/// rgya gar skad du// ma hA san+ti ni ya mAr+tha sa mU ha tan+t+ra dr-iSh+ti sarba gar+b+ha rat+na byU ha nA ma/ bod skad du/ rdzogs pa chen po nges don 'dus pa'i rgyud/ lta ba thams cad kyi sny-ing po rin po che rnam par bkod pa zhes bya ba/ bcom ldan 'das mnyam pa nyid kyi rgyal po dpal kun tu bzang po la phyag 'tshal lo// 'di skad gsungs pa'i dus gcig na/ kun rig sems kyi rgyal po des/ / 'og min chos kyi dbyings gnas na// nges pa'i don la rab bzhugs te// rdo rje sems dpa' la sogs pa'i// 'khor rnams 'dus nas rab tu 'khor// de tshe 'dus pa rnam bzhi yang/ / rdo rje gsang ba rin chen snying// dri med grags pa las rab grub// rgyal ba'i dbang po bsod nams snying// zhi ba'i bden dang nyi ma'i 'od// nam mkha'i snying po 'bum gzigs dang// phyogs bcu'i sangs rgyas rnams kyang bzhugs/ / rig 'dzin sems dpa' chen po dang// blo gros stsol dang rnam dag dang// dam pa'i yon tan 'od rlabs can// shes rab bla ma rgyal mtshan dang// rnam par grol ba'i ting 'dzin dbang/ / chos dbang dang ni spobs pa brtsegs// bdud 'joms dang ni seng ge'i sgra// rin chen mthong dang brtse ba can// dbang phyug gtso dang yid dge dang// mthong na dga' dang bden mos dang/ / gsung brtsegs la sogs 'khor rnams kun// rang rang gtso la bskor nas ni// rgyal sras sprul pa'i 'khor rnams kyang// tshangs pa brgya byin rgyal chen bzhi// thag bzang ris dang gang ba bzang// chos kyi rgyal po rta mgo can/ / zur phud lnga pa nor srung dang// mgrin bcu dang ni klu rgyal dang// de 'khor la sogs kun kyang gnas// mkha' 'gro sde lnga srin mo'i tshogs// ye shes mkha' 'gro rig pa 'dzin// rdo rje mkha' 'gro rigs kyi yum/ / rin chen mkha' 'gro 'dod dgur sgyur// pad+ma mkha' 'gro bde chen rgyas// las kyi mkha' 'gro lus sgrib sbyong// 'jig rten mkha' 'gro dam btags pa'o// 'khor gyi gtor zan pho mo kun/ / snying rje med par gsod la dga'// rkyen mthong tsam na chad pas gcod// kun kyang srin po'i cha byad can// rngams pa'i nga ro 'jigs tshul gyis// bstan pa bsrung phyir dus der 'dus// sprul skur snang ba'i 'khor rnams ni/ / dad nyan lha mi las can kun// mos shing dad pas 'dus pa yis// las dang thugs rje 'dzoms nas 'khod// de tshe rdo rje sems dpa' yis// 'dus pa'i 'khor la phan gdag phyir/ / gus pa'i tshul gyis thal sbyar te// bden pa'i yid kyis 'di skad gsol// rtsa ba gcig pa'i chos nyid la// sangs rgyas chos rnams ji ltar gsungs// chos nyid gnas lugs ji ltar yin// snod kyi rim pa gang la bstan/ / chos rnams gtan la ji ltar dbab// mnyam pa'i rgyal pos bshad du gsol// de skad zhus pa'i don gsan nas/ kun rig ston pas bka' stsal pa// legs so 'dus pa'i 'khor rnams kun/ / dad ldan bu la ngas bstan gyis// legs par nyon la yid la zung// dus gsum sangs rgyas thams cad kyang// rtsa ba rang sems rtogs pa'i phyir// gzi ldan nor bu rin chen bzhin// chos sku'i ston pa kun bzang ngas/ / thams cad ye shes chen por mkhyen// de don rang rig chos kyi sku// tshig dang yi ge brjod las 'das// rang byung ye shes thugs la gsal// drang srong mngon shes dpe bzhin du/ / rang byung ngo bo nyid kyi sku// dus gsum bde gshegs 'khor rnams la// yid la bstan pa'i don nyid shar// nges don rtogs phyir yang sangs rgyas// rang rig chos sku'i byin brlabs shar// de tshe nges pa'i don chen 'di/ / rdo rje sems dpas don rig nas// gtsang rigs lha yi gnas chen du// brtser dgongs dus la bab gyur nas// rig 'dzin 'khor la dbang bskur te// gsang sngags rang gi ngo bos bshad/ / dus der snying po sems dag gis// phyogs bcu'i 'dus pa'i sangs rgyas la// zhu ba zhus nas the tshom bcad// de nyid mngon dga'i phug tu zhugs// de bskul sprul pa 'dzam gling du// byang chub mo yi bur skyes nas/ / rig pa'i gnas lnga thams cad mkhyen// ya mtshan can du kun tu grags// spyan drangs gnas su don zhus te// bdud btul tshar bcad dam la btags// de nas shAkya thub sprul de// bkra shis bde ldan gnas dag tu/ / da lta dus kyi deng sang na// gsang bdag sprul pa dad nyan la// sdeb sbyor legs pa'i tshig tu gsungs// da yang rdo rje sems dpa' nyon// shes rab blo yi khyad par las// sku gsum chos rnams ci gsungs pa'i/ / bshad lugs rnam pa de dag kun// gdul bya'i 'khor la tha dad kyang// dus gsum gcig phyir khyad med pas// don la dbyer med ngo bo gcig/ rdzogs pa chen po nges don 'dus pa'i rgyud rin po che rnam par bkod pa las/ nges don 'byung ba'i rgyud gling gzhi bstan pa'i le'u ste dang po'o//// de nas 'dus pa'i 'khor rnams la// kun rig ston pa chos rje yis// chos nyid gnas lugs bka' stsal pa/ / 'khor ba mya ngan 'das pa'i chos// gzhi la yang dag med pa'i phyir// rang rig rtogs pa'i chos sku la// snang ba gzugs brnyan mi 'gog pa// chos nyid nges pa'i gnas lugs yin/ / ye nas rang byung rig pa 'di// ye nas yang dag ngos zin cing// bya ba med cing bsgrub tu med// de yang chos nyid gnas lugs yin// ye nas rang la gnas pa'i don// gzhan nas mi 'byung chos kyi sku/ / rgyu las ma byung bdag med pas// de yang chos nyid gnas lugs yin// rang byung ngo bo nyid kyi sku// ma bcos ma bslad don yin phyir// ma nor ji bzhin ma 'gags pa// de yang chos nyid gnas lugs yin/ / dus gsum gcig par nges pa'i phyir// ma skyes mi nub ye shes ni// mi 'byung mi 'gro ye gnas pa// de yang chos nyid gnas lugs yin// rang byung rig pa rang gsal te// kun la khyab pa mi byed phyir/ / blta ru med pas tha snyad med// de yang chos nyid gnas lugs yin// dngos med rang rig ye shes de// mtshon du dpe med rtog las 'das// bsam du med pa bsam mi khyab// de yang chos nyid gnas lugs yin/ / ngo bo rang byung snying po de// rgyu las ma byung rkyen med pas// dngos po ma yin rtag chad med// de yang chos nyid gnas lugs yin// snang ba rang gsal chos dbyings la// spros dang bral bas sgro skur med/ / mtha' dbus med pas rgyu 'bras med// de yang chos nyid gnas lugs yin// da yang rdo rje sems dpa' nyon// gzhi gcig gang yang mi 'gal ba// sangs rgyas rnams kyi gnas lugs yi// rdzogs pa chen po nges don 'dus pa rin po che rnam par bkod pa las/ don chos nyid kyi gnas lugs bstan pa'i le'u ste gnyis pa'o//// de nas 'dus pa'i tshogs rnams la// kun rig rgyal pos bka' stsal pa/ / don ldan snod bcud rim pa ni// yang dag nges pa'i sangs rgyas don// gsang sngags kun gyi rtsa ba yin// dbang rnams rim par rdzogs byas nas// chos kyi gzhung dang mi 'gal bar// thos sbyangs kun la rab sbyangs nas/ / nges don bka' rgyud gsang ba yi// dam pa'i mdzod kyi gter ldan zhing// srid par zhus kyang tshad med pa'i// bla ma rdo rje slob dpon de// tshul 'chos med par gdeng ldan pa'i// dpe ni nags kyi seng ge bzhin/ / gcig pur gnas kyang don ldan la// sangs rgyas dgongs pa thugs la gsal// da yang rdo rje sems dpa' nyon// skal ldan slob ma'i mtshan nyid ni// bla ma la gus dad ldan pas/ / ser sna chung la brtson 'grus che// brtse gdung dam tshig mi 'gal bsrung// don gsang thugs la shes rab zab// tshul shes ngang bzang rnams kyi don// yon tan zad med rin chen gter// thams cad 'byung ba'i gzhi ru bstan/ / da yang 'dus pa'i snying po nyon// de dang mi ldan 'di bstan na// sangs rgyas rnams kyi bka' bcag ste// mtshams med sdig pas char mi phod// dmyal ba'i 'og gzhi byed par gsungs/ / rdzogs pa chen po nges don 'dus pa rin po che rnam par bkod pa las/ snod bcud bstan pa'i le'u ste gsum pa'o//// de nas 'dus pa'i tshogs rnams la// kun rig chos kyi rgyal po yis/ / chos rnams gtan la dbab pa'i phyir// don gyi snying po 'di gsungs pas// yang dag nges don rtogs pa'i thabs// 'dus pa lnga yi don mtshon phyir// sun 'don bdun gyis shan phye ba/ / skabs dbye lnga yi sgo phyes nas// rtsa ba bzhi yi mdor bsdus la// 'phrang chen drug gis gtan la dbab// nges don bdun gyis nyams su blangs// nges pa gsum gyis khyad par 'phags// che ba lnga yi dngos 'dzin dag/ gnyis med gsum gyis la bzla la// gtan tshigs bzhi yis yid ches byas// 'bras bu dgu yis mtha' ru gtug/ rtogs pa bzhi yis gdengs ldan bya// rdzogs pa chen po nges don 'dus pa las chos rnams gtan la phab pa mdor bsdus te bstan pa'i le'u ste bzhi pa'o/ /// de nas 'dus pa'i snying po yis// dad ldan 'khor la phan gdags phyir// kun rig chos kyi rgyal po la/ / bden pa'i don ni 'di skad zhus// sangs rgyas dgongs pa gang du 'dus// rgyu 'bras nges tshig ji ltar 'dus// snying po 'dus pa'i khyad par gang// dpe dang don du ji ltar 'dus// rdzogs chen rang gzhung ji ltar 'dus/ kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa// sangs rgyas kun gyi dgongs pa'i chos// nges don bla ma dam pa yi// gdams ngag khyad par can du 'dus/ / dpe yis 'dus la don gyis 'dus// rtags dang gtan tshigs mthun par 'dus// don ni rang byung chos skur 'dus// da yang rdo rje sems dpa' nyon// kun tu bzang po'i dgongs 'dus pa/ / 'pho 'gyur med pa'i blta ba la// skye 'gags med pa'i bsgom pa shar// blang dor med pa'i spyod pa la// re dogs med pas 'bras bu gnas// rigs lnga'i sangs rgyas dgongs 'dus pa// rang byung skye med rang gsal de/ / 'gags med mi 'gyur rig pa de// rdo rje sems dpa'i dgongs pa ste// mi shigs ye nas rdo rje'i sku// chos nyid ma bcos ma bslad pa// mi zad gter gyi dgongs pa ste// 'du 'bral med pa'i ye shes thugs/ / rin chen 'byung ldan dgongs par 'dus// chos nyid mtha' yas brdal khyab pa// ma byung ma skyes snying po la// 'phel 'grib med par rang gnas pa// snang ba mtha' yas dgongs par 'dus/ / sangs rgyas ye shes da lta nyid// de rtogs rang byung chos nyid gsal// don yod grub pa'i dgongs pa ste// de las 'gyur med sangs rgyas thugs// ye shes lus can sangs rgyas sku// de ldan snang ba'i yul rnams la/ / zhen med rang byung ye shes gsal// rnam par snang mdzad dgongs par 'dus// da yang rdo rje sems dpa' nyon// dpe ni kun dpe nam mkhar 'dus// rtags ni byang chub sems su 'dus/ / gtan tshigs rang byung snying por 'dus// da yang 'dus pa'i snying po nyon// dus gsum sangs rgyas dgongs 'dus pa// 'dus ma byas pa'i ye shes de// rgyu dang rkyen gyis ma bskyed par// chos rnams kun gyi snying po ru/ / rang byung lhun gyis grub pa'i sku// sangs rgyas kun gyi dgongs par 'dus// dgongs pa de dag mtshon pa'i phyir// rang sems bla mar gsungs pa la// dbye ba rnam pa gsum yod de/ / sems nyid rgyu yi bla ma dang// 'bras bu ye shes bla ma dang// snang ba chos dbyings bla ma'o// da yang 'dus pa'i snying po nyon// sems nyid rgyu yi bla ma ni// log sred can ni ma yin te// lung rigs ldan pa'i gang zag gis/ / 'khor 'das chos rnams blos brtags pas// bde dang sdug bsngal gnyis su mthong// bde sdug gnyis la don brtags pas// dge sdig gnyis las byung bar nges// dad pa brtson 'grus shes rab kyis/ / rnam pa'i rtog pa'i blo sbyang phyir// drang ba'i don la dgongs nas ni// sgrib sbyang tshogs bsags bya bar gsungs// da yang 'khor gyi snying po nyon// 'bras bu ye shes bla ma ni// nges pa'i don la dgongs pa'i phyir/ / 'khor 'das 'byung bas ma reg pa'i// ye shes ngos zin ma bcos pa// rang rig chos sku dang ldan thugs// ngo bo longs spyod rdzogs skur ldan// thugs rje sprul pa'i sku ru 'byung// gzhi ni chos sku nyag gcig las/ / gdul byar ston pa gsum du 'byung// da yang 'dus pa'i snying po nyon// snang ba chos dbyings bla ma ni// 'byung chen lnga ni bla ma ste// 'dod yon lnga sogs chos rnams ni// tshig dang yi ges mi mtshon par/ / ldem dgongs rang gi ngo bos ni// snang ba chos kyi dbyings su bstan// rdzogs pa chen po nges don 'dus pa las sangs rgyas chos kun bla ma dam pa'i gdams ngag la 'dus par bstan pa'i le'u ste lnga pa'o/ /// de nas 'dus pa'i 'khor rnams la/ kun rig ston pas bka' stsal pa// 'khor 'das gzhi ni gcig mod kyang// sems kyi snang ba mi 'dra ste// snod kyi rim pa dang sbyar nas/ / dbang po rab 'bring gsum du byung// da yang 'dus pa'i snying po nyon// dbang po tha ma'i don du ni// dge sdig las kyi rgyu 'bras kyis// 'bras bu bde dang sdug bsngal la// gnyen po dge bas rgyu byas nas/ / chos spyod lam du khyer bas phyir// sde snod gsum kyi chos bstan pas// rgyu yi theg par btags shing 'dus// da yang rdo rje sems dpa' nyon// dbang po 'bring gi don du ni// 'bras bu rdo rje theg pa ste/ / kri yog rgyud lung man chad chos// phyag rgya'i dkyil 'khor lam byas nas// 'bras bu de nyid ye shes sku// rang gi lus ngag yid gsum ni// sku gsung thugs su sbyor ba'i phyir// rdo rje theg par btags shing 'dus/ / da yang 'dus pa'i snying po nyon// dbang po rab kyi don du ni// bstan pa tsam gyis rtogs pa'i chos// thig le nyag gcig chos kyi sku// shes pa tsam gyis sangs rgyas nges// pa na sa yi 'bras bu bzhin/ / rgyu 'bras ro gcig theg par 'dus// rdzogs pa chen po nges don 'dus pa las rgyu 'bras 'dus pa'i nges tshig bstan pa'i le'u ste drug pa'o//// de nas kun rig ston pa yis// 'dus pa'i 'khor la bka' stsal pa/ / kun gyi gzhi ni nam mkha' la// mun par nam langs nyi shar bzhin// gzhi sems rig pa'i ye shes ni// gcig pa ma yin khyad par che// de don ngas bshad legs par nyon/ / 'khor 'das bzhi ni ngo bo nyid// de las bskyed pa'i chos rnams byung// de tsam nyid nas ngang gis stong// gzhi la dngos med nam mkha' 'dra// da yang 'khor gyi snying po nyon// ma rig las skyes chags sdang sems/ / de phyir 'khor ba'i rtsa ba ste// nyon mongs bag chags bskyed par byed// sems ni tshogs brgyad mun pa 'dra// de 'dra lung gi slob dpon gyis// rig pa'i gtan tshigs rnam bzhi ni// yul gyi snang ba 'di nyid la/ / gzhig par rang bzhin med par shes// gsal la mi rtog gang bsgom pa// thos pa'i shes rab yin pa'i phyir// rig pa yin te ye shes min// de yang 'dus pa'i snying po nyon// sems dang rig pa'i bar du ni/ / lung ldan nges pa'i gdams ngag gis// snang ba gtan tshigs ma gzhigs pa// 'khor 'das ma rig chos kyi sku// gzhi shes nang gi rig pa de// bsam pa'i shes pa yin pa'i phyir// rang byung yin la nges shes min/ / nam langs mun pa med pa 'dra// da yang rdo rje sems dpa' nyon// ye shes chos sku'i bar du ni// rnal 'byor rig pa'i blo ldan pas// sems can rgyu ba rgyun gcod pas// ye shes 'gag pa med par gsal/ / bsgom pa'i shes rab yin pa'i phyir// mnyam gzhag ngang la yengs pa med// rjes thob ma yengs rting bzhin du// ye shes ngang las chos sku btsal// de shes gdeng gis zin pa ni// nyi shar mun grib med pa 'dra/ / da yang 'dus pa'i snying po nyon// sems kyi snying po rig pa dang// sangs rgyas snying po ye shes dang// chos kyi snying po rdzogs chen dang// 'byung ba'i snying po nam mkha' dang// 'khor 'das snying po ngo bo nyid/ / de don rnam par dbye ba ni// kun bzang rgyud du ngas bshad kyis// dad ldan phyi rab rtog par gyis// rdzogs pa chen po nges don 'dus pa las snying po nges don 'dus par bstan pa'i le'u ste bdun pa'o/ /// de nas 'dus pa'i 'khor rnams la// kun rig ston pa chos rje yis// dpe dang don du bka' stsal pa// dper na wA' ra NA sI'i ras// tshon gyi rkyen gyis bsgyur byas nas/ / kha dog sna tshogs cir snang yang// ras su dbyer med ngo bo gcig/ sems kyi snang ba sna tshogs pas// yul dbang rkyen gyis so sor snang// de yang 'khrul pa'i sems su snang// de phyir snang ba nges med yin/ / shel sgong dag gi nang du ni// kha dog sna tshogs ras bzhag pas// kha dog sna tshogs cir yang snang// snang yang shel la 'gyur ba med// de bzhin rang byung ngo bo la// gzung 'dzin