rgya gar skad du/ sarba d+harmA ma hA san+ti bo d+hi tsit+ta saM sa ra mU lats+tshe da A ka sha sa mA na k+Sha ra tan+t+ra/ bod skad du/ chos thams cad byang chub kyi sems rdzogs pa chen po 'khor ba rtsad nas gcod pa nam mkha' dang mnyam pa'i yi ge med pa'i rgyud/ bcom ldan 'das kun rig rgyal po la phyag 'tshal lo// 'di skad rtogs pa'i dus gcig na// mkha' klong rnam dag chos kyi dbyings// kun bzang yangs pa skye med klong/ / ye shes lnga rdzogs 'od zer 'phro// rdo rje sems dpa' 'dus ma byas// e ma ngo mtshar rmad byung gtsug/ de nas rdo rje sems dpa' yis// bcom ldan 'das la 'di skad gsol// kun gzhi rtsad nas ci ltar gcad/ / shes bya'i gras thag gcad pa ci// rig pa'i gnad ni gang du bsdu// bcom ldan 'das kyis bka' stsal pa// gdod nas ma skyes snying po a// 'gro ba kun la rang bzhin gnas// ma rig las dang rlung gis 'khor/ / rtogs na rdzogs sangs rgyas su nges// e ma rdo rje sems dpa' nyon// blta bas phyi rgya rlabs kyis gcad// ting nge 'dzin la 'byung 'jug med// gnyis med rjong na yangs pa'i rgya// kun tu bzang po bde chen sa/ / e ma sems dpa' rdo rje che// thams cad rang rig byang chub sems// nam mkha' bzhin du spros dang bral// sna tshogs rang bzhin mi gnyis tshe// thig ler rdzogs pas mtshon du med/ / e ma kun bzang bcom ldan che// skye ba med pa'i chos nyid la// skye ba'i cho 'phrul ci ste 'ong// kun la de bzhin nyid yod na// 'bad pa med par grol bar rigs// 'khrul pas 'khor ba ji lta bu/ / rtogs pa'i thabs su gang che lags// lta bsgom spyod 'bras bye brag gang// thams cad sems nyid shar ba la// bar do zhes pa yod dam med// rig pa spros dang bral ba la// bsgom du yod pa yin nam min/ / sna tshogs rang bzhin gnyis med la// 'bras bu thob tu yod dam med// mtshon med thig le'i ye shes la// thugs rje 'byung ngam mi 'byung lags// nam mkha' dang mnyam pa yi ge med pa'i rgyud las/ gleng gzhi'i le'u ste dang po'o//// de nas bcom ldan bka' stsal pa// skye ba med las thams cad skyes// skyes tsam nyid na ngo bos stong// de nyid skye med snying po yin// gdod nas ma skyes tshig las 'das/ / spros bral brjod med kho na nyid// mtha' bral gnyis med don dam klong// dgag bya bsgrub bya rnam par dag/ ma skyes rdo rje gnyis med dang// yid la mi byed bya btsal bral// ma bcos spros med chos nyid dbyings/ / mtha' bral mi dmigs rang bzhin dag/ bgrod med lhun grub yangs pa che// kun grol nyag gcig bde ba che// dmigs med ye shes rang snang dang// brdal khyab mkha' gsal dag pa'i chos/ / spros med byang chub snying po'i rdzong// bsam 'das brjod med rang sar grol// mi 'gyur mnyam nyid dpe dang bral// dpe bral ye shes mtshon du med// gnyis med rdzogs pas mtha' bral rdzong// mi skye mi 'gag cir mi dgongs/ / 'gag med A li kA lir rol// dgag bsgrub med pa'i ye shes ni// rgyu yis ma bskyed rkyen dang bral// stong gsal dbyer med ye shes can// nam mkha' dang mnyam pa yi ge med pa'i rgyud las/ skye med rnam par dag pa'i le'u ste gnyis pa'o//// de nas bcom ldan bka' stsal pa// rnam par mi rtog snyingapo 'di// yongs kyi rgyud la sbas pa med// don dam chos nyid snying po 'di// kun la til mar bzhin du khyab/ / za ma tog gi nor bu bzhin// lhun gyis grub cing tshang