@##/ /rgya gar skad du/ shrI gu h+ya badzra tan+t+ra rA dza/ bod skad du/ dpal gsang ba rdo rje rgyud kyi rgyal po/dpal rdo rje mkha' 'gro la phyag 'tshal lo/ /dpal ldan 'khor lo sdom pa ru/ /gsang ba'i 'khor lo mi gsung ba/ /bdag gis zab mo'i don ma rtogs/ /de phyir khyed kyis bdag la gsungs/ /bcom ldan 'das kyis bka' stsal pa/ /nyon cig lha mo spyan bzang ring / /gsang ba'i 'khor lo shin tu zab/ /rgyud rnams kun tu ma gsungs pa/ /khyod kyi ngor mdzad nga yis bshad/ /gsang ba rdo rje rgyud kyi rgyal po las gleng bslang ba'i le'u ste dang po'o// //lha mos gsol pa bcom ldan 'das/ /gsang ba zhes pa ji ltar lags/ /de yi 'khor lo ji ltar lags/ /de yi rdo rje ji ltar lags/ /de yi pad+ma ji ltar lags/ /bcom ldan 'das kyis bka' stsal pa/ /gsang ba zhes pa rnam pa bzhi/ /gsang ba'i pho brang dang po ste/ /de nas gsang ba'i dbang bskur phyir/ /gnyis pa rig pa'i pho brang ste/ /bzhi pa'i don ni rig pa'i phyir/ /gsum pa rta mgrin 'khor lo ste/ /de yi mgrin par gnas pa'i phyir/ /bzhi pa gsang ba bde skyong ste/ /sdig pa spong phyir bde skyong yin/ /de rnams don ni gsang ba ste/ /brtul zhugs byed cing gtong phod che/ /e ba~M zab cing chags la dga'/ /khu ba 'dzag cing rak+ta 'bab/ /'di la ston gyis gzhan la gsang/ /rdo rje pad+ma zhes bya ba/ /bzhi po gnas pa'i rten yin te/ /dper na khang rten ka ba bzhin/ /rgyud kyi don ni rgyun yin no/ /gsang ba rdo rje'i rgyud kyi rgyal po las rtog pa sel ba'i le'u ste gnyis pa'o// /lha mos gsol pa bcom ldan 'das/ / re re'i dbye ba ma 'tshal bas/ /'jig rten kun rdzob nyid du lhung / /'khrig pa'i zug rngu mi bzad pas/ /bdag ni 'di nyid du ni 'gum/ /bcom ldan 'das kyis bka' stsal pa/ /gsang ba'i pho brang rim pa drug /'dab ma'i grangs ni nyis 'gyur ro/ /rta 79-1-185a mgrin grangs ni dgu ru shes/ /gsang ba bde skyong rim pa gnyis/ /brgyad dang lnga bcu'i grangs yin no/ /rig pa'i pho brang 'dab ma lnga/ /rigs ni me tog lta bu'o/ /b+ha ga rab 'bring gsum yin te/ /rnal 'byor mkhas pas btsal bar bya/ / sman dang snum gyi ril bu yis/ /rnal 'byor sor mo la bskus la/ /gzhang kha nas ni phye mas bdug /gsang ba nas kyang snum gyis bdug /de nas rnal 'byor pho'am mos/ /rtse de sor mos legs par btsal/ /ring thung tshad ni sor gnyis nas/ /sor brgyad par ni gar gnas pa/ /shes rab b+ha ga che chung dang / /de bzhin b+ha ga grang dro dang / /chu rnams che zhing bde ba chung / /de la rnal 'byor mkhas pa yis/ /b+ha ga che na bde ba chung / /b+ha ga che na chung ngu bya/ /chung na de bzhin bskyed par gsungs/ /grang na de bzhin bsro bar bya/ /chu rnams che na chung bar bya/ /'di 'dra'i b+ha ga gang la yod/ /bud med 'di la b+ha ga mnga'/ /de phyir bud med bcom ldan 'das/ /thabs kyi rdo rje phra sbom dang / /ring ba dang ni thung ba ste/ /shes rab ji bzhin thabs la'o/ /de yi gnas su gzung bar bya/ / gsang ba rdo rje rgyud kyi rgyal po las gsang ba rtog pa'i le'u ste gsum pa'o// //lha mos gsol pa bcom ldan 'das/ /e ba~M rnam pa'i dbus gang du/ /bde ba'i khyad par tshol ba la/ /'di las khyad par med dam