rkyen gyis ris drug 'byung/ / 'khrul pa'i ngo la cir yang snang// snang yang gzhi la 'gyur ba med// da yang 'dus pa'i snying po nyon// gser bzo'i lag gis bsgyur byas nas// chol zangs dri chu'i snod byas na// gser kyang ngan pa'i rdzas su snang/ / de bzhin 'khrul pas brtags tsam na// yul kyang ma dag 'jig rten khams// ngam grog g.yang sa tsher dong snang// gser sku mchod rten byas tsam na// tshogs bsags rten du 'gyur ba'i phyir/ / gser kyang bzang po'i rdzas su mthong// ye shes can gyi ngo gang la// yul kyang zhing khams rnam par dag/ rin chen gser gyi ngo gang la// gser gyi rgyu la bzang ngan med// de bzhin chos sku'i ngo bo la/ / snang dang mi snang gzhi la med// da yang 'dus pa'i snying po nyon// sna tshogs dar gyi tshogs rnams la// za 'og snam bu byas tsam na// sna tshogs dar gyi ming dang bral// za 'og snam bur gcig pa ltar/ / chos sku rang gi sems yin kyang// lung ldan rkyen gyis bstan tsam na// sna tshogs 'dzin pa'i sems dang bral// thig le nyag gcig chen por 'dus// dper na sman dug gzhi gcig la// la la'i sman la la la'i dug/ de bzhin nges don chos 'di la// la la'i byang chub la la'i dmyal// ha la nag po'i dug dag kyang// thabs mkhas bza' legs sman gyi mchog/ de bzhin 'dod chags zhe sdang yang// nyon mongs rang sar grol tsam na/ / de ni rang byung ye shes yin// sman gyi rgyal po'i bcud len kyang// thabs la mi mkhas bza' nyes na// ha la nag po'i dug dang 'dra// rang la gnas pa'i chos nyid kyang// lung med 'khrul pa'i dbang song tshe/ / 'dod chags la sogs dug lnga yin// da yang rdo rje sems dpa' nyon// sa 'og gnas pa'i rin chen gser// ngo ma shes na rdo dang 'dra// de bzhin rang la yod pa'i don// rtogs pa med pa'i 'khrul rtog sems/ / ngo shes phrad na mi zad gter// dgos 'dod re ba de las byung// nges don chos sku rtogs tsam na// byin rlabs nor bu'i tshul du 'byung// da yang 'dus pa'i snying po nyon/ / mkha' la gza' skar shar ba dang// chu nang dag gi gzugs brnyan ni// gcig pa ma yin so so min// de bzhin rig pa'i rgyal po dang// rig pa'i rtsal du snang ba gnyis// ldog bcas tha dad ngo bo gcig/ rdzogs pa chen po nges don 'dus pa las dpe don 'dus pa bstan pa'i le'u ste brgyad pa'o//// de nas 'dus pa'i 'khor rnams la/ kun rig rgyal pos bka' stsal pa// rgyu rkyen ma bskyed rang byung la/ / gsal 'grib med pa ye shes yin// rtsol sgrub dag las ma byung bas// rang byung lam la rag ma lus// yul las ma byung ye gnas te// lung ldan rkyen gyis rtogs pas chog/ da yang rdo rje sems dpa' nyon/ / yang dag chos sku 'dus pa 'di// rang la yod kyis gzhan ma blta// chos nyid ngang las thugs ma bcos// lta ba'i don la brjed ma ngas// sgom pa'i ngang la dran ma gsal// spyod pa'i chos la bcos ma bslad/ / dam tshig gzhung la 'tshur ma rkyen// 'bras bu'i chos la rtags ma ring// da yang 'khor gyi snying po nyon// 'gro sa med kyis tsen ner 'dug/ ye nas yin gyis gzod ma 'tshol// 'khor ba'i chos la ngos ma 'dzin/ / snang ba'i yul la zhen ma che// 'jig rten gtam la blo ma rno// nam mkha' dag la bgos ma byed// rgyal ba'i bka' la shed ma byung// slob dpon dag la 'gras ma 'dzug/ rdzogs pa chen po nges don thams cad 'dus pa las/ don gyi bsdu ba bstan pa'i le'u ste dgu pa'o//// de nas rdo rje sems dpa' yis// 'dus pa'i 'khor la phan gdags phyir/ kun rigs sems kyi rgyal po la// yid kyi dran pas 'di skad gsol/ / mtshan nyid theg pa ji ltar 'khrul// phyi nang gsang sngags sgrib pa gang// thabs med yon tan ji ltar rdzogs// theg chen kun dang mi 'dra gang// rdzogs chen rang gzhung dbye ba dang/ / lam dang 'bras bu'i khyad par gyis// theg pa gzhan sun ji ltar gdon// kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa// 'gro drug sems can thams cad la/ / phung po lnga yis kun khyab ste// spyi dang rang gi mtshan nyid ni// so so'i dbye ba ngas bshad kyis// dang po spyi yi mtshan nyid kyis// phung po lnga ru 'dod pa'i gzhung// sems tsam theg chen pa na re/ / phung po lnga la ma gtogs pa'i// chos ni gzhan nas yod min phyir// phung po lnga ni yang dag yod// da yang 'dus pa'i snying po nyon// rgyu yi phung po lnga rnams kyang// lhar ni ma shes dad pa yis// sa dang pha rol phyin pa yi/ / lam la rim gyis bgrod byas nas// rnam par mi rtog ting 'dzin gyis// sgrib pa rnam pa gnyis sbyang ste// thabs dang shes rab gnyis ldan ni// rang gi don dam nges pa yin/ / 'bras bu thob pa'i dus na ni// sku gsum ye shes bzhi ru 'dod// da yang rdo rje sems dpa' nyon// phung po lnga ru 'dod pa de// yang dag don dam ma yin te// du mar snang yang rkyen gyis bskyed// gnyen pos bcos shing bsgyur yod phyir/ / kun rdzob sgyu ma tsam yod par// yang dag don du 'dod pa 'khrul// mi dang tho yor thag sbrul bzhin// 'khrul pa yin par the tshom med// da yang rdo rje sems dpa' nyon// phung po lnga yi dbye ba dang/ / mtshan nyid so sor tha dad pa'i// sems tsam gzhung du zhib bstan gyis// nges don skabs su ngas ma bshad// rdzogs pa chen po nges don 'dus pa las/ sems tsam sun 'don pa bstan pa'i le'u ste bcu pa'o/ /// de nas 'dus pa'i 'khor rnams la// kun bzang ston pas bka' stsal pa// gsang sngags phyi nang 'dod pa'i gzhung// phung po khams dang skye mched rnams// sangs rgyas yin par blos bsgyur nas/ / ye shes sems dpa' mchod la sogs// tshogs gnyis bsod nams bskyed nas ni// chos nyid sgrib pa bral dus na// 'bras bu 'byung bar nges pa ni// sku gsum ye shes lngar 'dod pas/ / rang rig chos sku nges don bsgribs// da yang rdo rje sems dpa' nyon// a nu yo ga'i 'dod pa ni// phung po lnga sogs rtog tshogs kun// ma bskyed rdzogs par 'dod pa de// 'bras bu ye shes lnga dang ni/ / sku lnga lhun grub 'dod pas bsgribs// yang dag 'dus pa'i snying po nyon// rang bzhin lhun grub sangs rgyas ni// dus gsum dag tu mi 'gyur cing// gnyen pos bcos shing bsgyur du med// thabs ni gang la'ang mi brten phyir/ / rang byung kun tu bzang po bya// da yang 'khor gyi snying po nyon// phung po rnam pa lnga las kyang// sku lnga ye shes lnga ru 'dod// phung po gcig las med pa la// 'bras bu tha dad 'byung ba yis/ / gnas 'gyur du ni sangs rgyas nas// rigs lnga'i yon tan rdzogs 'dod pas// shin tu mi 'thad 'gal ba'i phyir// ma rig rmongs pas rang la bsgribs// de don dgongs shing bsgrib pa ni// rgyud gzhan du ni zhib bstan phyir/ / nges don skabs su ngas ma bshad// da yang rdo rje sems dpa' nyon// ming gi rnam grangs du bstan yang// don gyi ngo bo gcig tu 'dus// rtsal shugs tshul du gnyis su snang// don la dgos med tshig dang bral/ / de phyir byis pa'i sgrin tshig 'dra// phung po khams dang skye mched kun// sems su byas shing blo yis bcos// de phyir yang dag phung po min// don dam chos la smos ci dgos// de phyir ma rig rmongs pa kun/ / gnas 'gyur sangs rgyas 'dod pas phung// gtan du 'khyams pa snying re rje// rdzogs pa chen po nges don 'dus pa las/ gsang sngags phyi nang gi 'dod gzhung sun 'don pa bstan pa'i le'u ste bcu gcig pa'o/ /// de nas 'dus pa'i 'khor rnams la// kun rig ston pas bka' stsal pa// mu stegs chad 'drar bskur btab kyang// nges don snying po ma mthong phyir// gtan tshigs sgro skur skyon bkal kyang/ / don dang mthun par mi 'gyur ro// da yang rdo rje sems dpa' nyon// theg pa 'og ma'i chos kun bzhin// shes rab thabs la brten dgos na// byas pa yin phyir gnas lugs min/ / sku dang ye shes 'byung mi srid// de phyir thabs la rag lus med// rang byung snying po chos sku ni// nyi ma dang ni 'od bzhin du// shes rab chos sku gcig pu la// sku dang ye shes kun ka rdzogs// da yang 'dus pa'i snying po nyon/ / nges don bka' yis drang don kun// sun bton sgro 'dogs chod pa yin// nges don bka' la sun 'don med// de phyir drang don bka' 'di gol// nges don yang ti'i gzhung gis ni/ / dngos su snang yang 'byung ba med// don dam rang bzhin ngo bor gnas// don du bya ba ma dmigs kyang// rang byung yon tan thugs la rdzogs// chu zla'i dkyil 'khor lta bur snang// rang byung lhun gyis grub pa yis/ / rang byung ngang la shugs kyis 'byung// da yang rdo rje sems dpa' nyon// phung po'i dbye ba 'dus lugs kyang// thun mong theg par sgo bstun phyir// kun dang mi mthun bstan pa yang// drang don yin phyir yang dag min/ / yang dag nges don yang ti ni// dper na shing thog smin pa la// 'bras bu shugs kyis 'byung ba ltar// chos sku sgrib pa med pa la// sku gsum ye shes lnga rnams kyang// ma btsal rang bzhin lhun gyis rdzogs/ / rigs lnga'i sangs rgyas don gyi tshang// thams cad mkhyen pa'i ye shes kun// ma lus thogs pa med par mkhyen// rdzogs pa chen po nges don 'dus pa las thabs la ma brten par yon tan thams cad rang la rdzogs par bstan pa'i le'u ste bcu gnyis pa'o/ /// de nas 'dus pa'i 'khor rnams kyis// kun rig sems kyi rgyal po la// theg pa gzhan dang sgo bstun phyir// phung po rgyu 'bras don zhus pa/ / phung po rnam pa lnga po de// yang dag yod dang byin rlabs su// rtag chad bral dang ngo bo gnas// kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa/ / rnam shes phung po yang dag yod// phung po bzhi ni byin rlabs byung// rtag chad bral ba'i rnam shes ni// kun gzhi rang gis ngo bo yin// rtag chad ngo bor gnas pa ni// phung po gzhan dang tshogs bdun yin/ / da yang 'dus pa'i snying po nyon// de yi 'bras bu sku lnga dang// ye shes lnga rnams yod tshul ni// 'dus ma byas kyi nam mkha' bzhin// dus gsum 'du 'bral med par ni// chos sku ye shes yang dag yod/ / sku dang ye shes gzhan dag ni// byin gyis brlabs las 'byung ba ste// gza' skar rgya mtsho ji bzhin du// rtsol du med par shugs las 'byung// chos sku me long lta bu ni// rtag chad gnyis dang bral bar gnas/ / ngo bo rang bzhin lhun gyis grub// de phyir dus gsum 'pho 'gyur med// sku dang ye shes gzhan dag ni// rtag chad gnyis kyi ngo bor gnas/ theg pa gzhan du zhib bstan gyis// nges don skabs su ngas ma bshad/ / rdzogs pa chen po nges don 'dus pa las// theg pa spyi dang rang gi 'gal bar bstan pa'i le'u ste bcu gsum pa'o//// de nas 'dus pa'i 'khor rnams la// yang ti rang gzhung bka' stsal pa/ / rang byung ye shes chos sku la// me long lta bu'i ye shes kyang// yang dag don du mi 'dod phyir// ye shes gzhan la smos ci dgos// da yang rdo rje sems dpa' nyon// rang byung ye shes chen po ni/ / dus gsum dag tu mi 'gyur la// me long lta bu'i ye shes kyang// thog ma med kyang tha ma yod// de phyir rkyen las byung ba yin// khams gsum 'khor ba'i dus tsam na// kun gzhi rnam par shes pa la/ / gnyen pos bskyed pa'i gnas 'gyur gyi// ye shes bya ba'i ming yang med// nges don yang ti'i gzhung gis ni// khams gsum 'khor ba'i dus na yang// rang byung ngo bo nyid kyi sku// chos sku khyab pa ye gnas phyir/ / sangs rgyas 'bras bu thob dus na// ye shes chos kyi sku ni gnas// de phyir don dam chos sku la// chos ni gzhan na yod mi srid// da yang rdo rje sems dpa' nyon// 'o na khyod kyi 'dod pa de// sems can las ni sangs rgyas pas/ / de nyid 'gyur ba ma yin nam// nges don 'gyur ba ma yin te// ma rtogs bag chags bcas pa dang// rtogs pa bag chags bral ba'i phyir// khyad par tha dad snang gyur kyang// don la rgyu 'bras rim gyis med/ / ngo bo gzhi yi chos sku dang// rtogs pa ye shes chos sku gnyis// ngo bo'i gzhi la tha dad med// nyi ma rang gi ngo bo la// mun grib grang ba gang yang med// glo bur sprin gyis bsgribs tsam na/ / nyi 'od med pa ma yin te// ngo bo 'phel 'grib med pa ltar// rtogs ma rtogs pa'i khyad par las// sems can sangs rgyas gcig pa'i phyir// gzhi la dus gsum 'gyur med yin// da yang rdo rje sems dpa' nyon/ / lung ldan bstan pas thams cad mkhyen// de dus 'bras bu sangs rgyas phyir// ngo bo dag la 'phel 'grib med// skye 'gag med par rgyun du gnas// sems can dus kyi chos sku las// de las 'phel ba rdul tsam med/ / de phyir yang dag ngas bshad nyon// de yang 'dus pa'i snying po nyon// 'o na dus gsum mi 'gyur cing// thams cad chos skur 'dod pa de// lung rig gnyis dang 'gal ba dang/ / sdud pa'i rtogs par 'gyur ba'i phyir// 'o na rtag dang khyad ci yod// de yang don dang mi 'gal te// thams cad chos skur 'dus pa de// bsdus nas 'dus pa ma yin te// nyi 'od bu ram mngar ba bzhin/ / dus gcig rdzogs pa chos kyi sku// rang bzhin ngang gis gnas pa bzhin// rgyu rkyen tshogs 'dus ma yin pas// lung dang rigs par ci la 'gal// kha dog dbyibs su med pa la// rtag pa'i skyon gyis ci la gos/ / mi 'gyur ye nas gnas pa la// rtag ces zer na rtag dka' bas// chos sku rgyun du ye yod phyir// chad pa'i skyon gyis nga ma gos// dngos po mtshan ma med pa'i phyir// rtag pa ther zug nga la med/ / de phyir skyon med gnyis kar gnas// da yang rdo rje sems dpa' nyon// chos nyid mchog tu gsang ba'i phyir// sgo lnga dag gi spyod yul min// de phyir chos sku brjod las 'das// btags pa'i tha snyad kun dang bral/ / de phyir sems kyi yul las 'das// rang byung rig pa'i ye shes la// tshig gi mtshon pa thams cad nor// rdzogs pa chen po nges don 'dus pa las/ yang ti rang don shan dbye ba bstan pa'i le'u ste bcu bzhi pa'o/ /// de nas kun rig ston pa yis// 'dus pa'i 'khor la bka' stsal pa// nyan thos lam dang 'bras bu'i gzhung// tshe 'di'i snga ma yang snga la// dge sdig las ni gang byas pas// da lta'i lus 'di blangs pa la/ / bde sdug gnyis ka dus 'dir 'byung// phyi ma 'khor bar lhung dogs nas// sdig spang dge ba spyad byas na// 'bras bu lha mi'i go 'phang thob// da yang 'dus pa'i snying po nyon// rgyu rkyen tshogs pa'i dge spyad nas/ / las de'i 'bras bu thob dus ni// gzhan don mthar phyin grub pa las// 'bras bu sangs rgyas thob par du// mtho ris 'bras bu gnas rten bcas// lha dang mi yi them skas la/ / rim par 'dzegs nas sangs rgyas 'byung// da yang 'dus pa'i snying po nyon// khyod ni yang ti rdzogs chen pa// rtogs pa gcig pus chog zer na// rgyu rkyen ma tshogs 'bras bu 'dod// stong pa nyid kyis mtha' ru lhung/ / lung rigs gnyis dang shin tu 'gal// de bas dge ba tshogs par spyad// 'bras bu lha dang mi yi ni// 'bras bu thob par bya ba la// rang sems rtogs pas mi chog ste// bsod nams tshogs ni bsags nas kyang/ / mya ngan 'das pa'i mtha' brten te// ting 'dzin rtse gcig bsgom gyur na// 'bras bu thams cad mkhyen pa yi// ye shes thob par 'gyur ba la// khyod ni yang ti rdzogs chen pa// 'khor ba las ni thar gyur nas/ / mya ngan 'das pa'i mtha' ru blta// lam de'i 'bras bus sangs mi rgya// de bas 'bras bu bla med pa'i// byang chub thob par bya ba la// rgyu ni sa dang pha rol phyin// lam la rim gyis bgrod gyur na/ / gzhan don 'bras bu phun sum tshogs// gzugs sku rnam gnyis 'thob par 'gyur// shes rab mi rtog rtse gcig tu// ma yengs don la bsgom gyur na// bdag don chos sku 'grub par gyur/ / da yang 'dus pa'i snying po nyon// 'bras bu bdag dang gzhan don gyis// phun sum tshogs pa thob pa ni// 'di las thabs chen nges pa'i lam// chos ni gzhan la yod do zer// de dag dbye ba'i tshogs bsags thabs/ / snying rje chen pos gzhir bzung nas// theg pa gzhan du zhib bstan phyir// nges don skabs su ngas ma bshad// da yang rdo rje sems dpa' nyon// gsang sngags phyi nang 'dod pa'i gzhung// lam dang 'bras bu'i khyad par ni/ / thabs dang shes rab zung 'brel nas// bde ba'i yon tan rnyed par 'gyur// 'bras bu thams cad mkhyen pa yi// ye shes thob par