rKTs


H514

(e-text produced by ACIP)

see text in transliteration
215b
།།རྒྱ་གར་སྐད་དུ། ཨཱརྱ་སུ་བརྞ་པྲ་བྷཱ་ས་ཨུཏྟ་མ་སཱུ་ཏྲ་ཨིནྡྲ་རཱ་ཛཱ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ། །བམ་པོ་དང་པོ། འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་དང ། བྱང་ཆུབ་སེམས་དཔའ་དང ། རང་སངས་རྒྱས་དང ། འཕགས་པ་ཉན་ཐོས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རིའི་ཟོམ། ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཟབ་མོ། དེ་བཞིན་གཤེགས་པ་རྣམས་ཀྱི་སྤྱོད་ཡུལ་དམ་པ་ན། དགེ་སློང་གི་དགེ་འདུན་ཆེན་པོ་དགེ་སློང་དགུ་ཁྲི་བརྒྱད་སྟོང་དང་ཐབས་གཅིག་ཏུ་བཞུགས་པ་ཐམས་ཅད་ཀྱང་དགྲ་བཅོམ་པ་ཆེན་པོ། གླང་པོའི་རྒྱལ་པོ་ལྟར་ཤིན་ཏུ་དུལ་བ། ཟག་པ་ཟད་པ། ཉོན་མོངས་པ་མེད་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། བྱ་བ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་
216a
༄#། །པར་སྦྱོར་བ་ཡོངས་སུ་བཅད་པ། དབང་ཕྱུག་དམ་པའི་མཆོག་ཐོབ་པ། ཚུལ་ཁྲིམས་རྣམ་པར་དག་པ་ལ་རབ་ཏུ་གནས་པ། ཐབས་དང ། ཤེས་རབ་ཀྱིས་ཡོངས་སུ་བཀོད་པ། རྣམ་པར་གྲོལ་བ་བརྒྱད་མངོན་དུ་གྱུར་ཅིང ། ཕ་རོལ་གྱི་མཐར་ཕྱིན་པར་གྱུར་པ་ལ། འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང ། ཚེ་དང་ལྡན་པ་རྟ་ཐུལ་དང ། ཚེ་དང་ལྡན་པ་རླངས་པ་དང ། ཚེ་དང་ལྡན་པ་མིང་ཆེན་དང ། ཚེ་དང་ལྡན་པ་བཟང་པོ་དང ། ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་སྟེང་རྒྱས་འོད་སྲུང་དང ། ཚེ་དང་ལྡན་པ་ག་ཡཱ་འོད་སྲུང་དང ། ཚེ་དང་ལྡན་པ་ཆུ་བོ་འོད་སྲུང་དང ། ཚེ་དང་ལྡན་པ་ཤཱ་རིའི་བུ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་དང ། དགའ་བོ་དང ། འདི་དག་ལ་སོགས་པ་ཉན་ཐོས་ཆེན་པོ་རྣམས་ཕྱི་དྲོའི་དུས་ཀྱི་ཚེ། སོ་སོ་ནས་ནང་དུ་ཡང་དག་པར་འཇོག་པ་ལས་ལངས་ཏེ། བཅོམ་ལྡན་འདས་ག་ལ་བ་དེར་དོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ཏེ། ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་བརྒྱ་སྟོང་དང་ཡང་ཐབས་གཅིག་སྟེ། དེ་དག་ཀྱང་ཀླུའི་རྒྱལ་པོ་ལྟར་དཔལ་དང ། གཟི་བརྗིད་ཆེན་པོར་ལྡན་པས་ཀུན་ཏུ་གྲགས་པ། སྦྱིན་པ་དང ། ཚུལ་
216b
ཁྲིམས་རྣམ་པར་དག་པ་རྟག་ཏུ་སྲུང་བར་མོས་པ་དང ། བཟོད་པ་དང ། བརྩོན་འགྲུས་བསྐལ་པ་གྲངས་མེད་པར་སྤྱད་པ། བསམ་གཏན་ཀུན་ལས་འདས་པའི་དྲན་པ་མངོན་དུ་གྱུར་པ། ཤེས་རབ་ཀྱི་སྒོ་རྣམ་པར་ཕྱེ་བ། ཐབས་མཁས་པ་ཤིན་ཏུ་བསྒྲུབས་པ། དབང་དམ་པས་རྣམ་པར་རོལ་ཅིང་མངོན་པར་ཤེས་པ་དམ་པ་བརྙེས་པ། གཟུངས་ཆེན་པོ་ཐོབ་པ།་སྤོབས་པ་མི་ཟད་པ། ཉོན་མོངས་པ་དང ། ཀུན་ནས་ཉོན་མོངས་པ་ཐམས་ཅད་སྤངས་པས་མྱུར་དུ་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་ཅིང་བདུད་དང ། ཕྱིར་རྒོལ་བའི་དཔུང་འཇོམས་པ། ཆོས་ཀྱི་རྔ་ཆེན་པོ་རྡུང་བས་མུ་སྟེགས་ཅན་ཐམས་ཅད་འདུལ་ཞིང་སེམས་རྣམ་པར་དང་བ་བསྐྱེད་པར་བྱེད་པ། དམ་པའི་ཆོས་ཀྱི་འཁོར་ལོ་བསྐོར་ནས་ལྷ་དང་མི་རྣམས་སྒྲོལ་བར་བྱེད་པ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་བརྒྱན་པར་བྱེད་པ། འགྲོ་བ་དྲུག་ན་གནས་པ་རྣམས་ལ་ཕན་དམ་པ་འདོགས་པ། ཡེ་ཤེས་ཆེན་པོ་ཕུན་སུམ་ཚོགས་པ། བཟོད་པ་ཆེན་པོ་དང་ལྡན་པ། བྱམས་པ་དང་ལྡན་པ། སྙིང་རྗེ་ཆེན་པོའི་སེམས་ལ་གནས་པ། མཐུ་ཆེན་པོ་བརྟན་པ་དང་ལྡན་པ། སངས་རྒྱས་ཐམས་ཅད་ལ་བསྙེན་བཀུར་བྱས་པ། ཡོངས་སུ་མྱ་ངན་ལས་མི་འདའ་ཞིང་མ་འོངས་པའི་མཐའ་ཀླས་པས་གནས་པར་ཡི་དམ་ཆེན་པོ་འཆང་བ། སངས་རྒྱས་མང་པོ་
217a
༄#། །ལ་རྒྱུ་རྣམ་པར་དག་པ་བསྐྱེད་པ། དུས་གསུམ་གྱི་ཆོས་མི་སྐྱེ་བར་བཟོད་པ་ཐོབ་པ། ཉན་ཐོས་དང ། རང་སངས་རྒྱས་ཀྱིས་སྤྱོད་ཡུལ་ལས་ཤིན་ཏུ་འདས་པ།་ཐབས་མཁས་པ་ཆེན་པོས་འཇིག་རྟེན་འདྲེན་པ་སྟེན་པ་ཆེན་པོས་བསྟན་པའི་ཆོས་ཟབ་མོ་དགོངས་པ་འགྲེལ་བ་ལ་མཁས་པ། སྟོང་པ་ཉིད་མངོན་དུ་གྱུར་པས་ཐེ་ཚོམ་ཡོངས་སུ་ཆད་པར་གྱུར་པ་ལ། འདི་ལྟ་སྟེ། བྱང་ཆུབ་སེམས་དཔའ་ཐོགས་པ་མེད་པར་ཆོས་ཀྱི་འཁོར་ལོ་བསྐོར་བ་དང ། བྱང་ཆུབ་སེམས་དཔའ་རྟག་པར་ཆོས་ཀྱི་འཁོར་ལོ་བསྐོར་བར་སེམས་བསྐྱེད་པ་དང ། བྱང་ཆུབ་སེམས་དཔའ་རྟག་ཏུ་བརྩོན་པ་དང ། བྱང་ཆུབ་སེམས་དཔའ་མི་གཏོང་བརྩོན་པ་དང ། བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་འཇམ་དཔལ་དང ། བྱང་ཆུབ་སེམས་དཔའ་ཀུན་ཏུ་སྤྱན་རས་གཟིགས་དབང་ཕྱུག་དང ། བྱང་ཆུབ་སེམས་དཔའ་གཟུངས་ཀྱི་དབང་ཕྱུག་རྒྱལ་པོ་དང།་བྱང་ཆུབ་སེམས་དཔའ་སྤོབས་པ་ཆེན་པོས་བཀོད་པའི་རྒྱལ་པོ་དང ། བྱང་ཆུབ་སེམས་དཔའ་ལྷུན་པོའི་རྒྱལ་པོ་དང ། བྱང་ཆུབ་སེམས་དཔའ་རྒྱ་མཚོ་ཟབ་མོའི་རྒྱལ་པོ་དང ། བྱང་ཆུབ་སེམས་དཔའ་རིན་པོ་ཆེའི་ཏོག་དང ། བྱང་ཆུབ་སེམས་དཔའ་རིན་པོ་ཆེའི་ཏོག་ཆེན་པོ་དང ། བྱང་ཆུབ་སེམས་དཔའི་སའི་སྙིང་པོ་དང ། བྱང་
217b
ཆུབ་སེམས་དཔའ་ནམ་མཁའི་སྙིང་པོ་དང ། བྱང་ཆུབ་སེམས་དཔའ་ལག་ན་རིན་ཆེན་དབང་ཕྱུག་དང ། བྱང་ཆུབ་སེམས་དཔའ་ལག་ན་རྡོ་རྗེ་དང ། བྱང་ཆུབ་སེམས་དཔའ་དགའ་བའི་སྟོབས་དང ། བྱང་ཆུབ་སེམས་དཔའ་ཆོས་ཆེན་མཐུ་དང ། བྱང་ཆུབ་སེམས་དཔའ་ཤིན་ཏུ་འོད་བཀོད་དང ། བྱང་ཆུབ་སེམས་དཔའ་གསེར་འོད་ཆེན་པོས་བཀོད་དང།་བྱང་ཆུབ་སེམས་དཔའ་ཚུལ་ཁྲིམས་རྣམ་དག་དང ། བྱང་ཆུབ་སེམས་དཔའ་རྟག་ཏུ་ཏིང་ངེ་འཛིན་དང ། བྱང་ཆུབ་སེམས་དཔའ་ཤིན་ཏུ་རྣམ་དག་བློ་གྲོས་དང ། བྱང་ཆུབ་སེམས་དཔའ་བརྩོན་འགྲུས་བརྟན་དང ། བྱང་ཆུབ་སེམས་དཔའ་སེམས་ནམ་མཁའ་བཞིན་དང ། བྱང་ཆུབ་སེམས་དཔའ་སྨོན་ལམ་ཆེན་པོ་མི་གཏོང་བ་དང ། བྱང་ཆུབ་སེམས་དཔའ་སྨན་སྦྱིན་དང ། བྱང་ཆུབ་སེམས་དཔའ་ཉོན་མོངས་ནད་སེལ་དང ། བྱང་ཆུབ་སེམས་དཔའ་སྨན་པའི་རྒྱལ་པོ་དང ། བྱང་ཆུབ་སེམས་དཔའ་དགའ་བས་མཐོ་བའི་རྒྱལ་པོ་དང ། བྱང་ཆུབ་སེམས་དཔའ་ལུང་བསྟན་མཆོག་ཐོབ་དང ། །བྱང་ཆུབ་སེམས་དཔའ་སྤྲིན་ཆེན་རྣམ་དག་འོད་དང ། བྱང་ཆུབ་སེམས་དཔའ་སྤྲིན་ཆེན་ཆོས་འཛིན་དང ། བྱང་ཆུབ་སེམས་དཔའ་སྤྲིན་ཆེན་གྲགས་དགའ་དང ། བྱང་ཆུབ་སེམས་དཔའ་སྤྲིན་ཆེན་གྲགས་པ་མཐའ་མེད་སྟོན་དང ། བྱང་
218a
༄#། །ཆུབ་སེམས་དཔའ་སྤྲིན་ཆེན་སེངྒེའི་སྒྲ་དང ། བྱང་ཆུབ་སེམས་དཔའ་སྤྲིན་ཆེན་ཁྱུ་མཆོག་སྒྲ་དང ། བྱང་ཆུབ་སེམས་དཔའ་སྤྲིན་ཆེན་བཀྲ་ཤིས་དང ། བྱང་ཆུབ་སེམས་དཔའ་སྤྲིན་ཆེན་རིན་ཆེན་དཔལ་དང ། བྱང་ཆུབ་སེམས་དཔའ་སྤྲིན་ཆེན་ཉི་མའི་སྙིང་པོ་དང ། བྱང་ཆུབ་སེམས་དཔའ་སྤྲིན་ཆེན་ཟླ་བའི་སྙིང་པོ་དང ། བྱང་ཆུབ་སེམས་དཔའ་སྤྲིན་ཆེན་སྐར་མའི་འོད་དང ། བྱང་ཆུབ་སེམས་དཔའ་སྤྲིན་ཆེན་མེའི་འོད་དང ། བྱང་ཆུབ་སེམས་དཔའ་སྤྲིན་ཆེན་གློག་གི་འོད་དང ། བྱང་ཆུབ་སེམས་དཔའ་སྤྲིན་ཆེན་འབྲུག་སྒྲ་དང ། བྱང་ཆུབ་སེམས་དཔའ་སྤྲིན་ཆེན་ཤེས་རབ་ཀུན་ཏུ་འཆར་བ་དང ། བྱང་ཆུབ་སེམས་དཔའ་སྤྲིན་ཆེན་རྣམ་དག་ཆང་པའི་རྒྱལ་པོ་དང ། བྱང་ཆུབ་སེམས་དཔའ་སྤྲིན་ཆེན་མེ་ཏོག་ཤིང་རྒྱལ་དང ། བྱང་ཆུབ་སེམས་དཔའ་སྤྲིན་ཆེན་ཨུཏྤ་ལའི་དྲི་དང ། བྱང་ཆུབ་སེམས་དཔའ་སྤྲིན་ཆེན་རིན་པོ་ཆེ་ཙནྡན་དྲི་བསིལ་སྐུ་དང ། བྱང་ཆུབ་སེམས་དཔའ་སྤྲིན་ཆེན་མུན་སེལ་དང ། བྱང་ཆུབ་སེམས་དཔའ་སྤྲིན་ཆེན་རབ་རིབ་སེལ་བ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་གྲངས་མེད་པ་རྣམས་སོ་སོ་ནས་ཕྱི་དྲོའི་དུས་ཀྱི་ཚེ། ནང་དུ་ཡང་དག་པར་འཇོག་པ་ལས་ལངས་ཏེ། བཅོམ་ལྡན་འདས་ག་
218b
ལ་བ་དེར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་ཡང་ལི་ཙ་བྱི་གཞོན་ནུ་རྣམས་ལ། འདི་ལྟ་སྟེ།་གཞོན་ནུ་སེངྒེའི་འོད་དང ། གཞོན་ནུ་སེངྒེའི་བློ་གྲོས་དང ། གཞོན་ནུ་ཆོས་སྦྱིན་དང ། གཞོན་ནུ་དབང་པོ་སྦྱིན་དང ། གཞོན་ནུ་འོད་ཆེན་དང ། གཞོན་ནུ་དཔལ་ཆེན་དང ། གཞོན་ནུ་སངས་རྒྱས་སྐྱོང་དང ། གཞོན་ནུ་ཆོས་སྐྱོང་དང ། གཞོན་ནུ་དགེ་འདུན་སྐྱོང་དང ། གཞོན་ནུ་རྡོ་རྗེ་སྐྱོང་དང ། གཞོན་ནུ་ནམ་མཁའི་སྐྱོང་དང ། གཞོན་ནུ་ནམ་མཁའ་ ་དང།་རིན་ཆེན་སྙིང་པོ་གཞོན་ནུ་དང ། བཀྲ་ཤིས་མཆོག་གི་སྙིང་པོ་གཞོན་ནུ་ལ་སོགས་པ་ལྔ་འབུམ་བརྒྱད་སྟོང་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདེ་བར་གནས་པ། ཐེག་པ་ཆེན་པོ་ལ་རབ་ཏུ་མོས་པ་དེ་དག་སོ་སོ་ནས་ཕྱི་དྲོའི་དུས་ཀྱི་ཚེ་བཅོམ་ལྡན་འདས་ག་ལ་བ་དེར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོར་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང་ལྷའི་སྲས་པོ་ལ། འདི་ལྟ་སྟེ། ལྷའི་སྲས་པོ་དགའ་བ་མཐོང་བ་དང ། ལྷའི་སྲས་པོ་རབ་དགའ་དང ། ལྷའི་སྲས་པོ་ཉི་འོད་དང ། ལྷའི་སྲས་པོ་ཟླ་བའི་གཙུག་ཕུད་དང ། ལྷའི་སྲས་པོ་ཤེས་རབ་གསལ་དང ། ལྷའི་སྲས་པོ་ནམ་མཁའ་རྣམ་དག་ཤེས་རབ་དང ། ལྷའི་སྲས་པོ་ཉོན་མོངས་
219a
༄#། །སེལ་དང ། ལྷའི་སྲས་པོ་བཀྲ་ཤིས་དང ། དེ་དག་ལ་སོགས་པ་ལྷའི་སྲས་པོ་བཞི་ཁྲི་ཉིས་སྟོང་ཡང་ཐེག་པ་ཆེན་པོ་བསྲུང་བ་དང ། ཡང་དག་པའི་ཆོས་རྗེས་སུ་འཛིན་ཅིང་རྒྱུན་མི་འཆད་པར་སྨོན་ལམ་ཆེན་པོ་བཏབ་པ་དེ་དག་ཐམས་ཅད་ཀྱང་ཕྱི་དྲོའི་དུས་ཀྱི་ཚེ་བཅོམ་ལྡན་འདས་ག་ལ་བ་དེར་ལྷགས་ནས་བཅོམ་ལྡན་འདས་ཀྱི་ ་ལ་སྤྱི་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང ། ཀླུའི་རྒྱལ་པོ་ལ། འདི་ལྟ་སྟེ། ཀླུའི་རྒྱལ་པོ་པདྨ་དང ། ཀླུའི་རྒྱལ་པོ་ཨེ་ལའི་འདབ་མ་དང ། ཀླུའི་རྒྱལ་པོ་སྟོབས་ཆེན་དང ། ཀླུའི་རྒྱལ་པོ་སྒྲ་ཆེན་དང ། ཀླུའི་རྒྱལ་པོ་རྦ་རླབས་ཆུང་དང ། ཀླུའི་རྒྱལ་པོ་ཀླུང་འཛིན་དང ། ཀླུའི་རྒྱལ་པོ་གསེར་གདོང་དང ། ཀླུའི་རྒྱལ་པོ་གཟི་ཅན་ལ་སོགས་པ་ཀླུའི་རྒྱལ་པོ་ཉི་ཁྲི་བརྒྱད་སྟོང་པོ་དེ་དག་ཀྱང་ཐེག་པ་ཆེན་པོའི་ཆོས་འཆང་ཞིང་འཛིན་པར་མོས་པ་དང ། ཡོངས་སུ་རྒྱས་པ་དང ། བསྲུང་བར་སེམས་བསྐྱེད་པ་ཤ་སྟག་སྟེ། དེ་དག་ཐམས་ཅད་ཀྱང་སོ་སོ་ནས་ཕྱི་དྲོའི་དུས་ཀྱི་ཚེ་བཅོམ་ལྡན་འདས་ག་ལ་བ་དེར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང ། གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་ལ་སོགས་པ་སུམ་ཁྲི་དྲུག་སྟོང་ལ། འདི་ལྟ་སྟེ།
219b
གནོད་སྦྱིན་ཨ་མྲ་དང ། གནོད་སྦྱིན་ཨ་མྲ་འཆང་དང ། གནོད་སྦྱིན་པདྨའི་འོད་ཀྱི་སྙིང་པོ་དང ། གནོད་སྦྱིན་པདྨའི་གདོང་དང ། གནོད་སྦྱིན་ཁྲོ་གཉེར་ཅན་དང ། གནོད་སྦྱིན་འཇིགས་པ་ཆེན་པོ་སྟོན་དང ། གནོད་སྦྱིན་ས་གཡོ་བྱེད་དང ། གནོད་སྦྱིན་ཟས་འཕྲོག་ལ་སོགས་པའི་གནོད་སྦྱིན་དེ་དག་ཀྱང་དེ་བཞིན་གཤེགས་པའི་ཆོས་ཡང་དག་པ་ལ་དད་ཅིང་བསྲུང་བ་ལ་བརྩོན་པ་ཤ་སྟག་སྟེ། དེ་དག་ཐམས་ཅད་ཀྱང་ཕྱི་དྲོའི་དུས་ཀྱི་ཚེ་བཅོམ་ལྡན་འདས་ག་ལ་བ་དེར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང ། ནམ་མཁའ་ལྡིང་གི་རྒྱལ་པོ་སྤོས་ཀྱི་གླང་པོ་ཆེ་མཐུ་སྟོབས་རྒྱལ་པོ་ལ་སོགས་པ་བཞི་ཁྲི་དགུ་སྟོང་དང ། གཞན་ཡང ། དྲི་ཟ་དང།་ལྷ་མ་ཡིན་དང ། མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པ་དང ། རི་དང ། ནགས་ཚལ་དང ། ཆུ་བོ་དང ། རྒྱ་མཚོའི་ལྷའི་དྲང་སྲོང་རྣམས་དང ། རྒྱལ་པོ་ཆེན་པོ་དང ། དེའི་འཁོར་དང ། བཙུན་མོ་དང ། སྲས་དང ། རིགས་ཀྱི་བུ་དང ། རིགས་ཀྱི་བུ་མོ་དང ། ལྷ་དང ། མི་ལ་སོགས་པ་དེ་ཐམས་ཅད་བླ་ན་མེད་པའི་ཐེག་པ་ཆེན་པོ་འདི་ཀློག་ཅིང་འདོན་པ་དང ། འཆང་ཞིང་འཛིན་པ་དང ། འདྲི་བ་དང ། རྒྱས་པར་བྱེད་པ་དང ། བསྲུང་ཞིང་སྐྱོབ་པར་སྨོན་ལམ་ཡོངས་སུ་འདེབས་པ་དེ་དག་ཐམས་ཅད་ཀྱང་ཕྱི་དྲོའི་དུས་ཀྱི་
220a
༄#། །ཚེ་བཅོམ་ལྡན་འདས་ག་ལ་བ་དེར་ལྷགས་ཏེ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །དེ་ལྟར་ཉན་ཐོས་དང ། བྱང་ཆུབ་སེམས་དཔའ་དང ། ལྷ་དང ། མི་དང ། ལྷ་མ་ཡིན་དང ། ནམ་མཁའ་ལྡིང་ལ་སོགས་པ་སྡེ་བརྒྱད་པོ་དེ་དག་སྤྲིན་བཞིན་དུ་འདུས་པ་སེམས་རྩེ་གཅིག་ཏུ་བྱས་ནས་ཐལ་མོ་སྦྱར་ཏེ་མིག་མི་འཛུམས་པས་བཅོམ་ལྡན་འདས་ཀྱི་ཞལ་ཏུ་བལྟ་ཞིང་དམ་པའི་ཆོས་བསྟན་པར་མོས་པས་གསོལ་བ་འདེབས་སོ། །དེ་ནས་བཅོམ་ལྡན་འདས་ཀྱི་ཕྱི་དྲོའི་དུས་ཀྱི་ཚེ་ཏིང་ངེ་འཛིན་ལས་བཞེངས་ཏེ་འཁོར་འདུས་པ་མང་པོ་ལ་གཟིགས་ནས་ཚིགས་སུ་བཅད་པ་འདི་དག་གསུངས་སོ། །མདོ་སྡེའི་་\?\་དབང་པོ་སྟེ། །མཉན་ན་ཤིན་ཏུ་ཟབ་པ་དང ། །ཡོངས་སུ་བརྟགས་ན་ཟབ་པ་ཉིད། །གསེར་འོད་དམ་པ་འདི་འཆད་དོ། །ཕྱོགས་བཞིར་སངས་རྒྱས་རྣམས་ཀྱིས་ནི། ། བྱིན་གྱིས་རླབས་ཀྱིས་བྱིན་བརླབས་པ། །མི་འཁྲུགས་པས་ནི་ཤར་ཕྱོགས་སུ། །རིན་ཆེན་ཏོག་གིས་ལྷོ་ཕྱོགས་སུ། །འོད་དཔག་མེད་ཀྱིས་ནུབ་ཕྱོགས་སུ། །རྔ་སྒྲ་ཡིས་ནི་བྱང་ཕྱོགས་སུ། །སྡིག་པ་ཐམས་ཅད་གཞིག་པའི་ཕྱིར། །བཤད་པ་དམ་པ་བཀྲ་ཤིས་པ། །སྡིག་པའི་ལས་རྣམས་ཟད་བྱེད་པ། །བདེ་བ་ཐམས་ཅད་སྦྱིན་བྱེད་པ། །སྡུག་
220b
བསྔལ་ཐམས་ཅད་འཇིག་བྱེད་པ། །ཐམས་ཅད་མཁྱེན་པ་ཉིད་ཀྱི་གཞི། །དཔལ་ཀུན་གྱིས་ནི་ལེགས་པར་བརྒྱན། །བྱིན་གྱིས་བརླབས་ཏེ་བརྗོད་པར་བྱ། །སེམས་ཅན་གང་དག་དབང་པོ་ཉམས། །ཚེ་ཟད་པ་དང་ཚེ་ཉམས་དང ། །ཕུན་སུམ་ཚོགས་མིན་གང་ཆགས་དང ། །ལྷ་རྣམས་རྒྱབ་ཀྱིས་ཕྱོགས་པ་དང ། །མཛའ་སྡུག་སྐྱེ་བོ་སྡང་བ་དང ། །བྲམ་ཟེ་ལ་ ་གཙེས་པ་དང ། །ཕན་ཚུན་མཐུན་པ་མ་ཡིན་དང ། །ནོར་འགྲིབས་བས་ནི་གནོད་པ་དང ། །མྱ་ངན་ངལ་དང་གནོད་པ་དང ། །འཇིགས་པ་དང་ནི་ཕོངས་པ་དང ། །གཟའ་དང་རྒྱུ་སྐར་བྱེད་སྟེམས་དང ། །མི་བཟད་གདོན་གྱིས་ཉེན་པ་དང ། །མྱ་ངན་ངལ་ལས་བྱུང་བ་ཡི། །རྨི་ལམ་སྡིག་པ་མཐོང་ན་ཡང ། །དེ་ནི་རབ་ཁྲུས་གཙང་མ་ཡིན། །མདོ་སྡེའི་དམ་པ་མཉན་པར་བྱ། །གང་དག་ཡིད་དགེ་སེམས་དྭང་ཞིང ། །གོས་གཙང་རྣམས་ཀྱིས་རབ་བརྒྱན་ཏེ། །ཟབ་མོ་སངས་རྒྱས་སྤྱོད་ཡུལ་བ། །མདོ་འདི་ཉན་པར་བྱེད་ན་ནི། །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་ཀུན་གྱི་གནོད་པ་དག་།ཤིན་ཏུ་མི་བཟད་འདི་འདྲ་བ། །དེ་དག་རྟག་ཏུ་ཞི་བར་འགྱུར། །འཇིག་རྟེན་སྐྱོང་བ་བདག་ཉིད་དང ། །བློན་པོའི་ཚོགས་ཀྱི་དབང་ཕྱུག་བཅས། །གནོད་སྦྱིན་བྱེ་བ་དུ་མ་ཡིས། །དེ་དག་ལ་ནི་སྲུང་བར་བྱེད། །ལྷ་མོ་ཆེན་མོ་དབྱངས་ཅན་དང ། །ནཻ་རཉྫ་ནར་གནས་པ་དང ། །འབྱུང་པོའི་མ་མོ་འཕྲོག་མ་
221a
༄#། །དང། །ས་ཡི་ལྷ་མོ་བརྟན་མ་དང ། །ཚངས་པའི་དབང་དང་ལྷ་དབང་དང ། །ཀླུ་དབང་མཐུ་ཆེན་རྣམས་དང་ནི། །མི་འམ་ཅི་དབང་ལྷ་མིན་དབང ། ། དེ་བཞིན་ནམ་མཁའ་ལྡིང་དབང་རྣམས། །སྡེ་དང་སྟོབས་དང་བཞོན་པ་དང ། །བཅས་ཏེ་དེ་དག་དེར་ལྷགས་ནས། །ཉིན་དང་མཚན་མོ་མི་གཡེལ་བར། །དེ་དག་ལ་ནི་སྲུང་བར་བྱེད། །ཟབ་མོ་སངས་རྒྱས་སྤྱོད་ཡུལ་བ། །སངས་རྒྱས་ཀུན་གྱི་གསང་བ་སྟེ། །བསྐལ་པ་བྱེ་བར་རྙེད་དཀའ་བ། །མདོ་འདི་རབ་ཏུ་བཤད་པར་བྱ། །གང་དག་མདོ་འདི་ཉན་པ་དང ། །གང་དག་གཞན་ལ་ཐོས་བྱེད་དང ། །གང་དག་རྗེས་སུ་ཡི་རང་དང ། །གང་དག་མཆོད་པར་བྱེད་པ་རྣམས། །དེ་དང་ལྷ་དང་ཀླུ་དག་དང ། །མི་དང་མི་འམ་ཅི་དག་དང ། །ལྷ་མིན་གནོད་སྦྱིན་དུ་མ་ཡིས། །བསྐལ་བ་བྱེ་བར་མཆོད་པར་འགྱུར། །སྲོག་ཆགས་བསོད་ནམས་བྱེད་པ་རྣམས། །དེ་དག་བསོད་ནམས་ཕུང་པོ་ནི། །མཐའ་ཡས་གྲངས་ཀྱང་མེད་པ་དང ། །བསམ་གྱིས་མི་ཁྱབ་སྐྱེ་བར་འགྱུར། །ཕྱོགས་བཅུའི་རྫོགས་པའི་སངས་རྒྱས་དང ། །དེ་བཞིན་ཟབ་མོར་སྤྱོད་པ་ཡི། །བྱང་ཆུབ་སེམས་དཔའ་རྣམས་ཀྱིས་ཀྱང ། །རབ་ཏུ་གཟུང་བར་འགྱུར་བ་ཡིན། །གཙང་མའི་གོས་རྣམས་རབ་བགོས་ལ། །དྲི་ཞིམ་པ་ཡི་གོས་འཆང་ཞིང ། །བྱམས་པའི་སེམས་ནི་ཉེར་
221b
གཞག་ནས། །གཡེལ་བ་མེད་པར་མཆོད་པར་བྱས། །རང་གི་སེམས་ནི་དྲི་མེད་ཅིང ། །རྒྱ་ཆེ་བར་ཡང་རབ་བྱེད་ལ། །སེམས་ཀྱང་ཤིན་ཏུ་དྭང་བྱེད་ཀྱི། །མདོ་སྡེ་དམ་པ་མཉན་པར་གྱིས། །གང་དག་མདོ་འདི་ཉན་པ་ནི། །དེ་དག་མི་ནང་ལེགས་པར་འོངས། །མི་ཡི་སྲིད་པ་ལེགས་པར་ཐོབ། །འཚོ་བ་བདེ་བས་འཚོ་བར་འགྱུར། །གང་གི་རྣ་བའི་བུ་གར་ཡང ། ། བཤད་པ་འདི་ནི་གྲགས་འགྱུར་བ། །དེ་དག་དགེ་རྩ་སྦྱངས་པ་སྟེ། །སངས་རྒྱས་མང་པོས་རབ་ཏུ་བསྔགས། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། གླེང་གཞིའི་ལེའུ་ཞེས་བྱ་བ་སྟེ་དང་པོའོ།། །།དེའི་ཚེ་དེའི་དུས་ན་རྒྱལ་པོའི་ཁབ་ཀྱི་གོང་ཁྱེར་ཆེན་པོ་ན། བྱང་ཆུབ་སེམས་དཔའ་སེམས་དཔའ་ཆེན་པོ་མཛེས་པའི་ཏོག་ཅེས་བྱ་བ།་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ལ་རིམ་གྲོར་བྱས་པ་ཞིག་གནས་པ་དེ་འདི་སྙམ་དུ་སེམས་ཏེ་རྒྱུ་གང་དང ། རྐྱེན་གང་གིས་བཅོམ་ལྡན་འདས་ཤཱཀྱ་ཐུབ་པ། འདི་ལྟ་སྟེ། ལོ་བརྒྱད་ཅུ་ཞིག་ཐུབ་སྟེ་འདི་ལྟར་སྐུ་ཚེ་ཐུང་སྙམ་ནས་དེའང་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཀྱང ། འདི་སྐད་དུ། རྒྱུ་གཉིས་དང ། རྐྱེན་གཉིས་ཀྱིས་ཚེ་རིང་བར་འགྱུར་ཏེ་གཉིས་གང་ཞེ་ན། འདི་ལྟ་སྟེ། སྲོག་གཅོད་པ་སྤངས་པ་དང ། །
222a
༄#། །ཁ་ཟས་རབ་ཏུ་སྦྱིན་པའོ་ཞེས་གསུངས་ཏེ། བཅོམ་ལྡན་འདས་ཤཱཀྱ་ཐུབ་པ་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་མང་པོ་ནས་སྲོག་གཅོད་པ་སྤངས་པར་གྱུར་པ་ནས་དགེ་བ་བཅུའི་ལས་ཀྱི་ལམ་གྱི་བར་དུ་ཡང་དག་པར་བླངས་ཏེ་གནས་པར་གྱུར། ཁ་ཟས་ཀྱང་ཕྱི་ནང་གི་དངོས་པོ་རྣམས་སེམས་ཅན་དག་ལ་ཡོངས་སུ་བཏང་སྟེ་ཆེར་ན་རང་གི་ལུས་ཀྱི་ཤ་དང ། ཁྲག་དང ། རུས་པ་དང ། རྐང་གིས་ཀྱང་སེམས་ཅན་ལྟོགས་པ་རྣམས་ཚིམ་པར་མཛད་ན་ཟས་གཞན་གྱིས་ལྟ་ཅི་སྨོས་སྙམ་མོ། །དེ་ནས་སྐྱེས་བུ་དམ་པ་དེས། སངས་རྒྱས་ལ་སོང་བའི་ཡིད་ལ་བྱེད་པ་དག་ལས་འདི་ལྟ་བུའི་ཚུལ་གྱིས་བསམ་པ་འདི་དག་སེམས་པ་ན། དེའི་ཁྱིམ་ཡངས་ཤིང་རྒྱ་ཆེ་བ། །བཻ་ཌཱུརྱ་སྔོན་པོ་ལས་གྲུབ་པ། ལྷའི་རིན་པོ་ཆེ་དུ་མས་སྤྲས་པ། དེ་བཞིན་གཤེགས་པས་ཁ་དོག་བསྒྱུར་བ། ལྷ་རྫས་ལས་འདས་པའི་སྤོས་ཀྱིས་ཁྱབ་པར་གྱུར་ཏོ། །ཁྱིམ་དེའི་ཕྱོགས་བཞི་ནས་ལྷའི་རིན་པོ་ཆེའི་ཁྲི་བཞི་བྱུང་བར་གྱུར་ཏེ་ཁྲི་དེ་དག་ལས་ཀྱང་ལྷའི་རས་བཅོས་བུ་རིན་པོ་ཆེའི་ཕྲུགས་རྣམས་བཏིང་བ་དག་བྱུང་བར་གྱུར་ཏོ། །ཁྲི་དེ་དག་ལས་ཀྱང་ལྷའི་མེ་ཏོག་པདྨ་རིན་པོ་ཆེ་དུ་མས་སྤྲས་པ། དེ་བཞིན་གཤེགས་པས་ཁ་དོག་བསྒྱུར་བ་དག་བྱུང་ངོ ། །པདྨ་དེ་དག་ལས་ཀྱང་སངས་རྒྱས་
222b
བཅོམ་ལྡན་འདས་བཞི་བྱུང་བར་གྱུར་ཏོ། །ཤར་ཕྱོགས་ནས་ནི་དེ་བཞིན་གཤེགས་པ་མི་འཁྲུགས་པ་བྱུང ། ལྷོ་ཕྱོགས་ནས་ནི་དེ་བཞིན་གཤེགས་པ་རིན་ཆེན་ཏོག་བྱུང ། ནུབ་ཕྱོགས་ནས་ནི་དེ་བཞིན་གཤེགས་པ་ཚེ་དཔག་མེད་བྱུང ། བྱང་ཕྱོགས་ནས་ནི་དེ་བཞིན་གཤེགས་པ་རྔ་སྒྲ་བྱུང་སྟེ། སེངྒེའི་ཁྲི་དེ་དག་ལས་སངས་རྒྱས་བཅོམ་ལྡན་འདས་དེ་དག་བྱུང་མ་ཐག་ཏུ་དེ་ནས་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་སྣང་བ་ཆེན་པོས་ཁྱབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྱི་བར་དང ། ཕྱོགས་བཅུ་ཀུན་ཏུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་བར་དག་སྣང་བས་ཁྱབ་པར་གྱུར། ལྷའི་མེ་ཏོག་དག་གི་ཆར་ཡང་བབ། ལྷའི་སིལ་སྙན་དག་གི་སྒྲའང་བྱུང་ངོ ། །སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སེམས་ཅན་ཐམས་ཅད་ལྷའི་བདེ་བ་དང་ལྡན་པར་གྱུར་ཏེ། སེམས་ཅན་དབང་པོ་མ་ཚང་བ་རྣམས་ནི་དབང་པོ་ཐམས་ཅད་དང་ལྡན་པར་གྱུར། སེམས་ཅན་དམུས་ལོང་དག་ནི་མིག་གིས་གཟུགས་རྣམས་མཐོང ། སེམས་ཅན་འོན་པ་དག་ནི་རྣ་བས་སྒྲ་རྣམས་ཐོས། སེམས་ཅན་སྨྱོན་པ་རྣམས་ནི་དྲན་པ་སོ་སོར་རྙེད། སེམས་ཅན་སེམས་རྣམ་པར་གཡངས་པ་དག་ནི་སེམས་རྣམ་པར་མི་གཡེང་བར་གྱུར། སེམས་ཅན་
223a
༄#། །སྒྲེན་མོ་རྣམས་ནི་གོས་བསྐལ་\?\་པར་གྱུར། སེམས་ཅན་བཀྲེས་པ་དག་ནི་ལྟོ་འགྲངས་པར་གྱུར། སེམས་ཅན་སྐོམ་པ་དག་ནི་སྐོམ་པ་དང་བྲལ་བར་གྱུར། །སེམས་ཅན་ནད་ཀྱིས་བཏབ་པ་དག་ནི་ནད་དང་བྲལ་བར་གྱུར། སེམས་ཅན་ལུས་ཀྱི་དབང་པོ་ཉམས་པ་དག་ནི་དབང་པོ་རྣམས་ཚོང་\?\་བར་གྱུར་ཏེ། འཇིག་རྟེན་དུ་ངོ་མཚར་རྨད་དུ་བྱུང་བའི་ཆོས་རྣམས་རྒྱ་ཆེར་བྱུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་སངས་རྒྱས་བཅོམ་ལྡན་འདས་དེ་དག་མཐོང་ནས་ངོ་མཚར་རྨད་དུ་གྱུར་ཏེ། དེ་\?\་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ་དགའ་བ་དང ། ཡིད་བདེ་བ་སྐྱེས་ནས་སངས་རྒྱས་བཅོམ་ལྡན་འདས་དེ་དག་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་སངས་རྒྱས་བཅོམ་ལྡན་འདས་དེ་དག་རྣམས་ལས་རྗེས་སུ་དྲན་ལ་བཅོམ་ལྡན་འདས་ཤཱཀྱ་ཐུབ་པའི་ཡོན་ཏན་རྗེས་སུ་དྲན་ཞིང་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་ལ་ཐེ་ཚོམ་ཟ་བར་གྱུར་ཏེ། བཅོམ་ལྡན་འདས་ཤཱཀྱ་ཐུབ་པ་འདི་ལྟར་ལོ་བརྒྱད་ཅུ་ཞིག་ཐུབ་སྟེ་སྐུ་ཚེ་ཐུང་བ་འདི་ཇི་ལྟ་བུ། འདི་ཇི་ཞིག་སྙམ་དུ་བསམ་པ་དེ་སེམས་ཤིང་འདུག་པར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་དེ་དག་དགོངས་ཤིང་མཁྱེན་བཞིན་དུ་བྱང་ཆུབ་སེམས་དཔའ་མཛེས་པའི་ཏོག་དེ་ལ་འདི་
223b
སྐད་ཅེས་བཀའ་སྩལ་ཏོ། །རིགས་ཀྱི་བུ། ཁྱོད་འདི་སྙམ་དུ་བཅོམ་ལྡན་འདས་ཤཱཀྱ་ཐུབ་པ་འདི་ལྟར་སྐུ་ཚེ་ཐུང་ངོ་སྙམ་དུ་མ་སེམས་ཤིག་།དེ་ཅིའི་ཕྱིར་ཞེ་ན། རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་གཏོགས་པར་ལྷ་དང་བཅས་པ།་བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང ། བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན་ལྷ་དང ། མི་དང ། ལྷ་མ་ཡིན་དུ་བཅས་པ་ན། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སྐུ་ཚེའི་ཚད་གྱི་མཐའ་ཕྱི་མའི་མཐའི་མུའི་བར་དུའང་རྟོགས་པར་ནུས་པ་ངེད་ཀྱིས་སུ་ཡང་མ་མཐོང་ངོ ། །སངས་རྒྱས་བཅོམ་ལྡན་འདས་དེ་དག་གིས་དེ་བཞིན་གཤེགས་པའི་སྐུ་ཚེའི་ཚད་བཤད་པ་བརྗོད་མ་ཐག་ཏུ་དེ་ནས་དེའི་མོད་ལ་སངས་རྒྱས་ཀྱི་མཐུས་ལྷའི་བུ་འདོད་པ་ན་སྤྱོད་པ་རྣམས་དང ། གཟུགས་ན་སྤྱོད་པ་རྣམས་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོའི་བར་དག་དང ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་འདུས་ནས། བྱང་ཆུབ་སེམས་དཔའ་མཛེས་པའི་ཏོག་གི་ཁྱིམ་དེར་ལྷགས་སོ། །དེ་ནས་དེ་བཞིན་གཤེགས་པ་དེ་དག་གིས་ཐམས་ཅད་དང་ལྡན་པའི་འཁོར་དེ་ལ་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་
224a
༄#། །བཤད་པ་ཚིགས་སུ་བཅད་དེ་མདོར་བཀའ་སྩལ་པ། རྒྱ་མཚོའི་ཆུ་རྣམས་ཐམས་ཅད་ཀྱི། །ཐིགས་པ་དག་ནི་བགྲང་བར་ནུས། །ཤཱཀྱ་ཐུབ་པའི་སྐུ་ཚེའི་ཚད། །སུས་ཀྱང་བགྲང་བར་མི་ནུས་སོ། །རི་རབ་རྣམས་ནི་ཐམས་ཅད་ཀྱང ། །ཕྲ་རབ་རྡུལ་བརླགས་བགྲང་བར་ནུས། །ཤཱཀྱ་ཐུབ་པའི་སྐུ་ཚེའི་ཚད། །སུས་ཀྱང་བགྲང་བར་མི་ནུས་སོ། །ས་ལ་གང་དག་ཡོད་པ་ཡི། །རབ་ཏུ་ཕྲ་རྡུལ་ཇི་སྙེད་པ། །ཐམས་ཅད་བགྲང་བར་ནུས་སྲིད་ཀྱི། །རྒྱལ་བའི་སྐུ་ཚེའི་ཚད་མི་ནུས། །གལ་ཏེ་ལ་ལས་ནམ་མཁའ་ལ། །སྣ་འགའ་ཞིག་གིས་དཔག་འདོད་ཀྱང ། །ཤཱཀྱ་ཐུབ་པའི་སྐུ་ཚེའི་ཚད། །སུས་ཀྱང་བགྲང་བར་མི་ནུས་སོ། །རྫོགས་པའི་སངས་རྒྱས་འདི་སྲིད་བཞུགས།། བསྐལ་པ་དག་ནི་འདི་སྙེད་ཅིག་།བསྐལ་པ་བྱེ་བ་བརྒྱ་དག་ཅེས། །གྲངས་ནི་རྙེད་པར་མི་རུང་ངོ ། །གང་ཕྱིར་དེ་ཡི་བྱེད་རྒྱུ་གཉིས། །རྒྱུ་ཡང་རྣམ་པ་གཉིས་གསུངས་ཏེ། །གཞན་ལ་འཚེ་བ་སྤངས་པ་དང ། །ཁ་ཟས་མང་པོ་བྱིན་པ་སྟེ། །དེ་ཕྱིར་བདག་ཉིད་ཆེན་པོ་དེའི། །སྐུ་ཚེའི་ཚད་ནི་མི་རྙེད་དོ། །བསྐལ་པ་འདི་སྙེད་ཅིག་ཅེ་འམ། །གྲངས་མེད་པ་ཡང་དེ་བཞིན་ཏེ། །དེ་བས་ཐེ་ཚོམ་མེད་པར་འགྱུར། །ཐེ་ཚོམ་ཅུང་ཟད་མ་ཟ་ཞིག་།རྒྱལ་བའི་སྐུ་ཚེའི་ཐ་མ་ཡི། །གྲངས་ནི་གང་དུའང་མི་དམིགས་སོ། །དེ་ནས་བྱང་ཆུབ་སེམས་
224b
དཔའ་མཛེས་པའི་ཏོག་གིས་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་བཤད་པ་དེ་ཐོས་ནས། སངས་རྒྱས་བཅོམ་ལྡན་འདས་དེ་དག་ལ་འདི་སྐད་ཅེས་གསོལ་ཏོ། །ཇི་ལྟར་ན་བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པས་དེས་ལྟར་སྐུ་ཚེའི་ཚད་ཐུང་བར་བསྟན་པར་གྱུར་ཅེས་དེ་སྐད་གསོལ་པ་དང ། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་མཛེས་པའི་ཏོག་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དེ་ནི་སྙིགས་མ་རྣམ་པ་ལྔ་ཡི་འཇིག་རྟེན་དུ་སྐྱེ་དགུའི་ཚེའི་ཚད་ལོ་བརྒྱ་ཐུབ་པའི་དུས་སུ་བལྟམས་ནས། སེམས་ཅན་མོས་པ་དམན་པ། དགེ་བའི་རྩ་བ་དང ། དད་པ་ཆུང་བའི་སེམས་ཅན་དེ་དག་བདག་ཏུ་ལྟ་བ་དང ། སེམས་ཅན་དུ་ལྟ་བ་དང ། སྲོག་ཏུ་ལྟ་བ་དང ། གསོ་བར་ལྟ་བ་དང ། གང་ཟག་ཏུ་ལྟ་བ་དང ། ལོག་པར་ལྟ་བ་དང ། བདག་དང ། བདག་གིར་འཛིན་པ་དག་དང ། རྟག་པ་དང ། ཆད་པར་ལྟ་བ་ལ་སོགས་པའི་བྱིས་པ་སོ་སོའི་སྐྱེ་བོ་རྣམས་ལ་ཕན་འདོགས་པ་དང ། གཞན་ཡང ། མུ་སྟེགས་ཅན་རྣམས་ལ་ཡང་དག་པའི་ལྟ་བ་བསྐྱེད་པས་མྱུར་དུ་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་དེ་བཞིན་གཤེགས་པ་ཤཱཀྱ་ཐུབ་པ་དེས་སྐུ་ཚེའི་ཚད་ཐུང་བ་བསྟན་ཏོ། །གཞན་ཡང ། རིགས་ཀྱི་བུ། དེ་བཞིན་གཤེགས་པ་དེ་མྱ་ངན་ལས་
225a
༄#། །འདའ་བ་བསྟན་པས་སེམས་ཅན་རྣམས་དེ་ལ་དཀོན་པ་དང ། ཕྲད་པར་དཀའ་བའི་འདུ་ཤེས་དང ། །མྱ་ངན་དང ། སྡུག་བསྔལ་གྱི་འདུ་ཤེས་ལ་སོགས་པ་བསྐྱེད་པས་སངས་རྒྱས་བཅོམ་ལྡན་འདས་ཀྱིས་གསུངས་པའི་མདོ་འདི་དག་མྱུར་དུ་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བྱེད་པ་དང ། གཞན་དག་ལའང་རྒྱ་ཆེར་ཡང་དག་པར་སྟོན་པ་ལ་སྐུར་པ་འདེབས་པ་མེད་པར་འགྱུར་བས་དེའི་ཕྱིར་དེ་བཞིན་གཤེགས་པས་སྐུ་ཚེ་ཐུང་བར་བསྟན་ཏོ། །དེའང་དེ་བཞིན་གཤེགས་པ་རྟག་ཏུ་བཞུགས་ཤིང་མྱ་ངན་ལས་མི་འདའ་ན། སེམས་ཅན་རྣམས་གུས་པ་མེད་པ་དང ། ཕྲད་པར་དཀའ་བའི་འདུ་ཤེས་ཀྱང་མི་བསྐྱེད་པས་དེ་བཞིན་གཤེགས་པས་ ་པའི་མདོ་ཟབ་མོ་དག་འཛིན་ཅིང་ཀློག་པ་དང ། ཀུན་ཆུབ་པར་བྱེད་པ་དང ། གཞན་དག་ལའང་རྒྱ་ཆེར་ཡང་དག་པར་སྟོན་པར་མི་བྱེད་དོ། །དེ་ཅིའི་ཕྱིར་ཞེ་ན། དེ་ནི་བཅོམ་ལྡན་འདས་རྟག་ཏུ་འཇིག་རྟེན་ན་བཞུགས་པར་འཛིན་པའི་ཕྱིར་རོ། །རིགས་ཀྱི་བུ། དཔེར་ན། གང་ལ་ལ་ཞིག་ཕ་མ་ལ་ནོར་བུ་རིན་པོ་ཆེ་རྒྱས་པ་མང་དུ་ཡོད་པ་མཐོང་ནས།་ནོར་དེ་ལ་དཀོན་པ་དང ། ངོ་མཚར་གྱི་འདུ་ཤེས་མི་བསྐྱེད་དོ། །དེ་ཅིའི་ཕྱིར་ཞེ་ན། ཕ་མའི་ནོར་རྫས་དེ་ལ་རྟག་ཏུ་ཡོད་པའི་འདུ་ཤེས་སྐྱེ་བའི་ཕྱིར་རོ། །དེ་བཞིན་
225b
དུ་བཅོམ་ལྡན་འདས་རྟག་ཏུ་མྱ་ངན་ལས་མི་འདའ་ན་དེ་ལ་དཀོན་པ་དང ། ཕྲད་པར་དཀའ་བའི་འདུ་ཤེས་མི་འབྱུང་བའི་ཕྱིར་རོ། །རིགས་ཀྱི་བུ། གཞན་ཡང ། དཔེར་ན། གང་ལ་ལ་ཞིག་ཕ་མ་དབུལ་ཞིང་ནོར་དང་མི་ལྡན་པ་ཞིག་དེ་རྒྱལ་པོ་འམ། བློན་པོ་ཆེན་པོ་ཞིག་གི་གནས་སུ་ཕྱིན་ཏེ། དེ་དག་གི་བང་མཛོད་དང ། ནོར་དང ། རིན་པོ་ཆེ་ལ་སོགས་པ་མང་པོ་རྒྱས་པ་མཐོང་ན་དེ་དཀོན་པ་དང ། རྙེད་པར་དཀའ་བའི་འདུ་ཤེས་སྐྱེ་སྟེ་དབུལ་པོ་དེ་ནོར་བཙལ་བའི་ཐབས་བསྒྲུབ་པ་ལ་བརྩོན་པར་བྱེད་དོ། །དེ་ནི་དབུལ་བ་དང ། ཕོངས་པ་སྤངས་ཏེ་བདེ་བ་དང ། འབྱོར་པ་བསྒྲུབ་པར་འདོད་པའི་ཕྱིར་རོ། །རིགས་ཀྱི་བུ། དེ་བཞིན་དུ་དེ་བཞིན་གཤེགས་པ་མྱ་ངན་ལས་འདའ་བ་མཐོང་ན་དེ་དཀོན་པ་དང ། ཕྲད་པར་དཀའ་བ་དང།་མྱ་ངན་དང ། སྡུག་བསྔལ་གྱི་འདུ་ཤེས་ཀྱང་སྐྱེད་ཅིང་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་དུ་འབྱུང་བའང་བསྐལ་པ་གྲངས་མེད་པ་ན་ལན་འགའ་ཞིག་འབྱུང་སྟེ། ཇི་ལྟར་ཨུ་དུམ་བཱ་རའི་མེ་ཏོག་བརྒྱ་ལམ་ན་ཡང་འགའ་ཞིག་འབྱུང་བ་བཞིན་པས་སེམས་ཅན་རྣམས་དེ་ལ་དཀོན་པ་དང ། ཕྲད་པར་དཀའ་བའི་འདུ་ཤེས་བསྐྱེད་ཅིང་བཅོམ་ལྡན་འདས་དེ་ལ་གུས་པ་སྐྱེ་བར་འགྱུར། ཞལ་ནས་གསུངས་པའི་མདོ་རྣམས་ལའང་བདེན་པའི་འདུ་ཤེས་དང ། ཡོངས་སུ་གཟུང་བའི་འདུ་ཤེས་བསྐྱེད་
226a
༄#། །ཅིང་སྐུར་པ་འདེབས་པར་མི་བྱེད་དོ། །རིགས་ཀྱི་བུ། དེ་ལྟ་བས་ན་དེ་བཞིན་གཤེགས་པ་རྒྱུ་དེ་དང ། རྐྱེན་དེའི་ཕྱིར་འཇིག་རྟེན་ན་ཡུན་རིང་དུ་མི་ ་ཤིང་མྱུར་དུ་མྱ་ངན་ལས་འདའ་བར་མཛད་པས་དེ་བཞིན་གཤེགས་པ་རྣམས་ནི་ཐབས་མཁས་པ་ཕུན་སུམ་ཚོགས་པ་དེ་ལྟ་བུས་སེམས་ཅན་རྣམས་ཡོངས་སུ་སྨིན་པར་མཛད་དོ། །དེ་ནས་དེ་བཞིན་གཤེགས་པ་བཞི་པོ་དེ་དག་ཀྱང་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཛེས་པའི་ཏོག་དང ། བྱང་ཆུབ་ ་དཔའ་བརྒྱ་སྟོང་ཚད་མེད་པ་དང ། གཞན་ཡང ། སྲོག་ཆགས་བྱེ་བ་བརྒྱ་སྟོང་ཚད་མེད་པ་དང་ཐབས་གཅིག་ཏུ་བྱ་རྒོད་ཀྱི་ཕུང་པོའི་རི་ག་ལ་བ་དེར་སོང་སྟེ། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པའི་ཞབས་ལ་སྤྱི་བོས་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་ཇི་ལྟ་བུར་གྱུར་པ་དེ་དག་གསོལ་ནས། དེ་བཞིན་གཤེགས་པ་དེ་བཞིའང་བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་ཤཱཀྱ་ཐུབ་པ་བཞུགས་པར་བྱོན་ནས་ཕྱོགས་སོ་སོའི་གདན་གྱི་སྟེང་ན་བཞུགས་ཏེ་འཁོར་གྱི་བྱང་ཆུབ་སེམས་དཔའ་ལ་བཀའ་སྩལ་པ། རིགས་ཀྱི་བུ། སོང་ལ། བཅོམ་ལྡན་འདས་ཤཱཀྱ་ཐུབ་པ་ལ་གནོད་པ་དང ། ཉམ་ང་
226b
བ་ཆུང་ངམ། བསྐྱོད་པ་ཡང་ངམ། བདེ་བ་ལ་རིག་པར་གནས་སམ་ཞེས་གསོལ་ཅིག་།གཞན་ཡང ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་གསེར་འོད་དམ་པ་མདོ་སྡེའི་དབང་པོ་ཤིན་ཏུ་ཟབ་པ་འདི་སེམས་ཅན་ཐམས་ཅད་ལ་ཕན་པ་དང ། མུ་གེའི་ཡང་བ་ཡོངས་སུ་བསལ་ཏེ། ཐམས་ཅད་བདེ་བ་དང་ལྡན་པའི་ཕྱིར་འདི་བསྟན་པ་ལེགས་ཏེ་རྗེས་སུ་དགྱེས་པ་མཛད་དོ་ཞེས་ཀྱང་གསོལ་ཅིག་།དེ་ནས་སོ་སོའི་ཞབས་འབྲིང་ནས་མཆིས་པའི་བྱང་ཆུབ་སེམས་དཔའ་དེ་དག་གིས་བཅོམ་ལྡན་འདས་ཤཱཀྱ་ཐུབ་པ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ཏེ་བཅོམ་ལྡན་འདས་བཞི་པོ་དེ་དག་གིས་ཇི་སྐད་བཀའ་སྩལ་པ་དེ་བཞིན་དུ་གསོལ་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། བྱང་ཆུབ་སེམས་དཔའ་དེ་དག་ལ་ལེགས་སོ་ཞེས་བཀའ་སྩལ་ཏེ་ལེགས་སོ། །ལེགས་སོ། །དེ་བཞིན་གཤེགས་པ་བཞིས་ཀྱང་སེམས་ཅན་ཐམས་ཅད་ལ་ཕན་པ་དང ། བདེ་བའི་དོན་དུ་དམ་པའི་ཆོས་འདི་བཤད་པར་ང་ལ་བསྐུལ་བ་མཛད་པས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱ་རྒོད་ཕུང་པོའི་རི་ལ་ང་བཞུགས་ཏེ། །མདོ་སྡེ་རིན་ཆེན་འདི་ནི་འཆད་མཛད་ཀྱང ། །སྐྱེ་བོ་མང་
227a
༄#། །པོ་དེ་དག་བསྒྲལ་བའི་ཕྱིར། །ཡོངས་སུ་མྱ་ངན་འདའ་བའང་སྟོན་པ་མཛད། །བྱིས་པ་ལྟ་བ་ལོག་པར་གྱུར་པ་རྣམས། །ང་ཡི་བསྟན་ལ་མོས་པར་མི་བྱེད་པ། །དེ་དག་ཀུན་ཏུ་བསྒྲལ་བའི་དོན་གྱི་ཕྱིར། །ཡོངས་སུ་མྱ་ངན་འདའ་བའང་སྟོན་མཛད་དོ། །དེ་ནས་དེའི་ཚེ་འཁོར་དེར་སློབ་དཔོན་ལུང་སྟོན་པ་བྲམ་ཟེ་ཀཽཎྜིནྱ་ཞེས་བྱ་བ་དང ། བྲམ་ཟེ་སྟོང་ཕག་དུ་མས་བཅོམ་ལྡན་འདས་ལ་མཆོད་པ་བྱས་ཏེ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་ཆེན་པོའི་སྒྲ་ཐོས་ནས་འཕྲལ་དུ་ངུས་ཏེ་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་བཅོམ་ལྡན་འདས་ལ་གསོལ་པ། གལ་ཏེ། བཅོམ་ལྡན་འདས། སེམས་ཅན་ཐམས་ཅད་ལ་ཐུགས་བརྩེ་བ། ཐུགས་རྗེ་ཆེན་པོ་དང་ལྡན་པ། ཕན་པར་བཞེད་པ། སེམས་ཅན་ཐམས་ཅད་ལ་ཕ་མ་ལྟ་བུ་མི་མཉམ་པ་དང་མཉམ་པར་གྱུར་པ། ཟླ་བ་ལྟ་བུ་སྣང་བ་མཛད་པ། ཤེས་རབ་དང ། ཡེ་ཤེས་ཆེན་པོའི་ཉི་མ་ཤར་བ་ལྟ་བུ་ལགས་ཤིང ། གལ་ཏེ་ཁྱོད་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་ན། བདག་ལ་དམ་པ་གཅིག་སྩལ་དུ་གསོལ། བཅོམ་ལྡན་འདས་ཅང་མི་གསུང་བར་གྱུར་ཏོ། །དེ་ནས་སངས་རྒྱས་ཀྱི་མཐུས་འཁོར་དེར་ལིཙྪ་བཱི་གཞོན་ནུ་སེམས་ཅན་ཐམས་ཅད་ཀྱི་མཐོང་ན་དགའ་
227b
བ་ཞེས་བྱ་བ་དེ་སྤོབས་པ་སྐྱེས་ནས་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱ་ལ་འདི་སྐད་ཅེས་སྨྲས་སོ། །ཅི་བྲམ་ཟེ་ཆེན་པོ། ཁྱོད་བཅོམ་ལྡན་འདས་ལ་དམ་པ་གཅིག་གསོལ་ལམ།་བདག་གིས་ཁྱོད་ལ་དམ་པ་སྦྱིན་ནོ། །བྲམ་ཟེས་སྨྲས་པ། ལིཙྪ་བཱི་གཞོན་ནུ་བདག་ནི་བཅོམ་ལྡན་འདས་ལ་མཆོད་པ་དང ། རིང་བསྲེལ་གྱི་ཕྱི་མ་དགོས་པའི་ཕྱིར། བཅོམ་ལྡན་འདས་ཀྱི་རིང་བསྲེལ་ཡུངས་འབྲུ་ཙམ་ལ་བརྟེན་པར་འདོད་དོ། །རིང་བསྲེལ་ཡུངས་འབྲུ་ཙམ་དེ་མ་བརྗེད་པར་མཆོད་ན་སུམ་ཅུ་རྩ་གསུམ་པའི་ལྷ་རྣམས་ཀྱི་བདག་པོ་འབའ་ཞིག་ཐོབ་ཅེས་གྲག་གོ་།ཀྱེ་ལིཙྪ་བཱི་གཞོན་ནུ། གསེར་འོད་དམ་པའི་མདོ་ཉན་ཐོས་དང ། རང་སངས་རྒྱས་ཐམས་ཅད་ཀྱིས་ཤེས་པར་དཀའ་བ། ཁོང་དུ་ཆུད་པར་དཀའ་བ་དེ་ལྟ་བུའི་མཚན་ཉིད་དང ། ཡོན་ཏན་དང་ལྡན་པ་གསེར་འོད་དམ་པའི་མདོ་འཆད་ཅེས་གྲག་གི་ཉོན་ཅིག་།ཀྱེ་ལིཙྪ་བཱི་གཞོན་ནུ། གསེར་འོད་དམ་པའི་མདོ་ནི་དེ་ལྟར་ཤེས་པར་དཀའ་ཞིང་རྟོགས་པར་དཀའ་བས་ན་ཁོ་བོ་ཅག་མཐའ་འཁོབ་ཀྱི་གླིང་གི་བྲམ་ཟེ་རྣམས་ནི་གང་བཅངས་ནས་སེམས་ཅན་རྣམས་མྱུར་དུ་སུམ་ཅུ་རྩ་གསུམ་པའི་བདག་པོ་ཐོབ་པར་འགྱུར་བའི་རིང་བསྲེལ་ཡུངས་འབྲུ་ཙམ་ཟ་མ་ཏོག་གི་ནང་དུ་བཅུག་ལ་བཅངས་ཀྱང་རུང་ངོ ། །ཀྱེ་ལིཙྪ་བཱི་གཞོན་ནུ། ཁྱོད་ཅི། དེ་བཞིན་གཤེགས་པ་
228a
༄#། །ལ་རིང་བསྲེལ་ཡུངས་འབྲུ་ཙམ་གསོལ་ནས་རིང་བསྲེལ་ཟ་མ་ཏོག་གི་ནང་དུ་བཅུག་སྟེ་བཅངས་པས་སེམས་ཅན་རྣམས་སུམ་ཅུ་རྩ་གསུམ་པའི་བདག་པོ་ཐོབ་པར་མི་འདོད་དམ། ཀྱེ་ལིཙྪ་བཱི་གཞོན་ནུ། ཁོ་བོས་ནི་དམ་པ་དེ་ལྟ་བུ་གསོལ་ཏོ། །དེ་ནས་ལིཙྪ་བཱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བས་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱ་ལ་ཚིགས་སུ་བཅད་པ་དག་གིས་སླར་སྨྲས་པ། །ནམ་ཞིག་གངྒཱའི་ཆུ་རྒྱུན་ལ། །མེ་ཏོག་རྣམས་ནི་སྐྱེ་བ་དང ། །བྱ་རོག་དམར་པོར་འགྱུར་པ་དང ། །ཁུ་བྱུག་དུང་མདོག་འདྲ་འགྱུར་དང ། །འཛམ་བུར་ཏ་ལའི་འབྲུ་ཆགས་དང ། །བྲ་གོར་ཨ་མྲའི་དོག་པ་ཆགས། །དེ་ཡི་ཚེ་ན་ཡུངས་འབྲུ་ཙམ། །རིང་བསྲེལ་དུ་ནི་སྩལ་བར་འགྱུར། །ནམ་ཞིག་རུས་སྦལ་སྤུ་རྣམས་ལས། །གོས་སུ་ལེགས་པར་བཏགས་གྱུར་ཏེ། །དགུན་གྱི་གྲང་བ་སེལ་བྱེད་པ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་སྦྲང་བུའི་རྐང་ལག་ལས། །ཡང་ཐོག་ལེགས་པར་བྱས་གྱུར་ཏེ། །བརྟན་ཅིང་རབ་ཏུ་མི་གཡོ་ན། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་སྲིན་བུ་པད་མ་ཀུན། །སོ་ནི་དཀར་པོར་སྐྱེས་གྱུར་ཏེ། །རྣོ་ཞིང་ཆེན་པོར་གྱུར་པ་ན། །དེ་ཚེ་རིང་བསྲེལ་ཡོད་པར་འགྱུར། །མཐོ་རིས་སུ་ནི་འཛེག་པའི་ཕྱིར། །ནམ་ཞིག་རི་
228b
བོང་རྣ་རྣམས་ལས། །སྐས་ནི་ལེགས་པར་བྱས་གྱུར་པ། །དེ་ཚེ་རིང་བསྲེལ་ཡོད་པར་གྱུར། །ནམ་ཞིག་སྐས་དེར་རབ་འཛེགས་ཏེ། །བྱི་བས་ཟླ་བ་ཟ་བ་དང ། །སྒྲ་གཅན་ལ་ཡང་གནོད་བྱེད་པ། །དེ་ཚེ་རིང་བསྲེལ་ཡོད་པར་འགྱུར། །གྲོང་ན་རྒྱུ་བའི་སྦྲང་བུ་ཡིས། །ནམ་ཞིག་རྫ་མའི་ཆང་འཐུངས་ཏེ། །ཁྱིམ་ན་གནས་པར་བྱེད་འགྱུར་བ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་བོང་བུ་བདེར་འགྱུར་ལ། །མཆུ་དམར་བིམ་པ་འདྲར་གྱུར་ཅིང ། །གླུ་གར་རྣམས་ལ་མཁས་གྱུར་པ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་འུག་པ་བྱ་རོག་རྣམས། །དབེན་པར་སོང་ནས་རྩེ་བ་དང ། །ཕན་ཚུན་མཐུན་པར་འགྱུར་བ་ན། །དེ་ཚེ་རིང་བསྲེལ་ཡོད་པར་འགྱུར། །པ་ལ་ཤ་ཡི་ལོ་མ་རྣམས། །རིན་ཆེན་སྣ་གསུམ་གདུགས་གྱུར་ཏེ། །ཆར་འབབ་སྐྱབས་སུ་ནམ་འགྱུར་བ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་རྒྱ་མཚོའི་གྲུ་བོ་ཆེ། །འཁྲུལ་འཁོར་དང་ནི་གཡོར་མོར་གཅས། ། ཐང་ལ་ཕྱུང་སྟེ་འགྲོ་བ་ན། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་བྱ་ནི་འུག་པ་རྣམས། །རི་བོ་སྤོས་ཀྱི་ངད་ལྡང་བ། །མཆུ་ལ་ཐོགས་ཏེ་འགྲོ་འགྱུར་བ། །དེ་ཚེ་རིང་བསྲེལ་ཡོད་པར་འགྱུར། །སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས་ཚིགས་སུ་བཅད་པ་འདི་དག་ཐོས་ནས། ལིཙྪ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ལ་ཚིགས་
229a
༄#། །སུ་བཅད་པ་དག་གིས་སླར་སྨྲས་པ། ལེགས་སོ་ལེགས་སོ་གཞོན་ནུ་མཆོག་།རྒྱལ་བའི་སྲས་པོ་ཚིག་པོ་ཆེ། །དཔའ་ཞིང་ཐབས་ལ་མཁས་ལྡན་པ། ། ལུང་བསྟན་པ་ནི་དམ་པ་ཐོབ། །འཇིག་རྟེན་མགོན་པོ་སྐྱོབ་པ་པོ། །དེ་བཞིན་གཤེགས་པའི་ཆེ་བ་ཉིད། །བསམ་གྱིས་མི་ཁྱབ་གོ་རིམས་བཞིན། །གཞོན་ནུས་བདག་ལ་མཉན་པར་གྱིས། །སངས་རྒྱས་ཡུལ་ནི་བསམ་མི་ཁྱབ། །དེ་བཞིན་གཤེགས་རྣམས་མཚུངས་པ་མེད། །སངས་རྒྱས་ཐམས་ཅད་རྟག་ཏུ་ཞི། །སངས་རྒྱས་ཐམས་ཅད་ཡང་དག་འབྱུང་།། སངས་རྒྱས་ཐམས་ཅད་ཁ་དོག་མཚུངས། །འདི་ནི་སངས་རྒྱས་ཆོས་ཉིད་ཡིན། །བཅོམ་ལྡན་དེ་ནི་བཅོས་མ་མིན། །དེ་བཞིན་གཤེགས་པ་མ་སྐྱེས་ཏེ། །རྡོ་རྗེ་ལྟ་བུར་སྲ་བའི་སྐུ། །སྤྲུལ་པའི་སྐུ་ནི་སྟོན་པར་མཛད། །དྲང་སྲོང་ཆེན་པོའི་རིང་བསྲེལ་ནི། །ཡུང་འབྲུ་ཙམ་ཞེས་བྱ་བ་མེད། །སྐུ་ལ་རུས་པ་ཁྲག་མེད་ན། །རིང་བསྲེལ་ཡོད་པར་ག་ལ་འགྱུར།། སེམས་ཅན་རྣམས་ལ་ཕན་པའི་ཕྱིར། །ཐབས་ཀྱིས་རིང་བསྲེལ་བཞག་པར་མཛད། །རྫོགས་པའི་སངས་རྒྱས་ཆོས་ཀྱི་སྐུ། །དེ་བཞིན་གཤེགས་པ་ཆོས་ཀྱི་དབྱིངས། །ཆོས་སྟོན་མཛད་པ་ཅི་འདྲ་པ། །བཅོམ་ལྡན་འདས་ཀྱི་སྐུ་དེ་འདྲ། །བདག་གིས་འདིས་ཐོས་ཤེས་ནས་ནི། །བདག་གིས་དམ་པ་གསོལ་བར་བྱས། །དེ་ཉིད་ཁོ་ན་ལུང་བསྟན་ཕྱིར།།
229b
གཏམ་གླེང་བ་ནི་བདག་གིས་བྱས། །དེ་ནས་ལྷའི་བུ་སུམ་ཁྲི་ཉིས་སྟོང་གིས་དེ་བཞིན་གཤེགས་པའི་སྐུ་ཚེའི་ཚད་བསྟན་པ་ཟབ་མོ་དེ་ལྟ་བུ་འདི་ཐོས་ནས་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་ཡིད་ཀྱིས་ཀུན་ཏུ་རྟོག་པ་རབ་དགའ་ནས་སྒྲ་སྐད་མཐུན་པར་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །སེམས་ཅན་ཡོངས་སུ་སྨིན་མཛད་ཕྱིར། །ཡོངས་སུ་མྱ་ངན་འདའ་བ་སྟོན། །སངས་རྒྱས་བཅོམ་ལྡན་བསམ་མི་ཁྱབ། །དེ་བཞིན་གཤེགས་པ་རྟག་པའི་སྐུ། །སེམས་ཅན་རྣམས་ལ་ཕན་བྱའི་ཕྱིར། །བཀོད་པ་རྣམ་པ་སྣ་ཚོགས་སྟོན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཛེས་པའི་ཏོག་གིས་སངས་རྒྱས་བཅོམ་ལྡན་འདས་དེ་དག་དང ། སྐྱེས་བུ་དམ་པ་དེ་གཉིས་ལས་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་བསྟན་པ་ཐོས་ནས་སྟན་ལས་ལངས་ཏེ་ཐལ་མོ་སྦྱར་བར་བཏུད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་སངས་རྒྱས་བཅོམ་ལྡན་འདས་དེ་དག་མྱ་ངན་ལས་མི་འདའ་ལ། རིང་བསྲེལ་འཇིག་རྟེན་དུ་བཞག་པའང་མ་མཆིས་ན། ཅིའི་སླད་དུ་མདོ་སྡེ་དག་ལས་སངས་རྒྱས་མྱ་ངན་ལས་འདའ་ཞིང་རིང་བསྲེལ་འཇིག་རྟེན་དུ་བཞག་པ་ལ་ལྷ་དང ། མི་གུས་པ་དང་བཅས། བཀུར་
230a
༄#། །སྟི་དང་བཅས་པས་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་རིང་བསྲེལ་འཇིག་རྟེན་དུ་བཞག་པ་ལ་ལྷ་དང ། མིར་བཅས་པའི་འཇིག་རྟེན་གྱི་མཆོད་པ་བྱས་ན། བསོད་ནམས་དཔག་ཏུ་མེད་པ་འཐོབ་བོ་ཞེས་ཀྱང་གསུངས་ལ། ད་འདིར་ནི་དེ་དག་མེད་དོ་ཞེས་ཀྱང་གསུངས་པ་དེ་ཇི་ལྟ་བུ་ལགས། བཅོམ་ལྡན་འདས། ཐུགས་བརྩེ་བས་རྣམ་པར་དབྱེ་ཞིང་བཤད་པར་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཛེས་པའི་ཏོག་ལ་སོགས་པའི་འཁོར་འདུས་པ་དེ་དག་ལ་བཀའ་སྩལ་པ། བཅོམ་ལྡན་འདས་མྱ་ངན་ལས་འདས་ཏེ་རིང་བསྲེལ་འཇིག་རྟེན་དུ་བཞག་ཅེས་གསུངས་པའང་དགོངས་པའི་དོན་དུ་བསྟན་པར་ཤེས་པར་བྱའོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འདི་བཅུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཡང་དག་པ་དང ། བདེན་པའི་ཚུལ་དུ་མྱ་ངན་ལས་འདས་པ་ཆེན་པོ་ཡོད་པར་གསུངས་པར་ཤེས་པར་བྱའོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱིས་ཉོན་མོངས་པའི་སྒྲིབ་པ་དང ། ཤེས་བྱའི་སྒྲིབ་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པ་
230b
རྣམས་ཀྱི་གང་ཟག་ལ་བདག་མེད་པ་དང ། ཆོས་ལ་བདག་མེད་པར་མངོན་དུ་མཁྱེན་པས་མྱ་ངན་ལས་འདས་པ་ཞེས་བྱ་བ་དང ། ལུས་ཀྱི་གནས་དང ། ཆོས་ཀྱི་གནས་སུ་གྱུར་པས་མྱ་ངན་འདས་པ་ཞེས་བྱ་བ་དང ། སེམས་ཅན་རྣམས་འདུལ་བར་མཛད་པ་ལྷུན་གྱིས་གྲུབ་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། ཡང་དག་པ་ཉིད་མངོན་དུ་གྱུར་པས་མཚན་ཉིད་ཐ་དད་པ་མེད་པས་ཆོས་ཀྱི་སྐུར་མཉམ་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། འཁོར་བ་དང ། མྱ་ངན་ལས་འདས་པའི་རང་བཞིན་གཉིས་སུ་མེད་པར་མངོན་དུ་གཟིགས་པས་མྱ་ངན་ལས་འདས་པ་ཞེས་བྱ་བ་དང ། ཆོས་ཐམས་ཅད་ཀྱི་ངོ་བོ་ཉིད་རྟོགས་པས་རྣམ་པར་དག་པ་མངོན་དུ་གྱུར་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། ཆོས་ཐམས་ཅད་སྐྱེ་བ་དང ། འཇིག་པ་མེད་པའི་སྒྲུབ་པ་ལ་མཁས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་ཉིད་དང ། ཆོས་ཀྱི་དབྱིངས་ཡང་དག་པའི་མཐའ་མཉམ་པའི་ཡེ་ཤེས་ཐོབ་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། ཆོས་ཐམས་ཅད་ཀྱི་དེ་བཞིན་ཉིད་དང ། མྱ་ངན་ལས་འདའ་བའི་དེ་བཞིན་ཉིད་ལ་བྱེ་བྲག་མེད་པར་མཁྱེན་པས་མྱ་ངན་ལས་འདས་པ་ཞེས་བྱའོ། །གཞན་ཡང ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འདི་བཅུས་
231a
༄#། །ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཡང་དག་པ་དང ། བདེན་པའི་ཚུལ་དུ་མྱ་ངན་ལས་འདའ་བ་ཆེན་པོ་ཡོད་པར་གསུངས་སོ། །བཅུ་གང་ཞེ་ན། འདི་ལྟ་སྟེ། ཉོན་མོངས་པ་ཐམས་ཅད་ཀྱི་གཞི་ནི་མོས་པ་དང ། འདོད་པ་སྟེ་གང་མོས་པ་ལས་འདོད་པ་སྐྱེའོ། ། སངས་རྒྱས་བཅོམ་ལྡན་འདས་རྣམས་ནི་མོས་པ་དང ། འདོད་པ་ལས་བྲལ་བའི་ཕྱིར་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པ་རྣམས་ནི་མོས་པ་དང ། འདོད་པ་ཐམས་ཅད་དང་བྲལ་ནས་ཆོས་གང་ཡང་མི་ལེན་པའི་ཕྱིར་གཟུང་བ་མེད་པ་དང ། འགྲོ་བ་དང ། འོང་བ་དང ། ལེན་པ་མེད་པ་སྟེ་དེའི་ཕྱིར་མྱ་ངན་ལས་འདས་པ་ཞེས་བྱ་བ་དང ། འགྲོ་བ་དང ། འོང་བ་དང ། བླང་བར་བྱ་བ་མེད་པ་དེ་ནི་ཆོས་ཀྱི་སྐུ་སྟེ་སྐྱེ་བ་དང ། འགོག་པ་མེད་པའོ། །སྐྱེ་བ་དང ། འགོག་པ་མེད་པ་དེ་ཉིད་ལ་མྱ་ངན་ལས་འདས་པ་ཞེས་བྱ་བ་དང ། སྐྱེ་བ་དང ། འགོག་པ་མེད་པ་དེ་ཚིག་གིས་མི་བརྗོད་པ་ཚིག་གི་ལམ་ཆད་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། བདག་དང ། གང་ཟག་མེད་ཅིང་སྐྱེ་བ་དང ། འགག་པའི་ཆོས་ཙམ་ལ་གནས་འཕོ་བ་ཐོབ་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། ཉོན་
231b
མོངས་པ་དང ། ཉེ་བའི་ཉོན་མོངས་པ་དག་གློ་བུར་ཉིད་དུ་གཟིགས་ཤིང་གང་ཆོས་ཉིད་དེ་ནི་གནས་པ་སྟེ་འགྲོ་བ་དང ། འོང་བ་མེད་པར་སངས་རྒྱས་བཅོམ་ལྡན་འདས་ཀྱིས་མངོན་དུ་གྱུར་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། ཡང་དག་པ་ནི་བདེན་པ་སྟེ་དེ་ལས་གཞན་པ་ནི་བརྫུན་པའོ། །གང་བདེན་པ་ཉིད་ནི་ཡང་དག་པ་སྟེ་ཡང་དག་པ་ཉིད་ནི་དེ་བཞིན་གཤེགས་པ་ཉིད་པས་དེ་ལ་མྱ་ངན་ལས་འདས་པ་ཞེས་བྱ་བ་དང ། ཡང་དག་པའི་མཐའ་ཉིད་ནི་སྤྲོས་པ་མེད་པ། དེ་བཞིན་གཤེགས་པ་ཉག་ཅིག་གིས་ཡང་དག་པའི་མཐའ་མངོན་དུ་གྱུར་ཅིང་སྤྲོས་པ་ཉེ་བར་ཞི་བ་དེ་ཉིད་ལ་མྱ་ངན་ལས་འདས་པ་ཞེས་བྱ་བ་དང ། མི་སྐྱེ་བ་ནི་བདེན་པ། སྐྱེ་བ་ནི་བརྫུན་པ་ཡིན་པས་ན་བྱིས་པ་སོ་སོའི་སྐྱེ་བོ་རྣམས་ནི་འཁོར་བའི་འདམ་དུ་བྱིང་བ། དེ་བཞིན་གཤེགས་པའི་སྐུ་ནི་བདེན་པ་ཡང་དག་པ་མ་ཡིན་པ་མེད་པའི་ཕྱིར་མྱ་ངན་ལས་འདས་པ་ཞེས་བྱ་བ་དང ། ཡང་དག་པ་མ་ཡིན་པའི་ཆོས་ནི་རྐྱེན་ལས་སྐྱེ་བ་ཡང་དག་པའི་བདེན་པའི་ཆོས་ནི་རྐྱེན་གྱིས་བསྐྱེད་པ་མ་ཡིན་པ། དེ་བཞིན་གཤེགས་པའི་ཆོས་ཀྱི་སྐུའང་ཡང་དག་པ་བདེན་པ་ཉིད་ཡིན་པས་དེ་ལ་མྱ་ངན་ལས་འདས་པ་ཞེས་བྱའོ། །གཞན་ཡང ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་རྣམ་པ་འདི་བཅུས་ནི། དེ་
232a
༄#། །བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡང་དག་པ་དང ། བདེན་པའི་ཚུལ་རྟོགས་པས་མྱ་ངན་ལས་འདས་པ་ཆེན་པོར་ཤེས་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་སྦྱིན་པ་དང ། སྦྱིན་པའི་འབྲས་བུ་ལ་བདག་དང ། བདག་གིར་བྱ་བ་མེད་པར་རབ་ཏུ་ཤེས་པས་སྦྱིན་པ་དེ་དང ། དེའི་འབྲས་བུ་ལོག་པའི་རྣམ་པར་རྟོག་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པས་ཚུལ་ཁྲིམས་དང ། ཚུལ་ཁྲིམས་ཀྱི་འབྲས་བུ་ལ་བདག་དང ། བདག་གིར་བྱ་བ་མེད་པར་རབ་ཏུ་ཤེས་པས་ཚུལ་ཁྲིམས་དེ་དང ། དེའི་འབྲས་བུ་ལ་ལོག་པའི་རྣམ་པར་རྟོག་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པས་བཟོད་པ་དང ། བཟོད་པའི་འབྲས་བུ་ལ་བདག་དང ། བདག་གིར་བྱ་བ་མེད་པར་རབ་ཏུ་ཤེས་པས་བཟོད་པ་དེ་དང ། དེའི་འབྲས་བུ་ལ་ལོག་པའི་རྣམ་པར་རྟོག་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པས་བརྩོན་འགྲུས་དང ། བརྩོན་འགྲུས་ཀྱི་འབྲས་བུ་ལ་བདག་དང ། བདག་གིར་བྱ་བ་མེད་པར་རབ་ཏུ་ཤེས་པས་བརྩོན་འགྲུས་དེ་དང ། དེའི་འབྲས་བུ་ལ་ལོག་པའི་
232b
རྣམ་པར་རྟོག་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པས་བསམ་གཏན་དང ། བསམ་གཏན་གྱི་འབྲས་བུ་ལ་བདག་དང ། བདག་གིར་བྱ་བ་མེད་པར་རབ་ཏུ་ཤེས་པས་བསམ་གཏན་དེ་དང ། དེའི་འབྲས་བུ་ལ་ལོག་པའི་རྣམ་པར་རྟོག་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པས་ཤེས་རབ་དང ། ཤེས་རབ་ཀྱི་འབྲས་བུ་ལ་བདག་དང ། བདག་གིར་བྱ་བ་མེད་པར་རབ་ཏུ་ཤེས་པས་ཤེས་རབ་དེ་དང ། དེའི་འབྲས་བུ་ལ་ལོག་པའི་རྣམ་པར་རྟོག་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པ་རྣམས་ཀྱིས་སེམས་ཅན་དང ། སེམས་ཅན་མེད་པར་རབ་ཏུ་མཁྱེན་པ་དང ། ཆོས་ཐམས་ཅད་ཀྱི་རང་བཞིན་མེད་པ་ལ་ལོག་པའི་རྣམ་པར་རྟོག་པ་ཡོངས་སུ་སྤངས་པས་མྱ་ངན་ལས་འདས་པ་ཞེས་བྱ་བ་དང ། གང་སྲེད་པའི་བདག་ཉིད་ཅན་ནི་ཚོར་བ་ལ་ནན་ཏན་བྱེད་དོ། །ཚོར་བ་ལ་ནན་ཏན་བྱེད་པའི་དབང་གིས་སྡུག་བསྔལ་རྣམ་པ་སྣ་ཚོགས་མྱོང་བར་འགྱུར་རོ། །དེ་བཞིན་གཤེགས་པ་རྣམས་ནི་བདག་གིར་འཛིན་པ་ཡོངས་སུ་བཅད་ཅིང་ཚོར་བ་མི་མངའ་བས་མྱ་ངན་ལས་འདས་པ་ཞེས་བྱ་བ་དང ། འདུས་བྱས་ཀྱི་ཆོས་ཐམས་ཅད་ནི་བགྲང་ཞིང་དཔག་ཏུ་ཡོད་ལ། འདུས་མ་བྱས་ཀྱི་ཆོས་ནི་བགྲང་ཞིང་དཔག་པ་ཐམས་ཅད་དང་བྲལ་བ་
233a
༄#། །སྟེ་སངས་རྒྱས་ཀྱིས་འདུས་བྱས་ཀྱི་ཆོས་སྤངས་ཤིང་འདུས་མ་བྱས་ཀྱི་ཆོས་མངོན་དུ་མཛད་དེ། བགྲང་བ་དང ། དཔག་པ་མི་མངའ་བས་དེའི་ཕྱིར་མྱ་ངན་ལས་འདས་པ་ཞེས་བྱ་བ་དང ། དེ་བཞིན་གཤེགས་པས་སེམས་ཅན་དང ། ཆོས་ཀྱི་རང་བཞིན་ཀུན་སྟོང་པ་དང ། སྟོང་པ་དེ་ལས་གཞན་པའང་ཡོད་པ་མ་ཡིན་པ་དང ། སྟོང་པའི་རང་བཞིན་དེ་ཉིད་ཡང་དག་པའི་ཆོས་ཀྱི་སྐུ་ཡིན་པས་དེའི་ཕྱིར་དེ་ལ་མྱ་ངན་ལས་འདས་པ་ཞེས་བྱ་སྟེ། རིགས་ཀྱི་བུ། ཆོས་བཅུ་པོ་དེ་དག་གིས་ནི་མྱ་ངན་ལས་འདས་པ་ཞེས་བྱའོ། །གཞན་ཡང ། རིགས་ཀྱི་བུ། དེ་བཞིན་གཤེགས་པ་མྱ་ངན་ལས་མི་འདའ་བ་དེ་འབའ་ཞིག་ངོ་མཚར་ཆེ་བ་མ་ཡིན་གྱི། གཞན་ཡང་ངོ་མཚར་དུ་བྱ་བའི་ཆོས་རྣམ་པ་བཅུ་ཡོད་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །བཅུ་གང་ཞེ་ན། འདི་ལྟ་སྟེ། འཁོར་བ་ནི་སྐྱོན་དང་ལྡན་པ་མྱ་ངན་ལས་འདས་པ་ནི་ཞི་ཞིང་དབེན་པ་ཡིན་ན་འཁོར་བ་དང ། མྱ་ངན་ལས་འདས་པ་དེ་གཉིས་མཉམ་པར་མཁྱེན་པས་འཁོར་བ་ལའང་མི་གནས། མྱ་ངན་ལས་འདས་པ་ལའང་མི་བཞུགས་ཤིང་གང་སེམས་ཅན་རྣམས་ཀྱི་དོན་ལ་མི་སྐྱོ་བ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །དེ་བཞིན་གཤེགས་པས་བྱིས་པ་སོ་སོའི་སྐྱེ་བོ་ཕྱིན་ཅི་ལོག་ཏུ་སྤྱོད་པ་དང ། ཉོན་མོངས་
233b
བ་སྣ་ཚོགས་ཀྱིས་གླགས་པར་གཟིགས་ཀྱང་འདི་དག་རྣམ་པར་གྲོལ་བར་བྱའོ་སྙམ་དུ་མི་དགོངས་མོད་ཀྱི། སྔོན་གྱི་ཐུགས་རྗེ་དང ། དགེ་བའི་རྩ་བའི་མཐུས་སེམས་ཅན་འདི་དག་སོ་སོའི་དབང་པོ་དང ། རང་བཞིན་དང ། བསམ་པ་ཅི་ལ་མོས་པ་རྟོག་པ་མི་མངའ་བར་ལྷུན་གྱིས་གྲུབ་པའི་ཚུལ་གྱིས་ཕྱི་མའི་མཐར་ཐུག་པ་མེད་པར་ཕན་འདོགས་ཤིང་སྟོན་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །དེ་བཞིན་གཤེགས་པས་སེམས་ཅན་རྣམས་ལ་གསུང་རབ་ཡན་ལག་བཅུ་གཉིས་རྒྱས་པར་བསྟན་པས་ཕན་གདགས་སོ་སྙམ་དུ་མི་དགོངས་མོད་ཀྱི། སྔོན་གྱི་ཐུགས་རྗེ་དང ། དགེ་བའི་རྩ་བའི་མཐུས་སེམས་ཅན་འདི་དག་ལ་ཕྱི་མའི་མཐར་ཐུག་པ་མེད་པར་ཆོས་རྒྱས་པར་སྟོན་པ་དེ་ནི་དེ་བཞིན་གཤེགས་པ་ ་ཀྱི་སྤྱོད་པའོ། །དེ་བཞིན་གཤེགས་པ་གྲོང་དང ། གྲོང་ཁྱེར་དང ། གྲོང་འདབ་ཏུ་གཤེགས་ཤིང་རྒྱལ་པོ་དང ། བློན་པོ་དང ། བྲམ་ཟེ་དང ། རྒྱལ་རིགས་དང ། རྗེའུ་རིགས་དང ། དམངས་རིགས་ལ་སོགས་པའི་ཁྱིམ་དུ་བསོད་སྙོམས་བླང་ངོ་སྙམ་དུ་མི་དགོངས་མོད་ཀྱི། སྔོན་གྱི་སྐུ་དང ། གསུང་དང ། ཐུགས་ཀྱི་སྤྱོད་པ་ལ་གོམས་པའི་མཐུས་ལྷུན་གྱིས་གྲུབ་པར་བསོད་སྙོམས་ལ་གཤེགས་ཤིང་ཕན་པའི་དོན་མཛད་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །དེ་བཞིན་གཤེགས་པའི་སྐུ་ལ་སྦྲེབས་པ་དང ། སྐྱེམས་པའང་
234a
༄#། །མི་མངའ། བཤང་གཅི་དང ། སྐུ་ཉམ་ཆུང་བའང་མི་མངའ་བར་བསོད་སྙོམས་ལེན་པར་སྣང་ཡང་དེ་ལ་གསོལ་བའང་མེད། དེའི་རྣམ་པར་རྟོག་པའང་མི་མངའ་མོད་ཀྱི། སེམས་ཅན་ལ་ཕན་གདགས་པའི་ཕྱིར་བསོད་སྙོམས་གསོལ་བར་ཡང་སྣང་བ་དེ་ནི་དེ་བཞིན་གཤེགས་པའི་སྤྱོད་པ་ལྷུན་གྱིས་གྲུབ་པའོ། །གང་དེ་བཞིན་གཤེགས་པས་སེམས་ཅན་འདི་དག་གི་དབང་པོ་རབ་དང ། འབྲིང་དང ། ཐ་མ་ཇི་ལྟ་བ་བཞིན་དུ་ཆོས་བསྟན་ཏོ་སྙམ་དུ་མི་དགོངས་མོད་ཀྱི། སངས་རྒྱས་བཅོམ་ལྡན་འདས་ཀྱིས་སོ་སོའི་དབང་པོ་དང ། སྣོད་ཇི་ལྟ་བ་ཡིན་པ་རྟོག་པ་མི་མངའ་བ་རབ་ཏུ་མཁྱེན་ཅིང་དེ་དག་ལ་ཆོས་སྟོན་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །དེ་བཞིན་གཤེགས་པས་སེམས་ཅན་འདི་དག་ནི་གུས་པ་མེད་པ་རྟག་ཏུ་ཚིག་རྩུབ་པོས་ངན་དུ་སྨྲ་བ་ཡིན་པས་འདི་དག་དང་ལྷན་ཅིག་མི་སྨྲའོ། །སེམས་ཅན་འདི་དག་ནི་ང་ལ་རྟག་ཏུ་གུས་པར་བྱེད་པ་བསྟོད་ཅིང་སྙན་པར་སྨྲ་བ་ཡིན་པས་འདི་དག་དང་ལྷན་ཅིག་སྨྲ་བར་བྱའོ་ཞེས་དེ་བཞིན་གཤེགས་པ་མི་དགོངས་ཏེ། བྱམས་པ་དང ། ཐུགས་རྗེས་མཉམ་པར་དགོངས་ཤིང་གཉིས་སུ་མེད་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །སངས་རྒྱས་བཅོམ་ལྡན་འདས་རྣམས་ལ་བྱམས་སྡང་དང ། ང་རྒྱལ་དང ། འདོད་པ་དང །
