ཅན། ། རྟེན་འབྱུང་ཁྱོད་ཉིད་མི་ཤེས་ཤིང་།། དེ་རྣམས་ཤིན་ཏུ་རྨོངས་དབྱེ་བས།། ཇི་བཞིན་པར་ནི་རྟོགས་པར་བྱེད།། མགོན་ཁྱོད་བདེ་བ་ཆེན་པོ་སྟེ།། སངས་རྒྱས་ཀུན་གྱི་སྟོན་གཅིག་པུ།། སྐུ་མེད་སྲིད་གསུམ་བདག་ཉིད་ཅན།། དགོངས་པ་གཉིས་ཀའི་མཚན་དང་ལྡན།། དེ་བས་ཁྱོད་ནི་ཆོས་ཀུན་གྱི།། ཡོན་ཏན་གསུམ་བདག་དེ་ཉིད་གསུམ།། དགོངས་པ་བྱ་བ་དྲི་མེད་གསུམ།། སངས་རྒྱས་ཀྱི་ནི་བདུད་རྩི་འབྱུང་། ། ཁྱོད་འདིར་བྷ་ག་ཁྱབ་འཇུག་སྟེ།། ལིང་ག་དྲག་པོའི་མིང་ཅན་ཉིད།། ཁྱོད་ནི་ས་བོན་ཚངས་ལ་བརྟགས།། ཁྱོད་ནི་རྟེན་འབྱུང་འགྲོ་བ་འབྱུང་།། དུས་གསུམ་ལས་འདས་རྣལ་འབྱོར་ཆེ། ། དུས་དང་རྩིས་སུ་གྱུར་པ་ཉིད།། ཤེས་དང་ཤེས་བྱ་རྣམ་པར་གྲོལ།། དེ་བས་ཁྱོད་ནི་འགྲོ་བའི་བླ།། དེ་ནས་རྡོ་རྗེ་འཛིན་པ་ཡིས།། དེ་ལ་སོགས་པའི་ཚིག་གསན་ནས།། དམ་ཚིག་རྗེས་སུ་དྲན་སྒོམ་པ། ། བཅོམ་ལྡན་འདས་ནི་སྟོན་པར་མཛད།། རང་གི་རྡོ་རྗེ་པདྨར་ལྡན།། དབང་པོ་གཉིས་ནི་རབ་སྦྱོར་ལས།། རང་གི་ཁུ་བའི་ཐིགས་སྐྱེས་པའི།། སངས་རྒྱས་རྡོ་རྗེ་སེམས་དཔའ་སྒོམ།། དཀྱིལ་འཁོར་རྗེས་སུ་དྲན་བདག་ཉིད།། དབང་པོ་གཉིས་ཉིད་སྦྱོར་བ་ལས།། རང་གི་ཚངས་པ་རྟག་དྲངས་ཏེ།། རྣལ་འབྱོར་པས་ནི་ཀྱིལ་འཁོར་བྱ།། སྐུ་རྗེས་དྲན་པའི་སྦྱོར་བ་ཡང་།། སངས་རྒྱས་རྣམས་ཀྱི་ཕུང་པོ་ལྔ། ། སངས་རྒྱས་དེ་ཉིད་སོགས་བརྟག་པ།། བདག་ཀྱང་དེ་དང་འདྲ་བར་རིག། གསུང་རྗེས་དྲན་པའི་སྦྱོར་བ་ལྔ།། རྡོ་རྗེ་ཆོས་གསུང་ཕུན་སུམ་ཚོགས།། དེ་ཡི་གསུང་ཅི་འདྲ་བར་འགྱུར། བདག་ཀྱང་དེ་དང་འདྲར་ཆོས་འཛིན།། ཐུགས་རྗེས་དྲན་པའི་སྦྱོར་བ་གང་།། རྡོ་རྗེ་འཛིན་པའི་ཐུགས་དང་ནི།། ཀུན་ཏུ་བཟང་པོའི་ཐུགས་གང་ཡིན།། བདག་ཀྱང་དེ་དང་འདྲ་བར་འགྱུར།། སེམས་ཅན་རྗེས་དྲན་སྦྱོར་བ་གང་། ། སེམས་ཅན་རྗེས་དྲན་རྡོ་རྗེ་ཉིད།། སྤྱོད་པ་མཁའ་མཚུངས་ཇི་བཞིན་དུ།། བདག་ཀྱང་དེ་དང་འདྲ་བར་འགྱུར།། སྔགས་སྐུ་རྡོ་རྗེ་གསུམ་ཞེས་པ།། དེ་སྦྱོར་དྲན་པ་སྒོམ་པ་ནི། ། རྡོ་རྗེ་སྔགས་ཀྱི་སྐུ་གང་ཡིན།། གསུང་དང་སྐུ་ནི་རྣམ་སྒོམ་པ།། དེ་ཉིད་གསུམ་མཉམ་གཅིག་པ་ཉིད།། རྟག་ཏུ་གསུམ་འདས་གྱུར་པ་ཡི།། སྔགས་འཛིན་མཆོག་ནི་ཅི་འདྲ་བ།། བདག་ཀྱང་དེ་དང་འདྲ་བར་འགྱུར། ། དམ་ཚིག་རྗེས་དྲན་རྣམས་ཀྱིས་ནི།། དེ་བས་ཚངས་པ་ཤིན་ཏུ་དབྱུང་།། དངོས་མེད་གཅིག་ཏུ་སྦྱོར་བ་ཡིས།། མཁས་པས་ཆོ་ག་བཞིན་དུ་གསུང་།། དེ་བཞིན་གཤེགས་མཆོག་ཆེ་བ་ནི། ། དངོས་མེད་ཅེས་བྱ་བསད་པ་སྟེ།། བློ་དང་ལྡན་པས་འདི་བསད་ན།། དངོས་གྲུབ་སྔགས་མཆོག་ཐོབ་པར་འགྱུར།། ཤེས་རབ་དམ་ཚིག་སྦྱོར་གྱུར་པ།། རྗེས་སུ་དྲན་པ་ཞེས་བཤད་དོ།། ཕ་རོལ་ཕྱིན་པ་ཞེས་གྲགས་པ།། ཡོད་མེད་གཉིས་དང་བྲལ་བའོ།། ཐམས་ཅད་རང་བཞིན་དྲི་མ་མེད།། མ་སྐྱེས་པ་དང་ཟད་པ་མེད།། བྱང་ཆུབ་མེད་ཅིང་མངོན་རྟོགས་མེད། ཁམས་མེད་འབྱུང་བའང་མེད་པའོ།། མ་སྐྱེས་རྗེས་སུ་སྦྱོར་བ་གང་།། དེར་ནི་ཅི་ཡང་བརྗོད་མིན་ཞིང་།། མ་སྐྱེས་མིང་ནི་གཅིག་པུ་པ།། དྲན་པ་དེ་ནི་ཡིན་པར་བཤད།། ཇི་ལྟར་ནམ་མཁའ་འོད་གསལ་བ།། མཚན་མ་མེད་ཅིང་འགྱུར་བ་མེད།། རང་བཞིན་མཁའ་དང་འདྲར་གྱུར་ཅིང་།། གཉིས་མེད་གཉིས་སུ་ཡོད་མིན་ཞིང་།། ཡན་ལག་བཅུ་གཉིས་སྦྱོར་གཅིག་གང་།། ཞེ་སྡང་རྫོགས་ལོངས་སྤྱོད་པའི་མིང་།། སངས། རྒྱས་ཀུན་གྱིས་བསྟེན་གྱུར་ཅིང་།། དེ་ནི་རིགས་རྗེས་དྲན་ཞེས་བྱ།། རྟེན་འབྱུང་ལས་སྐྱེས་རྫོགས་སངས་ཏེ།། བུད་མེད་ལོ་གྲངས་བཅུ་གཉིས་པ།། བརྟན་པའི་སེམས་ནི་ཐོབ་པ་ལས།། རང་གི་ཁུ་བས་མཆོད་པར་བྱ་དངོས་མེད་བདག་ཉིད་དག་པ་གང་། ། དེ་ནི་དག་པར་བཤད་པ་ཡིན།། དེ་ཉིད་ཀྱིས་ནི་མཆོད་པར་བསྔགས།། ཤེས་རབ་ཕ་རོལ་ཕྱིན་པས་འགྲོ།། འདི་ཡིས་ལུས་ལ་མཆོད་པ་དང་།། ཁྱད་པར་དུ་ནི་དེ་བཞིན་གཤེགས། ། རྡོ་རྗེ་འཛིན་བཤད་དེ་བཞིན་ཐུགས།། ཆོས་འཛིན་པ་ཡི་སྐུ་གསུང་ཐུགས།། སྐུ་གསུང་ཐུགས་ནི་གང་དག་གྲུབ།། ཚེ་འདི་ཉིད་ལ་ཐོབ་པར་འགྱུར།། གང་བཤད་རིགས་ནི་དམན་བཤད་པ།། དེ་ལའང་ཚུལ་དེ་གྲུབ་པར་འགྱུར། ། དེ་ཉིད་མཆོད་པར་བཤད་པ་ཉིད།། དེ་བཞིན་སོ་སོར་རབ་ཏུ་བརྟག། མི་ཕྱེད་རྡོ་རྗེའི་སྦྱོར་བ་ཡང་།། གསུང་གི་དབང་བསྐུར་བ་ཉིད་གསལ།། དགོངས་པ་ལུང་བསྟན་ལ་གནས་ནས།། གང་ཞིག་སེམས་ནི་མ་རྨོངས་པ།། མཁའ་ལ་གནས་པའི་ཉི་མ་བཞིན།། དེ་ནི་ཅི་དགར་སྤྱོད་པར་བྱེད།། དེ་བཞིན་གཤེགས་པ་ཐམས་ཅད་ཀྱི།། རྡོ་རྗེ་གསུམ་གྱི་གསང་བ་སྟེ།། སྔགས་སྤྱོད་པ་ཡི།། མཆོག་གྱུར་པ།། ལེའུ་བདུན་པ་རབ་ཏུ་བསྟན།། ། དེ་ནས་དཔལ་ལྡན་དེ་བཞིན་གཤེགས།། དཀོན་མཆོག་དཔལ་ནི་འོད་ཆེན་པོ།། དེ་བཞིན་གཤེགས་པ་ཐམས་ཅད་ཀྱི།། བླ་མ་རྡོ་རྗེ་གསུམ་གྱི་བདག། མགོན་པོ་རྡོ་རྗེ་འཛིན་ཆེན་པོ།། དབང་ཕྱུག་དབང་ཕྱུག་དམ་པ་དང་།། སངས་རྒྱས་ཀུན་གྱི་སྟོན་པ་ལ།། བསྟོད་པ་འདི་ཡིས་གསོལ་བ་བཏབ།། ནམ་མཁའི་སྤྱོད་པ་རྡོ་རྗེ་མཆོག་རྡོ་རྗེ་སེམས་དཔའ་ཐུབ་པ་ཆེ། ། ཐེག་པ་ཆེན་པོའི་རྣམ་སྣང་བ།། ཀུན་ཏུ་བཟང་པོ་བརྟུལ་ཞུགས་བཟང་།། དངོས་ཀུན་དངོས་པོ་གཅིག་པའི་མཆོག། རིགས་མཆོག་ཐམས་ཅད་ཡང་དག་འབྱུང་།། རྒྱལ་བའི་དམ་པའི་མཆོད་པའི་མཆོག། མཆོད་པ་ཀུན་མཆོག་བཤད་དུ་གསོལ།། འདོད་ཆགས་ཆེན་པོ་ཞེ་སྡང་ཆེ།། གཏི་མུག་ཆེན་པོ་བློ་གྲོས་ཆེ།། ཐེག་པ་གསུམ་པོ་རབ་སྟོན་ཅིང་།། རྡོ་རྗེ་ཐེག་པ་སྟོན་པ་པོ། ། ནམ་མཁའ་གཅིག་པུ་དངོས་པོའི་མཆོག། ཡེ་ཤེས་རྒྱ་མཚོ་ཐ་མ་ཆེ།། རྡོ་རྗེ་གསུམ་པོ་ཆགས་མེད་པ།། རྒྱལ་གནས་མཆོད་པ་བཤད་དུ་གསོལ།། རྡོ་རྗེ་གསུམ་པོ་ལམ་གྱི་མཆོག་ཐར་ལམ་གཅིག་པུ་སྟོན་པ་པོ། ། སངས་རྒྱས་སྐལ་མཆོག་ཤིན་ཏུ་དག། མི་མཆོག་མཆོད་པ་བཤད་དུ་གསོལ།། དངོས་པོ་ཀུན་གཅིག་ཤིན་ཏུ་དག། བྱང་ཆུབ་སེམས་ནི་རྒྱ་མཚོ་ཆེ།། ཆོས་ཀྱི་འཁོར་ལོ་གཅིག་བསྐོར་བ། ། རྟེན་འབྲེལ་ཡེ་ཤེས་ལས་བྱུང་བ།། རྡོ་རྗེ་གསུམ་གཅིག་རྣམ་དག་དོན།། སྣ་ཚོགས་སངས་རྒྱས་བྱ་བ་མཛད།། བདག་མེད་མེད་ཆོས་ཤིན་ཏུ་དག། ཕྱག་འཚལ་རྡོ་རྗེ་ཐེག་པ་ལའོ། ། དེ་ནས་དེ་བཞིན་གཤེགས་བདག་པོ།། ཐམས་ཅད་ནམ་མཁའ་མི་འགྱུར་ཆེ།། ཐམས་ཅད་དབང་བསྐུར་ཀུན་དབང་པོ།། ཀུན་དོན་རིན་ཆེན་མཆོག་འཛིན་པའང་།། ན་ཆུང་མིག་ཡངས་བཙལ་ནས་ནི། ། གཟུགས་དང་ན་ཚོད་རྣམས་ཀྱིས་བརྒྱན།། ལོ་གྲངས་ཉི་ཤུ་ལྔ་ལོན་པ།། རྙེད་ནས་མི་ཡི་སྐྱེ་གནས་བརྟག། རྣམ་པར་དབེན་ནམ་གཙང་བ་ཡི།། ས་ཕྱོགས་སུ་ནི་རྒྱལ་བདག་ཉིད་ཞེ་བཞི་པའི་གནས་ཡིད་འོང་། ། བཤང་གཅི་ཆུ་ཡིས་བྱུགས་ནས་ནི།། སངས་རྒྱས་བྱང་ཆུབ་རབ་སྟེར་བའོ།། རྟག་ཏུ་མཆོད་པ་ཉིད་བྱའོ།། དེ་བཞིན་གཤེགས་པ་མཆོད་པ་ཡི།། ཕུང་པོ་ཞེས་བྱ་སྣ་ཚོག་སྐྱེས། ། རྡོ་རྗེ་གསུམ་པོ་མི་ཕྱེད་ཁམས།། རྒྱལ་བ་ཞེས་ནི་བྱ་བར་བཤད།། ཀུན་མཁྱེན་ཡེ་ཤེས་ལང་ཚོ་སྟེ།། ལེན་པ་མི་གསལ་ལ་སྦྱོར་ལ།། དེ་ཉིད་ན་ཆུང་ཡིན་པར་བརྟག། འཇིག་རྟེན་པ་རྣམས་འཐོབ་བྱེད་རྒྱའགྲོ་བའི་དོན་ནི་རབ་གྲུབ་པ། ། གང་ཞིག་དངོས་མེད་ཅེས་བཤད་པ།། མཐའ་སྐྱེས་བཞིན་དུ་བརྟག་པ་ཡིན།། གཙང་བ་རྣམ་དག་སེམས་ཡིན་ཏེ།། རྣམ་པར་དབེན་པ་དངོས་མེད་པ།། ས་ནི་སྤྱན་ཞེས་བྱ་བ་ཡིན། ། ས་ཕྱོགས་རྒྱལ་བ་འབྱུང་བ་ཡིན།། ཞི་བ་སྣ་ཚོགས་ངེས་འབྱུང་བ།། ཞི་བའི་གནས་ནི་མྱུར་ལ་སོགས།། བཤང་གཅི་ཡུལ་དང་དབང་པོར་གྲགས།། ཆུ་ནི་ཤེས་རབ་ལ་སོགས་དྲུག། འོདི་དག་གིས་གང་བྱུགས་གྱུར་པ། ། རྫོགས་ལོངས་སྤྱོད་པའི་འདོད་འབྱུང་བ།། དེ་དག་རྒྱལ་བའི་ཆོས་བཤད་པ།། དགོངས་པ་སྦྱོར་བ་ཆོས་ཉིད་དོ།། མཆོད་པའི་ཡན་ལག་གཉིས་པ་ཡིས།། བཀོད་པའི་ཡན་ལག་མཚན་ཉིད་བཤད། ། འཇིག་རྟེན་ཤིན་ཏུ་འདས་སྤྱི་བོ།། འཇིག་རྟེན་འདས་པའི་སྙིང་ཁ་རུ།། རྐང་པའི་བར་དང་ལྟེ་བ་དང་།། རྐེད་པ་གསང་བ་འཇིག་རྟེན་པ།། རྒྱལ་སྲས་རྣམས་ཀྱི་བཀོད་པ་ནི།། རིགས་ནི་ལྔ་པོ་བྱ་བ་ཡིན། ། ནམ་མཁའི་ཁམས་ཀྱི་དབུས་གནས་པར།། ཡེ་ཤེས་རྒྱ་མཚོ་རྣམ་པར་སྒོམ།། བདག་ཉིད་ཟླ་བའི་ནང་གནས་པར།། བརྟུལ་ཞུགས་ཅན་གྱིས་སྙིང་ཁར་སྒོམ།། ཆུ་དེ་སྦྱོར་བར་གྱུར་པ་ནི།། མ་མ་ཀཱིར་ནི་ཡོངས་སུ་བརྟག། ཞི་བ་རྡོ་རྗེ་འཛིན་འདོད་པས།། བསྡུ་བ་དེ་ཡང་རབ་ཏུ་བྱ།། རིན་ཆེན་རང་བཞིན་མཆོད་རྟེན་ནི།། འོད་ཟེར་སྣ་ཚོགས་ཉིད་ཀྱིས་བརྒྱན།། ཡེ་ཤེས་རྒྱ་མཚོ་དུས་གསུམ་པ།། གནས་དེ་རུ་ནི་བསམ་བྱ་བ། ། བློ་ལྡན་པ་སྤུའི་བུ་ག་ལས།། ཇི་ལྟ་ཇི་ལྟར་སྤྲོ་བར་བྱ།། རྣལ་འབྱོར་རྣལ་འབྱོར་མཆོག་གཞོལ་བས།། མཆོད་པའི་སྤྲིན་ནི་དེས་སྤྲོ་བྱ།། གོས་དཀར་པདྨར་ཡང་དག་དགོད།། རྣམ་ལྔ་གཅིག་ལ་རྣལ་འབྱོར་མ། ། མེ་ཡི་སྦྱོར་བ་བཤད་པ་ནི།། དེ་ཡང་མི་གསལ་ཞི་ལ་གནས།། སྒྲོན་མར་ཨུཏྤལ་ཉིད་གྱུར་པ།། རླུང་སྟེ་སྦྱོར་བ་ལྔ་པའོ།། འཇུག་དང་གནས་དང་སྐྱེ་བ་དང་།། དེ་བཞིན་སྤང་བའི་མིང་ཅན་ནོ།། དེ་ཉིད་རྣམ་པ་གསུམ་བྱས་པས།། རྡོ་རྗེ་གསུམ་གྱི་དམ་ཚིག་གནས།། དེ་ནས་བློ་ལྡན་གྱིས་དབུལ་བ།། ལྷ་རྣམས་ཀྱི་ཡང་དངོས་མེད་ཉིད།། དེ་ནས་དེ་བཞིན་གཤེགས་པ་མཆོག། ཁྱབ་བདག་རྣམ་སྡང་ཆེན་པོ་ལས། @མེ་ཏོག་དགོངས་པ་ཐོས་ནས་ནི།། རྡོ་རྗེ་ཅན་གྱིས་ཐུབ་ཆེན་ཞུས།། མེ་དང་རླུང་དང་དབང་ཆེན་དང་།། ཆུ་རུ་ཡོངས་སུ་བརྟག་པ་ཡིན།། རེ་རེའང་དང་པོ་སྦྱོར་ཞེས་བྱ།། མེ་ཏོག་དེ་ལྔ་གསུམ་དུ་བཤད། ། བྱ་རྒོད་མེ་ཏོག་ཟ་བ་དང་།། བུང་བ་ཤ་ཟ་ཞེས་ཟེར་ཞིང་།། མེ་ཏོག་འདི་ཡི་དགོངས་པ་ནི།། མ་འོངས་སྐྱེ་བོས་མི་ཤེས་སོ།། མ་རྟོགས་པས་ནི་དེ་རྣམས་ཀྱི།། དངོས་གྲུབ་རིང་དུ་གནས་པར་འགྱུར། ། འདི་ལྟར་བདག་ནི་སྐལ་མིན་ཞེས།། སྨྲ་ཞིང་དེ་རྣམས་བདག་ཉིད་སྨོད།། དེ་ལྟར་བདག་ཉིད་ཀྱིས་སྨད་པས།། སངས་རྒྱས་ཐམས་ཅད་སྨད་པར་འགྱུར།། སངས་རྒྱས་ཐམས་ཅད་སྨད་གྱུར་པས། མི་ལས་འདས་ནས་གཞན་དུ་འགྲོ།། གཙོ་བོ་སངས་རྒྱས་ནང་ན་མིན།། ཕྱི་རོལ་ན་མིན་གཉིས་ཀར་མིན།། ཚོགས་པ་ལས་ནི་མ་ཡིན་ཏེ།། རྐྱེན་གྱིས་འགྲོ་བ་དག་ལ་གནས།། དེ་བཞིན་དེ་བཞིན་གཤེགས་སངས་རྒྱས། ། ལུས་ལ་གསང་སྔགས་འདི་ཉིད་ལས།། གསང་སྔགས་འགྲུབ་པར་དཀའ་བའི་རྒྱུས།། དེས་ནི་བདག་དང་དེ་དག་སྨོད།། དེ་རྣམས་རྗེས་སུ་གཟུང་བའི་ཕྱིར།། དགོངས་པས་དེ་ནི་བཤད་དུ་གསོལ། ། རང་གི་ངོ་བོ་མ་འཚལ་ན།། མཁས་པ་དག་ནི་ཉམས་པར་འགྱུར།། དེ་ནས་བཅོམ་ལྡན་སྣ་ཚོགས་པས།། གསང་བའི་བདག་པོ་ལ་གསུངས་པ།། ཉིན་དང་མཚན་མོ་དབྱེ་བ་ཡིས།། མེ་ཏོག་དོན་ནི་བཤད་པར་བྱ། ། པདྨ་ཨུཏྤལ་ཉིན་མོར་བཤད།། ཛཱ་ཏི་མཚན་མོ་ཡིན་ཞེས་བཤད།། ལྔ་ཡི་བདག་ཉིད་གསུམ་དང་གཅིག། གཉིས་ལྔ་གཅིག་དང་གསུམ་དུ་འགྱུར།། དེ་ཡི་ཐབས་ནི་ཉིན་མོར་བཤད།། མཚན་མོ་ཤེས་རབ་ཅེས་བཤད་དོ།། ཉིན་དང་མཚན་མོའི་དབྱེ་བ་ཡིས།། འཇུག་ཏུ་འབྱུང་བ་ཉིད་དུ་འགྱུར།། དེ་གཉིས་དབུས་ཀྱི་སྦྱོར་བ་གང་།། དགོངས་པས་ཡོངས་སུ་བརྟག་པ་ཡིན།། དེ་ནི་སངས་རྒྱས་སྙིང་པོར་འགྱུར། ། དེ་བས་ལྷ་ཚོགས་ཀྱིས་དེ་མིན།། རྣལ་འབྱོར་པ་དང་སྔགས་པ་རྣམས།། དགོངས་པའི་ཆོས་ལ་རབ་བརྩོན་བྱ།། དགོངས་པ་བྱིན་རླབས་རྒྱུ་ཡིས་ནི།། དེ་རྣམས་ཀྱིས་ནི་འགྲུབ་པར་འགྱུར། ། གང་ཞིག་རླུང་ནི་བཅུར་གྲགས་པ།། དེ་ནི་པདྨ་ཨུཏྤལ་མིང་།། དེ་ཉིད་ཅེས་གྲགས་རྡོ་རྗེ་གསུམ།། ཛཱ་ཏི་གཅིག་པུ་གསུམ་དུ་འདོད།། ཀར་ནི་ཀ་དང་མ་ལི་ཀ། ཡུག་ཏི་ཀ་ར་བཱི་ར་ནི། གོ་རིམས་བཞིན་ཏུ་སྤྱན་སོགས་ཏེ།། ས་ལ་སོགས་པར་འདིར་སྦྱར་རོ།། དངོས་མེད་གོ་འཕང་ལ་བཀོད་པས།། ལྷ་རྣམས་ཀྱི་ནི་སྐུར་སྦྱོར་བས།། གཅིག་ཏུ་སངས་རྒྱས་ཀུན་མཉེས་པའི།། མཆོད་པ་ཆེན་པོར་དེ་འགྱུར་རོ། ། ལྔ་པོའི་བདག་ཉིད་ཡང་དག་བཞག། ལྔ་བཅུ་དག་ནི་གཉིས་འགྱུར་བྱས།། དེ་ཉིད་གསུམ་སྦྱོར་འཁོར་ལོ་ནི།། དཔག་ཚད་བརྒྱ་ཡི་དཀྱིལ་འཁོར་རོ།། དེར་ནི་མཁས་པས་རྟག་པར་ནི། ། རིགས་རྣམས་རབ་ཏུ་དགོད་པར་བྱ།། པདྨ་འཁོར་ལོ་རྡོ་རྗེ་དང་།། དེ་བཞིན་ཨུཏྤལ་རྟག་ཏུ་སྒོམ།། དཔག་ཚད་བཞི་པོ་སྦྱོར་གཅིག་པ།། དཔག་ཚད་རྒྱ་ཁྱོན་དེ་ཉིད་གསུམ།། བྱམས་པ་ལ་སོགས་གྲུ་བཞིར་འགྱུར། ། མཛེས་པ་ཕུང་པོས་བརྒྱན་པ་ཡིན།། གྲུ་བཞི་དེ་ནི་རིགས་སུ་གྱུར།། ཞི་བ་སྦྱོར་བ་གཅིག་མིང་ཅན།། མཆོད་རྟེན་ཡེ་ཤེས་སེམས་རང་བཞིན།། གསལ་ཞིང་རང་བཞིན་དྲི་མ་མེད། ། རིགས་རྣམས་མཆོད་ཕྱིར་དེ་ཉིད་ནི།། ཤེས་རབ་ཅན་གྱིས་གནས་སྒོམ་མོ།། མངོན་ཤེས་ལྔ་ཡི་གནས་འདོད་རྣམས།། དེ་ཡི་མཆོད་པ་རྒྱ་མཚོགས་ལ།། རིན་ཆེན་ཡེ་ཤེས་སྤྲོ་བདག་ཉིད། ། གོས་ནི་བསྡུ་བ་ཞེས་བྱའོ།། མཆོད་པ་མཆོག་རྣམས་དེ་དག་གིས།། བྱང་ཆུབ་འདོད་པས་མཆོད་པར་བྱ།། ཤེས་རབ་ཅན་གྱིས་མཆོད་མཆོག་ལས།། ལྷ་རྣམས་རྟག་ཏུ་མཉེས་པར་བྱ།། སྦྱོར་གཅིག་དེ་ལས་ཡང་དག་བྱུང་། ། རིན་ཆེན་འབྱུང་གནས་ན་ཆུང་མིན། དགའ་མགུ་ཡང་དག་ལྡན་པ་ཡིན།། དངོས་གྲུབ་ཤིན་ཏུ་གྲུབ་པའི་ཕྱིར།། ང་རྒྱལ་ལ་སོགས་བདུན་ཞེས་བྱ།། རིན་ཆེན་ཐམས་ཅད་དབུལ་བར་བྱ། ། ཆོས་དང་རྫོགས་ལོངས་སྤྱོད་ལས་བྱུང་།། རིན་ཆེན་བདུན་གྱི་ནོར་དེ་ནི།། དེས་བཀང་བ་ཡི་ཞིང་འདི་ནི།། ཤེས་རབ་ཐབས་གཅིག་ལས་བྱུང་བའི།། དངོས་གྲུབ་འདོད་པས་སྦྱིན་པའི་ཕྱིར། ཞིང་དེ་ཉིན་རེ་དབུལ་བར་ནི།། ནམ་མཁའ་མཐའ་ཡས་རྣལ་འབྱོར་པའི།། སྦྱིན་པའི་ཕ་རོལ་ཕྱིན་འདིར་འགྱུར།། སངས་རྒྱས་དཀྱིལ་འཁོར་དབུས་སུ་དེ།། ཕྱག་རྒྱའི་བདག་པོར་མཉམ་བཞག་སྟེ།། འདོད་ཆགས་བློ་ལྡན་སངས་རྒྱས་ལ།། རེག་པར་ཡང་དག་སྦྱོར་བ་དབུལ།། ནམ་མཁའི་དབྱིངས་ཀྱི་དབུས་གནས་པར།། བཀོད་པའི་དཀྱིལ་འཁོར་དམ་པ་སྒོམ།། བདག་ཉིད་དེ་བཞིན་གཤེགས་པའི་སྐུ། ། ཡུལ་དང་དབང་པོ་སུན་འབྱིན་པ།། དངོས་མེད་གཅིག་པར་ཡང་དག་འབྱུང་།། ཡུལ་དང་དབང་པོ་ཞེས་བྱ་བའི།། བཤང་གཅི་ཇི་ལྟ་ཇི་ལྟ་བར།། དེ་ཉིད་མཆོད་པ་རྣམས་ཀྱིས་མཆོད།། སྐལ་བཟང་བཞིན་ནི་མཛེས་པ་ཡི། བུད་མེད་གཟུགས་བཟང་རྙེད་པ་དང་།། གསང་སྔགས་ཡི་གེའི་གནས་འགྱུར་བས།། རྣལ་འབྱོར་མ་དེ་བྱིན་བརླབས་ལ།། བྱས་ནས་གཉིས་མེད་སྦྱོར་གཅིག་པུ། རང་གི་ལུས་ནི་ནང་དུ་གཞུག། སྤྱན་སོགས་ཇི་ལྟ་ཇི་ལྟ་བར།། བྱིན་གྱིས་བརླབས་པའི་གནས་བཀོད་དེ།། མིག་བཟང་དག་པའི་བྱ་བ་ཡི།། རང་བྱུང་ཁུ་བ་བླངས་ནས་མཆོད།། གང་ཞིག་དེ་ལྟར་རྟོག་པ་དེ། ། བླངས་པས་རྡོ་རྗེ་འཆང་བར་འགྱུར།། ས་ལ་སོགས་པའི་དཀྱིལ་འཁོར་གང་།། སྤྱན་ལ་སོགས་པར་རབ་བརྟག་པ།། དེ་ནི་འཇུག་སོགས་སྦྱོར་བ་ཡང་།། དེ་ནི་ཁུ་བ་ཟ་བར་འགྱུར།། འདི་ནི་སྔགས་རྣམས་ཐམས་ཅད་ཀྱི།། སྐུ་གསུང་ཐུགས་ཀྱི་མཆོད་པ་སྟེ།། རྡོ་རྗེ་ཡེ་ཤེས་ཅན་གསང་གི། གསང་སྔགས་དངོས་གྲུབ་བྱེད་པས་མཆོག། རིན་ཆེན་ཀུན་གྱི་འབྱུང་གནས་མཆོག་དགོངས་པ་ལུང་བསྟན་ལ་གནས་ནས། ། གང་ཞིག་སེམས་ནི་བཟོད་གྱུར་པ།། དེ་ནི་ཇི་བཞིན་ཉིད་དུའང་བྱེད།། དེ་བཞིན་གཤེགས་པ་ཐམས་ཅད་ཀྱིས།། རྡོ་རྗེ་གསུང་གི་གསང་བ་ལས།། བཤད་གཅིའི་དམ་ཚིག་ཅེས་བྱ་བའི། ། ལེའུ་བརྒྱད་པ་ཡིན་པར་བཤད།། ། དེ་ནས་དེ་བཞིན་གཤེགས་མཆོག་གཙོ།། ཐམས་ཅད་ནམ་མཁའ་མི་འགྱུར་ཆེ།། སངས་རྒྱས་དབང་བསྐུར་སྤྱོད་པའི་མཆོག། གཟུགས་དོན་དབང་ཕྱུག་དམ་པ་ཡིན།། རྡོ་རྗེ་གསུམ་ཉིད་ལོངས་སྤྱོད་པ།། རྡོ་རྗེ་མི་ཕྱེད་གསུམ་དཀྱིལ་འཁོར།། སངས་རྒྱས་ཡེ་ཤེས་སྦྱོར་གཅིག་པའོ།། གསང