bya ba la// thabs dang shes rab 'dzom pa dgos/ / de phyir thabs ni gang zhe na// phung po khams dang skye mched kun// lha dang lha mor gnas 'gyur bar// rim gyis bskyed dam ma bskyed rdzogs// cho ga gsum mam bdun gyis ni// bskyed cing bsgyur byas ye shes sems/ / spyan drangs bstim dang mchod la sogs// gzhung dang ldan par byas gyur pas// mthar phyin 'bras bu thob dus na// gzugs sku rnam gnyis 'byung nas kyang// byang chub sems dpa' man chad nas/ / sems can dmyal ba yan chad kyis// 'gro don mthar phyin grub pa la// stong nyid ting 'dzin bag chags sbyangs// chos sku thams cad mkhyen pa yi// ye shes bde ldan thob par 'gyur// da yang rdo rje sems dpa' nyon/ / 'di las lhag pa'i nges don chos// rdzogs chen yang ti khyed la med// de phyir thabs la brten nas ni// shes rab lta bas thag bcad de// 'bras bu nges par 'byung bar 'dod// rdzogs pa chen po nges don 'dus pa las/ sngags dang mtshan nyid kyi lam dang 'bras bu dbye ba'i le'u ste bco lnga pa'o//// de nas 'dus pa'i tshogs rnams la// kun rig ston pas bka' stsal pa// theg brgyad lam gyi gol sa ni/ / khyed cag blo dman ma rig pas// thabs dang shes rab 'brel dgos zer// 'khrul pa brtas pa'i rtog pa yin// da yang 'dus pa'i snying po nyon// dper na mar 'dod pa la ni// chu bsrubs pas ni mar med ltar/ / thabs kyi mtshan ma dngos su spyad// zhen pa'i sems kyis byang chub 'dod// dper na nyi ma'i snying po la// sprin ni dkar nag gnyis kas sgrib// de bzhin thabs la brten pa yi// gang zag kun gyis dngos por bzung/ / de phyir lam gyi gegs su gsungs// da yang rdo rje sems dpa' nyon// dper na skyes bu mi rnams kyis// sngags med pa yi dug zos na// a shu ka yi rkyen yin phyir/ / che chung gang zos gnyis ka 'chi// nges pa'i lung ldan don med phyir// thabs ni che chung gnyis kas bsgribs// rtsol ba byas pas thams cad gol// de phyir rang rig chos sku ni// sems kyi gzib na ngos zin na/ / thabs ni gang la'ang brten pa med// de phyir man ngag snying po'i chos// da yang 'dus pa'i snying po nyon// khyed cag theg pa 'og ma pa// mtshan ma dngos su spyad sgo nas// 'bras bu thams cad mkhyen pa yi/ / ye shes thob par 'dod pa ni// shin tu gti mug smad pa'i gnas// kun brtags bsgom pa'i chos pa kun// lam gyi gegs ni thabs yin phyir// gol sa yin par kun nas bshad// de phyir thabs la brten mi dgos/ / da yang 'dus pa'i snying po nyon// sangs rgyas nyid du 'gro ba yi// nges pa'i lam ni gang yin phyir// thog mar blta ba'i gdengs dang ni// ting 'dzin spyod lam dus gcig tu// rang byung snying po'i don rtogs phyir/ / brjod pa'i tha snyad kun dang bral// thig le nyag gcig chos kyi sku// shes dang sangs rgyas dus mnyam phyir// de las lhag pas chos gzhan med// da yang rdo rje sems dpa' nyon// khyed ni theg pa 'og ma pa/ / bye ma las ni mar btsir bzhin// bem po 'byung ba rnam bzhi las// sangs rgyas 'dod pa'i snying rul kun// bskal par bsgrub kyang 'grub mi srid// bem po rang yang sems yin na/ / yul la 'pho 'gyur yod pa'i phyir// sems la skye shi yod par 'gyur// de phyir rang byung ye shes min// rdzogs chen las ni ji ltar 'dod// yang ti don dam chen po ni// khyung chen nam mkhar lding ba bzhin/ / dran pa tsam gyis chos skur gsal// de tsam nyid nas btsal mi dgos// de phyir ma bsgrod pa yi lam// dper na nor bu rin chen bzhin// rtogs pa tsam gyis chog pa'i phyir// bdag gzhan don ni lhun gyis grub/ / de phyir nges don ya mtshan che// da yang rdo rje sems dpa' nyon// khyed cag theg pa 'og ma pa// dper na til la mar yod kyang// ma btsir bar du mar mi 'byung// de bzhin rang la yod mod kyang/ / ma bstan bar du shes mi srid// bskal pa 'bum phrag brgya yi bar// 'dus byas chos spyod byas gyur kyang// 'bras bu ngas rgyas 'byung ba med// da yang 'dus pa'i snying po nyon// de dag shes byed lam mang yang/ / rang la yod pa ma shes na// gzhan la tshol ba rmongs pa'i chos// de phyir tshol med don 'di gces// rdzogs pa chen po nges don 'dus pa las/ theg pa gzhan sun 'don pa'i le'u ste bcu drug pa'o/ /// de nas rdo rje sems dpa' yis// 'dus pa'i 'khor la phan gdags phyir// kun rig sems kyi rgyal po la// bden pa'i tshig gis 'di skad gsol// ma rig ye shes dbye ba gang/ / yul sems gzhi la gcig mi gcig/ rgyu 'bras don gyi dbye ba gang// bsgom du yod med ji ltar yin// rtogs ma rtogs kyi khyad par gang// kun rig rgyal pos bshad du gsol// de skad zhus pa'i don gsan nas/ / 'dus pa'i 'khor la bka' stsal pa// sems can kun la gnas pa'i don// ma rig ye shes khyad par ni// nga yi bshad kyis da nyon cig/ dang po 'khor 'das bar do la// shes bzhin lung ma bstan du yod/ / de nyid rang du ngo ma shes// de phyir gang gi blo yis 'jug/ de ni gti mug 'khor ba'i gzhi// de la dpyad kyang mi shes pa// gzhi gnas ma rig pa zhes bya// da yang 'dus pa'i snying po nyon// de la yul med 'dzin pa ni/ / bag la nyal ba'i cha phra byung// de phyir rang la rang gis bsgribs// lhan cig skyes pa'i ma rig pa// rgyu yi rkyen zhes de la bya// rgyu de shin tu myur bar ni// de ma thag tu 'dzin pas brtags/ / bag nyal ming la zhen 'dzin cing// de ma thag pa'i rkyen zhes bya// rgyu dang de ma thag pa yi// rkyen gnyis zung du 'dzin pa'i phyir// lhan cig skyes pa'i ma rig yin// da yang 'dus pa'i snying po nyon/ / des bskyed shes pa mngal du 'jug/ ngar 'dzin chags sdang phra mo skye// nang gi bzung ba kun tu brtas// de phyir dmigs pa'i rkyen zhes bya// khong nas phyung nas phyi rol gyi// bag chags yul gyi snang ba la/ / rang gi yid kyi ngan rtog zhugs// yul la chos brgyad kun tu brtags// nga bdag ngan rtog 'dzin bltas zhen// mngon rgyu chags sdang kha tshang phyir// dmigs pa bdag po'i rkyen gnyis tshang// kun brtags ma rig pa zhes bya/ / da yang 'dus pa'i snying po nyon// lhan cig kun brtags gnyis 'dzom pas// kun gzhi'i rnam par shes pa yin// des bskyed tshogs brgyad kha tshang bas// 'khor bar 'khyams zhes de la bya/ / da yang 'dus pa'i snying po nyon// sangs rgyas kun gyi ye shes ni// rang sems ngo bo rtogs las byung// yang na rang byung kun gyi gzhi// shes nas lung ldan nges pa'i don// zung du 'dzom phyir ye shes yin/ / sman dang sman pa 'dzoms pa 'dra// rdzogs pa chen po nges don 'dus pa las/ ma rig pa dang ye shes dbye ba bstan pa'i le'u ste bcu bdun pa'o//// de nas kun rig rgyal po yis// yul sems dbye ba bka' stsal pa/ / snang zhing srid pa'i chos rnams kun// 'khrul sems bag chags brtas pa'i phyir// snang ba zhen pa sna tshogs pa// ngo bo yul du grub pa med// de phyir snang ba log 'khrul yin// da yang 'dus pa'i snying po nyon/ / rang gi sems ni 'khrul pa'i dpe// thag sbrul tho yor mi bzhin du// med la yod 'dzin kun tu brtags// sa chu me rlung 'byung ba bzhi// 'khrul pa'i bag chags brtas pa'i phyir/ / dngos su snang yang don du med// de yul 'di ni gtan med la// rmongs pa kun gyis dam par 'dzin// log pa'i rjes su 'brang bas ltung// spre 'dra'i lung gis bslad pa yin// da yang rdo rje sems dpa' nyon/ / rang rig chos sku ye shes la// ma rig rkyen bzhis ma bskyed pas// kun gzhi med phyir sems kyang med// yul sems gnyis ka gzhi la med// de phyir sems min chos sku la// rang rig ye shes blo ldan pas/ / snang ba med phyir 'dzin pa bral// gsal la 'dzin med mi g.yo ba// sangs rgyas kun gyi dgongs par bshad// da yang rdo rje sems dpa' nyon// rang sems yul du 'dzin pa'i rgyu// 'khor ba'i sa bon ma rig pas/ / rgyu rkyen byas nas sdug bsngal 'byung// de phyir rang 'khrul rmongs pa'i sems// gzung 'dzin bying rgod zhen pa'i rgyu// yul la brten nas chags sdang skye// 'khor ba'i rgyu ni chags sdang gnyis/ / gcig dang mi gcig rtsol ba'i bar// 'khor ba'i mtha' la zad pa med// de phyir rang rig don rtogs nas// sems med yul 'di ci la srid// de bas rang sems snying po 'di// sems kyi yul las 'das pa'i phyir/ / gcig dang mi gcig brjod kyi bar// ma rig blo la yul sems yod// log lta can rnams dam par 'dzin// de phyir sgra dang mtshan ma'i chos// sprel 'dra'i lung gi blos btags nas// yul sems rtsol ba'i chos kun 'byung/ / ngas lung man ngag bstan pa yis// yang dag nges pa'i sangs rgyas la// rang rig chos sku sems dang bral// de phyir yul med rig pa gtso// nga'i lung go bas yul sems brlag/ da yang 'dus pa'i snying po nyon// de yang rtsa ba mdor bsdus na// nyi shar mun grib med pa bzhin// rang byung chos sku'i don rtogs pas// gol sgrib yul sems gzhi nas dag/ de phyir rang byung ye shes sku/ / dus gsum 'pho 'gyur med pa'i phyir// 'khrul med yang dag mngon sangs rgyas// de phyir nges don rtogs pas chog/ rdzogs pa chen po nges don 'dus pa las/ yul sems gzhi la skabs dbye ba bstan pa'i le'u ste bco brgyad pa'o/ /// de nas 'dus pa'i tshogs rnams la// kun rig sems kyi rgyal po yis// rgyu 'bras skabs dbye bka' stsal pa// yang dag nges don snying po la// mdzad spyod 'byung bas ma bslad phyir/ / rgyu dang 'bras bu ngo bo gcig/ rang byung rig pa'i chos nyid ni// dper na nor bu rin chen la// dgos 'dod 'bras bu dus gcig rdzogs// de bzhin chos sku'i nges don la// rtogs pa tsam gyis yon tan rdzogs/ / de yang 'dus pa'i snying po nyon// theg gzhan chos kun rgyu 'bras te// dus gcig ma yin rim gyis tshol// rtsol bsgrub yod phyir 'khor ba'i rgyu// gnas skabs bde thob mthar thug med/ / rgyu 'bras bskyed rim gol bar gsungs// dper na byas pa'i rdzas rnams kun// mi rtag myur du 'jig pa bzhin// rgyu rkyen byas pa'i chos kun nor// 'bras bu mi 'byung chu shing 'dra// da yang 'dus pa'i snying po nyon/ / bden don rtsa ba mdor bsdus na// tak+Sha ka yi rgyan bzhin du// rgyu 'bras mthar phyin gzhi nas rdzogs// de bzhin chos sku'i snying po la// bde ba'i yon tan rang la 'char// rgyu 'bras gcig phyir lhun gyis grub/ / rdzogs pa chen po nges don 'dus pa las/ rgyu 'bras don gyi skabs dbye ba bstan pa'i le'u ste bcu dgu pa'o//// de nas kun rig rgyal po yis// bsgom du yod med skabs dbye ba/ / ched du dgongs te bka' stsal pa// des don ma nor 'phrad 'dod na// ma bsgoms sangs rgyas da lta nyid// rang byung chos sku ye yin la// byang chub snying po bsgom du med// da yang 'dus pa'i snying po nyon/ / de phyir chos nyid gdod nas dag/ kun bzang nga yi yang snying rgyud// ma nor gdams ngag rnam pa lngas// tshegs med rang sems snying po'i don// skal ldan rnams kyis rtogs par gyis// da yang rdo rje sems dpa' nyon/ / sangs rgyas dgong pa ji lta ba// sems can blo yis rtogs pa'i thabs// dpes mi mtshon phyir ma bshad par// gdams ngag bstan pa tsam gyis ni// ma bsgoms da lta nyid du yang// nges don rtogs phyir bsgom med don/ / ma bsgoms 'bral med sangs rgyas thugs/ kun bzang thugs dang mnyam par ni// bde ba'i 'khor lo'i rgyud chen du// bsgom du med par ngas bshad kyis// da yang rdo rje sems dpa' nyon/ / de don gdams ngag skal med la// zhi gnas blo ni ma yengs pa// bsgom du yod pa gnas pa'i thabs// 'khor la bstan gyis yid kyis nyon// bsgom du med la su skrag pa// mtshan nyid dbang gsum rim gyis bstan/ / de don nyams su myong ba la// yid ches gdeng dang ldan par 'byung// de phyir rang sems dgon pa brten// de gnas shes rab shin tu 'phel// nyams ni phyi nang rim gyis 'byung/ / de byung dga' brod sems mi bya// da yang rdo rje sems dpa' nyon// rnam grangs mtshon pa'i tshig rnams las// bzlog ste brjod med rang la bzhag/ tha mal rjes su ma 'brangs pa// bsgom du yod pa'i mchog tu bshad/ / de phyir ma yengs bsgom pa ni// nyid las mi gzhan 'khor rnams kyang// don gyi sgo nas shes par gnang// rig 'dzin sems dpa' rnams kyang ni// ting 'dzin goms pas brtan pa thob/ / 'khor na gnas pa'i dad nyan kyang// mos pa'i lta ba goms par byed// shes rab dman pa'i rnal 'byor pa// gnas dang mi g.yo lhun grub 'dod// de phyir rang sems rtogs par dka'/ / rdzogs pa chen po nges don 'dus pa las/ bsgom du yod med skabs bstan pa'i le'u ste nyi shu pa'o//// de nas 'dus pa'i tshogs rnams la// kun rig rgyal pos bka' stsal pa// ye nas yod pa'i chos kyi sku/ / rtogs ma rtogs kyi khyad dbye ba// legs par nyon la yid kyis zung// rang sems ma rtogs sems can gyis// 'khor ba gang nas gang du 'khrul// ces 'khrul ldog thabs ma shes pas// yod med gzung 'dzin bla dgas la/ / 'khrul pa rnams ni dam par 'dzin// 'khor 'das chos la brtags pas lan// da yang 'dus pa'i snying po nyon// gang la'ang rtog pa ma shes phyir// log lta gang zhig nor ba'i lam/ / gnyis med don la ma reg 'khrul// de phyir gnyis med ma rtogs nas// lus ngag stsol ba sdug bsngal snon// de phyir nges don lung med na// theg dgu shes kyang grol mi srid// da yang rdo rje sems dpa' nyon/ / ye nas yod pa'i chos nyid la// lung ldan nges pa'i don phrad na// rtogs dus da lta'i tshe 'di la// rang sems snying po rtogs par gyis// kun bzang ngang la thog mtha' med// dus gcig chod phyir mngon sangs rgya/ / 'das pa'i sangs rgyas kun gyis kyang// da yod phyir na thog ma yod// skye ba mi len tha ma byung// da ltar ma byon sems dpa' yis// thog mtha' ma chod rtsol bar byed// de phyir rang sems rtogs par dka'/ / sems can kun la smos ci dgos// da yang 'dus pa'i snying po nyon// de phyir nges pa'i lung bstan gyis// 'khrul pa ldog thabs shes pa des// nges don tshig gi gdams ngag ni// bstan pas don rtogs skad cig mar/ / sangs rgyas kun dang dgongs pa mnyam// thog mtha' chod phyir thams cad mkhyen// de phyir nges pa'i rgyud don 'di// rtogs pas chog phyir ya mtshan can// des na tshegs med don chen po/ / chos rnams kun gyi mchog tu bshad// rdzogs pa chen po nges don 'dus pa las/ rtogs ma rtogs kyi khyad par skabs dbye ba bstan pa'i le'u ste nyi shu rtsa gcig pa'o//// de nas kun rig rgyal po la/ / rdo rje sems dpas don zhus pa// lta sgom spyod pa 'bras bu yi// rtsa ba'i mdo ni ji ltar bsdu// kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa/ / dngos med rig pa'i lta ba ni// rang byung sku nyid rgyu yin phyir// lta ba'i nang nas dam pa'i mchog/ de phyir don la rig par blta// da yang rdo rje sems dpa' nyon// shes pa rang gsal lta ba ni// ngo bo dbye ba rnam drug gis/ / rang gi mtshan nyid de yin pas// de nyid lus med chos kyi sku// phyi nang med pa rnam dag dbyings// nyi ma shar nas mun med gsal// rang byung ngo bo rig par shar// de tsam nyid nas da lta'i thugs/ / gsang ba dam pa lta ba'i mchog/ da yang 'dus pa'i snying po nyon// rang byung rig pa'i lta ba la// de la ma nor nges shes te// skyes kyang dam par mi 'dzin phyir// 'di mnyam 'dzin rtog med par gsal/ / yang dag blo la gol sa med// de phyir dngos med 'dzin bral gyis// yang dag lta ba'i dgongs pa 'di// ma nor lung dang mthun gyur na// kun bzang nga dang lta ba mthun// da yang rdo rje sems dpa' nyon/ / gzhi nges pa dang ma nges pa// gar mkhan lag pa ji bzhin du// sna tshogs snang yang gzung du med// de tsam nyid nas gzhi mi 'gyur// de don ma nor rtogs pa na// rang gi mtshan nyid rtogs pa na/ / rang gi mtshan nyid 'gyur ba med// ji skad btags kyang don dang mthun// rang byung nges pa'i lta ba yin// rdzogs pa chen po nges don 'dus pa las/ lta ba nges pa mdor bsdu ba bstan pa'i le'u ste nyi shu rtsa gnyis pa'o/ /// de nas 'dus pa'i 'khor rnams la/ kun rig ston pas yang gsungs pa// rang rig ye shes gsal ba yi// don dang mi 'bral ting 'dzin ni// gsal la mi