234b
སེར་སྣ་ལ་སོགས་པའི་ཉོན་མོངས་པ་མི་མངའ་མོད་ཀྱི། དེ་བཞིན་གཤེགས་པ་ནི་རྟག་པར་དབེན་པ་ལ་དགྱེས་ཤིང་འདུ་འཛི་ཐམས་ཅད་སྤངས་ཏེ་འདོད་པ་ཆུང་བ་ལ་བསྔགས་པ་མཛད་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །དེ་བཞིན་གཤེགས་པ་ནི་ཆོས་འགའ་ཙམ་ཡང་མི་མཁྱེན་པ་འམ། ཐུགས་སུ་མ་ཆུད་པ་མི་མངའ་བ་དང ། གནས་ ་ཅད་དུ་མེ་ལོང་ལྟ་བུའི་ཡེ་ཤེས་མངོན་དུ་གྱུར་པས་རྣམ་པར་མི་རྟོག་མོད་ཀྱི། དེ་བཞིན་གཤེགས་པས་སེམས་ཅན་འདི་དག་གི་ལས་དང ། སྤྱོད་པ་ལ་གཟིགས་ནས་དེ་དག་གི་བསམ་པ་དང་མཐུན་པར་སྦྱོར་བས་ཐབས་ཀྱིས་འདྲེན་ཅིང་འཁོར་བ་ལས་སྒྲོལ་བ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །དེ་བཞིན་གཤེགས་པས་སེམས་ཅན་གང་དག་ཕྱུག་ཅིང་དར་བ་གཟིགས་ནའང་དགྱེས་པ་མི་སྐྱེ། རྒུད་པ་དང ། དམའ་བ་གཟིགས་ནའང་ཐུགས་ངན་མི་མཛད་མོད་ཀྱི། དེ་བཞིན་གཤེགས་པ་སེམས་ཅན་དེ་དག་ཡང་དག་པའི་སྤྱོད་པ་སྒྲུབ་པ་གཟིགས་ནས་ཐོགས་པ་མེད་པའི་ཐུགས་རྗེ་ཆེན་པོས་སྐྱོབ་བར་མཛད་དོ། །སེམས་ཅན་ལ་ལ་ལོག་པར་སྤྱོད་པ་གཟིགས་ནའང་ཆགས་པ་མེད་པའི་ཐུགས་རྗེ་ཆེན་པོས་སྐྱོབ་ཅིང་འཛིན་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །རིགས་ཀྱི་བུ། འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
235a
༄#། །ཀྱི་ཡང་དག་པའི་སྤྱོད་པ་མཐའ་མེད་པར་བསྟན་པ་དང ། མྱ་ངན་ལས་འདས་པ་ཡང་དག་པའི་བདེན་པའི་མཚན་ཉིད་དུ་ཤེས་པར་གྱིས་ཤིག་།སྐབས་གཞན་དག་ཏུ་མྱ་ངན་ལས་འདའ་བ་དང ། རིང་བསྲེལ་འཇིག་རྟེན་དུ་བཞག་ཅེས་བྱ་བ་དེ་ནི་ཐབས་མཁས་པ་བསྟན་པ་སྟེ། སེམས་ཅན་རྣམས་ཀྱིས་མཆོད་པ་དང ། རིམ་གྲོ་བྱེད་པ་དེ་དག་ཀྱང་དེ་བཞིན་གཤེགས་པའི་ཐུགས་རྗེ་དང ། དགེ་བའི་རྩ་བའི་མཐུ་ཡིན་པར་བལྟ་བར་བྱའོ། །དེ་ལ་གང་ཞིག་མཆོད་པ་དང ། རིམ་གྲོ་བྱེད་པ་དེ་ནི་མ་འོངས་པའི་དུས་ན་མི་ཁོམ་པ་བརྒྱད་ཡོངས་སུ་སྤངས་ཏེ་དེ་བཞིན་གཤེགས་པ་རྣམས་དང་ཕྲད་ཅིང་དགེ་བའི་བཤེས་གཉེན་དང་ལྡན་པ་དང ། བྱང་ཆུབ་ཀྱི་སེམས་མི་གཏོང་བ་དང ། བསོད་ནམས་དཔག་ཏུ་མེད་པ་འཕེལ་བ་དང ། འཁོར་བ་ལས་མྱུར་དུ་འདའ་ཞིང་འཁོར་བའི་འཆིང་བས་གླགས་པར་མི་འགྱུར་བའི་སྤྱོད་པ་དམ་པ་འདི་ཡིན་པས་ཁྱོད་ཀྱིས་ནན་ཏན་དུ་བསྒྲུབ་ཅིང་གཡེལ་བ་མེད་པར་བྱའོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་བཅོམ་ལྡན་འདས་མྱ་ངན་ལས་མི་འདའ་བའི་དོན་དང ། བཟོད་པ་ཟབ་མོ་བསྟན་པ་བཅོམ་ལྡན་འདས་ལ་མངོན་དུ་ཐོས་ནས་ཐལ་མོ་སྦྱར་བ་བཏུད་དེ་འདི་སྐད་ཅེས་གསོལ་ཏོ། །དེང་གཟོད་བདག་གིས་དེ་བཞིན་གཤེགས་པ་སྟོན་པ་ཆེན་པོ་མྱ་ངན་ལས་མི་
235b
འདའ་བ་དང ། རིང་བསྲེལ་འཇིག་རྟེན་དུ་བཞུག་ཅིང་སེམས་ཅན་རྣམས་ལ་ཕན་པ་རྒྱ་ཆེར་མཛད་པ་འདི་འཚལ་བར་གྱུར་ནས་ལུས་དང ། སེམས་དགའ་ཞིང་རངས་པ་ངོ་མཚར་དུ་གྱུར་ཏོ། །དེ་བཞིན་གཤེགས་པའི་སྐུ་ཚེའི་ཚད་འདི་བསྟན་པ་ན་གྲངས་མེད་དཔག་ཏུ་མེད་ཅིང་མཐའ་ཡས་པའི་སེམས་ཅན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་བཞིན་གཤེགས་པ་དེ་དག་ཀྱང་མི་སྣང་བར་གྱུར་ནས་བྱང་ཆུབ་སེམས་དཔའ་མཛེས་པའི་ཏོག་ཀྱང་སྟན་ལས་ལངས་ནས་བཅོམ་ལྡན་འདས་ཀྱི་ཞབས་ལ་ཕྱག་བཙལ་ཏེ་སླར་ཡང་རང་གི་གནས་དེ་ཉིད་དུ་འདུག་གོ་།གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། དེ་བཞིན་གཤེགས་པའི་སྐུ་ཚེའི་ཚད་བསྟན་པ་ཞེས་བྱ་བའི་ལེའུ་སྟེ་གཉིས་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་འཁོར་འདུས་པ་དེའི་ནང་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་བཅོམ་ལྡན་འདས་ཀྱི་ཞབས་ལ་ཕྱག་བཙལ་ཏེ་གསེར་དང ། རིན་པོ་ཆེའི་མེ་ཏོག་དང ། རིན་པོ་ཆེའི་རྒྱལ་མཚན་དང ། གདུགས་དམ་པས་མཆོད་པ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་
236a
༄#། །གཤེགས་པ་རྣམས་ཀྱི་དགོངས་པ་ཤིན་ཏུ་ཟབ་པ་དེ་ཚུལ་བཞིན་ཇི་ལྟར་བསྒྲུབ་པར་བགྱི་ཞེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ།་རིགས་ཀྱི་བུ། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། ཁྱོད་ལ་དེའི་དོན་རྣམ་པར་ཕྱེ་སྟེ་བསྟན་པར་བྱའོ། །རིགས་ཀྱི་བུ། དེ་བཞིན་གཤེགས་པ་ཐམས་ཅད་ལ་སྐུ་རྣམ་པ་གསུམ་མངའ་སྟེ། གསུམ་གང་ཞེ་ན། སྤྲུལ་པའི་སྐུ་དང ། ལོངས་སྤྱོད་རྫོགས་པའི་སྐུ་དང ། ཆོས་ཀྱི་སྐུའོ། །འདི་ལྟ་བུའི་སྐུ་གསུམ་ལྷུན་གྱིས་གྲུབ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཛིན་ཏེ། གང་གིས་དེ་མངོན་དུ་གྱུར་པ་རྣམས་འཁོར་བ་ལས་འབྱུང་བར་བྱེད་དོ། །དེ་ལ་ཇི་ལྟར་ན་བྱང་ཆུབ་སེམས་དཔས་སྤྲུལ་པའི་སྐུ་ཤེས་པར་བྱ་ཞེ་ན། རིགས་ཀྱི་བུ། དེ་ནི་དེ་བཞིན་གཤེགས་པ་སྔོན་ས་རྣམ་པར་སྦྱོང་བའི་དུས་ན་སྐྱེ་བོ་ཐམས་ཅད་ཀྱི་ཕྱིར་ཆོས་རྣམ་པ་སྣ་ཚོགས་སྒྲུབ་བོ། ། དེ་ལྟར་སྤྱོད་པ་སྦྱངས་པས་རྣལ་འབྱོར་གྱི་མཐར་ཕྱིན་པ་ཡིན་ནོ། །རྣལ་འབྱོར་དེའི་སྟོབས་ཀྱིས་དབང་ཆེན་པོ་ཐོབ་བོ། །དབང་ཆེན་པོའི་མཐུས་སྐྱེ་བོའི་བསམ་པ་ཇི་ལྟ་བ་དང ། སྤྱོད་པ་ཇི་ལྟ་བ་དང ། ཁམས་ཇི་ལྟ་བ་བཞིན་དུ་ཐམས་ཅད་མངོན་དུ་གྱུར་ནས་དུས་ལ་མི་གཞེས། དུས་ལ་མི་འདའ། གནས་དང་མཐུན་པ། དུས་དང་
236b
མཐུན་པ། སྤྱོད་པ་དང་མཐུན་པ། ཆོས་བཤད་པ་དང་ཡང་མཐུན་པར་སྐུ་རྣམ་པ་སྣ་ཚོགས་སྟོན་པ་དེ་ནི་སྤྲུལ་པའི་སྐུ་ཞེས་བྱའོ། །རིགས་ཀྱི་བུ། ཇི་ལྟར་ན་བྱང་ཆུབ་སེམས་དཔས་ལོངས་སྤྱོད་རྫོགས་པའི་སྐུ་ཤེས་པར་བྱ་ཞེ་ན། དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའ་རྣམས་ལ་ཐོགས་པ་མེད་པར་ཐོབ་པར་བྱ་བའི་ཕྱིར་དོན་དམ་པའི་བདེན་པ་སྟོན་ཏེ་འཁོར་བ་དང ། མྱ་ངན་ལས་འདས་པ་རོ་གཅིག་པ་ཉིད་དུ་ཤེས་པར་བྱ་བ་དང ། འཇིག་ཚོགས་ལ་ལྟ་བ་བསལ་ནས་སེམས་ཅན་འཇིགས་པར་གྱུར་པ་ ་དགའ་བར་བྱ་བ་དང ། སངས་རྒྱས་ཀྱི་ཆོས་རྣམས་མཐའ་ཡས་པའི་རྒྱུར་གྱུར་པས་བདེན་པ་ཉིད་དང ། དེ་བཞིན་ཉིད་དང ། དེ་བཞིན་ཉིད་ཀྱི་ཡེ་ཤེས་དང་མཐུན་པར་སྔོན་གྱི་སྨོན་ལམ་གྱི་མཐུས་སྐུ་དེ་སྟོན་པར་འགྱུར་ཏེ་མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུས་བརྒྱན་པ། འོད་སྐུ་ལ་འཁོར་བ་གྲུབ་པ་དེ་ནི་ལོངས་སྤྱོད་རྫོགས་པའི་སྐུ་ཞེས་བྱའོ། །རིགས་ཀྱི་བུ། དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཀྱི་སྐུ་ཤེས་པར་བྱ་ཞེ་ན། ཉོན་མོངས་པའི་སྒྲིབ་པ་ཐམས་ཅད་དང་བྲལ་བ། དགེ་བའི་ཆོས་ཐམས་ཅད་རྫོགས་པའི་ཕྱིར་དེ་ཁོ་ན་ཉིད་དང ། ཡང་དག་པའི་ཡེ་ཤེས་ཉིད་ཙམ་དུ་གནས་པ་དེ་ནི་ཆོས་ཀྱི་སྐུ་ཞེས་བྱའོ། །སྐུ་སྔ་མ་དེ་གཉིས་ནི་བཏགས་པ་ཙམ་མོ། །
237a
༄#། །ཆོས་ཀྱི་སྐུ་ནི་མང་དག་པ་སྟེ་སྐུ་དེ་གཉིས་ཀྱི་གཞི་བྱེད་དོ། །དེ་ཅིའི་ཕྱིར་ཞེ་ན། ཆོས་ཀྱི་སྐུ་དེ་བཞིན་ཉིད་དང ། རྣམ་པར་མི་རྟོག་པའི་ཡེ་ཤེས་ལས་གུད་ན་སངས་རྒྱས་ཀྱི་ཆོས་གང་ཡང་མེད་པའི་ཕྱིར་རོ། །དེ་བཞིན་གཤེགས་པ་རྣམས་ནི་ཡེ་ཤེས་ཕུན་སུམ་ཚོགས་པ། ཉོན་མོངས་པ་ཐམས་ཅད་སྤངས་པའི་མཐར་ཕྱིན་པ་སྟེ།་སངས་རྒྱས་ཀྱི་ས་རྣམ་པར་དག་པ་བརྙེས་པའི་ཕྱིར་ཆོས་ཀྱི་དེ་ཁོ་ན་ཉིད་དང ། ཡང་དག་པའི་ཡེ་ཤེས་ཀྱིས་སངས་རྒྱས་ཀྱི་ཆོས་རྣམས་ཡོངས་སུ་འཛིན་ཏོ། །གཞན་ཡང ། རིགས་ཀྱི་བུ། སངས་རྒྱས་ཐམས་ཅད་ནི་བདག་དང ། གཞན་གྱི་དོན་གྱི་མཐར་ཕྱིན་པ་སྟེ་དེ་ལ་ཆོས་ཀྱི་དེ་བཞིན་ཉིད་ཀྱིས་ནི་བདག་གི་དོན་མཛད། དེ་བཞིན་ཉིད་ཀྱི་ཡེ་ཤེས་ཀྱིས་ནི་གཞན་གྱི་དོན་མཛད་དོ། །བདག་དང ། གཞན་ལ་ཕན་པའི་དོན་མཛད་པ་ལ་དབང་བརྙེས་པའི་ཕྱིར་མཛད་\?\་པ་མཐའ་ཡས་པ་སྣ་ཚོགས་ལྷུན་གྱིས་གྲུབ་བོ། །དེ་བས་ན་སངས་རྒྱས་ཐམས་ཅད་ཀྱི་ཆོས་དཔག་ཏུ་མེད་པ་མཐའ་ཡས་པ་རྣམ་པ་མང་པོ་ཁྱད་པར་དུ་བསྟན་ཏོ། །རིགས་ཀྱི་བུ། དཔེར་ན། རྣམ་པར་རྟོག་པའི་སེམས་ལ་བརྟེན་ནས་ཉོན་མོངས་པ་རྣམ་པ་མང་པོ་དང ། ལས་རྣམ་པ་མང་པོ་དང ། འབྲས་བུ་རྣམ་པ་མང་པོ་སྟོན་པ་དེ་བཞིན་དུ་ཆོས་ཀྱི་ཆོས་ཉིད་དང ། དེ་བཞིན་ཉིད་ཀྱི་ཡེ་ཤེས་
237b
ལ་བརྟེན་ནས། སངས་རྒྱས་ཀྱི་ཆོས་རྣམ་པ་སྣ་ཚོགས་དང ། རང་སངས་རྒྱས་ཀྱི་ཆོས་རྣམ་པ་སྣ་ཚོགས་དང ། ཉན་ཐོས་ཀྱི་ཆོས་རྣམ་པ་སྣ་ཚོགས་མང་པོ་སྟོན་ཏོ། །ཆོས་ཀྱི་དེ་བཞིན་ཉིད་དང ། དེ་བཞིན་ཉིད་ཀྱི་ཡེ་ཤེས་ལ་བརྟེན་ནས་སངས་རྒྱས་ཐམས་ཅད་ཀྱི་ཆོས་ལ་དབང་ཕུན་སུམ་ཚོགས་པ་བརྙེས་པ་དེ་ནི་དམ་པ་དཔག་པར་དཀའ་བ་ཡིན་ནོ། །དཔེར་ན། ནམ་མཁའ་ལ་རི་མོ་བྲིས་ཏེ་རྒྱན་དུ་བྱས་པ་དེ་ནི་དཔག་པར་དཀའ་བ་ཡིན་ནོ། །དེ་བཞིན་དུ་ཡང་དག་པའི་ཆོས་དང ། ཡང་དག་པའི་ཡེ་ཤེས་ལ་བརྟེན་ནས་སངས་རྒྱས་ཀྱི་ཆོས་རྣམས་བསྒྲུབ་པའང་དཔག་པར་དཀའ་བ་ཡིན་ནོ། །རིགས་ཀྱི་བུ། ཇི་ལྟར་ན་ཆོས་ཀྱི་དེ་བཞིན་ཉིད་དང ། དེ་བཞིན་ཉིད་ཀྱི་ཡེ་ཤེས་རྣམ་པར་རྟོག་པ་མི་མངའ་ཞིང ། ཕྲིན་ལས་ལ་མངའ་བརྙེས་པ་ཡིན་ཞེ་ན། རིགས་ཀྱི་བུ། དཔེར་ན། དེ་བཞིན་གཤེགས་པ་མྱ་ངན་ལས་འདས་ཀྱང་སྨོན་ལམ་ལ་མངའ་བརྙེས་པས་ཕྲིན་ལས་ཀྱི་རྣམ་པ་ཐམས་ཅད་ཀྱང་མཛད་དེ་དེ་བཞིན་ཉིད་དང ། དེ་བཞིན་ཉིད་ཀྱི་ཡེ་ཤེས་ཀྱིས་དོན་ཐམས་ཅད་གྲུབ་པར་མངའ་མཛད་པའང་དེ་བཞིན་ནོ། །གཞན་ཡང ། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་དུ་སྙོམས་པར་ཞུགས་པ་ལས་སྔོན་གྱི་སྨོན་ལམ་གྱི་དབང་གིས་བསམ་གཏན་དེ་ལས་བཞེངས་ཏེ་དོན་དང ། ཕྲིན་ལས་ཐམས་ཅད་མཛད་
238a
༄#། །པ་ལྟར་ཆོས་རྣམ་པ་གཉིས་ཀྱང་རྣམ་པར་རྟོག་པ་མེད་པར་དོན་ཐམས་ཅད་མཛད་པ་ལ་མངའ་བརྙེས་པའོ། །རིགས་ཀྱི་བུ། དཔེར་ན། ཉི་མ་དང ། ཟླ་བ་ལའང་རྣམ་པར་རྟོག་པ་མེད། ཆུ་དང ། མེ་ལོང་ལའང་རྣམ་པར་རྟོག་པ་མེད། སྣང་བ་ལའང་རྣམ་པར་རྟོག་པ་མེད་མོད་ཀྱི། གསུམ་འདུས་པ་ལས་གཟུགས་བརྙན་འབྱུང་ངོ ། །དེ་བཞིན་དུ་ཆོས་ཀྱི་དེ་བཞིན་ཉིད་དང ། དེ་བཞིན་ཉིད་ཀྱི་ཡེ་ཤེས་ལའང་རྣམ་པ་རྟོག་པ་མེད་མོད་ཀྱི། སྨོན་ལམ་གྱི་དབང་གིས་སེམས་ཅན་སྐལ་བ་ཅན་དག་ལ་ལོངས་སྤྱོད་རྫོགས་པའི་སྐུ་དང ། སྤྲུལ་པའི་སྐུའང་ཉི་ཟླའི་གཟུགས་བརྙན་བཞིན་རྒྱུ་དང ། རྐྱེན་འདུས་པ་ལ་བྱུང་ངོ ། །རིགས་ཀྱི་བུ། གཞན་ཡང ། དཔེར་ན། ཚད་མེད་གྲངས་མེད་པའི་ཆུ་དང ། མེ་ལོང་དག་ནི་སྣང་བ་ལ་བརྟེན་ནས་སྟོང་པའི་གཟུགས་བརྙན་མཚན་ཉིད་ཐ་དད་པ་དག་སྣང་ངོ ། །སྟོང་པ་ཞེས་བྱ་བ་ནི་མཚན་ཉིད་མེད་པའོ། །རིགས་ཀྱི་བུ།་དེ་བཞིན་དུ་ལོངས་སྤྱོད་རྫོགས་པའི་སྐུ་དང ། སྤྲུལ་པའི་སྐུ་ནི་འཁོར་རྣམས་ལ་ཆོས་ཀྱི་སྐུའི་གཟུགས་བརྙན་སྟོན་པར་སྨོན་ལམ་གྱི་དབང་གིས་སྐུ་དེ་གཉིས་སྣང་སྟེ་མཚན་སྣ་ཚོགས་སུ་སྣང་ནའང་ཆོས་ཀྱི་སྐུའི་མཚན་ཉིད་ཐ་དད་པ་མེད་དོ། །རིགས་ཀྱི་བུ། སྐུ་དེ་གཉིས་ལ་གནས་ཏེ་སངས་རྒྱས་བཅོམ་ལྡན་འདས་རྣམས་ཕུང་
238b
པོའི་ལྷག་མ་དང་བཅས་པའི་མྱ་ངན་ལས་འདས་པ་ཞེས་གསུང་ངོ ། །ཆོས་ཀྱི་སྐུ་ལས་དགོངས་ཏེ་ཕུང་པོའི་ལྷག་མ་མེད་པའི་མྱ་ངན་ལས་འདས་པ་ཞེས་གསུངས་སོ། །དེ་ཅིའི་ཕྱིར་ཞེ་ན།་དེར་ནི་ཆོས་ཐམས་ཅད་ཟད་པའི་མཐར་གྱུར་པའི་ཕྱིར་སྐུ་འདི་གསུམ་ལ་བརྟེན་ནས་སངས་རྒྱས་བཅོམ་ལྡན་འདས་རྣམས་མི་གནས་པའི་མྱ་ངན་ལས་འདས་པ་ལ་གནས་པ་ཞེས་བཤད་དོ། །སྐུ་གཉིས་པོ་ནི་མྱ་ངན་ལས་འདས་པ་ཞེས་མི་གསུང་སྟེ་ཆོས་ཀྱི་སྐུ་ལས་གཞན་པའི་སངས་རྒྱས་མེད་པའི་ཕྱིར་རོ། །ཅིའི་ཕྱིར་སྐུ་གཉིས་པོ་ལ་མྱ་ངན་ལས་འདས་པ་ཞེས་མི་བྱ་ཞེ་ན། སྐུ་དེ་གཉིས་ནི་ཡང་དག་པ་མ་ཡིན་པ་བཏགས་པ་ཙམ་པས་སྐད་ཅིག་ཏུ་སྐྱེ་ཞིང་འགག་པ་རྟག་པར་མི་གནས་པ་དང ། ཡང་དང་ཡང་དུ་འབྱུང་བས་མ་ངེས་པ་ལྟར་ཆོས་ཀྱི་སྐུ་ནི་དེ་ལྟ་མ་ཡིན་ནོ། །བམ་པོ་གཉིས་པ།། །།དེའི་ཕྱིར་སྐུ་དེ་གཉིས་ནི་མྱ་ངན་ལས་འདས་པ་ཞེས་མི་བྱའོ། །ཆོས་ཀྱི་སྐུའང་དེ་དང་མི་གཉིས་པའི་ཕྱིར་མྱ་ངན་ལས་འདས་པ་ལ་གནས་པ་མ་ཡིན་བས་སྐུ་དེ་གསུམ་ལས་བརྟེན་ཏེ་མི་གནས་པའི་ཕྱིར་མྱ་ངན་ལས་འདས་པ་ཞེས་གསུང་ངོ ། །རིགས་ཀྱི་བུ། དེ་ལ་བྱིས་པ་སོ་སོའི་སྐྱེ་བོ་རྣམས་ནི་མཚན་ཉིད་གསུམ་གྱི་ཕྱིར་འཆིང་པ་དང ། སྒྲིབ་པ་ཡོད་པས་སྐུ་གསུམ་ལས་རིང་དུ་གྱུར་ཏོ། །གསུམ་གང་ཞེ་ན། ཀུན་བརྟགས་པའི་མཚན་ཉིད་དང ། གཞན་གྱི་
239a
༄#། །དབང་གི་མཚན་ཉིད་དང ། ཡོངས་སུ་གྲུབ་པའི་མཚན་ཉིད་དོ། །མཚན་ཉིད་དེ་རྣམས་ཤེས་པ་དང ། འགོག་པ་དང ། དག་པར་མ་གྱུར་པ་དེའི་ཕྱིར་སྐུ་གསུམ་མ་ཐོབ་བོ། །དེ་ལྟ་བུའི་མཚན་ཉིད་གསུམ་ཤེས་པ་དང ། འགོག་པ་དང ། རྣམ་པར་བྱང་བར་གྱུར་པས་སངས་རྒྱས་བཅོམ་ལྡན་འདས་རྣམས་སྐུ་གསུམ་ཡོངས་སུ་རྫོགས་པར་གྱུར་ཏོ། །རིགས་ཀྱི་བུ། བྱིས་པ་སོ་སོའི་སྐྱེ་བོ་རྣམས་ཀྱིས་རྣམ་པར་ཤེས་པ་གསུམ་མ་སྤངས་པའི་ཕྱིར་སྐུ་གསུམ་ལས་རིང་དུ་གྱུར་ཏོ། །གསུམ་གང་ཞེ་ན།་དངོས་པོ་ལ་འཇུག་པའི་རྣམ་པར་ཤེས་པ་དང ། ཀུན་གཞི་ལ་གནས་པའི་ཡིད་དང ། ཀུན་གཞིའི་རྣམ་པར་ཤེས་པའོ། །ལམ་སྦྱོང་བ་དག་ལ་གནས་པས་འཇུག་པའི་རྣམ་པར་ཤེས་པ་སྦྱོང་ངོ ། །གཅོད་པའི་ལམ་ལ་གནས་པས་ཀུན་གཞི་ལ་གནས་པའི་ཡིད་སྦྱོང་ངོ ། །མཆོག་ཏུ་རྒྱལ་བའི་ལམ་ལ་གནས་པས་ཀུན་གཞིའི་རྣམ་པར་ཤེས་པ་སྦྱངས་སོ། །འཇུག་པའི་རྣམ་པར་ཤེས་པ་སྦྱངས་ན་སྤྲུལ་པའི་སྐུ་མངོན་དུ་འགྱུར་རོ། །ཀུན་གཞི་ལ་གནས་པའི་ཡིད་སྦྱངས་པས་ལོངས་སྤྱོད་རྫོགས་པའི་སྐུ་སྟོན་ཏོ། །ཀུན་གཞིའི་རྣམ་པར་ཤེས་པ་སྦྱངས་པས་ནི་ཆོས་ཀྱི་སྐུ་འཐོབ་སྟེ་དེ་ལྟར་ན་དེ་བཞིན་གཤེགས་པ་ཐམས་ཅད་སྐུ་གསུམ་ལྷུན་གྱིས་གྲུབ་པ་ཞེས་བྱའོ། །
239b
རིགས་ཀྱི་བུ། སངས་རྒྱས་ཐམས་ཅད་ཀྱི་སྤྲུལ་པའི་སྐུ་ནི་སངས་རྒྱས་ཐམས་ཅད་དང་སྤྱོད་པ་མཐུན་པའོ། །ལོངས་སྤྱོད་རྫོགས་པའི་སྐུ་ནི་སངས་རྒྱས་ཐམས་ཅད་དང་དགོངས་བ་མཐུན་པའོ། །ཆོས་ཀྱི་སྐུ་ནི་སངས་རྒྱས་ཐམས་ཅད་དང་སྐུ་མཐུན་པའོ། །རིགས་ཀྱི་བུ། སངས་རྒྱས་ཀྱི་སྤྲུལ་པའི་སྐུ་ནི་སོ་སོའི་སྐྱེ་བོའི་ཡིད་དང་མཐུན་པར་རྣམ་པ་མང་པོས་མཚན་མ་སྣ་ཚོགས་སྟོན་པའི་ཕྱིར་མང་པོ་ཞེས་བྱའོ། །ལོངས་སྤྱོད་རྫོགས་པའི་སྐུ་ནི་འཁོར་རྣམས་ཀྱི་བསམ་པ་གཅིག་པས་མཚན་ཉིད་གཅིག་པའི་ཕྱིར་མཚན་ཉིད་གཅིག་ཅེས་བྱའོ། །ཆོས་ཀྱི་སྐུ་ནི་མཚན་མ་སྣ་ཚོགས་ལས་ཡང་དག་པར་འདས་པ་མཚན་མར་བཟུང་བའི་སྤྱོད་ཡུལ་མ་ཡིན་པ་སྟེ་དེ་བས་ན་གཅིག་པའང་མ་ཡིན། ཐ་དད་པའང་མ་ཡིན་པ་ཞེས་བྱའོ། །རིགས་ཀྱི་བུ། སྤྲུལ་པའི་སྐུ་ནི་ལོངས་སྤྱོད་རྫོགས་པའི་སྐུ་ལ་བརྟེན་ཏེ་མངོན་པར་སྣང་ངོ ། །ལོངས་སྤྱོད་རྫོགས་པའི་སྐུ་ནི་ཆོས་ཀྱི་སྐུ་ལ་བརྟེན་ཏེ་མངོན་པར་སྣང་ངོ ། །ཆོས་ཀྱི་སྐུ་ནི་ཡང་དག་པ་སྟེ་ཅི་ལའང་མི་གནས་པའོ། །རིགས་ཀྱི་བུ། སྐུ་དེ་གསུམ་ནི་རྟག་པར་བཤད་པའི་རྣམ་གྲངས་ཀྱང་ཡོད། མི་རྟག་པར་བཤད་པའི་རྣམ་གྲངས་ཀྱང་ཡོད་དོ། །སྤྲུལ་པའི་སྐུ་ནི་ཐབས་མཁས་པས་གནས་ཐམས་ཅད་དུ་དམིགས་པ་ཇི་ལྟ་བ་བཞིན་དུ་རྒྱུན་མི་འཆད་པར་ཆོས་ཀྱི་འཁོར་ལོ་བསྐོར་བའི་
240a
༄#། །ཕྱིར་རྟག་པ་ཞེས་བྱའོ། །དེ་གཞིར་མ་གྱུར་པས་མཛད་པ་ཆེན་པོ་ཕུན་སུམ་ཚོགས་པ་མངོན་དུ་མི་སྟོན་པའི་ཕྱིར་མི་རྟག་པ་ཞེས་བྱའོ། །ལོངས་སྤྱོད་རྫོགས་པའི་སྐུ་ནི་ཐོག་མ་མེད་པའི་དུས་ནས་རྒྱུན་མི་འཆད་ཅིང་སངས་རྒྱས་ཐམས་ཅད་ཀྱི་ཆོས་མ་འདྲེས་པས་ཡོངས་སུ་འཛིན་ཅིང་སྡུད་པའི་ཕྱིར་སེམས་ཅན་ཟད་པ་མེད་པས་སྤྱོད་པའང་མི་ཟད་དེ་དེའི་ཕྱིར་རྟག་པ་ཞེས་བྱའོ། །དེའང་གཞིར་མ་གྱུར་པའི་ཕྱིར་མཛད་པ་ཆེན་པོ་ཕུན་སུམ་ཚོགས་པ་མངོན་དུ་མི་སྟོན་པར་མི་རྟག་པ་ཞེས་བྱའོ། །ཆོས་ཀྱི་སྐུ་ནི་འདུ་བྱེད་ཀྱི་ཆོས་མ་ཡིན་པ་མཚན་མ་ཐ་དད་པ་མེད་པ་རྩ་བ་དང ། གཞིར་གྱུར་པའི་ཕྱིར་ནམ་མཁའ་ཇི་ལྟ་བ་བཞིན་པས་དེ་ནི་རྟག་པ་ཞེས་བྱའོ། །རིགས་ཀྱི་བུ། རྣམ་པར་མི་རྟོག་པའི་ཡེ་ཤེས་ལས་གུད་ན་འཕགས་པའི་ཡེ་ཤེས་མེད་དོ། །དེ་བཞིན་ཉིད་ཀྱི་ཆོས་ཉིད་ལས་ཀྱང་ལྷག་པའི་སྤྱོད་ཡུལ་མེད་དོ། །དེ་ནི་ཆོས་ཀྱི་དེ་བཞིན་ཉིད་དང ། ཡེ་ཤེས་ཀྱི་དེ་བཞིན་ཉིད་དང ། དེ་བཞིན་ཉིད་དེ་གཉིས་ཀྱི་དེ་བཞིན་ཉིད་ནི་གཅིག་པའང་མ་ཡིན་ཐ་དད་པའང་མ་ཡིན་པས་དེའི་ཕྱིར་ཆོས་ཀྱི་སྐུ་ནི་ཡེ་ཤེས་རྣམ་པར་དག་པ་དང ། སྤངས་པ་རྣམ་པར་དག་པ་གཉིས་ཀྱི་ཕྱིར་ཆོས་ཀྱི་སྐུ་ནི་རྣམ་པར་དག་པ་ཕུན་སུམ་ཚོགས་པ་ཞེས་བྱའོ། །རིགས་
240b
ཀྱི་བུ།་གཞན་ཡང ། སྐུ་འདི་གསུམ་དབྱེ་བ་ལའང་རྣམ་པ་བཞི་སྟེ། སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པའང་ཡོད། ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་པའི་སྐུ་མ་ཡིན་པའང་ཡོད། སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་ཡིན་པའང་ཡོད། །སྤྲུལ་པའི་སྐུའང་མ་ཡིན་ལ་ལོངས་སྤྱོད་རྫོགས་པའི་སྐུའང་མ་ཡིན་པའོ། །སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་གང་ཞེ་ན། དེ་བཞིན་གཤེགས་པ་རྣམས་མྱ་ངན་ལས་འདས་སུ་ཟིན་ཀྱང་སྨོན་ལམ་གྱི་དབང་གིས་སྐལ་པ་ཇི་ལྟ་བ་བཞིན་ཕན་འདོགས་པ་ནི་སྤྲུལ་པའི་སྐུ་ཞེས་བྱའོ། །ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་པའི་སྐུ་མ་ཡིན་པ་གང་ཞེ་ན། སའི་སྔ་རོལ་པའི་སྐུའོ། །སྤྲུལ་པའི་སྐུའང་ཡིན་ལ་ལོངས་སྤྱོད་རྫོགས་པའི་སྐུའང་ཡིན་པ་དེ་གང་ཞེ་ན། ལྷག་མ་དང་བཅས་པའི་མྱ་ངན་ལས་འདས་པའི་སྐུའོ། །སྤྲུལ་པའི་སྐུའང་མ་ཡིན་ལ་ལོངས་སྤྱོད་རྫོགས་པའི་སྐུའང་མ་ཡིན་པ་དེ་ནི་ཆོས་ཀྱི་སྐུའོ། །རིགས་ཀྱི་བུ། ཆོས་ཀྱི་སྐུ་དེ་ནི་ཆོས་གཉིས་སུ་མེད་པ་མངོན་དུ་གྱུར་པའོ། །གཉིས་གང་ཞེ་ན། ཆོས་ཀྱི་སྐུ་དེ་ལ་མཚན་ཉིད་དང ། མཚན་ཉིད་ཀྱི་གཞི་གཉི་ག་མེད་པ་སྟེ་ཡོད་པའང་མ་ཡིན། མེད་པའང་མ་ཡིན། གཅིག་པའང་མ་ཡིན། ཐ་དད་པའང་མ་ཡིན། བགྲང་བའང་མ་
241a
༄#། །ཡིན།་བགྲང་བར་མི་བྱ་བའང་མ་ཡིན། སྣང་བའང་མ་ཡིན། མུན་པའང་མ་ཡིན་པ་སྟེ་དེ་ལྟ་བུའི་དེ་བཞིན་ཉིད་ཀྱི་ཡེ་ཤེས་ལ་མཚན་ཉིད་དང ། མཚན་ཉིད་ཀྱི་གཞིར་ཡང་མི་དམིགས། ཡོད་པ་དང ། མེད་པར་ཡང་མི་དམིགས། གཅིག་པ་དང་ཐ་དད་པར་ཡང་མི་དམིགས། བགྲང་བར་ཡང་མི་དམིགས་བགྲང་བར་མི་བྱ་བར་ཡང་མི་དམིགས། །སྣང་བ་དང ། མུན་པར་ཡང་མི་དམིགས་པ་སྟེ་འདི་ལྟར་སྤྱོད་ཡུལ་རྣམ་པར་དག་པ་དང ། ཡེ་ཤེས་རྣམ་པར་དག་པ་དེ་དབྱེར་མེད་པ།་བར་མཚམས་མེད་པ། འགོག་པ་དང་ལམ་གྱི་གཞིར་གྱུར་པ་སྟེ་དེའི་ཕྱིར་ན་ཆོས་ཀྱི་སྐུ་དེ་ནི་དེ་བཞིན་གཤེགས་པའི་མཛད་པ་སྣ་ཚོགས་མངོན་དུ་གྱུར་པའོ། །རིགས་ཀྱི་བུ།་སྐུ་འདི་ནི་རྒྱུ་དང ། རྐྱེན་དང ། སྤྱོད་ཡུལ་དང ། གནས་དང ། འབྲས་བུ་དག་གཞི་ཉིད་ལ་བརྟེན་པ་བསམ་གྱིས་མི་ཁྱབ་པ་སྟེ་དོན་དེ་མངོན་པར་ཤེས་ན་སྐུ་དེ་ཉིད་ཐེག་པ་ཆེན་པོའོ། །དེ་ཉིད་དེ་བཞིན་གཤེགས་པའི་ངོ་བོ་ཉིད་དོ། །དེ་བཞིན་གཤེགས་པའི་སྙིང་པོ་སྟེ་སྐུ་དེ་ལ་བརྟེན་ནས་སེམས་དང་པོ་བསྐྱེད་པ་དང ། ས་ཡོངས་སུ་སྦྱོང་བའི་སེམས་མངོན་པར་འབྱུང་སྟེ་ས་ལས་ཕྱིར་མི་ལྡོག་པའི་སེམས་ཀྱང་མངོན་དུ་འགྱུར་བ་དང ། སྐྱེ་བ་གཅིག་གིས་ཐོགས་པ་ལ་གནས་པའི་སེམས་དང་
241b
རྡོ་རྗེ་ལྟ་བུའི་ཏིང་ངེ་འཛིན་དང ། དེ་བཞིན་གཤེགས་པའི་དགོངས་པའང་མངོན་པར་འབྱུང ། དེ་བཞིན་གཤེགས་པའི་དམ་པའི་ཆོས་ཚད་མེད་གྲངས་མེད་པ་ཐམས་ཅད་ཀྱང་མངོན་དུ་འབྱུང་བར་འགྱུར་རོ། །ཆོས་ཀྱི་སྐུ་ལ་བརྟེན་ནས་བསམ་གྱིས་མི་ཁྱབ་པའི་ཏིང་ངེ་འཛིན་ཆེན་པོའང་མངོན་དུ་འབྱུང་བར་འགྱུར་རོ། །ཆོས་ཀྱི་སྐུ་འདི་ལ་བརྟེན་ནས་ཡེ་ཤེས་ཆེན་པོ་ཐམས་ཅད་ཀྱང་སྣང་བར་འགྱུར་རོ། །དེ་ལྟ་བས་ན་སྐུ་གཉིས་ནི་ཏིང་ངེ་འཛིན་དང ། ཡེ་ཤེས་ལ་བརྟེན་ནས་འབྱུང་བར་འགྱུར་རོ། །ཆོས་ཀྱི་སྐུ་འདི་ནི་རང་གི་ངོ་བོ་ཉིད་ལ་བརྟེན་ནས་རྟག་པ་ཞེས་བྱའོ། །བདག་ཅེས་བྱའོ། །ཏིང་ངེ་འཛིན་ཆེན་པོ་ལ་བརྟེན་པས་ན་བདེ་བ་ཞེས་བྱའོ། །ཡེ་ཤེས་ཆེན་པོ་ལ་བརྟེན་པས་ན་རྣམ་པར་དག་པ་ཞེས་བྱ་སྟེ་དེའི་ཕྱིར་དེ་བཞིན་གཤེགས་པ་རྟག་པར་བདེ་བ་དང ། རྣམ་པར་དག་པ་ལ་མངའ་བརྙེས་ཤིང་བཞུགས་པའོ། །ཏིང་ངེ་འཛིན་ཆེན་པོ་ལ་བརྟེན་ནས་དཔའ་བར་འགྲོ་བའི་ཏིང་ངེ་འཛིན་ལ་སོགས་པའི་ཏིང་ངེ་འཛིན་ཐམས་ཅད་དང ། ཆོས་དྲན་པ་ཉེ་བར་གཞག་པ་ལ་སོགས་པ་དྲན་པ་ཉེ་བར་གཞག་པ་ཐམས་ཅད་དང ། བྱམས་པ་ཆེན་པོ་དང ། སྙིང་རྗེ་ཆེན་པོ་དང ། གཟུངས་ཐམས་ཅད་དང ། མངོན་པར་ཤེས་པ་ཐམས་ཅད་དང ། དབང་ཐམས་ཅད་དང ། མཉམ་པ་ཉིད་
242a
༄#། །ཀྱི་ཆོས་ཐམས་ཅད་འཛིན་པ་ལ་སོགས་པ་སངས་རྒྱས་ཀྱི་ཆོས་ཐམས་ཅད་མངོན་པར་འབྱུང་ངོ ། །ཡེ་ཤེས་ཆེན་པོ་ལ་བརྟེན་པས་ནི་སྟོབས་བཅུ་དང ། མི་འཇིགས་པ་བཞི་དང ། སོ་སོར་ཡང་དག་པར་རིག་པ་བཞི་ལ་སོགས་པ་མ་འདྲེས་པའི་ཆོས་བརྒྱ་བརྒྱད་ཅུ་དང ། རྨད་དུ་བྱུང་བའི་ཆོས་ཐམས་ཅད་དང ། བསམ་གྱིས་མི་ཁྱབ་པའི་ཆོས་ཐམས་ཅད་མངོན་དུ་འགྱུར་རོ། །འདི་ལྟ་སྟེ། དཔེར་ན། ཡིད་བཞིན་གྱི་ནོར་བུ་རིན་པོ་ཆེ་ལས་བརྟེན་ནས་རིན་པོ་ཆེ་རྣམ་པ་སྣ་ཚོགས་ཚད་མེད་གྲངས་མེད་པ་ཐམས་ཅད་སྣང་བར་འགྱུར་རོ། །དེ་བཞིན་དུ་ཏིང་ངེ་འཛིན་ཆེན་པོའི་རིན་པོ་ཆེ་དང ། ཡེ་ཤེས་ཆེན་པོའི་རིན་པོ་ཆེ་ལ་བརྟེན་ནས་སངས་རྒྱས་ཐམས་ཅད་ཀྱི་དམ་པའི་ཆོས་རྣམ་པ་སྣ་ཚོགས་གྲངས་མེད་ཚད་མེད་པ་མངོན་དུ་འབྱུང་བར་འགྱུར་རོ། །རིགས་ཀྱི་བུ། དེ་ལྟར་ན་ཆོས་ཀྱི་སྐུ་དང ། ཏིང་ངེ་འཛིན་དང ། ཡེ་ཤེས་ནི་མཚན་མ་ཐམས་ཅད་ལས་ཡང་དག་པར་འདས་པ། མཚན་མས་མི་གོས་པ། རྣམ་པར་མི་རྟོག་པ། རྟག་པའང་མ་ཡིན། ཆད་པའང་མ་ཡིན་པ་སྟེ་དེ་ནི་དབུ་མའི་ལམ་སྒྲུབ་པ་ཞེས་བྱའོ། །རྣམ་པར་རྟོག་པ་ཡོད་པར་སྣང་ཡང་ངོ་བོ་ཉིད་ལ་ནི་རྣམ་པར་རྟོག་པའང་མེད། གསུམ་དུ་བགྲང་བའང་ཡོད་མོད་ཀྱི། དངོས་པོ་གསུམ་
242b
དུའང་མེད་དོ། །འཕེལ་བ་དང ། འགྲིབ་པ་མེད་པ་དེ་ནི་རྨི་ལམ་དང ། སྒྱུ་མ་ལྟ་བུ་སྟེ་གཟུང་བའང་མེད་འཛིན་པའང་མེད་དོ། །ཆོས་ཀྱི་ངོ་བོའི་དེ་བཞིན་ཉིད་ནི་རྣམ་པར་གྲོལ་བའི་གནས་ཏེ་འཆི་བདག་གི་སྤྱོད་ཡུལ་ལས་ཡང་དག་པར་འདས་པ། འཁོར་བའི་མུན་པ་ལས་མངོན་དུ་རྒལ་བ། སྐྱེ་བོ་ཐམས་ཅད་ཀྱིས་བསྒྲུབ་པར་མི་ནུས་པ། མཐར་ཕྱིན་པར་མི་ནུས་པ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ཀྱིས་བཞུགས་པར་བྱ་བའི་གནས་སོ། །རིགས་ཀྱི་བུ། དཔེར་ན། གང་ལ་ལ་ཞིག་གསེར་འདོད་དེ་གནས་ཀུན་ཏུ་བཙལ་བ་ལས་གསེར་གྱི་སྦྲམ་བུ་རྙེད་ནས་སྦྲམ་བུ་དེ་ཞིབ་ཏུ་བཏགས་ཏེ་སྙིང་པོ་བཞུ་ཞིང་སྦྱངས་ནས་རྣམ་པར་བྱང་བར་གྱུར་པ་དང ། གསེར་དེ་གདུ་བུ་ལ་སོགས་པ་རྒྱན་རྣམ་པ་སྣ་ཚོགས་ཡིད་བཞིན་དུ་བསྒྱུར་ཏེ་སྤྱད་ཀྱང་གསེར་གྱི་རང་བཞིན་ཉིད་ནི་མི་འགྱུར་རོ། །རིགས་ཀྱི་བུ། གཞན་ཡང ། རིགས་ཀྱི་བུའམ། རིགས་ཀྱི་བུ་མོ་གང་འཇིག་རྟེན་གྱི་དགེ་བ་སྤྱོད་པར་མོས་པ་དེས་དེ་བཞིན་གཤེགས་པའམ། དེ་བཞིན་གཤེགས་པའི་འཁོར་དེ་དག་མཐོང་སྟེ་ཉེ་བར་བསྙེན་ནས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དགེ་བ་ནི་གང ། མི་དགེ་བ་ནི་གང ། ཡང་དག་པའི་བསྒྲུབ་པ་གང་བགྱིས་པས་རྣམ་པར་དག་པའི་སྤྱོད་པ་ཐོབ་པར་འགྱུར། སངས་རྒྱས་
243a
༄#། །བཅོམ་ལྡན་འདས་རྣམས་དང ། དེའི་འཁོར་དག་གིས་འདི་སྐད་ཅེས་འདྲི་བ་ལ་འདི་སྙམ་དུ་དགོངས་ཏེ། རིགས་ཀྱི་བུ་དང ། རིགས་ཀྱི་བུ་མོ་འདི་དག་ནི་དམ་པའི་ཆོས་ཉན་པར་མོས་པ་དང ། རྣམ་པར་བྱང་བར་འདོད་པ་སྟེ། འདི་དག་ལ་ཡང་དག་པའི་ཆོས་བསྟན་ཏེ་སྙམ་མོ། །དེ་ཐོས་ནས་ཀྱང་ཚུལ་བཞིན་ཡིད་ལ་བྱ་སྟེ་ནན་ཏན་གྱིས་བསམ་པ་སྐྱེས་ཤིང་བརྩོན་པར་གྱུར་པའི་མཐུས། ལེ་ལོའི་སྒྲིབ་པ་དང ། སྡིག་པ་མི་དགེ་བའི་ཆོས་ཐམས་ཅད་བསལ་ཏེ། བསླབ་པའི་གནས་ཐམས་ཅད་ལ་རབ་ཏུ་གུས་པར་གནས་ཤིང་སེམས་བྱིང་བ་དང ། རྒོད་པ་བསལ་ཏེ་ས་དང་པོ་ལ་འཇུག་གོ། །ས་དང་པོའི་སེམས་ལ་བརྟེན་ནས་སེམས་ཅན་མང་པོའི་དོན་ལ་བརྩོན་པའི་སྒྲིབ་པ་སྤངས་པས་ས་གཉིས་པ་ལ་འཇུག་གོ་།ས་དེ་ལས་ཉོན་མོངས་པའི་སྒྲིབ་པ་སྤངས་ནས་ས་གསུམ་པ་ལ་འཇུག་གོ། །ས་དེ་ལས་སེམས་རྣམ་པར་སྦྱོང་བ་ལ་སྒྲིབ་པ་སྤངས་ནས་ས་བཞི་པ་ལ་འཇུག་གོ། །ས་དེ་ལས་ཐབས་མཁས་པའི་སྒྲིབ་པ་སྤངས་ནས་ས་ལྔ་པ་ལ་འཇུག་གོ། །ས་དེ་ལས་དོན་དམ་པ་དང ། ཀུན་རྫོབ་དུ་དམིགས་པའི་སྒྲིབ་པ་སྤངས་ནས་ས་དྲུག་པ་ལ་འཇུག་གོ། །ས་དེ་ལས་མཚན་མ་དང ། སྤྱོད་པ་ལ་དམིགས་པའི་སྒྲིབ་པ་སྤངས་ནས་ས་བདུན་པ་ལ་འཇུག་གོ །
243b
ས་དེ་ལས་མཚན་མོ་འགོག་པར་ཡང་མི་དམིགས་པའི་སྒྲིབ་པ་སྤངས་ནས་ས་བརྒྱད་པ་ལ་འཇུག་གོ་།ས་དེ་ལས་མཚན་མང་\?\་སྐྱེ་བར་མི་དམིགས་པའི་སྒྲིབ་པ་སྤངས་ནས་ས་དགུ་པ་ལ་འཇུག་གོ། །ས་དེ་ལས་དྲུག་པ་མངོན་པར་ཤེས་པའི་སྒྲིབ་པ་སྤངས་ནས་ས་བཅུ་པ་ལ་འཇུག་གོ། །ས་དེ་ལས་ཤེས་བྱའི་སྒྲིབ་པ་དང ། ཀུན་གཞིའི་རྣམ་པར་ཤེས་པ་སྤངས་ནས་དེ་བཞིན་གཤེགས་པའི་ས་ལ་འཇུག་གོ་།དེ་བཞིན་གཤེགས་པའི་ས་ནི་རྣམ་པར་དག་པ་གསུམ་གྱི་ཕྱིར་རབ་ཏུ་རྣམ་པར་དག་པ་ཞེས་བྱའོ། །གསུམ་གང་ཞེ་ན།་འདི་ལྟ་སྟེ། ཉོན་མོངས་པ་རྣམ་པར་དག་པ་དང ། སྡུག་བསྔལ་རྣམ་པར་དག་པ་དང ། མཚན་མ་རྣམ་པར་དག་པ་སྟེ་ཇི་ལྟར་གསེར་བཟང་པོ་བཞུ་ཞིང་བཏུལ་ཏེ་སྦྱངས་པ་ལ་རྡུལ་དང ། དྲི་མས་ཕྱིར་མི་གོས་ཤིང་རང་བཞིན་རྣམ་པར་དག་པའི་གསེར་ཉིད་དུ་སྣང་སྟེ་གསེར་གྱི་དངོས་པོ་རྣམ་པར་དག་པའང་མེད་པར་གྱུར་པ་མ་ཡིན་པ་བཞིན་ནོ། །དཔེར་ན། ཆུ་རྙོག་པ་ཅན་དྭངས་ཏེ་རྣམ་པར་དྭངས་ནས་ཆུའི་རང་བཞིན་ཉིད་གསལ་བར་གྱུར་པ་ཡིན་གྱི། ཆུ་དེ་ཉིད་མེད་པར་གྱུར་པའང་མ་ཡིན་ནོ། །དེ་བཞིན་དུ་ཆོས་ཀྱི་སྐུའང་ཉོན་མོངས་པ་དང ། སྡུག་བསྔལ་སྣ་ཚོགས་འདུས་པ་སྤངས་ནས་བག་ཆགས་མ་ལུས་པར་བསལ་ཏེ་སངས་རྒྱས་ཀྱི་ངོ་བོ་ཉིད་རྣམ་པར་དག་པ་ཉིད་སྣང་
244a
༄#། །བར་གྱུར་པ་ཡིན་གྱི། དངོས་པོ་མེད་པར་གྱུར་པ་ཉིད་ནི་མ་ཡིན་ནོ། །ཡང་དཔེར་ན། ནམ་མཁའ་ལ་དུ་བ་དང ། སྤྲིན་དང ། རྡུལ་དང ། ན་བུན་གྱིས་བསྒྲིབས་པ་དེ་མེད་པར་གྱུར་ན་ནམ་མཁའི་ཁམས་དེ་རྣམ་པར་དག་པར་གྱུར་པ་ཡིན་གྱི། ནམ་མཁའ་དེ་ཉིད་མེད་པར་གྱུར་པ་ནི་མ་ཡིན་ནོ། །དེ་བཞིན་དུ་ཆོས་ཀྱི་སྐུ་ཉོན་མོངས་པ་ཐམས་ཅད་ཟད་པའི་ཕྱིར་རྣམ་པར་དག་པ་ཞེས་བྱ་ཡི། སྐུ་དེ་ཉིད་མེད་པར་གྱུར་པ་ནི་མ་ཡིན་ནོ། །གཞན་ཡང ། དཔེར་ན། འགའ་ཞིག་གཉིད་ལོག་པའི་རྨི་ལམ་ན་ཆུ་ཆེན་པོས་ཁྱེར་ནས། ལུས་དང ། རྐང་ལག་བསྐྱོད་དེ་ལུས་དང ། སེམས་འབད་པ་དང་བཅས་པས་ཕ་རོལ་གྱི་འགྲམ་དུ་ཕྱིན་པ་རྨིའོ། །རྨི་ལམ་དེ་ལས་སད་པ་དང ། ཆུ་དང ། ཕན་ཚུན་གྱི་འགྲམ་ཐ་དད་པ་ཡོད་པ་མཐོང་བ་མེད་ཀྱང ། སེམས་ཉིད་མེད་པ་ནི་མ་ཡིན་ནོ། །འཁོར་བར་རྣམ་པར་རྟོག་པ་ཟད་པའང་བློ་རྣམ་པར་དག་པ་སྟེ་སངས་རྒྱས་པ་དེ་མེད་པའང་མ་ཡིན་ནོ། །དེ་བཞིན་དུ་ཆོས་ཀྱི་དབྱིངས་ལ་རྣམ་པར་རྟོག་པ་ཐམས་ཅད་མི་སྐྱེ་བའི་ཕྱིར་རྣམ་པར་དག་པ་ཞེས་བྱ་སྟེ་སངས་རྒྱས་རྣམས་ཀྱི་ཡང་དག་པའི་སྐུ་ནི་མེད་པ་མ་ཡིན་ནོ། །གཞན་ཡང ། རིགས་ཀྱི་བུ། ཆོས་ཀྱི་སྐུ་ནི་ཉོན་མོངས་པའི་སྒྲིབ་པ་རྣམ་པར་དག་པར་ལོངས་སྤྱོད་རྫོགས་པའི་
244b
སྐུ་སྣང་བར་འགྱུར་རོ། །ལས་ཀྱི་སྒྲིབ་པ་རྣམ་པར་དག་པས་སྤྲུལ་པའི་སྐུ་སྣང་པར་འགྱུར་རོ། །ཡེ་ཤེས་ཀྱི་སྒྲིབ་པ་རྣམ་པར་དག་པས་ཆོས་ཀྱི་སྐུ་སྣང་བར་འགྱུར་རོ། །དཔེར་ན་ནམ་མཁའ་སྟོང་པ་ལ་བརྟེན་ནས་གློག་འབྱུང ། གློག་ལ་བརྟེན་ཏེ་འོད་སྣང་ངོ ། །དེ་བཞིན་དུ་ཆོས་ཀྱི་སྐུ་ལ་བརྟེན་ཏེ་ལོངས་སྤྱོད་རྫོགས་པའི་སྐུར་སྣང་ངོ ། །ལོངས་སྤྱོད་རྫོགས་པའི་སྐུ་ལ་བརྟེན་ཏེ་སྤྲུལ་པའི་སྐུ་སྣང་ངོ ། །དེ་ལ་རང་བཞིན་རྣམ་པར་དག་པའི་ཕྱིར་ཆོས་ཀྱི་སྐུར་སྣང་ངོ ། །ཡེ་ཤེས་རྣམ་པར་དག་པས་ལོངས་སྤྱོད་རྫོགས་པའི་སྐུར་སྣང་ངོ ། ། ཏིང་ངེ་འཛིན་རྣམ་པར་དག་པས་སྤྲུལ་པའི་སྐུར་སྣང་ངོ ། །དེ་གསུམ་རྣམ་པར་དག་པ་ནི་ཆོས་ཀྱི་དེ་བཞིན་ཉིད་དང ། གཞན་མ་ཡིན་པའི་དེ་བཞིན་ཉིད་དང ། རོ་གཅིག་པའི་དེ་བཞིན་ཉིད་དང ། རྣམ་པར་གྲོལ་བའི་དེ་བཞིན་ཉིད་དང ། མཐའ་ཀླས་པའི་དེ་བཞིན་ཉིད་ཀྱི་ཕྱིར་སངས་རྒྱས་ཐམས་ཅད་ནི་སྐུ་ཐ་མི་དད་དོ། །རིགས་ཀྱི་བུའམ། རིགས་ཀྱི་བུ་མོ་གང་དེ་བཞིན་གཤེགས་པ་ནི་བདག་གི་སྟོན་པ་ཆེན་པོའོ་ཞེས་སྨྲ་ཞིང་མོས་པ་དེ་ནི་དེ་བཞིན་གཤེགས་པའི་སྐུ་གཉིས་སུ་མེད་པར་བསམ་པ་ཐག་པ་ནས་ཤེས་པ་ཡིན་ནོ། །རིགས་ཀྱི་བུ། དེའི་ཕྱིར་སྤྱོད་ཡུལ་ཐམས་ཅད་ལ་ཡང་དག་པ་མ་ཡིན་པའི་རྟོག་པ་ཡོངས་སུ་བསལ་བས་ཆོས་དེ་དག་ལ་མཚན་ཉིད་གཉིས་སུ་མེད་པ་དང །
245a
༄#། །རྣམ་པར་རྟོག་པ་མེད་པ་དང ། འཕགས་པ་རྣམས་ཀྱིས་བསྒྲུབ་པར་བྱ་བ་དེ་ལ་ཇི་ལྟ་ཇི་ལྟར་གཉིས་སུ་མེད་པའི་ཚུལ་གྱིས་ཡང་དག་པར་བསྒྲུབས་པས་དེ་ལྟ་དེ་ལྟར་སྒྲིབ་པ་ཐམས་ཅད་སྦྱོང་བར་འགྱུར་རོ། །ཇི་ཙམ་དུ་སྒྲིབ་པ་བྱང་བར་གྱུར་པ་དེ་ཙམ་དུ་ཆོས་ཀྱི་དེ་བཞིན་ཉིད་དང ། དེ་བཞིན་ཉིད་ཀྱི་ཡེ་ཤེས་རྣམ་པར་དག་པ་མཆོག་ཐོབ་པར་འགྱུར་རོ། །ཇི་ཙམ་དུ་ཆོས་ཀྱི་དབྱིངས་དང ། དེ་བཞིན་ཉིད་དང ། ཡང་དག་པའི་ཡེ་ཤེས་རྣམ་པར་དག་པ་དེ་བཞིན་དུ་དབང་ཕུན་སུམ་ཚོགས་པ་ཐམས་ཅད་ཀྱང་འཛིན་ཅིང་ཡོངས་སུ་རྫོགས་པར་འགྱུར་རོ། །སྒྲིབ་པ་ཐམས་ཅད་ཀྱང་སྦྱོང་བར་འགྱུར་རོ། །སྒྲིབ་པ་ཐམས་ཅད་རྣམ་པར་དག་པའི་ཕྱིར་དེ་ནི་ཡང་དག་པ་ཉིད་དང ། དེ་བཞིན་ཉིད་དང ། ཡང་དག་པའི་ཡེ་ཤེས་དང ། བདེན་པའི་མཚན་ཉིད་དུ་མཐོང་བ་དེ་ནི་ཡང་དག་པ་ཞེས་བྱ། འཕགས་པའི་གཟིགས་པ་ཞེས་བྱ། ཡང་དག་པ་བདེན་པའི་ཚུལ་དུ་སངས་རྒྱས་མཐོང་བ་ཞེས་བྱའོ། །དེ་ཅིའི་ཕྱིར་ཞེ་ན། ཚུལ་བཞིན་དུ་ཆོས་ཉིད་མཐོང་བའི་ཕྱིར་སངས་རྒྱས་རྣམས་ཀྱིས་ཀྱང་དེ་བཞིན་གཤེགས་པ་ཐམས་ཅད་མངོན་དུ་གཟིགས་པ་ཞེས་བྱའོ། །དེ་ཅིའི་ཕྱིར་ཞེ་ན། ཉན་ཐོས་དང ། རང་སངས་རྒྱས་ནི་ཁམས་གསུམ་ལས་མངོན་པར་འབྱུང་ཞིང་ཡང་དག་པའི་
245b
མཐའ་ལ་གཞོལ་བས་འཕགས་པའི་གང་ཟག་དེ་ལྟ་བུས་མཐོང་བར་མི་ནུས་སོ། །དེ་མ་མཐོང་བས་བྱིས་པ་སོ་སོའི་སྐྱེ་བོ་རྣམས་ནི་ཐམས་ཅད་ཀྱང་ཕྱིན་ཅི་ལོག་གིས་བསླད་པ་དང ། ལོག། པའི་རྣམ་པར་རྟོག་པས་ཤེས་པར་མི་ནུས་ཏེ། དཔེར་ན། ཤིན་ཏུ་མཐུ་ཆུང་བའི་རི་བོང་གི་རྐྱལ་གྱིས་རྒྱ་མཚོ་མི་རྒལ་བ་བཞིན་དུ་བྱིས་པ་སོ་སོའི་སྐྱེ་བོའི་ཤེས་པས་ཆོས་ཀྱི་དེ་བཞིན་ཉིད་མངོན་པར་ཤེས་པར་མི་ནུས་སོ། །འོན་ཀྱང་དེ་བཞིན་གཤེགས་པ་རྣམ་པར་རྟོག་པ་མེད་བར་ཆོས་ཐམས་ཅད་ལ་དབང་ཆེན་པོ་བརྙེས་པ། རྣམ་པར་དག་པའི་ཡེ་ཤེས་ཟབ་མོ་དང་ལྡན་པ་རྣམས་ཀྱི་རང་གི་སྤྱོད་ཡུལ་ཡིན་ཏེ། གཞན་དང་ཐུན་མོང་དུ་མ་གྱུར་པའོ། །དེའི་ཕྱིར་སངས་རྒྱས་བཅོམ་ལྡན་འདས་རྣམས་ནི་བསྐལ་པ་ཚད་མེད་གྲངས་མེད་པར་སྐུ་དང་སྲོག་མི་ཕངས་པར་དཀའ་བ་སྤྱོད་པས་ཤིན་ཏུ་མཆོག་དམ་པ། བླ་ན་མེད་པ། བསམ་གྱིས་མི་ཁྱབ་པ། ཚིག་དང ། བརྗོད་པའི་སྤྱོད་ཡུལ་ལས་འདས་པ། ཤིན་ཏུ་ཞི་བ། འཇིགས་པ་ཐམས་ཅད་དང་བྲལ་བའི་སྐུ་དེ་བརྙེས་པར་གྱུར་ཏོ། །རིགས་ཀྱི་བུ། དེ་ལྟ་བུའི་ཆོས་ཀྱི་ཆོས་ཉིད་ཤེས་ཤིང་མཐོང་བ་ནི་སྐྱེ་བ་དང ། རྒ་བ་དང ། ན་བ་དང ། འཆི་བ་མེད་པར་ཡུན་རིང་དུ་འཚོ་བའོ། །གཉིད་ཀྱིས་ལོག་པ་དང ། བཀྲེས་པ་དང ། སྐོམ་པ་མེད་པར་སེམས་རྟག་པར་ཏིང་ངེ་འཛིན་དུ་གནས་ཏེ་གཡོ་ཞིང་སྤྲོས་པ་མེད་པའོ། །གང་ཞིག་དེ་བཞིན་གཤེགས་
246a
༄#། །པ་ལ་སྤྲོས་པ་དང་བཅས་པའི་སེམས་བསྐྱེད་ན་དེས་ནི་དེ་བཞིན་གཤེགས་པ་མཐོང་བར་མི་འགྱུར་རོ། །གང་ཞིག་དེ་བཞིན་གཤེགས་པ་རྣམས་ཀྱིས་བཤད་པ་འདི་ནི་ཕན་པ་དང་བཅས་པ་སྟེ་སུས་མདོ་འདི་ཐོས་པ་དེས་གཅན་གཟན་དང ། ཡི་དྭགས་མ་རུངས་པ་དང ། སྐྱེ་བོ་མི་བགྲུངས་པ་རྣམས་དང་ཡང་ཕྲད་པར་མི་འགྱུར་རོ།། ཆོས་འདི་ཐོས་པའི་འབྲས་བུ་རྣམ་པར་སྨིན་པའང་ཟད་པར་མི་འགྱུར་རོ། །དེ་བཞིན་གཤེགས་པ་རྣམས་ནི་ལུང་དུ་མི་སྟོན་པ་དང ། ཡུལ་ཐམས་ཅད་ལ་མཁྱེན་པར་བཞེད་པའི་དགོངས་པ་མི་མངའ། འཁོར་བ་དང ། མྱ་ངན་ལས་འདས་པ་ལ་དགོངས་པ་ཐ་དད་པ་མི་མངའ་འོ། །དེ་བཞིན་གཤེགས་པ་ལ་མ་བརྟགས་པའི་ལུང་སྟོན་པ་མི་མངའ་འོ།། སངས་རྒྱས་བཅོམ་ལྡན་འདས་རྣམས་ནི་སྤྱོད་ལམ་རྣམ་པ་བཞིར་ཡེ་ཤེས་ཀྱིས་མ་བཟུང་བ་མེད་དོ། །ཆོས་ཐམས་ཅད་ལ་ཐུགས་རྗེས་མ་ཟིན་པ་མེད་དོ། །སེམས་ཅན་ཐམས་ཅད་ལ་ཕན་པ་དང ། བདེ་བས་མ་བཟུང་བ་མེད་དོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལས་གསེར་འོད་དམ་པའི་མདོ་སྡེ་འདི་ཐོས་ཏེ་མོས་ན་དེ་སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་དང ། ལྷ་མ་ཡིན་གྱི་གནས་སུ་ནམ་ཡང་མི་ལྟུང་ངོ ། །རྟག་ཏུ་ལྷ་དང ། མིའི་གནས་སུ་སྐྱེ་སྟེ་དམན་པར་མི་སྐྱེ་བ་དང ། རྟག་ཏུ་སངས་
246b
རྒྱས་བཅོམ་ལྡན་འདས་ལ་བསྙེན་བཀུར་བྱེད་ཅིང ། དམ་པའི་ཆོས་ཉན་ཅིང་འཛིན་པ་དང ། སངས་རྒྱས་ཀྱི་ཞིང་རྣམ་པར་དག་པ་དག་ཏུ་སྐྱེ་བར་ཡང་འགྱུར་ཏེ་དེ་ནི་ཆོས་ཤིན་ཏུ་ཟབ་མོ་འདི་ཐོས་པའི་ཕྱིར་རོ། །རིགས་ཀྱི་བུའམ། རིགས་ཀྱི་བུ་མོ་དེ་དག་ནི་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡང་མཁྱེན་ཅིང་ལུང་ཡང་སྟོན་ཏོ། །གང་རིགས་ཀྱི་བུའམ། རིགས་ཀྱི་བུ་མོ་ལ་ལས་ཤིན་ཏུ་ཟབ་མོ་དམ་པའི་ཆོས་འདི་རྣ་ལམ་དུ་ལན་ཅིག་ཐོས་ན་ཡང་དེ་ནི་དེ་བཞིན་གཤེགས་པ་ལ་དབང་ཟ་བར་མི་འགྱུར། དམ་པའི་ཆོས་ལ་མི་དམོད། འཕགས་པ་རྣམས་ལ་མི་བརྙས། སྐྱེ་དགུ་ཐམས་ཅད་ཀྱི་དགེ་བའི་རྩ་བ་མ་སྐྱེས་པ་ནི་སྐྱེས་པར་བྱེད། དགེ་བའི་རྩ་བ་སྐྱེས་པ་རྣམས་ནི་འཕེལ་བ་དང ། ཡོངས་སུ་སྨིན་པར་བྱེད་ཅིང ། འཇིག་རྟེན་གྱི་ཁམས་ན་སེམས་ཅན་ཇི་སྙེད་པ་དེ་དག་ཕ་རོལ་ཏུ་ཕྱིན་པའི་སྤྱོད་པ་སྟོབས་པར་བྱེད་དོ། །དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོ་དང ། བརྒྱ་བྱིན་དང ། ཚངས་པ་དང ། རྒྱལ་པོ་ཆེན་པོ་བཞི་ལ་སོགས་པའི་ལྷ་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ཏེ་ཐལ་མོ་སྦྱར་བ་བཏུད་ནས་ཤིན་ཏུ་གུས་པ་དང་བཅས་པས་བཅོམ་ལྡན་འདས་ཀྱི་ཞབས་ལ་སྦྱི་བོས་ཕྱག་བཙལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གསེར་འོད་དམ་པ་མདོ་
247a
༄#། །སྡེའི་དབང་པོའི་རྒྱལ་པོ་འདི་འཆད་པའི་གནས་དེ་དང ། ཡུལ་དེ་དག་ཏུ་ཕན་པའི་ཡོན་ཏན་འདི་བཞི་འབྱུང་བར་འགྱུར་རོ། །བཞི་གང་ཞེ་ན་ཡུལ་དེར་རྒྱལ་པོ་ཕ་རོལ་པོའི་དགྲ་དང ། དཔུང་དར་བ་ཡིས་མི་ཚུགས་པ་དང ། ནད་ཐམས་ཅད་བསལ་ཅིང་ཚེ་རིང་བ་དང ། བཀྲ་ཤིས་ཤིང་བདེ་བས་ཡང་དག་པའི་ཆོས་སྟོན་པར་བྱེད་དོ། །བཙུན་མོ་དང ། སླས་དང ། སྲས་དང ། སྲས་མོ་དང ། བློན་པོ་རྣམས་ཀྱང་འདུམ་ཞིང་རྩོད་པ་མེད་པ་དང ། གཅམ་བུ་དང ། སྒྱུས་འཚོ་བ་སྤངས་པའི་རྒྱལ་པོས་གནང་ཞིང་བཀུར་བར་འགྱུར་བ་དང ། དགེ་སྦྱོང་དང ། བྲམ་ཟེ་ལ་སོགས་པ་དམ་པའི་ཆོས་སྤྱོད་ཅིང་ནད་མེད་པ་དང ། བདེ་བས་གློ་བུར་དུ་འཆི་བ་མེད་པ་དང ། བསོད་ནམས་ཀྱི་ཚོགས་ཐམས་ཅད་སྒྲུབ་ཅིང་ཡོངས་སུ་འཛིན་པ་དང ། གང་དུས་ཐམས་ཅད་དུ་འབྱུང་བ་ཆེན་པོ་བཞི་མི་འཕྲོད་པ་མེད་པ་དང ། རྟག་པར་ལྷ་རྣམས་ཀྱིས་སྲུང་ཞིང་སྐྱོབ་པ་དང ། བྱམས་པ་དང ། སྙིང་རྗེ་མཉམ་པས་གནོད་པ་མེད་པ་དང ། འཚེ་བའི་སེམས་མེད་པ་དང ། སེམས་ཅན་རྣམས་དཀོན་མཆོག་གསུམ་ལ་སྐྱབས་སུ་འགྲོ་ཞིང་བྱང་ཆུབ་སེམས་དཔའི་སྤྱོད་པ་སྒྲུབ་པར་སྨོན་ལམ་འདེབས་སོ། །བཅོམ་ལྡན་འདས། བདག་ཅག་ཀྱང་རྟག་ཏུ་མདོ་སྡེ་འདི་རྒྱས་པར་བགྱི་བའི་སླད་དུ་མདོ་སྡེ་འདི་སུ་འཛིན་པའི་
247b
གང་ཟག་དེའི་གནས་སུ་མཆི་ཞིང་ཕན་གདགས་པར་བགྱིའོ་ཞེས་གསོལ་པ་དང ། བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ཏེ། ལེགས་སོ། །ལེགས་སོ། །རིགས་ཀྱི་བུ། དེ་ལྟར་དེ་བཞིན་དུ་ཁྱེད་ཀྱིས་ཀྱང་མདོ་སྡེའི་རྒྱལ་པོ་དམ་པ་འདི་འཇིག་རྟེན་ན་ཡུན་རིང་དུ་གནས་པར་བྱ་བའི་ཕྱིར་སྤེལ་བ་དང ། རྒྱས་པར་བྱ་བ་ལ་བརྩོན་པར་གྱིས་ཤིག་།གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སྐུ་གསུམ་རྣམ་པར་དབྱེ་བའི་ལེའུ་སྟེ་གསུམ་པའོ།། །།དེ་ནས་བྱང་ཆུབ་སེམས་དཔའ་མཛེས་པའི་ཏོག་གཉིད་ལོག་པའི་རྨི་ལམ་ན་གསེར་གྱི་རྔ་ཀུན་ཏུ་སྣང་བ། དཔེར་ན། ཉི་མའི་དཀྱིལ་འཁོར་འདྲ་བ་ཞིག་མཐོང་ངོ ། །ཕྱོགས་ཐམས་ཅད་ནའང་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་དག་རིན་པོ་ཆེའི་ཤིང་དྲུང་ན་རིན་པོ་ཆེའི་བཻ་ཌཱུརྱའི་ཁྲི་རྣམས་ལ་བཞུགས་ཤིང་འཁོར་བརྒྱ་སྟོང་དུ་མས་ཡོངས་སུ་བསྐོར་ཏེ་མདུན་གྱིས་བལྟས་ནས་ཆོས་སྟོན་པ་མཐོང་ངོ ། །དེ་ནའང་སྐྱེས་བུ་བྲམ་ཟེའི་གཟུགས་ལྟ་བུ་ཞིག་རྔ་དེ་རྡུང་བ་མཐོང་སྟེ་རྔའི་སྒྲ་དེ་ལས་བསྟན་པའི་ཚིགས་སུ་བཅད་པ་འདི་ལྟ་བུ་དག་བྱུང་བ་ཐོས་སོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་སད་མ་ཐག་ཏུ་བསྟན་པའི་ཚིགས་སུ་བཅད་པ་འདི་དག་རྗེས་སུ་དྲན་ནོ། །རྗེས་སུ་དྲན་ནས་ཀྱང་དེའི་མཚན་མོ་ཟད་པ་དང ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ་སྲོག་
248a
༄#། །ཆགས་སྟོང་པྲག་དུ་མ་དང་ལྷན་ཅིག་ཏུ་བྱ་རྒོད་ཕུང་པོའི་རི་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ ་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་མཛེས་པའི་ཏོག་གིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་རྨི་ལམ་ན་རྔའི་སྒྲ་ལས་ཚིགས་སུ་བཅད་པ་གང་དག་ཐོས་པ་དེ་དག་གསོལ་ཏོ། །ནུབ་ཅིག་གཡེལ་བ་མེད་པར་ཡང ། །བདག་གི་རྨི་ལམ་རྨིས་པ་ནི། །མཛེས་པའི་རྔ་ཆེན་མཐོང་བ་སྟེ། །ཐམས་ཅད་དུ་ནི་གསེར་གྱི་འོད། །ཉི་མ་ཇི་ལྟ་བཞིན་དུ་འབར། ། ཀུན་ཏུ་རྣམ་པར་ལྷང་ངེ་སྟེ། །ཕྱོགས་བཅུ་རྣམས་སུ་སྣང་བར་གྱུར། །ཀུན་ཏུ་རིན་ཆེན་ཤིང་དྲུང་ན། །རིན་ཆེན་བཻཌཱུརྱ་དག་གི་།ཁྲི་ལ་སངས་རྒྱས་རྣམས་བཞུགས་ཏེ། །བརྒྱ་སྟོང་ཕྲག་ནི་དུ་མ་ཡི། །འཁོར་དབུས་མདུན་གྱིས་བལྟས་པ་མཐོང ། །བྲམ་ཟེའི་གཟུགས་ནི་འདྲ་བ་ཞིག། །རྔ་ཆེན་རབ་ཏུ་བརྡུང་བ་མཐོང ། །དེ་ཡིས་དེ་ལ་བརྡུངས་པ་དང ། །ཚིགས་སུ་བཅད་པ་འདི་དག་བྱུང ། །གསེར་འོད་དམ་པའི་རྔ་ཆེན་སྒྲ་ཡིས་ནི། །སྟོང་གསུམ་འཇིག་རྟེན་འཇིག་རྟེན་གསུམ་འདི་ན། །ངན་སོང་སྡུག་བསྔལ་གཤིན་རྗེའི་སྡུག་བསྔལ་
248b
དང། །དབུལ་བའི་སྡུག་བསྔལ་སྡུག་བསྔལ་ཞི་བར་ཤོག་།རྔ་བོ་ཆེ་ཡི་སྒྲ་སྐད་འདི་ཡིས་ནི། །འཇིག་རྟེན་རྨོངས་པ་ཐམས་ཅད་ཞི་གྱུར་ཅིག་།ཇི་ལྟར་ཐུབ་དབང་འཇིགས་མེད་འཇིགས་ཞི་ལྟར། །སེམས་ཅན་འཇིགས་མེད་འཇིགས་དང་བྲལ་བར་ཤོག་།ཇི་ལྟར་འཁོར་བར་ཀུན་མཁྱེན་ཐུབ་དབང་པོ། །འཕགས་པའི་ཡོན་ཏན་ཀུན་དང་ལྡན་པ་ལྟར། །སྐྱེ་དགུ་ཏིང་འཛིན་བྱང་ཆུབ་ཡན་ལག་གི་།ཡོན་ཏན་ལྡན་ཞིང་ཡོན་ཏན་རྒྱ་མཚོར་གྱུར། །རྔ་བོ་ཆེ་ཡི་སྒྲ་སྐད་འདི་ཡིས་ནི། །སེམས་ཅན་ཐམས་ཅད་ཚངས་པའི་སྒྲ་ལྡན་གྱུར། །སངས་རྒྱས་བྱང་ཆུབ་དམ་པ་མཆོག་རེག་ཤོག་།ཆོས་ཀྱི་འཁོར་ལོ་དགེ་བ་བསྐོར་གྱུར་ཅིག་།བསྐལ་པ་བསམ་གྱིས་མི་ཁྱབ་བཞུགས་པར་ཤོག་།འགྲོ་ལ་ཕན་ཕྱིར་ཆོས་ཀྱང་སྟོན་གྱུར་ཅིག་།ཉོན་མོངས་འཇོམས་གྱུར་སྡུག་བསྔལ་སེལ་བར་ཤོག་།འདོད་ཆགས་ཞེ་སྡང་གཏི་མུག་ཞི་གྱུར་ཅིག་།སེམས་ཅན་གང་དག་ངན་སོང་སར་གནས་ཏེ། །རུས་པའི་ལུས་ལ་མེ་ལྕེ་རབ་འབར་བ། །དེ་དག་རྔ་ཆེན་བསྒྲགས་པ་ཐོས་གྱུར་ཅིག་།སྡུག་བསྔལ་ཐམས་ཅད་རབ་ཏུ་ཞི་གྱུར་ནས། །སངས་རྒྱས་ཕྱག་འཚལ་ལོ་ཞེས་ཚིག་ཐོས་ཤོག་།སེམས་ཅན་ཀུན་གྱི་ཚེ་རབས་བརྒྱ་དག་དང ། །ཚེ་རབས་སྟོང་ཕྲག་བྱེ་བ་སྐྱེ་དྲན་ཤོག་།ཐུབ་པའི་དབང་པོ་རྟག་ཏུ་དྲན་གྱུར་ཅིག་།དེ་དག་གིས་ནི་རྒྱ་ཆེན་གསུང་ཐོས་ཤོག་།རྔ་བོ་ཆེ་ཡི་སྒྲ་སྐད་འདི་ཡིས་ནི། །སངས་རྒྱས་རྣམས་དང་རྟག་ཏུ་འགྲོགས་རྙེད་གྱུར། །
249a
༄#། །སྡིག་པའི་ལས་རྣམས་རྣམ་པར་སྤོང་བར་ཤོག་།བྱ་བ་དགེ་བ་རྣམས་ནི་སྤྱོད་གྱུར་ཅིག་།མི་དང་ལྷ་དང་སྲོག་ཆགས་ཐམས་ཅད་ཀྱི། །དེ་དག་བསམ་དང་སྨོན་ལམ་གང་ཡིན་པ། །རྔ་བོ་ཆེ་ཡི་སྒྲ་སྐད་འདི་ཡིས་ནི། །དེ་དག་རྣམས་ཀྱི་རེ་ཀུན་རྫོགས་གྱུར་ཅིག་།སེམས་ཅན་གང་དག་སེམས་དམྱལ་མི་བཟད་སྐྱེས། །ལུས་ལ་མེ་ལྕེ་ཀུན་ཏུ་རབ་ཏུ་འབར། །སྐྱབས་མེད་མྱ་ངན་བཅས་ཤིང་ཡོངས་འཁྱམ་པ། །མེ་རྣམས་དེ་དག་རབ་ཏུ་ཞི་བར་ཤོག་།སེམས་དམྱལ་ཡི་དྭགས་མི་ཡི་འཇིག་རྟེན་ན། །སེམས་ཅན་སྡུག་བསྔལ་མི་བཟད་དྲག་པོ་གང ། །རྔ་བོ་ཆེ་ཡི་སྒྲ་སྐད་འདི་ཡིས་ནི། །དེ་དག་རྣམས་ཀྱིས་སྡུག་བསྔལ་ཀུན་ཞི་ཤོག་།རྟེན་མེད་དཔུང་གཉེན་མེད་པ་དང ། །སྐྱབས་མེད་པར་ནི་གྱུར་པ་དག་།དེ་རྣམས་ལ་ནི་སྐྱོབ་པ་དང ། །དཔུང་གཉེན་རྟེན་མཆོག་བདག་གྱུར་ཅིག་།སངས་རྒྱས་རྐང་གཉིས་དམ་པ་དག་།ཐུགས་བརྩེ་ཐུགས་རྗེ་ལྡན་པའི་ཐུགས། །གང་དག་ཕྱོགས་བཅུའི་འཇིག་རྟེན་ན། །བཞུགས་པ་བདག་ལ་དགོངས་སུ་གསོལ། །བདག་གིས་སྔོན་ཆད་སྡིག་པའི་ལས། །ཤིན་ཏུ་མི་བཟད་གང་བགྱིས་པ། །སྟོབས་བཅུའི་སྤྱན་སྔར་བདག་མཆིས་ཏེ། །དེ་དག་ཐམས་ཅད་བཤགས་པར་བགྱི། །ཕ་མ་དག་ཏུ་མི་འཛིན་དང ། །སངས་རྒྱས་རྣམས་སུ་མི་འཛིན་དང ། །དགེ་བ་དག་ཏུ་མི་འཛིན་དང ། །སྡིག་པ་བདག་གིས་གང་བགྱིས་
249b
དང། །ཕྱུག་པའི་རྒྱགས་པས་དྲེགས་པ་དང ། །རིགས་དང་ལོངས་སྤྱོད་རྒྱགས་པ་དང ། །གཞོན་པའི་རྒྱགས་པས་དྲེགས་པ་ཡིས། །བདག་གིས་སྡིག་པ་གང་བགྱིས་དང ། །ཉེས་བསམས་ཉེས་པར་སྨྲས་པ་དང ། །ཉེས་པར་བགྱིས་པའི་ལས་རྣམས་དང ། །ཉེས་པའི་དམིགས་སུ་མ་བལྟས་པས། །བདག་གིས་སྡིག་པ་གང་བགྱིས་དང ། །བྱིས་པའི་བློ་ཡི་འཇུག་པ་དང ། ། མི་ཤེས་མུན་པའི་སེམས་དང་ནི། །སྡིག་པའི་གྲོགས་པོའི་དབང་གྱུར་དང ། །ཉོན་མོངས་རྣམ་པར་འཁྲུག་སེམས་དང ། །རྩེད་མོ་དགའ་བའི་དབང་ཉིད་དང ། །མྱ་ངན་དང་ནི་ནད་དབང་དང། །ནོར་གྱིས་མི་ཆོག་ཉེས་པ་ཡིས། །བདག་གིས་སྡིག་པ་གང་བགྱིས་དང ། །འཕགས་མིན་སྐྱེ་བོ་འདྲེ་བ་དང ། །ཕྲག་དོག་སེར་སྣའི་རྒྱུ་དང་ནི། །གཡོ་དང་དབུལ་བའི་ཉེས་པ་ཡིས། ། བདག་གིས་སྡིག་པ་གང་བགྱིས་དང ། །ཕོངས་པ་བྱུང་བའི་དུས་ཀྱི་ཚེ། །འདོད་པ་རྣམས་ཀྱི་འཇིགས་རྒྱུ་དང ། །ཕྱུག་པོ་མ་ཡིན་གྱུར་པ་ཡིས། །བདག་གིས་སྡིག་པ་གང་བགྱིས་དང ། ། གཡོ་བའི་སེམས་ཀྱི་དབང་ཉིད་དང ། །འདོད་དང་ཁྲོ་བའི་དབང་དག་དང ། །བཀྲེས་དང་སྐོམ་གྱིས་ཉེན་པ་ཡིས། །བདག་གིས་སྡིག་པ་གང་བགྱིས་དང ། །བཟའ་བ་དག་དང་བཏུང་བ་དང ། བུད་མེད་སྒྱུ་དང་གོས་ཀྱི་ཕྱིར། །ཉོན་མོངས་གདུང་བ་སྣ་ཚོགས་ཀྱིས། །བདག་གིས་སྡིག་པ་གང་བགྱིས་དང ། །ལུས་དང་ངག་དང་ཡིད་ཀྱིས་སྡིག་།ཉེས་པར་སྤྱད་པ་རྣམ་གསུམ་བསགས་
250a
༄#། །འདི་འདྲའི་ཚུལ་གྱིས་གང་བགྱིས་པ། །དེ་དག་ཐམས་ཅད་བདག་འཆགས་སོ། །སངས་རྒྱས་རྣམས་དང་ཆོས་རྣམས་དང ། །དེ་བཞིན་ཉན་ཐོས་རྣམས་ལ་ཡང ། །གུས་པ་མ་ལགས་གང་བགྱིས་པ། །དེ་དག་ཐམས་ཅད་བདག་འཆགས་སོ། །གང་ཡང་རང་སངས་རྒྱས་རྣམས་དང ། །བྱང་ཆུབ་སེམས་དཔའ་རྣམས་ལ་ཡང ། ། གུས་པ་མ་ལགས་བགྱིས་པ་རྣམས། །དེ་དག་ཐམས་ཅད་བདག་འཆགས་སོ། །དམ་ཆོས་སྨྲ་བ་རྣམས་ལ་ཡང ། །གུས་པ་མ་ལགས་བགྱིས་པ་དང ། །ཆོས་ལའང་གུས་པ་མ་བགྱིས་པ། །དེ་དག་ཐམས་ཅད་བདག་འཆགས་སོ། །བདག་གིས་རྟག་ཏུ་མི་ཤེས་པས། །དམ་པའི་ཆོས་ནི་སྤངས་པ་དང ། །ཕ་མ་རྣམས་ལ་མ་གུས་པ། །དེ་དག་ཐམས་ཅད་བདག་འཆགས་སོ། །བླུན་པ་དང་ནི་བྱིས་པ་དང ། །འདོད་ཆགས་ཞེ་སྡང་གཏི་མུག་དང ། །ང་རྒྱལ་དྲེགས་པས་བསྒྲིབས་བགྱིས་པ། །དེ་དག་ཐམས་ཅད་བདག་འཆགས་སོ།། བདག་ནི་ཕྱོགས་བཅུའི་འཇིག་རྟེན་དུ། །སྟོབས་བཅུ་རྣམས་ལ་མཆོད་པར་ཤོག་།བདག་ནི་ཕྱོགས་བཅུར་སེམས་ཅན་རྣམས། །སྡུག་བསྔལ་ཀུན་ལས་འདོན་གྱུར་ཅིག་སེམས་ཅན་བསམ་གྱིས་མི་ཁྱབ་ཀུན། །ས་བཅུ་དག་ལ་འགོད་པར་ཤོག་།ས་བཅུ་དག་ལ་གནས་ནས་ཀྱང ། །ཐམས་ཅད་དེ་བཞིན་གཤེགས་གྱུར་ཅིག་།ཇི་སྲིད་སྡུག་
250b
བསྔལ་རྒྱ་མཚོ་ལས། །དེ་ཀུན་ཐར་བགྱིད་ནུས་སྲིད་དུ། །སེམས་ཅན་རེ་རེའི་ཕྱིར་ཡང་ནི། །བསྐལ་པ་བྱེ་བར་སྤྱོད་པར་ཤོག་།གསེར་འོད་དམ་པ་ཞེས་བགྱི་བ། །ལས་རྣམས་ཐམས་ཅད་བྱང་བྱེད་པ། །ཟབ་མོ་དག་ནི་སྟོན་པ་འདི། །སེམས་ཅན་དེ་དག་སྟོན་གྱུར་ཅིག་།གང་གིས་བསྐལ་པ་སྟོང་རྣམས་སུ། །སྡིག་པ་ཤིན་ཏུ་མི་བཟད་བགྱིས། །ལན་གཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །གང་གིས་ལས་ཀྱི་སྒྲིབ་པ་རྣམས། །མྱུར་དུ་ཡང་དག་ཟད་འགྱུར་བ། །གསེར་འོད་དམ་པ་དགེ་བ་ཡིས། ། བཤགས་\?\་པ་འདི་དག་བཤགས་ནས་ནི། །རིན་ཆེན་འབྱུང་གནས་མཆོག་བཅུ་པོ། །ས་བཅུ་ལ་ནི་གནས་པར་ཤོག་།སངས་རྒྱས་ཡོན་ཏན་སྣང་གྱུར་ཅིག་།སྲིད་པའི་མཚོ་ལས་སྒྲོལ་བར་ཤོག་།སངས་རྒྱས་རྒྱ་མཚོ་ཆུ་བོ་དང ། །ཡོན་ཏན་རྒྱ་མཚོ་\?\་ཟབ་མོ་དེ། །སངས་རྒྱས་ཡོན་ཏན་བསམ་ཡས་ཀྱིས། །ཐམས་ཅད་མཁྱེན་ཏུ་རྫོགས་པར་ཤོག་།ཏིང་འཛིན་བརྒྱ་ཕྲག་སྟོང་རྣམས་དང ། །གཟུངས་རྣམས་བསམ་གྱིས་མི་ཁྱབ་དང ། །དབང་སྟོབས་བྱང་ཆུབ་ཡན་ལག་གི་།སྟོབས་བཅུ་དམ་པར་འགྱུར་བར་ཤོག་།དགོངས་པའི་ཐུགས་ཀྱིས་སངས་རྒྱས་རྣམས། །བདག་ལ་རྣམ་པར་གཟིགས་སུ་གསོལ། །ཐུགས་རྗེར་ལྡན་པའི་ཐུགས་ཀྱིས་ནི། །ནོངས་པར་རབ་ཏུ་གཟུང་དུ་གསོལ། །བདག་གིས་བསྐལ་པ་བརྒྱ་རྣམས་སུ།།
251a
༄#། །སྔོན་ཆད་སྡིག་པ་གང་བགྱིས་པ། །དེ་ཕྱིར་བདག་ནི་མྱ་ངན་སེམས། །ཕོངས་དང་མྱ་ངན་འཇིགས་པས་གཟིར། །སྡིག་པའི་ལས་ལ་འཇིགས་པར་བགྱིད། །ཡིད་ནི་རྟག་ཏུ་དམན་པར་གྱུར། །གང་དང་གང་དུ་འགྲོ་བགྱིད་པ། །བདག་ནི་གང་དུའང་དགའ་མ་མཆིས། །སངས་རྒྱས་ཐམས་ཅད་ཐུགས་རྗེར་ལྡན། །འགྲོ་བ་ཀུན་གྱི་འཇིགས་སེལ་བས། །ནོངས་པ་རབ་ཏུ་གཟུང་དུ་གསོལ། །འཇིགས་པ་དག་ལས་བདག་ཐར་མཛོད། །བདག་གི་ཉོན་མོངས་ལས་རྣམས་ཀྱི། །དྲི་མ་དེ་བཞིན་གཤེགས་པས་སོལ།། སངས་རྒྱས་རྣམས་ཀྱིས་བདག་ལ་ནི། །ཐུགས་རྗེའི་ཆུ་ཡིས་བཀྲུ་བར་གསོལ། །སྡིག་པ་ཐམས་ཅད་བཤགས་པར་བགྱི། །སྔོན་ཆད་བདག་གིས་གང་བགྱིས་དང ། །ད་ལྟར་བདག་གིས་སྡིག་པ་གང ། །དེ་དག་ཐམས་ཅད་བདག་འཆགས་སོ། །ནོངས་པར་བགྱིས་པའི་ལས་རྣམས་ཀུན། །སླན་ཆད་མི་བགྱི་བསྡམས་པར་བགྱི། །བདག་གིས་ནོངས་པར་བགྱིས་པ་གང་།། སྡིག་དེ་བཅབ་བར་མི་བགྱི་འོ། །ལུས་ཀྱི་ལས་ནི་རྣམ་གསུམ་དང ། །ངག་གི་རྣམ་པ་བཞི་དག་དང ། །ཡིད་ཀྱི་རྣམ་པ་གསུམ་པོ་རྣམས། །དེ་དག་ཐམས་ཅད་བདག་འཆགས་སོ།། ལུས་ཀྱི་བགྱིས་དང་ངག་གི་ལས། །ཡིད་ཀྱི་རྣམ་པར་བསམས་པ་དང ། །ལས་རྣམས་བཅུ་པོ་བགྱིས་པ་དག་།དེ་དག་ཐམས་ཅད་བདག་འཆགས་སོ། །མི་དགེ་ལས་བཅུ་སྤངས་ནས་སུ།།
251b
དགེ་བ་བཅུ་པོ་བསྟེན་བགྱིས་ལ། །ས་བཅུ་ལ་ནི་བདག་གནས་ཤིང ། །སྟོབས་བཅུ་མཆོག་ཏུ་གྱུར་པར་ཤོག་།བདག་གི་སྡིག་པའི་ལས་གང་དག་།མི་འདོད་འབྲས་བུ་ཐོབ་བགྱིད་པ།། སངས་རྒྱས་སྤྱན་སྔར་མཆིས་ནས་སུ། །དེ་དག་ཐམས་ཅད་བཤགས་པར་བགྱི། །འཛམ་བུའི་གླིང་འདིར་གང་དག་དང ། །འཇིག་རྟེན་ཁམས་ནི་གཞན་དག་ཏུ། །གང་རྣམས་དགེ་བའི་ལས་བགྱིད་པ། །དེ་དག་ཀུན་ལ་ཡི་རང་ངོ ། །ལུས་དང་ངག་དང་ཡིད་ཀྱིས་ཀྱང ། །བདག་གི་བསོད་ནམས་གང་བསྒྲུབས་པ། །བདག་ནི་དགེ་བའི་རྩ་པ་དེས། །བྱང་ཆུབ་མཆོག་ལ་རེག་པར་ཤོག་།སྲིད་འགྲོ་ཉམ་ངར་བྱིས་པའི་བློ་ཡིས་ནི། །ཤིན་ཏུ་མི་བཟད་སྡིག་པ་གང་བགྱིས་པ། །སྟོབས་བཅུ་མི་མཉམ་སྤྱན་སྔར་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །སྐྱེ་བ་ཉམས་ང་སྲིད་པ་ཉམ་ང་དང ། །འཇིག་རྟེན་ཉམ་ང་གཡོ་སེམས་ཉམ་ང་བར། །ལུས་ཀྱི་སྤྱོད་པ་ཉམ་ང་སྣ་ཚོགས་ཀྱིས། །བདག་གིས་སྡིག་པ་གང་བསགས་དེ་འཆགས་སོ། །བྱིས་པ་བླུན་བྱས་ཉོན་མོངས་ཉམ་ང་དང ། །སྡིག་པའི་གྲོགས་དང་ཕྲད་པ་ཉམ་ང་དང ། །སྲིད་པ་ཉམ་ང་འདོད་ཆགས་ཉམ་ང་དང ། །ཞེ་སྡང་གཏི་མུག་མུན་པ་ཉམ་ང་དང ། །ངལ་བའི་ཉམ་ང་དུས་ཀྱིས་ཉམ་ང་དང ། །བསོད་ནམས་བསྒྲུབས་པ་ཉམ་ང་དག་གིས་ཀྱང ། །རྒྱལ་བ་མི་མཉམ་མངོན་སུམ་མཆིས་ནས་ནི། །སྡིག་པ་དེ་
252a
༄#། །ཀུན་སོ་སོར་བཤགས་པར་བགྱི། །སངས་རྒྱས་གསེར་མདོག་རི་སྣང་རི་རབ་འདྲ། །ཡོན་ཏན་རྒྱ་མཚོ་འདྲ་ལ་ཕྱག་འཚལ་ལོ། །རྒྱལ་བ་དེ་དག་རྣམས་ལ་སྐྱབས་སུ་མཆི། །རྒྱལ་བ་དེ་དག་རྣམས་ལ་མགོས་ཕྱག་འཚལ། །གསེར་མདོག་གསེར་ནི་དྲི་མ་མེད་པའི་གསེར་གྱི་འོད། །དྲི་མེད་རྣམ་དག་བཻ་ཌཱུརྱ་ཡི་ཡན་ལག་སྤྱན། ། སངས་རྒྱས་ཉི་མ་དཔལ་གཟི་གྲགས་འབར་འབྱུང་བའི་གནས། །ཐུགས་རྗེའི་འོད་ཟེར་དག་གིས་མུན་པའི་མུན་ནག་བསལ། །ཡན་ལག་རབ་ཏུ་དྲི་མེད་རབ་བཟང་རྣམ་པར་མཛེས། །སངས་རྒྱས་ཉི་མ་ཡན་ལག་དྲི་མེད་གསེར་འདྲས་ཁྱབ། །ཉོན་མོངས་མེད་གདུངས་ཡིད་ཅན་འབར་པའི་མེ་འདྲ་ལ། །ཐུབ་པ་ཟླ་བའི་འོད་ཟེར་དྲ་བས་ཚིམ་པར་མཛད། །མཚན་མཆོག་སུམ་ཅུ་གཉིས་ཀྱིས་དབང་པོ་ཡན་ལག་མཛེས། །དཔེ་བྱད་བཟང་པོ་དག་གིས་ཡན་ལག་རྣམ་པར་མཛེས། །དཔལ་གཟི་བསོད་ནམས་འབར་འཁྲུངས་འོད་ཟེར་དྲ་བ་ཡིས། །འཇིག་རྟེན་གསུམ་ན་མུན་ཁྲོད་ཉི་མ་བཞིན་དུ་བཞུགས། །དྲི་མེད་རྒྱ་ཆེན་ཁ་དོག་སྣ་ཚོགས་བཻ་ཌཱུརྱ། །སྐྱ་རེངས་དམར་དང་དངུལ་དང་ཤེལ་བཞིན་ཡན་ལག་དམར། །འོད་ཟེར་དྲ་བ་རྣམ་པ་སྣ་ཚོགས་ལེགས་བརྒྱན་པ། །ཐུབ་ཆེན་ཁྱེད་ནི་ཉི་མ་བཞིན་དུ་དེ་ཡིས་མཛེས། །མྱ་ངན་འཁྲུགས་པའི་འཆི་ཆུ་རྒ་བའི་རྦ་རླབས་ཅན། །འཁོར་བའི་ཀླུང་
252b
ཆེན་ཕོངས་པའི་ཆུ་བོར་ལྷུང་བ་ལ། །སྡུག་བསྔལ་རྒྱ་མཚོ་མཆོག་ཏུ་རྩུབ་ཅིང་ཤུགས་དྲག་པ། །བདེ་གཤེགས་ཉི་མའི་འོད་ཟེར་མང་པོ་རྣམས་ཀྱིས་བསྐམས། །ཡན་ལག་གསེར་གྱི་མ་དག་\?\་ཏུ་རྣམ་པར་སྣང ། །ཡེ་ཤེས་འབྱུང་གནས་འཇིག་རྟེན་གསུམ་ཀུན་མཆོག་།རབ་མཛེས་མཚན་གྱིས་ཡན་ལག་རྣམ་སྤྲས་པ། །སངས་རྒྱས་གསེར་སྐུ་འབར་ལ་ཕྱག་འཚལ་ལོ། །ཇི་ལྟར་རྒྱ་མཚོའི་ཆུ་ནི་དཔག་མེད་དང ། །ཇི་ལྟར་ས་ལ་ས་རྡུལ་མཐའ་ཡས་དང ། །ཇི་ལྟར་རི་རབ་རྡོ་མཐའ་མཚུངས་མེད་དང ། །ཇི་ལྟར་ནམ་མཁའི་མཐའ་མ་མཐའ་ཡས་པ། །དེ་བཞིན་སངས་རྒྱས་ཡོན་ཏན་མཐའ་ཡས་ཏེ། །སེམས་ཅན་ཀུན་གྱིས་ཤེས་པར་མི་ནུས་སོ། །བསྐལ་པ་དུ་མར་གཞལ་ཞིང་བསམས་ཀྱང་ནི། །ཡོན་ཏན་མཐའ་མ་ཤེས་པར་མི་ནུས་སོ། །སྐུ་ནི་སྐྲ་ཡི་རྩེ་མོའི་ཚད་ཙམ་དང ། །རྡོར་བཅས་རིར་བཅས་རྒྱ་མཚོར་བཅས་པ་ནི། །བསྐལ་པར་བགྲངས་ན་ཤེས་པར་ནུས་ཀྱང་སྲིད། །སངས་རྒྱས་ཡོན་ཏན་ཤེས་པར་མི་ནུས་སོ། །ཡོན་ཏན་ཁ་དོག་སྙན་དང་གྲགས་པ་དང ། །དགེ་བའི་མཚན་གྱིས་བརྒྱན་པའི་སྐུ་ལུས་དང ། །དཔེ་བྱད་བཟང་པོ་བརྒྱད་ཅུས་བརྒྱན་པ་ཡིས། །སེམས་ཅན་ཐམས་ཅད་དེ་འདྲར་གྱུར་པར་ཤོག་།བདག་ནི་དགེ་བའི་ལས་རྣམས་འདི་དག་གིས། །འཇིག་རྟེན་མི་རིང་སངས་རྒྱས་འགྱུར་བར་ཤོག་།འགྲོ་ལ་ཕན་ཕྱིར་ཆོས་ཀྱང་
253a
