/ de phyir drang srong tshul du drang srong lam 'di mkhas pas blo la bzhag/ ldang dang mi ldang ched du mi spong mi sel ston pa drug gis bstan pa'ang snying por bsam/ / gang yang mi sgom gnas gsum mi g.yo rten 'cha' mi byed pa nyid drang srong lam// 'di las sangs rgyas pa la'ang lam med rgyal ba kun gyi bde lam shul po che// byang chub kyi sems bsgom pa'i rgyud las/ drang srong rnams kyi grub pa'i rgyu bstan pa'i skabs bco lnga pa'o//// de nas bcom ldan 'das la/ gsang ba'i bdag po phyag na rdo rjes/ bcom ldan 'das shin tu zab pa'i don ji ltar lags/ zhes gsol pas/ bcom ldan 'das kyis bka' stsal pa/ 'phags pa kun gyi yul dang gnas kyang 'das sogs lam nyid gzhan na med// kun gyis dmigs par bya phyir mchog gi snying po 'dis kyang kun la khyab/ / mchog tu gsang ba'i chos nyid zab mo gang yang snang med 'di// ci la'ang mi snang gang la'ang mi dmigs de bzhin nyid kyi ngang// gsang ba'i dbang phyug de bzhin dbyings nyid dbang bsgyur thugs rje'i ngang/ / 'di la bla med myur ba'i go 'phang mchog chen gang brnyes pa// sems kyi ngang las gzhan min gang yang rgyal ba gzhan na lhag par med// srin bu me khyer nam mkha'i 'od du 'bar yang glog dang mtshungs pa yin/ / theg gzhan khyad par rab tu bsngags kyang theg mchog 'dir mi mtshungs// don gyi ngo bo gzhan min yang dag thar lam 'di ni rnam par mi rtog nyid las 'khrungs// bsam 'das brjod med rgyal ba'i sems de ye shes thugs rje'i ngang/ / 'di la bla med dmyur ba'i go 'phang mchog chen gang brnyes pa// mi bsgom ci 'ang 'di la gang na bsgom du yod de bzung ba'i yul dang bral/ dmigs shing bsam du med pas rna ba nyan cing lce yis brjod du med/ / yul dgon sems dgon gnas dgon lus dgon 'brel bas bzung// lung mchog rgyal po nor bu rin chen lta bu'i kun gzhi 'di// 'di zhes dmigs su rdul tsam med phyir mchog gi snying po nyid/ / kun snyoms gsal ba'i thig le gsal ba'i sgron ma kun 'byung 'dzin pa'i sku// rnam thar sgo gsum 'byung ba'i klong chen 'di ni mchog gi sku// spyod yul sman pa'i rgyal po lta bu'i nad gso mdzad pa'i mkhan/ / theg pa'i mtshan nyid shin tu zab pa'i khyad par 'gyur ba'i lam chen 'di nyid ni// theg ba kun gyi nad gso mdzad pa'i sman pa'i mchog chen po// kun snyoms kun 'byung thig le 'bar ba'i sku mchog zab mo 'di/ / gang yang dmigs su med par yan lag gnas// 'di las khyad par zab pa'i sangs rgyas byang chub gang nas btsal du yod// shin tu 'du shes gang yang snyoms 'jug 'di ni kun gyi rmad byung yin/ khyad par mchog tu gyur cing kun tu rab tu bsngags pa rdzogs mchog yin// rdzogs mchog bya bral yangs pa'i snying po 'di ni bsgom du med pa yin// gang yang 'di las snying po byang chub gzhan nas rnyed par 'dod pa gdod nas gol ba yin/ / rdzogs so rdzogs so rdzogs pa 'di la thams cad ma lus rdzogs// 'di la shin tu zab pa'i chos ni gang yang med// byang chub kyi sems bsgom pa'i rgyud las/ man ngag shin tu zab par bstan pa'i skabs bcu drug pa'o//// de nas bcom ldan 'das rab tu nges pa rnyed de gnas pa la/ gsang ba'i bdag po phyag na rdo rjes 'di skad ces gsol to/ / bcom ldan 'das gang du 'gro zhing ci zhig spang du yod ces/ bcom ldan 'das la zhus pas/ bcom ldan 'das kyis bka' stsal pa/ dmigs med dag pa'i mkha' dbyings klong yangs rab tu 'khyil ba las/ ya mtshan 'khrul gyi shes rab 'od 'bar de ni kun la gsal// mchog tu rmad byung ngo mtshar khyad par yul 'di kun gyi rmad chen yin// rang sems rnam dag kun gyi yul te kun gyi 'gro khung yin// mi dmigs dbyings las dmigs med rig pa rang zhir 'gro ru gzhug/ kun snyoms sems la kun 'byung rig pa khungs pa'i steng du btang// yum gyi mkha' dbyings khyab par gdal ba'i klong du sems kyi phur pa thebs par btab la bzhag/ 'gul ba'i tshe na dam por bcings shing 'byung du gzhug par yong mi bya// yong zhig 'byung na mkha' dbyings klong gi khung pa'i mtshan nyid brtag par bya// mtshan nyid brtags te mtshan nyid mthong nas khung pa'i gting yang dkrug/ legs par 'khrugs nas slar la steng nas kha ru dbyang bar mi bya gting khar 'dug/ gting de mthong nas rgyal ba sangs rgyas rnams kyang bdud las rgyal/ / rgyal ba'ang de las sangs rgyas gang du'ang mi 'gro de kho na nyid na 'dug/ drang srong rnal 'byor rnams kyi 'gro sa de yin gyis// de ltar yum gyi mkha' dbyings dag pa'i gting mthong nas// 'jig rten 'di na yod pa thams cad ci zhig spang du yod de kun tu bzang po'i ngang/ / thams cad 'di ltar shes na bsgom pa'i mchog chen khyad par yin// 'di las rgyal ba rnams la bsgom du rdul tsam med// byang chub kyi sems bsgom pa'i rgyud las/ gang du'ang 'gror med cing ci'ang spang du med pa'i skabs bcu bdun pa'o//// de nas bcom ldan 'das la/ gsang ba'i bdag po phyag na rdo rje// bcom ldan 'das rgyud kyi mtshan nyid dang/ sems kyi mtshan nyid ji ltar lags/ zhes gsol pas/ bcom ldan 'das kyis bka' stsal pa/ byang chub sems ni rgyud kyi rang bzhin yin te sems kyi mtshan nyid ni// thams cad kun la mnyam gnas de nyid ngang las g.yos pa med par rgyun du gnas pa rgyud/ / de ltar gnas pa de nyid kha dog dbyibs kyis mtshon du med de rang bzhin gnas pa sems// gang gi'ang mtshan nyid de ltar shes pa de las shes rgyu med pa shes rab yin/ shes pa'i don las mi 'gyur 'da' bar dka' ba de las 'da' bar mi byed sdom pa rdzogs// gang yang mnyam snyoms de bzhin de las 'da' mi byed pa bsam gtan mchog/ yon tan lhun rdzogs rang gi sems las ma gtogs chos gzhan med// chos 'di phyi rol yul dang nang gi sems su mi 'byed kun bzang ngang// pha rol tshul rol gang yang spong mi byed de mnyam par gnas par bya/ / sa yi rim par mi gnas ting 'dzin ri mo mi mnyes lha yi skur mi bsgom// drang srong dgon dben mi gzung dbang po yan par gzhag par bya// yul dang dbang por mi 'byed spyod lam lhun par gzhag par bya/ / 'di la yul dang dbang por ye nas dbyer med 'byed pa 'khrul// rnam thar gsum dang gzungs kyi sgo yis ye nas mtshon du med// lha klu mthu chen rnams dang drang srong gis kyang 'di mi mthong/ / 'di la sus kyang gzhig pa'i thabs med sangs rgyas rnams kyi thugs// 'di la su yis dgongs nas dmigs pa ci zhig bsgom// nyam thag phyi rol pas ni ma rtogs pa'i// rgyal ba'i bden pa ston pas khyad par bstan pa 'di nyid ni/ / ci yang mi bsam cir yang mi dmigs 'di nyid bsam pa las/ mchod rten lha khang la sogs 'dus byas dge rtsa btang snyoms bzhag/ byas la sogs ba'i las ni zin par mi 'gyur byas shing rtogs pa'i rgyun/ / lus dang yul dang dbang po ngag sogs de yang mi dbye de bzhin gzhag par bya// yul nyid ye nas sangs rgyas kun tu bzang mo'i mkha' dang dbyings// dbang po gdod nas rnam par dag ste dkyil 'khor mchog gi mchog/ dka' thub brtul zhugs mi dgos pa la ci zhig sbyang du yod// sa nyid rnam rtog rlung ste rma 'bu spu dang sgo nga 'dra ste mtshungs// rtogs pas byang chub rnyed na phyi rol mu stegs pas/ / rtogs pa'i 'du mched shes pa'i dkyil bcug nas// byed pa po byas thar pa'i lam du rtse gcig rtog pas byang chub myur 'os na// skyes bu glen pa gad+gA'i 'gram du skam drir zhi ba ji bzhin byang chub med/ / mi gnas byang chub klong du kun 'dus sny-ing po rnams gsal te// gang la'ang mi dgongs ci'ang ye nas rnam par rol pa'i ngang las ma g.yos na// sangs rgyas 'phags pa'i gong na de bzhin snying po yin pa'o/ / de la sangs rgyas chos dbyings 'phags pa su yis gang nas btsal// phyogs bcu'i rgyal ba gang nas gtams gyur kyang// sangs rgyas kun gzhi byang chub sems las med par sangs rgyas gsung/ / sangs rgyas nyid kyang dang po'i rgyud med rang sems dag pa gang yin de kho na'o// bung ba me tog gzhibs kyang ma rnyed sprang rtsi'i snying po ltar// sems nyid ji ltar dag kyang mi stong sprul pa'i snying po 'byung bar 'gyur/ / de phyir thams cad ye sangs rgyas pa'i 'jings der rig pa bsam pas mnan// mnan pa'ang mi dmigs dbang po'i 'byung ba brtag/ phyi nang snod bcud kun 'byung gnas pa ye nas ci'ang med pa yin/ / ci yang med pa'i ngang las car yang bsam mi bya bar bzhag khams gsum yod sgrol rgyud drug gnam phyag btab nas ye sangs rgyas pa yin// rgyal ba sangs rgyas 'di las yod pa min te 'di dang so so min/ / snying po 'di la dkyil 'khor ma lus kun kyang rab tu ldan pa yin// bsod nams skal bar ldan pa'i rnal 'byor pas// 'di ston pa yis skyes chen rnal 'byor de yis don 'di bstan pa yin/ / mi 'gyur rdo rje lta bu'i don 'di bstan pas na// rdo rje slob dpon slob dpon zhes su bod// ro nye gzong gdabs bzhin du mi 'gyur de na gnas pa ltar// tshad ma tshad ma'i don ston rdo rje slob dpon chen po de/ / mig gi 'bras ltar 'phangs shing gces byas te// rin thang med pa'i rig chen phul nas kyang// don 'di tshig 'ga'i lan lon ma yin phyir// mig 'bras snying bzhin rang sar gces pa bzhin// de bzhin tshig gi tshad ma ma yin don gyi tshad ma 'di/ / sems dang bag chags dbyer med tha dad min pa bzhin// sangs rgyas rnams kyi snying phyung khung du 'jug byed pa'i// rdo rje slob dpon tshad ma dbyer med gzung/ / byang chub sems bsgom pa'i rgyud las/ rgyud kyi 'grel ba byang chub sems yin par bstan pa dang/ rgyud la bstod pa dang/ slob dpon dbyer med par bstan pa'i skabs bco brgyad pa'o/ /// gsang ba'i rgyud sa pa'i byang chub sems dpa'i rigs can/ dad pa dang spur ldan pa la sbyin pa las/ gzhan du ma gsungs so// byang chub sems dpa'i rigs la sbyin no// 'di 'dod dus su rgyud gnyis sbyin mi bya/ / 'di ster ba yi mtshan ldan skyes bu la// nang rgyud 'ga' zung rmad 'byung rgyas pa dang// byang chub sems sgoms gshin rje gnam rgyud rnams// skyes chen rnams kyi thob skal yin pas sbyin/ / mi 'gal tshul du sbyin lugs man ngag bstan// slob dpon slob bus 'di gzhung ma snyegs na// 'bras bu mi thob dmyal rgyu sogs pa mang// 'di gzhung snyegs na 'di gzhung kho nas 'grub// 'phags pa 'jam dpal rdzun med nyid kyis gsungs/ / dus med rtag tu byang chub sems dpa' spyad// rdzogs so/ / 'di skad bdag gis thos pa'i dus gcig na/ bcom ldan 'das byang chub kyi sems rdo rje de bzhin gshegs pa thams cad kyi sku gsung thugs rdo rje'i btsun mo'i b+ha ga la/ de bzhin gshegs pa mi bskyod pa dang/ rnam par snang mdzad dang/ rin chen 'byung ba dang/ snang ba mtha' yas dang/ gdon mi za bar grub pa dang/ sa rdo rje zhes bya ba'i byang chub sems dpa' sems dpa' chen po dang/ chu rdo rje zhes bya ba'i byang chub sems dpa' sems dpa' chen po dang/ me rdo rje zhes bya ba'i byang chub sems dpa' sems dpa' chen po dang/ rlung rdo rje zhes bya ba'i byang chub sems dpa' sems dpa' chen po dang/ dam tshig rdo rje zhes bya ba'i byang chub sems dpa' sems dpa' chen po la sogs pa brjod kyis mi lang ba dang thabs cig tu bzhugs so/ / gleng gzhi'i le'u ste dang po'o//// de nas mi bskyod pa la sogs pa'i de bzhin gshegs pa rnams kyis/ bcom ldan 'das byang chub kyi sems rdo rje de bzhin gshegs pa rnam par snang mdzad la 'di skad ces gsol to/ / bcom ldan 'das byang chub kyi sems rdo rje rang gi byang chub kyi sems ji ltar bsgom pa lags/ zhes gsol ba dang/ bcom ldan 'das byang chub kyi sems rdo rje bka' stsal pa/ byang chub kyi sems bsgom pa ni/ phyi'i byang chub kyi sems dang/ nang gi byang chub kyi sems dang/ gsang ba'i byang chub kyi sems bsgom pa'o// zhes bka' stsal pa dang/ rdo rje mi bskyod pa la sogs pas yang/ bcom ldan 'das byang chub kyi sems rdo rje de bzhin gshegs pa la 'di skad ces gsol to// bcom ldan 'das byang chub kyi sems rdo rje de bzhin gshegs pa/ byang chub kyi sems rnam gsum bka' stsal pa/ don gang las dgongs nas bka' stsal pa lags/ zhes gsol pa dang/ bcom ldan 'das byang chub kyi sems rdo rje de bzhin gshegs pas 'di skad ces dka' stsal to// yi ge e'i dbyibs bzang po la/ / dbus su baM gyis brgyan pa der// phyag rgya'i dkyil 'khor gang gsal ba// rang gi byang chub sems bsgom pa'o// nang gi byang chub sems bsgom pa// phyag rgyar gyur pa'i lus nyid la/ / 'byung ba bzhi dang 'khor lo bzhi// yum bzhi dang ni 'khor lo bzhi// yi ge'i tshogs dag bkod pa nyid// zhu ba gong bu gcig gyur pa// nang gi byang chub sems bsgom pa'o// gsang ba'i byang chub sems bsgom pa/ / de las skad cig nam grol ba// mi rtog ting 'dzin brjod du med// dngos min dngos dang bral ba min// dbu mar yang ni mi dmigs so// bcom ldan 'das byang chub kyi sems rdo rje de bzhin gshegs pas de skad ces bka' stsal to/ / byang chub kyi sems bsgom pa las/ gleng slang ba'i le'u ste gnyis pa'o//// yang bcom ldan 'das byang chub kyi sems rdo rje la 'khor rnams kyis mgrin gcig tu zhus pa/ thugs nyid rdo rje bdag po mchog/ ji ltar sems nyid blta bar 'tshal// gzu bo chen pos bshad du gsol// yang dag don nyid bshad du gsol// byang chub nam mkha'i mtshan nyid ni/ / sku nyid don rnams bshad du gsol// de bzhin gsung gi don rnams gsungs// de nas bdag po mchog ste byang chub kyi sems rdo rje'i ting nge 'dzin las bzhengs nas/ 'khor rnams la byang chub kyi sems rdo rje bstan par bzhed nas/ nyid kyi che ba dbyung ba'i phyir/ 'khor rnams la rigs kyi bu zhes bka' stsal pa/ khyed cag legs par nyan 'dod na// legs so legs so nyon cig khyed// legs so legs so byang chub che/ / dad dang gus par mnyan par gyis// e maho rgyud 'di brtag par dka'// e maho rgyud 'di thun mong min// byang chub nam mkha'i mtshan nyid de// btsal bas rnyed pa'i gnas med de// ma btsal bas kyang stor bral med/ / byang chub mchog nyid ye nas gsang// byang chub sems nyid rdo rje de// sku gsung thugs kyi gtso mchog rgyal// de yang ma mthong tshul gyis mthong// de bzhin gsung gi don rnams ni/ / rlung gi de nyid zhi gyur nas// sngags kyi de nyid gang yin pa// ye shes gshegs shing bzhugs pa'o// de bzhin thugs kyi rdo rje yang// ye shes gshegs shing bzhugs pa'o// nam mkha'i dbyings su gyur nas ni/ / rang bzhin gyis ni 'od gsal pa'o// byang chub kyi sems bsgom pa las/ bdag po mnyes nas bka' stsal pa'i le'u ste gsum pa'o//// de nas bdag po'i gtso mchog la/ 'khor rnams kyis yang gsol ba/ / bde bar gsheg pa don dam gtso// dmigs med byang chub de bzhin gshegs// rgyu nyid ma skyes 'dus ma byas// dbyings nyid zag med bshad du gsol// thabs rnams ma nor bshad du gsol/ / mi dmigs don dam bshad du gsol// de nas ston pa byang chub kyi sems rdo rje de bzhin gshegs pas/ nyid las mi gzhan pa'i 'khor la ngo mtshar skyes par gsungs ba/ e maho e maho zhes gsungs pa dang/ de nas 'khor gyis ngo mtshar du byung ba'i tshig de thos nas/ ngo mtshar chen por gyur te slar gsol pa/ bdag cag mos pa rgya chung la// byang chub nam mkha'i ngang las gsungs// smra ru ma chis don nyid las/ / sngon ma thos pa'i rmad byung dka'// tshig las 'das pa'i don nyid gsungs// gleng bral don nyid rmad byung dka'// bdag po don nyid bka' stsal 'tshal// byang chub kyi sems bsgom pa las/ / bdag pos ngo mtshar du byung ba gsungs pa dang/ 'khor yang ngo mtshar bar gyur pa bstan pa'i le'u ste bzhi pa'o//// de nas ston pa byang chub kyi sems rdo rje de bzhin gshegs pa nyid stong pa mi dmigs pa'i ting 'dzin las bzhengs nas/ 'khor gyi bsam pa thugs su chud nas bka' stsal pa/ bstan du med pa rdo rje'i sku// mngon par byang chub mi rtog 'dus ma byas// rgyu las ma bskyed rkyen gyis grogs ma byas/ / de nyid byang chub nam mkha' 'o// de las sku rnams rim gyis byung// 'di dang 'di zhes bstan du med// bsam gtan dus dag rnam grol mthong// dag pa'i sems nyid sgrib pa med/ rang bzhin gyis ni 'od gsal ba// 'di nyid don dam ngo bo ste// rtogs pa'i dus na ngo bo ste// 'bras bu'i ye shes thabs kyi sgo// rnam grangs tha dad dngos po gcig/ dngos po'i dus na de lta'o// don dam dmigs med brjod du med/ / tha snyad yi ge las 'das pa// bsrung du med pa'i dam tshig mthong// thabs kyi rim pa dam tshig mthong// ma rtogs dus na bsrung bar bya// de bzhin gshegs pa thams cad kyi sku dang/ gsung dang/ thugs rdo rje las/ byang chub kyi sems bsgom pa ste bsrung du med pa'i dam tshig bsrung ba bstan pa'i le'u ste lnga pa'o//// byang chub kyi sems rdo rje rnam par snang mdzad de bzhin gshegs pa nyid rnam par rol ba'i ting nge 'dzin las gzhengs nas/ don dam pa'i man ngag gi sgo 'di bka' stsal to// chos sku ngo bo nyid kyis dag/ rang bzhin gyis ni 'od gsal ba// de nyid gnyis med chos kyi sku/ / tshig las 'das te brjod du med// dus gsum mnyam pa nyid rtogs na// de nyid shes rab pha rol phyin// don dam gtso mchog rgyal ba'i bka'// smra ru med pa rnam dag las// sgra yig rnam par spangs pa'o/ / dang po dga' ba'i bag chags bzlog/ bar du A li kA li dang// 'khor lo bzhi dang 'byung ba bzhi// zhu bas phra mo thig le dang// ye shes gshegs shing bzhugs pa las// klu ni brug gu lta bu gyur// de las snang med brjod du med/ / rang bzhin gyis ni 'od gsal ba// de lta'i rim pa thams mchog btsal// tha mar dran med rgyu ba bcad// de ni rim par 'jug pa ste// bskyed dang phra mo thig le dang// ye shes gshegs shing bzhugs pa las/ / phrug gu lta bu'i sems la dmigs// de las rtags lnga byung ba las// rang bzhin gyis ni 'od gsal 'grub// de ni rim par 'jug pa'i thabs// rnam dag don ni chos dbyings te/ / chos dbyings zad ma ye shes te// dang por rtogs pas gnyis su med// de las rang byung ye shes ni// rgyu dang rkyen gyis ma bskyed 'byung// bag chags rgyu ba bzlog pa'i thabs// sngar gyi rim par 'jug pa ste/ / rang bzhin gyis ni 'od gsal ba// skad cig mas ni mtha' ru 'dzin// dbang po yul la yin pa ste// chos kyi dbyings la yin pa'o// lus ngag sems kyang steng chu bzhin// gzhan du g.yo ba med par gnas/ / byang chub kyi sems bsgom pa las/ rnal 'byor gyi don thabs kyi rim pa bstan pa'i le'u ste drug pa'o//// de nas yang ston pa byang chub kyi sems rdo rje de bzhin gshegs pa la/ / 'khor gyi de bzhin gshegs pa rnams kyis gsol ba/ byang chub kyi sems rdo rje de bzhin gshegs pa rnal 'byor gyi don la cig car 'jug pa ji ltar lags// zhes gsol pa dang/ byang chub kyi sems rdo rje de bzhin gshegs pas bka' stsal pa/ chos kyi rang bzhin ye nas rnam dag la// rang rig ye shes rang gi de bzhin gshegs// de las ma yengs rnal 'byor cig char 'jug/ ces gsungs so// byang chub kyi sems bsgom pa las/ rnal 'byor cig char 'jug pa'i le'u ste bdun pa'o//// de nas byang chub kyi sems rdo rje de bzhin gshegs pas/ 'khor rnams la gsang ba'i don gtad pa/ khyed la don mchog gsang ba 'di/ khyad par gsungs te ngas gtad do// gsang zhes bstan du med pa'i don// zab mo sangs rgyas kyis ma gzigs// don dam khyad par tha mi dad// 'dus ma byas pa skad cig don// rang rig sgribs pa spangs dag pa/ / nges bsgom mchog ste rtsal dang bral// yang dag nyid de dmigs su med/ khyed la ngas gtad thabs kyi sgo// de bzhin gshegs pa thams cad kyi sku dang/ gsung dang/ thugs kyi rang bzhin byang chub kyi sems bsgom pa las/ 'khor la gsang ba gtad pa'i le'u ste brgyad pa'o//// byang chub kyi sems bsgom pa'i rgyud rdzogs so// // bod skad du/ de bzhin gshegs pa thams cad rang bzhin byang chub kyi sems bsgom pa'i rgyud/ dpal rdo rje sems dpa' la phyag 'tshal lo// 'di skad bshad pa'i dus na/ bcom ldan 'das byang chub kyi sems rdo rje btsun mo'i b+ha ga la/ de bzhin gshegs pa mi bskyod pa la sogs pa rnams dang/ btsun mo dam pa spyan ma la sogs pa rnams dang/ byang chub sems dpa' sa'i snying po la sogs pa rnams dang/ lA se la sogs pa btsun mo rnams dang/ dam pa'i sgo ba gshin rje gshed po la sogs pa rnams dang/ de dag thams cad btsun mo'i b+ha ga la rang bzhin gyis gnas par gyur to// de bzhin gshegs pa thams cad kyi rang bzhin// byang chub kyi sems bsgom pa'i rgyud las/ gleng gzhi'i le'u ste dang po'o//// de nas de bzhin gshegs pa mi bskyed pa la sogs pa rnams kyis mgrin gcig pas gsol pa/ bcom ldan 'das byang chub kyi sems bsgom pa'i don dam gnas gang lags/ bcom ldan 'das kyis byang chub kyi sems rdo rjes bka' stsal ba/ byang chub sems kyi don nyid ni// mthong bas bltar med don nyid do// mtshan ma tsam na 'di rnams 'byung// 'byung gnas sum cu rtsa gnyis so/ / byang chub sems kyi yi ge las// mtshan dpe rnams ni lha rnams las// byang chub sems ni bsgom pa'o// chu zla'i tshul du rnam par gsal// byang chub sems zhes bya ba ni/ / dam pa'i skyes bu nyes pa spong// yang dag bden pa thar pa'i mchog/ byang chub nam mkha'i rang bzhin te// kun 'byung lam nyid yang gnas so// de bzhin gshegs pa thams cad kyi rang bzhin byang chub kyi sems bsgom pa'i rgyud las/ gleng bslang ba'i le'u ste gnyis pa'o//// de nas 'khor gyi de bzhin gshegs pa rnams kyis gsol pa/ byang chub sems ni rdo rje mchog/ bde ba nyid kyi 'byung khung tu/ / byang chub sems kyi gnas nyid nas// mtshan dpe shin tu rgyan pa yi// lha rnams thabs kyis ji ltar 'byung// zhes gsol pa dang/ bcom ldan 'das byang chub kyi sems rdo rjes bka' stsal pa/ yum gyi b+ha ga gzhal yas las/ / rdo rje rnam bzhi las bskyed pa// mkha' nyid gsang ba'i gzhal yas khang// byang chub sems las lhar gyur ba// stong pa nyid de byang chub sems// gdags su yod pa'i skur gyur pa// yi ge rnams la rab tu byung/ / brtan par shin tu red pa de// bskyed pa'i rim pa yin pa'o// de lta'i phyir na byang chub sems// sgom pa zhes par rab tu bshad// de bzhin gshegs pa thams cad kyi rang bzhin byang chub kyi sems bsgom pa'i rgyud las/ mtshan ma shin tu bstan pa'i le'u ste gsum pa'o//// de nas de bzhin gshegs pa rnams kyis gsol pa/ bde bar gshegs pa byang chub rdo rje'i mchog/ bskyed dang rdzogs pa ji ltar lags/ / de yi mthar phyin don gang lags// nyams su blang ba'i thabs gang lags// zhes gsol ba dang/ bcom ldan 'das byang chub kyi sems rdo rjes bka' stsal pa/ chos rnams rang bzhin dag pa las/ / skad cig ma la gsal gyur pa/ rdzogs dang bskyed pa zhes bya ste// 'di goms red pa lam mthar phyin// sems kyi skad cig dang po la// lus dang chos kun gnas pa'o// chos sku mkha' ltar lhar gnas pa/ / de la gnas pa ga la 'gyur// mi gnas pa nyid pha rol phyin// bde gshegs sa gsum rab tu gnas// snang dang mi snang dran sems med// mkha' la mkha' gnas dbyings la dbyings// mngon sum mi gnas mtshon du med/ / de bzhin gshegs pa thams cad kyi rang bzhin byang chub kyi sems bsgom pa'i rgyud las/ rdzogs pa'i rdzogs pa bstan pa'i le'u ste bzhi pa'o//// de nas rtsol ba dang bral ba'i 'khor gyi bde bar gshegs pa rnams kyis gsol pa/ bde gshegs byang chub sems dges mchog/ legs dges khyod kyis bka' stsol cig/ sku mi mnga' la bdag phyag 'tshal// gsung mi mnga' la de bzhin du/ / thugs la shin tu gus phyag 'tshal// zhes gsol pa dang/ de bzhin gshegs pa byang chub kyi sems rdo rjes bka' stsal pa/ nyon cig 'khor gyi bde gshegs rnams// rtsol bral don ni thugs nyid kyi/ / ye shes dag pa nyid yin te// dbyings la dbyings kyis bltas pas na// gang yang mthong ba med pa ni// de nyid mthong chen po yin// mkha' la mkha' nyid mkha' yi don// bgrod med pa zhes bya ba ste/ / bya bral rdzogs pa'i lung zheng bya// mkha' la mkha' bsam don de ni// bde gshegs rnams kyis de ma gzigs// bka' yang dag pa dpe med do// btsal na rtsol nad sangs mi srid// ma btsal ba ni ye shes rang/ / phyi nang chos rnams thams cad kun// chos kyi dbyings kyi rang bzhin yin// rang bzhin med pa'i don 'di la// rtog pa gang yang mi skye na// de bzhin gshegs pa de nyid yin// chos sku chen po zhes bya ste/ / ye shes de nyid nyams su blang// de bzhin gshegs pa thams cad kyi rang bzhin byang chub kyi sems bsgom pa'i rgyud las/ rtsol ba dang bral ba'i don bstan pa'i le'u ste lnga pa'o//// de bar gshegs pa rnams kyis gsol pa/ byang chub sems ni 'byung ba'i rtsa// sum cu rtsa gnyis nges pa ste// rtsa yi dbye ba bka' stsal 'tshal// zhes gsol pa dang/ bcom ldan 'das byang chub kyi sems rdo rje bka' stsal ba/ byang chub sems ni 'byung ba dang// bde gshegs rnams ni bsti gnas sa// steng sgo rgya srubs rtsa chen bzhi// mig rtsa gnyis dang rna rtsa gnyis// lce rtsa gnyis dang sna rtsa gnyis// 'gram rtsa gnyis dang lce'u chung gnyis/ / nu rtsa gnyis dang mchan rtsa gnyis// dpung rtsa gnyis dang lag ngar gnyis// pho zur gnyis dang bla rtsa gnyis// rje ngar gnyis dang long rtsa gnyis// mtheb rtsa gnyis dang sum cu gnyis/ / byang chub sems ni dkar dmar 'bab// de bzhin gshegs pa thams cad kyi rang bzhin byang chub kyi sems sgom pa'i rgyud las/ rtsa'i dbye ba bstan pa'i le'u ste drug pa'o//// de nas 'khor gyi bde bar gshegs pa rnams kyis gsol pa/ byang chub sems ni rdo rje mchog/ rang bzhin gnas pa bka' stsal pa/ mi dmigs bde ba bka' stsol cig khyab pa chen po bka' stsol cig/ nyag gcig dgongs pa bka' stsol cig/ ces gsol pa dang/ bcom ldan 'das byang chub kyi sems rdo rje bka' stsal pa/ nyon cig 'khor gyi bde bar gshegs// yang dag ma bcos sems de la// ci yang ma g.yos byung ba n-i// bag chags zad de de bzhin nyid/ / de bzhin nyid ces bya ba ni// gud na yod pa ma yin no// ye nas sems nyid nam 'kha' la// snang ba med pa thams cad snang// kun snang bde ba don dam ste// tshig dang yi ge kun las 'das/ / 'di las gdags pa'i chos gang med// de kho na nyid mi dmigs pa// mtshan ma'i byung tshor kun med na// dmigs med mkha' yi dbus zhes bya// kun pas bdag nyid rgyal ba'i thugs/ / sangs rgyas rnams kyi chen po zhes// grags dang ma grags sems med pa// e maho de nyid khyab pa ste// dmigs pa med pa'i mkha' zhes bya// dbyings la dbyings nyid rang rig na// bya btsal rdzogs pa zhes bya ste/ / stong pa la ni stong pa sgom// stong nyid ye shes dag pa ste// dngos dang dngos med gnyis kas stong// ye shes dang ni dbyings ma bskyed// mkha' la mkha' bsam mkha' yi don// rang bzhin med pas lhun grub sa/ / ye nas skye ba med pa'i don// byang chub sems ni bsgom pa yin// ye shes rang thabs ldan pa yin// gnas med mnyam pa bag la nyal// de bzhin chung ngu'i chung ngu zhing// de las gsum ni rang bzhin gnas/ / de bzhin gshegs pa thams cad kyi rang bzhin byang chub kyi sems bsgom pa'i rgyud las/ rang bzhin gyis gnas pa'i le'u ste bdun pa'o//// de nas 'khor gyi bde bar gshegs pa rnams la/ rigs kyi bu dag ces bos nas bka' stsal ba/ ngo mtshar rmad du byung ba yi// thabs chen gdams ngag rgyud mchog 'di// gsang ba'i nges don nyid yin pas// dad brtson ma yengs gsal ba'i don/ / byang chub sems bsgom dam pa dag/ skyes bu dam pa'i don du bshad// yongs su btad pas 'chang ba dang// klong pa dang ni don bsam pa// lha dang lha min ma lus 'dud// thams cad dngos po ma lus pa/ / zil gyis non par the tshom med// de bzhin gshegs pa thabs cad kyi rang bzhin byang chub kyi sems bsgom pa'i rgyud las/ 'khor la yongs su gtad pa'i le'u ste brgyad pa'o//// byang chub kyi sems bsgom pa zhes bya ba'i rgyud rnal 'byor dam ba rdzogs so/ /// rgya gar gyi mkhan po dz+nyA na gar+b+ha dang/ bod kyi lo tsa ba bai ro tsa nas bsgyur cing zhus te gtan la phab pa'o// // bcom ldan 'das rdo rje sems dpa' la phyag 'tshal lo/ / yi ge med pa'i rgyas pa/ 'khor thun mong ma yin pa rnams dang/ dper na til gyi gong bu ltar gang nas khyab par gnas so// byang chub sems dpa' rdo rje chos la sogs pas/ bcom ldan 'das la yi ge med pa'i chos kyi 'khor lo bskor bar zhus pas/ bcom ldan 'das las rang bzhin gyis 'od zer byung ste/ bde bar gshegs pa rnams rang bzhin gyis byon par gyur to/ / de nas rang gi mthus rab tu chem pa la sogs pa yang byung ngo// de nas 'khor de dag gis bdag po'i mchog la bstod de zhus pa/ bdag po mchog nyid rang bzhin snang// bdag po chen pos bshad du gsol/ / gzu bo chen pos bshad du gsol// yi ge med pa bshad du gsol// rang bzhin rgyas pa bshad du gsol// mtshan ma med pa bshad du gsol// rang bzhin gyis rgyud las/ 'khor gyis gleng bslang ba'i le'u ste dang po'o/ /// bde ba'i dbang phyug bcom ldan 'das de rnams par snang mdzad kyi skur byung nas/ mtshan ma med pa'i ting nge 'dzin las bzhengs te bka' stsal pa/ sems can ye shes bskyed pa'i thabs/ / byang chub chen po thob 'dod na// rgyud 'di rtogs par dka' ba ste// kun gyis mthong bar bya ba min/ khyed cag legs par nyan 'dod na// legs so legs so don dang 'tsham/ / legs so legs so byang chub che// legs so legs so gus par nyon// legs so legs so zhu ba legs// byang chub chen po'i thabs mchog 'di// blo dman rnams la mi snang ste// yang rab rnams kyi spyod yul lo/ / rang bzhin gyis rgyas pa las/ bdag po 'khor la mnyes pa'i le'u ste gnyis pa'o//// de nas 'khor de dag yi ge med par nam yang ma thos pa 'di thos nas ngo mtshar bar gyur te/ bdag po'i mchog la gsol ba/ yig med mtshan med spros pa// dmigs pa med pa'i don chen 'di// nam yang ma khums de ring khums// btsal med don dang de ring na// gzu po chen pos bshad du gsol// yi ge med pa rgyas pa las/ / 'khor dam ba'i le'u ste gsum pa'o//// de nas bdag po'i mchod de thams cad mkhyen pa'i ting nge 'dzin las bzhengs nas/ nam mkha'i dbye ba 'di bka' stsal pa/ sems can rnams la rang bzhin gnas/ / thabs kyi rim pa mchog dang ni// mtshan ma spros pa gnyis kun rgyud// thog ma'i bag chags byang ba de// rgyud kun gyi ni rtsa bar 'gro// bsam pa dang po la gnas pa/ kha dog rgyan dang kun la khyab/ / mthong ba yid kyis dmigs pa'o// 'di ni 'jig rten pa yi'o// 'jig rten 'das la'ang rnam pa gnyis// mtshan dang mtshan med gnyis su 'gro/// mtshan ma sku phyag rang bzhin med/ / mtshan med ma bcos rang nyid de// btsal pa kun dang bral ba'o// phyi dang nang dang gsang ba gsum// lus dang shes pa la sogs pa// kun la khyab pa'i mkha' ru 'gro// dbyings nyid mkha' ru shes pa ni/ / chos dbyings zang ma zhes bya'o// rang bzhin gyis rgyas pa chen po las/ nam mkha'i dbye ba bstan pa'i le'u ste bzhi pa'o//// de nas 'khor rab tu dang ba rnams kyis thal mo gdong du sbyar nas mgrin gcig pas zhus pa/ bde bar gshegs pa'i bdag po mchog/ nyag gcig dgongs pa bshad du gsol// de nas bde bar gshegs pa dbyings zab mo'i ting nge 'dzin las bzhengs nas/ 'khor gyi bsam pa mkhyen nas bka' stsal pa/ nyag gcig gdongs pa mtshan med de// 'di dang 'di zhes bstan du med// sangs rgyas kyis kyang ma gzigs te// sems can blo la ga la gnas// phyogs su bltas pas mthong ba med/ / mthong ba nyid na ma mthong ste// mthong med tshul du mthong bar bya// de ni nges sgoms mchog yin no// de ni nyal ba'i 'khor lo yin// sems la sems kyis bltas pa na// gang yang ma mthong gsal ba'o/ / nyag gcig dgongs pa de la bya// rang bzhin gyis rgyas pa chen po las/ bde bar gshegs pa nyag gcig gi dgongs pa bstan pa'i le'u ste lnga pa'o//// de nas bdag po'i mchog la gsol ba/ bde bar gshegs pas nyag gcig gis// lta ba zab mo bshad du gsol// dam pas khyad par bshad du gsol// bdag po'i mchog gis bshad du gsol// chos dbyings zab mo'i bshad du gsol/ / ye shes spyi blugs bshad du gsol// de nas bdag po'i mchog de zil gyis gnon pa'i ting nge 'dzin las bzhengs nas bka' stsal pa/ sems can kun la rang bzhin gnas// rgyu rgyud na ni gsang ba bzhugs/ / gsang ba gab pa'i don yin te// gang zag blo la ma snang bas// lta ba zab mo khyad par can// nga yis khyed la bstan par bya// dang po'i tshe na byung ba ni// rang byung rig pa