rtog mi g.yo ba// ngo bo la sogs dbye ba yis/ / brgyad tshan gsum gyi man ngag gis// gnyis gsum bsres pa'i chos nyid ni// ye shes rang byung chen po la// mi rtog ye shes lhun grub na// rtsol bsgrub 'das pa'i byang chub sems/ / gsal tsam nyid nas dmigs pa med// de bzhin nyid du kun rig pas// des khyab gar gnas sangs rgyas yin// da yang 'dus pa'i snying po nyon// nam mkha'i ngang du sprin sangs ltar// nga yi chos sku ngos zin na/ / thog ma med nas bsags pa yi// rnam rtog phung po dpag med pa'i// dngos de chos sku rig pa las// rnam rtog stong pa'i ngang du sangs// 'di shes rang rig sgom pa'i mchog/ chos sku snying po byang chub la/ / mtshon du med par rkyen dang bral// de bzhin nyid du kun rig nas// des khyab chos sku rang gsal 'dis// kun la dbang bsgrub thob pa yin// rdzogs pa chen po nges don 'dus pa las/ nges don sgom pa bsdu ba bstan pa'i le'u ste nyi shu rtsa gsum pa'o/ /// de nas 'dus pa'i 'khor rnams la// kun rig ston pas bka' stsal pa// bya ba med pa'i spyod pa ni// da lta'i lus 'di blangs pa'i tshe/ / spyod pa'i dbye ba rnam drug gis// don rtogs spang blang med pa'i phyir// theg pa kun las khyad par 'phags// de yang rang sems rtogs pa'i gdeng// dus dang rnam pa thams cad du// rang gsal rig pa 'di nyid las/ / de las gzhan du bogs mi 'don// da yang rdo rje sems dpa' nyon// da lta lus ngag yid kyis kyang// gzhan du ma tshol don 'di la// ma yengs rig spyod don dran na// 'khor ba med pa'i mdzad spyod yin/ / gang yang rung ba ci la yang// skyon yon dgags bsgrub med rtogs pas// 'jig rten tha snyad 'dzin pa nub// don gsal brjed ngas chags pa chung// rtsing chos nga rgyal chos mi 'byung/ / de phyir spyod pa'i gdeng du bshad// da yang 'dus pa'i snying po nyon// shes rab blta ba'i gdeng spyod kyis// dug lnga rang grol ye shes kyi// gang du skyes tshe 'di nyid gsal// rang byung rig pa'i gol sa med/ / de phyir rnal 'byor spyod pa ste// 'du shes rtogs pa thabs kyis kyang// ngos zin nges pa'i gdeng ldan phyir// rkyang pa dus mnyam yul snang la// nyi zla gzas zin ji bzhin du// ye shes spyod pa'i mchog tu bstan/ / rdzogs pa chen po nges don 'dus pa las/ spyod pa mdor bsdus pa bstan pa'i le'u ste nyi shu rtsa bzhi pa'o//// de nas kun rig rgyal po yis// 'dus pa'i 'khor la bka' stsal pa// nges pa'i gdeng ldan yid ches pa'i/ / dbye ba rnam pa drug pos ni// phyi ma ma yin dus 'dir ni// ye shes mngon gyur 'bras bu yin// da yang rdo rje sems dpa' nyon// dper na chu dngas rnyog med bzhin// re dogs med pa'i 'bras bu la/ / gol sgrib bya ba'i ming yang med// nyam nga med pa'i gdeng gis zin// zhe 'dod med pa'i nyams zhig 'byung// nyams med rig pa nyams kyi mchog/ de don yid ches 'bras bu'i mchog/ dper na rtsi 'tshal yod pa'i phyir// 'bras bu gser la smos ci dgos// de bzhin nges pa'i gdeng ldan na// 'bras bu sangs rgyas smos ci dgos// nges don byang chub dus 'dir 'grub// da yang 'dus pa'i snying po nyon/ / chos sku gzugs brnyan 'byung ba'i dpe// nyi zla gza' skar rtsol med par// rgya mtshor gzugs brnyan 'char ba ltar// sems can mos pa tha dad par// gzugs sku rnam gnyis dus gcig 'byung/ / rdzogs pa chen po nges don 'dus pa las/ 'bras bu nges par bsdu ba bstan pa'i le'u ste nyi shu rtsa lnga pa'o//// de nas rdo rje sems dpa' yis// 'dus pa'i 'khor gyi don ched du// kun rig sems kyi rgyal po la/ / bden pa'i yid kyis 'di skad gsol// rtsa ba gcig pa'i chos nyid la// 'gro drug sdug bsngal ci las byung// mu stegartag chad ji ltar 'khrul// theg pa'i rim pa gang las byung// mnyam pa'i rgyal pos bshad du gsol/ / de skad zhus pa'i don gsan nas// 'dus pa'i 'khor la bka' stsal pa// 'gro drug sdug bsngal 'byung ba ni// lhan cig ma rig rgyu nyid las/ kun brtags ma rig rkyen byas nas/ / thag pa sbrul du 'dzin pa bzhin// dbang pos yul la der sems pas// le lo snyoms las dman la sbyar// chags sdang lnga la longs spyod pas// de yi rnam smin 'bras bu 'byung// da yang 'dus pa'i snying po nyon/ / dmyal bas rang sems me sogs mthong// yi dwags mi gtsang mthong yul sdang// byol song ngam grog gyen thur snang// mi yis mthong yul bzhi ru snang// lha ma yin gyis go mtshon mthong/ / lha yis rin chen sna bdun mthong// de dag 'gro drug sdug bsngal yin// rdzogs pa chen po nges don 'dus pa las/ 'gro drug sdug bsngal 'byung tshul bstan pa'i le'u ste nyi shu rtsa drug pa'o//// de nas 'dus pa'i 'khor rnams la/ / mu stegs 'khrul tshul bka' stsal pa// yod mthar 'dzin pa'i lta ba ni// 'gyur ba bzhi dang rtag pa lnga// thams cad bdag gis byas par 'dod// rgyu 'bras log pa'i brtul zhugs kyis/ / thar lam mi thob 'khor bar ltung// mar 'dod bye ma btsir ba 'dra// da yang 'dus pa'i snying po nyon// ye med chad pa'i 'dod pa ni// phung pos bsdus pa'i chos rnams kun// rdul phran dag las byung ba'i phyir/ / 'byung ba lnga zhig rang thim nas// me shi thal ba rlung khyer 'dra// da yang 'dus pa'i snying po nyon// gnyis ka gzhir 'dod mu stegs ni// rig byed smra ba'i lta ba ste// gzhi ni nges pa med pa la/ / snang ba gang yang mi 'gog 'dod// gdon gyis zin pa'i smyon pa 'dra// de yi 'bras bu nges pa ni// sems kyi rtsa ba ma shes pas// 'byung chen gtos kyi mun pa bzhin// thugs rje'i nyi zer zhags thag chad/ / dmyal ba'i 'bras bu the tshom med// rdzogs pa chen po nges don 'dus pa las// mu stegs 'khrul tshul bstan pa'i le'u ste nyi shu rtsa bdun pa'o//// de nas 'dus pa'i 'khor rnams la// theg pa'i rim pa bka' stsal pa/ / gzhi ni ngo bo nyid sku ste// mthun dpe me long lta bu la// gzugs brnyan theg pa rim dgu byung// de rnams don gyi dbye ba ni// dang po nyan thos lta ba yang// mdo sde pa dang bye brag gnyis/ / mkhan slob sdom pa'i khyad par gyis// dka' thub lus gdungs bzod pa des// sems kyis lus ngag btson bzung yang// rdul dang shes pa gnyis 'dod pas// glang chen 'dam du bying ba ltar// lus ngag las kyi rtsol ba yis/ / 'bras bu mi thob snying rje'i gnas// da yang 'dus pa'i snying po nyon// bla ma dag la mi brten par// rang sems don la blo sbyangs phyir// rten 'brel phyi nang rtsad bcad nas// stong pa nyid la rten 'cha' ba/ / btsan par mi 'gyur nyams pa'i phyir// nor bus rgyal srid bsgom pa 'dra// da yang 'dus pa'i snying po nyon// chos rnams sems su 'dus nas ni// kun rdzob dang ni don dam du// so sor rtog pa'i shes rab kyis/ / bden pa gnyis su rnam par phye// gcig bor nas ni gcig tshol ba// chu bzhag zla ba ngos 'dzin 'dra// da yang 'dus pa'i snying po nyon// thams cad rtsa ba gcig pa yi/ / rang gi sems kyi snying po'i don// zab la rgya che mi shes pas// bsam du med ngang gang 'jog pa// byis pa de ni blun pa ste// mun pa'i skye mched nyid du 'gyur// rdzogs pa chen po nges don 'dus pa las/ rgyu mtshan nyid kyi lta ba bstan pa'i le'u ste nyi shu rtsa brgyad pa'o/ /// de nas 'dus pa'i 'khor rnams la/ kun rig ston pas bka' stsal pa// chos nyid stong pa'i ngang las ni// dag pa bzhi yi sgor zhugs nas/ / yo byad phyi la gtsor 'dzin cing// kun rdzob lha yi dkyil 'khor du// rgyud dag pa yi ting 'dzin gyis// sku ni gzugs brnyan phyag mtshan dang// bzlas brjod gtsang sbra dus tshigs kyis// rgyu rkyen tshogs pa'i nus mthu yis/ / rigs gsum dkyil 'khor lhar gsal kyang// dngos grub gzhan la re ba yis// khyi rgan 'dab chags bsnyegs pa 'dra// da yang 'dus pa'i snying po nyon// rang sems dbye ba med pa la/ / u pa ya yi theg pa yang// gong 'og lta spyod gnyis 'dzin pa// ne tso mi ltar 'chos pa 'dra// da yang 'dus pa'i snying po nyon// yo ga rnal 'byor sems dpa' yis// phyag rgya bzhi yi sgor zhugs nas// yo byad gtso ru mi 'dzin par/ / don dam skye 'gag med pa la// lha yi dkyil 'khor 'phags pa'i sku// rnam par snang mdzad chen po yi// chos dbyings dag pa'i byin brlabs las// lha dang bdag tu mnyam pa yis/ / dam tshig ye shes lhar gsal kyang// rgyal srid med pa'i blon po 'dra// da yang 'dus pa'i snying po nyon// bla ma'i don med nan brtags kyis// dmigs pa can la sems gtad kyang// rnam par grol bar mi 'gyur te/ / nam mkha' dag la 'dzin pa bzhin// rdzogs pa chen po nges don 'dus pa las/ phyi rgyud kyi theg pa'i lta ba bstan pa'i le'u ste nyi shu rtsa dgu pa'o//// de nas 'dus pa'i 'khor rnams la/ kun rig ston pas bka' stsal pa// 'khor 'das ye nas sangs rgyas la// sems kyi rnam rtog ci skyes kyang// mtshan ma'i dngos por ma grub par// dper na nam mkha'i ser bu 'dra// da yang 'dus pa'i snying po nyon/ / yod med dbus la mi gnas pas// sku gsum ye shes lhun grub kyi// yul sems dbye ba med par 'dod// de phyir bden pa gnyis med gzhi// da yang 'dus pa'i snying po nyon// de don lam gyi rim pa ni/ / thabs dang shes rab bsgor zhugs nas// ting 'dzin gsum gyis lha bsgoms pas// grib ma gzugs su bsgyur ba 'dra// da yang rdo rje sems dpa' nyon// byas pa'i chos rnams ma lus kun// yid dang kun gzhi gnyis 'dus pas/ / kun gzhi mkha' klong rnam dag tu// rnam rtog mtshan ma gang spyod kyang// nam mkha' gza' skar rtsol med bzhin// kun bzang bde chen thabs kyi gtso// kun tu bzang po gnyis med mkhar/ / 'du 'bral med pa chos kyi sku// bde chen gnyis med rig pa'i rtsal// nges pa'i gsang sgo ma shes pas// kun bzang spyod pas don mi rtogs// nyi ma sprin gyis bsgribs pa 'dra/ / da yang 'dus pa'i snying po nyon// sems nyid rtsol ba med pa la// bsam pa'i dbang gis bsgyur byas nas// 'khor ba'i rgya mtshor g.yeng gyur te// mi shes pa la de ltar snang// rdzogs pa chen po nges don 'dus pa las/ / bskyed rdzogs gnyis bstan pa'i le'u ste sum bcu pa'o//// de nas rdo rje sems dpa' yis// 'dus pa'i 'khor la phan don du// kun rig rang byung ston pa la// bden pa'i yid kyis 'di skad gsol/ / spyi yi a ti rdzogs chen ni// chos rnams sems su ji ltar 'dus// sems 'dod lta ba ji ltar gol// rang sems nges don ji ltar min// kun rig ston pas bshad du gsol// de skad zhus pa'i don gsan nas/ / 'dus pa'i 'khor la bka' stsal pa// sems sa chos rnams gcig pa ni// 'khor ba mya ngan 'das pa'i chos// sgyu ma rnam gnyis spyod yul te// rnam rtog ye shes tha dad kyang// sems kyi chos nyid ngang du gcig/ da yang rdo rje sems dpa' nyon// de yang de nyid mtshon pa'i dpe// sprin dang 'ja' tshon khu rlangs dang// 'byung ba'i cho 'phrul sna tshogs la// nam mkha'i ngang du ro gcig bzhin// yul gyi tha dad mtshan ma rnams/ / rang gi sems kyis brtags pa'i phyir// phyi nang chos rnams ma lus kun// rigs rgyud med phyir sems su gcig/ rdzogs pa chen po nges don 'dus pa las/ chos rnams sems su 'dus par bstan pa'i le'u ste so gcig pa'o/ /// de nas 'dus pa'i 'khor rnams la// sems 'dod gol bar bka' stsal pa// sems kyi chos sku bsgribs pa'i phyir// 'khor 'das gnyis kyi bar do na// thog mtha' gcod ni ma shes na/ / skye rgas na 'chi las mi thar// sa mkhan med pa'i tshong pa 'dra// skye 'chi gnyis kyi bar do na// chos skur ngo sprod ma shes na// ma rig mun pa sangs dus med// sgron me med pa'i mun khung 'dra/ / da yang rdo rje sems dpa' nyon// yul sems gnyis kyi bar do na/ gol sa gcod ni ma shes na// nyon mongs nyen las ldog mi srid// dred mo gdos kyis zin pa 'dra// mnyam bzhag rjes thob bar do ru/ / rgyun du 'bral med ma shes na// lta bsgom gnyis kyis rkyen mi thub// chu bran than pas bskams pa 'dra// srid pa dag gi bar do na// sangs rgyas 'byung dus ma shes na// gzugs sku rnam gnyis 'byung mi srid/ / rin chen 'dam khung stor ba 'dra// bdag gzhan rtsod pa'i bar do na// gal mdo tshig gi 'phrang med na// theg pa gzhan las khyad mi thon// g.yul ngor pham pa'i blon po 'dra// da yang 'dus pa'i snying po nyon/ / de dag gdams ngag med pa'i skyon// sems kyi rtsa ba ma rig pas// 'khrul pa sna tshogs 'byung ba'i phyir// 'khor ba'i rtsa ba chags sdang lngas// ngan song gsum du rtag tu 'khor// de phyir ma rig sems kyis 'khrul/ / de yang rdo rje sems dpa' nyon// sems kyi 'dod lugs rnam pa bcus// nan brtags lta ba log par bstan// de phyir snang ba sems su byas// nges don ma shes blo yis bcom/ / yang dag sems med chos ma shes// de phyir lung med rigs pas dpyad// yul sems rig par blo yis bsres// da yang 'dus pa'i snying po nyon// bde gshegs snying po ma mthong bar// lung ldan nges pa'i don chen 'di/ / ma rnyed bar du sangs mi rgya// de phyir chos kun rtsa ba ni// chos sku rang gi sems kyis bsgribs// da yang 'dus pa'i snying po nyon// sems ni don med 'khrul pa'i phyir// chos sku'i gol sa sems yin pas/ / rang byung chos nyid sems dang bral// sems bral rang byung ye shes sku// da yang rdo rje sems dpa' nyon// gang yang rung ba ci la yang// yid kyi sgo lnga'i rjes 'brangs pas// lta bsgom ma yin ma rig sems/ / rigs drug bskyed pa sems yin phyir// ma rig 'khrul pa sems las byung// de phyir sems ni gol bar gsungs// da yang 'dus pa'i snying po nyon// rang byung 'dus pa'i snying po la// tshogs brgyad med phyir sems dang bral/ / sna tshogs sems ni gzhan gyi dbang// rang gi sems zhes de la bya// skyon gyi rtsa ba sems yin pas// de phyir sems kyis sangs mi rgya// sems kyi rgyu rkyen skyes pa'i phyir/ / nges don ma yin 'khrul pa'i blo// de yang 'dus pa'i snying po nyon// nges don a ti'i gol sar bshad// de phyir sems ni gol ba'i chos// dmus long rin chen mi mthong 'dra// rdzogs pa chen po nges don 'dus pa las/ rang sems gol sa yin par bstan pa'i le'u ste so gnyis pa'o//// de nas 'dus pa'i 'khor rnams la// kun rig ston pas bka' stsal pa// sems ni 'khor ba'i rtsa ba ste// yul ni sna tshogs snang ba la/ / sems kyi rtog pa sna tshogs zhen// de phyir sems ni 'khor ba'i rgyu// rtag chad 'dzin pa sems yin pas// lta ba'i gol sa sems las byung// gang dran rang sems 'khrul pa ste// sems las byung ba'i rnam rtog gis/ / chags sdang thams cad bskyed par byed// 'khor 'das re dogs sems kyis byas// de phyir 'khor ba'i rgyur sems gol// da yang 'dus pa'i snying po nyon// sems kyis byas pa rtog pa yis/ / skye ba brgyud pa grangs med pa// sems 'dis byas phyir rang byung min// de phyir sems ni glo bur 'khrul// de ltar chos brgyad dam par zhen// da yang rdo rje sems dpa' nyon// nges don ma mthong glen pa kun/ / sems las ma gtogs chos med zer// de phyir rmongs pa'i blo re nor// glen bsgom mun pa bsgom pas phung// gang dran sems kyi chos 'di log/ yid la byed pa'i lam ngan kun/ / blang dor sems 'di shin tu 'chal// drang don sems su bstan pas phung// 'bad rtsol byas pa'i sems kyis dkrugs// mkhyen du re ba'i sgrim tshig gis// nges don ma nor bka' 'di bslang// da yang 'dus pa'i snying po nyon/ / ma rig rmongs pa'i gang zag kun// chos sku rang yang sems yin zer// de phyir tshig las don ma go// ming las nges don shes pa dkon// de phyir sems kyis byang mi chub// de nyid btsal ba'i mthun dpe ni/ / rjes btsal bas ni glang po rnyed// sems kyi phyogs nas don btsal bas// rang rig rgyal po ye shes rnyed// de rnyed sems kyi 'dzin pa bral// 'dzin bral sems med rang rig sku/ / de don 'bral med byang chub klong// sems bral ting 'dzin rgyun du gnas// da yang 'dus pa'i snying po nyon// sems la sangs rgyas 'dod pa ni// mo gsham bu dang gnyen byed bzhin// snang ba sems yin zer ba de/ / ra gan gser du byed pa 'dra// de bas lung ldan don rnyed nas// rang byung snying po'i don rtogs nas// rang rig sangs nas rang sems brlag/ de phyir chos sku 'gyur ba med// rdzogs pa chen po nges don 'dus pa las/ rang sems nges don min par bstan pa'i le'u ste so gsum pa'o//// de nas 'dus pa'i don ched du// rdo rje sems dpas don zhus pa// snang ba chos dbyings blta ba gang// don gyi 'gyur med gnas lugs ci/ / mtha' 'bral gzhi nges bshad du gsol// de skad zhus pa'i don gsan nas// kun rig ston pas bka' stsal pa// rang byung chos sku gcig gcig la// yon tan thams cad 'byung ba ni/ / dper na nor bu rin chen ltar// de ni lhun grub kun gyi gzhi// da yang rdo rje sems dpa' nyon// 'khor ba'i rgyu ni zhen rtog ste// lung ldan grub mthas blo ma bsgyur// dbang po yul la rtag tu yengs/ / chos brgyad gzung 'dzin dam par zhen// chu bo bzhi yis mi 'jigs bzhin// 'khor bar 'khyam pa'i gtan gzhi yin// da yang rdo rje sems dpa' nyon// phra rags yul ni gnyen pos spong// ris su 'dzin cing dbye ba spong/ / yod med 'chal pas rgyu 'bras spong// blo yis gzhi nyid 'chos pa'i phyir// nyan thos rang rgyal gol bar bshad// da yang 'dus pa'i snying po nyon// chos rnams sems su bsdu ba'i phyir/ / yul sems gnyis med 'dod pa dang// sems nyid rang snang yin 'dod pas// sems nyid stong pa yin blta dang// cis kyang khas mi len pa'i phyir// dbu ma sems tsam blta ba yis/ / sdud pa'i rtog pas gol ba'i phyir// da yang 'dus pa'i snying po nyon// phyi yi 'byung ba rnam lnga ni// gzhan 'byung yin phyir ye shes min// de phyir mi spong gnod mi nus// sems su mi bsdu phan mi thog/ de phyir kho nar zhen med na/ / snang ba'i yul ni cir snang yang// sgro skur mi gdag rang gsal pa// chos kyi dbyings zhes de la bya// rdzogs pa chen po nges don 'dus pa las/ gol med chos kyi dbyings bstan pa'i le'u ste so bzhi pa'o/ /// de nas 'dus pa'i 'khor rnams la// kun rig kun tu bzang po yis// gnas lugs 'gyur med bka' stsal pa// chos sku khyab pa'i phyi nang chos// mtha' dbus med pa thams cad kyi/ / gnas dang gzhi yi rten byed pa// rang byung thig le nyag gcig ste// 'di ni bde gshegs thams cad kyi// thugs kyi dam pa'i dkyil 'khor yin// da yang rdo rje sems dpa' nyon// rang byung snying po 'gyur med la/ / blo yis bcos pas gzhi mi 'gyur// de phyir rkyen gyis bcos su med// ma bcos ye nas kun gyi gzhi// rang byung ngo bo nyid kyi sku// chos rnams kun gyi rtsa ba'i gzhi// dus gsum sangs rgyas kun gyis gsungs/ / de phyir gzhi la 'pho 'gyur med// da yang rdo rje sems dpa' nyon// rang byung lhun gyis grub pa'i phyir// sangs rgyas nyag gcig chos kyi sku// 'di ni 'khor 'das gnyis kyi rgyu// ma rtogs dus na 'khor ba las/ / rtogs na mya ngan 'das zhes bya// gzhi la sangs rgyas sems can med// de phyir gnyis med gcig gi ngang// thams cad de yi ngo bor gnas// da yang 'dus pa'i snying po nyon// 'khor 'das gnyis pas gzhi snga'i phyir/ / blau yis ma bcos 'khor 'das med// bag chags ma brtas 'byung ba med// gang yang med phyir kun gyi rgyu// rang byung rtogs pa'i bcom ldan 'das// sa rnams ma bsgrod ngang gis rdzogs/ / lam la mi brten lam dang bral// med pa ma yin ye shes nyid// rdzogs chen mnyam nyid kun tu khyab// chos rnams kun gyi chos chen po// thams cad ngo bor lhun gyis grub// des bskyed chos rnams thams cad 'byung/ / 'khrul bral rtog med gzhi dang mthun// de phyir lung ldan rkyen gyis ni// blo dngos gcig pa'i dgongs pa la// gzhi shes pa la rtogs zhes bya// da yang 'dus pa'i snying po nyon// chos kyi rgyal po rab sngags phyir/ / 'khor 'das 'byung ba thams cad kyang// rtsol ba med par shugs las 'byung// de phyir kun gyi gzhi 'gyur zhes// kun bzang nyid kyi gsungs pa yin// rdzogs pa chen po nges don 'dus pa las/ gnas lugs 'gyur ba med pa bstan pa'i le'u ste so lnga pa'o//// de nas 'khor gyi tshogs rnams la// kun rig ston pas bka' stsal pa// nang gi sgrib pas bsgrib med don/ / da lta'i chos sku 'di la ni// 'dus ma byas phyir rtag chad med// ye shes rnam pa nyid yin no// da yang 'dus pa'i snying po nyon// kun gzhi mnyam nyid rgyal ba'i thugs// ma lus sems can thams cad la/ / rtag med bdag bral chos skur gnas// dngos med khyab pas nam mkha' 'dra// chad pa ma yin gnyug mar gnas// 'dzin med ye shes ngang gis gsal// dngos por med pa chos sku yod// rang byung nyi ma'i snying po 'dra/ / dbu mar mi gnas ye shes ni// ci yang ma yin nyon mongs sel// mtha' gsum bral ba'i chos nyid ni// mi 'gyur 'joms pas rdo rje 'dra// bla mas don bstan rnal 'byor pas// the tshom med par rang sems rtogs/ / yul dang chos sku ma 'dres pa// ka shi'i ras kyis rin chen 'dra// da yang 'dus pa'i snying po nyon// nges don rtogs par yid ches pa'i// chos sku 'gyur med rang la gsal// de tsam nyid nas gdeng gis zin/ / long ba mig phyed gsal po 'dra// dper na nam mkha'i nyi ma bzhin// ma rig mun pa 'joms pa'i thabs// blta ba gzhi nges don nyid la// ma nor rig pa gcig yin te// 'bras bu lhun grub gcig tu bstan/ / rdzogs pa chen po nges don 'dus pa las// mtha' bral lhun gyis grub pa'i lta ba bstan pa'i le'u ste so drug pa'o//// de nas rdo rje sems dpa' yis// 'khor gyi don du yang zhus pa/ / mtshan ma zil gyis ji ltar mnan// 'gro drug g.yang sa ji ltar bcad// ye shes spyi blugs ji ltar bsgom// kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa/ / mtshan ma zil gyis mnan pa'i phyir// ma rig mun pa lta bu la// rig pa ye shes bstan pa'i thabs// rig pa'i dbang chen bka' stsal pa// de yi dang po dpe bstan pa// bram ze gtsang mas khrus gsol te/ / rgyal srid dag la dbang bskur bzhin// don gyis zin nas rang byung 'char// de don nges par drang thabs kyi// 'dus ma byas kyi nam mkha' la// rang gi tshad dang ldan pa la// sems ni drag tu gtad par bya/ / dper na gyi ling rta 'dul bzhin// rang gi shes pa ma yengs par// drag gzhan bar nas rtsol bas gdon// tshad zin don la gnas par bya// de'ang khams dang sbyar byas la// khams bde thun ni ring bar bya/ / mi bde yun ni thung bar bya// yang na langs la cung zad bcag/ rtags ni lus sems gnyis 'byung ste// lus ni 'dar zhing mchi ma 'byung// sems ni bde la btang dka' ste// ting 'dzin rtsal gyi rtags rnams 'byung/ / rtog pa med par gnas pa ni// bya ba btang ba'i skye bu bzhin// ci yang med pa'i rang bzhin la// ma yengs gsal bar lhug par bzhag/ rgod na nam mkha'i sprin bzhin du/ / byung yang gzhi la gnod med ltar// sems kyi rtsol ba tshad zin na// rtog pas mi bsgrib bcos mi dgos// de yis bsgom nyams bstan pa ni// dmigs pa'i don la sems gtad kyang// shes pa gtad du mi chud par/ / yul la mi rtog bde bar gnas// zhen pa'i rtog pa skye na yang// ba mo la ni nyi shar bzhin// rjes su mi 'brang lhun gyis 'gro// de tshe zhe la yid ches 'byung// de dus nyid du rang mnyam ni/ / snang med 'khrul pa log pa tsam// snang bcas don zin de nyid nyams// de nyid goms pas nyams su bde// rdzogs pa chen po nges don 'dus pa las/ nam mkha' mtshon pa nyid la rig pa rtsal gyi dbang bskur ba'i le'u ste so bdun pa'o/ /// de nas 'dus pa'i tshogs rnams la// 'gro drug g.yang sa bcad pa'i phyir// rtsa ba sems las 'das pa yi// ye shes ngos bzung bka' stsal pa// kun gzhi gzhi cha ngo bo la/ / chos sku ngos bzung mthun dpe ni// rtsa chu brtags nas ngos zin pa// sman pa mkhas pa ji bzhin dang// nor bu chu 'dangs dpe bzhin no// byang chub sems kyi rig pa'i don// snga ma 'phro ba yid yin te/ / phyi ma skye ba nyon mongs yin// sgo lngar skye ba rtog pa ste// dmigs 'dzin med par ngang gi gsal// gnyug mar gnas pas 'phel 'grib med// ye shes zang thal nyid yin te// rang gi ngo bo chos kyi sku/ / shes pa rtsol med drang por 'jug/ dper na thi bya tshang 'jug bzhin// rang gi ngo bo chos sku la// bsgom du med pa'i dgongs pa bya// de don rtags ni dngas zhing bde// shes pa mi 'gyur bkri mi 'dod/ / chu las mi 'da' nya bzhin du// don las mi 'da' chos nyid rtags// de rtags ldan pa'i rnal 'byor pas// rgyal pos mnga' byas btsun mo bzhin// snga phyi gnyis po skyes pa'i tshe// de rjes mi gcod chos sku ste/ / dper na rkun po tshor ma thag/ ma bskrad rang bzhin dengs pa ltar// rang rgyud rtsol ba med pa la// mi g.yo mnyam pa'i don la bzhag/ de don rtogs pa'i rnal 'byor nyams// shing bal lta bur lus yang zhing/ / phyi nang 'byung 'jug dbugs rnams snyoms// chos nyid bde chen gsang ba'i nyams// rdzogs pa chen po nges don 'dus pa las/ sems kyi sems nyid la rig pa rtsal gyi dbang bskur ba'i le'u ste so brgyad pa'o/ /// de nas kun rig ston pa yis// ye shes spyi blugs bstan pa'i phyir// rang byung chos sku gsal ba yi// ye shes spyi blugs bka' stsal pa// ye shes chen po'i mthun dpe ni// rang byung ngo bo nyid khyab phyir/ / mtha' dbus med pas nam mkha' 'dra// de don rang byung ye shes la// snang srid bsal ba sgo lnga'i yul// rtog pa gsal ba chos kyi sku// 'dzin pa med par lhun gyis grub// khyung chen nam mkhar ldings pa'i tshe/ / 'phur rlabs 'og tu kun chud ltar// nges don rtogs pas sku gsum rdzogs// 'byung 'jug med par gzhag par bya// ji bzhin nyid kyi gnas lugs ni// rnam par mi rtog sa le ba/ / sa le ba la rtog pa med// de ni rang byung ye shes yin// nor bu rin chen yon tan la// dgos 'dod thams cad shugs kyis 'byung// de bzhin ye shes ngos zin na// bying rgod mi 'byung chos nyid gsal/ / dper na dug la sngags btab pas// nad rnams sel cing sman 'gyur ltar// chags sdang la sogs dug rnams la// chos nyid gsal thebs rang sar grol// de rtags sgra thos rmi lam bzang/ / gzugs rnams mthong zhing bskor ba byed// bdud rtsi 'dren cing chos ston pa// bdud kyi cho 'phrul bcwo brgyad 'byung// da yang 'dus pa'i snying po nyon// rtog pa bzang ngan ci skyes kyang// blang dor dga' brod sems mi bya/ / snang ba mi 'gag rang zhir 'gro// 'khyag rom chur log ji bzhin du// dgongs pa ma g.yos dam pa'i rtags// rdzogs pa chen po nges don 'dus pa las/ ye shes spyi blugs kyi chos nyid la rigs pa rtsal gyi dbang bskur ba'i le'u ste so dgu pa'o/ /// de nas kun rig rgyal po la// rdo rje sems dpas don zhus pa// ma bsgoms ye shes ji ltar gsal// rtog pa rang sar ji ltar grol/ / the tshom gegs rnams ji ltar bsal/ kun rig ston pas bshad du gsol// zhus pa'i don ni bka' stsal pa// ma bsgoms don dang mi 'bral la// thig le nyag ma gcig tu rdzogs// kun gzhi gzhi cha chos sku la/ / sna tshogs snang yang 'gyur ba med// de yang rdo rje sems pa nyon// sems nyid bsgom du med pa'i dpe// nam mkha' bsgom du med dang 'dra// de bzhin sems kyis sems bsgom du// chos sku sems kyi yul las 'das/ / stong nyid rig pa'i ye shes la// nges par 'gyur med blta ba'i gzungs// don du mi brjed ting 'dzin la// rang sems rtogs phyir bsgom mi dgos// da yang rdo rje sems dpa' nyon/ / rang byung chos sku'i don zin na// shes pa gtad la bsgom mi dgos// de phyir rang byung nang nas gsal// chos nyid ma bsgoms 'bral ba med// yang dag sangs rgyas dgongs pa la// 'pho 'gyur med phyir 'dus ma byas/ / de rtogs rnal 'byor skal ldan gyis// ma bsgoms chos nyid rang byung shugs// de la rtogs pas bskyod mi byed// da yang rdo rje sems dpa' nyon// da lta'i shes pa 'di nyid la// ma bcos rang gsal chos skur shes/ / de tsam nyid nas zhen med gsal// de phyir gnyen pos bsgom mi dgos// dung nge ma yengs rang lugs la// ma yengs pa zhes btags pa tsam// don la chos sku de nyid yin/ / de phyir ma yengs 'bral ba med// gar gnas shes pa 'di nyid las// gzhan du g.yos pa rdul tsam med// de phyir chos nyid rgyun du gnas// shes pas chog phyir rtsol ba med// da yang 'dus pa'i snying po nyon/ / lung ldan nges pa'i don zin nas// thams cad rang byung nyid kyi don// mkha' ltar khyab cing nyi ltar gsal// gsal tsam nyid nas nub pa med// dngos med kun khyab chos sku bde// med pa ma yin shes shing rig/ rig tsam nyid nas ngang gis stong// stong pa nyid na mtha' dbus med// da yang 'dus pa'i snying po nyon// ye shes lhun grub chen po la// bying rgod zhen 'dzin skyon bral bas// gsal bde stong pa chen po la/ / ngang du bzhag pa ci yang med// mnyam gzhag med pas rjes thob med// thams cad rang byung chen po las// gzhan du g.yo ba rdul tsam med// da yang 'dus pa'i snying po nyon// de ltar rtogs pa'i rnal 'byor pas/ / lam med lam lngar ma bgrod cig/ sa med sa bcur ma sbyor cig/ rten med dmigs pa ma 'cha' zhig/ sgrib med sgrib gnyis ma sbyong zhig/ yul med tshogs gnyis ma gsog cig/ nges don 'di rnyed bsgrub mi dgos/ / rdzogs pa chen po nges don 'dus pa las/ ma bsgoms don dang mi 'bral bar bstan pa'i le'u ste bzhi bcu pa'o//// de nas 'dus pa'i tshogs rnams la/ kun rig chos kyi rgyal po yis/ / rnam rtog rang grol bka' stsal pa// dper na nyi ma'i snying po la// gzhan gyis ma byas rang gsal bzhin// thams cad ye shes chos sku gsal// ma rig mun pa gdod nas sangs// da yang rdo rje sems dpa' nyon/ / dper na rgyal po mthong ba'i tshe// mnyan zhing gus pa'i blo skye bzhin// chos nyid dran pas rtog pa med// rig pa rgyun chags dag tu gnas// da yang 'dus pa'i snying po nyon// dper na nam mkha'i sprin bzhin du/ / rang byung ngang gis gnod med ltar// ma rtogs rang grol 'dzin med phyir// ye shes ngo bo chos skur gsal// da yang 'khor gyi snying po nyon// dper na dgun zla 'bring po la// spang la me mched ji bzhin du/ / ci dran chos skur 'od gsal bas// thams cad ye shes nyid du gsal// da yang 'khor gyi snying po nyon// dper na rin chen gser gling du// sa rdo btsal gyis mi rnyed ltar// gang yang chos nyid rang gsal phyir/ / ting 'dzin dag la 'byung 'jug med// da yang 'dus pa'i snying po nyon// 'khor ba mya ngan 'das pa'i chos// thams cad chos nyid 'gyur ba las// bsgom pa'i tha snyad bral ba'i don// rang rig ye shes nyid du gsal/ / rdzogs pa chen po nges don 'dus pa las/ rnam rtog thams cad rang grol du bstan pa'i le'u ste zhe gcig pa'o//// de nas 'dus pa'i 'khor rnams la// kun rig ston pa kun bzang gis/ / the tshom gal 'gags bka' stsal pa// rtsol ba tshig gi 'phrang chen ni// gzhi nges snang ba ma nges phyir// lung dang man ngag mi 'gal ba'i// gtan tshigs chen por bzhag pa'o// dper na nyi ma'i snying po la/ / mun snang gnyis ka mi 'gal bzhin// gzhi gcig gang yang mi 'gal la// de nyid dus na ngos bzung med// da yang 'dus pa'i snying po nyon// chu bran rgya mtshor gcig pa bzhin// gang dran ye shes chen po la/ / byis pa rnams kyis tha dad bzung// de phyir blo yi snang ba yin// 'byung ba nam mkha' 'dus pa bzhin// chos rnams sems su 'dus pa las// blo bzhag theg pa rim dgu byung// gzhi la chos sku gcig las med/ / da yang rdo rje sems dpa' nyon// yul nyid sems la sdug bsngal 'byung// rang sems yul la bem por 'gyur// gcig na skye shi med par rig/ 'chi 'pho 'ong phyir blo 'phel yin/ / gnyis ka yul sems bsre par 'gyur// thams cad ma lus sems yin na// sems tsam ka ta rim par gol// da yang 'dus pa'i snying po nyon// phar 'gel tshur 'gel sems pa ni// de shes ma 'phan 'khor ba rang/ / de phyir sems rtog rtsis su che// de phyir lung ldan gdams ngag dgos// da yang 'khor gyi snying po nyon// nga yi nges don chos 'di la// bsgom du yod med 'khor ba'i chos// sems can sangs rgyas gcig pa'i phyir/ / rgyu 'bras dbyer med lhun gyis grub// rtogs nas 'bral med ma bsgoms phyir// chos sku rang byung de nyid ni// dus gsum dag tu 'bral med blta// de phyir nges don bsgom mi dgos/ / da yang 'dus pa'i 'khor rnams nyon// phung