ba'o// mi 'gyur kun rdzogs nam mkha' che// khyab gdal 'ub chub thig le gcig/ brjod bral rang grol gnas su dag/ rgyal ba rnams kyi thugs dang ni/ / sems can rnams kyi rgyud la yang// snying po ye shes yongs la khyab// ma lus ye shes chen por gnas// ye shes chen por gang 'dod pa// rang gi sems la btsal bar bgyi/ / sems kyi chos nyid skye ba med// chos can thams cad ngo bos stong// ma rtogs bar du shes mi 'gyur// yang dag bden pa'i snying po 'di// rtogs ldan 'ga' yi spyod yul min// sems nyid ye nas rnam par dag/ e ma rang la gnas bzhin du// gzhan nas thob 'dod nor ba'i lam// rtogs par gyur na de bzhin nyid// ma rtogs mun pa'i mtsho la spyod// nam mkha' dang mnyam pa yi ge med pa'i rgyud las/ kun khyab yangs pa'i le'u ste gsum pa'o//// de nas bcom ldan bka' stsal pa// 'khor ba thog mtha' med pa nas// lhan cig skyes pa'i ma rig pas// kun nas slong ba'i sa bon byas// las dang nyon mongs rkyen byas nas/ / kun brtags ma rig pa yis 'khor// grib ma gzugs kyi dpe bzhin no// skyod byed las kyi rlung gis brlabs// zhe sdang dmyal ba'i tsha grang 'khor// ser sna bkres skom yi dgas 'khor/ / gti mug glen lkugs byol song 'khor// phrag dog 'gyur ba mi ru 'khor// nga rgyal 'thab rtsod lha min 'khor// 'dod chags ltung ba lha ru 'khor// 'khor ba zo chu'i khyud mo 'dra// lha mi gtsang ma'i lus thob kyang/ / ma rtogs bar du 'khor bar 'khyams// thog mtha' med kyang rtogs na yod// e ma kun bzang bde ba che// gzhi dang 'khrul pa gang las byung// gcig pa yin nam tha dad yin// sangs rgyas sems can gang snga lags/ / kun rig rgyal pos bka' stsal pa// rkyen snang ga pur sman dug tshul// gser gyi nya mo bag la nyal// nam mkha' sprin gyi dpe yis mtshon// nam mkha' dang mnyam pa yi ge med pa'i rgyud las/ 'khrul tshul gnad kyi le'u ste bzhi pa'o//// de nas bcom ldan bka' stsal pa// chos nyid rnam par dag pa la// ma rig 'khrul pa'i grib mas bsgribs// bsgribs kyang chos nyid spros dang bral/ / khyab gdal don 'di sus rtogs pa// rgyal sras bzhin du dbul ba sangs// 'du 'bral gnyis med kun tu bzang// mtshan ma ma spangs rang sar grol// 'khor ba ma bkag gnas su dag/ 'khrul pa ma bsal rtsad nas chod/ / dug lnga ma bsgyur chos nyid klong// rtsol bsgrub med par ye sangs rgyas// yin pa'i don la yin par shes// dper na gser la gser mthong bzhin// yid kyi rnam rtog zad pa'o// nam mkha' chen po'i klong chen bzhin/ / khyab gdal mi 'gyur kun rdzogs grol// nyi ma sprin med snying po bzhin// dus gsum sgrib med de bzhin nyid// brgya byin gtsug gi nor bu bzhin// 'dod dgu 'byung la 'gran zla med/ / ma gi ta yi sman bzhin du// gang la reg pa sman du 'gyur// dgra bcom rgyal sras mi lus mchog/ rtogs na khyad par yod pa'o// rtogs pa'i thabs su thams cad shar// nam mkha' dang mnyam pa yi ge med pa'i rgyud las/ rtogs ldan mchog gi le'u ste lnga pa'o//// de nas bcom ldan bka' stsal pa// chos nyid rang bzhin 'od gsal ba// sgro skur lta ba kun dang bral// thams cad gcig gi rang bzhin la/ / spang 'gegs byin pas bslad pa med// dbyer med ye shes lnga ldan la// sbyang bgrod gnyis blta rang sar grol// skye 'gag gnyis su med pa la// bsgyur dang spyod lnga rnam par dag/ dag pa'i klong na bsrung mtshams