chen po'o// chos dbyings ma bcos dbyings nyid la/ / ye shes skad cig gsang ba'o// sems kyi skad cig dang po la// skyed pa ma yin ma bskyed pa// dbyings yig oM ni mtshon par bya// muM gyis rab tu gsal ba'o// skyes bu rtsal mthu ldan pas ri/ / skad cig ma la gsal bar byed// kun gzhi la sogs nyon mong yid// 'di dag 'gyur bar ngas ma bstan// 'gyur na rim pa can du 'gro// de bzhin gshegs pa thams cad kyi rang bzhin ye ge med pa las/ / dbyings zab mo bstan pa'i le'u ste drug pa'o//// de nas bdag po'i mchog gi khyad par gyi 'khor la dam tshig gi le'u bstan pa/ chos rnams rtsa ba dam tshig ste// thar ba nyid dang ngan song yang/ / man ngag dam la rdzogs pas na// dam tshig 'di ni sa gzhi'o// mngon par bla ma mnyes par bya// bla med thar pa spang mi bya// 'di ni dam tshig rdo rje 'o// hUM phaT sngags kyang bzlas pa'o// 'di ni bzlas pa dam pa'i mchog/ bde bar gshegs pa'i sku gsung thugs kyi rang bzhin rgyas pa las/ dam tshig gi rtsa ba bstan pa'i le'u ste bdun pa'o//// de nas bdag po'i mchog des/ 'khor la rigs kyi bu zhes bos nas/ ngo mtshar ba 'di gsungs so// e ma rgyud 'di sla phyir dka'// e maho rgyud 'di mthong ba min// e maho dbang po rab kyi rab// de yi don du rgyud 'di bshad// e maho gdams ngag rgyud du byas/ / e maho nges don zab mo 'di// e maho nyag gcig dgongs pa'o// e maho thabs dam ma nor ba// e maho byang chub thob pa'i thabs// blo la blos ni snang bar gyis// blo la rgyud don snang bar gyis/ / de bzhin gshegs pa thams cad kyi rang bzhin rgyas pa las/ bdag pos ngo mtshar ba bshad pa'i le'u ste brgyad pa'o//// de nas yang 'khor la bos nas gsungs pa/ yang dag bde gshegs thugs kyi rgyud/ / gtsor byas bshad pa'i don 'di ni// 'jig rten dag tu grags pa yang// mang po'i don du ma bshad do// 'ga' yi don las ma yin no// zab mo man ngag rgyud mchog go/ lta spyod dam tshig dbang rnams kyang/ / nges don 'di las brtag par bya/ khyad par 'khor la thabs kyi rgyud// gsang mchog 'di ni ngas bshad do// thun mong ma yin 'khor mchog la// rdo rje 'khor lo ma bskor te// 'di ni gang du'ang ma bshad do/ khyed cag dad pa ldan par gyis// snod ni yang dag ldan pa'o// de bzhin gshegs pa thams cad kyi rang bzhin rgyas pa las/ bdag pos 'khor la gtad pa'i le'u ste dgu pa'o/ /// rang bzhin gyi rgyud rgyas pa yi ge med pa/ de bzhin gshegs pa thams cad kyi sku gsung thugs las byung ba mthong bar dka' ba'-i don rdzogs so//// rgya gar gyi mkhan po dz+nyA na gar+b+ha dang/ bod kyi dge slong bai ro tsa nas bsgyur cing zhus te gtan la phab pa/ skar sar bas kyang bsabs pa'o//// rgya gar skad du/ b+ho d+hi tsit+ta/ bod skad du/ byang chub sems bsgom pa/ bcom ldan 'das dpal bde ba'i mchog la phyag 'tshal lo/ / bcom ldan 'das de thams cad chos nyid zab mo la gzung bar dgongs nas/ chos kyi dbyings gteng dpags dka' ba zhes bya ba'i ting nge 'dzin la snyoms par zhugs te/ rang bzhin gyi dkyil 'khor nyid dang tha mi dad pa rnams la rang bzhin gsung du med pa 'di bka' stsal pa/ de'i tshe na thams cad chos nyid stong pa nyid du gyur to// byang chub sems kyi ngo bo ni/ / bsam med dran med mi g.yo ba// bsam pa bstan du med pa'o// tha snyad gdags su ga la yod// 'di ni brjod med spros las 'das// dge ba'i rmi lam lta bu'o// rnal 'byor dam pa'i lam zhes bya/ / grub mtha' ma nyam yongs su dag/ sangs rgyas sa la rang bzhin gnas// rdzogs pa chen po'i don zhes bya// de bzhin gshegs pa thams cad kyi rang bzhin gsung du med pa'i gsung gsungs pa'i skabs te dang po'o/ /// yang bde ba'i mchog gi ye shes gsung du med pa 'di bka' stsal pa/ chos nyid ji bzhin pa de la/ blo yang de 'dra bzhag gyur na// sems kyang skad cig dang po la// lus chos gnas pa don la rig/ de dus byung tshor shes 'jug med// bag chags rgyud chad rang byung shar// ye shes me ste skad cig la// de bzhin dbyings kyang skad cig ma// de dang de zhes dbyer med pa// de ni rgyun chags thams cad spangs/ / shes pa ye shes nyid du gyur// de bzhin sbyor ba'i lam pa yi// ye shes la reg mi gnas la// rang rgyud du ni bdud bzhi 'byung// 'jigs pa gzugs dang grags pa sgra// 'od kyi bdud dang slu ba rnams/ / byung tshe de la rig byas la// mi zhen mi chags lan 'ga' bsam// kun 'ong 'gro ba de nyid lam// shes pa khyad par can zhes bya/ ye shes gsung du med pa'i skabs te gnyis pa'o/ /// de nas yang bde ba'i dam tshig mchog des/ 'khor rnams la dbyings zang ma bka' stsal pa/ zhi ba'i dbyings te 'dus ma 'dus// rang bzhin bzang dang rab 'dres pa// rtsal med tshul du byung ba de/ / gang gi ma bslad rang bzhin dbyings// thog ma med pa'i rgyal po'o// skad cig rgyu 'bras med par dbyings// rgyun chad med pa dbyings la yan// btsal na rtsol nad sangs mi srid// btsal ba med pa dbyings kyi mchog/ de lta bu yi dbyings de la// de lta bu yi ye shes dbab// yang na dbab dang mi dbab med// shes rig bag chags rgyun de yang// gnyen po'i sgo nas mi gcod de// rang bzhin rang gis rtogs 'gyur ba/ / de yis bag chags rang bzhin dag/ rang ga'i bsam pa gya gyu ba// de red ba yang bde bar gshegs// gcig tu gzung par ngas ma bshad// ye shes de yang bsam pa'i dbang// bsam pa rang kha ma yin te/ / dbyings dang ye shes rab 'byor na// rim pa can gyi char gzung ste// rim pa med pa'i don de ni// yang dag pa yi dam pa'o// byang chub sems bsgom pa las/ dbyings zang ma bstan pa'i skabs te gsum pa'o/ /// de nas yang rang bzhin mtshon du med pa bka' stsal to// rang bzhin rang gi rtogs pa ni// dwangs snyigs med pa'i zab mo ste// rang kha'i tshe na yong med na// bsam pa mtshan ma can gyis ni/ / de la mi dpogs gya gyu can// gsal ba med pa rang bzhin gsal// gsal ba nyid ni grub mtha'i skyon// rang bzhin mkha' la rang bzhin sems// gsal ba rang bzhin rang bzhin gnas/ / shes rgyun de yang de bzhin tsam// de ni nyams med nyams zhes bya// lta ba rim pa ma yin la// sgom pas rim pa ma yin la// lta spyod gnyis ka rang bzhin tsam/ khyad par 'phags pa'i rang bzhin no/ / byang chub sems bsgom pa las/ mtshon du med pa'i skabs te bzhi pa'o//// de nas yang dbyings dang spyod yan pa 'di bka' stsal pa/ thams cad dbyings dang spyod yan pas// dbyings dang ye shes dbyer med pas/ / ye nas ma bcos chos dbyings la// ma bcos rig pa klong du yin// rang bzhin don dang ldan byas te// rtog ge'i spyod yul ma yin pas// dbyings dang ye shes gnyis med de/ / gnyis med bde ba'i rgyal po'o// de ltar ma yin rtog ge bas// bsam pa de la gnas pa na// gal te sems la gtad yod pas// btang bas mi thongs 'ching ba'i rgyu// gtang mi dgos pa'i skyes bu yis/ / nam mkha'i rten dang nang du bsdus// dang po'i tshe na 'di gnyis sgrib// dbang po yul la 'phros pa yang// de kha dbyings zangs shes rab mod// lan cig rdzogs chen don 'dod pa// rang bzhin bde ba nyams su blangs/ / bde ba snyam ste ma tshor 'chor// de bas chad pa zhi bar bzhag/ der bzhag ser 'od bong ba bzhin// dbyings dang ye shes skad cig la// med pa shes rab thabs rdzogs pa// de ni sangs rgya sa la gnas/ / gnyis su med par mi blta bas// de ni sangs rgya sa la gnas// de dag gting dpags dka' ba'i don// byang chub sems bsgom yi ge med pa las/ dbyings dang ye shes gnyis su med pa'i skabs bstan pa ste lnga pa'o/ /// de nas yang mthong med bltar med pa'i don dka' stsal pa/ mthong bas blta ru med pa ni// chu srin gre ba'i rin chen bzhin// nam yang bstan du med pa'o// mtshan ma kun dang bral bas na/ / btsal dang bral ba yi ge med// gtso dang bral bas nyams kyi gtso// mi dmigs sku la bltar med de// mi dmigs gsung thugs de bzhin yin// ma mthong bas na mthong ba che// thabs kyi thabs te dngos grub rmad/ / shin tu ngo mtshar rdzogs chen po// sangs rgyas thugs la mi mnga' ba// 'di rtogs go ba brgya nang na// gcig mi 'ong bar shin tu grags// lung du bsgom bsgrub kun dang bral/ khyab pas bde chen don zhes bya/ / mthong med bsam pas thams cad mthong// de ni nges sgom mchog chen po// sa dang pha rol phyin las 'das// de yi snang ba rang bzhin med// rang bzhin med pa'ang mi bsam ste// smra bsam yul las 'das pa'o/ / sems kyi byung tshor byung ba na// de kho rang bzhin rang zhi ba// nges don snying po bla na med// rnam rtog bsags pa'i 'phra rgyas kyis// log khrid don min rtas pa'i mthu// bzlog dka' gnyen pos bzlog pa min/ / rgyal las dmangs byung tha mar rgyal// rgyal po thu bo mi yi mchog/ rgyal bzung rgyal khams cham la phab// nges par bsad pas sdig mi 'ong// 'di ni slar 'tsho shin tu rgyal/ / mkhas pas rgyal po bsad gyur na// shin tu rgyal 'khor bsrang bar 'ong// lugs zlog bde chen sa las 'das// byang chub sems bsgom pa las/ mthong bar byar med pa'i skabs te drug pa'o// pa'o//// de nas chos nyid ji bzhin pa'i don bka' stsal pa/ sems mi g.yo ba sangs rgyas so// gang yang mi bskyed don de la// gang gnas chos nyid yin par bshad// gnas dang mi gnas gnyis med de/ / de phyir rnam pa thams cad mkhyen 'di ni sku yi dngos grub yin// chos nyid cir yang ma mthong ba// thugs la yang dag don ma log/ bzlas shing gsal bar ma gyur pa// gsung gi dngos grub shin tu yin/ / sa la mi rten lhun gyis grub// 'di ni lam rgan kun bong 'gro// thams cad 'dus pa'i dngos grub yin// rang bzhin rang la rang bzhin shar// rang byung rig pa zhes bya'o// 'di mi snang ba gnan snang med/ / gal te blo la snang ba de// don snang ma yin mtshan ma'o// de ni rang byung rin pa min// byang chub sems bsgom pa las/ chos nyid ji bzhin pa'i skabs te bdun pa'o//// de nas yang rmad du byung ba 'di bka' stsal pa/ sems mi g.yo ba bde ba ste// sems kyis sems 'ching mi tshor bas// sems la zhib pas brtag dpyad bya// shes bzhin gyis ni thang bcad de// sems kyis sems la bltas pa na/ / cir yang ma mthong ma yengs pa// bsgoms na ma sgoms bsgrub na nyams// de bas byung tshor ci byung yang// rang byung rang zhi bsgom pa'i gtso// rang byung rang zhi tsam ming gdags// sems kyi spyod 'jug thams cad kyang/ / yi ge med pa'i ngang du bzhag/ de ni rgyal po'i rgyal po'o// man ngag snying po'i rgyud ces bya// bde gshegs nyag gcig dgongs pa la// phyi rabs rnal 'byor don la ni// ya rabs bsam pa'i ting nge 'dzin/ / shes rab kyis ni don la dpyad// byang chub sems bsgom pa yi ge med pa'i rgyud las// rmad du byung bar bstan pa'i skabs te brgyad pa'o//// de nas sku gsung thugs su 'khor rnams rang bzhin gyi ston nas bka' stsal pa/ byang chub sems sgom pa yi ge med pa'i rgyud 'di mthong ngam/ thos sam/ nyams su blangs sam/ don rtogs sam// mngon du gyur tam/ zhes bka' stsal pa las/ de nas 'khor rnams kyis mgrin gcig pas 'di skad ces gsol to// byang chub kyi sems yi ge med pa 'di bdag cag gis ji ltar yang ma 'tshal lo zhes gsol pa las/ bde bar gshegs pa rnams slar yi ge med pa'i rang bzhin du 'dus so/ / byang chub sems sgom pa yi ge med pa bstan pa'i skabs dgu pa rdzogs so// // u rgyan skad du/ san+d+hi ma hA pra ka ra na tan+t+ra nA ma/ bod skad du/ rdzogs pa chen po lta ba dmar 'byam lta ba'i rgyud/ rgya gar skad du/ san+d+hi sarba ti la e ka spra sa ra ha ma ma hA spras d+hA tu a b+hi shi ke tan+t+ra nA ma/ bod skad du/ rdzogs pa chen po thams cad 'dus pa thig le nyag gcig lta ba gcod 'dral chen po/ dbyings chen po man ngag ces bya ba/ dpal kun tu bzang po thams cad 'byung ba'i rgyal po chen po la phyag 'tshal lo// 'di skad bdag gis thos ba'i dus gcig na/ rang snang dag pa chen po'i gnas ye shes thig le chen po'i sku/ rtag par mi 'gyur khong gsal chen po'i sku/ thugs yang dag pa'i ye shes chen po/ 'gag med gsung gis bdag tshig can// dri med ye shes chen po'i spyan mnga' la/ / dus gsum gcig pa'i mnga' bdag des// dri med rnam dag klong yangs nas// 'gag pa med pas bka' stsal pa// kye/ zer gyi ston pa kun bzang dang// rtsal gyi ston pa kun bzang dang/ / longs sku ston pa kun bzang dang// byang chub sems dpa' kun bzang la// dus gsum chos sku ngo sprad bstan par bya// zhes gsungs pas/ zer gyi kun tu bzang po dang// rtsal gyi kun tu bzang po la/ / longs sku'i kun tu bzang po yis// 'di skad ces pa'i tshig brjod do// rang bzhin kun bzang 'khor bcas rnams// thog ma med pa'i dus dbyings na// sangs rgyas sems can sngaun rol na// thog ma ji ltar gnas pa lags/ / de la 'khrul pa ci yis lan// tha ma 'khrul ba ji ltar zlogs// sangs rgyas sa na ji ltar gnas// thugs rje'i 'byung lugs ji ltar lags// lam gyi so mtshams ji ltar lags// theg pa rim dgu 'ong ba ci/ / 'bras bu'i don la dgu yod dam// ston pa rnam dgu bstan par bya// lta spyod dgongs pa dgu yod dam// de yis 'bras bu dgur 'byung ngo// de dag go rim ji ltar lags// lam mi rtogs dang ldog pa de/ / rtag tu 'khor ram grol bar 'gyur// zhes zhus so// lta ba gcod 'dral chen po'i rgyud las/ gleng gzhi'i le'u ste dang po'o//// san+d+hi ma hA mu dra pra sa ra d+hA tu/ e/ thugs rje longs sku kun bzang la/ / de la dri dgos mi mnga' ste// 'gro ba'i don la dgongs nas dris// rtsal gyi kun tu bzang po des// zer nyid rnam dag klong nas su// dgongs ba'i klong nas byin chen gyis// longs sku nyid la bka' stsal pa/ / thog ma med pa'i dus dbyings nas// dbyings nyid chen po zhes kyang bya// phyogs med chen po zhes kyang bya// de mtshon mthun pe 'gal ba'i dpe// de dag tshul du bdag gis brjod// thog ma med pa'i dus nyid na/ / mi stong kun stong stong pa rgya mo che// mi gsal kun gsal gsal ba 'od po chen// mi 'byung kun 'byung 'byung ba kun gyi gnas// mi snang kun snang snang pa kun gyi dbyings// mi 'char kun 'char thams cad 'char pa'i gzhi/ / mi mtshangs kun tshangs tshangs pa mdzod po che// mi srid kun srid srid pa kun gyi gzhi// ri bong rwa dang rus sbal spu// nam mkha'i me tog bzhin du cang med min// thams cad kun gyi gzhi ma yin/ / zhes gsungs so// lta ba gcod 'dral chen po'i rgyud las/ dus gsum gyi dbyings chen po'i le'u gnyis pa'o//// d+ha tu rat+na pra sa ra/ yang bka' stsal pa/ dbyings nyid chen po zhes bya ste/ / de yi dus na 'di ltar bstan// sems dang yid 'gyu 'dod dang ni// rig dang ma rig ye shes dang// sangs rgyas sems can longs sku dang// byang chub sems dpa' rnams dang sprul pa'i sku/ / theg pa rim dgu mu steg rtag chad dang// dngos grub sa rdul tsam mi mnga' 'o// dag dang ma dag grub dang ma grub dang// yin min yod med kun gyi gzhi ru gnas pa yin// stong ra chen mo zhes bya'o/ / sangs rgyas med pas stong pa 'dra// sems can med pas stong pa'i gzhi// sangs rgyas sems can 'khor 'das gzhi yin pa// stong dang mi stong kun gyi gzhi// kun gzhi dbyings zhes bya'o// ngo bo thams cad kyi gzhi ni/ / gsal ba zang thal chen po yin// rang bzhin stong pa'i gzhi yin te// thugs rjes mi 'gag pa yi gzhi// yon tan mi 'gyur pa yi gzhi// 'phrin las gang yang 'byung ba'i gzhi// srog gsum gcig la tshang ba'i gzhi/ / thugs rje rlang la rang bzhin nam mkha'i gzhi// ngo bo rig pa'i gzhi// yon tan 'gyur ba'i gzhi// 'phrin las gcod byed yid kyi gzhi// zhes gsungs so// lta ba gcod 'bral chen po'i rgyud las/ gzhi dngos po bstan pa'i le'u ste gsum pa'o//// d+hA tu kar+m+ma pra sa ra/ yang bka' stsal pa/ dbyings dang sgrub byed gzhan sel te// kun gzhi'i 'phrin las bstan pa'i le'u ste// phyi dang nang dang gsang ba'o/ / de la phyi yi 'phrin las bzhi// thugs rje'i yi dwags las byed bzhi// rang gzhi'i byol song yon tan mi yi gzhi// 'phrin las 'gag pa med pa de// lha dang lha min 'phrin las bzhi// des na phyi yi 'phrin las bzhi/ / nang gi 'phrin las bstan pa ni// ngo bo zhi ba rang bzhin drag po yi// yon tan rgyas pa 'phrin las mngon spyod bzhi// spyod pa'i khyad par bstan pa ni// ngo bo rig pa las kyi gzhi// rang bzhin ma ni snang ba'i bzhi/ / thugs rje ma ni rlung gis las byed bzhi// yon tan 'gyu ba'i 'phrin las bzhi yin no// 'phrin las thog med yid kyi gzhi// yang gsang sangs rgyas 'phrin las bzhi// bzhi lnga shes na ye shais 'phrin las gzhi/ / ye shes lnga ste rang 'byung las kyi bzhi// sku lnga ye shes lnga rtsegs dang// thugs dang spyan lnga rtsegs pa'i gzhi ma yin// sangs rgyas gsungs lnga'i 'phrin las ni// chos cha re la re re tshang bas gsungs chen lnga/ / de yi lnga rtsegs gsungs lnga'i 'phrin las te// yon tan lnga rtsegs 'phrin las lnga rtsegs las// de yang gzhi la tshang bas kun gzhi yin// zhes gsungs so// lta ba gcod 'bral chen po'i rgyud las/ gzhi'i spyod 'bral las kyi bzhi bstan pa'i le'u ste bzhi pa'o//// d+hA tu ra ti pra sa ra/ de nas yang bka' stsal pa/ ston pa rgya chen gsal ba rgya chen dang// mi 'byung kun 'byung 'byung ba kun gyis lan/ / mi gnas dgu gnas snang gzhi kun gyis len// mi srid dgu srid srid pa kun gyis len// de yang ji ltar len ce na// ri bong rwa yang rung yang brdo// mo sham bu ni skye yang brdo/ / nam mkha'i me tog mchod pa 'bul// rus sbal spu ni 'breg yang brdo// pha med ma med bu ni 'khyam yang brdo// sangs rgyas pas ni de lnga'o// sems can pas ni de lnga'o// bde gshegs sku bas de lnga'o/ / grib ma'i 'od la chags sdang skye// skye ba snga ma'i dus yin no// rang snang gsang 'byung ngas ngo shes// sku lnga ye shes thugs dang gsung// yon tan 'phrin las lnga rtsegs shar// 'od ni sangs pas sku gsung rgyas/ / rtogs pa bzhi la mngon 'gyur 'od dang 'gyu ba yid// sangs pa rgyu lnga lam lnga 'od// rgyas pa lnga rtsegs dgongs pa shar// lnga pa 'gyu ba rag pa 'od// gzhi las 'das pas sangs rgyas pa// snga rab 'das pa'i sangs rgyas yin/ / de yis thog ma shes pas na// thog ma bzhi shes gtan tshigs 'god pa nga// nga med pa yi sngon rol na// gzhi shes bya bar 'dogs mkhan nga// nga yis gzhi shes sangs rgyas pas/ zer dang rtsal gyi kun bzang gis/ / sangs rgyas chos sku zhes su brjod// nga yis byin brlabs brjod pa yis// thugs rje sprul sku 'byung ba yin// mi 'char dgu 'char thams cad 'char ba'i gzhi// thugs rje sprul sku byang chub sems dpa' yin/ / mngon par shes pas dus gsum gzigs pa yang// ma g.yengs dus na mkha' dbyings chen por gzigs// mar ldan 'gro drug 'khrul dang yar ldan 'bras bu gzigs// skye ba dag la snga ba rdzus te 'gro drug skye ba gzigs/ / rig dang ma rig las 'bras 'byung bar gzigs// mtshan nyid 'dul dang gsang sngags 'dul ba gzigs// chos sku ngo sprod rtsol med rang grol gzigs// de rnams 'bras bu dus tshod rang sa gzigs/ / btul bas mi thul 'khor bar gnas par gzigs// de ltar dbyings su shes pa de ltar yin// dbang po yid dang rang rig mngon sum dang// rnal 'byor mngon sum tshad mas de ltar gzigs/ / zhes gsungs so// lta ba gcod 'bral chen po'i rgyud las/ dus gsum gtan la dbab pa'i le'u ste lnga pa'o//// ma nu A ti ta khya spra sa ra/ yang bka' stsal pa/ ma rig so mtshams ngo sprad pa/ / ngo bo nges tshig mtshan nyid dang// dbye ba dpe dang rtags don bstan par bya// gzhi la shes pas ngo bo yin// 'od la ltos pas nges tshig yin// ma rig mtshan nyid gzung 'dzin la// dbye ba rnam pa bzhi yin te/ / lhan skyes ma rig ma ni gsum// kun brtags ma rig 'od lnga la// rang snang ma shes rtags pas skyes// las nyid rgyu 'bras la rmongs pa// las ni rgyu ba'i rlung yin no// las yul rang snang 'od las spyad/ / 'bras bu rgyu mthun drug tu smin// des na rmongs pa ma rig pa// 'gro drug 'khor zhing rgyu drug 'khyam// de kho na nyid las rmongs pa ni/ kho na nyid ni gzhi yin te// de ngo ma sprad pas rmongs pa/ / des na rdzus te skyes zhes bya// 'byung ba 'dus nas pha las skyes// de ni mngal skyes zhes bya ste// skye gnas kun la 'chi ba yin// drod gsher skye ba dus gzung dka'// thig le 'od kyi tshom bu las/ / sgong skyes bya ba rdzus dang 'dra// skye ba bzhi 'am lnga yi gzhi// bzhi la ma mtshangs skye ba med// ngo bo thig le sgong skyes bzhi// rang bzhin stong pa mngal skyes bzhi// thugs rje 'gag med rdzus skyes bzhi// ngo bo gsher las skye ba'i bzhi/ / thugs rje grong las skye ba'i bzhi// ri bong rwa yis brdungs pa yis// skye ba thams cad 'phrin las bzhi// rang bzhin stongs pa lta bu ste// skye bzhi'i rtsa ba ma chod na// rtag tu rtsol ba tshe chad 'gyur/ / ces gsungs so// lta ba gcod 'bral chen po'i rgyud las// ma rig shan dbye ngo sprod pa'i skye ba rtsad gcod kyi le'u ste drug pa'o//// ti la e ha spra sa ra ha ma nu ta ra// thog ma med pa'i dus nyid na/ / sems can lus 'di ji ltar len// ma ning rlung du skye ba de// thugs rje 'gag pa med pa'i rlung// ma ning thugs rje 'gag med yin// ma ning snang bar skye ba ste// ma ning rang bzhin stong pa yin/ / ma ning rig par skye ba yi// ma ning ngo bo gsal ba yin// 'phrin las yid du bcos ba ste// des skyes ma ning 'phrin las thog med yin// yon tan skye ba'i dus nyid 'gyu bas te// ma ning yon tan 'gyur med yin/ / skye ba lnga yi rtsa ba yin// de ma chod par gzhan rtsad gcad// lcags mkhar mkha' la rdegs pa 'dra// srog 'phrog phra ste rgyab pa med// rkyen ni 'od lnga rang gis phyed// de dus skye shi rtsa ma chod// chu chung nya chen 'dzin pa 'dra/ / lag rdum brag la 'dzeg pa 'dra/ yan lag med pa rkyal byed 'dra// bya long nam mkha'i mtha' 'tshol 'dra// long ba nang thab byed pa 'dra// 'bras bu 'byung ba ngas ma mthong// nor bu chu dngas chu la 'phyar ba ltar/ / nyon mongs rnyog ma skad cig rang sar grol ba 'di// tshul chos che ru re la byin na dbang po kha 'gro 'ong// shes rab dad pa yon tan dang dang gus par ldan srid de// de rnams ldan pa'i gang zag 'dzam bu'i gling na 'dug ba ngas ma mthong/ / gdam pa'i ngo sprod dngos su ston pa 'di// phyal bar ma gtang yun du 'jo shes mdzod// srog dang sngo ba'i byang chub sgrub zer kyang// lo 'ga' lon nas dad pa ldog srid kyis/ / chu srin gre bar rin chen tshud pa ltar// zags su ma gzhug kha ru ma 'don cig/ de ltar ma byas chu srid klu yi rgyal pos gsad// de dang 'dra ste gnyis ka dmyal bar 'gro/ / dmyal pa sgrub pa'i ngo sprod 'di ma dgos pa ngas ma mthong// rang rgyud srid cing kha phyar stong// gdam pa 'dod cing 'phrel nas rgyab log byed// ngo sprod gzhus nas dmyal ba'i grong kha 'grim// dmyal dpon chos kyi rgyal pos de ma 'brel/ / gnyis char ngan te spre'u la bsgoms pa slob// sgom pa byed pa 'dra zhing sems can gsod// des na rang phung gzhan nas rlag/ ces gsungs so// lta ba gcod 'dral chen po'i rgyud las/ skye shi rtsa gcod ngo sprod pa'i le'u ste bdun pa'o//// de nas yang bka' stsal pa/ ma rig pa las lus blangs te// ma ni mkha' dbyings chen po yin// de ma shes pas ma rig pa// ma rig pa la rgyu lnga ste/ / phra rag ma rig rgyu lnga'o// gzhi ni zhing dang 'dra ba de// rgyu ni sa bon rkyen ni chu lta bu// 'bras bu du mar snang ba ltar// rkyen lnga skyed de bar do ru// las drug tshang ste 'bras bu rdzus skyes drug/ de gzigs rgyu rkyen gzhi sbyar te/ / bkri drang tshul du chos kyi sgo mo yang// brgyad khri bzhi stong gnyen por bshad pa tsam// gang zag la'ang rnam pa bzhir shes te// chu shing lta bu'i gang zag de dag dang// dngul rdo lta bu'i gang zag dang/ / gser gling lta bu'i gang zag dang// nor bu rin chen man shel gyi med pa'i// gang zag rnam pa bzhi la dpe dang sbyar te bshad// snyan rgyud rdzogs chen rang gis ngo sprad nas// dper na skyur ru ra ni rlon pa de/ / phyi nang med par gsal bas dpe yi tshad du skyol// de bzhin du bsgrub mtha' phyogs med lta ba'i dras thag chod pa yis// ji ltar brjod med smra ba yin 'dug cir byas kyang// thams cad ma lus rang sgo rang snang bas/ / grub mtha' gcod chen yin par brjod// chos sku'i yang rtse kun bzang byin brlabs 'di// seng ge'i 'o ma rin chen phyil phul blugs pa ltar// gang la btang yang bdud rtsi sman chen yin/ / snyan rgyud rdzogs chen seng ge'i 'o ma 'dra// rin chen phyil bu'i gang zag la// btab pa tsam gyis sku gsum dgongs pa 'char// seng ge'i 'o ma ru dong bzhos pa na// ru dong chag nas 'o ma 'thor ba yis/ / 'dzam bu'i gling du slob ma mnar med 'gro// ru dong nang du 'o ma 'jo lugs ni// slob ma ngan pas gdam pa gsang mi thub// mchu 'khyer nas kun la sgrogs par byed// gdam pa 'thor nas mnar med dmyal bar 'gro/ / slob dpon slob ma gnyis kyang dmyal bar sreg/ kun bzang rdo rje sems dpa' me chen spar// dga' rab rdo rje la sogs thub pa'i me bskul nas// rdo rje dmyal chen thar ba'i dus med sreg/ de bas ngo sprod bstan pa'i snod med do// zhes gsungs so// lta ba gcod 'dral chen po'i rgyud las/ 'gro drug lus dngos bstan pa dang// thugs rjes snod rtag pa'i le'u ste brgyad pa'o/ /// ma hA ya na spa na spa na du ne/ 'gro ba drug po 'di dag ni// lam dang lam gyi cha rkyen dang// de la rtsod ba'i gags med na// 'gro drug rang gis gnas las ni// thar ba'i dus ni mi 'ong pas// lta ba'i dmar byang bshad par bya/ / ma rtogs sems can ma rig pa// de yi ngo bo nges tshig dang// mtshan nyid dbye ba gong dpe dang// rnam pa lnga ru mdor bsdus bshad par bya// ma hA pra dz+nyA d+hA du/ 'gro drug ma rtogs las kyis ni/ / rtag tu 'khor bar 'khyam pa yin// rtag tu ltogs bab lta ba yin// mu stegs chad par lta ba log/ de yang phyi me 'dang de// rang bzhin stong pa ma rtogs logs// rig pas brtags te sprin dang chu sbu ltar/ / blo bur ba yis lus blangs te// drod gsher 'dus pas sems su snang// rdul dang mun pa'i snying stobs kyis// blo bur ba ru lus blangs te// sngo nga ma shi ci bder spyod// shi nas 'dir tshogs 'byung mi srid/ / thig le dkar dmar drod gsher las// pha mas bsrubs cing sbyor ba'i dus// rdo rje b+ha ga 'thabs pa yin// de rlung sems su gyur pa las// sems shes bya blo bur ba// tha ma 'chi ba'i dus nyid na/ / dbugs chad dus na ag zer nas// dbugs gsum 'byus nas mkha' la thim// lus ni 'byung ba lnga la zha// sems ni nam mkha' stong la thim// dang po sems nyid dbyings la gnas// tha ma sbyor dus sems su shar/ / tha ma nam mkha'i ngang du 'gro// sprin dang 'dra ste phyis mi 'byung// de yang rang bzhin log pa ru// byang chub sems dpa' khyod nyon dang// phyi med zer na brtag ste 'chad// nyams su myong na med ces 'gag/ / ma myong gtan tshig su la grub// skad cig 'gag dang phyi ma skye// de yi bar mtshams ma shes pas// brtags te chad pa nyon re mongs// ljon shing thal ba rlung khyer smra// de yang grub pa ma yin te/ / skad cig snga phyi yod pa'i phyir// lta ba gcod 'dral chen po yin// mu stegs rtag par lta ba de// lung rig man ngag dag gis bsgrub// yon tan 'gyur med log par rtogs// de yang ji ltar rtogs zhe na/ / sems can nga ni rtogs pa yin// blo 'gyur bdag rtags gcig pu nyid// bu srin sa bon 'bras bu bzhin// rgyu rtags rkyen dang 'bras bu rtags// sems dbugs chad pas dus su ni// rtags pa 'theb long nyungs 'bru skra rtse tsam/ / lus kyi bong dang sbyar nas ni// rtsa bcag bye'u 'phur tshang 'jug ltar// lus 'di bor nas sred len dus// ma yin mngal du 'jug par byed// mi nyid shi ba'i blo bur de// rtag pas mi lus len pa nyid/ / de yang lta ba log bas na// de yi gcod 'dral 'di lta ste// gcig bu rtag zer blo bur 'gyur// ci ste sgra zer 'gag pa'i phyir// nyams su myong nas rtag zer nyams myong lus pas mi rtag pa/ / de yang lta ba tshad ma man te log/ dper na ma yi mngal kha ru// pha yi thig les sa bon rgyu// de btabs bu pho long bar rig/ sran 'bras ngan btab bzang btab pas// 'bras bu de ltar dman par rig/ ces gsungs so// lta ba gcod 'dral chen po'i rgyud las/ ma rtogs log rtogs kyi lta ba bstan pa'i dmar 'byam chen po'i le'u ste// gong thag bsdam pa dang ra bar gzhug pa/ mtshon chas bsnun pa'i le'u ste dgu pa'o/ /// ma hA yA na pra sa ra/ nyan thos lta ba dman pa yang// thugs rje 'gag med ma rtogs pas// shes rab snying rje chung ba yin// des ni ye shes de bas chung// de yang ji ltar chung zhe na/ / mu stegs rtag pa rdzas yod de// so sor rtog pas brtags pa yis// bdag med de la lta ba zer// bdag med nyams su ma myong na// med brjed su la rjod par byed// brjod bya de rang bdag tu snang/ / rdzas yod bdag med khas blangs kyang// nyams myong yul min yul ni rdzas// phyi rol rdul phran rtag par 'dod// nyams su ma myong rtag par ni// myong na sems rtag 'dus byas 'gyur// ces gsungs so/ / nyan thos kyi lta ba gcod 'bral gyi le'u ste bcu pa'o//// de nas yang bka' stsal ba/ rang rgyal lta ba chung ba yang// rang gi thugs rje ma rtogs te// 'dzin pa tsam cig yod pa las// phyi rol rdul phran sgyu ma tsam/ / phung po bdag med sa ru 'dod// de yang 'dzin pa rtag ce na// nyams su myong na rtag pa nyams// ma myong rtag ces gang la srid// ces gsungs so// theg pa chen po sems tsam gyis// rnam pa bden dang brdzun par 'dod/ / ngo bo gsal ba ma rtogs pas// rnam pa brdzun pa yin pas na// bla ma'i gdam ngag rnam pa yin// de brdzun phyir na dgos pa med// rnam pa bden par 'dod pa ni// bden pa nyams su ma myong phyir/ / bden pa 'du byas ces sangs rgyas so// rang rgyal dang sems tsam pa'i lta ba'i gcod 'bral gyi le'u ste bcu gcig pa'o//// de nas yang dag bshad bya ba// byang chub sems dpa' kun bzang gis/ / rang bzhin rtogs pa'i don ma rtogs// chos med sgyu mar 'dod pa dang// ye shes sgyu mar 'dod pa ni// nyams su ma myong ci yis shes// myong nas ye shes 'gyur ba'i phyir// ye shes de la dgongs pa med/ / sgyu mas sgyu ma bslu pa dang// sgyu ma skad cig skye 'gag pas// 'bras bu skye 'gag can du 'gyur// rang bzhin stong par ma rtogs pas// chos rnams stong par 'dod pa ni// de yang chang chad gol bas lta ba ngan/ stong nyid nyams su ma myong na/ gtan la phab la dgos pa med// myong na blo yin dam bca' nyams// don dam kun rdzob 'dod pa ni// don dam blo bur ma grub pas// bya ba thams cad don med 'gyur/ / kun rdzob snang ba 'du byas yin// 'brel med chos spyad don med do// 'brel yod gang dang 'brel kyang ni// mi dgos dgos med skyon du 'gyur// ces gsungs so// rgyu'i lta ba'i spyod 'bral chen po'i le'u ste bcu gnyis pa'o/ /// de nas yang dag bshad bya ba// byang chub sems dpa' chen po nyon// ngo bo rang bzhin thugs rje ma rtogs te// lta ba chos nyid klong yin la// rigs gsum mgon po sgrub par byed/ / rje dang bran yin zer gyis bsgrub// chos nyid lta bar ma rtogs so// mi tshe grangs bdun rje 'bangs bsgrubs// de yang lta ba dman pa ste// chos nyid zab mo nyams myong na// chos nyid lta ba 'du byas 'gyur/ / ma myong shes par mi 'gyur ro// rje dang 'bangs su bsgrub zer na// nyams su ma myong rje 'bangs gang// myongs na myong bya sems su gcig/ rje dang 'bangs zhes gang la bya// rje gshegs dus na 'bangs 'das te/ / ngan pa las te bzang po song// ngo bsrungs mchod pa su la phan// 'bras bu mthar ma phyin te bzang ngan snang// chos nyid bzang ngan med zer na// rje 'bangs sgom pa dgos pa med/ / sems kyi rnam sprul yin ce na// rnam pa rig gsum bco lnga pa// chos nyid du mar 'gro bar 'gyur// mi 'gyur rnam pa ga la sgrub// grub na gcig po dam bca' nyams// don dam rtogs pa'i byin rlabs kyis/ / kun rdzob lha yi sku ru 'dod// rgyal ba'i sku dang don dam gnyis// gcig gi tha dad 'brel ma 'brel// lha ru gcig na 'dus byas 'gyur// don dam gcig phyir lha snang 'gag/ tha dad byin rlabs dam bca' nyams/ / nyams su don dam ma myong na// byin rlabs 'byung zhes ci la bya// myongs na don dam blo bur ba// spun dang grogs