po sangs rgyas sna tshogs ni// bsgom pas ma phan rnal 'byor 'ching// snang ba bor nas sangs rgyas na// rtog tshogs lha ru ci la yin// de ltar chos sku ma shes na/ / gsang sngags man ngag ci la che// de phyir bstan shes bsgom mi dgos// da yang 'dus pa'i snying po nyon// sangs rgyas sems can 'brel ba yang// med na thugs rjes phan mi nus// yod na sems can ci la 'khor/ / gnas skabs 'brel ba med pa la// mthar thug ci phyir 'brel ba yod// rgyu 'bras tshul ni 'og ma'i chos// de gnyis ltos pa'i rgyu 'bras med// gzhi ma gcig la snang lugs gnyis// don la gnyis ka yang dag med/ / de phyir 'khor 'das ma rig chos// lam pa'i chos ni dgos med phyir// 'khor ba'i rnam rtog ci la yod// ma spangs grol phyir bsgom du med// da yang 'dus pa'i snying po nyon// gzhi nas bsam gtan nyams myong ba/ / yid la nyams su myong ba na// zhi gnas yin phyir lhag mthong med// nyams myong med na gdeng dang bral// de phyir blun po'i spyod yul min// gzhi nyid rtogs na nyams mi dgos/ / de phyir rtogs pa shin tu gces// gang ltar dran pa nyams kyi mchog/ de la 'di shes smra mi shes// de phyir ma bsgoms nga yi nyams// da yang 'dus pa'i snying po nyon// 'khor 'das gnyis pas nga snga'i phyir/ / sangs rgyas kun pas lung 'di snga/ kun tu bzang po 'di rtogs pas// sangs rgyas thams cad phyi nas rgyas// de phyir sangs rgyas ma gsungs chos// sangs rgyas sems can nga las byung// gzhi la 'khor 'das med pa'i phyir/ / sems can tha mal lus srog la// ye shes spyod spang la sogs med// pho tshod blta ba bdud kyis bslus// da yang 'dus pa'i snying po nyon// rang byung ye shes rtsa ba ni// dngos po med la shes pa yod/ / yid snang sems kyi rang bzhin la// nges don bka' dang drang don las// ngo bo gzhi gcig mi 'gal kyang// rnam snang shAka thub zhing khams bzhin// drug gi snang ba tha dad pa// gtan tshigs bzhi yi rang bzhin las/ / snang ba zhen pas gang 'gog pa// lta ba'i yul ni rnam bzhi yis// thams cad blo yi snang ba ste// gang yang ma yin zhen pa 'gog/ de phyir nges don gdams ngag che// de bas rang sems rtogs pa'i thabs/ / kun gzhi gzhi cha ngos zin na// ye shes lhun grub rdzong chen du// rang rig rgyal po ye shes 'phyo// ma rtogs log rtogs dgag pa'i phyir// mdo sde dang ni rgyud sde la// tshad ma bzhi yi gtan tshigs kyi/ / theg pa gong 'og khyad par gyis// ming dang tha snyad bsam yas kyang// zhen pa bzlog pa'i thabs su bshad// rdo rje theg pa 'di las med// da yang rdo rje sems dpa' nyon// snang ba mi 'gog chos dbyings la/ / zhen pa med pas ye shes te/ kun gzhi rang bzhin ma bcos pa// de nyid don dang gang ldan pa// mi yi lus la sangs rgyas yin// rdzogs pa chen po nges don 'dus pa las/ the tshom gegs bsal ba'i le'u ste zhe gnyis pa'o/ /// de nas rdo rje sems dpa' yis// 'dus pa'i 'khor la phan don du// bden pa'i yid kyis 'di skad gsol// nges pa bdun gyis nams blangs pa'i// lta ba sgom pa spyod pa dang/ / dam tshig phrin las 'bras bu dang// rang gis nyams su blangs pa'i thabs// kun rig ston pas bshad du gsol// de skad zhus pa'i don gsan nas/ kun rig ston pas bka' stsal pa/ / gzhi nges lta ba nyams blangs pa'i// sangs rgyas rgyal po chos sku la// 'khor 'das med pa rig pa'i klong// gzhi la 'gyur med blta ba'i gdeng// yul la mi ltos rang byung sku// ye shes nam mkha'i mtha' dang mnyam/ / don la 'gyur med rang byung ste// skyon gyis ma gos lta ba'i gzungs// 'gyur med chos nyid brdal ba'i klong// da yang rdo rje sems dpa' nyon// mi skye mi 'gag lta ba la// bsgoms pas mi rnyed rtogs pas chog/ 'bral med da lta kun bzang thugs// dus dang rnam pa thams cad du// skye shi med pa lta ba'i mchog/ don du ye shes mthar phyin lam// re dogs med phyir ltung mi srid// gdod nas snying po 'gyur med gzhi/ / de nyid rang rig chos sku la// rang rig rang bltas ngos mtshar che// de phyir chos sku sangs rgyas thugs// rdzogs pa chen po nges don 'dus pa las/ gzhi nges pa'i lta ba nyams su blangs pa'i le'u ste zhe gsum pa'o/ /// de nas kun rig ston pa yis// don dang mi 'bral ting 'dzin ni// 'dus pa'i 'khor la bka' stsal pa// chos nyid mi 'gyur ye shes klong// ma bcos ye nas gnas pa ste/ / rgyu rkyen ma bskyed rang byung sku// dngos med rang gsal 'bras bu la// rkyen bral snying pos gzhig tu med// bsam du med pas bsgoms mi dgos// da yang 'dus pa'i snying po nyon// dbyibs dang bral bas byang chub sems/ / kha dog med pas mtshon du med// sems kyi yul las 'das pa yis// skye shi med pas 'gyur ba med// rtag chad med pas 'khor ba bral// mtho dman med pas kun gyi rtse// che chung med pas dmigs dang bral/ kun gzhi med pas chos sku'i klong// yangs dog med pas bzang mo'i mkha'// mtha' dbus med pas kun la khyab// ye shes zang thal phyi nang med// mtshon du med pas tshad dang bral/ / 'dus pa'i snying po da nyon cig/ snang ba med pa'i chos nyid ni// ma bcos ye nas ngang gis gsal// rtsol bsgrub ces kyang btsal du med// rtog pa'i dgongs nyams blang ba ni// ma bcos chos sku dag pa'i klong/ / 'bras bu sangs rgyas de nyid yin// da yang 'dus pa'i snying po nyon// gdod nas 'gyur med ting 'dzin la// rang byung rig pa'i ye shes kyi// ma bcos rang gsal ngang bzhag pas// nyams su blangs pa'i dgongs pa ste/ / de la rnal 'byor gang gnas pa// da lta nyid nas sangs rgyas thugs// rdzogs pa chen po nges don 'dus pa las/ don dang 'bral med kyi dgongs pa bstan pa'i le'u ste zhe bzhi pa'o/ /// de nas 'dus pa'i 'khor rnams la// kun rig ston pas bka' stsal pa// skyon med yon tan kun ldan pas// shes rab thabs kyi spyod pa yis// phyi nang chos rnams rdzogs par ni// nga yis bshad kyis sems dpa' nyon/ / lta sgom nges pa'i don gnas pa'i// rnal 'byor nges pa'i skal ldan de// dad pas kun nas bslangs pa yis// snying rje'i rlan dang ma bral bas// sems bskyed rnam gnyis de la rdzogs/ / gang la'ang mi rtog rang gsal ba'i// chos nyid ngang du rang gnas pas// bying rgod gnyis kyi skyon bral gnas// zhi gnas bde ba de la rdzogs// phyi nang chos rnams ma lus kun// so sor rtogs pa'i shes rab kyis/ / sgyu ma lta bur shes pa'i phyir// dngos med rtogs pas lhag mthong rdzogs// da yang rdo rje sems dpa' nyon// lta ba'i ngang la mnyam bzhag pas// ser sna 'dzin pa'i sems med pas/ / chos dang bdag tu ma mthong phyir// sbyin pa'i pha rol phyin pa rdzogs// nges don rtogs pa'i rnal 'byor pas// lus ngag yid kyi spyod pa yis// mi dge nyes byas mi 'byung bas// tshul khrims pha rol phyin pa rdzogs/ / rang byung rig pa'i rnal 'byor pas// lta ba nges pa'i gdeng zin pas// chos kyi dbyings su kun shong phyir// bzod pa'i pha rol phyin pa rdzogs// nges pa'i don la yid ches nas// rang byung rig pa shes pa yis/ / lta ba'i don la ma yengs pas// brtson 'grus pha rol phyin pa rdzogs// snga phyis ma bslad gnyug ma la// gzhan du 'dzin bral rang byung sku// chos nyid don las mi g.yo phyir// bsam gtan pha rol phyin pa rdzogs/ / thos pa'i shes rab blo sbyang nas// nges pa'i don ni mthar phyin pas// chos rnams lta bas thag chod phyir// shes rab pha rol phyin pa rdzogs// da yang rdo rje sems dpa' nyon// lung ldan nges pa'i gdams ngag gis/ / chos kyi dbyings su shes pa'i phyir// snang ba gang yang mi 'gog pas// thabs kyi pha rol phyin pa rdzogs// sngon nas dge ba'i tshogs bsags pas// bla ma sangs rgyas kun dang phrad/ / mi gnas bla med don rtogs pas// smon lam pha rol phyin pa rdzogs// thog mtha' ma rig sangs pa las// lung bstan rang gi don shar bas// ma rig mun pa kun bcom phyir// stobs kyi pha rol phyin pa rdzogs/ / rang byung ngo bo nyid kyi sku// chos sku'i rtsa ba rab rtogs pas// yon tan ma lus kun 'dus phyir// ye shes pha rol phyin pa rdzaugs// da yang 'dus pa'i snying po nyon// sangs rgyas kun gyi mdzad spyod la/ / tha mal spyod pa'i ming med pas// lus ngag dge ba mi mnyam phyir// tshogs chen ma lus rnam gnyis rdzogs// rdzogs pa chen po nges don 'dus pa las/ chos rnams rdzogs pa'i mdzad spyod bstan pa'i le'u ste zhe lnga pa'o/ /// de nas 'dus pa'i tshogs rnams la// kun rig rgyal pos bka' stsal pa// sems can dus na sangs rgyas spyod// gang yang ma bcos de bzhin nyid// chos sku rtogs nas 'gro don du/ / cir yang snang ba sprul pa'i sku// mdzad pa bcu gnyis mthar phyin pa// thugs rje'i sprul pa'i kun 'dul yang// blo yi 'du shes rdul tsam med// da yang 'dus pa'i snying po nyon// bdag tu rtog pa med pa'i phyir/ / gnyis med don gcig chos kyi sku// mthun 'jug spyod pa rgya mtshor ni// spyod pa sna tshogs ci bder spyod// pad+ma'i skye sa 'dam yin te// de la skyon gyis gos med ltar// chos nyid blang dor med par rtogs/ / ting 'dzin nyams pa rdul tsam med// thun mong ma yin rnal 'byor pas// 'ching grol med phyir gol sa med// da yang 'dus pa'i snying po nyon// de dag rig spyod lta ba'i gzungs/ / rgyun du mi 'bral don mdzad pa// sangs rgyas mdzad spyod dus 'dir 'grub// de phyir rtsol med sangs rgyas yin// rdzogs pa chen po nges don 'dus pa las/ spyod pa 'ching grol med pa nyams su blangs ba bstan pa'i le'u ste zhe drug pa'o/ /// de nas 'dus pa'i tshogs rnams la/ kun rig ston pa kun bzang gis// dam tshig bsrung dang nyams med pa// nges pa'i don du bka' stsal pa// gdeng ldan nges pa'i ye shes kyis/ / bsrung du med pa'i dam tshig ste// ye bsrung chen po'i ngang du bsdam// sdom pa phyi nang dam tshig kyang// gdul bya ji ltar 'dod pa ston// tha snyad tsam du 'dul mod kyang// dam du bca' ba rdul tsam med/ / chos sku thugs kyi mtshan nyid de// de yi ngang dang mi 'bral na// ye bsrung gdeng dang ldan pa'i phyir// dam du bcas kyang skyon med phyir// dngos po med pa nam mkha' 'dra// da yang rdo rje sems dpa' nyon/ / nga yi chos nyid dam tshig ni// ma bcos mkha' la nyi shar 'dra// mun pa med par rang gsal ba// lhangs kyis rtogs na lta ba yin// rang gi shes pa gnyug ma yis// don la ma yengs ting 'dzin la/ / snang ba'i yul la ma zhen pa// gang yang ma bkag spyod pa'i phul// nges don rtogs pa'i chos nyid la// mi 'da' dam tshig bsrung ba ste// bsrung du med pas nyams pa med// de phyir ye shes 'bral med pa'i/ / dbyings nas rig pa rang la shar// sna tshogs bsags pa'i kun gzhi yi// snga phyi grub pa ga la yod// da yang 'dus pa'i snying po nyon// lung ldan nges pa'i don bstan pa'i// sems rtogs ma brjed lta ba la/ / rgyun du 'bral med dam tshig blang// rang byung chos sku chen po la// brtson 'grus ma yengs gus pa'i thabs// lung ldan nges pa'i gdams ngag la// shes rab go cha dad pa'i lam// yid ches gdeng gis 'gyur ba med/ / da yang rdo rje sems dpa' nyon// de nyid goms shing brtan pa'i tshe// shes rig ma nyams gsal ba'i rtags// de ldan chos nyid mngon du rtogs// de phyir dam tshig kun gyi mchog/ de lta'i rnal 'byor gang rung gis/ / spong sdud zhen pa med pa'i phyir// yul ni ma 'gags chos kyi dbyings// bla ma rdo rje slob dpon la// g.yo sgyu med pa'i dam tshig gis// 'gal sems rdul tsam med pa'i phyir// spyod par ma chags khong khro med/ / mched dang lcam dral la sogs pa'i// brtse gdung chos byed mi 'gyod pa// nges don rtogs pa'i ye shes la// rig pa so thub dgon pa'i mchog/ da yang 'dus pa'i snying po nyon/ / dus dang spyod lam thams cad du// rgyun du gsal thebs chos spyod yin/ dam tshig chen po'i chos nyid la// rgyun du mi 'bral lha dran phyir// mtshams med byas kyang nges pa'i don// de ldan nyes pa rdul tsam med/ / rdzogs pa chen po nges don 'dus pa las// dam tshig bsrung nyams med pa'i le'u ste zhe bdun pa'o//// de nas 'dus pa'i 'khor rnams la// kun rig ston pa kun bzang gis// phrin las rdzogs par bka' stsal pa/ / dper na yid bzhin nor bu la// dgos 'dod thams cad 'byung ba bzhin// ye shes rig pa'i dbang thob phyir// phyi nang dbang rnams de la rdzogs// phyogs bcu ye shes lhun grub pas/ / mi rtog ye shes gegs bsal nas// gnod byed mtshams brtol med pa'i phyir// phyi nang mtshams kun de la rdzogs// rang bzhin dag pa'i ngo bo la// 'khor ba'i skyon gyis ma gos phyir// ma rig rnam rtog sgrib med pas/ / don gyi bshags pa de la rdzogs// ye nas rang byung chos sku la// 'khor 'das gzhi la med pa'i phyir// gnyis med don la blo gnas pas// byin chen dbab pa de la rdzogs// dug nyid sbyor shes sman gyi mchog/ dug lnga rang grol ye shes kyis// nyon mongs bdud rtsi chen po la// ye shes byin brlabs de la rdzogs// bag chags brtas pa'i snang ba la// mos pa'i ting 'dzin dbang bsgyur ba/ / 'byung ba lnga yis kun khyab pa// dbang chen rim pa'i phrin las rdzogs// phyogs bzhi rang bzhin lhun grub pas// rin chen lnga las byas pa yi// gzhal yas khang chen phrin las rdzogs// rtog tshogs lha ru gnas bsgyur bas/ / 'khrul snang med par gnas pa'i phyir// rig tshor don gyis lhar gsal bas// ye shes lha rnams de la rdzogs// 'khor 'das gzhi la med pa'i phyir/ kun tu bzang po'i ngo bo las// sangs rgyas sems can gnyis med phyir/ / spyan drangs bstim pa de la rdzogs// ye nas gnas pa'i rang byung de// rang chas yod phyir ma btsal ba'i// chos nyid don la mi 'gyur bas// brtan par bzhugs pa'i phrin las rdzogs/ / gzhi la skyon yon med pa'i phyir// rang byung phyi nang med pas na// bzang ngan blang dor mi byed pas// zil gyis mnan pa'i phrin las rdzogs// yang dag sangs rgyas dgongs pa la// dbyer med gcig tu rdzogs pa yis/ / thams cad 'dren pa chen po ste// nan tan phyag rgya de la rdzogs// ye shes lha yi nga rgyal gyis// lus ngag yid kyi bya ba kun// bsgul bskyod thams cad ye shes rol// phyag rgya'i mchod m missing text missing text missing text missing text missing text missing text missing text missing text missing text missing text missing text missing text missing text missing text issing bzhin snying rje chags/ / zhen pa gang yang med pa'i phyir// de yang 'gag med rol pa yin// gol dang ltung ba med pa'i phyir// chos nyid gzhan dang phrag dog med// de phyir rang byung chen por shar/ / de yang 'gag med rol pa yin// da yang 'dus pa'i snying po nyon// 'byung ba 'dod yon dug lnga yang// thams cad ye shes chos skur shar// kun gzhi rang byung de shes pas// kun la dbang bskur thob pa yin/ / rdzogs pa chen po nges don 'dus pa las/ rol pa 'gag med kyi gtan tshigs bstan pa'i le'u ste re lnga pa'o//// de nas kun rig ston pa yis// 'dus pa'i 'khor la bka' stsal pa/ / mtshan nyid gnyis med gtan tshigs kyi// nges don rtsa ba chos sku la// lung ldan rkyen gyis yid ches bya// sangs rgyas sems can ngo bo la// rang byung yin phyir gnyis su med// da yang rdo rje sems dpa' nyon/ / de nyid rtogs pas 'khor 'das dag/ de phyir mtshan nyid gnyis su med// phyi dang nang dang snod dang bcud// mtho ris ngan song dge dang sdig/ dag dang ma dag gtsang rme dang// yin dang min dang blang dor dang/ / bya dang mi bya skyon yon sogs// tha snyad gnyis su gsungs pa kun// dper na ri bong rwa bzhin du// tshig tu yod la don la med// de phyir mtshan nyid gnyis med pa'i// gtan tshigs chen por bzhag pa yin/ / da yang 'dus pa'i snying po nyon// mtha' dang bral ba'i chos sku 'di// med pa ma yin dran dang tshor// chad pa ma yin rig cing gsal// rtag pa ma yin dngos po med// gnyis su ma song zla bo med/ / gcig tu ma song kun la yod// da yang rdo rje sems dpa' nyon// chos can rang gi mtshan nyid ni// gdod nas gnyis su med pa yi// chos