་བ་ཉམ་ནི་དགའ་བར་བཤད། ། ནམ་མཁའི་དབྱིངས་ཀྱི་དབུས་གནས་པར།། སངས་རྒྱས་དཀྱིལ་འཁོར་བསྒྲུབ་པར་བྱ།། རྡོ་རྗེ་རྩེ་གཅིག་རྡོ་རྗེ་ཡང་།། སྒོམ་པའི་བདག་ཉིད་ཅན་གྱིས་བསྒོམ། ། འོད་འཕྲོ་མང་པོ་འབར་བ་དང་།། འོད་ཟེར་སྣ་ལྔས་རབ་ཏུ་གང་།། དུས་གསུམ་སངས་རྒྱས་ཡང་དག་འབྱུང་།། བསྒོམས་ལ་རྡོ་རྗེས་ཕྱེ་མར་བརླག། རྡོ་རྗེ་གསུམ་གཅིག་ལོངས་སྤྱོད་ནི།། རྡོ་རྗེས་ཕྱིར་བརླགས་མེད་གྱུར་པའི། ། ཐུགས་ཀྱི་དངོས་གྲུབ་བྱེད་བསམ་གཏན།། བསྒོམས་ན་མྱུར་དུ་ཐོབ་པར་འགྱུར།། རྡོ་རྗེ་མཆོག་ཅེས་བྱ་བ་ཡི།། རྡོ་རྗེ་གསང་བ་འདི་ལྟ་བུ།། རྡོ་རྗེས་རྡོ་རྗེ་འཛིན་པ་ནི།། སེམས་ཅན་ཐམས་ཅད་བསད་ན་ནི།། དེ་ནི་མྱུར་བར་མི་བསྐྱོད་པའི།། རྒྱལ་བའི་སྲས་སུ་སྐྱེ་བར་འགྱུར།། ཞེ་སྡང་རིགས་ཆེན་དེ་ཉིད་ཀྱིས།། ཞིང་དེ་འགེངས་པར་བྱེད་པར་འགྱུར།། དེ་ནས་དགོངས་པ་ཆོས་གཅིག་པུ། ། གཙོ་བོ་ཀུན་མཁྱེན་ཐམས་ཅད་རིག། དམ་ཚིག་དེ་ཉིད་གསུངས་པ་ཡི།། མགོན་ལ་ཕྱག་ན་རྡོ་རྗེས་གསོལ།། འདི་ལྟར་དངོས་མེད་མཆོག་གྱུར་པ།། ཁྱོད་ནི་ཆོས་རྣམས་སྟོན་མཛད་པ།། འཇིག་རྟེན་པ་དང་འགལ་ཚིག་གིས།། མགོན་ཁྱོད་ཅི་ཕྱིར་སྟོན་པར་མཛད།། གང་ཞིག་དེ་བཞིན་ཉིད་དངོས་གཅིག། དུས་གསུམ་བྱུང་བའི་སངས་རྒྱས་རྣམས།། ཆོས་སྐུ་གཅིག་པུ་ལས་འཁྲུངས་པ།། ཇི་ལྟར་རྡོ་རྗེས་ཕྱེ་མར་བརླག། དེ་ནི་ཕྱེར་བརླགས་གྱུར་པ་ལས།། ཇི་ལྟར་ཡང་དག་སེམས་འགྲུབ་འགྱུར།། ཆོས་སྐུ་གཅིག་པུ་ལས་བྱུང་ལས།། ལྷག་པར་ཞེས་བྱ་གྱུར་ནས་སུ།། དུས་གསུམ་འབྱུང་བའི་སངས་རྒྱས་རྣམས། ། ཕྱེ་མར་བརླག་པར་ཇི་ལྟར་ནུས།། ཕྱིར་བརླག་བྱེད་པས་དངོས་མེད་པས།། ཕྱེ་མ་ཉིད་ཀྱང་ཁྱད་པར་དུ།། སངས་རྒྱས་སྔགས་དོན་རྣལ་འབྱོར་པ།། ནུས་པ་བསམ་མི་ཁྱབ་ལྡན་ལ།། དེ་འདྲ་བར་ནི་ཕྱེར་བརླག་པར།། སྔགས་པ་གཞན་གྱིས་མི་ནུས་སོ།། སེམས་ཅན་གྱིས་ནི་སེམས་ཅན་བཞིན།། སངས་རྒྱས་ཕྱིར་བརླག་པས།། འདི་གཉིས་ཁྱད་པར་མེད་དོ་ཞེས།། མ་འོངས་སྐྱེ་བོ་སྨྲ་བར་འགྱུར། ། སངས་རྒྱས་གཅིག་པུ་མཐར་ཐུག་པ།། མིན་ཞེས་མི་རྣམས་ངེས་སྨྲ་ཞིང་།། གང་ཞིག་སངས་རྒྱས་ཀྱིས་གསུངས་བཞིན།། རབ་ཏུ་སྤོང་བར་བྱེད་པར་འགྱུར།། ཐེག་བཟང་བསྒྲུབས་ན་འཚང་རྒྱ་བ། དགོངས་པའི་བུམ་པ་བཟང་པོ་མཆོག། དེ་ནི་བཅོམ་ལྡན་མྱུར་སྦྱོར་བས། མི་བསྐྱོད་ཞིང་དུ་སྐྱེས་འགྱུར་རམ།། སེམས་ཅན་འཁོར་བར་འཁོར་གྱུར་པ།། དེ་ཚེ་ཞེ་སྡང་ཆེ་སྐྱེ་འམ།། སྙིང་རྗེས་གསད་པར་བྱའོ་ཞེས།། སྔགས་པ་རྣམས་ནི་དེ་མི་སྤོང་།། འདས་ཚེ་སྟོང་པར་གྱུར་པ་དང་།། ད་ལྟ་རྗེས་སུ་སྟོན་མཛད་དང་།། མཉེས་བྱ་མ་འོངས་སངས་རྒྱས་རྣམས།། སངས་རྒྱས་བྱང་ཆུབ་སྩོལ་བའོ། ། མི་བསྐྱོད་གཟུགས་ཅན་རྡོ་རྗེ་ཡིས།། དེ་རྣམས་ཇི་ལྟར་གཞོམ་པར་བགྱི།། དེ་ཉིད་སྣ་ཚོགས་དོན་ལྡན་ཚིག། དེ་རྣམས་ཀྱིས་ནི་ཇི་ལྟར་རྟོགས།། གང་ཞིག་ཤེས་པས་རྒྱལ་སྲས་རྣམས། ། དགོངས་པའི་དོན་ལ་རྟོག་མེད་འགྱུར།། མ་འོངས་སྡེ་བོའི་དོན་དུ་ནི།། དེ་ཉིད་བཅོམ་ལྡན་བཤད་དུ་གསོལ།། དེ་ནས་རྡོ་རྗེ་འཛིན་སྨྲ་ཡིས།། འགྲོ་ལ་ཕན་པའི་ཚིག་གསན་ནས། དེ་ནས་གཙོ་བོ་རྡོ་རྗེ་འཆང་།། ཁྱབ་བདག་གིས་ནི་སླར་གསུངས་པ།། ལེགས་སོ་བུ་ཁྱོད་ཆེར་ལེགས་ཏེ།། ཀུན་ཏུ་བཟང་པོ་ཁྱོད་ལེགས་སོ།། དགོངས་པས་བཤད་པའི་དོན་དུ་ནི།། ཁྱོད་ཀྱིས་ང་ལ་གང་དྲིས་པ།། གསུངས་དོན་ཇི་ལྟ་ཇི་ལྟ་བར།། དེ་ནི་ང་ཡིས་བཤད་པར་བྱ།། ཕུང་སོགས་ཡན་ལག་གང་གྱུར་པ།། སངས་རྒྱས་སེམས་ཅན་རབ་བརྟན་ཞིང་།། སྔགས་དང་ཕྱག་རྒྱའི་སྦྱོར་བ་ཡང་། ། དབྱེ་བ་སྣ་ཚོགས་རབ་ཏུ་བསྟན།། འཁོར་བ་མི་བསྐྱོད་མིང་ཅན་ཏེ།། དེའི་སྔགས་རྡོ་རྗེ་ཞེས་བྱ་བ།། མི་གསལ་རྡོ་རྗེ་ཞེས་བཤད་དེ།། དངོས་མེད་གཅིག་པུ་རྡོ་རྗེ་ཉིད།། དེས་བཤིག་པ་ནི་བས་པོ་སྟེ། ། སངས་རྒྱས་སེམས་ཅན་ཁྱད་པར་དུ།། སྣ་ནི་ཚོགས་ཀྱི་དབང་པོ་ཡི།། ཁ་ནི་རང་བཞིན་ཉིད་དུ་གཡོ།། རྣལ་འབྱོར་པ་ཡི་ལག་གྱུར་པ།། འགྲོ་བ་རླུང་གི་མིང་ཅན་ནོ།། མི་བསྐྱོད་རྡོ་རྗེའི་སྦྱོར་བ་ཉིད། ། ལག་ཏུ་རྡོ་རྗེ་གཞག་ནས་ནི།། དེ་ཚེ་མྱུར་ལ་སོགས་བྱ་བ།། ཀླུ་ཡི་རང་བཞིན་སྣ་ཚོགས་ཉིད།། ཕུང་སོགས་བརྟག་པའི་སངས་རྒྱས་རྣམས།། སྐུ་གསུང་ཐུགས་ལས་ཡང་དག་འབྱུང་།། དེ་ཡི་ཡན་ལག་ཕུང་པོར་བཤད། ། དེ་ནི་ཕྱིར་འགྱུར་བསད་པ་ཡིན།། འདི་ནི་ཞེ་སྡང་རིགས་ཡིད་འོང་།། མི་བསྐྱོད་ཡེ་ཤེས་རྡོ་རྗེ་ཉིད།། དེ་ཡི་ཞིང་སྐྱེད་དམ་པ་ཡིན།། དངོས་གྲུབ་ཆེན་པོ་དེས་འཐོབ་འགྱུར།། དེ་ནས་དཔལ་ལྡན་བདེ་ཆེན་པོ། ། ཡེ་ཤེས་ཐར་པ་རབ་སྒྲུབ་པ།། རང་བཞིན་དག་གིས་གོས་མེད་པ།། བྱང་ཆུབ་སྤྱོད་པ་རབ་སྒྲུབ་པས།། ཕྱག་ན་རྡོ་རྗེ་འོད་ཆེན་པོ།། གསང་བ་གསུམ་གྱི་གཙོ་བོ་ལ།། བོས་ནས་ཡང་དག་རྫོགས་སངས་རྒྱས། ། སྒྲུབ་པའི་དམ་ཚིག་དེ་ཉིད་གསུངས།། ནམ་མཁའི་དབྱིངས་ཀྱི་དབུས་གནས་པར།། རྡོ་རྗེ་དཀྱིལ་འཁོར་དམ་པ་ལ།། རྣམ་པར་སྣང་མཛད་བསྒོམ་བྱ་ཞིང་།། སངས་རྒྱས་ཐམས་ཅད་རྣམ་པར་སྒོམ། ། རིན་ཆེན་ཀུན་གྱི་སྦྱོར་བ་ཡིས།། རྡོ་རྗེ་གཟུགས་ནི་རྣམ་པར་སྒོམ།། རྡོ་རྗེ་གསུམ་མཉམ་སྦྱོར་བ་ཡིས།། རྫས་རྣམས་ཐམས་ཅད་དབྲོག་པར་བྱ།། ཤེས་དང་དབང་པོ་ལྡོག་པར་འགྱུར།། ། རྣམ་སྨིན་དངོས་པོ་མེད་པ་གང་།། དེ་ཉིད་དབྲོག་པའི་རྡོ་རྗེ་སྟེ།། སངས་རྒྱས་ཐམས་ཅད་རབ་སྒྲུབ་བོ།། རིན་ཆེན་རྡོ་རྗེ་མཆོག་སྦྱོར་བ།། རྒྱལ་བའི་སྲས་སུ་འགྱུར་བ་དང་།། ནོར་གྱི་རྒྱ་མཚོས་གང་བ་ཡི། ། ཡིད་བཞིན་ནོར་བུ་འདྲ་བར་འགྱུར།། འདི་ནི་གཏི་མུག་རིགས་དེ་ཉིད།། དམ་ཚིག་ཡིན་པར་ཡོངས་སུ་བསྒྲགས།། རིགས་ཀུན་རྒྱ་མཚོ་ཞེས་བྱ་སྟེ།། དེ་ལས་ཐུབ་པའི་སྐྱེས་མཆོག་འགྱུར། ། དེ་ནས་བདག་པོ་བཅོམ་ལྡན་འདས།། འདོད་ཆགས་ཐར་པར་རབ་འཇུག་པ།། གསང་བ་དག་པ་གནས་མེད་པ།། དཀྱིལ་འཁོར་མཆོག་ནི་བཀའ་སྩལ་ཏོ།། ནམ་མཁའི་དབྱིངས་ཀྱི་དབུས་གནས་པར། ། རིན་ཆེན་དཀྱིལ་འཁོར་བསྒོམ་པར་བྱ།། དཔལ་མེད་ཆོས་ནི་རྣམ་བསྒོམས་ཏེ།། སངས་རྒྱས་ཀུན་གྱིས་རབ་ཏུ་དགང་།། བུད་མེད་ལྟ་བུའི་སྦྱོར་བ་ཡང་།། ཏིང་ངེ་འཛིན་གྱིས་སྦྱོར་བ་ཡིས། ། ཐམས་ཅད་དེ་རུ་བསྒོམ་པར་བྱ།། འདི་ནི་རྡོ་རྗེ་ཚུལ་མཆོག་ཡིན།། དངོས་མེད་བསམ་པའི་སྦྱོར་བ་ཡིས།། གསལ་མི་གསལ་ལ་ཡང་དག་སྦྱར།། ཆོས་དང་རྫོགས་ལོངས་སྤྱོད་སྦྱོར་བ།། གསང་སྔགས་ཀྱིས་སྤྲུལ་དབང་པོ་གཉིས།། སྦྱོར་བ་བཞི་ཡི་སྦྱོར་བ་ཡིས།། དབང་པོ་གཉིས་ནི་རབ་འབྱོར་པའི།། སྙོམས་ཞུགས་སྦྱོར་བ་དེ་ཡི་ནི།། དེ་དག་ཐམས་ཅད་བར་སྤྱོད། ། སྐུ་གསུམ་མི་ཕྱེད་སྔགས་རྣམས་ཀྱི།། འདི་ནི་སྒོམ་པ་མཆོག་དེ་ཡིན།། དེ་ཉིད་དམ་ཚིག་སྦྱོར་བ་འདི།། འདོད་ཆགས་རིགས་གཅིག་སྒོམ་པའོ།། འདི་ནི་སངས་རྒྱས་ཐམས་ཅད་ཀྱི།། འདོད་ཆགས་ཆེན་པོའི་ཚུལ་མཆོག་སྟེ།། སྔགས་པ་རྣམས་ཀྱིས་ཉིན་རེ་ཞིང་།། རབ་ཏུ་འབད་པས་བསྒོམ་པར་བྱ།། དེ་ནས་གསང་དབང་རྡོ་རྗེ་གསུམ།། རྡོ་རྗེ་སྔགས་དོན་སྒྲུབ་པའོ།། བདག་མེད་ཡེ་ཤེས་ལས་བྱུང་བས། ། གསུང་ནི་འདི་སྐད་བཀའ་སྩལ་ཏོ།། ནམ་མཁའི་དབྱིངས་ཀྱི་དབུས་གནས་པར།། སངས་རྒྱས་དཀྱིལ་འཁོར་བསྒོམ་པར་བྱ།། དོན་ཡོད་རྡོ་རྗེ་རྣམ་བསྒོམས་ཏེ།། སངས་རྒྱས་ཐམས་ཅད་བསྒོམ་པར་བྱ། ། རྡོ་རྗེ་ཚིག་གི་བརྫུན་སྨྲ་བ།། རྒྱལ་བ་ཐམས་ཅད་བསླུ་བ་སྟེ།། འདི་ནི་སངས་རྒྱས་ཐམས་ཅད་ཀྱི།། ནམ་མཁའི་གསུང་ནི་དྲི་མེད་པའོ།། གང་ཞིག་བརྫུན་དུ་སྨྲ་བཤད་པ། བརྫུན་དེ་ཉིད་ནི་དམ་པ་སྟེ།། དཔའ་བོ་གང་ཞིག་སྒོམ་བྱེད་པ།། དེ་ནི་རྒྱལ་བའི་མཆོག་ཏུ་འགྱུར།། གསང་བའི་ཡེ་ཤེས་དམ་པ་སྟེ།། སངས་རྒྱས་དངོས་གྲུབ་བྱེད་པའི་མཆོག། དམ་ཚིག་འགུགས་པར་གང་གྱུར་པའི། ། རིགས་ཀྱི་དམ་ཚིག་ལ་འཇུག་པའོ།། ཀུན་ཏུ་ཀུན་ནས་འབད་པ་ཡིས།། ཇི་བཞིན་དོན་དུ་དྲང་བྱས་ཏེ།། སོ་སོར་རྟོག་པའི་སྦྱོར་བ་ཡིས།། དེ་ནི་དངོས་གྲུབ་རྒྱ་ཆེན་འཐོབ།། དེ་ནས་བཅོམ་ལྡན་སྣ་ཚོགས་པ། ། མི་བྱེད་རྡོ་རྗེ་གསུམ་རྒྱལ་བདག།། རྡོ་རྗེའི་དངོས་གྲུབ་རབ་སྟོན་པས།། གསུང་ནི་འདི་སྐད་བཀའ་སྩལ་ཏོ།། ནམ་མཁའི་དབྱིངས་ཀྱི་དབུས་གནས་པར།། དེར་ནི་དཀྱིལ་འཁོར་བསྒོམ་པར། སངས་རྒྱས་སྐུ་རུ་རབ་བརྟག་པའི།། དམ་ཚིག་དེ་ནི་ཡང་དག་བཤད།། དཀོན་མཆོག་དཔལ་ནི་རབ་བསྒོམས་ཏེ།། གཟུགས་རྣམས་ཀུན་གྱིས་ས་འདི་གང་།། ཕུང་པོ་ལ་སོགས་གྲངས་མཉམ་པའི།། སངས་རྒྱས་ཀུན་གྱིས་ཐམས་ཅད་དུ།། རྩུབ་པའི་ངག་ལ་སོགས་པ་ནི།། ས་རྣམས་དམན་པ་ཞེས་བྱ་བའི།། བསྒོམས་ན་དངོས་གྲུབ་ཐོབ་འགྱུར་ཞེས།། བཅོམ་ལྡན་ཐུབ་པས་དེ་སྐད་གསུངས།། དེ་བཞིན་གཤེགས་པ་ཀུན་བཀོད་པ། ། སྣ་ཚོགས་གཟུགས་ཅན་འོད་པོ་ཆེ།། བསམ་པས་དཔལ་ལྡན་གཅིག་པུ་ཉིད།། དཔག་ཏུ་མེད་པར་གྱུར་པ་ཡིན།། དེ་ནས་གང་ཞིག་དམ་ཚིག་སོགས།། ཆོས་དབྱིངས་རྡོ་རྗེ་གསུམ་ཉིད་ནི། ། དེ་བཞིན་གཤེགས་པ་ཐམས་ཅད་ཀྱིས།། དམ་ཚིག་རྡོ་རྗེ་དཔལ་ལ་སོགས།། བྱང་ཆུབ་སེམས་དཔའ་སེམས་དཔའ་ཆེ།། ངོ་མཚར་རྨད་དུ་གྱུར་ནས་ནི།། ཚིག་ལམ་རྡོ་རྗེ་ཞེས་བྱ་འདི། ། དེ་ནི་དེ་རྣམས་བརྗོད་པར་བྱེད།། ཅི་ནི་མགོན་པོ་བཅོམ་ལྡན་འདས།། དེ་བཞིན་གཤེགས་པ་ཀུན་གྱི་བདག། གང་ཞིག་ཁམས་གསུམ་ལས་འདས་ཤིང་།། འཇིག་རྟེན་ཐམས་ཅད་ལས་འདས་བང་དེ་བཞིན་གཤེགས་པ་ཀུན་མཆོག་དང་། ། བྱང་ཆུབ་སེམས་དཔའི་ཚོགས་ཆེན་གྱི།། འཁོར་གྱི་དཀྱིལ་འཁོར་དབུས་སུ་ནི།། ངོ་མཚར་ཆེ་བའི་ཚིག་གི་ལམ།། གཙོ་བོའི་ཡང་དག་རྡོ་རྗེའི་ཚིག། དགོངས་པས་ཅི་སླད་གང་གསུངས་ཤེས།། བརྗོད་ཀྱིས་མི་ལང་བ་ཡི་ཡང་།། བརྗོད་མི་ལང་བ་རྣམས་ཀྱིས་གསོལ།། དེ་ནས་དེ་བཞིན་གཤེགས་ཀུན་གྱིས།། བརྗོད་ཀྱིས་མི་ལང་བ་ཡི་ཡང་། ། བརྗོད་ཀྱིས་མི་ལང་གྲངས་ཀྱི་ནི།། རི་རབ་རྡུལ་ཕྲན་དང་མཉམ་པའི།། དེ་བཞིན་གཤེགས་པ་ཐམས་ཅད་དང་།། དམ་ཚིག་རྡོ་རྗེ་དཔལ་སོགས་པའི། བྱང་ཆུབ་སེམས་དཔའ་སེམས་ཆེན་ལ།། དངོས་མེད་ལས་བྱུང་གསལ་བ་གསུངས།། དམན་དང་སྨད་པའི་འདུ་ཤེས་ནི།། རྒྱལ་བའི་སྲས་རྣམས་མ་སྐྱེད་ཅིག། ཅིའི་ཕྱིར་ཞེ་ན་དེ་བཞིན་གཤེགས།། འབྱུང་བ་གང་འདི་སྤྱོད་མཆོག་ཡིན།། འདི་ལྟར་སྔགས་ཀྱི་སྤྱོད་མཆོག་འདི།། རྣམ་པར་དག་ཡིན་རིགས་ཀྱི་བུ།། སངས་རྒྱས་མཉམ་མེད་འབྱུང་འགྱུར་འདི།། གསང་བའི་སྔགས་དོན་སྤྱོད་པ་ཉིད།། འདི་ལྟར་དཔེར་ན་རིགས་ཀྱི་བུ། ། ནམ་མཁའ་ཀུན་ཏུ་སོང་བ་སྟེ།། ཆོས་རྣམས་ཀུན་ཀྱང་དེར་རྟོགས་ཤིང་།། རབ་དབྱེའི་སྦྱོར་བར་གྱུར་པ་ཉིད།། འདོད་པའི་ཁམས་ན་མི་གནས་ཤིང་།། དེ་ནི་གཟུགས་ཀྱི་ཁམས་མི་གནས། ། དེ་བཞིན་གཟུགས་མེད་ཁམས་ནའང་མིན།། འབྱུང་བ་བཞི་ལ་དེ་མི་གནས།། རིགས་ཀྱི་བུ་ཆོས་ཐམས་ཅད་ཀྱང་།། དེ་ལྟར་དོན་གྱི་དབང་མཁྱེན་ནས།། དགོངས་པའི་དབང་གིས་རྒྱལ་བ་རྣམས།། དེ་བཞིན་གཤེགས་རྣམས་དགོངས་ཉིད་ཀྱིས།། ཆོས་རྣམས་སྟོན་པར་མཛད་པ་ཡིན།། དེ་བཞིན་དུ་ནི་ཁྱེད་རྣམས་ཀྱིས།། མདོར་ན་ཁོང་དུ་ཆུད་བར་བྱ།། ཡང་དག་བྱང་ཆུབ་དོན་རྣམས་ཀྱིས།། ནམ་མཁའི་ངེས་ཚིག་སྦྱོར་བས་ནི། ། དེ་བཞིན་གཤེགས་པའི་སྦྱོར་བ་བྱུང་།། དམ་ཚིག་རྗེས་སུ་རིག་པར་བྱ།། འདི་ལྟར་དཔེར་ན་རིགས་ཀྱི་བུ།། གཙུབ་ཤིང་གཙུབ་སྟན་བཅས་པ་དང་།། སྐྱེས་བུའི་ལག་པ་བསྐྱོད་པ་ཡིས། ། རྐྱེན་ལས་དུ་བ་འབྱུང་བར་འགྱུར།། དེ་ནས་མེ་ཡང་འབྱུང་མོད་ཀྱི།། གཙུབ་ཤིང་ལ་སོགས་རེ་རེ་ནས།། འདི་ལྟར་སོ་སོར་བརྟགས་ན་གོ། མེ་དེ་གངའང་མི་གནས་སོ།། ཁྲག་ཆ་དང་ནི་གཟུགས་བརྙན་དང་། ། སྒྱུ་མ་དང་ནི་སྨིག་རྒྱུ་དང་།། དེ་བཞིན་ཆུ་ཟླ་རྨི་ལམ་སྟེ།། ཆོས་རྣམས་ཐམས་ཅད་དེ་དང་འདྲ།། མགོན་པོ་པི་ཝང་སྒྲ་ལྟ་བུ།། རྐྱེན་དོན་ལས་ཚིག་ཡང་དག་བྱུང་།། དེ་བཞིན་འགྲོ་འོང་གནས་པ་རྣམས།། ཅུང་ཟད་ཙམ་ཡང་ཡོད་མ་ཡིན།། གནས་མེད་གནས་པའི་སྦྱོར་བ་ཡིས།། གནས་པ་ནམ་མཁའི་མཚན་ཉིད་ཡིན།། དེས་ན་ཁྱེད་ཀྱིས་རྡོ་རྗེ་ཡིས།། དམ་ཚིག་རྗེས་སུ་རིག་པར་བྱ། ། དེ་ལྟར་ཆོས་རྣམས་དངོས་མེད་ཅེས།། གསང་བའི་དེ་ཉིད་དོན་མཁས་པས།། རྣམ་པར་སྨིན་པ་ལྡོག་བྱའི་ཕྱིར།། ཕུང་པོ་དེ་བཞིན་གཤེགས་པས་གསུངས།། དེ་ནས་བྱང་ཆུབ་སེམས་དཔའ་རྣམས། ། ངོ་མཚར་རྨད་དུ་བྱུང་ནས་ནི།། རྔམས་པ་ཡིས་ནི་མིག་གདངས་ཏེ།། ཚིག་ནི་འདི་སྐད་ཅེས་གསོལ་ཏོ།། ཆོས་འདི་ངོ་མཚར་རྨད་བྱུང་སྟེ།། ནམ་མཁའ་དང་ནི་མཚུངས་པ་ཡི།། མི་རྟོག་རྣམ་པར་དག་པ་ཡང་།། ཀུན་རྫོབ་ཏུ་ནི་བཤད་པར་མཛད།། དམ་ཚིག་ཆེན་པོ་ཡང་དག་གནས།། དགོངས་པ་ལུང་སྟོན་མཆོག་ལ་ནི།། གང་ཞིག་ཡིད་འོང་བཟོད་གྱུར་པ།། དེ་ནི་དེ་བཞིན་སྤྱོད་པ་ཡིན། ། མཆོག་ཏུ་དགའ་བའི་དེ་ཉིད་དོན།། གསང་བ་ཆེན་པོ་ཞེས་བྱ་བ།། དམ་ཚིག་ཚུལ་ནི་ཡང་དག་བཤད།། ལེའུ་དགུ་པ་རྫོགས་པ་ཡིན།། ། དེ་ནས་དེ་བཞིན་གཤེགས་པ་ཀུན། ། རྡོ་རྗེ་གསུམ་འབྱུང་བཅོམ་ལྡན་འདས།། སླར་ཡང་དགོངས་པ་འདུས་ནས་ནི།། བླ་མ་ཆེན་པོ་བཅོམ་ལྡན་འདས།། དམ་ཚིག་རྡོ་རྗེ་དེ་ཉིད་གནས།། མངོན་པར་བྱང་ཆུབ་དེང་དཔོན་ཉིད། ། སྐུ་དང་གསུང་ཐུགས་གཙང་གཙོ་ལ།། བཏུད་དེ་དེ་བཞིན་གཤེགས་པས་གསོལ།། སྙིང་པོ་སྔགས་ནི་ཀུན་བསྡུས་པས།། གསང་བ་ཡང་དག་རྡོ་རྗེ་གསུམ།། དངོས་གྲུབ་ཆེན་པོའི་ཚུལ་གྱི་མཆོག། དེ་ཉིད་བཅོམ་ལྡན་བཤད་དུ་གསོལ།། དེ་བཞིན་གཤེགས་པ་ཀུན་ཡེ་ཤེས།། སྐུ་གསུང་ཐུགས་ཀྱི་དངོས་གྲུབ་གསོལ།། གསུང་གཅིག་དུ་མའི་རྣམ་པར་རྟོག། ཡང་དག་བསྡུས་དོན་དེ་བཞིན་གསུང་། ། དེ་ནས་བདག་པོ་བཅོམ་ལྡན་འདས།། ཉོན་མོངས་ཀུན་གྱི་རྒྱ་མཚོ་གཙོ།། འབར་བ་དྲག་པོ་སྤྱན་ཡངས་པས།། གསུང་ནི་འདི་སྐད་བཀའ་སྩལ་ཏོ།། སྐུ་ལ་སོགས་པའི་རྡོ་རྗེ་གསུམ། ། སྐུ་དང་གསུང་ཐུགས་སྒོམ་པ་ནི།། མཉམ་ཞིང་རྣམ་པར་མི་རྟོག་པ།། དམིགས་པ་མེད་ཅིང་གནས་མེད་པའོ།། དེ་ནས་མགོན་པོ་བཅོམ་ལྡན་འདས།། རང་བཞིན་དག་པའི་དེ་བཞིན་གཤེགས།། ཕ་རོལ་ཕྱིན་པ་སྔགས་ཚུལ་གྱི།། རྡོ་རྗེ་ཞེས་བྱའི་ཏིང་འཛིན་ལ།། དཔའ་བོ་ཆེན་པོ་སྙོམས་ཞུགས་ཏེ།། དེ་བཞིན་གཤེགས་ཀུན་ལ་གསུངས་པ།། གང་ཕྱིར་སངས་རྒྱས་བཅོམ་ལྡན་འདས།། དེ་བཞིན་གཤེགས་པ་ཀུན་འདི་ན། ། མགོན་པོ་མི་བསྐྱོད་ལ་སོགས་པའི།། དེ་བཞིན་གཤེགས་པ་དུ་མ་དང་།། རིག་པ་བྱེ་བ་ཁྲག་ཁྲིག་ནི།། བརྒྱ་སྟོང་དུ་མ་ཞེས་བྱ་དང་།། སེམས་ཅན་དོན་བྱ་ལ་རོལ་དང་། མཆོག་ནི་དེ་རྣམས་སྟོན་པར་མཛད།། ཕྱོགས་བཅུའི་འཇིག་རྟེན་ཁམས་མཆོག་ཏུ།། འདོད་པའི་ཡོན་ཏན་ལྔར་ལྡན་པས།། རོལ་ཅིང་དགྱེས་པར་གྱུར་པ་དང་།། ཡོངས་སུ་སྤྱོད་པ་ཡོད་ཀྱང་ནི།། སྔགས་སྤྱོད་པ་ལ་བརྩོན་རྣམས་ལ། ། ཀྱེ་མ་དཔའ་བོ་དེ་བཞིན་གཤེགས།། རང་གཙོ་གསང་སྔགས་སྤྱོད་ཚུལ་མཆོག། ཆོས་བདག་མེད་པའི་རང་བཞིན་ཅན།། འདི་དག་རྫོགས་པར་གྱུར་མཉམ་ནས། སྤྱན་རས་ཀྱིས་ནི་འཚོ་མི་མཛད།། དེ་ལྟར་རྣམ་པར་སྤྱད་པའི་དོན།། གསང་སྔགས་བརྟུལ་ཞུགས་སྤྱོད་རྣམས་ལ།། ཡང་དག་པར་ནི་བྱིན་བརླབས་ཕྱིར།། དེ་ནི་སྟོན་པར་མཛད་འདི་ཡིན།། དེ་ནས་དེ་བཞིན་གཤེགས་པ་མཆོག། ཐུབ་ལ་ཕྱག་ན་རྡོ་རྗེས་གསོལ།། མགོན་པོ་དེ་བཞིན་གཤེགས་དེ་རྣམས།། སོ་སོ་སྐྱེ་བར་གྱུར་པ་ལ།། དངོས་པོ་མེད་ཅིང་དམིགས་སུ་མེད།། ནམ་མཁའི་ཁམས་དང་མཉམ་གྱུར་ནས། ། འདོད་པའི་ཡོན་ཏན་ལྔར་ལྡན་ནས། ཇི་ལྟར་དེ་རྣམས་རོལ་པར་མཛད།། དེ་རྣམས་ཕྱོགས་བཅུའི