po ltar snang zer// grogs po 'gag pas bdag mi 'gag/ 'gags na grogs dang bdag nyid gcig/ mi 'gag lha skyed mchod phul bas// don dam rtogs par ga la 'gyur// rtogs na lha ni kun rdzob la// don dam 'dus ma byas pa'i phyir// lha bskyed mchod pa blo bur 'gyur// zhes gsungs so/ / lta ba gcod 'bral chen po'i dmar byang seng khyim gyi rgyud las/ rang snang 'khrul pa phyi par bstan pa'i le'u ste bcu gsum pa'o//// chos nyid don dam nam mkha'i ngang nyid la// skye ba med pa'i chos nyid las skye ba'i/ / cho 'phrul rigs lnga la sogs 'khrul par 'dod// de yang 'phrin las ma rtogs te// chos nyid skye ba med zer bas// skye ba'i cho 'phrul dam bca' nyams// skye ba nyams su myong ba na/ / ye shes lha nyid 'dus byas 'gyur// ma myong skye zhes ga la bya// skyes pa 'gag phyir sku mdog 'gag/ skyes pa 'dus byas yin pa'i phyir// ma myong skye ba su yis shes// don dam mi skye zhes smra na/ / nyams su myong ste mi skye 'am// myong ba skyes nas 'dug pa'i phyir// skye ba med ces ji ltar brjod// ma myong mi skye ci yis shes// lung dang rigs pas shes zhe na// rig pa nam mkha' ltar zer na// nam mkha' skye ba med pas te/ / sku tshogs gang la skye bar 'gyur// skye na skye med dam bca' nyams// skye ba med las skye zer na// rang gis tshig gis gsal bar 'byung// skyes pa las kyang bu skye bar 'gyur ro// zhes gsungs so/ / sgyu ma'i lta ba gcod 'bral gyi le'u ste bcu bzhi pa'o//// de nas yang dag bshad bya ba// rang gis rigs pa rtogs pa yis// dbyings dang ye shes gnyis med de// sku dang ye shes skur snang ngo/ / cho ga gsum dang dkyil 'khor gyi byin brlabs las 'byung zhe na// de yang lta ba ngan pa ste// chos gsum gzhi ni ma rtogs pas// de la rig pa'i ye shes gcig nyid de// dgu ru snang zer rang tshig 'gal/ / dbyings dang ye shes gnyis med phyir// dgu ru snang bas dam cha nyams// yang sku dgu ru ye shes pa'i// nyams su myong ngam ma myong zhes// ma myong dgu ru ci yis shes// myong na gnyis med dam bca' nyams/ / zhes gsungs so// sems nyid skye ba med zer nas// rol ba mtshan nyid gnyis med zer// blo nyid ngo bo rang grol smra// sems la skye ba med pa de// nyams su ma myong ci yis shes// myong na myong mkhan blo yin phyir/ / skye ba med pa'i dam bca' nyams// rol ba 'gag med smra zhe na// rang gi tshig gis gsal ba 'byung// mtshan nyid gnyis su med ce na// gnyis med nyams su myong ma myong// ma myong gnyis med su yis shes/ / myong na gnyis med dam bca' nyams// ngo bo blo grol zhes smra na// skye med grol lam skye yod grol// skye med grol na skye yod thal// skye yod grol na dam bca' nyams par 'gyur// mi sdegs pa yis ka bden bzhi/ / dam pa'i mtho bzhi shes par bya// dbu pa'i gdung chen rnam pa bzhi// ka nas dag ces smra ba de// rtogs te dag gam ma rtogs dag/ ma rtogs pa ru su yis shes// rtogs pa lam yin dam bca' nyams/ / lhun gyi grub ces smra ba na// sangs rgyas dag tu grub ma grub// ye shes grub dgos rang tshig 'gal// nges med 'bras bu ngo log 'gyur// mi 'gyur rang gi dam bca' nyams// ma rig mi rig dus med de/ / rgyun thos bsam don med par 'gyur// skad cig blo bur mi rtag 'dus byas pas// dgos pa med pa'i skyon du 'gyur// dbub pa'i gdung bzhi zhes bya'o// bsdeg pa'i mtshon ni phyogs re yin/ / bkrigs pas thag pa dam bca' 'o// gzung pa'i ra ba rang gzhung ngo// rgol pa'i dgra ni phyogs rtogs so// dgra tshar bcad pa'i rig pa'o// pha rgod gsad pa'i ston mo bya'o// sha rus khrag tshogs gtor ma btang/ / pags pa nam mkha'i mtha' la rkyang// mgo bo gtan gtun bar du brdungs// rkang bzhi bcag la tsho sngor bya// don snying byung la zhal du btab// nang rol gyi yi ston mo bya// lus po mgo rus bsgral bar bya/ / spyan mig nyi zla gangs dkar rtse la brkyal// snang ba rigs gsum rtse ru 'don// sna ni chu bo'i gzhung la gtang// lce ni brag dmar log la dgram// 'og sgo rlung la bskur te gtang/ / zhes gsungs so// lta ba dmar byang chen po las/ lta ba'i gcod 'bral gyi brda bstan pa'i le'u ste bco lnga pa'o//// lta ba gcod 'bral chen po 'di// nor bu rin chen lta bu'i rgyud// rgyud kyi rgyal po chen po 'di/ / longs sku'i kun bzang sogs la gtad// ces gsungs so// rgyud kyi rgyal po lta ba'i sems khyim 'di// bdag cag 'khor dang bcas pa la// thugs rjes gnang ba rjes yi rang// bdag gis legs par bzung bar bgyi/ / zhes gsungs so// rgyud gtad pa'i rjes yi rangs le'u ste bcu drug pa'o// rdzogs so// rgya gar skad du/ sarba d+harma ma hA san d+hi b+ho d+hi tsat+ti saM sA ra mU la tshe da ma hA A kA sha sa man ta dz+nyA na pra b+ha tan tra/ bod skad du/ chos thams cad byang chub kyi sems rdzogs pa chen po 'khor ba rtsad nas gcod pa nam mkha' dang mnyam pa ye shes 'od kyi rgyud/ ye shes 'od kyi dam pa de la phyag 'tshal lo// 'di skad bshad pa'i dus na/ chos nyid kyi mkha'/ ye shes kyi klong/ 'og min rig pa'i gzhal yas na/ bcom ldan 'das mngon rdzogs rgyal po bzhugs so// rang bzhin gyi 'khor dang// rang bzhin lta ba'i 'khor dang/ rang bzhin gyis rtogs pa'i 'khor dang/ byang chub sems dpa'i 'khor rnams dang thabs cig go/ de'i tshe lha'i dbang po brgya byin gyi phyogs bcu'i sangs rgyas thams cad la/ lha de ba bzang skyong gi bu sems lhag can des 'di skad du bskul te// dus gsum sangs rgyas thams cad kyis// rgyu yi chos rnams mthar phyung nas/ / 'bras bu'i chos ni mi gsung ba// thugs rje chen pos yal lam ci// gdul bya skal ldan yod pa na// lhun grub zab mo gsung du gsol// zhes bskul ba dang/ lha'i bu des phyogs bcu'i sangs rgyas thams cad la zhus pa ni 'di ltar ro/ / shar phyogs mngon dga'i zhing khams su// sangs rgyas mi bskyod pa la zhus// skye ba med pa'i sems nyid la// skye ba 'ong ba ji ltar lags// bcom ldan 'das kyis bka' stsal pa/ / rang bzhin 'od gsal skye med la// 'khrul rtog blo yis kun klong skye// skyes tsam nyid ma ngo bos stong// de nyid skye med ye shes 'od// lho phyogs dpal ldan zhing khams der/ / sangs rgyas rin chen 'od la zhus// gzung 'dzin blo yi dra ba 'di// rtsa nas bcad na ji ltar bcad// bcom ldan 'das kyis bka' stsal pa// nam mkha' mtha' dang mnyam pa yis// gsang rdzogs 'od kyi rgyud rnams kyis/ khams gsum 'khor bar 'khrul pa yi// ma rig pa de rtsa nas bcad// nub phyogs bde ba'i zhing khams der// sangs rgyas 'od dpag med la zhus// rang bzhin bde ba chen po la// sdug bsngal 'ong ba ji ltar lags/ / bcom ldan 'das kyis bka' stsal pa// 'gro drug 'khor ba'i sdug bsngal 'di// phan pa'i dbang bcu nus pa'i lnga// zab mo'i dbang gsum rdzogs pa yis// sdug bsngal chos nyid dbyings su zhi/ / byang phyogs rnam dag zhing khams der// sangs rgyas don rnams grub la zhus// chos nyid 'gyur ba med pa la// rnam rtog rlung gi rlabs pa ci// bcom ldan 'das kyis bka' stsal pa/ / bems po'i rlung dang rig pa'i rlung// rlung gi gnad gsum shes pa yis// dbu mar rlung ni tshud pa dang// las rlung ye shes rlung du grol// byang shar bsam gtan brgyan pa der// sangs rgyas ting 'dzin rgyal la zhus/ / rtog med don gyi ye shes la// rnam rtog 'ong ba ji ltar lags// bcom ldan 'das kyis bka' stsal pa// seng ge glang chen 'thab pa de// wa sbe dag gi phra ma bcug/ sgam gnyis e la 'dus tsam na/ / phra ma mkhan de skyar la 'byin// shar phyogs byang chub yid 'ong der// sangs rgyas sgron ma 'byung la zhus// sems nyid rang bzhin 'od gsal la// ma rig mun pa ji ltar lags// bcom ldan 'das kyis bka' stsal pa/ / rang bzhin 'od gsal chen po la// log rtog mun pa bsgribs med kyang// sprad pa gsum gyi gdam ngag gis// sku gsum thig le gcig tu rdzogs// lho nub rdul dang bral ba der// sangs rgyas snang ba bkod la zhus/ / smra bsam brjod du med pa la// sna tshogs 'ong ba ji ltar lags// bcom ldan 'das kyis bka' stsal pa// sna tshogs snang ba'i chos rnams kun// dper na rmi lam lta bu ste// rmi lam bde sdug sna tshogs kyang/ / rmi lam sad dus rang bzhin med// nub byang dbang bsgyur zhing khams der// sangs rgyas gdugs mdzes dag la zhus// a ti tha snyad bral ba la// rtog ge smra ba ji ltar lags/ / bcom ldan 'das kyis bka' stsal pa// rdzings las spul gyi bya bzhin du// ji ltar bskor yang de ru 'bab// ji tsam pa yi tshig brjod kyang// a ti'i ngang du thams cad 'bab// 'og phyogs pad+ma brdal ba ru/ / sangs rgyas rgyal ba'i dbang por zhus// snying po blo las grol pa la// blo btags 'ong ba ji ltar lags// rnam rtog blo las 'khrul ba 'byung// byung tsam nyid na 'gro 'ong med// de don rtogs pa'i rnal 'byor ba/ / blo nyid chos nyid grol ba'o// steng phyogs mdangs dga'i zhing khams der// sangs rgyas dga' ba'i dpal la zhus// gnyis med gnyis su med pa la// gnyis 'dzin 'ong ba ji ltar lags/ / bcom ldan 'das kyis bka' rtsal pa// rgyu rkyen rkyen bzhis 'khrul ba yi// 'khor 'das sna tshogs snang ba 'di// gang shar de bzhin nyid shes na// bden pa dbyer med blo las 'das// dbus phyogs mtha' dbus med pa ru/ / sangs rgyas mngon rdzogs rgyal po la// sems lhag can gyis 'di ltar zhus// ngo bo rang bzhin thugs rje las// rtsa ba'i rgyud du gsang ba dang// la zlo'i rgyud du rdzogs pa la/ / man ngag rgyud du 'od 'di byung// 'di la zab mo'i chos su mchi// ston pas bdag la bshad du gsol// zhes zhus pa dang/ bcom ldan 'das kyis bka' stsal pa// zab mo 'od kyi rgyud 'di la// zab mo don gyi chos drug ste/ / gnas lugs dang ni mtshon pa'i dbang// lta sgom spyod 'bras zab mo drug/ ces gsungs pa dang// kye kye mngon rdzogs rgyal po lags// thugs rje thabs kyi rol ba las// ston pas rgyas par bshad du gsol/ / zhes yang zhus pa dang/ mngon rdzogs rgyal pos lan btab pa// ye shes gar yang rgya ma chad// phyogs su ma lhung ris med de// thams cad 'byung ba'i gzhir 'gyur ro// gdod nas ma skyes sems kyi dbang/ / srid pa gsum nas ye dbang bskur// gang gis de rtogs sems kyi dbang// gzhi nas dbang thob bskur mi dgos// cir yang ma yin byang chub sems// rtogs pas gzhan gyis bcos su med/ / rtsis gdab blo dang bral bas na// phyogs su ma ltung lta ba'i gdeng// ye shes rgyun la bar ma chad// 'di las gzhan du ma bkol bar// rig pa'i rgyal po kun gsal pas// dran pa thams cad ting 'dzin mchog/ bya btsal bral ba'i chos nyid du// blang dor med pa'i rig pa shar// thams cad skye med ye shes klong// 'di la spyad bya spyod byed bral// ye shes dri ma med pa la// re dogs blo las 'das pas na/ / 'khor ba'i gdar sha chod pa de// sangs rgyas lag tu gtod pa yin// zhes gsungs so// ye shes 'od kyi rgyud las/ gleng gzhi'i le'u ste dang po'o//// de nas sems lhag lha yi bus// gnas lugs ma bcos ris med zhus/ / mngon rdzogs rgyal pos bka' stsal pa// thams cad nga yis byas pa yin// nga las byung zhing nga ru thim// nga yi rang bzhin 'od gsal lo// 'chad pa po nga nyan pa nga// lta ba po nga sgom pa nga/ / spyod pa po nga grub pa nga// de bzhin dbang gi rang bzhin nga// rgyal ba kun gyi ngo bo la// sems can kun gyi rang gzhin te// 'dir bsam 'dir 'byung thams cad ngang// kun gsal sgrib pa med pa ste/ / ye shes dr-i med 'od du bshad// stong pa kun 'byung nam mkha'i bzhin// sems nyid yid bzhin rin po che// 'phel 'grib med pa'i gnas lugs ni// 'byung gnas rgya mtsho'i dbyings dang mnyam/ / stong zhing gar yang rgya ma chad// ye shes nam mkha'i mtha' dang mnyam// gsal la 'gag pa med pa yis// rig pa rang gsal sgron ma'i 'od// gzhan skyon sel ma zhugs pa ni// rin chen sa le gser gling phyin/ / ma nor ma bcos ji bzhin nyid// kun gzhi rang byung chen po la// ma rig ye shes tha dad med// 'khrul dang ma 'khrul sems su gcig/ byang chub sems kyi mtshan nyid ni// thog ma dang bral tha ma med/ / thogs med 'khor pa'i rang bzhin 'di// byang chub sems su ye nas dag/ sems nyid 'od gsal dri med la// blo bur gzugs brnyan sprin gyis bsgribs// ngo bo ma yin rkyen gyis snang// bsam pas btags pa sna tshogs pa/ / bag chags log pa'i rkyen gyis mthong rtog pa gzhi nas ma 'ong ste// rang byung mthong bas rtog pa zad// dper na snang bas mun sel bzhin// ris med nam mkha' lta bur gnas/ / rgyal ba'i thugs dang rang bzhin ldan// bsam gyis mi khyab dgongs pa'i don// phyogs ris mi mnga' kun la khyab// rang byung gnyug ma kun gyi gzhi// bzod nas rang byung 'gyur ba med// ma bcos kun khyab rig pa'i thugs/ khyab brdal 'ub chub kun la gnas// rang gnas ye shes gdod nas grub// dngos por mi mnga' rang byung sems// ye shes nam mkha'i 'od bzhin khyab// 'gro drug sems can thams cad la/ / rang gnas ye shes 'dod nas ldan// 'od gsal snying po ye shes 'di// rin chen gsung gi rtags la shes// sems nyid rnam dag lhun gyis grub// kun bzang rgyal ba'i rig pa bde/ / mtha' yas sems can thams cad la// rgyal ba'i ye shes rang chas ldan// bsam bral rang lugs cir mi dgongs// gdod nas nam mkha'i mtha' dang mnyam// yid la mi byed gza' gtad bral/ / 'khor ba mya ngan 'das pa yis// rnam rtog phra rags cir snang yang// rang bzhin ma bcos nyid du bde// ji ltar chu yis snang ba bzhin// rnam rtog phra rags ye shes nyid// rang bzhin gnyug ma dwangs pa ltar/ / 'khor ba nyid na gdod nas dag/ mtshan ma'i rnam pa ci byung yang// chu shing lta bur snying po med// ma rig 'thibs mun 'khor ba na// ye shes sgron ma'i 'od ltar gsal// rnam rtog mtshan ma ci byung yang/ / gnas lugs nyid las g.yos pa med// ces bka' stsal to// ye shes 'od kyi rgyud las/ gzhi gnas lugs kyi le'u ste gnyis pa'o//// de nas sems lhag lha yi bus// rdo rje zab par dbang bskur zhus/ / sngon rdzogs rgyal pos bka' stsal ba// gnas dang dkyil 'khor dpon dang 'theb// 'jug tshul dus dang yon bdun bshad// man ngag sdom du shes bar gyis// gzhi ye gnas dang rten pa'i gnas/ / thams cad rang rig sems nyid de// rgyu rkyen bral ba'i dngos gzhi ni// sangs rgyas sems can thams cad kyi// bzhugs gnas rang byung khyad par can// rte gnas ri bo de shan nam// rgya phug rdo rje gdan stengs sam/ / wA rA nA se'i gsil khang ngam// za ma tog gi rgyal mtshan nam// ma la ya yi rtse mo'am// gru 'dzin ka sha li phug go/ dkyil ni rang byung ye shes de// ma bcos dngos gzhi'i dkyil 'khor nyid/ / mkha' ltar rang rig ye shes gsal// sems kyi dkyil 'khor 'od gsal lo// tsit+ta rin chen dkyil 'khor ni// 'og min rig pa'i gzhal yas khang// zag pa med pa'i mtshan nyid de// dngas ma gsum gyi rtse mor sgom/ / ma nor don gyi slob dpon ni// rang sems bla ma kun gyi bdag/ brda don sprod pa'i slob dpon ni// shes rab mchog ldan ting 'dzin thob// dman pa blo spangs thams cad mkhyen/ / bstan pa'i bcud bsdus bde gshegs sras// slob ma rin chen sems la slob// rtog ldan blo yi khyad par gyis// ting 'dzin shes rab rtsal du rdzogs// snod ldan slob bu dad pa bstan// rigs rgyud dag pa bla ma khur/ / man ngag gter 'chang thugs kyi sras// dang po dngos gzhi dkyil 'khor bstan// kun rdzogs dkyil 'khor lus la dgod// 'phrul tshig gdams ngag rna bar gzhug/ sems lung 'bog pa'i gdams ngag sbyin/ / rgya brtags gdab pa'i cho ga bya// lus la bde mchog bde ba'i dbang// yon tan ldan pa'i bu mo de// thabs kyi bsnyen pa gsum rdzogs nas// bde chen phyag rgya mtshon pa'i rgyu// rin chen gter gyi gdam ngag sbyin/ / bde ba lag gi 'du byed kyis// dga' bde rigs kyi bde ba dbab// rgod ma kha dang rin chen rtsi// sbyar zhing rtsa gsum gyen du brlab// 'bar ba nyu gu dring zhing bzhib// zag med bde ba pad+mar rgyas/ / tsit+ta rgyas shing 'khor lor gang// thung gi a la cung zad phog/ lus 'dar mig mi 'dzams shing 'bar// 'khyil ba'i rtsibs brgyad bde chen po// rol bar bcos ma la rten nas/ / rnal ba'i don ni rtogs pa'o// ngag la rang grol rlung gi dbang// bems po'i rlung dang rig pa'i rlung// dang po gyen rgyu thur rgyu dang// srog 'dzin khyab byed me dang mnyam// rlung lnga d+hu tir rim gy-is gzung/ / rig pa'i rlung ni gnyis yin te// las kyi rlung gis thur du ltung// ye shes rlung gis gyen du 'dren// rlung gi 'them pas thams cad byed// bems po'i rlung la rten nas su// rig pa'i rlung ni zin gyur na/ / rtogs pa'i rlung chen don rtogs so// sems la rig pa dang grol dbang// rtogs med mthong ba'i lam dang phrad// sgom med don gyi gzer chen 'thebs// bgrod med go ba'i rdzings las bsgral/ / rna brgyud lung gi gter chen grol// re dogs med pa'i btsan sa thob// 'di de rdo rje lam mchog ste// skal ldan 'bad par med par grol// rgyal thabs sems kyi rin chen dbang// spyi lugs tshangs pa'i dbang zhes bya/ / dang po bcu bzhi zhag gi dus// nus pa'i tshogs bsag bar chad bsrung// mthar phyin thun mtshams bcu phrag bdun// bar do 'byongs shing mthar phyin 'gyur// de nas srog 'dzin bla ma la/ / lus dang bcas pa'i longs spyod 'bul// brda tsam dbang gis mtshon nas su// gnas lugs rtogs par the tsom med// ces gsungs so// ye shes 'od kyi rgyud las/ dbang gi le'u ste gsum pa'o/ /// de nas sems lhag lha yis ni// phyogs ris med pa'i lta ba zhus// mngon rdzogs rgyal pos bka' stsal pa// skye med nam mkha' rdo rje'i don// lta med rig pa gdod nas A// rang byung ye shes 'od gsal shar/ / ye shes rang gnas bde chen po// nyan thos gang zag bdag med mthong// rang rgyal chos kyis phyogs gcig rtogs// theg chen bdag med gnyis su 'dod// kri ya dag pa chos nyid lta// u pa gong 'og rjes su 'jug/ yo ga phung po byin gyis rlob// rtsal dang cho 'phrul rang snang gsum// bskyed rdzogs gsum gyi lta bar 'dod// lta ba'i rgyal po nam mkha' che// phyogs su ma ltung mthas ma reg/ rnam spyod dgag bya med pa la// yongs spyod bsgrub bya med par shar// gnyis snang dgag sgrub med pa la// mthong byed rtogs pa'i ye shes nyid// dngos po med pa'i rig pa'i gter// blang dor mi 'da' lta ru med/ / rang bzhin lta ba'i rgyal po yin// snying po blo 'das ye shes 'od// 'od gsal rig pa'i gdeng dang ldan// thams cad rtogs pa'i ngo bo nyid// ye shes snying po nyid du shar// rang byung rig pa 'od gsal la/ / snang ba rgya mtsho chen po bzhin// sgro skur spros pa ngang gis med// gsang sngags gter gyi mdzod 'dzin 'di// dngos po ji ltar snang ba kun// rtsi gdab med pa nyid du shar// thams cad ye shes chen po las/ / ye shes ma yin gang yang med// bde ba rang rig rnam rtog bral// rang gnas ye shes 'od gsal klong// rtogs pas the tshom rgyu ba bral// rang shar ye shes sgrib pa med/ theg brgyad gsal ba'i me long 'di/ / snying po don la gol sa med// mthar thug rtogs pa'i dus na mthong// mi rtog don 'jal goms shing rtogs// grub mtha' ngan pa gnas dus su// 'di yis don kun rig par gyis/ / 'di yis rang sems ma rig na// sgra dang tshad ma gang gis kyang// rig pa'i ye shes rnyed mi 'gyur// snying po ye shes rang bzhin 'od// skyon dang yon tan gnyis su med// rdzogs chen lta la dpang stod med/ / mtho dman med pa'i ye shes de// 'gro drug ji ltar snang ba yang// mya ngan 'das pa'i rang bzhin nyid// nam mkha' lta bur bdag med pa// stong pa ye shes snying po can// yod med thams cad byang chub sems/ / snang ba rang rig tha dad pa// don dang rtags la sogs pa rnams// rnam pa sna tshogs bag chags snang// yang dag ma yin 'khrul pa'i sems// ma bcos brda ba'i lta bar go/ rtogs pa'i gdeng gis chod par bya/ / dbang po'i ngo la shar bar bya// chos nyid byang chub sems su mthong// nyon mongs lnga yang ye shes lam// thams cad byang chub sems kyi zhing// sangs rgyas nyid las gzhan mi mnga'// rtogs ldan mchog gi ye shes so/ / e ma ma rtogs sems can kun// sna tshogs 'khrul ba snying re rje// shes pa skye lugs gsum yin te// so sor rtogs pa'i shes pa dang// tha snyad btags pa de bzhin te// zhen pa'i shes pa gsum yin no/ / rtog pa dang po chod pa yis// gnyis po dbyings su thim par 'gyur// kun gzhi'i rnam shes spyi khyab de// tshogs brgyad yul du smras pa yin// mthong ba sna tshogs rig pa'i nyams// snang srid brda ru shar ba gces/ / zhes gsungs so// ye shes 'od kyi rgyud las/ lta ba'i le'u ste bzhi ba'o//// de nas sems lhag lha yi bus// ting 'dzin sgom pa'i bsam gtan zhus// mngon rdzogs rgyal pos bka' stsal pa/ / 'gyur med sems dpa'i ting 'dzin ni// rig pa mtha' bral dkyil 'khor 'dir// zhen med tshul gyis 'jug na bde// dang po rang sems rgyun la brtag/ gnyis pa bla ma'i gdam ngag sbyin/ / gsum pa brda don ngo bo sprad// dkyil 'khor drug gi ye shes la// sgra yi mtha' la bzhag par bya// myong ba med pa'i rnam pa yin// tshor ba med pa'i reg bya'o// phyi rol tshul bzhin nges par 'gyur// tha ma dran bsam 'gyu pa bral/ / btsal med ye shes rig pa'i ngang// des na rang rig cog ge zhog/ bsam med rang dngas rig pa'i ngar// bde chen mi rtog 'gyu ba bral// yid la mi byed snang bdag/ rig pa ma 'gags ye shes gsal/ / ye shes rang snang rgyal pa'i thugs// 'khor ba'i rnam pa med sems de// btang bzhag rang bzhin bya ba bral// mi rtsol sgom med drang po'i lam// spro bsdu med pa'i dgongs par gnas/ / snang ba rgya mtsho chen po bzhin// bying rgod spros pa ngang gis dag/ ye gsal nam mkha'i rang bzhin las// rang gsal rig pa dri ma med// rang rig cir yang mi rtog pas// cir yang ma yin dmigs su med/ / sems las rnam rtog 'gyu ba bral// rig pa ye shes 'dzin pa zad// nyi ma'i dkyil ltar gsal 'grib med// rang shar dngos por grub pa med// shes pa rang lugs so ma nyid// kun bzangs rgyal ba'i dgongs pa'o/ / rang byung rdzogs sangs rgyas su gnas// rang gsal ye shes ngang la bzhugs// bcos med 'dzin bral spros pa med// sgom med rig pa rgyun mi 'chad// dmigs med ye shes 'od gsal ngang/ / skye med rin chen ting 'dzin gter// re zhi mtshon pa'i brda tsam du// gzhu ltar dgug cing mda' ltar sring// snyugs zhug pa yi brda yis su// 'byung 'jug mi mnga' rang bzhin dag/ mi bsam rang bzhin lhug par bzhag/ / dman pa phyag dar khrod kyi spyod pa dang/ mtshon pa nyams myong gi spyod pa dang/ 'dod pa bya ba'i spyod pa dang/ bcom ldan 'das kyis bka' stsal pa/ lta ba glong du gyur pa'i spyod pa ni/ tha mal gyi spyod pa'o// zhes thugs kyi rgyud nas kyang bshad do// chos nyid glong du gyur pa'i spyod pa ni/ ci la yang ma zhen ma chags pa'o// nyams myong rgyud la skyes pa'i spyod pa ni/ srab la sbyar ro/ / brtul zhugs kyi spyod pa'i spyod pa ni/ bya ri skegs lta bu ste ma nges pa'o zhes gsungs so// byang chub sems dpa'i spyod pa'i mtha' ni ma bcos pa'o// rang bzhin rnam par dag pa'i dus na/ spyi la yang ma zhen pa'i spyod pa rnam par dag pa'o/ / bde ba chen po yul du shar ba'i dus su/ zug rngu'i mtha' rang bzhin gyis 'gog/ khyad par na rgyu la skyes pa'i dus na/ snying rje chen po lhag par can gyi spyod pa skye bar 'gyur ro/ / 'dod pa med par 'gro ba rigs drug gi gnas yul du snang ba'i dus su/ chos thams cad ci la yang ma chags pa'i spyod pa skye bar 'gyur ro// sangs rgyas kyi zhing yongs su dag pa la yul du snang ba'i dus su/ thun mong gi dngos po 'gags nas ngo tsha ba dang bag tsha ba'i 'du shes med de/ tshig nam mkha' la khungs ston to// spyan nam mkha' la gzigs te/ mdzub mo nam mkha' la stod pa'i spyod pa 'char ro// chos kyi sku sprul pa'i nyams su btar ba'i dus su/ lus grang dro dang na tsha med cing gcer bu'i spyod pa rang byung shar te/ nam mkha'i ri mo khungs 'don pa'o// zag pa med pa'i ting nge 'dzin gyis ro nyams su myong ba'i dus su/ zas kyi 'du shes chung zhing grogs la mi chags par/ ri dwags rma sam ltar gcig pu ri sul 'grim pa'i spyod pa 'char ro// sems ye shes kyi dbang du 'dus shing snang ba chos nyid kyi dbang du 'dus pa'i du 'dus pa'i dus na/ nam mkha' la 'gro ba dang/ chu la mi nub par 'gro ba dang/ gzhan gyis mi snang ba'i rtsal la spyod par 'gyur ro// rig pa'i dbyings la shar ba'i dus su// yul gzhan dag gi snang ba 'char bar 'gyur ro/ / sems las su rung ba'i dus su/ gzhan gyi sems shes shing dngos po thams cad las brdzun du smra bar 'gyur ro// chos nyid pa stong nyid las su rung ba'i dus na/ phyi'i 'byung ba dang/ mi ma yin pa'i sgra thams cad sel bar 'gyur ro/ / spyod pa rnam par dag pa de rnams ni/ rgyud dag pa'i rdo rje sems dpa' snang ste/ lus ma bor bar mngon par rdzogs par sangs rgyas so//// na mo bud+d+ha yA/ tad+ya thA/ d+harmasaM g+ha ri/ many+dzu shri/ a pra bra/ b+ha ga ba ti/ su ka a/ de nas byang chub sems dpa' sems dpa' chen po dga' mgu yi rangs te/ bcom ldan 'das la thal mo snying khar sbyar nas/ yan lag lnga sa la gtsugs te/ kye kye legs so dpal ldan mgon po che// zhal nas byung na dga' ba de// zhal nas gsungs pa'i nga nyid don gyi mchog/ bdag blo mun pa kha 'byed pas// snang gsal thugs rje 'od kyi me/ / sems can kun gyi skyabs mdzad pas// mgon po dri med ye shes sku// 'gro ba'i don du sku sprul nas// rang byung sangs rgyas rnam par gzigs// byams mgon thugs rjes skyabs mdzad pa// sangs rgyas log par dad sel la/ / gus pa'i tshul gyis skyabs su mchi// zhes brjod nas bstod do// byang chub sems dpa' rma bya mjing bsnol gyi rgyud las/ spyod pa rtog pa'i le'u ste bzhi pa'o//// de nas byang chub sems dpa' sems dpa' chen pos yang dri ba dris pas/ 'jam dpal gzhon nur gyur pa thugs rje can// zhu ba zhus pa legs gsung pa// 'gro mgon rdo rje sems dpas mdzad// sangs rgyas thugs kyi dpal be'u dang/ / sangs rgyas dbu yi gtsug tor dang// sangs rgyas zhal gyi ljags bzang nas// 'od zer 'byung ba bstan du gsol// ces dri ba dris so// rdo rje 'dzin pa khyod nyon cig/ khyod kyi dri ba dris pa de legs so/ / phyogs bcu dus gsum gyi sangs rgyas thams cad la/ thugs rje 'byung ba ni brjod kyi mi lang/ bsam gyis mi khyab/ ngas ma 'ongs pa'i sems can la mdo tsam zhig bstan gyis/ khyod nyon cig/ thugs rje'i bye brag mang gis kyang rtsal ma 'gags pa yin te/ dper na nam mkha' sprin dang char gyi tshul 'byung ste/ thugs rin po che'i dpa' be'u'i nas/ sangs rgyas byams pa mi nyams mgon po zhes bya ba byung nas/ rang bzhin rnam par dag pa'i chos bstan to// dbu'i gtsug tor nas 'jam dpal dri med snying po zhes bya ba byung nas/ sku gdung ring bsrel gyi chos bstan te/ zhal gyi ljags las/ sangs rgyas bye ba rnam par gzigs zhes bya ba byung nas/ rgyu 'bras kyi chos ma lus par bstan to// sangs rgyas stong gi yon tan ni// sangs rgyas gcig pu nyid la 'dus// gcig pu rab tu snang ba'i chos// 'gro ba kun la rang bzhin gnas/ / zhes byung ste/ phyogs bcu dus gsum gyi sangs rgyas thams cad kyi yon tan bsam gyis mi khyab pa gcig byung ste/ de dag kyang sangs rgyas 'od dpag med chen po rtsal snang ngo// sangs rgyas 'od dpag med nyid 'gro ba yongs kyi snying por shar nas/ / 'gro ba sems can thams cad la// snying po rnam dag ye shes rdzogs// zhes gsungs/ sangs rgyas kun gyi gtsug phud lnga// rgyal mtshan rtse mo bzhin du gnas/ / sangs rgyas kun gyi che ba lnga// nam mkha' bzhin du khyab par gnas// rdo rje snying po bla na med// rin chen gtsug phud dri ma med// nges pa'i skyon rtog sel bar byed// pad+ma'i snying po 'od 'bar ba/ / mtha' la mi gnas phyag rgya che// mgon po dri ma med pa'i sku// yon tan kun gyi snying po shar// thabs mkhas thugs rje stobs kyi bdag/ bdud bzhi 'dul mdzad dpa' bo mchog/ dag pa'i zhing du yang dag sgrol/ / thugs rje'i chu bo rgyun mi 'chad// shes rab gru yis sgrol mdzad pa// sprin chen glog gi 'phreng ba can// rgyun gyi thugs rje'i rdo rje bdag/ snying po bdag med ya ma brla// snying po rjes 'brangs spyod pa'i mtshon/ / nam mkha'i nyi mi'i tshul bzhin du// rang byung spros med mkha' la gdengs// rgyud dag pa yi dbyings nyid nas// 'bras bu ye shes dkyil 'khor rang snang ba'i dus su/ snod bcud thams cad chos nyid du brdal ba/ / mi byed pa'i lta ba nam mkha' dang mnyam pas re dogs kyi 'phro gcad/ zag pa med pa'i ye shes rang snang bas/ bdag dang gzhan gyi don mthar phyin/ shes rab kyi stobs ma 'gags pas/ bdud dang srin po zil gyis mnan/ kye rdo rje 'dzin pa nyon cig thabs la mkhas pa'i byang chub sems dpa' ni/ sems can gyi pha ma yin gyis/ de yang dri ma med pa'i don gyis gnas par bya'o/ / rtogs pa'i don la rtse gcig tu ma yengs par gnas pas/ byang chub sems dpa'i bsam gtan zhes bya'o// 'jam dpal dri med snying po ngas/ sems can rnams kyi phyir/ gsang ba'i rgyud gsum yang gsang thugs kyi rgyud/ / thugs nas phyung nas gdams par bzhag/ sangs rgyas lag tu gtad pa'i phyir// sangs rgyas gtsug phud rnam par rgyal ba zhes bya ba/ thugs las nor bu dri ma med pa'i rgyud mdzad do/ / 'bras bu bla na yod pa dang/ bla na med pa'i theg pa shan dbye ba'i phyir/ ljags kyi pad+mo las/ sangs rgyas bye ba rnam par gzigs zhes bya ba byung nas/ byang chub kyi sems rma bya mjing bsnol mdzad do/ / sangs rgyas sprul pa'i sku ye shes kyi lus su gnas pa'i phyir/ mdzod spu'i bu ga nas 'od zer lnga 'phros nas sangs rgyas bde ldan mgon po spyan ras gzigs zhes bya ba byung nas/ lha mo 'od zer gyi rgyud mdzad do/ / las dge sdig la mtho dman med par la bzla ba'i phyir/ shangs kyi rlung sgrom nas mthu stobs kyi bdag po dpal phyag na rdo rje phyung ste/ bya btsal med par ye shes bla ma'i rgyud phyung ste/ chos las 'das pa'i sku yongs su rdzogs par bstan to/ / zhes byang chub sems rma bya mjing bsnol gyi rgyud/ rdzogs pa chen po 'bras bu bla na med pa'i theg pa las le'u lnga pa'o//// byang chub kyi sems rma bya mjing bsnol zhes bya ba'i rgyud/ 'jam dpal snying pos/ byang chub sems dpa' ro langs bde ba la gdams pa rdzogs so//// byang chub kyi sems rma bya mjing bsnol bsgom na/ ngan song gsum gyi gzhi gsog go/ byang chub kyi sems dkar dmar rnams gnyis rang rgyud du go na/ sems can gyi gzugs su smin no// rgyud kyi rgyal po ting nge 'dzin mchog gi rgyud las/ ta na dang ga na'i rtog pa bshad pa'i le'u ste bcu gcig pa'o/ /// de skad ces yid byed pa po kun tu bzang pos/ ci yang ma gsungs par bka' stsal pas/ rdo rje sems dpa' la sogs pa rigs lnga'i sangs rgyas yab yum dang/ zhi khro'i lha brgya rtsa brgyad kyi dkyil 'khor gyis/ rgyud kyi rgyal po ting nge 'dzin mchog gi rgyud kyi don rtogs so// rgyud kyi rgyal po ting nge 'dzin mchog gi rgyud las/ 'bras bu nges par bskor ba rdzogs so a+thi+-i//// rgya gar skad du/ ma hA sa ma ya rA tsa sarba ka ta tan+t+ra/ bod skad du/ dam tshig chen po'i rgyal po dam tshig bkod ba'i rgyud/ dpal 'da' ba med pa'i kun tu bzang po la phyag 'tshal lo// de nas bcom ldan dgyes chen la/ / rdo rje sems dpas 'di skad gsol// rnal 'byor kun gyi rtsa ba mchog/ dam tshig sa gzhi bstan pa las// nges par gsungs pa khyad par che// ho/ e ma ho rab tu blo ldan gyis/ nges pa'i lung du bstan pa ni/ / snga rabs 'das pa'i sangs rgyas kyang// dam tshig 'di la brten te byung// da ltar bzhugs pa'i sangs rgyas kyang// dam tshig 'di la rab tu gnas// slad kyis 'byon pa'i sangs rgyas kyang// dam tshig 'di la rab tu bsgrub/ / de phyir kye kye bcom ldan 'das// dam tshig rtsa ba bshad du gsol// de skad gsol ba'i tshig gsan nas// mngon rdzogs rgyal pos bka' stsal pa// rdo rje sems dpa' sems dpa' che/ / legs 'os bu la bstan par bya// dam tshig rtsa ba 'di dag rnams// legs par yid kyis mnyan par gyis// 'di yang sku gsung thugs su bstan// sku yi dam tshig ma g.yos pa// gsung gi dam tshig ma yengs ba/ / thugs kyi dam tshig ma 'gyur ba// sku yi dam tshig pha ma dang// lus srog bskyed dang 'jig rten ston// ma rig dbang po sgo 'dren pa// mkhan po slob dpon rdo rje mched// man ngag rgyud lung nges don ston/ / dus gsum mi 'bral dam pa'i grogs// rgyal theb karma las kyi ging// las dang bskos nga mig mthar 'byin pa'i// nges pa'i rnam grangs 'di dag la// ngan sems dbye sems mi bya ste/ / kye'u chu rgyu dang brnyas pa dag/ bre mo gtam du'ang zur mi bya'o// nyams pa phung ba'i rgyu yin pas// ngag gis de ltar bya ba min// lus kyis bya ba'i rim pa yang// brdeg dang bsnun dang bsad pa dang/ / glang po lus kyis 'gal ba rnams// dngos kyi bya ba ci smos kyis// rtsed mo'i las su'ang bya ba min// yid kyi bsrung ba'i rim pa yang// brnyas dang sku dang phrag dog rnams// se gol yun du'ang bya ba dang/ / cung zad yun du bsam pa min// chos nyid dbye bsring med pa dang// byang chub sems su gcig pas na// thams cad kun tu bsrung ba dang// yun du 'di las 'da' mi bya'o// des ni thar pa chen po thob/ / kun tu bzang por gdon mi za'o// gang zhig 'di dag mi bsrung zhing// nyams par byed pa gang yin pa// sa bon me yis tshig pa bzhin// 'bras bu med cing nyams par 'gyur// gsung gi dam tshig chos nyid dang/ / sngags dang phyag rgya la sogs pa// rgyun mi gcad par bzlas pa ste// rab kyis chu bo'i rgyun bzhin du// mi drag mi bum mi zhan par// dus gsum du ni rgyun med par// ma yengs pa yi ngag gis bzlas/ / 'bring gis dus bzhi gnam stong dang// khyad par nya dang tshes brgyad rnams// dus la bab par rgyun med bzlas// tha mas zhag grangs bdun rnams sam// khri 'bum brgya stong gar nus par// tha na nyi shu rtsa gcig gam/ / yang na bdun gyi bar rnams su// de tshe g.yeng bas bar mi gcad// de yang lus ngag yid gsum gyis// de tshe bar chad med par bzlas// de rnams ma nyams gtsor gzung na// sangs rgyas byang chub gdon mi za/ / 'di rnams nyams na don med pas// de ni phyal ba mya ngan snon// dngos grub 'bras bu yongs mi 'grub// thugs kyi dam tshig sde snod dang// kun bzang bka' dang nges pa'i don// gsang ba chen po bcu po dang/ / man ngag chen po gzhan la mi spel ba// de yang ngag lus sems rnams te// lus kyi sbyod pa brlang gsang zhing// ngag gis rdo rje lce yod kyang// brjod pa dag tu bya ba min// dbang bskur gnas pa gang thob nas/ / snod dang ldan pa'i skyes bu la// thabs kyis smra bar gang byed pa// de ni bsrung ba'i rim pa ste// dngos grub 'bras bu chud mi za// 'di dag nyams na bka' 'chal zhing// sangs rgyas byang chub snod min pas/ / de tshe 'bras bu mi 'thob bo// dam tshig thams cad kyi rgyal po sa ma ya bkod pa'i rgyud las/ dam tshig gsum gyi rtsa ba bstan pa'i le'u ste dang po'o//// rdo rje sems dpa' gzhan yang de bsrung ba'i rim pa ni/ grangs med brjod kyis mi lang ba 'di yid la zung zhig/ sku'i dam tshig bsrung ba yang yi dam gyi lha dang/ rdo rje slob dpon dang/ dus gsum gyi pha ma dang/ mched dang lcam dral dang/ gsang ba'i don spyod pa mtha' dag la bsrung ba ste/ de la yi dam gyi lha la bsrung ba ni/ yi dam gyi lha dang por bsgom par nod nas rab kyis nyin dang mtshan med par yi dam gyi lha'i ting nge 'dzin du gnas shing/ sngags brjod cing dam bcas pa las mi 'da' bar bya ba dang/ 'bring gis nyin mtshan thun du de bzhin du bya ba dang/ tha mas kyang lo dang zla ba la dam bcas pa las mi 'da' bar bya ba dang/ tha na yang ming tsam yang yid la mi brjed par bya ba dang/ phyi dang nang gi mchod pas dus thams cad du ci nus su mchod par bya ba dang/ tha na nang nub kyi 'tsho ba'i yo byad ci yod pas kyang mchod pa dang/ nyes byas dang nyams chag yod na yang yid dam gyi lha de mdun du zla ba'i dkyil 'khor gyi steng du bzhugs su gsol la 'gal 'khrul mi 'chab par bshags pa dang/ sku gsung thugs kyi dngos grub yid la ji ltar 'dod par nod par bya'o/ / de bzhin du rdo rje slob dpon rnam pa lnga dang mkhyen pa can mtha' dag dang/ tha na tshig gi le'u gsum ston pa yan chad la rnal 'byor pa'i longs spyod ci yod pas mchod cing dbul ba ci smos kyis/ tha na lus kyi phyag gsum dang/ yid kyi gdung gsum dang/ ngag gi tshig gsum du bcas pas dus thams cad du dbul ba dang/ mtshan nas brjod cing mchod pa dang/ bka' las mi 'da' bar bya zhing nges pa'i don zab mo zhu bar bya'o/ / dus gsum kyi pha ma ni lus las bcad nas 'jig rten gsal bar ston pa'i drin can yin te/ pha ma rnam pa lngar bstan pa kun la yang dngos su yod pa la bkur ba dang/ 'das shing med pa la smon lam sna tshogs gdab pa dang/ yid kyis mchod pas mchod pa snga ma bzhin no// mched lcam dral lnga u0f84la yang gong ma bzhin las khyad par brtse zhing gdung bas gzhi bzung/ mi 'bral zhing log pa'i lam bkag cing/ legs pa la gdab pa dang/ dge ba la bskul zhing mi 'bral ba'i smon lam rgyas pa dang/ mchod pa khyad par gong ma bzhin no// de rnams mchod pa yang spyir sangs rgyas thams cad la mchod pa ci phul kyang/ dang po nye bar len pa'i lha bzhi ma mchod na/ phyogs bcu dus gsum gyi sangs rgyas gang la phul yang mnyes par mi 'gyur zhing/ bzhes par mi 'gyur te/ de ci'i phyir zhe na/ nye bar len pa'i lha bzhi'i gong na sangs rgyas gzhan med cing/ sangs rgyas thams cad nye bar len pa'i lha bzhi la brten nas sangs rgyas te/ de yang gang zhe na/ bsod nams nye bar len pa'i lha 'phags pa dkon mchog gsum dang/ dngos grub nye bar len pa'i lha yi dam gyi lha dang/ yang dag pa'i 'bras bu nye bar len pa'i lha rdo rje slob dpon dang/ mched lcam dral dang/ lus nye bar len pa'i lha dus gsum gyi pha ma'o/ / de ci'i phyir lha zhes bya zhe na/ thams cad du legs pa sbyin pa la ni lha zhes bya la/ bar du gcod pa thams cad bdud kyi rang bzhin pas/ 'di ni lha yi yang lha ste/ gnyan zhing byin che ba las sangs rgyas thams cad kyis ngang la 'di mchod par bsngags te/ bdag gis ngang la mchod par bya ste/ don de bzhin du dam tshig las mi 'da' bar byas na rtsa ba'i dam tshig ma nyams na dam tshig thams cad kyang mi nyams la/ nyams na yang de bzhin dang du blangs na skong nges te/ kun tu bzang po dbye ba med pa'i sar gyur pa/ gzhan rtogs shing bsgrubs par ma grub kyang/ sangs rgyas thams cad kyi bdag nyid pa'o/ zhes kun tu bzang pos gsungs so// gsang ba'i don spyod pa mtha' dag ni/ 'jig rten gyi khams gang na sngags kyi don spyod pa mtha' dag dam tshig gnyen po la gcig tu gnas shing/ gang nyams na yang de skongs par gyur cig bar spyir smon lam 'debs pa dang/ dang po 'jug pa'i sgo dang/ bar du sgrub pa'i thabs dang/ tha ma grub pa'i 'bras bu thams cad gcig pas/ thams cad la bdag nyid kyi bu dang 'dra bar nyes na bcos pa dang/ legs pa'i lam bstan pa dang/ gsang ba'i don zab par spyod cing bar chad med par grub cing mthar phyin par gyur cig par smon lam gdab pa dang/ kun la nyams na mi rung zhing phung bar 'gyur ba dang/ nyes legs kyi skyon yon dang gdams ngag legs par bstan pa la sogs pa 'di las 'byung ba bzhin ma nor bar byed pa ni/ sku'i dam tshig bsrung ba'i rim pa ste/ rdo rje sems dpa' yang dag pa'o// gsung gi dam tshig bsrung ba'i rim pa yang/ skyes bu brtson pa rab dang ldan pas sgom sgrub kyi 'phrin las thams cad la brtson pa mgo la me shor ba bzhin bya ba dang/ yun bsring ba chu bo chen po'i rgyun bzhin du ngal dub dang skyo ngal med par bya ba dang/ de yang lung ngag yid kyis skyes bu dar ma'i gzhu brdungs ba bzhin btang nge 'bad nas bsrung ba'i rim pa'o// de yang ngag gis bsrung bar bya ba ste/ mi nyams pa rnam gsum la/ lha chos dang/ mi chos dang/ bka' chos dang gsum mo// lha chos ni sngags dang/ phyag rgya dang/ 'phrin las kyi go rims dang/ ting nge 'dzin rnams dang por rdo rje slob dpon khungs can ma yin par gar song song du ras chod dang/ bka' rkun dang/ sgyu thabs dang/ dad pa med pa'i nan che ba dang/ dbang ma thob par gzhan la spro ba dang/ don ma phyin par nga mkhas la sogs pa bka' dang 'gal zhing bdag nyid la gnod cing 'phung bar bya ba ma yin no/ / mi chos kyis bsrungs pa ni/ bka' gsang gcig tu spyod cing mthun pa lta ci smos kyi/ sangs rgyas kyi bstan pa la gnas pa'i rgyu 'bras kyi theg pa la zhugs pa thams cad la/ mthun pa la dbyen mi bskyal la/ mi mthun pa la ris mi gzung/ rtsod pa can la zur mi gso/ 'gal ba rnams la byams pa mi sgom/ dgongs pa can la dpyas mi gdags/ dge ba can la thugs mi dkrug nyes par spyod pa la legs par mi brjod/ gzhung ngan pa la mi chos lha chos kyi bro dam pa gdab/ gzhan gyis ma smras shing nyes pa med pa la nyes sam smras zhes mi brdzod pa'o/ / bka' chos chos kyis bsrung ba ni/ gsang ba'i las dang/ gsang ba'i tshig dang/ gsang ba'i spyod pa ngag gis gzhan la mi smra ba dang/ slob dpon dang mched kyis gnyer du gtad pa gzhan la mi smra ba dang/ dang por slob dpon gyis ji ltar dam phog pa las mi 'gal bar bya ba dang/ lung pa gcig pa'i phyogs rnams kyis gcig sprang gcig gis byas la ma nyams par bya ba dang/ nyes pa dang 'gal 'khrul shor na gsang zhing mi bcab par gnong 'gyod dang chas pas nyes pa bcos shing nyam pa bskang pa dang/ ngag gis ci smra yang chos dang mthun par smra ba las ma rtogs par 'gal ba can du mi smra ba dang/ de bzhin gshegs pa'i bka' mtha' dag las 'byung ba la mi nyams par smra ba ni/ yang dag par rdzogs pa'i sangs rgyas kyi tshig gi don las ma gol ba'o// thugs kyi dam tshig bsrung ba'i rim pa yang gsang ba'i don mtha' dag las mi nyams pa yang yin na/ khyad par du gsang ba'i spyod pa glang po thams cad dam med pa dang/ ma 'dres pa lta ci smos kyi/ 'dres pa rnams la yang nan tan dang chas par bya ba dang/ de bzhin du rdzas dang/ lag cha dang/ dkyil 'khor la sogs pa yang de dang 'thun par bya ba dang/ zab mo dang/ tan+t+ra'i don rnams sgrun du re zhing gcam la 'phyar bas/ nyan thos dang lta ba dman zhing snod ma yin pa rnams la ming tsam yang cha med par bya rgyu la/ smra zhing ston cing cha re re nas ngoms par byed pa rnams ni bka' chad kyi gnas yin pas ma gtogs/ lo dang zla bas snod bcud brtags nas ston par byed pa ni/ bsrung ba'i rim pa'o// 'phyar pos gsang mi thub pas brten zhing nges 'byung che ba'i 'khor btsal ba dang/ le los mthar mi phyin pas brtson 'grus kyis gzhi gzung ba dang/ mtshan ma ngan pas nyams par 'gyur bas rang bzhin bzang po las zla btsal ba dang/ kun gyi thun mongs ma yin pas rigs rgyud bzang ba las grogs bsdu ba dang/ thugs rje'i rgyun thag ring bas ngang ring zhing dad pa che bar bya ba dang/ sems can dar skad thung bas bka' mi sun par bya ba'i don dgrol ba dang/ dam las zlog pa 'byung bas thabs glang po mi bstan pa dang/ tshul snyoms zhing nyams grod len pa 'byung srid pas bka' btsal legs par bya ba dang/ ras chod dang gzu lums can gyi don du gsang sngags mnyen zhing nyen che bar bstan pa ni/ thugs kyi dam tshig bsrung ba'i rim pa'o/ / gzhan yang sems dpa' chen po sku gsung thugs kyi dam tshig la grangs brjod kyis mi lang yang/ spyir sku'i dam tshig lus kyis mi nyams par bya/ gsung gi dam tshig ngag gis mi nyams par brjod/ thugs kyi dam tshig sems kyis mi brjed par gzung ba ni/ bsrung ba'i rim pa'o// dam tshig thams cad kyi rgyal po dam tshig bkod pa'i rgyud las/ sku gsung thugs kyi rtsa ba bsrung pa'i rim pa'i le'u ste gnyis pa'o/ /// rdo rje sems dpa' gzhan yang dam tshig 'di dag nyams pa'i snga rtags ni/ sku'i dam tshig nyams pa'i snga rtags ni/ 'jig rten gyi khams 'dir yang mdze dang/ shu ba dang/ 'brum bu la sogs pa nad ngan rnam pa sna tshogs byung nas/ skye bo yongs kyis spangs pa dang/ nye drung la sogs pa rnams dang 'grogs shing rtse ba'i dbang med de/ mi yongs kyis smad par 'gyur/ de'i tshe dus ma yin par 'chi zhing/ shi nas kyang sems can dmyal ba zhes bya ba'i nang nas kyang/ gting khung rdo rje dmyal ba zhes bya ba shin tu dmyal ba gang gis kyang de la ni sdug bsngal sdau bar dka' la/ de la ni tshe'i tshad kyang med de thams cad du 'thon mi srid pa'i phyir ro/ / rdo rje sems dpa' gsung gi dam tshig nyams pa'i snga rtags ni/ 'jig rten gyi khams 'dir yang/ bgegs stong phrag brgyad cus glags 'tshol ba dang/ nad bzhi brgya rtsa bzhis skabs 'tshol ba dang/ ye 'grogs sum brgya drug cus bar du gcod pa dang/ lkugs shing dbang po rmongs pa la sogs pa'i nad sna tshogs byung nas/ gsang ba'i bka' nub pa dang/ gang zag rnal 'byor pa sgyid lug nas/ de'i tshe bar chod kyi bgegs kyis glo bur du 'chi zhing/ shi nas kyang dmyal ba de'i gnas su yang gong ma bzhin du skye bar 'gyur ro// rdo rje sems dpa' thugs kyi dam tshig nyams pa'i snga rtags ni/ 'jig rten gyi khams 'dir yang mthu dang rdzu 'phrul chung zhing/ smyo ba dang/ 'bog pa dang/ brlam pa dang/ 'chal zhing nyams pa dang/ dbang po mi gsal zhing mig long pa dang/ rna ba 'on pa dang/ lkugs pa la sogs pa byung nas/ mi nag mang pos 'phyas pa dang/ mu stegs dang log pa'i phyogs kyis ya ka 'dogs pa dang/ nyan thos la sogs pa theg pa 'og ma skur ba 'debs shing/ bka' 'di dag sun byung bar gyur nas/ de'i tshe 'phral du 'chi zhing/ shi nas kyang yang sems can dmyal ba la sogs pa de rnams su skye'o// de rnams su skyes pa'i tshe/ de la tshe'i tshad med pas/ 'dzam bu gling 'di dag 'pho zhing 'jig na/ gling gzhan na rdo rje dmyal ba yod pa der yun cung zad tsam yang ma lon par phyin par 'gyur ro// de bzhin du bskal pa ther 'bum du las kyi dbang gis 'khor ro// des ni na ba dang tsha ba'i smreng 'don par mi nus te/ shin tu 'gyod pa drag po skyes na bskal par re la na tsha'i sgra phog re cig 'byin par nus so// dam tshig thams cad kyi rgyal po sa ma ya bkod pa'i rgyud las/ rtsa ba'i dam tshig nyams pa'i snga rtags bstan pa'i le'u ste gsum pa'o/ /// rdo rje sems dpa' gzhan yang yan lag gi dam tshig bsrung ba 'di yid la zung zhig/ spyad par bya ba'i dam tshig lnga dang/ mi spang ba'i dam tshig lnga dang/ dang du blang ba'i dam tshig lnga dang/ shes par bya ba'i dam tshig lnga dang/ grub par bya ba'i dam tshig lnga la sogs pa'i sa ma ya 'bum sde'i bsrung ba'i rim pa ni/ ji snyed du brjod kyang brjod pa'i mtha' las 'das te/ chu thams cad kyi thigs pa nas bgrang bar nus kyis/ dam tshig gi grangs 'di dag brjod par dka' ste/ bskal ba dpag tu med par bstan kyang mtha' med de/ de dag las rnal 'byor skal pa dang ldan pa rnams kyis nges par bsrung ba ni 'di dag go/ rnal 'byor sngags kyi spyod pa dag/ chos ma mthong ba ci smos kyi// dam ma 'dres pa rnams la yang// zur yang bstan par mi bya zhing/ dngos su bstan pa ci smos kyi/ / tshig gi zur du'ang gleng mi bya'o// bdag cag rnams ni 'di ltar spyod// de bzhin smra bar gang byed pa// de ni nyams pas dmyal bar skye// gsang sngags chos kyi tshig rnams kyang// skye bo byis pa la sogs dang/ / de bzhin dam med thams cad la// bshad par bya ba ci smos kyi// tshig 'ga' 'ang thos par yong mi bya// rdzas dang lag cha la sogs dang// phud dang gtor ma tshogs rnams dang// phur pa me mar snod la sogs/ / de dag mthong bar mi bya'o// rnga dang dril bu la sogs sgra// skye bos thos par yong mi bya// gang zhig nyan cing lta 'dod pa// rdul chags skyes bus de bskrad do// gzhan yang yan lag gi dam tshig ni/ / gong ma'i rtsa ba nyid las 'di dag 'byung ba'i phyir yan lag ste/ de yang spyad par bya ba lnga ni/ gzungs ma mtshan dang ldan pa la thams cad skye ba'i rgyu ye nas chen po yin pa'i phyir/ rtogs pa dang ldan pas dngos grub kyi rgyu dang rkyen du spyod pa ni sbyor ba'i dam tshig go/ 'di dag skyon du bltas nas spong ba dang/ gsang med bar 'chal ba spyod pa ni nyams pa'o// zhing bcu thugs rjes bzung nas/ gnas dag par ting nge 'dzin gyis spor ba ni sgrol ba'i dam tshig go/ de ma yin par srog la mi 'dzem pa dang/ snying rje dang bral ba ni nyams pa'o// gsang ba'i don drang por smra ba ma yin zhing/ phan pa'i chos su 'gyur ba'i brdzun smra ba'i ni dam tshig go/ gnas skabs med par rang rgyal dang gzhan la gnod par smra ba ni nyams pa'o// sdig can rnams kha 'thun par log pa'i lam du khrid pa dang theg pa chen po las dma' ba'i rigs su khrid pa dang/ gsang sngags la smra 'dod pa rnams 'byed par byed pa phra ma ba'i dam tshig go/ mthun pa dang/ mdza' gnyen dang/ mkhan 'khon med pa 'byed pa ni 'phra ma'i dam tshig nyams pa'o/ / bka' las 'gal zhing mched las 'khus pa dang/ slob dpon dang/ mched dang/ gnyen dang/ 'khor dang/ 'dul ba'i dus la bab pa rnams log cing 'gal ba byed pa la zhi ba dang des dad pas ma 'dul na ngag brlang pos 'chos pa dam tshig go/ 'gal ba med pa dang thub tshad la ngag brlang por smra ba ni nyams pa'o// mi spang ba lnga la/ 'dod chags chos nyid ting nge 'dzin la chags pa dam pa'o// 'dod pa dngos la chags pa nyams pa'o/ / zhe sdang log pa dang gol ba la sdang ba dam pa'o// mnyes pa dang thub pa la sdang ba nyams pa'o// gti mug phyogs ris med cing ci la yang mi rtog pa dam pa'o// bstan pa nyan mi shes par dge sdig la 'dzen pa med par nyams pa'o/ / nga rgyal bdud kyis bslu bas mi tshugs shing rdo rje theg pa sran 'dzugs pa dam pa'o// bden pa med par log pa'i phyogs la nga che ba nyams pa'o// phrag dogs chos nyid la gal mi 'dzugs shing/ yang dag pa la 'dzin rtog ming yang med par gnas pa dam tshig go/ gzhan nyes pa med pa dang/ grogs mched la phrag dogs pa nyams pa'o// dang du blang ba lnga la/ dam rdzas lnga po chos nyid la rtog pa med pa dang/ rang bzhin gyis grub pa'i mthu yod pa dang/ ye nas bdud rtsi yin pa dang/ skyon yon tan dang/ dug bdud rtsi yin pa dang/ de nyid dngos grub chen po'i rgyu dang rkyen yin pas gsang sngags sgrub pa'i thabs dam pa spyod pa dam tshig go/ rtogs pa dang ting nge 'dzin du mi ldan zhing/ gsang ba med par byol song bzhin du bab chol du spyod pa ni nyams pa'o// shes par bya ba lnga la/ phung po lnga dang/ 'byung ba lnga dang/ yul dang/ dbang po dang/ rnam par shes pa dang/ phyin ci log bzhi dang/ 'jig rten drug dang/ yul dang/ rig pa thams cad ya nas rdo rje dbyings kyi dkyil 'khor yin par shes pa dang/ phyin ci log lnga sku lngar shes pa dang/ pho mo yab yum thabs dang shes rab tu shes pa dang/ lus ngag yid gsum sku gsung thugs su shes pa dang/ phyi nang snod bcud chos kyi skur shes pa ni dam tshig go/ 'di dag rang rgyud dang// phyogs ris dang/ 'dzin rtog gis dngos por spyod pa ni nyams pa'o// bsgrub par bya ba lnga ni/ shes par lnga po de nyid shes pa'i sar mi gzhag grub pa bya dgos pas/ sngags dang/ phyag rgya dang/ ting nge 'dzin las su bya bas skra la me shor ba bzhin du lus ngag yid gsum gyi sgo nas thag bcad de/ rtsol zhing rtsom la sgrub pa ni dam tshig go/ de la snyoms las dang/ le lo dang/ phyi bshol dang/ long yod dang/ chang dbang dang/ gnyid dbang dang/ rkyen dbang du gtong ba nyams pa'o// dam tshig thams cad kyi rgyal po sa ma ya bkod pa'i rgyud las/ yan lag gi dam tshig bsrung ba'i le'u ste bzhi pa'o/ /// rdo rje sems dpa' chen po yan lag gi dam tshig bsrung ba'i rim pa ni spyad par bya ba'i dam tshig lnga ni/ 'dul ba'i dus la gar bab par rim par shes par bsrung/ mi spang ba lnga ni nyin dang mtshan med par bsrung/ dang du blang ba lnga ni dus bzhi dang dus drug tu bsrung/ shes par bya ba lnga ni thog ma nyid nas bsrung/ tha ma lnga'i grub par bya ba ni/ 'jug tu dus dang rgyun med par bsrung ba'o/ / de yang lus ngag yid gsum gyi thag bcad de bsrung ba'o// dam tshig thams cad kyi rgyal po sa ma ya bkod pa'i rgyud las/ yan lag gi dam tshig bsrung ba'i rim pa'i le'u ste lnga pa'o//// rdo rje sems dpa' yan lag gi dam tshig 'di dag dus 'di yi tshe na ma rtogs pa rnams nyams la/ rtogs pa rnams yang dag pa'i don las mi nyams par 'gyur la/ rdo rje sems dpa' dus nam zhig gi tshe na yan lag gi dam tshig 'di dag rnal 'byor pa ye nyams chen por 'gyur te/ rgyal po chos nyid la mi phyogs shing bsod nams kyi skal ba chung ba dang/ dmangs dang skye bo 'phral gyi 'du byed kyis phugs ring bar lta mi shes shing/ bsod nams zad pas sngags la nyams sod pa dang/ rnal 'byor ba la 'phya zhing skur ba dang/ srog la mi lta bar sdig smin pa'i skye bo gsod cing 'phrog pa mang ba dang/ gang zag rnal 'byor gyi sngags che ba'i khyad par tsam la brten nas khe grags dang phral gyi 'dod pa tshol ba'i phyir/ skye bo 'khrul pa rnams bsdigs shing spa bkong pa'i phyir/ rnal 'byor gyi rdzas dang lag cha gsang ba'i rgyu rnams mngon du bstan te phyung/ gsang sngags kyi don spyod pa rnams kyis kyang gsang bar ma byas shing kun la cha yod byas pa dang/ sngags kyi yang dag pa ma rig par skye bo ma rig pa drang par 'dod pas/ tshom bu la sogs pa sngags kyi spyod pa bstan cing bsdus nas/ de dag la yang dag pas nges pa'i don ma bstan par spyod pa rtsing po dang/ 'phral gyi drag shul dang/ srin po tho co la sogs pa byas pas/ grub pa'i 'bras bu log par gol te/ de nyid gsang sngags kyi rgyus mkhan chen por byas te/ gsang sgo 'chol ba dang/ dbye gsal med pa dang/ kun gyi dpya sla bar song ba dang/ kun la cha yod pas smod cing skur pa 'debs pa dang/ yang dag pa mnyam pa nyid mi shes pa'i gang zag pa phal pa rnams rang che bar 'byin par 'dod pa dang/ gzhan thabs kyis smad pa'i phyir/ ming 'dogs shing mtshang tshig la sogs pa rnams smra bar byed ba dang/ rang gi rig pa nang nas ma shar bas/ bdag nyid kyis bsgrub par 'dod pa'i phyir/ dam tshig gcig pa'i grogs pa dang 'thab cing/ skye bo la sogs pa'i las log par byed pa dang/ phyi nang gi dbang rnams lta ci smos kyi/ rnal 'byor gyi kha dbang yang ma thob par/ gsang sngags kyi slob dpon byed pa dang/ so so'i ris su 'dzin cing sngags kyi khas blangs chag nyams chen por gyur pas/ de dag gnas su mi skongs te/ yan lag gi dam tshig nyams pas/ de'i skyon ni sngags kyi byin nyams pas/ sngags mthu byin chung ba dang/ rnal 'byor gyi spyod pa nyams pas dus su mi 'grub pa dang/ mchod pa'i gzhung ma stobs pas dngos grub mi 'thob pa dang/ ting nge 'dzin bying rmugs dang/ dza gad kyi dbang dang// le lo dang gnyid dbang gis bar chod dang bdud kyi dbang du 'gyur te/ sngags pa tshe thung zhing nad mang ba dang/ sngags pa nyams pa sha stag mang bas ma mo dang mkha' 'gro dam tshig gi bya ra la sogs pa rab tu khros pa'i dbang gis/ 'jig rten gyi khams 'dir yang rims nad la sogs pa sna tshogs pa btang ste/ mdze dang/ shu ba dang/ 'brum bu la sogs pa dang/ rims nyin gcig pa dang/ nyin gnyis pa la sogs pa dang/ rtag pa'i rims dang/ rlung mkhris dang/ bad kan dang/ 'dus pa las gyur pa'i glad bag dang/ 'khru bag dang/ tsha ba'i rims la sogs pa'i nad rnam pa sna tshogs pa dang/ mu ge la sogs pa spel zhing/ de'i tshe sems can rnams dus ma yin bar 'chi zhing glo bur du 'chi ba dang/ theg pa 'og ma rnams sngags la 'jug cing de nyid kyi rnam smin gyis/ de'i tshe skye bo sdig po che rnams/ sdig smin par sogs pa'i rnam smin gyis/ de nyid tshe ring zhing srog sra bar 'ong ba dang/ sngags kyi spyod pa dar bar spyod cing don la gol ba dang/ gsang ba'i rgyud rnams mngon du yongs su dar bas/ dus kyi nyams pa chen por gyur pas/ dus brtsi ba las log pa dang/ 'bras bu yang dmyal khams bcu drug la sogs par kha brgyud pa dang/ de la yang tshe tshad dag sdug bsngal la sogs pa grangs bsam gyis mi khyab par gnas pa dang/ de las thar nas kyang yi dwags mgo gcig la lus brgya la sogs pa'i sdug bsngal sna tshogs pa'i kha brgyud cing gnas pa dang/ de dag las thar nas kyang srin po 'bar ba ha sa ta la mgo dang yan lag mang po la sogs pa'i sdug bsngal kha brgyud par gyur to/ / de skad ces bka' stsal pa dang/ rdo rje sems dpa' shin tu 'jigs shing skrag nas brgyal te/ kha bub tu 'gyel to// dam tshig thams cad kyi rgyal po sa ma ya bkod pa'i rgyud las/ yan lag gi dam tshig nyams pa'i skyon bstan pa'i le'u ste drug pa'o//// de nas bcom ldan 'das yid kun tu bzang pos/ rdo rje sems dpa' brgyal ba bslang ba'i phyir/ 'di skad ces bya ba'i glu blangs so// a ho sna tshogs rang bzhin cir yang 'byung ba'i gzhi// bya ba med las yongs su rnam par grol ba yi/ / ma chags skye mched sems su yongs su dag/ brjod med ngang la rnam rtog mtshan ma spangs// rang bzhin yongs kyis zhi ba'i chos nyid la// 'dzin rtog med pa'i byang chub yang skye bas/ / nyams pa med cing don dang ldan pa'i ngang// yangs par rtogs na 'khor ba'i gcong rong bde// nyams par rig pas spyi khyab yongs la snums// thugs rje 'byung bas don dam yum gyi dbyings// yongs la khyab pas byang chub yab kyi ngang/ / gnyis med 'brel bas mngon sum sangs rgyas pas// bsrung ba'i rim pa 'di rtogs bde ba'i klong// gang zhig 'khrul pa yongs su thar pa'i phyir// byang chub nyid de 'khrul ba med par bya'o ha/ / de skad ces glu blangs pas/ rdo rje sems dpa' brgyal ba sangs nas/ bcom ldan 'das la phyi nang gi mchod pas mchod cing mnyes par byas nas/ zhabs la phyag 'tshal te 'di skad ces gsol to/ / kye kye shin tu bcom ldan 'das/ shin tu thugs rje chen po dang ldan pa/ shin tu thabs rgya mtsho mnga' ba/ shin tu 'gro ba 'dren pa'i bla mar gyur pas/ 'di dag nyams pa las slar gso ba'i thabs ni ci mnga'/ gsos na skongs par 'gyur ram mi 'gyur/ bde bar gshegs pa lung bstan du gsol/ de skad ces gsol ba dang/ bcom ldan 'das kyi bka' stsal pa/ rdo rje sems dpa' 'di dag shin tu gso ba'i thabs mnga' ste/ dper na mar me dang 'dra'o// shi zhing nyams kyang gso ba'i thabs mnga' 'o// gser skyogs dngul skyogs zhom pa dang 'dra ste/ zhom yang bsrang ba'i thabs mnga' 'o// de skad ces bka' stsal pa dang/ rdo rje sems dpa' shin tu dga' zhing dang ba skyes nas/ bcom ldan 'das la 'di skad ces gsol to// e ma a la la/ shin tu ngo mtshar dang ldan pa'i bcom ldan 'das kyis/ dam tshig nyams pa'i rgyu 'di rnams slar gso ba'i thabs mnga' ba ni shin tu ngo mtshar che ste/ sku'i dam tshig 'di dag nyams na/ slar gso zhing bskang ba'i cho ga gang lags pa dang/ gsung gi dam tshig 'di dag nyams na/ slar gso zhing bskang ba'i cho ga gang lags pa dang/ thugs kyi dam tshig 'di dag nyams na/ slar gso zhing bskang ba'i cho ga gang lags pa dang/ yan lag gi dam tshig la sogs pa 'di dag nyams na/ slar gso zhing bskang ba'i cho ga gang lags pa de/ bcom ldan 'das kyis lung bstan du gsol/ bde bar gshegs pas lung bstan du gsol/ de skad ces gsol pa dang/ bcon ldan 'das kyis bka' stsal pa/ sems dpa' chen po sku'i dam tshig nyams na/ slar gso ba'i cho ga 'di yid la zung zhig/ rdo rje slob dpon pha ma dang// de bzhin mched la sogs pa la// sku yi dam tshig nyams pa de// 'gyod pa drag po bskyed byas la/ / de dag rnams kyi spyan snga ru// zang zing nor dang yo byad rnams// ji ltar mnyes par phul nas ni// tshig tu 'di skad smra bar bya// ma rig 'khrul pa nor ba yis// nyes pa'i nyon mongs bdag las byung/ / bdud kyis bslus sam bdud kyis bsnun// bgegs kyis bslus sam ngan du smras// nor bar 'khrul lam log par bsams// phrag dogs gtum khro dag la sogs// nyes pa'i 'gal ba ci mchis pa/ / ma lus nyams pa mthol zhing bshags// rdo rje slob dpon dpal dang ldan// 'phags pa'i sku dang tha mi dad// sku gsung thugs kyi rdo rje bdag/ bde gshegs rnams kyi gsung rab lung// rnam par rgyal ba'i man ngag mnga'/ / zhal nas gsungs pa'i rgyal ba'i bka'// lus ngag yid thub gnas rab khyod// bsnyen bkur gzhung bzhin rngo ma thogs// ngan sems g.yas sems dag la sogs// sdoms pa'i dam tshig gang nyams pa/ / ma lus pa yang mthol zhing bshags// yun gyi sgrib par mi 'gyur zhing// tshangs pa 'phral du stsal du gsol// sku la bsdos dang thugs thub spyad// ma rig ka ma li la brlams// ngan du brjod dang log par smras/ / sku la smad cing thugs la 'goms// bka' rkun lung med yongs su bslad// nyams pa'i chad pas mi dgum zhing// tshangs pa dus 'dir stsal du gsol// thams cad rdo rje mched lcam dral/ / mthun par spyod pa'i rnal 'byor pa'i// bder gshegs slob mar lung mnos pas// mnyam dang mi mnyam don gcig la// legs nongs rnam par dbyer med kyang// rnam par 'bad pa'i sgo tsam du/ / gzhung las 'gal ba ci mchis dang// thugs dam yid 'gal ci mchis pa// rnam par dag pa'i bsam pas mthol// don gyis mi gnas tshig 'dis bshags// rab bzhin med pa bzod par gsol// 'dzin pa med par tshangs par gsol/ / dper na khrus kyi yon chab ltar// lus kyi dri ma sel ba bzhin// nyams pa'i dri ma sel bar mdzod// de ltar bshags pa byed na yang// slob dpon la sogs mched rnams kyis/ / gang zhig nongs pa dran pa dang/ rjes su 'gyod pa skyes nas su// slan chad sdom pa 'tshal ba la// tshangs pa 'phral du stsal bar bya// de la tshangs pa ma stsal na// gnyis ka rdo rje dmyal bar skye/ / de la sdug bsngal bzod glags med// de bas tshangs pa stsal bar bya// de ltar tshangs pa thob nas kyang// bshags pa 'dod pa gang yin pas// zhabs la spyi bor blang bar bya// slan chad mi gnyis gcig par bya/ / gal te nyams pa ma bskangs par// bla ma slob dpon mched lcam dral/ rkyen gyis grongs chad gyur pa na// de yi slob dpon bzhugs pa la// gong ma bzhin du bshags par bya// de yi slob dpon mi bzhugs na/ / de dang mnyam pa brgyad rnams la// de tshe gong ma bzhin du bshags// de yang rnyed par ma gyur na// spyin sreg me thab rab brtsigs nas// de dang mnyam pa gsum bkug la// mchod rdzas sna tshogs bsham par bya/ / gsum po de yang dbang por gzhag/ bla ma la sogs mched rnams kyis/ gsang mtshan la sogs spyan drangs te// sbyin sreg mchod pa tshul bzhin bya// dkyil 'khor lha la'ang tshul bzhin bya/ / gzhug la bshags pa'i cho ga gdags// de tshe zin par gyur pa'i tshe// gong du smos pa'i yon rnams kyang// dbang po gsum la dbul bar bya'o// des kyang yongs su bsgrags pa gtang// de bzhin lan grangs bdun du bya/ / de ltar byas na skongs par 'gyur// mched la sogs la'ang de bzhin no// dam tshig nyams par ngas ma bstan// nyams na gzhag par ngas ma bstan// bsrung bar bya ba ngas bshad do/ / nyams na bskang bar ngas bshad do// de ni sku yi dam tshig go/ dam tshig bkod pa'i rgyud las/ sku'i dam tshig nyams pa bskang ba'i le'u ste bdun pa'o//// gsung gi dam tshig bskang ba yang// rgyud chen dag gis mi skongs te/ / lung chen dag gi nang du bskang// de yang gso bar bya ba yi// cho ga yang dag 'di nyon cig/ sngags dang phyag rgya rgyun bcad nas// dus dang tshes grangs dag la sogs// de tshe nyams par gyur pa la/ / lung chen thob pa'i slob dpon gyis// nges par de yi drung song la// 'byor ba'i longs spyod sna tshogs dang// nor dang zang zing phul nas kyang// 'di skad ces ni gsol ba btab// nges pa'i lung byin man ngag can/ / don dang mthun pa'i skyes bu khyod// lcags chag mgar bas brdungs pa bzhin// chag nyams bskang ba'i rim pa rnams// nges par lung du bstan du gsol// de skad gsol ba btab nas kyang/ / de nas slob dpon blo ldan gyis// lan du 'di skad gleng bar bya// legs 'os bu mchog slob ma khyod// nges par bstan pa'i lung dag las// gang zhig 'gal ba bshags spro na// rna ba'i dbang po tshur nyon la/ / nges par 'di dag zin par gyis// zhes brjod do// de la rigs kyi bu ma yengs pa'i bzlas brjod yid la dus dang rgyun med par bzlas par bzlas pa ma rtogs nas/ rgyud kyi kha brgyud nas nges pa'i don mi shes pas 'grub ba'i don mi shes par/ 'grub par