med/ / mnyam pas rim par bkod pa med// rtogs pas blta ba'i yul las 'das// gsal bas bsam gtan spros dang bral// yul las 'das pas spyod du med// lhun gyis grub pas rtsol bsgrub med/ / ma yengs dran pas spros dang bral// sngags dang phyag rgya rnam par dag/ stong nyid ngang la mchod bshags med// 'khor 'das khyab gdal chen po la// phrin las rnam bzhi gdod nas rdzogs/ / 'gro ba mu stegs rim dgu rdzogs// lam lnga pha rol phyin bcu rdzogs// 'khor 'das byang chub sems su rdzogs// snang srid thig le gcig tu rdzogs// dran pa gzhi bzhengs yongs su rdzogs// rgya chad phyogs lhung med pa'o/ / nam mkha' dang mnyam pa yi ge med pa'i rgyud las/ nam mkha' mdzod kyi le'u ste drug pa'o//// de nas bcom ldan bka' stsal pa// rang rig bde ba chen po la// bsgom yod bsgom med gnyis su med/ / tshig tsam don dam bde chen dang// ma bcos ma yangs rang sar grol// dran pa rang grol bde chen klong// so ma lhug pa gyin 'da' tsam// mig tsam bsgom zhes de la bya// dran rig shes pa ma 'gags la/ / 'dzin rig yul las rnam par grol// ma byung ma skyes g.yos pa med// spros bral bsam 'das brjod med rdzong// mnyam nyid rnam dag brdal ba'i klong// mkha' 'dra ye shes lhun gyis grub/ / ma btsal rang bzhag rnyog pa med// lhun grub rtog pas bya btsal bral// ye nas rang byungaye shes la// 'khrul dang ma 'khrul rtog las 'das// rtog 'das don gyi ye shes la// bsgom bya chos nyid gud na med/ / bsgom pa ming du btags pas nor// ci ste smra bsam brjod las 'das// rnam rtog gnyen por mi rtog bsgom// de ka rtog pa chen po yin// mthong tshor de nyid klong du shar// yid la mi byed bde ba che/ / nam mkha' dang mnyam pa yi ge med pa'i rgyud las/ bde chen gsal ba'i le'u ste bdun pa'o//// de nas bcom ldan bka' stsal pa// blang dor med pa'i ye shes ni// skye med 'gag med chos nyid klong/ / bya bral lhun rdzogs blo las 'das// e ma rang la gnas bzhin du// spyad pas thob 'dod e ma 'khrul// spyod byed bral ba'i ye shes la// sangs rgyas sems can gnyis med de// lam gyis bcos su ga la yod/ / ci phyir dgag bsgrub med pa la// rtsal sprug smon chags re dogs med// ngo mtshar rmad byung rol pa 'di// rtag na bde ba chen por rtag/ chad na 'khor ba rtsad nas chad// bying na chos nyid dbyings su bying/ / rgod na ye shes rol par rgod// mnyam na mi mnyam mnyam nyid klong// thim na 'khrul snang chos nyid thim// skye med don te yi ge gcig/ bya bral mkha' ltar yi ge med// yi ge med pa rgyud kun mchog/ e ma rnam dag bya btsal bral// bya bral ngang las rnam par rol// ci spyod don las ma g.yos shing// thug phrad rang grol rtsis zin na// ming tsam spyod cas de la bya// nam mkha' dang mnyam pa yi ge med pa'i rgyud las/ rnam rtog ye shes su 'bar ba'i le'u ste brgyad pa'o//// de nas bcom ldan bka' stsal pa// gdod nas ma skyes don gyi sa// thob bsgrub kun gyi yul las 'das// re dog blo las rnam par grol/ / go ba'i yul ni bde ba che// ngang dngas rang bzhin bdag nyid klong// rang bzhin rnam par dag pa la// rol pa 'gag pa med par shar// mtshan nyid dbyer med chen po la// blo rtog chos nyid dbyings su grol/ / rtog med mnyam nyid chos kyi sku// bde ba chen po longs spyod sku// rtsal du shar ba sprul pa'i sku// 'du 'bral med pa rdo rje'i sku// tshig gi tha snyad ma lags sam// gdod nas snying po byang chub la/ / btsal ba'i bsam pas dbyings mi bskyod// sku dang ye shes tshig las grol// grol nas grol ba'i lam yang ston// snying po klong nas grol ba la// mngon sum rjes dpag log par rtog/ rtog ge'i spyod yul ma yin no/ / ci ste bya btsal bral ba'i phyir// skyes pa skye med blo las 'das// sgra dang tshig gi mtha' las grol// stong pa ye shes snying por shar// nam mkha' dang mnyam pa yi ge med pa'i rgyud las/ de kho na nyid kyi le'u ste dgu pa'o/ /// de nas bcom ldan bka' stsal pa// thams cadabyang chub sems yin te// 'dzin pa'i shes pa yod pa'i phyir// tshor ba nyams su myong ba'o// snang ba sems nyid rgyan shar bas/ / snang ba'i bar do stong rgya theb// bsam gtan gnyid gnyis ro mnyam phyir// rmi lam bar do rnam par dag/ skye shi med pa'i don rtogs pas// 'chi ka bar do bde chen klong// phyi ma bde ba mchog thob pas/ / srid pa'i bar dor lus mi len// lus med lus te lus kyi mchog/ sprul pa'i sku ste rnam par dag/ ma rtogs mos pa'i rnal 'byor kyang// ci ste las kyi dbang gyur na// bde ba mchog gi las 'phro mthud/ / las las grol na thar ba'i mchog/ ji tsam pa yi tshig brjod kyang// sems las gud na yod ma yin// pho mo ma yin ma ning min// kha dog dbyibs dang mtshan ma med// 'das dang ma 'ongs da ltar med/ / gcig dang tha dad las grol ba// dran pa dngos med rig pa'i rgyun// rlung las brten cing rgyun mi chad// nam mkha' dang mnyam pa yi ge med pa'i rgyud las/ byang chub sems kyi le'u ste bcu pa'o/ /// de nas bcom ldan bka' stsal pa// chos rnams thams cad stong pa nyid// gzhig kyang rang bzhin rnam par dag/ rnam par mi rtog spros bral mkha'// ngo bo gzugs med tshor ba med/ / 'du shes 'du byed rnam shes stong// dbang po lnga dang yul yang stong// skye mched khams dang rten 'brel stong// bden bzhi bsal gsal dang spros bral stong// lha dang phyag rgya sngags kyang med// thabs dang shes rab bde ba stong/ / dbus mtha' gnyis med tshig kyang med// med de med pa'i snying po can// yod de rtog pa'i mtha' las 'das// mtha' bral don gyi chos sku 'di// phyogs med rkyen rnams kun dang bral/ / rang snang thabs kyi ye shes rol// shes pa shes byar rnam par dag/ spros bral bsam 'das smra ru med// mtha' bral tshig gis mi phebs la// bsgom yod blo yi rtog pa yin// bsgom med skur 'debs blta ba la/ / des na gnyis med bde chen klong// spang bya blang bya gnyis med rdzong// btang snyoms mngon gyur med pa nyid// mi rtog nam mkha'i mtha' ltar yangs// nam mkha' dang mnyam pa yi ge med pa'i rgyud las/ chos nyid stong pa nyid kyi le'u ste bcu gcig pa'o//// de nas bcom ldan bka' stsal pa// chos rnams 'od gsal gnyis med la// bdag tu mi rtog gzhan mi rtog/ mi rtog rtog las rnam par grol/ / gnyis med bde ba chen po la// dper na glang chen lcags kyu bzhin// ma yengs dran pas rang sar grol// gser bum til gyi sgron ma bzhin// 'gyur med rig pa nang na gsal// rdzogs chen rtog pa'i rnal 'byor ni/ / gser gling brdal ba'i klung chen bzhin// gang bltas rdzogs pa chen po'i klong// dug sbrul 'bar ba'i mdud pa bzhin// rtsol bsgrub med par rang sar grol// gnyis med gnyis su med pa'i phyir/ / sku gsung thugs