་འཇིག་རྟེན་དུ།། ངེས་པར་གྱུར་པའི་འཁོར་རྣམས་དང་།། སེམས་ཅན་དོན་གྱི་བྱ་བ་ཀུན། ། འདོད་པས་སྟོན་པར་མཛད་པ་ཡིན།། མགོན་པོ་འདོད་པའི་ཡོན་ཏན་རྣམས།། སྦྱིན་སོགས་དྲུག་ཅེས་བྱ་བར་འབྱུང་།། ཐམས་ཅད་དག་ཀྱང་དེ་ཉིད་འབྱུང་།། ཕ་རོལ་ཕྱིན་པར་མཉམ་གཞག་ཉིད། ། དེ་ལྟར་ཕ་རོལ་ཕྱིན་འབྱུང་བའི།། འདོད་པའི་ཡོན་ཏན་ལྔ་དང་ལྡན།། འགྲོ་བའི་དོན་གྱི་བྱ་བ་ཡང་།། འདོད་པ་ལྔ་པོ་འདི་ཡིས་མཛད།། འདི་རྣམས་ཀྱིས་ནི་མགོན་པོ་འདི། ། མི་བསྐྱོད་ལ་སོགས་རྒྱལ་བ་རྣམས།། རོལ་ཅིང་དགྱེས་པར་མཛད་པ་དང་།། འགྲོ་བའི་དོན་ཡང་མཛད་གྱུར་ཅིང་།། འཇིག་རྟེན་པ་དང་འགལ་བྱ་རྣམས།། དེ་ཡང་དེ་བཞིན་མཛད་གྱུར་པ།། དག་པ་རྡོ་རྗེའི་ཚིག་མཆོག་འདི། ། དེ་རྣམས་ཀྱིས་ནི་རྟོགས་པར་འགྱུར།། ཕྱག་བྱར་འོས་པའི་རིག་པ་ནི།། ངེས་པར་ལྡན་པ་ངེས་པར་འདོད།། ཡོད་མེད་ལ་སོགས་བྱེད་པ་ནི།། གཉིས་གྱུར་མཚན་མ་ཅན་དུ་འགྱུར། ། ཕྱོགས་བཅུ་ལམ་དུ་ཆོས་གསུངས་པ།། གང་ཞིག་འཇིག་རྟེན་ཕུང་པོ་ལྔ།། ཁམས་ལ་སོགས་པར་མཚོན་པ་གང་།། གཟུགས་སོགས་ཞེས་བྱའི་མིང་ཅན་ཡིན།། འདི་ནི་ཡན་ལག་ཐམས་ཅད་ནི། ། བྱ་བ་ཉན་ཐོས་ཐེག་པའོ།། དེ་ཉིད་རྐྱེན་གྱི་ཐེག་པ་སྟེ།། ཚིག་དེ་སྟོན་པར་མཛད་པ་འདི།། གང་ཞིག་རྡོ་རྗེ་ཐེག་པར་གནས།། དེ་བཞིན་ཇི་བཞིན་སྒྲ་རུ་འཛིན།། ཤེས་རབ་ཕ་རོལ་ཕྱིན་པ་ལ། ། ངེས་པར་འབྱུང་བའི་ཚུལ་གསུམ་པོ།། ཆོས་སྐུ་ངོ་བོ་ལ་སོགས་པ།། མཁའ་དབྱིངས་མཐའ་ཡས་རྣལ་འབྱོར་པ།། གནས་མེད་གནས་པར་སྦྱོར་བ་ཡིས།། འགྲོ་བའི་སྙིང་དུ་རྣམ་རོལ་པ། ། ཞི་བ་གཅིག་ལ་གནས་པའི་མགོན།། འཁོར་བ་དང་ནི་ཅིག་ཤོས་སྤངས།། སྔགས་ལས་ཡང་དག་འབྱུང་བ་དེ།། མི་བསྐྱོད་ལ་སོགས་པར་བརྟགས་རྣམས།། དངོས་མེད་གནས་ལ་གནས་པས་ན། ། སྒྲུབ་པ་པོ་རྣམས་གཟིགས་མི་འགྱུར།། གསང་སྔགས་རྐྱེན་གྱི་སྦྱོར་བ་ཡིས།། དེ་ནི་རྫོགས་ལོངས་སྤྱོད་གཟིགས་འགྱུར།། བཅོམ་ལྡན་གསང་བ་གསུངས་པ་འདི།། དོན་དེ་འཚལ་བར་མ་གྱུར་པས། ། རྣམ་རྟོག་དུ་མའི་ཀུན་རྟོག་ལས།། ཆོས་ཉིད་དེ་ཡིས་ཤེས་མི་འགྱུར།། ཇི་སྐད་གསུངས་པ་མི་ཤེས་པས།། ཕྱི་དུས་སྐྱེ་བོ་ལ་ལ་སྨྲ།། འཇིག་རྟེན་པ་རྣམས་དྲང་བྱའི་ཕྱིར།། གསང་བར་གྱུར་པ་བསྟན་དུ་གསོལ། ། དེ་ནས་བཅོམ་ལྡན་སྣ་ཚོགས་པས།། ལག་ན་རྡོ་རྗེ་གྲགས་པ་ཆེ།། དགོངས་པའི་དོན་ནི་རྟོགས་གྱུར་པ།། བུ་ཁྱོད་ཤེས་རབ་ཆེན་པོ་ལེགས།། གང་ཞིག་ཤེས་པས་མ་འོངས་པའི།། སྐྱེ་བོ་རྣམ་པར་མི་རྟོག་འགྱུར། ། ཚིག་གཅིག་ལ་ཡང་སྣ་ཚོགས་དོན།། ཡང་དག་བསྡུས་ནས་ཁྱོད་ཀྱིས་བཤད།། དེ་ནས་དམ་པ་བཅོམ་ལྡན་འདས།། བླ་མ་ཀུན་མཁྱེན་ཐམས་ཅད་རིག། སྐྱེས་བུ་དམ་པ་དེ་དག་ལ། སྤྱན་རས་ཀྱིས་ནི་འཚོ་བྱའི་ཕྱིར།། རྡོ་རྗེ་གསུམ་གྱི་གསང་བ་འདི།། དེ་བཞིན་གཤེགས་པ་ཀུན་གྱི་མཆོག། སྐུ་གསུང་ཐུགས་ཀྱི་རྡོ་རྗེ་ཡི།། གསང་བ་ཡི་ནི་མཆོག་གི་གནས།། སྙིང་པོ་སྔགས་རྣམས་ཐམས་ཅད་ཀྱི། ། བསྐུལ་བ་གཅིག་པུ་ཞེས་བྱ་བ།། དེ་བཞིན་གཤེགས་ཀུན་གསང་གཅིག་པུ།། མཆོག་ལས་མཆོག་ཏུ་གསུངས་གྱུར་པ།། སྐུ་གསུང་ཐུགས་ཀྱི་ཡང་དག་རྟོགས།། དམ་ཚིག་ལ་ནི་དམིགས་པ་དང་། ། རྡོ་རྗེ་འཛིན་པའི་སྐུ་གསུང་ཐུགས།། དམ་ཚིག་ལ་ནི་དམིགས་པ་དང་།། ཆོས་འཛིན་པ་ཡི་སྐུ་གསུང་ཐུགས།། དམ་ཚིག་ལ་དམིགས་དེ་བཞིན་ནོ།། ཉིད་སྐུ་གསུང་ཐུགས་རྡོ་རྗེ་ལས།། ཚིག་ལས་ངེས་པར་བརྗོད་པ་ནི། ། དེ་ཉིད་སྔགས་སུ་ཡང་དག་བསྡུས།། སྣ་ཚོགས་གསུང་བ་གཟུགས་གཅིག་པུ།། ཡི་གེ་ཧཱུཾ་ནི་སྐུ་གསུངས་ལ།། དེ་ནས་ཡི་གེ་ཨོཾ་གསུངས་ཏེ།། དེ་བཞིན་མགོན་པོས་ཡི་གེ་ཨཱཿ། ། སྭཱ་ནི་དེ་བཞིན་བཞི་པ་ཡིན།། ཧཱ་ཡང་འདོད་ལྷར་གྱུར་པ་སྟེ།། དེ་ནི་འདི་ལྟར་སངས་རྒྱས་ལྔ།། ཧཱུཾ་ཨོཾ་ཨཱཿསྭཱ་དེ་བཞིན་ཧཱ།། འདི་ནི་གསུངས་པ་ཙམ་གྱིས་ནི།། སངས་རྒྱས་སྲས་དང་བཅས་པ་ཀུན། ། རབ་ཏུ་འདར་ཞིང་བརྒྱལ་བར་གྱུར།། དེ་རྣམས་གཉིས་མེད་སྦྱོར་ལ་གནས།། རྡོ་རྗེ་སེམས་དཔའ་རྗེས་སུ་དྲན།། ཞི་བའི་སྦྱོར་བར་ཆོས་གཅིག་པའི།། རྣམ་པར་མི་རྟོག་ཆོས་གཅིག་སྐྱེས།། དེ་ནས་བཅོམ་ལྡན་འདས་དེ་ཡང་། ། དེ་བཞིན་གཤེགས་ཀུན་བདག་པོ་ཡིས།། དེ་ཡི་བྱིན་རླབས་སྦྱོར་དོན་དུ།། དམ་ཚིག་འདི་དག་བཀའ་སྩལ་ཏོ།། ནམ་མཁའི་དབྱིངས་ཀྱི་དབུས་གནས་པར།། དཀྱིལ་འཁོར་བཀོད་པ་ཞེས་བྱ་བ། ། རེ་རེའང་གསུམ་གྱི་སྦྱོར་བ་ཡིས།། སྒོམ་པར་སྦྱོར་བ་བསྒོམ་པར་བྱ།། བྱེ་བྲག་གསུམ་པོ་གཅིག་བརྟགས་པའོ།། བཀོད་པ་མི་གསལ་བ་ཉིད་དོ།། ཟླ་བའི་དབུས་གནས་ཡི་ཧཱུཾ། རང་གི་གཟུགས་གཅིག་རབ་ཏུ་བརྟག། རྡོ་རྗེ་འོད་ཟེར་རབ་འབར་བ།། རྣམ་པར་འཕྲོ་བ་བསམ་པར་བྱ།། སངས་རྒྱས་རྣམས་ཀྱི་སྐུ་གསུང་ཐུགས།། སྙིང་ལ་དེ་ཡིས་རྣམ་བསྒོམས་ནས།། དཔལ་ལྡན་དེ་འདིས་ཅིག་དེར། ། རྡོ་རྗེ་གསུམ་གྱི་རྡོ་རྗེ་འཛིན།། རྡོ་རྗེ་སེམས་དཔའ་དབང་ཆེན་གཙོ།། འདི་ནི་ཀུན་མཆོག་ཆེན་པོར་སྐྱེ།། རང་གི་སྔགས་ཀྱིས་བསྐྱེད་བྱ་བ།། སྔགས་ཀྱི་ཆོ་ག་དམ་པའོ།། སྙིང་པོ་རང་གི་རྡོ་རྗེ་སྔགས། རྡོ་རྗེ་བསྡུས་པ་ཞེས་བཤད་དོ།། རང་སྔགས་ཚུལ་ལས་བྱུང་བའོ།། སྐྱེས་བུའི་གཟུགས་སུ་བསྒོམ་པར་བྱ།། སྦྱོར་བ་བཞི་པོ་སྦྱོར་གཅིག་པུས།། གནས་བཞི་དག་ཏུ་དེ་དགོད་དོ།། ཁ་དོག་གསུམ་པོ་ཞལ་གསུམ་ལྷའི། ། དེ་ཉིད་གསུམ་གཅིག་རྣམ་སྒོམ་ཞེས།། བཅོམ་ལྡན་འདས་མཆོག་ནམ་མཁའ་ནི།། རྡོ་རྗེ་དམ་ཚིག་གཙོ་བོས་གསུངས།། དེ་ནས་དེ་བཞིན་གཤེགས་པ་མཆོག། ཞི་བའི་བདག་ཉིད་ཐུབ་པ་ཆེ། གཙོ་ལ་ཕྱག་ན་རྡོ་རྗེ་ཡིས།། གསང་བ་འདི་ནི་སླར་ཞུས་པ།། ཧཱུཾ་ཨོཾ་ཨཱཿདང་སྭཱ་ཧཱ་ཞེས།། དེ་ནས་འདི་ནི་གསུངས་གྱུར་པས།། སངས་རྒྱས་སྲས་དང་བཅས་པ་ཀུན།། དེ་ནས་རབ་འདར་བརྒྱལ་གྱུར་ཅིང་། རྡོ་རྗེ་སེམས་དཔའ་རྗེས་དྲན་པ། ཐུབ་ཆེན་དེ་འདིར་ཇི་ལྟ་བུར།། མགོན་པོ་དེ་ནི་ཕྱི་དུས་ན།། ཇི་སྐད་གསུངས་པ་མི་རྟོགས་ལ།། གཅིག་པུ་མཁའ་མཉམ་སངས་རྒྱས་དང་།། བྱང་ཆུབ་སེམས་དཔའ་མཐུ་ཆེན་རྣམས། ། རབ་ཏུ་འདར་ཞིང་བརྒྱལ་གྱུར་ཞེས།། བྱིས་པ་རྣམས་ཀྱིས་མི་རྟོགས་སོ།། ལན་བརྒྱ་སྟོང་དང་བྱེ་བ་ཡི།། གྲངས་དག་ཏུ་ནི་སྟོན་མཛད་ཅིང་།། སྟོན་པ་སྣ་ཚོགས་སྟོན་མཛད་ཀྱང་།། འདར་ཞིང་བརྒྱལ་བ་དེ་མ་གྱུར། ། མ་འོངས་དུས་ནའང་འབྱུང་འགྱུར་བ།། མི་ནི་མཁས་པའི་ང་རྒྱལ་ཅན།། བླ་མའི་ལུང་ནི་བླངས་ནས་སུ།། རྟགས་ནི་རང་ཉིད་འཛིན་པར་བྱེད།། དེ་ནི་སྔགས་དོན་གསུངས་པ་ཡི།། མཚན་ཉིད་གསང་འདི་མི་ཤེས་པར། ། སྔགས་དོན་དེ་ཉིད་མཁས་པ་ཡིས།། གཞན་རྣམས་ལ་ནི་མི་སྙན་སྒྲོགས།། འཁྲུལ་པ་ཅུང་ཟད་ཙམ་མཐོང་ན།། བཞད་གང་དག་ནི་བྱེད་པར་འགྱུར།། རེག་ན་དུག་དང་མཚུངས་པ་ཡི། ། མི་དེ་ཞི་བར་མི་འགྱུར་རོ།། གང་ཞིག་ཡིད་ནི་རིན་ཆེན་འདྲའི།། འགྲོ་ལ་ཕན་པའི་སྔགས་པ་རྣམས།། འདི་ནི་མ་འོངས་དུས་སུ་ཡང་།། དངོས་གྲུབ་མཆོག་ནི་ཐོབ་པར་འགྱུར། དེ་རྣམས་ཡང་དག་བསྡུ་བའི་ཕྱིར།། སྐད་ཅིག་རྗེས་གསུངས་གྲུབ་དོན་དུ།། སྦྱོར་བར་དགོངས་པའི་བསམ་པ་ཅན།། བཅོམ་ལྡན་འདི་ནི་བཤད་དུ་གསོལ།། དེ་ནས་སྟོན་པ་བཅོམ་ལྡན་འདས།། འགྲོ་ཕན་ཕྱག་ན་རྡོ་རྗེ་དེ་ལྟར་སྦྱོར་བ་ཡང་དག་སྦྱོར། ། སྒོམ་པའི་དངོས་པོ་རྟོག་བྱེད་པ།། དབང་པོ་ཉི་མ་ཐུབ་པ་ཉིད།། གང་ཞིག་ཕྱོགས་བཅུར་གནས་པ་རྣམས།། སྲས་བཅས་སངས་རྒྱས་ཞེས་བྱ་བའི།། དེ་བཞིན་གཤེགས་པ་ཐམས་ཅད་གྱུར། ། ཕུང་པོ་ལ་སོགས་གྲངས་མཉམ་པའི།། ལུས་ལས་སྐྱེས་ཏེ་ཡོད་པ་འདི།། སྟོང་པའི་རྐྱེན་དུ་སྦྱོར་བ་ལས།། སངས་རྒྱས་སྲས་དང་བཅས་གྱུར་འདོད།། སྔགས་དེ་སྔགས་པ་སངས་རྒྱས་དེ།། བདག་ཉིད་དེ་སྲས་ཡང་དག་སྦྱོར།། ཞི་སོགས་མཉམ་པའི་སྦྱོར་བ་ལས།། ཞི་བའི་བདེ་བ་དེ་ནས་བརྩམ།། བདག་ཉིད་རང་བཞིན་གྱིས་དག་ཅིང་།། རང་བཞིན་དྲི་མ་མེད་བྱས་ལ།། དལ་དང་མྱུར་དང་གནས་པ་ཡི། ། སྣ་ཚོགས་དེ་གཅིག་དག་ལ་གཞུག། ཡིད་དམན་རིམ་ལ་སོགས་པས་ཀྱང་།། སྦྱོར་བ་དེ་ཉིད་དག་ལ་གནས།། དེ་ནས་དབང་པོ་མེད་གྱུར་པ།། གང་ཚེ་ཞི་བའི་བདེ་གཅིག་པུ། རང་བཞིན་དག་པའི་སྦྱོར་བ་སྟེ། ། དེ་ཡི་ཆོས་ནི་ལྟ་བ་པོ།། དེ་ནས་རྫོགས་ལོངས་སྤྱོད་པའི་སྔགས།། སངས་རྒྱས་ཐམས་ཅད་འཇམ་ལས་བྱུང་།། གང་ཕྱིར་རང་ནི་ཟློ་གྱུར་པ།། ཡི་གེ་ཧཱུཾ་གི་གསང་སྔགས་ལྔ།། དེ་ཚེ་སྙིང་ལས་རབ་འདར་ཞིང་། ། དབང་པོ་ཐམས་ཅད་བརྒྱལ་བར་གྱུར།། གང་ཡང་ཕུང་སོགས་ཡན་ལག་ནི།། སྲས་བཅས་སངས་རྒྱས་ཐམས་ཅད་དེ།། དེ་ཉིད་ཀྱི་ནི་གྲངས་མཉམ་པའི།། རྣལ་འབྱོར་པ་ཡི་ལུས་རབ་འདར།། ཉེ་བར་མཚོན་སོགས་ཚིག་རྣམས་ནི། ། ཕུང་པོ་ལ་སོགས་བཤད་པ་གང་།། སངས་རྒྱས་སྲས་བཅས་པར་གྱུར་ཏེ།། དེ་ནི་བརྒྱལ་ཞིང་འདར་བར་འགྱུར།། དེ་གཉིས་ལ་ནི་སྙོམས་འཇུག་པ།། སངས་རྒྱས་ཐམས་ཅད་སྲས་དང་བཅས། ། རྡོ་རྗེ་སེམས་དཔའ་ཉིད་དྲན་ཏེ།། དེ་སྔགས་བདག་ཉིད་དངོས་ལས་བྱུང་།། དེ་འདིར་མཆོག་ཏུ་བཤད་པ་ཡིན།། རྡོ་རྗེ་གསང་བ་རྨད་བྱུང་བ།། ཕྲ་མོའི་སྙིང་གོང་དབུས་གནས་པར།། དཀྱིལ་འཁོར་རྣམ་པར་བསམ་པའོ། ། དེ་ཡི་དབུས་གནས་ཞི་བ་ཡི།། གོ་འཕང་མཆོག་ནི་བསམ་པར་བྱ།། དེ་ཧཱུཾ་ཞེས་བྱའི་འོད་པོ་ཆེ།། དེ་ཡོངས་གྱུར་པའི་རྡོ་རྗེ་ནི།། འདི་ནི་མཆོག་གྱུར་རྩེ་ལྔ་པ།། རྣལ་འབྱོར་པ་ཡིས་རྟག་ཏུ་སྒོམ། ། རྡོ་རྗེ་ལྕགས་ཀྱུའི་སྦྱོར་བ་ཡིས།། རྡོ་རྗེ་གསུམ་ནི་བསམ་པར་བྱ།། དེ་ཡི་སྙིང་ཁར་བསྡམས་ནས་ནི།། ལྷ་རྣམས་རབ་ཏུ་བསྐུལ་བར་བྱ།། འདི་ནི་སངས་རྒྱས་ཐམས་ཅད་ཀྱི།། རྡོ་རྗེ་ཐམས་ཅད་རབ་སྒྲུབ་པའོ། ། འཁོར་ལོ་པདྨའི་རིགས་སོགས་པའང་།། རོལ་མོ་འདི་ནི་དག་པ་སྟེ།། རྡོ་རྗེ་ལྕགས་ཀྱུ་རྣམས་བསྒོམས་ནས།། སྙིང་ཁ་རུ་ནི་བསྐུལ་བར་འགྱུར།། རྡོ་རྗེ་ཡི་ནི་ཚུལ་མཆོག་འདི།། ཞག་བདུན་པར་དུ་བྱས་ནས་ནི། ། ཡེ་ཤེས་རྡོ་རྗེ་ཅན་གྱི་གསང་།། རྡོ་རྗེ་གསུམ་པོ་ཡང་དག་སྒྲུབ།། ཕུང་པོ་ལ་སོགས་སངས་རྒྱས་གང་།། དེ་ནི་དངོས་པོ་མེད་ལྟ་བ།། དེ་ཉིད་མཆོག་གི་གསང་སྔགས་ཀྱིས།། སྐྲག་པ་རྣམ་སྨིན་མཐོང་བ་ལ། ། སྐྲག་པ་མི་རྣམས་འདི་དག་སྟེ།། གསང་སྔགས་གཉིས་མེད་སྦྱོར་གཅིག་བྱུང་།། མཐོང་བས་སྐྲག་སྟེ་མཆོག་སྟེར་ཅིང་།། འདི་དག་འདི་ཉིད་བརྟགས་པ་ཡིན།། ཞི་བ་གཅིག་པུའི་སྤྱོར་བ་ལ་སྔགས་ལུས་རྫོགས་པ་ཉིད་གྱུར་ནས། ། ཡིད་ལ་མགུ་ཞིང་དག་འགྱུར་བའི།། དངོས་གྲུབ་རྒྱ་ཆེར་སྟེར་བར་འགྱུར།། ཕུང་པོ་ལ་བཏགས་སངས་རྒྱས་དང་།། དེ་བཞིན་བྱང་ཆུབ་སེམས་དཔའ་རྣམས།། སྔགས་ཀྱི་སྦྱོར་བའི་དོན་སྒྲུབ་པས། ། རྨོངས་པས་འདའ་བ་བྱས་ནས་ནི།། དེ་ཡི་སྲོག་ནི་དེར་ཟད་འགྱུར།། ཞི་བ་ཉིད་ཀྱི་སྦྱོར་གཅིག་ལས།། འདི་ནི་འཇིག་རྟེན་འདས་པ་མཆོག། དེ་ལས་བཟློག་པ་འཇིག་རྟེན་པའོ།། དེ་ནས་བདག་པོ་བཅོམ་ལྡན་འདས། ། འཇིག་རྟེན་གསུམ་གཙོ་སྟོན་པ་པོ།། འཇིག་རྟེན་གསུམ་མཆོག་རྡོ་རྗེ་གཙོས།། གསུང་ནི་འདི་སྐད་བཀའ་སྩལ་ཏོ།། གང་ཞིག་སྔགས་ཀྱི་སྐྱེས་བུར་བཤད།། རྡོ་རྗེ་གསུམ་གྱི་ཡེ་ཤེས་གཟུག། འདི་ནི་དབང་པོ་གཉིས་སྦྱོར་བའི།། གཅིག་པར་སྒོམ་པ་རྟག་ཏུ་བྱེད།། བདག་དམིགས་སེམས་ཅན་ཡོད་མིན་པའི།། སྔགས་ཀྱི་དབང་པོ་རྣམ་སྒོམ་པ།། དབང་པོ་གཉིས་སྦྱོར་བཟང་པོ་སྟེ།། དངོས་པོ་ཐམས་ཅད་རྣམས་བརྟགས་པའོ། ། འདི་ནི་སངས་རྒྱས་ཐམས་ཅད་ཀྱི།། སྔགས་ཀྱི་དམ་ཚིག་མཆོག་སྒོམ་པའོ།། རང་གཟུགས་རྡོ་རྗེ་ཡང་དག་སྦྱོར།། རིག་མ་དབང་ཕྱུག་བདག་ཀྱང་སྒོམ།། གཉིས་མེད་གཉིས་སུ་མེད་ཆགས་པ། ལྟ་བ་དམ་ཚིག་དཀྱིལ་འཁོར་རོ།། གསང་བ་ཞེས་བྱ་དེར་སྦྱར་བ།། དེ་ཉིད་མཉམ་པའི་བདག་ཉིད་དོ།། དེ་ནས་སྟོན་པ་བཅོམ་ལྡན་འདས།། ཐམས་ཅད་དབང་བསྐུར་དམ་པ་ནི།། མི་ཕྱེད་རྡོ་རྗེ་གསུམ་གྲུབ་པ། གསང་བའི་དགོངས་པ་བཀའ་སྩལ་ཏོ།། ནམ་མཁའ་མཐའ་ཡས་སྦྱོར་བ་ཡིས།། ཕུང་པོ་བདག་ཉིད་མི་དམིགས་པ།། ཆོས་ཀྱི་དབྱིངས་ལ་སོགས་པའི་རིམ།། བུད་མེད་དེ་ནི་རྒྱ་ཆེན་འགྱུར།། རབ་ཏུ་སྦྱོར་བ་འདི་ཡིས་ནི། ། འགྲོ་བའི་བུད་མེད་ཅེས་བྱ་བ།། གསང་སྔགས་དེ་ཉིད་དོན་གསང་ཉིད།། དེ་ནི་གསང་བར་ཉེ་བར་སྤྱོད།། དེར་ནི་ཡིད་འོང་སངས་རྒྱས་རྣམས།། བྱེ་བ་གྲངས་མེད་རྡོ་རྗེ་འཛིན།། སྔགས་རིག་དམ་པ་སྤྲོ་འོང་ཞེས། ། དེར་ནི་བཅོམ་ལྡན་གཙོ་བོས་གསུངས།། བྱང་ཆུབ་སེམས་དཔའི་དམ་ཚིག་ནི།། སྟོན་པ་འདིར་ནི་བླ་མ་ཆེར།། འཇིག་རྟེན་པ་ལ་འདིར་བཤད་དེ།། འཇིག་རྟེན་འདས་པ་བཟློག་པའོ།། ནམ་མཁའ་ལྟ་བུའི་བྱང་ཆུབ་ནི།། འདི་ཡིས་ཤིན་ཏུ་འཐོབ་པར་འགྱུར།། བྱང་ཆུབ་སེམས་ཀྱི་ཡོན་ཏན་མཚོ།། རྡོ་རྗེ་སེམས་དཔའ་མཆོག་དེས་འཐོབ།། དགོངས་པ་ལུང་བསྟན་གསང་བ་ལ།། གང་ཞིག། སེམས་ནི་དང་གྱུར་པ།། གསང་བ་འབད་དེ་ཡང་དག་སྲུང་།། དེ་ནི་རྟག་ཏུ་ལེགས་པར་བྱེད།། རྡོ་རྗེ་གསུམ་གྱི་གསང་བ་ལས།། དེ་བཞིན་གཤེགས་པ་ཀུན་གྱི་ཡང་།། དེ་ཉིད་བསྐུལ་བ་ཞེས་བྱ་བ།། ལེའུ་བཅུ་པ་ཡིན་པར་བཤད། ། ། དེ་ནས་སྟོན་པ་བཅོམ་ལྡན་འདས།། རྡོ་རྗེ་གསུམ་མཆོག་མཆོག་གསལ་བ།། དེ་བཞིན་གཤེགས་པ་ཀུན་མཆོག་ཅིག། ཉི་ཤུ་རྩ་ལྔ་མཆོག་ཅེས་བྱའི། ། ཏིང་ངེ་འཛིན་ལ་སྙོམས་ཞུགས་ནས།། དེ་བཞིན་གཤེགས་ཀུན་རྡོ་རྗེ་ཡིས།། སྔགས་རིག་སྐྱེས་བུ་ཞེས་བྱ་བའི།། ལེའུ་འདི་ནི་བཀའ་སྩལ་ཏོ།། སྔགས་མཆོག་དེ་ནི་ཕྱག་རྒྱ་ཆེ།། རྡོ་རྗེ་གསུམ་གྱི་ཡེ་ཤེས་སྒོས། ། རྟོགས་དང་བྲི་བ་འཐོབ་པའི་ཕྱིར།། རྡོ་རྗེ་ཡེ་ཤེས་དག་གིས་ཀྱང་།། ཚངས་པ་ལ་སོགས་ཡང་དག་བཤད།། ཡེ་ཤེས་སྙིང་པོ་དམ་པ་སྟེ།། གསུམ་སོགས་བཤད་གྱུར་པ།། སྐུ་ཡི་རྡོ་རྗེ་འཐོབ་བྱེད་པའོ།། ཨཱཿདང་ཟུང་ནི་གསུང་རྡོ་རྗེ།། བྱང་ཆུབ་བདག་མེད་འཐོབ་བྱེད་པའོ།། ཧཱུཾ་ནི་རྡོ་རྗེ་གསུམ་མཐའ་ཉིད།། སྐུ་གསུང་ཐུགས་ནི་འཐོབ་བྱེད་པའོ། དེ་ནི་འཇུག་སོགས་གནས་ཉིད་དང་།། ལྡང་བ་དག་ཏུ་རབ་ཏུ་བཤད།། ཉི་ཤུ་ལྔ་སོགས་མིང་ཅན་གྱི།། སྐྱེས་བུའི་གཟུགས་སུ་འདི་འགྱུར་རོ།། དེ་བས་རེ་རེའང་གསུམ་ཉིད་དེ།། རྡོ་རྗེ་གསང་སྔགས་ཉིད་དུ་གྱུར། ། བརྗོད་མེད་ས་བོན་བརྒྱད་པ་ལས།། དེ་ནི་ནམ་མཁའ་ལས་རྒྱལ་འགྱུར།། བརྒྱ་ཕྱེད་རླུང་ནི་གཅིག་པུ་ལ།། དེ་ལས་ངེས་པར་ཉི་ཤུ་ལྔ།། སྐྱེས་བུ་ཉིད་དུ་བྱུང་བ་ན།། མགྲིན་བཅུ་ཞེས་བྱའི་མིང་ཅན་དང་། ། སྒྲ་སྒྲོགས་གསོད་པའི་དགའ་བྱེད་འགྱུར།། དེ་ནས་ཚངས་པ་གཅིག་ཉིད་གྱུར།། ཚངས་པ་ཁྱབ་འཇུག་དྲག་པོ་སྟེ།། འཇུག་པ་ལ་སོགས་རིམ་དུ་བཤད།། འདི་དག་བསྙེངས་མེད་དེ་གཅིག་པུ། ། དེ་ནི་ཞི་བ་དངོས་མེད་ཉིད།། དེ་ལས་ཀྱང་ནི་ཡང་དག་འབྱུང་།། ལོངས་སྤྱོད་རྫོགས་སྐུ་དམ་པའོ།། དེ་ནས་སྔགས་གཅིག་སྤྲུལ་པ་ལས།། འགྲོ་བའི་དོན་གྱི་བྱ་བར་འགྱུར།། མཚམས་དང་སྐྱེ་མཆེད་ནོར་ལྷའོ། ། ཟླ་བ་ཟུང་གཅིག་རིག་བྱེད་དེ།། དེ་ལ་སོགས་པའི་གྲངས་གྱུར་རྣམས།། དེ་ནི་རིག་པའི་སྐྱེས་བུར་གནས།། འདི་རྣམས་ལས་གཅིག་གཟུང་ནས་ནི།། སངས་རྒྱས་རོལ་མོ་བསྟན་པར་བྱ།། རྡོ་རྗེ་སེམས་དཔའ་དེ་ཉིད་འདི།། ནམ་མཁའ་རྡོ་རྗེ་དབུས་སུ་བསམ།། དཀྱིལ་འཁོར་བརྒྱན་པ་ཞེས་བཤད་པ།། ཡི་གེ་བྷྲཱུཾ་ནི་དེས་བསམ་མོ།། རྡོ་རྗེ་སྤྲིན་ནི་སྤྲོ་བསྐྱེད་པའི།། དེ་བཞིན་གཤེགས་པ་དྲུག་གི་སྐུ། དེ་དབུས་གནས་པའི་རྣལ་འབྱོར་པར།། སྒོམ་པའི་བདག་ཉིད་ཅན་གྱིས་བསྒོམ།། སྔགས་རྣམས་ཀུན་གྱི་གཙུག་ཏོར་ནི།། སྔགས་ཀྱི་སྐྱེས་བུ་