khas blangs pa de nyams pa chen bo'i rgyur 'gyur te/ de dag sems can gyi rang dbang gis mi 'grub cing/ dam zos shing 'gal ba'i rgyu shin tu mang bas/ rnal 'byor gyi spyod pa 'di dag sun 'byung zhing/ gang zhig shin tu sgyid lug pa mang ba la/ dang la chos 'di dag bshad par bya ba yin pa las/ slob dpon lung med cing man ngag la mi mkhas pa dang/ rnal 'byor pa'i lta ba chung zhing sems can gyi las dman pas/ de dag gzhung du ma snyems pas/ don ched 'di ltar yid la zungs shig/ lus kyi sgul skyod ni phyag rgya chen po'i rang bzhin yin pas/ ngag gi gleng brjod ni bzlas par bya ba'i snying po yin la/ sems dran rtog thams cad thugs rje ting nge 'dzin gyi rang bzhin yin pa'o// de ci'i phyir zhe na/ dper na brlan nyid chu'i rang bzhin yin pa las/ logs nas brlan mi 'byung ba bzhin du/ phyag rgya nyid lus kyi rang bzhin yin pa las/ logs na phyag rgya zhes bya ba med de/ lus las gzhan du mi 'da' bas dam tshig gi phyag rgya dang/ yan lag gi sgul skyod gang yang mthar phyin pa las kyi phyag rgya dang/ de la 'dzin pa dang thog chags med pas bde ba chos kyi phyag rgya dang/ de la dus gsum du 'du 'bral med pas sku phyag rgya chen po ste/ de ltar rig pa'i dus na/ lus phyag rgya'i dkyil 'khor la/ sku gsung thugs bkod pa mi zad par gnas pas 'di la yang 'da' ba yang med/ nyams pa yang med/ yengs pa yang med/ btsal ba yang med pas/ de la 'di skad ces bya ste/ ma rig 'gro ba'i sems can kun/ / sangs rgyas phyag rgya'i dkyil 'khor la// nges par grol bar rab bshad mdzad// ma rig sems can drang don du// phyag rgya rnams su bshad pa yang// log par lta ba bsgyur ba'i phyir/ / las kyi dbang du 'bab pa tsam// don la nges pa 'di rtogs na// ma bcos klong du lhan ne ba'o// de la ngag gi gleng brjod bzlas pa bya ba yin pa ni/ dper na sgra dang sgra brnyan 'dra ste/ sgra yang thos par byed pa la/ thos par byed pa yang sgra brnyan don yin la/ de bzhin du ngag gis glengs pa dang brjod pa yang sngags kyi bzlas brjod yin la/ sngags kyi bzlas brjod kyang ngag gi gleng brjod yin te/ chos thams cad ni tshig yin/ tshig thams cad ni yi ge/ yi ge thams cad snying po/ snying po thams cad ni mi brjed pa'i gzungs/ mi brjed pa'i don chos nyid de/ dus thams cad du so 'di las mi nyams par rig cing gnas par rtogs pa'i dus na/ snying po bzlas brjod zur phyin pa yin pa las/ 'di las 'da' ba med/ yengs pa med/ btsal ba yang med/ sgrub pa yang med pas/ de la 'di skad ces gsungs so/ / bzlas brjod bsnyen pa'i snying po rnams// ma bzlas don gyis tshang ba ni// don ni man ngag 'di yin te// snying po sngags kyi don rig pas// ci bzlas sngags kyi snying po mchog/ dus gsum bar chad med pa yi/ / bzlas brjod klong du gnas pa la// 'dzin rtog bar chad yod med do// bder gshegs gsung gi ngo bo la// sangs rgyas byang chub sems dpa' nyan// bskal pa'i chu bo'i rgyun bzhin du// snying po bar chad med pa'o/ / de la sems kyi dran rtog thugs ting nge 'dzin yin pa ni/ dper na mar me'i 'od dang 'dra ste/ mar me nyid kyang 'od la/ 'od nyid kyang mar me'i byin rlabs te/ yang dag pa'i sems kyi dran rtog thams cad thugs ting nge 'dzin yin la/ thugs ting nge 'dzin yang sems kyi dran rtog nyid du snang ste// dran pa thams cad shes pa/ shes pa thams cad rtsol ba/ rtsol ba thams cad thabs la mkhas pa/ thabs la mkhas pa thams cad rang rig pa'i ye shes te/ ye shes rang snang ba las ma gtogs pa/ rtog pa rang rgyud kyis med la/ thabs rang snang ba las ma gtogs pa/ nyon mongs pa rang rgyud kyis med de/ sems can gyi dmigs pa'i phyogs cha las 'das shing/ nye bar len pa'i sems gzhan du mi 'gyur bas/ rang 'byung gi ye shes chen po zhes kyang bya la/ de rnam par dag pa 'dus ma byas chos sku chen po dang ldan pas/ 'di ltar rig pa'i skyes bu chen pos 'da' ba yang med/ yengs pa yang med/ 'gyur ba yang med pas/ de la 'di skad ces gsungs so// thugs kyi brnag pa gang yin pa// nges pa 'di las rgya cher bshad/ / dus gsum 'gyur ba med pa yi// rang byung rig pa'i rgyal po'i 'os// gang ltar bsam pa 'dod dgur bde// yongs la khyab pas brdal ba'i sku// dngos por mi chags ma chags glong// rang bzhin mtshan ma kun spangs te/ / yang so che 'o sems chen po// skyes bu dam pa nyid yin pas// bcos pa med pa'i snying po la// brjed pa med pas lha zhes bya// ma yengs pa yi dgongs pa yis// nyams pa la bzla dgongs par ldan/ / thams cad kun tu mi 'gyur ba'o// dam tshig bkod pa'i rgyud las/ dam tshig nyams pa bskang ba'i le'u ste brgyad pa'o//// sems dpa' chen po thugs kyi dam tshig bskang ba yang// rgyud lung dag gis mi bskongs te/ / man ngag dag gis nang du bskang// de yang gso bar bya ba yi// cho ga yang dag 'di nyon cig/ gsang ba'i man ngag chen po rnams// dam tshig nyams dang med pa dang// dam las log dang ma 'dres pa/ / 'phyar la gcam pa'i gang zag dang// theg pa dman pa la sogs pa// tshig tu brjod cing bstan pa dang// ya ga log pa dag la sogs// de tshe nyams par gyur pa la/ / sdug bsngal gzhan gyis mi 'byongs te// man ngag can gyi slob dpon la// nges par de yi drung song la// 'byor pa longs spyod sna tshogs dang// rin chen gser la sogs pa yi// yon mchog dag kyang dbul bar bya/ / de nas slob dpon chen po la// 'di skad gsol ba gdab par bya// mkhas pa'i blo ldan man ngag can// nges pa'i rtsal 'chang skyes bu'i mthu// rig pa'i rtsal 'chang rdzu 'phrul can// yangs pa'i chos nyid nam mkha' 'dra/ / khyab pa'i thugs rje nyi ma bzhin// rnal 'byor yongs khyab snum pa'i mchog/ 'gro la phan pa'i gtso can gyis// log pa'i gol sar mi gtang zhing// byang chub nyid du dran pa dang/ / nyams pa'i dri ma bsal ba'i phyir// sangs rgyas rnams kyis dgab tu gsol// thugs rje char gyis bkru bar mdzod// man ngag nges pa bstan du gsol// de skad gsol ba gdab par bya// de nas ston pa slob dpon gyis/ / lan du 'di skad brjod par bya// 'gyod pa skyes pa bu mchog khyod// tshul bzhin bshags phyir legs par 'ongs// de ni man ngag snod dang ldan// nges par lung ni bstan par bya'o// yid dang rna ba'i dbang po la/ / nges par 'di ni bcang bar gyis// zhes brjod la/ de la rigs kyi bu thugs kyi dam tshig gsang ba'i man ngag gzhan la spel ba ni/ dam nyams pa dang/ ma 'dres pa dang med pa la sogs pa la spel te/ zang zing dang nor 'dod kyi dbang du btang na nyams pa'i rgyu yin pa de ni/ man ngag chen po'i gzhung gis thugs kyi dam tshig nyams pa med pa zhes bya ste/ nam mkha' la yangs dog med pa bzhin/ blo chos nyid du gyur pa la 'dzin rtog gi bag chags spangs pas/ gang zhig smras shing brjod na yang/ snod dang mi ldan pa med par shes par byas la/ bsrung du med pa'i ngo bo/ rang bzhin gyi rnal 'byor pas/ chos nyid las tshigs dang yi ger gleng ba las 'das shing/ 'di 'dra zhes bstan par sus kyang mi nus pas/ smras na yang smras pa'i ngo bo med cing yang dag pa'i sa la gleng brjod dang bral bas nyams pa med la/ 'di ltar rig pa'i skyes bus nyams par mi 'gyur zhing/ nyams na yang 'khor lo sgyur ba'i rgyal srid ltar/ nang nyams na nub sor chud la/ nub nyams na nang sor chud de/ rdza mkhan 'jim rlon dang phrad pa dang 'dra la/ de ltar bstan cing bshad na gang la yang 'dzin pa med pas/ yang dag pa la nyams pa'i rgyu med pas/ don chen 'di ltar rig pa'i skyes bus skongs kyi/ phal gyis skongs par mi 'gyur ro/ / de la 'di skad ces gsungs te/ ya rabs gsang ba'i man ngag 'di// ma rabs phal gyi spyod yul min// kun gyis rtogs par mi 'gyur te// rgya mtsho'i gting ltar rtogs pa med// nam mkha'i mtha' ltar thug pa med/ / spong len med par rig pa yis// yongs la khyab bde bshad pa'i phyir// ma rabs bus pas mi rtogs te// gang zhig tshig tsam zlos pa las// man ngag yod ces yongs mi bya/ / gdeng chen ldan pa'i skyes bu dang// bka' dang 'thun las ma gtogs pa// ras chod bshad pas yongs mi 'grub// theg pa sngags kyi 'bras bu ni// spel zhing bshad pas mi 'grub ste// yid la brnags shing bcangs pas na/ / man ngag snying po de la yod// rang gi sems nyid ma rtogs na// bstan cing bshad kyang than par zad// dus gsum 'pho 'gyur med pa yi// byang chub nyid la g.yos pa med// khams gsum 'khrugs kyang stong pa med/ / srid gsum 'khrugs kyang g.yos pa med// bsam med chos ni nam mkha' 'dra// brjod med sems ni mtshan nyid med// ming dang tshig las 'das pa yi// sangs rgyas nyid kyis brjod par dka'/ / sems dpa' chen po 'di lta bu'i man ngag nos shing khong du chud par gyis shig/ thugs kyi dam tshig skongs pa'o// 'di lta bu la yengs pa med par gyis shig/ thugs kyi dam tshig mi nyams pa'o/ / 'di'i don la 'gyur ba med par gyis shig/ thugs kyi dam tshig mi 'da' ba'o// dam tshig thams cad kyi rgyal po sa ma ya bkod pa'i rgyud las/ thugs kyi dam tshig nyams pa bskang ba'i le'u ste dgu ba'o/ /// sems dpa' chen po yan lag gi dam tshig bskang ba yang/ rtsa ba'i dam tshig bskang ba sa dang yan lag kyang shugs kyis skongs la/ de las rtsa ba ma nyams par yan lag nyams na yang gong ma gong ma ltar bskangs pas yan lag kyang skongs par 'gyur ro/ / sems dpa' chen po de ni dper na shing ta la'i rtsa ba ma phyung na yan lag nyams kyang shugs kyis skye ba bzhin/ rtsa ba ma nyams na yan lag kyang shugs kyis skong bar 'gyur la/ gal te nyams par tshor na yang spyad par bya ba'i dam tshig nyams na dkyil 'khor gcig pa'i 'phrin las kyis bskang// mi spang ba'i dam tshig nyams na dkyil 'khor chen po gnyis pa'i dam tshig gis bskang/ gnyis ka nyams na sgrol sbyor gyi mchod pa brgya rtsa brgyad kyis bskang/ dang du blangs ba nyams na bdud rtsi sman gyis bsgrub pas bskang/ shes par bya ba nyams na gsung dbang gi 'phrin las kyis bskang/ bsgrub par bya ba'i dam tshig nyams na thugs rdo rje rigs kyi dam tshig gis bskang/ kun ka nyams na sku gsung thugs yon tan 'phrin las kyi sgrub pa rdzogs pas bskang ngo// dam tshig thams cad kyi rgyal po sa ma ya bkod pa'i rgyud las/ yan lag gi dam tshig nyams pa bskang ba'i le'u ste bcu pa'o//// de skad ces bka' stsal pa dang/ rdo rje sems dpas yang 'di skad ces gsol to/ / e ma'o ngo mtshar rab 'byams kyis// skang so cho ga khyad par che// dam tshig 'di dag bsrungs pa yi// yon tan 'bras bu gang yin pa// bcom ldan 'das kyis bstan du gsol// de skad ces gsol pa dang/ bcom ldan 'das kyis bka' stsal pa/ sems dpa' chen po dam tshig 'di dag bsrungs pa'i phan yon dang 'bras bu ni yang dag pa nyid du bshad par bya'o// dam tshig ni 'degs pa'i sa gzhi dang 'dra'o/ / dam tshig ni 'jig pa'i mkhar dang 'dra'o// dam tshig ni rno ba'i mtshon dang 'dra'o// dam tshig ni skyed par byed pa'i pha ma dang 'dra'o// dam tshig ni grub par byed pa'i shing thog dang 'dra'o/ / dam tshig ni mi 'bral ba lus dang grib ma dang 'dra'o// dam tshig ni ma yengs na sgom pa yin no// dam tshig ni ma brjed na chos nyid yin no// dam tshig ni rjes su dran na bzlas brjod yin no// sems dpa' chen po sku'i dam tshig ma nyams par bsrungs ba'i yon tan ni/ lus mtshan dang dpe byad kyis brgyan pa dang/ nad nyung ba dang/ gzhon zhing lang tsho dar la bab pa dang/ yan lag la lhag chad med pa dang/ dbang po nyams pa med pa dang/ tshe ring ba dang/ longs spyod 'phel ba dang/ 'byor ba 'phel ba dang/ 'khor ma mo dang mkha' 'gro ma bka' bzhin nyan pa dang/ srid pa gsum la dbang sgyur ba dang/ mthu dang rdzu 'phrul yang gzhan gyis dpag gi mi lang ba dang/ man ngag lung gi don rtogs par 'gyur ba dang/ rigs 'dzin rnam gsum gyi dngos grub 'thob pa dang/ kun tu bzang po dang skal ba mnyam par 'gyur ro/ / sems dpa' chen po gsung gi dam tshig ma nyams par bsrungs ba'i yon tan ni/ lha nye ba dang/ rigs brgyud 'phel ba dang/ dus su 'grub pa dang/ bka' nyan pa dang/ dbang du 'du ba dang/ kha lo sgyur ba dang/ legs pa 'phel ba dang/ skyon gyis mi gos pa dang/ chos nyid kyi don dang mi 'gal ba dang/ mya ngan las 'das pa'i sku thob pa dang/ kun tu bzang po dang spyod pa mnyam par 'gyur ro/ / sems dpa' chen po thugs kyi dam tshig ma nyams par bsrungs ba'i yon tan ni/ don dang mthun pa dang/ skyo dub med pa dang/ man ngag gi snod du 'gyur ba dang/ dngos grub thob pa dang/ rtog pa med pa dang/ dgongs pa zab pa dang/ thugs rgya che ba dang/ don la mkhas pa dang/ gzhung las mi 'gal ba dang/ kun tu bzang po dang rtog pa mnyam par 'gyur ro// sa ma ya bkod pa las/ sku gsung thugs kyi dam tshig bsrung ba'i yon tan gyi le'u ste bcu gcig pa'o/ /// sems dpa' chen po yan lag gi dam tshig ma nyams par bsrungs pa'i yon tan ni/ dngos grub chen po rnam gsum thob pa dang/ bdud rnam bzhi tshar gcod pa dang/ rdo rje theg pa'i bka' btsan zhing mi 'gyur ba dang/ sngags che ba'i yon tan nub pa'i dus med pa dang/ lhun gyis grub pa'i 'phrin las ci la yang thogs pa med pa dang/ khyad par gyi 'bras bu mthar rgyas pa dang/ gnyis su med pa'i don la yun du mi 'gyur ba dang/ bla na med pa'i sa la bde ba chen por longs spyod pa dang/ grangs dang tshom bu bsam gyis mi khyab pa thams cad lcang lo can gyis pho brang du grangs dang tshom bu bsam gyis mi khyab par phung po mi gnas pa'i mya ngan las 'das par mngon par rdzogs par sangs rgyas pa dang/ 'khor gyi mkha' 'gro ma thams cad sprin phung bzhin du gtibs nas ci bsgo ba nyan pa la sogs pa'i yon tan bskal pa brgyar brjod kyang rdzogs pa'i mtha' med do/ / dam tshig bkod pa'i rgyu las/ yan lag gi dam tshig bsrung ba'i yon tan gyi le'u ste bcu gnyis pa'o/ /// spyi'i dam tshig nyi shu rtsa brgyad la sum brgya drug cur sbyar te/ lta ba'i dam tshig brgya nyi shu dang/ spyod pa'i dam tshig brgya nyi shu dang/ bsrung ba'i dam tshig brgya nyi shu ste/ de ltar sum brgya drug cu'o/ / de la lta ba'i dam tshig brgya nyi shu ni/ chos thams cad kyi rtsa ba kun gzhi byang chub kyi sems su 'dus par lta zhing mi 'da' ba dang/ de bzhin du sangs rgyas thams cad kyang rang gi sems yin par lta ba dang/ sems ye nas sangs rgyas par lta ba dang/ yul chos nyid du lta ba dang// dbang po ye shes su lta ba dang// de yang gnyis su med pa'i byang chub kyi sems bde ba chen por lta ba dang/ sems can nyid yang dag pa'i sangs rgyas su lta ba dang/ 'khor ba nyid mya ngan las 'das par lta ba dang/ sdug bsngal thams cad byang chub dam par lta ba dang/ nyon mongs pa thams cad lam gyi dam par lta ba dang/ ma nor ba'i chos nyid dang/ ma yengs pa'i ting nge 'dzin dang/ ma bcos pa'i don dang/ ma brjed pa'i phyag rgya dang/ ma bslad pa'i ye shes dang/ mi dmigs pa'i ting nge 'dzin dang/ ma skyel pa'i klong dang/ mi 'da' ba'i dam pa dang/ mi 'gyur ba'i g.yung drung dang/ mi gtong pa'i rig pas mi 'bral ba'i gzungs su lta zhing/ dam tshig las mi 'da' ba ni/ lta ba'i dam tshig gi rtsa ba'o// de la chos thams cad kyi rtsa ba kun gzhi byang chub kyi sems su 'dus par lta zhing/ dam tshig las mi 'da' ba la yang lnga ste/ de'i don ston pa'i rdo rje slob dpon btsal ba dang// bka' las 'byung ba'i lung ma nyan pa dang/ man ngag tu sems la sgom pa dang/ ye nas de ltar yin par yid ches par bya ba dang/ dang du blang zhing mi 'da' ba'i bar du don rnam pa lnga lngas bstan cing yid ches par bya ba ni/ lta ba'i dam tshig brgya nyi shu'i yan lag go/ dam tshig bkod pa'i rgyud las/ lta ba'i dam tshig brgya nyi shu'i le'u ste bcu gsum pa'o//// sems dpa' chen po de la spyod pa'i dam tshig brgya nyi shu ni/ dbyings dang ye shes gnyis su med pa chos kyi skur spyod cing/ dam tshig las mi 'da' ba dang/ thabs dang shes rab gnyis su med pa'i byang chub sems su spyod cing/ dam tshig las mi 'da' ba dang/ yab dang yum yang gnyis su med pa'i bde ba chen por spyod cing/ dam tshig las mi 'da' ba dang/ de bzhin du phyi dang nang yang phyogs ris med par chos nyid du bde ba brdal bar spyod pa dang/ mtha' dang dbus kyang ye shes chen por khong du snyoms par spyod pa dang/ che ba dang chung ba yang mnyam pa nyid kyi klong du spyod pa dang/ sangs rgyas dang sems can yang thig le chen por lhun gyis grub par spyod pa dang/ mthon po dang dma' mo yang steng 'og med par lhun gyis grub par spyod pa dang/ bzang po dang ngan pa yang spong len med pa'i mdzad spyod du rol pa dang/ bde ba dang sdug bsngal yang gnyis su med pa'i 'phrin las su mdzad pa dang/ 'khor ba dang mya ngan las 'das pa yang mi dmigs pa'i ting nge 'dzin du sgom pa dang/ rgyu dang 'bras bu thams cad mi 'gyur ba'i g.yung drung du spyod pa dang/ phung po dang/ khams dang/ skye mched thams cad lha dang lha mo'i dkyil 'khor gnyis su med par spyod pa dang/ yul dang dbang po thabs dang shes rab tu sbyod pa dang/ 'dod ba'i yon tan thams cad chos nyid rnam par dag pa'i rgyan du spyod pa dang/ nyon mongs pa lnga dug lnga ye shes lnga'i rang bzhin du spyod pa dang/ phyin ci log lnga sku lnga mthar phyin par spyod pa dang/ mi gtsang ba'i dam rdzas lnga bdud rtsi chen po lnga'i rang bzhin du spyod pa dang/ 'dzin rtog gi skyon thams cad kun tu bzang po'i 'dzin spyod du rol cing spyod pas/ dam tshig las mi 'da' ba'o// de la dbyings dang ye shes gnyis su med pa chos kyi skur rtogs par bya zhing dam tshig las mi 'da' bar bya ba la yang don rnam pa lnga ste/ rtogs par bya ba'i thabs dang/ bsgom par bya ba'i yul dang/ bsgrub par bya ba'i 'phrin las dang/ mthar phyin pa'i 'bras bu dang/ bstan cing gzhag par bya ba'i snod dang lnga'o// de bzhin du 'dzin rtog gi skyon thams cad kun tu bzang po'i mdzad spyod du rol cing spyod pa'i dam tshig gi bar du rtogs pa dang/ sgom pa dang/ bsgrub pa dang/ mthar phyin pa lnga lngar shes par bya'o// sa ma ya bkod pa'i rgyud las/ spyod pa'i dam tshig brgya nyi shu'i le'u ste bcu bzhi pa'o/ /// sems dpa' chen po de la bsrung ba'i dam tshig gi brgya nyi shu ni/ lta ba zab mo thams cad shes rab chung ba dang/ theg pa dman pa la bsrungs la dam tshig las mi 'da' bar bya ba dang/ spyod pa glang po thams cad ya kha dang rtog pa can la bsrungs la dam tshig las mi 'da' bar bya ba dang/ de bzhin du gsang ba'i 'phrin las gzu lums dang ras chod can la bsrung ba dang/ gsang ba'i don bka' rkun dang rgyab nyan byed pa la bsrung ba dang/ gsang ba'i man ngag dad pa chung zhing gsang med pa la bsrung ba dang/ nges pa'i don 'phyar po dang 'phyon ma la mi 'byung ba dang/ dngos grub kyi rkyen kha sla dang tshod yod pa la bsrung ba dang/ brtson po'i 'phrin las le lo dang long yod can la mi gtad pa dang/ mtshan ma dang grub rtags rang bstod rang che ngag tu mi smra bar bsrung ba dang/ grogs dang mched dam tshig nyams shing mtshan ngan pa la mi btsal ba dang/ bka' gsang sbed shes pa dang/ man ngag 'tshol mkhas pa dang/ don la nan gtan che ba dang/ dam phog pa mi brjed pa dang/ gdung sems mi gtong ba dang/ gnyer gtad pa grims pa dang/ 'khor la snod rtogs pa dang/ bka' la lta log dang sgro skur med pa dang/ phyogs la ngan sems dang gdug sems med pa dang/ yongs la spro ring zhing dang che bar bsrung zhing dam tshig las mi 'da' ba'o// de ltar lta ba zab mo thams cad shes rab zhan pa dang theg pa dman pa la bsrung ba la yang lnga ste// lus kyis bsrung ba mi 'byung ba dang/ ngag gis bsrung ba mi smra ba dang// yid kyis bsrung ba brnag pa dang// thabs kyis bsrung ba rtag pa dang// spyod pas bsrung ba gzab pa'o// de bzhin du yongs la spro ring zhing dang che bar bsrung ba'i dam tshig gi bar du lus dang/ ngag dang/ yid thabs dang spyod pa lnga lngar rig par bya'o// dam tshig thams cad kyi rgyal po sa ma ya bkod pa'i rgyud las// bsrung ba'i dam tshig brgya nyi shu dang sum brgya drug cu'i le'u ste bco lnga pa'o/ /// sems dpa' chen po dam tshig sum brgya drug cu la/ las su bya ba'i dam tshig gsum ste// sbyor sgrol sman dang gsum mo// de la rtsa ba bco lngar spros te// sbyor ba'i lung drug/ sgrol ba'i gnas bzhi/ bcud rtsi sman lnga'o// rtsa ba bco lnga las sum brgya drug cur spros pa ni/ mi spang pa brgya nyi shu dang/ dang du blang ba brgya nyi shu dang// spyad par bya ba brgya nyi shu ste// de ltar sum brgya drug cu'o// de yang mi spang ba brgya nyi shu la/ sbyor ba'i gzungs ma khru tshad dang ldan pa bzhin bzangs ma lo bcu gnyis lon pa dang// lo bcu drug lon pa dang/ lo nyi shu rtsa lnga lon pa dang/ lo sum cu rtsa gcig lon pas gzhi gzung ste/ mo rigs phal yan chad zin zin kun yang bgrangs pa brgya nyi shu la sbyor ba tshul bzhin byas pa'i yon tan ni/ 'gro ba mtha' dag dbang du 'gyur zhing/ dngos grub grangs kyang de bzhin thob nas/ ye shes lnga'i rigs 'dzin du skye'o// dang du blang ba'i dam tshig brgya nyi shu ni sman bdud rtsi la byas te/ gtso bo lnga dang/ 'bras bu lnga dang/ dbang po lnga dang/ sman sna tshogs pa'i ra sa ya na rtsa ba dang yan lag tu bcas pa brgya nyi shu la sogs te sbyar zhing dang du blangs pa'i yon tan ni/ bdud bzhi 'joms shing dug lnga sel te/ gtan mi 'chi ba'i sman gyis rigs 'dzin thob nas/ sku lnga lhun gyis 'grub bo// spyad par bya ba'i dam tshig brgya nyi shu ni bsgral bar bya ba ste/ 'bras bu chen po lnga dang/ zhing bcu la sogs te/ brgya nyi shu bsgral bar byas nas de'i yon tan ni dam tshig dang/ sdom pa dang/ tshul khrims nyams pa thams cad skongs nas/ dam tshig nyams pa las ma gtogs pa gzhan gyi sdig ci byas kyang bag chags kyis mi gos so// sems dpa' chen po gzhan yang yan lag gi dam tshig ma nyams par bsrung na dgyes pa bskongs pa dang/ mnyes pa 'bul ba dang/ dngos grub stsol ba dang/ 'phrin las mthar phyin pa dang/ sems can kyi don yid bzhin du 'grub pa dang/ 'og min gyi gnas su mi gnyis par gcig pa'o/ / dam tshig thams cad kyi rgyal po sa ma ya bkod pa'i rgyud las/ dam tshig sum brgya drug cu bskang ba'i 'phrin las kyi le'u ste bcu drug pa'o//// de nas rdo rje sems dpas yang 'di skad ces gsol to/ / kye ma yan lag gi dam tshig sum brgya drug cu bsrungs pa'i phan yon dang/ ma bsrungs pa'i skyon ci lags/ bka' stsal pa/ sems dpa' chen po dam tshig sum brgya drug cu bsrungs pa'i yon tan ni/ bdag gi dgongs pa dang/ gzhan gyis 'byor ba kun 'grub pa ste/ sa rdo dang/ rtsi shing dang/ ri brag la thogs pa med pa dang/ chu la mi 'bying zhing mkha' la bya bzhin du 'phyo ba dang/ rdzu 'phrul rnam pa sna tshogs kyis 'gro ba'i don byed pa dang/ bdud dang bar du gcod pa la sogs pa rdul phra mo bzhin du brlag pa dang/ yid la bsam pa thams cad 'grub pa dang/ thams cad du legs pa sbyin zhing bkra shis pa dang/ mi dang mi ma yin pa la sogs pa rnams kyis yid bzhin gyi nor bu dang 'dra bar bkur ba dang/ mkha' 'gro dang sha za la sogs pa thams cad lus kyi rje bo bzhin du byed pa dang/ gnas pa gang na ba der rdo rje theg pa dar zhing rgyas pa dang/ 'khor dang sder bcas pa rim gyis grub pa thob nas/ thams cad dad cing 'dun pa'i zhing du gyur pa dang/ de bzhin gshegs pa thams cad kyi thugs su byon zhing spyan du mdzes pa'i rang bzhin can du gyur pas yon tan bgrang ba las 'das pa'o/ / sa ma ya bkod pa'i rgyud las/ yan lag gi dam tshig sum brgya drug cu bsrungs pa'i phan yon gyi le'u ste bcu bdun pa'o/ /// sems dpa' chen po sum brgya drug cu ma bsrungs pa'i skyon ni/ dper na srog med pa'i gzugs brnyan gyis srog gi bya ba med pa bzhin dam tshig med cing ma bsrungs pas bla na med pa'i byang chub kyi bar du mi nus pa ste/ 'bad pa la don med cing bsgrubs pa la 'bras bu mi 'byung ba dang/ bsam pa mi 'grub cing btsal ba skyon du 'gyur ba dang/ byas pa thams cad chud zos shing yid la mi 'dod pa 'phel zhing rags pa dang/ mi snyan pa'i grags pa dang/ mi skyid pa'i sdug bsngal gyi mtsho rdol ba dang/ bka' chad kyi gnas dang/ bka' 'bab kyi chad pas kyang ye shes kyi lha rnams gtan du 'phangs shing/ dam can rnams kyang gshed mar 'gyur ba dang/ 'phral gyi ye 'grog gis srog gi bar chad du 'gyur ba la sogs pa nyes pa brjod kyis mi lang ste/ yi dwags kyi gdon brgyad khri bzhi stong gis nyen par gyur nas/ mnar med pa'i dmyal ba yan chad la thug pa'o// sa ma ya bkod pa'i rgyud las/ sum brgya drug cu ma bsrungs ba'i skyon gyi le'u ste bco brgyad pa'o//// de skad ces bka' stsal pa dang/ bcom ldan 'das la/ rdo rje sems dpas 'di skad ces gsol te// kye ma yon tan dpag med pa/ sangs rgyas mdzad pa khyad par che'o// grub pa'i yon tan bsam mi khyab// nges pa'i dgongs pa phal che las/ / rnal 'byor rnams la thugs rje che// 'dren pa khyod la phyag 'tshal bstod// gzhan yang dam tshig rtsa ba rnams// bcom ldan 'das kyis bshad du gsol// kun bzang lha yis bka' stsal pa// nyon cig sems dpa' chen po khyod/ / dam tshig rtsa ba yang dag ni// lta ba 'di la rab tu 'dus// mi 'da' ba yi dam tshig la// g.yos pa med pa'i chos nyid kyis// yongs la bde khyab 'jig rten spangs// gnyis med sems ni thabs kyi sku/ / sangs rgyas ye shes de las med// de rtogs skyes bu chen po yis// lta ba'i dam tshig rtogs zhes bshad// sa ma ya bkod pa'i rgyud las/ lta bas la bzla ba'i le'u ste bcu dgu pa'o//// de nas rdo rje sems dpas 'di skad ces gsol to// bcom ldan 'das dam tshig gi gtor ma la rnam grangs dur bstan par bgyi/ bcom ldan 'das kyis bka' stsal pa/ dam tshig gi gtor ma la rnam pa gsum ste/ gtor ma'i lta ba dang/ gtor ma'i spyod pa dang/ gtor ma'i 'phrin las so// de la gtor ma'i lta ba ni/ snang srid gtor mar lta ba'o// gtor ma'i spyod pa ni/ thabs dang shes rab tu spyaud pa'o// gtor ma'i 'phrin las ni/ dus gsum sku gsum thugs su sangs rgyas pa'i 'phrin las so// de la yang rnam pa gsum ste/ chos nyid dbyings kyi gtor ma dang/ ye shes rol pa'i gtor ma dang/ thugs rje sprul pa'i gtor ma'o// de la 'di skad ces gsungs te/ khyad par dpal gyi gtor ma skugs na nyal// sha khrag dmar gyi gtor ma 'ben du 'cha'// sprul pa'i mchod gtor 'jig rten khyad par gtor/ / yongs su khyab pa'i gtor ma chen po yis// kun la khyab pas ye shes dbyings su 'dus// 'dus ma byas pa'i gtor ma chen po la// 'dzin rtog med pa'i sems kyis bkrol ba yi// rang bzhin med pa'i gtor ma chen po 'di/ / yongs su gtor bas 'gro ba'i don rdzogs nas// rnam rtog 'dzin pa'i nyon mongs kun bkrol te// bla med byang chub lam la dgod bar mdzod// dam tshig bkod pa'i rgyud las/ gtor ma dam tshig gi le'u ste nyi shu tham pa'o//// de nas yang rdo rje sems dpas/ bcom ldan 'das la 'di skad ces gsol to// yab gcig lags 'di ltar yon tan che ba/ 'di ltar mthu che ba/ 'di ltar thabs che ba/ 'di ltar nyan che ba/ 'di ltar rab tu zab pa'i rgyud 'di'i phan yon gang lags/ bcom ldan 'das kyis bka' stsal pa/ sems dpa' chen po phyogs bcu sangs rgyas thams cad kyi thugs kyi yang thugs/ gzigs par bya ba'i spyan du yang gyur pa'i rgyud 'di ni shin tu phan yon che ste/ rgyud 'di shes shing rtogs pa lta ci smos kyi/ tha na tshig 'bru 'ga' tsam yang yid la byed na yang/ de dus thams cad du dam tshig nyams par mi 'gyur zhing/ nyams na yang skongs bar 'gyur la/ skangs na yang skongs bar 'gyur nges la/ de ni 'jig rten gyi khams 'dir yang mthu dang/ rdzu 'phrul dang/ dngos grub la sogs pa gang gis kyang bskyad du med par 'gyur la/ 'jig rten pha rol tu yang kun tu bzang po'i dgongs pa dang skal ba mnyam par 'gyur ro// sems dpa' chen po rgyud 'di ming tsam 'dzin par byed na yang/ de ngan 'gror 'gro bar mi 'gyur/ lta ba phyin ci log tu mi 'gyur/ dam tshig nyams par mi 'gyur/ de bzhin gshegs pa'i don dang ldan zhing bde ba mchog dang ldan par 'gyur ro// sems dpa' chen po rgyud 'di 'dzin pa 'am/ 'chang ba 'am/ klog pa 'am/ yi ger 'dri ba 'am/ ming nyan par byed na/ de sangs rgyas dang byang chub sems dpa' thams cad kyis mchod cing bkur stir byed pa dang/ 'khor ma mo dang mkha' 'gro ma la sogs pa rnams kyang/ ci bsgo ba rnams bran bzhin snying nye bzhin nyan pa dang/ tshe dang 'byor ba'i longs spyod dang ldan pa dang/ 'jig rten phyi mar yang kun tu bzang po dang mnyam zhing dbyer med par 'gyur ro/ / sems dpa' chen po gang zag la la mnar med par ltung bar nges pa la yang// rgyud 'di thos par byas na/ bla na med pa'i don dang ldan par 'gyur ro// sems dpa' chen po gang zag la la dam nyams nas rdo rje dmyal bar ltung ba yang/ rgyud 'di yi tshig 'ga' rna bar thos na yang/ de'i dam tshig nyams pa de skongs nas/ rnal 'byor bde ba'i don dang ldan par 'gyur ro// sems dpa' chen po de lta bu'i rgyud 'di ni shin tu dkon zhing mi 'byung ba ste/ de ci'i phyir zhe na/ rgyud 'di phyogs bcu'i dus gsum gyis de bzhin gshegs pas kyang ma gsungs/ gsungs bar mi 'gyur/ ngas kyang ma bshad/ bshad par mi 'gyur/ sangs rgyas rnams kyang mi gsung bar 'gyur ba'i phyir yang dkon no// sems dpa' chen po rgyud 'di ni gang na yang mi bzhugs/ gang na yang mi ston/ ston par mi 'gyur/ bzhugs par mi 'gyur ba'i phyir dkon no/ sems dpa' chen po rgyud 'di ni gang zag gi blo la mi snang/ snang bar mi 'gyur ba'i phyir dkon no// de skad ces bka' stsal pa dang/ rdo rje sems dpas/ bcom ldan 'das la 'di skad ces gsol to/ / e maho ngo mtshar che'o// rgyud 'di tshig tu mi gnas pa de sems can skal ba chung ba lags sam zhes gsol pa dang/ bcom ldan 'das kyis bka' stsal ba/ sems dpa' chen po rgyud 'di ni tshig dang yi ger 'dri ba las 'das pas/ dus kyi tha ma la 'byung yang srid/ mi 'byung yang srid pas/ 'byung na gang zag gcig la 'byung la/ de gang dang yang ma bral ba'o// de la skur pa 'debs pa dag 'byung ba'i phyir yang dkon no/ / dam nyams shing ma rungs ba'i phyir dkon no// 'di dag ma thos shing mi shes pas/ phrag dogs dang/ skur pa dang/ nga rgyal dang/ smod pas kyang dkon no/ / rgyud 'di bshad cing bstan pa min pas kyang dkon no// 'di ni dad pa dang/ rang bzhin zab pa dang/ gron tshegs la mi lta ba dang/ snod dang ldan pa la byung bas kyang dkon no// rgyud 'di rnal 'byor grub pa gcig gi sems la 'byung bas kyang dkon no/ / sa ma ya bkod pa las/ rgyud kyi phan yon gyi le'u ste nyi shu rtsa gcig pa'o//// de nas rdo rje sems dpas 'di skad ces gsol to// dam tshig chen po gsang ba'i rgyud ji ltar btsal bar bgyi/ spyad legs pa'i yon tan dang/ ma legs pa'i skyon ji ltar byung/ kun gyi rgyal pos bka' stsal pa/ sems dpa' chen po gsang ba'i chos thams cad kyi dam tshig ni/ dper na rgyal po chen po'i bka' khrims gsang zhing dam par blon po rig pa can gyis btsal na/ thugs dgongs dang bsam dgongs thams cad mthar phyin te rgyal khams bde zhing skyid par 'gyur la/ de blon po da dar gyis rgyal khrims spyad ma legs na thams cad kyang phung nas sdug cing bsngal ba bzhin/ gsang ba 'di dag thams cad las 'phro dang skal bar ldan zhing snod du gyur pa'i rdo rje slob dpon dang/ slob mar bcas pas gsang ba'i don sba zhing spyad legs par bya dgos te/ gsang ba thams cad la gnyan zhing bkur ba lha dang klu'i spyi gtsug gi nor bu rin po che dang 'dra bar bya ba dang/ 'phangs shing brtse ba mig gi 'bras bu lta bur bya ba dang/ mi 'bral ba lus dang grib ma 'dra bar bya ba dang/ gsang zhing sba ba snying sgor 'byin pa dang 'dra bar bya ba dang/ nyams su blang ba mgo la me mched pa ltar bya ba dang/ spyod pa gzab pa tshul shis pa'i btsun mo ltar bya ba dang/ mi 'bral zhing srung ba srog rtsa dang