ci/ /bcom ldan 'das kyis bka' stsal pa/ /shin tu dben pa'i gnas btsal la/ /bza' ba bcud can sna tshogs dang / /btung ba zhim po mang po dang / /gur kum la sogs dri zhim dang / /shin tu 'jam pa'i stan bting la/ /rnal 'byor ma yi gnas bcu ru/ /dri zhim thig le re re bya/ / rnal 'byor pha yi gnas lnga ru/ /de bzhin thig le lnga yang bya/ /de nas mkha' gsang byin gyis brlab/ /e las gru gsum gting ring bsam/ /de yi nang du pa~M las ni/ /pad+ma 'dab ma brgyad du bsam/ /de yi dbus su 'khor lo bsam/ /'khor lo'i 79-1-185b dbus su reg mi bzod/ /de nas thabs kyi rdo rje yang / /hU~M las rdo rje rtse lnga bsam/ /oM las rdo rje mgo bor bsam/ /phaT las rdo rje bu ga bsam/ /de nas bde ba'i stan thog tu/ /sbyor ba rnam pa gsum bya ste/ /yan lag thabs dang sbyor ba dngos/ /'khor lo nyi shu rtsa dgu la/ /chags pa skye ba'i dri yis byug /bde ba skye ba'i zas zos nas/ /bde ba'i stan la 'dug nas ni/ /thabs kyis gnas dgur 'o yang bya/ /shes rab kyis kyang gnas lngar bya/ /thabs kyis shes rab pad+ma la/ /'o byas pad+ma rgyas su gzhug /shes rab kyis kyang de bzhin no/ /chags pa skye ba'i rtags 'byung ste/ /de nas gcig gis gcig 'khyud nas/ /he ru ka dang phag mor bsam/ /shes rab rkang pa gnyis brkyang nas/ /thabs ni thabs ldan gyis bskyod nas/ /nang rtags phyi ru bstan pa'i phyir/ /shes rab ma la rtags gsum 'byung / /lus 'dar 'phar ba sku yi rtags/ /mi bzod skad 'don ngag gi rtags/ /shes pa brgyal ba thugs kyi rtags/ /de la ngo bor bshad pa'i phyir/ /'di ni gsang ba'i dkyil 'khor te/ /'di yis skra dkar gnyer ma spong / /nad kyi zug rngu thams cad 'joms/ /'di ni gsang ba'i bcud kyis len/ /phyi yi dkyil 'khor bsgoms pa min/ /gsang ba'i dkyil 'khor nyid la gnas/ /sbyin sreg la sogs bya ba min/ /gsang ba'i rdo rje rgyud 'di ni/ /kun gyis thos par mi 'gyur te/ / glegs bam sor ni bcu gnyis bya/ /glegs bam gsang ba'i gnas su sba/ /yongs su smin pa'i rnal 'byor ma/ /'ga' yis mthong gi gzhan la sba/ /gsang ba ston pa'i bla ma ni/ /sangs rgyas nyid pas btsun pa yin/ /gzhan yang 'dod pa'i stan thog tu/ / gsungs pa'i sbyor thabs kun byas nas/ /lnga bcu nas bzung stong gi bar/ /rnal 'byor ma kun bde med kyang / /sbyor thabs mkhas pas bskyod byas nas/ /bcu gnyis ma dang bde ba mnyam/ /sbyor thabs mi shes rnal 'byor pas/ /rlung mkhris bad kan kun 79-1-186a nas skye/ /shes rab kyis kyang thabs la ste/ /sbyor thabs mkhas pa'i shes rab ma/ /thabs kyis rtag tu bsten par bya/ /sbyor thabs mkhas pa'i rnal 'byor pas/ /rnal 'byor ma yi gsang la bsten/ /lha mos gsol ba bcom ldan 'das/ / gsang la bsten pa ji ltar lags/ /bcom ldan 'das kyis bka' stsal pa/ /ming sring tshul lam rje 'bangs tshul/ /pha spad tshul lam mkhan slob tshul/ /gzhan gyis mi rig ngo tsha bsrung / /dben pa'i gnas su sbyor ba bya/ /gal te ma bsten dam tshig nyams/ /tshe 'di nyid la dmyal bar ltung / /lha mos gsol pa bcom ldan 'das/ /thabs med rnal 'byor ji ltar lags/ /bde ba khyad med ji ltar lags/ /phyag rgya ma bsten ji ltar lags/ /bcom ldan 'das kyis bka' stsal pa/ /bde ba la