༄#། །སྟོན་གྱུར་ཅིག་།སེམས་ཅན་སྡུག་བསྔལ་མང་གཟིར་ཐར་བྱེད་ཤོག་།སྟོབས་བཅས་སྡེར་བཅས་བདུད་ལས་རྒྱལ་གྱུར་ཅིག་།ཆོས་ཀྱི་འཁོར་ལོ་དགེ་བ་བསྐོར་བར་ཤོག་།བསྐལ་པ་བསམ་གྱིས་མི་ཁྱབ་གནས་གྱུར་ཅིག་།བདུད་རྩིའི་ཆུ་ཡིས་སེམས་ཅན་ཚིམ་བྱེད་ཤོག་།ཇི་ལྟར་སྔོན་གྱི་རྒྱལ་བས་རྫོགས་པ་ལྟར། །ཕ་རོལ་ཕྱིན་དྲུག་བླ་མེད་རྫོགས་པར་ཤོག་།ཉོན་མོངས་བཅོམ་ཞིང་སྡུག་བསྔལ་སེལ་གྱུར་ཅིག་།འདོད་ཆགས་ཞེ་སྡང་གཏི་མུག་ཞི་བྱེད་ཤོག་།ཚེ་རབས་བརྒྱ་དང་ཚེ་རབས་བྱེ་བ་སྟོང ། །བདག་ནི་རྟག་ཏུ་ཚེ་རབས་དྲན་པར་ཤོག་།ཐུབ་པའི་དབང་པོ་རྟག་ཏུ་དྲན་གྱུར་ཅིག་།དེ་དག་རྣམས་ཀྱི་གསུང་རྒྱ་ཆེ་ཐོས་ཤོག་།བདག་གི་དགེ་བའི་ལས་རྣམས་འདི་དག་གིས། །རྟག་ཏུ་སངས་རྒྱས་འགྲོགས་པ་རྙེད་པར་ཤོག་།སྡིག་པའི་ལས་རྣམས་རྣམ་པར་སྤོང་གྱུར་ཅིག་།དགེ་བའི་འབྱུང་གནས་དགེ་རྣམས་སྤྱོད་པར་ཤོག་།ཞིང་རྣམས་ཀུན་ན་སྲོག་ ་ཐམས་ཅད་ཀྱང ། །འཇིག་རྟེན་དག་ན་སྡུག་བསྔལ་ཀུན་ཞིར་གྱུར། །སེམས་ཅན་དབང་པོ་མ་ཚང་ཡན་ལག་ཉམས། །དེ་ཀུན་དེ་རིང་དབང་པོ་ཚང་བར་ཤོག་།གང་དག་ནད་བཏབ་ཉམ་ཆུང་ལུས་ཉམས་དང་\?\།ཕྱོགས་བཅུ་དག་ན་སྐྱབས་མེད་གྱུར་པ་རྣམས། །དེ་ཀུན་མྱུར་དུ་ནད་ལས་ཐར་གྱུར་ཅིག་།ནད་མེད་སྟོབས་དང་དབང་པོ་རྙེད་པར་ཤོག །
253b
གང་དག་རྒྱལ་པོ་ཆོམ་རྐུན་དགྲས་བསྡིགས་བསད་ཐུག་དང ། །སྡུག་བསྔལ་རྣམ་པ་སྣ་ཚོགས་བརྒྱ་ཡིས་ཕོངས་གྱུར་པ། །སེམས་ཅན་ཉམ་ཐག་གྱུར་ཅིང་སྡུག་བསྔལ་དེ་དག་ཀུན། ། འཇིགས་མཆོག་མི་བཟད་བརྒྱ་པོ་དེ་ལས་ཐར་གྱུར་ཅིག་།གང་དག་བརྡེགས་ཤིང་བཅིངས་པས་བཅིངས་གཟིར་པ། །ཕོངས་པ་སྣ་ཚོགས་དག་ན་གནས་གྱུར་ཅིང ། །ཉོན་མོངས་སྟོང་ཕྲག་དུ་མས་བཀྲུགས་ནས་ཀྱང ། །འཇིགས་པ་མི་བཟད་མྱ་ངན་སྣ་ཚོགས་རྙེད། །དེ་དག་ཐམས་ཅད་བཅིངས་ལས་གྲོལ་གྱུར་ཅིག་།བརྡེགས་པ་དག་ནི་བརྡེགས་ལས་ཐར་བར་ཤོག་།བསད་པ་རྣམས་ཀྱང་སྲོག་དང་ལྡན་གྱུར་ཅིག་།ཕོངས་གྱུར་ཐམས་ཅད་འཇིགས་པ་མེད་པར་ཤོག་།སེམས་ཅན་གང་དག་བཀྲེས་སྲེད་སྐོམ་གྱིས་གཟིར། །དེ་དག་ཟས་སྐོམ་སྣ་ཚོགས་རྙེད་པར་ཤོག་།ལོང་བས་གཟུགས་རྣམས་སྣ་ཚོགས་མཐོང་གྱུར་ཅིག་།འོན་པས་ཡིད་འོང་སྒྲ་རྣམས་ཐོས་པར་ཤོག་།གཅེར་བུ་རྣམས་ཀྱིས་སྣ་ཚོགས་གོས་རྙེད་གྱུར། །སེམས་ཅན་དབུལ་པོས་གཏེར་རྣམས་རྙེད་པར་ཤོག་།ནོར་འབྲུ་རིན་ཆེན་སྣ་ཚོགས་མང་པོ་ཡིས། །སེམས་ཅན་ཐམས་ཅད་བདེ་དང་ལྡན་པར་ཤོག། གང་ཡང་སྡུག་བསྔལ་ཚོར་བར་གནོད་མ་གྱུར། །སེམས་ཅན་ཐམས་ཅད་བལྟ་ན་སྡུག་པ་དང ། །གཟུགས་བཟང་མཛེས་ཤིང་ཚུལ་དུ་ཤིས་པར་ཤོག་།རྟག་ཏུ་བདེ་བ་དུ་མ་གསོག་གྱུར་ཅིག་།ཡིད་ཀྱི་ཟས་སྐོམ་རབ་འབྱོར་
254a
༄#། །བསོད་ནམས་དག་།བསམས་མ་ཐག་ཏུ་དེ་དག་གྲུབ་གྱུར་ཅིག་།རྫ་རྔ་ཅང་ཏེའུ་པི་ཝང་སྒྲ་སྙན་དང ། །ཆུ་མིག་མཚོ་དང་རྫིང་བུ་ལྟེང་ཀ་དག་།གསེར་གྱི་པདྨ་ཨུཏྤལ་འདབ་མ་ཅན། །ཟས་སྐོམ་གོས་ནོར་མུ་ཏིག་ནོར་བུ་དབྱིག་།རྒྱན་གསེར་རིན་ཆེན་སྣ་ཚོགས་བཻཌཱུརྱ། །དེ་དག་བསམས་མ་ཐག་ཏུ་གྲུབ་གྱུར་ཅིག་།འཇིག་རྟེན་གང་ནའང་སྡུག་བསྔལ་སྒྲ་མ་བྱུང ། །སེམས་ཅན་གཅིག་ཀྱང་མི་འཕྲོད་མཐོང་མ་གྱུར། །དེ་དག་ཐམས་ཅད་ཁ་དོག་རྒྱ་ཆེན་དང ། །ཕན་ཚུན་དུ་ནི་འོད་བྱེད་གྱུར་པར་ཤོག། མི་ཡིས་འཇིག་རྟེན་ཕུན་སུམ་ཚོགས་གང་ཡོད། །དེ་དག་བསམས་པར་སྐྱེ་བར་དེ་དག་གྱུར། །བསམས་པ་ཐམས་ཅད་བསམས་མ་ཐག་ཏུ་ཡང ། །བསོད་ནམས་འབྲས་བུ་ཡོངས་སུ་རྫོགས་པར་ཤོག་།སྤོས་དང་ཕྲེང་བ་དག་དང་བྱུག་པ་དང ། །གོས་དང་ཕྱེ་མ་མེ་ཏོག་སྣ་ཚོགས་དང ། །ལྗོན་ཤིང་དག་ལས་དུས་གསུམ་འབབ་པར་ཤོག་།སེམས་ཅན་དེ་དག་ལེན་ཅིང་དགར་གྱུར་ཅིང ། །དེ་བཞིན་གཤེགས་པ་བསམ་ཡས་ཐམས་ཅད་དང ། །རྫོགས་པའི་བྱང་ཆུབ་སེམས་དཔའ་ཉན་ཐོས་དང ། །རྡུལ་བྲལ་དྲི་མེད་བརྟན་པའི་ཆོས་ལ་ཡང། །ཕྱོགས་བཅུ་རྣམས་སུ་མཆོད་པ་བྱེད་པར་ཤོག་།འགྲོ་བ་དམན་པ་ཐམས་ཅད་སྤོང་གྱུར་ཅིག་།མི་ཁོམ་བརྒྱད་པོ་དག་ལས་འདས་པར་ཤོག་།དལ་བའི་རྒྱལ་པོ་དམ་པ་
254b
མཆོག་ཐོབ་གྱུར། །རྟག་ཏུ་སངས་རྒྱས་འགྲོགས་པ་ཐོབ་པར་ཤོག་།རྟག་ཏུ་མཐོན་པོའི་རིགས་སུ་སྐྱེ་བར་ཤོག་།ནོར་དང་འབྲུ་ཡི་མཛོད་རྣམས་འབྱོར་གྱུར་ཅིག་།སྙན་དང་གྲགས་དང་གཟུག་དང་ཁ་དོག་གིས། །བསྐལ་པ་དུ་མར་ལེགས་པར་བརྒྱན་པར་ཤོག་།བུད་མེད་ཐམས་ཅད་རྟག་ཏུ་ཕོར་གྱུར་ཏེ། །དཔའ་ཞིང་རྟུལ་ཕོད་མཁས་ཤིང་གསལ་བར་ཤོག་།དེ་ཀུན་རྟག་ཏུ་བྱང་ཆུབ་ཕྱིར་སྤྱོད་གྱུར། །ཕ་རོལ་ཕྱིན་པ་དྲུག་ལ་སྤྱོད་པར་ཤོག་།ཕྱོགས་བཅུ་དག་ན་རིན་ཆེན་ཤིང་དབང་དྲུང ། །སངས་རྒྱས་བདེ་བཞུགས་རིན་ཆེན་བཻ་ཌཱུརྱའི། །ཁྲི་ལ་བཞུགས་པ་དག་ནི་མཐོང་གྱུར་ཅིག་།ཆོས་བསྟན་པ་ཡང་དེ་དག་ཐོས་པར་ཤོག་།བདག་གིས་སྡིག་པའི་ལས་རྣམས་བསྒྲུབས་པ་ནི། །སྲིད་པ་ཉམ་ངར་སྔོན་ཆད་གང་བསྒྲུབས་པ། །སྡིག་ལས་གང་དག་མི་འདོད་འབྲས་ཐོབ་པ། །དེ་དག་ཐམས་ཅད་མ་ལུས་ཟད་གྱུར་ཅིག་།སེམས་ཅན་གང་དག་སྲིད་པར་བཅིངས་གནས་ཀུན། །འཁོར་བའི་ཞགས་པའི་ཐག་པས་དམ་བཅིངས་པ། །ཤེས་རབ་ལག་གིས་བཅིངས་པ་ཁྲོལ་བར་ཤོག་།སྡུག་བསྔལ་རྣམས་ལས་ཐར་གྱུར་ཐོབ་གྱུར་ཅིག་།སེམས་ཅན་གང་དག་འཛམ་བུའི་གླིང་འདི་དང ། །གང་དག་འཇིག་རྟེན་ཁམས་ནི་གཞན་རྣམས་ན། ། བསོད་ནམས་སྣ་ཚོགས་ཟབ་མོ་རྣམས་བྱེད་པ། །དེ་དག་ཀུན་ལ་རྗེས་སུ་ཡི་རང་ངོ ། །ལུས་དང་ངག་དང་ཡིད་ཀྱིས་སྒྲུབས་པ་ཡི། །བདག་གིས་རྗེས་སུ་ཡི་རང་བསོད་ནམས་དེས། །བདག་གི་སྨོན་
255a
༄#། །གྲུབ་འབྲས་བུ་ཡོད་པར་ཤོག་།བྱང་ཆུབ་རྡུལ་བྲལ་བླ་མེད་ཐོབ་གྱུར་ཅིག་།གང་དག་རྟག་དྭང་དྲི་མ་བྲལ་བ་དང ། །དྲི་མེད་ཡིད་ཀྱིས་ཕྱག་འཚལ་བསྟོད་པ་དང། །ཡོངས་སུ་བསྔོ་བའི་བརྗོད་པ་འདི་ཡིས་ནི། །བསྐལ་པ་དྲུག་ཅུར་ངན་སོང་སྤོང་བར་གྱུར། །ཚིགས་སུ་བཅད་པ་བརྗོད་པ་འདི་དག་གིས། །སྐྱེས་པ་བུད་མེད་བྲམ་ཟེ་རྒྱལ་རིགས་ལས། །ཐལ་སྦྱར་འདུག་སྟེ་རྒྱལ་བ་གང་བསྟེན་པ། །ཚེ་རབས་ཀུན་ཏུ་སྐྱེ་བ་དྲན་པར་འགྱུར། །ཡན་ལག་དབང་པོ་ཀུན་གྱིས་ཡན་ལག་བརྒྱན། །བསོད་ནམས་ཡོན་ཏན་སྣ་ཚོགས་རྣམས་དང་ལྡན། །མི་དབང་རྒྱལ་པོས་རྟག་ཏུ་དེ་མཆོད་དེ། །དེ་དང་དེ་དག་ཏུ་ནི་དེ་འདྲར་འགྱུར། །གང་དག་རྣ་བའི་བུ་གར་བཤགས་པ་འདི་ནི་གྲགས་འགྱུར་བ། །དེ་དག་སངས་རྒྱས་གཅིག་གིས་གན་ནས་དགེ་བ་བྱས་མ་ཡིན། །གཉིས་ལ་མ་ཡིན་བཞི་ལ་མ་ཡིན་ལྔ་མིན་བཅུ་ལ་མིན། །དེ་ལྟར་སངས་རྒྱས་སྟོང་གི་གན་ནས་དགེ་བ་བྱས་པ་ཡིན།་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་གསན་ནས། བྱང་ཆུབ་སེམས་དཔའ་མཛེས་པའི་ཏོག་ལ་འདི་སྐད་ཅེས་བཀའ་སྩལ་ཏོ། །ལེགས་སོ། ། ལེགས་སོ། །རིགས་ཀྱི་བུ། ཁྱོད་ཀྱི་རྨི་ལམ་ན། གསེར་གྱི་རྔ་ལས་དེ་བཞིན་གཤེགས་པའི་ཡང་དག་པའི་ཡོན་ཏན་ལ་བསྔགས་པ་དང ། སྡིག་པ་བཤགས་པ་འདི་
255b
དག་གང་གིས་ཐོས་པ་དེ་དག་ཐམས་ཅད་བསོད་ནམས་ཀྱི་ཕུང་པོ་རྒྱ་ཆེན་པོ་དང་ལྡན་པ་དང ། སྐྱེ་བོ་མང་པོ་ལ་ཕན་པ་དང ། བདེ་བས་ཚིམ་པར་བྱེད་དེ། སྒྲིབ་པ་ཐམས་ཅད་བྱང་བར་འགྱུར་བར་ཤེས་པར་གྱིས་ཤིག་འདི་ལྟ་བུའི་སྤྱོད་པ་ཁྱད་པར་ཅན་དང་ལྡན་པ་འདི་དག་ནི་ཐམས་ཅད་ཀྱང་སྔོན་འདས་པའི་དུས་ན་དེ་བཞིན་གཤེགས་པ་དག་ལ་བསྟོད་པ་དང ། སྨོན་ལམ་རྒྱ་ཆེན་པོ་བཏབ་པའི་རྒྱུ་དང ། དེ་བཞིན་གཤེགས་པའི་བྱིན་གྱིས་བརླབས་ཀྱིས་དེ་དག་ཐོས་པར་གྱུར་པ་ཡིན་ནོ་ཞེས་བཀའ་སྩལ་ནས། དེ་ནྶ་འཁོར་འདུས་པ་དེ་དག་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། རྨི་ལམ་ན་བཤགས་པའི་ལེའུ་སྟེ་བཞི་པའོ།། །། དེ་ནས་བཅོམ་ལྡན་འདས་ཡང་དག་པར་རྣམ་པར་དབྱེ་བ་ལ་བཞུགས་ཏེ། ཤིན་ཏུ་ཟབ་མོ་མཆོག་ཏུ་གྱུར་པའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་སྐུའི་བ་སྤུའི་བུ་ག་དག་ནས་འོད་ཟེར་ཁ་དོག་རྣམ་པ་སྣ་ཚོགས་བརྒྱ་སྟོང་ཚད་མེད་པ་བྱུང་བས། སངས་རྒྱས་ཀྱི་ཞིང་ཐམས་ཅད་འོད་དེའི་ནང་དུ་སྣང་བར་གྱུར་པ་ནི། ཕྱོགས་བཅུའི་གངྒཱའི་ཀླུང་གི་བྱེ་མ་སྙེད་ཀྱིས་ཀྱང་དཔེ་དང ། ཚད་ཀྱིས་བསྐྲུན་པར་མི་ནུས་སོ། །སྙིགས་མ་ལྔའི་འཇིག་རྟེན་གྱི་ཁམས་འོད་ཟེར་དེས་སྣང་བར་གྱུར་པའི་སེམས་ཅན་དེ་དག་མི་དགེ་བ་བཅུའི་ལས་ཀྱི་ལམ་དང་
256a
༄#། །མཚམས་མེད་པ་ལྔ་བྱེད་པ་དང ། དཀོན་མཆོག་གསུམ་ལ་སྐུར་པ་འདེབས་པ་དང ། བླ་མ་དང ། གཉེན་པ་ལ་སྲི་ཞུ་ཆུང་བ་དང ། སློབ་དཔོན་དང ། བྲམ་ཟེ་ལ་བཀུར་སྟི་མི་བྱེད་པ་རྣམས་སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་ཀྱི་གནས་སུ་ལྟུང་བར་འགྱུར་བ་དེ་དག་གི་གནས་སུ་འོད་དེས་རེག་མ་ཐག་ཏུ་བདེ་བ་སོ་སོར་མྱོང་བར་གྱུར་ཏོ། །གང་གིས་འོད་དེ་མཐོང་བ་དང ། འོད་དེའི་མཐུས་ཐམས་ཅད་བདེ་ཞིང་ཉམས་དགའ་བ་དང ། ཁ་དོག་དང ། དབྱིབས་ལེགས་པའི་མཆོག་ཐོབ་པས་མཚན་ཕུན་སུམ་ཚོགས་པ་དང ། བསོད་ནམས་དང ། ཡེ་ཤེས་ཀྱི་ཚོགས་ཀྱི་རྒྱན་དང་ལྡན་པས་དེ་བཞིན་གཤེགས་པ་རྣམས་མཐོང་བར་གྱུར་ཏོ། །དེ་ནས་བརྒྱ་བྱིན་ལྷའི་དབང་པོ་ལྷའི་ཚོགས་མང་པོ་དང ། གང་གཱའི་ལྷ་མོ་ལ་སོགས་ཏེ། འཁོར་འདུས་པ་དེ་དག་ཡ་མཚན་དུ་གྱུར་པའི་འོད་དེས་བསྐུལ་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུ་འམ། རིགས་ཀྱི་བུ་མོ་ཉན་
256b
ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པའམ། ཐེག་པ་ཆེན་པོ་ལ་ཡང་དག་པར་ཞུགས་པའམ། སེམས་ཅན་གཞན་དག་ཀྱང་རུང་སྟེ།་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས། ལས་ཀྱི་སྒྲིབ་པ་རྣམས་ཇི་ལྟར་སོ་སོར་བཤགས་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། འདི་ལ་རིགས་ཀྱི་བུའམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པའམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པའམ། ཐེག་པ་ཆེན་པོ་ལ་ཡང་དག་པར་ཞུགས་པའམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཉིན་ལན་གསུམ་མཚན་ལན་གསུམ་དུ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། ཐལ་མོ་སྦྱར་ནས་ཚིག་འདི་སྐད་དུ། སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་གསུམ་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང ། མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ་སངས་རྒྱས་བཅོམ་ལྡན་འདས་གང་དག་ད་ལྟ་ན། ཕྱོགས་བཅུའི་འཇིག་རྟེན་ན་བླ་ན་མེད་པ་ཡང་དག་པར་
257a
༄#། །རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཆོས་ཀྱི་འཁོར་ལོ་རབ་ཏུ་བསྐོར་བ། ཆོས་ཀྱི་འཁོར་ལོ་རབ་ཏུ་སྟོན་པ། ཆོས་ཀྱི་ཚུལ་རབ་ཏུ་འཛིན་པ། ཆོས་ཀྱི་སྦྱིན་པ་རབ་ཏུ་མཛད་པ། ཆོས་ཀྱི་སྒྲོན་མ་རབ་ཏུ་འབར་བར་མཛད་པ། ཆོས་ཀྱི་ཆར་རབ་ཏུ་འབེབས་པ། ཆོས་ཀྱི་རྔ་རབ་ཏུ་བརྡུང་བ། ཆོས་ཀྱི་རྔ་བོ་ཆེ་རབ་ཏུ་བརྡུང་བ།་ཆོས་ཀྱི་དུང་རབ་ཏུ་འབུད་པ། ཆོས་ཀྱི་སྲོག་ཤིང་རབ་ཏུ་སྒྲེང་བ། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ཚིམ་པར་མཛད་པ། ཉམ་བག་ཏུ་སྤྱོད་དུ་འཛུད་པའི་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ལོ། །བམ་པོ་གསུམ་པ། །སངས་རྒྱས་བཅོམ་ལྡན་འདས་མཆོད་པའི་གནས། ཕྱག་བགྱི་བའི་གནས། རི་མོ་བགྱི་བའི་གནས། མཁྱེན་པར་གྱུར་པ།་སྤྱན་དུ་གྱུར་པ། དཔང་དུ་གྱུར་པ། ཚད་མར་གྱུར་པ། མཁྱེན་པ་དང་ལྡན་པ། གཟིགས་པ་དང་ལྡན་པ་དེ་དག་ལ་བདག་མགོ་དང ། ངག་དང ། ཡིད་ཀྱིས་ཕྱག་འཚལ་ལོ། །ཐོག་མ་དང།་ཐ་མ་མ་མཆིས་པའི་འཁོར་བ་ན་འཁོར་བའི་ཚེ། བདག་འདོད་ཆགས་ཀྱིས་གཟིར་བའམ། ཞེ་སྡང་གིས་གཟིར་བ་འམ། གཏི་མུག་གིས་གཟིར་བའི་ལུས་དང ། ངག་དང ། ཡིད་ཀྱིས་ལས་ཀྱི་སྒྲིབ་པ་གང་མངོན་པར་འདུས་བགྱིས་པ། སངས་རྒྱས་སུ་མ་འཚལ་བ་དང ། ཆོས་སུ་མ་འཚལ་བ་དང ། དགེ་འདུན་དུ་མ་འཚལ་བ་དང ། དགེ་བ་དང ། མི་དགེ་བར་མ་འཚལ་
257b
བ་དང ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང ། ཆོས་སྤངས་པ་དང ། དགེ་འདུན་གྱི་དབྱེན་བགྱིས་པ་དང ། དགེ་སློང་དགྲ་བཅོམ་པ་བཀུམ་པ་དང ། ཕ་མ་བཀུམ་པ་དང།་ལུས་ཀྱི་རྣམ་པ་གསུམ། ངག་གི་རྣམ་པ་བཞི། ཡིད་ཀྱི་རྣམ་པ་གསུམ་སྟེ། མི་དགེ་བ་བཅུའི་ལས་ཀྱི་ལམ་བགྱིས་པ་དང ། བགྱིད་དུ་སྩལ་བ་དང ། བགྱིད་པ་ལ་རྗེས་སུ་ཡི་རང་བ་དང།་སེམས་ཅན་ཁ་ཅིག་ལ་ངག་རྩུབ་པོ་སྨྲས་པ་དང ། སྐུར་པ་བཏབ་པ་དང ། སྲང་ལ་གཡོ་བགྱིས་པ་དང ། གཞལ་བ་ལ་གཡོ་བགྱིས་པ་དང ། འགྲོ་བ་དྲུག་ཏུ་འཁོར་བར་འཁོར་བ་ན། ཕ་མ་མི་དགའ་བར་བགྱིས་པ་དང ། གང་ཟག་གིའམ། མཆོད་རྟེན་གྱིའམ། དགེ་འདུན་གྱིའམ། ཕྱོགས་བཞིའི་དགེ་སློང་གི་དགེ་འདུན་གྱི་ནོར་བརྐུས་པ་དང ། ཇི་ལྟར་བསླབ་པའི་གཞི་བཅས་པ་རྣམས་ཀྱི་འདུལ་བ་དང་འགལ་བར་བགྱིས་པ་དང ། མཁན་པོ་དང ། སློབ་དཔོན་གྱིས་བསྒོ་བ་མ་མཉན་པ་དང ། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པའམ།་རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པའམ། ཐེག་པ་ཆེན་པོ་ལ་ཡང་དག་པར་ཞུགས་པའམ། དེ་ལས་གཞན་པའི་སེམས་ཅན་རྣམས་ལ་མི་སྙན་པར་བགྱིས་པ་དང།་སྤྱོས་པ་དང ། བརྡེགས་པ་དང ། དེ་དག་ལ་ཐ་བ་དང ། ཞེ་སྡང་བསྐྱེད་པ་དང ། ཕྲག་དོག་དང ། སེར་སྣ་ལས་བྱུང་བའི་སེམས་ཀྱིས། སངས་རྒྱས་བཅོམ་ལྡན་འདས་རྣམས་
258a
༄#། །ལ་ཚིག་རྩུབ་པོ་སྨྲས་པ་དང ། དམ་པའི་ཆོས་ལ་ཆོས་མ་ལགས་ཞེས་བགྱིས་པ་དང ། ཆོས་མ་ལགས་པ་ལ་དམ་པའི་ཆོས་ལེགས་ཞེས་བགྱིས་པ་དེ་དག་སངས་རྒྱས་བཅོམ་ལྡན་འདས་མཁྱེན་པར་གྱུར་པ། སྤྱན་དུ་གྱུར་པ། དབང་དུ་གྱུར་པ། ཚད་མར་གྱུར་པ། མཁྱེན་པ་དང་ལྡན་པ། གཟིགས་པ་དང་ལྡན་པ་དེ་དག་གི་སྤྱན་སྔར་སོ་སོར་འཆགས་སོ། །མཐོལ་ལོ། །མི་འཆབ་བོ། །སླན་ཆད་ཀྱང་མི་བགྱིད་དོ། །བདག་ལས་ཀྱི་སྒྲིབ་པ་གང་གིས་བསྒྲིབས་ཏེ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང།་ཡི་དྭགས་ཀྱི་ཡུལ་དང ། ལྷ་མ་ཡིན་གྱི་ཚོགས་ཀྱི་ནང་དུ་མཆི་བར་འགྱུར་བ་དང ། སངས་རྒྱས་དང ། ཆོས་དང ། དགེ་འདུན་མཉེས་པར་བགྱིད་པར་མི་འགྱུར་བ་དང ། མི་ཁོམ་པ་རྣམས་སུ་སྐྱེ་བར་འགྱུར་བའི་ལས་དེ་ལུས་འདི་ཉིད་ལ་རྣམ་པར་སྨིན་ཏེ་གཞན་དུ་མི་མྱོང་བར་ཤོག་ཅིག་།དེ་ཡང་སངས་རྒྱས་བཅོམ་ལྡན་འདས་མཁྱེན་པར་གྱུར་པ། སྤྱན་དུ་གྱུར་པ།་དཔང་དུ་གྱུར་པ། ཚད་མར་གྱུར་པ། མཁྱེན་པ་དང་ལྡན་པ། གཟིགས་པ་དང་ལྡན་པ་དེ་དག་གི་སྤྱན་སྔར་སོ་སོར་འཆགས་སོ། །མཐོལ་ལོ། །མི་འཆབ་བོ། ། སླན་ཆད་ཀྱང་མི་བགྱིད་དོ། །ཇི་ལྟར་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སྔོན་བྱང་ཆུབ་ཀྱི་ཕྱིར་སྤྱོད་པ་ན། ལས་ཀྱི་སྒྲིབ་པ་རྣམས་སོ་སོར་བཤགས་པ་དང ། མ་
258b
བཅབས་\?\་པ་དེ་བཞིན་དུ་བདག་ཀྱང་ལས་ཀྱི་སྒྲིབ་པ་རྣམས་སོ་སོར་བཤགས་སོ། །མཐོལ་ལོ། །མི་འཆབ་བོ། །སླན་ཆད་ཀྱང་མི་བགྱིད་དོ། །ཇི་ལྟར་མ་འོངས་པའི་དུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བྱང་ཆུབ་སེམས་དཔའི་སྤྱད་པ་སྤྱོད་པ་ན། ལས་ཀྱི་སྒྲིབ་པ་རྣམས་སོ་སོར་བཤགས་པར་འགྱུར་བ་དང ། མི་འཆབ་པར་འགྱུར་བ་དེ་བཞིན་དུ། བདག་ཀྱང་ལས་ཀྱི་སྒྲིབ་པ་སོ་སོར་བཤགས་སོ། །མཐོལ་ལོ། །མི་འཆབ་པོ། །སླན་ཆད་ཀྱང་མི་བགྱིད་དོ། །ཇི་ལྟར་ད་ལྟར་ཕྱོགས་བཅུའི་འཇིགས་རྟེན་ན། བྱང་ཆུབ་སེམས་དཔའ་སེམས་དཔའ་ཆེན་པོ་དག་བྱང་ཆུབ་ཀྱི་ཕྱིར་སྤྱོད་པ་ན། ལས་ཀྱི་སྒྲིབ་པ་རྣམས་སོ་སོར་བཤགས་པ་དང ། མཐོལ་ཞིང་མི་འཆབ་པ་དེ་བཞིན་དུ་བདག་ཀྱང་ལས་ཀྱི་སྒྲིབ་པ་རྣམས་སོ་སོར་བཤགས་སོ། །མཐོལ་ལོ། ། མི་འཆབ་བོ། །སླན་ཆད་ཀྱང་མི་བགྱིད་དོ། །ཇི་ལྟར་འདས་པ་དང ། མ་འོངས་པ་དང ། ད་ལྟར་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བྱང་ཆུབ་སེམས་དཔའི་སྤྱད་པ་སྤྱོད་པ་ན། ལས་ཀྱི་སྒྲིབ་པ་རྣམས་སོ་སོར་བཤགས་པ་དང ། སོ་སོར་བཤགས་པར་འགྱུར་བ་དེ་བཞིན་དུ། བདག་ཀྱང་ལས་ཀྱི་སྒྲིབ་པ་རྣམས་སོ་སོར་བཤགས་སོ། །མཐོལ་ལོ།་མི་འཆབ་བོ། །སླན་ཆད་ཀྱང་མི་བགྱིད་དོ་ཞེས་བརྗོད་པར་བྱའོ། །ཤཱ་རིའི་བུ། དེ་ལྟ་བས་ན། རིགས་ཀྱི་བུའམ། རིགས་ཀྱི་བུ་མོ། ཆོས་ཐམས་ཅད་ལ་སྒྲིབ་པ་མེད་པ་
259a
༄#། །རྣམ་པར་དག་པ་ཐོབ་པར་འདོད་པས། འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བྱའོ། །སུ། རྒྱལ་རིགས་ཀྱི་རིགས་ཤིང་སཱ་ལ་ཆེན་པོ་ལྟ་བུ་ཕྱུག་པ། ནོར་ཆེ་བ། ལོངས་སྤྱོད་ཆེ་བ། ས་ལེ་སྦྲམ་དང ། ནོར་དང ། ཡོ་བྱད་མང་བ། ཤིན་ཏུ་སྐྱིད་པ། བཞོན་པ་ཆེན་པོ་ལ་ཞོན་པ་རྣམས་ཀྱི་ནང་དུ་སྐྱེ་བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བགྱིའོ། །སུ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་རྣམས་དང ། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་ཕྱུག་པ། ནོར་ཆེ་བ། ལོངས་སྤྱོད་ཆེ་བ། ས་ལེ་སྦྲམ་དང ། ནོར་དང ། ཡོ་བྱད་མང་བ། ཤིན་ཏུ་སྐྱིད་པ། བཞོན་པ་ཆེན་པོ་ལ་ཞོན་པ་རྣམས་ཀྱི་ནང་དུ་སྐྱེ་བར་འདོད་པ་དེས་ཀྱང་འདི་བཞིན་དུ། ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། ། ཕྱིན་ཆད་ཀྱང་མི་བྱའོ། །སུ། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་བརྟུལ་ཞུགས་དང་མཚུངས་པར་སྐྱེ་བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བྱའོ། །སུ། སུམ་ཅུ་རྩ་གསུམ་པའི་ལྷ་རྣམས་ཀྱི་བརྟུལ་ཞུགས་དང་མཚུངས་པར་སྐྱེ་བར་འདོད་པ་དེས་ཀྱང་འདི་བཞིན་དུ་
259b
ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བྱའོ། །དེ་བཞིན་དུ། སུ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ཚངས་རིས་དང ། ཚངས་པའི་མདུན་ན་འདོན་པ་དང ། ཚངས་པ་ཀུན་འཁོར་དང ། ཚངས་ཆེན་དང ། འོད་ཆུང་དང ། ཚད་མེད་འོད་དང ། འོད་གསལ་དང ། དགེ་ཆུང་དང ། ཚད་མེད་དགེ་དང ། དགེ་རྒྱས་དང ། སྤྲིན་མེད་དང ། བསོད་ནམས་སྐྱེས་དང ། འབྲས་བུ་ཆེ་དང ། སེམས་ཅན་འདུ་ཤེས་མེད་པ་དང ། གྱ་ནོམ་སྣང་བ་དང ། ཤིན་ཏུ་མཐོང་བ་དང ། མི་ཆེ་བ་དང ། མི་གདུང་བ་དང ། འོག་མིན་གྱི་ལྷ་རྣམས་ཀྱི་བརྟུལ་ཞུགས་དང་མཚུངས་པར་སྐྱེ་བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་བར་བྱའོ། །ཕྱིན་ཆད་ཀྱང་མི་བྱའོ། །སུ། གཟུགས་མེད་པ་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བ་རྣམས་དང ། རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བ་རྣམས་དང ། ཅིའང་མེད་པའི་སྐྱེ་མཆེད་དུ་ཉེ་བར་འགྲོ་བ་རྣམས་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ཀྱི་བརྟུལ་ཞུགས་དང་མཚུངས་པར་སྐྱེ་བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བྱའོ། །སུ། རྒྱུན་ཏུ་ཞུགས་པའི་འབྲས་བུ་དང ། ལན་གཅིག་
260a
༄#། །ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པ་ཉིད་མངོན་སུམ་དུ་བྱེད་པར་འདོད་པ་དེས་ཀྱང ། འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བྱའོ། །སུ། རིག་པ་གསུམ་མམ། མངོན་པར་ཤེས་པ་དྲུག་གམ། སྟོབས་རྣམས་སམ། དབང་པོ་རྣམས་སམ། ཉན་ཐོས་ཀྱི་ཕ་རོལ་ཏུ་ཕྱིན་པ་འམ། ཉན་ཐོས་དབང་ཆེ་བར་གྲགས་པ་འམ། རང་བྱང་ཆུབ་མངོན་སུམ་དུ་བྱེད་པར་འདོད་པ་དེས་ཀྱང ། འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བྱའོ། །སུ། ཐམས་ཅད་མཁྱེན་པའི་ཡེ་ཤེས་དང ། རྣམ་པར་དག་པའི་ཡེ་ཤེས་དང།་བསམ་གྱིས་མི་ཁྱབ་ ་ཡེ་ཤེས་དང ། མཚུངས་པ་མེད་པའི་ཡེ་ཤེས་དང ། ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་མངོན་པར་བསྒྲུབ་པར་འདོད་པ་དེས་ཀྱང།་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཆད་ཀྱང་མི་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པས་ཆོས་ཐམས་ཅད་ནི་རྟེན་ཅིང་འབྲེལ་པར་འབྱུང་བའོ་ཞེས་གསུངས་པའི་ཕྱིར་ཏེ། རྒྱུ་དང ། རྐྱེན་གཞན་དང ། གཞན་གྱིས་གཞན་སྐྱེའོ། །གཞན་འགོག་གོ་།དེ་ལ་འདས་པའི་ཆོས་
260b
གང་ཡིན་པ་དེ་དག་ནི་འགགས་པ། ཟད་པ་དང་བྲལ་བ། རྣམ་པར་གྱུར་པ་སྟེ། དེ་དག་ལའང་ལས་ཀྱི་སྒྲིབ་བ་ཅུང་ཟད་ཀྱང་མེད་དོ། །དེ་ལྟར་ན་འདུ་བྱེད་པ་གང་ཡིན་པ་རྣམས་ཀྱང་མེད་པ་ལས་བྱུང་བ་སྟེ། དེ་དག་ལའང་ལས་ཀྱི་སྒྲིབ་པ་ཅུང་ཟད་ཀྱང་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པས་ཆོས་ཐམས་ཅད་ནི་སྟོང་པ། སེམས་ཅན་མེད་པ། སྲོག་མེད་པ། གང་ཟག་མེད་པ། མ་སྐྱེས་པ། མ་འགགས་པ། འདུས་མ་བྱས་པ་ཞེས་གསུངས་པའི་ཕྱིར་རོ། །ཤཱ་རིའི་བུ། ཆོས་ཐམས་ཅད་བདག་ལས་བྱུང་བ་ཡང་བདག་ཀྱང་ཡོད་པ་མ་ཡིན་ནོ། །ཤཱ་རིའི་བུ། རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་།འདི་ལྟ་སྟེ། སེམས་ཅན་མེད་པའི་མཐའི་ཆོས་ཀྱི་ཚུལ་འདི་ལ་འཇུག་པ་འདི་ནི་ལས་ཀྱི་སྒྲིབ་པ་རྒྱུན་གཅོད་པ་ཞེས་བྱ་བ་སྟེ། ཤཱ་རིའི་བུ། འདི་ནི་སོ་སོར་བཤགས་པའོ། །དེ་ནས་ཡང་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པའམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པའམ། ཐེག་པ་ཆེན་པོ་ལ་ཡང་དག་པར་ཞུགས་པའམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་པར་འཚལ་བས་ཇི་ལྟར་དགེ་བའི་རྩ་བ་རྣམས་ལ་རྗེས་
261a
༄#། །སུ་ཡི་རང་བར་བགྱི། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། འདི་ལ་རིགས་ཀྱི་བུ་འམ། རིགས་ཀྱི་བུ་མོ་ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ལ་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས། ཚིག་འདི་སྐད་དུ། ཕྱོགས་བཅུའི་འཇིག་རྟེན་ན་སེམས་ཅན་གང་སུ་དག་སྦྱིན་པ་ལས་བྱུང་བའི་བསོད་ནམས་བགྱི་བའི་དངོས་པོ་དང ། ཚུལ་ཁྲིམས་ལས་བྱུང་བ་དང་\?\། བསྒོམ་པ་ལས་བྱུང་བའི་བསོད་ནམས་བགྱི་བའི་དངོས་པོ་མངོན་པར་འདུས་བགྱིས་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ ། །རྗེས་སུ་ཡི་རང་བ་དམ་པ་དང ། གཙོ་བོ་དང ། ཁྱད་པར་ཅན་དང ། རབ་དང ། ཕུལ་དང ། གྱ་ནོམ་པ་དང ། བླ་མ་དང ། བླ་ན་མེད་པ་དང ། ལྟག་ན་མེད་པ་དང ། མཉམ་པ་མེད་པ་དང ། མི་མཉམ་པ་དང ། མཉམ་པས་རྗེས་སུ་ཡི་རང་ངོ ། །ཕྱོགས་བཅུའི་འཇིག་རྟེན་གྱིས་ཁམས་ན་སེམས་ཅན་གང་སུ་དག་སྦྱིན་པ་ལས་བྱུང་བའི་བསོད་ནམས་བགྱི་བའི་དངོས་པོ་དང།་ཚུལ་ཁྲིམས་ལས་བྱུང་བ་དང ། བསྒོམ་པ་ལས་བྱུང་བའི་བསོད་ནམས་བགྱི་བའི་དངོས་པོ་མངོན་པར་འདུ་བགྱིད་པར་འགྱུར་བ་དེ་དག་ཐམས་ཅད་ལའང་རྗེས་སུ་ཡི་
261b
རང་བའི་མཆོག་གིས་རྗེས་སུ་ཡི་རང་བ་ནས། རྗེས་སུ་ཡི་རང་བ་མི་མཉམ་པ་དང ། མཉམ་པའི་བར་གྱིས་རྗེས་སུ་ཡི་རང་ངོ ། །ཕྱོགས་བཅུའི་འཇིག་རྟེན་ན་སེམས་ཅན་གང་སུ་དག་སྦྱིན་པ་ལས་བྱུང་བའི་བསོད་ནམས་བགྱི་བའི་དངོས་པོ་དང ། ཚུལ་ཁྲིམས་ལས་བྱུང་བ་དང ། བསྒོམ་པ་ལས་བྱུང་བའི་བསོད་ནམས་བགྱི་བའི་དངོས་པོ་མངོན་པར་འདུ་བགྱིད་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས། རྗེས་སུ་ཡི་རང་བ་མི་མཉམ་པ་དང ། མཉམ་པའི་བར་གྱིས་རྗེས་སུ་ཡི་རང་ངོ ། །བྱང་ཆུབ་སེམས་དཔའ་གང་དག་ད་ལྟར་ན་སེམས་དང་པོ་བསྐྱེད་པ་དེ་དག་གི་དང་པོ་བྱང་ཆུབ་ཏུ་སེམས་བསྐྱེད་པ་དང་ལྡན་པའི་དགེ་བའི་རྩ་བ་གང་ལགས་པ་དང ། བྱང་ཆུབ་སེམས་དཔའ་བསྐལ་པ་བརྒྱས་འབྱུང་བ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དང ། བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དང།་ཕྱིར་མི་ལྡོག་པ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དང ། བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས། རྗེས་སུ་ཡི་རང་བ་མི་མཉམ་པ་དང ། མཉམ་པའི་བར་གྱིས་རྗེས་སུ་ཡི་རང་ངོ ། །བྱང་ཆུབ་སེམས་དཔའ་
262a
༄#། །སེམས་དཔའ་ཆེན་པོ་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་མངོན་པར་འདུས་བགྱིས་པ་གང་ལགས་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ ། །རྗེས་སུ་ཡི་རང་བ་དམ་པ་དང ། གཙོ་བོ་དང ། ཁྱད་པར་ཅན་དང ། རབ་དང ། ཕུལ་དང ། གྱ་ནོམ་པ་དང ། བླ་མ་དང ། བླ་ན་མེད་པ་དང ། ལྟག་ན་མེད་པ་དང ། མཉམ་པ་མེད་པ་དང ། མི་མཉམ་པ་དང ། མཉམ་པས་རྗེས་སུ་ཡི་རང་ངོ ། །མ་འོངས་པའི་དུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བྱང་ཆུབ་ཀྱི་ཕྱིར་སྤྱད་པ་སྤྱོད་པ་ན། ཕ་རོལ་ཏུ་ཕྱིན་པ་དྲུག་དང་ལྡན་པའི་བསོད་ནམས་ཀྱི་ཕུང་པོ་མངོན་པར་འདུ་བགྱིད་པར་འགྱུར་པ་གང་ལགས་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ ། །རྗེས་སུ་ཡི་རང་བ་དམ་པ་དང ། གཙོ་བོ་དང ། ཁྱད་པར་ཅན་དང ། རབ་དང ། ཕུལ་དང ། གྱ་ནོམ་པ་དང ། བླ་མ་དང ། བླ་ན་མེད་པ་དང ། ལྟག་ན་མེད་པ་དང ། མཉམ་པ་མེད་པ་དང ། མི་མཉམ་པ་དང ། མཉམ་པས་རྗེས་སུ་ཡི་རང་ངོ ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ད་ལྟར་ཕྱོགས་བཅུའི་འཇིག་རྟེན་ན་བྱང་ཆུབ་ཀྱི་ཕྱིར་སྤྱད་པ་སྤྱོད་པ་ན།
262b
དེ་དག་ཕ་རོལ་ཏུ་ཕྱིན་པ་དྲུག་དང་ལྡན་པའི་བསོད་ནམས་ཀྱི་ཕུང་པོ་མངོན་པར་འདུ་བགྱིད་པ་གང་ལགས་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ། །རྗེས་སུ་ཡི་རང་བ་དམ་པ་དང ། གཙོ་བོ་དང ། ཁྱད་པར་ཅན་དང ། རབ་དང ། ཕུལ་དང ། གྱ་ནོམ་པ་དང ། བླ་མ་དང ། བླ་ན་མེད་པ་དང ། ལྟག་ན་མེད་པ་དང ། མཉམ་པ་མེད་པ་དང།་མི་མཉམ་པ་དང ། མཉམ་པས་རྗེས་སུ་ཡི་རང་ངོ ། །སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང།་ལྷ་དང ། མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བ། ཆོས་ཀྱི་འཁོར་ལོ་རབ་ཏུ་བསྟན་པ། ཆོས་ཀྱི་ཚུལ་རབ་ཏུ་གཟུང་བ།་ཆོས་ཀྱི་ཆར་རབ་ཏུ་ཕབ་པ། ཆོས་ཀྱི་ཆར་རབ་ཏུ་བཏང་བ། ཆོས་ཀྱི་རྔ་རབ་ཏུ་བརྡུངས་པ། ཆོས་ཀྱི་རྔ་བོ་ཆེ་བརྡུངས་པ། ཆོས་ཀྱི་དུང་བུས་པ། ཆོས་ཀྱི་སྲོག་ཤིང་བསྒྲེང་བ། ཆོས་ཀྱི་སྒྲོན་མེ་འབར་བར་མཛད་པ། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ཚིམ་པར་མཛད་པ། ཉམ་བག་ཏུ་སྤྱོད་ཏུ་འཛུད་པ་གང་ལགས་པ་དེ། དེ་ལ་ཉན་ཐོས་ཀྱི་
263a
༄#། །ཐེག་པའམ། རང་སངས་རྒྱས་ཀྱི་ཐེག་པའམ། བྱང་ཆུབ་སེམས་དཔའི་ཐེག་པའམ། དེ་ལས་གཞན་པའི་སེམས་ཅན་རྣམས་ཀྱིས་དགེ་བའི་རྩ་བ་བསྐྱེད་པ་གང་ལགས་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བས་ན། རྗེས་སུ་ཡི་རང་བ་མི་མཉམ་པ་དང ། མཉམ་པའི་བར་གྱིས་རྗེས་སུ་ཡི་རང་ངོ། །སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང ། མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ་མ་འོངས་པའི་དུས་ཀྱི་སངས་རྒྱས་བཅོམ་ལྡན་འདས། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས ། ཆོས་ཀྱི་འཁོར་ལོ་བསྐོར་བར་འགྱུར་བའི་བར་དག་གང་ལགས་པ་དང ། དེ་ལ་ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། བྱང་ཆུབ་སེམས་དཔའི་ཐེག་པ་པའམ། དེ་ལས་གཞན་པའི་སེམས་ཅན་གང་དག་དགེ་བའི་རྩ་བ་བསྐྱེད་པར་འགྱུར་བ་གང་ལགས་པ། དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས། རྗེས་སུ་ཡི་རང་བ་མི་མཉམ་པ་དང ། མཉམ་པའི་བར་གྱིས་རྗེས་སུ་ཡི་རང་ངོ ། །སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་
263b
ཆེ་དང ། ལྷ་དང ། མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ་ད་ལྟར་ཕྱོགས་བཅུའི་འཇིག་རྟེན་ན། སངས་རྒྱས་བཅོམ་ལྡན་འདས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཆོས་ཀྱི་འཁོར་ལོ་རབ་ཏུ་བསྐོར་བ། ཆོས་ཀྱི་འཁོར་ལོ་རབ་ཏུ་སྟོན་པ། ཆོས་ཀྱི་ཚུལ་རབ་ཏུ་འཛིན་པ། ཆོས་ཀྱི་ཆར་རབ་ཏུ་འབེབས་པ། ཆོས་ཀྱི་ཆར་རབ་ཏུ་གཏོང་བར། ཆོས་ཀྱི་སྦྱིན་པ་མཛད་པ། ཆོས་ཀྱི་འཁོར་ལོ་རབ་ཏུ་སྟོན་པ། ཆོས་ཀྱི་རྔ་བརྡུང་བ། ཆོས་ཀྱི་རྔ་བོ་ཆེ་བརྡུང་བ། ཆོས་ཀྱི་དུང་འབུད་པ། ཆོས་ཀྱི་སྲོག་ཤིང་བསྒྲེང་བ། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ཚིམ་པར་མཛད་པ། ཉམ་བག་ཏུ་སྤྱོད་དུ་འཛུད་པ་གང་ལགས་པ་དང ། དེ་ལ་ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། བྱང་ཆུབ་སེམས་དཔའི་ཐེག་པ་པའམ། དེ་ལས་གཞན་པའི་སེམས་ཅན་དེ་དག་དགེ་བའི་རྩ་བ་བསྐྱེད་པ་གང་ལགས་པ་དེ་དག་ཐམས་ཅད་ལའང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས། རྗེས་སུ་ཡི་རང་བ་མི་མཉམ་པ་དང ། མཉམ་པའི་བར་གྱིས་རྗེས་སུ་ཡི་རང་ངོ་ཞེས་བརྗོད་པར་བྱའོ། །ཤཱ་རིའི་བུ། འདི་ནི་རྗེས་སུ་ཡི་རང་བའི་བསོད་ནམས་ཀྱི་ཕུང་པོའོ། །རིགས་ཀྱི་བུའམ། རིགས་ཀྱི་བུ་མོ་རྗེས་སུ་ཡི་རང་བའི་བསོད་ནམས་ཀྱི་ཕུང་པོ་འདིས་རྗེས་སུ་ཡི་རང་ན། བསོད་ནམས་ཀྱི་ཕུང་པོ་མང་པོ་གྲངས་མེད་དཔག་ཏུ་མེད་
264a
༄#། །པ་བསྐྱེད་དོ། །ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྱི་སེམས་ཅན་ནས། འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་དགྲ་བཅོམ་པ། ཟག་པ་ཟད་པར་གྱུར་ལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་དེ་དག་ལ་ཇི་སྲིད་འཚོའི་བར་དུ། གོས་དང ། ཟས་དང ། ན་བའི་གསོས་སྨན་དང ། ཡོ་བྱད་རྣམས་ཀྱི་བསྙེན་བཀུར་བྱས་པ་བས། གང་ཞིག་རྗེས་སུ་ཡི་རང་བ་འདིས་རྗེས་སུ་ཡི་རང་ན། དེ་ནི་དེ་བས་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་སྐྱེད་དོ། །ཤཱ་རིའི་བུ། དེ་ལྟ་བས་ན། རིགས་ཀྱི་བུ་འམ། རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས། རྗེས་སུ་ཡི་རང་བ་འདིས་རྗེས་སུ་ཡི་རང་བར་བྱའོ། །བུད་མེད་སྐྱེས་པའི་དངོས་པོ་ཐོབ་པར་འདོད་ཅིང ། བུད་མེད་ཀྱི་དབང་པོ་བརྗེ་བར་འདོད་པས་ཀྱང ། རྗེས་སུ་ཡི་རང་བ་འདིས་རྗེས་སུ་ཡི་རང་བར་བྱའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ།། བཅོམ་ལྡན་འདས། མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སྣང་བ་བགྱིས་པར་འགྱུར་བ་དང ། ད་ལྟར་བྱུང་བའི་བྱང་ཆུབ་སེམས་དཔའ་
264b
རྣམས་ཀྱིས་མོས་པ་བསྐྱེད་པར་འགྱུར་བའི་བསྐུལ་བའི་ཕུང་པོའང་བཤད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། འདི་ལ་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པའམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པའམ། ཐེག་པ་ཆེན་པོ་ལ་ཡང་དག་པར་ཞུགས་པའམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས། ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ལ་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས། ཚིག་འདི་སྐད་དུ། སངས་རྒྱས་བཅོམ་ལྡན་འདས་གང་དག་ད་ལྟར་ཕྱོགས་བཅུའི་འཇིག་རྟེན་གྱི་ཁམས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ནས་ཆོས་ཀྱི་འཁོར་ལོ་རབ་ཏུ་བསྐོར་བར་བསྐུལ་གྱི། སངས་རྒྱས་བཅོམ་ལྡན་འདས་དེ་དག་གིས་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང ། མི་
265a
༄#། །རྣམས་ཀྱི་དོན་དང ། སྨན་པ་དང ། བདེ་བའི་སླད་དུ་ཆོས་ཀྱི་འཁོར་ལོ་རབ་ཏུ་བསྐོར་དུ་གསོལ། ཆོས་ཀྱི་འཁོར་ལོ་རབ་ཏུ་བསྟན་དུ་གསོལ། ཆོས་ཀྱི་ཚུལ་རབ་ཏུ་གཟུང་དུ་གསོལ། ཆོས་ཀྱི་སྦྱིན་པ་མཛད་དུ་གསོལ། ཆོས་ཀྱི་སྒྲོན་མ་འབར་བར་མཛད་དུ་གསོལ། ཆོས་ཀྱི་ཆར་དབབ་ཏུ་གསོལ། ཆོས་ཀྱི་ཆར་གཏང་དུ་གསོལ། ཆོས་ཀྱི་རྔ་རྡུང་དུ་གསོལ། ཆོས་ཀྱིས་རྔ་བོ་ཆེ་རྡུང་དུ་གསོལ། ཆོས་ཀྱི་དུང་འབུད་དུ་གསོལ། ཆོས་ཀྱི་སྲོག་ཤིང་བསྒྲེང་དུ་གསོལ་ཞེས་བརྗོད་པར་བྱའོ། །ཤཱ་རིའི་བུ། གཞན་ཡང ། རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས། ཚིག་འདི་སྐད་དུ། སངས་རྒྱས་བཅོམ་ལྡན་འདས་གང་དག་ད་ལྟ་ན་ཕྱོགས་བཅུའི་འཇིག་རྟེན་གྱི་ཁམས་ན་སྐུ་ཚེའི་འདུ་བྱེད་བཏང་བའི་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ནས་གསོལ་བ་འདེབས་ཀྱི། སངས་རྒྱས་
265b
བཅོམ་ལྡན་འདས་དེ་དག་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང ། མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ། ཆོས་ཀྱི་འཁོར་ལོ་ནི་རབ་ཏུ་བསྐོར། ཆོས་ཀྱི་སྒྲོན་མེ་ནི་རབ་ཏུ་འབར་བར་མཛད། ཆོས་ཀྱི་ཆར་ནི་རབ་ཏུ་འབེབས། ཆོས་ཀྱི་ཆར་ནི་རབ་ཏུ་གཏོང ། ཆོས་ཀྱི་རྔ་ནི་རབ་ཏུ་བརྡུང ། ཆོས་ཀྱི་རྔ་བོ་ཆེ་ནི་རབ་ཏུ་བརྡུང ། ཆོས་ཀྱི་དུང་ནི་རབ་ཏུ་འབུད། ཆོས་ཀྱི་སྲོག་ཤིང་ནི་རབ་ཏུ་བསྒྲེང ། ཆོས་ཀྱི་སྒྲོན་མ་ནི་མཆེད་པར་མཛད། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ནི་ཚིམ་པར་མཛད། ཉམ་བག་ཏུ་སྤྱོད་དུ་འཛུད་ཅིང་རེ་ཞིག་བཞུགས་སུ་གསོལ། གསོལ་བ་བཏབ་པའི་ཕུང་པོ་འདིའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ཏེ་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་དེ་བཞིན་དུ་འདི་ཡོངས་སུ་བསྔོའོ་ཞེས་བརྗོད་པར་བྱའོ། །ཤཱ་རིའི་བུ། འདི་ནི་གསོལ་བ་གདབ་པའི་ཕུང་པོ་སྟེ། རིགས་ཀྱི་བུ་འམ། རིགས་ཀྱི་བུ་མོ་གསོལ་བ་གདབ་པའི་ཕུང་པོ་འདིས་གསོལ་བ་འདེབས་ན། བསོད་ནམས་མང་པོ་གྲངས་མེད་དཔག་ཏུ་མེད་པ་བསྐྱེད་དོ། །ཤཱ་རིའི་བུ། རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཇི་སྙེད་
266a
༄#། །པ་དེ་དག་རིན་པོ་ཆེ་སྣ་བདུན་གྱིས་བཀང་སྟེ། དེ་བཞིན་གཤེགས་པ་རྣམས་ལ་དབུལ་བ་ཕུལ་བ་བས། གང་གིས་དེ་བཞིན་གཤེགས་པ་དེ་དག་ལ་ཆོས་ཀྱི་འཁོར་ལོ་བསྐོར་བར་བསྐུལ་ན། དེ་ནི་དེ་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་སྐྱེད་དོ། །ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྟ་ཞོག་སྟེ། ཤཱ་རིའི་བུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དང་མཉམ་པ་ཇི་སྙེད་པ་དེ་དག་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས། རིན་པོ་ཆེ་སྣ་བདུན་གྱིས་བཀང་སྟེ་དེ་བཞིན་གཤེགས་པ་རྣམས་ལ་དབུལ་བ་ཕུལ་བ་བས་གང་གིས་དེ་བཞིན་གཤེགས་པ་དེ་དག་ལ་གསོལ་བ་བཏབ་ན། དེ་ནི་དེ་བས་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་བསྐྱེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། དེ་བཞིན་གཤེགས་པ་རྣམས་ལ་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་སྟེ། དགེ་བའི་རྩ་བ་དེས་ན་ང་\?\་ལ་ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པས།་བཅོམ་ལྡན་འདས། སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང ། མི་རྣམས་ཀྱི་དོན་
266b
དང ། སྨན་པ་དང ། བདེ་བའི་སླད་དུ་ཆོས་ཀྱི་འཁོར་ལོ་རབ་ཏུ་བསྐོར་བར་གསོལ་ཞེས་ཆོས་ཀྱི་འཁོར་ལོ་རབ་ཏུ་བསྐོར་བར་གསོལ་བ་བཏབ་བོ། །ཤཱ་རིའི་བུ། ངས་སྔོན། བྱང་ཆུབ་ཀྱི་ཕྱིར་སྤྱད་པ་སྤྱོད་པ་ན། དེ་བཞིན་གཤེགས་པ་རྣམས་ལ་རིང་དུ་བཞུགས་པ་གསོལ་ཏེ། དགེ་བའི་རྩ་བ་དེ་ནི་ང་མི་འཇིགས་པ་བཞི་དང ། དེ་བཞིན་གཤེགས་པའི་སྟོབས་བཅུ་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང ། སོ་སོ་ཡང་དག་པར་རིག་པ་བཞི་དང ། བྱམས་པ་ཆེན་པོ་དང ། སྙིང་རྗེ་ཆེན་པོ་དང ། ཡོངས་སུ་མྱ་ངན་ལས་འདས་པ་ཐོབ་སྟེ། ངའི་དམ་པའི་ཆོས་ཀྱང་ཡུན་རིང་དུ་གནས་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པའམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས། ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ། དགེ་བའི་རྩ་བ་རྣམས་ཇི་ལྟར་ཡོངས་སུ་བསྔོ་བར་བགྱི། དེ་སྐད་ཅེས་གསོལ་
267a
༄#། །པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། འདི་ལ་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས། ཉིན་ལན་གསུམ་མཚན་ལན་གསུམ་དུ་ཚིག་འདི་སྐད་ཅེས། ཐོག་མ་དང ། ཐ་མ་མ་མཆིས་པའི་འཁོར་བ་ན་འཁོར་བའི་ཚེ། བདག་གིས་དགེ་བའི་རྩ་བ་མངོན་པར་འདུས་བགྱིས་པར་གྱུར་པ། སངས་རྒྱས་སམ། ཆོས་སམ། དགེ་འདུན་ནམ། གང་ཕྲག་\?\་གམ། ཐ་ན་དུད་འགྲོའི་སྐྱེ་གནས་སུ་སོང་བ་རྣམས་སམ། སེམས་ཅན་གཞན་དག་ཀྱང་རུང་སྟེ། ཟན་ཆང་གཅིག་ཙམ་སྩལ་བར་གྱུར་པ་དང ། འཆགས་པ་གང་ལགས་པ་དང ། གསོལ་བ་གདབ་པ་གང་ལགས་པ་དང ། སྐྱབས་སུ་མཆི་བ་གང་ལགས་པ་དང ། བསླབ་པའི་གཞི་དང་ལྡན་པའི་དགེ་བའི་རྩ་བ་གང་ལགས་པ་དང ། སོ་སོར་འཆགས་པ་དང་ལྡན་པའི་དགེ་བའི་རྩ་བ་གང་ལགས་པ་དང ། རྗེས་སུ་ཡི་རང་བ་དང་ལྡན་པའི་བསོད་ནམས་བགྱི་བའི་དངོས་པོ་གང་ལགས་པ་དང ། གསོལ་
267b
བ་གདབ་པ་དང་ལྡན་པའི་དགེ་བའི་རྩ་བ་གང་ལགས་པ་དེ་དག་ཐམས་ཅད་གཅིག་ཏུ་བསྡུས། གཞལ་བཟླུམས་ཏེ་སེམས་དུལ་ཞིང་རྣམ་པར་གྲོལ་བ་དང ། གཟུང་བ་མ་མཆིས་པས་སེམས་ཅན་ཐམས་ཅད་ལ་སྩལ་ཏོ། །ཇི་ལྟར་དགེ་བའི་རྩ་བ་རྣམས་སེམས་ཅན་རྣམས་ལ་བཏང་བར་བགྱི་བ། སངས་རྒྱས་བཅོམ་ལྡན་འདས་རྣམས་ཀྱིས། སངས་རྒྱས་ཀྱི་ཡེ་ཤེས་ཆགས་པ་མི་མངའ་བས་ཇི་ལྟར་མཁྱེན་པ་དེ་ལྟ་བུས་བདག་གིས་དགེ་བའི་རྩ་བ་དེ་བཏང་སྟེ། སེམས་ཅན་ཐམས་ཅད་ལག་ན་རིན་པོ་ཆེ་དང་ལྡན་པར་གྱུར་ཅིག་།ནམ་མཁའ་མཛོད་དང ། ལོངས་སྤྱོད་ཟད་མི་ཤེས་པ་དང ། བསོད་ནམས་ཟད་མི་ཤེས་པ་དང ། ཆོས་ཟད་མི་ཤེས་པ་དང ། ཡེ་ཤེས་ཟད་མི་ཤེས་པ་དང ། སྤོབས་པ་ཟད་མི་ཤེས་པ་དང ། བླ་ན་མེ་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པ་དང ། ཐམས་ཅད་མཁྱེན་པའི་ཡེ་ཤེས་ཐོབ་པར་གྱུར་ཅིག་།བདག་གིས་དགེ་བའི་རྩ་བ་འདི་སེམས་ཅན་ཐམས་ཅད་ལ་སྩལ་པ་ལས་བྱུང་བའི་བསོད་ནམས་གང་ཡིན་པ་དེ་དག་ཐམས་ཅད་གཅིག་ཏུ་བསྡུས། གཞལ་ཟླུམས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དགེ་བའི་རྩ་བ་འདིས་བདག་དང ། སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་གྱུར་ཅིག་།ཐམས་ཅད་
268a
༄#། །མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག་།ཇི་ལྟར་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བྱང་ཆུབ་ཀྱི་ཕྱིར་སྤྱོད་པ་ན། དེ་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་བསྔོས་པ་དེ་བཞིན་དུ། བདག་གིས་ཀྱང་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་བསྔོའོ། །དགེ་བའི་རྩ་བ་འདིས་བདག་དང ། སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།ཐམས་ཅད་མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག་།ཇི་ལྟར་མ་འོངས་པའི་དུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བྱང་ཆུབ་གྱི་ཕྱིར་སྤྱོད་པ་ནི། ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་བསྔོ་བར་འགྱུར་བ་དེ་བཞིན་དུ་བདག་གིས་ཀྱང་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་བསྔོའོ། །དགེ་བའི་རྩ་བ་འདིས་བདག་དང ། སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།ཐམས་ཅད་མཁྱེན་པའི་ཡེ་ཤེས་ཀྱང་
268b
ཐོབ་པར་གྱུར་ཅིག་།ཇི་ལྟར་དེ་ལྟ་ན་ད་ལྟར་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བྱང་ཆུབ་ཀྱི་ཕྱིར་སྤྱོད་པ་ན། ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་བསྔོས་པ་དེ་བཞིན་དུ་བདག་གིས་ཀྱང་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་བསྔོའོ། །དགེ་བའི་རྩ་བ་འདིས་བདག་དང ། སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།ཐམས་ཅད་མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག་།ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་ཀྱི་སྙིང་པོ་ལ་བཞུགས་ཏེ། སངས་རྒྱས་ཀྱི་ཏིང་ངེ་འཛིན་བསམ་གྱིས་མི་ཁྱབ་པ། དྲི་མ་མེད་པ། ཤིན་ཏུ་དཀར་བ་ལ་ཞུགས་ནས་བདུད་སྡིག་ཅན་བཅོམ་སྟེ། ཤེས་པར་བགྱི་བ་དང ། བལྟ་བར་བགྱི་བ་དང ། རྟོགས་པར་བགྱི་བ་དང ། མངོན་པར་རྫོགས་པར་བྱང་ཆུབ་པར་བགྱི་བ་གང་ཅིའང་རུང་སྟེ། དེ་ཐམས་ཅད་ནམ་གྱི་ཐོ་རངས་སྐྱ་རང་འཆར་ཀར་སྐད་ཅིག་གཅིག་དང་ལྡན་པའི་ཤེས་རབ་ཀྱིས་བདུད་རྩི་བརྙེས་ཏེ། འཆི་བ་མེད་པར་འགྲོ་བའི་ལམ་མངོན་པར་སངས་རྒྱས་པ་དེ་བཞིན་དུ་བདག་དང ། སེམས་ཅན་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
269a
༄#། །རྒྱ་བར་གྱུར་ཅིག་།ཐམས་ཅད་མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག་།ཇི་ལྟར་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དང ། འོད་མཆོག་དང ། འོད་དགེ་དང ། བསོད་ནམས་འོད་དང ། མི་འཁྲུགས་པ་དང ། སེང་གེ་དང ། འོད་ཟེར་བརྒྱ་པ་དང ། འོད་ཟེར་མཐོ་དང ། འོད་ཀྱི་དྲ་བ་ཅན་དང ། རིན་ཆེན་འོད་འཕྲོ་དང ། འོད་འབར་དང ། སྣང་བའི་རྒྱལ་པོ་དང ། ཤིན་ཏུ་བརྒྱན་དང ། རིན་ཆེན་མེ་ཏོག་དང ། ཆོས་ཀྱི་རྒྱལ་མཚན་དང ། ཡན་ལག་མཆོག་ཅེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་དང ། སངས་རྒྱས་བཅོམ་ལྡན་འདས་གཞན་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཇི་ཙམ་དུ་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང ། མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ་ཆོས་ཀྱི་འཁོར་ལོ་རབ་ཏུ་བསྐོར་བ་དེ་བཞིན་དུ་བདག་དང ། སེམས་ཅན་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་
269b
པོ་ཆེ་དང ། ལྷ་དང ། མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ་ཆོས་ཀྱི་འཁོར་ལོ་རབ་ཏུ་བསྐོར་བར་ཤོག་ཅིག་ཅེས་བརྗོད་པར་བྱའོ། །ཤཱ་རིའི་བུ། འདི་ནི་ཡོངས་སུ་བསྔོ་བའི་ཕུང་པོ་སྟེ། བསོད་ནམས་ཀྱི་ཕུང་པོ་སྔ་མས་ཡོངས་སུ་བསྔོ་བའི་ཕུང་པོ་འདིའི་བརྒྱའི་ཆར་ཡང་ཉེ་བར་མི་འགྲོ་བ་ནས། དཔེའི་བར་དུ་ཡང་མི་བཟོད་དོ། །ཤཱ་རིའི་བུ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་མདོ་སྡེ་འདི་ལེན་ཏམ། ཀུན་ཆུབ་པར་བྱེད་དམ། འཛིན་ཏམ། ཀློག་གམ། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་ན་དེའི་བསོད་ནམས་ཀྱི་ཕུང་པོ་དེ་བས་ཆེས་མང་དུ་གྲངས་མེད་དཔག་ཏུ་མེད་པ་བསྐྱེད་དོ། །ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་སྔ་ཕྱི་མེད་པར་མི་ལུས་ཐོབ་པར་གྱུར་ལ། དེ་དག་སྔ་ཕྱི་མེད་པར་མིའི་ལུས་ཐོབ་ནས་ཀྱང་རང་བྱང་ཆུབ་ཐོབ་པར་གྱུར་ཏེ། དེ་དག་ལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་བསྟི་སྟང་དང ། ཕུད་དུད་དུ་བྱ་བའི་ཕྱིར་གོས་དང ། ཟས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་ཇི་སྲིད་འཚོའི་བར་དུ་བསྙེན་བཀུར་བྱས། རིམ་གྲོ་བྱ་བ་ལ་ལན་གཅིག་ཙམ་ཡང་རིན་པོ་ཆེའི་ཕུང་པོ་རི་རབ་ཙམ་གྱི་རིན་པོ་ཆེ་རྣམས་ཡོངས་སུ་ཟད་པར་བྱས་ལ། ཡོངས་སུ་མྱ་ངན་ལས་
270a
༄#། །འདས་ནས་ཀྱང་དེ་དག་གི་མཆོད་རྟེན་རིན་པོ་ཆེ་སྣ་བདུན་ཏེ། གསེར་དང ། དངུལ་དང ། མུ་ཏིག་དང ། བཻ་ཌཱུརྱ་དང ། ཤེལ་དང ། སྤུག་དང ། མུ་ཏིག་དམར་པོ་ལས་འཕང་དུ་དཔག་ཚད་བཅུ་པ་བྱས་ཏེ། དེ་དག་ལ་གདུགས་དང ། རྒྱལ་མཚན་དང ། བ་དན་དང ། བ་དན་ཕྲ་མོ་རྣམས་ཀྱིས་མཆོད་པ་བྱས་ན། ཤཱ་རིའི་བུ།་དེ་ཇི་སྙམ་དུ་སེམས། རིགས་ཀྱི་བུ་འམ། རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ། བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། །བཀའ་སྩལ་པ། ཤཱ་རིའི་བུ། རིགས་ཀྱི་བུ་འམ། རིགས་ཀྱི་བུ་མོ་གང་མདོ་འདི་འཛིན་ཏམ། ཀུན་ཆུབ་པར་བྱེད་དམ། འདོན་པར་བྱེད་དམ།་ཀློག་གམ། སྐྱེ་བོ་མང་པོ་ལ་ཡང་དག་པར་རབ་ཏུ་སྟོན་ཏམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་འདེབས་ན། དེ་ནི་དེ་བས་བསོད་ནམས་ཆེས་མང་དུ་བསྐྱེད་དོ། །བསོད་ནམས་ཀྱི་ཕུང་པོ་སྔ་མས་བསོད་ནམས་ཀྱི་ཕུང་པོ་འདིའི་བརྒྱའི་ཆར་ཡང་ཉེ་བར་མི་འགྲོ་བ་ནས་དཔེའི་བར་དུའང་མི་བཟོད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ལྟར་རིགས་ཀྱི་བུ་འམ། རིགས་ཀྱི་བུ་མོ་སྒྲུབ་པ་འདི་ལ་གནས་ནས། ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་བཅོམ་ལྡན་འདས་རྣམས་ལ་
270b
ཆོས་ཀྱི་འཁོར་ལོ་བསྐོར་བར་བསྐུལ་བའི་ཕྱིར་རོ། །ཤཱ་རིའི་བུ། སྦྱིན་པ་རྣམས་ཀྱི་ནང་ན། འདི་ལྟ་སྟེ། ཆོས་ཀྱི་སྦྱིན་པ་མཆོག་ཅེས་ངས་བཤད་དོ། །དེ་ནས་འཁོར་དེ་ལས་སྲོག་ཆགས་ཁྲི་སྟན་ལས་ལངས་ཏེ། སོ་སོ་ནས་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་པས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་མདོ་འདི་གཟུང་བར་བགྱིའོ། །གཞན་དག་ལའང་རྒྱ་ཆེར་ཡང་དག་པར་བསྟན་པར་བགྱིའོ། །བསྒྲུབ་པ་ལ་གནས་པར་བགྱིའོ། །དེ་ཅིའི་སླད་\?\་དུ་ཞེ་ན། བཅོམ་ལྡན་འདས། བདག་ཅག་ནི་དགེ་བའི་ཆོས་དེ་ལྟ་བུ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་དོན་དུ་གཉེར་བ་ལགས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་དང ། ཆོས་ཀྱི་རྣམ་གྲངས་འདི་ལ་ལྷའི་མེ་ཏོག་མན་དཱ་ར་བས་མངོན་པར་གཏོར་ཏོ། །མངོན་པར་གཏོར་ནས་ཀྱང་ཚིག་འདི་སྐད་ཅེས། བཅོམ་ལྡན་འདས། ཆོས་ཀྱི་རྣམ་གྲངས་འདི་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་བསྐྲུན་པ་དང ། ལས་ཀྱི་སྒྲིབ་པ་རྒྱུན་གཅོད་བའི་གཅེས་སྤྲས་བགྱིད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་
271a
༄#། །པ། དེ་དེ་བཞིན་ནོ། །ཀཽ་ཤི་ཀ་།དེ་དེ་བཞིན་ཏེ། དེ་ཅིའི་ཕྱིར་ཞེ་ན། ལྷའི་དབང་པོ། ངས་མངོན་པར་ཤེས་ཏེ། འདི་ནས་བསྐལ་པ་གྲངས་མེད་པའི་ཡང་ཆེས་གྲངས་མེད་པར་གྱུར་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་ཕུང་པོ་ཆེན་པོ་ཞེས་བྱ་བ། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ ། །ལྷའི་དབང་པོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་ཕུང་པོ་ཆེན་པོ་དེའི་སྐུ་ཚེའི་ཚད་ནི་ལོ་བྱེ་བ་ཕྲག་དྲུག་ཅུ་ཐུབ་པར་གྱུར་ཏོ། །དེའི་ཉན་ཐོས་ཐོག་མར་འདུས་པ་ནི། བྱེ་བ་ཕྲག་འབུམ་ཡོད་དེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཤ་སྟག་གོ་།དེའི་ཉན་ཐོས་འདུས་པ་གཉིས་པ་ནི་བྱེ་བ་ཕྲག་དགུ་བཅུ་རྩ་བརྒྱད་ཡོད་དེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ་ཤ་སྟག་གོ་།དེའི་ཉན་ཐོས་འདུས་པ་གསུམ་པ་ནི་བྱེ་བ་བརྒྱ་སྟོང་ཕྲག་དགུ་བཅུ་རྩ་དགུ་ཡོད་དེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ་ཤ་སྟག་གོ་།ལྷའི་དབང་པོ། དེ་ནས་
271b
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་ཕུང་པོ་ཆེན་པོ་དེ་ལྷ་དང་བཅས་པའི་འཇིག་རྟེན་དང ། ཚངས་པ་དང་བཅས་པ་དང ། དགེ་སྦྱོང་དང ། བྲམ་ཟེར་བཅས་པའི་སྐྱེ་དགུའི་དོན་གྱི་ཕྱིར་རྒྱུའོ། །ལྷའི་དབང་པོ། དེའི་ཚེ་བུད་མེད་གང་གཱའི་ལྷ་མོ་ཞེས་བྱ་བ་ཞིག་འཁོར་འདུས་པ་དེ་ཉིད་ཀྱི་ནང་དུ་འདུས་པར་གྱུར་ཏེ་འདུག་པ་དེས་ཆོས་ཀྱི་རྣམ་གྲངས་འདི་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་ཕུང་པོ་ཆེན་པོ་ལས་མངོན་སུམ་དུ་གཟུང ། ཀུན་ཆུབ་པར་བྱས། བླངས་ནས་སྐྱེ་བོ་མང་པོ་ལ་ཡང་དག་པར་བསྟན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པར་གྱུར་ཏོ། །དེ་དེ་ནས་ཤི་འཕོས་ནས་བུད་མེད་ཀྱི་ལུས་སྤངས་ཏེ་སྐྱེས་པའི་དབང་པོ་ཐོབ་ནས་རྟག་པར་རྒྱུན་ཏུ་ལྷ་དང ། མི་རྣམས་ཀྱི་ནང་དུ་སྐྱེས་ཏེ། ལན་བརྒྱད་ཁྲི་བཞི་སྟོང་དུ་འཁོར་ལོས་བསྒྱུར་བའི་རྒྱལ་པོ་བྱས་ནས། དེ་བཞིན་གཤེགས་པ་རིན་ཆེན་འོད་འཕྲོ་ཞེས་བྱ་བར་གྱུར་ཏེ། །ཀཽ་ཤི་ཀ་།འདི་ནས་ཤར་ཕྱོགས་ན་སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་ན་ཆོས་སྟོན་ཏེ་ངས་ད་ལྟར་ནའང་མཐོང་ངོ ། །ཀོའུ་ཤི་ཀ་།སུ་དག་།བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་
272a
༄#། །ཆེན་འོད་འཕྲོ་དེའི་མཚན་ཐོས་པ་དེ་དག་ཐམས་ཅད་ཡོངས་སུ་མྱ་ངན་ལས་འདས་པར་ངེས་པར་འགྱུར་རོ། །བུད་མེད་གང་ལ་ལ་ཞིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་འཕྲོ་དེའི་མཚན་ཐོས་སམ། འཆི་ཀར་ཡང་མངོན་སུམ་དུ་བྱེད་ན་དེ་ཉིད་དེའི་བུད་མེད་ཀྱི་ལུས་ཀྱི་ཐ་མ་ཡིན་ནོ། །རིགས་ཀྱི་བུ། གསེར་འོད་དམ་པའི་མདོ་སྡེའི་དབང་པོ་འདིའི་ཕན་ཡོན་རྣམ་པ་སྣ་ཚོགས་འབྱུང་བར་འགྱུར་ཏེ། བྱང་ཆུབ་ཀྱི་དགེ་བའི་ཆོས་རྣམས་ཡོངས་སུ་རྒྱས་པར་འགྱུར་བ་དང ། ལས་ཀྱི་སྒྲིབ་པའི་རྒྱུན་ཐམས་ཅད་གཅོད་པར་འགྱུར་རོ། །ཡང་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་གིས་གསེར་འོད་དམ་པ་མདོ་སྡེའི་དབང་པོ་འདི་འཆད་ཅིང་སྟོན་པའི་གནས་དང ། ཡུལ་འཁོར་དེར་ཕན་ཡོན་རྣམ་པ་འདི་བཞི་འབྱུང་བར་འགྱུར་རོ། །བཞི་གང་ཞེ་ན། ཡུལ་དེའི་རྒྱལ་པོ་ནད་མེད་ཅིང་གནོད་པ་ཐམས་ཅད་དང་བྲལ་བར་འགྱུར་བ་དང ། ཚེ་རིང་ཞིང་བར་ཆད་མི་འབྱུང་བ་དང ། དགྲ་དང ། ཕ་རོལ་གྱི་དམག་ཚོགས་ཀྱིས་འཇོམས་པར་མི་འགྱུར་བ་དང ། བདེ་བ་ལ་ལོངས་སྤྱོད་ཅིང་དམ་པའི་ཆོས་ཡོངས་སུ་རྒྱས་པར་བྱེད་པ་དེ་ནི། མིའི་རྒྱལ་པོ་དེ་ལ་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་བཞི་དང །
272b
གནོད་སྦྱིན་གྱི་བདག་པོ་ལ་སོགས་པས་ཡོངས་སུ་བསྲུངས་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ལྷའི་འཁོར་དེ་དག་ལ། རིགས་ཀྱི་བུ་དག་།དེ་དེ་ལྟ་ཡིན་ནམ་ཞེས་བཀའ་སྩལ་པ་དང ། དེ་ནས་བརྒྱ་བྱིན་དང ། ཚངས་པ་ལ་སོགས་པ་ཚད་མེད་པའི་འཁོར་དེ་དག་སོ་སོ་ནས་ཚིག་འདི་སྐད་ཅེས་གསོལ་ཏོ། །དེ་དེ་ལྟ་ལགས་སོ། །བཅོམ་ལྡན་འདས་ཡུལ་འཁོར་གང་དུ་མདོ་སྡེའི་དབང་པོ་འདི་ཀློག་ཅིང་འདོན་པ་དང ། སྟོན་པ་དེའི་རྒྱལ་པོ་དང ། ཡུལ་འཁོར་དེར་མཆིས་ཏེ། དེ་ལ་བདག་ཅག་གིས་རྟག་ཏུ་བསྲུང་བ་དང ། ལྷན་ཅིག་གནས་པར་བགྱིས་ཏེ། རྒྱལ་པོ་དེའི་ཕས་ཀྱི་དགྲ་དང ། གནོད་པ་དང ། བར་ཆད་དང ། ནད་དང ། མྱ་ངན་ལ་སོགས་པ་ཐམས་ཅད་མ་མཆིས་པར་བགྱིའོ། །ཚེ་རིང་བ་དང ། བདེ་བ་དང ། བཀྲ་ཤིས་སུ་ལྡན་ཞིང་བསམས་པ་ཐམས་ཅད་འགྲུབ་པས། རྟག་པས་སེམས་དགའ་བར་ཡང་བགྱིའོ། །རྒྱལ་པོའི་འཁོར་དེའི་དམག་རྣམས་ཀྱང་དཔའ་ཞིང་བརྟུལ་ཕོད་པར་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ཏོ། །ལེགས་སོ། །ལེགས་སོ། །རིགས་ཀྱི་བུ་དག་།ཇི་སྐད་སྨྲས་པ་དེ་བཞིན་དུ་སྒྲུབས་ཤིག་དང ། རྒྱལ་པོ་དེ་ཆོས་བཞིན་དུ་སྤྱོད་པས། དེའི་འབངས་རྣམས་ཀྱང་རྒྱལ་པོ་བཞིན་ཆོས་བཞིན་སྤྱོད་པར་འགྱུར་རོ། །དེ་ལ་ཁྱེད་ཀྱིས་མཐུ་དང ། ཁ་
273a