snying rtsa 'dra bar bya ba dang/ sba zhig gsang ba pho mo'i mtshan ma dang 'dra bar bya ba dang/ nan tan dang gdams pa yun gyi gter bzhin du bya ba dang/ bka' las 'byung ba'i gdam ngag man ngag bzhin du mnyan par sems la bcangs na/ gsang sngags kyi rgyu gser dang 'dra ba dgos pa'i don yid la ji ltar 'dod par spyad du yod ba dang/ gsang ba'i 'bras bu zhing gshin pa'i lo tog bzhin du 'phel ba dang/ gsang ba'i nus mthu nor bu rin po che dang 'dra bar 'byung ba dang/ log pa'i phyogs mtha' dag gtar mtshan la rtse sbur reg pa 'dra bar 'gyur ba dang/ bar du gcod pa thams cad me'i phung po la sprang bu brlag pa 'dra bar 'gyur ba dang/ ngan song 'khor ba'i sdug bsngal thams cad mun rum du nyi ma shar ba dang 'dra bar 'gyur ba dang/ 'dzin rtog thams cad rdul phyis pa dang 'dra bar 'gyur ba dang/ phyin ci log thams cad kyang 'bras kyi glu ma yo legs pa 'dra bar 'gyur ba dang/ yid la bsgoms pa thams cad smon lam gyi rgyal po'i zhing khams bzhin du 'gyur bas/ gsang ba'i dam tshig spyad legs pa'i byin rlabs so// sa ma ya bkod pa las/ gsang ba'i dam tshig ma nor bar spyad pa'i yon tan gyi le'u ste nyi shu rtsa gnyis pa'o/ /// sems dpa' chen po dus tha ma la gsang ba'i dam tshig 'di dag 'cho zhing spel mi shes te/ sngon gyi rnal 'byor pa tshul dang ldan pas snod brtags shing ston la/ snod dang mi ldan pa la mi ston cing/ gsang ba'i sgrol na phyag rgya mu ti hos btab nas sbas pa rnams 'dod pas rgyal ba'i sngags pas/ au rgyan dang/ bal po dang/ kha che la sogs par gsang sngags kyi don zab mo 'tshong zhing spro bar byed do/ / gzhan yang bod la sogs pa gdol pa'i shas che ba rnams su yang gser phye la sogs pas 'dod pa'i dbang gis 'phros pas/ de dag la shas cher gsang thub cing spyad legs pa 'ga' tshul 'grub cing mthar phyin pa yang 'byung na/ phal du gsang pa med pa bka' lhod pa'i sngags pa phal 'jig rten pa'i grags pa 'dod pas snod mi 'dam par snang dgu thams cad la mang bar 'chad pa dang/ sgrogs shing 'tshong na tshul bzhin du mi spyod pa mang ba dang/ gsang ba 'chal bas de'i skyon ni/ gsang ba thams cad la mthu dang byin med par 'gyur ro// bka' bzhin mi byed pas mtho ris kyi 'bras bu thob pa nyung zhing/ ngan song 'grub pa mang bar 'gyur ro// snod dang dus dang mtshams med par sgrub thabs dang 'phrin las chol par spyad pa'i skyon ni/ spyas dang ya khar gyur pas/ chos la rtsod pa mang zhing ris mi mthun pa dang/ sdig pas phog pa'i dri mas mig gi dbang po la sogs pa nyams pa dang/ drag po'i las tshar ma chod pas// sku la bab cing srog brtod pa mang bar 'gyur ro// de bzhin du sgrol sbyor gyi las lta ba dang/ ting nge 'dzin gyis ma zin pa yang de bzhin no// dus tha ma'i slob dpon phrag dog can gyi grogs po yon tan can la thos kyis dogs pa dang/ slob ma bdag gi bka' las gzhan gegs la gnod pa byed pa byung na skyon ni 'khrug pa'i skabs dang/ mi mthun pa'i ris dang/ shes rab mi skye zhing tshogs gcog pa'i sgrib pa shin tu yang che'o// dus tha ma'i chad pa pos sgra dang grags pa 'dod pa'i phyir grangs mang bar khas 'ches/ nges pa'i don dang bstan tshigs mchod par 'phrin las kyi sdebs sbyor legs su re mang po dang don thog tu ma phebs pa'i btsan dpyad kyis shes pa med pa'i rang re'i rig pas 'grol zhing/ kha shing rgol tshig mang pos gsang ba'i don phrad rgyu la shes pas khas 'ches shing 'chad pa'i dus 'byung la/ nyan pa rnams kyang de la dad cing 'dun nas tshor ba skyes pa'i dus na/ de'i don ni gsang ba'i don 'di dag 'chad shing/ spyod pa thams cad bro glu dang 'dra bar gyur nas/ 'du byed kyi g.yengs pa skye zhing/ dngos grub dang/ sngags kyi nus mthu dang/ chos nyid kyi byin rlabs ye med par sgrung gtam bzlas pa dang 'dra bar gyur nas ci brjod kyang grub pa mi 'thob bo/ / dus phal du gsang sngags pa mi rten cing/ blo 'gyur ba chu'i chu bur dang 'dra ba rnams la/ rgyu'i theg pa la spyod pa'i gang zag phal gyis gsang sngags zhes bya ba ni bka' ma yin te/ 'di ltar 'gal te don med pas/ mdo dang tshad ma la don dang gtan tshigs yod pas 'di spyad ba'i rgyu zhes log par khrid pa la/ de bzhin du ngag nyan par byed pas rdo rje theg pa spangs nas rgyu'i theg pa spyod na/ skyon ni rdo rje theg pa'i dbu yogs dang/ gsang sngags gnyan po'i bka' chad 'byung rdo rje theg pa'i dbu yogs kyis de dag dmyal ba 'chi 'pho'i gnas su skyes nas/ bskal pa brgyar yang rdo rje theg pa'i spyod pa'i skal ba dang mi ldan pa dang/ gsang sngags gnyan pa'i bka' chad ni dus ma yin par 'chi ba dang/ mi nad dang phyugs nad kyi rnam pa 'byung ba dang/ gnas nas 'byin pa dang/ char dus su mi 'bab cing lo nyes dang mu ge'i rnam pas nyon mongs pa dang/ dgra mang zhing 'jig rten phyi mar yang dmyal ba khog 'joms kyi gnas su bskal pa brgyar skye bar 'gyur ro/ / gsang ba'i dam tshig nyams pas gcig 'og tu gcig mi chud pas/ spyod pa yang nyams pa'i rgyu ste/ mi mthun zhing khog gnag pas mi bde ba 'byung zhing byams pa'i 'bras bu med par 'gyur ro// sa ma ya bkod pa'i rgyud las/ gsang ba'i dam tshig spyad nyes pa'i skyon ni bstan pa'i le'u ste nyi shu rtsa gsum pa'o//// sems dpa' chen po gsang ba'i dam tshig rtsa ba ni/ gter du rtsa ba rin po che'i sgrom bu rtsa ba dang/ sems la rtsa ba yid la brnag pa dang/ 'khor lo rtsa ba snod dang ldan pa las ma gtogs pa kun gyi thun mong ma yin te/ de'i phyir 'di skad ces gsungs te/ gsang ba'i dam tshig chen po 'di// dam par spyad las ma gtogs pa/ snang dgu phal gyi thun mong min// blo zhen thos na skrag par 'gyur// rin po che dang gser gyi rgyun// 'khor los sgyur ba'i rgyal po las// mgo nag kun gyis mi thob cing// kla klo kun gyi thun mong min/ / de bzhin gsang ba'i gsang chen 'di// rnal 'byor ngang tshul bzang ba dang/ 'byor ba'i longs spyod ci smos kyi// lus dang srog la'ang ma chags pas// gang na dam pa 'di yod par// spu gri sor yang rgal ba dang/ / me mar mur gyi 'obs 'bogs na// de ni 'di yi gzhag pa'i snod// bka' las 'byung bzhin cig mi byed// gsang ba'i don nges g.yo sgyus 'tshol/ 'dod dang bkur sti chags pas 'chings/ / de 'dra tha zhal spyod yul min// long bas dro yang nyi mi mthong// blun po lung du ma bstan pas// ji ltar sbyad kyang bden mi mthong// 'das pas brlag cing 'bras bu med// sman pas sman ngo mi shes shing/ / nad kyis ngos nas ma zin par// nor bar btang bas dug tu 'gyur// phan par ma song sdig bzhin du// slob dpon snod la mi rtog cing// slob ma dam tshig mi 'dzin pa/ nyes 'gyur nyams pa brjod pa las 'das/ / gnyis ka 'phung byed brlag par 'gyur// de bas gsang chen dam pa 'di// chu srin dgu po'i kha nang 'du// nor bu rin chen 'chang ba bzhin// gzhan la bstan par bya ba min// don du gsang ba 'di 'tshol zhing/ / yid la brnags shing 'chang byed pa// dus gsum rgyal ba'i sras yin pas// sangs rgyas kun gyi gdung 'dzin no// gsang thub pa ni dngos grub yin// brjed pa med pa lha zhes bya// ma yengs yid kyi dgongs pa yin/ / don las mi 'da' dam zhes bya// kun tu bzang po'i dam pa la// mi 'bras lus dang grib ma bzhin// mi gtong ba ni chu srin ltar// phyag rgya bzlas brjod chu rgyun bzhin/ / bden par gnas shing drang por spyod// bstan pa bzhin du bka' nyan cing// nges ba'i don las mi 'da' ba// da ltar nyid nas sangs rgyas nyid// bsgrubs shing btsal kyang dpag tu med// ma btsal na yang skyon med de/ / gser bzhin ye nas dag pa la// de la bcos shing smon du med// sa ma ya bkod pa las/ gsang ba'i dam tshig rtsa ba'i le'u ste nyi shu rtsa bzhi pa'o//// sems dpa' chen po rdo rje slob dpon la bka' bcag dgongs pa ni/ bdud dang bar du gcod pa slob dpon gyi cha byad du byung na/ brdung zhing dgar ba byas kyang dam tshig las ma gtogs so// rdo rje slob dpon smyos pa dang/ chang dbang dang/ gdon dbang du byed pa yang bka' bcag pa mi 'gal ba dang/ slob dpon legs pa'i lam la dgongs shing dge ba'i gags byed pa dang/ sdig pa'i las la bskul ba dang/ rbod pa'i las byed na bka' bcag pa 'byung ngo/ / bka' bden pa mi ston cing/ mu stegs dang log pa'i phyogs ston par byed na yang spang bar bya'o// mched dang lcam dral yang dkar po'i phyogs la smod cing nag po'i phyogs la bstod pa dang/ dad pa can gyi tshogs gcog cing/ dge ba can gyi thugs dkrug pa dang/ bka' las 'gal zhing mched la 'khu na ngag gcag go/ dam tshig dang brtse gdung med cing/ sdig la mi 'dzem pa dang/ chos la mi dad cing dge ba la mi gus pa dang/ yo byad la bsog 'jog byed cing phud la khyer rngam che na spang ngo// gzungs dang/ de byi dang/ grogs kyang de bzhin no// de las gzhan du slob dpon gyi bka' mi gcag pa dang/ ci gsungs ba nyan pa dang/ mched lcam la sogs pa yang de bzhin no// bzang po'i las ni bden pa'i chos yin la/ sdig pa'i las dam la mi gnas pa min pas/ sangs rgyas thams cad kyi dam par dam gcig yin pas/ dam tshig yid la 'dzin pa ni sangs rgyas thams cad 'dzin pa yin pas/ gzhan gyi rtsol ba ci'ang ma byas kyang sangs rgyas pas ma nyams gtsor gzung zhing nyams pa spang bar kun tu bzang po ngas gsungs so/ / sa ma ya bkod pa las/ 'gal ba bcos shing spang ba'i le'u ste nyi shu rtsa lnga pa'o//// gzhan yang sems dpa' chen po dam tshig gi don mi len par gsang ba'i don spyod pa ni/ nam mkha' la khang bu brtsig pa dang/ rdo rje brag la sa bon 'debs pa 'dra ste/ ci byas kyang 'bras bu med cing tshi chad par 'gyur bas/ 'di skad ces gsungs te/ snga rab 'das pa'i sangs rgyas kyang// dam tshig 'di rtogs mngon sangs rgyas/ / da ltar byung ba'i sangs rgyas kyang// dam tshig 'di srungs mngon sangs rgyas// slad kyis 'byon pa'i sangs rgyas kyang// dam tshig 'di spyod de bzhin rgyas// dam pa'i don de sangs rgyas yin/ / gzhan du rnal 'byor ma tshol cig/ lta spyod sgrub thabs 'phrin las kyang// dam tshig yod na de dag nges// gal te dam tshig 'di med na// byas kyang phan med sdug bsngal che// spur bas srin bal lam drangs dang/ / glang chen rdzab tu chud pa bzhin// btsal kyang phan med ngal chad pas// dam med de yang de dang mtshungs// zang zing nor dang longs spyod la// 'byor bas che phra khas blangs nas/ / sangs rgyas rnams dang bla ma dang// de bzhin mched la sogs pa la// dang por dad pas khas blangs nas// dbul bar dam bcas 'das na ni// sangs rgyas sku bslus zhes bya ste// brdzun par lha mi yid ches pas/ / dngos grub 'bras bu ci btsal kyang// 'di dang phyi mar thob mi 'gyur// gal te sngon gyi las bsnyegs kyis// dus 'dir cung zad bder gyur kyang// phyi ma la ni 'grub mi 'gyur// ngan song dmyal ba'i gnas skyes nas/ / sdug bsngal nyam thag gyur pa la// mgon skyabs sus kyang nus mi 'gyur// rnal 'byor 'thab rtsod skyes pa la// gcig lan gcig gis byed pa ni// be'u sbrel g.yang du lhung ba bzhin/ / gnyis ka dmyal bar ltung bar 'gyur// gang zhig bsrings pa de rgyal bas// gnyis kas bsrings na rgyal bar nges// rtsod pas rgyal ba 'phel ma yin// gang gis pham blangs rgyal bar 'gyur// don med slob dpon slob ma mched/ / long bas long ba khrid pa bzhin// ngam grog g.yang sar kun lhung ltar// mi bde ngan song gsum du skye// de la dam pa 'di thos nas// ji ltar mun par sgron bteg bzhin// de ma thag tu gsal gyur nas/ / byang chub 'tshang rgya gdon mi za// dam tshig chen po'i lta ba la// lta spyod dma' ba'i 'gal 'jugs pa// bya 'phur rjes su khyi snyegs bzhin// rang nyid tshi chad sgrib par lhung// man ngag lung dang ldan pa la/ / don gyi bkur sti mi byed cing// thabs kyis smod cing don 'grub pa// nyes 'gyur nyams pa brjod mi lang// slob dpon nges pa can rnams kyis// gsang ba nges par dam phog pa// de ma thag tu grags shing ston/ / de yi mtshan nyid de dang mtshungs// slob dpon bka' ltar mi byed cing// slob ma bstan pa mi nyan pa// gsang ba don la ci bsgrubs kyang// sgrung dang 'dra ste phan med 'gyur// zhes ched du brjod do/ / dam tshig thams cad kyi rgyal po sa ma ya bkod pa'i rgyud las/ gsang don spyad nyes pa'i skyon bstan pa'i le'u ste nyi shu rtsa drug pa'o//// sems dpa' chen po dam tshig gsang ba'i don spyod shes pa'i yid bzhin gyi nor bu rin po che bas dkon zhing rin che ba de sgroms su bcug nas/ bkur ba dang mchod pa byas na/ ci 'dod pa'i dga' ba bskyed pa bzhin/ thabs la mkhas pa'i rnal 'byor chen pos 'di dag sems la bcangs shing spyad legs par byas na/ 'jig rten gyi khams 'dir dgos pa thams cad lhun gyis grub par 'gyur ba lta ci smos kyi/ 'jig rten phyi ma'i dngos grub thams cad kyang da ltar nyid du 'grub par 'gyur te/ rgyal ba thams cad kyi gdung 'tshob cing/ sangs rgyas thams cad kyi sras su gyur nas/ 'khor gyi ma mo dang/ mkha' 'gro ma dang/ dam bcas pa thams cad kyis ci bsgo ba thams cad nyan zhing zhabs spyi gtsug gis len te/ gsang ba thams cad byin dang ldan par 'gyur bas 'di skad ces gsungs so// rnal 'byor brtson pa rab ldan pas// phyogs bcu dus gsum sangs rgyas grangs/ ces gsungs so// de nas b+ho d+hi sa twa rjes su yi rang ba'i le'u ste bco lnga pa'o//// rdzogs so//// rgya gar skad du// bo d+hi sa twa u ba de sha rad dI bi dz+wa la tan tra/ bod skad du/ byang chub sems kyi man ngag/ rin po che sgron ma 'bar ba'i rgyud// bcom ldan 'das dpal kun tu bzang po la phyag 'tshal lo// 'og min gyi gnas chos nyid pho brang yangs pa'i klong chen gdal ba'i gnas na/ gsang bdag chen po dam pa dang po'i sangs rgyas de dus gsum ji bzhin gdal khyab chen po'i ngo bor bzhugs so// de'i 'khor nam mkha' gang ba'i bder gshegs dang/ bar snang gang ba'i mkha' 'gro dang/ sa gzhi gang ba'i skye 'gro la sogs pa til gyi gang bu ltar khengs/ nang nas rigs kyi gtso bo rdo rje sems dpa' 'khor gyi nang nas bzhengs nas/ bcom ldan 'das kyi spyan sngar cang mi smra bar 'khod do// dam pa dang po'i sangs rgyas par mkhyen nas/ rigs kyi gtso bo sems dpa' chen po khyed la sogs pa'i 'khor rnams dga' ba'i sems kyi mdangs phyung/ dang po'i sems kyis lus btud nas cang mi smra bar mnyam gzhag gi tshul gyis 'khod de/ 'dod pa ci dgos gsol cig ces gsungs so// de nas rigs kyi gtso bo sems dpa' chen pos zhus pa/ kye/ dam pa dang sangs rgyas lags/ / 'das dang ma byon da lta yi// bstan pa ston pa 'khor gnas dus// bdag cag rnams la bstan du gsol// dam pa dang po'i sangs rgyas kyis gsungs pa/ sngon byung thog ma'i bstan pa ni/ / snang srid kun tu 'gag med yin// de yi rjes 'jug bstan pa ni// rgyud dang lung dang man ngag yin// de yi gdung 'tsho bstan pa ni// rin chen sgron ma 'di nyid yin// sngon byung thog ma'i ston pa ni/ / rang byung sgrib pa med pa yin// de yi rjes 'jug bstan pa ni// ston pa kun tu bzang po yin// de yi gdung 'tsho bstan pa ni// las can sprul skur byung ba ni// sngon byung thog ma'i 'khor bstan pa// mi 'gag mi sgrib gnyis med yin/ / de yi rjes 'jug 'khor bstan pa// sems dpa' rdo rje khyod nyid yin// de yi rjes 'jug de yi gdung 'tsho 'khor// las can skal bar ldan pa yin// sngon byung thog ma'i gnas bstan pa/ / ye shes sgrib med gzhal yas yin// de yi rjes 'jug gnas bstan pa// kun bzang lha yi pho brang yin// de yi gdung 'tsho gnas bstan pa// dar mo dar ya'i chos 'byung nas// gru gsum e las thams cad 'byung/ / b+ha ga gzhal yas khang du gsungs// sngon byung thog ma'i dus bstan pa// dus gsum dbye ba med pa yin// thams cad dus chen gcig tu bstan// de yi rjes 'jug dus bstan pa/ / sangs rgyas sems can thams cad dang// 'khrul pa bzang ngan 'byung dus yin// de tshe gdung 'tsho dus bstan pa// shas rgyud gcig gi ngo bo la// rnam grol ye shes shar ba yin// sngon byung med na thog ma med/ / rjes 'jug med na tha ma med// gdung 'tsho med na dar yang 'chad// gsungs so// rin po che sgron ma 'bar ba'i rgyud las/ gleng gzhi dang gleng slang ba'i le'u ste dang po'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// ma byung ma skyes sngon rol gyi// chos nyid spyi yi gnas tshul de// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo khyod nyon cig/ chos nyid spyi yi gnas tshul de// yin lugs ci yang ma yin te// kha dog dbyibs dang grangs ma yin// pho mo ma ning gzugs ma yin// ji ltar nam mkha'i dkyil dang 'dra/ / gnas lugs spyi khyab gnas pa de// ya mtha' rgyal ba'i dkyil 'khor nas// ma mtha' lcags chen rab tu 'bar ba yis// dbye zhing bskol ba ma yin te// ji ltar til dang mar bzhin no/ / de yi rtogs pa'i rtogs lugs ni// yon tan phyogs re so sor rtogs// bsam brjod bral bas stong par rtogs// ma rtogs log rtogs phyogs rtogs dpe// ji ltar long ba du ma yis// glang chen gtan la 'bebs pa bzhin/ / de nyid gtan la 'bebs tshul ni// snang srid 'khor 'das thams cad du// khyab gdal chen po'i ngo bo ste// ji ltar mkha' la nyi shar 'dra// zhes gsungs so// rin po che sgron ma 'bar ba'i rgyud las/ chos nyid spyi'i gnas tshul dang gnas lugs/ de nyid gtan la 'bebs tshul bstan pa'i le'u ste gnyis pa'o//// de nas rigs kyi gtso bo sems dpa' chen po des 'khor gyi nang nas bzhengs nas zhus pa/ kye/ dam pa dang po'i sangs rgyas lags// chos nyid rang gi ngo bo yi// de yi yon tan ji ltar lags// bdag cag rnams la bstan du gsol// dam pa dang po'i sangs rgyas kyis gsungs pa/ / rigs kyi gtso bo sems dpa' chen po nyon cig/ chos nyid rang gi ngo bo de// kun bral nyag gcig ci ma spangs pa yin// mtha' ma spangs par grol ba yin// snang ba ma 'gags rang bzhin gnyis su med pa yin/ / snang la ma 'dres yongs su rdzogs pa yin/ nyam nga med pa lta ba'i gdeng yin/ dmigs 'dzin med pa ting nge 'dzin gyi gdeng yin/ blang dor med pa spyod pa'i gdeng yin// spangs thob med pa 'bras bu'i gdeng yin/ / rgyud thams cad kyi rgyal po yin// lung thams cad kyi spyi 'grel yin/ man ngag thams cad kyi nges don yin/ dgongs pa thams cad kyi zhe phug yin/ theg pa kun gyi yang rtse yin/ bstan pa thams cad kyi snying po yin/ theg pa thams cad kyi 'byung gnas yin/ 'bras bu thams cad kyi mthar thug yin/ dus gsum sangs rgyas kyi yab/ byang chub sems dpa' skyed pa'i yum/ rigs pa 'dzin pa'i nyi ma/ chos thams cad kyi mes po yin/ bka'i yang snying yin/ don thams cad kyi 'jug sdud yin/ ma rig pa thams cad kyi mun sel yin/ log par lta ba kun gyi gnyen po yin/ / gsang sngags ma lus pa kun gyi bka' sgo yin/ che ba bas kyang shin tu che ba yin/ gsang ba bas kyang shin tu gsang ba'o// rin po che sgron ma 'bar ba'i rgyud las/ chos nyid rang gi ngo bos rang gi yon tan bstan pa'i le'u ste gsum pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// chos nyid rang gi ngo bo la// log rtog mtshan ma mnga' mi mnga'/ / rgyun dang dum bur gnas mi gnas// rnam pa'i grangs su bgrang mi bgrang// gnyis snang shes pa 'jug mi 'jug/ spros pa'i mtha' ru song ma song// dbye zhing bskol bar yod dam med// bdag cag 'khor tshogs thams cad la/ / tshangs pa'i gsung ltar bsgrags su gsol// dam pa dang pos gsungs pa/ rigs kyi gtso bo sems dpa' chen po nyon cig/ chos nyid rang gi ngo bo la/ log rtog mtshan ma mi mnga' ste/ / ji ltar nam mkha'i mtshan nyid la// lho sprin rlung gis gtor ba la// nyi ma'i snying po shar ba bzhin// gsal zhing dag pa'i ngo bor bzhugs// chos nyid rang gi ngo bo de// rgyun dang dum bur mi gnas te/ / ji ltar chu bo chen po bzhin// dus gsum rgyun chad med par gnas// chos nyid rang gi ngo bo de// rnam pa'i grangs las 'das pa ste// rnam dag nam mkha'i dkyil bzhin gnas// chos nyid rang gi ngo bo la/ / gnyis snang shes pa ma zhugs te// gnyis med rgya mtsho'i rdzing dang 'dra// chos nyid rang gi ngo bo la// spros pa'i mtha' dang ye bral te// spros bral chen po'i ngo bor bzhugs// chos nyid rang gi ngo bo la// dbye zhing bkol ba ma mchis te/ / ji ltar rin chen gser gling bzhin// zhes gsungs so// rin po che sgron ma 'bar ba'i rgyud las// 'khor 'das gnyis kyis so mtshams su gdeng chen tho btsugs pa'i le'u ste bzhi pa'o/ /// de nas rigs kyi gtso bo sems dpa' chen pos zhus pa/ chos nyid rang gi ngo bo la/ nyi ma'i 'od zer bdal ba bzhin// rig pa phyi nang med par phebs// nang du bdag rig dngos med shes// phyi ru gzhan rig dngos med shes/ / yul sems rigs su mi 'dzin pas// yul snang rnam pa gang yang med// shes pa tshur 'jug rnam pa med// de la rtogs tshad bzhi yod de// blo phyogs med du shar bas spang ba med cing sgrub pa med/ / blang ba med cing dor ba med// btang ba med cing bzhag pa med// shes rgyud gcig gi ngo bo la// de rtogs tshad ni ci lags zhus pas/ dam pa dang po'i sangs rgyas kyis gsungs pa/ rigs kyi khro bo sems dpa' chen po nyon cig/ chos nyid rang gi ngo bo la/ rig pa spyi blugs sbyi na mar chu blugs pa bzhin// nyams kyi rten mi 'tshol te tshul khrims sdom pa lha mi sgom/ ngo bo ye bral chen po las/ myong bya myong byed gnyis med pas// mtshan ma'i rtog 'dzin ma grub pas// dper na lce'i ro mchog myong ba med pa bzhin no// zhes gsungs so// rin po che sgron ma 'bar ba'i rgyud las/ chos nyid rang gi ngo bo de shes rgyud gcig gi ngo bo la rtogs pa'i tshad bstan pa'i le'u ste lnga pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// dpe mtshan tshig gi lde mig gis/ / don gyi ngo bo rtogs mi rtogs// tshig don gnyis kyi 'brel ba gcig/ bdag cag rnams la bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ tshig gi brda yis don rnams go/ chos rnams brda ru shes na las can yin// sems kyis sems myong nyams myong yin// phyogs ris dbye ba med na theg pa yin// ces gsungs so/ / yang gsungs pa/ rigs kyi gtso bo sems dpa' chen po nyon cig man ngag don gyi bshad lugs ni// don gyi bshad lugs lnga yis bshad// lo rgyus don gyi bshad pa ni// bstan pa'i lo rgyus bshad pa dang/ / ston pa'i lo rgyus bshad pa dang// bshad pa'i lo rgyus bshad pa dang// brgyud pa'i lo rgyus bshad pa'o// rtsa ba don gyi bshad pa ni/ de la rnam pa gsum yod de// chos rnams kun gyi snying po ni// rnam pa kun ldan rnam pa med/ / snying po mchog gi rtsa ba yin// don gyi bcud rnams 'dus pa la// chos rnams kun gyi rtsa ba yin// yo ga don gyi bshad pa ni// a ni skye ba med pa yin// 'gag pa med pa ti yin te/ / lhag ma ma lus thams cad yin// dgos ched don gyi bshad pa ni// dgos ni phyogs 'dzin cha la dgos// ched ka rnam grol rtogs par bstan// tshig gi don gyi bshad pa ni// de la rnam pa gsum yod de/ / rab la mtshan bstan 'bring la dbye ba bstan// tha ma 'bru gnyer dgrol ba'o// zhes gsungs so// rin po che sgron ma 'bar ba'i rgyud las/ tshig dang brda la brten nas don gyi ngo bo rtog par bstan pa'i le'u ste drug pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// tshig gi don cig go ba la// dus la snga phyi yod dam med// the tshom yid gnyis za mi za/ / zhes zhus pas/ rigs kyi gtso bo sems dpa' chen po nyon cig/ brda dang tshig la brten nas su// don gyi ngo bo rtogs pa la// dus gsum snga phyi mi mnga' ste// lta ba la che chung med de chig chod/ / dgung la khri gdugs brdal ba 'dra// ting nge 'dzin la btang bzhag med de chig chod// skyes bu lam du zhugs pa 'dra// dus la snga phyi med de chig chod// dmus long nyin mtshan dbyer med 'dra// sa la mthon dman med de chig chod/ / rin chen gser gling phyin pa 'dra// yang gsungs pa/ rigs kyi gtso bo sems dpa' chen po nyon cig/ gdeng dang ldan pa'i rnal 'byor la// the tshom yid gnyis mi mnga' ste/ / bdag tu 'dzin pa'i 'khrul pa chad pa dang// snang ba ji mi snyam pa'i shes pa skyes pa dang// byin brlabs 'gag pa med pa gsum dus mnyam// chos sku blo las 'das pa dang// longs sku rang don mthar phyin dang/ / sprul sku gzhan don rdzogs pa gsum dus mnyam/ gcig lam gcig sku gcig 'bras bu gcig/ gnas gcig yul gcig dus kyang gcig/ phyi nang mtho dman bdag gzhan med par bstan// de'i mtshon dpe bstan pa ni/ / nyi ma'i snying po lhag gis shar ba dang// 'od kyis kun tu khyab pa dang// mun pa sangs pa dang gsum dus mnyam// zhes gsungs so// rin po che sgron ma 'bar ba'i rgyud las/ brda dang tshig la brten nas don gyi ngo bo rtog pa la the tshom yid gnyis med par bstan pa'i le'u ste bdun pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ / chos nyid don gyi ngo bo de// rtogs pa rigs can gcig gi shes rgyud la// ngo yis gzung na ji ltar gzung// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig chos nyid don gyi ngo bo de/ go bar byed pa'i las can des// ngo yis gzung na bzhi yod de// chos nyid don gyi rang bzhin la// log rtog sgrib pa mi mnga' bas/ / ye sangs rgyas pa'i thig le ru// don gyi ngo yis de ru gzung// chos nyid don gyi ngo bo la// yon tan snang srid kun 'byung bas// kun 'byung yangs pa'i lta ba ru// don gyi ngo yis de ru gzung// chos nyid don gyi ngo bo la/ / las can bag chags skyon gyis ma gos pas// sgrib g.yogs med pa'i chos nyid du// don gyi ngo yis de ru gzung// chos nyid don gyi snang ba la// dgag dang sgrub tu med pa la// lhun gyis grub pa'i spyod yul du/ / don gyi ngo bos de ru gzung// yang gsungs pa rigs kyi gtso bo sesam dpa' chen po nyon cig/ chos nyid don gyi ngo bo de// ma bcos kun la khyab pas na// gdal khyab nyi ma'i zer dang 'dra/ / chos nyid don gyi rang bzhin la// mtshan ma'i rtog pa spyad du med pa yis// dbyings chen rnam par dag par bstan// chos nyid don gyi ngo bo de// yon tan ma 'gags rgyun du 'byung bas na/ / med la zad mi shes pa dang// stong pa thams cad 'byung ba yis// ji ltar nam mkha'i cho 'phrul 'byung ba bzhin du bstan// chos nyid don gyi ngo bo de/ sgrib g.yogs mun pas bar ma chod// ma bsgribs phyi nang gsal ba yis/ / ye shes chen po zhes kyang bstan// chos nyid don gyi ngo bo de// ma bkag sngon du rol pas na// rang gi ngo bo 'gag med cing// gzhan gyi rkyen gyis mi khegs pas// gzhi snang 'gag pa med par bstan/ / chos nyid don gyi ngo bo de// ma btsal lhun gyis grub pas na// rang bzhin bcu yis btsal du med// rtsol sgrub dag dang ye bral nas// lhun grub chen po'i ngo bor bstan// ces gsungs so// rin po che sgron ma 'bar ba'i rgyud las/ chos nyid kyi ngo bo de rtogs ldan rigs can gyi gang zag la don yon tan du gzung ba'i le'u ste brgyad pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// yon tan chen po'i phyag rgya de// de yi bzhugs tshul ji ltar lags// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ yon tan chen po'i phyag rgya de gzhi ma bcos par bzhugs/ phyogs gang yang ma ltung bar bzhugs/ rgya gar yang ma chad par bzhugs/ don ngos 'dzin dang bral bar bzhugs/ zhes gsungs so// yang zhus pa/ rgya chad phyogs lhung med pa yi// don chen ngos gzung med pa ste// sna tshogs don gyis gtan la ji ltar dbab// snying dang 'dra ba'i 'khor tshogs la// tshangs pa'i gsung ltar sgrag tu gsol/ / dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ gtan tshigs gtan la don gyis 'bebs pa bzhi// don chen phyag rgya'i bzhugs tshul de/ / dang po rgyu yis ma bskyed pas// tha ma rkyen gyis ma shigs so// ye nas 'bras bu mchog grub pas// rtsol sgrub dag la rag ma lus// rang bzhin cir yang ma grub pas// rol pa 'gag pa med par shar/ / byed pa po yis ma byas pas// 'dus byas dag tu 'gro mi 'gyur// ces gsungs so// rin po che sgron ma 'bar ba'i rgyud las/ phyag rgya'i gnas tshul dang gtan tshigs kyi gtan la 'bebs tshul gyi le'u ste dgu pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// chos rnams kun gyis gzhi mo ni// spyi bsdu don gyi phung po de// de yi gnad ni gang gis gzung/ / de yi srog ni gang gis gzung// de yi gzer ni gang gis gdag/ bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ snang srid 'khor 'das kun gyi chos// gzhi mo lhun grub chen po ru// kun gyis gnad du des gzung ngo// ma yengs rgyun du gnas pas na// lam chen ngang gis gsal ba yin// lam gyi gnad du des gzung ngo/ / gzhi mo lhun grub chen po de// rang la rang chas yod pas na// rang sar gnas pa'i 'bras bu'i gnad du 'byung// gzhi mo lhun grub chen po de// dngos po med pas rtag pa med// snang ba ma 'gag chad pa med/ / mi 'gyur bas rtag chad gnyis kyis gzer thebs pa yin/ bying rgod gnyis su ma song bas gsal ba'i gzer thebs pa yin/ rtse gcig tu gnas pas spros pa gcod pa'i gzer thebs pa yin/ phyogs ris med pas lta ba'i srog zin pa yin// chu bo ltar mi 'gyur bas ting nge 'dzin gyi srog zin pa yin/ spu gri 'dra ste rno la gcod pas spros pa'i srog zin pa yin// zhes gsungs so// rin po che sgron ma 'bar ba'i rgyud las/ / gnad gsum gzer gsum srog gsum dgu bstan pa'i le'u ste bcu pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ / rtog 'khrul med pa'i sngon rol na// kun gyi gzhi ni ji ltar lags// snying dang 'dra ba'i 'khor tshogs la// tshangs pa'i gsung ltar sgrag tu gsol// dam pa dang po'i sangs rgyas kyis gsungs pa/ rigs kyi gtso bo nyon cig/ dam pa gzhi'i gnas tshul ni/ 'dus ma byas pa rnam gsum du gnas te/ lhan cig skyes pa rnam pa gsum yin te// 'du 'bral med pa'i tshul du gnas so// yang gsungs pa/ dam pa gzhi yi gnas tshul te/ / dang po'i shes bzhin lung ma bstan// bag chags ma bsags lus ma blangs// 'khor 'das gnyis kyi ma rig kun gyi gzhi// de yi mtshon pa'i dpe bstan pa// dper na rgya zho mnan pa 'dra/ yang gsungs pa/ dam pa gzhi yi gnas tshul ni// nam mkha' dang ni 'ja' tshon 'dra// chos nyid nam mkha' chen po de// byas pa med par rang byung yin// thog ma gzha' tshon rnam pa lnga// bris pa med par rang gsal yin/ / yang zhus pa/ dam pa gzhi yi gnas tshul de// yi ge'i tshul du ji ltar gnas// zhes zhus pas/ yang gsungs pa/ dam pa bzhi yi gnas tshul ni// thig le sku gsum sa bon du// yi ge 'bru gsum tshul du gnas/ / rten med yi ge gsum ni// a dang nga dang ha dang gsum// skyon dang yon tan kun gyi gzhi yin te// ma rig ye shes kun gyi gzhi ru gnas// byas pa med par rang byung chen po ste/ / zhes gsungs so// nyi ma'i dkyil 'khor zhin gnas pa// rin po che sgron ma 'bar ba'i rgyud las/ gzhi'i gnas tshul bstan pa'i le'u ste bcu gcig pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// rgyud drug gnas pa'i sems can rnams// de yi 'khrul lugs ji ltar lags// bdag cag rnams la bstan du gsol// zhes zhus pas/ dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ rgyud drug gnas pa'i sems can rnams// thog ma 'khrul pa'i 'khrul lugs ni// thog ma rkyen gyis 'khrul pa dang/ rkyen med rang 'khrul du 'khrul pa dang/ rkyen med rkyen ltar snang nas 'khrul pa'o// thog ma rkyen gyis 'khrul pa ni// rgyu yi rkyen dang bdag po'i rkyen// dmigs pa'i rkyen dang mtshungs pa de ma thag pa'i rkyen/ / phyi nang rnam rtog rkyen bzhis 'khrul// ces gsungs so// rin po che sgron ma 'bar ba'i rgyud las/ sems can gyi 'khrul ba mdor bstan pa'i le'u ste bcu gnyis pa'o//// rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// thog ma sems can 'khrul pa yi// rkyen med rang 'khrul 'khrul pa yi// de yi 'khrul lugs ji ltar lags// bdag cag rnams la bstan du gsol/ / zhus pas// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ sems can rang 'khrul rgyas pa ru// de yi 'khrul lugs bstan pa ni// rlung chen g.yos pas rig pa 'degs/ / de nas yid 'khor lo rnam gsum 'gyur// gsal la mi g.yo rgya ma chad// mi 'gyur kun 'gro lnga ru 'khrul// phyogs lnga kha dog lnga dbyibs lngar 