la rten mi 'cha'// 'byung ba lnga la rag ma lus// srid gsum ye nas rnam par dag/ 'dod yon ye shes lnga ru rol// dug lnga sku lnga'i ngang du thim// sdug bsngal chos nyid dbyings kyi rgyan/ / rnam rtog ye shes chen por 'bar// 'khrul pa'i 'gro 'ong zad pa dang// 'bras bu thob ces re ba med// med nas don med ma yin te// longs sku gnyis med thams cad rdzogs// nam mkha' dang mnyam pa yi ge med pa'i rgyud las/ 'od gsal gnyis med kyi le'u ste bcu gnyis pa'o//// de nas bcom ldan bka' stsal pa// ming tshig sgra las 'das pa che// ma bslabs kun las grol na mkhas// ma bsams skye ba med pas a/ / ma bsgoms dbyings su thim pas ti// yo ga rdzogs chen chos kyi rtse// shin tu rnal 'byor lha yi lha// rdzong bzhi gnyis med tshig gcig lha// 'phrang bzhi dbyer med chig chod lha/ / klong bzhi zung 'jug 'da' kha'i lha// dbul mo gter phrad sku bzhi'i gdeng// rdzogs pa chen po sa gcig pa// gang gis de rtogs de yis sa// yongs su rdzogs pas chos kyi rtsi// bde ba che las gzhan med do/ / smra bsam brjod med chos kyi sku// gnyis med bde ba chen po'i klong// sprul pa rgyan dang rol par shar// sku lnga ye shes thig ler rdzogs// ma skyes pa yi dbyings nyid du// ma g.yos pa ru yid gnas pas/ / ma bsgrubs pa yi 'bras bu ster// ma bsams pa ru re ba bskang// ye shes chen po'i ros gang bas// mtshon du yod pa ma yin te// ye shes rol pas 'gro don rdzogs// nam mkha' dang mnyam pa yi ge med pa'i rgyud las/ sku gsum thig ler rdzogs pa'i le'u ste bcu gsum pa'o//// de nas bcom ldan 'di skad gsungs// cir snang de bzhin nyid du gcig/ 'di la bcos bslad ma byed cig/ ma bcos mnyam pa'i rgyal po de// mi rtog chos sku'i dgongs par gnas// skye med lta ba stong pa nyid// kun khyab sgom pa gnyis su med// 'khrul spyod sems kyi rgyan du rol// rtogs pa'i 'bras bu thig ler gcig/ dus gsum gcig ste khyad par med// gtan tshigs bzhi ru gcig pa'i phyir// nga las byung zhing nga ru thim// nga yi rang bzhin 'od gsal lo// e ma sems dpa' rdo rje che// nam mkha'i mtha' ltar longs spyod pas/ / chos dbyings rgya mtsho zad mi shes// bdud rtsi'i thigs pa lce la zhog/ rgyal po btson du bzung ba dang// gangs ri rtse nas bsnyil ba ste// shing rta'i gzer mgo gcad par bya// mkha' ltar yi ge med pa'i rgyud/ / rang rig sems kyi dkyil du chong// thugs rje ye shes rol par 'char// e ma kun bzang rgyal ba'i yab// ma 'dres yongs rdzogs zab cing yangs// nam mkha' lta bu'i rgyud bstan pa/ / ming tshig yi ge med pa la// bstan du 'ong ba ci yi phyir// bcom ldan kun bzang bka' stsal pa// mtshon du med pa'i chos nyid la// mtshon du med pa'i tshig brjod nas// mtshon pa'i tshig las rnam par grol/ / legs so sems dpa' rdo rje che// don dam yi ge med pa'i rgyud// khyod la gtad do bde ba che// rang byung ye shes rgyas thob la// thig le nyag gcig ngang la zhog/ kun tu bzang po bde ba che// thig le chen po yi ge med/ / bya ba med pas rnam par grol// grol nas grol ba'i lam yang shar// kun rig sems la mngon par bstod// nam mkha' dang mnyam pa yi ge med pa'i rgyud/ bcom ldan 'das kun rig rgyal pos gsungs pa rdzogs so/ /// rgya gar gyi mkhan po shri sing ha dang/ bod kyi lo tsA ba bai ro tsa nas bsgyur ba'o////

CLOSE WINDOW