K515 ārya-puṣpakūṭa-nāma-dhāraṇī 'phags pa me tog brtsegs pa zhes bya ba'i gzungs

བོད་ཡིག

[31a] @#// rgya gar skad du/ Ar+ya puSh+pa kU Ta nA ma d+hA ra NI/ bod skad du/ 'phags pa me tog brtsegs pa zhes bya ba'i gzungs/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das mtsho chen po ma dros pa na/ klu'i rgyal po ma dros pa'i khang pa na/ dge slong lnga brgya'i dge slong gi dge 'dun chen po dang thabs cig tu bzhugs te/ [31b] byang chub sems dpa'i tshogs chen po 'jig rten gyi khams gzhan dang gzhan dag nas 'dus pa/ byang chub sems dpa' stong du tshang ba thams cad kyang gzungs thob pa/ ting nge 'dzin thob pa/ skye ba gcig gis thogs pa/ sa bcu la rab tu gnas pa/ de ma thag tu rgyal tshab tu dbang bskur bas dbang bskur ba/ go cha chen po bgos pa/ sangs rgyas kyi yon tan thams cad la the tsom med pa sha stag dang yang thabs cig go// de'i tshe na byang chub sems dpa' sems dpa' chen po seng ge rnam par rtse zhes bya ba 'khor de nyid du 'dus par gyur te 'dug go// de nas byang chub sems dpa' sems dpa' chen po seng ge rnam par rtse stan las langs te/ bla gos phrag pa gcig tu gzar nas pus mo g.yas pa'i lha ngas la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to// bcom ldan 'das rigs kyi bu'am/ rigs kyi bu mo gang gis de bzhin gshegs pa la mchod pa bgyis na de'i bsod nams ji snyed cig bskyed par 'gyur/ de skad ces gsol pa dang / bcom ldan 'das kyis byang chub sems dpa' sems dpa' chen po seng ge rnam par rtse la 'di skad ces bka' stsal to// bcom ldan 'das rigs kyi bu'am/ rigs kyi bu mo gang gis de bzhin gshegs pa la mchod pa bgyi na de'i bsod nams ji snyed cig skyed par 'gyur zhes seng ge rnam par rtse khyod de skad ma zer cig // de ci'i phyir zhe na/ de bzhin gshegs pa ni tshul khrims dpag tu med pa/ ting nge 'dzin dpag tu med pa/ shes rab dpag tu med pa/ rnam par grol ba dpag tu med pa/ rnam par grol ba'i ye shes mthong ba dpag tu med pa ste/ seng ge rnam par rtse ba gang gi phyir de bzhin gshegs pa dgra bcom pa yang dag par rdzogs pa'i sangs rgyas yon tan gyi tshogs dpag tu med pa dang ldan pa de'i phyir de la mchod pa'i rnam par smin pa de yang dpag tu med par shes par bya'o// [32a] seng ge rnam par rtse ba gang la la dag de bzhin gshegs pa bzhugs kyang rung // yongs su mya ngan las 'das kyang rung ste/ mchod pa byed pa de dag thams cad ni 'di lta ste/ nyan thos kyi theg pa'am/ rang sangs rgyas kyi theg pa'am// theg pa chen po'am/ theg pa gsum las theg pa gcig gis yongs su mya ngan las 'da' bar 'gyur ro// seng ge rnam par rtse yang gang gis de bzhin gshegs pa dgra bcom pa yang dag par rdzogs pa'i sangs rgyas mthong nas sems dang bar gyur la/ dad pa'i sems kyis rnyed pa dang / na bza' dang / zhal zas dang / gzims cha dang / snyun gyi gsos sman dang / yo byad dang / bde bar sbyar ba thams cad kyis bsti stang du byas shing // ri mor byas te mchod cing rjed la/ rim gror byas pa dang / gang zhig gis de bzhin gshegs pa yongs su mya ngan las 'das pa'i ring bsrel yungs 'bru tsam gyi mchod rten la mchod pa byas pa'i rnam par smin pa ni mnyam par shes par bya ste/ bye brag gam tha dad du bya ba med do// seng ge rnam par rtse ba byang chub sems dpa' khyim pa gang zhig gis nyan thos dang / rang sangs rgyas dang / de bzhin gshegs pa dgra bcom pa yang dag par rdzogs pa'i sangs rgyas rnams la rin po che'i phung po ri rab tsam 'bul bar phul ba bas byang chub sems dpa' gang rab tu byung nas kAR+ShA pa Na gcig tsam dbul bar phul la/ phul nas kyang bla na med pa yang dag par rdzogs pa'i byang chub tu yongs su bsngos na/ dge ba'i rtsa ba snga ma des dge ba'i rtsa ba phyi ma'i brgya'i char yang nye bar mi 'gro/ stong gi cha dang / 'bum gyi cha dang / grangs dang / cha dang / bgrang ba dang / bskrun pa dang / rgyur yang nye bar mi 'gro ba nas dpe'i bar du yang mi bzod do// seng ge rnam par rtse ba gang zhig gis de bzhin gshegs pa dgra bcom pa yang dag par rdzogs pa'i sangs