༄#། །དོག་ཕུན་སུམ་ཚོགས་པས་བསྟང་ཞིང་ཕན་པ་དམ་པས་གནས་དང ། འཁོར་ལ་སོགས་པ་འོད་ཅན་དུ་གྱིས་ཤིག་།དེ་ནས་བརྒྱ་བྱིན་དང ། ཚངས་པ་ལ་སོགས་པས་ཀྱང་བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་བཞིན་དུ་བགྱིའོ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། གང་མདོ་སྡེའི་དབང་པོ་འདི་སྟོན་པ་དང ། རྒྱས་པར་བྱེད་པའི་གནས་དང ། ཡུལ་དེར་རྒྱལ་པོའི་བློན་པོ་རྣམས་ལ་ཕན་ཡོན་རྣམ་པ་འདི་བཞི་འབྱུང་བར་འགྱུར་ཏེ། བཞི་གང་ཞེ་ན། གཅིག་ལ་གཅིག་གུས་ཤིང་མཛའ་བའི་སེམས་སུ་འགྱུར་པ་དང ། རྟག་ཏུ་རྒྱལ་པོས་གནང་ཞིང་དགེ་སྦྱོང་དང ། བྲམ་ཟེ་དང ། རྒྱལ་ཕྲན་ལ་སོགས་པས་བཙུན་པར་འཛིན་པ་དང ། དམ་པའི་ཆོས་དོན་དུ་གཉེར་ཞིང་ཁེ་དང་གྲགས་པ་མི་ཚོལ་བས་གྲགས་པ་ཆེན་པོ་ཕྱོགས་སུ་རྒྱས་ཤིང་ཀུན་གྱིས་བསྟོད་པ་དང ། ཚེ་རིང་ཞིང་བདེ་བར་ལོངས་སྤྱོད་པ་སྟེ། བཞི་པོ་དེ་དག་གོ་།གཞན་ཡང ། དམ་པའི་ཆོས་འདི་སྟོན་པའི་ཡུལ་དེའི་དགེ་སྦྱོང་དང ། བྲམ་ཟེ་རྣམས་ལ་ཕན་ཡོན་འདི་བཞི་འབྱུང་སྟེ། བཞི་གང་ཞེ་ན། གོས་དང ། བསོད་སྙོམས་དང ། མལ་ཆ་དང ། སྨན་ལ་སོགས་པས་ཕོངས་པར་མི་འགྱུར་བ་དང ། དེ་དག་ཀུན་ཀྱང་ཀློག་པ་དང ། འདོན་པའི་བསམ་པས་སེམས་བདེ་བར་འགྱུར་བ་དང ། རི་དང །
273b
ནགས་ཚལ་ལ་སོགས་པར་བདེ་བར་གནས་པར་འགྱུར་བ་དང ། གང་བརྣག་པར་བྱ་བའི་བསམ་པ་དེ་ཡོངས་སུ་རྫོགས་པར་འགྱུར་བ་དང་བཞི་པོ་ད་དག་གོ་།གཞན་ཡང ། མདོ་འདི་འདོན་པའི་ཡུལ་དེའི་སྐྱེ་བོ་དེ་དག་ནད་མེད་ཅིང་བདེ་བ་འཕེལ་བ་དང ། ནོར་དང ། ཡོ་བྱད་དང ། རིན་པོ་ཆེ་ལ་སོགས་པ་བསྒྲུབ་པ་མྱུང་དུ་འགྲུབ་ཅིང ། བསོད་ནམས་འཕེལ་བ་ལ་སོགས་ཏེ་ཕན་ཡོན་རྣམ་པ་དེ་དག་དང་ལྡན་པར་འགྱུར་རོ། །དེ་ནས་བརྒྱ་བྱིན་དང ། ཚངས་པ་དང ། རྒྱལ་པོ་ཆེན་པོ་བཞི་ལ་སོགས་པའི་འཁོར་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། དོན་ཟབ་མོ་སྟོན་པའི་མདོ་སྡེ་འདི་ཇི་སྲིད་འཇིག་རྟེན་ན་གནས་ཀྱི་བར་དུ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཆོས་རྣམས་ཀྱང་གནས་པར་འགྱུར་རོ། །མདོ་སྡེ་འདི་ནམ་མི་བཞུགས་པར་གྱུར་པའི་དུས་དེར། དམ་པའི་ཆོས་རྣམས་ཀྱང་མེད་པར་འགྱུར་རོ་ཞེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་དེ་ལྟའོ། །རིགས་ཀྱི་བུ་དག་།དེ་ལྟ་བས་ན་ཁྱོད་ཀྱིས་གསེར་འོད་དམ་པའི་མདོ་འདི་ལས་ཐ་ན་ཚིག་གཅིག་གམ། ཚིགས་སུ་བཅད་པ་གཅིག་གམ། ལེའུ་གཅིག་གམ། སྡེ་ཚང་བར་ཡང་རུང་སྟེ། ཡང་དག་པར་གདོན་པར་བྱ། བཟུང་བར་བྱ། བསམ་པར་བྱ། ཡོངས་སུ་བསྒྲུབ་པར་བྱའོ། །སེམས་ཅན་མང་པོའི་ཡུན་གྱི་དོན་དང ། ཕན་
274a
༄#། །པ་དང ། བདེ་བའི་ཕྱིར་ཀུན་ལ་སྟོན་ཅིང་རྒྱས་པར་བྱེད་ན། དེ་བསོད་ནམས་ཀྱི་ཕུང་པོ་ཚད་མེད་པ་དང་ལྡན་པར་འགྱུར་རོ་ཞེས་བཀའ་སྩལ་པ་དང ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལས་ཀྱི་སྒྲིབ་པ་རྒྱུན་གཅོད་པ་ཞེས་བྱ་བའི་ལེའུ་སྟེ་ལྔ་པའོ།། །།བམ་པོ་བཞི་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་རིན་པོ་ཆེ་སྣ་ཚོགས་ཀྱི་མེ་ཏོག་གི་གདུགས་དང ། མེ་ཏོག་གི་ཕུར་མས་མཆོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་ཀྱི་སེམས་བྱང་ཆུབ་ཀྱི་སེམས་ཞེས་བགྱི་བ། བཅོམ་ལྡན་འདས། ཇི་ཙམ་གྱིས་ན་བྱང་ཆུབ་སེམས་དཔའ་བྱང་ཆུབ་ཀྱི་སེམས་དང་ལྡན་པ་ལགས། བཅོམ་ལྡན་འདས། བྱང་ཆུབ་ཀྱི་སེམས་གང་ལགས། བཅོམ་ལྡན་འདས། བྱང་ཆུབ་ལ་ནི་སེམས་སམ། བྱང་ཆུབ་སེམས་དཔའ་མ་དམིགས། མི་དམིགས། དམིགས་པར་ཡང་མི་འགྱུར་རོ། །བྱང་ཆུབ་ལས་གུད་
274b
ནའང་བྱང་ཆུབ་ཀྱི་སེམས་མི་དམིགས་ཏེ་བྱང་ཆུབ་ནི་བརྗོད་དུ་མ་མཆིས། སེམས་ནི་གཟུགས་མ་མཆིས། བསྟན་དུ་མ་མཆིས། ཐོགས་པ་མ་མཆིས། རྣམ་པར་རིག་པ་མ་མཆིས་ཤིང ། སེམས་པར་ཡང་མི་དམིགས་ན། བཅོམ་ལྡན་འདས། ཇི་ལྟར་ན་ཆོས་འདི་དག་གི་དོན་རྟོགས་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། འདི་ལ་བྱང་ཆུབ་ནི་བརྡ་འམ། གདགས་པའམ། ཐ་སྙད་དུ་མི་དམིགས་ཤིང ། བྱང་ཆུབ་ལས་གུད་ན་བྱང་ཆུབ་ཀྱི་སེམས་ཀྱང་མི་དམིགས་ལ། བྱང་ཆུབ་ནི་བརྗོད་དུ་མེད། སེམས་ནི་གཟུགས་མེད། བསྟན་དུ་མེད། ཐོགས་པ་མེད། རྣམ་པར་རིག་པ་མེད། སེམས་དཔའ་ཡང་མི་དམིགས་སོ། །དེ་ཅིའི་ཕྱིར་ཞེ་ན། བྱང་ཆུབ་ནི་བརྗོད་དུ་མེད་པ་སྟེ། བྱང་ཆུབ་ཇི་ལྟ་བར་སེམས་ཀྱང་དེ་བཞིན་ནོ། །སེམས་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་དང ། སེམས་ཇི་ལྟ་བར་སེམས་དཔའ་རྣམས་ཀྱང་དེ་བཞིན་ནོ། །སེམས་དཔའ་རྣམས་ཇི་ལྟ་བར་འདས་པ་དང ། མ་འོངས་པ་དང ། ད་ལྟར་བྱུང་བའི་ཆོས་ཐམས་ཅད་ཀྱང་དེ་བཞིན་ནོ། །རིགས་ཀྱི་བུ། དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་མིང་ཐོབ་བོ། །ཆོས་ཐམས་ཅད་ཀྱི་རྗེས་སུ་སོང་བའི་སེམས་དེ་ནི། བྱང་ཆུབ་ཀྱི་སེམས་ཞེས་བྱའོ། །བྱང་ཆུབ་ནི་འདས་པ་དང ། མ་
275a
༄#། །འོངས་པ་དང ། ད་ལྟར་བྱུང་བ་ཡང་མ་ཡིན་ཏེ་སེམས་ཀྱང་དེ་བཞིན་ནོ། །ཆོས་ཐམས་ཅད་མི་དམིགས་པའི་ཕྱིར་འདི་ལ་ཅིའང་རྙེད་པ་མེད་དོ། བྱང་ཆུབ་ཀྱང་མེད། བྱང་ཆུབ་ཏུ་གདགས་པའང་མེད། སེམས་ཅན་ཡང་མེད། སེམས་ཅན་དུ་གདགས་པའང་མེད། ཉན་ཐོས་ཀྱང་མེད། ཉན་ཐོས་སུ་གདགས་པའང་མེད། རང་སངས་རྒྱས་ཀྱང་མེད། རང་སངས་རྒྱས་སུ་གདགས་པའང་མེད། བྱང་ཆུབ་སེམས་དཔའ་ཡང་མེད། བྱང་ཆུབ་སེམས་དཔར་གདགས་པའང་མེད། སངས་རྒྱས་ཀྱང་མེད། སངས་རྒྱས་སུ་གདགས་པའང་མེད། འདུས་བྱས་ཀྱང་མེད། འདུས་བྱས་སུ་གདགས་པའང་མེད། འདུས་མ་བྱས་ཀྱང་མེད། འདུས་མ་བྱས་སུ་གདགས་པའང་མི་དམིགས་དམིགས་པར་མི་འགྱུར་པའོ། །རིགས་ཀྱི་བུ། འོན་ཀྱང ། དཔེར་ན། རི་རབ་ཀྱི་ཚུལ་དུ་དགེ་བའི་རྩ་བ་ཐམས་ཅད་ཀྱིས་ཡང་དག་པར་འཕགས་པའི་སེམས་དང་པོ་བསྐྱེད་དེ། དེ་ལ་རྒྱུ་ནི་སྦྱིན་པའི་ཕ་རོལ་ཏུ་ཕྱིན་པའོ། །སེམས་བསྐྱེད་པ་གཉིས་པ་ནི་ཆོས་ཐམས་ཅད་ཀྱི་བྱ་བའི་གནས་ཀྱི་ཚུལ་གྱིས་ས་ལྟ་བུར་བལྟ་སྟེ། དེ་ལ་རྒྱུ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་གསུམ་པ་ནི་འཇིགས་པ་མེད་པ་དང ། བག་ཚབ་མེད་པ་དང ། སྐྲག་པ་མེད་པའི་ཚུལ་གྱིས་རི་དྭགས་ཀྱི་
275b
རྒྱལ་པོ་སེངྒེ་རལ་པ་ཅན་གྱི་རྩལ་ལྟ་བུར་བལྟ་སྟེ། དེ་ལ་རྒྱུ་ནི་བཟོད་པའི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བཞི་པ་ནི་ཕྱིར་མི་ལྡོག་པའི་ཚུལ་གྱིས་སྲེད་མེད་ཀྱི་བུའི་མཐུ་དང།་སྟོབས་དང ། ཤུགས་དང ། བརྩོན་འགྲུས་དང ། བརྟུལ་བ་ལྟ་བུར་བལྟ་སྟེ། དེ་ལ་རྒྱུ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་ལྔ་པ་ནི་བསོད་ ་ཀྱིས་ཆོག་མི་ཤེས་པའི་ཚུལ་གྱིས་དགེ་བ་སྣ་ཚོགས་ཀྱིས་ཡང་དག་པར་འཕགས་པ་ལྟ་བུར་བལྟ་སྟེ། དེ་ལ་རྒྱུ་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་དྲུག་པ་ནི་མུན་པ་མུན་ནག་ཆེན་པོ་སེལ་བའི་ཚུལ་གྱིས་ཉི་མའི་དཀྱིལ་འཁོར་འོད་གསལ་བ་ལྟ་བུར་བལྟ་སྟེ། དེ་ལ་རྒྱུ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བདུན་པ་ནི། དེད་དཔོན་མཛོད་ཆེན་པོས་ཕྱུག་པ་ལྟ་བུར་འཁོར་བའི་འབྲོག་དགོན་པ་ལས་སྒྲོལ་པའི་ཚུལ་གྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་པས་དེ་ལ་ལེགས་པར་བརྒྱན་པ་ལྟ་བུར་བལྟ་སྟེ། དེ་ལ་རྒྱུ་ནི་ཐབས་མཁས་པའི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བརྒྱད་པ་ནི་ཟླ་བ་ཉའི་དཀྱིལ་འཁོར་རྣམ་པར་དག་པའི་དཔེའི་ཚུལ་གྱིས་སྒྲིབ་པ་ཐམས་ཅད་རྣམ་པར་དག་པར་ཡོངས་སུ་རྫོགས་པར་བྱེད་པ་ལྟ་བུར་བལྟ་སྟེ། དེ་ལ་རྒྱུ་ནི་སྨོན་ལམ་གྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་དགུ་པ་ནི། སངས་རྒྱས་ཀྱི་
276a
༄#། །ཞིང་ཡོངས་སུ་དག་པའི་ཡོན་ཏན་གྱི་རྒྱན་བཀོད་པ་ཐམས་ཅད་ཀྱི་དཀྱིལ་འཁོར་གྱི་ཚུལ་གྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ལྟ་བུར་བལྟ་སྟེ། དེ་ལ་རྒྱུ་ནི་སྟོབས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བཅུ་པ་ནི་ཡོན་ཏན་དང ། ཡེ་ཤེས་དང ། ཆོས་ཐམས་ཅད་ལ་དབང་བསྒྱུར་པར་དབང་\?\་བསྐུར་བ་ཐོབ་པས་འཁོར་ལོས་བསྒྱུར་བའི་མཚན་གྱི་དཔེའི་ཚུལ་གྱིས་ནམ་མཁའ་དང་མཚུངས་པ་ལྟ་བུར་བལྟ་སྟེ། དེ་ལ་རྒྱུ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་ནི་བཅུ་པོ་འདི་དག་ཡིན་ཏེ། འདི་དག་དང་ལྡན་པས་བྱང་ཆུབ་སེམས་དཔའ་ཞེས་བྱའོ། །དོན་དམ་པར་ན་འདི་ལ་བྱང་ཆུབ་ཀྱང་མེད། བྱང་ཆུབ་སེམས་དཔའ་ཡང་མེད། བྱང་ཆུབ་ཀྱི་སེམས་ཀྱང་མེད་དོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། དད་པའི་དབང་པོ་སྔོན་དུ་འགྲོ་བ་དང ། བསམ་པ་སྔོན་དུ་འགྲོ་བ་དང ། ལྷག་པའི་བསམ་པ་སྔོན་དུ་འགྲོ་བ་དང ། ཕ་རོལ་ཏུ་ཕྱིན་པ་སྔོན་དུ་འགྲོ་བ་དང ། བྱམས་པ་ཆེན་པོ་སྔོན་དུ་འགྲོ་བ་དང ། སྙིང་རྗེ་ཆེན་པོ་སྔོན་དུ་འགྲོ་བ་དང །
276b
སེམས་ཅན་གྱི་རྟེན་སྔོན་དུ་འགྲོ་བ་དང ། བསྡུ་བའི་དངོས་པོ་སྔོན་དུ་འགྲོ་བ་དང ། སངས་རྒྱས་ཀྱི་ཆོས་འདོད་པ་སྔོན་དུ་འགྲོ་བ་དང ། ཐམས་ཅད་མཁྱེན་པའི་ཡེ་ཤེས་འདོད་པ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ལུས་ཀྱི་ལས་ཡོངས་སུ་དག་པ་སྔོན་དུ་འགྲོ་བ་དང ། དག་གི་ལས་ཡོངས་སུ་དག་པ་སྔོན་དུ་འགྲོ་བ་དང ། ཡིད་ཀྱི་ལས་ཡོངས་སུ་དག་པ་སྔོན་དུ་འགྲོ་བ་དང ། རྣམ་པར་མི་འཚེ་བ་སྔོན་དུ་འགྲོ་བ་དང ། ངན་སོང་ཐམས་ཅད་རྣམ་པར་སྤོང་བ་སྔོན་དུ་འགྲོ་བ་དང ། མི་ཁོམ་པ་བརྒྱད་རྣམ་པར་སྤོང་བ་སྔོན་དུ་འགྲོ་བ་དང ། ཉན་ཐོས་དང ། རང་སངས་རྒྱས་ཀྱི་ས་ལས་འདའ་བ་སྔོན་དུ་འགྲོ་བ་དང ། སངས་རྒྱས་ཀྱི་ཡོན་ཏན་ལ་དགོད་པ་སྔོན་དུ་འགྲོ་བ་དང ། བསམ་པ་ཡོངས་སུ་རྫོགས་པ་སྔོན་དུ་འགྲོ་བ་དང ། སྨོན་ལམ་ཡོངས་སུ་རྫོགས་པ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་འདི་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་
277a
༄#། །རྣམས་ཀྱི་བཟོད་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། རྗེས་སུ་ཆགས་པ་སྤོང་བ་སྔོན་བུ་འགྲོ་བ་དང ། ཁོང་ཁྲོ་བ་སྤོང་བ་སྔོན་དུ་འགྲོ་བ་དང ། ལུས་ལ་མི་ལྟ་བ་སྔོན་དུ་འགྲོ་བ་དང ། སྲོག་ལ་ཡིད་མི་རྟོན་པ་སྔོན་དུ་འགྲོ་བ་དང ། མོས་པ་སྔོན་དུ་འགྲོ་བ་དང ། སེམས་ཅན་ཡོངས་སུ་སྨིན་པར་བྱ་བ་སྔོན་དུ་འགྲོ་བ་དང ། བྱམས་པའི་སྟོབས་སྔོན་དུ་འགྲོ་བ་དང ། ཟབ་མོའི་ཆོས་ལ་བཟོད་པ་སྔོན་དུ་འགྲོ་བ་དང ། རྒྱ་ཆེན་པོ་ལ་མོས་པ་སྔོན་དུ་འགྲོ་བ་དང ། མི་ཤེས་པ་བསལ་བ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་གྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་བྱ་བ་ཅི་ཡོད་སྙམ་པ་སྔོན་དུ་འགྲོ་བ་དང ། དགེ་བའི་ལུས་དང ། དག་དང ། ཡིད་མངོན་པར་བསྒྲུབ་པ་ལ་རྗེས་སུ་ཡི་རང་བ་སྔོན་དུ་འགྲོ་བ་དང ། ཞུམ་པ་མེད་པ་སྔོན་དུ་འགྲོ་བ་དང ། ཕྱིར་མི་ལྡོག་པའི་ས་ལ་བསྡུ་བ་ཐོབ་པར་བྱ་བ་སྔོན་དུ་འགྲོ་བ་དང ། ཡང་དག་པའི་སྩོལ་བ་སྔོན་དུ་འགྲོ་བ་དང ། དྲན་པ་ཉེ་བར་གཞག་པ་སྔོན་དུ་འགྲོ་
277b
བ་དང ། ཉོན་མོངས་པའི་དགྲ་འདུལ་བ་སྔོན་དུ་འགྲོ་བ་དང ། ཆོས་ཐམས་ཅད་ཀྱིས་དབེན་པ་སྔོན་དུ་འགྲོ་བ་དང ། སེམས་ཅན་ཡོངས་སུ་སྨིན་པར་བྱ་བ་སྔོན་དུ་འགྲོ་བ་དང ། ཐམས་ཅད་མཁྱེན་པའི་ཡེ་ཤེས་ཡང་དག་པར་སྒྲུབ་པ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པའི་སྔན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། དགེ་བའི་ཆོས་ལ་གནས་པ་སྔོན་དུ་འགྲོ་བ་དང ། ཏིང་ངེ་འཛིན་སྔོན་དུ་འགྲོ་བ་དང ། སྙོམས་པར་འཇུག་པ་སྔོན་དུ་འགྲོ་བ་དང ། ཡང་དག་པར་རྫོགས་པའི་བྱང་ཆུབ་སྔོན་དུ་འགྲོ་བ་དང ། བསམ་གཏན་དང ། རྣམ་པར་ཐར་པ་སྔོན་དུ་འགྲོ་བ་དང ། ཏིང་ངེ་འཛིན་གྱི་དབང་པོ་སྔོན་དུ་འགྲོ་བ་དང ། ཏིང་ངེ་འཛིན་གྱི་སྟོབས་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་ཉོན་མོངས་པ་སྤོང་བ་སྔོན་དུ་འགྲོ་བ་དང ། ཏིང་ངེ་འཛིན་གྱི་ཕུང་པོ་ཡོངས་སུ་རྫོགས་པར་བྱེད་པ་སྔོན་དུ་འགྲོ་བ་དང ། དམ་པའི་ཆོས་ཡོངས་སུ་བསྲུང་བ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་
278a
༄#། །ཤེས་རབ་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཕུང་པོ་ལ་མཁས་པ་སྔོན་དུ་འགྲོ་བ་དང ། ཁམས་ལ་མཁས་པ་སྔོན་དུ་འགྲོ་བ་དང ། སྐྱེ་མཆེད་ལ་མཁས་པ་སྔོན་དུ་འགྲོ་བ་དང ། རྟེན་ཅིང་འབྲེལ་བར་འབྱུང་བ་ལ་མཁས་པ་སྔོན་དུ་འགྲོ་བ་དང ། བདེན་པ་ལ་མཁས་པ་སྔོན་དུ་འགྲོ་བ་དང ། ལྟ་བར་གྱུར་པ་ཐམས་ཅད་བསལ་བ་སྔོན་དུ་འགྲོ་བ་དང ། ཤེས་རབ་ཀྱི་དབང་པོ་སྔོན་དུ་འགྲོ་བ་དང ། མི་སྐྱེ་བའི་ཆོས་ལ་བཟོད་པ་སྔོན་དུ་འགྲོ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བ་སྔོན་དུ་འགྲོ་བ་དང ། སྒྲིབ་པ་མེད་པའི་ཡེ་ཤེས་མཐོང་བ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་གྱི་བསམ་པ་དང ། སྤྱོད་པ་ལ་འཇུག་པ་སྔོན་དུ་འགྲོ་བ་དང ། སེམས་ཅན་གྱི་རྟེན་སྔོན་དུ་འགྲོ་བ་དང ། བྱམས་པ་དང ། སྙིང་རྗེ་ཆེན་པོ་སྔོན་དུ་འགྲོ་བ་དང ། སེམས་ཅན་ཡོངས་སུ་སྨིན་པར་བྱ་བ་ལ་མི་སྐྱོ་བ་སྔོན་དུ་འགྲོ་བ་དང ། སངས་རྒྱས་ཀྱི་ཆོས་ཐམས་ཅད་ལ་འཇུག་པ་སྔོན་
278b
དུ་འགྲོ་བ་དང ། ཁྱད་པར་གྱི་ཡེ་ཤེས་མཐོང་བ་ཁོང་དུ་ཆུད་པ་སྔོན་དུ་འགྲོ་བ་དང ། ཕ་རོལ་ཏུ་ཕྱིན་པ་ཡོངས་སུ་བྱང་བར་བྱ་བ་དང ། ཡོངས་སུ་སྨིན་པར་བྱ་བ་སྔོན་དུ་འགྲོ་བ་དང ། དངོས་པོ་ཇི་ལྟ་བ་བཞིན་དུ་ཡོངས་སུ་རྟོགས་པ་སྔོན་དུ་འགྲོ་བ་དང ། སེམས་ཀྱི་སྟོབས་ཉེ་བར་བསྒྲུབ་པ་སྔོན་དུ་འགྲོ་བ་དང ། ཕྱིར་མི་ལྡོག་པའི་ས་ཡོངས་སུ་ཐོབ་པར་བྱེད་པ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་ཐབས་མཁས་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་ཉོན་མོངས་པའི་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་དབང་པོ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་བསམ་པ་དང ། མོས་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་བསམ་པ་དང ། ལྷག་པའི་བསམ་པ་དང ། མོས་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། འཇིག་རྟེན་གྱི་ཁམས་ཐ་དད་པ་དང ། ཁམས་གསུམ་གྱི་ཐིབས་པོ་ཉེ་བར་རྒྱུ་བ་
279a
༄#། །ཤེས་པ་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་བསམ་པ་དང ། བག་ལ་ཉལ་གྱི་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་འཆི་འཕོ་བ་དང ། སྐྱེ་བ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། སེམས་ཅན་ཐམས་ཅད་ཀྱི་ཕུང་པོ་གསུམ་དུ་རྣམ་པར་གཞག་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང ། དབང་པོ་མི་སྐྱོ་བའི་སེམས་ཅན་ཡོངས་སུ་སྨིན་པར་བྱ་བ་ཤེས་པ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་གཟོད་མ་ནས་བྱུང་བ་མེད་པ་སྔོན་དུ་འགྲོ་བ་དང ། ཆོས་ཐམས་ཅད་གཟོད་མ་ནས་མཚན་ཉིད་མེད་པ་སྔོན་དུ་འགྲོ་བ་དང ། ཆོས་ཐམས་ཅད་གཟོད་མ་ནས་སྐྱེ་བ་མེད་པ་སྔོན་དུ་འགྲོ་བ་དང ། ཆོས་ཐམས་ཅད་གཟོད་མ་ནས་ཡོད་པ་མ་ཡིན་པ་འདི་ལ་སྔོན་དུ་འགྲོ་བ་དང ། ཆོས་ཐམས་ཅད་གཟོད་མ་ནས་ཆགས་པ་མེད་པ་སྔོན་དུ་འགྲོ་བ་དང ། ཆོས་ཐམས་ཅད་འཇུག་པ་མེད་པ་སྔོན་དུ་འགྲོ་བ་དང ། ཆོས་ཐམས་ཅད་ལྡོག་པ་མེད་པ་སྔོན་དུ་འགྲོ་བ་དང ། ཆོས་
279b
ཐམས་ཅད་དངོས་པོ་མེད་པའི་ངོ་བོ་ཉིད་སྔོན་དུ་འགྲོ་བ་དང ། ཆོས་ཐམས་ཅད་ཀྱི་ཐོག་མ་དང ། བར་མ་དང ། ཐ་མ་མཉམ་པ་ཉིད་སྔོན་དུ་འགྲོ་བ་དང ། ཆོས་ཐམས་ཅད་ཀྱི་དེ་བཞིན་ཉིད་ལ་འཇུག་པའི་རྟོག་པ་དང ། རྣམ་པར་རྟོག་པ་མེད་པ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་རྣམ་པར་དབྱེ་བ་ལ་ཤིན་ཏུ་རྣམ་པར་བརྟགས་པ་སྔོན་དུ་འགྲོ་བ་དང ། དཀར་པོའི་ཆོས་ཤིན་ཏུ་ཡོངས་སུ་རྫོགས་པ་སྔོན་དུ་འགྲོ་བ་དང ། བྱང་ཆུབ་ཀྱི་ཚོགས་བསགས་པ་དཔག་ཏུ་མེད་པ་སྔོན་དུ་འགྲོ་བ་དང ། བསོད་ནམས་དང ། ཡེ་ཤེས་ཀྱི་ཚོགས་ཆེན་པོ་ཡོངས་སུ་བཟུང་བ་སྔོན་དུ་འགྲོ་བ་དང ། སྙིང་རྗེ་ཆེན་པོ་ཡངས་པ་ཁོང་དུ་ཆུད་པར་བྱ་བ་སྔོན་དུ་འགྲོ་བ་དང ། འཇིག་རྟེན་གྱི་ཁམས་རྣམ་པར་དབྱེ་བའི་རིམ་པ་ཤེས་པ་སྔོན་དུ་འགྲོ་བ་དང ། སེམས་ཅན་གྱི་ཁམས་དང ། ཉོན་མོངས་པའི་སྤྱོད་པ་ལ་འཇུག་པ་སྔོན་དུ་འགྲོ་བ་དང ། དེ་བཞིན་གཤེགས་པའི་སྤྱོད་ཡུལ་ལ་འཇུག་ཅིང་རྗེས་སུ་འགྲོ་བ་ཤེས་པ་ཡིད་ལ་བྱེད་པ་སྔོན་དུ་འགྲོ་བ་དང ། སྟོབས་བཅུ་
280a
༄#། །དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པ་ལ་ལྷག་པར་དམིགས་ཤིང་ཀུན་ཤེས་པར་བྱ་བ་སྔོན་དུ་འགྲོ་བ་དང ། རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ལ་དབང་བསྐུར་བའི་ས་ཐོབ་པ་སྔོན་དུ་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་བའི་སྔོན་དུ་འགྲོ་བའི་ཆོས་རྣམ་པ་བཅུའོ། །དེ་ལ་ཕ་རོལ་ཏུ་ཕྱིན་པའི་དོན་གང་ཞེ་ན། སྤྱོད་པའི་ཁྱད་པར་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཡེ་ཤེས་ཟབ་ཅིང་རྒྱ་ཆེ་བ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །འདུས་བྱས་དང ། འདུས་མ་བྱས་ལ་ཆགས་པ་མེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །འཁོར་བའི་ཉེས་པ་ཇི་ལྟ་བ་བཞིན་དུ་རྟོགས་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སྐྱེ་བོ་མི་མཁས་པ་རྣམས་ཁོང་དུ་ཆུད་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཆོས་ཀྱི་མཛོད་ཟད་མི་ཤེས་པ་ཡང་དག་པར་སྟོན་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སྒྲིབ་པ་མེད་པའི་རྣམ་པར་ཐར་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སེམས་ཅན་གྱི་ཁམས་རབ་ཏུ་ཤེས་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སྦྱིན་པ་མཉམ་པ་ཉིད་རྗེས་སུ་རྟོགས་པའི་
280b
དོན་ནི་ཕ་རོལ་ཏུ་ཕྱིན་པའི་དོན་ནོ། །ཚུལ་ཁྲིམས་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བཟོད་པ་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བརྩོན་འགྲུས་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བསམ་གཏན་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཁས་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཆོས་ཐམས་ཅད་རབ་ཏུ་ཤེས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །མི་སྐྱེ་བའི་ཆོས་ལ་བཟོད་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཕྱིར་མི་ལྡོག་པའི་ས་ཡང་དག་པར་ཐོབ་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སངས་རྒྱས་ཀྱི་ཞིང་ཡོངས་སུ་སྦྱང་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བྱང་ཆུབ་ཀྱི་སྙིང་པོ་ལ་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བདུད་ཐམས་ཅད་གདུལ་བར་བྱ་བའི་དོན་ནི། ཕ་རོལ་ཏུ་ཕྱིན་པའི་དོན་ནོ། །འཁོར་བ་དང ། མྱ་ངན་ལས་འདས་པ་གཉིས་སུ་མེད་
281a
༄#། །པར་སྟོན་ཅིང་གྲོལ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཡོན་ཏན་ཐམས་ཅད་ཀྱི་ཕ་རོལ་ཏུ་འགྲོ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཕས་ཀྱི་རྒོལ་བ་ཐམས་ཅད་ཚར་གཅོད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སྟོབས་བཅུ་དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་བྱང་ཆུབ་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཆོས་ཀྱི་འཁོར་ལོ་རྣམ་པ་བཅུ་གཉིས་སུ་བསྐོར་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དང་པོའི་སྔ་ལྟས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་གང་བར་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་གཉིས་པའི་སྔ་ལྟས་ནི་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལག་མཐིལ་ལྟ་བུར་གྱུར་པ་ལ་
281b
རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་ལེགས་པར་བརྒྱན་པར་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་གསུམ་པའི་སྔ་ལྟས་ནི་བདག་ཉིད་དཔའ་ཞིང་ལག་ཆ་དང ། གོ་ཆ་སྲ་བ་ཐོགས་ནས་ཕས་ཀྱི་རྒོལ་བ་ཐམས་ཅད་འདུལ་བར་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བཞི་པའི་སྔ་ལྟས་ནི་ཕྱོགས་བཞི་ནས་རླུང་གི་དཀྱིལ་འཁོར་བཞིས་ཐམས་ཅད་དང་ལྡན་པའི་སའི་དཀྱིལ་འཁོར་ཆེན་པོ་ལ་མེ་ཏོག་སྣ་ཚོགས་ཀྱིས་མངོན་དུ་འཐོར་བར་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་ལྔ་པའི་སྔ་ལྟས་ནི་རྒྱན་ཐམས་ཅད་ཀྱིས་བརྒྱན་པའི་བུད་མེད་ཀྱིས་མགོ་ལ་མེ་ཏོག་ཙམ་པ་ཀའི་ཕྲེང་བ་འདོགས་པར་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དྲུག་པའི་སྔ་ལྟས་ནི་རྫིང་ཐེམ་སྐས་བཞི་དང་ལྡན་པ། གསེར་གྱི་བྱེ་མ་བདལ་བ། རྙོག་པ་མེད་ཞིང་དྭང་ལ་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། མེ་ཏོག་ཨུཏྤ་ལ་དང ། ཀུ་མུ་ད་དང ། པདྨ་དཀར་པོས་བརྒྱན་པའི་ཆུ་མཐོང་སྟེ་དེ་ལ་བདག་ཉིད་རྩེ་དགའ་ཞིང་ཡོངས་སུ་སྤྱོད་པར་མཐོང་ངོ ། །རིགས་
282a
༄#། །ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བདུན་པའི་སྔ་ལྟས་ནི་ཕྱོགས་གཡས་གཡོན་གཉིས་ན་སེམས་ཅན་དམྱལ་བའི་གཡང་ས་མཐོང་སྟེ་དེ་ནས་བདག་ཉིད་མ་རྨས་མཉམས་པར་སླར་ལྡོག་པ་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བརྒྱད་པའི་སྔ་ལྟས་ནི་ཕྲག་པ་གཉིས་ན་རི་དྭགས་ཀྱི་རྒྱལ་པོ་སེངྒེ་རལ་པ་ཅན་ཅོད་པན་ཐོགས་པ་གཅན་གཟན་ཕྲ་མོ་ཐམས་ཅད་སྐྲག་པར་བྱེད་ཅིང་འདུག་པར་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དགུ་པའི་སྔ་ལྟས་ནི་འཁོར་ལོས་བསྒྱུར་བའི་རྒྱལ་པོར་མཐོང་སྟེ་སྐྱེ་བོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ལ་མགོ་བོའི་སྟེང་ན་རིན་པོ་ཆེ་སྣ་ཚོགས་ཀྱིས་སྤྲས་པའི་གདུགས་དཀར་པོ་འཛིན་པ་མཐོང་ངོ ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བཅུ་པའི་སྔ་ལྟས་ནི། དེ་བཞིན་གཤེགས་པའི་སྐུ་མཐོང་སྟེ་ཁ་དོག་གསེར་ལྟ་བུའི་འོད་འདོམ་གང་བ། ཚངས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་པར་མཐོང་སྟེ། རིགས་ཀྱི་བུ།
282b
བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ས་བཅུ་པོའི་སྔ་ལྟས་ཡིན་ནོ། །དེ་ལ་རིགས་ཀྱི་བུ། ཅིའི་ཕྱིར་ས་དང་པོ་ལ་རབ་ཏུ་དགའ་བ་ཞེས་བྱ་ཞེ་ན། དེ་ནི་ཐོག་མར་འཇིག་རྟེན་ལས་འདས་པའི་སེམས་སྔོན་མ་ཐོབ་པ་དེ་མངོན་དུ་གྱུར་ཏེ་དོན་ཆེན་པོའི་བསམ་པ་ཕུན་སུམ་ཚོགས་པའི་ཕྱིར་རབ་ཏུ་དགའ་བ་ཆེན་པོ་སྐྱེ་བས་ས་དང་པོ་ལ་རབ་ཏུ་དགའ་བ་ཞེས་བྱའོ། །ལྟུང་བ་ཕྲ་མོའི་དྲི་མ་དང ། ཚུལ་ཁྲིམས་ཀྱི་ཉེས་པ་ཐམས་ཅད་རྣམ་པར་དག་པའི་ཕྱིར་ས་གཉིས་པ་ནི་དྲི་མ་མེད་པ་ཞེས་བྱའོ། །ཚད་མེད་པའི་ཡེ་ཤེས་དང ། ཏིང་ངེ་འཛིན་གྱི་འོད་སྣང་བ་དེ་བསྐྱོད་པར་མི་ནུས་ཤིང་གང་གིས་ཀྱང་ཟིལ་གྱིས་མི་གནོན་པ་དང ། ཐོས་པ་འཛིན་པའི་གཟུངས་ལ་གནས་པའི་ཕྱིར་ས་གསུམ་པ་ནི་འོད་བྱེད་པ་ཞེས་བྱའོ། །ཤེས་རབ་ཀྱི་མེས་ཉོན་མོངས་པ་ཐམས་ཅད་སྲེག་ཅིང་བྱང་ཆུབ་ཀྱི་ཕྱོགས་ཀྱི་ཆོས་བསྒོམས་པའི་མེའི་འོད་འཕྲོ་བ་ཆེར་གྱུར་པས་ས་བཞི་པ་ནི་འོད་འཕྲོ་བ་ཞེས་བྱའོ། །དེ་བསྒོམ་པའི་ཐབས་དང ། མཆོག་གི་ཡེ་ཤེས་ལ་དབང་བསྒྱུར་བར་དཀའ་བ་དང ། མཐོང་བ་དང ། བསྒོམས་པས་སྤངས་པའི་ཉོན་མོངས་པ་ཐུལ་བར་དཀའ་བ་ཐུལ་བའི་ཕྱིར་ས་ལྔ་པ་ཤིན་ཏུ་སྦྱང་བར་དཀའ་བ་ཞེས་བྱའོ། །འདུ་བྱེད་ཀྱི་ཆོས་བར་ཆད་མེད་པ་མངོན་དུ་
283a
༄#། །གྱུར་ཏེ་མཚན་མ་མེད་པ་ཡིད་ལ་བྱེད་པ་ཐམས་ཅད་མངོན་དུ་བྱེད་པས་ས་དྲུག་པ་ལ་མངོན་སུམ་པ་ཞེས་བྱའོ། །ཟག་པ་མེད་པའི་ཆོས་རྣམས་ལ་བར་ཆད་མེད་ཅིང་མཚན་མ་མེད་པ་ཡིད་ལ་བྱེད་པས་རྣམ་པར་གྲོལ་བའི་ཏིང་ངེ་འཛིན་ལ་རྒྱུན་རིང་དུ་བསྒོམས་པས་ས་དེ་རྣམ་པར་དག་ཅིང་ཐོགས་པ་མེད་པའི་ཕྱིར་ས་བདུན་པ་ནི་རིང་དུ་སོང་བ་ཞེས་བྱ་འོ། །མཚན་མ་མེད་པའི་ཡིད་ལ་བྱེད་པ་བསྒོམས་པ་ལ་དབང་ཐོབ་སྟེ་ཉོན་མོངས་པ་རྣམས་ཀྱིས་གཡོ་བར་མི་ནུས་པས་ན་ས་བརྒྱད་པ་ནི་གཡོ་བ་ཞེས་བྱའོ། ། རྣམ་པ་ཐམས་ཅད་དུ་ཆོས་སྟོན་པ་ལ་དབང་དུ་གྱུར་པས་ཁ་ན་མ་ཐོ་བ་མེད་ཅིང་བློ་གྲོས་ཤིན་ཏུ་ཡངས་པ་ཐོགས་པ་མེད་པ་ཐོབ་པའི་ཕྱིར་ས་དགུ་པ་ནི་ལེགས་པའི་བློ་གྲོས་ཞེས་བྱའོ། །ཆོས་ཀྱི་སྐུ་ནམ་མཁའ་ལྟ་བུ་ལ་ཡེ་ཤེས་ཆེན་པོའི་སྤྲིན་ལྟ་བུས་ཁྱབ་པར་འགེབས་པའི་ཕྱིར་ས་བཅུ་བ་ནི་ཆོས་ཀྱི་སྤྲིན་ཅེས་བྱའོ། །དེ་ལ་རིགས་ཀྱི་བུ། །ཆོས་དང།་གང་ཟག་ལ་མཚན་མ་ཅན་དུ་མངོན་པར་ཞེན་པའི་རྨོངས་པ་དང ། འཁོར་བ་དང ། ངན་སོང་གི་ཉོན་མོངས་པས་འཇིགས་པའི་རྨོངས་པ་དང ། རྨོངས་པ་འདི་གཉིས་ཀྱིས་ས་དང་པོ་ལ་སྒྲིབ་པོ། །ལྟུང་བ་ཕྲ་མོའི་འཁྲུལ་པ་ལ་རྨོངས་པ་དང ། ལས་དང ། སྤྱོད་པ་སྣ་ཚོགས་མངོན་པར་སྐྱེད་པའི་རྨོངས་པ་དང ། རྨོངས་པ་འདི་གཉིས་
283b
ཀྱིས་ས་གཉིས་པ་ལ་སྒྲིབ་བོ། །མ་ཐོབ་པ་ཐོབ་པར་འདོད་པའི་རྨོངས་པ་དང ། གཟུངས་དམ་པའི་མཆོག་ཐོབ་པ་ལ་རྨོངས་པ་དང ། རྨོངས་པ་འདི་གཉིས་ཀྱིས་ས་གསུམ་པ་ལ་སྒྲིབ་བོ། །མཉམ་པར་གཞག་པའི་རོའི་དགའ་བ་ལ་སྲེད་པའི་རྨོངས་པ་དང ། ཆོས་རྣམ་པར་དག་པ་ལ་སྲེད་པའི་རྨོངས་པ་དང ། རྨོངས་པ་འདི་གཉིས་ཀྱིས་ས་བཞི་པ་ལ་སྒྲིབ་བོ། །འཁོར་བ་ལ་ཤིན་ཏུ་སྐྱོ་བའི་རྨོངས་པ་དང ། མྱ་ངན་ལས་འདས་པ་ལ་མངོན་པར་གཞོལ་བའི་རྨོངས་པ་དང ། རྨོངས་པ་འདི་གཉིས་ཀྱིས་ས་ལྔ་པ་ལ་སྒྲིབ་བོ། །འདུ་བྱེད་ཀྱི་རྒྱུ་བ་མངོན་དུ་གྱུར་པའི་རྨོངས་པ་དང ། མཚན་མ་སྦོམ་པོ་མངོན་དུ་གྱུར་པའི་རྨོངས་པ་དང ། རྨོངས་པ་འདི་གཉིས་ཀྱིས་ས་དྲུག་པ་ལ་སྒྲིབ་བོ། །མཚན་མ་ཕྲ་མོ་མངོན་དུ་གྱུར་པའི་རྨོངས་པ་དང ། མཚན་མ་མེད་པའི་ཡིད་ལ་བྱེད་པའི་རྨོངས་པ་དང ། རྨོངས་པ་འདི་གཉིས་ཀྱིས་ས་བདུན་པ་ལ་སྒྲིབ་བོ། །མཚན་མ་མེད་པ་ལ་ཆེད་དུ་རྩོལ་བའི་རྨོངས་པ་དང།་མཚན་མར་འཛིན་པ་ལ་དབང་ཐོབ་པའི་རྨོངས་པ་དང ། རྨོངས་པ་འདི་གཉིས་ཀྱིས་ས་བརྒྱད་པ་ལ་སྒྲིབ་བོ། །གང་ཆོས་སྟོན་པ་ཚད་མེད་པ་དང ། ཚིག་དང ། ཡི་གེ་ཚད་མེད་པ་ལ་མཁས་པར་མ་གྱུར་པའི་རྨོངས་པ་དང ། སྤོབས་པ་ལ་དབང་མ་ཐོབ་པའི་རྨོངས་པ་དང ། རྨོངས་པ་འདི་གཉིས་ཀྱིས་ས་དགུ་པ་ལ་སྒྲིབ་བོ། །མངོན་པར་
284a
༄#། །ཤེས་པ་ཆེན་པོ་ལ་དབང་སྒྱུར་བ་མ་ཐོབ་པའི་རྨོངས་པ་དང ། དོན་དང ། ལས་གསང་བ་ཕྲ་མོ་ལ་མཁས་པར་མ་གྱུར་པའི་རྨོངས་པ་དང ། རྨོངས་པ་འདི་གཉིས་ཀྱིས་ས་བཅུ་པ་ལ་སྒྲིབ་བོ། །སྤྱོད་ཡུལ་ཤིན་ཏུ་ཕྲ་བ་ཐམས་ཅད་ལ་ཤེས་བྱའི་སྒྲིབ་པའི་རྨོངས་པ་དང ། ཉོན་མོངས་པ་ཤིན་ཏུ་ཕྲ་བའི་གནས་ངན་ལེན་ལ་རྨོངས་པ་དང ། རྨོངས་པ་འདི་གཉིས་ཀྱིས་སངས་རྒྱས་ཀྱི་ས་ལ་སྒྲིབ་བོ། །རིགས་ཀྱི་བུ། དེ་ལ་བྱང་ཆུབ་སེམས་དཔའི་ས་དང་པོ་ལ་གནས་པའི་བྱང་ཆུབ་སེམས་དཔའ་ནི་སྦྱིན་པའི་ཕ་རོལ་ཏུ་ཕྱིན་པ་གནོན་ཏོ། །བྱང་ཆུབ་སེམས་དཔའི་ས་གཉིས་པ་ལ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གནོན་ཏོ། །ས་གསུམ་པ་ལ་ནི་བཟོད་པའི་ཕ་རོལ་ཏུ་ཕྱིན་པ་གནོན་ཏོ། །ས་བཞི་པ་ལ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གནོན་ཏོ། །ས་ལྔ་པ་ལ་ནི་བསམ་གཏན་གྱི་ཕ་རོལ་ཏུ་ཕྱིན་པ་གནོན་ཏོ། །ས་དྲུག་པ་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་གནོན་ཏོ། །ས་བདུན་པ་ལ་ནི་ཐབས་མཁས་པའི་ཕ་རོལ་ཕྱིན་པ་གནོན་ཏོ། །ས་བརྒྱད་པ་ལ་ནི་སྨོན་ལམ་གྱི་ཕ་རོལ་ཏུ་ཕྱིན་པ་གནོན་ཏོ། །ས་དགུ་པ་ལ་ནི་སྟོབས་ཀྱི་ཕ་རོལ་ཏུ་ཕྱིན་པ་གནོན་ཏོ། །ས་བཅུ་པ་ལ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་གནོན་ཏོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་
284b
བསྐྱེད་པ་དང་པོ་ནི་རིན་པོ་ཆེ་ཡང་དག་པར་འཕགས་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་གཉིས་པ་ནི་གནས་པ་མེད་པའི་ཏིང་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་གསུམ་པ་ནི་རབ་ཏུ་མི་གཡོ་བའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བཞི་པ་ནི་ཕྱིར་མི་ལྡོག་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་ལྔ་པ་ནི་རིན་པོ་ཆེའི་མེ་ཏོག་གི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་དྲུག་པ་ནི་ཉི་མའི་འོད་ཀྱི་གཟི་བརྗིད་ཀྱི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བདུན་པ་ནི་དོན་ཐམས་ཅད་གྲུབ་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བརྒྱད་པ་ནི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་དགུ་པ་ནི་ཡེ་ཤེས་སྒྲོན་མའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བཅུ་པ་ནི་དཔའ་བར་འགྲོ་བའི་ཏིང་ངེ་འཛིན་གྱིས་ཡོངས་སུ་བཟུང་ནས་སྐྱེ་སྟེ། རིགས་ཀྱི་བུ། འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སེམས་བསྐྱེད་པ་བཅུ་པའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དང་པོ་ལས་ཁྱད་
285a
༄#། །པར་གྱི་བྱིན་གྱིས་བརླབས་པ་ཞེས་བྱ་བའི་ ་འདི་སྐྱེ་སྟེ་གཟུངས་ལ། ཏདྱ་ཐཱ། པཱུརྞ་མ་ནོར་ཐེ། དུ་ཧུ་དུ་ཧུ་དུ་ཧུ། ཡཱ་བཏ་སཱུརྱ། ཨ་བ་བྷཱ་ས་ཏཱ། ཡཱ་པད་ཙནྡྲ་དཽ་དཏྟེ། དཱ་པ་ད་ར་ཀཱ་མཱན་\?\། དཎྜ་པ་རི་ཧཱ་རམ་ཀུ་རུ་སཝཱཧཱ། རིགས་ཀྱི་བུ། གཟུངས་འདི་ནི་གང་གཱའི་ཀླུང་གཅིག་གིས་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་དང་པོའི་བྱང་ཆུབ་སེམས་དཔའ་སྲུང་བའི་ཕྱིར་གསུངས་ཏེ། སུ་ཞིག་གཟུངས་སྔགས་འདི་འདོན་ཅིང་འཛིན་ན་འཇིགས་པ་ཐམས་ཅད་ལས་གྲོལ་བར་འགྱུར་བ་ནི། འདི་ལྟ་སྟེ། སྟག་དང ། སེང་གེ་ལ་སོགས་པ་གཅན་གཟན་མ་རུངས་པའི་རིགས་དང ། ཡི་དྭགས་ཐམས་ཅད་དང ། མི་དང ། མི་མ་ཡིན་པ་ལ་སོགས་ཏེ་དགྲ་དང ། རྐུན་པོ་དང ། གཟའ་དང ། ཉོན་མོངས་པ་རྣམས་དང ། སྒྲིབ་པ་རྣམ་པ་ལྔ་ལས་རྣམ་པར་གྲོལ་ཏེ་ས་དང་པོ་རྗེས་སུ་དྲན་པར་འགྱུར་རོ། །རིགས་ཀྱི་བུ།་བྱང་ཆུབ་སེམས་དཔའ་སེམས་དཔའ་ཆེན་པོ་ས་གཉིས་པ་ལ་གཞན་གྱིས་མི་ཐུབ་པ་ཞེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། ཨུཏྟོ་ལི། ཙི་རི་ཙི་རི། ཨུཏྟོ་རཱ། ཏོ་ར་ཎཾ། ཤནྟོ། ཤནྟོ། ཨཏྟོ་ལི། ཧུ་ལུ་ཧུ་ལུ་སཝཱ་ཧཱ། རིགས་ཀྱི་བུ། གཟུངས་འདི་ནི་གང་གཱའི་ཀླུང་གཉིས་ཀྱི་བྱེ་མ་སྙེད་ལས་འདས་པའི་སངས་རྒྱས་བཅོམ་
285b
ལྡན་འདས་རྣམས་ཀྱིས་ས་གཉིས་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་སོ། །གང་ལ་ལ་ཞིག་གཟུངས་སྔགས་འདི་ཀློག་ཅིང་འཛིན་ན་འཇིགས་པ་ཐམས་ཅད་ལས་རྣམ་པར་གྲོལ་ཏེ་དེ་གཅན་གཟན་མ་རུངས་པ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་ལ་སོགས་པས་གཙེ་བ་དང ། ཕ་རོལ་གྱི་དགྲ་དང ། གཟའ་དང།་ཉོན་མོངས་པ་དང ། སྡུག་བསྔལ་པ་དང ། སྒྲིབ་པ་རྣམ་པ་ལྔ་ལས་རྣམ་པར་གྲོལ་ཏེ་ས་གཉིས་པ་རྗེས་སུ་དྲན་པར་འགྱུར་རོ། །རིགས་ཀྱི་བུ། ས་གསུམ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་རབ་ཏུ་གནས་པ་ཞེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། དཎྛི་ཀེ་།བཎྛི་ཀེ་།ཀ་ར་ཋི། ཀཽར་ཋི། ཀཻ་ཡཱུ་རེ་དནྟི་ལི་སཝཱཧཱ། །རིགས་ཀྱི་བུ། གཟུངས་འདི་ནི་གང་གཱའི་ཀླུང་གསུམ་གྱི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་གསུམ་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་ཏེ་སུ་གཟུངས་སྔགས་འདི་འཆང་བ་དང ། འདོན་པ་དེ་འཇིགས་པ་ཐམས་ཅད་དང ། གཅན་གཟན་མ་རུངས་པ་དང ། གདོན་མ་རུངས་པ་དང ། མི་དང ། མི་མ་ཡིན་པ་ལ་སོགས་པས་གཙེ་བ་དང ། གཟའ་དང ། ཕ་རོལ་གྱི་དགྲ་དང ། སྡུག་བསྔལ་རྣམ་པ་སྣ་ཚོགས་དང ། སྒྲིབ་པ་རྣམ་པ་ལྔ་ལས་རྣམ་པར་གྲོལ་ཏེ་ས་གསུམ་པ་རྗེས་སུ་དྲན་
286a
༄#། །པར་འགྱུར་རོ། །རིགས་ཀྱི་བུ། ས་བཞི་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་གདུལ་དཀའ་བ་ཞེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། ཤི་རི་ཤི་རི། དི་མི་དི་མི་ནི། ད་རི་ད་རི་ཎི། ཤི་རི་ཤི་རི་ཎི། བི་ཤཱ་ལཱ། བི་ཤཱ་ལ། པ་ཤ་པ་ཤ་ནི། བནྡྷ་ནི་ཡེ་སཝཧཱ། །རིགས་ཀྱི་བུ། གཟུངས་འདི་ནི་གང་གཱའི་ཀླུང་བཞིའི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་\?\་བཞི་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་ཏེ་སུས་གཟུངས་སྔགས་འདི་འདོན་པ་དང ། འཆང་བ་དེ་འཇིགས་པ་ཐམས་ཅད་དང ། གཅན་གཟན་ཁྲོ་བོ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་ལ་སོགས་ཏེ་ཕ་རོལ་གྱི་དགྲ་དང ། སྡུག་བསྔལ་མང་པོས་གཙེ་བ་དང ། གཟའ་དང ། སྒྲིབ་པ་རྣམ་པ་ལྔ་ལས་ཀྱང་རྣམ་པར་གྲོལ་ཏེ་ས་བཞི་པ་ལ་རྗེས་སུ་དྲན་པར་འགྱུར་རོ། །རིགས་ཀྱི་བུ། ས་ལྔ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཡོན་ཏན་སྣ་ཚོགས་ཀྱིས་བཀོད་པ་ཅེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། ཧ་རི་ཧ་རི་ཎི། ཙི་རི་ཙི་རི་ཎི། ཀ་རི་མཱ་ཎི། སང་ཀ་རི་མཱ་ཎི། སམ་བྷ་ས་ནི། ཛམ་བྷ་ནི། སྟམ་བྷ་ནི། མོ་ཧ་ནི། སཝ་ཡམྡུཀྐེ་སཝཱཧཱ། རིགས་ཀྱི་བུ། གཟུངས་འདི་ནི་གང་གཱའི་
286b
ཀླུང་ལྔའི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་ལྔ་པ་ལ་གནས་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་ཏེ་སུས་གཟུངས་སྔགས་འདི་འདོན་ཅིང་འཆང་ན་འཇིགས་པ་ཐམས་ཅད་དང ། གཅན་གཟན་ཁྲོ་བོ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་ལ་སོགས་ཏེ་ཕ་རོལ་པོའི་དགྲ་དང ། སྡུག་བསྔལ་རྣམ་པ་སྣ་ཚོགས་ཀྱིས་གཙེ་བ་དང ། གཟའ་དང ། སྒྲིབ་པ་རྣམ་པ་ལྔ་ལས་རྣམ་པར་གྲོལ་ཏེ་ས་ལྔ་པ་རྗེས་སུ་དྲན་པར་འགྱུར་རོ། །རིགས་ཀྱི་བུ། ས་དྲུག་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཡེ་ཤེས་ཀྱི་དཀྱིལ་འཁོར་སྒྲོན་མ་ཞེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། བི་ཏོ་རི་བི་ཏོ་རི། མ་རི་ཎི། ཀི་ལི་ཀི་ལི།་བིདྷོ་ཧ་ན་ཏི། ལུ་ལུ་ལུ་ལུ། ཙུ་ལུ་ཙུ་ལུ། ཏོ་ལུ་བ་ཏོ་ལུ་བ། ཤ་ཤ། ཤཙྪ། པ་རི་ཤ་སཝ་སྟི། སརྦ་སཏྭ་ནཱ་ན། སིད་དྷྱ་ན་ཏུ་མཱ་མ། མནྡྲ་པ་དཱ་ནི་སཝཱ་ཧཱ། རིགས་ཀྱི་བུ། གཟུངས་འདི་ནི་གང་གཱའི་ཀླུང་དྲུག་གི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་དྲུག་པ་ལ་གནས་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་ཏེ་སུས་གཟུངས་སྔགས་འདི་འདོན་ཅིང་འཆང་ན་འཇིགས་པ་ཐམས་ཅད་དང ། གཅན་གཟན་ཁྲོ་བོ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་ལ་
287a
༄#། །སོགས་ཏེ་ཕ་རོལ་གྱི་དགྲ་དང ། སྡུག་བསྔལ་རྣམ་པ་སྣ་ཚོགས་ཀྱིས་གཙེ་བ་དང ། གཟའ་དང ། སྒྲིབ་པ་རྣམ་པ་ལྔ་ལས་ཀྱང་རྣམ་པར་གྲོལ་ཏེ་ས་དྲུག་པ་རྗེས་སུ་དྲན་པར་འགྱུར་རོ། །རིགས་ཀྱི་བུ། ས་བདུན་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཁྱད་པར་དུ་འཕགས་པ་ཞེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། ཛ་ཧ་ཛ་ཧ་རུ། ཛ་ཧ་ཛ་ཧ་ཛ་ཧ་རུ། བཻ་ལུ་ཀེ་།བཻ་ལུ་ལེ། ཨ་མྲི་ཏ་གྷ་ཎེ། པ་རུ་ཤ་ཎེ། བཻ་རུ་ཏི་ཀེ་།བ་རུ་བཏྟེ། བི་དྷི་ཧེ་ཀེ ། བིནད་བི་ལི་ནི། ཨ་མྲྀ་ལུ་ཏི་ཀཻ་བྷཻ་ཛུ་ཡུ། བྷཻ་ཛུ་ཡུ་སཝཱཧཱ། རིགས་ཀྱི་བུ། གཟུངས་འདི་ནི་གང་གཱའི་ཀླུང་བདུན་གྱི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་བདུན་པ་ལ་གནས་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་ཏེ་སུས་གཟུངས་སྔགས་འདི་འདོན་ཅིང་འཆང་ན་འཇིགས་པ་ཐམས་ཅད་དང ། གཅན་གཟན་ཁྲོ་བོ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་ལ་སོགས་ཏེ་ཕ་རོལ་གྱི་དགྲ་དང ། སྡུག་བསྔལ་རྣམ་པ་སྣ་ཚོགས་ཀྱིས་གཙེ་བ་དང ། གཟའ་དང།་སྒྲིབ་པ་རྣམ་པ་ལྔ་ལས་ཀྱང་རྣམ་པར་གྲོལ་ཏེ་ས་བདུན་པ་རྗེས་སུ་དྲན་པར་འགྱུར་རོ། །རིགས་ཀྱི་བུ། ས་བརྒྱད་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་
287b
ཆེན་པོ་ལ་རྙོག་པ་མེད་པའི་རྟོག་པ་ཞེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། ཤི་རི་ཤི་རི། ཤི་རི་ཎི། མི་ཏེ་མི་ཏེ། ཀ་རེ་ཀ་རེ། ཧེ་རུ་ཧེ་རུ། ཙུ་རུ་ཙུ་རུ། བན་དྷ་ནི་སཝཱཧཱ། རིགས་ཀྱི་བུ། གཟུངས་འདི་ནི་གང་གཱའི་ཀླུང་བརྒྱད་ཀྱི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་བརྒྱད་པ་ལ་གནས་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་ཏེ་སུས་གཟུངས་སྔགས་འདི་འདོན་ཅིང་འཆང་ན་འཇིགས་པ་ཐམས་ཅད་དང ། གཅན་གཟན་ཁྲོ་བོ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་ལས་སོགས་པ་སྟེ་ཕ་རོལ་གྱི་དགྲ་དང ། སྡུག་བསྔལ་རྣམ་པ་སྣ་ཚོགས་ཀྱིས་གཙེ་པ་དང ། གཟའ་དང ། སྒྲིབ་པ་རྣམ་པ་ལྔ་ལས་ཀྱང་རྣམ་པར་གྲོལ་ཏེ་ས་བརྒྱད་པ་རྗེས་སུ་དྲན་པར་འགྱུར་རོ། །རིགས་ཀྱི་བུ།་ས་དགུ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་སྒོ་མཐའ་ཡས་པའི་རྒྱུན་ཞེས་བྱ་བའི་གཟུངས་འདི་སྐྱེའོ། །གཟུངས་ལ། ཏདྱ་ཐཱ། ཧ་རི་ཙཎྜ་ལི་ཀེ། ། ཀུ་ལ་མཱ་བྷ་ཏེ། ཏོ་ར་ཤི་པ་ཏ་པ་ཏ་སི། ཤི་རི་ཤི་རི། ག་ཤི་རི། ག་བི་ཤི་རི། སཝསྟི་སརྦ་སཏྭ་ནན་སཝཱཧཱ། རིགས་ཀྱི་བུ། གཟུངས་འདི་ནི་གང་གཱའི་ཀླུང་དགུའི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་དགུ་པ་ལ་གནས་པའི་བྱང་ཆུབ་སེམས་དཔའ་བསྲུང་བའི་ཕྱིར་གསུངས་ཏེ་སུས་གཟུངས་སྔགས་འདི་འདོན་ཅིང་འཆང་ན་འཇིགས་
288a
༄#། །པ་ཐམས་ཅད་དང ། གཅན་གཟན་ཁྲོ་བོ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་ལས་སོགས་ཏེ་ཕ་རོལ་གྱི་དགྲ་དང ། སྡུག་བསྔལ་རྣམ་པ་སྣ་ཚོགས་ཀྱིས་གཙེ་བ་དང ། གཟའ་དང ། སྒྲིབ་པ་རྣམ་པ་ལྔ་ལས་ཀྱང་རྣམ་པར་གྲོལ་ཏེ་ས་དགུ་པ་རྗེས་སུ་དྲན་པར་འགྱུར་རོ། །རིགས་ཀྱི་བུ། ས་བཅུ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཟད་མི་ཤེས་པའི་ཟ་མ་ཏོག་ཅེས་བྱ་བའི་གཟུངས་འདི་སྐྱེ་སྟེ། གཟུངས་ལ། ཏ་དྱ་ཐཱ། སིདྡྷི་སུ་སིདྡྷི། མོ་ཅ་\?\་ནི། མོཀྵ་ནི། བི་མུཀྟེ། ཨ་མ་ལེ། བི་མ་ལེ། ད་མ་ལེ། མཱངྒ་ལེ། ཧི་ར་ཎྱ་གརྦྷེ། རཏྣ་གརྦྷེ། ས་མནྟ་བྷ་དྲེ། སརྦ་ཨརྠཱ། ས་དྷ་ནི། མ་ན་སི། མཧཱ་མ་ན་སི། ཨངྦྷུ་ཏེ། ཨ་ཏྱདྦྷུ་ཏེ། ཨ་ར་ཛེ། བི་ར་ཛེ། ཨ་ཙྱུ་ཏེ། ཨ་མྲྀ་ཏེ། ཨ་ར་ཛེ། བི་ར་ཛེ། བྲཧྨེ་བྲཧྨ། སཱ་རེ་པཱུ་ར་ཎི་པཱུ་ར་ཎ། མ་ནོ་ར་ཐེ་སཝཱཧཱ། རིགས་ཀྱི་བུ། གཟུངས་འདི་ནི་བཀྲ་ཤིས་པ་དང ། སྤྱི་བོ་ནས་དབང་བསྐུར་བ་སྟེ་གངྒཱའི་ཀླུང་བཅུའི་བྱེ་མ་སྙེད་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ས་བཅུ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བསྲུང་བའི་ཕྱིར་གསུངས་ཏེ་སུས་གཟུངས་སྔགས་འདི་འདོན་ཅིང་འཆང་ན་འཇིགས་པ་ཐམས་ཅད་དང ། གཅན་གཟན་ཁྲོ་བོ་དང ། ཡི་དྭགས་མ་རུངས་པ་དང ། མི་དང ། མི་མ་ཡིན་པ་
288b
ལས་སོགས་ཏེ་ཕ་རོལ་གྱི་དགྲ་དང ། སྡུག་བསྔལ་རྣམ་པ་སྣ་ཚོགས་ཀྱིས་གཙེ་པ་དང ། གཟའ་དང ། གདུག་པ་ཅན་ཐམས་ཅད་དང ། སྒྲིབ་པ་རྣམ་པ་ལྔ་ལ་སོགས་པ་ལས་རྣམ་པར་གྲོལ་ཏེ་ས་བཅུ་པ་རྗེས་སུ་དྲན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེངྒེའི་ཏོག་གི་འོད་ཟེར་སྣང་བ་ཐོགས་པ་མེད་པ་ཞེས་བྱ་བས་བཅོམ་ལྡན་འདས་ཀྱིས་གཟུངས་འདི་དག་བཤད་པ་ཐོས་ནས་སྟན་ལས་ལངས་ཏེ་བླ་གོས་པྲག་\?\་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་ཞབས་ལ་ཕྱག་བཙལ་ཏེ་ཚིགས་སུ་བཅད་པ་འདིས་བསྟོད་དོ། །ཟབ་མོ་མཚན་ཉིད་མེད་ཆོས་ལ། །སྐྱེ་བོ་ཤེས་པ་ཉམས་པ་རྣམས། །བཅོམ་ལྡན་ཉག་གཅིག་སྒྲོལ་མཛད་པས། ། དཔེ་མེད་ཁྱོད་ལ་ཕྱག་འཚལ་ལོ། །དེ་བཞིན་གཤེགས་པའི་ཤེས་རབ་སྤྱན། །ཆོས་ཀྱི་མཚན་ཉིད་གཅིག་མི་གཟིགས། །ཡང་དག་ཆོས་ཀྱི་སྤྱན་གྱིས་ནི། །ཀུན་ཏུ་གསལ་བ་བསམ་མི་ཁྱབ། །ཆོས་འགའང་སྐྱེ་བ་མེད་པ་སྟེ། །འགོག་པར་ཡང་ནི་མི་འགྱུར་རོ། །དེ་ལྟར་མཉམ་པར་གཟིགས་པ་ན། །བླ་མེད་གནས་སུ་བཞུགས་པར་གྱུར། །འཁོར་བ་དག་ཀྱང་མི་འཇིག་ལ། །མྱ་ངན་འདས་ལའང་མི་བཞུགས་ཤིང ། །མཐའ་གཉིས་ལ་ནི་མི་གནས་ཏེ། །དེ་ཕྱིར་མྱ་ངན་ལས་འདའ་བ་བརྙེས། །དག་དང་མ་དག་ཕྱོགས་ལ་ཡང ། །རྣམ་
289a
༄#། །པར་དབྱེ་བ་མེད་པའི་ཕྱིར། །བཅོམ་ལྡན་རོ་གཅིག་མཁྱེན་པས་ན། །རྣམ་དག་པ་ཡི་མཚོག་བརྙེས་སོ། །བཅོམ་ལྡན་འདས་ཀྱི་ཚད་མེད་སྐུས། །ཚིག་གཅིག་སྟོན་པ་མེད་པར་ཡང ། །འཁོར་མང་འདི་དག་ཐམས་ཅད་ལ། །ཆོས་ཀྱི་ཆར་གྱིས་ཚིམ་པར་མཛད། །སེམས་ཅན་འདི་དག་ཐམས་ཅད་ཀྱི། །མཚན་ཉིད་རྣམ་པར་གཟིགས་མེད་ཀྱང ། །ཉོན་མོངས་སྡུག་བསྔལ་ཐམས་ཅད་ལས། །བཅོམ་ལྡན་རྟག་ཏུ་སྐྱོབ་པར་མཛད། །བདེ་དང་སྡུག་བསྔལ་རྟག་མི་རྟག་།བདག་དང་བདག་མེད་ལ་སོགས་དང ། །གཅིག་དང་ཐ་དད་མ་ཡིན་དང ། ། སྐྱེ་བ་མེད་དང་འགོག་མེད་པའི། །དེ་འདྲའི་དོན་གྱི་རྣམ་པ་ལ། །རྣམ་པར་དབྱེ་ཞིང་སྟོན་པར་མཛད། །དཔེར་ན་བྲག་ཆ་སྟོང་པར་ནི། །དེ་དོན་སངས་རྒྱས་རྣམས་ཀྱིས་མཁྱེན། ། ཆོས་ཀྱི་དབྱིངས་ནི་དབྱེར་མེད་པས། །ཐེག་པ་མི་མཐུན་གཞན་མེད་དེ། །སེམས་ཅན་རྣམས་ནི་བསྒྲལ་བའི་ཕྱིར། །གསུམ་དུ་རྣམ་པར་དབྱེ་བ་མཛད། །དེ་ནས་ཚངས་པའི་རྒྱལ་པོ་དབང་ཕྱུག་ཆེན་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གསེར་འོད་དམ་པ་མདོ་སྡེའི་རྒྱལ་པོ་འདི་ཤིན་ཏུ་དཀོན་ཞིང་དཔག་པར་དཀའ་བ་ཐོག་མར་
289b
ཡང་དགེ་བ། བར་དུའང་དགེ་བ། ཐ་མར་ཡང་དགེ་བ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། སངས་རྒྱས་ཀྱི་ཆོས་ཐམས་ཅད་ཕུན་སུམ་ཚོགས་པར་མཛད་པ་འདི་གང་ཞིག་འཆང་བ་དང ། འཛིན་པ་དེ་སངས་རྒྱས་བཅོམ་ལྡན་འདས་རྣམས་ཀྱིས་མཛད་པ་གཟོ་བ་ལགས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཇི་སྐད་སྨྲས་པ་དེ་བཞིན་ཏེ། རིགས་ཀྱི་བུ། གང་མདོ་འདི་ཉན་པར་བྱེད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ། འདིས་ནི་ས་ལས་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་མཆོག་ཏུ་སྨིན་པ་བྱེད་པ་དང ། ཆོས་ཀྱི་ཕྱག་རྒྱ་དམ་པ་ཡིན་པ་དང ། མདོ་སྡེ་ཀུན་གྱི་རྒྱལ་པོར་གྱུར་པ་སྟེ་དེའི་ཕྱིར་མཉན་པ་དང ། གཟུང་བ་དང ། བཀླག་པ་དང ། གདོན་པར་བྱའོ། །དེའང་རིགས་ཀྱི་བུ། དགེ་བའི་རྩ་བ་མ་བསྐྱེད་པ་དང ། དགེ་བའི་རྩ་བ་ཡོངས་སུ་མ་སྨིན་པ་དང ། སངས་རྒྱས་མང་པོ་ལ་བསྙེན་བཀུར་མ་བྱས་པའི་སེམས་ཅན་དེ་དག་གིས་ནི་དམ་པའི་ཆོས་འདི་མཉན་པར་མི་ནུས་སོ། །རིགས་ཀྱི་བུ། ཆོས་ཀྱི་རྣམ་གྲངས་འདི་ཐོས་པ་ཙམ་གྱིས་རིགས་ཀྱི་བུ་འམ། རིགས་ཀྱི་བུ་མོ་དག་ལྷག་པའི་བསམ་པ་ཡོངས་སུ་དག་ཅིང་
290a
༄#། །སངས་རྒྱས་མཐོང་བ་དང་མི་འབྲལ་བར་འགྱུར་རོ། །དམ་པའི་ཆོས་མཉན་པ་དང་མི་འབྲལ་བར་འགྱུར་རོ། །དགེ་འདུན་ལ་བསྙེན་བཀུར་བྱེད་པ་དང་མི་འབྲལ་བར་འགྱུར་རོ། །རྒྱ་མཚོའི་ཕྱག་རྒྱ་མི་ཟད་པ་མངོན་པར་བསྒྲུབ་པའི་གཟུངས་དང་མི་འབྲལ་བར་འགྱུར། སེམས་ཅན་གྱི་བསམ་པ་དང ། སྤྱོད་པ་དང ། སྒྲ་ལ་འཇུག་པའི་གཟུངས་དང་མི་འབྲལ་བར་འགྱུར། ཉི་མའི་ཏོག་སྣང་བའི་གཟུངས་དང་མི་འབྲལ་བར་འགྱུར། ཟླ་བའི་ཏོག་སྣང་བའི་གཟུངས་དང་མི་འབྲལ་བར་འགྱུར། ཀུན་ནས་ལྡང་བ་ཐམས་ཅད་རྣམ་པར་གནོན་པ་བསྒྲུབས་པའི་གཟུངས་དང་མི་འབྲལ་བར་འགྱུར། རྡོ་རྗེ་ལྟར་སྲ་ཞིང་བརྟན་པའི་རི་རྣམ་པར་འཇོམས་པའི་གཟུངས་དང་མི་འབྲལ་བར་འགྱུར། བརྗོད་དུ་མེད་པའི་དོན་བསྟན་པ་ལ་ཡང་དག་པར་གཞོལ་བའི་གཟུངས་དང་མི་འབྲལ་བར་འགྱུར། ཚིག་དང ། སྤྱོད་པ་དང ། སྒྲ་ཐམས་ཅད་ལ་འཇུག་པའི་གཟུངས་དང་མི་འབྲལ་བར་འགྱུར། ནམ་མཁའི་དཀྱིལ་འཁོར་དྲི་མ་མེད་པ་བསྒྲུབ་པའི་ཕྱག་རྒྱས་བཏབ་པའི་གཟུངས་དང་མི་འབྲལ་བར་འགྱུར། སངས་རྒྱས་ཀྱི་སྐུ་མཐའ་ཡས་པ་ཡོངས་སུ་རྫོགས་པ་བསྒྲུབ་པའི་གཟུངས་དང་མི་འབྲལ་བར་འགྱུར་རོ། །ལྷའི་བུ་གཟུངས་འདི་དག་ཐོབ་པས་བྱང་ཆུབ་སེམས་དཔའ་རྣམས་ཕྱོགས་
290b
བཅུའི་སངས་རྒྱས་ཀྱི་ཞིང་རྣམས་སུ་སངས་རྒྱས་ཀྱི་སྐུ་མངོན་པར་སྤྲུལ་ནས་ཆོས་སྟོན་ཏོ། །ཆོས་ཉིད་ལས་ཀྱང་མི་གཡོ་ལ། འགྲོ་བ་འང་མེད། འོང་བ་འང་མེད་དོ། །སེམས་ཅན་རྣམས་ཡོངས་སུ་སྨིན་པར་བྱེད་ཀྱང་སེམས་ཅན་དུ་དམིགས་པའང་མེད་དོ། །ཆོས་སྟོན་ཀྱང་ཡི་གེ་མཉམ་པ་ཉིད་ལས་གཡོ་བ་མེད་དོ། །འཆི་འཕོ་བ་དང ། སྐྱེ་བ་སྟོན་ཀྱང་འཕོ་བ་འང་མེད། སྐྱེ་བ་འང་མེད་དོ། །ཆོས་ཐམས་ཅད་ལ་རྣམ་པར་རྟག་པ་མེད་པའི་ཕྱིར་འདུ་བྱེད་རྣམས་གང་དུ་འང་འགྲོ་བར་མི་འགྱུར། གང་ནས་ཀྱང་འོང་བར་ཡང་མི་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་བྱང་ཆུབ་སེམས་དཔའ་སུམ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཚད་མེད་པ་རྣམས་ཀྱིས་ནི་བྱང་ཆུབ་ཀྱི་སེམས་ལས་ནི་ཕྱིར་མི་ལྡོག་པར་གྱུར་ཏོ། །དགེ་སློང་དང ། དགེ་སློང་ཚད་མེད་པ་རྣམས་ཀྱིས་ནི་ཆོས་ལ་ཆོས་ཀྱི་མིག་རྣམ་པར་དག་པ་ཐོབ་བོ། །སེམས་ཅན་ཚད་མེད་པ་རྣམས་ཀྱིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པ་དང ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འཁོར་བའི་རྒྱུན་གཅོད་དམ་ཆོས་འདི། །ཟབ་ཅིང་ཕྲ་ལ་བལྟ་དཀའ་སྟེ། །འདོད་པས་བསྒྲིབས་པའི་དམུས་ཡོང་དག་།དེ་མ་མཐོང་བས་སྡུག་བསྔལ་ལེན། །དེ་ནས་འཁོར་འདུས་པ་དེ་དག་སྟན་ལས་ལངས་ཏེ་བཅོམ་ལྡན་
291a
༄#། །ལྡན་འདས་ཀྱི་ཞབས་ལ་སྤྱི་བོས་ཕྱག་བཙལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཀློག་ཅིང་འདོན་པ་དང ། སྟོན་ཅིང་གནས་པ་དེར་བདག་ཅག་ཐམས་ཅད་མཆིས་ནས་ཆོས་སྟོན་པའི་འཁོར་དུ་བགྱིས་ཏེ་དེ་ལ་ཕན་པ་དང ། བདེ་བ་སྩལ་ཅིང་ལུས་དང ། སེམས་བདེ་བར་བགྱིའོ། །བདག་ཅག་གིས་སེམས་རྩེ་གཅིག་ཏུ་གྱུར་པར་མཆོད་པར་བགྱིའོ། །ཉན་པའི་འཁོར་རྣམས་ཀྱང་བདེ་བས་ཚིམ་པར་བགྱིའོ། །རྒྱལ་པོའི་ཡུལ་དེར་ཡང་ཕ་རོལ་གྱི་དགྲའི་འཇིགས་པ་དང ། འཚེ་བ་དང ། མུ་གེ་ཡ་ང་བས་སྡུག་བསྔལ་བ་མ་མཆིས་པ་དང ། སྐྱེ་བོ་མང་པོས་རྒྱས་ཤིང་ཡོངས་སུ་དར་བར་བགྱིའོ། །ཆོས་འདི་བཤད་པའི་གནས་ཀྱི་དཀྱིལ་འཁོར་འདི་ལྷ་དང ། མི་དང ། ལྷ་མ་ཡིན་ལ་སོགས་པ་ཐམས་ཅད་དང ། སེམས་ཅན་ཐམས་ཅད་ཀྱིས་མི་བརྫི་ཞིང་གཙང་མར་བགྱིའོ། །དེ་ཅིའི་སླད་དུ་ཞེ་ན། ཆོས་འདི་བཤད་པའི་གནས་འདི་ནི་མཆོད་རྟེན་ལགས་པའི་སླད་དུ་གདུགས་དང ། རྒྱལ་མཚན་དང ། མེ་ཏོག་དང ། བདུག་པ་དང ། ལྷབ་ལྷུབ་ཀྱིས་ཡོངས་སུ་མཆོད་པར་བགྱིའོ། །བདག་ཅག་གིས་ཀྱང་རྟག་ཏུ་བསྲུང་ཞིང་བསྐྱབས་ཏེ་ཉམས་པ་མ་མཆིས་པར་བགྱིའོ། །དེ་ནས་བཅོམ་ལྡན་འདས་ཀྱིས་འཁོར་འདུས་
291b
བ་དེ་དག་ལ་བཀའ་སྩལ་པ། རིགས་ཀྱི་བུ། ཁྱེད་ཀྱིས་མདོ་སྡེ་དམ་པ་འདི་སྒྲུབ་པ་ལ་བརྩོན་པར་གྱིས་ཤིག་དང ། དམ་པའི་ཆོས་འདི་འཇིག་རྟེན་འདིར་ཡུན་རིང་དུ་གནས་པར་འགྱུར་རོ།། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ས་རྣམ་པར་སྦྱོང་བ་ཞེས་བྱ་བའི་ལེའུ་སྟེ་དྲུག་པའོ།། །།བམ་པོ་ལྔ་པ། དེ་ནས་བཅོམ་ལྡན་འདས་ཀྱིས་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་རྒྱལ་པོ་གསེར་གྱི་ལག་པའི་དབང་པོ་ཞེས་བྱ་བ་དེས་དེ་བཞིན་གཤེགས་པ་ཐམས་ཅད་ལ་བསྟོད་པ་པདྨོའི་འབྱུང་གནས་འདིས་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མངོན་པར་བསྟོད་དོ། །རྒྱལ་བ་གང་དག་སྔར་འགྱུར་གང་བྱུང་དང ། །ཕྱོགས་བཅུའི་འཇིག་རྟེན་དག་ནའང་གང་འཚོ་བ། །རྒྱལ་བ་དེ་དག་རྣམས་ལ་ཕྱག་བགྱིའོ། །རྒྱལ་བ་དེ་དག་ཀུན་ལ་བདག་གིས་བསྟོད། །ཐུབ་དབང་ཞི་ཞིང་རབ་ཞི་རྣམ་པར་དག་།སྐུ་ནི་གསེར་གྱི་མདོག་ཏུ་རབ་ཏུ་གདའ། །དབྱངས་རྣམས་ཀུན་པས་སངས་རྒྱས་གསུངས་སྙན་ཏེ། །ཚངས་པའི་གསུངས་དབྱངས་རབ་ཏུ་བསྒྲགས་པའི་གསུང ། །བུང་བ་རྨ་བྱ་ཨུཏྤལ་སྔོན་པོའི་དབུ། །མཐོན་མཐིང་ལྕང་ལོ་བྱ་ནི་ཙ་ཤ་འདྲ། །ཁ་བ་དུང་ལྟར་རབ་ཏུ་དཀར་བའི་ཚེམས། །རྟག་ཏུ་གསེར་ལྟར་རྣམ་པར་མཛེས་པར་གདའ། །སྤྱན་ནི་རིང་ཞིང་
292a
༄#། །མཐོན་མཐིང་དྲི་མ་མེད། །ུཏྤལ་སྔོན་པོ་རབ་ཏུ་རྒྱས་པ་འདྲ། །ལྗགས་ནི་ཆེ་ཞིང་ལེབ་ལ་པདྨའི་མདོག་།པདྨ་འདྲར་སྣང་པདྨའི་ཟེ་བ་འདྲ། །ཞལ་གྱི་མཛོད་སྤུ་པད་རྩ་དུང་དང་འདྲ། །བཻ་ཌཱུརྱ་ཡི་མདོག་འདྲ་གཡས་སུ་འཁྱིལ། །ཐུབ་པའི་སྐུ་ནི་ཟླ་བ་ཕྲ་འདྲ་ཞིང ། །ཟླ་བ་ཟད་འདྲ་སྤྱན་བཀྲག་བུང་བ་བཞིན། །ཞལ་མཐོ་ཤངས་ནི་རྟག་ཏུ་ལྷང་ངེ་སྟེ། །འཇམ་ཞིང་ས་ཡི་གསེར་ལྟར་ཁ་དོག་བཟང ། །རྟག་པར་རྒྱུན་ཏུ་རྒྱལ་བ་ཐམས་ཅད་ཀྱི། །རོ་མཆོག་འཇམ་ཞིང་དམ་པ་མཆོག་རབ་འཕགས། །སྤུ་ཡི་བུ་ག་ནས་ནི་རེ་རོ་སྐྱེས། །སྤུ་རྣམས་སྐྱེས་པ་གཡས་སུ་འཁྱིལ་བ་སྟེ། །མཐོན་མཐིང་འདྲ་བར་འཚེར་ཞིང་ལྕང་ལོ་ཅན། །རྨ་བྱའི་མགྲིན་སྡུག་འདྲ་བར་སྔོ་ལ་མཛེས། །བལྟམས་མ་ཐག་ཏུ་སྐུ་ཡིས་སྣང་བར་བགྱིས། །ཕྱོགས་བཅུའི་འཇིག་རྟེན་དག་ནི་ཐམས་ཅད་གང ། །འཇིག་རྟེན་གསུམ་ན་སྡུག་བསྔལ་མཐའ་ཡས་ཞི། །བདེ་བ་ཀུན་གྱིས་སེམས་ཅན་རྣམས་ཀྱང་ཚིམ། །སེམས་དམྱལ་འགྲོ་དང་དུད་འགྲོར་འགྲོ་བ་དང ། །ཡི་དྭགས་ལྷ་གནས་མི་ཡི་གནས་རྣམས་སུ། །སེམས་ཅན་དེ་དག་ཐམས་ཅད་བདེ་བས་ཚིམ། །ངན་སོང་འགྲོ་བ་རྣམས་ནི་ཐམས་ཅད་ཞི། །ཁ་དོག་བཟང་བ་གསེར་དང་འདྲ་བའི་འོད། །བཙོ་མའི་གསེར་ལྟར་རབ་ཏུ་སྣང་བའི་སྐུ། །བདེར་གཤེགས་ཟླ་བ་རབ་ཏུ་དྲི་མེད་ཞལ། །འཛུམ་ཞིང་རྣམ་མཛེས་ཤིན་ཏུ་དྲི་མེད་ཞལ། །གཞོན་ནུ་བཙས་
292b
འདྲར་སྐུ་ལུས་ཡན་ལག་འཇམ། །སེངྒེ་འདྲ་བར་རྩལ་གྱིས་གནོན་པའི་མཆོག་།ཕྱག་རིང་ཕྱག་ནི་རབ་ཏུ་རིང་བ་སྟེ། །སཱ་ལའི་ལྕུག་མ་རླུང་གིས་བསྐྱོད་པ་བཞིན། །འདོམ་གང་འོད་འབར་འོད་ཟེར་རབ་ཏུ་གཏོང ། །ཉི་མ་སྟོང་ལྟར་རབ་ཏུ་ལྷང་ངེའོ། །ཐུབ་པའི་དབང་པོ་སྐུ་མཆོག་དྲི་མ་མེད། །ཞིང་རྣམས་མཐའ་ཡས་ཐམས་ཅད་རབ་ཏུ་སྣང ། །སངས་རྒྱས་འོད་ནི་རྣམ་པར་ལྷང་ངེ་བས། །ཞིང་རྣམས་མཐའ་ཡས་བརྒྱ་སྟོང་རྣམས་སུ་ཡང ། །མཚན་བྱད་ཟླ་བ་ཉི་མ་མང་པོ་དག་།དེ་དག་ཐམས་ཅད་འོད་ནི་མེད་པར་འགྱུར། །སངས་རྒྱས་ཉི་མ་འཇིག་རྟེན་སྒྲོན་མ་སྟེ། །སངས་རྒྱ་ཉི་མ་བརྒྱ་ཕྲག་སྟོང་རྣམས་ནི། །ཞིང་རྣམས་མཐའ་ཡས་སྟོང་ཕྲག་བརྒྱ་དག་ན། །དེ་བཞིན་གཤེགས་པའི་ཉི་མ་སེམས་ཅན་མཐོང ། བསོད་ནམས་སྟོང་ཕྲག་བརྒྱ་དང་ལྡན་པའི་སྐུ། །ཡོན་ཏན་ཀུན་གྱིས་རབ་ཏུ་བརྒྱན་པའི་སྐུ། །གླང་ཆེན་དབང་པོའི་སྣ་འདྲ་རྒྱལ་བའི་སྐུ། །ཕྱག་དང་ཞབས་འོད་རབ་མཛེས་དྲི་མ་མེད། །ས་ཡི་སྟེང་གི་རྡུལ་དང་མཚུངས་འདྲ་སྙེད། །ཕྲ་བའི་རྡུལ་སྙེད་སངས་རྒྱས་གང་འདས་དང ། །གང་དག་ཕྲ་བའི་རྡུལ་སྙེད་འབྱུང་བ་དང ། །གང་དག་ཕྲ་བའི་རྡུལ་སྙེད་བཞུགས་པ་ཡི། །རྒྱལ་བ་དེ་དག་ལ་ནི་རབ་དྭང་བའི། །ངག་ཡིད་ལུས་ཀྱིས་མེ་ཏོག་དབུལ་བ་དང ། །སྤོས་རྣམས་དབུལ་དང་བསྔགས་པ་བརྒྱ་དག་དང ། །དགེ་བའི་སེམས་ཀྱིས་ཀྱང་ནི་ཕྱག་