rnams rtsa ba gcig pa'i don// gtan tshigs dag gis yid ches bya/ / gnyis med ces su btags pa ni// 'dres pa'i don gyis ma yin te// gang dang ma 'dres rang byung sku// chad dang gnyis med ma yin te// sangs rgyas snying po chos sku yod/ / de phyir gzhi la 'khor 'das med// gnyis ka med phyir mthar ma rig/ rang byung chos sku nam mkha' 'dra// rdzogs pa chen po nges don 'dus pa las// mtshan nyid gnyis su med pa'i gtan tshigs bstan pa'i le'u ste re drug pa'o/ /// de nas 'dus pa'i 'khor rnams la// kun rig ston pas bka' stsal pa// ngo bo nyid du sngo grol ba// gtan tshigs nges par yid ches don// lus ngag rtsol ba med pa'i phyir/ / rang byung jo la 'ching grol med// de phyir ngo bo nyid du gnas// da yang rdo rje sems dpa' nyon// gzung 'dzin skyon gyis ma gos pas// rnam rtog jo ni rang sar grol// de phyir nges don ye shes klong/ / las kyi dbang du gzhi mi 'gyur// de phyir chos sku rtogs pas grol// de las sogs pa gang yang med// nges pa'i lung ldan yid ches pa'i// nges pa'i gdeng rnyed rnal 'byor pas// mi yi lus ni 'di nyid / sangs rgyas 'bras bu da lta thob// de phyir rang blo ngo bo nyid// dus 'dir rtsol bas btsal du med// 'dzin med gsal bas sgom du med// de phyir yang dag dgongs pa'i gdeng// de dang su ldan rnal 'byor mchog/ da yang 'dus pa'i snying po nyon// byang chub sems ni rnam dag pas// de don rang byung don rtogs pas// sangs rgyas gzhan du bsgrub mi dgos// de phyir lung ldan gdams ngag gces/ / chos nyid dag tu blo grol phyir// nyon mongs dug lnga rang sar grol// de la skyon gyis ma gos te// rang byung lus la ye shes thugs// sems can rang blo 'dzin pa med// de phyir nyams pa rdul tsam med/ / da yang 'dus pa'i snying po nyon// 'jig rten ma lus thams cad kun// bsam gyis mi khyab tshig gyur kyang// nam mkha' tshig par mi 'gyur bzhin// nges don rtogs pa'i rnal 'byor la// lha srin mkha' 'gros dgrar langs kyang/ / gnod pas mi tshugs ji bzhin byed// de phyir lung ldan shin tu gnyan// rdzogs pa chen po nges don 'dus pa las/ rang blo ngo bo nyid du grol ba'i gtan tshigs bstan pa'i le'u ste re bdun pa'o/ /// de nas kun rig ston pa la// 'dus pa'i 'khor gyi don ched du// rdo rje sems dpas 'di skad gsol// nges don gdul bya 'bras bu yi// sku gsum ston pa ji ltar 'byung// de 'khor las can gang la gsungs/ / 'gyur med rgyun gyi dpe don gang// mnyam pa'i rgyal pos bshad du gsol// de skad zhus pa'i don gsan nas// kun rig ston pas bka' stsal pa// sangs rgyas ngo bo sku gsum las/ / chos skur rang byung rig pa de// dus gsum dag tu skye 'gag med// 'gro 'ong med par ye nas gnas// da yang 'dus pa'i snying po nyon// nges don chos sku'i mthun dpe ni// 'dus ma byas pa'i nam mkha' che/ / dngos med kun khyab dus gsum gcig/ mtha' dbus ris su dbye ru med// de don rang byung ngo bo de// tshig tu brjod med rang rig sku// thugs la gsal phyir nges shes pas// de phyir kun bzang chos kyi sku/ / zhing khams chos nyid bde ba'i klong// rang bzhin 'og min byang chub thugs// de las 'gyur ba rdul tsam med// rang byung rig pa rnam par dag/ snying po chos sku thugs sgo na// rgyu 'bras gzhi la med pa'i don/ / chos nyidartsol bral snying po yis// 'khor 'das ma rig lhun rdzogs chos// chos sku ston pa kun bzang gis// dgongs pa'i nges don byin brlabs kyis// phyogs bcu'i nyid las mi gzhan 'khor/ / dus gsum sangs rgyas nyid la bshad// rdzogs pa chen po nges don 'dus pa las/ chos sku'i gdul bya bstan pa'i le'u ste re brgyad pa'o//// de nas 'dus pa'i 'khor rnams la// kun rig rgyal pos bka' g+Nal pa/ / gzha' tshon rnam lnga ma 'dres gsal// de tsam nyid nas dngos med yin// de bzhin rang gi ngo bo yang// skye med chos sku nyid kyi rtsal// rigs lnga sku mdog brgyan pa 'byung// de phyir longs sku'i sangs rgyas kun gzhi chos sku'i gzhi cha la// snga phyi bag chags med par gsal// 'byung lnga'i rol pa sna tshogs kyang// zhen pa med phyir chos nyid dbyings// yang dag nges pa'i 'bras bu rnyed/ / longs spyod rdzogs pa'i sku'i sgo nas// ldem dgongs phyi nang gsang ba'i don// sa bcu'i rig 'dzin sems dpa' la// gsang sngags rang gi ngo bos ston// rdzogs pa chen po nges don 'dus pa las/ longs sku'i 'khor gyi gdul bya bstan pa'i le'u ste re dgu pa'o//// de nas 'dus pa'i tshogs rnams la// kun rig ston pas bka' stsal pa// sprul pa'i sku yi sangs rgyas ni// ji ltar ston phyir sprul pa'i sku/ / 'gro ba'i don phyir gdul bya la// ci rigs par ni don mdzad do// da yang 'dus pa'i snying po nyon// gzhan don sprul sku'i mthun dpe ni// nges med brag cha khyung dang ni// seng ge chu zla gzugs brnyan dang/ / u dum wa ra'i me tog 'dra// sprul sku rang gi ngo bo ni// thub pa drug tu sku sprul te// mi yis shAkya thub par mthong// lha mi rnams kyi ston pa yin// da yang rdo rje sems dpa' nyon// zhing khams gsum kyi gnas 'di yi/ / 'gro drug sems can las dag nas// tshogs gnyis bsag thabs la brten nas// sgrib sbyangs 'bras bu rim gyis 'byung// sprul sku'i gsung gi sgo nas ni// gang la gang 'os drang don du// dge sdig rgyu 'bras gnyis kyi chos/ / sdeb sbyor legs pa'i tshig tu ston// rdzogs pa chen po nges don 'dus pa las/ sprul sku'i 'khor gyi gdul bya bstan pa'i le'u ste bdun cu pa'o//// de nas 'dus pa'i 'khor rnams la/ / kun rig ston pas bka' stsal pa// 'bras bu nges par mthar thug phyir// che ba'i yon tan gtan la dbab// de don legs par ngas bshad nyon// 'khor 'das gnyis kyi gzhi gyur pa// rang byung ngo bo nyid kyi sku/ / de las 'khor 'das thams cad skyes// gzhi la 'khor 'das grub pa med// 'khrul ngor bden gyis don la med// de phyir rang byung kun gyi gzhi// de la bskyed par nus pa med// de yang rdo rje sems dpa' nyon/ / dper na gser rgyu gcig pa la// dbyibs dang gzugs ni tha dad pa// byas pa de dag ming re grags// grags kyang gser gyi ngo bo gcig/ de bzhin 'khor 'das sna tshogs la// blun po rnams kyis tha dad bzung/ / de la spang sdud zhen pa byas// gzhi la ngo bo gcig las med// de yang 'dus pa'i snying po nyon// dper na nor bu rin chen ltar// rnyed pa yod la stor ba med// rang byung ngo bo rtogs pa la/ / ma btsal yon tan thams cad byung// de phyir chos sku nyid kyi rtsal// rtogs pa'i byin rlabs sku gsum byung// chos sku kun bzang nges don la// rtogs pas phyogs phyir ye sangs rgyas// da yang 'dus pa'i snying po nyon/ / da yang 'dus pa'i snying po nyon// thugs kyi sprul pa byung ba ni// rdo rje sems dpa' nyid yin te// snod dang ldan pa'i rig 'dzin la// rgyud lung gnyis kyi nges pa'i chos/ / skye ba gcig tu bsgrub gyur na// rdo rje 'chang gi sa la 'dug/ da yang 'dus pa'i snying po nyon// sman mchog rgyal po chen po ni// lha yi bdud rtsi ma gi tas// shi ba kun bslang sman gyi mchog/ gang la reg pas 'tsho ba ltar/ / yang tig thig le nyag gcig la// nges pa'i lung ldan don bstan na// lus ngag rtsol ba mi dgos phyir// bstan dang sangs rgyas dus mnyam byung// de phyir man ngag shes pas chog/ da yang 'dus pa'i snying po nyon/ / gsung gi sprul pa shAka thub kyis// sems can skye bo las dag la// sde snod rnam pa gsum gyi chos// bskal pa grangs med rnam gsum na// 'bras bu bcu gcig sa gnon 'dod// da yang 'dus pa'i snying po nyon/ / dper na dpag bsam ljon shing las// bsod nams che chung rim pa yis// 'bras bu sna tshogs rab 'bring 'byung// de phyir las dang rkyen las 'byung// de bzhin drang don chos rnams kun/ / gang zag blo yi rim pa la// ci rigs pa yi chos bstan pas// 'bras bu lha dang mi ru skye// da yang 'dus pa'i snying po nyon// drang don chos kyis sangs mi rgya// a mra'i 'bras bu smin mi srid// ma rtogs chos kun ci spyad kyang/ / rnam par grol bar mi 'gyur ro// rdzogs pa chen po nges don 'dus pa las/ rang rig 'bras bu mthar thug pa'i le'u ste don gcig pa'o//// de nas 'dus pa'i 'khor rnams la/ / 'gyur med don gyi dpe don ni// kun rig ston pas bka' stsal pa// chu bo chen po'i dpe bzhi yis// mi 'gyur don chen des mtshon pa// bshad kyang 'khor rnams legs par nyon// chu gzhan skye 'bri yod mod kyi/ / chu bo chen po gang gA la// dbyar skye dgun 'bri med par ni// rgyun mi chad par rtag pa bzhin// rang byung skye med rnal 'byor la// dus dang rnam pa thams cad du// lta ba 'phel 'grib med par ni/ / ye shes chen po rgyun mi chad// da yang 'dus pa'i snying po nyon// chu gzhan mtsho rab yod mod kyang// chu bo chen po pak+Shu la// gting la ring thung med 'bab cing// drag dal med par snyoms pa bzhin// theg gzhan res 'jog yod gyur kyang/ / nges don chos gyi ting 'dzin la// thun mtshams med par rgyun du gnas// de phyir 'byung 'jug med par gsal// da yang 'dus pa'i snying po nyon// chu gzhan 'gyar 'gyur yod mod kyang/ / chu chen nai rany+dza na la// kyag kyog med par dal 'bab cing// drang por 'gyur ba med pa bzhin// theg gzhan jang dor ched byed kyang// nges don yang ti rdzogs chen la// bzang ngan che chung med par mnyam/ / nges don rtogs pa'i 'bras bu ni// gol sgrib lhad med nges pa'i chos// 'gro ba kun la phan pa'i chos// phyi ma ma yin dus 'dir 'byung// da yang rdo rje sems dpa' nyon// chu bo bzhi 'dus rgya / chu bran mang po kun 'dus phyir// rgya mtsho chen por ro gcig kyang// chos sku thig le nyag gcig tu// lta sgom spyod pa 'bras bu 'dus// de phyir rang rig chos sku nyid// de rtsal snang ba chos dbyings la/ / gang yang ma 'gags lhun gyis grub// rdzogs pa chen po nges don 'dus pa las/ 'gyur ba med pa'i dpe don mthar thug bstan pa'i le'u ste don gnyis pa'o//// de nas rdo rje sems dpa' yis/ / 'dus pa'i 'khor la phan gdags phyir/ kun rig chos kyi rgyal po la// nges pa'i dgongs don 'di skad gsol// mtshan nyid sangs rgyas ji ltar bzhed// kri ya sangs rgyas ji ltar 'dod// bskyed rdzogs gnyis kyi sangs rgyas gang/ / yang ti sangs rgyas ji ltar gnas// kun rig ston pas bshad du gsol// de skad zhus pa'i don gsan nas// kun rig ston pas bka' stsal pa// nyan thos rang rgyal mdo sde ni/ / bskal pa grangs medagasum du ni// tshogs ni rnam pa gnyis bsags te// lam lnga rim gyis dgrod byas nas// dka' thub mthar phyin 'bras bur nges// bud med lus bor pho lus thob// bden bzhi spang blang nyan thos kyi/ / sa rnams gnon pa'i 'bras bu ni// dgra bcom chen po sdug bsngal bral// tshangs par spyod pa dge slong tshogs// bde skyid ldan pa sprul sku'i tshul// bya ba byas shing b+hA ra han// zag pa med cing 'khor ba stongs/ / da yang 'dus pa'i snying po nyon// yang ti rdzogs chen la ltos na// 'gro don mi byed thabs dang bral// chos sku ma rtogs shes rab bral// lung ldan nges pa'i don ma mthong// thabs dang shes rab bral pa'i phyir/ / nyan thos rang rgyal nyid du ltung// de phyir nges pa'i sangs rgyas min// da yang rdo rje sems dpa' nyon// byang chub sems dpa'i 'bras bu yang// byang chub mchog tu sems bskyed nas/ / 'gro ba'i don du dka' spyad kyi// thabs kyi pha rol phyin pa bcus// sgrib gnyis sbyang nas tshogs gnyis rdzogs// da yang 'dus pa'i snying po nyon/ kun tu 'od kyi sa la ni// mi lus med par longs sku'i tshul/ / mtshan dang dpe byad thams cad ldan// don dam rang bzhin med pa'i phyir// sangs rgyas che ba'i chos kun mkhyen// gdul bya 'khor gyis longs sku mthong// da yang 'khor gyi snying po nyon// byang chub sems dpa'i sangs rgyas kyang/ / yang ti rdzogs chen la ltos na// nges don snying po ma mthong phyir// gzhi na ma rig yod pas na// rtsol ba byas pas chos sku bsgribs// de phyir yang dag sangs rgyas min// rdzogs pa chen po nges don 'dus pa las/ rgyu mtshan nyid kyi sangs rgyas bstan pa'i le'u ste don gsum pa'o//// de nas kun rig rgyal po yis// 'dus pa'i 'khor la bka' stsal pa// kri ya lha dang lha mo dang// pho mo gnyis kyi tshul du gnas/ / rigs gsum mgon po sangs rgyas pa// bram ze'i tshul du gtsang spyod pas// dag pa'i sangs rgyas 'ba' zhig 'dod// da yang 'dus pa'i snying po nyon// kun kyang longs spyod rdzogs sku / gzugs brnyan chu zla lta bu des// 'gro don smon lam stobs kyis byed// de phyir dag pa'i sangs rgyas 'dod// da yang rdo rje sems dpa' nyon// yo ga rnal 'byor sems dpa' yis// 'bras bu phyag rgya bzhi bsgrubs te/ / 'bras bu stug po bkod pa'i sar// chos kyi dbyings su sangs rgyas 'dod// da yang 'dus pa'i snying po nyon// thabs dang shes rab bde spyod ni// lha dang lha mo kun kyang ni/ / longs spyod rdzogs pa'i cha byad can// sems dpa' sems ma mang po kun// 'jig 'bral med la ye shes lha// chags pa'i tshul gyi bteg pa'i tshul// lag bcangs 'khyud pa tsam gyis kyang// bde ba chos kyi dbyings su smin/ / gsang sngags thabs chen 'bras bu'i mchog/ sangs rgyas sa na 'ja' tshon bzhin// rang bzhin med pa skye shi bral// rnam par snang mdzad la sogs pa'i// sangs rgyas bde skyid kun ldan phyir/ / gzhal yas dkyil 'khor zhing khams rnams// bsam pa tsam gyis rang bzhin 'byung// dper na 'phrul dga'i longs spyod 'dra// da yang 'dus pa'i snying po nyon// de dag kri yog sangs rgyas kyang// yang ti rdzogs chen la ltos na/ / rtsed mo 'dra ste la ta slob// yang dag nges don ma shes pas// re dogs yod phyir lhun grub min// rdzogs pa chen po nges don 'dus pa las/ gsang sngags phyi rgyud kyi sangs rgyas bstan pa'i le'u ste don bzhi pa'o/ /// de nas 'dus pa'i 'khor rnams la// kun rig ston pas bka' stsal pa// rnal 'byor chen po'i sangs rgyas ni// phung po khams dang skye mched sogs// ye nas sangs rgyas yin pa'i phyir/ / dkyil 'khor ma lus rang la rdzogs// da yang rdo rje sems dpa' nyon// de bsgrubs sangs rgyas skye ba 'dis// rdo rje 'chang gi sa non tshe// thabs dang shes rab bde spyod pa// dga' 'dus pho mo'i dpe bzhin du/ / 'khrig pa'i sbyor bas thabs kyis ni// sangs rgyas thams cad skyed par byed// da yang 'dus pa'i snying po nyon// zhi khro'i lha tshogs rgyan dang bcas// 'dod chags 'khrig pa'i tshul du gnas/ / bde skyid sangs rgyas ngo bo la// ye nas lha yi dkyil 'khor nyid// grangs kyis mi langs pho mo kun// 'gro don ma lus dus gcig byed// da yang 'khor gyi snying po nyon// chos rnams rnam rtog dbyer med pas/ / nam mkha' stong 'byung sna tshogs bzhin// skye shi med pa smos ci dgos// dus 'dir 'byung bas khyad par 'phags// de phyir thabs la brten pa'i mis// 'bras bu byang chub chud mi 'dza'// thabs kyi nang na dam pa'i mchog/ da yang rdo rje sems dpa' nyon// rjes su rnal 'byor sangs rgyas ni// ma bskyed rdzogs pa'i ye shes klong// lha yi dkyil 'khor rang byung sku/ kun bzang rol pa thabs kyi yab// kun tu bzang mo shes rab yum/ / rang la rdzogs pas bskyed mi dgos// btsal du med pas skye shi med// 'du 'bral med pa'i sangs rgyas la// kun tu bzang po'i sa zhes gdags// da yang rdo rje sems dpa' nyon// de dag rgyud lung / yang ti rdzogs chen la ltos na// rang byung nges don ma shes pas// ched du byed pa'i rtsol bas bsgribs// re dogs phra mo yod pa'i phyir// nges lung ma shes snang bar 'chol/ / gzugs can sangs rgyas 'dod pa'i phyir// chos sku'i sangs rgyas don la bsgribs// rdzogs pa chen po nges don 'dus pa las/ theg dgu'i rgyud lung gi sangs rgyas bstan pa'i le'u ste don lnga pa'o/ /// de nas 'dus pa'i 'khor rnams la// kun rig ston pas bka' stsal pa// thig le nyag gcig mngon phyung nas// lung bstan nges pa'i don phyir du// rnam smin lus dang bral ma thag/ thog mtha' med pa'i sangs rgyas che/ / skad cig gcig la