gnas gsang ba'i don/ /khyod kyi ngor mdzad nga yis bshad/ /sbyor thabs mi shes rnal 'byor dang / /stan yang gcig la mi 'dug ste/ /'dod chags bsam pa yang mi bya/ /gal te de 'dra bsten gyur na/ /'jig rten phal pa'i 'dod chags te/ / shi nas mnar med dmyal bar skye/ /'dod chags spyod pa shal ma ri/ /lcags kyi sor ni bcu drug pa/ /yar la 'dzeg cing mar la 'bab/ /thabs med rnal 'byor 'dra ba 'bod/ /de phyir sbyor thabs mkhas pas bsten/ /sbyor thabs las ni bde ba skye/ /de phyir bde ba khyad par 'phags/ /bde ba thabs med lus zungs nyams/ /rlung mkhris bad kan kun nas skye/ /las kyi phyag rgya rtag tu bsten/ /phyag rgya ma bsten dam tshig nyams/ /phyag rgya bsten pa'i dus su yang / /rnal 'byor ming sring brda yis mtshon/ / gang zhig 'dzub mo ston pa na/ /'ongs sam zhes ni 'dri ba yin/ /sor mo gnyis ni ston pa dang / /mthe bo drang por ston pa dang / /de bzhin srin lag drang por ston/ rdo rje bo la zhes bya ste/ /pad+ma kak+ko la zhes bya/ /de ltar ma byas dam tshig nyams/ /brda yi bye 79-1-186b brag ma lus pa/ /sam+bu Ta ru zhes par bya/ /lha mos gsol pa bcom ldan 'das/ /rdo rje pad+ma dga' ba'i gnas/ /de ru gzung ba ji ltar lags/ /bcom ldan 'das kyis bka' stsal pa/ /de ru gzung ba rnam pa gnyis/ /rab kyi dbugs dang shes pas gzung / /dang po btsan thabs sbyor bas gzung / /sbyor ba rnam pa bcu ru gzung / /gcig ni sbom po khro mos gzung / /gzung ba'i rtan ni rnam pa bzhi/ /man ngag can gyis shes par bya/ /gal te de ru ma zin na/ /'khor bar ltung bas rang gis su/ /ting nge 'dzin gyi ha~M la bsdu/ /lce yis byang chub sems blangs la/ /ro ma'i 'khor lo ru ni bstim/ /de ltar ma byas dam tshig nyams/ /lha mos gsol pa bcom ldan 'das/ /shes rab sbyor thabs 'ba' zhig gam/ /thabs kyi bskyod pa 'ba' zhig gam/ / rnal 'byor pha dang rnal 'byor ma/ /bde ba khyad par med dam ci/ /bde ba'i ngo bo ji ltar lags/ /bcom ldan 'das kyis bka' stsal pa/ /bskyod pa bud med kyis kyang bskyod/ /sbyor thabs kyang ni thabs kyis bya/ /de las bde ba khyad paRa 'phags/ / dper na dar dang snal ma bzhin/ /thabs kyis snal ma'i cha tsam myong / /shes rab dar gyi sham bu tsam/ /de phyir rnal 'byor ma yi rgyud/ /rnal 'byor ma yis 'grub par gsungs/ /rgyud kyi nang na mchog yin pas/ /rab gnas sbyin sreg dbang bskur dang / /mchod dang bzlas dang gtor ma dang / /khrus dang bsrung ba la sogs pa/ /gsang ba 'di las gzhan na med/ /'bras bu'i nang na 'di mchog ste/ /ye shes lnga yi spros dang bral/ /de nas lha mos 'khor dpag tu med pa dang / /mkha' 'gro ma rnams 'dod chags kyi the tshom yongs su zad nas/ bcom ldan 'das la kun gyis 'khyud nas gsang ba'i mchod pas bde ba chen po'i ros gang bar mchod nas mi snang bar gyur to/ /gsang ba'i yang gsang ba gsang ba rdo rje'i rgyud kyi rgyal po 'khor lo sdom pa'i rtog pa rgyu dang 'bras 79-1-187a bu'i de kho na bstan pa'i le'u ste bzhi pa'o// //gsang ba rdo rje'i rgyud kyi rgyal po zhes bya ba rdzogs so// //paN+Di ra rat+na badzra dang / lots+tsha ba dge slong shAkya ye shes kyis bsgyur te gtan la phab pa// // |