'khrul// rigs lnga 'khor lo 'byung ba lnga ru 'khrul/ / rtsal lnga don snying dbang po lnga ru 'khrul// sha khrag yan lag nyon mongs lnga ru 'khrul// nad lnga lha 'dre pho mo ma ning lnga ru 'khrul// rtsi shing nags tshal ri rdo sa brag rig pa drag zhan shugs kyis de ltar 'khrul/ / ces gsungs so// rin po che sgron ma 'bar ba'i rgyud las/ rang 'khrul rgyas par bstan pa'i le'u ste bcu gsum pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ / sems can rang 'khrul 'khrul pa de// shin tu rgyas par ji ltar 'khrul// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ sems can rang 'khrul 'khrul pa ni// de yi 'khrul lugs bstan pa ni// thig le sku gsum sa bon ni// yi ge 'bru gsum gnas pa de// a dang nga dang ha dang gsum// a las rang byung kha dog lnga shar te/ / dkar po sngon po ser po dmar po ljang khu lnga// nga las nga 'dzin rig pa yid blo dang sems dang lnga// ha las rnam shes rta ru dbugs 'byung// rang byung kha dog dkar po las/ / rig pa dpyad pa yid kyis gzung// blo yis zhen pas sems kyis chags// dkar por 'khrul pas zhe sdang skyes// rang byung kha dog sngon po las// rig pa dpyad pas yid kyis gzung// blo yis zhen pas sems kyis chags/ / sngon por 'khrul pas gti mug skyes// rang byung kha dog ser po las// rig pa dpyad pas yid kyis gzung// blo yis zhen pas sems kyis chags// ser por 'khrul pas nga rgyal skyes/ / rang byung kha dog dmar po las// rig pas dpyad pas yid kyis gzung// blo yis zhen pas sems kyis chags// dmar por 'khrul bas 'dod chags skyes// rang byung kha dog ljang khu las// rig pa dpyad pas yid kyis gzung/ / blo yis zhen pas sems kyis chags// ljang khur 'khrul pas phrag dogs skyes// dug lnga rgyas pa'i 'bras bu ni// 'gro ba ris drug dag tu smin// de las sdug bsngal sna tshogs 'byung/ / rnam smin las rnams bsam mi khyab// ces gsungs so// rin po che sgron ma 'bar ba'i rgyud las// rang 'khrul shin tu rgyas par bstan pa'i le'u ste bcu bzhi pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// sems can 'khrul pa'i 'khrul lugs ni// rkyen med rkyen ltar snang nas 'khrul pa'i don// bdag cag rnams la bstan du gsol/ / dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ sems can rkyen ltar snang nas 'khrul pa ni// gzhi mo lhun grub don ma rtogs// rkyen med rkyen ltar snang bar mthong/ / dper na shel sgong dag pa la// ras kyi rkyen gyis kha dog 'byung// shel sgong dag gis ras ma spangs// shel gyi rang bzhin ngo bo la// kha dog gang du 'gyur ba med// de nas rkyen ltar snang ba ni/ rkyen mi gnas pa/ rkyen ma spangs pa/ de nyid rang yin pa/ rang ltar snang ba/ rang ma spangs pa/ rang mi gnas pa/ de sems nyid yin pa/ sems ltar snang ba/ sems ma spangs pa/ de kho na dang po chos nyid yin pa/ / de kho na bar du 'khrul pa yin pa/ de kho na tha mar ye shes yin pa/ de gsum gcig pa/ gcig ni gcig khyad ni che/ ci ste 'khrul pa dang ma 'khrul pa'i phyir// 'khrul pa zhig pa mkhas pa ngo mtshar che// gzhi lhun grub de snang ba yul gyi rkyen gyis 'khrul pas 'khrul pa de nyid/ / 'khrul pa de gol bas ye shes de nyid/ ye shes la 'gro 'ong de med// ye shes de la 'gyur ldog med/ ces gsungs so// rin po che sgron ma 'bar ba'i rgyud las/ 'khrul pa ltar snang ba'i le'u ste bco lnga pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// sems can 'khrul pa'i 'khrul lugs de/ / mdo ru bsdu na gang du bsdu/ bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ grol 'khrul med pa'i sngon rol na/ yang mes chen po'i gnas tshul ni// ma rig ye shes ming ma btags// 'khor 'das gnyis su rgya ma chad// bde sdug gnyis kyi kha mi 'dzin// rgyu rkyen tshig las 'das pa yi// kun gzhis chen po'i ngo bor bzhugs/ / sems can 'khrul ba'i 'khrul lugs ni// kun gzhi sdong po rtsad ma chod pas// tshogs drug gis yal ga rgyas/ tshogs drug gi yal ga rgyas pa'i yul drug gi bya lding/ nyon mongs drug gi brun blangs pas skye ba rnam bzhi'i ngo smin/ / skye ba rnam bzhi'i ngo smin pas 'bras bu khams gsum du 'khor/ ces gsungs so// rin po che sgron ma 'bar ba'i rgyud las/ des rgyud drug gi sdug bsngal nyams su myong ba ste 'khrul pa mdor bsdus pa'i le'u ste bcu drug pa'o/ /// de nas rigs kyi gtso bo sems dpa' chen pos zhus pa/ dga' ba'i sems dang/ dang ba'i yid dang/ gus pa'i lus gsum btud nas zhus pa/ kye/ dam pa dang po'i sangs rgyas thog ma'i 'od mi 'gyur ba lhun gyi grub par bzhugs pa lags/ sems can gyi 'khrul pa don man ngag gis bsdu na ji ltar bsdu/ snying dang 'dra ba'i 'khor tshogs dang/ / bdag cag rnams la bstan du gsol zhus pas/ dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ sems can 'khrul ba'i 'khrul lugs mi shes pas/ / ya mtha' rgyal ba'i dkyil 'khor de// rgyu med rkyen dang bral ba ma shes pas// chos nyid rnal mar 'dug pa'i thig ler btags// mtshon med brjod med 'das par mi shes pas// sems nyid rnam par dag pa'i thig ler btags/ / rtog med chos skur ma shes pas// ye shes chen po'i thig ler btags// gsal sgrib med par ma shes pas// 'phro 'du can gyi thig ler 'phro 'dus pas// nyon mongs dug lnga'i sa bon bsdus/ / 'jig rten pa yi 'byung ba lnga yi thig le ru// nyon mongs dug lnga yul du zhugs// nyon mongs can gyi yid kyi thig ler bsdus// nyon mongs dug lnga la longs spyod// dbyings sna tshogs 'jug pa'i thig ler bsdu/ / nyon mongs dug lnga gzugs brnyan rdzogs// mtha' lcags rab tu 'bar ba'i thig ler bsdu// nyon mongs dug lnga'i 'bras bu sdug bsngal brgyad dang bcu gcig smin// ces gsungs so/ / rin po che sgron ma 'bar ba'i rgyud las/ 'khrul pa'i don man ngag gi bsdu ba'i le'u ste bcu bdun pa'o//// de nas rigs kyi gtso bo sems dpa' chen pos dga' ba'i sems dang/ dang ba'i yid dang/ gus pa'i lus gsum btud nas zhus pa/ kye/ dam pa dang po'i sangs rgyas lags// thog ma'i ston pa 'od mi 'gyur ba// lhun gyis grub par bzhugs pa lags// sems can rkyen gyis 'khrul pa de/ / de yi bzlog thabs ji ltar lags// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ rkyen gyis 'khrul ba'i bzlog thabs ni/ / ston pa lung gi gdeng dang gcig/ bla ma'i man ngag gdeng dang gnyis// 'jig rten 'thun dpe'i gdeng dang gsum// nyams myong rig pa'i gdeng dang bzhis// 'khrul pa'i rtsa ba kun gzhi la/ / gtan tshigs bzhi bzhis dral bas// kun gzhi dngos po mtshan ma med par phebs// de yi mthun dpe bstan pa ni// dper na 'dre bsad ro med bzhin// ma rig pa la dngos po med// rgyu yi rkyen las bzlog par gsungs/ / yid kyi rnam pa shes pa de// de ma yin la der 'dzin zhugs pa yin// de yi mthun dpe bstan pa ni// dper na g.yem mkhan don gyis gnongs pa bzhin/ yid kyi rnam par shes pa rang bzhin med par shes pas bdag po'i rkyen las bzlog par gsungs/ yul cir snang sems kyi rang bzhin du shes pas/ de yi mthun dpe bstan pa ni/ dper na mkha' sprin na bun bzhin// dmigs pa'i rkyen las bzlog par gsungs/ / rig pa gcad bya gcod byed gnyis med pas// de yi mthun dpe bstan pa ni// dper na gnam lcags sta re 'dra// mtshungs pa de ma thag pa'i rkyen las bzlog par gsungs// rin po che sgron ma 'bar ba'i rgyud las/ rkyen 'khrul ldog par bstan pa'i le'u ste bco brgyad pa'o//// de nas rigs kyi gtso bo sems dpa' chen pos dga' ba'i mdangs dang/ gdung ba'i yid dang/ gus pa'i lus gsum btud nas zhus pa/ kye/ dam pa dang po'i sangs rgyas lags// thog ma'i ston pa 'od mi 'gyur ba lhun gyis grub par bzhugs pa lags// sems can rang 'khrul mdor bstan pa'i// de yi bzlog lugs ji ltar lags/ / dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ 'khrul pa kun gyi 'bras bu ni// khams gsum 'khor ba'i sems can la// sdug bsngal brgyad dam bcu gcig gnas pa ste/ / 'khrul pa kun gyi rtsa ba yin// de yi bzlog pa'i thabs bstan pa// sdug bsngal ci las byung brtags pas// 'khor ba'i snying po dag las byung// 'khor ba ci las byung brtags pas/ / chags sdang rnam pa lnga las byung bar rig/ chags sdang ci las byung brtags pas// gzung 'dzin gnyis las byung bar rig/ gzung 'dzin ci las byung brtags pas// gcod byed shes pa dag las byung bar rig gcod byed ci las byung brtags pas/ / rno ba'i shes pa dag las byung// rno ba'i shes pa ci las byung brtags pas// ma bsgrib gsal cha dag las byung// gsal cha ci las byung brtags pas/ / ye shes rang shar dag las byung// rang shar gang las byung brtags pas// byas pa med pa'i rang byung chen por shes// rang byung chen po'i mtshan nyid ni// rgyu rkyen dag gis ma bskyed cing/ / rtsol sgrub gnyis las ma byung ste// lhag ma med par kun dang ldan// thams cad 'dus pa dang ldan pa// ngan pa bor du med pas bzang po yin// rang byung kun tu bzang po de// 'gag med ye shes chen por shar/ / kun tu bzang po dang rol pa tha mi dad pas rang byung dang ye shes tha dad med par rtogs// zhes gsungs so// rin po che sgron ma 'bar ba'i rgyud las/ 'khrul pa mdor bstan pa bzlog pa'i thabs bstan pa'i le'u ste bcu dgu pa'o/ /// de nas rigs kyi gtso bo sems dpa' chen pos dga' ba'i mdangs dang/ dang ba'i yid dang// gus pa'i lus gsum btud nas zhus pa/ kye/ dam pa dang po'i sangs rgyas lags/ / thog ma'i ston pa 'od mi 'gyur ba lhun gyis grub par bzhugs pa lags/ rang 'khrul pa rgyas par 'khrul pa de// de yi bzlog lugs bstan du gsol// dam pa dang po'i sangs rgyas thog ma'i ston pa 'od mi 'gyur ba lhun gyis grub pa des gsungs pa/ rigs kyi gtso bo sems dpa' chen po nyon cig/ 'khrul pa rgyas pa'i bzlog lugs ni// gdeng chen gzhi yi don bstan nas// gtan tshigs bzhi yis rgyas btab nas/ / g.yo mi g.yo la yid tsam g.yo ba'i yid// rlung chen g.yos pa ngos gzung nas// ye shes chen po rlung 'gag pa med par ngo sprad// 'gyu mi 'gyu la yid tsam 'gyus pa yis// rang rig chen por ldog pa de/ / dper na thab kyi dkyil gyi me bzhin no// rno la mi gcod pa'i rig pa la// gzung 'dzin dang bral ba'i rig pa phye bar ngo sprod do// gsal mi gsal yid tsam gsal ba'i yid de// 'byung chen ltos kyi nam mkha' bzhin no/ / gdal khyab chen por gsal bar ngo sprad// gsal la mthong ba'i yid dang/ gtan la 'babs pa'i yid dang/ nyes par 'dzin pa'i yid dang/ yid 'khor lo rnam gsum ni snang stong dbyer med gsum du ngo sprad de/ / dper na zla ba'i gzugs brnyan bzhin// yang gsungs pa/ rigs kyi gtso bo sems dpa' chen po nyon cig/ gsal la mi g.yo rgya ma chad// mi 'gyur kun 'gro rnam pa lnga/ / gsal ba nam mkha'i rang bzhin no// phyogs med mtha' bral lta bar sprad// mi g.yo rgya mtsho chen po bzhin// srid gsum 'khrugs kyang g.yo ba med// mnyam gzhag ting 'dzin chen por sprad/ / mi 'gyur ri bo lta bu ste// blangs pa med cing dor ba med// lhun grub rang chas 'bras bur sprad// rgya ma chad kyi gtan tshigs de// ji ltar glang chen chur zhugs bzhin// nyams pa med pa'i spyod pa bshad/ / kun tu 'gro ba'i yon tan de// 'phrin las thugs rje chen por sprad// ji ltar bu gcig pa yi ma bzhin du// byams sems gdung dang ma bral bas// snying rje chen por ngo sprod do// zhes gsungs so/ / rin po che sgron ma 'bar ba'i rgyud las// rang 'khrul rgyas pa bzlog thabs bstan pa'i le'u ste nyi shu pa'o//// de nas rigs kyi gtso bo sems dpa' chen pos dga' ba'i mdangs phyung/ dang ba'i yid gus/ mos pa'i lus btud nas zhus pa/ kye/ dam pa dang po'i sangs rgyas lags// thog ma'i ston pa 'od mi 'gyur ba lhun gyis grub par bzhugs pa lags/ snying dang 'dra ba'i 'khor tshogs la// bdag dang mtha' yas don slad du/ / rang 'khrul shin tu rgyas pa yi// de yi bzlog lugs bstan du gsol// tshangs pa'i gsung ltar sgrag tu gsol// dam pa dang po'i sangs rgyas kyis gsungs pa// rang 'khrul shin tu rgyas pa'i bzlog lugs ni/ / thog ma gzhi mo'i dus tsam na// dngas snyigs ma phyed gsal lugs de// thig le sku gsum rang chas gnas// rang byung ye shes 'bru gsum shar// a las rang byung kha dog lnga// nga las rang byung rol par shar/ / yid dang blo dang sems su shar// ha las rang byung thugs rje snying rjer shar// rang byung kha dog dkar po las// rig pas ma dpyad yid ma gzung// blo yis ma gzung sems ma chags/ / dkar po grol bas chos dbyings ye shes shar// rang byung kha dog sngon po las/ rig pas ma dpyad yid ma gzung// blo yis ma zhen sems ma chags// sngon po grol bas me long ye shes shar// rang byung kha dog ser po las/ / rig pas ma dpyad yid kyis ma gzung// blo yis ma zhen sems ma chags// ser po grol bas mnyam pa nyid kyi ye shes shar// rang byung kha dog dmar po las// rig pas ma dpyad yid ma gzung/ / blo yis ma zhen sems ma chags// dmar po grol bas so sor rtog pa'i ye shes shar// rang byung kha dog ljang khu las// rig pas ma dpyad yid ma gzung// blo yis ma zhen sems ma chags/ / ljang khu grub pas bya ba grub pa'i ye shes shar// chos kyi dbyings kyi ye shes grol ba las// 'bras bu chos sku zhes kyang bya// me long ye shes grol ba las// longs spyod rdzogs pa'i sku zhes kyang bya/ / mnyam nyid ye shes grol ba las// sprul pa'i sku zhes kyang bya// so sor rtog pa'i ye shes grol ba las// mngon par byang chub sku zhes bya// bya ba grub pa'i ye shes grol ba las// zag pa med pa'i sku zhes kyang bya/ / zhes gsungs so// rin po che sgron ma 'bar ba'i rgyud las/ rang 'khrul rgyas par bzlog lugs bstan pa'i le'u ste nyi shu gcig pa'o//// de nas rigs kyi gtso bo sems dpa' chen pos dang ba'i sems dang/ dga' ba'i yid dang/ mos pa'i lus gsum btud nas zhus pa/ kye/ dam pa dang po'i sangs rgyas thog ma'i ston pa 'od mi 'gyur ba lhun gyis grub pa lags/ 'khrul pa mdor bstan pa de'i bzlog thabs ji ltar lags/ / snying dang 'dra ba'i 'khor tshogs dang// bdag dang mtha' yas don slad du// tshangs pa'i gsung ltar sgrag tu gsol// dam pa dang po'i sangs rgyas kyis gsungs pa/ / rigs kyi gtso bo sems dpa' chen po nyon cig/ 'khrul lugs mdor bstan pa de'i bzlog thabs bstan pa ni/ ma byung ma skyes sngon rol gyi// rgyu med rkyen dang bral ba yi// kun gzhi sdong po chen po de/ / rgyud lung man ngag rig pa bzhis// rtsad nas gcad cing drung nas gdon// tshogs drug yal ga rgyas pa med// tshogs drug yal ga ma rgyas pas// yul drug bya la lding sa med// nyon mongs brun yal blangs sa med/ / nyon mongs brun rnams ma blangs pas// skye ba rnam bzhi'i ngo mi smin// skye ba bzhir ngo ma smin las// 'bras bu khams gsum du ma 'khor ro// 'bras bu khams gsum du ma 'khor bas// sdug bsngal brgyad dang bcu drug mi spyod do/ / zhes gsungs so// rin po che sgron ma 'bar ba'i rgyud las// 'khrul pa mdor bstan pa'i bzlog thabs bstan pa'i le'u ste nyi shu gnyis pa'o//// de nas rigs kyi gtso bo sems dpa' chen pos dga' ba'i mdangs phyung/ dang ba'i yid gus/ mos pa'i lus btud nas zhus pa/ kye/ dam pa dang po'i sangs rgyas thog ma'i ston pa 'od mi 'gyur ba lhun gyis grub par bzhugs pa lags/ / 'khrul pa'i don man ngag gi bsdus nas 'khrul pa de'i bzlog thabs ni/ snying dang 'dra ba'i 'khor tshogs dang// bdag dang mtha' yas don slad du// tshangs pa'i gsung ltar sgrag tu gsol// dam pa dang po'i sangs rgyas thog ma'i ston pa 'od mi 'gyur ba lhun gyis grub par bzhugs pa des/ rigs kyi gtso bo sems dpa' chen po nyon cig/ 'khrul ba'i don man ngag gis bsdus nas 'khrul pa de'i bzlog lugs 'di ltar lags/ ya mtha' rgyal ba'i dkyil 'khor thig le des/ rgyu med rkyen dang bral bar shes pas chos nyid rnam dag ming dang bral/ mtshon med brjod las 'das pa shes pas sems nyid rnam par dag pa'i ming dang bral/ / rtog med chos kyi sku ru shes pas ye shes lnga'i ming dang bral// gsal sgrib med par shes shing 'jig rten las 'das pa'i 'byung ba lnga'i thig le ye shes rnam pa lnga yin pa la yin par shes pa dang/ ma rig pa ma rig pa yin par shes pas gzung 'dzin the tshom gyi shes pa ma rmugs// yin pa la yin par bstan pa thob pas 'khrul 'khor gyi rtog pa dang mtshan mas 'thibs pa med/ 'phro 'du can gyi thig ler nyon mongs dug lnga sa bon bsdus ma rnyed// des 'jig rten pa'i 'byung ba lnga'i thig ler nyon mongs dug lnga'i sa bon bsdus ma rnyed/ des 'jig rten pa'i 'byung ba lnga'i thig ler nyon mongs dug lnga yul du 'jug sa ma rnyed/ nyon mongs can gyis yid kyis thig ler nyon mongs dug lngas longs spyod sa ma rnyed/ dbyings sna tshogs 'jug pa'i thig ler nyon mongs dug lnga'i gzugs brnyan rdzogs sa ma rnyed/ / des tha ma lcags rab tu 'bar ba'i thig ler nyon mongs dug lnga'i 'bras bu smin sa ma rnyed/ dmigs 'dzin rtog gsum gyis thig le'i don ma rtogs/ ma nor ba stong chad phyogs gsum gyis thig le'i don ma rnyed/ brda rgod brod gsum gyi thig le'i don ma rtogs/ bying rmugs thibs gsum thun mong ma yin pa'i 'jug sgo yin/ de dang po ma rig de med na// lus can rnams kyang grol bar 'gyur// thog ma rnam dag de med na/ / 'bad rtsol 'bras bu med par 'gyur// yod du mi rung med mi rung// ltar snang glo bur ba dag yin par 'dod// rtogs nas sgom byed 'jug pa'i gdeng// mngon du 'gyur bas 'bras bu'i gdeng/ / dang po 'jug pa lam gyi gdeng// bar du spyod lam grogs kyi gdeng// tha ma mthar phyin 'bras bu'i gdeng// rang bzhin dag pa chos kyi sku// sgyu ma dam pa ye shes nam mkha' 'ja' tshon 'dra// dang po ngo ma shes rang rgyud du 'khrul pas 'khor ba bdag 'dzings pa 'dra/ / tha ma ngo shes yid ches ba dang rigs su gnas shing dbyer med pas 'khor 'das zho mnan pa 'dra/ zhes gsungs so// rin po che sgron ma 'bar ba'i rgyud las/ thig le dgu skor gyi man ngag gis 'khrul pa man ngag tu bsdus pa bzlog lugs bstan pa'i le'u ste nyi shu gsum pa'o//// de nas rigs kyi gtso bo sems dpa' chen pos dga' ba'i mdangs phyung/ dang ba'i yid gus/ mos pa'i lus btud nas zhus pa/ kye/ dam pa dang po'i sangs rgyas thog ma'i ston pa 'od mi 'gyur ba lhun gyis grub par bzhugs pa lags/ dam pa gzhi yi gnas lugs la/ / log rtog mtshan ma yod dam med// thun mong theg pa gzhan sun ji ltar gdon// thun mong ma yin theg pa rang gzhung ji ltar skyangs// gdung ba'i re ba gang gis bgyi// dam pa dang po'i sangs rgyas lags/ / bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ dam pa gzhi yi gnas lugs de// ye yod yin na skyon gnyis 'byung/ / ye med yin na skyon gnyis 'byung// gzhi yi ngo bo de nyid la// log rtog mtshan ma yod srid na// skyon gyi tshad ma rnam bzhi 'byung// gzhi yi ngo bo de nyid la// log rtog mtshan ma mi mnga' na/ / skyon gyi tshad ma rnam gnyis 'byung// gzhi yi ngo bo de nyid la// log rtog mtshan ma ma yin na// skyon gcig tshad ma rnam pa gcig/ gzhi yi ngo bo de nyid las// log rtog mtshan ma 'byung mi srid// skyon gyi tshad ma dpe don rnam bzhi 'byung/ / gzhi yi ngo bo de nyid kyis// log rtog mtshan ma byed srid na// skyon gyi tshad ma rnam gnyis 'byung// gzhi yi ngo bo de nyid dang// log rtog mtshan mar song srid na// skyon gyi tshad ma rnam bzhir 'byung/ / gzhi yi ngo bo de nyid dang// yod pa gcig las log rtog mtshan mar song srid na// skyon gyi tshad ma rnam pa gcig/ gzhi'i ngo bo de nyid rang med pa gcig las log rtog mtshan ma byung na rgyud drug sems can 'khrul par 'gyur/ / yang na bde gshegs snying po kun la khyab pa nyams// gzhi'i ngo bo de nyid rang yod med gnyis ka las log rtog mtshan ma byung na sangs rgyas sems can gnyis ka 'khrul par 'gyur/ / gzhi'i ngo bo nyid rang yod med gnyis ka ma yin pa gcig las log rtog mtshan ma byung srid byung na phung po gsum pa 'khrul rgyu med/ 'on te 'khrul kyang lto ba med/ gzhi'i ngo bo de nyid rang rdzas su grub pa gcig las/ log rtog mtshan ma byung na gzhi'i ngo bo 'dus byas 'gyur/ gzhi'i ngo bo de nyid rang rdzas su ma grub pa las log rtog mtshan ma 'byung na rdzas su grub pa las 'byung mi srid/ yul du byas nas 'byung na 'khrul pa dngos/ / yul du ma byas 'byung mi srid// gzhi'i gnas lugs la 'khrul pa yod dam med// ces gsungs so// rin po che sgron ma 'bar ba'i rgyud las/ gtan la 'bebs pa'i man ngag la bcu drug bstan pa'i le'u ste nyi shu bzhi pa'o/ /// de nas rigs kyi gtso bo sems dpa' chen pos dga' ba'i mdangs phyung/ dad pa'i yid gus/ mos pa'i lus btud nas zhus pa/ kye/ dam pa dang po'i sangs rgyas thog ma'i ston pa 'od mi 'gyur ba lhun gyis grub par bzhugs pa lags/ / nges don kun tu bzang po 'di// sangs rgyas yang dag lags ma lags// sangs kyi rgyas lugs ji ltar rgyas// snying dang 'dra ba'i 'khor rnams dang/ / bdag dang mtha' yas don slad du// tshangs pa'i gsung ltar bsgrag tu gsol// dam pa dang po'i sangs rgyas 'od mi 'gyur ba lhun gyis grub pas gsungs pa/ rigs kyi gtso bo sems dpa' chen po nyon cig nges don kun tu bzang po 'di/ / ma rig sangs la ye shes rgyas// rtog med gsal ba'i ngo bor bzhugs// gnyis 'dzin sangs la gnyis med rgyas// mnyam nyid lhun gyis grub par bzhugs/ / rnam pa du mar 'dzin pa sangs// rnam dag dri ma med pa rgyas// dri med gsal ba'i ngo bor bzhugs// phyogs 'dzin sangs la phyogs med rgyas// mtha' bral rang grol chen por bzhugs/ / yang gsungs pa/ rigs kyi gtso bo sems dpa' chen po nyon cig/ nges don kun tu bzang po 'di// tshogs bsags sgrib sbyangs ma yin te// lam bgrod sa sbyang sangs rgyas ni// thun mong 'dod pa don dang 'gal/ / thun mong ma yin sangs rgyas ni// dag pa phyogs med sangs rgyas te// rin chen gser gling phyin pa 'dra// thun mong ma yin sangs rgyas ni// mi tshe bskal par dus mi 'debs// mkhas shing grol ba dag la brten/ / snying po mchog gis kun la khyab// mtha' la thug pa med cing dbyings la bri ba med// thun mong ma yin sangs rgyas ni// gzhan las rag las ma yin te// rten med rang grol chen po yin/ / cha shas phra mo'i yul dang bral// ces gsungs so// rin po che sgron ma 'bar ba'i rgyud las/ kun tu bzang po'i yon tan dang sangs rgyas lugs bstan pa'i le'u ste nyi shu lnga pa'o//// de nas rigs kyi gtso bo sems dpa' chen pos dga' ba'i mdangs phyung/ dang ba'i yid mos/ gus pa'i lus gsum btud nas zhus pa/ kye/ dam pa dang po'i sangs rgyas thog ma'i ston pa 'od mi 'gyur ba lhun gyis grub par bzhugs pa lags/ gzhi mo lhun grub 'dug tshul la// kun bzang dgongs par ci phyir btags// lta sgom ngo yis gang du gzung// sku gsung thugs su ji ltar bsdu// snying dnga'adra ba'i 'khor tshogs dang/ / bdag dang mtha' yas don slad du// tshangs pa'i gsung ltar bsgrag tu gsol// de nas dam pa dang po'i sangs rgyas thog ma'i ston pa 'od mi 'gyur bas gsungs pa/ rigs kyi gtso bo sems dpa' chen po nyon cig/ gzhi mo 'od gsal chen po de// kun tu bzang po'i dgongs pa ru// ma bsgribs phyi nang med par gsal// ma btsal lhun gyis grub par gsal// ma bslad gnyug ma'i ngang du gsal// ma 'gags bdag nyid chen por gsal/ / gzhi la gnas pa'i yon tan dang// kun bzang lta ba'i dgongs pa gnyis// mtsho la sbrang char babs pa bzhin// dbyer med 'od gsal ngang du thim// yang gsungs pa/ sems dpa' rigs kyi gtso bo nyon cig/ kun tu bzang po'i dgongs pa la// phyogs med mtha' dang bral bas lta ba yin// dmigs med yul dang bral bas sgom pa yin// kun tu bzang po'i dgongs pa la// gza' gtad med cing gzung 'dzin cha las 'das pas spyod pa yin/ / yid ches mngon du gyur pas 'bras bu yin// yang gsungs pa/ rigs kyi gtso bo sems dpa' chen po nyon cig/ kun tu bzang po'i dgongs pa la/ / lta sgom spyod pa 'bras bu bzhi// don gyi ngo bo gcig gnas pas// sku ni rin po che yi 'od du bzhugs// gsung kyang 'od zer 'gag pa med par shar// thugs kyi snying po rang la rang grol bas/ / zhes gsungs so// rin po che sgron ma 'bar ba'i rgyud las/ kun tu bzang po'i dgongs pa'i yon tan mdor bsdus nas lta sgom sku gsung thugs su bstan pa'i le'u ste nyi shu drug pa'o//// de nas rigs kyi gtso bo sems dpa' chen pos dga' ba'i mdangs phyung/ / dang ba'i yid gus/ mos pa'i lus btud nas zhus pa/ kye/ dam pa dang po'i sangs rgyas thog ma'i ston pa 'od mi 'gyur ba lhun gyis grub par bzhugs pa lags/ gzhi mo lhun grub dam pa de// rigs can skal ldan 'ga' yi spyod yul lags/ phyi rabs rnal 'byor don ched du// gnyis dang shes pa tha dad pas// rang bzhin lhun grub don ma rtogs/ / skye shi sdug bsngal grangs med pas// bar do'i gdams ngag bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ rang bzhin gnas pa'i bar do ru/ / kun gzhi sdong po bcud la bor// sbrul gyi rkang lag 'byung ba bzhin// skye shi gnyis kyi bar do ru// thog ma'i ye shes ngos gzung la// dwa phrug ma dang phrad pa bzhin// ting 'dzin snga phyi bar do ru/ / chos ma gsal mi gsal 'debs pas// mar me gcig nas gcig tu 'debs pa bzhin// srid pa dag gi bar do ru// las kyi 'phro rnams mthud pa ni// yur ba rkong chad chu blangs 'dra// dus gsum rgyal ba'i thugs gter las/ / don gyi man ngag bcud phyung nas// mdor bstan bar do rnam bzhi bshad// ces gsungs so// rin po che sgron ma 'bar ba'i rgyud las/ don gyi bcud phyung nas bar do bzhi la bcu gnyis su bstan pa'i le'u ste nyi shu bdun pa'o/ /// de nas rigs kyi gtso bo sems dpa' chen pos zhus pa/ dam pa dang po'i sangs rgyas lags// bar do bzhi'i man ngag bstan pa'i// yid ches pa ni ji ltar 'byung/ / bdag cag rnams la bstan du gsol// dam pa dang pos gsungs pa/ rigs kyi gtso bo sems dpa' chen po nyon cig/ ya mtha' rgyal ba'i dkyil 'khor nas// ma mtha' na rag dmyal khams kyi/ / bde sdug skyon yon thams cad kun// gzhi mo lhun grub ngang du kun kyang gcig/ chos rnams rtsa ba de la yid ches bya// snying po mchog gi rtsa ba de// yul du ma gyur sngon du 'byin mi nus// kun gyi snying po yin pas yid ches de la bya/ / rang bzhin rgyu yis ma bskyed pas// ngo bo skyon gyis yong mi khegs// rang bzhin rgyu rkyen med par yid ches de la bya// snying po mchog gi rtsa ba de// rgyud lung man ngag chos rnams kyis/ / spyi dang rang gi mtshan nyid ston pas na// ston pa'i sgron mar yid ches de la bya// snying po mchog gi rtsa ba de/ phyi yi 'byung ba rnam bzhi dang// nang gi shes pa skad cig ma// gzhi mo'i don la dbyer med pas/ / gnyis med ye shes chen por yid ches de la bya// snying po mchog gi rtsa ba de// rgyu 'bras theg pa kun gyi mchog yin pas// theg pa'i yang rtser yid ches de la bya// snying po mchog gi rtsa ba de/ / rgyu rkyen dag las ma byung ste// 'bad cing btsal du med pas na// lhun gyis grub par yid ches de la bya// snying po mchog gi rtsa ba de// sa bcu lam lnga ma bgrod par// 'bras bu ye shes grub pas na// rnam dag lam chen yin par yid ches de la bya/ / zhes gsungs so// rin po che sgron ma 'bar ba'i rgyud las/ man ngag la yid ches par bstan pa'i le'u ste nyi shu brgyad pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// yid ches don dang phrad pa la/ 'bras bu'i ngo bo ji ltar gzung// thog ma'i ston pas bstan du gsol// thog ma'i ston pa 'od mi 'gyur bas gsungs pa/ rigs kyi gtso bo sems dpa' chen po nyon cig/ shes rgyud gcig gi ngo bo la chos sku thugs su ngo sprad/ longs sku gsung du ngo sprad/ sprul sku sku ru ngo sprad/ dbyer med ngo bo nyid kyi sku ru ngo sprad/ zag pa med pa bde ba chen por ngo sprad/ shes rgyud gcig pa'i ngo bo la/ gsang ba'i sku lnga gcig tu gtogs// so so tha dad ma yin pas// dbye bkol med pa'i sku zhes bya// de la gzugs dang mtshan ma ma grub pas/ / rang bzhin med pa sku zhes bya// de la dbyibs dang kha dog ma grub pas/ mtshan ma med pa'i sku zhes bya// yul dang yul can ma yin pas// snang ba med pa'i sku zhes bya// tshig dang sgra las 'das pa na/ / brjod du med pa'i sku zhes bya// yang gsungs pa/ de yi don las ma rtogs pas// snang ba'i spyod yul gzhan med pas// snang ba sku yi rang bzhin yin// grags pa gsung gi rang bzhin yin// snang grags rtog par ma song bas/ / dran rtog thugs kyi rang bzhin yin// zhes gsungs so// rin po che sgron ma 'bar ba'i rgyud las/ snang grags kyi chos thams cad sku gsung thugs su ngo sprad pa'i le'u ste nyer dgu pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// 'bras bu sku gsum rtogs pa la// dus la snga phyi yod dam med// bskal pa mi tshe bgrang mi bgrang/ / sa bcu lam lnga bgrod mi bgrod// gzhi lam 'bras bu gsum du dbye mi dbye// dam pa dang po'i sangs rgyas kyis// bdag cag rnams la bstan du gsol// dam pa dang po'i sangs rgyas kyis gsungs pa/ / rigs kyi gtso bo sems dpa' chen po nyon cig/ 'bras bu sku gsum thob pa la// bskal pa mi tshe mi bgrang ste// log rtog mtshan ma nub pa dang// sku lnga mngon du gyur pa gnyis// skad cig dus la snga phyi med/ / sa bcu lam lnga mi bgrod de// nyon mongs dug gsum grol ba dang// 'bras bu sku gsum thob pa gnyis// skad cig gcig la snga phyi med// ma rig 'khrul rgya ral ba dang// ye shes mthong chen rtol ba gnyis/ / skad cig dus la snga phyi med// 'khrul ba rtsad nas chod pa dang// chos sku rang la rtogs pa gnyis// skad cig dus la snga phyi med// gzhi dang lam dang 'bras bu gsum// so so tha dad ma yin te/ / gzhi yi dus na skye ba med// lam gyi dus na 'gag pa med// 'bras bu'i dus na blo las 'das// zhes gsungs so// rin po che sgron ma 'bar ba'i rgyud las/ 'bras bu sku gsum thob pa la dus la snga phyi med par bstan pa'i le'u ste sum bcu tham pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// 'bras bu sku gsum grub pa la// bsod nams tshogs la bsten mi bsten/ / lus ngag yid gsum 'bad rtsol 'tshal mi 'tshal// dam pa dang po'i sangs rgyas lags// bdag cag rnams la bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ 'bras bu sku gsum bzhugs tshul ni// bsod nams tshogs la mi bsten te// ma bsams lhun gyis grub pa chen por bzhugs// lus ngag yid gsum mi rtsol te// yang mes gzhi mo'i bzhugs tshul ni/ / mtshon med brjod las 'das pa ste// chos sku'i dus na skye ba med// longs sku'i dus na 'gag pa med// sprul sku'i dus na gzhan don rdzogs// zhes gsungs so// rin po che sgron ma 'bar ba'i rgyud las/ sku gsum 'bad rtsol la rag ma lus par bstan pa'i le'u ste so gcig pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ / 'bras bu sku gsum grub pa la// gdeng dang ldan pa'i rnal 'byor pas// rang sems gzhag lugs ji ltar lags// dam pa dang po'i sangs rgyas kyis// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ dngos po gsum po dbyer med pas// sems nyid ma bcos sku gsung thugs su gzhag/ nyon mongs rang bzhin 'od gsal ba/ / rang sems rig pa phyi nang bral bar gzhag/ phyi yi yul la btsal du med pas na// rang sems lhun gyis grub par gzhag/ mtshon pa'i rgyu dang bral bas na// rang sems brjod du med par gzhag/ yang gsungs pa/ rigs kyi gtso bo sems dpa' chen po nyon cig/ ye shes gnyen po med pa'i phyir// rang sems bde ba chen por gzhag/ rgyu 'bras gnyis su med pas na// rang sems sgro skur bral bar gzhag/ log rtog mtha' dang bral ba'i phyir// rang sems bsam las 'das par gzhag/ yang gsungs pa/ rigs kyi gtso bo sems dpa' chen po nyon cig/ sems nyid 'gag pa med pa'i phyir/ / rang snang rol par shar bar gzhag/ sems kyi rang bzhin gcig tu 'dug pa'i phyir// gcig tu 'dus pas sna tshogs 'byung bar shar// rtsol sgrub rgyu las ma rig pas// 'bras bu gzhan las bsgrub tu med par gzhag/ ces gsungs so// rin po che sgron ma 'bar ba'i rgyud las/ rnal 'byor pas sems nyid gzhag lugs bstan pa'i le'u ste so gnyis pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// rang sems thig le chen po de// bcos pas grub bam ma bcos grub// dam pa dang po'i