གསང་བ་པ།། གཅིག་པུ་ཉིད་ནི་བདག་པོར་གྱུར།། སྔགས་སྤྱོད་དོན་ནི་སྒྲུབ་པ་པོ། ། ཆོས་འཁོར་ལོ་གཅིག་འཁོར་ལོ་མཆོག། རྒྱལ་དང་རྨད་བྱུང་ཆེ་གཙུག་ཏོར།། ལུས་དང་རྣམ་པར་རྒྱལ་དེ་བཞིན།། བྱ་བ་མཆོག་ཏུ་ཡང་དག་བཤད།། སྦྱོར་དང་བྱ་བ་གཉིས་མེད་བཞིན།། སྦྱོར་བ་འབའ་ཞིག་ཉིད་ལ་འདི།། བྷྲཱུཾ་ནི་གཙུག་ཏོར་ཡིན་པར་བསྟན།། ཡེ་ཤེས་རྡོ་རྗེ་སྙིང་པོ་འདི།། དུས་སྦྱོར་གཅིག་གི་མིང་ཅན་ནོ།། ནམ་མཁའི་ཁམས་དང་མཉམ་ཉིད་ལྡན།། སྔགས་ཀྱི་སྐྱེས་བུ་དངོས་གྲུབ་སྩོལ། ། རྡོ་རྗེའི་དཀྱིལ་འཁོར་དབུས་གནས་པར།། ཨོཾ་ཞེས་བྱ་བ་དེ་རུ་སྒོམ།། ཕྲ་མོའི་དཀྱིལ་འཁོར་དབུས་གནས་པར།། ཡི་གེ་ཨཱཿནི་རྣམ་པར་སྒོམ།། ཆོས་ཀྱི་དཀྱིལ་འཁོར་སྦྱོར་བ་ལའང་།། ཡི་གེ་ཧཱུཾ་ནི་དེ་རུ་སྒོམ།། ཡི་གེ་བྲུཾ་ནི་གནས་མིང་ཅན།། རྡོ་རྗེ་གསུམ་འབྱུང་བསྒོམ་པར་བྱ།། གསང་བའི་དམ་ཚིག་དེ་ཉིད་དེ།། རྡོ་རྗེ་གསུམ་འབྱུང་བཀའ་སྩལ་ཏོ།། སྙིང་པོ་དུས་གསུམ་སངས་རྒྱས་ཀྱི།། རྡོ་རྗེ་གསུམ་ནི་མཉེས་བྱེད་མཆོག། སྐུ་དང་གསུང་ཐུགས་ཐོག་མ་མཐའ།། ཨོཾ་ཨཱཿཧཱུཾ་གི་གྲངས་དང་མཉམ།། སངས་རྒྱས་སྐུ་མཆོག་གསུང་གི་ལམ།། ཐུགས་ཀྱི་ཡེ་ཤེས་འཇིགས་སུ་བྱ།། རང་ཉིད་འདོན་པ་ཉིད་དུ་ནི། ། རེ་རེ་ཞིང་ནི་ཡང་དག་བཤད།། སྔགས་ཀྱི་སྐྱེས་བུའི་སྦྱོར་བ་ཡང་།། རྒྱུ་ཡི་བདག་ཉིད་མིང་ཅན་ཡིན།། བྱང་ཆུབ་ཚུལ་མཆོག་འདི་ཡིན་ཏེ།། སངས་རྒྱས་བྱང་ཆུབ་རབ་སྒྲུབ་པའོ།། ། རྡོ་རྗེ་ཡེ་ཤེས་སྤྲུལ་པ་སྟེ།། སངས་རྒྱས་འབྲས་བུ་ཐོབ་བྱེད་པའོ།། སྔགས་ཀྱི་རིག་པ་ཞེས་བསྒྲགས་པ།། འདི་ནི་སངས་རྒྱས་སྐྱེས་བུ་ཡོན།། རྡོ་རྗེ་གསུམ་མཉམ་མི་ཕྱེད་པ།། རྫོགས་པ་ལ་སོགས་སྒོམ་པ་ཡི། ། དེ་བཞིན་གཤེགས་ཀུན་རྡོ་རྗེ་ནི།། གསུམ་པོ་ཡེ་ཤེས་རྡོ་རྗེ་སྩོལ།། བྱིན་རླབས་དཔལ་ཆེན་ཞེས་བྱ་བའི།། དམ་ཚིག་ཏིང་འཛིན་གྱུར་པ་ཡིན།། རྣམ་པར་དབེན་དང་ཅི་རིགས་པའི།། སྟན་དག་ལ་ནི་སྦྱོར་བ་བཞི།། རིག་པའི་སྐྱེས་བུར་ཡང་དག་སྦྱོར།། བརྟུལ་ཞུགས་ཅན་གྱིས་ཀུན་ཏུ་བརྩམ།། ཐབས་དང་ཤེས་རབ་ཉི་ཟླ་ཕྱེད།། ཐུན་གཅིག་ཏུ་ནི་རབ་ཏུ་བརྟག། དེ་ཡི་ཕྱེད་ཉིད་ཟླ་ཕྱེད་ཀྱིས།། རྡོ་རྗེ་གསུམ་ནི་ངེས་པར་འགྲུབ།། འཇིག་རྟེན་འདས་པའི་རང་བཞིན་ཉིད།། འཇིག་རྟེན་པའི་ཡང་ཕྱིན་ཅི་ལོག། རྡོ་རྗེ་གསུམ་སྦྱོར་སྩོལ་དངོས་གྲུབ།། གྲུབ་པར་འགྱུར་བ་ཐེ་ཚོམ་མེད།། ནམ་མཁའི་རྡོ་རྗེ་དབུས་གནས་པར། ། ཕྲ་མོའི་དཀྱིལ་འཁོར་བསམ་པར་བྱ།། རང་གི་སྔགས་ཀྱི་དམ་ཚིག་དུས།། བསྐྱེད་པ་ཡི་གེ་ཨོཾ་བསྒོམ་བྱ།། སྦྱོར་བ་བཞི་ཡི་གཏན་ཚིགས་གང་།། སྙིང་པོར་ཡོངས་སུ་བརྟགས་པ་ཡིན།། སྣ་རྩེ་དང་ནིརྩ་བ་ཉིད། ། སྤྱི་བོ་མཐའ་ནི་དགའ་ལྡན་གནས།། གཅིག་དང་གསུམ་གྱི་དངོས་པོར་འགྱུར།། དག་པའི་གནས་ཀྱི་གྲོང་ཁྱེར་བ།། ཕྱེ་ས་གསུམ་གྱི་མིང་ཅན་ནི།། རིགས་ཀྱི་དབྱེ་བ་རྡོ་རྗེ་གསུམ།། སྣ་ཡི་རྩེ་མོ་སྦྱོར་བ་ཡིས། ། རྡོ་རྗེ་གསུམ་སྦྱོར་བརྟུལ་ཞུགས་ཅན།། མཱ་མ་ཀཱི་དང་གོས་དཀར་མོ།། སྒྲོལ་མ་གཏོགས་པ་སངས་རྒྱབ་སྤྱན།། འོད་ཟེར་ལྔ་ཡི་སྤྲིན་ཆེན་པོ།། རྣམ་པར་སྣང་མཛད་གཉིས་མེད་གནས།། རྡོ་རྗེ་རྣམ་སྣང་དེ། ལས་ནི།། དངོས་གྲུབ་རྒྱ་ཆེན་གསོལ་བར་འགྱུར།། སངས་རྒྱས་སྐུ་ཡི་འོད་འདྲ་བ།། སྐད་ཅིག་དེར་འགྲུབ་རྣལ་འབྱོར་པ།། ཡེ་ཤེས་ལྔ་པོ་བསྟེན་ནས་ནི།། རྡོ་རྗེ་བསྐལ་པ་གསུམ་དུ་གནས།། ཡེ་ཤེས་འདས་དང་མ་འོངས་དང་། ། ད་ལྟར་བྱུང་བ་རྡོ་རྗེ་གསུམ།། དེ་འདིར་བསྐལ་པར་བརྟགས་གྱུར་པ།། གྲངས་མེད་ཅེས་བྱ་དེ་ཉིད་དོ།། སྐུ་ཡི་གསང་བ་དེ་ཉིད་འདི།། འཇིག་རྟེན་འདས་པའི་རིམ་པར་གསུངས།། ཞི་བའི་བདེ་ལས་ཤེས་བྱ་བ། ། རང་མྱོང་སྦྱོར་བ་གཅིག་ལས་དེ།། སྐུ་ཡི་གསང་བ་མཆོག་འདི་ནི།། དེ་བཞིན་གཤེགས་པ་ཀུན་གྱིས་གསུངས།། རྡོ་རྗེ་འོད་ཟེར་བཀོད་པ་ཡི།། ཏིང་འཛིན་ཡང་དག་བཀའ་སྩལ་ཏོ།། ། ཨ་དང་ཨུ་ནི་ལྐོག་མའི་དབུས།། རྐན་གྱི་སྟེང་གི་མིང་ཅན་ནོ།། ཨི་དང་ཙ་ནི་ལག་གཡོན་ཉིད།། ཨུ་དང་མུ་ནི་གཡས་པར་བརྟག། རི་ཛུ་འདི་ནི་གསང་བར་དགོད།། ལི་ཏི་རྐང་པ་ཅིག་ཤོས་ལ།། དཀྱིལ་འཁོར་གཅིག་ནི་དེ་ཉིད་དོ། ། དཀྱིལ་འཁོར་ལྔ་ལས་རྒྱལ་གྱུར་པ།། ཧ་ནི་ལུས་སྐྱེས་གཙུག་ཏོར་དང་།། གཅོད་ནི་གསུམ་པོ་གཅོད་པ་ཅན།། ཡོན་ཏན་བཞི་ཡི་བཞི་པོ་དེ།། ལྔ་པོའི་ལྔ་པོ་དེ་འགྱུར་རོ།། ནམ་མཁའི་རྡོ་རྗེ་གཅིག་ཕྱེད་སྦྱོར། ། དེ་ནི་འོད་ཟེར་ལྔར་འགྱུར་རོ།། རིག་པ་ཆེན་པོ་དེ་ཉིད་འདི།། ཆ་ཞེས་བྱ་བར་དེ་ཡོངས་བསྒྲགས།། དུས་ཅན་བདག་ཉིད་སྦྱོར་དབང་པོ།། དེ་ཡི་རང་སྦྱོར་གཟུགས་ཅན་གཅིག། ཨཱ་ནི་ཐབས་འགྱུར་སྦྱོར་བ་ནི། ། དབང་པོ་གཉིས་པོ་གཅིག་ཏུའོ།། ནམ་མཁའི་རྡོ་རྗེ་དབུས་གནས་པར།། ཆོས་ཀྱི་དཀྱིལ་འཁོར་མཆོག་བསམ་པ།། རང་སྔགས་སྐྱེས་བུ་བསམས་ནས་ནི་ཨཱ་ནི་ངག་གི་ལམ་དུ་བཞག། ཁ་དོག་ལྔ་ཡིས་ཀུན་ནས་ནི།། བརྒྱན་པའི་རྡོ་རྗེ་ཆེན་པོ་དག། འཇིག་རྟེན་དབང་ཕྱུག་མཆོག་བསྒོམས་པས།། དམ་ཚིག་ཡེ་ཤེས་བསྒོམ་པར་བྱ།། གསུང་གི་དམ་ཚིག་སྤྲོས་པར་བཤད། ། ཁྱབ་བདག་མི་ཟད་རྟག་པ་སྟེ།། ཐོག་མཐའ་མེད་པའི་མཐར་ཐུག་པ།། ཞི་བ་མྱ་ངན་འདས་ཞེས་བྱ།། ཆོས་ཀྱི་གསུང་ལས་རྣལ་འབྱོར་དབང་།། རྡོ་རྗེ་ཆོས་དང་འདྲ་བར་འགྱུར།། ཡེ་ཤེས་ལྔ་ལྡན་བསྟེན་ན་ནི།། རྡོ་རྗེ་གསུམ་གྱི་བསྐལ་པར་གནས།། གསུང་གི་གསང་བ་འདི་ཉིད་ནི།། དེ་བཞིན་གཤེགས་པ་ཀུན་གྱིས་གསུངས།། དམ་ཚིག་འབྱུང་བ་ཞེས་བྱ་བ།། ཏིང་ངེ་འཛིན་དུ་ཡོངས་སུ་བསྒྲགས། ། ནམ་མཁའ་རྡོ་རྗེ་དབུས་གནས་མཆོག། རྡོ་རྗེའི་དཀྱིལ་འཁོར་དམ་པ་ནི།། དེར་ནི་རང་སྔགས་སྐྱེས་བུ་དག། ཧཱུཾ་ནི་སེམས་ལ་གནས་རྫོགས་བྱ།། དམ་ཚིག་ཆེན་པོ་དེ་ཉིད་ཅན།། ཁ་དོག་རྣམ་ལྔ་བསྒོམ་པར་བྱ། ། རྡོ་རྗེ་ཀུན་དང་རྒྱལ་བའི་གནས།། ཡེ་ཤེས་རྡོ་རྗེ་དག་གིས་བྱ།། སྟོན་པ་རྡོ་རྗེའི་ཐུགས་འདྲ་བ།། ཡང་དག་ཡེ་ཤེས་ཡོན་ཏན་མཚོ།། ཡེ་ཤེས་ལྔ་ལྡན་བསྟེན་ན་ནི།། རྡོ་རྗེ་བསྐལ་པ་གསུམ་དུ་གནས། ། ལྐོག་མ་རྐན་དང་དེ་ནས་མཆུ།། སྤྱི་བོ་ས་ཡི་མིང་ཅན་ཏེ།། རྡོ་རྗེས་གསུམ་ཐུགས་གསང་བ་གཅིག། དེ་ནས་ཧཾ་ལས་ཞུགས་པ་ཡིན།། དེ་བཞིན་གཤེགས་ཀུན་ཡེ་ཤེས་ནི།། དམ་ཚིག་རྡོ་རྗེ་ཞེས་བྱ་བ། ། རྡོ་རྗེ་ཡེ་ཤེས་གཅིག་ལས་བྱུང་།། ཏིང་འཛིན་གསང་བར་བཤད་པ་ཡིན།། ཡེ་ཤེས་དཀྱིལ་འཁོར་དབུས་གནས་པར།། རྡོ་རྗེ་ཆེན་པོར་བསམས་ནས་ནི།། ལུས་ཀུན་ལ་ནི་ཁམས་དམིགས་ན།། རྡོ་རྗེ་ཡེ་ཤེས་སྐྱེ་བར་འགྱུར།། དངོས་པོ་མེད་དོན་གསལ་བྱེད་པ།། ཁམས་ཉིད་ཀྱིས་ནི་ཐམས་ཅད་བཤད།། རླུང་གི་རྐྱེན་དང་ཀུན་སྦྱོར་ལས།། ཁཾ་དུའང་འགྲོ་བར་གྱུར་པ་ཡིན།། སངས་རྒྱས་བྱང་ཆུབ་སེམས་དཔའ་ཡིས། ། ཡང་དང་ཡང་དུ་མཆོད་པ་དང་།། རྡོ་རྗེ་གསུམ་གྱི་དམ་ཚིག་གནས།། གཉིས་མེད་ལྷུན་གྱི་ངོ་བོ་ཉིད།། སངས་རྒྱས་དེ་བཞིན་ཉིད་སྦྱོར་བ།། སོ་སོ་རུ་ནི་ཡང་དག་གནས།། ནམ་མཁའ་རྡོ་རྗེ་དམ་ཚིག་ཆེ། ། ཆོས་རྣམས་དེ་ནི་མི་གཟིགས་སོ།། སངས་རྒྱས་ཀུན་ནི་གཉིས་མེད་རང་།། མི་སྣང་འདི་ཡི་དམ་ཚིག་ཡིན།། དངོས་པོ་མེད་པའི་གནས་ཐོབ་ན།། སངས་རྒྱས་ཀྱིས་ཀྱང་མི་གཟིགས་སོ།། སྐུ་གསུང་ཐུགས་ལས་ཡང་དག་བྱུང་།། མི་སྣང་རྡོ་རྗེ་གསུམ་འདི་ཡིན།། དེ་ཡི་བཀོད་འཕྲེང་ཞེས་བྱ་བ།། ཏིང་ངེ་འཛིན་ནི་ཡང་དག་གསུངས།། མ་འདྲེས་པ་ཡི་ཆོས་བདག་ཉིད།། སྐུ་དང་ལྡན་པའི་འོད་པོ་ཆེ། རྡོ་རྗེ་དཀྱིལ་འཁོར་དབུས་གནས་པའི།། རང་སྔགས་སྐྱེས་བུ་བསམ་པར་བྱ།། ཧཾ་ནི་རྡོ་རྗེ་བཞིར་བཤད་པ།། སྙིང་ཁ་རུ་ནི་ཡཾ་མཛེས་པ།། རྟག་ཏུ་སྦྱོར་བས་གཞུག་པ་ནི།། འོད་ཟེར་རྣམ་པར་བསྒོམ་པར་བྱ།། སྐུ་གསུང་ཐུགས་ཀྱི་ལོངས་སྤྱོད་ནི།། འཇམ་པའི་དམ་ཚིག་རྡོ་རྗེ་ཅན།། ས་བཅུ་རབ་ཏུ་གནས་ན་ནི།། དགོངས་དོན་དེ་ཚེ་ཀུན་ཏུ་བྱུང་།། ཡེ་ཤེས་ཉིད་ནི་ཟླ་བ་འདི།། བྱང་ཆུབ་སེམས་དཔའ་རྡོ་རྗེ་ཅན།། སྡང་བ་ཅན་ཞེས་བྱ་བ་ཡི། ། ཏིང་ངེ་འཛིན་ནི་ཡང་དག་བཤད།། ནམ་མཁའི་དབྱིངས་ཀྱི་དབུས་གནས་པར།། བྷྲཱུཾ་ནི་འབར་བའི་འོད་བཟང་བ།། མཚོན་ཆ་མཆོག་ནི་རྡོ་རྗེ་ཡིས།། རྡོ་རྗེ་སྐུ་དང་འདྲ་བར་འགྱུར། ། འདི་ནི་རྡོ་རྗེ་མཁའ་འདྲ་སྦྱོར།། དམ་ཚིག་བཀོད་པའི་གནས་གྱུར་པ།། ཏིང་འཛིན་དམ་ཚིག་མི་སྣང་བའི།། བྷྲཱུཾ་ནི་ཡང་དག་འབྱུང་བ་བཤད།། སངས་རྒྱས་མངོན་པར་ཤེས་གནས་པ།། དམ་ཚིག་ཏུ་ནི་ཡང་དག་བཤད། ། མངོན་ཤེས་ལྔ་དང་འདྲ་བ་ནི།། དེ་ནི་སྐྱེས་བུ་མཆོག་ཏུ་འགྱུར།། སངས་རྒྱས་མངོན་ཤེས་མཆོག་སྒྲུབ་པ།། འདི་ནི་དམ་པ་ཡིན་པར་བཤད།། དེ་ཡི་དངོས་གྲུབ་ཐམས་ཅད་ཀྱིས་དངོས་གྲུབ་ཆེན་པོ་སྒྲུབ་པའི་མཆོག། ནམ་མཁའི་དབྱིངས་ཀྱི་དབུས་གནས་པར།། སངས་རྒྱས་དཀྱིལ་འཁོར་དམ་པ་བསམ།། སངས་རྒྱས་དགོངས་པའི་མཆོག་བསྒོམས་ལ།། ཡི་གེ་ཨོཾ་ནི་བསྒོམ་པར་བྱ། ། རྡོ་རྗེ་གསུམ་གྱི་གསང་བ་འདི།། ཡི་གེ་ཨོཾ་ནི་མི་ཟད་གཙོ།། འདི་ནི་མི་ཕྱེད་སྦྱོར་བ་ཡིས།། བསྒོམ་པས་མི་བསྐྱོད་འདྲ་བར་འགྱུར།། མི་བསྐྱོད་པ་ཡི་དམ་ཚིག་མཆོག། དེ་སྐུ་བྱང་ཆུབ་རྡོ་རྗེ་ཅན། ཏིང་ངེ་འཛིན་དུ་ཡང་དག་བཤད།། དེ་ནི་སྐྱེས་བུ་དམ་པ་ཡིན།། མི་བསྐྱོད་མཚུངས་པའི་སྐུ་དང་ནི།། གསུང་ཐུགས་རྩེ་གཅིག་འཛིན་པ་ལས།། འཇིག་རྟེན་ཁམས་ནི་ཐམས་ཅད་དུ།། རྡོ་རྗེ་ཅན་གྱིས་མཆོད་པར་འགྱུར། ། ནམ་མཁའི་དབྱིངས་ཀྱི་དབུས་གནས་པར།། སངས་རྒྱས་དཀྱིལ་འཁོར་བརྒྱན་པར་བསམ།། ནམ་མཁའི་རྡོ་རྗེ་རབ་བསྒོམས་ཏེ།། དེ་ནས་རྡོ་རྗེ་རྣམ་པར་བསྒོམས།། རྡོ་རྗེ་དམ་ཚིག་གསུམ་བསྒོམས་པས། ། དཀོན་མཆོགདཔལ་དང་འོད་འདྲ་ཞིང་།། དཀོན་མཆོག་གསུམ་དཔལ་མཚུངས་པ་ཡི།། བཅོམ་ལྡན་དཀོན་མཆོག་དཔལ་འདྲ་ཞིང་།། སྐུ་གསུང་ཐུགས་སྦྱོར་རྡོ་རྗེ་ཡིས།། ཡེ་ཤེས་གསང་བའི་གནས་སུ་འགྱུར།། ཏིང་འཛིན་དཔག་མེད་ལས་བྱུང་བ།། རྡོ་རྗེ་ཡེ་ཤེས་འཛིན་དེ་འགྱུར།། ལོངས་སྤྱོད་དམ་ཚིག་ཅེས་བྱ་བ།། རིན་ཆེན་རྡོ་རྗེ་གཅིག་ཏུ་འབྱུང་།། དེ་ཉིད་གསུམ་གསང་དགོངས་པ་ལས། ། རིན་ཆེན་རྡོ་རྗེ་དེ་གནས་འགྱུར།། ནམ་མཁའི་དབྱིངས་ཀྱི་དབུས་གནས་པར།། སངས་རྒྱས་དཀྱིལ་འཁོར་བསམ་པར་བྱ།། འཇིག་རྟེན་དབང་ཕྱུག་རབ་བསྒོམས་ལ།། དེར་ནི་ཆོས་ཀྱི་ཨོཾ་སྒོམ་མོ།། ཆོས་ཀྱི་ཨོཾ་ནི་དེ་ཚེ་ཡང་།། རྡོ་རྗེ་གསུམ་མཉམ་སྦྱོར་བ་ཡིས།། རྡོ་རྗེ་དཔག་མེད་འདྲ་བ་ནི།། བཅོམ་ལྡན་དཔག་མེད་རྡོ་རྗེ་ཅན།། ལུས་དང་ངག་སེམས་རྡོ་རྗེ་ཡིས།། དཔག་མེད་ཚེ་དང་འདྲ་བར་འགྱུར། ། ཐེག་པ་ཆེན་པོ་ལམ་གྱི་མཆོག། འགྲོ་བའི་དོན་ནི་རབ་བསྒྲུབ་པ།། ཡེ་ཤེས་རྒྱ་མཚོ་དཔལ་དང་ལྡན།། འགྲོ་དོན་གཅིག་ཏུ་འབྱུང་བར་འགྱུར།། དོན་ཡོད་པ་ཡི་དམ་ཚིག་མཆོག། སེམས་ཅན་དོན་ནི་སྒྲུབ་གྱུར་པ།། འོད་ཟེར་ཡེ་ཤེས་མཆོག་ཅེས་བྱའི།། ཏིང་ངེ་འཛིན་དུ་ཡང་དག་བཤད།། སེམས་ཅན་ཁམས་ནི་མ་ལུས་པའི།། ལོངས་སྤྱོད་ཀུན་ཏུ་འགྱུར་བ་ཡི།། ནམ་མཁའི་དབྱིངས་ཀྱི་དབུས་གནས་པར། ། སངས་རྒྱས་དཀྱིལ་འཁོར་དམ་པ་བསམ།། དེ་ནི་རྣམ་སྣང་རྡོ་རྗེར་བཤད།། འོད་ཟེར་དེར་ནི་རབ་ཏུ་སྒོམ།། རྣམ་པར་རྒྱལ་བའི་ཡི་གེ་ཨོཾ།། འོད་ཆེན་དེར་ནི་རབ་ཏུ་སྒོམ།། དེ་ནས་འདི་ནི་རྡོ་རྗེ་གསུམ། ། རྣམ་པར་སྣང་མཛད་འདྲ་བར་འགྱུར།། དེ་ནི་བཅོམ་ལྡན་མགོན་པོས་བཤད།། རྣམ་སྣང་རྡོ་རྗེ་ཅན་དེ་ཡིན།། རྡོ་རྗེ་གསུམ་གཉིས་མེད་སྦྱོར་ལས།། རྣམ་པར་སྣང་མཛད་འདྲ་བའི་འོ། ། དེ་ཉིད་ཡེ་ཤེས་རྫོགས་བྱང་ཆུབ།། རྡོ་རྗེ་སྐུ་གསུམ་སྒྲུབ་པ་པོ།། སྐུ་དང་གསུང་ཐུགས་རྫོགས་བྱང་ཆུབ།། དེ་ལ་དམིགས་པའི་རྡོ་རྗེ་ཅན།། ཏིང་འཛིན་ཞི་བ་ཉིད་སྦྱོར་བ།། འགྲོ་བའི་། དོན་ནི་རབ་སྒྲུབ་པའོ།། ཚིག་གཅིག་ལ་ནི་སྣ་ཚོགས་དོན།། སྔགས་ཀྱི་དེ་ཉིད་གསལ་གྱུར་པའོ།། དེ་ནས་དེ་བཞིན་གཤེགས་མཆོག་ལ།། དེ་ནས་གསང་བའི་བདག་པོ་ནི།། གསང་དགོངས་རྡོ་རྗེ་ཞེས་བྱ་བ་ཐུབ་པ་ཆེ་ལ་སླར་ཡང་ཞུས། ། ཨོཾ་ཨཱཿཧཱུཾ་ནི་གསུམ་ལ་སོགས།། བྷྲཱུཾ་སོགས་ཐོག་མར་གནས་པ་ཡིས།། སྐུ་གསུང་ཐུགས་ཀྱི་རྡོ་རྗེ་ཅན།། སྔགས་ཀྱི་སྐྱེས་བུར་དེ་འགྱུར་རོ།། ཨོཾ་ནི་རྣམ་སྣང་རྡོ་རྗེར་འགྱུར། ། ཨཱཿནི་འཇིག་རྟེན་དབང་ཕྱུག་གཙོ།། ཧཱུཾ་ནི་རྡོ་རྗེ་སེམས་དཔར་བ་ཤད།། སྐྱེས་བུ་རྡོ་རྗེ་ཅན་དུ་འགྱུར།། བྷྲཱུཾ་ནི་གནས་ཀྱི་མཆོག་ཏུ་འགྱུར།། ཁཾ་ནི་ངེས་པར་མི་སྣང་བ།། ཧཾ་ནི་འཇམ་དཔལ་ཡང་དག་བཤད། ། ཀྵཾ་ནི་རྡོ་རྗེ་བཀོད་ཅེས་བྱ།། རྡོ་རྗེ་སེམས་དཔའ་རིན་པོ་ཆེ།། འཇིག་རྟེན་དབང་ཕྱུག་དངོས་གྲུབ་སྩོལ།། དེ་བཞིན་མགོན་པོ་རྣམ་སྣང་མཛད།། ཨོཾ་ལ་སོགས་པ་ལྔ་ལས་སྐྱེས།། ཨོཾ་ཨཱཿཧཱུཾ་ནི་དེ་ཉིད་གསུམ། ། རྣམ་སྣང་རྡོ་རྗེ་ཅན་གྱུར་པ།། སྐུ་གསུང་ཐུགས་ཀྱི་རྡོ་རྗེ་གྲགས།། ཤིན་ཏུ་རྣམ་པར་ངེས་པར་བཤད།། གསང་སྔགས་དཀྱིལ་འཁོར་རྣལ་འབྱོར་པ།། ལྔ་པོ་བཅོ་ལྔར་ཡང་དག་བཤད།། ཁྲག་གི་སྦྱོར་བ་ལས་བྱུང་བ།། གསང་སྔགས་སྐྱེས་བུ་ཞེས་བྱ་བ།། གསང་སྔགས་ཆེན་པོའི་སྦྱོར་བ་ཡང་།། ཏིང་འཛིན་སྐྱེས་བུ་དམ་པ་ཡིན།། སྣ་ཚོགས་སྔགས་དོན་དེ་ཉིད་འགྱུར།། ཕྱག་རྒྱ་གཅིག་པར་དཀྱིལ་འཁོར་ཏེ། ། དེ་དག་གསང་བར་བཤད་པ་ནི།། དགོངས་པ་གཅིག་ལས་ཡང་དག་འབྱུང་།། དགའ་བ་གཅིག་ཅིང་དགའ་བའི་མིང་།། དེ་དག་ཇི་ལྟར་རྟོགས་པར་འགྱུར།། མགོན་པོ་རྐྱེན་དང་བྲལ་བའི་མི། ། པི་ཝང་སྒྲ་ནི་མཆིས་མ་ལགས།། དེ་བཞིན་ཕྱག་རྒྱ་མེད་པ་ནི།། གསང་སྔགས་དངོས་གྲུབ་མི་འབྱུང་ངོ་།། བརྡ་གསུམ་གྱི་ནི་དེ་ཉིད་འདི།། གང་གི་དོན་དུ་རབ་གསུངས་པ།། ལག་པའི་སྦྱོར་བས་རབ་སྒྲུབ་པའི། ། ཕྱག་རྒྱ་ཇི་ལྟར་གནས་པར་མཛད།། སྔགས་དང་ཕྱག་རྒྱ་སྦྱོར་བ་ནི།། ཕྱག་རྒྱ་གཅིག་པུའི་སྦྱོར་བ་དང་།། གསང་སྔགས་གཅིག་པུས་མི་འགྲུབ་ཅེས།། ཁྱོད་ནི་ཆོས་རྣམས་སྟོན་པར་མཛད། ། འདིར་ནི་སྔགས་སྦྱོར་གཅིག་པུ་ལས།། ཕྱག་རྒྱ་བསྟན་པར་མ་མཛད་ན།། གསང་སྔགས་གཅིག་སྐྱེས་དངོས་གྲུབ་ནི།། འཇིག་རྟེན་པ་རྣམས་ཇི་ལྟར་སྒྲུབ།། སྔགས་ལ་དམིགས་པའི་སྦྱོར་གྱུར་པ།། ལྷ་རྣམས་ཀྱིས་ཀྱང་སྦྱོར་ལས་བྱུང་།། འགྲོ་བའི་དོན་ནི་རབ་སྒྲུབ་པ།། ཡིད་བཞིན་ནོར་བུར་ལྟ་བུར་འགྱུར།། འཇིག་རྟེན་འདས་པ་ཞེས་བྱ་དང་།། ཡང་ན་ཤིན་ཏུ་འཇིག་རྟེན་འདས།། མགོན་པོ་འཇིག་རྟེན་པ་རྣམས་ཀྱི་ཇི་ལྟར་འགྲོ་ལ་དེ་ཕན་འགྱུར། ། སྤྱན་དྲངས་པ་དང་གཤེགས་སུ་གསོལ།། འདིར་ནི་ཇི་ལྟར་ལེགས་པར་བརྗོད།། གང་གིས་འདིར་ནི་དངོས་གྲུབ་འགྲུབ།། ལྷ་རྣམས་མངོན་ཕྱོགས་ཇི་ལྟ་བུ།། འདི་དག་མ་འོངས་སྐྱེ་བོ་ཡིས། ། གང་ཞིག་ཤེས་ན་ཡང་དག་པར།། ངེས་པར་རྣམ་རྟོག་མེད་འགྱུར་བ།། མི་ཡི་སྐྱེས་བུ་འདི་དག་གསུངས།། དེ་ནས་མགོན་པོ་བཅོམ་ལྡན་འདས།། དགོངས་པའི་གསང་བ་དམ་པ་སྟེ། ། ཕྱག་རྒྱའི་ངེས་པ་འཇིག་རྟེན་པའི།། ཕྱག་ན་རྡོ་རྗེ་ལ་གསུངས་སོ།། རྣམ་རྟོག་སྣ་ཚོགས་ལྕགས་ཞེས་བྱ།། ཉེས་པ་གསུམ་ཚོགས་བདག་ཉིད་ལས།། གསང་སྔགས་སྐྱེས་བུའི་སྦྱོར་བ་ཡིས། ། དེ་ནི་མི་མཆོག་དག་ཏུ་འགྱུར།། གསེར་འགྱུར་རྩི་ཡི་རྣམ་པ་ཡིས།། ལྕགས་ནི་གསེར་དུ་བྱེད་པ་ཡིན།། དེ་བཞིན་སྔགས་ཀྱི་དེ་ཉིད་ཀྱིས།། མི་ནི་བདེར་གཤེགས་བྱེད་པ་ཡིན།། ངེས་བྱས་སྦྱོར་བའི་གསང་སྔགས་ནི། ། ཞི་བདེ་དངོས་གྲུབ་སྟེར་བར་འགྱུར།། ཕྱག་རྒྱ་མེད་པའི་སྔགས་གཅིག་པུས།། སྔགས་ཀྱི་སྐྱེས་བུར་འགྱུར་པ་ཡིན།། དངོས་མེད་པ་ལས་ཡང་དག་སྐྱེ།། སྔགས་ཀྱི་སྐྱེས་བུ་འབྱུང་བ་སྟེ། ། འདི་ནི་ཕྱག་རྒྱ་ཆེན་པོ་སྟེ།། འགྲོ་བའི་དོན་ནི་རབ་སྒྲུབ་པའོ།། སྤྱན་དྲང་བར་ནི་བཞུགས་པ་ཡིས།། མྱུར་བ་ཡིས་ནི་གཤེགས་སུ་གསོལ།། གནས་པ་ཡིས་ནི་དེ་སྒྲུབ་པའོ།། ཡིད་སྟོན་དངོས་གྲུབ་དམ་པ་ཡིན།། དེ་ནི་སྐྱེས་བུའི་སྦྱོར་བ་ཡིས།། ཕྱག་རྒྱ་ཆེ་དང་གཅིག་སྒྲུབ་ལས།། མྱུར་བ་ལ་སོགས་གསུམ་ལྡན་པ།། དེ་ནི་ཕྱག་རྒྱ་ཡིན་པར་བཤད།། འབད་དེ་བླ་མས་སློབ་མ་ཡི། རྣ་བའི་དྲུང་དུ་བཤད་པར་བྱ།། མྱུར་བ་དང་ནི་འཇུག་པ་དང་།། གནས་པའི་རྗེས་སུ་སྦྱོར་བ་རྣམས།། སྤྱན་དྲང་བ་དང་གཤེགས་སུ་གསོལ།། འདི་དག་ཕྱག་རྒྱར་ཡང་དག་གྱུར།། སྒྲུབ་པ་ལ་ནི་མྱུར་ལ་སོགས།། ཅི་རིགས་པ་ནི་ངེས་པར་སྦྱར།། ཕུང་པོ་ལ་སོགས་ཆོས་རྣམས་ཀུན།། སྟོང་ཞིང་རྟེན་འབྲེལ་ལས་བྱུང་བ།། མཐོང་ཞིང་དེ་བཞིན་སྦྱོར་བ་ལས།། ཆོས་ཀྱི་སྐུར་ནི་དེ་གནས་འགྱུར།། འདིར་ནི་གསང་སྔགས་སྦྱོར་འགྱུར་མེད། ། ཕྱག་རྒྱའང་ཆོས་སྐུ་འདི་ཉིད་ཡིན།། དེ་ལྟ་ན་ཡང་འགྲོ་བའི་དོན།། ཡིད་བཞིན་ནོར་བུ་ལྟ་བུར་བྱེད།། འོན་ཏེ་རྡོ་རྗེ་འཛིན་གང་ཞིག། སྦྱོར་བ་གསུམ་དང་ལྡན་པའི་མི།། སྤྱན་དྲང་བ་དང་གཤེགས་སུ་གསོལ། ། དེ་བཞིན་དུ་ནི་གནས་གྱུར་པའོ།། ཉེ་བའི་ཚིག་ནི་སྤྱན་དྲང་བ།། རིང་ནས་ལག་པར་རབ་ཏུ་སྦྱོར།། དེ་བཞིན་གསང་སྔགས་དེ་ཉིད་ཀྱང་།། གཉིས་ཀ་ལ་ནི་ཡང་དག་སྦྱོར།། རིགས་ཀྱི་དབྱེ་བ་སྦྱོར་བ་ཡིས།། ཕྱག་རྒྱ་བུད་མེད་ཡིན་པར་བཤད།། སེམས་ཀྱི་རྐྱེན་སྦྱོར་བདག་ཉིད་ནི།། འཇིག་རྟེན་པར་ནི་རབ་ཏུ་བརྟག། རང་གི་མཚན་མར་ཡང་དག་སྦྱོར།། རིགས་ཀྱི་དབྱེ་བའི་སྦྱོར་བ་ཡིས།། ཕྱག་རྒྱས་ས་གསུམ་ལ་གནས་པ། ། ས་འོག་ཀླུ་ཡི་བུ་མོ་ཡང་།། བརྟུལ་ཞུགས་ཅན་གྱི་སེམས་ཀྱིས་དགུག། གཞུག་པའི་རིམ་པ་ཉིད་དང་ནི།། དེ་རྣམས་གནས་པའི་སྦྱོར་བ་ཉིད།། དངོས་མེད་དེ་ཉིད་གཅིག་པུ་ཡིས།། འགྲོ་བ་ཐམས་ཅད་དགུག་པར་བྱ། ། གཞན་ཡང་གསང་བ་པ་ཡི་མཆོག། སེམས་ཀྱི་རྐྱེན་ནི་ཉིད་ལྟོས་དང་།། དངོས་མེད་བྱང་ཆུབ་འཐོབ་པ་ལ།། གསང་སྔགས་མེད་ཅིང་ཕྱག་རྒྱ་མེད།། འཇིག་རྟེན་ན་ནི་རྡོག་ཅི་རྙེད། ། དུས་གསུམ་དུ་ནི་ཀུན་འབྱུང་བ།། དེ་ནི་དངོས་མེད་སེམས་གཅིག་ལས།། རྣལ་འབྱོར་པས་ནི་སྐད་ཅིག་རྟོགས།། བྱང་ཆུབ་ཀུན་རྫོབ་མ་ཡིན་ལ།། དེ་ལས་གཞན་དུའང་རྙེད་མི་འགྱུར།། གཉིས་ཀ་ལས་མིན་གཞན་ལས་མིན།། མུན་པའི་སྒྲོན་མ་མཚུངས་པར་འགྱུར།། སེམས་ཅན་བསམ་པའི་དབང་གི་སྔགས།། གསང་བ་འདི་ནི་རབ་སྟོན་ཏེ།། དེ་ནི་སྒྲུབ་དང་བསྒྲུབ་བྱ་དང་། ། རྣམ་པར་མི་རྟོག་བརྟགས་པའོ།། སེམས་ཅན་ཀུན་གྱི་ལོངས་སྤྱོད་དུ།། སྔགས་ཀྱི་སྐས་བུ་རབ་ཏུ་གནས།། ནམ་མཁའ་མཉམ་པའི་སྦྱོར་བ་ནི།། རྣམ་པར་དབེན་པར་རབ་ཏུ་བརྟག། གསལ་དང་མི་གསལ་ཡང་དག་ལྡན།། ཀླུང་དང་འབབ་ཆུ་ལ་སོགས་ཡིན།། མྱ་ངན་འདས་པ་གནས་སྦྱོར་བ།། དུར་ཁྲོད་ལ་སོགས་པ་ཡི་མིང་།། འདི་ནི་སྔགས་རིག་མཆོག་རྣམས་ཀྱི།། བསམ་གཏན་བསྡུས་ལས་སྤྱོད་པའོ། ། འཇིག་རྟེན་འདས་པ་དེ་ཉིད་འདིར།། འཇིག་རྟེན་པ་ནི་བཟློག་པའོ།། མི་བསྐྱོད་ཡེ་ཤེས་ལ་སོགས་པ།། རྡོ་རྗེ་ནམ་མཁའི་དཀྱིལ་དུ་བསམ།། མངོན་ཤེས་ལྔ་ཡི་སྦྱོར་བ་ཡིས།། སངས་རྒྱས་མཆོག་གི་གནས་སུ་སྒོམ།། རྡོ་རྗེ་མངོན་ཤེས་རྡོ་རྗེ་ཆེ།། དམ་ཚིག་མཆོག་ཏུ་བཀའ་སྩལ་ཏོ།། རྡོ་རྗེ་ཆེན་པོ་རབ་མཛེས་པ།། རྩེ་ལྔ་པ་ལ་དེ་བཞིན་འབར།། རང་བཞིན་ལྔ་རུ་སྦྱོར་བ་ཡིས། མངོན་ཤེས་ལྔ་པོ་འགྱུར་བ་ཡིན།། མངོན་ཤེས་ལྔ་ཡི་ཏིང་འཛིན་ལ།། གནས་ནས་བླ་ན་མེད་པ་བརྟག། གཙོ་བོ་མེ་སྟག་མང་པོ་འཁྲུག། རང་སྔགས་འཁོར་ལོ་བསྒོམ་པར་བྱ།། རྡོ་རྗེ་ལ་རབ་དགོད་བྱས་པས། རྡོ་རྗེ་མངོན་ཤེས་སྐྱེ་བར་འགྱུར།། ནམ་མཁའ་རྡོ་རྗེ་དབུས་གནས་པར།། འཁོར་ལོ་རྡོ་རྗེ་འབར་འོད་འདྲ།། སངས་རྒྱས་འཇུག་པར་རབ་བསྒོམས་ན།། སངས་རྒྱས་མཆོག་དང་འདྲ་བར་འགྱུར།། སངས་རྒྱས་དཀྱིལ་འཁོར་དབུས་གནས་པར། ། ལུས་ལ་རྣམ་པར་སྣང་མཛད་གཞག། སྙིང་ཁར་ཡི་གེ་ཨོཾ་བསམས་ན།། སྔགས་ལ་མངོན་ཤེས་སྒོམ་པར་འགྱུར།། འགོག་པ་རྡོ་རྗེ་གྱུར་པའི་སེམས། ནམ་ཞིག་བདག་ཉིད་བདག་ལས་སྐྱེས།། སངས་རྒྱས་ཀུན་མཆོག་འབྱུང་བ་ཡི།། དཔལ་ལྡན་ཡིད་བཞིན་ནོར་བུར་འགྱུར།། སངས་རྒྱས་དཀྱིལ་འཁོར་དབུས་གནས་པར།། དེར་ནི་མི་བསྐྱོད་རབ་ཏུ་སྒོམ། ། ཧཱུཾ་ནི་སྙིང་ཁའི་ཟླ་གནས་པར།། བསམས་ལ་སེམས་ནི་དེ་རུ་གཞག། སངས་རྒྱས་དཀྱིལ་འཁོར་དབུས་གནས་པར།། ཚེ་དཔག་མེད་པ་རབ་ཏུ་སྦྱོར།། ཨཱཿནི་སྙིང་ཁའི་ཐིག་ཁེར་གནས། ། བསམས་ལ་རྡོ་རྗེའང་ཡང་དག་གཞག། འདི་ནི་དགོངས་པའི་མཆོག་གི་མཆོག། རྡོ་རྗེ་མི་ཕྱེད་གསུམ་སྦྱོར་སྐྱེས།། འགོག་པའི་དམ་ཚིག་ཡེ་ཤེས་ཏེ།། སངས་རྒྱས་དངོས་གྲུབ་ཆེར་འབྱུང་བའོ། ། ནམ་མཁའི་རྡོ་རྗེ་དབུས་གནས་པར།། སངས་རྒྱས་དཀྱིལ་འཁོར་བསྒོམ་པར་བྱ།། སྐུ་གསུང་ཐུགས་ཀྱི་ཡི་གེ་ཨོཾ།། བསམས་ན་བསྐལ་པ་གཅིག་ཏུ་གནས།། ནམ་མཁའ་རྡོ་རྗེ་དབུས་གནས་པར། ། སངས་རྒྱས་དཀྱིལ་འཁོར་བསྒོམ་པར་བྱ།། ལུས་དང་ངག་སེམས་ཡི་གེ་ཨཱཿ།། བསམས་ན་བསྐལ་པ་དག་ཏུ་གནས།། མཁའ་དབྱིངས་རྡོ་རྗེ་དབུས་གནས་པར།། རྡོ་རྗེ་དཀྱིལ་འཁོར་བསྒོམ་པར་བྱ། ། ལུས་དང་ངག་སེམས་ཡི་གེ་ཧཱུཾ།། བསམས་ན་དེ་ནི་བསྐལ་པར་གནས།། བཅོམ་ལྡན་བདག་པོ་རྡོ་རྗེ་གསུམ།། དམ་ཚིག་རྟོག་པས་དེ་སྐད་གསུངས།། དགུ་མཐའ་ཅན་གྱི་ཡི་གེ་འདི། ། སྔགས་ཀྱི་སྐྱེས་བུ་མཆོག་ཏུ་འགྱུར།། བརྗོད་དུ་མེད་ཅིང་མིང་མེད་ལ།། ཤེས་དང་ཤེས་བྱ་རྣམ་སྤངས་པའང་།། ཀུན་རྫོབ་ལ་ནི་ལེགས་གནས་ན།། ཚིག་གི་སྔགས་སུ་འདི་བརྗོད་དོ།། རྡོ་རྗེ་གསུམ་གྱི་རྡོ་རྗེ་ཅན།། རྣལ་འབྱོར་འདིར་འགྱུར་ཕྱིན་ཆད་ནི།། གང་ཞིག་ཀློག་གམ་སེམས་ཀྱང་རུང་།། རྡོ་རྗེ་ཡེ་ཤེས་ལྟ་བུར་འགྱུར།། ཇི་ལྟར་གསང་བའི་རྒྱལ་དབང་པོ། ། དགོངས་པ་ལུང་སྟོན་འདི་གྱུར་པ།། སངས་རྒྱས་ཀུན་གྱིས་དེ་ལུང་བསྟན།། ཁྱད་པར་དུ་ཡང་བྱིན་གྱིས་རློབ།། ཀློག་ཅིང་སྒོམ་དང་ལྡན་པར་ནི།། བྲིས་ནས་གང་དུ་འཇོག་གྱུར་པ།། དེ་ནས་སངས་རྒྱས་ཐམས་ཅད་ཀྱི། ། རིགས་སྐྱེས་རྒྱལ་བའི་སྲས་སུ་འགྱུར།། ཁམས་གསུམ་ཐམས་ཅད་བཅོམ་ནས་ནི།། མྱུར་བ་དེ་བཞིན་གཤེགས་འགྱུར་ཞིང་།། འཁོར་ལོ་སྒྱུར་བའི་བུ་བཞིན་དུ།། བྱང་ཆུབ་མྱུར་དུ་དེས་འཐོབ་བོ།། ཁམས་གསུམ་སྐུ་དང་གསུང་ཐུགས་ཀྱི།། སྔགས་པའི་ཡན་ལག་གྱུར་པ་ནི།། སངས་རྒྱས་འདུས་ལ་བརྟེན་པ་ཡིས།། དེ་ནི་དངོས་པོ་མེད་པར་འཇོམས།། དངོས་མེད་གཅིག་པུ་རྫོགས་ལོངས་སྤྱོད།། ཕུང་སོགས་ཡན་ལག་དོན་ལས་སྤྱོད།། བདེ་གཤེགས་སེམས་ཅན་སྤངས་པ་ནི།། སྔགས་པ་སྔགས་ལས་གྱུར་པ་ཡིན།། ཇི་ལྟར་ནམ་མཁའ་རང་མཚན་ཉིད། ། སྐད་ཅིག་ཀྱང་ནི་འདོར་མི་བྱེད།། དེ་འིསངས་རྒྱས་ཐམས་ཅད་ཀྱང་། རིགས་ལས་སྐྱེས་ལ་བྱིན་གྱིས་རློབ།། དགོངས་པ་ལུང་སྟོན་ལ་གནས་ནས།། གསང་བའི་རིན་ཆེན་ཡང་དག་སྲུང་། ། མིག་གཟུགས་རང་གི་ངོ་བོ་ཉིད།། སྤྱོད་པ་ཅི་དགའ་བྱེད་པར་འགྱུར།། དེ་བཞིན་གཤེགས་ཀུན་ཡེ་ཤེས་ནི།། གསང་བའི་དགོངས་པའི་མིང་ཅན་ཏེ།། སྐུ་དང་གསུང་ཐུགས་གསང་བ་དང་། ། གསང་སྔགས་དམ་ཚིག་དེ་ཉིད་བྱུང་།། དེ་ནི་རིག་པ་སྐྱེས་བུ་མཆོག། བཅུ་གཅིག་པར་ནི་ཡང་དག་བཤད།། རས་ནི་བྲིས་དང་མཚུངས་པར་འབྱུང་།། འཐོབ་པའི་ཕྱིར་ནི་ལེའུར་གྱུར། ། དེ་ནས་དཔལ་ལྡན་རྣམ་སྣང་མཛད།། བསྐྱེད་པ་ཡེ་ཤེས་བླ་མ་གཙོ།། དེ་ཉིད་དམ་ཚིག་མཆོག་གྱུར་པ།། རྡོ་རྗེ་གསུང་གིས་བཀའ་སྩལ་ཏོ།། མཁའ་དང་མཚུངས་ཤིང་མི་རྟོག་ལ། རང་བཞིན་གྱིས་ནི་དམ་ཆོས་ཅན།། དངོས་མེད་ཤིན་ཏུ་དྲི་མེད་ལ།། དམ་ཚིག་གཅིག་ཏུ་གྱུར་ཀྱང་ནི།། གར་དང་གླུ་དང་རོལ་མོ་དང་།། དགོད་དང་སྒེག་པས་རབ་མཛེས་པས།། འཇིག་རྟེན་སངས་རྒྱས་གར་མཁན་གྱི། ། རོལ་མོ་འདི་དག་རབ་ཏུ་སྒོམ།། གཞོན་ནུས་བསྒྲུབས་པའི་སེམས་ཅན་ནི།། ཇི་ལྟ་ཇི་ལྟར་སྟོན་པ་བཞིན།། གར་སོགས་རྩེད་མོས་བྱང་ཆུབ་ནི།། མྱུར་དུ་དེ་ཉིད་ལས་འཐོབ་འགྱུར།། འདོད་པའི་ཡོན་ཏན་ལྔར་ལྡན་པ།། དེ་ཡི་མིང་ནི་ཡིད་ལྡན་པ།། དཀོན་མཆོག་གསུམ་ལ་སྐྱབས་སུ་གནས།། ལྷུན་གྱིས་གྲུབ་པའི་སངས་རྒྱས་འགྱུར།། སེམས་ཅན་གང་འདི་མཐོང་བ་དང་།། ཐོས་ཤིང་རེག་པར་གྱུར་པ་ནི།། དེ་ནི་ཨུ་དུམ་པ་ར་ཡི།། མེ་ཏོག་འདྲ་བར་གྱུར་པ་ཡིན།། སེམས་ཅན་ཀུན་གྱི་གཙོ་བོ་འདི།། གསུང་གི་རྡོ་རྗེ་ཆོས་ཉིད་སྐྱེས།། གཅིག་དང་དུ་མ་ལས་གྲོལ་བ།། རྟེན་འབྱུང་གསལ་བར་བྱེད་པ་ཡིན། ། དེ་ནས་གསང་བའི་བདག་མཆོག་དེ།། ཆོས་ཀྱི་དེ་ཉིད་རབ་སྟོན་པ།། ཐུབ་ཆེན་རྣམ་པར་སྣང་མཛད་ལ།། ཐལ་མོ་སྦྱར་བ་བྱས་ནས་ཞུས།། མགོན།། པོ་དེ་ཉིད་བསྡུས་པ་ལས།། རོལ་མོ་འདིར་ནི་གྱུར་པ་དང་།། འཇིག་རྟེན་པ་དེ་གར་བྱེད་པ།། གསུངས་ཏེ་མ་འོངས་སྐྱེ་བོ་ནི།། ཆོས་དབྱིངས་དེ་ནི་གར་མིན་ན།། གཙོ་བོ་ཇི་ལྟར་གར་བགྱིད་ལགས།། རྨོངས་པའི་འཇིག་རྟེན་རྒྱང་ཕན་གར།། གསང་མཐོན་མྱོས་པས་བསྐུལ་བ་ཡིན།། ཆོས་དབྱིངས་དེ་ནི་གླུ་མིན་ན།། གཙོ་བོ་ཇི་ལྟར་གླུ་ལེན་འགྱུར།། རྨོངས་པའི་འཇིག་རྟེན་རྒྱང་ཕན་གྲུ།། གསང་མཐོན་མྱོས་པས་བསྐུལ་བ་ལགས། ། ཆོས་དབྱིངས་དེ་ནི་རོལ་མོ་མིན།། གཙོ་བོ་ཇི་ལྟར་རོལ་མོར་འགྱུར།། འཇིག་རྟེན་རྒྱང་པན་རྨོངས་རོལ་མོ།། གསང་མཐོན་མྱོས་པས་བསྐུལ་བ་ལགས། ཆོས་དབྱིངས་དེ་དགོད་མ་ལགས་ན།། གཙོ་བོ་ཇི་ལྟར་རྒོད་པར་འགྱུར།། རྨོངས་པའི་འཇིག་རྟེན་རྒྱང་ཕན་རྒོད།། གསང་མཐོན་མྱོས་པས་བསྐུལ་བ་ལགས།། ཆོས་དབྱིངས་དེ་སྒེག་མ་ལགས་ན།། གཙོ་བོ་ཇི་ལྟར་སྒེག་པར་འགྱུར།། རྨོངས་པས་འཇིག་རྟེན་རྒྱང་ཕན་སྒེག། གསང་མཐོན་མྱོས་པས་བསྐུལ་བ་ལགས།། དེ་ལྟར་རྣམ་པ་མང་པོ་ལ།། གཞན་རྣམས་ཀྱང་ནི་སྦྱོར་བྱེད་ཅིང་།། བཟའ་དང་མིན་ལས་སྦྱོར་བ་ཡིས།། རྣལ་འབྱོར་པ་ནི་བདག་ཡིན་སྙམ།། རྡོ་རྗེ་ཡི་ནི་ཚིག་མཆོག་འདི།། ཡོད་མེད་རབ་ཏུ་ཞི་བ་ཉིད།། དེ་ཡི་རང་བཞིན་གཅིག་སྦྱོར་བ་དག། ཡང་དག་མཆོག་བསྡུས་དེ་ཉིད་མཆོག། དེ་ནས་དེ་ཉིད་ཡང་དག་བཟུང་།། རྣལ་འབྱོར་རིགས་མཆོག་རྣལ་འབྱོར་པ།། དེ་ཉིད་གསུམ་མཉམ་ཉིད་སྦྱོར་བ།། སངས་རྒྱས་ཀྱི་ནི་རོལ་མོ་སྟོན།། སྣ་ཚོགས་ཚུལ་གྱིས་རྣམ་དགོད་པས། ། ནོར་ཅན་མིང་ནི་ཉམས་ལ་སོགས།། གཅིག་པུའང་དཔག་མེད་དངོས་བཤད་པའི།། གར་གྱིས་སྐྱེ་དགུ་དགའ་བར་བྱེད།། རྫོགས་པའི་བྱང་ཆུབ་སོགས་དངོས་གྲུབ།། སྣ་ཚོགས་ཁྱེད་ཀྱིས་གསུངས་པ་རྣམས།། སེམས་ཞི་བ་ཡི་རྣལ་འབྱོར་པ།། དེ་རྣམས་ལྷུན་གྱིས་གྲུབ་པར་འགྱུར།། མགོན་པོ་ཤེས་རབ་འདི་སྲིད་དུ།། ཐབས་ཀྱིས་མཆིལ་པར་ཉེ་བར་སྦྱོར།། སྔགས་ཀྱི་གཟན་གྱི་སྦྱོར་བ་ཡིས།། ཁྱེད་ནི་འཇིག་རྟེན་པ་རྣམས་འཛིན།། ཤར་དུ་ཟིན་ཀྱང་མི་རིག་པ།། དགོངས་པའི་གསང་བ་དམ་པ་ནི།། གཞན་རྣམས་ལ་ནི་སྟོན་མཛད་པ།། ངོ་བོ་ཉིད་ནི་གཞན་མིན་པའོ། ། ཕྱི་རོལ་སྔགས་དོན་དངོས་གྲུབ་ནི།། དེ་ཉིད་དུ་ནི་ཚོལ་མོད་ཀྱི།། འགལ་བའི་རྗེས་འཇུག་ཆོས་ཉིད་ཅན།། དེར་ཡང་འགྲུབ་པར་འགྱུར་མ་ཡིན།། དེ་རྣམས་གསང་བ་མི་སྲུང་ཞིང་།། སྲེད་པ་ཡིས་ནི་སྟོན་པར་བྱེད།། བཅོམ་ལྡན་འདས་གསུང་གསང་བ་ནི།། གསང་མཆོག་ཚིག་གིས་སྒྲོགས་པར་བྱེད།། ཁྱོད་བཀའ་ལས་འདས་དམན་པ་རྣམས།། སྔགས་ཀྱི་ནུས་པ་རྣམ་སྤངས་པ། འཇིག་རྟེན་པ་རྣམས་སྡང་འགྱུར་ཞིང་།། དེ་རྣམས་འགྲུབ་པར་འགྱུར་མ་ཡིན།། སྲེད་པ་འམ་དད་པ་དག་གིས་ཀྱང་།། རྐྱེན་དང་དེ་བཞིན་ཉན་ཐོས་རྣམས།། གསང་བ་ལ་ནི་སྨིག་རྒྱུ་བཞིན།། རིགས་སྐྱེས་གཞན་ཡང་ལྟུང་བར་འགྱུར། ། མགོན་པོ་དེ་ནི་དེར་གནས་ཤིང་།། ཉམས་ཤིང་བློ་གྲོས་དམན་པར་གནས།། དེ་ནས་ཚིག་མིན་གྱུར་པར་འབྱུང་།། ཚིག་གི་བདུད་རྩི་སྦྱོར་བ་ལས། ། ཆོས་ཀྱི་ཚུལ་འདི་ཐོས་པ་དང་།། ཕྱི་ནས་འཇིགས་ཤིང་སྐྲག་པར་འགྱུར།། བྱང་ཆུབ་སེམས་དཔའ་ལྷུང་འགྱུར་བར།། བདག་ཉིད་ཆེ་དེ་བྱེད་པར་འགྱུར།། དེ་བཞིན་བྱང་ཆུབ་འགྱུར་བ་དང་།། སྔགས་པ་རྣམས་ཀྱང་གསང་བ་ལགས།། ཤེས་རབ་ཕ་རོལ་ཕྱིན་སྦྱོར་བ།། གསང་བ་མདོ་སྡེ་རྣམས་སྨྲ་བ།། གདོང་གཡོགས་པ་ཡི་སྦྱོར་བ་ཡིས།། དེ་ཚེ་ཆོག་གིས་རིག་སྐྱེས་པ།། གསང་སྔགས་ལ་སོགས་ཆོས་རྣམས་ལ། ། དད་པ་རྣམས་ནི་སྐྱེད་མི་བྱེད།། ལོག་པ་མཁས་པའི་ང་རྒྱལ་ནི།། བྱིས་པ་ཕྱི་ནས་བྱེད་པར་འགྱུར།། ཨ་ཡི་དོག་པའི་རས་འདི་ནི།། སྦྱོར་བ་ཤེས་རྣམས་ཀྱི་འདི་མ་ཡིན།། དེ་རྣམས་དད་པས་རྗེས་འཇུག་པ།། གཏམ་དག་ཡང་ནི་བྱེད་པར་འགྱུར།། སྒྲ་ནི་གཡོ་ཡི་ཚུལ་གྱིས་ན།། རྒྱལ་པོ་རྣམས་ནི་སླུ་བར་བྱེད།། སྟེང་དུ་གཡོགས་པ་དག་གིས་ནི།། བརྒྱད་གཉིས་པ་ལ་ཚུལ་དུ་བྱེད། ། དེ་ནི་མ་སྐྱེས་པ་ཡི་བདག། རས་ཀྱི་རྒྱུ་མེད་པ་ཉིད་ནི།། ཨཱ་ཡི་དོག་རས་ཉིད་རྒྱལ་པོའི།། ཡང་དག་དངོས་གྲུབ་བྱེད་པའི་མཆོག། དམ་པའི་སྐྱེ་བ་ཉིད་མཐོང་ན།། དེ་ནི་ལོངས་སྤྱོད་ལམ་སྐྱེད་མིན། ། དེ་བས་སྐྱེ་བོ་མེད་གཅིག་པུ།། བྱ་བའི་སེམས་ནི་རབ་ཏུ་འཇུག། དེར་ནི་མཆེ་བ་ཅན་མི་འགྲོ།། དེ་ལ་བརྩལ་བ་འབའ་ཞིག་ཡིན།། རྒྱལ་པོ་དངོས་གྲུབ་ཆེན་པོའི་རས།། བར་ཆད་ཤིན་ཏུ་མང་པོ་པ། ། བྱ་བ་དེ་ནི་རྣམ་པར་འཇོམས།། སྒྲིབ་པ་མེད་པའི་རྣལ་འབྱོར་ཅན།། དེ་ནི་ཚིག་དེ་ཐོས་པ་དང་།། རྒྱལ་པོའི་བར་དུ་ཡིད་དགའ་ཞིང་།། དངོས་གྲུབ་ཆེན་པོའི་རིགས་མཆོག་ལས།། སུ་ཞིག་བདག་ནི་ཟློག་པར་བྱེད།། རས་ཀྱི་བར་ཆད་བྱེད་པ་དག། དེ་ལ་ཆད་པས་གཅད་པར་བྱ།། འདི་ལ་འཇིགས་པའི་སེམས་བོར་ལ།། སྐྱེ་བོ་མེད་པར་ཁྱེད་ཀྱིས་ནི།། རྒྱལ་རིགས་དག་གམ་རིགས་བཟང་ངམ། ། ངག་ཞིག་མི་བསྲུན་རིགས་ཅན་རྣམས།། དོག་པ་མེད་པ་རས་འཇིག་པ།། དེ་དག་ཐམས་ཅད་བརླག་པར་བྱ།། དེ་ནས་རྒྱལ་པོ་སྦྱིན་པ་ནི།། རྒྱུད་ཀྱི་སློབ་དཔོན་བདག་ཉིད་ཆེ།། རིན་ཆེན་རིན་ཐང་མེད་ལྔ་སོགས། ། བདེ་བ་ཀུན་གྱི་འབྲས་བུའོ།། འདི་ཡིས་གདོང་ནི་གཡོགས་ནས་སུ།། རྒྱལ་པོ་འབྲས་བུ་ལོངས་སྤྱོད་ཅིག། ཨཱ་ཡི་དོག་པ་རས་དེ་བྱིན།། ཇི་ལྟར་སྐྱེ་བཞིན་རྒྱལ་པོ་བྱས་རིན་ཆེན་རིན་ཐང་མེད་བླངས་རྣམས། ། འདི་ནི་ཇི་ལྟར་བཞག་ནས་སུ།། དེ་ནས་དེ་ནི་མི་སྣང་བ།། རྒྱུ་མ་ཅན་དེས་ནི་དེ་ཚེ་བྱས།། དེ་ལ་སོགས་པའི་སྣ་ཚོགས་ཚིག། རིགས་སྐྱེས་པ་ལ་དེ་རྣམས་སྨྲ།། རང་ཉིད་འཇིགས་ཤིང་གཞན་རྣམས་ཀྱང་།། སྐྲག་པར་བྱེད་ཅིང་ཐེ་ཙོམ་མེད།། དེ་ནས་དེ་བཞིན་གཤེགས་བདག་པོ།། འབྱིན་པ་སྟོན་པ་མངའ་བདག་གཙོ།། ཕྱག་ན་རྡོ་རྗེ་གོ་བྱེད་པ།། སྙན་པའི་གསུང་གིས་བཀའ་སྩལ་པ། ། རྡོ་རྗེ་རྡོ་རྗེ་ཆེན་པོ་ལེགས།། རྡོ་རྗེ་ཐལ་མོ་བསྟན་བྱས་ཏེ།། རྡོ་རྗེ་འདི་ནི་ཞུས་གྱུར་པ།། དེ་ཉིད་བསྡུས་པ་དམ་པའོ།། རྡོ་རྗེ་ཐལ་མོ་དེ་ཉིད་འདི།། ལུང་བསྟན་བྱ་ཡིས་དེ་ཉོན་ཅིག་དེ་ཉིད་གསུམ་དུ་གྱུར་པ་ནི། ། རྡོ་རྗེ་ཐལ་མོར་ཡོངས་སུ་བརྟག། དེ་ཉིད་གསུམ་ནི་ལྔ་གསུམ་སྟེ།། ཚངས་དང་ཁྱབ་འཇུག་དབང་ཕྱུག་ཆེ།། དེ་རུ་ང་ནི་ལྷ་གསུམ་འགྱུར།། ཨོཾ་ཨཱཿ། ཧཱུཾ་དང་གྲངས་མཉམ་པའི།། གསང་སྔགས་འཇུག་པ་ཐམས་ཅད་ནི།། སྣ་ཚོགས་ལུས་ཅན་གཅིག་མིང་ཅན།། ཞི་བ་ཉིད་ནི་གང་དུ་སྟོན།། དེར་ནི་ང་ཡང་གནས་པ་ཡིན།། དཔྲལ་ཡོན་དེ་ལ་བཞིན་མི་སྡུག། དེ་ཡི་སྐྱེས་བུ་མིང་ལྡན་མིང་།། དེ་