293a
༄#། །འཚལ་ལོ། །རྒྱལ་བའི་ཡོན་ཏན་གང་དག་དགེ་གྱུར་པ། །སྙིང་པོ་མཆོག་རབ་སྣ་ཚོགས་དུ་མ་སྟེ། །བདག་གིས་བསྐལ་པ་སྟོང་དུ་ལྕེ་བརྒྱ་ཡིས། ། སངས་རྒྱས་ཡོན་ཏན་བརྗོད་པར་མི་ནུས་སོ། །རྒྱལ་བ་གཅིག་གི་ཡོན་ཏན་རྣམས་ཀྱང་ནི། །ལྕེ་སྟོང་གིས་ཀྱང་ཅུང་ཟད་བརྗོད་མི་ནུས། །བདག་གིས་རྒྱལ་བ་དག་ནི་ཐམས་ཅད་ཀྱི། །ཡོན་ཏན་གཅིག་རྒྱས་བརྗོད་པར་ག་ལ་ནུས། །ལྷར་བཅས་འཇིག་རྟེན་ཐམས་ཅད་མཚོར་གྱུར་ཏེ། །སྲིད་པའི་རྩེ་མོ་མན་ཆད་ཆུས་གང་བ། །སྐྲ་ཡིས་རྩེ་མོས་དཔག་པར་ནུས་སྲིད་ཀྱི། །བདེ་གཤེགས་རྣམས་ཀྱི་ཡོན་ཏན་གཅིག་ལ་མིན། །ལུས་དང་ངག་དང་ཡིད་རབ་དྭང་བ་ཡིས། །རྒྱལ་བ་ཀུན་ལ་བདག་གིས་བསྔགས་བསྟོད་པས།། བདག་གིས་བསོད་ནམས་འབྲས་བུ་མཆོག་བསགས་གང ། །དེས་ནི་སེམས་ཅན་རྒྱལ་བ་རེག་གྱུར་ཅིག་།དེ་ལྟར་རྒྱལ་པོས་སངས་རྒྱས་རྣམས་བསྟོད་ནས། །རྒྱལ་པོ་འདི་ལྟར་སྨོན་ལམ་འདེབས་པ་ནི། །མ་འོངས་བསྐལ་པ་མཐའ་ཡས་རྣམས་སུ་ཡང ། །གང་དང་གང་དུ་བདག་ནི་སྐྱེ་བ་ན། །རྨི་ལམ་དུ་ནི་འདི་འདྲའི་རྡ་མཐོང་ཞིང ། །དེར་ནི་བཤགས་པ་འདི་འདྲ་ཐོས་པར་ཤོག་།རྒྱལ་བསྟོད་པདྨ་འབྱུང་རྒྱལ་འདི་འདྲ་བ། །ཚེ་རབས་དེ་དང་དེར་ནི་རྙེད་གྱུར་ཅིག་།སངས་རྒྱས་ཡོན་ཏན་མཐའ་ཡས་མཚུངས་མེད་
293b
དང། །གང་ཡང་བསྐལ་པ་སྟོང་དུ་རྙེད་དཀའ་བ། །དེ་དག་རྨི་ལམ་ན་ཡང་ཐོས་པར་ཤོག་།ཉིན་གྱུར་ཚེ་ཡང་དེ་དག་སྟོན་གྱུར་ཅིག་།སེམས་ཅན་སྡུག་བསྔལ་མཚོ་ལས་ཐར་བྱེད་ཤོག་།ཕ་རོལ་ཕྱིན་པ་དྲུག་པོ་རྫོགས་བགྱིས་ནས། །ཕྱིན་ཆད་བྱང་ཆུབ་བླ་མེད་ཐོབ་པར་ཤོག་།བདག་གི་ཞིང་ནི་འགྲན་ཟླ་མེད་གྱུར་ཅིག་།རྔ་ཕུལ་རྣམ་པར་སྨིན་པའི་འབྲས་བུ་དང ། །རྒྱལ་བ་ཐམས་ཅད་ལ་ཡང་བསྟོད་པའི་རྒྱུས། །ཤཱཀྱ་ཐུབ་དབང་མངོན་དུ་མཐོང་བར་ཤོག་།དེར་ནི་བདག་གིས་ལུང་བསྟན་ཐོབ་གྱུར་ཅིག་།གསེར་གྱི་ལག་པའི་དབང་དང་གསེར་གྱི་འོད། །བདག་གི་ཁྱེའུ་ནི་གང་ཡིན་འདི་གཉིས་ཀྱང ། །དེར་ནི་བུ་ཕོ་དེ་དག་གཉི་ག་ཡང ། །བྱང་ཆུབ་བླ་མེད་ལུང་བསྟན་ཐོབ་པར་ཤོག་།སེམས་ཅན་གང་དག་གནས་མེད་རྟེན་མེད་ཅིང། །སྐྱབས་དང་བྲལ་ནས་ཕོངས་པར་གྱུར་པ་དང ། །དེ་དག་ལ་ཡང་མ་འོངས་དུས་རྣམས་ན། །སྐྱོབ་དང་དཔུང་གཉེན་སྐྱབས་དང་རྟེན་གྱུར་ཤོག་།སྡུག་བསྔལ་ཀུན་འབྱུང་ཟད་པར་བྱེད་གྱུར་ཅིག་།བདེ་བ་ཀུན་གྱི་འབྱུང་གནས་གྱུར་པར་ཤོག་།སྔོན་མཐའ་འདས་པ་དེ་དག་ཇི་སྲིད་པ། །མ་འོངས་བསྐལ་པར་བྱང་ཆུབ་སྤྱོད་གྱུར་ཅིག་།གསེར་འོད་དམ་པ་ཡི་ནི་བཤགས་པ་ཡིས། །བདག་གི་སྡིག་པའི་རྒྱ་མཚོ་སྐེམས་པར་ཤོག་།བདག་གི་ལས་ཀྱི་རྒྱ་མཚོ་ཟད་གྱུར་ཅིག་།བདག་གི་ཉོན་མོངས་རྒྱ་མཚོ་ཆད་པར་ཤོག་།བདག་གི་བསོད་
294a
༄#། །ནམས་རྒྱ་མཚོ་རྫོགས་གྱུར་ཅིག་།ཡེ་ཤེས་དྲི་མེད་སྣང་བ་དམ་པ་ཡིས། །བདག་གི་ཡེ་ཤེས་རྒྱ་མཚོ་རྣམ་དག་ཤོག་།ཡོན་ཏན་ཀུན་གྱི་རྒྱ་མཚོར་འགྱུར་བར་ཤོག་།བྱང་ཆུབ་ཡོན་ཏན་ཡོན་ཏན་རིན་ཆེན་རྫོགས། །གསེར་འོད་དམ་པའི་བཤགས་པའི་སྟོབས་ཀྱིས་ནི། །བདག་གི་བསོད་ནམས་རབ་ཏུ་སྣང་བར་ཤོག་།བདག་གི་བྱང་ཆུབ་སྣང་བ་རྣམ་དག་གྱུར། །ཡེ་ཤེས་དྲི་མེད་སྣང་བ་དམ་པ་ཡིས། །བདག་གི་ལུས་ཀྱི་འོད་ནི་སྣང་བར་ཤོག་།བསོད་ནམས་སྣང་བ་ལྷང་ངེར་བྱ་བའི་ཕྱིར། །འཇིག་རྟེན་གསུམ་ན་ཁྱད་པར་འཕགས་གྱུར་ཅིག་།བསོད་ནམས་སྟོབས་དང་རྟག་ཏུ་ལྡན་པར་ཤོག་།སྡུག་བསྔལ་རྒྱ་མཚོ་ལས་ནི་སྒྲོལ་བ་དང ། །བདེ་བ་ཀུན་གྱི་རྒྱ་མཚོ་འདྲ་བ་ཡིས། །མ་འོངས་བསྐལ་པར་བྱང་ཆུབ་སྤྱད་པར་བགྱི། །འཇིག་རྟེན་གསུམ་ན་སྔོན་མཐར་ཇི་སྙེད་གཤེགས། །དེ་དག་ཞིང་ནི་རྒྱལ་བ་ཐམས་ཅད་ཀྱི། །ཡོན་ཏན་མཐའ་ཡས་ཁྱད་འཕགས་ཅི་འདྲ་བ།། ཡོན་ཏན་མཐའ་ཡས་རྣམས་ཀྱིས་བདག་གི་ཞིང ། །མ་འོངས་དུས་ན་དེ་འདྲར་འགྱུར་བར་ཤོག་།མཛེས་པའི་ཏོག་གིས་ཤེས་པར་བྱོས། །རྒྱལ་པོ་གསེར་གྱི་ལག་དབང་གིས།། སྔོན་ཚེ་སྨོན་ལམ་འདི་བཏབ་སྟེ། །དེ་ཉིད་ད་ལྟར་ཁྱོད་ཡིན་ནོ། །སྔོན་གྱི་དུས་ཀྱི་བུ་གཉིས་ནི། །གསེར་གྱི་ལག་དང་གསེར་གྱི་འོད། །དེ་ཉིད་དངུལ་ཏོག་དངུལ་འོད་ཅེས། །
294b
ངས་ནི་དེ་ཚེ་ལུང་བསྟན་ཏོ། །འཁོར་མང་དེ་དག་འདི་ཐོས་ནས། །ཀུན་གྱིས་བྱང་ཆུབ་སེམས་བསྐྱེད་པ། །ད་ལྟར་མ་འོངས་དུས་དག་ཏུ། །རྟག་པར་བཤགས་པ་འདི་བྱེད་ཤོག་།གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། འདས་པ་དང ། མ་འོངས་པ་དང ། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་ཀྱི་ཞིང་ཐམས་ཅད་ལ་བསྟོད་པའི་ལེའུ་ཞེས་བྱ་སྟེ་བདུན་པའོ།། །།དེ་ནས་བཅོམ་ལྡན་འདས་ཀྱིས་འཁོར་དེའི་ནང་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བར་གནས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། གསེར་ཅན་ཞེས་བྱ་བའི་གཟུངས་འདི། གང་རིགས་ཀྱི་བུའམ། རིགས་ཀྱི་བུ་མོ་གང་ལ་ལས་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་ཐམས་ཅད་མངོན་དུ་མཆོད་ཅིང་བཀུར་སྟི་བྱེད་པར་འདོད་པས་གཟུངས་འདི་འཆང་ཞིང་གཟུང་བར་བྱའོ། །དེ་ཅིའི་ཕྱིར་ཞེ་ན། གཟུངས་འདི་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་བཅོམ་ལྡན་འདས་རྣམས་ཀྱི་ཡུམ་ཡིན་པའི་ཕྱིར་གཟུངས་འདི་འཛིན་པའི་བསོད་ནམས་ཀྱི་ཚོགས་རྒྱ་ཆེར་འཕེལ་བར་འགྱུར་རོ། །འདས་པའི་སངས་རྒྱས་བཅོམ་ལྡན་འདས་དཔག་ཏུ་མེད་པ་དག་ལ་དགེ་བའི་རྩ་བ་བསྐྱེད་པ་རྣམས་ཀྱིས་འཛིན་ཅིང་འཆང་བར་འགྱུར་རོ། །ཚུལ་ཁྲིམས་རྣམ་པར་དག་པ་མ་ཉམས་ཤིང་སྐྱོན་མེད་པ་རྣམས་ཀྱིས་ཆོས་ཀྱི་རྣམ་གྲངས་ཤིན་ཏུ་ཟབ་མོ་
295a
༄#། །འདི་ལ་འཇུག་ནུས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། གཟུངས་སྔགས་བསྒྲུབ་པའི་ཆོ་ག་ནི་སྔར་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའི་མཚན་འདི་དག་བརྗོད་ཅིང་སེམས་རྩེ་གཅིག་པས་ཕྱག་འཚལ་ལ་དེ་ནས་སྔགས་འདི་གདོན་པར་བྱའོ། །ཕྱོགས་བཅུའི་སངས་རྒྱས་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕྱག་འཚལ་ལོ། །ཉན་ཐོས་དང ། རང་སངས་རྒྱས་དང ། འཕགས་པ་ཐམས་ཅད་ལ་ཕྱག་འཚལ་ལོ། །སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །ཤར་ཕྱོགས་ཀྱི་སངས་རྒྱས་མི་འཁྲུག་པ་ལ་ཕྱག་འཚལ་ལོ། །ལྷོ་ཕྱོགས་ཀྱི་སངས་རྒྱས་རིན་པོ་ཆེའི་ཏོག་ལ་ཕྱག་འཚལ་ལོ།། ནུབ་ཕྱོགས་ཀྱི་སངས་རྒྱས་འོད་དཔག་མེད་ལ་ཕྱག་འཚལ་ལོ། །བྱང་ཕྱོགས་ཀྱི་སངས་རྒྱས་རྔ་སྒྲའི་རྒྱལ་པོ་ལ་ཕྱག་འཚལ་ལོ། །སྟེང་གི་ཕྱོགས་ཀྱི་སངས་རྒྱས་ཡང་པའི་དཔལ་ལ་ཕྱག་འཚལ་ལོ། །འོག་གི་ཕྱོགས་ཀྱི་སངས་རྒྱས་སྣང་བ་དམ་པའི་དཔལ་ལ་ཕྱག་འཚལ་ལོ། །སངས་རྒྱས་རིན་ཆེན་སྙིང་པོ་ལ་ཕྱག་འཚལ་ལོ། །སངས་རྒྱས་ཀུན་ཏུ་འོད་ལ་ཕྱག་འཚལ་ལོ། །སངས་རྒྱས་ཀུན་ཏུ་སྣང་བ་ལ་ཕྱག་འཚལ་ལོ། །སངས་རྒྱས་སྤོས་མཆོག་བརྩེགས་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་པདྨ་དམ་པ་ལ་ཕྱག་འཚལ་
295b
ལོ། །སངས་རྒྱས་མཉམ་པར་གཟིགས་ལ་ཕྱག་འཚལ་ལོ། །སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ། །སངས་རྒྱས་རིན་ཆེན་བླ་མ་ལ་ཕྱག་འཚལ་ལོ། ། སངས་རྒྱས་རིན་ཆེན་འོད་ལ་ཕྱག་འཚལ་ལོ། །སངས་རྒྱས་དྲི་མེད་འོད་སྣང་ལ་ཕྱག་འཚལ་ལོ། །སངས་རྒྱས་སྤོབས་པས་བཀོད་པར་དགོངས་པ་ལ་ཕྱག་འཚལ་ལོ།། སངས་རྒྱས་ཟླ་འོད་རྣམ་དག་གྲགས་པའི་ཏོག་གི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཕྱག་འཚལ་ལོ། །སངས་རྒྱས་མེ་ཏོག་འོད་བཀོད་ལ་ཕྱག་འཚལ་ལོ། །སངས་རྒྱས་འོད་སྣང་རྒྱལ་པོ་ལ་ཕྱག་འཚལ་ལོ། །སངས་རྒྱས་དགེ་འོད་དྲི་མ་མེད་པར་གྲགས་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་སྤྱན་རས་གཟིགས་དབང་མི་འཇིགས་པ་ལ་ཕྱག་འཚལ་ལོ།། སངས་རྒྱས་འཇིགས་མེད་གྲགས་པ་ལ་ཕྱག་འཚལ་ལོ། །སངས་རྒྱས་རབ་མཆོག་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་
296a
༄#། །ཆེན་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ལེགས་པའི་བློ་གྲོས་ལ་ཕྱག་འཚལ་ལོ། །དེ་དག་ལ་ཕྱག་འཚལ་ནས་གཟུངས་འདི་གདོན་པར་བྱའོ། །ན་མོ་རཏྣ་ཏྲ་ཡཱ་ཡ། ཏདྱ་ཐཱ། ཀུ་ཊི་ཀུ་ཊི་ནི། ཨི་མི་རི་ཏོ། ཀོ་ཥ་ཎི། ཨི་མི་རི་ཎི། ཨི་རི་སཝཱཧཱ། དེ་ནས་བཅོམ་ལྡན་འདས་ཀྱི་བྱང་ཆུབ་སེམས་དཔའ་བདེ་བར་གནས་པ་ལ་བཀའ་སྩལ་པ། གཟུངས་འདི་ནི་དུས་གསུམ་གྱི་སངས་རྒྱས་རྣམས་ཀྱི་ཡུམ་ཡིན་པའི་ཕྱིར་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་གཟུངས་འདི་འཆང་ཞིང་འཛིན་ན་བསོད་ནམས་ཀྱི་ཚོགས་ཚད་མེད་དཔག་ཏུ་མེད་པ་དག་འཕེལ་བར་འགྱུར་རོ། །གྲངས་མེད་པའི་སངས་རྒྱས་རྣམས་ལ་བཀུར་སྟི་དང ། མཆོད་པ་དང།་རིམ་གྲོ་དང ། བསྔགས་པར་བྱས་པར་འགྱུར་རོ། །སངས་རྒྱས་དེ་རྣམས་ཀྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དེ་ལ་ལུང་སྟོན་པར་འགྱུར་རོ། །བདེ་
296b
བར་གནས་པ། གང་ཞིག་གཟུངས་སྔགས་འདི་འཆང་བ་དེས་གོས་དང ། བསོད་སྙོམས་དང ། རིན་པོ་ཆེ་དང ། མང་དུ་ཐོས་ཤིང་མཁས་པ་དང ། ནད་མེད་ཅིང་ཚེ་རིང་བ་ལ་སོགས་པ་ཡིད་བཞིན་དུ་འཐོབ་སྟེ་བསོད་ནམས་ཤིན་ཏུ་མང་དུ་འཕེལ་ལོ། །ཅི་དང ། ཅི་འདོད་པ་དེ་དང ། དེ་དག་ཐམས་ཅད་འགྲུབ་པར་འགྱུར་རོ། །བདེ་བར་གནས་པ། སྔགས་འདི་འཆང་ཞིང་འཛིན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་ཐོབ་ཀྱི་བར་དུ་རྟག་པར་བྱང་ཆུབ་སེམས་དཔའ་གསེར་གྱི་གྲོང་ཁྱེར་རི་བོ་དང ། བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་རྒྱ་མཚོ་དང ། བྱང་ཆུབ་སེམས་དཔའ་ཀུན་ཏུ་སྤྱན་རས་གཟིགས་དབང་ཕྱུག་དང ། བྱང་ཆུབ་སེམས་དཔའ་འཇམ་དཔལ་དང ། བྱང་ཆུབ་སེམས་དཔའ་པིང་ག་ལ་ཆེན་པོ་ལ་སོགས་པ་དང་ལྷན་ཅིག་ཏུ་གནས་ཏེ་བྱང་ཆུབ་སེམས་དཔའ་རྣམས་ཀྱིས་སྲུང་བར་བྱེད་དོ། །བདེ་བར་གནས་པ། གཟུངས་འདི་སྒྲུབ་པའི་ཆོ་ག་ནི་འདི་ཡིན་པར་ཤེས་པར་རིག་པར་བྱའོ། །ཐོག་མར་བཟླས་བརྗོད་ཁྲི་རྩ་བརྒྱད་ཚང་བར་བཟླས་པས་བསྙེན་པར་བྱའོ། །དེ་ནས་ཁང་པ་དབེན་པའི་ནང་དུ་དཀྱིལ་འཁོར་བྱས་ཏེ་ཚེས་བཅུ་དྲུག་གི་ཉིན་པར་ཁྲུས་བྱས་ཏེ་གོས་སར་པ་གྱོན་ཏེ་བདུག་པ་དང ། མེ་ཏོག་དང ། ཞལ་ཟས་སྣ་མང་པོ་ལ་སོགས་པས་མཆོད་པར་བྱ་ཞིང་དཀྱིལ་འཁོར་གྱི་ནང་དུ་ཞུགས་ནས་
297a
༄#། །ཐོག་མར་སྔར་སྨོས་པའི་སངས་རྒྱས་དང ། བྱང་ཆུབ་སེམས་དཔའ་རྣམས་ཀྱི་མཚན་ནས་བརྗོད་དེ་གུས་པར་ཕྱག་འཚལ་ཞིང་སྡིག་པ་བཤགས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་སྔགས་དེ་སྟོང་རྩ་བརྒྱད་ཚང་བར་བཟླའོ། །དེ་ནས་ལུས་བསྲང་སྟེ་འདུག་ནས་ཅི་འདོད་པ་དེ་བསམ་པར་བྱའོ། །དེ་ནས་ཉི་མ་མ་ཤར་བར་དཀྱིལ་འཁོར་གྱི་ནང་དུ་ཁ་ཟས་གཙང་མ་ཟ་གཅིག་ཏུ་བཟའ་བར་བྱའོ། །དེ་ནས་ཞག་བཅོ་ལྔ་ལོན་པ་དང་གཟོད་དཀྱིལ་འཁོར་དེ་ནས་བྱུང་བར་བྱས་ཏེ་མི་དེ་ནི་བསོད་ནམས་དང་\?\། གཟི་བརྗིད་ཀྱི་མཐུ་བསམ་གྱིས་མི་ཁྱབ་པ་དང་ལྡན་ཞིང་བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །གལ་ཏེ་བསམས་པ་མ་གྲུབ་ནའང་དཀྱིལ་འཁོར་དེར་ཞུགས་ན་བསམ་པ་ཡོངས་སུ་རྫོགས་པར་འགྱུར་བས་དེ་ཕྱིན་ཆད་ཀྱང་རྟག་པར་རྗེས་སུ་དྲན་པར་བྱའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། གསེར་ཅན་ཞེས་བྱ་བའི་གཟུངས་ཏེ་ལེའུ་བརྒྱད་པའོ།། །།དེ་ནས་བཅོམ་ལྡན་འདས་ཀྱིས་གཟུངས་དེ་གསུངས་ནས། གཞན་ཡང ། བྱང་ཆུབ་སེམས་དཔའ་སེམས་དཔའ་ཆེན་པོ་དང ། ལྷ་དང ། མི་ལ་སོགས་པའི་འཁོར་འདུས་པ་དེ་དག་ལ་ཕན་པ་དང ། བདེ་བའི་ཕྱིར་དོན་དམ་པའི་བདེན་པ་སྟོང་པའི་
297b
མཚན་ཉིད་དེ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བསམ་གྱིས་མི་ཁྱབ་མདོ་རྣམས་གཞན་དག་ཏུ། །སྟོང་པའི་ཆོས་རྣམས་རབ་ཏུ་རྒྱས་བཤད་དེ། །དེ་ལྟ་བས་ན་མདོ་མཆོག་དམ་པ་འདིར། །སྟོང་པའི་ཆོས་རྣམས་མདོ་ཙམ་བཤད་པར་བྱ། །སེམས་ཅན་བློ་ཆུང་རྣམ་པར་མི་ཤེས་པས། །ཆོས་རྣམས་ཐམས་ཅད་ཤེས་པར་མི་ནུས་ཏེ། །དེ་ལྟ་བས་ན་མདོ་མཆོག་དམ་པ་འདིར། །སྟོང་པའི་ཆོས་རྣམས་མདོ་ཙམ་རབ་ཏུ་བཤད། །སེམས་ཅན་ཀུན་གྱིས་ཅི་ནས་ཤེས་འགྱུར་དང ། །སེམས་ཅན་འབྱུང་བྱའི་ཕྱིར་ནི་སྙིང་རྗེའི་དབང ། །ཐབས་དང་ཚུལ་དང་རྒྱུ་གཞན་རྣམས་ཀྱིས་ནི། །མདོ་མཆོག་དམ་པ་དབང་པོ་འདི་བཤད་དོ། །ལུས་འདི་གྲོང་ཁྱིམ་སྟོང་པ་ཇི་བཞིན་ཏེ། །དབང་པོ་རྣམས་ནི་དམག་དང་ཆོམ་རྐུན་འདྲ། །དེ་དག་ཐམས་ཅད་གྲོང་གཅིག་གནས་མོད་ཀྱི། །དེ་དག་ཕན་ཚུན་རྣམ་པར་མི་ཤེས་སོ། །མིག་གི་དབང་པོ་གཟུགས་གྱུར་རྣམས་ལ་རྒྱུག་།རྣ་བའི་དབང་པོ་སྒྲ་ལ་རྣམ་པར་དཔྱོད། །སྣ་ཡི་དབང་པོ་སྣ་ཚོགས་དྲི་རྣམས་འཕྲོག་།ལྕེ་ཡི་དབང་པོ་རྟག་ཏུ་རོ་ལ་རྒྱུག་།ལུས་ཀྱི་དབང་པོ་རེག་པ་དག་ལ་རྒྱུག་།ཡིད་ཀྱི་དབང་པོ་ཆོས་རྣམས་རྣམ་པར་དཔྱོད། །དབང་པོ་དྲུག་པོ་འདི་དག་ཕན་ཚུན་དུ། །རང་རང་ཡུལ་ལ་རབ་ཏུ་འཇུག་པར་བྱེད། །སེམས་ནི་སྒྱུ་མ་ལྟ་བུར་གཡོ་བ་ཡིན། །དབང་པོ་དྲུག་ནི་ཡུལ་ལ་རྣམ་དཔྱོད་དེ། །ཇི་
298a
༄#། །ལྟར་མི་ཞིག་གྲོང་སྟོང་རྒྱུག་པ་དང ། །དམག་དང་ཆོམ་རྐུན་དག་དང་གནས་པ་བཞིན། །ཇི་ལྟར་བྱ་ཞིག་ཡུལ་དྲུག་གནས་བཅས་ཤིང ། །དབང་པོའི་སྤྱོད་ཡུལ་དག་ཀྱང་རབ་ཤེས་པ། །དེ་ལྟར་སེམས་ནི་ཡུལ་དྲུག་གནས་བཅས་ཏེ། །དབང་པོའི་སྤྱོད་ཡུལ་རྣམས་ཀྱང་རབ་ཏུ་ཤེས། །གཟུགས་དང་སྒྲ་དང་དེ་བཞིན་དྲི་རྣམས་དང ། ། རོ་དང་རེག་བྱ་དེ་བཞིན་སྤྱོད་ཡུལ་ཆོས། །སེམས་ནི་དབང་པོ་དྲུག་པོ་ཐམས་ཅད་ལ། །དབང་པོར་ཞུགས་པ་བྱ་བཞིན་གཡོ་བར་འགྱུར། །དབང་པོ་གང་དང་གང་དུ་གནས་བཅས་པ།། དབང་པོ་དེ་ནི་ཤེས་པ་བདག་ཉིད་བྱེད། །ལུས་ནི་གཡོ་བ་མེད་ཅིང་བྱེད་པ་མེད། །སྙིང་པོ་མེད་ཅིང་རྐྱེན་ལས་བྱུང་བ་ཡིན། །ཡང་དག་མ་ཡིན་ཡོངས་སུ་རྟོག་ལས་བྱུང ། །གྲོང་སྟོང་ལས་ཀྱི་འཁྲུལ་འཁོར་འདྲ་བར་གནས། །ས་དང་མེ་དང་ཆུ་དང་རླུང་རྣམས་ནི། །གྲོང་གཞན་གནས་དེ་ཕྱོགས་དང་ཕྱོགས་ན་གནས། །དཔེར་ན་སྦྲུལ་གདུག་གནས་གཅིག་ཇི་བཞིན་ཏེ། །རྟག་ཏུ་ཕན་ཚུན་མཐུན་པ་མ་ཡིན་བཞིན། །ཁམས་ཀྱི་སྦྲུལ་རྣམས་བཞི་པོ་དེ་དག་ཀྱང ། །གཉིས་ནི་སྟེང་འགྲོ་གཉིས་ནི་ཐུར་དུ་འགྲོ་།ཕྱོགས་དང་ཕྱོགས་མཚམས་རྣམས་སུ་གཉིས་གཉིས་ཏེ། །ཁམས་སྦྲུལ་དེ་དག་ཐམས་ཅད་འཇིགས་པར་འགྱུར། །ས་ཡི་སྦྲུལ་དང་ཆུ་ཡི་སྦྲུལ་དག་དང ། །འདི་གཉིས་འོག་ཏུ་ཟད་པར་འགྱུར་
298b
བ་ཡིན། །མེ་ཡི་སྦྲུལ་དང་རླུང་གི་སྦྲུལ་དག་དང ། །འདི་གཉིས་སྟེང་གི་ནམ་མཁར་འགྲོ་བ་ཡིན། །ཇི་ལྟར་སྔོན་ཆད་བྱས་པའི་ལས་རྣམས་ཀྱིས། །སེམས་དང་རྣམ་ཤེས་ཀུན་ཏུ་གནས་ནས་དོང ། །ལྷ་དང་མི་དང་ངན་སོང་གསུམ་དག་ཏུ། །ཇི་ལྟར་བྱས་པའི་ལས་ཀྱིས་སྲིད་པར་སྐྱེ། །བད་ཀན་རླུང་དང་མཁྲིས་པ་ཟད་གྱུར་ན། །ལུས་ནི་གཅིན་དང་ངན་སྐྱུགས་རྣམས་ཀྱིས་གང། །མངོན་པར་མི་དགའ་སྲིན་བུའི་ཕུང་པོར་གྱུར། །དུར་ཁྲོད་དག་ན་འཐོར་བ་ཤིང་བཞིན་གྱུར། །ལྷ་མོ་ཁྱོད་ནི་ཆོས་འདི་རྣམས་ལ་ལྟོས། །འདི་ལ་སེམས་ཅན་གང་ཟག་གང་ཞིག་ཡོད། །ཆོས་རྣམས་འདི་དག་ཐམས་ཅད་སྟོང་པ་སྟེ། །མ་རིག་པ་ཡི་རྐྱེན་ལས་བྱུང་བ་ཡིན། །འབྱུང་བ་ཆེན་པོ་འདི་དག་ཆེ་འབྱུང་མིན། །མ་བྱུང་བ་ལས་བྱུང་ཞིང་མི་འབྱུང་སྟེ། །གང་གི་ཕྱིར་ནི་འབྱུང་བ་མི་འབྱུང་བ། །དེ་ཕྱིར་འབྱུང་བ་ཆེ་ཞེས་ངས་བརྗོད་དོ། །ཡོད་པ་མིན་ཞིང་ནམ་ཡང་ཡོད་མིན་ལ། །མ་རིག་པ་ཡི་རྐྱེན་ལས་འབྱུང་བ་ཡིན། །མ་རིག་འདི་ནི་ཡོད་པ་མ་ཡིན་ཏེ། །དེ་བས་ངས་ནི་མ་རིག་འདི་བཤད་དེ། །འདུ་བྱེད་རྣམ་ཤེས་མིང་དང་གཟུགས་བཅས་དང ། །སྐྱེ་མཆེད་དྲུག་དང་རེག་དང་ཚོར་བ་དང ། །སྲེད་དང་ལེན་དང་དེ་བཞིན་སྲིད་པ་དང ། །སྐྱེ་དང་རྒ་ཤི་མྱ་ངན་གནོད་པ་རྣམས། །འཁོར་བའི་སྡུག་བསྔལ་བསམ་གྱིས་མི་ཁྱབ་པ། །འཁོར་བའི་འཁོར་ལོ་ཇི་ལྟར་གནས་པ་དག་།མ་བྱུང་བ་ལས་བྱུང་དང་
299a
༄#། །མི་འབྱུང་དང ། །ཚུལ་བཞིན་མ་ཡིན་སེམས་ཀྱིས་རྣམ་དཔྱད་དང ། །བདག་གི་ལྟ་བར་གྱུར་པ་གཅད་པར་བགྱིས། །ཡེ་ཤེས་རལ་གྲིས་ཉོན་མོངས་རྒྱ་མོ་བརྟོལ། །ཕུང་པོའི་གནས་ལ་སྟོང་པར་གྱུར་པར་ལྟོས། །བྱང་ཆུབ་ཡོན་ཏན་རྒྱ་ཆེན་རེག་པར་གྱིས། །ངས་ནི་བདུད་རྩིའི་གྲོང་ཁྱེར་སྒོ་ཡང་ཕྱེ། །བདུད་རྩིའི་ཁུ་བའི་སྣོད་ཀྱང་ཀུན་ཏུ་བསྟན། །ངས་ནི་བདུད་རྩིའི་གྲོང་ཁྱེར་གནས་དེར་འཇུག་།ངས་ནི་བདུད་རྩིའི་ཁུ་བས་བདག་ཚིམ་བྱས། །ངས་ནི་ཆོས་ཀྱི་རྔ་ཆེན་དམ་པ་བརྡུངས། །ངས་ནི་ཆོས་ཀྱི་དུང་གི་མཆོག་ཀྱང་བུས། །ངས་ནི་ཆོས་ཀྱི་སྒྲོན་མ་མཆོག་འབར་བྱས། །ངས་ནི་ཆོས་ཀྱི་ཆར་པ་དམ་པ་ཕབ། །ངས་ནི་ཉོན་མོངས་དགྲ་ཚོགས་རྣམས་ལས་རྒྱལ། །ངས་ནི་ཆོས་ཀྱི་རྒྱལ་མཚན་དམ་པ་བསྒྲེང ། །སྲིད་པའི་མཚོ་ལས་སེམས་ཅན་རབ་ཏུ་བསྒྲལ། །ངས་ནི་ངན་སོང་གསུམ་གྱི་ལམ་རྣམས་བཀག་།སེམས་ཅན་ཉོན་མོངས་མེ་ཡིས་གདུངས་གྱུར་པ། །རྟེན་མེད་གྱུར་ཅིང་དཔུང་གཉེན་མེད་པ་དག་།སྲོག་ཆགས་ཉོན་མོངས་མེས་གདུངས་ཞི་བྱས་ནས། །བདུད་རྩིའི་ཁུ་བ་བསིལ་བས་ཚིམ་པར་བྱས། །གང་ཕྱིར་བསྐལ་པ་དུ་མར་སྔོན་ཆད་ངས། ། འདྲེན་པ་བསམ་གྱིས་མི་ཁྱབ་མཆོད་པ་བྱས། །ཆོས་ཀྱི་སྐུ་དེ་ཡོངས་སུ་ཚོལ་བ་ན། །བརྟུལ་ཞུགས་བརྟན་པས་བྱང་ཆུབ་ཕྱིར་སྤྱད་དེ། །ལག་པ་དང་ནི་མིག་དང་རྐང་པ་དང ། །ཡན་ལག་མཆོག་
299b
དང་བུ་སྡུག་བུ་མོ་དང ། །ནོར་དབྱིག་ནོར་བུ་མུ་ཏིག་རྒྱན་དང་གསེར། །བཻ་ཌཱུརྱ་དང་རིན་ཆེན་སྣ་ཚོགས་བཏང ། །སྟོང་གསུམ་ཤིང་ལྗོན་ཐམས་ཅད་དང ། །རྩཝ་དང་རྩཝ་རྣམས་ཐམས་ཅད་དང་།། ནགས་ཚལ་དག་དང་ས་ལས་ནི། །འཁྲུངས་པ་ཐམས་ཅད་གཅད་གཏུབས་ཏེ། །དེ་དག་ཐམས་ཅད་ཕྱེར་བརླགས་ནས། །རབ་ཏུ་ཕྲ་བའི་རྡུལ་འདྲར་བྱས། །ནམ་མཁའི་དཀྱིལ་འཁོར་ཇི་ཙམ་པར། །ཕྱེ་མའི་ཕུང་པོ་སྤུངས་ནས་ནི། །འདི་ལ་ཆ་གསུམ་དབྱེ་བར་ནུས། །ས་ལ་རྡུལ་ནི་ཡོད་པ་རྣམས། །སྟོང་གསུམ་དག་ནི་ཐམས་ཅད་ཀྱི། །རྡུལ་ཁམས་བསམ་གྱིས་མི་ཁྱབ་པ། ། སེམས་ཅན་ཀུན་གྱི་ཤེས་པ་གང ། །དེ་ནི་སེམས་ཅན་གཅིག་གིར་གྱུར། །ཤེས་པ་དེ་ཡིས་རྡུལ་རྣམས་ཀྱི། །ཕྱེ་མ་བགྲང་བར་བྱེད་ན་ནི། །སེམས་ཅན་ཀུན་ལས་རབ་འཕགས་པ། །ཡེ་ཤེས་རབ་ལྡན་མི་རྣམས་ཀྱིས། །ཐམས་ཅད་བགྲང་བར་ནུས་སྲིད་ཀྱི། །རྒྱལ་བའི་མཁྱེན་པ་མི་ནུས་སོ། །ཐུབ་པ་ཆེན་པོའི་ཡེ་ཤེས་གང ། །སྐད་ཅིག་ཅིག་ལ་འཇུག་པ་ཡང ། །བསྐལ་པ་བྱེ་བ་དུ་མར་ནི། །གང་དུ་འང་བགྲང་བར་མི་ནུས་སོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སྟོང་པ་ཉིད་ཀྱི་ལེའུ་ཞེས་བྱ་སྟེ་དགུ་པའོ།། །།དེ་ནས་ལྷ་མོ་རིན་ཆེན་འོད་འཕྲོས་ཆོས་བསྟན་པ་ཤིན་ཏུ་ཟབ་མོ་དེ་ཐོས་ནས་དགའ་བ་དང ། རངས་པ་སྐྱེས་ཏེ་འཁོར་འདུས་པ་དེའི་ནང་ནས་སྟན་ལས་ལངས་ཏེ་བླ་གོས་ཕྲག་པ་
300a
༄#། །གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བསྟན་པ་ཟབ་མོ་འདི་ལ་ཇི་ལྟར་རྣལ་འབྱོར་དུ་བྱ་བ་ཞུ་བའི་ཕྱིར་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །རྒྱལ་བ་རྐང་གཉིས་གཙོ་ལགས་ཏེ། །འཇིག་རྟེན་ཀུན་ཏུ་སྣང་མཛད་པ། ། བྱང་ཆུབ་སྤྱོད་པ་ཡང་དག་ཚུལ། །བདག་ལ་ཐུགས་རྗེས་བཤད་དུ་གསོལ། །རིགས་ཀྱི་ལྷ་མོ་ལ་བཀའ་སྩལ་པ། ཁྱོད་ལ་ཐེ་ཙོམ་ཅི་ཡོད་པ། །འདྲི་བའི་དོན་དེ་ཞུས་ཤིག་དང། །རྣམ་པར་ཕྱེ་སྟེ་བཤད་པར་བྱ། །དེ་ནས་ཡང་རིགས་ཀྱི་ལྷ་མོས་བཅོམ་ལྡན་འདས་ལ་གསོལ་པ། བདག་དང་གཞན་ལ་ཕན་གདགས་ཕྱིར། །བྱང་ཆུབ་སེམས་དཔའ་རྣམས་ཀྱིས་ནི། །འཁོར་དང་མྱ་ངན་འདས་བྲལ་བའི། །བྱང་ཆུབ་སྤྱོད་པ་ཇི་ལྟར་སྤྱད། །དེ་ནས་བཅོམ་ལྡན་འདས་ཀྱིས་རིགས་ཀྱི་ལྷ་མོ་ལ་འདི་སྐད་ཅེས་བཀའ་སྩལ་ཏོ། ། ལྷ་མོ། ཆོས་ཀྱི་དབྱིངས་ལ་གནས་ཏེ་བྱང་ཆུབ་ཀྱི་སྤྱོད་པ་སྤྱད་པས་ནི་མཉམ་པ་ཉིད་ལ་ནན་ཏན་དུ་བྱའོ། །དེ་སྐད་ཅེས་བཀའ་སྩལ་པ་དང་རིགས་ཀྱི་ལྷ་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཇི་ལྟར་ན་ཆོས་ཀྱི་དབྱིངས་ལ་གནས་ཏེ་བྱང་ཆུབ་ཀྱི་སྤྱད་པ་སྤྱོད་ཅིང་མཉམ་པ་ཉིད་ལ་ནན་ཏན་དུ་བགྱི་བ་ལགས། བཀའ་
300b
སྩལ་པ། ལྷ་མོ། དེ་ནི་ཕུང་པོ་ལྔ་ལ་ཆོས་ཀྱི་དབྱིངས་སུ་འདོགས་ཏེ་ཆོས་ཀྱི་དབྱིངས་ནི་ཕུང་པོ་ལྔ་ཉིད་དོ། །ཕུང་པོ་ལྔའང་བརྗོད་དུ་མེད་པ། ཕུང་པོ་ལྔ་མ་ཡིན་པའང་བརྗོད་དུ་མེད་པ་སྟེ།་དེ་ལ་ཆོས་ཀྱི་དབྱིངས་དེ་ཉིད་ཕུང་པོ་ལྔ་ཡིན་ན་ནི་ཆད་པར་འགྱུར་རོ། །གལ་ཏེ་ཕུང་པོ་ལྔ་ལས་གཞན་པར་འདོད་ན་ནི་རྟག་པར་འགྱུར་ཏེ་མཚན་མ་གཉིས་དང་བྲལ་བ། མཐའ་གཉིས་ལ་མི་གནས་པ། བལྟར་མེད་པ། བལྟ་བར་བྱ་བ་ལས་འདས་པ། མིང་དང ། མཚན་མ་མེད་པ་དེ་ནི་ཆོས་ཀྱི་དབྱིངས་ཞེས་བརྗོད་དོ། །རིགས་ཀྱི་ལྷ་མོ། ཕུང་པོ་ལྔ་ལས་ཆོས་ཀྱི་དབྱིངས་སུ་ཇི་ལྟར་གདགས་ཞེ་ན། ཕུང་པོ་ལྔ་དེ་ནི་རྒྱུ་དང ། རྐྱེན་གྱིས་མ་བསྐྱེད་པ་སྟེ། དེའང་གལ་ཏེ་རྒྱུ་དང ། རྐྱེན་ལས་སྐྱེ་བ་ཞིག་ཡིན་ན་ནི་སྐྱེས་ཟིན་པ་སྐྱེ་འམ། མི་སྐྱེ་བ་སྐྱེ་ཞེས་བྱ། གལ་ཏེ་སྐྱེས་ཟིན་པ་སྐྱེ་ན་ནི་རྒྱུ་དང ། རྐྱེན་ཀྱང་མི་དགོས་པའི་རིགས་སོ། །གལ་ཏེ་མ་སྐྱེས་པ་སྐྱེ་ན་ནི་སྐྱེ་བ་དམིགས་སུ་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། གང་མ་སྐྱེས་པའི་ཆོས་རྣམས་ནི་ཡོད་པ་མ་ཡིན་པ་ཉིད་པས་མིང་མེད་པ། མཚན་མ་མེད་པ། གཞལ་བ་དང ། དཔག་པ་དང ། དཔེར་བྱ་བས་མི་བརྗོད་པ་སྟེ་རྒྱུ་དང ། རྐྱེན་གྱིས་བསྐྱེད་པར་བྱ་བ་མ་ཡིན་ནོ། །རིགས་ཀྱི་ལྷ་མོ། དཔེར་ན། རྔའི་སྒྲ་ནི་ཤིང་དང ། ཀོ་བ་དང ། ལག་པ་ལ་བརྟེན་ཏེ་སྒྲ་འབྱུང་མོད་ཀྱི། རྔའི་སྒྲ་དེ་ནི་འདས་པའང་སྟོང ། མ་འོངས་པའང་སྟོང ། ད་ལྟར་བྱུང་བའང་
301a
༄#། །སྟོང་སྟེ། རྔའི་སྒྲ་དེ་ནི་ཤིང་ལས་ཀྱང་མ་བྱུང ། ཀོ་བ་དང ། ལག་པ་ལས་ཀྱང་མ་བྱུང ། དུས་གསུམ་གྱིས་མ་བསྐྱེད་པས་མི་སྐྱེ་བ་སྟེ་གང་མི་སྐྱེ་བ་དེ་ནི་མི་འགོག་པའོ། །གང་མི་འགོག་པ་དེ་ནི་གང་ནས་ཀྱང་མ་འོངས་པའོ། །གང་ནས་ཀྱང་མ་འོངས་པ་དེ་ནི་གང་དུའང་མི་འགྲོ་བའོ། །གང་དུའང་མི་འགྲོ་བ་དེ་ནི་རྟག་པ་དང ། ཆད་པ་མ་ཡིན་པས་གཅིག་པའང་མ་ཡིན། ཐ་དད་པའང་མ་ཡིན་པའོ། །དེ་ཅིའི་ཕྱིར་ཞེ་ན། གལ་ཏེ་གཅིག་པ་ཡིན་ན་ཆོས་ཀྱི་དབྱིངས་དང་ཐ་མི་དད་པས་འོ་ན་ནི་བྱིས་པ་སོ་སོའི་སྐྱེ་བོ་རྣམས་ཀྱིས་ཀྱང་དོན་དམ་པའི་བདེན་པ་མངོན་དུ་གྱུར་པས་མྱ་ངན་ལས་འདས་པའི་བདེ་བ་དམ་པ་ཐོབ་པར་འགྱུར་བ་ཞིག་ན་དེ་ལྟ་མ་ཡིན་པས་དེ་གཅིག་པ་མ་ཡིན་ནོ། ། གལ་ཏེ་ཐ་དད་པ་ཡིན་ན་ནི་སངས་རྒྱས་དང ། བྱང་ཆུབ་སེམས་དཔའ་རྣམས་ཀྱི་སྤྱོད་པའང ། མཚན་མ་དེ་ཉིད་འཛིན་པ་ཡིན་པས་རྣམ་པར་གྲོལ་བར་ཡང་མི་འགྱུར་ཞིང་ཉོན་མོངས་པའི་འཆིང་བ་དང་མ་བྲལ་བས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་མི་རྒྱའོ། །དེ་ཅིའི་ཕྱིར་ཞེ་ན། འཕགས་པ་རྣམས་ནི་འདུ་བྱེད་དང ། འདུ་བྱེད་མ་ཡིན་པ་ཡང་དག་པའི་ངོ་བོར་གཅིག་པའི་ཕྱིར་ཐ་དད་པ་མ་ཡིན་ནོ། །དེ་བས་ན་ཕུང་པོ་ལྔ་དེ་ནི་ཡོད་པའང་མ་ཡིན། མེད་པའང་མ་ཡིན། རྒྱུ་དང །
301b
རྐྱེན་གྱིས་བསྐྱེད་པའང་མ་ཡིན། རྒྱུ་དང ། རྐྱེན་མེད་པས་བསྐྱེད་པའང་མ་ཡིན་པ། ཚིག་གིས་ཐོག་ཏུ་མི་ཕེབས་པ། མིང་དང ། མཚན་མ་མེད་པ། རྒྱུ་དང ། རྐྱེན་མེད་པ། དཔེས་བསྟན་དུ་མེད་པ། ཐོག་མ་དང ། ཐ་མར་དབེན་པ། རང་གི་ངང་\?\གིས་སྟོང་པ་སྟེ་དེ་ནི་འཕགས་པ་རྣམས་ཀྱིས་མཁྱེན་པར་བྱ་བ་ཡིན་གྱི། གཞན་དུ་སྤྱོད་ཡུལ་དུ་མ་གྱུར་པའོ། །དེ་བས་ན་ཕུང་པོ་ལྔ་ལ་ཆོས་ཀྱི་དབྱིངས་སུ་སྟོན་ཏོ། །གཞན་ཡང ། རིགས་ཀྱི་ལྷ་མོ། གང་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དམ་པ་དང ། ཀུན་རྫོབ་གཞན་དང ། གཞན་མ་ཡིན་པར་འདོད་པ་དེ་ནི་དཔག་པར་དཀའ་བ་སྟེ་འཕགས་པ་དང ། མ་རབས་ཀྱི་སྤྱོད་ཡུལ་ནི་གཅིག་པ་དང ། ཐ་དད་པའི་རང་བཞིན་མ་ཡིན་ཏེ། ཀུན་རྫོབ་ཀྱང་མ་སྤངས། དོན་དམ་པ་དང་ཡང་བྲལ་བར་མ་གྱུར་པ་དེ་ནི་ཆོས་ཀྱི་དབྱིངས་ལ་གནས་ཤིང་བྱང་ཆུབ་སེམས་དཔའི་སྤྱད་པ་སྤྱོད་པའོ། །དེའི་ཚེ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། རིགས་ཀྱི་ལྷ་མོ་དེ་རབ་ཏུ་དགའ་བ་དང ། ཡིད་བདེ་བ་སྐྱེས་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་དེ་སྤྱི་བོས་ཕྱག་བཙལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་
302a
༄#། །བཅོམ་ལྡན་འདས་ཀྱིས་བཀའ་སྩལ་པའི་བྱང་ཆུབ་སེམས་དཔའི་སྤྱོད་པ་དེ་ལ་བདག་གིས་བསླབ་པར་འཚལ་ལོ། །དེ་ནས་མི་མཇེད་ཀྱི་བདག་པོ་ཚངས་པ་ཆེན་པོ་འཁོར་འདུས་པ་དེའི་ནང་ན་འདུག་པས་རིགས་ཀྱི་ལྷ་མོ་རིན་ཆེན་འོད་འཕྲོ་ལ་འདི་སྐད་ཅེས་དྲིས་སོ། །ལྷ་མོ། བྱང་ཆུབ་སེམས་དཔའི་སྤྱོད་པ་ཤིན་ཏུ་བསྒྲུབ་པར་དཀའ་བ་འདི་ཁྱོད་ཇི་ལྟར་སྤྱོད་པས་དེ་ལ་དབང་ཐོབ་པར་འགྱུར། དེ་ནས་རིགས་ཀྱི་ལྷ་མོས་ཚངས་པ་ཆེན་པོ་ལ་འདི་སྐད་ཅེས་སྨྲས་སོ། །ཚངས་པའི་རྒྱལ་པོ་ཆེན་པོ། ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་དེ་ཤིན་ཏུ་ཟབ་པས་སོ་སོའི་སྐྱེ་བོ་ཐམས་ཅད་ཀྱིས་དེའི་དོན་མི་ཤེས་ཏེ་འཕགས་པ་རྣམས་ཀྱི་སྤྱོད་ཡུལ་བས་མཆོག་ཏུ་ཕྲ་བ་ཤེས་པར་དཀའ་བའོ། །བདག་ནི་ཆོས་འདི་ལ་བརྟེན་ཏེ་བདེ་བར་གནས་པ་ཐོབ་བོ། །གལ་ཏེ་ཚིག་དེ་བདེན་པ་ལྟ་ན་སྙིགས་མ་ལྔའི་འཇིག་རྟེན་གྱི་ཁམས་འདི་དག་ནི་ཚད་མེད་གྲངས་མེད་དཔག་ཏུ་མེད་པའི་སེམས་ཅན་དེ་དག་ཐམས་ཅད་གསེར་གྱི་ཁ་དོག་ཅན་དུ་གྱུར་ཏེ་མཚན་སུམ་ཅུ་རྩ་གཉིས་དང་ལྡན་པ། སྐྱེས་བ་འང་མ་ཡིན། བུད་མེད་ཀྱང་མ་ཡིན་པ་ཤ་སྟག་ཏུ་གྱུར་ཏེ་རིན་པོ་ཆེའི་པདྨ་ལ་འདུག་ཅིང་བདེ་བ་ཚད་མེད་པ་ལ་ལོངས་སྤྱོད་པ་དང ། ལྷའི་མེ་ཏོག་མཆོག་གི་ཆར་འབབ་ཅིང་
302b
ལྷའི་སིལ་སྙན་དང ། རོལ་མོ་མ་དཀྲོལ་བར་རང་བྱུང་པའི་མཆོད་པ་དེ་ལྟ་བུ་དང་ལྡན་པར་ཤོག་ཅིག་ཅེས་སྨྲས་མ་ཐག་ཏུ་སྙིགས་མ་ལྔའི་འཇིག་རྟེན་གྱི་ཁམས་ཐམས་ཅད་ན་སེམས་ཅན་ཇི་སྙེད་འཁོད་པ་དེ་དག་ཐམས་ཅད་གསེར་གྱི་ཁ་དོག་ཅན། སྐྱེས་བུ་ཆེན་པོའི་མཚན་དང་ལྡན་པ། སྐྱེས་པ་འང་མ་ཡིན། བུད་མེད་ཀྱང་མ་ཡིན་པར་གྱུར་ནས་རིན་པོ་ཆེའི་པདྨ་ལ་འདུག་ཅིང་བདེ་བ་ཚད་མེད་པས་ལོངས་སྤྱོད་པར་གྱུར་པ་ནི་ཇི་ལྟར་གཞན་འཕྲུལ་དབང་བྱེད་ལྷའི་གཞལ་མེད་ཁང་པ་ན་ངན་འགྲོ་ཐམས་ཅད་མེད་ཅིང་རིན་པོ་ཆེའི་ལྗོན་ཤིང་སྣ་ཚོགས་བྲེས་པ། རིན་པོ་ཆེ་སྣ་བདུན་གྱི་པདྨས་འཇིག་རྟེན་གྱི་ཁམས་ཁྱབ་པར་བྱས་པ། རིན་པོ་ཆེ་སྣ་བདུན་དང ། ལྷའི་མེ་ཏོག་གི་ཆར་བབ་པ། ལྷའི་རོལ་མོ་སྣ་ཚོགས་ཀྱིས་ལོངས་སྤྱོད་པར་གནས་པ་བཞིན་དུ་གྱུར་ཏོ། །དེ་ནས་རིགས་ཀྱི་ལྷ་མོ་རིན་ཆེན་འོད་འཕྲོ་འང་བུད་མེད་ཀྱི་ལུས་ལས་ཚངས་པའི་ལུས་སུ་བསྒྱུར་ཅིང་འདུག་གོ་།བྱང་ཆུབ་སེམས་དཔའ་རིན་ཆེན་འོད་འཕྲོ་ལ་ཚངས་པའི་རྒྱལ་པོས་འདི་སྐད་ཅེས་སྨྲས་སོ། །བཙུན་པ། ཁྱོད་ཇི་ལྟར་བྱང་ཆུབ་སེམས་དཔའི་སྤྱད་པ་སྤྱོད། སྨྲས་པ། ཚངས་པའི་རྒྱལ་པོ་ཆེན་པོ། ཆུའི་ཟླ་བ་བྱང་ཆུབ་ཀྱི་སྤྱད་པ་སྤྱོད་པ་བཞིན་བདག་ཀྱང་བྱང་ཆུབ་ཀྱི་སྤྱད་པ་སྤྱོད་དོ། །རྨི་ལམ་བྱང་ཆུབ་ཀྱི་སྤྱད་པ་སྤྱོད་པ་བཞིན་བདག་ཀྱང་བྱང་ཆུབ་ཀྱི་སྤྱད་པ་སྤྱོད་དོ། །སྨིག་རྒྱུ་བྱང་ཆུབ་ཀྱི་སྤྱད་པ་སྤྱོད་པ་
303a
༄#། །བཞིན་བདག་ཀྱང་བྱང་ཆུབ་ཀྱི་སྤྱད་པ་སྤྱོད་དོ། །སྒྲ་བརྙན་བྱང་ཆུབ་ཀྱི་སྤྱད་པ་སྤྱོད་པ་བཞིན་བདག་ཀྱང་བྱང་ཆུབ་ཀྱི་སྤྱད་པ་སྤྱོད་དོ། །དེ་སྐད་ཅེས་བཤད་པ་ཚངས་པ་ཆེན་པོས་ཐོས་ནས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །བཙུན་པ། ཁྱོད་དོན་གང་ལ་གནས་ཏེ་ཚིག་དེ་སྐད་ཅེས་སྨྲ། ལྷ་མོས་སྨྲས་པ། ཚངས་པའི་རྒྱལ་པོ། ཆོས་གང་ཡང་བདེན་པའི་མཚན་ཉིད་དུ་མ་གྲུབ་ཅིང་རྒྱུ་དང ། རྐྱེན་ལ་བརྟེན་ནས་གྲུབ་པའི་ཕྱིར་རོ། །ཚངས་པའི་རྒྱལ་པོས་སྨྲས་པ། གལ་ཏེ་དེ་ལྟ་ན་སོ་སོའི་སྐྱེ་བོ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བའི་རིགས་སོ། །སྨྲས་པ། སྐྱེས་བུ་ཁྱོད། ཅིའི་ཕྱིར་དེ་སྐད་ཅེས་སྨྲ། བྱིས་པ་འང་གཞན། མཁས་པ་འང་གཞན། བྱང་ཆུབ་ཀྱང་གཞན། བྱང་ཆུབ་མ་ཡིན་པ་འང་གཞན། རྣམ་པར་གྲོལ་པ་འང་གཞན། རྣམ་པར་གྲོལ་བ་མ་ཡིན་པ་འང་གཞན་མ་ཡིན་མོད་ཀྱི། ཚངས་པ་ཆེན་པོ།་ཆོས་དེ་དག་ཐམས་ཅད་ནི་ཆོས་ཀྱི་དབྱིངས་སུ་མཉམ་པ་ཉིད་དོ། །དེ་སོ་སོ་མ་ཡིན་པ། ཡང་དག་པར་དབྱེར་མེད་པ། བར་མཚམས་མེད་པ། འཕེལ་བ་དང ། འགྲིབ་པ་མེད་པ་ལ་མངོན་པར་ཆགས་ཤིང་འཛིན་ཏོ། །ཚངས་པའི་རྒྱལ་པོ། དཔེར་ན། སྒྱུ་མ་མཁན་དང ། དེའི་སློབ་མ་སྒྱུ་མ་སྤྲུལ་པ་ལ་མཁས་ཤིང་བྱང་བར་གྱུར་བ་ཞིག་གིས་ལམ་གྱི་བཞི་མདོར། ས་དང ། བྱེ་མ་
303b
དང།་ཤིང་དང ། རྩཝ་དང ། ལོ་མ་ལ་སོགས་པ་གནས་གཅིག་ཏུ་བསྡུས་ཏེ་སྒྱུ་མ་སྤྲུལ་པ། འདི་ལྟ་སྟེ། རྟ་དང ། གླང་པོ་ཆེའི་ཚོགས་དང ། དམག་དང ། ཤིང་རྟ་ལ་སོགས་པའི་ཚོགས་དང ། རིན་པོ་ཆེ་སྣ་བདུན་གྱི་ཕུང་པོ་དང ། བང་བ་དང ། མཛོད་ལ་སོགས་པ་རྣམ་པ་སྣ་ཚོགས་ཀུན་ལ་སྟོན་ཏོ། །དེ་ལ་སེམས་ཅན་བྱིས་པ་བླུན་པོ་མི་ཤེས་པའི་རང་བཞིན་ཅན་དག་གིས་མཐོང་ན་སྒྱུ་མ་སྤྲུལ་པར་མི་ཤེས་ཏེ། རྟ་དང ། གླང་པོ་ཆེ་ལ་སོགས་པ་མཐོང་བ་དང ། ཐོས་པ་འདི་དག་ནི་ཡང་དག་པར་ཡོད་པ་ཡིན་ཏེ་གཞན་ནི་བརྫུན་པ་སྙམ་དུ་སེམས་ཤིང་ཕྱིས་ཀྱང་དེ་ལ་ཞིབ་ཏུ་རྟོག་པར་མི་བྱེད་དོ། །དེ་ལ་མཁས་པ་ཤེས་པའི་རང་བཞིན་ཅན་རྣམས་ནི་དེ་ལྟ་མ་ཡིན་ཏེ་སྒྱུ་མ་སྤྲུལ་པ་ཡིན་པར་ཤེས་ནས་ཐོས་པ་དང ། མཐོང་བ་དེ་དག་ལ་འདི་སྙམ་དུ་སེམས་ཏེ་རྟ་དང ། གླང་པོ་ཆེ་ལ་སོགས་པ་བདག་གིས་མཐོང་བ་འདི་ནི་ཡང་དག་པ་མ་ཡིན་པ་སྒྱུ་མ་སྤྲུལ་པས་འགྲོ་བའི་མིག་སླུ་བར་བྱེད་པ་སྟེ་རྟ་དང ། གླང་པོ་ཆེ་དང ། བང་མཛོད་ལ་སོགས་པ་འདི་དག་ནི་དེར་སྣང་བ་ཙམ་དུ་ཟད་དེ་བདག་གིས་མཐོང་བ་དང ། ཐོས་པ་བཞིན་དུ་བདེན་པ་མ་ཡིན་པར་ཡང་འཛིན་ལ་ཕྱིས་ཞིབ་ཏུ་བརྟགས་ན་འང་བརྫུན་པ་སླུ་བའི་ཆོས་སུ་ཤེས་སོ། །དེ་ལྟ་བས་ན་མཁས་པ་རྣམས་ཀྱིས་ནི་ཆོས་འདི་དག་ཐམས་ཅད་ནི་ཡང་དག་པ་མ་ཡིན་པའི་རང་བཞིན་དུ་རྟོགས་ཏེ་ཇི་ལྟར་མཐོང་བ་དང ། ཐོས་པ་འང་
304a
༄#། །ཡང་ཀུན་རྫོབ་ཙམ་དུ་དེ་དག་གི་དོན་མཚོན་པ་དང ། ཚིག་གི་ཐ་སྙད་ལ་བརྟེན་ནས་ཡང་དག་པའི་དོན་ཤེས་པར་བྱ་བ་ཙམ་དུ་ཟད་ཀྱི་དོན་དམ་པ་ནི་དེ་ལྟ་མ་ཡིན་ནོ་སྙམ་མོ། །ཡང་ཚངས་པ་ཆེན་པོ། བྱིས་པ་སོ་སོའི་སྐྱེ་པོ་འཕགས་པ་འཇིག་རྟེན་ལས་འདས་པའི་ཤེས་རབ་ཀྱི་མིག་མ་ཐོབ་པ་རྣམས་ཀྱིས་ནི་ཆོས་འདི་དག་ཐམས་ཅད་ཀྱི་དེ་བཞིན་ཉིད་བརྗོད་དུ་མེད་པར་ཡང་མི་ཤེས་ལ། གང་མཐོང་བ་དང ། ཐོས་པ་དང ། འདུ་བྱེད་དང ། འདུ་བྱེད་མ་ཡིན་པའི་ཆོས་རྣམས་ཇི་ལྟར་བརྟགས་པ་ལྟར་བདེན་པ་ཉིད་དུ་མངོན་པར་ཞེན་ཏེ་ཆོས་རྣམས་ཀྱི་དེ་བཞིན་ཉིད་བརྗོད་དུ་མེད་པ་དོན་དམ་པའི་ཚུལ་དེ་ཤེས་པར་མི་ནུས་སོ། །དེ་ལ་འཕགས་པ་རྣམས་ཀྱིས་ནི་གང་གཟིགས་ཤིང་གསན་པ་དང ། འདུ་བྱེད་དང ། འདུ་བྱེད་མ་ཡིན་པའི་ཆོས་རྣམས་ཀྱི་མཐུ་དང ། ལས་ཇི་ལྟ་བུ་ཡིན་པ་དེ་ལ་བདེན་པའོ་ཞེས་མངོན་པར་མི་ཞེན་ཏེ་འདུ་བྱེད་ཀྱི་ཆོས་ཀྱང་མི་བདེན་པ། འདུ་བྱེད་ཀྱི་མ་ཡིན་པའི་ཆོས་ཀྱང་མི་བདེན་པ། ཡང་དག་པ་མ་ཡིན་པའི་རྟོག་པས་བརྟགས་པ་ཙམ་དུ་འདུ་བྱེད་དང ། འདུ་བྱེད་མ་ཡིན་པའི་མཚན་ཉིད་ཀྱང་མིང་ཙམ་དུ་ཟད་པ། བདེན་པའི་རང་བཞིན་དུ་མི་གྲུབ་པ་སྟེ་འཕགས་པ་རྣམས་ཀྱིས་ཀུན་རྫོབ་ཀྱི་ཐ་སྙད་ལ་བརྟེན་ནས་ཡང་དག་པ་བདེན་པའི་དོན་དེ་སྟོན་པར་བྱེད་དོ། །དེ་བཞིན་དུ་ཚངས་པ་ཆེན་པོ། གང་འཕགས་པ་རྣམས་ནི་འཕགས་
304b
པའི་ཡེ་ཤེས་དང ། འཕགས་པའི་གཟིགས་པས་ཆོས་རྣམས་ཀྱི་དེ་བཞིན་ཉིད་བརྗོད་དུ་མེད་པ་བཞིན་འདུ་བྱེད་དང ། འདུ་བྱེད་མ་ཡིན་པའི་ཆོས་ཀྱང་དེ་བཞིན་དུ་ལྟ་སྟེ་ཀུན་རྫོབ་ཏུ་མིང་དང ། མཚན་མ་སྣ་ཚོགས་ལ་བརྟེན་ནས་གཞན་ལ་སྟོན་པར་བྱེད་དོ། །དེ་ནས་ཡང་བྱང་ཆུབ་སེམས་དཔའ་རིན་ཆེན་འོད་འཕྲོ་ལ་ཚངས་པ་ཆེན་པོས་འདི་སྐད་ཅེས་སྨྲས་སོ། །སེམས་ཅན་ཇི་སྙེད་ཅིག་གིས་ཆོས་ཟབ་མོ་འདི་ལྟ་བུ་རྟོགས་ཤིང་ཤེས་པར་ནུས། སྨྲས་པ། ཚངས་པ་ཆེན་པོ། གང་སྤྲུལ་པ་མང་པོའི་སེམས་དང ། སེམས་ལས་བྱུང་བས་ཆོས་ཟབ་མོ་འདི་ཡང་དག་པར་ཤེས་པར་གྱུར་པ་དེ་སྙེད་ཀྱིས་ཤེས་སོ། །ཚངས་པའི་རྒྱལ་པོས་སྨྲས་པ། སྤྲུལ་པ་དེ་དག་ཉིད་ཀྱང་རང་བཞིན་ཡོད་པ་མ་ཡིན་ན་དེ་དག་གི་སེམས་དང ། སེམས་ལས་བྱུང་བ་གང་ནས་སྐྱེ་བར་འགྱུར། སྨྲས་པ། གང་ཆོས་ཀྱི་དབྱིངས་ཡོད་པ་འང་མ་ཡིན་མེད་པ་འང་མ་ཡིན་པར་ཡང་དག་པར་ཤེས་པ་དེ་དག་གིས་ཟབ་མོ་དེའི་དོན་ཤེས་པར་ནུས་སོ། །དེ་ནས་ཚངས་པ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་རིན་ཆེན་འོད་འཕྲོ་འདི་ནི་བསམ་གྱིས་མི་ཁྱབ་པ་སྟེ་ཆོས་ཀྱི་གཞུང་ཟབ་མོ་འདི་ལ་མཁས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ཏེ། ཚངས་པ་ཆེན་པོ། དེ་ཇི་ལྟར་ཁྱོད་ཀྱིས་སྨྲས་པ་དེ་བཞིན་ནོ། །བྱང་ཆུབ་སེམས་དཔའ་རིན་ཆེན་འོད་འཕྲོ་འདིས་ཁྱོད་ལ་ཇི་སྐད་བསྟན་པ་བཞིན་དུ་ནན་ཏན་དུ་སྒྲུབས་ཤིག་དང ། མི་སྐྱེ་
305a
༄#། །བའི་ཆོས་ལ་བཟོད་པ་ཐོབ་པར་འགྱུར་རོ། །དེ་ནས་ལྷའི་རྒྱལ་པོ་ཚངས་པ་ཆེན་པོ་དང ། གཞན་ཡང ། ཚངས་པའི་འཁོར་དེ་དག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བས་བྱང་ཆུབ་སེམས་དཔའ་རིན་ཆེན་འོད་འཕྲོའི་རྐང་པ་གཉིས་ལ་སྤྱི་བོས་ཕྱག་བཙལ་ཏེ་ཚིག་འདི་སྐད་ཅེས་སྨྲས་སོ། །དེང་སྐྱེས་བུ་ཆེན་པོ་ཁྱེད་དང་ཕྲད་ཅིང་བདག་ཅག་གིས་དམ་པའི་ཆོས་འདི་ལྟ་བུ་ཐོས་བར་གྱུར་པ་ངོ་མཚར་ཆེ་ལགས་སོ། །དེ་ནས་བཅོམ་ལྡན་འདས་ཀྱིས་ཚངས་པ་ཆེན་པོ་ལ་བཀའ་སྩལ་པ། བྱང་ཆུབ་སེམས་དཔའ་རིན་ཆེན་འོད་འཕྲོ་འདི་མ་འོངས་པའི་དུས་ན་རིན་པོ་ཆེའི་དཔལ་གྱི་སྙིང་པོ་ཞེས་བྱ་བ། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང ། མི་རྣམས་ཀྱི་སྟོན་པ།་སངས་རྒྱས་བཅོམ་ལྡན་འདས་སུ་འགྱུར་རོ་ཞེས་བཀའ་སྩལ་ཏོ། །དེ་སྐད་ཅེས་བཀའ་སྩལ་པ་དེའི་ཚེ་བྱང་ཆུབ་སེམས་དཔའ་ཁྲི་ཕྲག་སུམ་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ལྷའི་བུ་ཁྲི་ཕྲག་བརྒྱད་སྟོང་དང ། རྒྱལ་པོ་དང ། བློན་པོ་ལ་སོགས་པ་ཚད་མེད་གྲངས་མེད་པ་རྣམས་ཀྱིས་རྡུལ་མེད་རྡུལ་དང་
305b
བྲལ་བའི་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ཏོ། །དེ་ནས་འཁོར་འདུས་པ་དེའི་ནང་ནས་དགེ་སློང་ཁྲི་ཕྲག་ལྔ་བཅུ་བྱང་ཆུབ་སེམས་དཔའི་སྤྱད་པ་སྤྱོད་པ། བྱང་ཆུབ་ཀྱི་སེམས་ལས་ཕྱིར་མི་ལྡོག་པར་སེམས་པ་དེ་དག་ཀྱང་བྱང་ཆུབ་སེམས་དཔའ་རིན་ཆེན་འོད་འཕྲོས་ཆོས་བསྟན་པ་འདི་ཐོས་ནས་བྱང་ཆུབ་ཀྱི་སེམས་ཕྱིར་ཞིང་བརྟན་པ་དང ། བསམ་གྱིས་མི་ཁྱབ་བ་བླ་ན་མེད་པའི་སྨོན་ལམ་ཡོངས་སུ་རྫོགས་ནས་ཀྱང་བྱང་ཆུབ་ཏུ་སེམས་བསྐྱེད་དེ་སོ་སོ་ནས་རང་རང་གི་གོས་གྱོན་པ་ཕུད་དེ། བྱང་ཆུབ་སེམས་དཔའ་ལ་གསོལ་ནས་བླ་ན་མེད་པའི་མཆོག་དམ་པའི་སེམས་བསྐྱེད་དེ། སྨོན་ལམ་འདི་སྐད་ཅེས་གསོལ་ཏོ། །བདག་ཅག་གི་དགེ་བའི་རྩ་བ་ཅི་མཆིས་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ་ཞེས་སྨོན་ལམ་བཏབ་བོ། །ཚངས་པ་ཆེན་པོ། དགེ་སློང་དེ་དག་གིས་བསོད་ནམས་དེ་ལ་བརྟེན་ནས་ཇི་སྐད་སྨྲས་པ་བཞིན་ནན་ཏན་དུ་བསྒྲུབས་ནས་བསྐལ་པ་ཆེན་པོ་དགུ་བཅུ་འདས་པ་ན་འཁོར་བ་ལས་ཡོངས་སུ་འདས་བའི་ཤེས་པ་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལ་བཀའ་སྩལ་པ། དགེ་སློང་དག་།ཁྱེད་བསྐལ་པ་གྲངས་མེད་པ་སུམ་ཅུ་འདས་པའི་འོག་ཏུ་བླ་ན་མེད་པའི་སངས་རྒྱས་སུ་གྱུར་ཏེ་བསྐལ་པའི་མིང་ནི་རྒྱལ་བར་དཀའ་བའི་འོད་ཀྱི་རྒྱལ་པོ་ཞེས་བྱ་བ། ཡུལ་གྱི་མིང་ནི་དྲི་མ་མེད་པའི་
306a
༄#། །འོད་ཅེས་བྱ་བར་དུས་ཅིག་ཏུ་ཀུན་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ་དེ་དག་ཀུན་ཀྱང་མཚན་སྨོན་ལམ་རྣམ་པར་བཀོད་པའི་རྒྱལ་པོ་ཞེས་བྱ་བ། ཡོན་ཏན་གྱི་མཚན་བཅུ་ཡོངས་སུ་རྫོགས་པར་འགྱུར་རོ་ཞེས་ལུང་བསྟན་ཏོ། །གཞན་ཡང ། ཚངས་པ་ཆེན་པོ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་གང་ཉན་པ་དང ། འཛིན་པ་དེ་དག་གི་མཐུ་དང ། གཟི་བརྗིད་ཆེན་པོ་དང་ལྡན་པར་འགྱུར་ཏེ། དཔེར་ན། གང་ལ་ལ་ཞིག་གིས་ཐབས་དང་མི་ལྡན་པས་ཕ་རོལ་ཏུ་ཕྱིན་པ་དྲུག་བསྐལ་པ་ཆེན་པོ་བརྒྱད་སྟོང་དུ་སྤྱོད་པ་བས། གང་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་གསེར་འོད་དམ་པའི་མདོ་སྡེའི་དབང་པོའི་རྒྱལ་པོ་འདི་གླེགས་བམ་དུ་བྲིས་ཏེ་ཟླ་བ་ཕྱེད་ཕྱེད་ཅིང་སེམས་རྩེ་གཅིག་ཏུ་བྱས་ཏེ་ཀློག་ཅིང་འདོན་ན། བསོད་ནམས་ཀྱི་ཕུང་པོ་འདི་ལ་བསོད་ནམས་ཀྱི་ཕུང་བོ་སྔ་མ་དེས་བརྒྱའི་ཆར་ཡང་ཉེ་བར་མི་ཕོང་པ་ནས་གྲངས་སུ་བགྲང་བ་དང ། དཔེར་བསྒྲུན་པར་ཡང་མི་བཟོད་དོ། །ཚངས་པ་ཆེན་པོ། དེ་ལྟ་བས་ན་ཁྱེད་ཀྱིས་རྟག་ཏུ་ཡིད་ལ་བྱ་ཞིང་ནན་ཏན་དུ་བསྒྲུབ་པ་དང ། གཟུང་ཞིང་གཞན་ལ་འང་ཡང་དག་པར་རྒྱ་ཆེར་བསྟན་པར་བྱའོ། །དེ་ཅིའི་ཕྱིར་ཞེ་ན། སྔོན་འདས་པའི་དུས་ན་ང་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ཇི་ལྟར་སྐྱེས་བུ་དཔའ་བོ་
306b
གཡུལ་ངོར་ལུས་དང ། སྲོག་ལ་མི་ལྟ་བ་བཞིན་དུ་ངས་ཀྱང་མདོ་སྡེའི་དབང་པོའི་རྒྱལ་པོ་འདི་གཟུང་ཞིང་འཛིན་པ་དང ། ཀློག་ཅིང་འདོན་པ་དང ། གཞན་ལ་འང་རྒྱ་ཆེར་ཡང་དག་པར་སྟོན་པ་ལ་ཐོགས་པ་མེད་པར་གྱུར་ཏོ། །ཚངས་པ་ཆེན་པོ། དཔེར་ན། འཁོར་ལོས་བསྒྱུར་བའི་རྒྱལ་པོ་ནམ་འཇིག་རྟེན་ན་གནས་ཀྱི་བར་རིན་པོ་ཆེ་སྣ་བདུན་ཡང་མེད་པར་ཡང་མི་འགྱུར་རོ། ། གལ་ཏེ་རྒྱལ་པོ་མི་བཞུགས་ན་རིན་པོ་ཆེ་སྣ་བདུན་ཡང་མོད་ལ་མེད་པར་འགྱུར་རོ། །ཚངས་པ་ཆེན་པོ། དེ་ལྟར་དེ་བཞིན་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཇིག་རྟེན་ན་གནས་ཀྱི་བར་དུ་བླ་ན་མེད་པའི་ཆོས་རིན་པོ་ཆེ་ཐམས་ཅད་ཀྱང་ནུབ་པར་མི་འགྱུར་རོ། །མདོ་སྡེའི་དབང་པོ་འདི་ནམ་མེད་པ་ན་གཞན་དག་ཀྱང་ནུབ་པར་འགྱུར་རོ། །དེ་ལྟ་བས་ན་མདོ་སྡེའི་རྒྱལ་པོ་འདི་སེམས་རྩེ་གཅིག་ཏུ་བྱས་ཏེ་མཉན་པ་དང ། གཟུང་བ་དང ། ཀློག་པ་དང ། གཞན་དག་ལའང་རྒྱ་ཆེར་བཤད་པ་དང ། ཡི་གེར་འདྲིར་འཇུག་པ་དང ། ལུས་དང ། སྲོག་ལ་མི་བལྟ་བས་ངལ་བ་དང ། དུབ་པ་ཁྱད་དུ་གསོད་ཅིང་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱ་སྟེ་བསོད་ནམས་ཀྱི་ནང་ན་མཆོག་ཡིན་པར་ངའི་འཁོར་རྣམས་ཀྱིས་ཀྱང་དེ་བཞིན་དུ་བསླབ་ཅིང་ནན་ཏན་དུ་བྱའོ།། དེ་ནས་ཚངས་པའི་རྒྱལ་པོ་ཆེན་པོ་ལ་སོགས་ཏེ་ཚངས་བའི་འཁོར་གྲངས་མེད་བ་དང ། བརྒྱ་བྱིན་ལྷའི་དབང་པོ་དང ། རྒྱལ་པོ་ཆེན་པོ་བཞི་དང ། གཞན་ཡང ། གནོད་སྦྱིན་གྱི་དབང་པོ་ལ་སོགས་པ་དེ་དག་ཐམས་
307a
༄#། །ཅད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བསྲུང་བ་དང ། ཡོངས་སུ་རྒྱས་པར་བགྱིའོ། །ཆོས་འདི་སྟོན་པའི་ཚེ་བགེགས་དང ། བར་ཆད་ཀུན་བསལ་ཏེ་དགེ་བར་འགྱུར་བ་དང ། ཁ་དོག་དང ། མཐུ་ཡོངས་སུ་རྫོགས་པར་འགྱུར་བ་དང ། སྤོབས་པ་ཐོགས་པ་མེད་པ་དང ། ལུས་དང།་སེམས་བདེ་བར་འགྱུར་བ་དང ། དེའི་འཁོར་རྣམས་ཀྱང་བདེ་བ་ཉམས་སུ་མྱོང་བ་དང ། གང་ན་གནས་པའི་ཡུལ་འཁོར་དེའང་མུ་གེ་དང ། དགྲའི་འཇིགས་པ་དང ། མི་མ་ཡིན་པས་འཚེ་བ་ཞིག་མཆིས་ན་འང་བདག་ཅག་ལྷའི་འཁོར་གྱིས་ཡོངས་སུ་བསྲུངས་པས་དེ་དག་བདེ་ཞིང་སྐྱིད་པ་དང ། གནོད་པ་རྣམས་མ་འབྱུང་བར་གྱུར་ན། དེ་དག་ཀྱང་བདག་ཅག་ལྷའི་མཐུ་ལགས་པར་འཚལ་བར་བགྱི་འོ། །གང་ལ་ལ་ཞིག་མདོ་སྡེ་འདི་ལ་མཆོད་ཅིང་རིམ་གྲོ་བགྱིད་ན་དེ་ལ་བདག་ཅག་གིས་སངས་རྒྱས་བཅོམ་ལྡན་འདས་དང་འདྲ་བར་མཆོད་ཅིང་རིམ་གྲོ་བགྱིད་དོ། །དེ་ནས་བཅོམ་ལྡན་འདས་ཀྱིས་ལྷའི་རྒྱལ་པོ་ཚངས་པ་ཆེན་པོ་ལ་སོགས་ཏེ་ཚངས་པའི་འཁོར་དེ་དག་དང ། རྒྱལ་པོ་ཆེན་པོ་བཞི་དང ། གནོད་སྦྱིན་གྱི་དབང་པོ་
307b
ལས་སོགས་པ་རྣམས་ལ་ལེགས་སོ་ཞེས་བཀའ་སྩལ་ཏོ། །ལེགས་སོ། །ལེགས་སོ། །རིགས་ཀྱི་བུ། ཁྱོད་ཀྱིས་དམ་པའི་ཆོས་ཟབ་མོ་འདི་འང་ཐོས། མདོ་སྡེའི་དབང་པོ་འདི་དང་འདི་འཛིན་པ་དང ། བསྲུང་བ་དང ། བསྐྱབ་པའི་སེམས་བསྐྱེད་པ་དེས་བསོད་ནམས་ཀྱི་ཁྱད་པར་ཚད་མེད་པ་དང་ལྡན་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ།། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚངས་པའི་རྒྱལ་པོ་ལ་སོགས་པ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སྟོང་པ་ཉིད་ལ་བརྟེན་ནས་བསམ་པ་ཡོངས་སུ་རྫོགས་པ་ཞེས་བྱ་བའི་ལེའུ་སྟེ་བཅུ་པའོ།། །།དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་དང ། རྒྱལ་པོ་ཆེན་པོ་ཡུལ་འཁོར་སྲུང་དང ། རྒྱལ་པོ་ཆེན་པོ་འཕགས་སྐྱེས་པོ་དང ། རྒྱལ་པོ་ཆེན་པོ་མིག་མི་བཟང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ནི་དེ་བཞིན་གཤེགས་པ་ཐམས་ཅད་ཀྱིས་གསུངས་པ། དེ་བཞིན་གཤེགས་པ་ཐམས་ཅད་ཀྱིས་གཟིགས་པ། དེ་བཞིན་གཤེགས་པ་ཐམས་ཅད་ཀྱིས་དགོངས་པ། བྱང་ཆུབ་སེམས་དཔའི་ ་
308a
༄#། །ཐམས་ཅད་ཀྱིས་ཡོངས་སུ་བཟུང་བ། ལྷའི་ཚོགས་ཐམས་ཅད་ཀྱིས་ཕྱག་བགྱིས་པ། ལྷའི་ཚོགས་ཐམས་ཅད་ཀྱིས་མཆོད་པ། ལྷའི་དབང་པོའི་ཚོགས་ཐམས་ཅད་ཀྱིས་མངོན་པར་བསྟོད་པ། འཇིག་རྟེན་སྐྱོང་བ་ཐམས་ཅད་ཀྱིས་མཆོད་ཅིང་བསྔགས་ཏེ་རྗེད་པས་རབ་ཏུ་བཀུར་བ། ལྷའི་ཁང་ཁྱིམ་ཐམས་ཅད་སྣང་བར་བགྱིས་པ། སེམས་ཅན་ཐམས་ཅད་ལ་མཆོག་ཏུ་བདེ་བ་ཐམས་ཅད་རབ་ཏུ་སྦྱིན་པར་བགྱིད་པ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་སྐེམས་པ། འཇིགས་པ་ཐམས་ཅད་ཀྱི་རྒྱུན་གཅོད་པ། ཕ་རོལ་གྱི་དམག་ཚོགས་ཐམས་ཅད་རབ་ཏུ་ཟློག་པ། མུ་གེའི་ཡང་བ་ཐམས་ཅད་རབ་ཏུ་ཞི་བར་བགྱིད་པ། ནད་ཀྱི་ཡང་བ་ཐམས་ཅད་རབ་ཏུ་ཞི་བར་བགྱིད་པ། གཟའི་གནོད་པ་ཐམས་ཅད་སེལ་བ། མཆོག་ཏུ་ཞི་བར་བགྱིད་པ། མྱ་ངན་དང ། ཉོན་མོངས་པ་ཐམས་ཅད་རབ་ཏུ་ཞི་བར་བགྱིད་པ། གནོད་པ་རྣམ་པ་སྣ་ཚོགས་རབ་ཏུ་ཞི་བར་བགྱིད་པ། གནོད་པ་འབུམ་རབ་ཏུ་འཇོམས་པར་བགྱིད་པ་ལགས་སོ། །བཙུན་པ་བཅོམ་ལྡན་འདས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཁོར་གྱི་ནང་དུ་རྒྱ་ཆེར་ཡང་དག་པར་རབ་ཏུ་བཤད་ན་ཆོས་མཉན་པ་བདུད་རྩིའི་ཁུ་བ་འདིས་བདག་ཅག་རྒྱལ་པོ་ཆེན་པོ་དཔུང་དང་གཡོག་ཏུ་བཅས་པ་བཞིའི་ལྷའི་ལུས་འདི་གཟི་བྱིན་ཆེན་པོས་རྣམ་པར་འཕེལ་བར་འགྱུར་རོ། །བདག་
308b
ཅག་གི་ལུས་ལ་བརྩོན་པ་དང ། སྟོབས་དང ། མཐུའང་བསྐྱེད་པར་འགྱུར། གཟི་བརྗིད་དང ། དཔལ་དང ། ཕུན་སུམ་ཚོགས་པའང་བདག་ཅག་གི་ལུས་ལ་འཇུག་པར་འགྱུར་ཏེ། བཙུན་པ་བཅོམ་ལྡན་འདས། བདག་ཅག་རྒྱལ་པོ་བཞི་ནི་ཆེ་བ་དང་ལྡན་པ། ཆོས་སྨྲ་བ། ཆོས་ཀྱི་རྒྱལ་པོ་ལགས་ཏེ། བཙུན་པ་བཅོམ་ལྡན་འདས། བདག་ཅག་ནི་ཆོས་ཀྱིས་ལྷ་དང ། ཀླུ་དང ། གནོད་སྦྱིན་དང།་ལྷ་མ་ཡིན་དང ། ནམ་མཁའ་ལྡིང་དང ། དྲི་ཟ་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་ཀྱི་རྒྱལ་པོ་བགྱིའོ། །འབྱུང་པོའི་ཚོགས་མི་བཟད་པ། སྙིང་རྗེ་མ་མཆིས་པ། གཞན་གྱི་གཟི་བྱིན་འཕྲོག་པ་རྣམས་བཟློག་པར་བགྱིའོ། །བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། གནོད་སྦྱིན་འབུམ་ཕྲག་དུ་མ་དང་ལྷན་ཅིག་ཏུ་རྟག་པར་རྒྱུན་ཏུ་ལྷའི་མིག་རྣམ་པར་དག་པ། མིའི་ལས་འདས་པས་འཛམ་བུའི་གླིང་ཐམས་ཅད་ལ་བལྟ་བར་བགྱི། བསྲུང་བར་བགྱི། ཡོངས་སུ་བསྐྱང་བར་བགྱི་སྟེ། ། བཙུན་པ་བཅོམ་ལྡན་འདས། དེའི་སླད་དུ་བདག་ཅག་རྒྱལ་པོ་ཆེན་པོ་བཞི་འཇིག་རྟེན་སྐྱོང་བ་ཞེས་མིང་དུ་ཆགས་སོ། །བཙུན་པ་བཅོམ་ལྡན་འདས། གང་སུ་དག་འཛམ་བུའི་གླིང་འདིར་ཕ་རོལ་གྱི་དམག་ཚོགས་ཀྱིས་ཡུལ་འཇོམས་པར་འགྱུར་རམ། མུ་གེའི་ཡ་ང་བ་འམ། ནད་ཀྱི་ཡ་ང་བ་འམ། གནོད་པ་སྣ་ཚོགས་བརྒྱ་དང ། གནོད་པ་སྟོང་དང ། གནོད་པ་འབུམ་དག་གིས་
309a
༄#། །གཙེས་པར་གྱུར་ན། བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛིན་པའི་དགེ་སློང་ཆོས་སྨྲ་བ་དེ་དག་ལ་བསྐུལ་བར་བགྱིའོ། །བཙུན་པ་བཅོམ་ལྡན་འདས། ནམ་བདག་ཅག་རྒྱལ་པོ་ཆེན་པོ་བཞིས་རྫུ་འཕྲུལ་དང ། བྱིན་གྱིས་བརླབས་ཀྱིས་དགེ་སློང་ཆོས་སྨྲ་བ་དེ་དག་ལ་བསྐུལ་བ་ན། ཡུལ་གང་དང ། གང་དུ་མཆི་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡུལ་དེ་དག་ཏུ་རྒྱ་ཆེར་ཡང་དག་པར་སྟོན་པར་འགྱུར་ཏེ། གང་གནོད་པ་སྣ་ཚོགས་བརྒྱ་དང ། གནོད་པ་སྣ་ཚོགས་སྟོང་ཡུལ་དུ་འབྱུང་བ་འདི་ལྟ་བུ་འདི་དག་རབ་ཏུ་ཞི་བར་འགྱུར་རོ། །བཙུན་པ་བཅོམ་ལྡན་འདས། མིའི་རྒྱལ་པོ་གང་གིས་ཡུལ་དུ་མདོ་སྡེའི་དབང་པོ་འཛིན་པའི་དགེ་སློང་ཆོས་སྨྲ་བ་དེ་དག་མཆི་བར་འགྱུར་བའི་ཡུལ་དེ་དག་ཏུ་གསེར་འོད་དམ་བ་མདོ་སྡེའི་དབང་པོའི་རྒྱལ་པོ་འདིའང་བསྙེན་པར་འགྱུར་རོ། །བཙུན་པ་བཅོམ་ལྡན་འདས། ནམ་མིའི་རྒྱལ་པོས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་ཏེ་དེ་ཐོས་ནས་མདོ་སྡེའི་དབང་པོ་འདི་འཛིན་པའི་དགེ་སློང་དེ་དག་ཕྱིར་རྒོལ་བ་ཐམས་ཅད་ལས་ཀུན་ཏུ་སྲུང་བར་བགྱིད། ཡོངས་སུ་བསྐྱབ་པ་དང ། ཡོངས་སུ་འཛིན་པ་དང ། ཡོངས་སུ་སྐྱོང་བར་བགྱིད་ན། བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞིས་མིའི་རྒྱལ་པོ་དེའི་ཡུལ་ཐམས་ཅད་ན་གནས་པའི་
309b
སེམས་ཅན་རྣམས་ཀུན་ཏུ་བསྲུང་བར་བགྱི། ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཞི་བ་དང ། བདེ་ལེགས་སུ་འགྱུར་བར་བགྱིའོ། །བཙུན་པ་བཅོམ་ལྡན་འདས། མིའི་རྒྱལ་པོས་ནམ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་ལ་བདེ་བར་སྦྱར་བ་ཐམས་ཅད་ཀྱིས་བདེ་བར་བགྱིད་ན། བཙུན་པ་བཅོམ་ལྡན་འདས། བདག་ཅག་རྒྱལ་པོ་བཞིས་མིའི་རྒྱལ་པོ་དེའི་ཡུལ་ཐམས་ཅད་ན་གནས་པའི་སེམས་ཅན་རྣམས་ལ་བདེ་བའི་ཡོ་བྱད་ཐམས་ཅད་ཀྱིས་བདེ་བ་དང ། ཡོ་བྱད་ཐམས་ཅད་ཕུན་སུམ་ཚོགས་པར་བགྱིའོ། །བཙུན་པ་བཅོམ་ལྡན་འདས། ནམ་མིའི་རྒྱལ་པོས་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འདི་འཛིན་པ་ལ་བསྟི་སྟང་དུ་བགྱིད། བླ་མར་བགྱིད། རིམ་གྲོ་བགྱིད་ཅིང་མཆོད་ན། བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞིས་མིའི་རྒྱལ་པོ་ཆེན་པོ་དེ་ལ་རྒྱལ་པོ་ཐམས་ཅད་པས་ཆེས་བསྟི་སྟང་དུ་བགྱི། ཆེས་བླ་མར་བགྱི། ཆེས་རིམ་གྲོར་བགྱི། ཆེས་མཆོད་པར་བགྱི་སྟེ་ཡུལ་ཐམས་ཅད་དུའང་རབ་ཏུ་བསྔགས་པར་བགྱིའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། རྒྱལ་པོ་ཆེན་པོ་བཞིས་ལྷ་དང ། མི་ལ་རྣམ་པར་བལྟ་བ་ཞེས་བྱ་བ་སྟེ་ལེའུ་བཅུ་གཅིག་པའོ།། །།བམ་པོ་དྲུག་པ། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་ལེགས་སོ་ཞེས་བྱ་བ་བྱིན་ཏེ། རྒྱལ་པོ་ཆེན་པོ་དག་ལེགས་སོ། །ལེགས་སོ། །
310a
༄#། །རྒྱལ་པོ་ཆེན་པོ་ཁྱེད་ཡང་ལེགས་སོ། །ལེགས་སོ། །འདི་ལྟ་སྟེ། ཁྱེད་ནི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་རྣམས་བསྐྱེད་པ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་མང་པོ་ལ་བསྙེན་བཀུར་བྱས་པ། ཆོས་དང་ལྡན་པ། ཆོས་སྨྲ་བ། ཆོས་ཀྱི་རྒྱལ་པོ། ཆོས་ཀྱིས་ལྷ་དང ། མི་རྣམས་ཀྱི་རྒྱལ་པོ་བྱེད་པའོ། །འདི་ལྟ་སྟེ། ཁྱེད་ནི་ཡུན་རིང་པོར་སེམས་ཅན་ཐམས་ཅད་ལ་ཕན་པའི་སེམས་དང་ལྡན་པ། བདེ་བ་དང ། བྱམས་པའི་སེམས་དང་ལྡན་པ། སེམས་ཅན་ཐམས་ཅད་ལ་ཕན་པ་དང ། བདེ་བར་བྱ་བའི་ལྷག་པའི་བསམ་པ་ལ་ཞུགས་པ། མི་ཕན་པ་ཐམས་ཅད་འགོག་པ། སེམས་ཅན་ཐམས་ཅད་ལ་བདེ་བ་ཐམས་ཅད་ཉེ་བར་བསྒྲུབ་པར་བརྩོན་པ་ཡིན་ཏེ། རྒྱལ་པོ་ཆེན་པོ། ཁྱེད་བཞིས་མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པ་དང ། རིམ་གྲོ་བྱེད་པར་བརྩོན་པ་དེ་དག་ལ་ཀུན་ཏུ་བསྲུང་བར་གྱིས་ཤིག་།ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཞི་བ་དང ། བདེ་ལེགས་སུ་འགྱུར་བར་གྱིས་ཤིག་།དེ་ནས་རྒྱལ་པོ་ཆེན་པོ་དཔུང་དང ། གཡོག་དང ། གནོད་སྦྱིན་འབུམ་ཕྲག་དུ་མ་དང་བཅས་པ་ཁྱེད་བཞིས་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་ཚུལ་ཀུན་ཏུ་བསྲུང་བར་འགྱུར་རོ། །ཡོངས་སུ་བསྐྱང་བ་དང ། ཡོངས་སུ་གཟུང་བར་ཡང་འགྱུར་རོ། །དེས་
310b
ན་རྒྱལ་པོ་ཆེན་པོ་དཔུང་དང ། གཡོག་དང ། གནོད་སྦྱིན་འབུམ་ཕྲག་དུ་མ་དང་བཅས་པ་ཁྱེད་བཞིས་ལྷ་དང ། ལྷ་མ་ཡིན་དུ་གཡུལ་འགྱེད་པ་ན་རྒྱལ་བར་འགྱུར་རོ། །ལྷ་མ་ཡིན་རྣམས་ཕམ་པར་འགྱུར་རོ། །འདི་ལྟར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཕ་རོལ་གྱི་དམག་ཚོགས་ཐམས་ཅད་འདུལ་བར་བྱེད་པ་འདིའི་ཕྱིར་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ལ་ཀུན་ཏུ་བསྲུང་བར་གྱིས་ཤིག་།ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཞི་བ་དང ། བདེ་ལེགས་སུ་འགྱུར་བར་གྱིས་ཤིག་།དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་དང ། རྒྱལ་པོ་ཆེན་པོ་ཡུལ་འཁོར་སྲུང་དང ། རྒྱལ་པོ་ཆེན་པོ་འཕགས་སྐྱེས་པོ་དང ། རྒྱལ་པོ་ཆེན་པོ་མིག་མི་བཟང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། མ་འོངས་པའི་དུས་ན་གསེར་འོད་དམ་པ་མདོ་སྡེའི་དབང་པོ་རྒྱལ་པོ་འདི་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ཡུལ་འཁོར་རམ། རྒྱལ་པོའི་ཕོ་བྲང་འཁོར་གང་དུ་སྤྱོད་པར་འགྱུར་བ་དང ། མིའི་རྒྱལ་པོ་གང་དང ། གང་གི་ཡུལ་དུ་སྤྱོད་པར་འགྱུར་བ་དང ། བཙུན་པ་བཅོམ་ལྡན་འདས། མིའི་རྒྱལ་པོར་འགྱུར་བ་གང་ལ་ལ་ཞིག་ལྷའི་དབང་པོའི་དམ་ཚིག་རྒྱལ་པོའི་བསྟན་
311a
༄#། །བཅོས་འདིས་རྒྱལ་པོ་བགྱིད་ཅིང་རྟག་པར་རྒྱུན་ཏུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་ཏམ། རིམ་གྲོ་བགྱིད་དམ། མཆོད་པ་བགྱིད་ངམ། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་འམ། མདོ་སྡེའི་དབང་པོའི་རྒྱལ་པོ་འཛིན་པ་དེ་དག་ལའང་བསྟི་སྟང་དུ་བགྱིད། བཙུན་པར་བགྱིད། རིམ་གྲོར་བགྱིད་ཅིང་མཆོད་དེ་རྟག་པར་རྒྱུན་ཏུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཉན་ན་ཆོས་མཉན་པའི་ཆུ་བོའི་ཆུ་ཆོས་བདུད་རྩིའི་ཁུ་བ་འདིས་བདག་ཅག་རྒྱལ་པོ་ཆེན་པོ་དཔུང་དང་གཡོག་ཏུ་བཅས་པ་བཞི་དང ། གནོད་སྦྱིན་འབུམ་ཕྲག་དུ་མའི་ལྷའི་ལུས་འདི་དག་གཟི་བྱིན་ཆེན་པོ་རྣམ་པར་འཕེལ་བར་འགྱུར་རོ། །བདག་ཅག་ལ་བརྩོན་འགྲུས་དང ། མཐུ་དང ། སྟོབས་ཆེན་པོར་ཡང་བགྱིད་པར་འགྱུར། བདག་ཅག་གི་གཟི་བྱིན་དང ། དཔལ་དང ། ཕུན་སུམ་ཚོགས་པའང་རྣམ་པར་འཕེལ་བར་འགྱུར་རོ། །བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ། གནོད་སྦྱིན་འབུམ་ཕྲག་དུ་མ་དང་ལུས་ལྟར་མི་གདའ་བར་བགྱིས་ཏེ་ད་ལྟར་དང ། མ་འོངས་པའི་དུས་ན་གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་འཁོར་རམ། ཕོ་བྲང་འཁོར་གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་སྤྱོད་པར་འགྱུར་བ་དེ་དག་ཏུ་མཆི་བར་བགྱིའོ། །མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པ་