ma rig sangs// lus med rig pa'i ye shes rgyas// rang byung thugs la skye shi med// thams cad mkhyen pa'i ye shes ldan// nam mkha' nyi ma'i snying po 'dra/ / da yang 'dus pa'i snying po nyon// ye shes lus can sangs rgyas la// sems can med phyir don mi dgos// rang byung rig pa'i chos sku la// rang la yod pa ngo shes phyir// ched du rtsol bas bsgrub mi dgos/ / rang byung rig pa'i chos sku la// dus gsum 'khrugs kyang 'pho 'gyur med// stong gsum zhig kyang nyams mi srid// rang byung chos sku kha mig can// de yi gzugs brnyan gzugs sku gnyis// ma btsal 'byung ba chos kun ston/ / da yang rdo rje sems dpa' nyon// rgyud lung nyan thos yan chad na// 'bras bu gzugs sku 'byung mi srid// yid smon gyis ni sangs rgyas kyang// nges don yang tig sangs rgyas min/ / dus dang rnam pa thams cad kyang// 'dus ma byas pa'i sangs rgyas ni// dngos med rang byung rig pa'i sku// de don chos sku shes pa la// drang ba'i don du gzugs sku 'byung// thabs la mi brten yon tan rdzogs/ / rdzogs pa chen po nges don 'dus pa las/ yang dag par nges don sangs rgya bar bstan pa'i le'u ste don drug pa'o//// de nas rdo rje sems dpa' yis// 'dus pa'i 'khor la phan gdags phyir/ / kun rig ston pa chos rje la// bden pa'i yid kyis 'di skad gsol// rig 'dzin sems dpa'i don ched du// sangs rgyas rtogs pa bshad du gsol// rgyal sras sprul pa'i don ched du// rig 'dzin rtogs pa bshad du gsol/ / mkha' 'gro rnams kyi don ched du// rgyal sras rtogs pa 'dir gsungs shig/ dad nyan rnal 'byor don ched du// mkha' 'gro'i rtogs pa 'dir smros shig/ de skad zhus pa'i don gsan nas/ / kun rig ston pas bka' g+Nal pa// da yang 'dus pa'i 'khor bzhi kun// phyi rabs rnal 'byor don ched du// rang sems chos sku'i don rtogs pas// rang rang thugs la mnga' ba yis// tshig tu mtshon pa 'dir smros shig/ / rdo rje gsang ba'i rin chen snying// dri med grags pa las rab grub// zhi ba bde dang nyi ma'i 'od// nam mkha'i snying po 'bum gzigs rnams// go rim bzhin du rtogs brjod phyir// nges pa'i dgongs / rang sems dngos po med pa la// rig pa stong pa'i ngang la gnas// de phyir rang byung chos kyi sku// de la skyon gyis gos pa med// da ni dgongs don 'dir gsungs pa/ / rang byung rig pa'i ye shes la// dngos po mtshan ma med pa'i phyir// gang la 'du shes med 'jug pa// rtog med gsal ba sgom pa'i mchog/ yang ni dgongs don 'dir gsungs pa// dus gsum skye 'gag med pa'i phyir/ / rang rig chos sku ye shes gsal// lnga phyi da lta med par gnas// de las mi 'da' chos nyid la// de don mi rtog dgongs pa'i mchog/ yang ni dgongs don 'dir gsungs pa// sangs rgyas thugs ni chos kyi sku/ / phung po med phyir rgud pa med// skye shi med pa rang byung sku// de nyid rtogs pa blta ba la// de don yengs med bsgom pa'i mchog/ yang ni dgongs don 'dir gsungs pa// ngo bo ye nas sangs rgyas phyir/ / 'khor 'das med par rnam par dag/ skye shi med pa'i rig pa 'di// dus gsum mi 'gyur dgongs pa yin// yang ni dgongs don 'dir gsungs pa// rgyu rkyen ma skyes 'bras bu la// lung las ma byung ye shes shar/ / sems las ma byung chos sku rtogs// de dang mi 'bral dgongs pa'i mchog/ yang ni dgongs don 'dir gsungs pa// chos nyid ngang las dngos po med// de phyir mtshan ma rang sar grol/ / de phyir thig le nyag gcig la// yengs med 'bras bu sangs rgyas nyid// yang ni dgongs don 'dir gsungs pa// sems kyi yul 'das byang chub thugs// rang la bltas pas ye shes mthong// de don dngos med byang chub sku/ / de las ma yengs nges don mchog/ yang ni dgongs don 'dir gsungs pa// dngos por ma mthong chos skur mthong// bsgom dang mi bsgom tha snyad bral// gang la'ang mi gnas rig par shar/ / de don sangs rgyas dgongs pa yin// yang ni dgongs don 'dir gsungs pa// nges pa'i rang rig ye shes la// gang yang mi bsam dran med de// yid ches gdeng dang ldan pa mchog/ de la 'gyur med chos kyi sku/ / rdzogs pa chen po nges don 'dus pa las/ phyogs bcu'i sangs rgyas kyi rtogs pa brjod pa'i le'u ste don bdun pa'o//// de nas kun bzang spyan jar ni// rig 'dzin rtogs pa brjod pa'i phyir/ / jo gros gtso dang rnam dag snying// dam pa'i yon tan 'od rlabs can// shes rab ja ma rgyal mtshan 'dzin// rnam par grol ba ting 'dzin dbang// chos dbang dang ni bsod nams brtsegs// bdud 'joms dang ni seng ge'i sgra/ / rin chen mthong dang brtse ba can// dbang phyug gtso dang yid dge dang// mthong dga' bden mos gsung brtsegs rnams// rang rang rtogs pa brjod pa'i phyir// nges pa'i gdeng nyams brjod pa ni/ / spangs na rtsol ba'i gol sgrib yin// spang sngang med pa'i don rtogs na// nges don dgongs pa de las med// yang ni gdeng nyams 'dir gsungs pa// gsal la ma yengs chos kyi / ma bsgoms 'bral med ting nge 'dzin// dmigs su med pas nam mkha' 'dra// 'du 'bral med pas rgyun du gnas// yang ni gdeng nyams 'dir gsungs pa// sems la gnyen po med pas ni/ / bsam pa'i yul las 'das pas na// gzhan nas ma 'ongs rgyun mi chad// de nyid rang rig chos skur rtogs// yang ni gdeng nyams 'dir gsungs pa// rang byung rig pa rang shar phyir// ma rig mun pa rtsad nas gcod/ / de la gnyen pos bcos su med// gdod nas rang byung sangs rgyas thugs// yang ni gdeng nyams 'dir gsungs pa// chos nyid ye nas ma bcos pa'i// de nyid nam mkha'i rang bzhin ltar// skye med rang gsal chos nyid la/ / rgyun du 'bral med byang chub klong// yang ni gdeng nyams 'dir gsungs pa// rang byung dag pas pad+ma 'dra// 'khor ba'i skyon gyis ma gos pa// de phyir chos nyid ngang la ni/ / 'bral med byang chub sems su gsal// yang ni gdeng nyams 'dir gsungs pa// zab mo'i ming ni cir btags kyang// dpes kyang mtshon med brjod las 'das// dmigs pa'i yul bral chos kyi sku/ / de las mi 'gyur nyams kyi mchog/ yang ni gdeng nyams 'dir gsungs pa// rang byung chos sku mtha' dbus med// de las ma yengs rtsol bsgrub 'das// mtshon du med pas rkyen mi tshug/ de phyir dus gsum 'bral ba med/ / yang ni gdeng nyams 'dir gsungs pa// snying po chos sku'i rig 'dzin de// lhun gyis grub phyir ye shes klong// de yi ngang la 'khor ba med// de phyir sangs rgyas dgongs pa yin// yang ni gdeng nyams 'dir gsungs pa/ / 'byung bzhi zhig pa'i nam mkha' bzhin// chos nyid snying po rig pa ni// ye shes rang gsal 'gyur ba med// de phyir bsgom med byang chub sku// yang ni gdeng nyams 'dir gsungs pa/ / mtshan ma'i yul med byang chub lam// de las ma btsal rang bzhag na// yang dag don gyi dgongs pa ste// de nyid mi 'bral bsgom pa'i mchog/ yang ni gdeng nyams 'dir gsungs pa// mngon sum mi gnas chos sku la/ / tha dad bral bas ye shes klong// de las mtshon pa'i ming ma rnyed// de las ma g.yos bsgom pa yin// yang ni gdeng nyams 'dir gsungs pa// rang byung ngo bo nyid kyi sku// bsgoms pas rnyed par mi 'gyur te/ / ma bsgoms pas kyang stor bral med// de phyir chos nyid 'bral ba med// yang ni gdeng nyams 'dir gsungs pa// rang byung chos nyid nam mkha' 'dra// de bzhin ting 'dzin spros med gsal/ / de la gnyen pos bcos su med// de phyir 'bral med dgongs pa yin// yang ni gdeng nyams 'dir gsungs pa// yul gyi mtshan ma sna tshogs pa// de tsam nyid nas rang bzhin shes// de phyir sems rtogs chos skur gsal/ / yang ni gdeng nyams 'dir gsungs pa// gang yang ma spangs skyon ma gos// 'gro 'ong med par rgyun du gnas// bying rgod rkyen gyi dbang mi 'gro// de las sgrib med sangs / yang ni gdeng nyams 'dir gsungs pa// ma btsal rang las rnyed pa'i phyir// lhag mthong dran pa blta ba'i gzungs// de phyir mi 'bral bsgom pa'i gdeng// ye nas yod pas stor bral med/ / yang ni gdeng nyams 'dir gsungs pa// bsgom med dmigs dang bral ba'i phyir// phyag rgya bsgyur mi dgos par nges// gsung med rig pa'i dgongs pa yin// ye shes thugs la 'gyur ba med/ / gzhan yang rig 'dzin sems dpa'i tshogs// bsam gyis mi khyab grangs las 'das// rang rang gdeng nyams 'dir gsungs pa// de don nges pa chos skur gcig/ rdzogs pa chen po nges don 'dus pa las/ rig 'dzin sems dpa' rnams kyi rtogs pa brjod pa'i le'u ste don brgyad pa'o//// de nas rgyal sras sprul pa'i tshogs// tshangs pa brgya byin rgyal po bzhi// thag bzang ris dang gang ba bzang/ / mkha' lding rgyal po rta mgo can// zur phud lnga pa nor srungs dang// mgrin bcu dang ni klu rgyal rnams// rang rang rtogs pa brjod pa'i phyir// nges don rtogs pa 'dir gsungs pa// rtsol bsgrub bral ba byang chub thugs/ / re dogs med pas gol sa med// de don ma bral chos nyid la// rgyun du 'bral med ye nas yod// yang ni rtogs don 'dir gsungs pa// snang ba chos dbyings rtog med las// sgro skur bral ba chos kyi dbyings/ / de nyid dus mnyam rang gsal ba// sangs rgyas kun gyi dgongs par go/ yang ni rtogs don 'dir gsungs pa// gol sa med pa'i lta ba la// bying rgod bral ba'i bsgom par gsal/ / phrag dog med pa'i spyod pa de// de nyid ye shes chos nyid klong// yang ni rtogs don 'dir gsungs pa// nor bu chu dngas dpe bzhin du// dran pa tsam gyis ma rig sangs// btsal du med pas ye shes rgyas/ / de dus nyid na gzugs sku 'byung// yang ni rtogs don 'dir gsungs pa// nges don lung la yid ches pas// the tshom med las rang byung gsal// rig pa mi 'gag bde chen klong// de las mi 'gyur dgongs par shes/ / yang ni rtogs don 'dir gsungs pa// yul gyi mtshan ma cir snang yang// yid kyis dgag sgrub med par ni// chos dbyings gdeng ldan nges don la// spang dang sdud pa'i zhen med do// yang ni rtogs don 'dir gsungs pa/ / lung la yid ches dgongs pa med// zab la rgya che dgongs pa gsal// de don rtogs goms 'bras bu la// sangs rgyas nges pa de la bya// yang ni rtogs don 'dir gsungs pa/ / tshe rabs kun tu mthu brtas pas// snga phyi zhen pa'i rtog pa la// ma yengs chos nyid rang gsal ba// de las bsgom pa rdul tsam med// yang ni rtogs don 'dir gsungs pa// rang byung nges don rgyun mi 'chad/ / yang dag ting 'dzin rgyun mi 'chad// de phyir nges shes 'gyur ba med// yang ni rtogs don 'dir gsungs pa// 'khor bas ma bslad ting 'dzin la// ma bsgoms chos nyid da lta'i thugs// bsgom mnyam rjes med par rgyun du gnas// yang ni rtogs don 'dir gsungs pa// rang sems ma bcos rang lugs la// ma bcos rang bzhag bsgom pa ste// brjod du med pa'i nyams myong gsal/ / de don rang sems rtogs pa yin// yang ni rtogs don 'dir gsungs pa// de don chos nyid 'gyur med la// blo yis brtags pa thams cad med// gang yang ma spangs rang byung la/ / de la bsgom du rdul tsam med// rdzogs pa chen po nges don 'dus pa las/ rgyal sras sprul pa'i 'khor gyi rtogs pa brjod pa'i le'u ste don dgu pa'o//// dad nyan 'khor la phan don du// mkha' 'gro sde lnga 'khor dang bcas/ / rang rang rtogs pa brjod pa'i phyir// nges pa'i don du 'dir gsungs pa// gti mug mun pa 'thibs pa la// thog mtha' chod pas ma rig sangs// yul 'di ma bshigs chos kyi dbyings/ / de rnyed rang sems rtogs pa yin// yang ni rtogs don 'dir gsungs pa// zhe sdang kha dog yul la skye// phyi yi gol sa gcod shes na// zhe sdang rang grol rgyal ba'i thugs// de dus nyid na chos kyi sku/ / yang ni rtogs don 'dir gsungs pa// rtogs don bde ba'i ye shes shar// rgyal po ngo bo nyid kyi sku// de don mi 'bral chos skur gsal// de la skyon gyis gnod mi tshugs// yang ni rtogs don 'dir gsungs pa/ / pho mo 'dod chags ci spyad kyang// gol med ye shes rgyun mi 'chad// snga phyir ma song zhen med phyir// bde chen longs spyod chen por bshad// yang ni rtogs don 'dir gsungs pa// lta dman chos la phrag dog kyang/ / gol ba yin phyir nyes med dge/ de phyir byang chub bde ba'i klong// de la skyon gyis gos mi srid// da yang 'dus pa'i snying po nyon// sangs rgyas rig 'dzin spyan snga ru// 'jig rten mkha' 'gros 'di skad gsol/ / dam bcas don las bdag mi 'da'// bka' bzhin bgyi ba'i don ched du// nges don 'dus pa'i don chen 'di// mi nub pa ru bdag gis bsrungs// 'di la 'gal byed sdig can kun/ / myur du bsgral la zhal du rdung// da yang ston pa'i 'khor kun nyon// bdag cag yid kyis dam bcas pa'i// sangs rgyas bstan pa bsrung ba'i phyir// sdig can bsad kyang grol bar nges// rnam smin srog la longs spyod kyis/ / sangs rgyas rig 'dzin rnams kyis kyang// rang sems chos skur byin gyis rlobs// de skad brjod pa'i don gsan nas// kun rig ston pas 'khor rnams la// rtsa ba nges pa'i don 'di gsungs/ / legs so dad ldan 'khor rnams nyon// shes rab sngo yi khyad par las// tshig tu mtshon pa sna tshogs kyang// don la dbyer med ngo bo gcig/ de phyir 'khor rnams chos skur rtogs// sangs rgyas 'bras bu de nyid yin/ / lta ba'i snying po'i don gtad pa// chos kyi rgyal po kun rdzogs 'di// skal ldan 'dus pa rnams kyis kyang// yid la brnag cing bcang bar gyis// da yang 'dus pa'i snying po nyon// nga yis bstan pa'i snying / sangs rgyas kun gyi gsang ba'i chos// rig 'dzin rnams kyi thugs la spos// chos skyong rnams kyis gter ltar srungs// de don nam ngag nges don 'di// log sred zhen chags ma nges la/ / nam yang bstan par ma byed cig/ nyam thos la sogs lta dman la// bstan kyang go bar mi 'gyur la// mi theg khal chen bkal ba bzhin// don ma go bas ngan song ltung// da yang 'dus pa'i 'khor kun nyon/ / de bas rang sems sngon sbyangs pa'i// rnal 'byor dad ldan 'khor rnams la// 'chi ka'i snying po don mtshon nas// nges don rgyud 'di rtogs par gyis// da yang rdo rje sems dpa' nyon// yang gsang nges don khyad par can/ / 'bras bu nges pa'i gdams ngag 'di// bla mar mi gus nga rgyal can// tshul 'chos byed cing slob dpon smod// nor phongs gzhogs slong kha gsags can// g.yo sgyu'i thabs kyis chos 'dod la/ / rgyud kyi snying po'i lta ba ni// nam yang bstan par ma gsungs so// rnyed 'dod rang bzor nges don chos// gal te snying po'i don bstan na// 'phags pa rnams kyang dgrar ldang na// mkha' 'gro dam can smos ci dgos/ / rang gi srog bcad mnar med ltung// da yang 'dus pa'i snying po nyon// nges don 'dus pa'i rgyud chen 'di// mar me shi kha'i 'od bzhin du// bstan pa 'jig pa'i dus dag tu// kun bzang thugs rje'i byin rlabs kyis/ / rnal 'byor skal ldan rnams la 'byung// de tshe nges don 'bras bu 'di// gu lang gser bzhin mi nub tsam// snod ldan 'ga' la bstan pa las// snang dgu rnams kyi spyod yul min// kun kyang nges pa'i don la zhog/ da yang 'dus pa'i snying po nyon// de ltar ma rtogs dman rnams kyis// lam lnga sbyangs shing tshogs bsags kyang// nges don ma shes 'bras bu chung// de bas rang byung snying po 'di/ / lung ldan rnams la rtogs par gyis// de rtogs 'bras bu sangs rgyas 'byung// 'gro ba'i mgon pos 'di skad gsungs// de yang rdo rje sems dpa' nyon// gsang ba'i man ngag rgyud chen 'di// lan gcig dus kyi deng sang na/ / snod ldan kun la chos 'di 'byung// de tshe theg dman sgro skur 'debs// rang gis rang bslus 'khor bar ltung// 'di la mos shing 'dzin pa la// sangs rgyas kun gyis byin gyis rlobs/ / bsod nams mi zad gter dang ldan// phyi ma'i 'bras bu dus 'dir 'byung// kun tu bzang pos de skad bshad// rdzogs pa chen po nges don 'dus pa las/ rgyud bshad cing bzung bar bstan pa'i le'u ste brgyad cu rtsa gcig pa'o/ /// rdzogs pa chen po nges don 'dus pa lta ba thams cad kyi snying po rin po che rnam par bkod pa zhes bya ba rdzogs so//// rgya gar gyi mkhan po bi ma la mi tra dang/ bod kyi lots+tsha ba A tsar+ya dran pa ye shes kyis bsgyur cing zhus te gtan la phab pa'o/

CLOSE WINDOW