T50 buddhābhiṣeka-nāma-stotra sangs rgyas dbang bskur ba zhes bya ba'i bstod pa

བོད་ཡིག

[230a] rgya gar skad du/ shud+d+ha a b+hi She ka nA ma sto traH/ bod skad du / sangs rgyas dbang bskur ba zhes bya ba'i bstod pa/ thams cad mkhyen pa la phyag 'tshal lo// de nas bskal pa grangs med gsum// pha rol phyin rnams rdzogs pa yi// thub pa lha rnams kyi ston pa// mtho ris nas ni mi nang gshegs// nyi ma'i rigs te zla ba yi// sa yi bdag po zas gtsang dang // gtso mo sgyu 'phrul lha mo yi// mngal du nying mtshams sbyor bar mdzad// der ni rin chen khang gnas shing // lha yi mchog rnams bstod byed la// de la gsung ni mthon po yis// dam pa'i chos ni ston par mdzad// lha rnams thal mo sbyar byas te// dus gsum du ni der blta ba// rdul med mu tig phreng ba ni// bai DUr+ya yi snod gnas 'dra// bdud rtsi rab sbyin gzugs can te// de 'os lha mo mdzes par gyur// zla ba shin tu gsal ba'am// mu tig 'o ma'i rgya mtsho 'dra// 'byung ba rnams kyang dbugs 'byin cing // yid la re ba'i don rdzogs mdzad// de ni 'dod la stsol ba ste// 'dod pa thams cad phun tshogs mdzad// skyed mos tshal ni lum+bi nIr// 'jig rten gtso mo sor gyur te / sa bdag dang ni slas rnams dang // mdun na 'don dang lhan cig gnas// der ni mya ngan med pa yi// yal ga la 'jus brtul zhugs gnas// mkha' la lha yi bu mo rnams// zla ba dang ni skar tshogs 'dra// skar ma rgyal la bab pa na// de'i sras rtsib ma'i logs nas ni// 'gro la phan pa mkhyen pa yi// nyi ma shar ba bzhin du byung // mtshan mchog yang dag rdzogs pa yi// gtso bo nyid kyi sku yi 'od// 'dzam bu chu bo'i gser 'dra yis// phyogs rnams rab tu snang bar gyur// brgya byin ma ma'i cha byad can// smin ma bskyod pas zlog pa mdzad// sa la gom bdun bor ba na// gter dang pad+mas brgyan par gyur// bdag gi skye ba tha ma ni// 'di yin yang srid yod min zhes// snyan pa'i gsung ni bsgrags nas kyang // phyogs rnams kun du gzigs par gyur// nyi zla rin chen bum pa las// dro grang chu yi rgyun gnyis ni// [230b] dri ma med pa'i nam mkha' las// de yi dbu la bab bar gyur// bde gshegs 'gro ba'i bla ma ni// rin chen sna tshogs bkram pa yi// seng ge'i gdan ni mthon po la// dgyes pas der ni bzhugs par 'gyur// brgya byin gnas kyi chu bo dang // 'jug ngogs las blangs lha yi chu// gser las byas pa'i bum pa yis// lha rnams kyis ni dbang bskur bstabs// lha yi gos dang phreng ba dang // bstod pa la ni brtson pa yi// tshogs rnams du ma 'dus pa yis// lha yi tshal ni gang bar gyur// rnga sgra rnams dang ca co yis// mkha' dbyings ma lus khyab par gyur// nam mkha' las ni me tog char// rgyun mi 'chad par bab par gyur// man+dAr me tog gcal bkram pas// gnas gtsang ma yi gnas ltar gyur// ga bur tsan+dan phye ma yis// 'jig rten mgon la gtor bar gyur// ri bo rgya mtshor bcas pa dag // gar mkhan gyi ni gos ltar g.yo// bcud rnams sna tshogs 'dzin pa yi// sa dag rnam drug g.yos par gyur// gung ba rnams ni sgra sgrogs shing // dus rnams kun du byung ba yi// shing rnams rang nyid 'dud pa dang // me tog rnams ni 'bor bar gyur// blon po rgan dang mdun na 'don// bkra shis dag ni 'don par byed// sa dang mkha' dang grub pa dang // mi 'am ci dang lhan cig spyod// nags na gnas pa'i lha rnams dang // lha dang grub pa rig 'dzin mi// nang gi slas kyi bud med kyang // rab tu dga' bas gar yang byed// long bas mig dang 'on pas thos// lkugs pa rnams ni sgra gsal dang // nad pa nad las thar ba dag // skad cig der ni thob par gyur// ri dgas bya dang sdig sprul dag // phan tshun 'tshe bar 'dod pa yi// sems can thams cad de yi tshe// rtsod med 'tshe ba med par gyur// de tshe gang yang sdug bsngal dang // nyes spyod byung bar ma gyur to// 'gro ba 'di dag nad med cing // bde zhing lo yar legs par gyur// de tshe kun du'ang mdun du ni// gter rnams der ni byung bar gyur// de tshe srid gsum rgyas par ni// dga' ba zhing bde ba dag tu gyur// [231a] rgyal ba dbang bskur bsod nams gang // bsod nams ldan pa'i sems kyis ni// nyan par byed pa de dag la// phun sum tshogs kun lag mthil gnas// tshe dang nad med dbang phyug dang // dgra zhi rgyas dang rgyal dang grags// rdzogs sangs yon tan sgrogs pa yi// dad pa'i mi yis thob par 'gyur// sangs rgyas dbang bskur ba zhes bya ba'i bstod pa rdzogs so// // lo tsA ba chen po rin chen bzang pos bsgyur cing zhus te gtan la phab pa//