311b
དང།་རིམ་གྲོ་བགྱིད་པ་དང ། མཆོད་པ་བགྱིད་པ་དེ་དག་ལ་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤང་བ་དང ། ཞི་བ་དང ། བདེ་ལེགས་སུ་འགྱུར་བར་བགྱིའོ། །རྒྱལ་པོའི་ཕོ་བྲང་འཁོར་དེ་དག་དང ། ཡུལ་འཁོར་དེ་དག་དང ། ཡུལ་དེ་དག་ཀྱང་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤང་བ་དང ། ཞི་བ་དང ། བདེ་ལེགས་སུ་འགྱུར་བར་བགྱིའོ། །ཡུལ་དེ་དག་ཀྱང་འཇིགས་པ་དང ། གནོད་པ་དང ། འཁྲུགས་པ་ཐམས་ཅད་ལས་ཡོངས་སུ་ཐར་བར་བགྱིའོ།། ཕ་རོལ་གྱི་དམག་ཚོགས་རྣམས་ཀྱང་སླར་བཟློག་པར་བགྱིའོ། །མིའི་རྒྱལ་པོ་གང་ལ་ལ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པ་དང ། རིམ་གྲོ་བགྱིད་པ་དང ། མཆོད་པ་བགྱིད་བ་དེའི་དགྲ་ཟླ་འདབ་ཉེ་བའི་རྒྱལ་པོ་གཞན་ཞིག་མཆིས་ལ། བཙུན་པ་བཅོམ་ལྡན་འདས། ནམ་དགྲ་ཟླ་འདབ་ཉེ་བ་དེའི་རྒྱལ་པོ་དེ་འདི་སྙམ་དུ་བདག་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ཡུལ་དེར་སོང་སྟེ་ཡུལ་དེ་རྣམ་པར་གཞིག་གོ་སྙམ་དུ་སེམས་བསྐྱེད་ན། བཙུན་པ་བཅོམ་ལྡན་འདས། དེའི་ཚེ་དེའི་དུས་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་གཟི་བརྗིད་ཀྱི་མཐུས་དགྲ་ཟླ་འདབ་ཉེ་བའི་རྒྱལ་པོ་དེ་རྒྱལ་པོ་གཞན་དག་དང་གཡུལ་འགྱེད་པར་འགྱུར། རང་གི་ཡུལ་དུ་ཕྱིན་ནའང་ཡུལ་འཁྲུག་པར་འགྱུར། རྒྱལ་པོའི་འཁྲུག་པ་མི་བཟད་པའང་འབྱུང་བར་འགྱུར།
312a
༄#། །ཡུལ་དུ་གཟའ་དང ། ནད་ཀྱང་འབྱུང་བར་འགྱུར། ཡུལ་དུ་བྲེལ་བ་སྣ་ཚོགས་བརྒྱ་དག་ཀྱང་འབྱུང་བར་འགྱུར་རོ། །བཙུན་པ་བཅོམ་ལྡན་འདས། ནམ་དགྲ་ཟླ་འདབ་ཉེ་བའི་རྒྱལ་པོ་དེ་རང་གི་ཡུལ་དུ་ཕྱིན་ན་གནོད་པ་སྣ་ཚོགས་བརྒྱ་དང ། བྲེལ་བ་སྣ་ཚོགས་བརྒྱ་འདི་ལྟ་བུ་འབྱུང་ངོ ། །བཙུན་པ་བཅོམ་ལྡན་འདས། དགྲ་ཟླ་འདབ་ཉེ་བའི་རྒྱལ་པོ་དེ་ཡན་ལག་བཞི་པའི་དམག་བསོགས་ཏེ་ཕ་རོལ་གྱི་དམག་ཚོགས་སུ་མཆི་བའི་སླད་དུ་རང་གི་ཡུལ་ནས་བྱུང་སྟེ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ཡུལ་དེར་མཆི་འཚལ་བ་དང ། གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གནས་པའི་ཡུལ་དེ་རྣམ་པར་གཞིག་པར་འཚལ་བར་འགྱུར་ན། བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང ། གནོད་སྦྱིན་འབུམ་ཕྲག་དུ་མ་དང་ལྷན་ཅིག་ཏུ་ལུས་མི་གདའ་བར་བགྱིས་ཏེ་དེར་མཆི་བར་བགྱིའོ། །ཕ་རོལ་གྱི་དམག་ཚོགས་དེ་ཤུལ་ཏུ་ཞུགས་པ་ལས་ཀྱང་དེ་ཉིད་ནས་ལྡོག་པར་བགྱིའོ། །བྲེལ་བ་སྣ་ཚོགས་བརྒྱ་དག་ཀྱང་ཉེ་བར་བསྒྲུབ་པར་བགྱིའོ། །བགེགས་ཀྱང་བགྱིའོ། །འདི་ལྟ་སྟེ། ཡུལ་དེར་ཕ་རོལ་གྱི་དམག་ཚོགས་དེ་མཆི་བར་ཡང་མི་ནུས་ན་ཡུལ་གཞིག་པར་བགྱིད་པ་ལྟ་ག་ལ་འགྱུར། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དེ་དག་ལ་ལེགས་སོ་ཞེས་བྱ་བ་བྱིན་ཏེ། རྒྱལ་པོ་ཆེན་པོ་དག་ལེགས་སོ། །ལེགས་སོ། །རྒྱལ་
312b
པོ་ཆེན་པོ་དག་ཁྱེད་ཡང་ལེགས་སོ། །ཁྱེད་བསྐལ་བ་གྲངས་མེད་པ་བྱེ་བ་ཁྲག་ཁྲིག་འབུམ་ཕྲག་དུ་མར་ཡང་དག་པར་བསྒྲུབས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདིའི་ཕྱིར་མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པ་དང ། རིམ་གྲོ་བྱེད་པ་དང ། མཆོད་པ་བྱེད་པ་དེ་དག་ལ་ཀུན་ཏུ་སྲུང་བར་གྱིས་ཤིག་།ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤངས་པ་དང ། ཞི་བ་དང ། བདེ་ལེགས་སུ་འགྱུར་བར་གྱིས་ཤིག་།རྒྱལ་པོའི་ཕོ་བྲང་འཁོར་དེ་དག་དང ། གྲོང་ཁྱེར་དེ་དག་དང ། ཡུལ་འཁོར་དེ་དག་དང ། ཡུལ་དེ་དག་ཀྱང་ཀུན་ཏུ་སྲུངས་ཤིག་།ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤང་བ་དང ། ཞི་བ་དང ། བདེ་ལེགས་སུ་འགྱུར་བར་གྱིས་ཤིག་།ཡུལ་དེ་དག་ཀྱང་འཇིགས་པ་དང ། གནོད་པ་དང ། འཁྲུག་པ་ཐམས་ཅད་ལས་ཡོངས་སུ་ཐར་བར་གྱིས་ཤིག་།ཕ་རོལ་གྱི་དམག་ཚོགས་རྣམས་ཀྱང་ཟློག་པར་གྱིས་ཤིག་།ཛམྦུའི་གླིང་ཐམས་ཅད་ན་གནས་པའི་མིའི་རྒྱལ་པོ་དེ་དག་མི་འཐབ་པ་དང ། འཚང་མི་འདྲུ་བ་དང ། མི་རྩོད་པ་དང ། མི་འགྱེད་པར་བྱ་བ་ལ་སྤྲོ་བར་གྱིས་ཤིག་།རྒྱལ་པོ་ཆེན་པོ་དཔུང་དང་གཡོག་ཏུ་བཅས་པ་ཁྱེད་བཞིས་ཛམྦུའི་གླིང་འདིར་ནམ་གྲོང་ཁྱེར་བརྒྱད་ཁྲི་བཞི་སྟོང་དེ་དག་ན་རྒྱལ་པོ་བརྒྱད་ཁྲི་བཞི་སྟོང་པོ་དེ་དག་རང་རང་གི་ཡུལ་ལ་མངོན་པར་དགའ་བ་དང ། རྒྱལ་སྲིད་ཀྱི་དབང་ཕྱུག་དེས་
313a
༄#། །མངོན་པར་དགའ་བ་དང ། རང་གི་ནོར་གྱི་ཕུང་པོས་ཕན་ཚུན་རྣམ་པར་མི་འཚེ་བ་དང ། ཕན་ཚུན་རྣམ་པར་འཚེ་བ་མི་སྐྱེད་པ་དང ། རང་གིས་ཇི་ལྟར་སྔོན་གྱི་ལས་བསགས་པས་རྒྱལ་པོ་ཐོབ་པའི་རང་གི་རྒྱལ་སྲིད་ཀྱི་དབང་ཕྱུག་གིས་དགའ་བ་དང ། ཕན་ཚུན་དུ་ཡུལ་འཇིག་པར་མི་བྱེད་པ་དང ། ཡུལ་གཞིག་པའི་ཕྱིར་ཕ་རོལ་གྱིས་མི་གནོད་པ་དང ། ནམ་ཛམྦུའི་གླིང་འདིར་གྲོང་ཁྱེར་བརྒྱད་ཁྲི་བཞི་སྟོང་དེ་དག་ན་རྒྱལ་པོ་བརྒྱད་ཁྲི་བཞི་སྟོང་དེ་དག་ནང་ཕན་ཚུན་དུ་བྱམས་པའི་སེམས་སུ་འགྱུར། བྱམས་པའི་སེམས་དང།་ཕན་པའི་སེམས་སུ་འགྱུར་ཏེ་ཕན་ཚུན་དུ་མི་འཐབ། འཚང་མི་འདྲུ། མི་རྩོད་མི་འགྱེད་པར་རང་རང་གི་ཡུལ་དག་ན་དགའ་བར་འགྱུར་ན་དེའི་ཕྱིར་རྒྱལ་པོ་ཆེན་པོ་དཔུང་དང་གཡོག་ཏུ་བཅས་པས་ཁྱེད་བཞིས་ཛམྦུའི་གླིང་འདི་རྒྱས་པར་འགྱུར། ལོ་ལེགས་པར་འགྱུར། ཉམས་དགའ་བར་འགྱུར། སྐྱེ་བོ་དང ། མི་མང་པོས་གང་བར་འགྱུར། སའང་བྱིན་ཅན་དུ་འགྱུར། དུས་དང།་ཟླ་བ་དང ། ཟླ་བ་ཕྱེད་པ་དང ། ལོ་ཁྱུད་ཀོར་ཐམས་ཅད་ཀྱང་ཡང་དག་པའི་དུས་དང་ལྡན་པར་འགྱུར། གཟའ་དང ། རྒྱུ་སྐར་དང ། ཟླ་བ་དང ། ཉི་མའང་ཉིན་མཚན་དུ་ལེགས་པར་རྒྱུ་བར་འགྱུར། ཆར་པའི་རྒྱུན་ཀྱང་ས་ལ་དུས་དུས་སུ་འབབ་པར་འགྱུར། འཛམ་བུའི་གླིང་ཐམས་ཅད་ན་གནས་པའི་སེམས་ཅན་རྣམས་ཀྱང་ནོར་དང་འབྲུ་ཐམས་ཅད་འབྱོར་པར་འགྱུར།
313b
ལོངས་སྤྱོད་ཆེ་བ་དང ། སེར་སྣ་མེད་པར་འགྱུར། གཏོང་བ་དང་ལྡན་པར་འགྱུར། དགེ་བ་བཅུའི་ལས་ཀྱི་ལམ་དང་ལྡན་པར་འགྱུར། ཕལ་ཆེར་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར། ལྷའི་ཁང་ཁྱིམ་རྣམས་ཀྱང་ལྷ་དང ། ལྷའི་བུ་རྣམས་ཀྱིས་གང་བར་འགྱུར་རོ། །རྒྱལ་པོ་ཆེན་པོ་དག་།གང་ལ་ལ་ཞིག་མིའི་རྒྱལ་པོར་འགྱུར་ལ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་གྱུར་ཏེ་རིམ་གྲོ་བྱས། མཆོད་པ་བྱས། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ལའང་བསྟི་སྟང་དུ་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ཅིང་རྒྱལ་པོ་ཆེན་པོ་ཁྱེད་བཞི་དཔུང་དང་གཡོག་ཏུ་བཅས་པར་གནོད་སྦྱིན་འབུམ་ཕྲག་དུ་མ་ལ་སྙིང་བརྩེ་བའི་ཕྱིར་རྟག་པར་རྒྱུན་ཏུ་གསེར་འོད་དམ་པ་མདོ་སྡེའི་དབང་པོ་འདི་ཉན་ན། ཆོས་མཉན་པའི་ཆུ་ཀླུང ། ཆོས་བདུད་རྩིའི་ཁུ་བ་འདིས་ཁྱེད་ཅག་གིས་ལུས་འདི་དག་ཚིམ་པར་འགྱུར་རོ། །ཁྱེད་ཀྱི་ལྷའི་ལུས་འདི་དག་གི་གཟི་བྱིན་ཆེན་པོའང་རྣམ་པར་འཕེལ་ལོ། །ཁྱེད་ཀྱི་བརྩོན་འགྲུས་དང ། མཐུ་དང ། སྟོབས་ཀྱང་སྐྱེད་དོ། །ཁྱེད་ཀྱི་གཟི་བརྗིད་དང ། དཔལ་དང ། ཕུན་སུམ་ཚོགས་པའང་རྣམ་པར་འཕེལ་བར་འགྱུར་རོ། །མིའི་རྒྱལ་པོ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ང་ལའང་མཆོད་པ་བསམ་གྱི་མི་ཁྱབ་པ་རྒྱ་ཆེན་པོ་ཡངས་པ་བྱས་པར་འགྱུར་རོ། །མིའི་རྒྱལ་པོ་དེས་འདས་པ་དང ། མ་འོངས་པ་
314a
༄#། །དང ། ད་ལྟར་བྱུང་བའི་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་ལའང་ཡོ་བྱད་བསམ་གྱིས་མི་ཁྱབ་པ། རྒྱ་ཆེ་བ། ཡངས་པ་ཐམས་ཅད་ཀྱིས་མཆོད་པ་བྱས་པར་འགྱུར་རོ། །དེས་ན་མིའི་རྒྱལ་པོ་ཆེན་པོ་དེ་ལ་བསྲུང་བ་ཆེན་པོ་བྱས་པར་འགྱུར་རོ། །དེ་ནས་མིའི་རྒྱལ་པོ་དེ་ལ་ཀུན་ཏུ་བསྲུང་བ་དང ། ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤང་བ་དང ། ཞི་བ་དང ། བདེ་ལེགས་སུ་འགྱུར་བ་བྱས་པར་འགྱུར་རོ། །བཙུན་མོ་དམ་པ་དང ། རྒྱལ་བུ་རྣམས་དང ། བཙུན་མོའི་འཁོར་ཐམས་ཅད་དང ། རྒྱལ་པོའི་ཕོ་བྲང་འཁོར་ཐམས་ཅད་ཀྱང་བསྲུང་བ་ཆེན་པོ་བྱས་པར་འགྱུར་རོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤང་བ་དང ། ཞི་བ་དང ། བདེ་ལེགས་སུ་འགྱུར་བ་བྱས་པར་འགྱུར་རོ། །རྒྱལ་པོའི་ཕོ་བྲང་འཁོར་ན་གནས་པའི་ལྷ་ཐམས་ཅད་ཀྱང་ཆེས་གཟི་བྱིན་དང་ལྡན་པ་དང ། ཆེས་སྟོབས་དང་ལྡན་པ་དང ། བདེ་བ་དང ། ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་འགྱུར། དགའ་བ་སྣ་ཚོགས་མྱོང་བར་འགྱུར། གྲོང་ཁྱེར་དེ་དག་དང ། ཡུལ་འཁོར་དེ་དག་ཀྱང་ཀུན་ཏུ་བསྲུང་བར་འགྱུར། ཡོངས་སུ་བསྐྱངས་པར་འགྱུར། གནོད་པ་མེད་པར་འགྱུར། དགྲ་མེད་པར་འགྱུར། ཕ་རོལ་གྱི་དམག་ཚོགས་ཐམས་ཅད་ཀྱིས་མི་བརྫི་བ་དང ། གནོད་པ་མེད་པ་དང ། འཁྲུག་པ་མེད་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་
314b
ལ་རྒྱལ་པོ་ཆེན་པོ་རྣམ་ཐོས་ཀྱི་བུ་དང ། རྒྱལ་པོ་ཆེན་པོ་ཡུལ་འཁོར་སྲུང་དང ། རྒྱལ་པོ་ཆེན་པོ་འཕགས་སྐྱེས་པོ་དང ། རྒྱལ་པོ་ཆེན་པོ་མིག་མི་བཟང་དང ། དེ་དག་གིས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས། མིའི་རྒྱལ་པོ་གང་ལ་ལ་ཞིག་གིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའང་ཉན་འཚལ་བར་གྱུར། བདག་ཉིད་ལའང་བསྲུང་བ་ཆེན་པོ་བགྱིད་འཚལ་བར་གྱུར། བཙུན་མོ་དམ་པ་དང ། རྒྱལ་བུ་རྣམས་དང ། རྒྱལ་པོའི་བུ་མོ་རྣམས་དང ། བཙུན་མོའི་འཁོར་གྱི་ཚོགས་རྣམས་ལའང་བསྲུང་བ་ཆེན་པོ་བགྱིད་འཚལ་བར་གྱུར། རྒྱལ་པོའི་ཕོ་བྲང་འཁོར་དེ་དག་ཐམས་ཅད་ལའང་ཞི་བ་དང ། བདེ་ལེགས་སུ་འགྱུར་བ་ཆེན་པོ་བསམ་གྱིས་མི་ཁྱབ་པ། མཆོག་ཏུ་ཁྱད་པར་དུ་འཕགས་པ། བླ་ན་མེད་པ་བགྱིད་འཚལ་བར་གྱུར། ཚེ་འདི་ཉིད་ལ་བདག་གིས་རྒྱལ་སྲིད་ཀྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་རྣམ་པར་འཕེལ་བར་བགྱིད་འཚལ་བར་གྱུར། རྒྱལ་པོ་ཉིད་བསམ་གྱིས་མི་ཁྱབ་པ་དང་ལྡན་པར་གྱུར། བསོད་ནམས་ཀྱི་ཕུང་པོ་དཔག་ཏུ་མ་མཆིས་པའང་ཡོངས་སུ་འཛིན་འཚལ་བར་གྱུར། བདག་གི་ཡུལ་ཐམས་ཅད་ཀྱང་ཀུན་ཏུ་བསྲུང་འཚལ་བར་གྱུར། ཡོངས་སུ་བསྐྱང་འཚལ་བར་གྱུར། རང་གི་ཡུལ་ན་གནོད་པ་མ་མཆིས་པ་དང ། དགྲ་མ་མཆིས་པ་དང ། ཕ་རོལ་གྱི་དམག་ཚོགས་ཀྱིས་མི་བརྫི་བ་དང ། ནད་འགོ་བ་མ་མཆིས་པ་དང ། འཁྲུག་པ་མ་མཆིས་པར་བགྱིད་འཚལ་བར་གྱུར་ན། བཙུན་པ་བཅོམ་ལྡན་འདས། མིའི་རྒྱལ་པོ་
315a
༄#། །དེས་གཡེང་བ་མ་མཆིས་པའི་སེམས་དང ། གུས་པ་དང་བཅས་པ་དང ། རིམ་གྲོ་དང་བཅས་པས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བསྟི་སྟང་དུ་བགྱིས་ཏེ་མཉན་པར་བགྱིའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པའི་སླད་དུ་མིའི་རྒྱལ་པོ་དེས་རྒྱལ་པོའི་ཕོ་བྲང་ཁྱད་པར་དུ་འཕགས་པར་མཆི་བར་བགྱིའོ། །དེར་མཆིས་ནས་ཀྱང་རྒྱལ་པོའི་ཕོ་བྲང་སྤོས་ཆབ་སྣ་ཚོགས་ཀྱིས་ཆག་ཆག་བཏབ་ཅིང ། མེ་ཏོག་སིལ་མ་སྣ་ཚོགས་དགྲམ་པར་བགྱིའོ། །སྤོས་ཆབ་སྣ་ཚོགས་ཀྱིས་ཆག་ཆག་བཏབ་པ་དེར་ཆོས་ཀྱི་ཁྲི་མཐོན་པོ་རྒྱན་སྣ་ཚོགས་ཀྱིས་ལེགས་པར་བརྒྱན་པ་བཤམ་པར་བགྱིའོ། །ཕྱོགས་དེར་གདུགས་དང ། རྒྱལ་མཚན་དང ། བ་དན་སྣ་ཚོགས་ཀྱིས་ལེགས་པར་བརྒྱན་པར་བགྱིའོ། །མིའི་རྒྱལ་པོ་དེས་ལུས་བཀྲུ་བར་བགྱིའོ། །གོས་དྲི་རབ་ཏུ་བདའ་བ། གོས་སར་པ། མཛེས་པ་བགོས་\?\་ནས། རྒྱན་སྣ་ཚོགས་ཀྱིས་བརྒྱན་པར་བགྱིའོ། །བདག་གིས་སྟན་རབ་ཏུ་དམའ་བ་གདིང་བར་བགྱིས་ཏེ་སྟན་དེ་ལ་མཆིས་ནས་རྒྱལ་པོའི་རྒྱགས་པས་དྲེགས་པར་མི་བགྱིའོ། །དར་རྒྱལ་སྲིད་ཀྱི་དབང་ཕྱུག་ལ་ཆགས་པར་མི་བགྱིའོ། །རྒྱགས་པ་དང ། ང་རྒྱལ་དང ། དྲེགས་པ་ཐམས་ཅད་རྣམ་པར་སྤངས་པའི་སེམས་ཀྱིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱིའོ། །དགེ་སློང་ཆོས་སྨྲ་བ་དེ་ལའང་སྟོན་པར་འདུ་
315b
ཤེས་བསྐྱེད་པར་བགྱིའོ། །མིའི་རྒྱལ་པོ་དེས་དེའི་ཚེ་དེའི་དུས་ན་བཙུན་མོ་དམ་པ་དང ། རྒྱལ་བུ་རྣམས་དང ། རྒྱལ་པོའི་བུ་མོ་རྣམས་དང ། བཙུན་མོའི་འཁོར་གྱི་ཚོགས་རྣམས་ལ་སྡུག་པ་དང ། ཕན་པས་བལྟ་བར་བགྱིའོ། །བཙུན་མོ་དམ་པ་རྣམས་དང ། རྒྱལ་བུ་རྣམས་དང ། རྒྱལ་པོའི་བུ་མོ་རྣམས་ལ་ཚིག་སྙན་པར་སྨྲ་བར་བགྱིའོ། །བཙུན་མོའི་འཁོར་གྱི་ཚོགས་ཐམས་ཅད་ལའང་ཚིག་སྙན་པར་སྨྲ་བར་བགྱིའོ། །ཆོས་མཉན་པའི་ཕྱིར་མཆོད་པ་རྣམ་པ་སྣ་ཚོགས་སྦྱོར་དུ་སྩལ་བར་བགྱིའོ། །དགའ་བ་བསམ་གྱིས་མི་ཁྱབ་ཅིང་མཚུངས་པ་མ་མཆིས་པས་བདག་ཚིམ་པར་བགྱིའོ། །དགའ་བ་དང ། བདེ་བ་བསམ་གྱིས་མི་ཁྱབ་པས་བདེ་བར་བགྱིའོ། །དབང་པོ་བདེ་བར་བགྱིའོ། །བདག་ཉིད་དོན་ཆེན་པོ་ཐོབ་པར་བསམ་པར་བགྱིའོ། །བདག་དགའ་བ་ཆེན་པོས་དགའ་བར་བགྱིའོ། །རབ་ཏུ་དགའ་བ་ཆེན་པོ་བསྐྱེད་ནས་ཆོས་སྨྲ་བ་བསུ་བར་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། ། རྒྱལ་པོ་ཆེན་པོ་དག་།དེའི་ཚེ་དེའི་དུས་ན་མིའི་རྒྱལ་པོ་དེས་གོས་ཐམས་ཅད་དཀར་པོ་སར་པ་མཛེས་པར་བགོ་བར་བྱའོ། །སྤུད་པ་དང ། རྒྱན་སྣ་ཚོགས་ཀྱིས་བདག་ལེགས་པར་བརྒྱན་པར་བགྱིའོ། །གདུགས་དཀར་པོ་འདི་གཟུང་བར་བགྱིའོ། །རྒྱལ་པོའི་མཐུ་ཆེན་པོ་དང ། རྒྱལ་པོའི་བཀོད་པ་ཆེན་པོས་བཀྲ་ཤིས་ཐ་དད་པ་སྣ་ཚོགས་ཐོགས་ཏེ་རྒྱལ་པོའི་ཕོ་བྲང་དེ་ནས་བྱུང་ལ་
316a
༄#། །ཆོས་སྨྲ་བ་དེ་བསུ་བའི་ཕྱིར་དེར་འགྲོ་བར་འགྱུར་རོ། །དེ་ཅིའི་ཕྱིར་ཞེ་ན། མིའི་རྒྱལ་པོས་དེར་གོམ་པ་ཇི་སྙེད་བོར་བ་དེ་སྙེད་ཀྱི་བསྐལ་བ་བྱེ་བ་ཁྲག་ཁྲིག་འབུམ་ཕྲག་དག་གིས་འཁོར་བ་ཕྱིར་བསྙིལ་བར་འགྱུར། དེ་སྙེད་ཀྱི་འཁོར་ལོས་བསྒྱུར་བའི་རྒྱལ་རིགས་བྱེ་བ་ཁྲག་ཁྲིག་འབུམ་ཕྲག་ཐོབ་པར་འགྱུར། དེར་གོམ་པ་དེ་སྙེད་བོར་བ་དེ་སྙེད་དུ་ཚེ་འདི་ལ་རྒྱལ་སྲིད་ཀྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་འཕེལ་བར་འགྱུར། བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་གནས་ཡངས་ཤིང་རྒྱ་ཆེ་བ་ལྷའི་གཞལ་མེད་ཁང་རིན་པོ་ཆེ་སྣ་བདུན་ལས་བྱས་པ་དག་ཐོབ་པར་འགྱུར། མི་རྣམས་ཀྱི་རྒྱལ་རིགས་དང ། ལྷའི་རྒྱ་ཆེ་ཞིང་རྒྱ་ཆེ་བ་འབུམ་ཕྲག་དུ་མ་ཐོབ་པར་འགྱུར། སྐྱེ་བར་ཐམས་ཅད་དུ་དབང་ཕྱུག་ཆེན་པོ་ཐོབ་པར་འགྱུར། ཚེ་རིང་བར་འགྱུར། ཡུན་རིང་དུ་འཚོ་བར་འགྱུར། སྤོབས་པ་དང་ལྡན་པར་འགྱུར། ཚིག་གཟུང་བར་འོས་པར་འགྱུར། གྲགས་པ་དང་ལྡན་པར་འགྱུར། བརྗོད་པ་ཤིན་ཏུ་རྒྱ་ཆེར་བར་འགྱུར། བསྔགས་པར་འོས་པར་འགྱུར། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ལ་ཕན་པར་འགྱུར། ལྷ་དང ། མི་རྣམས་ཀྱི་བདེ་བ་རྒྱ་ཆེ་ཞིང་རྒྱ་ཆེ་བ་ཐོབ་པར་འགྱུར། སྟོབས་ཆེ་བར་འགྱུར། ཚན་པོ་ཆེ་ཆེན་པོའི་སྟོབས་ཀྱི་ཤུགས་དང་ལྡན་ཞིང་གཟུགས་བཟང་བར་འགྱུར། མཛེས་པ་དང ། བལྟ་ན་སྡུག་པ་དང ། ཁ་དོག་བཟང་པོ་རྒྱས་
316b
པ་མཆོག་ཏུ་ལྡན་པར་འགྱུར། སྐྱེ་བ་ཐམས་ཅད་དུ་དེ་བཞིན་གཤེགས་པ་དང་ཕྲད་པར་འགྱུར། དགེ་བའི་བཤེས་གཉེན་རྣམས་རྙེད་པར་འགྱུར། བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་གཟུང་བར་འགྱུར་ཏེ་རྒྱལ་པོ་ཆེན་པོ་དག། ཡོན་ཏན་གྱི་ཕན་ཡོན་འདི་ལྟ་བུ་དག་མཐོང་ནས་མིའི་རྒྱལ་པོ་དེས་དཔག་ཚད་ཙམ་དུ་ཆོས་སྨྲ་བ་བསུ་བར་བྱ། དཔག་ཚད་བརྒྱ་དང ། དཔག་ཚད་སྟོང་དུའང་བསུ་བར་བྱ། ཆོས་སྨྲ་བ་དེ་ལ་སྟོན་པར་འདུ་ཤེས་བསྐྱེད་པར་བྱའོ། །ཡང་འདི་སྙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེང་བདག་གི་རྒྱལ་པོ་ཕོ་བྲང་འདིར་འཇུག་པར་འགྱུར་རོ། །དེང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་བདག་གི་རྒྱལ་པོའི་ཕོ་བྲང་འདིར་བཤོས་གསོལ་བར་འགྱུར་རོ།། དེང་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཆོས་འཇིག་རྟེན་ཐམས་ཅད་དང་མི་མཐུན་པ་མཉན་པར་བགྱིའོ། །དེང་བདག་གིས་ཆོས་མཉན་པར་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བགྱིའོ། །དེང་བདག་གིས་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་མཉེས་པར་བྱས་པར་འགྱུར་རོ། །དེང་བདག་གིས་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མཆོད་པ་ཆེན་པོ་བསམ་གྱིས་མི་ཁྱབ་པ་ཡངས་ཤིང་རྒྱ་ཆེ་བ་བྱས་པར་
317a
༄#། །འགྱུར་རོ། །དེང་བདག་གིས་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དག་གི་སྡུག་བསྔལ་ཐམས་ཅད་ཤིན་ཏུ་རྒྱུན་ཆད་པར་འགྱུར་རོ། །དེང་བདག་གིས་ཚངས་པའི་དབང་པོའི་རྒྱལ་པོ་ཉིད་ཀྱི་ལུས་བྱེ་བ་ཁྲག་ཁྲིག་འབུམ་ཕྲག་དུ་མ་ཐོབ་པ་དག་གིས་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་བརྒྱ་བྱིན་ཉིད་ཀྱི་ལུས་བྱེ་བ་ཁྲག་ཁྲིག་འབུམ་ཕྲག་དུ་མ་ཐོབ་བདག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་འཁོར་ལོས་བསྒྱུར་བའི་རྒྱལ་པོ་ཉིད་ཀྱི་ལུས་བྱེ་བ་ཁྲག་ཁྲིག་འབུམ་ཕྲག་དུ་མ་ཐོབ་པ་དག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་འཁོར་བ་ལས་ཡོངས་སུ་ཐར་བར་བྱས་པར་འགྱུར་རོ། །དེང་བདག་གིས་བསོད་ནམས་ཀྱི་ཕུང་པོ་དཔག་ཏུ་མེད་པ་བླ་ན་མེད་པ་ཡངས་ཤིང་རྒྱ་ཆེ་བ་བསམ་གྱིས་མི་ཁྱབ་པ་ཡོངས་སུ་གཟུང་བར་འགྱུར་རོ། །དེང་བདག་གིས་བཙུན་མོའི་འཁོར་གྱི་ཚོགས་ཐམས་ཅད་ལ་བསྲུང་བ་ཆེན་པོ་བྱས་པར་འགྱུར་རོ། །དེང་བདག་གིས་རྒྱལ་པོའི་ཕོ་བྲང་འཁོར་འདིར་ཞི་བ་དང ། བདེ་ལེགས་སུ་འགྱུར་བ་བསམ་གྱིས་མི་ཁྱབ་པ་མཆོག་ཏུ་ཁྱད་པར་དུ་འཕགས་པ་བླ་ན་མེད་པ་བྱས་པར་འགྱུར་རོ། །དེང་བདག་གིས་ཡུལ་འདི་དག་ཐམས་ཅད་ཀུན་ཏུ་བསྲུངས་བར་འགྱུར་རོ། །ཡོངས་སུ་བསྐྱངས་པ་དང ། གནོད་པ་མེད་པ་དང ། དགྲ་མེད་པ་དང ། ཕ་རོལ་གྱི་
317b
དམག་ཚོགས་ཐམས་ཅད་ཀྱིས་མི་བརྫི་བ་དང ། ནད་འགོ་བ་མེད་པ་དང ། འཁྲུག་པ་མེད་པར་འགྱུར་རོ་སྙམ་དུ་སེམས་བསྐྱེད་པར་བྱའོ། །རྒྱལ་པོ་ཆེན་པོ་དག། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་སྙེན་མ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛིན་པ་དེ་དག་ལ་མིའི་རྒྱལ་པོ་དེ་དམ་པའི་ཆོས་ལ་གུས་པ་དེ་ལྟ་བུས་བསྟི་སྟང་དུ་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ཅིང་རྒྱལ་པོ་ཆེན་པོ་ཁྱེད་བཞི་དཔུང་དང་གཡོག་དུ་བཅས་པ་དང ། ལྷའི་ཚོགས་དེ་དག་དང ། གནོད་སྦྱིན་འབུམ་ཕྲག་དུ་མ་དག་ལ་ཤས་ཀྱི་དམ་པ་བྱིན་ན་མིའི་རྒྱལ་པོ་དེ་བསོད་ནམས་མངོན་པར་འདུ་བྱེད་པ་དང ། དགེ་བ་མངོན་པར་འདུ་བྱེད་པ་དེ་དང ། ཚེ་འདིའི་ལུས་ཀྱི་རྒྱལ་སྲིད་ཀྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་དེས་རྣམ་པར་འཕེལ་བར་འགྱུར། ཚེ་འདི་ལ་རྒྱལ་བའི་གཟི་བརྗིད་ཆེན་པོ་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །དཔལ་དང ། ཕུན་སུམ་ཚོགས་པ་དང ། གཟི་བརྗིད་ཀྱིས་ཀྱང་བརྒྱན་པར་འགྱུར་རོ།། ཕྱིར་རྒོལ་བ་ཐམས་ཅད་དང ། དགྲ་ཐམས་ཅད་ཆོས་དང་མཐུན་པར་ཤིན་ཏུ་ཚར་ཆོད་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གང་ལ་ལ་ཞིག་མིའི་རྒྱལ་པོར་གྱུར་ལ་དེ་ཆོས་ལ་གུས་པ་དེ་ལྟ་བུས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཉན་ལ། དགེ་སློང་
318a
༄#། །ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ལའང་བསྟི་སྟང་དུ་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་ཅིང་རྒྱལ་པོ་ཆེན་པོ་བདག་ཅག་གི་སླད་དུ་རྒྱལ་པོའི་ཕོ་བྲང་དེ་ཤིན་ཏུ་དག་པར་ཕྱག་དར་བགྱིད། སྤོས་ཆབ་སྣ་ཚོགས་ཀྱིས་ཆག་ཆག་ལེགས་པར་འདེབས་ལ་བདག་ཅག་རྒྱལ་པོ་ཆེན་པོ་བཞི་དང་ལྷན་ཅིག་ཐུན་མོང་དུ་ཆོས་མཉན་པ་དེ་དག་ཉན་ཅིང་བདག་དང ། ལྷ་ཐམས་ཅད་ཀྱི་སླད་དུ་དགེ་བའི་རྩ་བའི་ཤས་ཅུང་ཟད་གཅིག་སྦྱིན་པར་བགྱིད་ན། བཙུན་པ་བཅོམ་ལྡན་འདས། དགེ་སློང་ཆོས་སྨྲ་བ་དེ་ཆོས་ཀྱི་སྟན་ལ་མཆིས་མ་ཐག་ཏུ་མིའི་རྒྱལ་པོ་དེས་བདག་ཅག་རྒྱལ་པོ་ཆེན་པོ་བཞིའི་དོན་གྱི་སླད་དུ་སྤོས་སྣ་ཚོགས་ཀྱིས་བདུག་པར་བགྱིའོ། ། བཙུན་པ་བཅོམ་ལྡན་འདས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་དེ་ལ་མཆོད་པའི་སླད་དུ་བདུག་པས་བདུགས་མ་ཐག་ཏུ་སྤོས་སྣ་ཚོགས་རྣམས་ལས་སྤོས་དང ། བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ་དེ་དག་སྐད་ཅིག་ཐང་ཅིག་ཡུད་ཙམ་དེ་ལ་རྒྱལ་པོ་ཆེན་པོ་བདག་ཅག་བཞིའི་རང་རང་གི་ཁང་པའི་སྟེང་གི་བར་སྣང་ལ་སྤོས་དང ། བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་རྣམས་སུ་གནས་པར་འགྱུར་རོ། །སྤོས་དྲི་རྒྱ་ཆེན་པོའང་མནམ་པར་འགྱུར། གསེར་གྱི་ཁ་དོག་ལྟ་བུའི་སྣང་བ་འབྱུང་
318b
བར་འགྱུར་ཞིང་སྣང་བ་དེས་བདག་ཅག་གི་ཁང་པ་རྣམས་ཀྱང་སྣང་བ་བགྱིས་པར་འགྱུར་རོ། །བཙུན་པ་བཅོམ་ལྡན་འདས། སྤོས་དང ། བདུག་པ་སྣ་ཚོགས་ཀྱི་འཁྲི་ཤིང་དག་སྐད་ཅིག་ཐང་ཅིག་ཡུད་ཙམ་དེ་ལ་མི་མཇེད་ཀྱི་བདག་པོ་ཚངས་པ་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། ལྷ་མོ་ཆེན་མོ་དབྱངས་ཅན་མ་དང ། ལྷ་མོ་ཆེན་མོ་བརྟན་མ་དང ། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། ལྷའི་བུ་དབང་ཕྱུག་ཆེན་པོ་དང ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང ། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་བཟང་དང ། འཕྲོག་མའི་བུ་ལྔ་བརྒྱ་འཁོར་དང་ལྡན་པ་དང ། ཀླུའི་རྒྱལ་པོ་ཆེན་པོ་མ་དྲོས་པ་དང ། ཀླུའི་རྒྱལ་པོ་ཆེན་པོ་རྒྱ་མཚོ་དང ། དེ་དག་རང་རང་གི་ཁང་པའི་སྟེང་གི་བར་སྣང་ལ་བྱུང་སྟེ་སྤོས་དང ། བདུག་པ་སྣ་ཚོགས་ཀྱིས་འཁྲི་ཤིང་གདུགས་རྣམས་སུ་གནས་པར་འགྱུར། སྤོས་དྲི་སྣ་ཚོགས་རྒྱ་ཆེན་པོའང་མནམ་པར་འགྱུར། ཁང་པ་རྣམས་ཀྱི་ནང་དུ་གསེར་དུ་སྣང་བར་འབྱུང་བར་འགྱུར་ཞིང་སྣང་བ་དེས་གནས་ཐམས་ཅད་སྣང་བར་བགྱིས་པར་འགྱུར་རོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་།རྒྱལ་པོ་ཆེན་པོ་ཁྱེད་བཞིའི་རང་རང་གི་ཁང་པ་རྣམས་ཀྱི་སྟེང་གི་བར་སྣང་ལ་སྤོས་དང ། བདུག་པ་སྣ་ཚོགས་ཀྱི་འཁྲི་ཤིང་དེ་དག་གདུགས་རྣམས་སུ་གནས་པར་མ་
319a
༄#། །ཟད་དོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དག་།མིའི་རྒྱལ་པོ་དེས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པའི་ཕྱིར་སྤོས་སྣ་ཚོགས་དེ་དག་གིས་བདུགས་མ་ཐག་ཏུ་ལག་ན་པོག་\?\་སྣོད་གཅིག་ཐོགས་པ་དེ་ལས་སྤོས་དང ། བདུག་པ་སྣ་ཚོགས་ཀྱིས་འཁྲི་ཤིང་རྣམས་འབྱུང་བར་འགྱུར་ཏེ་དེ་དག་སྐད་ཅིག་ཐང་ཅིག་ཡུད་ཙམ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དག་ཐམས་ཅད་ན་གང་ན་ཟླ་བ་བྱེ་བ་ཕྲག་བརྒྱ་དང ། ཉི་མ་བྱེ་བ་ཕྲག་བརྒྱ་དང ། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང ། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང ། རིའི་རྒྱལ་པོ་ཁོར་ཡུག་དང ། ཁོར་ཡུག་ཆེན་པོ་བྱེ་བ་ཕྲག་བརྒྱ་དང ། གླིང་ཆེན་པོ་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་དང ། རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་དང ། སུམ་ཅུ་རྩ་གསུམ་བྱེ་བ་ཕྲག་བརྒྱ་ནས། འདུ་ཤེས་མེད། འདུ་ཤེས་མེད་མིན་དུ་ཉེ་བར་སོང་བའི་བར་གྱི་ལྷ་བྱེ་བ་ཕྲག་བརྒྱ་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་དག་ཐམས་ཅད་དུ་སུམ་ཅུ་རྩ་གསུམ་གྱི་ལྷའི་རིས་བྱེ་བ་ཕྲག་བརྒྱ་པོ་ཐམས་ཅད་ན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོའི་ཚོགས་རྣམས་ཀྱིས་རང་རང་གི་ཁང་པ་དག་གི་སྟེང་གི་བར་སྣང་ལ་སྤོས་དང །
319b
བདུག་པ་སྣ་ཚོགས་ཀྱི་འཁྲི་ཤིང་དེ་དག་གདུགས་རྣམས་སུ་གནས་པར་འགྱུར། སྤོས་ཀྱི་དྲི་རྒྱ་ཆེན་པོའང་མནམ་པར་འགྱུར། ལྷའི་ཁང་པ་རྣམས་སུ་གསེར་གྱི་ཁ་དོག་ལྟ་བུའི་སྣང་བའང་འབྱུང་བར་འགྱུར་ཞིང་སྣང་བ་དེས་ཀྱང་ལྷའི་ཁང་པ་རྣམས་སྣང་བར་བྱས་པར་འགྱུར་རོ། །རྒྱལ་པོ་ཆེན་པོ་དག་།འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷའི་ཁང་པ་ཐམས་ཅད་ཀྱི་སྟེང་གི་བར་སྣང་ལ་སྤོས་དང ། བདུག་པའི་འཁྲི་ཤིང་དེ་དག་གདུགས་རྣམས་སུ་གནས་པ་དེ་བཞིན་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པའི་ཕྱིར་མིའི་རྒྱལ་པོ་དེས་སྤོས་སྣ་ཚོགས་དེ་དག་གིས་བདུགས་མ་ཐག་ཏུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་གཟི་བརྗིད་ཀྱི་མཐུས་སྤོས་དང ། བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ་དེ་དག་སྐད་ཅིག་ཐང་ཅིག་ཡུད་ཙམ་དེ་ལ་ཀུན་ཏུ་ཕྱོགས་བཅུའི་འཇིག་རྟེན་གྱི་ཁམས་དུ་མ་གང་གཱའི་ཀླུང་གི་བྱེ་མ་སྙེད་དག་གི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་ ་སུ་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དེ་དག་གི་བར་སྣང་ལ་སྤོས་དང ། བདུག་པ་སྣ་ཚོགས་ཀྱི་འཁྲི་ཤིང་རྣམས་སུ་གནས་པར་འགྱུར། དེ་དག་ཀྱང་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མ་ལ་སྤོས་དང ། བདུག་པ་སྣ་ཚོགས་རྒྱ་ཆེ་ཞིང་རྒྱ་ཆེ་བ་མནམ་པར་འགྱུར། གསེར་གྱི་ཁ་དོག་ལྟ་བུའི་སྣང་བ་འབྱུང་བར་འགྱུར་
320a
༄#། །ཞིང་སྣང་བ་དེས་ཀྱང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་སྣང་བ་བྱས་པར་འགྱུར་རོ། །རྒྱལ་པོ་ཆེན་པོ་དག་།ཆོས་འཕྲུལ་ཆེན་པོ་དེ་ལྟ་བུ་དེ་དག་བྱུང་མ་ཐག་ཏུ་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་ན་ཆོས་སྨྲ་བ་དེ་ལ་དགོངས་པར་འགྱུར་ཏེ། སྐྱེས་བུ་དམ་པ་ལེགས་སོ། །ལེགས་སོ། །སྐྱེས་བུ་དམ་པ། ཁྱོད་གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་ཚུལ་འདི་ལྟ་བུ། ཟབ་མོའི་དོན་འདི་ལྟ་བུ། ཟབ་མོར་སྣང་བ་འདི་ལྟ་བུ། ཡོན་ཏན་བསམ་གྱིས་མི་ཁྱབ་པ་དང་ལྡན་པ་འདི་ལྟ་བུ་འདི་རྒྱ་ཆེར་ཡང་དག་པར་རབ་ཏུ་འཆད་པར་འདོད་པ་ཁྱོད་ཡང་ལེགས་སོ། །ལེགས་སོ་ཞེས་བྱ་བ་སྦྱིན་པར་འགྱུར་རོ། །སུ་ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པའི་སེམས་ཅན་དེ་དག་ཀྱང་དག་བའི་རྩ་བ་ངན་ངོན་དང་ལྡན་པར་མི་འགྱུར་ན་གང་དག་འཛིན་པ་དང ། འཆང་བ་དང ། འཆད་པ་དང ། ཀློག་པ་དང ། ཀུན་ཆུབ་པར་བྱེད་པ་དང ། འཁོར་ལ་རྒྱ་ཆེར་ཡང་དག་པར་རབ་ཏུ་སྟོན་པ་ལྟ་སྨོས་ཀྱང་ཅི་དགོས་ཏེ། དེ་ཅིའི་ཕྱིར་ཞེ་ན། སྐྱེས་བུ་དམ་པ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་མ་ཐག་ཏུ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་
320b
བའི་ཕྱིར་རོ། །དེ་ནས་ཕྱོགས་བཅུ་ཀུན་ཏུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་ན་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་རང་རང་གི་སངས་རྒྱས་ཀྱི་ཞིང་ན་བཞུགས་པ་དག་གིས་དེའི་ཚེ་དེའི་དུས་ན་ཚིག་མཐུན་པ་དང ། ངག་མཐུན་པ་དང ། སྒྲ་སྐད་མཐུན་པས་དགེ་སློང་ཆོས་སྨྲ་བ་ཆོས་ཀྱི་ཁྲི་སྟན་ལ་འདུག་པ་དེ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ། ཁྱོད་མ་འོངས་པའི་དུས་ན་བྱང་ཆུབ་ཀྱི་སྙིང་པོར་འགྲོ་བར་འགྱུར། སྐྱེས་བུ་དམ་པ། ཁྱོད་བྱང་ཆུབ་ཀྱི་སྙིང་པོ་མཆོག་དམ་པར་སོང་སྟེ་ཤིང་གི་རྒྱལ་པོའི་དྲུང་དུ་འདུག་ནས་འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པ་སེམས་ཅན་ཐམས་ཅད་ལས་རབ་ཏུ་འདས་པའི་བརྟུལ་ཞུགས་དང ། དཀའ་ཐུབ་སྤྱོད་པའི་སྟོབས་བསྐྱེད་པའི་བྱིན་གྱིས་བརླབས་དཀའ་བ་སྤྱོད་པ་བྱེ་བ་ཁྲག་ཁྲིག་འབུམ་ཕྲག་དུ་མ་དག་སྟོན་པར་འགྱུར། སྐྱེས་བུ་དམ་པ། ཁྱོད་བྱང་ཆུབ་ཀྱི་སྙིང་པོ་ལ་ལེགས་པར་བརྒྱན་པར་བྱེད་པར་འགྱུར། སྐྱས་བུ་དམ་པ། ཁྱོད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཡོངས་སུ་སྐྱོབ་པར་འགྱུར། སྐྱེས་བུ་དམ་པ། ཁྱོད་ཤིང་གི་རྒྱལ་པོའི་དྲུང་དུ་འདུག་སྟེ་བདུད་ཀྱི་སྡེ་བསམ་གྱིས་མི་ཁྱབ་པ། གཟུགས་རབ་ཏུ་འཇིགས་འཇིགས་ལྟར་འདུག་པ། མི་སྡུག་པ་སྟོན་པ། གཟུགས་མི་སྡུག་པ་སྣ་ཚོགས་དག་ལས་རྒྱལ་བར་འགྱུར། སྐྱེས་བུ་དམ་པ།
321a
༄#། །ཁྱོད་བྱང་ཆུབ་ཀྱི་སྙིང་པོ་མཆོག་དམ་པར་སོང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཔེ་མེད་པར་རབ་ཏུ་ཞི་བ། རྡུལ་དང་བྲལ་བ། ཟབ་མོ་མངོན་པར་རྫོགས་པར་འཚང་རྒྱ་བར་འགྱུར། སྐྱེས་བུ་དམ་པ། ཁྱོད་རྡོ་རྗེའི་གདན་སྙིང་པོ་བརྟན་པ་ལ་འདུག་སྟེ་ཆོས་ཀྱི་འཁོར་ལོ་རྒྱལ་བ་ཐམས་ཅད་ཀྱིས་མངོན་པར་བསྟོད་པ། མཆོག་ཏུ་ཟབ་པ། བླ་ན་མེད་པ་རྣམ་པ་བཅུ་གཉིས་རབ་ཏུ་བསྐོར་བར་འགྱུར། སྐྱེས་བུ་དམ་པ། ཁྱོད་ཆོས་ཀྱི་རྔ་ཆེན་པོ་བླ་ན་མེད་པ་བརྡུང་བར་འགྱུར། སྐྱེས་བུ་དམ་པ། ཁྱོད་ཆོས་ཀྱི་དུང་བླ་ན་མེད་པ་འབུད་པར་འགྱུར། སྐྱེས་བུ་དམ་པ། ཁྱོད་ཆོས་ཀྱི་རྒྱལ་མཚན་ཆེན་པོ་བསྒྲེང་བར་འགྱུར། སྐྱེས་བུ་དམ་པ། ཁྱོད་ཆོས་ཀྱི་སྒྲོན་མ་བླ་ན་མེད་པ་འབར་བར་བྱེད་པར་འགྱུར། སྐྱེས་བུ་དམ་པ།་ཁྱོད་ཆོས་ཀྱི་ཆར་བླ་ན་མེད་པ་འབེབས་པར་འགྱུར། སྐྱེས་བུ་དམ་པ། ཁྱོད་ཉོན་མོངས་པའི་དགྲ་འབུམ་ཕྲག་དུ་མ་ལས་རྒྱལ་བར་འགྱུར། སྐྱེས་བུ་དམ་པ། ཁྱོད་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་ཤིན་ཏུ་འཇིགས་སུ་རུང་བ་འཇིགས་པ་ཆེན་པོའི་རྒྱ་མཚོ་ལས་སྒྲོལ་བར་འགྱུར། སྐྱེས་བུ་དམ་པ། ཁྱོད་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་དག་འཁོར་བའི་འཁོར་ལོ་ལས་ཡོངས་སུ་ཐར་པར་བྱེད་པར་འགྱུར། སྐྱེས་བུ་དམ་པ། ཁྱོད་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མ་དག་མཉེས་པར་བྱེད་པར་འགྱུར་རོ་ཞེས་གསུང་བར་འགྱུར་རོ། །དེ་སྐད་ཅེས་
321b
བཀའ་སྩལ་པ་དང ། བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དེ་དག་གི་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་ཡོན་ཏན་ཚེ་འདི་དང ། མ་འོངས་པ་ན་འབྱུང་བ་འདི་ལྟ་བུ་འདི་དག་མཐོང་བ། སངས་རྒྱས་འབུམ་ཕྲག་དུ་མ་ལ་དགེ་བའི་རྩ་བ་སྐྱེད་པ། བསོད་ནམས་ཀྱི་ཕུང་པོ་དཔག་ཏུ་མ་མཆིས་པ་ཡོངས་སུ་འཛིན་པ་མཐོང་ནས་སྙིང་བརྩེ་བའི་སླད་དུ། བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང ། གནོད་སྦྱིན་འབུམ་ཕྲག་དུ་མ་རང་རང་གི་ཁང་པ་ན་མཆིས་པ་དག་སྤོས་དང ། བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་ཀྱིས་བསྐུལ་མ་ཐག་ཏུ་ལུས་མི་གདའ་བར་བགྱིས་ཏེ། མིའི་རྒྱལ་པོ་དེའི་ཁང་པ་བརྩེགས་པ་ཕྱག་དར་མ་མཆིས་པ་ལེགས་པར་ཕྱག་དར་བགྱིས་པ། སྤོས་ཆབ་སྣ་ཚོགས་ཀྱི་ཆག་ཆག་ལེགས་པར་བཏབ་པ། རྒྱན་སྣ་ཚོགས་ཀྱིས་ལེགས་པར་བརྒྱན་པའི་རྒྱལ་པོའི་ཕོ་བྲང་ག་ལ་བ་དེར་ཆོས་མཉན་པའི་སླད་དུ་མཆིས་པར་བགྱིའོ། །མི་མཇེད་ཀྱི་བདག་པོ་ཚངས་པ་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། ལྷ་མོ་ཆེན་པོ་དབྱངས་ཅན་མ་དང ། ལྷ་མོ་ཆེན་པོ་དཔལ་དང ། སའི་ལྷ་མོ་བརྟན་མ་དང ། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། ལྷའི་བུ་དབང་ཕྱུག་ཆེན་པོ་དང ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང ། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་
322a
༄#། །བཟང་དང ། འཕྲོག་མའི་བུ་ལྔ་བརྒྱའི་འཁོར་ཅན་དང ། ཀླུའི་རྒྱལ་པོ་མ་དྲོས་པ་དང ། ཀླུའི་རྒྱལ་པོ་རྒྱ་མཚོ་དང ། ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་དག་ལུས་མི་གདའ་བར་བགྱིས་ཏེ། མིའི་རྒྱལ་པོ་དེའི་ཕོ་བྲང་རྒྱན་སྣ་ཚོགས་ཀྱིས་བརྒྱན་པ་དེ་ག་ལ་བ་དང ། ཆོས་སྨྲ་བ་དེའི་ཆོས་ཀྱི་ཁྲི་མཐོན་པོ་རྒྱན་སྣ་ཚོགས་ཀྱིས་ལེགས་པར་བརྒྱན་པ། མེ་ཏོག་བཀྲམ་པའི་ས་ལ་བཤམས་པར་གྱུར་པ་ག་ལ་བ་དེར་ཆོས་མཉན་པའི་སླད་དུ་མཆིས་པར་འགྱུར་རོ། །བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ།་གནོད་སྦྱིན་འབུམ་ཕྲག་དུ་མ་དེ་དག་ཐམས་ཅད་མཐུན་པར་བགྱིས་ཏེ་མིའི་རྒྱལ་པོ་དགེ་བའི་གྲོགས་བགྱིད་པ། དགེ་བ་ཐོབ་པར་བགྱིད་པ། བླ་ན་མེད་པ། ཆོས་ཀྱི་སྦྱིན་པ་ཆེན་པོ་སྦྱིན་པ་དེ་ལ་ཆོས་ཀྱི་བདུད་རྩིའི་ཁུ་བ་འདིས་ཚིམ་པར་གྱུར་མ་ཐག་ཏུ་མིའི་རྒྱལ་པོ་དེ་ལ་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང།་ཞི་བ་དང ། བདེ་ལེགས་སུ་འགྱུར་བར་བགྱིའོ། །མིའི་རྒྱལ་པོའི་ཕོ་བྲང་དེ་དང ། གྲོང་ཁྱེར་དེ་དང ། ཡུལ་དེའང་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང།་ཡོངས་སུ་བསྐྱང་བ་དང ། ཞི་བ་དང ། བདེ་ལེགས་སུ་འགྱུར་བར་བགྱིའོ། །ཆད་པ་སྤང་བར་ཡང་བགྱིའོ། །ཡུལ་དེར་ཡང་འཇིགས་པ་དང ། གནོད་པ་དང ། ནད་འགོ་བ་དང ། འཁྲུག་པ་ཐམས་ཅད་
322b
ལས་ཡོངས་སུ་ཐར་པར་བགྱིའོ། །བཙུན་པ་བཅོམ་ལྡན་འདས། གང་ལ་ལ་ཞིག་མིའི་རྒྱལ་པོར་གྱུར་ཏེ་མིའི་རྒྱལ་པོ་དེའི་ཡུལ་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བྱུང་ལ། བཙུན་པ་བཅོམ་ལྡན་འདས། མིའི་རྒྱལ་པོ་དེ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛིན་པ་དག་ལ་བསྟི་སྟང་དུ་མི་བགྱིད། བླ་མར་མི་བགྱིད། རིམ་གྲོར་མི་བགྱིད། མཆོད་པར་མི་བགྱིད་ན་བདག་ཅག་རྒྱལ་པོ་ཆེན་པོ་བཞི་དང ། གནོད་སྦྱིན་བྱེ་བ་ཁྲག་ཁྲིག་འབུམ་ཕྲག་དུ་མ་ལ་ཆོས་མཉན་པ་འདི་དང།་ཆོས་བདུད་རྩིའི་ཁུ་བ་འདིས་ཚིམ་པར་མི་བགྱིད། རིམ་གྲོར་མི་བགྱིད། ལྷའི་ལུས་འདི་དག་གི་གཟི་བྱིན་ཡང་རྣམ་པར་འཕེལ་བར་མི་བགྱིད། བདག་ཅག་གི་བརྩོན་འགྲུས་དང ། མཐུ་དང ། སྟོབས་ཀྱང་མི་སྐྱེད། བདག་ཅག་གི་ལུས་ལ་གཟི་བརྗིད་དང ། དཔལ་དང ། ཕུན་སུམ་ཚོགས་པའང་རྣམ་པར་འཕེལ་བར་མི་བགྱིད་པ་ལགས་སོ། །བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང ། གནོད་སྦྱིན་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ཡུལ་དེ་ཡལ་བར་དོར་བར་བགྱིའོ། །བཙུན་པ་བཅོམ་ལྡན་འདས། བདག་ཅག་གིས་ཡུལ་དེ་ཡལ་བར་བོར་ན་ཡུལ་ན་གནས་པའི་ལྷའི་ཚོགས་ཐམས་ཅད་ཀྱིས་ཀྱང་ཡུལ་དེ་ཡལ་བར་འདོར་བར་འགྱུར་རོ། །བཙུན་པ་བཅོམ་ལྡན་འདས། ལྷ་རྣམས་ཀྱིས་ཡུལ་དེ་ཡལ་
323a
༄#། །བར་བོར་ན་ཡུལ་དེར་ཡུལ་རྣམ་པར་འཁྲུག་པ་སྣ་ཚོགས་འབྱུང་བར་འགྱུར། རྒྱལ་པོའི་འཁྲུག་པ་མི་བཟད་པ་དག་འབྱུང་བར་འགྱུར། ཡུལ་ན་གནས་པའི་སེམས་ཅན་ཐམས་ཅད་ཀྱང་འཐབ་པ་སྐྱེ་བ་དང ། འཚང་འདྲུ་བ་སྐྱེ་བ་དང ། རྩོད་པ་སྐྱེ་བར་འགྱུར། དངོགས་པ་དང ། འགྱེད་པར་འགྱུར་བ་དང ། གཟའ་དང ། ནད་རྣམ་པ་སྣ་ཚོགས་ཡུལ་དུ་འབྱུང་བར་འགྱུར། ཕྱོགས་ཐ་དད་པ་ནས་སྐར་མདའ་ལྟུང་བར་འགྱུར། གཟའ་དང ། རྒྱུ་སྐར་རྣམས་ཀྱང་ཕན་ཚུན་མི་མཐུན་པར་གདའ་བར་འགྱུར། དགུང་ཟླ་འཆར་བ་ན་ཉི་མ་ལྟ་བུར་གདའ་བར་འགྱུར། ཟླ་བའི་གཟའ་དང ། ཉི་མའི་གཟའ་འབྱུང་བར་འགྱུར། ཉི་མ་དང ། ཟླ་བ་ནམ་མཁའ་ལ་གནས་པའང་རྟག་པར་རྒྱུན་ཏུ་སྒྲ་གཅན་གྱི་གནོད་པ་དང་ལྡན་པར་འགྱུར། དུས་དུས་སུ་ནམ་མཁའ་ལ་འཇའི་ཁ་དོག་ལྟ་བུ་འཁྱིལ་བར་འགྱུར། སའང་གཡོ་བར་འགྱུར། ས་ལ་གནས་པའི་ཁྲོན་པའང་སྒྲ་འབྱིན་པ་གྲག་པར་འགྱུར། ཡུལ་དུ་རླུང་དྲག་པོ་ལྡང་བར་འགྱུར། ཆར་པ་དྲག་པོ་འབབ་བར་འགྱུར། ཡུལ་དུ་མུ་གེའི་ཡང་བ་འབྱུང་བ་འགྱུར། ཕ་རོལ་གྱི་དམག་ཚོགས་ཀྱིས་ཡུལ་འཇོམས་པར་འགྱུར། ཡུལ་དེ་ཕུང་བར་འགྱུར། སེམས་ཅན་དེ་དག་ཀྱང་ཉོན་མོངས་པ་མང་བར་འགྱུར། ཡུལ་དེ་ཉམས་མི་དགའ་བར་འགྱུར་རོ། །བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང ། གནོད་སྦྱིན་འབུམ་ཕྲག་དུ་མ་དང ། ཡུལ་ན་
323b
གནས་པའི་ལྷ་དང ། ཀླུ་རྣམས་ཀྱིས་ཡུལ་དེ་ཡལ་བར་བོར་ན་ཡུལ་དེར་འདི་ལྟ་བུའི་གནོད་པ་རྣམ་པ་སྣ་ཚོགས་བརྒྱ་དང ། གནོད་པ་སྟོང་འབྱུང་བར་འགྱུར་རོ། །བཙུན་པ་བཅོམ་ལྡན་འདས། གང་ཡུལ་ཞིག་མིའི་རྒྱལ་པོར་གྱུར་ལ་དེ་བདག་ཉིད་ལ་ཀུན་ཏུ་བསྲུང་བ་ཆེན་པོ་བགྱིད་འཚལ་བར་འགྱུར། རྒྱལ་པོའི་བདེ་བ་སྣ་ཚོགས་ཡུན་རིང་པོར་མྱོང་བར་འཚལ་བར་གྱུར། བདེ་བ་ཐམས་ཅད་བསྟབས་པའི་སེམས་ཀྱིས་རྒྱལ་པོ་ཉིད་བགྱིད་འཚལ་བར་གྱུར། ཡུལ་ན་གནས་པའི་སེམས་ཅན་ཐམས་ཅད་བདེ་བར་བགྱིད་འཚལ་བར་འགྱུར། ཕ་རོལ་གྱི་དམག་ཚོགས་ཐམས་ཅད་ཕམ་པར་བགྱིད་འཚལ་བར་གྱུར། ཡུལ་ཐམས་ཅད་ཡུན་རིང་དུ་ཡོངས་སུ་སྐྱོང་འཚལ་བར་འགྱུར། ཆོས་ཀྱི་རྒྱལ་པོ་ཉིད་བགྱིད་འཚལ་བར་གྱུར། རང་གི་ཡུལ་ཡང་འཇིགས་པ་དང ། གནོད་པ་དང ། ནད་འགོ་བ་དང།་འཁྲུག་པ་ཐམས་ཅད་ལས་ཡོངས་སུ་ཐར་པར་བགྱིད་འཚལ་བར་གྱུར་ན། བཙུན་པ་བཅོམ་ལྡན་འདས། མིའི་རྒྱལ་པོ་དེས་གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་མཉན་པར་བགྱི། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ལའང་བསྟི་སྟང་དུ་བགྱི། བླ་མར་བགྱི། རིམ་གྲོར་བགྱི། མཆོད་པར་བགྱི། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་རྣམས་ཀྱང་ཆོས་མཉན་པའི་དགེ་བའི་རྩ་བ་བསགས་པ་འདི་དང ། ཆོས་བདུད་རྩིའི་ཁུ་བ་འདིས་ཚིམ་པར་བགྱི། བདག་
324a
༄#། །ཅག་གི་ལྷའི་ལུས་འདི་དག་གི་གཟི་བྱིན་ཆེན་པོའང་རྣམ་པར་འཕེལ་བར་བགྱིའོ། །དེ་ཅིའི་ཕྱིར་ཞེ་ན། བཙུན་པ་བཅོམ་ལྡན་འདས། མིའི་རྒྱལ་པོ་དེས་གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱི་སྟེ། བཙུན་པ་བཅོམ་ལྡན་འདས། ཚངས་པའི་དབང་པོས་འཇིག་རྟེན་དང ། འཇིག་རྟེན་ལས་འདས་པའི་བསྟན་བཅོས་རྣམ་པ་སྣ་ཚོགས་ཇི་སྙེད་པ་བསྟན་པ་དག་དང ། ལྷའི་དབང་པོ་བརྒྱ་བྱིན་གྱིས་བསྟན་བཅོས་རྣམ་པ་སྣ་ཚོགས་ཇི་སྙེད་པ་བསྟན་པ་དག་དང ། དྲང་སྲོང་མངོན་པར་ཤེས་པ་ལྔ་ཅན་རྣམ་པ་སྣ་ཚོགས་དག་གིས་སེམས་ཅན་དག་གི་དོན་གྱི་སླད་དུ་འཇིག་རྟེན་པ་དང ། འཇིག་རྟེན་ལས་འདས་པའི་བསྟན་བཅོས་རྣམ་པ་སྣ་ཚོགས་ཇི་སྙེད་བསྟན་པ་དག་པས་ཆེས་མཆོག་ཆེས་ཁྱད་པར་དུ་འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ནི། བཙུན་པ་བཅོམ་ལྡན་འདས། ཚངས་པའི་དབང་པོ་འབུམ་ཕྲག་དེ་དག་དང ། བརྒྱ་བྱིན་བྱེ་བ་ཁྲག་ཁྲིག་འབུམ་ཕྲག་དུ་མ་དང ། དྲང་སྲོང་མངོན་པར་ཤེས་པ་ལྔ་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་ཐམས་ཅད་པས་ཆེས་མཆོག་ཆེས་ཁྱད་པར་དུ་འཕགས་པ་དེ་བཞིན་གཤེགས་པས་སེམས་ཅན་རྣམས་ཀྱི་དོན་གྱི་སླད་དུ་རྒྱ་ཆེར་ཡང་དག་པར་རབ་ཏུ་བཤད་པ་ལགས་སོ། །ཅི་ནས་ཀྱང་འཛམ་བུའི་གླིང་ཐམས་ཅད་ན་གནས་པའི་མི་རྣམས་ཀྱི་རྒྱལ་པོས་རྒྱལ་པོ་ཉིད་བགྱི་བ་དང ། ཅི་ནས་
324b
སེམས་ཅན་ཐམས་ཅད་བདེ་བར་འགྱུར་བ་དང ། ཅི་ནས་རང་གི་ཡུལ་ཀུན་ཏུ་བསྲུངས་བར་འགྱུར་བ་དང ། ཡོངས་སུ་བསྐྱངས་པར་འགྱུར་བ་དང ། ཅི་ནས་ཡུལ་ཐམས་ཅད་ན་གནོད་པ་དང ། དགྲ་མ་མཆིས་པར་འགྱུར་བ་དང ། ཅི་ནས་ཕ་རོལ་གྱི་དམག་ཚོགས་རྣམས་ཕམ་སྟེ་ཕྱིར་ཕྱོགས་པར་འགྱུར་བ་དང ། ཅི་ནས་ཡུལ་དེ་དག་ན་ནད་འགོ་བ་མ་མཆིས་ཤིང་འཁྲུག་པ་མ་མཆིས་པར་འགྱུར་བ་དང ། ཅི་ནས་ཡུལ་ཐམས་ཅད་ཆོས་ཀྱིས་འཁྲུག་པ་མ་མཆིས་ཤིང་མི་བརྫི་བར་འགྱུར་བ་དང ། ཅི་ནས་མིའི་རྒྱལ་པོ་དེ་དག་གིས་རང་རང་གི་ཡུལ་རྣམས་སུ་ཆོས་ཀྱི་སྒྲོན་མ་ཆེན་པོ་འབར་བར་བགྱིས་ཤིང་སྣང་བར་བགྱིས་པར་འགྱུར་བ་དང ། ཅི་ནས་ལྷའི་ཁང་ཁྱིམ་ཐམས་ཅད་ལྷ་དག་དང ། ལྷའི་བུ་རྣམས་ཀྱིས་གང་བར་འགྱུར་བ་དང ། ཅི་ནས་བདག་ཅག་རྒྱལ་པོ་བཞི་དཔུང་དང་གཡོག་ཏུ་བཅས་པ་དང ། གནོད་སྦྱིན་འབུམ་ཕྲག་དུ་མ་དང ། འཛམ་བུའི་གླིང་ན་གནས་པའི་ལྷའི་ཚོགས་ཐམས་ཅད་ཚིམ་པ་དང ། རིམ་གྲོར་བགྱིད་པར་འགྱུར་བ་དང ། ཅི་ནས་བདག་ཅག་གི་ལྷའི་ལུས་འདི་དག་གཟི་བརྗིད་ཆེན་པོས་རྣམ་པར་འཕེལ་བར་འགྱུར་བ་དང ། ཅི་ནས་བདག་གི་ལུས་ལ་བརྩོན་འགྲུས་དང ། སྟོབས་དང ། མཐུ་ཆེན་པོ་བསྐྱེད་པར་འགྱུར་བ་དང ། ཅི་ནས་བདག་ཅག་གི་ལུས་ལ་གཟི་བརྗིད་དང ། དཔལ་དང ། ཕུན་སུམ་ཚོགས་པ་རབ་ཏུ་འཇུག་པར་འགྱུར་བ་དང ། ཅི་ནས་ཛམྦུའི་གླིང་ཐམས་ཅད་དུ་ལོ་ལེགས་ཤིང་ཉམས་དགའ་ལ་སྐྱེ་བོ་དང །
325a
༄#། །མི་མང་པོས་གང་བར་འགྱུར་བ་དང ། ཅི་ནས་ཛམྦུའི་གླིང་ཐམས་ཅད་ན་གནས་པའི་སེམས་ཅན་རྣམས་བདེ་བར་འགྱུར་བ་དང ། དགའ་བ་སྣ་ཚོགས་མྱོང་བར་འགྱུར་བ་དང ། ཅི་ནས་སེམས་ཅན་ཐམས་ཅད་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང ། མིའི་བདེ་བ་རྒྱ་ཆེ་ཞིང་རྒྱ་ཆེ་བ་དག་མྱོང་བར་འགྱུར་བ་དང ། སངས་རྒྱས་བཅོམ་ལྡན་འདས་རྣམས་དང་ལྷན་ཅིག་གནས་པར་འགྱུར་བ་དང ། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་དག་ཐམས་ཅད་ད་ལྟ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཚངས་པའི་དབང་པོ་བྱ་བ་ཁྲག་ཁྲིག་འབུམ་ཕྲག་དག་པས་ཆེས་འཕགས་པའི་ཐུགས་རྗེ་ཆེན་པོའི་སྟོབས་དང་ལྡན་པའི་བྱིན་གྱིས་བརླབས་དང ། བརྒྱ་བྱིན་བྱེ་བ་ཁྲག་ཁྲིག་འབུམ་ཕྲག་དག་གིས་ལྷའི་ཤེས་པ་བས་ཆེས་འཕགས་པའི་དེ་བཞིན་གཤེགས་པའི་མཁྱེན་པ་བླ་ན་མེད་པ་དང ། དྲང་སྲོང་མངོན་པར་ཤེས་པ་ལྔ་ཅན་རྣམ་པ་སྣ་ཚོགས་ཀྱི་ཚོགས་བྱེ་བ་ཁྲག་ཁྲིག་འབུམ་ཕྲག་དུ་མ་ཐམས་ཅད་པས་ཆེས་འཕགས་པའི་བྱིན་གྱིས་བརླབས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ཐམས་ཅད་ཀྱི་དོན་གྱི་དོན་དུ་གསེར་
325b
འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཛམྦུའི་གླིང་འདིར་རྒྱ་ཆེར་ཡང་དག་པར་རབ་ཏུ་བཤད་དོ། །མིའི་རྒྱལ་པོའི་དགོས་པ་དང ། རྒྱལ་པོའི་བསྟན་བཅོས་དང ། རྒྱལ་པོའི་བགྱི་བ་གང་དག་ཛམྦུའི་གླིང་ཐམས་ཅད་ན་མཆིས་པ་དང ། གང་དག་གིས་སེམས་ཅན་འདི་དག་ཐམས་ཅད་བདེ་བར་འགྱུར་བ་དེ་དག་ཐམས་ཅད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིར་ཉེ་བར་བསྟན། ཡོངས་སུ་བརྗོད། ཡང་དག་པར་རབ་ཏུ་བཤད་དོ། །བཙུན་པ་བཅོམ་ལྡན་འདས། རྒྱུ་དེ་དང ། རྐྱེན་དེས་མིའི་རྒྱལ་པོ་དེས་གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གུས་པར་མཉན་པར་བགྱི། གུས་པར་རིམ་གྲོ་བགྱི། མཆོད་པར་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་རྒྱལ་པོ་ཆེན་པོ་ཁྱེད་བཞི་དཔུང་དང་གཡོག་ཏུ་བཅས་པས་གདོན་མི་ཟ་བར་མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པ་དང ། རིམ་གྲོ་བྱེད་པ་དང ། མཆོད་པ་བྱེད་པ་དེ་དག་ཀུན་ཏུ་བསྲུང་བའི་ཕྱིར་སྤྲོ་བ་རྒྱ་ཆེར་གྱིས་ཤིག ། རྒྱལ་པོ་ཆེན་པོ་དག་།དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོའི་རྒྱལ་པོ་འདི་འཛིན་པ་དེ་དག་ཀྱང་སངས་རྒྱས་ཀྱི་མཛད་པ་འཛིན་དུ་ཆུག་ཅིག།
326a
༄#། །དང།་དེ་དག་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་འདི་ལ་སངས་རྒྱས་ཀྱི་མཛད་པ་བྱེད་པར་འགྱུར། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་འཆད་པར་འགྱུར་ཏེ། རྒྱལ་པོ་ཆེན་པོ་ཁྱེད་བཞིས། ཅི་ནས་མདོ་སྡེའི་དབང་པོ་འདི་འཛིན་པའི་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་བསྲུང་བ་དང ། གནོད་པ་མེད་པ་དང ། ནད་མེད་པ་དང ། འཁྲུག་པ་མེད་པ་དང ། སེམས་བདེ་བར་འགྲོ་ཞིང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡང་དག་པར་རབ་ཏུ་སྟོན་པར་འགྱུར་བར་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ཀུན་ཏུ་བསྲུང་བར་བྱ། ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཞི་བ་དང ། བདེ་ལེགས་སུ་འགྱུར་བར་བྱའོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་སྟན་ལས་ལངས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ལ་ཡིད་བཞིན་གྱི་ནོར་བུ་ཞེས་བགྱི་བའི་གཟུངས་མཆིས་པ་འདི་སེམས་ཅན་གང་ལ་ལ་དག་འཛིན་ཅིང་འཆང་བར་མོས་པ་དེ་ལ་བསོད་ནམས་དཔག་ཏུ་མ་མཆིས་པར་འགྱུར་བ་དང ། རྟག་ཏུ་དེ་ལ་བདག་གིས་བསྲུང་ཞིང་བསྐྱབས་པས་དེའི་སྡུག་བསྔལ་ཐམས་ཅད་བསལ་ཏེ་བདེ་བར་གནས་པར་བགྱིའོ། །བསོད་ནམས་དང ། ཡེ་
326b
ཤེས་ཀྱི་ཚོགས་ཀྱང་བསྐྱེད་པར་བགྱིའོ། །གང་གཟུངས་སྔགས་འདི་འཛིན་པར་འདོད་པས་ལུས་བསྲུང་བའི་ཕྱིར་སྔགས་འདི་སྔར་བརྗོད་པར་བགྱིའོ། །ན་མོ་བཻ་ཤྲ་བ་ཎཱ་ཡ། མཧཱ་རཱ་ཛཱ་ཡ། ཏདྱ་ཐཱ། ར་ར་ར་ར། ཀུ་ནོ་ཀུ་ནོ། ཁུ་ནོ་ཁུ་ནོ། རུ་ནོ་རུ་ནོ། ས་བ་ས་བ། ཀ་ར་ཀ་ར། མཧཱ་བི་ཀཱ་རཾ། མཧཱ་བི་ཀཱ་རཾ། མཧཱ་ཀཱ་ལ། མཧཱ་རཱ་ཛ། རཀྵ་རཀྵ་ཏུ་མཱཾ། སརྦ་སཏྭཱ་ནཱཉྩ་སཝཱཧཱ། བཅོམ་ལྡན་འདས། སྔགས་འདི་སྐུད་པ་དཀར་པོ་ལ་སྔགས་ལན་རེ་བཟླས་ཤིང་མདུད་པ་ལན་རེ་བོར་ཏེ་དེ་ལྟར་ལན་བདུན་བྱས་ནས་དཔུང་པ་ལ་བཏགས་ན་དོན་དེ་ངེས་པར་འགྲུབ་པར་འགྱུར་རོ། །དེ་ནས་ཁང་པ་དབེན་པའི་ནང་དུ་ཁྲུས་བྱས་ལ་གོས་གཙང་མ་གྱོན་ཏེ་སྤོས་གུ་གུལ་དང ། ཙནྡན་དང ། ག་བུར་དང ། དུ་རུ་སྐ་དང ། ་ག་རུ་དང ། སྤོས་དཀར་པོ་ལས་སོགས་པ་འདི་དག་ཆ་མཉམ་པར་སྦྱར་བའི་སྤོས་ཀྱིས་མཆོད་ཅིང་སྔགས་འདི་བཟླས་པས་རྒྱལ་པོ་ཆེན་པོ་རྣམ་ཐོས་ཀྱི་བུ་སྤྱན་དྲང་བར་བྱའོ། །ན་མོ་བཻ་ཤྲ་བ་ཎཱ་ཡ། མཧཱ་དྷཱ་ན་དཱ་ཡ། ཙཎྜེ་ཤཝ་རཝ་ཡ། ཨཱ་ཀཪྵ། ཨ་པ་ར་ཛི་ཏ། ཙཎྜེ་ཤཝ་རཝ། པ་ར་མ། ཀ་རུ་ཎི་ཀ། སརྦ་སཏྭ། ཧི་ཏ་ཙིནྟྲ། མ་མ་དྷཱ་ན་བརྡྷོ། པརྱེ་ཤ་སཝ་ཡཾ། ཨཱ་ཀཪྵ་ཡ་སཝཱཧཱ། །སྔགས་འདི་ལན་བདུན་བཟླས་པའི་འོག་ཏུ་རྩ་བའི་སྔགས་བཟླས་པར་བྱའོ། །སྔགས་འདི་འདོན་པའི་དུས་སུ་དཀོན་མཆོག་གསུམ་དང ། རྒྱལ་པོ་ཆེན་པོ་རྣམ་ཐོས་ཀྱི་བུ་ལ་སྔར་ཕྱག་འཚལ་བར་བྱའོ། །རྒྱལ་པོ་ཆེན་པོ་རྣམ་ཐོས་ཀྱི་བུ་ནི་སེམས་ཅན་ཐམས་ཅད་ཀྱི་བསམ་པ་སྐོང་ཞིང་
327a
༄#། །ནོར་སྦྱིན་པས་སེམས་ཅན་ཐམས་ཅད་བདེ་བར་མཛད་པའི་ཕྱིར་ཡིད་བཞིན་གྱི་ནོར་བུ་ཞེས་བྱ་བའི་སྔགས་འདི་བཟླས་ན་སེམས་ཅན་དེ་དག་ཡིད་བཞིན་དུ་བདེ་བ་རྙེད་པར་འགྱུར་རོ། །དེ་ནས་ལྷའི་རྒྱལ་པོ་རྣམ་ཐོས་ཀྱི་བུས་བཅོམ་ལྡན་འདས་ཀྱི་སྤྱན་སྔར་ཡིད་བཞིན་གྱི་ནོར་བུ་ཞེས་བགྱི་བའི་སྔགས་ཀྱི་སྙིང་པོ་འདི་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མོ་བཻ་ཤྲ་བ་ཎཱ་ཡ།་མཧཱ་རཱ་ཛ་ཡ། ཏདྱ་ཐཱ། སི་མི་སི་མི། སུ་མུ་སུ་མུ། ཙཎྜ་ཙཎྜ། ཙ་ར་ཙ་ར། ས་ར་ས་ར། ཀ་ར་ཀ་ར། ཀི་ལི་ཀི་ལི། ཀུ་རུ་ཀུ་རུ། མུ་རུ་མུ་རུ། ཙུ་རུ་ཙུ་རུ། སཾ་དཱ་ཡ། ཨཱཏྨ་ནལཾ། ནི་ཏ་ཏྱན། ཨནྡྷརྡྷཱ་ཏུ་སཝཱ་ཧཱ། ན་མོ་བཻ་ཤྲ་བ་ཎཱ་ཡ་སཝཱཧཱ། དྷཱ་ན་དཱ་ཡ་སཝཱཧཱ། ན་མོ་ར་ཐ་པ་རི་པཱུ་ར་ཡ་སཝཱཧཱ། སྔགས་འདི་སྔར་ལན་སྟོང་བཟླས་པའི་འོག་ཏུ་ཁང་པ་དབེན་པའི་ནང་དུ་ལྕི་བས་དཀྱིལ་འཁོར་ཆུང་ངུ་ཞིག་བྱས་ཏེ་བཤོས་ཅི་དང ། ཅི་འབྱོར་པས་མཆོད་པར་བྱའོ། །སྤོས་དམ་པ་བསྲེགས་པའི་དུ་བའི་རྒྱུན་མི་འཆད་པར་བྱ་ཞིང་ཉིན་མཚན་དུ་སེམས་རྩེ་གཅིག་པས་སྔགས་ཀྱི་སྙིང་པོ་འདི་བདག་ཉིད་ཀྱིས་ཐོས་པ་ཙམ་དུ་བཟླས་པ་བྱས་ན་དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུའི་སྲས་ཛི་ནར་ཤ་བྷ་ཞེས་བྱ་བ་གཞོན་ནུའི་གཟུགས་ཀྱིས་དེའི་གན་དུ་མཆིས་ཏེ་ངའི་ཡབ་ལ་ཅི་ཞིག་གསོལ་ཞེས་དྲི་བར་བྱེད་དོ། །དེ་ནས་བདག་ནི་དཀོན་མཆོག་གསུམ་ལ་མཆོད་པའི་ཕྱིར་ནོར་ཞིག་གསོལ་གྱི་སྩོལ་ཅིག་ཅེས་སྨོས་ཤིག་།དེ་ནས་སྲས་ཛི་ནར་ཤ་བྷས་
327b
ཡབ་ལ་གསོལ་པ། སྐྱེས་བུ་དམ་པ་ཞིག་དཀོན་མཆོག་གསུམ་ལ་མཆོད་པའི་ཕྱིར་ནོར་ཞིག་གསོལ་ལོ་ཞེས་གསོལ་བ་དང ། ཡབ་ཀྱིས་ཁྱོད་མྱུར་དུ་སོང་ལ་ཉིན་གཅིག་བཞིན་དུ་ཀར་ཤ་པ་ཎི་བརྒྱ་བརྒྱ་བྱིན་ཅིག་ཅེས་བཀའ་སྩལ་ཏོ། །དེ་ནས་སྔགས་སྒྲུབ་པ་དེས་ལྟས་དེ་ལྟ་བུ་མཐོང་ནས་དོན་དེ་གྲུབ་པར་ཤེས་ཏེ་གནས་དབེན་པར་བདག་གཅིག་བུ་སྤོས་བསྲེགས་ལ་ཉལ་ཁར་སྔས་སུ་དྲིའི་ཟ་མ་ཏོག་གཅིག་བཞག་སྟེ་ཉལ་བར་བྱའོ། །དེ་ཕྱིན་ཆད་ནང་གཅིག་བཞིན་དུ་ཟ་མ་ཏོག་དེའི་ནང་ནས་ནོར་ཅི་འབྱུང་བ་ལས་ནོར་དེ་དེའི་ཉིན་བར་དཀོན་མཆོག་གསུམ་ལ་མཆོད་པའི་ཡོ་བྱད་མེ་ཏོག་དང ། སྤོས་དང ། ཞལ་ཟས་ལ་སོགས་པར་སྦྱར་བ་དང ། བྲེལ་ཞིང་ཕོངས་པ་རྣམས་ལའང་སྦྱིན་ཞིང་ཟད་པར་བྱའོ། །སེམས་ཅན་ཐམས་ཅད་ལ་བྱམས་པར་བསམ་མོ། །ཁྲོ་བ་དང ། འཚོ་བའི་བསམ་པ་བསྐྱེད་ན་དེ་ཉམས་པར་འགྱུར་བས་ཁྲོ་བའི་སེམས་མི་སྐྱེ་བར་རྟག་ཏུ་བསྲུང་བར་བགྱིའོ། །དེ་ནས་ཡང་སྔགས་འདི་འཛིན་པ་དེས་ཉིན་གཅིག་བཞིན་དུ་ལྷའི་རྒྱལ་པོ་རྣམ་ཐོས་ཀྱི་བུ་དང ། གཞན་ཡང་སྲས་དང ། སྲས་མོའི་འཁོར་དུ་བཅས་པ་ལ་རྟག་པར་བསམ་ཞིང་བསྟོད་པ་དང ། བསྔགས་པ་བྱའོ། །རྟག་པར་དགེ་བ་བཅུའི་ལས་ཀྱི་ལམ་གྱིས་གཏོང་ཞིང་ལྷ་ལ་སོགས་པ་རྣམས་ཀྱི་མཐུ་དང།་བསོད་ནམས་མངོན་པར་འཕེལ་པར་འགྱུར་བ་དང ། དགེ་བ་རྒྱས་པ་དང ། བླ་ན་མེད་པའི་བྱང་ཆུབ་ཀྱང་ཐོབ་པར་འགྱུར་རོ། །ལྷ་དེ་དག་གིས་དེ་ལྟར་བྱེད་པ་དེ་མཐོང་ནས་ཀུན་དགའ་ཞིང་མགུ་རངས་
328a
༄#། །པས་འོང་ཞིང་དེ་ལ་བསྲུང་བ་དང ། སྐྱོབ་པར་བྱེད་དོ། །སྔགས་མཁན་དེ་ཉིད་ཀྱང་ཚེ་ལོ་དཔག་ཏུ་མེད་པར་གནས་ཤིང་ངན་སོང་གསུམ་ཡོངས་སུ་སྤོང་བ་དང ། བགེགས་དང ། བར་ཆད་ཐམས་ཅད་ཀྱང་མེད་པར་འགྱུར་རོ། །ཡིད་བཞིན་གྱི་ནོར་བུ་འདི་དག་དང ། གཏེར་གཞན་དག་ཀྱང་ཐོབ་པར་འགྱུར་རོ། །རྫུ་འཕྲུལ་ལ་དབང་སྒྱུར་ཞིང་བསམས་པ་ཐམས་ཅད་ཀྱང་གྲུབ་པར་འགྱུར་རོ། །གལ་ཏེ་ལོངས་སྤྱོད་ཅན་དུ་འདོད་ནའང་ཡིད་བཞིན་དུ་གྲུབ་པ་དང ། བྱ་དང ། གཅན་གཟན་གྱི་སྐད་ཐམས་ཅད་ཀྱང་ཤེས་པར་འགྱུར་རོ། །བཅོམ་ལྡན་འདས། སྔགས་སྒྲུབ་པ་དེས་བདག་མཐོང་བར་འཚལ་ན་ཚེས་བརྒྱད་དམ། ཚེས་བཅོ་ལྔའི་ཉིན་པར་རས་དཀར་པོ་ལ་བཅོམ་ལྡན་འདས་ཀྱི་སྐུ་གཟུགས་ཀ་པི་ཏ་དང་སྦྱར་བའི་མཚོན་རྩིས་རྒྱན་སྣ་ཚོགས་ཀྱིས་བརྒྱན་པ། རི་མོ་མཁན་གསོ་སྦྱོང་ཡན་ལག་བརྒྱད་དང་ལྡན་པས་སངས་རྒྱས་ཀྱི་གཡོན་ཕྱོགས་སུ་ནི་དཔལ་གྱི་ལྷ་མོའི་གཟུགས་བྲི། སངས་རྒྱས་ཀྱི་གཡས་ཕྱོགས་སུ་ནི་རྒྱལ་པོ་ཆེན་པོ་རྣམ་ཐོས་ཀྱི་བུ་བདག་བུ་སྨད་དང ། འཁོར་དུ་བཅས་པར་བྲིས་ཏེ་གནས་དེར་བཀྲམ་ནས་མེ་ཏོག་སྣ་ཚོགས་དང ། དྲི་སྣ་ཚོགས་མང་པོ་དང ། མར་མེ་དམ་པ་དང ། ཞལ་ཟས་བདའ་བ་སྣ་ཚོགས་ཀྱིས་ཉིན་མཚན་རྒྱུན་མི་འཆད་པར་མཆོད་པར་བྱའོ། །སྔགས་འདི་ཟློས་པས་སེམས་མི་གཡེང་བར་བྱ་ཞིང་རྒྱལ་པོ་ཆེན་པོ་རྣམ་ཐོས་ཀྱི་བུ་སྤྱན་དྲང་བའི་སྔགས་འདི་བཟླས་པར་བྱའོ། །ན་མཿ ་ཤྲཱི་ཀཎྛཱ་ཡ། བུདྡྷ་ཡ།