རྣམས་ལག་པའི་དབུས་ནས་ནི།། མཐེབ་སོགས་ཇི་བཞིན་གྲངས་སུ་བཤད།། ལག་པ་གཡོན་ནི་དྲག་པོར་འགྱུར།། གཡས་པ་དེ་བཞིན་ཁྱབ་འཇུག་སྟེ།། གཉིས་པོ་སྦྱོར་བ་ཚངས་པ་ཡིན།། དེ་བས་ཡོན་ཏན་གསུམ་བདག་དང་།། རིག་དང་མཆོད་སྦྱིན་སྙན་ཚིག་སྟེ།། རིག་བྱེད་དེར་གྱུར་གསུམ་དུ་བཤད།། སྲིད་བསྲུངས་ཞི་བ་ང་ཡིན་ཏེ།། མཐར་ནི་འགྲོ་བ་གནས་པ་ཡིན། ། ལག་པ་གཉིས་པ་འདི་དག་ནི།། བཞི་པའི་ཕྱེད་ཕྱེད་རྣམ་བརྒྱད་པ།། བྱེང་པོའི་ཚམ་གྱི་ཧཾ་མཆོག་ནི།། རབ་ཏུ་ཞི་བར་རབ་ཏུ་བསྒྲགས།། ཉི་མ་ཟླ་བ་མི་རྣམས་དེར།། སོ་སོར་ཡོངས་སུ་བསྒྲག་པ་ཡིན། ། ཡི་གེ་ཕྱེད་ཙམ་མཆོག་གྱུར་དང་།། ཤིས་པ་ཞི་བ་སྐྱོན་མེད་པ།། ཡོན་ཏན་ཨོཾ་དང་ཡི་གེ་ཕྱེད།། ཨོཾ་ཞེས་གསལ་བར་བརྗོད་པ་ཡིན།། སྣ་ཡི་རྩེ་མོར་ཡང་དག་ལྡན།། གཙུག་མཐའ་དང་ནི་ལག་པར་གནས། ། ཉི་མ་ཟླ་བའི་སྦྱོར་བ་ལས།། ཡེ་ཤེས་མེ་ནི་ངེས་པར་སྐྱེ།། ལྕེ་དང་རྐན་གྱི་མཚན་མ་ནི།། སྦྱོར་ལས་ཐར་པར་དེ་བཤད་དེ།། ཨཱ་འོག་ཏུ་ཨ་དང་ཡང་དག་ལྡན།། དེ་སྟེང་ཡི་གེ་ཨཱ་ཉིད་དེ།། ཐང་ཀ་རུ་ནི་མ་བཤད་དེ། ། ཁྱོད་ནི་ཡིག་ཕྱེད་ཞི་བ་ཉིད།། ཡི་གེ་ཨོཾ་ནི་ཚངས་པ་སྟེ།། ཨཱ་ནི་ཁྱབ་འཇུག་ཡིན་པར་བཤད།། ཧཱུཾ་ནི་རླུང་དུ་གྱུར་པ་ཡིན།། དེ་ཉིད་དྲག་པོ་ཞེས་བྱའོ།། ཞི་བའི་ཕྱེད་ཕྱེད་ཅེས་བྱ་བ། དེར་ནི་བདག་ཡོངས་བསྒྲུབས་པ་ཡིན།། གནས་དཔ་འཕོ་དང་སྐྱེ་བ་དང་།། གཞན་གྱི་ལུས་ལས་ཡང་དག་འཕོ།། ཡེ་ཤེས་རང་ཉིད་མེ་ཡིན་ཏེ།། ཁྱབ་པར་འཛིན་པ་དེ་བཞིན་ནོ།། རལ་གྲི་ལ་སོགས་དངོས་གྲུབ་དེར་བྱང་ཆུབ་ཕྱི་རོལ་ཉིད་འགྲུབ་འགྱུར། ། གཉིས་པོ་འདི་དག་གནས་པ་ཡི།། རྣམ་དག་འདི་དག་རབ་ཏུ་བརྟག། ཚངས་པ་ལ་སོགས་པ་རྣམས་དེར།། མ་འོངས་པ་རྣམས་སྒོམ་པར་འགྱུར།། དེ་ནི་མཐོ་རིས་སོགས་འགག་པས། ། དེ་བཞིན་འབྱུང་བ་སེལ་བ་ཡིན།། རྣལ་འབྱོར་པ་རྣམས་སྲོག་སྤངས་ནས།། གཉིས་སྤྱད་པར་ནི་རྣམ་པར་གནས།། ཤིན་ཏུ་སྦྱོར་གཅིག་གྱུར་སོང་བས།། འཇུག་འགྱུར་བ་ནི་དྲག་པོ་ཡིན།། ནམ་དགག་པ་ཡི་སྦྱོར་བ་ཡང་། ། ཚངས་པར་གཞོལ་བའི་བདག་ཉིད་ཅན།། མངལ་གྱི་གཟུགས་གྱུར་ཁྱབ་འཇུག་སྟེ།། དེ་ཡི་དབུས་ན་དབུས་བཟུང་བ།། སྤུ་ཡི་ཆ་ནི་སྟོང་ལས་གཅིག། ཞི་དེ་རྣམ་པར་མི་རྟོག་ཉིད།། ཐར་པ་གཅིག་པར་དེ་སྟོན་བྱ།། ཐར་པའི་ངོ་བོ་ཉིད་མ་ཡིན།། དེ་ལྟ་བས་ན་འདི་ལོག་པ།། ཞི་བ་ཉིད་ནི་སྒྲོགས་པའོ།། སྟོན་པ་དེ་རྣམས་ཕྱེ་ནས་ནི།། ཞི་བའི་ཆོས་རྣམས་སྨྲ་བར་འགྱུར།། ཐབས་ཆེན་དེ་བཞིན་ཤེས་རབ་དག། འདི་འདྲ་མཐོང་བར་མི་འགྱུར་རོ།། ཚངས་ལ་སོགས་པའི་ལྷ་རྣམས་ཀུན།། ཁྱེད་ཀྱི་ཐལ་མོ་དག་ལ་གནས།། དེ་རྣམས་ཕྱག་རྒྱ་སྟོན་བྱེད་ཅིང་།། སྔག་ནི་བྱེ་བ་མཐའ་ཡས་པ།། འདི་ཉིད་དུ་ནི་ཉི་ཟླ་དང་། ། སྦྱིན་སྲེག་ལས་ཅན་མེ་དང་ནི།། ལོ་དང་ཟླ་བའི་སྦྱོར་བ་དང་།། རྟག་ཏུ་འཆར་དང་འཕེལ་འགྲིབ་དང་།། དེ་ཉིད་གསུམ་གྱི་སྦྱོར་སྐྱེས་འདི།། དེ་ཉིད་གཅིག་པུ་རྣམ་པར་གནས། ། ཞི་བ་ཉིད་ཀྱི་སྦྱོར་ཆོས་ལ།། དེ་ཡང་གཅིག་དང་དུ་མ་སྤངས།། ཁྱེད་ཀྱི་ཐལ་མོ་ལས་བྱུང་བ།། དེ་བས་དེ་ནི་འདའ་མི་བྱ།། དེ་བཞིན་གཤེགས་ཀུན་སྤངས་འགྱུར་བས།། དེ་ནི་སྤོང་བར་མི་བྱ་ཞིང་།། འདི་དག་དངོས་མེད་ལ་ལྟོས་པས།། རྣལ་འབྱོར་པ་ནི་མཆོག་ཏུ་འདོད།། གཞན་དུ་རྣམ་རྟོག་ཉིད་ལས་ནི།། དངོས་གྲུབ་འབྲས་བུའི་སྣོད་མི་འགྱུར།། དེ་བས་ཐལ་མོ་སྦྱོར་བ་འདི།། སེམས་ཅན་རྗེས་བཟུང་དམ་པ་ཡིན། ། མ་བསྡུས་པ་ཡི་སེམས་ཅན་རྣམས།། བསྡུ་བའི་དོན་དུ་ཁྱོད་ཀྱིས་བྱ།། སྨད་བྱ་འོན་པ་ལྐུགས་པ་དང་།། དེ་བཞིན་ལོང་བར་གྱུར་པ་དང་།། གང་ཞིག་འཕྱེ་བོ་ལ་སོགས་གྱུར།། དེ་རྣམས་ལ་ནི་ཕན་ཕྱིར་བྱ། ། དེ་ལ་སོགས་པ་མདོར་བསྡུས་པ།། དེ་ནི་ཁྱེད་ཀྱི་ཐལ་མོར་གནས།། དེ་ནི་འཇིག་རྟེན་འདས་གཙོར་གྱུར།། དེ་ཉིད་བསྡུས་པའི་རྒྱུན་ཅན་ནོ།། དེ་ནི་ནང་མིན་ཕྱི་མ་ཡིན།། གཉིས་མིན་གཞན་གྱི་རྒྱུ་ལས་མིན། ། ཕྱག་རྒྱ་ཚོགས་པ་ལས་སྐྱེས་མིན།། འཇིག་རྟེན་རྐྱེན་ལས་བྱུང་བ་མིན།། རྡོ་རྗེ་ཐལ་མོ་བསྡམས་པས་ན།། མིང་ནི་རྡོ་རྗེ་ཐལ་མོ་གྱུར།། སེམས་ཅན་རྣམས་ཀྱིས་རྟོགས་དགའ་བའི།། སྙིང་པོ་བརྟག་པར་བྱ་བའི་མཆོག། ཕྱག་རྒྱ་འདི་ལྟ་བུ་འདི་ཡིན།། ཕྱི་ནང་གཉིས་ཀྱིས་མིང་ཅན་ནོ།། མི་བསྐྱོད་རིན་ཆེན་དཔག་མེད་དེ།། དངོས་གྲུབ་རྣམ་སྣང་དེ་བཞིན་གཤེགས།། འདི་དག་ལག་པ་གཡས་པ་ཡི།། མཐེའུ་ཆུང་ལ་སོགས་རྣམས་ལ་གནས། ། གཉིས་པོས་གཅིག་གྱུར་དགེ་འདུན་ཏེ།། དེ་ནི་སྐྱབས་ནི་གསུམ་ཡིན་ཏེ།། སངས་རྒྱས་ཆོས་དང་དགེ་འདུན་རྣམས།། གཅིག་དང་གསུམ་དུ་བརྟགས་པ་ཡིན།། ཕན་ཚུན་བཅིངས་པའི་རྡོ་རྗེ་ཉིད། ། ཤེས་རབ་ཐབས་ཀྱི་གནས་མཆོག་ཡིན།། ཐལ་མོ་བཅིངས་པ་ཙམ་གྱིས་ཀྱང་།། སངས་རྒྱས་ཐམས་ཅད་ཉིད་ཐོབ་འགྱུར།། སྐྱབས་མཆོག་གསུམ་དང་དེ་ཉིད་གསུམ།། རྡོ་རྗེ་གསུམ་དང་རྣམ་ཐར་གསུམ། ། ཞལ་གསུམ་མདོག་གསུམ་སྤྱན་གསུམ་དང་།། ལྷ་གསུམ་དང་ནི་ཁམས་གསུམ་དང་།། དུས་གསུམ་དམ་ཚིག་མཆོག་གྱུར་གསུམ།། ཚུལ་གསུམ་དཀྱིལ་འཁོར་གསུམ་དུ་འགྱུར།། སྦྱོར་བ་གསུམ་དང་ལམ་གསུམ་སྟེ། ། ཇི་སྲིད་རྟོགས་པས་བརྗོད་པ་རྣམས།། དེ་ནི་ཐལ་མོ་སྦྱོར་འདི་ཡིན།། འདོད་ནོར་ཡོན་ཏན་གསུམ་གྱི་མཆོག། རིམ་དང་བསླབ་པ་སྟེར་བ་དག། མ་འོངས་སྐྱེ་བོས་འཐོབ་པར་འགྱུར།། དེ་ཉིད་དུ་ནི་དེར་འགྱུར་ན། ། གཅིག་དང་དུ་མར་རྣམ་པར་སྤངས།། ཆོས་བཤད་བཤད་པ་དངོས་མེད་པ།། འགྲོ་བ་རྐྱེན་གྱིས་ཡང་དག་སྡུད།། འདི་ནི་མཁའ་ལྟར་རང་བཞིན་གཅིག། གནས་མེད་གནས་པ་ཞེས་བྱ་བ། ། བསྡུ་བ་བྱས་པར་གྱུར་པས་ཀྱང་།། སྐུ་གསུམ་དོན་གྱི་ཆོས་ཉིད་དོ།། འདི་ནི་ཐོག་མཐའ་མེད་སྟེ།། དངོས་པོ་མེད་ཅིང་གནས་མེད་པ།། མཐའ་མེད་ཟད་པ་མེད་པར་འབྱུང་།། སྐུ་གསུང་ཐུགས་ཀྱི་རྐྱེན་ལས་ནི། ། རྣམ་པའི་འཇུག་པའི་ཡེ་ཤེས་ཏེ།། དེ་ལས་སངས་རྒྱས་སྙིང་པོར་གྱུར།། ཧཱུཾ་གིས་སེམས་ཅན་ཡང་དག་འབྱིན།། སངས་རྒྱས་སྐུར་ནི་རབ་ཏུ་བརྟག། ཨོཾ་ནི་ཐམས་ཅད་སྡུད་པ་སྟེ། ། ཨཱ་ནི་གནས་པ་པར་འགྱུར་རོ།། གཅིག་པུ་རྣམ་གསུམ་དེ་བཞིན་ལྔ།། གསལ་དང་མི་གསལ་སྦྱོར་བ་ནི།། རྟེན་འབྲེལ་ཆོས་ཉིད་འདི་ཡིན་ཏེ།། དེ་ཉིད་ཀྱི་ནི་སྔགས་བཤད་པའོ། ། ཟློས་ན་བསམ་གཏན་རྣམ་བྲལ་བར།། དེ་ཡི་ལྷུན་གྲུབ་འབྲས་བུ་སྟེར།། རང་བཞིན་གྲུབ་པ་འདི་ཡིན་ཏེ།། འདོད་པའི་བཟླས་པར་དེ་བཤད་དོ།། རྣལ་འབྱོར་པ་ལ་དེ་གསལ་ཏེ།། བྱིས་རྣམས་དེ་ལ་ཕྱིན་ཅི་ལོག། རྐྱེན་ལས་བྱུང་བ་དེ་ཉིད་གསུམ།། དངོས་པོ་མེད་པར་དེ་བཤད་དོ།། དེ་ཉིད་བསྡུས་པ་བཤད་པ་ནི།། ཡིད་མིན་པ་ཡི་བཟླས་པར་འགྱུར།། ཡིད་སྟོན་གཅིག་ནི་མདོར་བསྡུས་ལས། ། རིངས་དང་དལ་དང་གནས་པ་རྣམས།། ཞི་བའི་ཆོས་ཉིད་ལ་སྐྱེ་སྟེ།། ནམ་མཁའི་དབྱིངས་དང་མཉམ་པར་ཐིམ།། དངོས་པོ་མེད་པའི་དེ་ཉིད་འདི།། རྟེན་འབྱུང་ཆོས་ཞེས་བྱ་བ་ཡིན།། ལོངས་སྤྱོད་རྫོགས་པའི་བསྡུས་ཏེ་གྱུར།། སྤྲུལ་པ་བསམ་མི་ཁྱབ་ཅེས་དབེན།། སྡུད་པ་པོར་ནི་གང་གྱུར་པ།། དེ་ཡང་ཕུལ་དུ་གྱུར་པའི་མིང་།། རྡོ་རྗེ་ལ་སོགས་ཡང་དག་སྦྱར།། སེམས་ཅན་རྣམས་ནི་དེ་སྦྱོར་བྱེད། ། དམ་ཚིག་ལ་སོགས་སྔོན་དེ་ནི།། དེ་ཉིད་ཀྱི་ནི་རྡོ་རྗེར་སྦྱར།། སེམས་ཅན་དགོངས་པའི་སྦྱོར་བ་ཡིས།། དེ་ཡི་ཆོས་རྣམས་སྟོན་པར་བྱེད།། རྣམ་པ་དགུ་པོ་ཐོག་མཐའ་ཅན།། སྡུད་པ་པོ་རྣམས་བྱས་པ་ཡིན། ། གསང་སྔགས་དེ་ཉིད་གནས་དགོད་པས།། སེམས་ཅན་རྣམས་ནི་དེར་འཇོག་སྟེ།། གསོལ་བ་འདེབས་དང་ཕྱག་འཚལ་དང་།། འཇིག་རྟེན་རྣམས་ལ་གསོལ་བ་དང་།། རྫོགས་སངས་རྒྱས་རྣམས་མཉེས་བྱེད་དེ། ། ཁྱོད་ཀྱི་ཐལ་མོར་གནས་པ་ཡིན།། གང་ཞིག་སེམས་ཅན་སངས་རྒྱས་གྱུར།། དེ་བཞིན་གཉིས་མེད་ཆོས་ཉིད་ཅན།། གནས་མེད་གནས་པའི་སྦྱོར་བ་ཡིས།། ཐམས་ཅད་སངས་རྒྱས་རྣམས་གནས་སོ། ། སྣ་ཚོགས་མཚོན་པ་དེ་ཉིད་དོ།། མཐོང་བ་གསལ་བྱེད་ཐལ་མོ་ཡིན།། དེ་བས་དེ་རྣམས་མགུ་གྱུར་པ།། ཆོས་ཀྱི་དེ་ཉིད་རྐྱེན་ལས་སོ།། རྒྱུ་མེད་རང་གི་དེ་ཉིད་འདི།། ཁྱེད་ཀྱི་ཕྱག་རྒྱའི་སྦྱོར་ལས་བྱུང་། ། གང་ཞིག་ཤེས་པས་འདོད་འགྲུབ་པའི།། དངོས་གྲུབ་དེས་ནི་འཐོབ་པར་འགྱུར།། ཨཱ་ཉིད་དེར་ནི་མི་གསལ་བའི།། རྒྱུ་ལས་སྦྱོར་བར་གྱུར་པ་ཡིན།། དོག་པར་དེ་ནི་ཡོད་བཤད་དེ། ། དངོས་པོ་མེད་པར་རས་ཀྱི་མིང་།། འཕགས་པ་གཤིན་རྗེ་གཤེད་བསྒོམས་ལ།། གཞོན་ནུའི་གཟུགས་སུའང་བསྒོམ་པར་བྱ།། དོག་པ་དེ་ཡི་རས་དོན་ལས།། མི་སྣང་བ་ལ་སོགས་གྲུབ་ཅིང་།། ཡིད་བཞིན་ནོར་བུ་འདྲ་བའི་མཆོག། འགྲོ་བའི་དོན་གཅིག་ཡང་དག་བྱུང་།། ཨཱ་ཡི་དོག་རས་མཚོན་པས་ནི།། འཇིག་རྟེན་པ་ལ་དགོངས་པས་བཤད།། འདི་ནི་ཆོས་དང་རྫོགས་ལོངས་སྤྱོད།། སྤྲུལ་པས་དེ་ནི་གསུམ་དུ་འགྱུར།། བྱིས་པ་རྟོགས་པར་བྱ་བའི་ཕྱིར།། དེ་ནི་རྣམ་པ་ལྔར་ཡང་འགྱུར།། ཐ་མལ་བྱིས་པའི་ཆོས་རྣམས་གང་།། རྣམ་ལྔ་གཅིག་པའི་རྣལ་འབྱོར་པ།། དེ་ཡང་ཤིན་ཏུ་ལྡན་སེམས་ཅན། ། སེམས་ཅན་སོགས་ལ་རྣམ་པར་གནས།། རྟག་པ་ལྟར་ནི་སོ་སོར་སྣང་།། འགྲོ་བ་དུས་གསུམ་མཚན་ཉིད་གཅིག། སྐྱེ་བ་མེད་ལས་སྐྱེས་པས་ན།། གཅིག་དང་དུ་མ་རྣམ་སྤངས་པའོ།། ཤེས་འདོད་དེ་ཚེ་སྔགས་པ་ནི།། འགྲོ་བ་བྱིས་པ་དེ་ཚེ་སྤྱོད།། དེ་ནས་གསང་སྔགས་གྲུབ་འགྱུར་བ།། རྣམ་པར་མི་རྟོག་ཅིག་ཤོས་ཉིད།། ཡ་ཡི་སྡེ་སོགས་གནས་བྱས་ཏེ།། སྔགས་ནི་ན་རི་བྲི་བར་བྱ།། རང་གི་སྡེ་བཅས་གནས་དག་ནི།། ཡི་གེ་ཨ་བཞིན་སྔོན་འགྲོ་བ།། སོ་སོ་གཞན་པའི་བཞི་པ་ནི།། ཨི་ཨུ་དང་ནི་རིང་པོར་བཅས།། ཨ་ཨཻ་ཨཽ་ཨུ་ཡ་སྟེ་མཐའ།། བཞི་པོ་དང་བཅས་ཟླུམ་པོར་བྲི། ། བསམ་གྱིས་མི་ཁྱབ་སྦྱོར་ལྡན་པའི།། འགྲོ་བ་མཉམ་གཞག་བསྐྱེད་པ་ཡིན།། འདི་དག་རང་སྐྱེས་གནས་གཟུགས་ཀྱི།། ཆུ་ཡི་ཡི་གེར་ཞུགས་པར་འགྱུར།། དེ་ནས་གཞོན་ནུའི་གཟུགས་ཉིད་ཀྱང་། ། རྣམ་པར་བསྒོམས་པས་སྐྱེ་བར་འགྱུར།། ཆ་བཅས་དབང་གནས་སྔགས་པ་ནི།། བླ་མེད་དངོས་གྲུབ་འཐོབ་པར་འགྱུར།། ར་ག་ཡི་ནི་གྲངས་བཞིན་དུ།། སྐུད་སོགས་སྦྱོར་ལ་གང་གནས་པ། ། ཉི་ཤུ་ཡི་ནི་སྔོན་མ་ཡང་།། དེ་ནི་རས་ཏེ་བཞི་པའང་ཡིན།། སྔོན་མེད་ཆ་ལུགས་གཟུགས་ཀྱིས་ནི།། ཁམས་གསུམ་དག་ནི་ལྟ་བར་འདོད།། འགྲོ་བའི་དོན་ནི་བྱེད་གྱུར་པའང་།། མཉམ་ཉིད་ཡེ་ཤེས་དེ་ཉིད་ལས། ། ཡོན་ཏན་གསུམ་ནི་བརྡར་བྱས་པ།། ཡོན་ཏན་མེད་པའི་ཡོན་ཏན་མིང་།། གཞོན་ནུའི་སྤྱོད་པའི་ལུས་ཀྱི་མིང་།། ལྟ་བ་འདི་ནི་བར་སྐྱེས།། དེ་ནི་སྒོ་གླེགས་མཐའི་ཡིན་ཏེ།། ཨེ་ཨུ་དང་ནི་རིང་པོར་བཅས།། ཡི་གེ་གསུམ་བཅས་ཐིག་ལེར་ལྡན།། ཚེག་དྲག་མཐའ་ཡི་རིང་སྡེ་ཅན།། ཡི་གེ་ཨ་ནི་ཡིག་སྦྱོར་བའང་།། བཅུ་གཅིག་པར་ཡང་གྱུར་པ་ཡིན།། དེ་ཉིད་རིང་པོ་རིང་པོའི་མཐས།། བཅུ་གཉིས་པ་ཡི་གྲངས་སུ་འགྱུར།། དེ་ཉིད་ཡི་གེ་ཨུར་སྦྱོར་ལས།། ཡི་གེ་ཨཽ་ཞེས་བརྗོད་པ་ཡིན།། སྔ་མའི་རི་མོའི་སྦྱོར་བ་ཡིས།། མིང་ནི་བཅུ་བཞི་པར་འགྱུར་རོ།། ཅི་སྟེ་ཨ་ལས་སྔགས་པས་ནི།། ཨཱཿཉིད་དུ་ནི་བལྟ་བར་བྱ།། དེ་བཞིན་ཨཱ་ཡི་སྦྱོར་བ་ལས།། ཡི་གེ་ཨ་ནི་ཅི་འདོད་པར།། ཇི་བཞིན་གྲངས་ཀྱིས་ཡང་དག་བལྟ།། རེ་རེའང་ཨ་ཡི་སྦྱོར་བས་བསྒོ།། ཨི་རི་ལི་ཨུའི་ཚོགས་ལས་ཀྱང་།། སྔགས་པ་ཡ་ར་ལ་ཝའི་གཟུགས།། ལྐོག་མ་མཁའ་དང་བར་དང་ནི།། རྐན་དང་སྤྱི་བོར་གང་གནས་པ།། གང་ཚེ་ཨ་ཀའི་སྡེ་གྲངས་ལས།། ཨ་ཡི་ཁ་ཡི་རྒྱབ་ན་གནས།། ཨི་ཚན་ཕྲག་པ་ལག་པ་དང་། ། ཚིགས་རྣམས་ལ་ནི་དེ་བཞིན་ནོ།། དཔུང་པ་དང་ནི་ལག་པ་དང་།། ལག་པ་གཡོན་པར་རབ་ཏུ་བརྟག། དཔྱི་དང་བཪྻ་དང་བྱིན་པ་དང་།། རྐང་པ་གཡས་གཡོན་དེ་བཞིན་ནོ།། གཟུགས་དེ་ཡི། ནི་གྲངས་མཉམ་པས།། ཏ་ཚན་ཤིན་ཏུ་དངོས་གྲུབ་སྟེར།། ཨུ་ཚན་དེ་བཞིན་དབུས་དང་ནི།། ལག་པ་རུ་ནི་ཡོངས་སུ་བཤད།། རྐང་པ་ཡང་ནི་རི་ཏིའི་ཚན།། འདས་པའི་ཚུལ་དུ་བཞུགས་པ་ཡིན།། དེ་བཞིན་ཉིད་ཀྱི་སྦྱོར་ལྡན་པའི།། སྔགས་པ་རྣམས་ཀྱིས་ཤིན་ཏུ་མཐོང་།། ལྷུན་གྱིས་གྲུབ་པས་དངོས་གྲུབ་པ།། མེ་ཏོག་གིས་མཛེས་འཕྲེང་བ་བཞིན།། རང་རྒྱུད་ཀྱི་ནི་ནང་ཉིད་དུ།། ལྷ་མཆོག་དག་ནི་བྱ་བ་ཡིན། ། དགོངས་པ་ལ་སོགས་རྣམ་པ་ཀུན།། དེ་ཉིད་ལས་ནི་བདག་འགྲུབ་འགྱུར།། ཚ་བའི་བཞི་བཞི་སྔ་སྦྱོར་བས།། མཁས་པ་ཡི་ནི་སྒོ་རྣམས་བྱ།། ཀ་ཙ་ཊ་ཏ་པ་ཚན་ཡང་།། དབུས་དང་ཤར་ལ་སོགས་སྔོན་འགྲོ། ། འགྲོ་ལ་ཕན་པའི་འདོད་པ་ཡང་།། མ་སྤེལ་བར་ནི་མཐོང་བ་ཡིན།། ཐམས་ཅད་ཀྱང་ནི་རྫོགས་ཡི་གེ། ཡི་གེ་ཧཱུ་ཡིས་མཆོད་པར་བྱ།། སྣ་ཚོགས་པ་ནི་འབྱིན་བྱེད་ཅིང་།། འགྲོ་བ་དུས་གསུམ་གཅིག་པའི་དངོས།། ཡི་གེ་ཨ་ནི་ལུས་སུ་བྱ།། ལྷག་མ་རྣམ་པ་དང་བཅས་པ།། མཚམས་མེད་ལྔ་ཡི་སྦྱོར་བ་ལས།། སྔགས་པ་འགྲོ་བ་ཕན་པར་སྟོན།། ཤ་ཐོག་མཐར་གནས་སྔགས་ལས་སྐྱེས། ། དབང་བསྐུར་གསུམ་པོ་སྤྱི་ལས་སྐྱེ།། གཟུགས་མེད་རྟོགས་པའི་ཆོས་རྣམས་ནི།། སྐད་ཅིག་གཅིག་གིས་ངེས་སྦྱོར་གྱུར།། དེ་ཚེ་དཀྱིལ་འཁོར་མེད་བྱས་པ།། འཇིག་རྟེན་པ་རྣམས་ཆོས་དགར་འགྱུར།། ཨ་ཀུ་ཧ་གནས་བྱང་ཕྱོགས་གནས།། ཡོད་པ་ཉིད་ཀྱང་དུས་གསུམ་འདས།། གང་དང་གང་ནས་བྱུང་བ་ཡི།། གསང་སྔགས་བསམ་པས་མི་ཁྱབ་གསུངས།། དེ་དང་དེ་ནི་བཞུགས་གྱུར་པ།། རང་གི་མཚན་མ་ཅིག་ཤོས་ཉིད། ། གཟུགས་མེད་འདི་ལ་གནས་ཡོད་པ།། ཆ་ནི་གསུམ་ཞེས་བྱ་བར་འགྱུར།། སྟེང་འོག་ཕྱོགས་ཀྱི་ཆ་རྣམས་སུ།། དངོས་མེད་པ་ནི་རྣམ་པར་གནས།། དངོས་པོ་གཅིག་གྱུར་མཐོང་བ་དང་།། འགྲོ་བཅས་ཚངས་པ་འགྲོ་བདག་ཉིད། ། ཚངས་པའི་གནས་པ་བཞི་པོ་ལས།། སྨོན་ལམ་ལ་སོགས་བསྒོམ་བྱ་བའོ།། འགྲོ་བ་དོན་གཏོགས་འདོད་པའི་ཡོན་ཏན་གྱུར་རྣམས་ལ།། དགྱེས་པའི་བདེ་མཆོག་དགའ་བའི་འདོད་པ་མཛོད། ། སྔོན་ཆད་མཛད་པའི་སྨོན་ལམ་རབ་མཆོག་དགོངས་ནས་ནི།། ཐུབ་པ་རྡོ་རྗེའི་ཚིག་མཆོག་རྣམ་པར་དབྱེ་བར་གསོལ།། ནོར་བུ་རིན་ཆེན་དག་གིས་རྣམ་བརྒྱན་སྐུ་ཡི་མཆོག། འགྲོ་བའི་དོན་བྱེད་སྲིང་མོ་བདག་ལ་བརྟེན་པར་མཛད། ། ལྷག་པའི་སྙིང་རྗེ་ལས་བྱུང་རབ་མཆོག་ལྡན་པའི་སྐུ།། བདག་ནི་ཡོངས་སུ་བཟུང་ལ་ཆོས་རྣམས་དོན་ཡོད་མཛོད།། སྲིང་མོས་ཀྱང་ནི་ཁྱད་པར་དུ།། དེ་ལྟར་བསྐུལ་བ་ཙམ་གྱིས་ནི།། དེ་ནས་ཡོངས་སུ་འཛིན་མཛད་དེ།། རིག་པའི་པདྨ་དཔལ་དུ་མཛད།། ཤིན་ཏུ་སྙན་ཅིང་ཡིད་འོང་དབྱངས་ཀྱིས་ནི།། ཕན་པས་མྱུར་དུ་འགྲོ་བ་གཉིས་མེད་འདིར་སྣོད་གྱུར།། བླ་མ་བདག་ནི་གལ་ཏེ་གསོན་པར་མཆིས་བཞེད་ན། ། དགའ་བ་ལས་བྱུང་ཆོས་དགའ་བ་དག་ལ་དགྱེས་པར་མཛོད།། འགྲོ་བ་དང་ནི་འོང་དང་གནས་པ་ཙམ་འདི་ནི།། ནམ་ཡང་ལྷོད་པར་གྱུར་པ་དག་གི་མངའ་བ་ལགས།། ཀུན་ཏུ་སོང་བའི་བདག་ཉིད་ཅན་གྱི་དམ་ཚིག་སྟོན། ། འདོད་པའི་ཡོན་ཏན་རྣམས་དང་ཁྱེད་བདག་འདོད་པ་མཛོད།། དགོངས་པའི་ཡེ་ཤེས་རྡོ་རྗེ་ཡིས།། སངས་རྒྱས་ཡོན་ཏན་གཅིག་ལ་བཞུགས།། བཟླས་བརྗོད་སྦྱིན་སྲེག་དེ་བཞིན་འཁྲུས། ། དཀྱིལ་འཁོར་ཡོངས་སུ་བརྟགས་པ་མཛད།། འདོད་པ་མེད་ཅིང་ཆགས་ལ་ཞི།། དེ་ཡང་དོན་དམ་དག་གྱུར་ཡིན།། སྤྱོད་དུས་དེ་བཞིན་སྔགས་པ་ནི།། བཟླས་བརྗོད་དངོས་པོ་མེད་པ་ཡིན།། བསྙེངས་པ་ཡང་ནི་ཡིད་བཟང་ལྡན།། མདའ་དང་རིག་བྱེད་ཡོན་ཏན་དང་།། ཕུང་དང་ཟླ་དཀྱིལ་རྣལ་འབྱོར་པ།། དབྱངས་ཀྱི་ཡི་གེ་གཞག་པར་བྱ།། ཧ་ཡི་སྡེ་ཚན་ཀ་སྡེ་དང་།། བཅུ་གཉིས་ཕྱེད་ཕྱེད་དག་ཏུ་སྦྱར། ། གཤིན་རྗེ་གཤེད་ཀྱི་གཟུགས་འདི་ནི།། ཉི་མའི་དཀྱིལ་འཁོར་དག་ལ་དགོད།། དེ་ནས་སྔགས་པ་མདུན་འདུག་སྟེ།། དགོངས་པའི་དོན་གྱིས་བརྟག་པར་བྱ།། ཕུང་པོ་ཁམས་ལ་སོགས་ལྟ་ག། བརྡ་ལས་ཇི་ལྟར་ལུས་ཡིན་བཞིན།། མ་བྱིན་ལེན་པ་བྱང་ཆུབ་སེམས།། ཀུན་རྫོབ་བསྟན་པ་བརྫུན་སྨྲ་བ།། ཕུང་པོ་སྲོག་ཆགས་གྱུར་པ་སྟེ།། ཚངས་པའི་གནས་བཞི་བུད་མེད་ཡིན།། མི་སྦྱིན་ཚིག་དང་རྐང་པ་སྟེ།། དེ་བཞིན་རྟེན་པ་ཉིད་ཀྱང་ནི།། དུས་གསུམ་སྦྱོར་བ་གཅིག་པུ་རུ།། སྔགས་པ་ཡིས་ནི་དེ་བྱའོ།། བཤང་བ་ཞེས་ནི་ཡུལ་ལ་བཤད།། གཅི་བ་ཞེས་ནི་དབང་པོ་ཡིན།། དེ་དག་ཟ་བར་བཤད་པ་ནི། ། མ་སྐྱེས་གཅིག་པུར་མཐོང་བའོ།། ཁྲག་ནི་པགས་པར་ཡང་དག་བཤད།། ས་བོན་ལུས་ཞེས་བྱ་བ་ཡིན།། རྐང་ནི་སེམས་ཀྱིས་ཀུན་རྟོག་པ།། ཟ་བ་དངོས་མེད་གྱུར་པའོ།། སྨོན་ལམ་དབང་གིས་འདི་རྣམས་ནི། ། བི་མུ་ར་ཤུ་པ་ས་འདི།། ལྷ་རྣམས་སྦྱོར་བའི་ཆོས་ཉིད་དུ།། བདུད་རྩི་ཞེས་ནི་བརྗོད་པ་ཡིན།། དགོངས་པ་ཡིས་ནི་བཤད་པ་ལ།། བྱིས་པ་རྣམས་ནི་ཡི་གེར་རྟོག། རྡོ་རྗེ་ཐེག་ལ་གནས་ཁྱོད་ཀྱང་། ། ཆོས་ཉིད་དེ་ཡང་མི་ཤེས་སོ།། རྟོག་པ་ཀུན་ལས་རྣམས་འདས་པས།། ཆོས་ཀྱི་དབྱིངས་ཏེ་མཁའ་དང་མཚུངས།། དེ་འདྲ་འཇིག་རྟེན་རྒྱང་ཕན་པ།། མཐོན་པོའི་གསང་གིས་རྟོག་པར་བྱེད། ། ཡི་གེ་གང་གིས་མི་གང་ཞིག། འགྲོ་ལ་གསལ་བར་རྟོག་བྱེད་པ།། འགྲོ་དོན་གཅིག་པའི་སྦྱོར་བ་ལས།། དེ་ཉིད་ཀྱིས་ནི་དེ་ཉིད་མཐོང་།། གང་ཞིག་རྣམ་སྨིན་སྨིན་པ་ཡི།། སེམས་ནི་དངོས་གྲུབ་ལ་གཞོལ་བ། ། རྫོགས་ལོངས་སྤྱོད་པའི་སྐུར་སྦྱོར་ལས།། དངོས་པོ་མེད་པ་ཉིད་དུ་བྱུང་།། བདག་ཉིད་བསམ་གྱིས་མི་ཁྱབ་གཟུགས།། ཀུན་རྫོབ་དོན་གྱི་གཉེན་པོར་འབྱུང་།། སྤྲུལ་པའི་ལུས་ལས་བསྔགས་པས་ནི། ། སྒྱུ་མ་བཞིན་དུ་སྟོན་པར་བྱེད།། གསང་བའི་དགོངས་པ་དེ་ཉིད་འདི།། འཇམ་དཔལ་ཡེ་ཤེས་དམ་པའོ།། རྡོ་རྗེ་གསུམ་གནས་སྦྱོར་བ་ཡིས།། སྒོམ་པའི་བདག་ཉིད་ཅན་གྱིས་སྒོམ།། ནམ་མཁར་བརྟགས་པའི་རྣལ་འབྱོར་ལ།། ཕུང་པོ་དགོན་པ་ཆེན་པོར་འདོད།། གནས་མེད་གནས་པའི་སྦྱོར་བ་ཡིས།། དེ་བཞིན་ཉིད་གནས་ས་ཕྱོགས་ཡིན།། ལོངས་སྤྱོད་རྫོགས་པའི་དཔག་བསམ་ཤིང་།། དངོས་གྲུབ་སྣ་ཚོགས་མེ་ཏོག་ལྡན།། སྤྲུལ་པའི་འབྲས་བུ་ཤིན་ཏུ་མཛེས།། ཡང་དག་རྫོགས་པའི་བྱང་ཆུབ་རི།། དངོས་མེད་དབེན་པ་ཉམས་དགའ་བ།། རྡོ་རྗེ་ཞེས་བྱ་དེས་བསྒྲུབ་བྱ།། ཕུང་སོགས་ཡན་ལག་ཐམས་ཅད་དེ། ། སངས་རྒྱས་འབྱུང་བ་དངོས་གྲུབ་གྱུར།། སྔགས་འདོན་པར་ནི་གང་གྱུར་པ།། བསྡུས་པ་སྔགས་ནི་གཅིག་པུ་པ།། ལུས་སོགས་རྡོ་རྗེ་གསུམ་ལ་ནི།། རྡོ་རྗེ་འཇམ་པ་བསྒོམ་པར་བྱ། ། ལུས་ལ་སོགས་པ་རྡོ་རྗེ་གསུམ།། དེ་ཉིད་གསུམ་ནས་སྤྲོ་བར་བྱ།། རྡོ་རྗེ་གསུམ་དང་ལེགས་སྦྱོར་ལས།། འཇམ་པའི་རྡོ་རྗེ་འདྲ་བར་འགྱུར།། ནམ་མཁའ་མཐའ་ཡས་ཡང་དག་རྟོག་སེམས་སྦྱོར་བ་ནི་དཔག་ཚད་ཡིན། ། ལྔ་བཅུ་གཉིས་གྱུར་གང་ཡིན་པ།། བརྒྱ་པོ་རྒྱབ་ནས་མངོན་ཕྱོགས་ལ།། ཅི་རིགས་གཅིག་པའི་ཡང་དག་རྟོགས།། སྣ་ཚོགས་རྡོ་རྗེ་འབར་གཅིག་སྩོལ།། དཔག་ཚད་བརྒྱ་ཡི་ཁྱོན་ཙམ་དུ། ། འབར་བའི་རྡོ་རྗེ་སྣང་བ་ཡིས།། ས་ལ་སོགས་པ་བརྒྱན་པ་ནི།། དེ་ནི་སྣང་བ་ཞེས་བཤད་དོ།། ཚངས་པ་དབང་པོ་ལ་སོགས་ལྷ།། དད་པས་དེ་ལ་ཕྱག་ཀྱང་བྱེད།། འདི་ནི་མི་སྣང་བྱེད་པ་སྟེ། ། ཏིང་འཛིན་འཇམ་པའི་རྡོ་རྗེ་ཉིད།། རྣམ་པར་སྨིན་པ་ལྡོག་གྱུར་ཅིང་།། ཇི་སྐད་གསུངས་པ་འགྲུབ་པར་འགྱུར།། ཕུང་པོ་ལ་སོགས་གྲངས་མཉམ་པར།། མི་བསྐྱོད་ལ་སོགས་རབ་ཏུ་བརྟག། བཤང་གཅི་སྤྱང་ལས་དེར་གྱུར་པ།། གང་ཞིག་དམ་ཚིག་ཅེས་བྱའོ།། དམ་ཚིག་རྩེ་བྱ་དེ་དག་མཆོག། མི་ཕྱེད་རྡོ་རྗེ་གསུམ་འབྱུང་བས།། དཀོན་མཆོག་གསུམ་ནི་མཉམ་བྱས་ཏེ།། བདག་མེད་པ་ཡང་བསྒོམ་པར་བྱ། ། དཀོན་མཆོག་གསུམ་ནི་ལྕགས་གསུམ་ཡིན།། བདག་མེད་ཅེས་བྱ་ཁ་ཡིན་ཏེ།། གང་འདི་རྣམ་རྟོག་གཅིག་ཉིད་དུ།། བཅུག་པ་རིལ་བུ་ཡིན་པར་འདོད།། སངས་རྒྱས་རྣམས་ཀྱིས་མི་ཕྱེད་པའི། ། སྒོམ་པ་སེམས་ཀྱི་དམ་པའོ།། དེ་ལྟར་དེ་ཉིད་ཤེས་བསྒོམས་ནས།། སྐད་ཅིག་གིས་འཇམ་རྡོ་རྗེར་འགྱུར།། འཁོར་ལོ་འོད་འཕྲོ་མཚུངས་པར་འགྱུར།། རང་གི་སྔགས་ཀྱིས་རྣམ་བསྒོམས་ནས། ། སངས་རྒྱས་ཀུན་གྱིས་གནས་བསྒོམས་ནས།། སངས་རྒྱས་འདྲ་བར་འགྱུར་བར་བཤད།། སུམ་ཅུ་རྩ་དྲུག་གནས་སྦྱོར་བའི།། རི་རབ་ཀྱི་ནི་རྡུལ་ཕྲན་རྣམས།། དེ་སྙེད་དེ་ཡི་རྗེས་འབྲང་རྣམས། ། དམ་ཚིག་རྡོ་རྗེ་ཞེས་བྱའོ།། གནས་ནི་ལྷ་ཡི་སྦྱོར་བ་སྟེ།། སྣ་ནི་རི་རབ་ཅེས་བྱའོ།། བདག་ཉིད་ཆེན་པོ་སུམ་ཅུ་བདུན།། ནམ་མཁའ་སྤྲོ་བ་བསམ་མི་ཁྱབ།། འཇམ་པའི་རྡོ་རྗེ་བདག་པོ་སྟེ།། འདི་དག་འཁོར་དུ་གྱུར་པ་ཡིན།། འཇིག་རྟེན་པ་ཡི་ངོ་བོ་རུ།། ཕྱི་ཡི་རི་རབ་བརྟག་པ་ཡིན།། དམ་ཚིག་རྡོ་རྗེ་ཞེས་བྱ་བའི།། འཁོར་ལོའི་ཏིང་ངེ་འཛིན་ཅེས་བྱ།། འཁོར་ལོ་དངོས་གྲུབ་རྙེད་སླ་བ།། སྐད་ཅིག་སྦྱོར་བས་སྒྲུབ་པའོ། ། རྡོ་རྗེ་ཆེན་པོ་རང་སྔགས་ཀྱིས།། དཀྱིལ་འཁོར་དབུས་སུ་རབ་བསྒོམས་པ།། རྡོ་རྗེ་ཀུན་གྱི་གནས་མཆོག་སྟེ།། ཐུགས་ཀྱི་རྡོ་རྗེ་འདྲ་བར་འགྱུར།། རི་རབ་སུམ་ཅུ་རྩ་དྲུག་གི། རྡུལ་ཕྲན་ཇི་སྐད་ཡོད་པ་ཡི། ། དེ་སྙེད་བུད་མེད་དེ་ཡི་ནི།། གསུམ་འགྱུར་གནས་སུ་འགྱུར་བ་ཡིན།། ཁམས་གསུམ་གྱི་ནི་རྡོ་རྗེ་ཆེ།། དྲག་པོ་ཡིས་ནི་ཕྱག་བྱས་འགྱུར།། རྡོ་རྗེ་དམ་ཚིག་ཅེས་བྱ་བའི།། ཏིང་འཛིན་འདི་ནི་ཡང་དག་བཤད། ། པདྨ་ཆེན་པོ་འདབ་བརྒྱད་པ།། རང་སྔགས་རྡོ་རྗེ་ལས་བྱུང་བ།། ཆོས་རྣམས་ཀུན་གྱི་གནས་བསྒོམས་ན།། རྡོ་རྗེ་ཆོས་དང་འདྲ་བར་འགྱུར།། སུམ་ཅུ་རྩ་དྲུག་གནས་སྦྱོར་བའི། ། རི་རབ་རྡུལ་ཕྲན་གྲངས་སྙེད་ཀྱི།། སངས་རྒྱས་རྡོ་རྗེ་མཆོག་གི་ནི།། དཀྱིལ་འཁོར་ལ་ནི་བདག་ཉིད་འཇོག། གོས་མེད་མཉམ་ཉིད་ཡེ་ཤེས་ཀྱི།། རྡོ་རྗེ་པདྨོ་གྲུ་བཅས་སྦྱིན།། སོ་སོར་རྟོག་པ་ཞེས་བྱ་བའི། ། ཏིང་ངེ་འཛིན་ནི་ཡང་དག་བཤད།། ཤིན་ཏུ་གྲངས་མེད་བསྐལ་པར་ནི།། གྲངས་ཀྱི་མིང་གིས་གནས་པར་ནི།། གནས་ཤིང་སྒོམ་པར་བྱེད་པ་ཡིན།། དེ་ཡི་ཡེ་ཤེས་ལྔར་ལྡན་པ། སངས་རྒྱས་ཀུན་གྱིས་དགོངས་པ་ནི།། འཇིག་རྟེན་ཕན་ཕྱིར་གསུངས་པ་རྣམས།། ཕྱོགས་བཅུའི་སངས་རྒྱས་མཐའ་ཡས་པའི།། ཡོན་ཏན་གསུམ་ནི་ཡོངས་སུ་བརྟེན།། འོད་ཟེར་ལྔ་ཡི་མདོག་འདྲ་བའི། ། རང་སྔགས་ལས་བྱུང་རལ་གྲི་ནི།། བློ་ལྡན་ལག་པར་དེ་བཞག་ན།། རྡོ་རྗེ་རིག་པ་འཛིན་པར་འགྱུར།། རང་གི་སྔགས་ཀྱི་ཁོངས་ཆུད་འདི།། ཧོ་ཧོ་ཧཱུཾ་དེ་ཁམས་གསུམ་པ།། པདྨ་སྤངས་པའི་ཚངས་པ་ཆེར། ། རྣལ་འབྱོར་པ་དེ་འགྱུར་བ་ཡིན།། ཁམས་གསུམ་ཀུན་གྱིས་ཆེར་མཆོད་ཅིང་།། ཚངས་དང་ལྷ་མིན་ཕྱག་བྱས་པ།། སྟོང་གསུམ་མི་ཡི་མཆོག་གཅིག་པུ།། དབང་ཆེན་པོ་ཡི་ཚངས་པར་འགྱུར། ། ཐུགས་ཀྱི་རྡོ་རྗེ་མཆོག་བསྒོམས་པས།། དངོས་གྲུབ་ཇི་ལྟར་འདོད་པ་དག། སྐུ་གསུང་ཐུགས་ཀྱི་རྡོ་རྗེ་ལས།། དེ་ནི་དེ་མ་ཐག་ཏུ་འཐོབ།། རང་གི་རྡོ་རྗེ་ཏིང་འཛིན་འདི།། དངོས་མེད་གཅིག་པུ་ཡང་དག་བྱུང་། ། བྱང་གྲོལ་ལ་ཡང་དེ་མི་གནས།། རལ་གྲི་ཁ་དང་འདྲ་བར་འགྱུར།། ཨོཾ་ནི་རིལ་བུ་ཙ་ན་ཀའི།། འབྲུ་ཚད་ཙམ་དུ་བསམས་ནས་ནི།། དབུས་སུ་རང་གི་ལྷ་ཡི་གཟུགས། ། བསམས་ཏེ་ཁར་བཅུག་རྣམ་བསྒོམས་ན།། བྱང་ཆུབ་ཡེ་ཤེས་འོད་པོ་ཆེ།། བློ་ལྡན་དེ་མ་ཐག་ཏུ་འགྱུར།། འཛམ་བུ་ཆུ་བོའི་གསེར་མདོག་གམ།། ཉི་མ་འཆར་བའི་མདོག་འདྲ་བའི།། ཙན་ཀ་ཡི་འབྲུ་ཚོད་ཙམ།། ཡི་གེའི་དམ་པ་ཨཱཿབསམ་མོ།། དེ་ཡི་དབུས་སུ་ལྷ་ཡི་གཟུགས།། ཁར་བཅུག་ནས་ནི་རྣམ་བསྒོམས་ན།། བྱང་ཆུབ་ཡེ་ཤེས་འོད་པོ་ཆེ།། དེ་ནི་དེ་མ་ཐག་ཏུ་འགྱུར།། འཛམ་བུ་ཆུ་བོའི་གསེར་མདོག་དང་།། ཉི་མ་འཆར་ཀའི་མདོག་འདྲ་བའི།། ནམ་མཁའི་དབུས་ན་གནས་པ་ཡི།། ཙ་ན་ཀ་ཡི་འབྲུ་ཚོད་ཙམ།། ཡི་གེ་ཧཱུཾ་ནི་རྣམ་བསམས་ཏེ།། དབུས་སུ་རང་གི་ལྷ་བསམས་ནས། ། ཁར་བཅུག་ནས་ནི་རྣམ་བསམས་ན།། རྡོ་རྗེ་སེམས་དཔའ་འོད་པོ་ཆེ།། དཔལ་ལྡན་དེ་མ་ཐག་ཏུ་འགྱུར།། འཛམ་བུ་ཆུ་བོའི་གསེར་མདོག་དང་།། ཉི་མ་འཆར་ཀའི་མདོག་འདྲ་བའི།། རྣམ་པར་སྣང་མཛད་མཁའ་དབྱིངས་ཀྱི།། དཀྱིལ་འཁོར་དབུས་སུ་རབ་བསྒོམས་ལ།། ལག་ཏུ་འཁོར་ལོ་རྣམ་བསྒོམས་ན།། འཁོར་ལོའི་རིག་པ་འཛིན་པར་འགྱུར།། རྡོ་རྗེའི་སྐུ་མདོག་སྦྱོར་བ་ཡང་། ། འདི་ནི་ཡེ་ཤེས་མཆོག་སྒྲུབ་པའོ།། འཁོར་ལོ་ཆེན་པོའི་རིགས་བསྒོམས་ཏེ།། ཡེ་ཤེས་རྡོ་རྗེ་དག་གིས་བྱ།། འཛམ་བུ་ཆུ་བོའི་གསེར་མདོག་གམ།། ཉི་མ་འཆར་ཀའི་འོད་འདྲ་བའི། ནམ་མཁའི་དབྱིངས་ཀྱི་དབུས་གནས་པར།། རྡོ་རྗེ་མི་ཕྱེད་རབ་བསྒོམས་ཏེ།། ལག་ཏུ་རྡོ་རྗེ་བསྒོམས་ན་ནི།། རྡོ་རྗེའི་རིག་པ་འཛིན་པར་འགྱུར།། རྡོ་རྗེ་མཆོག་གི་སྒྲུབ་པ་འདི།། རྡོ་རྗེ་སྐུ་ཡི་སྦྱོར་བ་ལས།། རྡོ་རྗེ་རིགས་ཀྱི་མཆོག་བསྒོམས་པས། ། ཡེ་ཤེས་རྡོ་རྗེ་དག་གིས་བྱ།། ནམ་མཁའི་ཁམས་ཀྱི་དབུས་གནས་པར།། རཱི་ཆེན་ལ་ནི་རིན་ཆེན་སྒོམ།། དེ་ཉིད་ལག་ཏུ་ལེགས་བཞག་ན།། རིན་ཆེན་རིག་པ་འཛིན་པར་འགྱུར། ། རིན་ཆེན་མཆོག་གི་སྒྲུབ་པ་འདི།། རིན་ཆེན་སྐུ་ཡི་སྦྱོར་བ་ལས།། རིན་ཆེན་རིགས་ཀྱི་མཆོག་བསྒོམ་པ།། ཡེ་ཤེས་རྡོ་རྗེ་དག་གིས་བྱ།། ནམ་མཁའི་དབྱིངས་ཀྱི་དབུས་གནས་པར།། ཚེ་དཔག་མེད་པ་རབ་བསྒོམས་ལ།། ལག་ཏུ་པདྨ་བསྒོམས་ན་ནི།། པདྨའི་རིག་པ་འཛིན་པར་འགྱུར།། པདྨ་མཆོག་གི་སྒྲུབ་པ་འདི།། པདྨའི་སྐུར་ནི་སྦྱོར་བ་ལས།། པདྨའི་རིགས་ཆེན་བསྒོམས་པ་ནི། ། ཡེ་ཤེས་རྡོ་རྗེ་དག་གིས་བྱ།། ནམ་མཁའི་དབྱིངས་ཀྱི་དབུས་གནས་པར།། དོན་ཡོད་མཆོག་ནི་རབ་བསྒོམས་ལ།། ལག་ཏུ་རལ་གྲི་རབ་བསྒོམས་ན།། རལ་གྲིའི་རིག་པ་འཛིན་པར་འགྱུར། ། དམ་ཚིག་མཆོག་ནི་འདི་སྒྲུབ་པ།། སྐུ་ཡི་དམ་ཚིག་སྦྱོར་བ་ལས།། དམ་ཚིག་རྡོ་རྗེ་རིགས་བསྒོམས་པ།། ཡེ་ཤེས་རྡོ་རྗེ་དག་གིས་བྱ།། བསྒྲུབ་བྱའི་རྡོ་རྗེའི་དབྱེ་བ་ཡིས། མདུང་ཐུང་རྡོ་རྗེ་ལྕགས་ཀྱུ་སོགས།། སྐུ་གསུང་ཐུགས་ཀྱི་སྒྲུབ་པ་ཡིས།། བསམ་གཏན་ཉིད་ཀྱིས་སྒྲུབ་པར་འགྱུར།། དམ་ཚིག་ཆེན་པོ་འབྱུང་བ་ཡིས།། དམ་ཚིག་དངོས་གྲུབ་ཅེས་བྱ་བའི།། མི་ཕྱེད་རྡོ་རྗེ་གསུམ་དབང་ཕྱུག། སྣ་ཚོགས་བཅོམ་ལྡན་འདས་ཀྱིས་གསུངས།། སྡུག་བསྔལ་དང་ནི་ཀུན་འབྱུང་ཉིད།། འགོག་དང་ལམ་སྟེ་བཞི་པོ་ནི།། ལམ་གྱི་བཞི་མདོར་ཡང་དག་བཤད།། སྒྲུབ་པ་པོ་ནི་གནས་མིང་ཅན། ། ཤིང་གཅིག་དྲུང་དུ་ཡང་དག་རྟོག། ཆོས་དང་རྫོགས་སྤྱོད་མིང་ཅན་དུ།། སྣ་ཚོགས་མཚན་གཅིག་ཡང་དག་དགོད།། མཚན་མ་རྐྱེན་གྱི་གཟུགས་ཅན་ནོ།། འབྱིན་དང་རྔུབ་པ་ཉིད་དང་ནི།། གནས། པ་ཡིས་ནི་ཉེར་མཛེས་པ།། ཡིད་སྟོན་པ་ཡི་མཉམ་སྦྱོར་ལ།། རབ་ཏུ་ཞི་བའི་ཞི་གནས་སུ།། དུས་གསུམ་རྟོག་པ་གཅིག་ལས་འདས།། རྡོ་རྗེ་ལྕགས་ཀྱུ་ཁྱད་པར་དང་།། སྒྲུབ་པ་པོ་ནི་རྟག་ཏུ་སྒྲུབ།། སྦྱོར་གསུམ་སྔགས་ཀྱི་སྐྱེས་བུ་ནི། ། སྦྱོར་གསུམ་རྡོ་རྗེ་ཅན་བསམ་པ།། སྐུ་གསུང་ཐུགས་ཀྱི་ལྕགས་ཀྱུའོ།། སངས་རྒྱས་ཡེ་ཤེས་བློ་ཅན་གྱི།། མི་གསལ་གསལ་བར་ཡང་དག་ལྡན།། དེ་བཞིན་ཉིད་ཀྱི་ངོ་བོ་ལས། ། འགྲོ་བ་ཐམས་ཅད་དགུག་པར་བྱ།། རླུང་གི་དཀྱིལ་འཁོར་མཆོག་གནས་པ།། སངས་རྒྱས་དགུག་པ་དམ་པ་ཡིན།། གནས་མེད་གནས་པའི་སྦྱོར་བ་ཡིས།། དེ་ཉིད་སྔགས་དོན་རྣལ་འབྱོར་པས།། འགྲོ་བ་འདོད་པའི་ལོངས་སྤྱོད་ཀྱང་།། མི་གསལ་སྦྱོར་བས་སྦྱོར་བར་བྱེད།། གང་ཡང་དམ་ཚིག་ཕྱོགས་རྣམས་ནི།། མཁའ་དབྱིངས་དབྱེ་བས་གནས་པ་རྣམས།། དེ་ཉིད་རྡོ་རྗེ་བཀུག་ནས་ནི།། སྔགས་རིག་པས་ནི་སྤྲད་པར་བྱ། ། ནམ་མཁའི་ཁམས་ནི་དགུག་པ་འདི།། དམ་ཚིག་ཆེན་པོ་རྡོ་རྗེ་ཅན།། སྔགས་ཀྱི་དེ་ཉིད་གཅིག་སྦྱོར་ལས།། ལྕགས་ཀྱུ་དེ་རྣམས་འགྲུབ་པར་འགྱུར།། དམ་ཚིག་རྣམས་ནི་དགུག་པའི་མཆོག། རྒྱལ་གནས་ལྕགས་ཀྱུ་བསམས་ནས་ནི།། རྣམ་པར་སྣང་མཛད་འཁོར་ལོ་ཆེ།། རྡོ་རྗེ་པདྨ་ལ་སོགས་བྱ།། མེ་ལོང་ལྟ་བུའི་སྔགས་པས་ནི།། སངས་རྒྱས་སྐུ་ནི་རྣམ་པར་སྒོམ།། ལག་ཏུ་སྐུ་དང་གསུང་ཐུགས་ཀྱི། ། ལྕགས་ཀྱུ་ལ་སོགས་རབ་ཏུ་སྒོམ།། དེ་ནི་སྦྱོར་བ་འདི་ཉིད་ཀྱིས།། དེ་ཉིད་ལས་ནི་ལྷ་རྣམས་དགོད།། དེ་ནི་དེ་མ་ཐག་ཏུ་ཡང་།། དངོས་གྲུབ་ཀུན་སྟེར་ལས་བྱེད་འགྱུར།། སྐུ་དང་གསུང་ཐུགས་ཐམས་ཅད་ནི། ། མཚན་ཉིད་གཅིག་པར་བསྒོམ་པར་བྱ།། ལྕེ་ཡི་རྡོ་རྗེ་སྦྱོར་བ་ཡིས།། གསུང་གི་རྡོ་རྗེར་དེ་མཉམ་སྒོམ།། བརྟུལ་ཞུགས་ཅན་གྱིས་ཕྱི་ནང་གཉིས།། གསང་བའི་མཆོག་མཆོད་དོ། ། དངོས་མེད་དམ་ཚིག་སྦྱོར་བ་ཡིས།། ཇི་ལྟ་ཇི་ལྟར་རབ་སྒྲུབ་པ།། དམ་ཚིག་གསུམ་གྱི་རྣལ་འབྱོར་པའི།། དེ་ནི་ཡང་དག་ཡིན་པར་བཤད།། གསང་བའི་སྙིང་པོ་བསྡུས་པ་ཡིས། ། དངོས་གྲུབ་ཀུན་གྱི་མཆོག་ཏུ་འདོད།། བཅོམ་ལྡན་དམ་ཚིག་ཆེན་པོ་ཡི།། རྣལ་འབྱོར་པས་ནི་དེ་སྐད་གསུངས།། དེ་ནས་ཕྱག་ན་རྡོ་རྗེ་ནི།། གོ་བྱེད་གསང་བ་ཡང་དག་གསུངས།། གང་ཞིག་ཤེས་ན་རྣལ་འབྱོར་པའི། ། མཉམ་གཞག་མཆོག་ནི་འཐོབ་འགྱུར་བའི།། གསང་དབང་དེ་ཉིད་དམ་པ་ཡི།། དེ་ནི་དེ་ཡིས་ཡང་དག་བཤད།། རྣལ་འབྱོར་ཆེན་པོ་གཅིག་བདག་ཉིད། ། ནམ་མཁའ་དང་ནི་མཉམ་པའི་གནས།། བྱས་ན་དམ་ཚིག་ཡང་དག་པ།། ཤ་ཆེན་ལ་ནི་ཡང་དག་སྦྱར།། དངོས་མེད་པ་ཡི་ཤ་ཆེན་གྱི།། དམ་ཚིག་མཆོག་ལ་གནས་ནས་ནི།། བློ་ལྡན་པདག་ཉིད་སྒོམ་པ་ནི།། རྡོ་རྗེ་དངོས་གྲུབ་ལོངས་སྤྱོད་སྟེར།། རྫོགས་ལོངས་སྤྱོད་ཡུལ་བཤང་བ་ཡིན།། དེ་ཉིད་ཡེ་ཤེས་དབང་པོ་གཅི།། དམ་ཚིག་འདི་དག་ཉིད་ཀྱིས་ནི།། རིག་པ་འཛིན་པའི་གཙོ་བོར་འགྱུར། ། ལོངས་སྤྱོད་རྫོགས་ཕུང་ལས་བྱུང་བ།། གླང་པོའི་ཤར་ནི་དེ་རབ་བརྟག། དམ་ཚིག་གཅིག་ཏུ་ལེགས་སྦྱོར་ལས།། མངོན་ཤེས་ལྔ་བདག་ཐོབ་པར་འགྱུར།། དབང་པོ་གཉིས་ནི་རྟ་ཤ་སྟེ། ། དངོས་མེད་དེ་ཉིད་ལས་སྦྱོར་ལས།། དམ་ཚིག་གཅིག་ཏུ་ལེགས་སྦྱོར་ན།། མི་སྣང་གནས་ཀྱི་མཆོག་ཏུ་འགྱུར།། དགོངས་པས་ཅིག་ཤོས་ཟློས་པ་ཡིན།། ཕུང་སོགས་ཡན་ལག་གང་གྱུར་པ། ། དངོས་མེད་དེ་ནི་ཁྱི་ཤ་ཡིན།། དམ་ཚིག་གཅིག་ཏུ་ཡང་དག་སྦྱོར།། དངོས་གྲུབ་ཐམས་ཅད་རབ་སྒྲུབ་པའོ།། རྫོགས་སངས་རྒྱས་ཅན་པ་ལང་ཤ།། ཁྲོ་བོའི་རྒྱལ་པོ་འགྲུབ་པར་འགྱུར།། དམ་ཚིག་གཅིག་ཏུ་ཡང་དག་སྦྱོར།། རྡོ་རྗེ་དགུག་པའི་དམ་པའོ།། འདི་ནི་འཇིག་རྟེན་པར་གྱུར་ལས།། དགོངས་པས་ཅིག་ཤོས་བཟློག་པ་ཡིས།། ཤ་ཆེན་དང་ནི་བཤང་གཅི་དང་།། གླང་པོ་རྟ་ཁྱི་བ་ལང་དག། མི་རྟོག་གཅིག་པའི་སྒྲུབ་པ་ཡིས།། དམ་ཚིག་གཅིག་ཏུ་དེ་འགྲུབ་འགྱུར།། བརྟན་པས་འདི་ནི་སྒྲུབ་པ་ནི།། སྔགས་ཀྱི་ལོངས་སྤྱོད་རྣལ་འབྱོར་པ།། རྡོ་རྗེ་སྦྱོར་བའི་གསང་བ་ཡིས།། སྒྲུབ་པ་འདི་དང་ལྡན་པར་འགྱུར། ། དེ་ནི་སངས་རྒྱས་བྱིན་རློབ་ཅིང་།། རྣམ་ཀུན་རྡོ་རྗེ་ཅན་གསུམ་དང་།། སྙིང་ཁར་ཡེ་ཤེས་དམ་ཚིག་དང་།། དབུ་རྒྱན་ལ་ནི་རྡོ་རྗེ་འཛིན།། སངས་རྒྱས་ཐམས་ཅད་ཚིམ་འགྱུར་བའི། ། འདི་ནི་དམ་ཚིག་སྡོམ་པའོ།། དངོས་གྲུབ་ཐམས་ཅད་སྟེར་བའི་མཆོག། དམ་ཚིག་མཆོག་འདིས་རབ་ཏུ་བྱ།། དམ་ཚིག་ཀུན་གྱི་དམ་པ་སྟེ།། རྡོ་རྗེ་ཟས་ཀྱི་ཏིང་འཛིན་ནོ།། དེ་ནས་འགྲོ་ལ་ཕན་པའི་མགོན། ། གཙོ་བོ་རྣམ་སྣང་ཆེན་པོ་ལ།། གསང་བའི་དགོངས་པ་དམ་པ་ནི།། རྡོ་རྗེ་འཛིན་པས་སླར་ཡང་ཞུས།། གང་ཞིག་སྤྱི་བོར་བརྟགས་པ་ནི།། གཅིག་པུ་ཉིད་དུ་གྱུར་པ་དེས།། རི་རབ་སུམ་ཅུ་རྩ་དྲུག་ཏུ། ། མུ་སྟེགས་རྣམས་ཀྱིས་འཚལ་མི་འགྱུར།། རང་གི་བསྟན་བཅོས་བརྡ་ཡིས་ནི།། ཕྱི་རོལ་པ་དེ་རྣམ་རྟོག་ལ།། ཏིང་འཛིན་བརྟགས་པ་འདི་དག་ཀྱང་།། འདི་ལ་རང་གི་ངོ་བོ་མེད།། ཚངས་སྒོ་མཛོད་ཀྱི་རྒྱུད་ལ་ནི།། རི་རབ་གཅིག་དང་བཅས་པར་བཤད།། བྱིས་པ་མཆོག་ནི་རྨོངས་བྱེད་པ།། གསུང་འདི་སྐྱེ་བོ་ལྟུང་བར་འགྱུར།། དེ་ནས་བཅོམ་ལྡན་བདག་པོ་འདིས།། རྡོ་རྗེ་ཅན་ལ་སླར་གསུངས་པ། ། ལེགས་སོ་རྡོ་རྗེ་ལེགས་པ་ཆེ།། སྐྱེས་བུ་དམ་པ་ཁྱོད་ལེགས་པ།། རྐྱེན་དང་ཉན་ཐོས་ཐེག་པ་དང་།། འདིར་ནི་ང་ཡིས་གསལ་བཤད་པ།། སངས་རྒྱས་ཀྱིས་བཤད་ཡེ་ཤེས་དག། ཐེག་པ་ཆེན་པོ་མི་མཐོང་ངོ་།། ཚད་ཡོད་དང་ནི་ཡོངས་ཆད་པའི།། རང་གི་ལུས་ལ་གང་བཤད་དེ།། ཡེ་ཤེས་དེ་རྣམས་དྲི་མེད་འདོད།། ཁྲོན་པའི་རུས་སྦལ་ཞེས་བྱའོ།། ནམ་མཁའ་དང་ནི་མཉམ་ཡེ་ཤེས།། རྡོ་རྗེ་ཐེག་པ་བླ་མེད་པ།། མཆོག་སྦྱིན་ང་ནི་ཁྱེད་བཞིན་དུ།། རྒྱ་ཆེན་དེ་ཡིས་མི་མཐོང་ངོ་།། རྡོ་རྗེ་ཐེག་པ་རྒྱ་མཚོ་སྟེ།། དེ་ཡིས་ཡང་དག་མ་མཐོང་བས།། རང་གི་ལུང་ནི་ཚང་མ་ཡིས།། གཞན་ཡོད་པ་ནི་མིན་ཞེས་སྨྲ།། ཐེག་པ་ཆེ་ལ་གསང་བ་རྣམས།། སྲང་ལ་བཅལ་ཏེ་དེ་སྨྲ་བ།། དེ་རྣམས་སྔོན་བཞིན་གསལ་མིན་ཞེས།། ང་ཡི་ཚིག་ལས་བལྟས་ཏེ་སྨྲངདེ་ཉིད་རྗེས་སུ་གཟུང་བའི་ཕྱིར། ། རྫོགས་སངས་རྒྱས་ལ་སྒོམ་པ་རྣམས།། གང་གིས་ཤེས་ན་རྟོག་མེད་འགྱུར།། གསང་བ་དགོངས་པས་གསུངས་པ་ཡིན།། སྔགས་ཀྱི་དེ་ཉི་དོན་བྱང་ཆུབ།། སྣ་ཚོགས་དངོས་གྲུབ་འབྲས་བུ་སྟར།། དགོངས་དོན་ཇི་ལྟ་ཇི་ལྟ་བར།། དེ་ནི་ང་ཡིས་ཡང་དག་བཤད།། དམ་ཚིག་རྡོ་རྗེ་ལྕེ་ལ་ནི།། རྡོ་རྗེ་ཅན་གྱིས་ཧཱུཾ་བསམས་ཏེ།། རྣལ་འབྱོར་པས་ནི་བདུད་རྩི་ལྔ། ། ཟོས་ན་རྡོ་རྗེ་གསུམ་ཐོབ་འགྱུར།། ཨཱཿདང་ཨོཾ་གྱི་གསང་བ་དག། འདི་ནི་རྡོ་རྗེ་གསུམ་མཆོག་སྟེ།། འདི་ལྟ་བུ་ཡི་སྦྱོར་བ་ཡིས།། རྡོ་རྗེ་སེམས་དཔའི་འོད་ཆེན་འགྱུར།། འདི་ནི་རྡོ་རྗེ་བདུད་རྩི་ཡི། ། འཕྲེང་འགྱུར་དམ་ཚིག་རྡོ་རྗེར་བཤད།། རྡོ་རྗེ་སེམས་དཔའ་ཡང་དག་འབྱུང་།། ཏིང་ངེ་འཛིན་ནི་བཤད་པ་ཡིན།། རྡོ་རྗེ་གསུམ་གྱི་དམ་ཚིག་མཆོག། སྐུ་གསུང་རྡོ་རྗེ་ཅན་དུ་འགྱུར།། དེ་ཉིད་སེམས་ཅན་ཐམས་ཅད་ཀྱི།། ཡིད་བཞིན་ནོར་བུའི་རྒྱ་མཚོ་ཆེ།། འཇིག་རྟེན་ཁམས་ནི་ཐམས་ཅད་དུ།། སངས་རྒྱས་སྐུ་དང་འདྲ་བར་འགྱུར།། རྡོ་རྗེ་དམ་ཚིག་དངོས་གྲུབ་མཆོག། རྡོརྗེ་བདག་ཉིད་དེ་སྣང་བྱེད། ། གངྒཱའི་ཀླུང་གི་བྱེ་མ་སྙེད།། སངས་རྒྱས་ཞིང་ནི་ཐམས་ཅད་དུ།། གྲུབ་ནས་འདི་ནི་དེར་སྦྱོར་བའི།། རིག་པ་འཛིན་པར་དེ་འགྱུར་རོ།། སྐུ་ཡི་རྡོ་རྗེ་སྒོམ་བདག་ཉིད།། གྲུབ་མཆོག་དམ་ཚིག་ལ་གནས་པ།། མི་སྣང་གྱུར་པ་ཀུན་གྱི་མཆོག། སྟོང་གསུམ་དག་ནི་སྣང་བར་བྱེད།། ལྷ་ཡི་བུ་མོ་མཆོག་ཕྲོགས་ནས།། སངས་རྒྱས་རྣལ་འབྱོར་མར་ལེགས་སྦྱོར།། གངྒཱའི་བྱེ་སྙེད་ཅེས་བྱ་བའི། ། རྫོགས་པའི་སངས་རྒྱས་མ་ལུས་ཀུན།། དཔེ་དེ་དང་ནི་གྲངས་གཅིག་པ།། སངས་རྒྱས་དུས་གསུམ་རྣམ་སྤངས་པ།། ལག་ཏུ་སྐྱུ་རུ་ར་གཞག་བཞིན།། རྡོ་རྗེ་མིག་གིས་མཐོང་འགྱུར། ། སངས་རྒྱས་ཞིང་ནི་གང་དག་ཏུ།། སྒྲ་གྲག་པ་ནི་ཇི་སྙེད་པ།། རྣ་བ་ལ་གནས་མ་ནོར་བར།། སྐད་ཅིག་གིས་ནི་དེ་ཀུན་ཐོས།། གངྒཱའི་བྱི་སྙེད་ཞིང་དག་དང་།། སྐུ་ལ་སོགས་པ་གསུམ་གྱིས་མཚན། ། སེམས་ཞེས་བཤད་པའི་སྒོམ་པ་མཆོག། སེམས་ཅན་རྣམས་ཀྱི་དེ་ཉིད་རིག། བསྐལ་པ་གངྒཱའི་བྱེ་སྙེད་དུ།། སངས་རྒྱས་རྡོ་རྗེ་མཆོག་གིས་འགེངས།། རྡོ་རྗེ་བསམ་མི་ཁྱབ་སྔོན་འགྲོ། རང་གི་རྣ་བ་སེམས་བཅས་པ།། གངྒཱའི་བྱེ་མའི་མིང་ཅན་གྱི།། གནས་ཀྱི་དངོས་པོ་བཤད་པ་ཡིན།། སངས་རྒྱས་རྣམས་ཀྱི་མངོན་ཤེས་ནས།། འདི་ནི་ཡང་དག་བཀའ་སྩལ་ཏོ།། མངོན་ཤེས་དྲུག་ནི་དོན་གྲུབ་བོ། ། དེ་ནི་སངས་རྒྱས་འདྲ་བར་འགྱུར།། གངྒཱའི་ཀླུང་གི་བྱེ་སྙེད་ཀྱི།། འཁོར་རྣམས་ཀྱིས་ནི་རབ་མཛེས་པས།། སྐུ་སོགས་རྡོ་རྗེ་གསུམ་འདི་ནི།། འཇིག་རྟེན་ཁམས་རྣམས་ཀུན་ཏུ་སྤྱོད། ། ཡིད་རྟོན་བདེན་གཅིག་བསྙེན་པ་སྟེ།། དེ་ཉིད་གསུམ་མཉམ་གཉིས་མེད་པ།། བརྟེན་ཏེ་དམ་ཚིག་གཅིག་གྱུར་པ།། ཡེ་ཤེས་ཉེ་བར་སྒྲུབ་པའོ།། ཡིད་རྟོན་མཉམ་པའི་སྦྱོར་བ་ལས། ། སྒྲུབ་པ་ཡི་ནི་དམ་ཚིག་འགྱུར།། འབྲས་བུ་མངོན་སུམ་བྱས་སྦྱོར་བ།། སྒྲུབ་པ་ཆེན་པོ་བཞི་པའོ།། རྐྱེན་དང་ཉན་ཐོས་མདོ་སྡེ་པ།། འདི་དང་ལྡན་པ་རབ་ཏུ་བསྔགས།། སེམས་ལ་དམིགས་དང་འདིར་སྦྱོར་བ།། སྐད་ཅིག་གིས་ཀྱང་དེ་འགྲུབ་འགྱུར།། བསྙེན་པའི་དམ་ཚིག་སྦྱོར་གཅིག་དང་།། ཉེ་བར་བསྒྲུབ་པར་གང་གྱུར་དང་།། སྒྲུབ་པའི་དམ་ཚིག་ཉིད་དང་ནི།། སྒྲུབ་པ་ཆེན་པོ་བཞི་པ་ཡིན།། འདི་ལ་ཡང་དག་འཇུག་འགྱུར་བ།། ཇི་ལྟ་ཇི་ལྟར་འཇིག་རྟེན་སོགས།། ས་དང་ཤིང་གི་རིན་ཆེན་སོགས།། ལྷ་ཉིད་དུ་ནི་རབ་ཏུ་བརྟག། ཆོས་ཀྱི་དབྱེ་བས་ཤེས་པར་བྱ། ། རྡོ་རྗེ་ཡེ་ཤེས་སྒྲུབ་པ་པོ།། བསྟེན་པའི་དམ་ཚིག་ཡང་དག་སྦྱོར།། བྱང་ཆུབ་མཆོག་ནི་རྣམ་པར་སྒོམ།། གཟུགས་དང་སྒྲ་དང་དེ་བཞིན་དྲི།། རོ་དང་རེག་བྱ་ཆོས་རྣམས་ལ།། དངོས་གྲུབ་མཆོག་ནི་རྣམ་དཔྱད་པ། ། དེ་ནི་ཉེ་བར་སྒྲུབ་པར་འགྱུར།། སྔགས་བདག་གང་ཡིན་བསྒོམས་ནས་ནི།། བསྐུལ་བ་སྒྲུབ་པར་འགྱུར་བ་ཡིན།། རང་སྔགས་རྡོ་རྗེ་ཅན་གྱི་གཟུགས།། འདི་ནི་སྒྲུབ་པ་ཆེན་པོར་འདོད།། བསྙེན་པ་རྡོ་རྗེ་བདུད་རྩི་དག། སྔགས་པས་ཀུན་ཏུ་བརྟག་པར་བྱ།། དངོས་གྲུབ་འདོད་པས་གནས་པ་ནི།། དབུ་རྒྱན་ལ་ནི་མཆོག་གང་བསམ།། འདི་ནི་སྔགས་རྣམས་ཐམས་ཅད་ཀྱི།། དེ་ཉིད་གསུམ་གསང་ཡང་དག་འབྱུང་། ། སྔགས་ཀྱི་དེ་ཉིད་དོན་གཉེར་བའི།། སྒྲུབ་པ་པོས་ནི་དབེན་པ་བསྟན།། སྣ་ཚོགས་ལུང་གི་ཡང་དག་རྟོག། སྔགས་ནི་དགོན་པ་ཆེན་པོར་འདོད།། དེ་ཡི་དཔག་བསམ་ཤིང་ལོངས་སྤྱོད། ། ས་ཕྱོགས་ཞེས་ནི་ཡོངས་སུ་བསྒྲགས།། མཁའ་དང་མཉམ་པའི་སྦྱོར་བ་ནི།། རྣམ་པའི་དབེན་པ་ཆེན་པོར་བཤད།། རི་འོར་རྫོགས་པའི་སངས་རྒྱས་དང་།། དེ་རིགས་དངོས་མེད་ལས་བྱུང་བའོ། ། དེ་འདྲའི་དབེན་པའི་མཚོན་པ་རུ།། དེར་ནི་འོད་ཆེན་རྣམ་གནས་ཏེ།། གནས་མེད་པ་ཡི་སྦྱོར་བ་ཡིས།། རྟག་ཏུ་དངོས་གྲུབ་ཐོབ་པར་འགྱུར།། བཅོམ་ལྡན་རྡོ་རྗེའི་སྒྲུབ་པ་ནི།། ཆེན་པོས་དེ་སྐད་བཀའ་སྩལ་ཏོ། ། དགོན་པ་ཆེན་པོའི་ས་ཕྱོགས་སོགས།། འཇིག་རྟེན་པ་རྣམས་སྨྲ་བ་གསལ།། བསྙེན་པ་སྐུ་ཡི་བརྟུལ་ཞུགས་མཆོག། བློ་དང་ལྡན་པས་རྡོ་རྗེ་བཞིས།། རྡོ་རྗེ་གསུམ་གཉིས་མེད་སྦྱོར་བས། ། བསྒོམས་ན་དངོས་གྲུབ་འཐོབ་པར་འགྱུར།། མེ་ལོང་ཞེས་བྱ་དགོན་པ་ཆེ།། རིན་ཆེན་ཞེས་བྱ་དབེན་པའོ།། ཆེན་པོ་ཞེས་བྱ་འོད་དཔག་མེད།། དོན་ཡོད་པ་ནི་རི་འོར་ཡིན།། ཆུ་ངོགས་དག་པའི་ཆོས་ཀྱི་ཆ། ། གནས་ལྔ་དག་ཏུ་རབ་ཏུ་བརྟག། ཇི་སྲིད་དོན་ནི་སྦྱོར་བ་བཞིས།། ཡི་གེ་ཨོཾ་ནི་སྡོམ་པར་འགྱུར།། ཇི་ལྟར་ནམ་མཁའི་མཚན་ཉིད་གཅིག། རང་གི་མཚན་ཉིད་འདོར་མི་བྱེད། དེ་བཞིན་དེ་ཉིད་གསུམ་བཞིའི་བྱེད།། ཡི་གེ་ཨོཾ་གཅིག་སྡོམ་པའོ།། གནས་མེད་གནས་པ་ཞེས་བྱ་བའི།། ཨོཾ་གཅིག་གིས་ནི་འགྲོ་ལ་ཁྱབ།། དེ་ཉིད་མི་གསལ་སྦྱོར་དབང་པོ།། གཙོ་བོ་རང་ཉིད་ཟློག་པ་ཡིན།། ལ་ལ་གླང་པོ་སྤངས་ནས་ནི།། རྗེས་ལ་དབྱིབས་ནི་ཚོལ་བར་བྱེད།། དེ་བཞིན་མ་འོངས་སྔགས་པ་ནི།། ཨོཾ་ལས་སྡོམ་པ་བཞིན་དུ་འདོད།། གཅིག་གཉིས་གསུམ་དང་བཞི་དང་ལྔ། ། དུས་ཐུབ་དེ་བཞིན་ནོར་ཅན་དང་།། ཕན་ཚུན་སྦྱོར་གནས་བརྗོད་པ་ལས།། བསམ་མི་ཁྱབ་པའི་གྲངས་སུ་འགྱུར།། བཅོམ་ལྡན་གཅིག་ཀྱང་དུ་མ་སྟེ།། ཚིག་ཏུ་བརྗོད་པ་རྣམ་པར་སྤངས། ། བརྡ་ཙམ་དུ་ནི་ཨོཾ་ཞེས་བྱ།། དངོས་མེད་སྦྱོར་བའི་ཆོས་ཉིད་ཡིན།། ཆོས་དང་ལོངས་སྤྱོད་སྤྲུལ་པ་སྟེ།། སྐུ་གསུམ་དུ་ནི་ཡང་དག་བཤད།། གསུམ་པོ་ཡང་དག་འཛིན་པས་ནི།། དེས་ན་ཨོཾ་ནི་སྡོམ་པ་ཡིན། ། དང་པོ་གཅིག་པུ་མི་བསྐྱོད་དགོད།། དེ་ཉིད་སྡོམ་པར་གྱུར་པ་ཡིན།། བརྡ་རུ་བརྗོད་པ་སྣ་ཚོགས་པ།། བསམས་ནས་སྡོམ་པ་ཀུན་ཏུ་བཤད།། མི་ཕྱེད་ནམ་མཁའི་སྦྱོར་བ་ཡིས།། བསམ་དང་གདོན་དང་རྣམ་པར་བྲལ།། རྟེན་འབྲེལ་རིག་ལས་ཡང་དག་འབྱུང་།། རྗེས་བཅས་ཞེས་བྱ་དེ་བསྒོམ་བྱ།། རྟག་ཏུ་འབྱུང་བའི་ཡེ་ཤེས་གཞག། མིག་ལ་སོགས་པ་བདུན་བརྒྱ་ལ།། གཡས་དང་ཅིག་ཤོས་ཟླ་ཕྱེད་དེ།། ཤེས་རབ་ཐབས་ཀྱང་སྒྲུབ་པའོ།། འདི་དག་ཟུང་གྱུར་ཟླ་བ་སྟེ།། རྡོ་རྗེ་མིང་ཅན་ཕྱེད་དང་གཉིས།། དེ་ནི་སྦྱོར་བ་འདི་ཉིད་ཀྱིས།། དངོས་གྲུབ་སྦྱར་དུ་ཐོབ་པར་འགྱུར། ཞག་ནི་ཐུབ་པ་སླ་ཕྱེད་དང་།། ཟླ་གཅིག་ཟླ་བ་ཕྱེད་གཉིས་པས།། འཇིག་རྟེན་པ་ཡི་ཞག་དབྱེ་བས།། རྒྱ་ཆེར་ངས་ནི་བཤད་པ་ཡིན།། གསང་བ་མཆོག་ལས་བྱུང་བ་ནི།། ཟླ་བ་ཕྱེད་ཀྱིས་སྒྲུབ་པར་གསུངས། ། དེ་ཉིད་ཉེ་བར་འགྲུབ་བཤད་པའི།། སྡོམ་པའི་ཡུལ་ནི་དམ་པ་ཡིན།། གང་ཚེ་ཤེས་རབ་ཐབས་ཡེ་ཤེས།། དེ་བཞིན་ཉིད་ཤེས་ལས་བྱུང་བ།། སངས་རྒྱས་སྐུ་འཛིན་དཔལ་དང་ལྡན། ། རྡོ་རྗེ་མི་ཕྱེད་གསུམ་བསྒོམས་པས།། རྡོ་རྗེ་བྱིན་རླབས་མཛད་པར་འགྱུར།། འདས་དང་མ་འོངས་སངས་རྒྱས་དང་།། གང་ཞིག་ཕྱོགས་བཅུར་བཞུགས་པ་རྣམས།། ཆོས་སྐུ་མཆོག་གི་རྣལ་འབྱོར་པ། ། སངས་རྒྱས་དེ་རྣམས་བྱིན་གྱིས་རློབ།། འདས་པ་རྣམས་ནི་ཆོས་སྐུ་ཡིས།། བསམ་མི་ཁྱབ་པའི་ཕྱོགས་ན་བཞུགས།། སྔགས་མཆོག་བསམ་གྱིས་མི་ཁྱབ་པས།། མ་འོངས་རྣམས་ཀྱིས་བྱིན་གྱིས་རློབ། ། སངས་རྒྱས་གསུམ་ལ་དབྱེ་བ་ནི།། ཅུང་ཟད་ཙམ་ཡང་ཡོད་མ་ཡིན།། འོན་ཀྱང་དངོས་མེད་ལས་བྱུང་བའི།། སྔགས་པ་རྣམས་ལ་བྱིན་གྱིས་རློབ།། ཕྱོགས་བཅུར་བཞུགས་པའི་སངས་རྒྱས་རྣམས། ། མི་ཕྱེད་རྡོ་རྗེ་གསུམ་བསྒོམས་ལ།། སྐུ་ནི་ཇི་ལྟ་བར་འཚམ་པ།། དེ་ལྟར་བྱིན་གྱིས་རློབ་པར་མཛད།། རིག་དང་མ་རིག་ཡང་དག་ལྡན།། སྲོག་ལ་སོགས་ཏེ་བཅུ་གཉིས་བཤད། ། དུས་ཀྱི་ཉིས་འགྱུར་ལམ་ལ་སོགས།། དེ་ཉིད་ཟླ་བ་ལ་སོགས་འགྱུར།། ཟླ་བ་ལ་སོགས་གྲངས་མཉམ་པས།། ཉི་མ་བཅུ་གཉིས་མིང་ཅན་ཡིན།། ཁྱབ་འཇུག་དེ་ཉིད་དབྱེ་བ་ཡིས།། ལམ་རྩོམ་པའི་ནི་བརྟགས་པ་ཡིས།། དེ་ཉིད་དུ་ནི་སྒྲུབ་པ་མཆོག། སྡོམ་པ་ཡུལ་ཞེས་བཤད་པ་ཡིན།། སྔགས་དང་དངོས་མེད་དེ་བྱེད་པ།། མགལ་མེ་འཁོར་ལོ་བསྐོར་དང་མཚུངས། ། རྟོག་པ་ལས་བྱུང་དེ་འདི་ནི།། དངོས་མེད་པ་ནི་བསྒོམས་པས་སོ།། མ་འོངས་པ་ཡི་སྐྱེ་བོ་ནི།། ལྷ་ཡི་གཟུགས་ལ་འདུད་པར་བྱེད།། མིག་དང་དེ་བཞིན་རྣ་བ་དང་།། ལྕེ་དང་དེ་བཞིན་ལུས་དག་དང་། ། པགས་པ་རྐང་པར་ཡང་དག་ལྡན།། འཛིན་པ་དག་ནི་མི་ནུས་པ།། ལྟ་དང་ཉན་དང་དྲི་དང་རོ།། རེག་བྱ་རྣམས་ནི་དངོས་མེད་པ།། རང་བཞིན་སེམས་མེད་གྱུར་པ་ཡི།། འཇིམ་གཟུགས་སངས་རྒྱས་སྐུ་ཅན་ཏེ། ། འོན་ཀྱང་འགྲོ་བའི་བླ་མའི་སྐུ།། སངས་རྒྱས་བྱིན་གྱི་བྱིན་རླབས་ཀྱིས།། དེ་བཞིན་སྔགས་སྦྱོར་བདག་ཉིད་ཅན།། དངོས་མེད་རྡོ་རྗེའི་སྐུ་ཉིད་ཡིན།། ཤིང་དང་ས་དང་རིན་ཆེན་སོགས།། རང་གི་ལྷ་ཡི་གཟུགས་བྱས་ལ།། རང་གི་ཆོས་ནི་སྤངས་ནས་སུ།། ཚིག་གི་ལམ་དེ་སྟོན་པར་བྱེད།། སྐུ་གསུང་ཐུགས་དང་ལྡན་པ་མཆོག། ཆོ་འཕྲུལ་དེ་ལ་ག་ལས་བྱུང་།། དེ་ནས་དང་སོགས་ཡང་དག་པས།། སླར་ཡང་དེ་ལ་གསོལ་འདེབས་ཀྱང་།། གསོལ་བ་འདེབས་པ་ཙམ་གྱིས་ནི།། དེ་དང་འདྲ་བར་ག་ལ་འགྱུར།། ཕྱི་རོལ་ཆོས་ལ་གང་ཞིག་དགའ།། ལྷ་རྣམས་ཐམས་ཅད་སྤོང་བ་ཡིན།། དེ་ལྟར་སྐུ་ལས་སྐུ་བྱུང་བ། ། དཔལ་ལྡན་ཆོས་འདིའང་གསུམ་གྱི་ལམ།། བྱིན་རླབས་པ་དག་ལོངས་སྤྱོད་ན།། གསུང་གི་རྡོ་རྗེ་ཅན་དུ་བྱེད།། འདས་དང་མ་འོངས་སངས་རྒྱས་རྣམས།། ཕྱོགས་བཅུ་ན་ནི་གང་བཞུགས་པ།། བྱུང་དང་འབྱུང་འགྱུར་དེ་རྣམས་ནི།། མི་ཕྱེད་གསུམ་གྱི་ལམ་དུ་འགྱུར།། ཡིད་རྟོན་བདེ་བ་ཞི་བདག་ཉིད།། དེ་བཞིན་ཉིད་ཤེས་ལས་བྱུང་བ།། ཡི་གེ་གཅིག་ནི་གསུམ་དྲུག་འདི།། རང་ཉིད་འགྲོ་བའི་ཁར་བརྗོད་དོ། ། དེ་ཡིས་བྱིན་གྱིས་བརླབ་པའི་གནས།། རྡོ་རྗེ་མི་ཕྱེད་རྡོ་རྗེ་ཅན།། གང་གཞན་སངས་རྒྱས་ཀྱིས་གསུངས་དང་།། འགྲོ་བའི་སྒྲར་ནི་འདི་གྱུར་ཏེ།། དུས་གསུམ་བཞུགས་པའི་སངས་རྒྱས་རྣམས། ། རྡོ་རྗེ་མི་ཕྱེད་གསུམ་རྣལ་འབྱོར།། གསུང་གི་རྡོ་རྗེ་མི་ཕྱེད་པ།། རྡོ་རྗེ་ཅན་མཆོག་དེ་བྱིན་རློབ།། འཇུག་པ་གནས་པའི་སྦྱོར་བ་དང་།། ལྡང་བ་དང་ནི་ཡང་དག་ལྡན།། གསུང་གི་རྡོ་རྗེ་དངོས་མེད་པ། དེ་ནི་སངས་རྒྱས་བྱིན་གྱིས་རློབ།། ཇི་ལྟར་འཁོར་ལོས་སྒྱུར་རྒྱལ་ནི།། ཚིག་གིས་ལམ་གྱི་ལས་བྱེད་འཇུག། གསུང་བྱིན་བརླབས་པས་སྔགས་པ་ནི།། དེ་བཞིན་དོན་ཡོད་ཉིད་དུ་བྱེད།། དེར་ནི་ཡང་དག་བཤད་པ་འདི། ། སྒྲུབ་པ་ཆེན་པོ་ཞེས་བྱ་བའོ།། སངས་རྒྱས་དེ་རྣམས་བྱིན་རློབ་པ།། སྡོམ་པ་ཡུལ་ནི་དམ་པའོ།། རྡོ་རྗེ་ཐུགས་ནི་འཛིན་རྒྱལ་པོ།། དེ་ནི་བདག་ལ་བྱིན་རློབ་མཛད།། མི་ཕྱེད་རྡོ་རྗེ་གསུམ་སྦྱོར་བས། ། ནམ་མཁའི་ཁམས་དང་མཉམ་པའི་གནས།། གང་ཞིག་བྱུང་དང་འབྱུང་འགྱུར་བའི།། ཕྱོགས་བཅུར་བཞུགས་པའི་སངས་རྒྱས་རྣམས།། དེ་ཡི་བྱིན་གྱིས་བརླབ་པའི་གནས།། ལན་གསུམ་ལས་ནི་བྱུང་བ་མཛད། ། སྐུ་ཡིས་སྟོན་པའི་མཛད་པ་མཆོག། རང་སངས་རྒྱས་ནི་སྒོམ་པ་ཡིན།། མདོ་སྡེ་པ་དང་ཉན་ཐོས་ཀྱིའང་།། སྨྲ་བ་སྒྲུབ་པ་པོར་གྱུར་ཡིན།། སེམས་ནི་རྣལ་འབྱོར་ལྡན་མཆོག་གིས།། འགྲོ་བའི་དོན་ནི་རབ་སྒྲུབ་པའོ།། འགྲོ་འོང་གནས་དང་བྲལ་བ་ནི།། རྡོ་དང་ས་དང་དབྱིག་བྱེད་པ།། ལུས་ལ་སོགས་པ་མཚོན་པ་ཡིས།། འོན་ཀྱང་དེ་ནི་གསུང་དུ་འགྱུར།། སེམས་དང་ལུས་དང་མི་ལྡན་པའི།། དེ་བཞིན་ཉིད་ནི་འགྲོ་དོན་ཅན།། སྐུ་གསུང་ཐུགས་ཀྱི་རྡོ་རྗེ་གཅིག། གྱུར་ཀྱང་སོ་སོར་བརྟན་པ་ཡིན།། སངས་རྒྱས་རྡོ་རྗེ་ཆོས་དག་གམ།། དེ་བཞིན་རྡོ་རྗེ་སེམས་དཔའ་ཡང་རུང་། ། སྐུ་གསུང་ཐུགས་ཀྱི་སངས་རྒྱས་སོགས།། རྡོ་རྗེ་གསུམ་པོ་མི་ཕྱེད་བརྟགས།། དེ་འདས་རྨོངས་པའི་བདག་ཉིད་ཅན།། སོ་སོར་རྟོག་པ་འགགས་པར་འགྱུར།། སྐུ་ལ་སོགས་པའི་གྲངས་མཉམ་པར། ། སངས་རྒྱས་ཀྱང་ནི་གང་རྟོགས་གྱུར།། སྟོང་པ་ཤིན་ཏུ་སྦྱོར་བ་ཡང་།། དེ་ནི་གསལ་བར་ཐེ་ཙོམ་མེད།། སྣ་ཚོགས་སྦྱོར་གྱུར་སྔགས་རྣམས་ནི།། གང་ཞིག་སྟོང་པར་མངོན་སུམ་བྱེད།། འདས་པ་དག་ནི་དེ་ཐམས་ཅད།། རྨོངས་པའི་བདག་ཉིད་དེ་འགས་འགྱུར།། ཉན་ཐོས་རང་སངས་རྒྱས་རྣམས་ཀྱི།། བྱང་ཆུབ་བསྡུས་ནས་བཤད་པ་ཡིན།། འཇིག་རྟེན་པ་ཡི་གང་བཤད་པ།། མདོར་བསྡུས་པ་ནི་འདི་ཡིན་ནོ། ། སངས་རྒྱས་ཡང་ན་རྡོ་རྗེ་ཆོས།། ཡང་ན་རྡོ་རྗེ་སེམས་དཔའ་ཡང་རུང་།། རྨོངས་པས་འདི་ལས་འདས་ན་ནི།། དེ་ནི་འགགས་པར་ཐེ་ཚོམ་མེད།། དགོངས་པ་ལུང་བསྟན་ལ་གནས་ནས།། གསང་བ་དམ་པ་ཡང་དག་སྲུང་།། ལྷུན་གྱིས་གྲུབ་པའི་སྦྱོར་བ་ཡིས།། དངོས་གྲུབ་མཆོག་ནི་བསྒྲུབ་པར་བྱ།། སྐུ་ལ་སོགས་པའི་གསང་བ་མཆོག། རྡོ་རྗེ་སྦྱོར་བ་ཞེས་བྱ་བའི།། དམ་ཚིག་སྒྲུབ་པའི་མཆོག་བསྟན་པའི། ། ལེའུ་བཅུ་གཉིས་གསུངས་པ་ཡིན།། དགོངས་པ་ལུང་བསྟན་པ་ཞེས་བྱ་བའི་རྒྱུད་རྫོགས་སོ།། ། རྒྱ་གར་གྱི་མཁན་པོ་དྷརྨྨ་ཤྲཱི་བྷ་དྲ་དང་། ཞུ་ཆེན་གྱི་ལོ་ཙ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།
CLOSE WINDOW