sangs rgyas lags// bdag cag rnams la bstan du gsol/ / dam pa dang po'i sangs rgyas kyis gsungs pa/ kye/ rigs kyi gtso bo sems dpa' chen po nyon cig/ rang sems thig le chen po de// bcos pas grub pa ma yin te// ma bcos rnal du gzhag pas grub/ / 'das pa'i sangs rgyas thams cad kyang// thig le'i don la chos mi mdzad// ma 'ongs pa yi sangs rgyas kyang// thig le'i don la 'chos mi srid// da ltar bzhugs pa'i sangs rgyas kyang// thig le'i don la yong mi 'chos/ / yang gsungs pa/ rigs kyi gtso bo khyod nyon cig/ thog ma'i ston pa nga nyid kyang// thig le'i don la 'chos ma myong// rigs kyi gtso bo khyod nyid kyang// thig le'i don la 'chos ma byed// chu ma rnyog san dngas/ glang po che ma bskyod na mgyogs// sems ma bcos na bde/ rig pa ma bcos na gsal/ zhes gsungs so// rin po che sgron ma 'bar ba'i rgyud las/ thig le bcos su med par bstan pa'i le'u ste so gsum pa'o/ /// de nas rigs kyi gtso bo sems dpa' chen pos zhus pa/ dam pa dang po'i sangs rgyas lags// rang sems thig le chen po de// ma bcos mnyam par gzhag pa las// gti mug thibs por mi 'gyur ram/ / de yi gsal cha ji ltar lags// thog ma'i ston pas bstan du gsol// ston pa 'od mi 'gyur bas gsungs pa/ rigs kyi gtso bo sems dpa' chen po nyon cig/ thig le chen po'i gsal cha ni rig pa gcod byed dang bral te zag pa med pa'i ye shes 'od 'bar bar gsal/ yid 'dzin pa dang bral te 'dzin med kyi yid phyogs med du gsal/ blo zhen pa dang bral te zhen med kyi blo sgrib pa med par gsal/ sems chags sdang dang bral te chags med kyi sems bsam brjod dang bral bar gsal/ zhes gsungs so// rin po che sgron ma 'bar ba'i rgyud las/ thig le chen po gsal cha ma 'gag par bstan pa'i le'u ste so bzhi pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// snang srid 'khor 'das kun gyi chos// thig le byang chub sems su ji ltar gcig/ tshul gyis bsdu na gang du bsdu// thog ma'i ston pas bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ chos rnams thig ler gcig lugs ni/ / gzhi yi dus na rang bzhin lhun gyis grub par kun kyang gcig/ lam gyi dus na mtshon byed brda la brten par kun kyang gcig/ lta ba'i dus na don mthun phyogs dang bral bar kun kyang gcig/ 'bras bu'i dus na yid ches the tshom bral bar kun kyang gcig/ yang gsungs pa/ rigs kyi gtso bo nyon cig/ chos rnams thig ler tshul gyi bsdu lugs ni// bde sdug kun gyi rtsa ba ni/ / spyi bsdu chen po'i byang chub sems// sems nyid rang gi ngo bo la// kun gzhi'i don la phyi nang med// ming gzh-i'i phung po skye ba med// yang dag don la bshad du med// rdzogs chen don la bsgom du med/ / rig pa'i yul la phyi nang med// khyab gdal 'ub chub mtha' yas te// zhes gsungs so// rin po che sgron ma 'bar ba'i rgyud las/ chos thams cad thig le byang chub sems su gcig pa'i tshul gyis bsdus pa'i le'u ste so lnga pa'o/ /// de nas rigs kyi gtso bo sems dpa' chen pos zhus pa/ chos rnams thig ler 'dus pa la// rdzogs pa chen por ji ltar btags// bdag cag rnams la bstan du gsol// thog ma'i ston pas gsungs pa/ / rigs kyi gtso bo khyod nyon cig/ chos rnams thig ler 'dus pa la// de la rnam pa bzhi yod de// dpe rdzogs nam mkha' lta bu ste// 'byung ba rnam bzhi ma 'dres par// nam mkha' chen por yongs su rdzogs/ / tshig rdzogs rang bzhin lhun gyis grub par rdzogs// de bzhin nyid rdzogs lta ba yongs su rdzogs// rim par tshur rdzogs rnam pa bzhi ru rdzogs// don rdzogs gzhi mo 'od gsal chen por rdzogs/ / rtags rdzogs kun rtags byang chub sems su rdzogs// dpe rdzogs 'byung ba rnam bzhi nam mkha' rdzogs// thig le byang chub sems kyi dpe bzhi ni// rin po che gser dang 'dra ste cir yang bsgyur du btub/ / nyi ma dang 'dra ste gcig gi 'od zer kun la khyab// nor bu rin po che dang 'dra ste dgos dgu rang las 'byung// za 'og snam bu 'dra ste ma 'dres yongs su rdzogs// zhes gsungs so/ / rin po che sgron ma 'bar ba'i rgyud las/ thig le byang chub sems rdzogs pa chen po gtan la 'bebs pa'i le'u ste so drug pa'o//// de nas rigs kyi gtso bo sems dpa' chen pos dga' ba'i mdangs phyung/ dang ba'i yid gus/ mos pa'i lus btud nas zhus pa/ kye/ dam pa dang po'i sangs rgyas thog ma'i ston pa 'od mi 'gyur ba lhun gyis grub par bzhugs pa lags/ theg pa brgyad po'i gzhung gis su/ / rdzogs chen a ti ma gtogs pa// de yi bsrung mtshams gang gis bsrungs// snying dang 'dra ba'i 'khor rnams dang// bdag dang mtha' yas don slad du// tshangs pa'i gsung ltar bsgrag tu gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ thun mong theg pa brgyad po yis// rdzogs pa chen po 'di ma rtogs// de la bsrung mtshams bzhi yod de// rang rig rtsal gyis srung mas bsrungs/ / lhan cig skyes pa'i ma rig pas rgyu byas nas/ mun pa'i 'khor sgo dag tu tshud// yang dbang gter gyis srung mas bsrungs// mun pa'i rang bzhin gyis snang ba'i don ma mthong// mun pa'i 'khor sgo dag tu tshud/ / sbas pa thabs kyis srung mas bsrungs// dgos pa'i thabs stor mun pa'i 'khor sgor rtag tu tshud// gab pa mchog gi srung mas bsrungs// stobs kyis mthu med 'khor ba'i btson rar tshud/ / mun pa'i 'khor sgo tha mar tshud// rig pa'i 'char sgo bzhi yi don ma rtogs// sgo mo che yi gnas ma rnyed// de la ma rig mun par gsungs// zhes gsungs so// rin po che sgron ma 'bar ba'i rgyud las/ / theg pa brgyad kyi a ti'i don ma rtogs pa'i srung ma ngos gzung ba'i le'u ste so bdun pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ / rdzogs pa chen po ma rtogs pas// 'khor bar 'khyams pa'i sdug bsngal rnams// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ 'khor ba'i rgyu ma rig pa yin// 'khor ba'i rkyen las dang nyon mongs pa yin// byed pa po skad cig ma rgyun dang bcas pa yin// des dmigs chos nyid yin par ngo ma shes// sdug bsngal yang nas yang du bsnan/ / dpe shing rta'i 'phang lo zo chu khyud mo 'dra// 'bras bu sdug bsngal brgyad dang bcu gcig myong/ bya sla la don che/ tshegs chung la go dka'/ theg pa brgyad kyis rang gzhung gis// rdzogs chen a ti'i don ma rtogs/ / zhes gsungs so// rin po che sgron ma 'bar ba'i rgyud las/ 'khor ba'i rgyu 'bras bstan pa'i le'u ste so brgyad pa'o//// de nas rigs kyi gtso bo sems dpa' chen pos zhus pa/ dam pa dang po'i sangs rgyas lags// lam gyi rgyu 'bras rnam pa'i grangs// so sor dbye ba'i go rim rnams// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ lam pa'i rgyu ni kun gzhi byang chub sems// lam gyi rkyen ni ting 'dzin rnam pa'i grangs// byed pa po ni rnal 'byor lus ngag yid gsum yin// lam gyi yon tan rtags dang thun mong dngos grub yin/ / lam gyi 'bras bu gnas skabs lha dang lha mo'i dkyil 'khor yin// zhes gsungs so// rin po che sgron ma 'bar ba'i rgyud las/ theg pa thun mong gi lam gyi gnas skabs kyi yon tan me tog dang 'dra bar bstan pa'i le'u ste so dgu pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// rdzogs chen a ti yo ga'i don/ mya ngan 'das pa'i don nyid ni/ / 'di la rgyu 'bras yod dam med// bdag cag rnams la bstan du gsol// dam pa dang po'i sangs rgyas kyis gsungs pa/ rgyu ni byas pa med par rang byung yin// rkyen ni bla ma dam pa'i gdams ngag yin/ / byed pa po ni lta sgom spyod pa 'bras bu bzhi yin// yon tan snang srid ye shes chen por shar ba yin// 'bras bu ye shes sku dang rang la rdzogs pa yin// yang gsungs pa/ rdzogs chen a ti'i yon tan ni/ / yul med rig pa kun tu shar// ji ltar rgya mtsho chen po'i rlabs bzhin du// btsal med yon tan shugs las 'byung// ji ltar ba mo nyi shar bzhin// rnam rtog mtshan ma ngang gis zhi// yang gsungs pa/ sems dpa' chen po nyon cig 'khor ba'i sdug bsngal chen po las// thar bar byed pa'i thabs chen po// khog pa mda' dang gzhu la brten// stag ral gzigs shubs rgyan 'dra yang// mde'u thung med na gnad mi 'phrod/ / yang gsungs pa/ rigs kyi gtso bo nyon cig/ rdzogs chen a ti yo ga'i don// lnga brgya dus kyi tha ma la// byin rlabs chen po'i yon tan ni// mtsho lud rlung gis bskyod pa bzhin/ / bkag pas khegs par mi 'gyur te// ma thub gsum ni 'di ltar yin// bde gshegs byin rlabs thugs ma thub// 'byung ba mtshan ma'i rtags ma thub// skye 'gro gtad pa'i gnyer ma thug/ lnga brgya dus kyi tha ma la/ / chos sgor mda' khung 'don pa dang// rgyal po grong sprang byed pa dang// chos gos 'og tu gri 'dzugs dang// che btsun dug la spyod pa dang// dus der nyi zla'i 'od ltar 'byung// zhes gsungs so/ / rin po che sgron ma 'bar ba'i rgyud las/ rdzogs pa chen po'i don rgyu 'bras su phye nas byin rlabs thugs la 'byung ba bstan pa'i le'u ste bzhi bcu pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// chos nyid thig le nyag gcig la// rgyud dang lung dang man ngag dang// gtan la 'bebs pa'i rigs pa bzhi// grangs kyi rnam pa phye ba rnams/ / bdag cag rnams la bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ bka' rgyud gzhan na gsal ba med// nges rgyud chen po'i ngang gis bstan/ / de yi rgyud du bstan pa ni// rang dang spyi yi dbye ba ni// dang po rgyud bdun skor dang bcas pa'i spyi'i don bstan pa ni/ rnal 'byor gnyis kyi lta ba ni/ phyi'i bya ba ma log par shes pas dus thams cad la yin/ nang gi rgyud du bstan pa ni// rnal 'byor ma hA yo ga'i lta// blang dor med par bstan pa yin// gsang ba'i rgyud du bstan pa ni// lhan cig skyes pa'i ye shes byar med yin// de kho na yi rgyud du bstan pa ni/ / 'khrul pa'i don la mkhas pa yin// gzhi yi rgyud du bstan pa ni// gnas lugs 'gyur ba med pa yin// thabs kyi rgyud du bstan pa ni// snang ba 'gag pa med pa yin// rnal 'byor rgyud du bstan pa ni/ / bya ba med pa'i ye shes yin// lam gyi rgyud du bstan pa ni// blo yi rtog pa grol ba yin// 'bras bu'i rgyud du bstan pa ni// 'khrul pa'i rgyud du chod pa yin// lung gi rnam grangs bstan pa ni// bka' rgyud kun nas gsal ba med/ / tshig gi rgyud du bstan pa ni// sgra dang yi ge tshig dang rim par phye ba yin// po ti glegs bam rgyud du bstan pa ni// rin chen sgron ma la sogs ma bur bstan pa yin// rgya ma las kyi lung du ni/ / chos nyid sde gsum bstan pa yin// ye shes lha yi lung du ni// bskyed pa'i rim pa thams cad yin// bya bral rdzogs pa'i lung du ni// rdzogs pa'i rim pa thams cad yin// gsang sngags spyi'i lung du ni/ yul du ma gyur thams cad thogs pa med pa yin/ man ngag gi nges lung du bstan pa/ byar med pa'i don mi 'gyur ba/ don gyi gsang lung du bstan pa/ blo yi yul du ma gyur pa/ snyan khung brgyud pa'i lung du bstan pa ni/ bla ma brgyud pa bar ma chad pa'i gdams pa'o// gtan la 'bebs pa'i lung du bstan pa/ 'khrul pa rtsad nas gcod pa yin// mngon du phyung ba'i lung du bstan pa/ snang ba dbye gsal med pa yin/ / yang gsungs pa/ rig pa dgu la/ phyi'i rig pa bya ba byed pa/ 'thad pa grub pa/ ltos te shes pa gsum du bstan/ nang gi rig pa chos nyid rig pa dag tu bstan/ gsang ba'i rig pa chos nyid kyi snang ba/ ye shes su snang ba/ de kho na nyid kyi rig pa don la mjal shes par bstan// rang gi rig pa shes par bstan/ gzhan rig gsal ba shes pa'o// skad cig ma'i rig pa snga phyi gtan tshigs shes pa'o/ / rgyun du gnas pa'i rig pa rgya che la tshang ba/ rig pa'i gtso bo rno ba/ zab pa/ myur bar bstan/ yang gsung pa/ man ngag dgu la/ phyi'i man ngag kri yog sde gsum la mkhas pa/ nang gi man ngag bskyed rdzogs gsum la mkhas pa/ gsang ba'i man ngag phyi nang gsang ba'i dbang gsum la mkhas pa/ de kho na nyid kyi man ngag snyan brgyud gdams pa la mkhas pa/ tshogs la bshad pa'i man ngag 'bru 'dzoms tshig la mkhas pa/ slob ma la bstan pa'i man ngag ni go sla la tshegs chung ba sde skor/ rang gi snying dang 'dra ba'i man ngag rtsod pa'i sgra gsum la mkhas pa/ man ngag gi spyi sdom gsang sngags thams cad la ma rmongs pa/ man ngag gi gtso bo slob pa'i dus gsum shes shing gcig skor don la gnas pa/ gcig pu bsam gyis mi khyab/ gcig la nyon mongs skye mkhan med/ bag chags la bsags pa med/ ces gsungs so// rin po che sgron ma 'bar ba'i rgyud las/ rgyud lung rigs pa man ngag bzhi ru phye ba'i le'u ste zhe gcig pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ / thig le nyag gcig mtshon pa'i thabs// brda yi man ngag bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ chos kyi dbyings kyi pho brang 'og min gyi gnas na sems can gyi mes po dpal tshangs pa bya ba gcig gnas pas/ nam mkha' nas sgra gcig byung ste/ dpal tshangs pa rang la lha khang khyad par can gcig 'dug ste/ de mi mthong bar 'dug pas grong khyer gsal ldan 'od kyi dkyil na sras kun rig snang gsal 'khrul gyi me long zhes bya ba mo rno ba zhig yod kyis/ de la thob cig zer ba'i sgra gcig byung/ mo btab pas yul mun snang gnyis kyi so mtshams na ci btab skye ba'i ldum ra zhig yod pas/ de la rgan mo dbul long ma dang khye'u thams cad shes pa gnyis 'thab cing yod pas/ khye'u thams cad shes pa'i rigs kyis rang gis lha tshangs pa mthong ste/ de nas tshangs pas khye'u'i grogs byas pas rgan mo grogs dgos nas grogs po tshu rol du phyin pas rgas po 'phung rgyas stag bya ba gcig rnyed/ bu ri bo mtho la snyeg dang/ chung du 'tsho'u ma la sdang rnyed/ bu mo 'bral mi phod rnyed/ dmag dpon mun pa'i rang bzhin rnyed/ dmag dpon kha brag lam du 'tshom rnyed nas/ dmag brgyad khri bzhi stong gis dmag khye'u la drangs so// khye'u thams cad shes pas grogs mo btsal bas chung yod tshad brlag tu 'jug ma rnyed do/ / bu nam mkha'i rang bzhin can dang/ bu mo phrad tshad rku ba dang/ bu chung ngu nyi ma'i rang bzhin can dang/ dmag dpon zla ba'i rang bzhin go cha can dang/ skyes bu lam la mkhas pa dang// dmag brgyad khri bzhi stong gis rgan mo la dmag drangs pas rgan mo phung ngo// long ba bza' mi bdun dmag dang chas pa de khye'u thams cad shes pas bsad do// ci btab skye ba'i brag cig tu red de 'dug go/ / sems can gyi mes po dpal tshangs pas rang la yod pa'i lha khang mthong ngo// kun gzhi dpe chung dang/ kha yan sgo dgu dang/ gnad kyi dpe chung dang/ spyi'i dpe chung dang/ slob pa'i dus gsum lus po 'dra/ man ngag sde skor lce dang 'dra// zhes gsungs so// rin po che sgron ma 'bar ba'i rgyud las/ brda'i man ngag rnam gsum ldebs dang 'dra bar bstan pa'i le'u ste zhe gnyis pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// rdzogs chen a ti yo ga la/ phyir rgol theg pa brgyad po yis// rig pa'i dmag gis bskor srid na/ / 'bros pa'i mkhar ni gang la bca'// bsrung pa'i mi ni gang la bgyi// rdeg pa'i mtshon ni gang la bgyi// dam pa dang po'i sangs rgyas lags// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ rdzogs chen a ti yo ga la// phyir rgol theg pa rim pa brgyad po'i dmag gis bskor srid na// 'bros pa'i rdzong la bzhi yod de/ / 'dod pa mi sgrub mi 'dod mi spong dang// 'gal ba mi sdud phyal bar mi gtong ba// de yang a ti 'bros pa'i mkhar// ma bkag ma zhes gzer bu chen po bzhi// de yang rdzogs tshan a ti 'bros pa'i mkhar/ / gzhi gcig gsal ba tha dad skye med pas// gtan tshigs chen po bzhi yi mkhar// de yang a ti 'bros pa'i mkhar// snang srid thig le chen por gcig/ de yang a ti 'bros pa'i mkhar// srung ba'i mi lus rig pa yin/ / lung rig khas len 'gro gleng yin// lung med smyon pa'i tshig 'dra ba// rigs chad pa la len mi gdab// kun gyi snying du sdug ma srid// dper na smad 'tshong bu bzhin no// brdeg pa'i mtshon cha gnyis yod do/ / gzhan gyi 'dod pa khas len na// rno la myur mgyogs mtshon cha brdeg/ grub mtha' ma longs lan mi gdab// phyag rgya bzhi yi ra bar gzhug/ gcig gam tha dad brtags pa yis// 'dod pa dri sde gzhan sun gdon/ khas len med na lan mi blan// stong pa'i klong la 'bros mtha' bskyon// nga rgyal smra na 'go sbre bya// rigs pa'i mda' nan che na 'brel ba bri// 'brel ba ma grub g.yang la bskyur// ces gsungs so/ / rin po che sgron ma 'bar ba'i rgyud las// a ti rang la gzhung bskyab cing gzhan sun gdon pa'i le'u ste zhe gsum pa'o//// de nas rigs kyi gtso bo sems dpa' chen pos zhus pa/ dam pa dang po'i sangs rgyas lags// phyi pa mu stegs theg pa dang// nang pa sangs rgyas theg pa gnyis// de yi khyad par ji ltar lags// thog mi ston pas bstan du gsol// thog ma'i ston pas gsungs pa/ / stong pas sdug bsngal bdag bzhir 'dod// ma rtogs pas na mu stegs yi// lta ba sum brgya drug cu'i grangs rnyed 'dod// bsdus pas drug cu rtsa gnyis te// de las bsdus pas nyi shu ste// de las bsdus pas rnam pa bzhi/ / de yang rnam pa gnyis su 'dus// rtag pa dang ni chad pa'o// chad pa'i lta ba rten chad dang// rgyu chad lam chad 'bras bu chad pa bzhir// lung dang rig pa gnyis kas bsgrub// rtag par 'dod pa'i lta ba ni/ / phyogs rtag dpe rtag rgyu rtag 'bras bu rtag pa bzhir// lung dang rig pa gnyis kas bsgrub// de yi lta ba phyogs btsal ba// sems can kun gyi snying dkyil na// rtag pa bzhi yi dngos po gcig/ rgyu rkyen gnyis kyi ma bskyed pas// lus kyi bong dang sbyar te gnas// lta ba de dag gsal bar ni// sde snod kun na gsal ba yod// ces gsungs so// rin po che sgron ma 'bar ba'i rgyud las/ 'jig rten pa'i lta ba bstan pa'i le'u ste zhe bzhi pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// sems nyid thig le nyag gcig la// theg pa dgu ru ci phyir gdags/ / brtags pa'i gtan tshigs ji ltar lags// thog ma'i ston pas bstan du gsol// thog ma'i ston pas gsungs pa/ rigs kyi gtso bo nyon cig/ gzhi mo 'od gsal chen po la// ma rig rkyen gyis gzung 'dzin skyes/ / sems kyi ngo bo tha dad shar// dbang po rab 'bring gsum du byung// dbang po rab kyi don du ni// nang gi bskyed rdzogs rnam gsum bstan// dbang po 'bring ni don du ni// phyi yi kri yog gsum du bstan/ / dbang po tha ma'i don du ni// mdo sde 'dul ba mngon pa gsum// sde snod kun gyi theg pa bstan// zhes gsungs so// rin po che sgron ma 'bar ba'i rgyud las/ theg pa dgu ru phye ba'i gtan tshigs bstan pa'i le'u ste zhe lnga pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// ston pa'i 'dul lugs rnam gsum la// drang don nges don gnyis su ci phyir gdags/ / theg pa che chung mtshan nyid de// bdag cag rnams la bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ 'jig rten pa yi gang zag la/ / mi chos lugs su drangs pa ni// lus ngag yid gsum gus par bstan// gang zag mtshan ma gtso bor 'dzin pa la// mtshan dang ldan pa'i skus drangs la// gang zag rang bzhin zhi ba la/ / chos nyid stong pa nam mkha' lta bur drangs// gang zag mi mthun so sor la// rgya mtsho tsam gyis chos nyid drangs// mu mtha' med par gsungs pa rnams// rgyu 'bras gnyis las ma gtogs pas// mi mthun bye brag phye ba med/ / theg chen rigs dang ldan pa la// chos nyid spros dang bral ba yi// 'bras bu'i don la yid ches bya// theg dman tha ma'i rigs can la// rgyu yi dus na nan tan bstan// yang gsungs pa/ snying rje shes rab ldan pa yis// gzhan don gtso ru len pa la// theg chen rigs su bstan pa yin// blo dman shes rab chung ba la// thabs chen yan lag brgyad po yis// mi ldan gang zag dman pa la/ / theg pa chung ngu'i rigs su bstan// yang gsungs pa/ rigs kyi gtso bo sems dpa' chen po nyon cig/ byis pa rnams la drang don bstan// rnon po rnams la nges don bstan// sems kyi gnas skabs na/ ci spyod ci bsgrub ci brtsams rgyu yin la/ dus nam zhig ma go na grub pa'i 'bras bu mi bslu bar 'bras bu yin/ 'jig rten phyi mar dus mi 'debs// nam mkha' stong pa khungs mi 'dren// sems can skal ba chung ba la snyad mi 'dogs/ cer mthong cer rtogs cer grol// rtogs thob dus gcig tu'o// zhes gsungs so// rin po che sgron ma 'bar ba'i rgyud las/ blo'i khyad par gyis drang don dang/ nges don dang/ rgyu 'bras su bstan pa'i le'u ste zhe drug pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// sems nyid thig le nyag gcig la// mdo sngag gnyis su phye ba yi/ / de yi dgongs pa ji ltar lags// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo nyon cig/ mdo sngags gnyis kyi khyad par ni// de la mdo sde'i 'dod gzhung ni/ / don dam mdo ru bsdus pa lags// kun rdzob tu ni spangs pa yin// 'bras bu gsang sngags 'dod gzhung ni// sprul sku da lta thob pa yin// lha dang rnal 'byor yul du gcig/ tha mal shes pa zlog dang gsum/ / sa lam dus gcig sbyangs dang gcig/ 'byung bzhi sems su shes dang gnyis// bka' yi zhen pa bzlog dang gsum// rtogs pa rnams la rgyu med dang// rnal 'byor rnams la sgrub rgyu bral/ / 'bras bu lam du byed dang gsum// rtog tshogs lha ru bsgyur ba dang/ lha dang rnal 'byor gnyis med dang// de nyid don gsum yin dang gsum// nyon mongs dug lngas rgyu byas nas// mchog gi dngos grub bsgrubs pas na/ / rgyu yi khyad par bstan pa yin// lha dang dkyil 'khor lam bcas pas// lam gyi khyad par bstan pa yin// rang sems gdod nas dag pas na// rtogs tshad gzhan nas btsal du med/ / de las 'bras bu mchog grub pas// dus kyi khyad par phye ba yin// tshe gcig lhun grub sbyor ba yis// rang don nye bar sbyor ba yin// 'phrin las rnam bzhi rdzogs pas na// gzhan don mtha' ru phyin pa yin/ / sgra dang tshad mas gzhig tu med pa yin// don gyi khyad par bstan pa yin// mnyam gzhag rjes thob med pas na// ting 'dzin khyad par bstan pa yin// nyon mongs nyon mongs sgrol bas na/ / dgongs pa'i khyad par bstan pa yin// lus ngag yid gsum sku gsung thugs su sbyor bas na// tshogs kyi khyad par bsgrub pa yin// kha zas kyi rnal 'byor dang ldan pas na// longs spyod phun sum tshogs pa yin/ / yan lag sgul spyod gar du shes pas na// mdzad spyod khyad par bstan pa yin// 'dod chags la sogs dug lnga yis// dmigs pa'i sems ni zin pa yin// bsam gtan khyad par bstan pa yin// tshe gcig gis lhun gyis grub pa'i rigs 'dzin thob pas na/ / dbang po rab 'bring gi spyod yul du bstan pa yin pas// zhes gsungs so// rin po che sgron ma 'bar ba'i rgyud las/ mdo sngags su bstan pa'i le'u ste zhe bdun pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// theg pa dgu ru phye ba'i shes rgyud so so'i ngo bo la// 'jug sgo so sod yod dam me/ / thog ma'i ston pas bstan du gsol/ thog ma'i ston pas gsungs pa// thig le nyag gcig ma rtogs pa// shes rgyud so so'i ngo bo la/ 'jug sgo lta spyod mi mthun pas// nyan thos dag gi 'jug sgo ni/ / bden pa bzhi yi sgo nas 'jug/ sdug bsngal kun 'byung 'gog pa lam dang bzhi// nyan thos dag gi lta ba ni// phung po la sogs chos rnams la// mi rtag pa dang du mar mthong// gang zag la ni bdag med rtogs/ / nyan thos dag gi sgom pa ni// 'khor bar skyes pa'i rtsa ba kun// bdag tu 'dzin pa las byung ba// skyes bu lus gcig sha gang la// mi gtsang sum cu so drug la// bdag ces bya ba ma rnyed pas// shes pa tshom gyis song ba la/ / bsam pa dang bral gzhag pa'o// nyan thos dag gi spyod pa ni// sbyangs pa'i yon tan bcu gnyis te// 'tsho ba'i yon tan bcu gsum po/ nyan thos pa'i sa dag ni/ dgra bcom pa'i sa'o/ / yang gsungs pa/ rang rgyal dag gi 'jug sgo ni// rten 'brel bcu gnyis sgo nas 'jug/ rang rgyal dag gi lta ba ni// nyan thos las kyi khyad par ni// chos la bdag med phyogs gcig rtogs pa'o// rang rgyal dag gi sgom pa ni/ / dper na gnyid ni sad pa la// dbang po yul la ma 'phros shing// rang rgyal dag gi spyod pa ni// nyan thos pa dang mthun par spyod pa ni// nyan thos pa dang mthun par spyod/ / sa ni rang sangs rgyas kyi sa// zhes gsungs so// rin po che sgron ma 'bar ba'i rgyud las/ nyan thos rang rgyal ba'i lta sgom mdor bstan pa'i le'u ste zhe brgyad pa'o//// de nas rigs kyi gtso bos zhus pa/ thog ma'i ston pa lags/ mdo sde theg pa chen po yi// lta sgom mdo ru bsdus pa'i don// bdag cag rnams la bstan du gsol// thog ma'i ston pas gsungs pa/ rigs kyi gtso bo nyon cig/ mdo sde theg pa'i 'jug sgo ni/ / bden pa gnyis kyi sgo nas 'jug/ rnam rig sems tsam lta ba ni// kun brtags gzhan dbang yong grub gsum du 'dod// rnam rig sems tsam sgom pa ni// rang gi rig pa'i ngo bo ni/ / gsal la rtogs pa med pa yis// gzung 'dzin gnyis dang bral bar 'dod// rnam rig sems tsam spyod pa ni// pha rol drug tshad med bzhi la spyod// rnam rig sems tsam sa dag ni// bcu gcig kun tu 'od kyi sa ru 'dod/ / yang gsungs pa/ theg chen dbu ma'i lta ba ni rnam pa gsum yod de/ rnal 'byor pa yi dbu ma ni// kun rdzob tu ni sems snang 'dod// don dam rang bzhin med par 'dod// rnal 'byor pa yi sgom pa ni/ / rang bzhin med pa'i ngang la 'jog/ spyod pa pha rol phyin drug tshad med bzhi la spyod// mdo sde spyod pa'i dbu ma ni// rnal 'byor yod pa dag dang mthun// rab tu mi gnas dbu ma ni// yod pa'i mtha' la mi gnas pa/ / med pa'i mtha' la mi gnas te// gnyis ka la yang mi gnas pas// gnyis med pa yang mi gnas so// rab tu mi gnas lta ba yin// rab tu mi gnas sgom pa yin// 'dod med spyi yi chos nyid sgom/ / rab tu mi gnas spyod pa ni// mdo sde rnal 'byor nyid dang mthun// ces gsungs so// rin po che sgron ma 'bar ba'i rgyud las/ mdo sde theg pa'i lta sgom bsdus pa'i le'u ste zhe dgu pa'o/ /// de nas rigs kyi gtso bos zhus pa/ dam pa dang po'i sangs rgyas lags// phyi rgyud sde gsum theg pa'i lta sgom mdo ru bsdus pa'i don// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo nyon cig/ rig sngags kri ya'i 'jug sgo ni// gza' dang skar ma dus tshod dang// mtshan ma bzang po brtags nas 'jug/ rig sngags kri ya'i lta ba ni// chos nyid rnam par dag pa'i sems/ / mtha' dbus bral ba'i chos nyid 'dod// rig sngags kri ya'i sgom pa ni// cho ya yan lag bcu gcig gis// bskyed nas rje bo'i tshul du 'dod// rig sngags kri ya'i spyod pa ni/ / khrus dang gtsang sbra dag la spyod// 'bras bu kri ya rdo rje 'dzin pa'i sa// yang gsungs pa/ u pa ya yi 'jug sgo ni// dag pa gsum gyi lam nas 'jug/ u pa ya yi sgom pa ni// rnam par mi rtog pa yi stong par sgom/ / gzhi dang ldan pa'i lha snang 'dod// u pa ya yi spyod pa ni// las su khrus dang mchod pa byed// u pa ya yi 'bras bu ni// lta spyod so so tha dad kyis// dper na rgan mo 'khar thogs 'dra/ / yo ga dag gi 'jug sgo ni// mtshan ma med pa'i sgo nas 'jug/ yo ga dag gi lta ba ni// chos nyid dag pa'i byin rlabs las// snangab lha dang lhag mor lta// rang dang 'dra ba'i grogs por 'dod// rnal 'byor yo ga'i sgom pa ni/ / mngon par byang chub lnga dang ni// cho 'phrul bzhi dang ldan par sgom// rnal 'byor yo ga'i spyod pa ni// ting 'dzin las su rung par spyod// 'bras bu sa yi rang bzhin ni// chos dbyings stug po bkod pa'i sa/ / zhes gsungs so// rin po che sgron ma 'bar ba'i rgyud las/ phyi rgyud sde gsum gyi lta sgom mdor bsdus pa'i le'u ste lnga bcu pa'o//// de nas rigs kyi gtso bo sems dpa' chen pos zhus pa/ kye thog ma'i ston pa lags/ bskyed rdzogs gnyis kyi lta sgom mdor bsdus pa// bdag cag rnams la bstan du gsol// thog ma'i ston pas gsungs pa/ rigs kyi gtso bo nyon cig/ rnal 'byor ma hA'i 'jug sgo ni/ / shes rab thabs dang ldan pa yi// gnyis su med pa'i sgo nas 'jug/ ma hA yo ga'i lta ba ni/ bden pa dbye ru med pa yi// bdag nyid chen po'i dkyil 'khor du// spyod yul kun dang bral bar lta/ / ma hA yo ga'i sgom pa ni// ting 'dzin gsum dang ldan pa ste// thabs dang shes rab zung 'brel bas// skye ba med pa'i sgom par bstan// ma hA yo ga'i spyod pa ni// ta na ga na dang/ dam rdzas bdud rtsi lnga la spyod/ / ma hA yo ga'i 'bras bu ni// rnal 'byor lus ngag yid gsum ni// sku gsum rdo rje 'chang gi sa// a nu yo ga'i 'jug sgo ni// dbyings dang ye shes sgo nas 'jug/ a nu yo ga'i lta ba ni// rang rig spros dang bral bas chos dbyings yin/ / dbyings nyid 'gag pa med pas ye shes shar// dbyings dang ye shes gnyis su med pas// byang chub chen po'i lta ba yin// a nu yo ga'i sgom pa ni// don rnams rtogs pas gnyis med sgom/ / don la rang bzhin mtshan ma med// rtags la dus gsum lha ru sgom// a nu yo ga'i spyod pa ni// zhi rgyas dbang dang mngon spyod bzhi// gzhan don yongs su rdzogs par byed// sa dang 'bras bu bstan pa ni/ / sku gsum ye shes bzhi rdzogs nas// kun bzang dbyer med sa dang ldan// zhes gsungs so// rin po che sgron ma 'bar ba'i rgyud las/ bskyed rdzogs gnyis kyis lta sgom mdor bstan pa'i le'u ste nga gcig pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ rdzogs chen a ti yo ga'i lta sgom mdor bsdus pa'i don/ rigs can skal bar ldan pa la/ / thugs rje'i tshul gyis bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ a ti yo ga'i 'jug sgo ni// rtsol ba dang bral ba'i shes rab kyis/ / nges pa'i gsang sgo btsal nas ni// lhun grub 'od gsal sgo nas 'jug/ a ti yo ga'i lta ba ni// mchog tu gsang ba'i don mchog ldan// bsam med kun tu 'char ba yin// kun bral ji ma spangs pa yin/ / rgya chad phyogs lhung med pa yin// bsam med brjod las 'das pa yin// re dogs sgro skur bral ba yin// lta ba med pa'i lta ba ni// de ni lta ba'i dam pa yin// a ti yo ga'i sgom pa ni/ / skyes bu yis ni gdeng chud nas// ma dmigs kun tu gsal ba yin// sems chos sku'i 'od gsal du bzhugs pa yin// sgra gsung gi zer la rol pa yin// thugs nam mkha'i klong na gnas pa yin// sku gsung thugs dbyer med pa rang 'od rang la shar ba yin/ / a ti yo ga'i spyod pa ni// gdeng gsum khong du chud pa yin// 'dzin chags bral bas spyod pa yin// blang dang dor dang rtsol dang sgrub// gang yang med pas spyod pa yin/ / mi spangs mi sgrub rtsol med pas// spyod pa'i gdeng chen bstan pa ni// a ti sa dang 'bras bu bstan pa ni// sa la sbyangs du med pa yin// lam la bgrod du med pa yin// ting 'dzin dmigs su med pa yin/ / 'bras bu lhun grub rang chas yin// ma bsgrubs sku gsung gzhi la grub// ma bsags tshogs rnams don gyis rdzogs// ma brgyud ye shes rang la gsal// ces gsungs so// rin po che sgron ma 'bar ba'i rgyud las/ / rdzogs pa a ti yo ga'i lta sgom mdo ru bsdus pa'i le'u ste nga gnyis pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// rin chen dam pa'i sgron me bstan/ / de yi gtad rgya bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ rin chen sgron ma 'bar ba 'di// sems dpa' chen po khyod la gtad/ / sems dpa' chen po khyod nyid kyis// rigs can las dang ldan la gtod// de nas 'jam dpal bshes gnyen gyis// dkon mchog yi dam lha rnams la// rin chen sna bdun mchod pa phul/ / zhu ba zhus pas mnyes pa med// the tshom chod pas yid ches skyes// man ngag dam pa bcud ldan 'di// mnyes pa bdun dang mdud pa lnga// dgrol ba'i rigs can ma rnyed nas// rgya gar rdo rje gdan drung gter/ / rgya nag ri bo rtse lnga'i gter// kha che me ri 'bar ba'i gter// shar phyogs bya rgod spungs pa'i gter// bal po 'phags pa shing kun gter// au rgyan d+ha na ko sha'i gter// bod yul rgyal po bang so'i gter/ / de rnams pa yi gnas su ni// gter srung bcas la sba zhing gtad// ces gsungs so// rin po che sgron ma 'bar ba'i rgyud las/ rgyud kyi sba thabs dang gtad pa'i rgya bstan pa'i le'u ste nga gsum pa'o/ /// rin po che sgron ma 'bar ba'i rgyud rdzogs so//// rgya gar gyi mkhan po bi ma la mi tra dang/ zhu chen gyi lo tsa ba gnyags dz+nyA nas dbu tshal gser khang du rgyal po yon mchod kyi don du bsgyur cing gtan la phab pa'o/ /// rgya gar skad du/ rat+na pra tI paM tan tra nA ma/ bod skad du/ rin po che sgron ma zhes bya ba'i rgyud/ bcom ldan 'das gsang bdag bde ba chen po la phyag 'tshal lo/

CLOSE WINDOW