328b
ན་མོ་བཻ་ཤྲ་བ་ཎཱ་ཡ། ཡཀྵ་རཱ་ཛཱ་ཡ། མཧཱ་རཱ་ཛཱ་ཡ། ཨ་ཏི་རཱ་ཛཱ་ཡ། ན་མཿ ཤྲཱི་མཧཱ་དེ་བྱཻ། ཏདྱ་ཐཱ། ཏ་ར་ཏ་ར། ཏུ་རུ་ཏུ་རུ། བ་ར་བ་ར། སུ་ཤུདྷོ་སུ་ཤུདྷོ། ཧ་ན་ཧ་ན། མ་ནི་ཀ་ན་ཀ། བཛྲེ་བཻ་ཌཱུརྱ། མུཀྟི་ཀ། ཨ་ལཾ་ཀྲིཾ་ཏ་ཤ་རཱི་རཱ་ཡ། སརྦ་སཏྭཱ་ཧི་ཏ་ཀཱ་མ། བེ་ཤྲ་བ་ཎཱ་ཤྲཱི་ཡ་དེ་བཱི་པྲ་བྷ་ཡ། ཨེ་ཧི་ཨེ་ཧི། མཱ་བི་ལམྦ། གྷཱུ་རྞ་གྷཱུརྞ། པ་ར་སྱ་པ་ར་སྱ། ད་དཱ་ཧི་མ་མཱ། དཪྴ་ན་ཀཱ་མ་སྱ། དཪྴ་ནཾ། མ་མ་མ་ན། པྲ་ལ་ཧ་དཱ་ཡ་སཝཱ་ཧཱ། བཅོམ་ལྡན་འདས། བདག་གིས་སྔགས་ཟློས་པ་དེ་དང ། མཆོད་པ་རྒྱ་ཆེན་པོ་མཐོང་ནས་བདག་བྱམས་པ་དང ། དགའ་པའི་བསམ་པ་སྐྱེས་ནས་བདག་དེའི་མདུན་དུ་བྱིས་པ་གཞོན་ནུའི་གཟུགས་སམ། ཡང་ན་རྒན་པོ་འམ། དགེ་སློང་གི་གཟུགས་སུ་བྱས་ཏེ་བདག་ལག་ན་ཡིད་བཞིན་གྱི་ནོར་བུ་གསེར་གྱི་སྣོད་དང་བཅས་པ་ཐོགས་ཏེ་དཀྱིལ་འཁོར་གྱི་ནང་དུ་ཞུགས་ནས་ལུས་ཀྱི་གུས་པ་སྟོན་ཅིང་སངས་རྒྱས་ཀྱི་མཚན་གཅིག་ཏུ་བརྗོད་དེ་སྔགས་མཁན་དེ་ལ་འདི་སྐད་ཅེས་སྨྲའོ། །ཁྱོད་ཅི་དང ། ཅི་སློང་བ་དེ་དག་ཐམས་ཅད་གྲུབ་པར་བྱ་སྟེ། ནགས་ཚལ་དབེན་པར་འགྲོ་འདོད་པ་འམ། ནོར་བུ་རིན་པོ་ཆེ་འདོད་པའམ། མི་མང་པོའི་ཡིད་དུ་འོང་བར་འདོད་པའམ། གསེར་དང ། དངུལ་ལ་སོགས་པའི་ནོར་འདོད་པའམ། སྔགས་གཞན་སྒྲུབ་པའི་དངོས་གྲུབ་འདོད་པ་འམ། རྫུ་\?\་འཕྲུལ་དང ། མངོན་པར་ཤེས་པ་དང ། ཚེ་རིང་བར་འདོད་པ་དང ། སྨན་བཅུད་ཀྱིས་ལེན་འདོད་པ་ལ་སོགས་པ་ཐམས་ཅད་བསམ་པ་བཞིན་དུ་གྲུབ་པར་བྱའོ། །བདག་གིས་དངོས་པོ་དེ་དག་ལ་སོགས་
329a
༄#། །པ་མདོ་ཙམ་ཞིག་སྨོས་པར་ཟད་ཀྱི། དེ་མ་ཡིན་པ་གཞན་ཞིག་འདོད་པ་ནའང་ཐམས་ཅད་བསམ་པ་བཞིན་དུ་ཡོངས་སུ་གྲུབ་པར་བྱ་སྟེ་རིན་པོ་ཆེའི་གཏེར་མི་ཟད་པ་དང།་བསོད་ནམས་ཚད་མེད་པ་དང་ལྡན་པར་འགྱུར་རོ། །དཔེར་ན། ཉི་ཟླ་འདི་ས་ལ་ལྟུང་བར་འགྱུར་བ་དང ། ས་ཆེན་པོ་འདི་གཞན་དུ་འགྱུར་བའི་དུས་ནི་ཡོད་ཀྱང་སྲིད་ཀྱི། བདེན་པའི་ཚིག་འདི་ནི་ནམ་ཡང་སླུ་བར་མི་འགྱུར་བས་རྟག་ཏུ་བདེ་བ་དང ། ཡིད་བཞིན་དུ་སྐྱིད་པ་ལོངས་སྤྱོད་པ་ཐོབ་པར་འགྱུར་རོ། །གཞན་ཡང ། བཅོམ་ལྡན་འདས་མདོ་སྡེའི་དབང་པོའི་རྒྱལ་པོ་འདི་གང་ཞིག་འཛིན་ཅིང་འཆང་བ་དང ། ཀློག་ཅིང་འདོན་པའང་རུང་སྔགས་འདི་སྒྲུབ་པའང་རུང་སྟེ་ཚེགས་ཆུང་ངུས་མྱུར་དུ་གྲུབ་པར་འགྱུར་རོ། །བཅོམ་ལྡན་འདས། བདག་གིས་སེམས་ཅན་དབུལ་ཞིང་ཕོངས་པའི་སྡུག་བསྔལ་གྱིས་ཉེན་པ་རྣམས་ཀྱི་ཆེད་དུ་སྔགས་འདི་བཤད་པས་དེ་ཕྱུག་ཅིང་བདེ་བའི་མཆོག་དང ། ཕུན་སུམ་ཚོགས་པ་ཚེ་གཅིག་ཏུ་འབྱོར་པར་འགྱུར་རོ། །བདག་གིས་ཀྱང་དེ་ཡོངས་སུ་བསྲུང་ཞིང་བསྐྱབ་པའི་ཕྱིར་རྗེས་སུ་འབྲང་ཞིང་གནོད་པ་དང ། འཚེ་བ་ཐམས་ཅད་མ་མཆིས་པར་བགྱིའོ། །གཞན་ཡང ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་དེ་འཛིན་ཅིང་རྒྱས་པར་བྱེད་པ་དང ། སྔགས་འདི་འཆང་བའི་གང་ཟག་དེ་གོམ་པ་བརྒྱ་ཚུན་ཆད་འོད་ཀྱི་སྣང་བར་བྱས་ཏེ་བདག་གི་འཁོར་གནོད་སྦྱིན་སྟོང་རྣམས་ཀྱིས་ཀྱང་རྟག་ཏུ་དེའི་གཡོག་ཏུ་བསྒོ་ཞིང་
329b
མངག་གཞུག་ཡིད་བཞིན་དུ་བྱེད་དུ་གཞུག་གོ་།བདག་གི་བདེན་པའི་ཚིག་འདི་སླུ་བ་མེད་པར་ཡང་བཅོམ་ལྡན་འདས་ཀྱིས་དགོངས་སུ་གསོལ། དེ་ནས་རྒྱལ་པོ་ཆེན་པོ་རྣམ་ཐོས་ཀྱིས་བུས་སྔགས་དེ་སྐད་ཅེས་སྨྲས་པ་དང ། བཅོམ་ལྡན་འདས་ཀྱིས་ལེགས་སོ། །ལེགས་སོ་ཞེས་བཀའ་སྩལ་ཏོ། །རྒྱལ་པོ་ཆེན་པོ། ཁྱོད་ཀྱིས་སེམས་ཅན་ཐམས་ཅད་སྲེད་པས་གདུངས་པའི་སྡུག་བསྔལ་གྱི་དྲ་བ་ཐམས་ཅད་བྲལ་བས་ཕྱུག་ཅིང་བདེ་བར་བྱ་བའི་ཕྱིར་སྔགས་འདི་སྨྲས་པ་དང ། གཞན་ཡང ། མདོ་སྡེ་འདི་འཇིག་རྟེན་དུ་ཡོངས་སུ་རྒྱས་པར་བྱ་བའི་ཕྱིར་སྔགས་འདི་བཤད་པ་ནི་ལེགས་སོ། །ལེགས་སོ། །དེ་ནས་རྒྱལ་པོ་ཆེན་པོ་བཞི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་ཞབས་གཉིས་ལ་སྤྱི་བོའི་ཕྱག་བཙལ་ཏེ་དེའི་ཚེ་མངོན་སུམ་དུ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །རྒྱལ་བ་ཟླ་བ་དྲི་མ་མེད་པའི་སྐུ། །རྒྱལ་བ་ཉི་མ་འོད་ཟེར་སྟོང་གི་འོད། །རྒྱལ་བ་པདྨ་དྲི་མ་མེད་པའི་སྤྱན། །རྒྱལ་བ་མེ་ཏོག་པད་རྩ་རྡུལ་མེད་ཚེམས། །རྒྱལ་བའི་ཡོན་ཏན་རྒྱ་མཚོ་ལྟ་བུ་སྟེ། །རིན་པོ་ཆེ་ནི་དུ་མའི་འབྱུང་གནས་གྱུར། །རྒྱལ་བ་རྒྱ་མཚོ་ཡེ་ཤེས་ཆུ་ཡིས་གང། །ཏིང་འཛིན་བརྒྱ་ཕྲག་སྟོང་གིས་ཀུན་ཏུ་གང ། །རྒྱལ་བའི་ཞབས་ནི་འཁོར་ལོས་བྲིས་འདྲ་སྟེ། །ཁོར་ཡུག་མུ་ཁྱུད་དེ་བཞིན་རྩིབ་མ་སྟོང ། །ཕྱག་དང་ཞབས་ནི་དྲ་བས་སྦྲས་པ་སྟེ།
330a
༄#། །ཞབས་ཀྱི་དྲ་བ་ངང་པའི་དབང་པོ་བཞིན། །གསེར་གྱི་རི་བོ་ལྟ་བུར་རབ་ཏུ་གདའ། །རྒྱལ་དབང་དྲི་མེད་གསེར་གྱི་རི་དབང་རྒྱལ། །ཡོན་ཏན་ཐམས་ཅད་རི་དབང་འདྲ་བ་སྟེ། །སངས་རྒྱས་རི་དབང་རྒྱལ་ལ་ཕྱག་འཚལ་ལོ། །དེ་བཞིན་གཤེགས་པའི་ཟླ་བ་ཆུ་ཟླ་འདྲ། །ནམ་མཁའ་དང་ཡང་མཚུངས་ཤིང་འདྲ་བ་སྟེ། །སྒྱུ་མ་སྨིག་རྒྱུ་ལྟ་བུར་ཆགས་མེད་པ། །རྒྱལ་བ་དྲི་མ་མེད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་ཚིགས་སུ་བཅད་དེ་བཀའ་སྩལ་པ། སྟོབས་བཅུ་དག་གིས་གསེར་འོད་དམ་པ་ཡི། །མདོ་སྡེ་དབང་པོའི་རྒྱལ་པོ་རབ་མཆོག་འདི། །འཇིག་རྟེན་སྐྱོང་བ་ཁྱེད་ཅག་རྣམས་ཀྱིས་ནི། །བརྩོན་འགྲུས་རབ་ཏུ་བརྟན་པས་བསྐྱང་བར་བྱ། །འདི་ལྟར་མདོ་སྡེ་དཀོན་མཆོག་ཟབ་མོ་འདི། །སེམས་ཅན་ཀུན་ལ་བདེ་བ་སྦྱིན་བྱེད་པ། །སེམས་ཅན་རྣམས་ལ་ཕན་དང་བདེ་བའི་ཕྱིར། །འཛམ་བུའི་གླིང་འདིར་ཡུན་རིང་གནས་པར་འགྱུར། །འདི་ལྟར་སྟོང་གསུམ་གྱི་ནི་སྟོང་ཆེན་གྱི། །འཇིག་རྟེན་དག་ན་ངན་སོང་སྡུག་བསྔལ་དང ། །སེམས་ཅན་དམྱལ་བའི་སེམས་ཅན་རྣམས་ཀྱི་ནི། །སྡུག་བསྔལ་ཐམས་ཅད་ཞི་བར་བྱེད་པ་ཡིན། །འཛམ་གླིང་འདི་ན་འཛམ་གླིང་གནས་པ་ཡི། །རྒྱལ་པོ་གང་དག་ཡིན་པ་ཐམས་ཅད་ཀྱིས། །རབ་
330b
ཏུ་དགའ་བ་ཆེན་པོ་བསྐྱེད་ནས་ནི། །ཆོས་རྣམས་ཀྱིས་ནི་ཡུལ་དག་བསྐྱང་བར་གྱིས། །གང་གིས་འཛམ་བུའི་གླིང་འདིར་བདེ་བ་དང ། །ཤིན་ཏུ་ལོ་ལེགས་ཉམས་ཀྱང་དགའ་འགྱུར་ཞིང ། འཛམ་བུའི་གླིང་ནི་ཐམས་ཅད་དག་ན་ཡང ། །སེམས་ཅན་ཐམས་ཅད་བདེ་བར་འགྱུར་བར་གྱིས། །འདི་ནི་མི་ཡི་དབང་པོ་གང་རྣམས་ནི། །ཡུལ་ལ་དགའ་དང་བདག་བདེ་དགའ་བ་དང ། །རྒྱལ་སྲིད་རྣམ་པར་འབྱོར་པ་དགའ་བ་དེས། །མདོ་སྡེའི་དབང་པོ་འདི་ནི་མཉན་པར་བྱ། །མདོ་སྡེའི་དབང་པོ་མཆོག་ཏུ་དགེ་བར་བྱེད། །ཕ་རོལ་དགྲ་ནི་ཡང་དག་ཟད་པར་བྱེད། །ཕ་རོལ་དམག་ཚོགས་ཟློག་བྱེད་དགེ་བར་བྱེད། །མཆོག་ཏུ་འཇིགས་པས་ཕོངས་པ་སེལ་བར་བྱེད། །དཔེར་ན་རིན་ཆེན་ཤིང་ལྗོན་རབ་མཛེས་པ། །ཡོན་ཏན་ཀུན་འབྱུང་ཁྱིམ་ན་ཡོད་པ་ལྟར། །རྒྱལ་པོ་ཡོན་ཏན་འདོད་པ་རྣམས་ཀྱིས་ཀྱང ། །མདོ་སྡེའི་དབང་པོའི་མཆོག་འདི་དེ་ལྟར་བལྟ། །དཔེར་ན་ཆུ་གྲང་སྐོམ་པ་སེལ་བྱེད་པས། ཚ་བས་ཉམ་ཐག་ཚེ་ནི་རྙེད་པར་ལྟར། །ཡོན་ཏན་དག་གིས་སྐོམ་པའི་རྒྱལ་པོ་ལ། །མདོ་སྡེའི་དབང་པོའི་མཆོག་འདི་དེ་བཞིན་ནོ། །དཔེར་ན་རིན་ཆེན་ཐམས་ཅད་འབྱུང་བའི་གནས། །རིན་ཆེན་སྣོད་ནི་ལག་མཐིལ་ཡོད་པ་ལྟར། །མི་ཡི་དབང་པོའི་ཚོགས་ལ་གསེར་འོད་མཆོག་།མདོ་སྡེའི་དབང་པོའི་མཆོག་འདི་དེ་བཞིན་ནོ། །འདི་
331a
༄#། །ནི་ལྷ་མི་ཚོགས་ཀྱིས་མངོན་མཆོད་པ། །མདོ་སྡེའི་དབང་པོ་ལྷ་དབང་ཕྱག་བྱས་པས། །འཇིག་རྟེན་སྐྱོང་བ་རྫུ་འཕྲུལ་ཆེན་པོ་པ། །བཞི་པོ་དག་གིས་ཀུན་ཏུ་བསྲུངས་པ་ཡིན། །ཕྱོགས་བཅུ་དག་ན་སངས་རྒྱས་རྣམས་ཀྱིས་ཀྱང ། །མདོ་སྡེའི་དབང་པོ་འདི་ནི་རྟག་ཏུ་དགོངས། །མདོ་སྡེའི་དབང་པོ་འདི་ནི་བཤད་པ་ན། །སངས་རྒྱས་རྣམས་ཀྱིས་ལེགས་ཞེས་བརྗོད་པ་བྱིན། །གནོད་སྦྱིན་བྱེ་བ་སྟོང་ཕྲག་བརྒྱ་རྣམས་ཀྱིས། །ཕྱོགས་བཅུ་དག་ཏུ་ཡུལ་ཡང་སྲུང་བར་བྱེད། །རབ་ཏུ་དགའ་ཞིང་རབ་ཏུ་མགུ་སེམས་ཀྱིས། །མདོ་སྡེའི་དབང་པོ་འདི་ནི་ཉན་པར་བྱེད། །འཛམ་བུའི་གླིང་ན་གནས་པར་གྱུར་པ་ཡི། །ལྷ་ཡི་ཚོགས་རྣམས་བསམ་གྱིས་མི་ཁྱབ་པ། །ལྷ་ཚོགས་དེ་དག་ཀུན་ཀྱང་རབ་དགའ་བས། །མདོ་སྡེའི་དབང་པོ་འདི་ནི་ཉན་པར་བྱེད། །ཆོས་རྣམས་མཉན་པར་བྱ་བ་འདི་ཡིས་ནི། །གཟི་བརྗིད་དང་ནི་ ་དང་བརྩོན་འགྲུས་ཐོབ། །གཟི་བྱིན་ཆེན་པོ་ཡིས་ནི་ལྷ་ཡི་ལུས། །ཤིན་ཏུ་རྒྱས་ཤིང་རྣམ་པར་འཕེལ་བར་འགྱུར། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་ཚིགས་སུ་བཅད་པ་འདི་ལྟ་བུ་འདི་དག་ཐོས་པ་དང ། ངོ་མཚར་དུ་གྱུར། རྨད་དུ་བྱུང་བར་གྱུར། དགའ་བར་གྱུར་ཏེ། དེ་དག་ཆོས་ཀྱི་ཤུགས་ཀྱིས་ཡུད་ཙམ་ཞིག་ཏུ་ངུས་
331b
ནས་མཆི་མ་ཕྱིས་ཏེ། དེ་དག་ལུས་འཕར་ཡན་ལག་ཀུན་འདར་ཞིང་དགའ་བ་དང ། བདེ་བ་དང ། ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་ནས། ཡང་བཅོམ་ལྡན་འདས་ལ་ལྷའི་མེ་ཏོག་མན་དཱ་ར་བ་དག་གིས་གཏོར། མངོན་པར་གཏོར་ཏོ། །མངོན་པར་གཏོར་ནས་ཀྱང་སྟན་རྣམས་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་རྒྱལ་པོ་ཆེན་པོ་རེ་རེ་ལ་ཡང་གནོད་སྦྱིན་ལྔ་བརྒྱ་ལྔ་བརྒྱ་དག་།ཆོས་སྨྲ་བ་དེ་ལ་བསྲུང་པ་དང ། ཡོངས་སུ་བསྐྱང་བའི་སླད་དུ་རྟག་ཏུ་དགེ་སློང་ཆོས་སྨྲ་བའི་སླད་བཞིན་འབྲང་བར་བགྱིའོ། །གལ་ཏེ་མདོ་སྡེ་འདི་ལས་ཚིག་གི་དོན་འགའ་ཞིག་བརྗེད་པར་གྱུར་ནའང་བདག་ཅག་གིས་དེ་ལ་དྲན་པ་དང ། མི་བརྗེད་པའི་མཆོག་གི་གཟུངས་ཆོས་ཀྱི་རྣམ་གྲངས་ཡོངས་སུ་རྫོགས་པར་བགྱིའོ། །མདོ་སྡེའི་དབང་པོ་འདི་དག་གང་ན་བཞུགས་པའི་གནས་དེ་དག་གི་སེམས་ཅན་རྣམས་ཀྱིས་ཡོངས་སུ་རྒྱས་པར་བྱེད་པས། ནམ་ཡང་ནུབ་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་འཁོར་འདུས་པ་དེ་དག་ལ་ཆོས་ཀྱི་རྣམ་གྲངས་འདི་བཤད་པའི་ཚེ། སེམས་ཅན་དེ་
332a
༄#། །དག་གིས་ཡེ་ཤེས་དང ། སྤོབས་པ་དང ། བསོད་ནམས་ཀྱི་ཚོགས་ཚད་མེད་པ་ཐོབ་པས། ཉོན་མོངས་པ་སྤངས་པའི་བདེ་བ་དང་ལྡན་ཏེ། བསྟན་བཅོས་ཐམས་ཅད་ལ་མཁས་ཤིང་འཁོར་བ་ཡོངས་སུ་སྤངས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་མྱུར་དུ་ཐོབ་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། རྒྱལ་པོ་ཆེན་པོ་བཞིས་ཡུལ་འཁོར་ཡོངས་སུ་སྐྱོང་བའི་ལེའུ་ཞེས་བྱ་བ་སྟེ་བཅུ་གཉིས་པའོ།། །།བམ་པོ་བདུན་པ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རདྭ་ཏིའི་བུ་ལ་བཀའ་སྩལ་པ། ཤཱ་རདྭ་ཏིའི་བུ། འདི་ལྟ་སྟེ། ཆགས་པ་མེད་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་འདི་ནི། བྱང་ཆུབ་སེམས་དཔའ་ཆོས་ཐམས་ཅད་ལ་བསྒོམས་པ་རྣམས་ཀྱི་མ་དང ། བྱང་ཆུབ་སེམས་དཔའི་སྔོན་གྱི་སྤྱོད་པ་དང ། བྱང་ཆུབ་སེམས་དཔའ་རྣམས་ཀྱི་ཡོངས་སུ་འཛིན་པ་ཡིན་ནོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཤཱ་རདྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། གཟུངས་ནི་ཡུལ་ན་མི་གནས། ཕྱོགས་ན་མི་གནས་པ་ལགས་ན། བཅོམ་ལྡན་འདས། གཟུངས་གཟུངས་ཞེས་བགྱི་བའི་གཟུངས་ཀྱི་ཚིག་གི་དོན་དེ་གང་ལགས། དེ་སྐད་ཅེས་
332b
གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རདྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རདྭ་ཏིའི་བུ། ཇི་ལྟར་ཁྱོད་ཐེག་པ་ཆེན་པོ་ལ་གནས་པ་དང ། ཐེག་པ་ཆེན་པོ་ལ་མོས་པ་དང ། ཐེག་པ་ཆེན་པོ་ལ་ལྷག་པར་བྱ་བ་བྱས་པ་ཡིན་ན། ཤཱ་རདྭ་ཏིའི་བུ། ཇི་ལྟར་ཁྱོད་གཟུངས་ནི་ཡུལ་ན་མི་གནས། ཕྱོགས་ན་མི་གནས་ཤིང།་ཆོས་ཀྱང་མ་ཡིན། ཆོས་མ་ཡིན་པའང་ཡིན། འདས་པའང་མ་ཡིན། མ་འོངས་པའང་མ་ཡིན། ད་ལྟར་བྱུང་བའང་མ་ཡིན། དངོས་པོ་ཅན་ཡང་མ་ཡིན། དངོས་པོ་མེད་པ་ཅན་ཡང་མ་ཡིན། རྐྱེན་ལས་བྱུང་བའང་མ་ཡིན། རྐྱེན་མེད་པ་ལས་བྱུང་བའང་མ་ཡིན། འགྲོ་བ་ལས་བྱུང་བའང་མ་ཡིན། འགྲོ་བ་མེད་པ་ལས་བྱུང་བའང་མ་ཡིན། ཆོས་གང་གི་སྐྱེ་བའང་མ་ཡིན། འགོག་པའང་མ་ཡིན་པར་ཆོས་སྟོན་མོད་ཀྱི། བྱང་ཆུབ་སེམས་དཔའ་རྣམས་ལ་ཕན་པར་བྱ་བའི་ཕྱིར། འདི་ལྟ་སྟེ། སངས་རྒྱས་ཀྱི་ཡོན་ཏན་དང ། སངས་རྒྱས་ཀྱི་ཚུལ་ཁྲིམས་དང ། སངས་རྒྱས་ཀྱི་བསླབ་པ་དང ། སངས་རྒྱས་ཀྱི་དགོངས་པ་དང ། སངས་རྒྱས་འབྱུང་བ། འདི་ལྟ་སྟེ། ཆགས་པ་མེད་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་སྒྲུབ་པའི་ལམ་གྱི་རིག་པ་དང ། སྟོབས་ཀྱི་གནས་འདྲི་བ་ལེགས་སོ། །ལེགས་སོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ།
333a
༄#། །ཤཱ་རདྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་སྟེ། གཟུངས་ཐོབ་པས་གང་ལ་གནས་ན། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང ། ཡང་དག་པར་དམ་བཅས་པར་འགྱུར་བ་དང ། རྟེན་མེད་པའི་ཆོས་ཀྱི་རང་བཞིན་གྱི་སྤོབས་པ་ཅན་གྱི་སློབ་དཔོན་དང ། ལམ་ལ་ཤིན་ཏུ་གནས་པར་འགྱུར་བའི་གཟུངས་ཀྱི་ཆོས་ཀྱི་རྣམ་གྲངས་བཤད་དུ་གསོལ། བདེ་བར་གཤེགས་པ།་བསྟན་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རདྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རདྭ་ཏིའི་བུ། ལེགས་སོ། །ལེགས་སོ། །ཤཱ་རདྭ་ཏིའི་བུ། དེ་དེ་བཞིན་ཏེ། གཟུངས་ཐོབ་པའི་བྱང་ཆུབ་སེམས་དཔའ་དེ་ལ་སངས་རྒྱས་ཉིད་དུ་བརྗོད་པར་བྱ་སྟེ། ཤཱ་རདྭ་ཏིའི་བུ། གང་ལ་ལ་གཟུངས་ཐོབ་པའི་བྱང་ཆུབ་སེམས་དཔའ་ལ་བཀུར་སྟིར་བྱེད་པ་དང ། བླ་མར་བྱེད་པ་དང ། རིམ་གྲོར་བྱེད་པ་དང ། མཆོད་པར་བྱེད་པ་དེས། སངས་རྒྱས་ལ་བཀུར་སྟིར་བྱས་པར་འགྱུར་རོ། །ཤཱ་རདྭ་ཏིའི་བུ། གང་ལ་ལ་གཟུངས་འདི་ཉན་པར་བྱེད་པ་དང ། གང་དག་གཟུངས་འདི་འཆང་བར་བྱེད་པ་དང ། གང་དག་མོས་པར་
333b
བྱེད་པ་དེ་རྣམས་ལ་བྱང་ཆུབ་ཀྱི་སེམས་དང་མ་བྲལ་བས། སངས་རྒྱས་ལ་ཇི་ལྟར་མཆོད་པ་དེ་བཞིན་དུ་འགྱུར་རོ། །ཤཱ་རདྭ་ཏིའི་བུ། གཟུངས་དེ་ནི་འདི་ཡིན་ཏེ། ཏདྱ་ཐཱ། སནྡྷ་ར་ཎི།་ཨུད་དྷཱ་ར་ཎི། སུ་སཾ་པྲ་ཏིཥྛི་ཏེ། སུ་ནཱ་ཡ། སུ་པྲ་ཏིཥྛི་ཏེ། བི་ཛ་ཡ་ལ། སཏྟྱ་པྲ་ཏི་ཛྙཱ། སུ་ཨ་རོ་ཧཱ། ཛྙཱ་ན་པྲ་ཏི། ཨུཏྤ་ད་ནི། ཨ་བ་ནཱ་བ་ནི། ཨ་བྷི་ཥིཉྩ་ནི། ཨ་བྷི་བྱ་ཧཱ་ར། ཤུ་བྷ་བ་ཏི། སུ་ནིཿ ་ཤྲི་ཏ།་བ་ཧུ་གུ་བྷ། ཨ་བྷི་བ་དཱ་སཝཱཧཱ།། །།ཤཱ་རདྭ་ཏིའི་བུ། ཆགས་པ་མེད་པའི་གཟུངས་ཀྱི་ཚིག་འདི་བྱང་ཆུབ་སེམས་དཔའ་གང་གིས་ཤིན་ཏུ་གནས་པ་དང ། ་པར་གཟུང་བ་བྱས་ནས་འཆང་བར་བྱེད་པ་དེ་ལ་བསྐལ་པའམ། བསྐལ་པ་བས་ལྷག་པའམ། བསྐལ་པ་སྟོང་ངམ། བསྐལ་པ་བརྒྱ་ཕྲག་སྟོང་དུའང་སྨོན་ལམ་ཟད་པར་མི་འགྱུར་ལ། དེའི་ལུས་ལ་མཚོན་གྱིས་ཆུགས་པར་མི་འགྱུར་ཏེ། དུག་གིས་མ་ཡིན་ཞིང་སྤྲུལ་གྱིས་ཚུགས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཤཱ་རདྭ་ཏིའི་བུ། ཆགས་པ་མེད་པའི་གཟུངས་འདི་ནི་འདས་པའི་སངས་རྒྱས་རྣམས་ཀྱི་ཡུམ། མ་འོངས་པའི་སངས་རྒྱས་རྣམས་ཀྱི་ཡུམ། ད་ལྟར་བྱུང་བའི་སངས་རྒྱས་རྣམས་ཀྱི་ཡུམ་སྟེ། འདི་ལྟ་སྟེ། ཆགས་པ་མེད་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་ཡིན་ནོ། །ཤཱ་རདྭ་ཏིའི་བུ། གང་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲངས་མེད་པ་
334a
༄#། །ཕྲག་བཅུ་རིན་པོ་ཆེ་སྣ་བདུན་གྱིས་བཀང་སྟེ། སངས་རྒྱས་བཅོམ་ལྡན་འདས་རྣམས་ལ་ཡོན་དུ་ཕུལ་ཞིང་སངས་རྒྱས་བཅོམ་ལྡན་འདས་རྣམས་ལ་བསྐལ་པ་གྲངས་མེད་པར་ན་བཟའ་དང ། ཞལ་ཟས་གྱ་ནོམ་པར་བཞུགས་པར་བྱེད་པ་བས། གང་དག་གིས་ཆགས་པ་མེད་པའི་གཟུངས་ཀྱི་ཆོས་ཀྱི་རྣམ་གྲངས་འདི་ལས་ཚིག་གཅིག་ཙམ་འཛིན་པར་བྱེད་པའི་སེམས་ཅན་དེ་དག་དེ་བས་ཆེས་བསོད་ནམས་མང་དུ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤཱ་རདྭ་ཏིའི་བུ། འདི་ལ་ཆགས་པ་མེད་པའི་གཟུངས་ཀྱི་ཆོས་ཀྱི་རྣམ་གྲངས་འདི་ནི། སངས་རྒྱས་ཐམས་ཅད་ཀྱི་ཡུམ་ཡིན་ནོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས།་ཆགས་པ་མེད་པའི་གཟུངས་ཞེས་བྱ་བའི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་གློག་ཐམས་ཅད་ཟློག་པ། སོ་སོར་འབྲང་བ་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་པ། ང་ཡང་ད་ལྟར་འཆད་ཀྱི་ཟུངས་ཤིག་།ཀུན་དགའ་བོ། ཤར་ཕྱོགས་ན་འོང་བ་ཞེས་བྱ་བའི་གློག་ཡོད། ཀུན་དགའ་བོ། ལྷོ་ཕྱོགས་ན་སྐང་བརྒྱ་པ་ཞེས་བྱ་བའི་གློག་ཡོད། ཀུན་དགའ་བོ།
334b
ནུབ་ཕྱོགས་ན་འོད་ཉམས་པ་ཞེས་བྱ་བའི་གློག་ཡོད། ཀུན་དགའ་བོ། བྱང་ཕྱོགས་ན་རྒྱུན་གྱི་བདག་པོ་ཞེས་བྱ་བའི་གློག་ཡོད། ཀུན་དགའ་བོ། གང་ལ་ལ་གློག་འདི་རྣམས་ཀྱི་མིང་ཤེས་པ་དང ། ཕྱོགས་རྣམ་པར་གནས་པ་ཤེས་པ་དེ་ལ་གློག་གི་འཇིགས་པ་ཐམས་ཅད་མི་འབྱུང་བར་ཤེས་པར་བྱའོ། །གློག་གི་མིང་འདི་དག་ཡི་གེར་བྲིས་ཏེ། གནས་གང་དག་ཏུ་བཞག་པའི་གནས་དེ་དག་ཏུ་གློག་ཐམས་ཅད་མི་འབབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ། དྲཱ་བི་ཌའི་སྔགས་ཀྱི་ཚིག་འདི་དག་བཀའ་སྩལ་ཏོ། །ཏདྱ་ཐཱ། ནི་མི་ནི་མི། ནི་མིན་དྷ་རི། འཇིག་རྟེན་གསུམ་སྣང་བར་བྱེད་པ། ལག་ན་རྩེ་གསུམ་ལས་ཕྱོགས་འདིར་གློག་ཐམས་ཅད་ལ་སྲུངས་ཤིག་།སྲུངས་ཤིག་སཝཱཧཱ། ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀྱང་ཆོས་ཀྱི་རྣམ་གྲངས་འདི་ལ། དྲཱ་བི་ཌའི་གསང་སྔགས་ཀྱི་ཚིགས་རྣམས་བརྗོད་པར་བགྱིའོ། །ཏདྱ་ཐཱ། ཀ་ཊེ་བི་ཀ་ཊེ། ནི་ཀ་ཊེ། པྲ་ཏྱ་རྠི་ཀེ། པྲ་ཏྱ་མི་ཏྲེ། ཤུདྡྷེ། མུཀྟེ། བི་མ་ལེ། པྲ་བྷ་སཱ་རེ། ཨཎྜ་རེ། པཎྜ་རེ། ཤཝེ་ཏེ། པཎྜ་ར་བཱ་སི་ནི། ཧ་རི་ཀཎྐ་རི། ཀ་པི་ལི། པིཾ་ག་ལ། ཨཀྵི་ད་དྷི་མུ་
335a
༄#། །ཁི།་དུས་མ་ཡིན་པར་འཆི་བ་ཐམས་ཅད་ལས་བདག་ལ་སྲུངས་ཤིག་།སྲུངས་ཤིག་།འཕགས་པ་སྤྱན་རས་གཟིགས་དབང་ཕྱུག་གི་གཟི་བརྗིད་ཀྱིས།་བདག་དུས་མ་ཡིན་པར་འཆི་བ་ཐམས་ཅད་མཐོང་བར་མ་གྱུར་ཅིག་སཝཱཧཱ། དེ་ནས་གསང་བ་པའི་བདག་པོ་ལག་ན་རྡོ་རྗེས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་ཆོས་ཀྱི་རྣམ་གྲངས་འདི་ལ་གཟུངས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། མུ་ནི་མུ་ནི། མུ་ནིན་དྷ་རི་མུ་ནི། མ་ཏི་མ་ཏི། སུ་མ་ཏི། མཧཱ་མ་ཏི། ཧཱ་ཧཱ་ཧཱ་ཧཱ། ཁྱོད་ལ་སྡིག་པ་མེད་ཀྱི་མ་འཇིགས་ཤིག་ཅེས་ལག་ན་རྡོ་རྗེས་སྨྲས་ཀྱིས་དྲཱ་བི་ཌ་སཝཱཧཱ། བཅོམ་ལྡན་འདས། བདག་གི་བསྲུང་བ་གཞན་གྱིས་མི་ཐུབ་པ་འདི་སུའི་སྙིང་ལ་འཛིན་ཏམ། ཡི་གེར་བྲིས་པ་དེ་བདག་གིས་རྟག་པར་རྒྱུན་དུ་འཇིགས་པ་ཐམས་ཅད་ལས་བསྲུང་བར་བགྱིའོ། །དུས་མ་ལགས་པར་འགུམ་པ་ཐམས་ཅད་ལས་ཐར་བར་བགྱིའོ། །དེ་ནས་མི་མཇེད་ཀྱི་བདག་པོ་ཚངས་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་སེམས་ཅན་རྣམས་ཀྱི་དོན་དང ། ཕན་པ་དང ། བདེ་བ་བསྐྱེད་པའི་སླད་
335b
དུ།་ཆོས་ཀྱི་རྣམ་གྲངས་འདི་ལ་གཟུགས་ཀྱི་གསང་སྔགས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། ཧི་ལི་མི་ལི། ཙི་ལི་སཝཱཧཱ། པྲཧྨ་པཱུ་རེ་སཝཱཧཱ། བྲཧྨ་སཝ་རེ་སཝཱཧཱ། བྲཧྨ་བི་སུ་གརྦྷེ། པུཥྤ་སཾ་སྟ་རེ་སཝཱཧཱ། བཅོམ་ལྡན་འདས། འདི་ནི་བདག་གི་བསྲུང་བ་ཚངས་པའི་ཆད་པ་ཞེས་བགྱི་བ་སྟེ། དུས་མ་ལགས་པར་འགུམ་པ་ཐམས་ཅད་ལས་ཡོངས་སུ་སྐྱོབ་པ། སྡིག་པ་ཐམས་ཅད་ལས་རབ་ཏུ་ཞི་བར་བགྱིད་པ་ལགས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ག་ལ་བདེ་ལོགས་སུ་ཐལ་མོ་སྦྱར་བ་བཏུད་དེ།་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་ཆོས་ཀྱི་རྣམ་གྲངས་འདི་ལ་གཟུངས་ཀྱི་གསང་སྔགས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། ནི་བ་རཱ་ཎེ། བནྡྷ་མཱ་དནྟེ་མ་ཏི་ཏི། ཏི་ཏི་གཽ་རཱི། གནྡྷ་རི། ཙཎྜ་ལི། མཱ་ཏངྒི། པརྞ་ལེ།་ཧི་ན་མ་དྷྱ་མ་དྷ་རི་ཎི་མ་ལ་ནི། ད་ལ་མད་དེ། ཙཀྲ་བཱ་ཀྲཱཻ། ཤ་བ་རི། ཤ་བ་རི་སཝཱཧཱ། བཙུན་པ་བཅོམ་ལྡན་འདས། འདི་ནི་བདག་གི་རིག་སྔགས་རྡོ་རྗེའི་ལྕེ་འབེབས་པ་ཞེས་བགྱི་སྟེ། འཇིགས་པ་ཐམས་ཅད་ལས་ཐར་བར་བགྱིད་པ། དུས་མ་ལགས་པར་འགུམ་པ་ཐམས་ཅད་ཡོངས་སུ་སྐྱོབ་པ་ལགས་སོ། །དེ་ནས་རྒྱལ་པོ་ཆེན་པོ་ཡུལ་འཁོར་སྲུང་དང ། འཕགས་སྐྱེས་པོ་དང ། མིག་མི་བཟང་དང །
336a
༄#། །རྒྱལ་པོ་ཆེན་པོ་རྣམ་ཐོས་ཀྱི་བུས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀྱང་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བའི་སླད་དུ་ཆོས་ཀྱི་རྣམ་གྲངས་འདི་ལ་གཟུངས་ཀྱི་གསང་སྔགས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། པུཥྤེ་སུ་པུཥྤེ། དྷུ་མ་པ་རི་ཧཱ་རེ། ཨཱརྱ་པུ་ཤ་སྟེ། ཤཱནྟི། ནི་རྨུཀྟེ། མངྒ་ལྱ། ཧི་ར་ཎྱ་གརྦྷེ་སྟུ་སྟེ། སྟ་བི་ཏེ་སཝཱཧཱ། བཙུན་པ་བཅོམ་ལྡན་འདས། འདི་ནི་རྒྱལ་པོ་ཆེན་པོ་བཞི་པོ་བདག་ཅག་གི་བསྲུང་པ་འཇིགས་པ་མ་མཆིས་པ་ཞེས་བགྱི་སྟེ། འཇིགས་པ་ཐམས་ཅད་ལས་མི་འཇིགས་པར་བགྱིད་པ། ཚ་སྐྱོང་བ་དུས་མ་ལགས་པར་འགུམ་པ་ཐམས་ཅད་ལས་ཡོངས་སུ་སྐྱོབ་པ་ལགས་སོ། ། དེ་ནས་ཀླུའི་རྒྱལ་པོ་རྒྱ་མཚོ་དང ། ཀླུའི་རྒྱལ་པོ་གློག་འོད་དང ། ཀླུའི་རྒྱལ་པོ་མ་དྲོས་པ་དང ། ཀླུའི་རྒྱལ་པོ་གློག་ལྕེ་དང ། ཀླུའི་རྒྱལ་པོ་འོད་ཟེར་བརྒྱ་པས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གི་བསྲུང་བ་ཆེན།
336b
པོ་ཡིད་བཞིན་གྱི་ནོར་བུ་ཞེས་བགྱི་བ། གློག་ཐམས་ཅད་ཟློག་པ། དུས་མ་ལགས་པར་འགུམ་པ་ཐམས་ཅད་སེལ་བ། དུག་རྣམས་མི་གདུག་པར་བགྱིད་པ། གཤེད་བྱེད་དང་བྱད་སྟེམས་དང ། རོ་ལངས་དང ། བཀྲ་མི་ཤིས་པའི་འཇིགས་པ་ཞི་བར་བགྱིད་པ་མཆིས་ན། བཅོམ་ལྡན་འདས། བདག་ཅག་ཀླུའི་སྐྱེ་གནས་འདི་ནས་དབྱུང་བ་དང ། སེ་སྣ་སྤང་བའི་སླད་དུ་ཐུགས་བརྩེ་བར་དགོངས་ཏེ་བཞེས་སུ་གསོལ། དེ་ཅིའི་ཕྱིར་ཞེ་ན། བཅོམ་ལྡན་འདས། བདག་ཅག་ཀླུ་རྣམས་ནི་སེར་སྣ་ཅན་ཏེ། སེམས་སེར་སྣས་བསྐོར་བ་ལགས་སོ། །ཏདྱ་ཐཱ། ཨཱརྱ་ཛེ། ཨ་མ་རི། ཨ་མྲྀ་ཏེ། ཨཀྵ་ཡེ། ཨ་བྷི་ཡེ། པུ་ཎྱཻ། བརྱ་བ་ཏེ། སརྦ་པཱ་པཾ། པྲ་ཤ་མ་ནཱི་ཡེ་སཝཱཧཱ། ཨཱརྱ་པུ་\?\་སཽ་\?\་པཱ་ཀཱི་ཡེ་སཝཱཧཱ། བཙུན་པ་བཅོམ་ལྡན་འདས། གསང་སྔགས་ཀྱི་ཚིག་འདི་དག་སྐྱེས་པའམ། བུད་མེད་གང་ལ་ལ་ལྕེ་ལ་འདོན་དམ། ཡི་གེར་བྲིས་པ་དེ་ལ་གློག་གི་འཇིག་པ་ཐམས་ཅད་མ་མཆིས་པར་རིག་པར་བྱའོ། །རྩ་བའི་དུག་གམ། མཆེ་བའི་དུག་གམ། དབྱིག་དུག་གམ། གང་དག་།གཞན་ཡང ། ཡན་ལག་ལས་བྱུང་བའི་དུག་དེ་དག་གིས་དེ་འགུམ་པའི་དུས་བགྱིད་པར་མི་འགྱུར་རོ། །བདག་འཇིགས་པ་ཐམས་ཅད་དང ། གནོད་པ་ཐམས་ཅད་ལས་བདེ་ལེགས་སུ་གྱུར་ཅིག་།དེ་ནས་བཅོམ་ལྡན་འདས་ཀྱིས་བརྒྱ་བྱིན་དང ། ཚངས་པ་
337a
༄#། །དང།་འཇིག་རྟེན་སྐྱོང་བ་དང ། ཀླུའི་དབང་པོ་དེ་དག་ལ་ལེགས་སོ་ཞེས་བྱ་བ་གནང་སྟེ། བཞིན་བཟང་དག་།ཁྱེད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བའི་ཕྱིར་ཞུགས་ཏེ། ཆོས་ཀྱི་རྣམ་གྲངས་འདི་རྗེས་སུ་ཡོངས་སུ་བཟུང་བའི་ཕྱིར་དྲཱ་བི་ཌའི་གསང་སྔགས་ཀྱི་ཚིག་རྣམས་བཤད་པ་ལེགས་སོ། །ལེགས་སོ། །ཕྱོགས་རྣམས་ནི་གཉིད་ལོག་པ་དང ། མྱོས་པ་དང ། རབ་ཏུ་མྱོས་པ་རྣམས་བསྲུང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་དང ། ཀླུའི་བདག་པོ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ཡིད་བཞིན་གྱི་ནོར་བུའི་གཟུངས་ཀྱི་ལེའུ་ཞེས་བྱ་སྟེ་བཅུ་བཞི་པའོ།། །།དེ་ནས་ལྷ་མོ་ཆེན་མོ་དབྱངས་ཅན་གྱིས་བླ་གོས་ཕྲག་པ་གཅིག་ཏུ་བགོས་ཏེ། པུས་མོ་གཡས་པའི་ལྷ་ང་ས་ལ་གཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་
337b
འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ལྷ་མོ་ཆེན་མོ་དབྱངས་ཅན་བདག་གིས་ཀྱང ། དགེ་སློང་ཆོས་སྨྲ་བ་དེའི་ཚིག་བརྒྱན་པའི་སླད་དུ་སྤོབས་པ་ཉེ་བར་བསྒྲུབ་པར་བགྱི། གཟུངས་ཀྱང་སྩལ་བར་བགྱི། ངེས་པའི་ཚིག་གིས་བརྗོད་པ་ཀུན་ཏུ་གཞག་པར་བགྱི། དགེ་སློང་ཆོས་སྨྲ་བ་དེ་ལ་ཤེས་པའི་སྣང་བ་ཆེན་པོ་བགྱི། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཚིག་འགའ་འམ། ཡི་གེ་གང་ཡང་རུང་བ་དག་ཅིག་ཡོངས་སུ་ཉམས་པར་གྱུར་ཏམ། བསྐྱུད་ན་བདག་གིས་དགེ་སློང་ཆོས་སྨྲ་བ་དེའི་ངེས་པའི་སྒྲ་དང ། ཚིག་དང ། ཡི་གེ་ཐམས་ཅད་བསྒྲུབ་པར་བགྱིའོ། །ཅི་ནས་སངས་རྒྱས་བཅོམ་ལྡན་འདས་འབུམ་ཕྲག་དག་ལ་དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཛམྦུའི་གླིང་ན་ཡུན་རིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང ། སེམས་ཅན་དུ་མ་དག་གིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་ནས་ཤེས་རབ་རྣོ་བ་བསམ་གྱིས་མི་ཁྱབ་པར་འགྱུར་བ་དང ། ཤེས་རབ་ཀྱི་ཕུང་པོ་བསམ་གྱིས་མི་ཁྱབ་པ་ཐོབ་པར་འགྱུར་བ་དང ། ཚེ་འདི་ལ་ཚེ་ཕུན་སུམ་ཚོགས་པ་རབ་ཏུ་ཐོབ་པར་འགྱུར་བ་དང ། སྲོག་ལ་ཕན་གདགས་པ་དང ། བསོད་ནམས་ཀྱི་ཕུང་པོ་དཔག་ཏུ་མ་
338a
༄#། །མཆིས་པར་རབ་ཏུ་འཛིན་པར་འགྱུར་བ་དང ། ཐབས་སྣ་ཚོགས་རབ་ཏུ་འཚལ་པར་འགྱུར་བ་དང ། བསྟན་བཅོས་ཐམས་ཅད་ལ་རབ་ཏུ་མཁས་པར་འགྱུར་བ་དང ། བཟོའི་བགྱི་བ་སྣ་ཚོགས་ཕུན་སུམ་ཚོགས་པ་ཐོབ་པར་འགྱུར་བ་དང ། བསྐྱུད་པ་མ་མཆིས་པར་བགྱི་བའི་སླད་དུ། དེ་ལ་གཟུངས་ཀྱང་སྩལ་བར་བགྱིའོ། །དགེ་སློང་ཆོས་སྨྲ་བ་དེ་དང ། སེམས་ཅན་ཆོས་ཉན་པ་དེ་དག་གི་དོན་གྱི་སླད་དུ་སྔགས་དང ། སྨན་དང་ལྡན་པའི་ཁྲུས་ཀྱི་ལས་བརྗོད་པར་བགྱི་སྟེ། གཟའ་དང ། རྒྱུ་སྐར་དང ། སྐྱེ་བ་དང ། འཆི་འཕོ་བའི་གནོད་པ་དང ། འཐབ་པ་དང ། རྙོག་པ་དང ། འཁྲུག་ལོང་དང ། ཁྲག་ཁྲུག་དང ། རྨི་ལམ་ངན་པ་དང ། ལོག་འདྲེན་གྱི་གནོད་པ་ཐམས་ཅད་དང ། བྱད་དང ། རོ་ལངས་ཐམས་ཅད་རབ་ཏུ་ཞི་བར་འགྱུར། གང་གིས་མཁས་པ་དག་ཁྲུས་བགྱིད་དུ་སྩལ་བའི་སྨན་དང ། སྔགས་ནི།་འདི་དག་སྟེ། ཤུ་དག་གི་ཝང་སྤྲྀ་ཀ་དང ། །ཤ་མྱ་ཤ་མྱི་ཤཱི་རི་ཤཱ། །ིནྡྲ་ཧསྟ་སྐལ་བ་ཆེ། །ཛཱ་མ་ཤིང་ཚ་ཨ་ག་རུ། །ཤི་རི་བིསྟ་སྲ་རྩི་པོག་།གུ་གུལ་ར་ས་ཤ་ལ་ཀི་།རྡོ་དྲེག་ལོ་མ་རྒྱ་སྤོས་དང ། །ཙནྡན་དང་ནི་ལྡོང་རོས་དང ། །གི་ཝང་དང་བཅས་རུ་རྟ་དང ། །གུར་གུམ་གླ་སྒང་ཡུངས་ཀར་དང ། །དབྱི་མོང་སུག་སྨེལ་ན་ལ་དང ། །
338b
ན་ག་གེ་སར་ཨུ་ཤི་ར། །འདི་དག་ཆ་ནི་མཉམ་བགྱིས་ནས། །སྐར་མ་རྒྱལ་ལ་བཏགས་པར་བགྱི། །ཕྱེ་མ་ལ་ནི་སྔགས་ཚིག་འདི། །ལན་བརྒྱ་མངོན་པར་གདབ་པར་བགྱི།། ཏདྱ་ཐཱ། སུ་ཏེ་ཀྲྀ་ཏེ། ཀ་མ་ཏ་ལི། ན་ལེ་ཛ་ན་ཀ་ར་ཏེ། ཧཾ་ཀ་ར་ཏེ། ཨིནྡྲ་ཛ་ལི་ནི། ཤཾ་ཀ་ར་དྲི་པ་ཤད་དྲི། ཨ་བརྟ་ཀ་།སེ་ཀེན་ཀུ་ཏྲ་ཀུ། ཀ་བི་ལ། ཀ་བི་ལ་མ་ཏི། ཤཱི་ལ་མ་ཏི།་ཤཱི་ལ་མ་ཏི། སནྡྷི། དྷུ་དྷུ་མ་བ་ཏི། ཤི་རི་ཤི་རི། སད་ཏྱ་སྠི་ཏ་སཝཱཧཱ། ལྕི་བས་དཀྱིལ་འཁོར་བགྱིས་ནས་ནི། །མེ་ཏོག་སིལ་མ་དགྲམ་པར་བགྱི། །གསེར་གྱི་སྣོད་དང་དངུལ་སྣོད་དུ། །མངར་བའི་ཁུ་བ་གཞག་པར་བགྱི། །སྐྱེས་བུ་གོ་ཆ་བགོས་པ་ནི། །བཞི་ཞིག་དེར་ཡང་གཞག་པར་བགྱི། །རབ་ཏུ་བརྒྱན་པའི་བུ་མོ་བཞི། །བུམ་པ་ཐོགས་པ་གཞག་པར་བགྱི། །རྟག་ཏུ་གུ་གུལ་བདུག་པར་བགྱི། །སིལ་སྙན་སྣ་ལྔ་བགྱིད་དུ་སྩལ། །གདུགས་དང་རྒྱལ་མཚན་བ་དན་གྱིས། །ལྷ་མོ་དེ་ནི་ལེགས་པར་བརྒྱན། །བར་བར་དག་ཏུ་མེ་ལོང་གཞག་།མདའ་དང་མདུང་རྩེ་སྣ་སྤྲད་གཞག་།དེ་ནས་མཚམས་ཀྱང་བཅད་པར་བགྱི། །དེ་ཡི་འོག་ཏུ་དགོས་པ་བརྩམ། །སྔགས་ཀྱི་ལས་ནི་འདི་དག་གིས།། མཚམས་གཅད་པ་ཡང་བརྩམ་པར་བགྱི། །སཱདྱ་ཐེ་དི་ན། ཨ་ཀ་ར་ཀེ་།ན་ཡ་ནེ། ཧི་ལེ་མི་ལེ། གི་ལེ། ཁི་ཁི་ལེ་སཝཱཧཱ། དེ་ནས་བཅོམ་ལྡན་འདས་ཀྱི་སྣམ་ལོགས་སུ་ཁྲུས་
339a
༄#། །བགྱིས་ནས་སྔགས་འདི་བཟླས་བརྗོད་བགྱིས་ན་ཁྲུས་ཀྱིས་ཞི་བར་སྦྱར་རོ། །ཏདྱ་ཐཱ། ས་ག་ཌེ། བི་ག་ཌེ། བི་ག་ཏ་བ་ཏི་སཝཱཧཱ། ཕྱོགས་བཞི་དག་ན་གང་གནས་པའི། །རྒྱུ་སྐར་དག་གིས་ཚེ་སྲུངས་ཤིག་།བཙས་པའི་སྐར་མའི་གནོད་པ་དང ། །ཕུང་པོའི་ལས་ཀྱི་འཇིགས་འབྱུང་དང ། །འབྱུང་པོའི་ཁམས་རྣམས་འཁྲུགས་བགྱིད་པ། །འཇིགས་པ་མི་བཟད་ཞི་གྱུར་ཅིག་།ཏདྱ་ཐཱ། ས་མེ་བི་ཤ་མེ་སཝཱཧཱ། ས་ག་ཌ། བི་ག་ཌེ་སཝཱཧཱ། བི་ག་ཌེ་བ་ཏེ་སཝཱཧཱ། སཱ་ག་ར་སཾ་བུདྡྷཱ་ཡ་སཝཱཧཱ། སྐནྡྷ་མཱ་ཏཱ་ཡ་སཝཱཧཱ། ནཱི་ལ་ཀཏྠཱ་ཡ་སཝཱཧཱ། ཨ་པ་ར་ཛི་ཏ། བིརྱ་ཡ་སཝཱཧཱ། ཧཱི་མ་བནྡྷ་སཾ་བུདྡྷ་ཡ་སཝཱཧཱ། ཨ་ནི་བི་ལ་བཀྟྲཱ་ཡ་སཝཱཧཱ། ན་མོ་བྷ་ག་བ་ཏེ། པྲཧྨཱ་ཎེ། ན་མ་སཝ་ར་སཝ་ཏྱཻ། མཧཱ་དེ་བྱཻ་སདྡྷྱནྟུ་མཾ། མནྟྲ་པ་དཱ། ཏ་ར་ཏུ་བི་ཙིཏཾ། པྲཧྨ་ནུ་མ་ནུ་ཏྱ་སཝཱཧཱ། དགེ་སློང་ཆོས་སྨྲ་བ་དེ་ལ་བསྲུང་བ་དང ། ཆོས་མཉན་པ་དེ་དག་དང ། ཡི་གེར་འདྲི་བ་དེ་དག་གི་དོན་གྱི་སླད་དུ། ཁྲུས་ཀྱི་ལས་འདིས་བདག་ཉིད་དེར་མཆི་བར་བགྱིའོ། །ལྷའི་ཚོགས་ཐམས་ཅད་དང་ལྷན་ཅིག་ཏུ་གྲོང་ངམ། གྲོང་ཁྱེར་རམ། གྲོང་རྡལ་ལམ། གཙུག་ལག་ཁང་དེར་ནད་ཐམས་ཅད་རབ་ཏུ་ཞི་བར་བགྱིའོ། །ཅི་ནས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་གི་སྲོག་ལ་ཕན་གདགས་པར་
339b
འགྱུར་བ་དང ། འཁོར་བ་ལས་འབྱུང་བ་ཐོབ་པར་འགྱུར་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་དང ། གཟའ་པ་\?\་དང ། འཐབ་པ་དང ། རྙོག་པ་དང ། བཙས་པའི་སྐར་མའི་གནོད་པ་དང ། རྨི་ལམ་ངན་པ་དང ། ལོག་འདྲེན་གྱི་གནོད་པ་ཐམས་ཅད་དང ། བྱད་དང ། རོ་ལངས་ཐམས་ཅད་རབ་ཏུ་ཞི་བར་བགྱིའོ། །དེ་ནས་བཅོམ་ལྡན་འདས་ཀྱིས་ལྷ་མོ་དབྱངས་ཅན་ལ། ལྷ་མོ་ཆེན་མོ་དབྱངས་ཅན་ཁྱོད།་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བའི་ཕྱིར་ཞུགས་ཏེ་ཁྱོད་ཀྱི་སྔགས་དང ། སྨན་དང་ལྡན་པའི་ཚིགས་འདི་འདྲ་བ་བཤད་པ་ནི་ལེགས་སོ། །ལེགས་སོ་ཞེས་བྱ་བ་བྱིན་ཏེ། ལྷ་མོ་ཆེན་མོ་དབྱངས་ཅན་གྱིས་བཅོམ་ལྡན་འདས་ཀྱི་ཞབས་ལ་ཕྱག་བཙལ་ཏེ་ཕྱོགས་གཅིག་ཏུ་འདུག་གོ་།དེ་ནས་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས་ལྷ་མོ་དབྱངས་ཅན་དེ་བཀུག་གོ་།ལྷ་མོ་ཆེན་མོ་དབྱངས་ཅན་མཆོད་འོས་དཀའ་ཐུབ་ཆེ། །འཇིག་རྟེན་ཀུན་ཏུ་རྣམ་གྲངས་མཆོག་སྦྱིན་ཡོན་ཏན་ཆེ། །རྩེར་གནས་མཛེས་མ་དཱུར་བ་རྩཝ་ཡིས་གོས་བསྐུས་པ། །དཱུར་བའི་རྩཝ་ཡི་གོས་གྱོན་སྤང་པ་གཅིག་གིས་གནས། །ལྷ་རྣམས་ཐམས་ཅད་ལྷགས་ནས་འདི་སྐད་ཚིག་སྨྲས་ཏེ། །སེམས་ཅན་རྣམས་ལ་
340a
༄#། །དགེ་བའི་ཚིག་ཤོད་ལྕེ་ཁྲོལ་མཛོད། །སྱད་ཡ་ཐེ་ད་ན། མུ་རེ། ཙི་རེ། ཨ་བ་ཛེ། ཨ་བ་ཛ་བ་ཏི། ཧིངྒུ་ལེ། མིངྒུ་ལེ། པིངྒ་ལ་བ་ཏི། མུངྒ་ཥེ། མ་རི་ཙྱཻ། སཝ་མ་ཏི། ད་ཤ་མ་ཏི། ཨ་གྲི་ཏ་མ་གྲཱི། ཏ་ར་ཙི། ཏ་ར་ཙ་བ་ཏི། ཙི་རི་ཙི་རི། ཤི་རི་མི་རི། མ་རི་ཙྱཻ། པྲ་ན་བྲི་ཡེ། ལོ་ཀ་ཛྱེཥྛེ། ལོ་ཀ་ཤྲེཥྛེ། ལོ་ཀ་པྲེ་ཡ། སིདྡྷི་པྲ་ཏེ། བྷཱི་མ་མུ་ཁི།་ཤུ་ཙི་ཙ་རི། ཨ་པྲ་ཏི་ཧ་ཏེ། ཨ་པྲ་ཏི་ཧ་ཏ་བུདྡྷི། ན་མུ་ཙི། མཧཱ་ན་མུ་ཙི། མཧཱ་དེ་བྱི། པྲ་ཏི་གྲཱི་ཧཱ། ན་མསྐ་རཱ་ན། བདག་གི་བློ་ཐོགས་པ་མེད་པར་གྱུར་ཅིག་།བསྟན་བཅོས་དང ། ཚིགས་སུ་བཅད་པའི་རྒྱུ་དང ། སྡེ་སྣོད་དང ། སྙན་དངགས་ལ་སོགས་པ་ལ། བདག་གི་རིག་སྔགས་དངོས་གྲུབ་ཏུ་གྱུར་ཅིག་།ཏདྱ་ཐཱ། མཧཱ་པྲ་བྷ་བེ། ཧི་ལི་ཧི་ལི། མི་ལི་མི་ལི། བཅོམ་ལྡན་འདས་མ་ལྷ་མོ་དབྱངས་ཅན་གྱི་མཐུས་བདག་རྣམ་པར་རྒྱལ་བར་གྱུར་ཅིག་།ཀཱ་ར་ཏེ། ཀེ་ཡཱུ་རེ། ཀེ་ཡཱུ་ར་མ་ཏེ། ཧི་ལི་མི་ལི། ཧི་ལི་མི་ལི། སངས་རྒྱས་ཀྱི་བདེན་པ་དང ། ཆོས་ཀྱི་བདེན་པ་དང ། དགེ་འདུན་གྱི་བདེན་པ་དང ། དབང་པོའི་བདེན་པ་དང ། ཆུ་ལྷའི་བདེན་པས་ལྷ་མོ་ཆེན་མོ་དགུག་པར་བྱའོ། །གང་དག་འཇིག་རྟེན་ན་བདེན་པ་སྨྲ་བ་དེ་དག་གི་བདེན་པ་དང ། བདེན་པའི་ཚིག་གིས་ལྷ་མོ་ཆེན་མོ་དབྱངས་ཅན་དགུག་པར་བགྱིའོ། །ཏདྱ་ཐཱ། ཧི་ལི་མི་ལི། ཧི་
340b
ལི་མི་ལི། ཧི་ལི་མི་ལི། བདག་རྣམ་པར་རྒྱལ་བར་གྱུར་ཅིག་།བཅོམ་ལྡན་འདས་མ་ལྷ་མོ་ཆེན་མོ་དབྱངས་ཅན་ལ་ཕྱག་འཚལ་ལོ། །བདག་ལ་གསང་སྔགས་ཀྱི་ཚིག་རྣམས་གྲུབ་པར་གྱུར་ཅིག་སཝཱཧཱ། དེ་ནས་ལྷ་མོ་ཆེན་མོ་དབྱངས་ཅན་གྱི་གསང་སྔགས་ཀྱི་ཚིག་དེ་དག་སྨྲས་ནས། ཡང་བྲམ་ཟེ་ཀཽཎྜི་ནྱ་ལ་འདི་སྐད་ཅེས་སྨྲས་སོ། །སྐྱེས་བུ་ཆེན་པོ། ཁྱོད་སེམས་ཅན་ཐམས་ཅད་ལ་སྤོབས་པ་དམ་པ་དང ། རྫུ་འཕྲུལ་དང ། མངོན་པར་ཤེས་པ་དང ། ཤེས་རབ་ཆེ་བ་དང ། ནོར་དང ། དབྱིག་ལ་སོགས་པ་སྦྱིན་པས་ཕན་ ་ཤིང་མྱུར་དུ་བླ་ན་མེད་པའི་བྱང་ཆུབ་ཐོབ་པར་བྱེད་པ་ལེགས་སོ། །ལེགས་སོ། །མདོ་སྡེ་འདི་འཛིན་པའི་ཆོ་ག་བསྟན་པའི་ཕྱིར་ཚིགས་སུ་བཅད་པ་འདི་དག་སྨྲས་སོ། །གཟུངས་འདི་དང་པོར་སུ་འདོན་པས། །དཀོན་མཆོག་གསུམ་ལ་ཕྱག་བཙལ་ཏེ། །འཁྲུལ་པ་མེད་པར་བཟླས་བྱས་ན། །དངོས་གྲུབ་དམ་པ་ཐོབ་པར་འགྱུར། །སངས་རྒྱས་རྣམས་དང་དམ་ཆོས་དང ། །བྱང་ཆུབ་རང་རྒྱལ་ཉན་ཐོས་དང ། །ཚངས་པ་དང་ནི་བརྒྱ་བྱིན་དང ། །རྒྱལ་ཆེན་བཞི་ལ་ཕྱག་འཚལ་ཞིང ། །རྟག་ཏུ་ཚངས་པར་སྤྱོད་པ་དང ། །རིམ་གྲོ་གུས་པར་བསམ་བྱས་ཏེ། །ཞི་ལ་དབེན་པའི་གནས་སུ་ནི། །སྒྲ་བསྐྱེད་གཟུངས་དང་བསྟོད་པ་བརྗོད། །ཇི་སྙེད་སངས་རྒྱས་ལྷ་ཀླུ་ལ། །མཆོད་པ་རྒྱ་ཆེན་བཤམ་པར་བྱ། །སྐྱེ་བོའི་
341a
༄#། །རིགས་ནི་མང་པོ་ལ། །སྙིང་རྗེའི་སེམས་ཀྱང་བསྐྱེད་པར་བྱ། །བཅོམ་ལྡན་གསེར་མདོག་མཚན་རབ་ཅན། །རྩེ་གཅིག་སེམས་ཀྱིས་བསམ་བྱ་ཞིང་།། བཅོམ་ལྡན་གསུང་རབ་དམ་ཆོས་ཀྱིས། །དབང་པོ་སོ་སོར་ངེས་མཛད་པའི། །དེ་ཡི་ཚིག་དོན་ལེགས་བསམས་ཏེ། །སྟོང་ཉིད་བསྒྲུབ་ལའང་གནས་པར་བྱོས། །བཅོམ་ལྡན་ཐམས་ཅད་མངོན་སུམ་དུ། །རྩེ་གཅིག་སེམས་ཀྱིས་བསམ་བྱས་ན། །ཏིང་ངེ་འཛིན་དང་ཡེ་ཤེས་དང ། །གཟུགས་མཆོག་དམ་པ་ཐོབ་པར་འགྱུར། །བཅོམ་ལྡན་དཔལ་མགུར་གསུང་ཆོས་ཀྱིས། །དམ་པའི་དབྱངས་དེས་འཁོར་རྣམས་འདུལ། །ལྗགས་ཀྱིས་སྟོང་གསུམ་ཁེབས་མཛད་ཅིང ། །སོ་སོར་ཅི་རིགས་ཡ་མཚན་སྟོན།། དེ་ལྟའི་གསུང་མཆོག་དམ་པ་ལ། །རྟག་པར་བསམ་ཞིང་འཇིགས་པ་སྤོངས། །བསམ་མི་ཁྱབ་པའི་ལྗགས་མཚན་འདི། །སྨོན་ལམ་རྒྱ་ཆེན་དབང་གིས་བརྙེས། །ཆོས་རྣམས་མེད་པར་སྟོན་མཛད་པ། །ཇི་ལྟར་མཁའ་ལ་མ་ཆགས་བཞིན། །སངས་རྒྱས་ལྗགས་མཚན་གསུང་སྒྲ་ལ། །དེ་བསམས་སྨོན་ལམ་ཚད་མེད་འགྲུབ། །གང་ཞིག་དབྱངས་ཅན་མངོན་མཆོད་དམ། །ཡང་ན་སློབ་མས་མན་ངག་བཞིན། །ལུང་བཞིན་ཆོས་དེ་གང་སྒྲུབ་པ། །བཀུར་སྟི་མཆོག་རྣམས་ཐོབ་པར་འགྱུར། །གང་ཞིག་ཡེ་
341b
ཤེས་\?\་གྲུབ་\?\་བའང ། །རྩེ་གཅིག་སེམས་ཀྱིས་ཆོས་འདི་ཟུངས། །བསོད་ནམས་ཡེ་ཤེས་ཚོགས་འཕེལ་ཞིང ། །ངེས་པར་འགྲུབ་ལ་ཡིད་གཉིས་སྤོངས། །གང་ཞིག་ནོར་སྒྲུབ་ནོར་དང་ལྡན། །ཁེ་དང་གྲགས་པའང་དེ་བཞིན་འགྲུབ། །འབྱུང་བར་འདོད་པའང་རྣམ་གྲོལ་བར། །ངེས་པར་འགྲུབ་པས་ཡིད་གཉིས་སྤོངས། །ཡོན་ཏན་མང་པོ་ཚད་མེད་དང། །བསམ་པ་བཞིན་དུ་ཀུན་གྲུབ་པས། །འདི་ལ་ཚུལ་བཞིན་གང་གནས་པ། །ངེས་པར་འགྲུབ་པས་ཡིད་གཉིས་སྤོངས། །དབེན་པར་གཙང་མའི་གོས་གྱོན་ཏེ། །དཀྱིལ་འཁོར་ཅི་རན་བྱས་པ་དེར། །བུམ་པ་རྒྱས་པ་བཞི་བཞག་སྟེ། །དུས་བཞིན་མེ་ཏོག་བདུག་པས་མཆོད། །བ་དན་གདུགས་དང་ལྔ་ལྔི་བྲེ། །ཕྱེ་མ་བྱུག་པས་རྒྱས་པར་བརྒྱན།། སངས་རྒྱས་དང་ནི་དབྱངས་ཅན་མཆོད། །ལྷ་དེ་མཐོང་འདོད་མཐོང་བར་འགྱུར། །དབྱངས་ཅན་ལྷ་མོ་དེ་མདུན་དུ། །ཞག་བདུན་གསུམ་དུ་བཟླས་བརྗོད་དེ། །གལ་ཏེ་ལྷ་དེ་མ་མཐོང་ན། །བསམ་པ་བརྟན་པས་ཞག་དགུར་བཟླས། །དེ་ཡི་ནུབ་མོའང་མ་མཐོང་ན། །གཞན་དུ་ཤིས་པའི་གནས་བཙལ་ཏེ། །ཚུལ་བཞིན་ལྷ་མོའི་གཟུགས་བྲིས་ལ། ། མཆོད་ཅིང་བཟླས་བརྗོད་རྒྱུན་མི་གཅོད། །བདག་དང་གཞན་དོན་ཚད་མེད་ལ། །ཉིན་མཚན་རྒྱུན་ཏུ་བརྩོན་བསྐྱེད་དེ། །དེ་ཡི་འབྲས་བུ་གཞན་ལ་སྟོབས། །དེས་ནི་བསམ་
342a
༄#། །པ་འགྲུབ་པར་འགྱུར། །དེ་སྟེའང་བསམ་པ་མ་གྲུབ་ན། །ཟླ་བ་གསུམ་དང་དྲུག་དང་དགུ། །ཡང་ན་བརྩོན་པས་ལོར་བཟླས་ན། །མངོན་ཤེས་དྲུག་ལ་སོགས་པའང་ཐོབ། །དེ་ནས་བྲམ་ཟེ་ཀཽཎྜི་ནྱས་འདི་སྐད་ཅེས་བཤད་པ་ཐོས་ནས་དགའ་བ་དང ། རངས་པ་ཚད་མེད་པ་སྐྱེས་ཏེ། འཁོར་འདུས་པ་དེ་དག་ལ་འདི་སྐད་ཅེས་སྨྲས་སོ། །ལྷ་དང ། མི་ལ་སོགས་པའི་འཁོར་ཐམས་ཅད་ཀྱིས་སེམས་མ་གཡེང་བར་བདག་ལ་ཉོན་ཅིག་དང ། བདག་གིས་ཀུན་རྫོབ་ཀྱི་བདེན་པ་ལ་བརྟེན་ཏེ་དབྱངས་ཅན་ལྷ་མོ་མཆོག་ལ་བསྟོད་པའི་ཕྱིར་ཆིགས་སུ་བཅད་དེ་སྨྲ་བར་བགྱིའོ། །ཕྱག་འཚལ་ལྷ་མོ་མཐུ་ཆེན་ལ། །འཇིག་རྟེན་ཁམས་འདིར་དབང་བརྙེས་པར། །སྔོན་གྱི་དྲང་སྲོང་གིས་བཤད་པས། །དེ་ཕྱིར་བདག་གིས་ཁྱོད་ལ་བསྟོད། །དཔལ་ལྡན་ཐུགས་ནི་བདེ་བ་དང ། །ཐོས་འཛིན་མཛེས་ལྡན་གྲགས་ལྡན་པ། ། འཇིག་རྟེན་འདི་སྐྱེད་ཡུམ་ཡང་ཡིན། །རྟག་ཏུ་དཔལ་ལ་བརྩོན་ཆེན་སྤྱོད། །གཡུལ་གྱི་གནས་ལས་རྟག་ཏུ་རྒྱལ། །སྙིང་རྗེ་བཟོད་ལ་དུལ་བས་བསྐྱེད། །གཤིན་རྗེའི་སྲིང་མོར་ལུང་སྟོན་ཅིང ། །རྟག་ཏུ་དར་གོས་སྔོན་པོ་མནབས། །མཛེས་དང་མི་མཛེས་ཀུན་སྟེན་ཅིང ། །སྦྱན་མིག་སུས་མཐོང་དྭང་བ་སྐྱེད། །སྤྱོད་པ་ཚད་མེད་འཇིག་
342b
རྟེན་འདས། །སྐྱབས་སུ་སུ་འོངས་རྗེས་སུ་འཛིན། །བར་འགའ་རི་དང་བྲག་ལ་གནས། །བར་འགའ་ཕུག་དང་ཆུ་བོའི་འགྲམ། །ཡང་ན་ལྗོན་སྡོང་ནགས་རྣམས་སུ། །གནས་དེ་དག་ནི་ལྷ་མོའི་རྟེན། །ཇི་ལྟར་རི་བྲག་མི་རྣམས་ཀྱིས། །རྨ་བྱའི་མདོངས་ལས་གདུགས་བྱས་ཤིང ། །རྟག་ཏུ་ལྷ་མོ་དེ་མཆོད་ན། །ཐམས་ཅད་དུས་སུ་འཇིག་རྟེན་སྐྱོབ། །སྟག་དང་སེང་གེས་འཁོར་བྱས་ཤིང ། །བྱ་དང་ཕྱུགས་དང་དེ་ལ་བརྟེན། །དྲི་ཆེན་སྒྲ་དག་མངོན་བསྒྲགས་པས། །བིན་དྷུའི་རི་ལའང་གྲགས་པར་གྱུར། །ཕྱག་ན་ཏྲི་ཤཱུལ་ཐོར་ཚུགས་དབུ། །ཡང་ན་ཉི་ཟླའི་རུ་མཚོན་བསྣམས། །ཟླ་བ་མར་ངོའི་བཅུ་གཅིག་གམ། །དག་ཡི་དུས་སུ་མཆོད་པར་བྱ། །གཡུལ་འགྱེད་དུས་སུ་ཐུགས་བརྩེ་བས། །འཇིག་རྟེན་ཀུན་ལ་གཟིགས་པའི་ཕྱིར། །ལྷ་མོ་བ་སུའི་གཟུགས་སྟོན་པས། །ལྷ་མོའི་མཆོག་དེ་དཔེ་མེད་པའོ། །ཕྱུགས་རྫི་རྒན་མོའི་གཟུགས་སྟོན་ཅིང ། །ལྷ་དག་འཐབ་པའང་རྟག་ཏུ་རྒྱལ། །ཡུན་རིང་འཇིག་རྟེན་བདེ་བར་གནས། །བར་འགའ་ཁྲོས་ཤིང་བར་འགའ་ཞི། །བྲམ་ཟེར་སྨྲ་ཞིང་ཆོས་བཞི་དང ། །རྫུ་འཕྲུལ་གསང་སྔགས་ཀུན་ལ་མཁས། །དྲང་སྲོང་ལྷ་མི་དབང་བརྙོས་པས། །ས་ཆེན་འདི་དང་ས་བོན་བྱེད། །ལྷ་མོ་འདུ་བའི་དུས་སུ་ཡང ། །རྒྱ་མཚོ་ལྟད་བཞིན་ངེས་པར་འདུ། །གནོད་སྦྱིན་ཀླུ་ལ་སོགས་རྣམས་
343a
༄#། །ཀྱིས། །ཀུན་གྱི་གཙོ་བྱེད་འདུལ་བར་ནུས། །མོ་རྣམས་ཀུན་གྱི་ཚངས་སྤྱོད་མཆོག་།འཇིག་རྟེན་གཙོ་སྦྱིན་བདག་ལ་དགོངས། །རྒྱལ་བོའི་གནས་ནའང་པདྨ་བཞིན། །ཆུ་བོ་ལ་ཡང་གྲུ་དང་གཟིངས། །ཟླ་བ་ཉ་བཞིན་ཞལ་ཡང་རྒྱས། །མང་དུ་ཐོས་ལྡན་རྟེན་ཡང་བྱེད། །རི་བོའི་རྩེ་བཞིན་སྤོབས་པ་འཕགས། །བསམ་པས་གླིང་དང་རབ་ཀྱང་སྟོན། །ལྷ་མིན་ལ་སོགས་ལྷ་རྣམས་ཀྱིས། །ཀུན་གྱིས་ཡོན་ཏན་བསྟོད་ཅིང་བསྔགས། །སྤྱན་སྟོང་བརྒྱ་བྱིན་ལྷ་རྒྱལ་ཡང ། །གུས་པའི་སེམས་ཀྱིས་ཞལ་དུ་བལྟ། །སེམས་ཅན་གང་དག་ཅི་འདོད་པ། །དེ་ཀུན་བསམ་པ་མྱུར་དུ་སྐོང ། །བློ་མྱུར་ཐོས་པ་འཛིན་པ་ཡང ། །ས་ཆེན་འདི་གནས་ཀུན་གྱི་མཆོག་།ཕྱོགས་བཅུའི་འཇིག་རྟེན་ཁམས་དག་ཏུ། །རྟག་ཏུ་སྒྲོན་ཆེན་སྣང་བྱེད་བཞིན། །བྱ་དང་གཅན་ཟན་རི་དྭགས་ཀྱིའང ། །ཀུན་གྱིས་བསམ་པ་ཡོངས་སུ་སྐོང ། །བུད་མེད་ཀྱི་མཆོག་རི་པོ་བཞིན། །དྲང་སྲོང་འཇིག་རྟེན་རི་གནས་བཞིན། །ལྷ་མོ་གཞོན་བཞིན་འདོད་དང་བྲལ། །མི་མཇེད་བདག་བཞིན་བདེན་པར་སྨྲ། །འཇིག་རྟེན་མཐུན་པར་གཟུགས་སྟོན་ཅིང། །འདོད་ཁམས་བར་གྱི་ལྷ་གནས་སུའང ། །ཁྱོད་ནི་ལྷ་མོའི་གཙོ་ཡིན་པས། །དེ་ལས་མཆོག་པའི་སེམས་ཅན་མེད། །གལ་ཏེ་གཡུལ་དང་འཇིགས་པའི་གནས།།
343b
མེ་ཡི་དོང་དུ་ལྷུང་གྱུར་ཏམ། །ཆུ་བོ་གཡང་ས་མི་རྒོད་ལས། །འཇིགས་པ་དེ་ལས་སྒྲོལ་བར་མཛད། །རྒྱལ་པོའི་ཆད་པས་བཅིངས་པ་ཡང ། །ཡང་ན་དགྲ་ཡིས་བསད་པར་ཡང། །རྩེ་གཅིག་སེམས་ནི་མ་གཡོས་ན། །སྡུག་བསྔལ་དག་ལས་ཐར་བར་འགྱུར། །དགེ་དང་མི་དགེ་ཀུན་ལས་སྐྱོབ། །བྱམས་དང་སྙིང་རྗེས་མདུན་ན་གནས། །དེ་ཕྱིར་བདག་ནི་སེམས་བཏུད་དེ། །ཕྱག་འཚལ་ལྷ་མོ་ཆེན་མོ་ལའོ། །དེ་ནས་ཡང་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས་ལྷ་མོ་ཆེན་མོ་དབྱངས་ཅན་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འབྱུང་པོའི་ཚོགས་རྣམས་ཐམས་ཅད་ང་ལ་ཉན་པར་གྱིས། །ལྷ་དང་དྲི་ཟ་ལྷ་དབང་བཅས་པའི་འཇིག་རྟེན་ན། །བུད་མེད་དམ་པ་ལྷ་མོ་མཆོག་གིས་རབ་གང་ཡིན། །ལྷ་མོ་དམ་པ་མཆོག་ཏུ་མཛེས་པའི་ཞལ་ལ་བསྟོད། །ཡོན་ཏན་རྣམ་པ་སྣ་ཚོགས་བསགས་པས་ཡན་ལག་བརྒྱན། །དབྱངས་ཅན་ཞེས་བྱ་སྤྱན་ནི་ཡངས་ཤིང་བསོད་ནམས་འབར། །དྲི་མེད་ཡེ་ཤེས་ཡོན་ཏན་རྣམས་ཀྱིས་རྣམ་པར་བརྒྱན། །རིན་ཆེན་སྣ་ཚོགས་ཐ་དད་ལྟ་བུར་བལྟ་བའི་ཕྱིར། །མཆོག་རབ་དག་གི་ཡོན་ཏན་ཁྱད་པར་དེ་བསྟོད་དོ། །དམ་པ་མཆོག་གི་དངོས་གྲུབ་བྱེད་པ་དང ། །ཡང་དག་བསྔགས་པ་ཡོན་ཏན་བྱེད་པ་དང ། །དྲི་མེད་མཆོག་དང་པདྨ་འབར་བ་དང །
344a
༄#། །མིག་མཆོག་དང་ནི་མིག་གི་དམ་པ་དང ། །དགེ་བའི་གནས་དང་དགེ་བ་མཐོང་བ་དང ། །ཡོན་ཏན་བསམ་མི་ཁྱབ་པས་བརྒྱན་པ་དང ། །ཟླ་བ་དང་འདྲ་དྲི་མ་མེད་འོད་དང ། །ཡེ་ཤེས་འབྱུང་གནས་དྲན་པ་དམ་པ་དང ། །སེངྒེ་མཆོག་དང་མི་ལ་ཞོན་པ་དང ། །ལག་པ་བརྒྱད་རྣམས་ཀྱིས་ནི་བརྒྱན་པ་དང ། །མདའ་གཞུ་མདུང་དང་རལ་གྲི་དགྲ་སྟ་དང ། །བེ་ཅོན་ལྕགས་ཀྱུ་འཁོར་ལོ་ཞགས་པ་བསྣམས། །ཟླ་བ་ཉ་བ་ལྟ་བུར་སྣང་བའི་ཞལ། །ཡིད་དུ་འོང་བའི་དག་དང་དབྱངས་སྙན་དང ། །ཤེས་རབ་ཟབ་མོ་དང་ནི་ལྡན་པ་དང ། །དགོས་མཆོག་སྒྲུབ་བྱེད་སེམས་ཅན་དམ་པ་དང ། །ལྷ་དང་ལྷ་མིན་དབང་པོས་མཆོད་པ་དང ། །ལྷ་དང་ལྷ་མིན་ཚོགས་ཀུན་གནས་བརྗོད་དང ། །འབྱུང་པོའི་ཚོགས་ཀྱི་གནས་རྟག་མཆོད་པའི་ཕྱིར། །སཝཱཧཱ། བདག་ཅག་ལྷ་མི་འདི་ལ་ཕྱག་བྱའོ། །བདག་ལ་ཡོན་ཏན་ཁྱད་པར་ཀུན་སྩོལ་ཅིག ། དགོས་པ་ཀུན་ཏུ་བདག་ལ་དངོས་གྲུབ་སྩོལ། །དགྲ་རྣམས་ཁྲོད་ན་བདག་ལ་རྟག་ཏུ་སྲུངས། །ཡི་གེ་རྫོགས་ཤིང་ཚིག་རྒྱས་འདི་དག་ནི། །ནང་པར་ལངས་ནས་གཙང་མར་བརྗོད་པར་བྱ། །བསམ་པ་དང་ནི་ནོར་འབྲུ་ཐམས་ཅད་རྙེད། །དངོས་གྲུབ་དགེ་བ་རྒྱ་ཆེན་ཐོབ་པར་འགྱུར། །དེ་ནས་བཅོམ་ལྡན་འདས་ཀྱིས་བྲམ་ཟེ་ཀཽཎྜི་ནྱ་ལ་
344b
ལེགས་སོ་ཞེས་བཀའ་སྩལ་ཏེ། ཁྱོད་ཀྱིས་སེམས་ཅན་ལ་ཕན་པ་དང ། བདེ་བའི་ཕྱིར་ལྷ་མོ་དབྱངས་ཅན་ལ་བསྟོད་པ་དང ། དངོས་གྲུབ་དམ་པ་སློང་བས་བསོད་ནམས་ཚད་མེད་པ་དང་ལྡན་པར་འགྱུར་རོ།། །།བམ་པོ་བརྒྱད་པ། དེ་ནས་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱ་ས་བསྟོད་པ་དང ། གསང་སྔགས་ཀྱི་ཚིག་གིས་ལྷ་མོ་ཆེན་མོ་དབྱངས་ཅན་ལ་གསོལ་ནས། ཡང་འཁོར་དེ་དག་ལ་སྨྲས་པ། སྐྱེས་བུ་ཁྱོད་ཀྱིས་ལྷ་མོ་དབྱངས་ཅན་སྤྱན་དྲང་བ་དང ། དེའི་ཐུགས་རྗེས་བསྐྱབ་ཅིང ། ཚེ་འདི་ཉིད་ལ་སྤོབས་པ་ཐོགས་པ་མེད་པ་དང ། ཐོས་པ་འཛིན་ཅིང་ཤེས་རབ་ཆེན་པོ་དང་ལྡན་པར་འགྱུར་བ་དང ། གཙུག་ལག་ཐམས་ཅད་ལ་མཁས་ཤིང ། ཚིག་སྦྱོར་བའི་རྒྱན་ལ་གསལ་ཞིང་ཐོགས་པ་མེད་པ་གྲུབ་པར་འདོད་པས། བསམ་པ་དེ་དེས་ཤིང་གུས་པའི་སེམས་ཀྱིས་ལྷ་མོ་དབྱངས་ཅན་སྤྱན་དྲང་བའི་ཚིག་འདི་བརྗོད་པར་བྱའོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །བྱང་ཆུབ་སེམས་དཔའ་དང ། ཉན་ཐོས་དང ། རང་སངས་རྒྱས་ཐམས་ཅད་ལ་སོགས་པ་དང ། འདས་པ་དང ། མ་འོངས་པ་དང ། ད་ལྟར་བཞུགས་པའི་འཕགས་པ་ཐམས་ཅད་ལ་ཕྱག་འཚལ་ལོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡང་དག་པར་བདེན་
345a
༄#། །པའི་གསུང་ལ་གནས་པ། སོ་སོའི་དབང་པོ་དང་མཐུན་པར་བདེན་པ་སྟོན་པ་ལ་མི་སླུ་བར་གསུང་བ། བསྐལ་པ་བྱེ་བ་ཚད་མེད་པར་ཡང་དག་པར་བདེན་པའི་ཚིག་རྟག་ཏུ་སྟོན་ཅིང་གསུང་པ་དེ་དག་ལ་རྗེས་སུ་ཡི་རང་ངོ ། །བདེན་པ་གསུང་བས་ལྗགས་ཡངས་ལ་རིང་བ་བཀྲམ་སྟེ་ཛམྦུའི་གླིང་དང ། རྒྱལ་ཆེན་བཞི་དང ། སྟོང་གཅིག་དང ། སྟོང་གཉིས་དང ། སྟོང་གསུམ་གྱི་འཇིག་རྟེན་གྱི་ཁམས་འདི་དང ། ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་ཐམས་ཅད་རྒྱས་པར་འགེངས་ཤིང ། ཉོན་མོངས་པའི་གདུང་བ་ཐམས་ཅད་སེལ་བའི་སངས་རྒྱས་བཅོམ་ལྡན་འདས་ཐམས་ཅད་ལ་ལུས་བཏུད་དེ་ཕྱག་འཚལ་ལོ། །ལྗགས་ཀྱི་མཚན་དམ་པ་དེ་འདྲ་བ་དང ། བདག་སྤོབས་པ་ཚད་མེད་པ་དང་ལྡན་པར་གྱུར་ཅིག་།ཕྱག་འཚལ་བཅོམ་ལྡན་དབྱངས་ཅན་མཆོག་།བྱང་ཆུབ་ཆེན་པོ་དབྱངས་ཅན་མཆོག་།འཕགས་པ་རང་རྒྱལ་དབྱངས་ཅན་མཆོག་།ཟུང་བཞི་ཡ་བརྒྱད་དབྱངས་ཅན་མཆོག་།བདེན་པ་བཞི་གསུང་དབྱངས་ཅན་མཆོག་།ཡང་དག་གཟིགས་པ་དབྱངས་ཅན་མཆོག་།དྲང་སྲོང་ཚངས་འཁོར་དབྱངས་ཅན་མཆོག་།ལྷ་མོ་ཨུ་མ་དབྱངས་ཅན་མཆོག་།སྐེམ་བྱེད་ལྷ་ཡང་དབྱངས་ཅན་མཆོག་།གཟི་ཅན་
345b
ཀླུ་ཡང་དབྱངས་ཅན་མཆོག་།མཚན་མོ་ལྷ་མོ་དབྱངས་ཅན་མཆོག་།རྒྱལ་ཆེན་བཞི་པོ་དབྱངས་ཅན་མཆོག་།བདེ་གནས་ལྷ་སྲས་དབྱངས་ཅན་མཆོག་།རྡོ་རྗེ་གསང་བདག་དབྱངས་ཅན་མཆོག་།ཁྱབ་འཇུག་ལྷ་ཡང་དབྱངས་ཅན་མཆོག་།ལྷ་མོ་བེ་མ་དབྱངས་ཅན་མཆོག་།ཚོགས་བདག་ལྷ་ཡང་དབྱངས་ཅན་མཆོག་།དཔལ་གྱི་ལྷ་མོ་དབྱངས་ཅན་མཆོག་།དཔལ་གྱི་བློ་གྲོས་དབྱངས་ཅན་མཆོག་།ཧི་རི་ཚིག་འཆང་དབྱངས་ཅན་མཆོག་།མ་མོ་ཀུན་མཆོག་དབྱངས་ཅན་མཆོག་།འཕྲོག་མ་མོ་ཡང་དབྱངས་ཅན་མཆོག་།གནོད་སྦྱིན་ཀུན་ཀྱང་དབྱངས་ཅན་མཆོག་།ཕྱོགས་བཅུའི་རྒྱལ་པོ་དབྱངས་ཅན་མཆོག་།བདག་ལ་ལས་མཆོག་ཀུན་གྱིས་སྟོབས། །མཐའ་མེད་དབྱངས་ཅན་མཆོག་ཐོབ་མཛོད། །སླུ་མེད་པ་ལ་ཕྱག་འཚལ་ལོ། །རྣམ་པར་གྲོལ་ལ་ཕྱག་འཚལ་ལོ། །འདོད་ཆགས་བྲལ་ལ་ཕྱག་འཚལ་ལོ། །བཅིངས་པ་བཅད་ལ་ཕྱག་འཚལ་ལོ། །རྣམ་དག་སེམས་ལ་ཕྱག་འཚལ་ལོ། །འོད་སྣང་མཛད་ལ་ཕྱག་འཚལ་ལོ། །བདེན་ཚིག་གསུང་ལ་ཕྱག་འཚལ་ལོ། །རྡུལ་དང་བྲལ་ལ་ཕྱག་འཚལ་ལོ།། དོན་དམ་གནས་ལ་ཕྱག་འཚལ་ལོ། །འཁོར་མང་གཙོ་ལ་ཕྱག་འཚལ་ལོ། །དབྱངས་ཅན་ལྷ་ལ་ཕྱག་འཚལ་ལོ། །བདག་ནི་ཚིག་ལ་ཐོགས་མེད་མཛོད། །བདག་གིས་བསམ་
346a
༄#། །པ་ཅི་མཆིས་པ། །ཐམས་ཅད་མྱུར་དུ་གྲུབ་པར་མཛོད། །ནད་མེད་རྟག་ཏུ་བདེ་བ་དང ། །ཚེ་རིང་བ་ཡང་ཐོབ་པར་ཤོག་།རིག་པའི་གནས་ལ་མཁས་པ་དང ། །བྱང་ཆུབ་ལམ་ལ་བརྩོན་པ་དང ། །སྐྱེ་བོ་ཀུན་ལ་ཕན་མང་མཛོད། །རེ་བ་ཐམས་ཅད་མྱུར་དུ་སྐོངས། །བདག་གི་ཡང་དག་བདེན་ཚིག་དང ། ། བདག་གིས་མི་སླུ་ཚིག་སྨྲས་པ། །དབྱངས་ཅན་ལྷ་མོ་མཆོག་གིས་ནི། །བདག་གི་དོན་དེ་གྲུབ་པར་མཛོད། །ལྷ་མོ་འདིར་ནི་གཤེགས་པར་གསོལ། །བདག་གི་ཚིག་ལ་ཐོགས་མེད་མཛོད། །ལུས་དང་ངག་དང་མྱུར་ཞུགས་ཤིང ། །ཡིད་མྱུར་སྤོབས་པ་རྫོགས་པར་མཛོད། །བདག་གི་ལྕེ་ཡི་དབང་པོ་ལ། །བདེ་གཤེགས་སྤོབས་པ་ལྡན་པར་མཛོད། །ཚིག་གི་གཟི་བརྗིད་མཐུ་དེས་ནི། །སེམས་ཅན་ཐམས་ཅད་འདུལ་བར་མཛོད། །བདག་གིས་ཚིག་ནི་ཅི་སྨྲས་པ། །དོན་དེ་ཐམས་ཅད་གྲུབ་པར་ཤོག་།ཚིག་ལ་ཐམས་ཅད་གུས་བསྐྱེད་ཅིང ། །བྱེད་པ་ཐམས་ཅད་ཆུད་མ་གཟོན། །ནམ་ཞིག་བདག་གི་སྤོབས་འདོད་པ། །དོན་དེ་གྲུབ་པར་མ་གྱུར་ན། །ལྷ་མོ་ཁྱོད་ཀྱི་བདེན་ཚིག་ནི། །ཐམས་ཅད་བརྫུན་པ་ཉིད་དུ་འགྱུར། །མཚམས་མེད་ལྔ་ཡི་སྡིག་བགྱིས་པ། །སངས་རྒྱས་བཀས་ནི་འདུལ་བར་འགྱུར། །གང་ཡང་དགྲ་
346b
བཅོམ་པ་དག་དང ། །བྱས་པ་གཟོ་བའི་ཚིག་རྣམས་དང ། །ཤཱ་རིའི་བུ་དང་མཽད་གལ་དང ། །བཅོམ་ལྡན་འཁོར་གྱི་གཙོ་བོ་སྟེ། །དེ་ལ་སོགས་པའི་བདེན་ཚིག་ཀྱང ། །ཐམས་ཅད་བདག་ལ་གྲུབ་པར་ཤོག་།སངས་རྒྱས་ཉན་ཐོས་འཁོར་རྣམས་དང ། །བདག་གིས་དེང་འདིར་སྤྱན་དྲང་གི། །བདག་གི་རེ་བ་བསྐང་བའི་ཕྱིར། །ཐམས་ཅད་མྱུར་དུ་གཤེགས་པར་མཛོད། །ཡང་དག་བདེན་པའི་ཚིག་གསོལ་པ། །ཐམས་ཅད་སླུ་བ་མེད་པར་ཤོག་།སྲིད་པའི་རྩེ་མོ་མན་ཆད་དང ། །གཙང་མའི་གནས་ནི་ཐམས་ཅད་དང། །ཚངས་པ་ཚངས་ཆེན་མདུན་འདོན་དང ། །ཚངས་པའི་རྒྱལ་འཁོར་ཐམས་ཅད་དང ། །སྟོང་གསུམ་འཁོར་བའི་བར་དག་དང ། །མི་མཇེད་འཇིག་རྟེན་གཙོ་བོ་དང། །དེ་དང་དེ་ཡི་འཁོར་རྣམས་དང ། །དེ་ཀུན་དེང་འདིར་སྤྱན་དྲངས་ཏེ། །ཐུགས་རྗེས་བདག་ལ་དགོངས་མཛད་ཅིང ། །བརྩེ་བ་ཀུན་གྱིས་གཟུང་བར་མཛོད། ། གཞན་འཕྲུལ་དབང་བྱེད་ལྷ་དག་དང ། །གཞན་ཡང་འཕྲུལ་དགའི་ལྷ་དག་དང ། །བྱམས་པ་མངོན་པར་འཚང་རྒྱའི་གནས། །དགའ་ལྡན་གནས་ཀྱི་ལྷ་རྣམས་དང ། །འཐང་བྲལ་གྱི་ནི་ལྷ་རྣམས་དང ། །སུམ་ཅུ་རྩ་གསུམ་ལྷ་རྣམས་དང ། །རྒྱལ་ཆེན་བཞི་ཡི་ལྷ་རྣམས་དང ། །གཞན་ཡང་ལྷ་འཁོར་ཐམས་ཅད་དང ། །ས་ཆུ་མེ་རླུང་ལྷ་དག་
347a
༄#། །དང། །རི་རབ་ལྷུན་ལ་གནས་པ་དང ། །ཆུ་བདུན་རི་བོ་ལྷ་རྣམས་དང ། །དེ་ཀུན་འཁོར་དང་བཅས་པ་དང ། །ཟུར་ཕུད་ལྔ་ཅན་ནོར་རྒྱས་དང། །ཉི་ཟླ་གཟའ་དང་རྒྱུ་སྐར་དང ། །དེ་ལ་སོགས་པའི་ལྷ་རྣམས་དང ། །འཇིག་རྟེན་བདེ་བར་མཛད་པའི་གནས། །དེ་ལ་སོགས་པའི་ལྷ་ཐམས་ཅད། །སྡིག་པའི་ལས་ལ་མ་མོས་ཕ། །སངས་རྒྱས་ལ་གུས་འབྱུང་བའི་མ། །བུ་རབ་གཞོན་ལ་བྱམས་པ་དང ། །ལྷ་དང་ཀླུ་དང་གནོད་སྦྱིན་རྣམས། །དྲི་ཟ་དང་ནི་ལྷ་མ་ཡིན། །གཞན་ཡང་མིའམ་ཅི་དག་དང ། །ལྟོ་འཕྱེ་ཆེ་ལ་སོགས་པ་རྣམས། །ཀུན་ཀྱང་བཅོམ་ལྡན་མཐུ་ཡིས་ནི། །བདག་གིས་དེང་འདིར་སྤྱན་དྲངས་ཏེ། །ཐུགས་རྗེས་བརྩེ་བའི་དགོངས་པ་ཡིས། །བདག་ལ་ཐོགས་མེད་སྤོབས་པ་བསྐྱེད། །ལྷ་དང་མི་རྣམས་ཐམས་ཅད་ཀྱི། །གཞན་གྱི་སེམས་རིག་མཁྱེན་པ་རྣམས། །ཀུན་གྱི་མཐུ་ཡིས་བྱིན་བརླབས་ཤིང ། །བདག་ལ་སྤོབས་པའི་མཆོག་སྩོལ་ཅིག་།ཇི་སྙེད་ནམ་མཁའ་མཐའ་གཏུགས་ཤིང ། །ཆོས་ཀྱི་དབྱིངས་ཀྱི་མཐའ་ཀླས་པའི། །སེམས་ཅན་དེ་དག་ཐམས་ཅད་ཀྱིས། །བདག་ལ་སྤོབས་པའི་མཆོག་སྩོལ་ཅིག་།དེ་ནས་དབྱངས་ཅན་ལྷ་མོ་ལ་བྲམ་ཟེ་ཀཽཎྜི་ནྱས་དེ་སྐད་ཅེས་གསོལ་པ་དང ། ལྷ་མོས་སྐྱེས་བུ་ཆེན་
347b
པོ་དེ་ལ་དགེའོ་ཞེས་སྨྲས་ཏེ། གང་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཚིགས་སུ་བཅད་པས་བསྟོད་པ་དང ། གསང་སྔགས་ཀྱི་ཚིག་དེ་དག་འཆང་ཞིང་འཛིན་པ་དང ། དཀོན་མཆོག་གསུམ་ལ་སྐྱབས་སུ་སོང་སྟེ། སེམས་འདུན་པས་རྗེས་སུ་དམིགས་ཤིང་ཅི་འདོད་པའི་དོན་ཆོ་ག་བཞིན་དུ་བསྒྲུབས་ན་ཆུད་ཟ་བར་མི་འགྱུར་རོ། ། གཞན་ཡང ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཤིན་ཏུ་ཕྲ་ཞིང་ཟབ་པ་འདི་འཛིན་པ་དང ། འཆང་བ་དང ། ཀློག་པ་དང ། འདོན་པ་དེ་བསམ་པ་ཐམས་ཅད་མྱུར་དུ་འགྲུབ་པར་འགྱུར་ཏེ། སེམས་གཡེང་བས་བྱས་པ་ནི་མ་གཏོགས་སོ། །དེ་སྐད་སྨྲས་པ་དང ། བྲམ་ཟེ་ཀཽཎྜི་ནྱ་རབ་ཏུ་དགའ་བ་དང ། ཡིད་བདེ་བ་སྐྱེས་ཏེ་ཐལ་མོ་སྦྱར་བ་བྱས་ནས་རྗེས་སུ་འཛིན་ཏོ། །དེ་ནས་བཅོམ་ལྡན་འདས་ཀྱིས་ལྷ་མོ་དབྱངས་ཅན་ལ་ལེགས་སོ་ཞེས་བཀའ་སྩལ་ཏེ། ལྷ་མོ། ཁྱོད་ཀྱིས་དམ་པའི་ཆོས་འདི་ཡོངས་སུ་སྲུང་ཞིང་ཡོངས་སུ་རྒྱས་པར་བྱ་བ་དང ། མདོ་སྡེ་འདི་འཛིན་པའི་སེམས་ཅན་ཐམས་ཅད་ལ་ཆོས་འདི་ལྟ་བུ་བསྟན་པས་བདེ་བ་དང ། བསོད་ནམས་དང ། སྤོབས་པ་ཚད་མེད་པ་འཕེལ་བར་འགྱུར་ཏེ། གང་སེམས་བསྐྱེད་པ་རྣམས་ཀྱང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱས་པ་ལེགས་སོ། །ལེགས་སོ། །གསེར་འོད་