rgyas la lo gcig gam/ lo brgya'am/ lo stong yang rung ste/ bde ba'i yo byad thams cad kyis bsnyen bkur byas pa dang / gang zhig gis de bzhin gshegs pa yongs su mya ngan las 'das pa'i mchod rten la byang chub kyi sems kyis yang dag par zin pas de bzhin gshegs pa mchod pa'i phyir me tog 'ga' 'bul lam/ [32b] chu snyim pa gang tsam 'thor ram/ byug pa'i thig le 'dri'am/ me tog gi nyal nyil 'phyag gam/ byug pa 'bul lam/ spos 'bul lam/ me tog 'bul lam/ bdug spos 'bul lam/ phreng ba 'bul lam/ rol mo'i sil snyan 'bul lam/ gdugs 'bul lam/ dril bu 'bul lam/ dpyang ba 'bul lam/ rgyal mtshan 'bul lam/ ba dan 'bul lam/ dar 'bul lam/ mar me 'bul zhing // phul nas dga' ba'i sems kyis gom pa'i gar stabs 'ga' bor te/ sangs rgyas bcom ldan 'das de la phyag 'tshal lo zhes smra ba de dag ni/ seng ge rnam par rtse bskal par ram/ bskal pa brgya'am/ bskal pa stong du'am/ bskal pa 'bum du yang ngan 'gro log par ltung bar 'gro bar 'gyur ba de'i gnas med de/ 'di la dogs pa'am/ yid gnyis sam/ the tsom za bar mi bya'o// seng ge rnam par rtse me tog brtsegs pa zhes bya ba'i gzungs yod kyis skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang / mi'i skye bo phal po che'i don dang / phan pa dang / bde ba'i phyir de bshad par bya'o// seng ge rnam par rtse gang la la zhig me tog brtsegs pa'i gzungs 'di 'dzin tam/ 'chang ngam/ klog gam/ yid la byed dam/ kun chub par byed dam/ gzhan dag la yang rgya cher yang dag par 'chad pa de rtag tu tshe rabs dran par 'gyur/ de ngan 'gro log par ltung bar mi 'gyur/ dal ba rnyed par 'gyur/ nam du yang dkon mchog gsum dang mi 'bral bar 'gyur/ nam du yang de bzhin gshegs pa dang mi 'bral bar 'gyur/ nam du yang sangs rgyas rjes su dran pa dang mi 'bral bar 'gyur/ nam du yang byang chub sems dpa' dang mi 'bral bar 'gyur/ nam du yang byang chub kyi sems dang mi 'bral bar 'gyur/ [33a] nam du yang dbang po ma tshang bar mi 'gyur/ nam du yang rigs dma' bar skye bar mi 'gyur/ spobs pa sna tshogs zab mo phun sum tshogs par 'gyur/ phyogs bcu'i 'jig rten gyi khams grangs med pa dag gi sangs rgyas bcom ldan 'das rnams mthong bar 'gyur ro// tad+ya thA/ d+hA ra NI/ d+hA ra NI/ mu ni pra b+hA swa re/ sid+d+hi tsaN+De nA ma tsi ni he ri a ro ga ba ti/ bud+d+ha ma ti d+har+ye/ oM ka re te ga ga ra te/ te dzo ba ti/ pi pu la bud+d+he/ d+harma a ba b+hA se/ a k+Sha ya kalpe/ kalpa ba ti/ a mr-i ta kalpe hu tA sha ne/ te dzo ba ti/ ni r+ya saM hI te/ te dzo gra bA tiSh+Thi na dra ye/ tiSh+Thi na dra ye bun+d+hi swA hA/ seng ge rnam par rtse gang la la zhig gis me tog brtsegs pa'i gzungs 'di'i ming dang yi ge dang / tshig mtha' dag shes te/ kun chub par byed pa de dpyid zla tha dang / dbyar zla ra ba dang / ston zla tha yar ngo'i tshes brgyad nas bzung la bco lnga'i bar du sangs rgyas rjes su dran pa bsgom par bya ste/ nyin lan gsum mtshan lan gsum bsam zhing // de bzhin gshegs pa rtse gcig tu yid la byas la/ bcom ldan 'das la spos dang / me tog dang / mar me dang / bdug spos kyis mchod na sangs rgyas bcom ldan 'das pad+ma'i snying po'i seng ge'i khri la bzhugs shing chos kyang ston pa bco lnga mthong bar 'gyur ro// gzungs rab tu thob par 'gyur/ dran pa dang ldan par 'gyur/ blo gros dang ldan par 'gyur/ rtogs pa dang ldan par 'gyur/ blo dang ldan par 'gyur/ yongs su mya ngan las 'das pa'i bar du tshe rabs dran par 'gyur ro// thos pa thams cad dang / bstan bcos thams cad dang / bzo thams cad dang / las thams cad rab tu shes par 'gyur/ ting nge 'dzin thams cad kyang de'i sems las rnam par dag par 'gyur te/ 'phags pa'i bden pa bzhi ni ma gtogs so// de ci'i phyir zhe na/ chos de dag ni zag pa med par gtogs pa'i phyir ro// [33b] bcom ldan 'das kyis de skad ces bka' stsal nas/ byang chub sems dpa' sems dpa' chen po seng ge rnam par rtse dang / byang chub sems dpa' de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// 'phags pa me tog brtsegs pa zhes bya ba'i gzungs rdzogs so//