348a
༄#། །དམ་པ་མདོ་སྡེའི་དབང་པོའི་རྒྱལ་པོ་ལས། ལྷ་མོ་དབྱངས་ཅན་གྱི་ལེའུ་ཞེས་བྱ་སྟེ་བཅོ་ལྔ་པའོ།། །།དེ་ནས་བཅོམ་ལྡན་འདས་ལ་ལྷ་མོ་ཆེན་མོ་དཔལ་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ལྷ་མོ་ཆེན་མོ་དཔལ་བདག་གིས་ཅི་ནས་ཀྱང ། ཆོས་སྨྲ་བའི་དགེ་སློང་དེ་ཡོ་བྱད་ཐམས་ཅད་ཕུན་སུམ་ཚོགས་པར་འགྱུར་བ་དང ། བྲེལ་ཕོངས་པ་མ་མཆིས་པ་ཐོབ་པར་འགྱུར་བ་དང ། སེམས་བརྟས་པ་ཐོབ་པར་འགྱུར་བ་དང ། སེམས་བདེ་བར་གདུགས་མཚན་བས་པར་འགྱུར་བ་དང ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཚིག་དང ། ཡི་གེ་རྣམ་པ་ཐ་དད་པ་དག་ཆུབ་པར་འགྱུར་བ་དང།་རྣམ་པར་རྟོག་པར་འགྱུར་བ་དང ། ཡང་དག་པར་བརྗོད་པར་འགྱུར་བ་དང ། སངས་རྒྱས་འབུམ་ཕྲག་དག་ལ་དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འྫམྦུའི་གླིང་དུ་ཡུན་རིང་དུ་གནས་པར་འགྱུར་ཞིང ། མྱུར་དུ་ནུབ་པར་མི་འགྱུར་བ་དང ། སེམས་ཅན་རྣམས་ཀྱང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང ། བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང ། མིའི་
348b
བདེ་བ་མྱོང་བར་འགྱུར་བ་དང ། མུ་གེ་མ་མཆིས་པར་འགྱུར་བ་དང ། ལོ་ལེགས་པར་འགྱུར་བ་དང ། སེམས་ཅན་རྣམས་ཀྱང་བདེ་བར་སྦྱར་བ་ཐམས་ཅད་ཀྱིས་བདེ་བར་འགྱུར་\?\་བ་དང ། དེ་བཞིན་གཤེགས་པ་དང་འགྲོགས་པར་འགྱུར་བ་དང ། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་རྒྱུན་ཆད་པར་འགྱུར་བ། འདི་ལྟ་སྟེ། གོས་དང ། ཟས་དང ། མལ་ཆ་དང ། སྟན་དང ། ན་བའི་གསོས་སྨན་དང ། སྨན་ཟོང་དང ། ཡོ་བྱད་དང ། འཚོག་ཆས་ཀྱི་བྱེ་བྲག་གཞན་དག་གིས་ཀྱང་དགེ་སློང་ཆོས་སྨྲ་བ་དེ་སྤྲོ་པར་བགྱིའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཡོན་ཏན་རྒྱ་མཚོ་བཻ་ཌཱུརྱ་དང ། གསེར་གྱི་རི་ཁ་དོག་བཟང་པོ་གསེར་དུ་སྣང་བའི་དཔལ་ཞེས་བྱ་བ་དེ་ལ། ལྷ་མོ་ཆེན་མོ་དཔལ་གྱིས་དགེ་བའི་རྩ་བ་བསྐྱེད་དེ། དེས་ད་ལྟར་ཕྱོགས་གང་དང ། གང་དུ་སེམས་པ་དང ། ཕྱོགས་གང་དང ། གང་དུ་ལྟ་བ་དང ། ཕྱོགས་གང་དང ། གང་དུ་འགྲོ་བའི་ཕྱོགས་དེ་དང ། དེར་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་དག་བདེ་བར་སྦྱར་བ་ཐམས་ཅད་
349a
༄#། །ཀྱིས་བདེ་བར་འགྱུར། །ཟས་དང ། སྐོམ་དང ། ནོར་དང ། འབྲུ་དང ། འགྲོན་བུ་དང ། གསེར་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱུ་རུ་དང ། དངུལ་དང ། ས་ལེ་སྤྲམ་དང ། ཡོ་བྱད་གཞན་དག་གིས་ཀྱང་མི་ཕོངས་པར་འགྱུར། སེམས་ཅན་དེ་དག་ཡོ་བྱད་ཐམས་ཅད་འབྱོར་པར་འགྱུར་རོ། །ལྷ་མོ་ཆེན་མོ་དཔལ་གྱི་མཐུས་དེ་བཞིན་གཤེགས་པ་དེ་ལ་མཆོད་པར་བྱ། །སྤོས་དང ། མེ་ཏོག་དང ། བདུག་པ་ཡང་\?\་དབུལ་བར་བྱ། ལྷ་མོ་ཆེན་མོ་དཔལ་གྱི་མིང་ནས་ལན་གསུམ་བརྗོད་ཅིང ། དེ་ལ་སྤོས་དང ། བདུག་པ་དང ། མེ་ཏོག་ཀྱང་བྱིན་ལ་རོ་སྣ་ཚོགས་ཀྱང་བྱིན་ན་དེའི་འབྲུའི་ཕུང་པོ་ཆེན་པོ་རྣམ་པར་འཕེལ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། ས་ལ་ས་ཡི་བཅུད་དག་རྣམ་པར་འཕེལ། །ལྷ་རྣམས་རྟག་ཏུ་རབ་ཏུ་དགའ་བར་འགྱུར། །འབྲས་བུ་ལོ་ཏོག་ལྡུམ་སྡོང་ལྗོན་ཤིང་རྣམས། །ལོ་ཏོག་ཤིན་ཏུ་སྣ་ཚོགས་རྣམས་ཀྱང་བསྐྱེད། །གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་མིང་བརྗོད་པའི་སེམས་ཅན་དེ་དག་ལ་ལྷ་མོ་ཆེན་མོ་དཔལ་ནི་སེམས་པར་འགྱུར། །དེ་དག་ལ་དཔལ་ཆེན་པོར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དཔལ་ལྷ་མོ་ཆེན་མོ་ལ་ལེགས་
349b
སོ་ཞེས་བཀའ་སྩལ་ཏེ། ལེགས་སོ། །ལེགས་སོ། །ལྷ་མོ། ཁྱོད་ཀྱིས་སྔོན་བྱས་པ་རྗེས་སུ་དྲན་པས། དེ་བཞིན་གཤེགས་པ་ལ་མཆོད་པ་དང ། སེམས་ཅན་ཚད་མེད་པ་རྣམས་ལ་ཕན་པ་དང ། བདེ་བས་ཕན་འདོགས་ཤིང་མདོ་སྡེ་འདིའང་ཡོངས་སུ་རྒྱས་པར་བྱེད་པའི་བསོད་ནམས་ཟད་མི་ཤེས་པ་དང་ལྡན་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལྷ་མོ་དཔལ་གྱི་ལེའུ་ཞེས་བྱ་སྟེ་བཅུ་དྲུག་པའོ།། །།དེ་ནས་ལྷ་མོ་དཔལ་ཆེན་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ནས་བྱང་ཕྱོགས་སུ་མི་རིང་བ་ཞིག་ན། ལྷའི་རྒྱལ་པོ་རྣམ་ཐོས་ཀྱི་བུའི་ཕོ་བྲང་ལྕང་ལོ་ཅན་གྱི་འཁོར་ན་སྐྱེད་མོས་ཚལ་དམ་པ་བསོད་ནམས་ཀྱི་མེ་ཏོག་འོད་ཅེས་བྱ་བ་ན། རིན་པོ་ཆེ་སྣ་བདུན་ལས་བྱས་པའི་ཁང་བཟང་པདྨ་དམ་པ་གསེར་གྱི་རྒྱལ་མཚན་ཞེས་བྱ་བ་ན་བདག་གནས་ཏེ། མི་གང་ལ་ལ་ཞིག་འབྲུའི་ཕུང་པོ་སྤེལ་བར་འདོད་པ་དེས། རང་གི་ཁྱིམ་ཕྱག་དར་ལེགས་པར་བྱ། ཁྲུས་ལེགས་པར་བྱ། གོས་དཀར་པོ་གཙང་མ་བགོ་བར་བྱ། གོས་རབ་ཏུ་དྲི་ཞིམ་པར་བགོ་བར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཡོན་ཏན་རྒྱ་མཚོ་བཻ་ཌཱུརྱ་དང ། གསེར་གྱི་རི་ཁ་དོག་བཟང་པོ་གསེར་དུ་སྣང་བའི་དཔལ་
350a
༄#། །དེ་ལ་ཕྱག་འཚལ་ཞིང་མཚན་ནས་ཀྱང་ལན་གསུམ་བརྗོད། ལྷ་མོ་ཆེན་མོ་དཔལ་གྱི་ལག་ནས། དེ་བཞིན་གཤེགས་པ་ལ་མཆོད་པ་བྱེད། མེ་ཏོག་དང ། བདུག་པ་དང ། སྤོས་ཀྱང་འབུལ། རོ་བྲོ་བ་སྣ་ཚོགས་ཀྱང་འབུལ། གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་མིང་ཡང་ལན་གསུམ་བརྗོད། བདེན་པའི་ཚིག་ཀྱང་བརྗོད། ལྷ་མོ་ཆེན་མོ་དཔལ་ལ་ཡང་མཆོས་ཅིང་མེ་ཏོག་དང ། བདུག་པའང་འབུལ། རོ་བྲོ་བ་སྣ་ཚོགས་ཀྱང་འབུལ་ན། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མཐུས། དེའི་ཚེ་ལྷ་མོ་ཆེན་མོ་དཔལ་ཁྱིམ་དེ་ལ་སེམས་པར་འགྱུར། དེའི་འབྲུའི་ཕུང་པོ་ཆེན་པོའང་འཕེལ་པར་འགྱུར་རོ། །ལྷ་མོ་ཆེན་མོ་དཔལ་དགུག་པར་འདོད་པ་དེས་རིག་པའི་གསང་སྔགས་འདི་དག་དྲན་པར་བྱའོ། །འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་ཐམས་ཅད་ལ་ཕྱག་འཚལ་ལོ། །སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་རིན་ཆེན་གཙུག་ཏོར་ཅན་ལ་ཕྱག་འཚལ་ལོ།། བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་འབར་བའི་རིན་ཆེན་འོད་ཟེར་སྣང་བའི་ཏོག་ལ་ཕྱག་འཚལ་ལོ། །དེ་བཞིན་གཤེགས་པ་ཛམྦུའི་གསེར་གྱི་རྒྱལ་
350b
མཚན་གསེར་དུ་སྣང་བ་ལ་ཕྱག་འཚལ་ལོ། །དེ་བཞིན་གཤེགས་པ་གསེར་དུ་སྣང་བའི་སྙིང་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཉི་མ་བརྒྱའི་འོད་སྣང་བའི་སྙིང་པོ་ལ་ཕྱག་འཚལ་ལོ། །དེ་བཞིན་གཤེགས་པ་གསེར་རི་རིན་ཆེན་འབྱུང་གནས་གདུགས་བརྩེགས་ལ་ཕྱག་འཚལ་ལོ། །དེ་བཞིན་གཤེགས་པ་གསེར་གྱི་མེ་ཏོག་འབར་བའི་འོད་ཟེར་གྱི་ཏོག་ལ་ཕྱག་འཚལ་ལོ། །དེ་བཞིན་གཤེགས་པ་སྒྲོལ་མ་ཆེན་པོ་ལ་ཕྱག་འཚལ་ལོ། །དེ་བཞིན་གཤེགས་པ་རིན་ཆེན་ཏོག་ལ་ཕྱག་འཚལ་ལོ། །ཤར་ཕྱོགས་ཀྱི་དེ་བཞིན་གཤེགས་པ་མི་འཁྲུགས་པ་ལ་ཕྱག་འཚལ་ལོ། །ལྷོ་ཕྱོགས་ཀྱི་དེ་བཞིན་གཤེགས་པ་རིན་ཆེན་ཏོག་ལ་ཕྱག་འཚལ་ལོ། །ནུབ་ཕྱོགས་ཀྱི་དེ་བཞིན་གཤེགས་པ་ཚེ་དཔག་མེད་ལ་ཕྱག་འཚལ་ལོ། །བྱང་ཕྱོགས་ཀྱི་དེ་བཞིན་གཤེགས་པ་རྔ་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཛེས་པའི་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་འོད་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་ཏུ་དུ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རབ་གནས་ལ་
351a
༄#། །ཕྱག་འཚལ་ལོ། །དེ་དག་ལ་ཕྱག་འཚལ་ནས་རིག་པ་འདི་དག་ལ་སྦྱོར་བར་བྱ་སྟེ། རིག་སྔགས་འདི་བདག་ལ་འབྱོར་བར་གྱུར་ཅིག་།སྱང་ཡ་ཐེ་དན། པྲ་ཏི་པུརྞཱ་ཙ་རེ། ས་མནྟ་དཪྴ་ཎེ། མཧཱ་བི་ཧཱ་ར་ག་ཏི། ས་མནྟྲ། བི་མཱ་ན་ག་ཏེ། མཧཱ་ཀཱརྱ། པྲ་ཏི་པྲ་བ་ཎི་སཏྭཱ། ཨརྠ་ས་མནྟཱ་ནུ། པྲ་པཱུ་རེ། ཨ་ཡཱ་ན་དྷརྨཱ་ཏཱ།་མཧཱ་བྷོ་གི་ནི། མཧཱ་མཻ་ཏྲི། ཨུ་པ་སང་ཧི་ཏེ། ཧི་ཏཻ་ཥི། སང་གྲྀ་ཧཱི་ཏེ། ས་མར་ཐཱ་ནུ་བཱ་ལ་ནེ་སཝཱ་ཧཱ། འདི་དག་ནི་སྤྱི་བོ་ནས་དབང་བསྐུར་བའི་ཆོས་ཉིད་ཀྱིས་གསང་སྔགས་ཀྱི་ཚིག་གཅིག་ཏུ་དེ་ཁོ་ན་ཡང་དག་པར་གྲུབ་པར་སྦྱིན་པ་མི་སླུ་བའི་དོན་གྱི་ཚིག་སྟེ། སེམས་ཅན་བར་མ་ལ་སྤྱོད་པ་རྣམས་དགེ་བའི་རྩ་བ་ཁ་ན་མ་ཐོ་བ་མེད་པར་དག་གིས། ལོ་བདུན་དུ་འདོན་ཅིང་འཛིན་པ་དག་ཡན་ལག་བརྒྱད་པའི་བསྙེན་པར་གནས་པ་ལ་བསྙེན་ཏེ་བདག་དང ། སེམས་ཅན་ཀུན་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་སྔ་དྲོ་དང ། ཕྱི་དྲོ་སངས་རྒྱས་ཐམས་ཅད་ལ་མེ་ཏོག་དང ། སྤོས་རྣམས་ཀྱིས་མཆོད་ནས་དེས་བདག་གིས་བསམ་པ་འདི་འབྱོར་པར་གྱུར་ཅིག་།མྱུར་དུ་འབྱོར་པར་གྱུར་ཅིག་།གཙུག་ལག་ཁང་དང ། དགོན་པའི་གནས་ཀྱང་རུང་སྟེ། ཁྱིམ་དེ་ཤིན་ཏུ་གཙང་མར་བྱས་ལ།
351b
ལྕི་བས་དཀྱིལ་འཁོར་བྱས་ཏེ། སྤོས་དང ། བདུག་པའང་དབུལ་བར་བྱ། སྟན་གཙང་མའང་གདིང་བར་བྱའོ། །ས་ལ་མེ་ཏོག་གི་སིལ་མ་བཀྲམ་སྟེ་བསྔད་པར་བྱའོ། ། དེ་ནས་སྐད་ཅིག་དེ་ཉིད་ལ་ལྷ་མོ་ཆེན་མོ་དཔལ་འོངས་ནས་དེར་གནས་པར་འགྱུར་རོ། །དེ་ཕྱིན་ཆད་ཁྱིམ་མམ། གྲོང་ངམ། གྲོང་ཁྱེར་རམ། གྲོང་རྡལ་ལམ། གཙུག་ལག་ཁང་དམ།་དགོན་པའི་གནས་སུ་ནམ་ཡང་བྲེལ་ཅིང་ཕོངས་པ་མེད་པར་འགྱུར་རོ། །འགྲོན་བུ་དང ། གསེར་དང ། རིན་པོ་ཆེ་དང ། ནོར་དང ། འབྲུ་དང ། ཡོ་བྱད་ཐམས་ཅད་འབྱོར་པ་དང ། བདེ་བར་སྦྱར་བ་ཐམས་ཅད་ཀྱིས་བདེ་བར་འགྱུར་རོ། །དགེ་བའི་རྩ་བ་གང་དག་བྱེད་པ་དེ་དག་ཐམས་ཅད་ལས་ལྷ་མོ་ཆེན་མོ་དཔལ་ལ་ཤེས་ཀྱི་མཆོག་སྦྱིན་པར་བྱ་སྟེ། དེ་ནས་དེ་ཇི་སྲིད་འཚོའི་བར་དུ་དེ་ན་གནས་པར་འགྱུར། འཕང་བར་མི་འགྱུར། དེ་དག་གི་བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལྷ་མོ་ཆེན་མོ་དཔལ་གྱིས་ནོར་ཡོངས་སུ་སྤེལ་བའི་ལེའུ་ཞེས་བྱ་བ་སྟེ་བཅུ་བདུན་པའོ།། །།དེ་ནས་བཅོམ་ལྡན་འདས་ལ་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ད་ལྟར་དང །
352a
༄#། །མ་འོངས་པའི་དུས་ན། གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་གང་དུ་གནས་པར་འགྱུར་བའི་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་དེར།་བཙུན་པ་བཅོམ་ལྡན་འདས། སའི་ལྷ་མོ་བརྟན་མ་བདག་མཆི་བར་བགྱིའོ། །བཙུན་པ་བཅོམ་ལྡན་འདས། གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་འཆད་པར་འགྱུར་བ་དང ། ས་ཕྱོགས་གང་དང ། གང་ན་དགེ་སློང་ཆོས་སྨྲ་བ་དེའི་ཆོས་ཀྱི་ཁྲི་ཤོམ་པར་འགྱུར་བ་དང།་གང་དང ། གང་དུ་ཆོས་སྨྲ་བསྟན་ལ་མཆིས་ནས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་བསྟན་པར་འགྱུར་བ་དེར། བཙུན་པ་བཅོམ་ལྡན་འདས། སའི་ལྷ་མོ་བརྟན་མ་བདག་ས་ཕྱོགས་དེ་དང ། དེ་དག་ཏུ་མཆི་བར་བགྱིའོ། །ལུས་མི་གདའ་བར་ཆོས་ཀྱི་ཁྲིའི་འོག་ལོགས་སུ་མཆིས་ཏེ། ཡན་ལག་གི་དམ་པ་མགོས་དགེ་སློང་ཆོས་སྨྲ་བ་དེའི་རྐང་མཐིལ་ནས་བརྟེན་པར་བགྱིའོ། །བདག་ཀྱང་ཆོས་མཉན་པ་དང ། ཆོས་བདུད་རྩིའི་ཁུ་བ་
352b
འདིས་ཚིམ་པར་བགྱི། ཡང་དག་པར་རིམ་གྲོར་བགྱི། ཡང་དག་པར་མཆོད་པར་བགྱིའོ། །བདག་ཚིམ་པར་གྱུར། རིམ་གྲོ་བགྱིས་བ་བགྱིས་པར་གྱུར་རབ་ཏུ་དགའ་བར་གྱུར་ནས།་སའི་ཕུང་པོ་དཔག་ཚད་སྟོང་ཕྲག་དྲུག་ཅུ་རྩ་བརྒྱད་པོ་འདི་ནས། སའི་གཞི་རྡོ་རྗེ་ལ་ཐུག་པའི་བར་དུ་སའི་བཅུད་ཀྱིས་རྣམ་པར་འཕེལ་བར་བགྱི། ཡང་དག་པར་རིམ་གྲོ་བགྱི། ཡོངས་སུ་རྫོགས་པར་བགྱིའོ། །སྟེང་དུའང་རྒྱ་མཚོའི་མཐའ་ལ་ཐུག་པའི་སའི་དཀྱིལ་འཁོར་འདི་སའི་བཅུད་ཀྱི་སྣུམ་གྱིས་བརླན་པར་བགྱིའོ། །ས་ཆེན་པོ་འདི་རབ་ཏུ་གཟི་བྱིན་དང་ལྡན་པར་བགྱིའོ། །དེ་ནས་ཛམྦུའི་གླིང་འདིར་རྩཝ་དང ། ཤིང་གེལ་པ་དང ། སྨན་དང ། ནགས་ཚལ་སྣ་ཚོགས་རྣམས་གཟི་བྱིན་དང་རབ་ཏུ་ལྡན་པར་འཁྲུང་བར་འགྱུར། ཀུན་དགའ་ར་བ་དང ། ནགས་ཚལ་དང ། ཤིང་ལྗོན་པ་ཐམས་ཅད་དང ། ལོ་མ་དང ། མེ་ཏོག་དང ། འབྲས་བུ་དང ། མེ་ཏོག་རྣམ་པ་སྣ་ཚོགས་པ་ཐམས་ཅད་ཀྱང་རབ་ཏུ་གཟི་བྱིན་དང་ལྡན་པར་བགྱི། དྲི་དང་རབ་ཏུ་ལྡན་པ་དང ། སྣུམ་དང་རབ་ཏུ་ལྡན་པ་དང ། རོ་ཞིམ་པོར་འགྱུར། བལྟ་ན་རབ་ཏུ་སྡུག་པ་དང ། རབ་ཏུ་ཆེ་བར་འགྱུར་རོ། །སེམས་ཅན་དེ་དག་ཀྱང་བཏུང་བ་དང ། བཟའ་བ་རྣམ་པ་སྣ་ཚོགས་པ་དེ་དག་འཚལ་ནས། ཚེ་དང ། སྟོབས་དང ། ཁ་དོག་དང ། དབང་པོ་རྣམས་རྣམ་པར་
353a
༄#། །འཕེལ་བར་འགྱུར་རོ། །གཟི་བྱིན་དང ། སྟོབས་དང ། ཁ་དོག་དང ། གཟུགས་དང་རབ་ཏུ་ལྡན་པར་གྱུར་ནས་ཀྱང ། ས་ལ་མཆིས་པའི་དགོས་པ་རྣམ་པ་སྣ་ཚོགས་ཐ་དད་པ་འབུམ་ཕྲག་དུ་མ་དག་བགྱིད་པར་འགྱུར། བརྩོན་པར་འགྱུར། འབད་པར་འགྱུར། སྟོབས་སུ་བགྱི་བའི་ལས་རྣམས་བགྱིད་པར་འགྱུར་རོ།། བཙུན་པ་བཅོམ་ལྡན་འདས། རྒྱུ་དེས་ཛམྦུའི་གླིང་ཐམས་ཅད་ཞི་བར་འགྱུར་བ་དང ། ལོ་ལེགས་པ་དང ། རྒྱས་བ་དང ། ཉམས་དགའ་བར་འགྱུར། སྐྱེ་བོ་དང ། མི་མང་པོས་གང་བར་འགྱུར། ཛམྦུའི་གླིང་གི་སེམས་ཅན་ཐམས་ཅད་བདེ་བར་འགྱུར། དགའ་བ་རྣམ་པ་སྣ་ཚོགས་མྱོང་བར་འགྱུར། སེམས་ཅན་དེ་དག་གཟི་བྱིན་དང ། སྟོབས་དང།་ཁ་དོག་དང ། གཟུགས་དང་ལྡན་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་སླད་དུ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ཆོས་ཀྱི་ཁྲི་སྟན་ལ་མཆིས་པའི་གན་དུ་མཆི་བར་འགྱུར། མཆིས་ནས་ཀྱང་སེམས་རབ་ཏུ་དང་བས་སེམས་ཅན་ཐམས་ཅད་ཀྱི་དོན་དང ། ཕན་པ་དང ། བདེ་བ་དང ། གསེར་འོང་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་བཤད་པར་བགྱི་བའི་སླད་དུ་ཆོས་སྨྲ་
353b
བདེ་དག་ལ་གསོལ་བ་འདེབས་པར་འགྱུར་རོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རབ་ཏུ་བཤད་པ་ན་སའི་ལྷ་མོ་བརྟན་མ་བདག་གཡོག་དང་བཅས་ཏེ། རབ་ཏུ་གཟི་བྱིན་དང་ལྡན་པ་དང ། རབ་ཏུ་སྟོབས་དང་ལྡན་པར་འགྱུར་རོ། །བདག་ཅག་གི་ལུས་ལ་སྟོབས་དང ། བརྩོན་འགྲུས་དང ། མཐུ་ཆེན་པོ་བསྐྱེད་པར་འགྱུར། བདག་ཅག་གི་ལུས་ལ་གཟི་བྱིན་དང ། དཔལ་དང ། ཕུན་སུམ་ཚོགས་པའང་འཇུག་པར་འགྱུར་རོ། །བཙུན་པ་བཅོམ་ལྡན་འདས། སའི་ལྷ་མོ་བརྟན་མ་བདག་ཆོས་བདུད་རྩིའི་ཁུ་བ་འདིས་ཚིམ་པར་གྱུར། གཟི་བྱིན་དང ། སྟོབས་དང ། བརྩོན་འགྲུས་དང ། མཐུ་དང ། ཤུགས་ཆེན་པོ་ཐོབ་པར་གྱུར་ན། ས་ཆེན་པོ་དཔག་ཚད་སྟོང་ཕྲག་བདུན་པའི་འྫམྦུའི་གླིང་འདི་སའི་བཅུད་ཆེན་པོས་རྣམ་པར་འཕེལ་བར་འགྱུར་རོ། །ས་ཆེན་པོ་གཟི་བྱིན་དང་རབ་ཏུ་ལྡན་པར་འགྱུར་རོ། །བཙུན་པ་བཅོམ་ལྡན་འདས། ས་ལ་བརྟེན་པའི་སེམས་ཅན་འདི་དག་ཐམས་ཅད་ཀྱང་འཕེལ་ཞིང་རྒྱས་ལ་ཡངས་པར་འགྱུར། རྒྱ་ཆེན་པོར་ཡང་འགྱུར་རོ། །ས་ལ་གནས་པའི་སེམས་ཅན་དེ་དག་ཆེན་པོར་གྱུར་ནས་ཀྱང ། ལོངས་སྤྱོད་དང ། ཡོངས་སུ་སྤྱོད་པ་སྣ་ཚོགས་ལ་སྤྱོད་པར་འགྱུར། བདེ་བ་དག་
354a
༄#། །ཀྱང་མྱོང་བར་འགྱུར་རོ། །དེ་དག་ཐམས་ཅད་བཟའ་བ་དང ། བཏུང་བ་དང ། བཅའ་བ་རྣམ་པ་སྣ་ཚོགས་དང ། གོས་དང ། མལ་ཆ་དང ། སྟན་དང།་གནས་དང ། ཁང་པ་དང ། གཞལ་མེད་ཁང་དང ། སྐྱེད་མོས་ཚལ་དང ། ཆུ་བོ་དང ། རྫིང་དང ། ཆུ་མིག་དང ། མཚེའུ་དང ། མཚོ་དང ། ལྟེང་ཀ་དང ། འདི་ལྟ་བུའི་ཡོ་བྱད་བདེ་བ་རྣམ་པ་སྣ་ཚོགས་ལ་གནས་པ་ས་ལས་འབྱུང་བ་ས་ལ་བརྟེན་པ་འདི་དག་ལ་སྤྱོད་པར་འགྱུར་རོ། །བཙུན་པ་བཅོམ་ལྡན་འདས། རྒྱུ་དེས་ན་སེམས་ཅན་དེ་དག་ཐམས་ཅད་ཀྱིས་བདག་ལ་བྱས་པ་གཟོ་བར་བགྱིའོ། །གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བསྟི་སྟང་དུ་བགྱིས་ཏེ། མཉན་པར་བགྱི། བཀུར་སྟིར་བགྱི། བླ་མར་བགྱི། རིམ་གྲོར་བགྱི། མཆོད་པར་བགྱིའོ། །བཙུན་པ་བཅོམ་ལྡན་འདས། གང་གི་ཚེ་སེམས་ཅན་དེ་དག་ཆོས་སྨྲ་བ་དེའི་གན་དུ་མཆི་བའི་སླད་དུ། རིགས་ཐ་དད་པ་དང ། ཁྱིམ་ཐ་དད་པ་དག་ནས་བྱུང་སྟེ་མཆིས་ནས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་གྱུར་ལ། ཐོས་ནས་ཀྱང་རང་རང་གི་རིགས་དང ། ཁྱིམ་དང ། གྲོང་དང ། གྲོང་རྡལ་ཐ་དད་པ་དག་ཏུ་ཞུགས་ནས། རང་རང་གི་
354b
ཁྱིམ་ན་གནས་པ་དག་ཕན་ཚུན་དུ། འདི་སྐད་ཅེས། བདག་ཅག་གིས་དེ་རིང་ཆོས་མཉན་པ་ཟབ་མོ་ཐོས་སོ། །དེ་རིང་བདག་ཅག་གིས་བསོད་ནམས་ཀྱི་ཕུང་པོ་བསམ་གྱིས་མི་ཁྱབ་པ་ཡོངས་སུ་བཟུང་ངོ ། །བདག་ཅག་གིས་ཆོས་མཉན་པ་དེས་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་དག་མཉེས་པར་བྱས་སོ། །དེང་བདག་ཅག་གིས་ཆོས་མཉན་པ་འདིས་སེམས་ཅན་དམྱལ་བ་ལས་ཡོངས་སུ་ཐར་རོ། །དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། ཡི་དྭགས་ཀྱི་ཡུལ་ལས་ཡོངས་སུ་ཐར་ཏེ། དེང་བདག་ཅག་གིས་ཆོས་མཉན་པ་འདིས་མ་འོངས་པའི་དུས་ན། ཚེ་རབས་འབུམ་ཕྲག་དུ་མར་ལྷ་དང ། མིའི་སྐྱེ་བ་ཡོངས་སུ་བཟུང་བར་འགྱུར་རོ་ཞེས་གཏམ་ཟེར་བར་འགྱུར་རོ། །ཁྱིམ་ཐ་དད་པ་གནས་པར་འགྱུར་བ་དེ་དག་སེམས་ཅན་གཞན་དག་ལ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་དཔེ་གཅིག་ཙམ་བརྗོད་དམ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ལེའུ་གཅིག་གམ། སྔོན་བྱུང་བ་གཅིག་གམ། ཐ་ན་བྱང་ཆུབ་སེམས་དཔའི་མིང་ངམ།་དེ་བཞིན་གཤེགས་པའི་མཚན་གཅིག་གམ། ཐ་ན་ཚིག་བཞི་པའི་ཚིགས་སུ་བཅད་པ་གཅིག་གམ། ཚིག་གཅིག་གིས་སེམས་ཅན་གཞན་དག་ལ་ཐོས་པར་
355a
༄#། །བགྱིད་དམ། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མཚན་གཞན་དག་ལ་རབ་ཏུ་སྟོན་ཏམ། བཙུན་པ་བཅོམ་ལྡན་འདས། གང་དང ། གང་ན་སེམས་ཅན་རྣམ་པ་ཐ་དད་པ་དེ་དག་ཕྱོགས་རྣམ་པ་ཐ་དད་པ་དག་ཏུ་མདོ་སྡེའི་གཏན་ཚིགས་རྣམ་པ་སྣ་ཚོགས་འདི་ལྟ་བུ་འདི་དག་གཅིག་ལ་གཅིག་བརྗོད་དམ། ཐོས་པར་བགྱིད་དམ། གཏམ་རྒྱུད་བརྗོད་ན། བཙུན་པ་བཅོམ་ལྡན་འདས། ཕྱོགས་དེ་དག་ཐམས་ཅད་ཤིན་ཏུ་གཟི་བྱིན་དང་ལྡན་པ་དང ། ཤིན་ཏུ་སྣུམ་པར་འགྱུར་རོ། །ས་ཕྱོགས་དེ་དང ། དེ་དག་ཏུ་སེམས་ཅན་དེ་དག་ཐམས་ཅད་ཀྱི་ཕྱིར་སའི་བཅུད་རྣམ་པ་སྣ་ཚོགས་དང ། ཡོ་བྱད་ཐམས་ཅད་རྒྱས་པར་སྐྱེ་བར་འགྱུར་རོ། །རྣམ་པར་འཕེལ་བར་འགྱུར། ཤིན་ཏུ་རྒྱས་པར་འགྱུར། སེམས་ཅན་དེ་དག་ཐམས་ཅད་ཀྱང་བདེ་བར་འགྱུར་རོ། །ནོར་ཆེ་བ་དང ། ལོངས་སྤྱོད་ཆེ་བ་དང ། སྦྱིན་པ་ལ་མོས་པར་འགྱུར། དཀོན་མཆོག་གསུམ་ལ་མངོན་པར་དད་པར་འགྱུར་རོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱི་སའི་ལྷ་མོ་བརྟན་མ་ལ་འདི་སྐད་ཅེས་བཀའ་སྩལ་ཏོ། །སའི་ལྷ་མོ། སེམས་ཅན་གང་ལ་ལ་དག་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ཚིག་གཅིག་ཉན་
355b
ན།་དེ་དག་མིའི་འཇིག་རྟེན་འདི་ནས་ཤི་འཕོས་ནས་སུམ་ཅུ་རྩ་གསུམ་གྱི་ལྷའི་རིས་ཀྱི་ནང་དུ་ལྷའི་རིས་གང་ཡང་རུང་བ་ཞིག་ཏུ་སྐྱེ་བར་འགྱུར་རོ། །སའི་ལྷ་མོ། སེམས་ཅན་གང་ལ་ལ་དག་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་དག་ལ་མཆོད་པའི་ཕྱིར་གནས་དེ་དག་ལེགས་པར་བརྒྱན་པར་བྱེད་དམ། ཐ་ན་གདུགས་གཅིག་གམ ། བ་དན་གཅིག་གམ། རས་བཅོས་བུ་གཅིག་གིས་གཡོགས་ན། སའི་ལྷ་མོ། རྟག་ཏུ་བརྒྱན་པའི་གནས་དེ་དག་འདོད་པ་ན་སྤྱོད་པའི་ལྷའི་རིས་བདུན་པོ་དེ་དག་ཏུ་ལྷའི་རིན་པོ་ཆེ་སྣ་བདུན་གྱིས་གཞལ་མེད་ཁང་རྒྱན་ཐམས་ཅད་ཀྱིས་ལེགས་པར་བརྒྱན་པ་དག་ཏུ་གནས་པར་འགྱུར་རོ། །གང་གི་ཚེ་སེམས་ཅན་དེ་དག་མིའི་འཇིག་རྟེན་འདི་ནས་ཤི་འཕོས་ཏེ། རིན་པོ་ཆེ་སྣ་བདུན་གྱི་གཞལ་མེད་ཁང་དེ་དག་ཏུ་སྐྱེ་བ་དེའི་ཚེ། སའི་ལྷ་མོ། རིན་པོ་ཆེ་སྣ་བདུན་གྱི་གཞལ་མེད་ཁང་རེ་རེར་ཡང་ལན་བདུན་བདུན་དུ་སྐྱེ་བར་འགྱུར་རོ། །ལྷའི་བདེ་བ་བསམ་གྱིས་མི་ཁྱབ་པ་དག་ཀྱང་མྱོང་བར་འགྱུར་རོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེས་ན་སའི་ལྷ་མོ་བརྟན་མ་བདག་དགེ་སློང་ཆོས་སྨྲ་བ་ཆོས་ཀྱི་ཁྲི་སྟན་ལ་མཆིས་པ་དེའི་ཚེ་ཆོས་
356a
༄#། །ཀྱི་སྟོན་གྱི་འོག་ལོགས་ཀྱི་ས་ཕྱོགས་དེ་དང ། དེ་དག་ཏུ་གནས་པར་བགྱིའོ། །ཅི་ནས་ཀྱང་སངས་རྒྱས་འབུམ་ཕྲག་དག་ལ་དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཛམྦུའི་གླིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང ། སེམས་ཅན་རྣམས་ཀྱང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང ། མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང ། མིའི་བདེ་བ་བསམ་གྱིས་མི་ཁྱབ་པ་མྱོང་བར་འགྱུར་བ་དང ། དེ་བཞིན་གཤེགས་པ་དང་འགྲོགས་པར་འགྱུར་བ་དང ། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་རྒྱུན་ཆད་པར་འགྱུར་བར་ལུས་མི་གདའ་བར་བགྱིས་ཏེ། དགེ་སློང་ཆོས་སྨྲ་བ་དེའི་རྐང་པ་ཡན་ལག་གི་དམ་པ་མགོ་བོས་བརྟེན་པར་བགྱིའོ། །དེ་ནས་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་སྔགས་
356b
ཀྱི་སྙིང་པོ་ཞིག་མཆིས་པ་འདི་ལྷ་དང ། མི་ཐམས་ཅད་ལ་ཕན་པ་དང ། བདེ་བར་འགྱུར་བ་སྟེ། གང་སྐྱེས་པའམ། བུད་མེད་དམ། འཁོར་བཞི་པོ་གང་ལ་ལ་ཞིག་གིས་བདག་མངོན་སུམ་དུ་མཐོང་བར་འདོད་པ་དང ། ནོར་དང ། ནོར་བུ་རིན་པོ་ཆེ་དང ། དབྱིག་ལ་སོགས་པ་འདོད་པ་དང ། སྨན་བཟང་པོས་ཚེ་རིང་ཞིང་ནད་མེད་པར་འདོད་པ་དང།་ཕས་ཀྱི་དགྲ་ཐམས་ཅད་དང་\?\། ཕྱིར་རྒོལ་བ་ཐམས་ཅད་འཇིལ་བར་འདོད་ན། གནས་དབེན་པར་དཀྱིལ་འཁོར་བྱས་ཏེ་ཁྲུས་བྱས་གོས་སར་པ་བགོས་ཏེ། རྩཝ་བཏིང་བའི་སྟེང་དུ་འདུག་ནས་སྐུ་གཟུགས་རིང་བསྲེལ་ཅན་གྱི་མདུན་ནམ། མཆོད་རྟེན་རིང་བསྲེལ་ཅན་གྱི་མདུན་དུ་མེ་ཏོག་དང ། བདུག་པ་དང ། ཞལ་ཟས་སྣ་ཚོགས་ཀྱིས་མཆོད་དེ་སྐར་མ་རྒྱལ་དང་སྦྱར་བའི་ཚེས་བརྒྱད་ལ་སེམས་རྩེ་གཅིག་གིས་གཟུངས་སྔགས་འདི་བཟླས་པས་སྤྱན་དྲངས་པར་འགྱུར་ཏེ། སྔགས་ལ། ཏདྱ་ཐཱ། ཙི་ལི་ཙི་ལི།་ཙུ་རུ་ཙུ་རུ། ཀུ་རུ་ཀུ་རུ། ཀུ་ཊུ་ཀུ་ཊུ། ཏོ་ཊུ་ཏོ་ཊུ། བ་ཧ་བ་ཧ། བ་རི་ཤེ། བ་རི་ཤེ་སཝཱཧཱ། བཅོམ་ལྡན་འདས། འཁོར་བཞི་པོ་གང་ལ་ལ་ཞིག་གིས་བདག་སྤྱན་དྲང་བའི་ཕྱིར་སྔགས་ཀྱི་ཚིག་འདི་བརྒྱ་རྩ་བརྒྱད་བཟླས་ན། བདག་དེའི་གན་དུ་མཆི་བར་བགྱིའོ། །གཞན་ཡང ། བཅོམ་ལྡན་འདས། སེམས་ཅན་གང་ལ་ལ་ཞིག་བདག་དང་
357a
༄#། །མཇལ་ཞིང་སྨྲ་བར་འཚལ་ན། ཆོ་ག་སྔ་མའི་ཚུལ་དུ་བཤམས་ཏེ་སྔགས་འདི་བཟླས་པར་བྱའོ། །ཏདྱ་\?\་ཐཱ། ཨཉྩ་ནི་ཀྱ་ལི་ཀྵ་ནི། ཤི་ཤི་དྷ་རི།་ཧ་ཧ། ཧི་ཧི། ཀུ་རུ་བ་རེ་སཝཱཧཱ། བཅོམ་ལྡན་འདས། སྔགས་ཀྱི་ཚིག་འདི་བརྒྱ་རྩ་བརྒྱད་བཟླས་ཏེ་སྔགས་སྔ་མ་བཟླས་པ་བྱས་ན་དེའི་མདུན་དུ་ལུས་བསྟན་ཏེ་ངེས་པར་བསམ་པ་རྫོགས་པར་བགྱིའོ། །གང་སྔགས་འདི་ཟློས་པར་འདོད་པས། སྔར་ལུས་བསྲུང་བའི་ཕྱིར་སྔགས་འདི་བརྗོད་དོ། །ཏདྱ་ཐཱ། ཤི་རི་ཤི་རི། བཱ་ཤ་ཀ་ཏི། ཏ་ཏི། ཀུཊྚི། པཱུ་ཏ། པཱུ་ཏེ་རི། པཱུ་ཏེ་རི་ཊི་ཊེ། བ་ཊི་ཀུ་ཀུ་ཊི། ཀ་བ་ཙི་ལི་སཝཱཧཱ། བཅོམ་ལྡན་འདས། གཟུངས་སྔགས་འདི་སྒྲུབ་པའི་ཚེ་ཚོན་སྐུད་སྣ་ལྔ་ལ་སྔགས་ལན་རེ་གདབ་ཅིང་མདུད་པ་རེ་རེ་བཅིང་ངོ ། །དེ་འདྲ་བ་ལན་ཉི་ཤུ་རྩ་གཅིག་བཟླས་ཏེ་དཔུང་པ་གཡོན་པ་ལ་བཏགས་ན། འཇིགས་པ་ཐམས་ཅད་བསལ་ཏེ་ལུས་བསྲུངས་པར་འགྱུར་རོ། །སེམས་མི་གཡེང་བར་སྔགས་འདི་བཟླས་ན། བསམ་པ་ཐམས་ཅད་འགྲུབ་པར་འགྱུར་རོ། །བདག་གི་ཚིག་འདི་མི་སླུ་བར་ནི་སངས་རྒྱས་དཀོན་མཆོག་དང ། ཆོས་དཀོན་མཆོག་དང ། དགེ་འདུན་དཀོན་མཆོག་རྣམས་བདག་ལ་མངོན་དུ་གཟིགས་ཤིང་དགོངས་པར་གསོལ། །དེ་ནས་བཅོམ་ལྡན་
357b
འདས་ཀྱིས་སའི་ལྷ་མོ་བརྟན་མ་ལ་ལེགས་སོ་ཞེས་བཀའ་སྩལ་ཏོ། །གང་ཁྱོད་ཀྱིས་བདེན་པའི་སྔགས་ཀྱི་ཚིག་འདིས་མདོ་སྡེའི་དབང་པོ་འདི་དང ། ཆོས་སྨྲ་བ་དེ་ལ་བསྲུང་བ་བྱས་པ་དེ་ནི་ལེགས་སོ། །ལེགས་སོ། །དེའི་ཕྱིར་ཁྱོད་ཀྱང་\?\བསོད་ནམས་ཀྱི་ཚོགས་དཔག་ཏུ་མེད་པ་དང་ལྡན་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སའི་ལྷ་མོ་བརྟན་མའི་ལེའུ་ཞེས་བྱ་སྟེ་བཅོ་བརྒྱད་པའོ།། །།དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་ལྷན་ཅིག་ཏུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ད་ལྟར་དང ། མ་འོངས་པའི་དུས་ན། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ ། ཕོ་བྲང་འཁོར་གང་དུ་འབྱུང་བར་འགྱུར་བར་དེར། བཙུན་པ་བཅོམ་ལྡན་འདས། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་བདག་གནོད་སྦྱིན་གྱི་སྡེ་དཔོན་ཆེན་པོ་
358a
༄#། །ཉི་ཤུ་རྩ་བརྒྱད་པོ་དེ་དག་དང་ལྷན་ཅིག་ཏུ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་དེར་མཆི་བར་བགྱིའོ། །ལུས་མི་གདའ་བར་བགྱི་སྟེ། དགེ་སློང་ཆོས་སྨྲ་བ་དེ་ལ་བསྲུང་བར་བགྱིའོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤང་བ་དང ། ཞི་བ་དང ། བདེ་ལེགས་སུ་འགྱུར་བར་བགྱིའོ། །སྐྱེས་པའམ། བུད་མེད་དམ། ཁྱེའུའམ་བུ་མོ་ཆོས་ཉན་པ་དེ་དག་ཐམས་ཅད་དང ། གང་སུ་དག་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཉན་པ་དང ། ཐ་ན་ཚིག་གཅིག་གམ། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་བྱང་ཆུབ་སེམས་དཔའི་མིང་གཅིག་གམ། དེ་བཞིན་ ་པའི་མཚན་ཅིག་ཙམ་ཐོས་པར་གྱུར་ཏེ་གཟུང་བ་དང ། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མིང་ཐོས་པར་འགྱུར་ཏེ། གཟུང་བ་དེ་ཐམས་ཅད་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཞི་བ་དང ། བདེ་ལེགས་སུ་འགྱུར་བར་བགྱིའོ། །རིགས་
358b
དེ་དག་དང ། ཁྱིམ་དེ་དག་དང ། གྲོང་དེ་དག་དང ། གྲོང་ཁྱེར་དེ་དག་དང ། གྲོང་རྡལ་དེ་དག་དང ། དགོན་པ་དེ་དག་དང ། ཕོ་བྲང་འཁོར་དེ་དག་ཀྱང་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་དང ། ཆད་པ་སྤང་བ་དང ། ཞི་བ་དང ། བདེ་ལེགས་སུ་འགྱུར་བར་བགྱིའོ། །བཙུན་པ་བཅོམ་ལྡན་འདས། རྒྱུ་གང་གིས་བདག་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཞེས་མིང་དུ་ཆགས་པར་གྱུར་ཅེ་ན། འདི་ནི་བཙུན་པ་བཅོམ་ལྡན་འདས་ཉིད་ཀྱིས་མངོན་སུམ་ལགས་ཏེ། བཙུན་པ་བཅོམ་ལྡན་འདས། བདག་གིས་ཆོས་ཐམས་ཅད་འཚལ་ཏོ། །ཆོས་ཐམས་ཅད་ཡོངས་སུ་འཚལ་ཏོ། །ཆོས་ཐམས་ཅད་ཁོང་དུ་ཆུད་དོ། །ཆོས་ཐམས་ཅད་ཇི་སྙེད་པ་དང ། ཆོས་ཐམས་ཅད་ཇི་ལྟ་བ་དང ། ཆོས་ཐམས་ཅད་གནས་པ་གང་ལགས་པ་དང ། ཆོས་ཐམས་ཅད་གང་དག་ལགས་པ་དང ། ཆོས་ཐམས་ཅད་ཀྱི་རིགས་གང་དག་ལགས་པ་དང ། བཙུན་པ་བཅོམ་ལྡན་འདས། ཆོས་ཐམས་ཅད་བདག་ལ་མངོན་སུམ་མོ། །བཙུན་པ་བཅོམ་ལྡན་འདས། ཆོས་ཐམས་ཅད་ལ་བདག་གི་ཡེ་ཤེས་སྣང་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་གསལ་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་རྒྱུ་བ་བསམ་གྱིས་
359a
༄#། །མི་ཁྱབ་བོ། །ཡེ་ཤེས་ཀྱི་ཕུང་པོ་བསམ་གྱིས་མི་ཁྱབ་བོ། །བཙུན་པ་བཅོམ་ལྡན་འདས། ཆོས་ཐམས་ཅད་ལ་བདག་གི་ཡེ་ཤེས་ཀྱི་ཡུལ་འཇུག་པ་བསམ་གྱིས་མི་ཁྱབ་བོ། །བཙུན་པ་བཅོམ་ལྡན་འདས། ཇི་ལྟར་བདག་ཆོས་ཐམས་ཅད་ཡང་དག་པར་འཚལ་བ་དང ། ཡང་དག་པར་ཡོངས་སུ་བརྟགས་པ་དང ། ཡང་དག་པ་ཡོངས་སུ་འཚལ་བ་དང ། ཡང་དག་པར་རྣམ་པར་བལྟ་བ་དང ། ཡང་དག་པར་ཁོང་དུ་ཆུད་པའི་རྒྱུ་དེས་ན། བཙུན་པ་བཅོམ་ལྡན་འདས། བདག་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཞེས་མིང་དུ་ཆགས་སོ། །བཙུན་པ་བཅོམ་ལྡན་འདས། བདག་གིས་དགེ་སློང་ཆོས་སྨྲ་བ་དེའི་ཚིག་བརྒྱན་པར་བགྱི་བའི་སླད་དུ་སྤོབས་པ་ཉེ་བར་སྒྲུབ་པར་བགྱིའོ། །ཅི་ནས་དགེ་སློང་ཆོས་སྨྲ་བ་དེའི་ལུས་མི་ངལ་བར་འགྱུར་བ་དང ། ལུས་ཀྱི་དབང་པོ་བདེ་བར་འགྱུར་བ་དང ། རབ་ཏུ་དགའ་བ་སྐྱེ་བར་འགྱུར་བ་དང ། གང་གི་སླད་དུ་སངས་རྒྱས་འབུམ་ཕྲག་དག་ལ་དགེ་བའི་རྩ་བ་བསྐྲུན་པའི་སེམས་ཅན་རྣམས་ཀྱི་དོན་གྱི་སླད་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཛམྦུའི་གླིང་དུ་ཡུན་རིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང ། སེམས་ཅན་རྣམས་ཀྱང་གསེར་འོད་
359b
དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང ། ཡེ་ཤེས་ཀྱི་ཕུང་པོ་བསམ་གྱིས་མི་ཁྱབ་པ་ཐོབ་པར་འགྱུར་བ་དང ། ཤེས་རབ་དང་ལྡན་པར་འགྱུར་བ་དང ། བསོད་ནམས་ཀྱི་ཕུང་པོ་རབ་ཏུ་འཛིན་པར་འགྱུར་བ་དང ། མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང ། མིའི་བདེ་བ་བསམ་གྱིས་མི་ཁྱབ་པ་དག་མྱོང་བར་འགྱུར་བ་དང ། དེ་བཞིན་གཤེགས་པ་དང་འགྲོགས་པར་འགྱུར་བ་དང ། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་རབ་ཏུ་ཞི་བར་བགྱི་བའི་སླད་དུ་དེའི་སྤུའི་བུ་ག་རྣམས་སུ་གཟི་བྱིན་སྩལ་བར་བགྱིའོ། །དེའི་ལུས་ལ་མཐུ་དང ། སྟོབས་དང ། བརྩོན་འགྲུས་ཆེན་པོ་བསྐྱེད་པར་བགྱིའོ། །དེའི་ཡེ་ཤེས་ཀྱི་སྣང་བ་བསམ་གྱིས་མི་ཁྱབ་པར་བགྱིའོ། །དེའི་དྲན་པ་ཁོང་དུ་ཆུད་པར་བགྱིའོ། །དེ་ཆེར་སྤྲོ་བར་བགྱིའོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་གཟུངས་སྔགས་ཤིག་མཆིས་པ་འདི་སེམས་ཅན་ཐམས་ཅད་ལ་ཕན་པ་དང །
360a
༄#། །སྙིང་བརྩེ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་བདག་ཉིད་ཀྱིས་སྔགས་འདི་འདོན་པར་བགྱིའོ། །སྔགས་ལ། ན་མོ་བུདྡྷ་ཡ། ན་མོ་དྷརྨཱ་ཡ། ན་མཿ སཾ་གྷཱ་ཡ། ན་མོ་བྲཧྨ་ཡ། ན་མོ་ཨིནྡྲ་ཡ། ན་མཿ ཙ་ཏུ་ར་ཎཱཾ། མཧཱ་རཱ་ཛཱ་ནཱན། ཏདྱ་ཐཱ། ཧི་ལི་ཧི་ལི། མི་ལི་མི་ལི། གཽ་རི། མཧཱ་གཽ་རི། སནྡྷ་རི། ། མཧཱ་གནྡྷ་རི། དྲི་མི་ཌི། མཧཱ་དྲི་མི་ཌི། དཎྜ་ཁུ་ཁུནྟ། ཧ་ཧ་ཧ་ཧ། ཧི་ཧི་ཧི་ཧི། ཧུ་ཧུ་ཧུ་ཧུ། ཧ་ལོ་དྷ་མེ། གུ་དྷ་མེ། ཙ་ཙ་ཙ་ཙ། ཙི་ཙི་ཙི་ཙི། ཙུ་ཙུ་ཙུ་ཙུ། ཙཎྜེ་ཤཝ་ར། ཤི་ཁ་ར། ཤི་ཁ་ར། ཨུཏྟི་ཥྛི་ཧེ་བྷ་ག་བཱན། སཾ་བིད་ཛྙཱ་ཡ་སཝཱཧཱ། གང་ལ་ལ་ཞིག་གིས་རིག་སྔགས་འདི་འཆང་ཞིང་འཛིན་ན་བདག་གིས་དེ་ལ་འཚོ་བའི་ཡོ་བྱད་བསོད་སྙོམས་དང ། གོས་དང ། མེ་ཏོག་དང ། འབྲས་བུ་དང ། ནོར་དང ། རིན་པོ་ཆེ་ལ་སོགས་པ་ཐམས་ཅད་སྩལ་བར་བགྱིའོ། །གང་ལ་ལ་ཞིག་བུ་ཕོ་མོ་སྨོས་པ་དང ། བྲན་ཕོ་དང ། བྲན་མོ་དང ། གསེར་དང ། དངུལ་དང ། རིན་པོ་ཆེ་དང ། རྒྱན་ལ་སོགས་པའི་ཡོ་བྱད་འདོད་ནའང་བདག་གིས་དེ་ལ་ཡིད་བཞིན་དུ་སོ་སོར་སྩལ་བར་བགྱིའོ། །རིག་སྔགས་འདིའི་མཐུ་དང ། གཟི་བརྗིད་ཆེན་པོ་དང་ལྡན་པའི་ཕྱིར་གང་གསང་སྔགས་འདི་ཟློས་པའི་ཚེ། བདག་མྱུར་དུ་དེའི་གན་
360b
དུ་མཆིས་ཏེ་ཅིའང་ཐོགས་པ་མེད་པར་འགྲུབ་པར་བགྱིའོ། །གསང་སྔགས་འདི་སྒྲུབ་པའི་ཆོ་ག་ནི། ཐོག་མར་གནོད་སྦྱིན་གྱི་བདག་པོ་ཆེན་པོ་ཡང་དག་ཤེས་ཀྱིས་གཟུགས། སྲིད་ཆགས་བཞི་པའམ། ལྔ་པ་ལག་ན་དགྲ་སྟ་ཐོགས་པ་བྲིས་པའི་མདུན་དུ་དཀྱིལ་འཁོར་གྲུ་བཞིར་བྱས་པའི་གྲཝ་བཞིར་སྦྲང་རྩིའམ། བུ་རམ་ཆུས་གང་བའི་བུམ་པ་བཞི་ཞོགས་ལ། བྱུག་པ་དང ། ཕྱེ་མ་དང ། བདུག་པ་བསྲེག་ཅིང་མེ་ཏོག་གི་ཕྲེང་བས་ཀྱང་མཆོད་པར་བགྱིའོ། །ཡང་དཀྱིལ་འཁོར་དེའི་མདུན་དུ་སྦྱིན་སྲེག་གི་ཐབ་ཁུང་བརྐོས་པ་ལ་དུད་པ་མེད་པའི་ནང་དུ་མར་དང ། ཡུངས་ཀར་དུ་བསྲེས་ལ། སྔགས་ལན་རེ་བཟླས་ཤིང་ཐབ་དེའི་ནང་དུ་སྦྱིན་སྲེག་བྱའོ། ། དེ་ལྟར་ལན་བརྒྱ་རྩ་བརྒྱད་བསྲེགས་པ་དང ། བདག་དེ་ལ་ལུས་མངོན་པར་སྟོན་ཏེ། ཁྱོད་ཅི་འདོད་ཅེས་དྲི་བར་བྱའོ། །དེ་ནས་སྔགས་གྲུབ་པ་དེས་ཀྱང་ཅི་འདོད་པ་དེ་ལ་སྨོས་ཤིག་དང ། ཅི་འདོད་པ་དེ་ཐམས་ཅད་སྦྱིན་པར་བྱེད་དོ། །གང་གསེར་དངུལ་འདོད་པ་དང ། གཏེར་ཚོལ་བར་འདོད་པ་དང ། ལྷའི་དྲང་སྲོང་འདོད་པའང་འགྲུབ་སྟེ་ནམ་མཁའ་ལ་འགྲོའོ། །གཞན་ཡང ། ལྷའི་མིག་དང ། ཕ་རོལ་གྱི་སེམས་ཤེས་པ་ལ་སོགས་པའི་མངོན་པར་ཤེས་པ་ཐམས་ཅད་ཀྱང་ཐོབ་པར་བྱེད་
361a
༄#། །དོ། །སེམས་ཅན་ཐམས་ཅད་ལ་ཡིད་བཞིན་དུ་དབང་བསྒྱུར་ཞིང་ཉོན་མོངས་པ་ཐམས་ཅད་ཀྱི་རྒྱུན་བཅད་དེ་རྣམ་པར་གྲོལ་བ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་གནོད་སྤྱིན་གྱི་སྡེ་དཔོན་ཆེན་པོ་ཡང་དག་ཤེས་ལ་ལེགས་སོ་ཞེས་བཀའ་སྩལ་ཏེ་ལེགས་སོ། །ལེགས་སོ། །གང་ཁྱོད་ཀྱིས་སེམས་ཅན་ཐམས་ཅད་ལ་ཕན་ཞིང་བདེ་བ་དང ། དམ་པའི་ཆོས་འདི་ཡོངས་སུ་བསྲུང་བའི་ཕྱིར་གསང་སྔགས་ཀྱི་ཚིག་འདི་སྨྲས་པས་བསོད་ནམས་དཔག་ཏུ་མེད་པ་འཕེལ་བར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། གནོད་སྦྱིན་གྱི་དབང་པོ་ཡང་དག་ཤེས་ཀྱི་ལེའུ་ཞེས་བྱ་སྟེ་བཅུ་དགུ་པའོ།། །།དེ་ནས་སའི་ལྷ་མོ་བརྟན་མ་ཞེས་བྱ་བ་དེ་འཁོར་མང་པོ་དེའི་ནང་ན་འདུག་པ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་།ཐལ་མོ་སྦྱར་བ་བཏུད་དེ་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཡུལ་འཁོར་ན་མིའི་རྒྱལ་པོ་བྱེད་པས་ཡང་དག་པའི་ཆོས་མི་སྤྱོད་ན། ཡུལ་གྱི་སྲིད་འཛིན་ཅིང་སེམས་ཅན་མང་པོ་ལ་བདེ་བ་དང ། རང་གི་ལུས་རྒྱལ་ཐབས་མཐོན་པོའི་ས་ན་ཡུན་རིང་པོར་གནས་
361b
པར་མི་འགྱུར་བས། བཅོམ་ལྡན་འདས། ཐུགས་རྗེ་དང་ལྡན་པས་རྒྱལ་པོའི་བསྟན་བཅོས་ཡང་དག་པས་ཡུལ་གྱི་སྲིད་ཇི་ལྟར་འཛིན་པ་བཤད་པར་གསོལ། དེ་ཐོས་པས་མིའི་རྒྱལ་པོ་རྣམས་ཆོས་དེ་ལྟ་བུས་འཇིག་རྟེན་སྐྱོང་ཞིང་རྒྱལ་ཐབས་དམ་པ་ལ་ཡུན་རིང་དུ་གནས་པས་བདེ་བར་འགྱུར་བ་དང ། ཡུལ་འཁོར་གྱི་སྐྱེ་བོ་དེ་དག་ཐམས་ཅད་ཀྱང་ཡོངས་སུ་བདེ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཁོར་མང་པོའི་ཚོགས་ཀྱི་ནང་ན་སའི་ལྷ་མོ་ལ་འདི་སྐད་ཅེས་བཀའ་སྩལ་ཏོ། །སའི་ལྷ་མོ།་ཁྱོད་དེའི་ཕྱིར་ཤིན་ཏུ་ལེགས་པར་ཉོན་ཅིག་།སྔོན་བྱུང་བ་འདས་པའི་དུས་ན་རྒྱལ་པོ་སྟོབས་ཀྱི་དབང་པོའི་ཏོག་ཅེས་བྱ་བ་ལ་བུ་མཛེས་པའི་ཏོག་ཅེས་བྱ་བ་དེ།་སྤྱི་བོ་ནས་དབང་བསྐུར་ནས་རིང་པོར་མ་ལོན་པ་ཞིག་ན། ཡབ་མཆོག་གི་རྒྱལ་པོ་དབང་པོའི་ཏོག་ལས་བླངས་པ། རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བ་ཞིག་ཡོད་དེ། ངས་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་དེས་ལོ་ཉི་ཁྲིའི་བར་དུ་རྒྱལ་པོ་ཉིད་བྱས་པར་གྱུར་ཏེ་ཐ་ན་སེམས་ཀྱི་སྐད་ཅིག་གཅིག་ཙམ་གྱིས་ཚོད་ཀྱང་སྔོན་ཆོས་མ་ཡིན་པའི་ཕྱོགས་འགའ་ཞིག་ལ་གནས་པར་མ་ཤེས་སོ། །བུ།་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་
362a
༄#། །ཅེས་བྱ་བ་དེ་གང་ཞེ་ན། དེ་ནས། རིགས་ཀྱི་ལྷ་མོ། དེའི་ཚེ་དེའི་དུས་ན་རྒྱལ་པོ་སྟོབས་ཀྱི་དབང་པོའི་ཏོག་ཅེས་བྱ་བས་བུ་རྒྱལ་པོ་མཛེས་པའི་ཏོག་ལ་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བ་ཚིགས་སུ་བཅད་པ་འདི་དག་གིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །སེམས་ཅན་ཀུན་ལ་ཕན་བྱེད་པ། །ཐེ་ཚོམ་ཐམས་ཅད་གཅོད་པ་པོ། །ཉེས་བྱས་ཐམས་ཅད་འཇིག་བྱེད་པ། །རྒྱལ་པོའི་བསྟན་བཅོས་བཤད་པར་བྱ། །རྒྱལ་པོ་ཐམས་ཅད་སོ་སོ་ནས། །དགའ་བའི་སེམས་སུ་འགྱུར་བྱོས་ལ། །ལྷ་ཡི་དབང་པོའི་དམ་ཚིག་ཀུན། །ཐལ་མོ་སྦྱར་ཏེ་ཉན་པར་བྱོས། །རྡོ་རྗེའི་འབྱུང་གནས་རི་དབང་འདིར། །ལྷ་ཡི་དབང་པོ་འདུས་པ་ན། །ཚངས་དབང་ལ་ནི་དྲི་བའི་ཕྱིར། །འཇིག་རྟེན་སྐྱོང་བ་རྣམས་ཀྱང་ལངས། །ཁྱོད་ནི་ལྷ་གཙོ་ཚངས་པ་སྟེ། །ཁྱོད་ནི་ལྷ་རྣམས་དབང་ཕྱུག་ལགས། །ཁྱོད་ནི་བདག་ཅག་ཐེ་ཚོམ་གཅོད། །བདག་ཅག་དོགས་པ་བཅད་དུ་གསོལ། །མིར་སྐྱེས་པ་ཡི་རྒྱལ་པོ་ལ། །ཇི་ལྟ་བུར་ནི་ལྷ་ཞེས་བགྱི། །གང་གིས་རྒྱུས་ན་རྒྱལ་པོ་ལ། །ལྷ་སྲས་ཞེས་ནི་བགྱི་བར་འགྱུར། །གལ་ཏེ་ལྷ་ནི་ཇི་ལྟ་བུར། །མི་ཡི་འཇིག་རྟེན་འདིར་སྐྱེས་ཤིང ། །མི་བདག་གྱུར་ཏེ་
362b
མི་རྣམས་ལ། །རྒྱལ་པོ་ཉིད་ནི་བགྱིད་པར་འགྱུར། །འཇིག་རྟེན་སྐྱོང་བས་ཚངས་དབང་ལ། །དེ་སྐད་ཡོངས་སུ་དྲིས་པ་དང ། །ལྷ་ཡི་གཙོ་བོ་ཚངས་པ་དེས། །འཇིག་རྟེན་སྐྱོང་ལ་འདི་སྐད་སྨྲས། །དེ་ལྟར་འཇིག་རྟེན་སྐྱོང་རྣམས་ཀྱིས། །དེ་ལྟར་བདག་ལ་དྲིས་པས་ན། །སེམས་ཅན་ཀུན་ལ་ཕན་པའི་ཕྱིར། །བསྟན་བཅོས་དམ་པ་ཁོ་བོས་བསྟན། །མི་ཡི་གནས་སུ་སྐྱེས་པ་ནི། །རྒྱལ་པོ་རྣམས་ཀྱི་སྐྱེ་བོ་དང ། །རྒྱུ་གང་གིས་ན་ཡུལ་རྣམས་སུ། །རྒྱལ་བོར་འགྱུར་བ་བཤད་པར་བྱ། །ལྷ་དབང་རྣམས་ཀྱི་བྱིན་བརླབས་ཀྱི། །མ་ཡི་རུམ་དུ་འཇུག་གྱུར་ཏེ། །ལྷ་ཡིས་སྔར་ནི་བྱིན་བརླབས་ནས། །ཕྱི་ནས་མངལ་དུ་འཇུག་པར་འགྱུར། །མི་ཡི་འཇིག་རྟེན་སྐྱེས་ཀྱང་ནི། །མི་ཡི་དབང་པོར་གྱུར་བ་ཡིན། །ལྷ་ལས་སྐྱེས་པར་གྱུར་པས་ན། །དེ་ནི་ལྷ་ཡི་སྲས་ཞེས་བྱ། །ཁྱོད་ནི་ལྷ་ཀུན་བུ་ཡིན་ཞེས། །སུམ་ཅུ་རྩ་གསུམ་ལྷ་དབང་གིས། །རྒྱལ་པོའི་སྐལ་བ་བྱིན་ནས་ནི། །མི་རྣམས་ལ་ནི་དབང་པོར་སྤྲུལ། །ཉེས་པར་བྱས་པ་རྣམས་འགོག་པ། །ཆོས་མ་ཡིན་པ་གཞིག་པ་དང ། །སེམས་ཅན་ལེགས་བྱེད་དགོད་པ་དང། །ལྷ་ཡི་གནས་སུ་དགྱེ་བའི་ཕྱིར། །མི་ཡི་དབང་པོ་མི་ཤས་དང ། །ལྷ་ཡིས་ཤས་དང་དྲི་ཟའི་ཤས། །གདོལ་པའི་ཤས་དང་སྲིན་ཤས་ཀྱིས། །ཉེས་པར་བྱེད་
363a
༄#། །པ་ཟློག་པར་བྱེད། །ལེགས་པར་བྱ་བ་བྱེད་རྣམས་ལ། །མི་ཡི་དབང་པོ་ཕ་མའི་ཤས། །རྣམ་སྨིན་འབྲས་བུ་བསྟན་པའི་ཕྱིར། །ལྷ་ཡི་རྒྱལ་པོར་བྱིན་གྱིས་བརླབས། །ཚེ་འདི་ལེགས་པར་བྱས་པ་དང ། །ཉེས་པ་བྱས་པའི་ལས་རྣམས་ཀྱི། །རྣམ་སྨིན་འབྲས་བུ་བསྟན་པའི་ཕྱིར། །ལྷ་ཡིས་རྒྱལ་པོར་བྱིན་གྱིས་བརླབས། །ཡུལ་ནི་ཉེ་བྱས་གནས་པ་དག་།གང་ཚེ་རྒྱལ་པོས་ཡལ་བོར་ཞིང ། །སྡིག་པ་ཅན་གྱི་སྐྱེ་བོ་ལ། །མཐུན་པའི་ཆད་པས་མི་གཅོད་ཅིང ། །ཉེས་པར་བྱེད་པ་ཡལ་བོར་བ། །དེ་ཚེ་ཆོས་མིན་ཤིན་ཏུ་འཕེལ། །འཐབ་མོ་དང་ནི་གཡོ་རྣམས་ཀྱང ། །ཡུལ་འཁོར་དེར་ནི་ཕྱི་ཕྱིར་འབྱུང ། །སུམ་ཅུ་རྩ་གསུམ་ཁང་པ་ན།། ལྷ་ཡི་དབང་པོ་འཁྲུག་པར་འགྱུར། །ཡུལ་ན་ཉེས་བྱེད་གནས་པ་དག་།གང་ཚེ་རྒྱལ་པོས་ཡལ་བོར་བ། །དེ་ཚེ་གཡོ་ནི་མི་བཟད་པ། །དྲག་པོ་རྣམས་ཀྱིས་ཡུལ་འཇོམས་འགྱུར། །ཕ་རོལ་དམག་ཚོགས་ལྷགས་ནས་སུ། །ཡུལ་འཁོར་དེ་ནི་རྣམ་པར་འཇིག་།ལོངས་སྤྱོད་རྣམས་དང་རིགས་ཀྱང་འཇིག་།གང་གི་ནོར་བསགས་ཡོད་པ་ཡང ། །གཡོ་བྱེད་རྣམ་པ་མང་པོ་ཡིས། །ཕན་ཚུན་དུ་ནི་འཕྲོག་པར་འགྱུར། །བྱ་བ་གང་གིས་རྒྱལ་པོ་ཉིད། །བྱ་བ་དེ་ནི་མི་བྱེད་ན། །གླང་ཆེན་དབང་
363b
པོས་གླིང་\?\་བུ་བཞིན། །རང་གི་ཡུལ་འཁོར་རྣམ་པར་འཇིག་།མ་རུངས་པ་ཡི་རླུང་ལྡང་ཞིང ། །མ་རུངས་པ་ཡི་ཆར་པ་འབབ། །ཉི་མ་དང་ནི་ཟླ་བ་དང ། །གཟའ་དང་རྒྱུ་སྐར་མ་རུངས་འགྱུར། །རྒྱལ་པོས་ཡལ་བར་བོར་ན་དེར། །ས་བོན་ལོ་ཏོག་མེ་ཏོག་འབྲས། །ལེགས་པར་སྨིན་པར་མི་འགྱུར་ཞིང ། །མུ་གེ་དག་ཀྱང་འབྱུང་བར་འགྱུར། །ཡུལ་ན་ཉེས་བྱེད་གནས་པ་དག་།གང་ཚེ་རྒྱལ་པོས་ཡལ་པོར་ན། །དེ་ཚེ་ལྷ་རྣམས་ཁང་པ་ན། །ཡིད་ནི་དགའ་བར་མི་འགྱུར་རོ། །ལྷ་རྒྱལ་དབང་པོ་དེ་དག་ཀུན། །རྒྱལ་དེ་ཆོས་དང་མི་ལྡན་དེ། །ཆོས་མིན་ཕྱོགས་ལ་གནས་པའོ་ཞེས། །ཕན་ཚུན་དུ་ནི་སྨྲ་བར་འགྱུར། །རྒྱལ་འདིས་རིང་པོར་མི་ཐོགས་པར། །ལྷ་རྣམས་འཁྲུག་པར་བྱེད་པར་འགྱུར། ། ལྷ་རྣམས་རབ་ཏུ་འཁྲུགས་པས་ནས། །དེ་ཡི་ཡུལ་ནི་རྣམ་པར་འཇིག་།ཡུལ་དུ་ཆོས་མིན་འབྱུང་གྱུར་ཞིང ། །མཚོན་ཆས་ཀྱང་ནི་འཇིག་པར་འགྱུར། །གཡོན་རྣམས་དང་ནི་འཐབ་མོ་དང ། །ནད་ཀྱང་ཀུན་ཏུ་འབྱུང་བར་འགྱུར། །ལྷ་དབང་རྣམས་ནི་རབ་ཁྲོས་ཤིང ། །ལྷ་རྣམས་ཀྱིས་ཀྱང་ཡལ་བར་འདོར། །ཡུལ་འཁོར་དེ་ནི་འཇིག་པར་འགྱུར། །རྒྱལ་པོ་དེ་ནི་མྱ་ངན་རྙེད། །སྤུན་ནམ་ཡང་ན་བུ་ཡང་རུང ། །སྡུག་པ་རྣམས་དང་བྲལ་བར་འགྱུར། །སྡུག་པའི་ཆུང་མ་དང་ཡང་འབྲལ། །ཡང་ན་
364a
༄#། །བུ་མོ་འཆི་བར་འགྱུར། །སྐར་མ་དག་ཀྱང་ལྟུང་བར་འགྱུར། །དེ་བཞིན་ཉི་མ་འདྲ་བ་འབྱུང ། །ཕ་རོལ་གྱི་ནི་དམག་ཚོགས་དང ། ། མུ་གེ་ཤིན་ཏུ་འབྱུང་བར་འགྱུར། །དེ་ཡིས་གླང་པོ་ཕངས་པ་དང ། །བློན་པོ་ཕངས་པ་འཆི་བར་འགྱུར། །དེ་ཡི་འོག་ཏུ་རྔ་མོ་ནི། །ཕངས་པ་དག་ནི་འཆི་བར་འགྱུར།། ཁྱིམ་དང་ལོངས་སྤྱོད་ནོར་རྣམས་ཀྱང ། །ཕན་ཚུན་དུ་ནི་འཕྲོག་པར་འགྱུར། །ཡུལ་ཡུལ་དུ་ནི་མཚོན་ཆ་ཡིས། །ཕན་ཚུན་དུ་ནི་འདེབས་པར་འགྱུར། །འཐབ་མོ་དག་དང་རྩོད་དང་གཡོ། །ཡུལ་རྣམས་སུ་ནི་འབྱུང་བར་འགྱུར། །ཡུལ་འཁོར་དུ་ནི་གདོན་འཇུག་ཅིང ། །མི་བཟད་པ་ཡི་ནད་ཀྱང་འབྱུང ། །དེ་ཡི་འོག་ཏུ་སྦྱིན་གནས་ཀྱང། །ཆོས་དང་ལྡན་པ་མ་ཡིན་འགྱུར། །དེ་ཡི་འཁོར་དང་བློན་པོ་ཡང ། །ཆོས་དང་ལྡན་པ་མ་ཡིན་འགྱུར། །ཆོས་དང་མི་ལྡན་སྐྱེ་བོ་ལ། །དེ་ཡི་འོག་ཏུ་མཆོད་བྱེད་འགྱུར། །ཆོས་དང་ལྡན་པའི་སེམས་ཅན་ལ། །རྟག་ཏུ་ཆད་པས་གཅོད་པར་འགྱུར། །ཆོས་དང་མི་ལྡན་སྐྱེ་བོ་བཀུར། །ཆོས་ལྡན་ཆད་པས་བཅད་པས་ན། ། དེར་ནི་ཆུ་དང་རྒྱུ་སྐར་རླུང ། །རྣམ་གསུམ་རྣམ་པར་འཁྲུག་པར་འགྱུར། །ཆོས་མིན་སྐྱེ་བོ་བཟུང་བས་ན། །དམ་ཆོས་རོ་ཡི་སྙིང་པོ་མདངས། །སེམས་ཅན་
364b
མདངས་དང་ས་ཡི་བཅུད། །དངོས་པོ་རྣམ་གསུམ་རྣམ་པར་འཇིག་།སྐྱེ་བོ་ངན་པ་རབ་བཀུར་ཅིང ། །སྐྱེ་བོ་དམ་བ་སྨད་པས་ན། །འཆི་དང་ལྕེ་འབབ་མུ་གེ་དང ། །རྣམ་པ་གསུམ་ནི་དེར་འབྱུང་འགྱུར། །འབྲས་བུ་ལོ་ཏོག་རོ་དང་མདངས། །དེ་ཡི་འོག་ཏུ་མེད་པར་འགྱུར། །སེམས་ཅན་ནད་པ་མང་པོ་དག་།ཡུལ་རྣམས་སུ་ནི་འབྱུང་བར་འགྱུར། །མངར་ཞིང་ཆེ་བའི་འབྲས་བུ་དག་།ཡུལ་རྣམས་ན་ནི་ཡོད་པ་ཡང ། །ཁ་བ་དང་ནི་ཚ་བ་དང ། །ཆུང་བ་དག་ནི་ཉིད་དུ་འགྱུར། །རྩེ་དང་དགོད་དང་དགའ་བ་དང། །སྔོན་ཆད་དགའ་བའི་དངོས་པོ་དག་།དགའ་བ་ཉམས་ཤིང་མི་དགའ་འགྱུར། །ཉོན་མོངས་བརྒྱ་ཡིས་རྣམ་པར་འཁྲུགས། །ལོ་ཏོག་རྣམས་དང་འབྲས་བུ་ཡི། ། སྣུམ་དངོས་ཁུ་བ་ཟད་པས་ན། །ལུས་དང་ཁམས་དང་དབང་པོ་ལ། །དེ་ལྟར་ཚིམ་པར་མི་འགྱུར་རོ། །སེམས་ཅན་རྣམས་ནི་མདོག་ངན་ཅིང ། །མཐུ་ཆུང་ཤིན་ཏུ་རིད་པར་འགྱུར། །ཁ་ཟས་མང་པོ་ཟོས་ཀྱང་ནི། །ཚིམ་པར་འགྱུར་བ་མ་ཡིན་ནོ། །སྟོབས་དང་མཐུ་དང་བརྩོན་འགྲུས་ཀྱང ། །དེ་ཡི་འོག་ཏུ་མེད་པར་འགྱུར། །སེམས་ཅན་བརྩོན་འགྲུས་ཉམས་པ་དག་།ཡུལ་རྣམས་སུ་ནི་འབྱུང་བར་འགྱུར། །སྣ་ཚོགས་ནད་ཀྱིས་གཟིར་བ་ཡི། །སེམས་ཅན་ནད་མང་འབྱུང་བར་འགྱུར། །སྲིན་པོ་སྣ་
365a
༄#། །ཚོགས་ལས་གྱུར་བའི། །གཟའ་དང་རྒྱུ་སྐར་འབྱུང་བར་འགྱུར། །ཆོས་མིན་ཕྱོགས་ལ་རབ་གནས་ཏེ། །རྒྱལ་པོ་ཆོས་དང་མི་ལྡན་པས།། འཇིག་རྟེན་གསུམ་གྱི་དཀྱིལ་འཁོར་ན། །ཁམས་གསུམ་རྣམ་པར་འཇིག་པར་འགྱུར། །གང་ཚེ་རྒྱལ་པོ་ཕྱོགས་གནས་ཏེ། །ཉེས་བྱེད་ཡལ་བར་འདོར་བའི་ཚེ། ། འདི་འདྲའི་ཉེས་པ་དུ་མ་དག་།ཡུལ་རྣམས་སུ་ནི་འབྱུང་བར་འགྱུར། །ལྷ་དབང་རྣམས་ཀྱིས་དགོས་གང་ཕྱིར། །རྒྱལ་པོ་བྱིན་གྱིས་བརླབས་པ་ཡི། །རྒྱལ་པོ་ཉིད་ནི་མི་བྱེད་ཅིང ། །ཉེས་བྱེད་\?\་ཡལ་བར་འདོར་ན་ནི། །ལེགས་པར་བྱས་པས་སེམས་ཅན་རྣམས། །ལྷ་ཡི་གནས་སུ་ལྷར་ཡང་སྐྱེ། །ཉེས་པར་བྱས་པས་ཡི་དྭགས་དང། །སེམས་ཅན་དམྱལ་དང་དུད་འགྲོར་སྐྱེ། །གང་ཚེ་རྒྱལ་པོའི་ཡུལ་རྣམས་ན། །ཉེས་བྱེད་ཡལ་བར་འདོར་བའི་ཚེ། །སུམ་ཅུ་རྩ་གསུམ་ལྷ་གནས་ནས། །ཉེས་པར་བྱས་པས་ལྟུང་བར་འགྱུར། །རྒྱལ་པོ་ཉིད་ནི་མི་བྱེད་ན། །དེ་ནི་བུ་ཡང་མ་ཡིན་ལ། །ལྷ་ཡི་རྒྱལ་པོ་ཕ་རྣམས་ཀྱི། །གནས་ལ་ཉེས་དང་བཅས་པར་འགྱུར། ། གཡོ་ནི་ཤིན་ཏུ་མི་བཟད་པས། །གང་ཚེ་ཡུལ་འཁོར་འཇིག་འགྱུར་བ། །དེ་ཕྱིར་ལྷ་ཡི་དབང་རྣམས་ཀྱིས། །མིའི་གནས་རྒྱལ་པོ་བྱིན་གྱིས་བརླབས། །ཉེས་
365b
པར་བྱས་པ་ཞི་བྱའི་ཕྱིར། །ལེགས་པར་བྱེད་ལ་འཇུད་པ་སྟེ། །ཚེ་འདི་ལ་ནི་སེམས་ཅན་ལ། །ཡུལ་གྱི་ཆོས་ཀྱི་དོན་གྱི་ཕྱིར། །རྣམ་སྨིན་སྐྱེད་པ་རྒྱལ་པོ་ཡིན། །ལེགས་བྱས་དང་ནི་ཉེས་བྱས་ཀྱི། །ལས་ཀྱི་རྣམ་པར་སྨིན་པའི་འབྲས། །རྣམ་པ་ཐ་དད་བསྟན་པའི་ཕྱིར། །བྱེད་པ་གང་ཡིན་རྒྱལ་པོར་བརྗོད། །བདག་གི་དོན་དང་གཞན་དོན་དང ། ། ཡུལ་གྱི་ཆོས་ཀྱི་དོན་གྱི་ཕྱིར། །ལྷ་ཚོགས་རྣམས་ཀྱི་བྱིན་གྱིས་བརླབས། །ལྷ་རྣམས་དག་ཀྱང་རྗེས་ཡི་རང ། །ཡུལ་འཁོར་དག་ན་སྐྱེ་བོ་ནི། །སྡིག་ཅན་གཡོན་ཅན་འདུལ་བ་དང ། །ཡུལ་གྱི་དོན་གྱི་ཆོས་ཀྱི་ཕྱིར། །སྲོག་ཀྱང་རྒྱལ་སྲིད་རྣམས་ཀྱང་བཏབ། །ཆོས་མ་ཡིན་པ་བཟོད་བྱེད་ཅིང ། །ཤེས་བཞིན་ཡལ་བར་འདོར་བ་ནི། །ཡུལ་ན་འཇིགས་པ་མི་བཟད་པ། །དེ་འདྲ་གཞན་ནི་ཡོད་མ་ཡིན། །ཇི་ལྟར་གཡོ་རྣམས་འབྱུང་བ་ལ། །གཡོ་བྱེད་ཆད་པར་མ་བཅད་ན། །ཡུལ་དུ་ཤིན་ཏུ་མི་བཟད་པའི། ། གཡོ་རྣམས་ཕྱིར་ནི་འབྱུང་བར་འགྱུར། །གླང་ཆེན་རྣམས་ཀྱིས་རྫིང་ཆེན་བཞིན། །ཡུལ་འཁོར་དེ་ནི་རྣམ་པར་འཇིག་།ལྷ་དབང་རྣམས་ཀྱང་འཁྲུག་པར་འགྱུར། །ལྷ་ཡི་གནས་ནི་རྣམ་པར་འཇིག་།ཡུལ་དུ་དངོས་པོ་ཐམས་ཅད་ནི། །མ་རུངས་པར་ཡང་འགྱུར་བས་ན། །དེ་ཕྱིར་སྡིག་པ་བྱེད་པ་རྣམས། །ཉེས་པའི་རིམ་བཞིན་གདུལ་བར་
366a
༄#། །བྱ། །ཆོས་ཀྱི་ཡུལ་འཁོར་བསྐྱང་བ་བྱ། །ཆོས་མ་ཡིན་པ་སྤྱད་མི་བྱ། །སྲོག་ཀྱང་ཡོངས་སུ་གཏང་བྱ་ཞིང ། །ཉེས་མགོན་བྱ་བར་མི་བྱའོ།། སྐྱེ་བོ་གཉེན་དང་སྐྱེ་བོ་གཞན། །ཡུལ་འཁོར་སྐྱེ་བོ་ཐམས་ཅད་ལ། །རྒྱལ་པོས་ཕྱོགས་ཀྱང་གཅིག་བྱ་ཡི། །ཕྱོགས་སུ་ལྷུང་བར་གྱུར་ཏ་རེ། །རྒྱལ་པོ་ཆོས་དང་ལྡན་པ་ཡི། །གྲགས་པ་འཇིག་རྟེན་གསུམ་གང་སྟེ། སུམ་ཅུ་རྩ་གསུམ་གནས་རྣམས་ན། །ལྷ་ཡི་དབང་པོ་དགར་གྱུར་ཏེ། །ཛམྦུའི་གླིང་ན་ངེད་ཀྱི་བུ། །འདི་ལྟར་ཆོས་ལྡན་རྒྱལ་པོ་ཡིན། །ཆོས་ཀྱི་ཡུལ་འཁོར་དེར་བསྟན་ནས། །ལེགས་པར་འབྱུང་ལ་སྐྱེ་བོ་བཀོད། །རྒྱལ་པོ་དེ་ནི་ལེགས་བྱེད་པས། །སྐྱེ་བོ་དག་ནི་འདིར་འགྱེད་དེ། ། ལྷ་དང་ལྷ་ཡི་བུ་རྣམས་ཀྱིས། །ལྷ་གནས་གང་བར་བྱེད་སྙམ་མོ། །ཆོས་ཀྱི་ཡུལ་འཁོར་དེར་བསྟན་ནས། །རྒྱལ་པོ་རྣམས་ནི་རབ་ཏུ་དགའ། །ལྷ་དབང་རབ་ཏུ་དྭང་གྱུར་པས། །མི་ཡི་རྒྱལ་པོ་དེ་ལ་སྲུང ། །ཉི་ཟླ་དང་ནི་དེ་བཞིན་དུ། །རྒྱུ་སྐར་ལེགས་པར་རྒྱུ་བར་འགྱུར། །རླུང་ཡང་དུས་སུ་ལྡང་འགྱུར་ཞིང ། །ཆར་ཡང་དུས་སུ་འབབ་པར་འགྱུར། །ལྷ་གནས་རྣམས་དང་དེ་བཞིན་དུ། །ཡུལ་འཁོར་རྣམས་སུ་ལོ་ལེགས་བྱེད། །ལྷ་དང་ལྷ་ཡི་བུ་རྣམས་ཀྱིས། །ལྷ་ཡི་གནས་རྣམས་གང་བར་བྱེད། །དེ་
366b
ལྟ་བས་ན་རྒྱལ་པོ་ཡིས། །བདག་གི་ཕངས་པའི་སྲོག་བཏང་གི་།གང་གིས་འཇིག་རྟེན་བདེ་འགྱུར་བ། །དཀོན་མཆོག་ཆོས་ནི་མི་བཏང་སྟེ། །ཡོན་ཏན་རྣམས་ཀྱིས་གང་བརྒྱན་པ། །ཆོས་དང་ལྡན་པ་བསྟེན་པར་བྱ། །རང་གི་སྐྱེ་བོས་རྟག་དགའ་བ། །རྟག་པར་སྡིག་པ་རྣམ་པར་སྤོངས། །ཆོས་ཀྱི་ཡུལ་འཁོར་བསྐྱང་བར་བྱ། །ཆོས་ཀྱང་ཡང་དག་བསྟན་པར་བྱ། །ལེགས་པར་བྱེད་ལ་སེམས་ཅན་དགོད། །ཉེས་བྱེད་ལས་ནི་བཟློག་པར་བྱ། །གང་ཚེ་སྡིག་པ་བྱེད་པ་རྣམས། །ཚུལ་བཞིན་གདུལ་བར་བྱེད་པའི་ཚེ། །ཡུལ་འཁོར་དུ་ནི་ལོ་ལེགས་ཤིང ། །རྒྱལ་པོ་གཟི་བརྗིད་ལྡན་པར་འགྱུར། །རྒྱལ་པོ་གྲགས་དང་ལྡན་འགྱུར་ཞིང ། །སྐྱེ་དགུ་རྣམས་ཀྱང་བདེ་བར་སྐྱོང ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བའི་ལེའུ་སྟེ་ཉི་ཤུ་པའོ།། །།བམ་པོ་དགུ་པ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ཆེ་འཁོར་ལོས་བསྒྱུར་བའི་རྒྱལ་པོར་འགྱུར། །དེ་ཚེ་རྒྱ་མཚོར་བཅས་པའི་ས་རྣམས་དང ། །གླིང་བཞིར་རིན་ཆེན་གང་བར་བཅས་པ་ཡང ། །སྔོན་གྱི་རྒྱལ་བ་དག་ལ་ངས་ཕུལ་ལོ། །ཆོས་ཀྱི་སྐུ་དེ་ཡོངས་སུ་བཙལ་བའི་ཕྱིར། །གང་སྔོན་ཡིད་
367a
༄#། །དུ་འོང་ཞིང་ཕངས་པ་ཡི། །དངོས་པོ་དེ་དག་ངས་ནི་མ་བཏང་མེད། །བསྐལ་པ་དུ་མར་ཕངས་པའི་སྲོག་ཀྱང་བཏང ། །ཇི་ལྟར་སྔོན་གྱི་བསྐལ་པ་བསམ་ཡས་ན། །རིན་ཆེན་གཙུག་ཏོར་ཅན་གྱི་བདེ་བར་གཤེགས། །མྱ་ངན་འདས་པའི་བདེ་བར་གཤེགས་པ་དེའི། །བསྟན་ལ་ལེགས་བྱུང་ཞེས་བྱའི་རྒྱལ་པོ་བྱུང ། །དེ་ནི་གླིང་བཞིའི་དབང་ཕྱུག་འཁོར་ལོས་བསྒྱུར། །རྒྱ་མཚོར་ཐུག་པའི་ས་ལ་རབ་ཏུ་སྟོན། །རྒྱལ་དབང་གསུང་ཕྱིར་རྒྱལ་པོའི་ཕོ་བྲང་ན། །དེ་ཚེ་རྒྱལ་པོ་དམ་པ་གཉིད་ཀྱིས་ལོག་།རྨི་ལམ་དུ་ནི་སངས་རྒྱས་ཡོན་ཏན་ཐོས། །ཆོས་སྨྲ་རིན་ཆེན་སོགས་པ་གཉིད་དཀྱིལ་ན། །རྣམ་པ་ལྷང་ངེར་མདོ་སྡེའི་རྒྱལ་པོ་འདི། ། རབ་ཏུ་འཆད་ཅིང་འདུག་བ་མཐོང་བར་འགྱུར། །རྒྱལ་པོ་དེ་ནི་གཉིད་ཀྱིས་ལོག་ལས་སད། །དེ་ཡི་ལུས་ཀུན་དགའ་བས་ཁྱབ་པར་གྱུར། །མགུ་ནས་རྒྱལ་པོ་ཁབ་ནས་སྔོན་བྱུང་སྟེ། །ཉན་ཐོས་དགེ་འདུན་མཆོག་གི་གནས་སུ་སོང ། །རྒྱལ་བའི་ཉན་ཐོས་རྣམས་ལ་མཆོད་བྱེད་ཅིང ། །འཕགས་པའི་དགེ་འདུན་འདི་ནི་རིན་ཆེན་སོགས། །ཡོན་ཏན་ལྡན་པའི་དགེ་སློང་གང་ཡོད་ཅེས། །ཆོས་སྨྲ་རིན་ཆེན་སོགས་པ་ཀུན་ཏུ་དྲིས། །དེ་ཡི་ཚེ་ན་རིན་ཆེན་སོགས་པ་ནི། །ཕུག་
367b
གཞན་ཞིག་གི་ནང་ན་འདུག་གྱུར་ཏེ། །མདོ་སྡེའི་རྒྱལ་པོ་འདི་ནི་རྣམ་སེམས་ལ། །ཁ་ཏོན་བྱེད་ཅིང་བདེ་བར་རབ་ཏུ་འདུག་།དགེ་སློང་ཆོས་སྨྲ་རིན་ཆེན་སོགས་པ་དེ། །ཕུན་སུམ་གཟི་བརྗིད་དཔལ་གྱིས་རབ་འབར་ཞིང ། །ཕུག་གཞན་ཞིག་གི་ནང་ན་འདུག་གྱུར་པ། །དེ་ཡི་ཚེ་ན་རྒྱལ་པོ་དེ་ལ་བསྟན། །འདི་ན་ཆོས་སྨྲ་རིན་ཆེན་སོགས་པ་འདི། །རྒྱལ་པོའི་སྤྱོད་ཡུལ་ཟབ་མོ་འཛིན་པ་སྟེ། །གསེར་འོད་དམ་པ་ཞེས་ནི་བྱ་བ་ཡི། །མདོ་སྡེའི་དབང་པོའི་རྒྱལ་པོ་རྟག་ཏུ་སྟོན། །རིན་ཆེན་སོགས་པའི་རྐང་ལ་ཕྱག་བཙལ་ཏེ། །རྒྱལ་པོ་ལེགས་པར་བྱུང་བས་འདི་སྐད་སྨྲས། །གསེར་འོད་དམ་པ་མདོ་སྡེའི་དབང་པོའི་རྒྱལ། །ཟླ་བ་ཉ་བའི་ཞལ་འདྲ་བཤད་དུ་གསོལ། །རྒྱལ་པོ་ལེགས་པར་བྱུང་བ་དེ་ཉིད་ལ། །རིན་ཆེན་སོགས་པས་ཁས་ནི་བླངས་པས་ན། །སྟོང་གསུམ་པ་ཡི་འཇིག་རྟེན་ཐམས་ཅད་དུ། །ལྷ་རྣམས་ཐམས་ཅད་རབ་ཏུ་དགའ་བར་གྱུར། །དེ་ཚེ་མི་ཡི་དབང་པོ་ས་ཕྱོགས་ནི། །གཙང་ཞིང་མཆོག་ཏུ་ཁྱད་པར་འཕགས་པ་དེར། །རིན་ཆེན་ཆུ་དང་སྤོས་ཆུས་ཆག་ཆག་བཏབ། །མེ་ཏོག་སིལ་མ་བཀྲམ་སྟེ་ཁྲི་བཤམས་ནས། །རྒྱལ་པོས་ཁྲི་དེ་གདུགས་དང་རྒྱལ་མཚན་དང ། །དར་ཡུག་སྟོང་ཕྲག་དུ་མས་ལེགས་པར་བརྒྱན། །རྒྱལ་པོས་ཁྲི་དེར་ཙནྡན་དམ་པ་དག་།རྣམ་པ་སྣ་ཚོགས་རྣམས་ཀྱང་མངོན་པར་
368a
༄#། །གཏོར། །ལྷ་དང་ཀླུ་དང་ལྷ་མིན་མི་འམ་ཅི། །གནོད་སྦྱིན་དབང་དང་གནོད་སྦྱིན་ལྟོ་འཕྱེ་ཆེས། །ལྷ་ཡི་མེ་ཏོག་མན་དཱ་ར་བའི་ཆར། །ཁྲི་དེ་ལ་ནི་མངོན་པར་རབ་ཏུ་ཕབ། །ཆོས་འདོད་ལྷ་ནི་བྱེ་བ་ཁྲག་ཁྲིག་སྟོང ། །བསམ་གྱིས་མི་ཁྱབ་གང་དག་ལྷགས་གྱུར་པ། །རིན་ཆེན་སོགས་པ་མངོན་པར་བྱུང་བ་ན།། ས་ལ་མེ་ཏོག་དག་གིས་མངོན་པར་འཐོར། །ཆོས་སྨྲ་རིན་ཆེན་སོགས་པ་དེ་ཉིད་ཀྱང ། །ཤིན་ཏུ་ལུས་བཀྲུས་གཙང་མའི་གོས་བགོས་ཏེ། །ཁྲི་དེར་ཉེ་བར་སོང་བར་བྱས་ནས་ནི། །ཐལ་མོ་སྦྱར་བ་བྱས་ཏེ་ཕྱག་ཀྱང་བཙལ། །ལྷ་དབང་དང་ནི་ལྷ་དང་ལྷ་མོ་རྣམས། །བར་སྣང་འདུས་ནས་མེ་ཏོག་མན་དཱ་རའི། །ཆར་པ་འབེབས་ཤིང་སིལ་སྙན་བརྒྱ་སྟོང་ཕྲག་།བསམ་གྱིས་མི་ཁྱབ་པ་དག་རབ་ཏུ་སྒྲོགས། །རིན་ཆེན་སོགས་པ་དགེ་སློང་ཆོས་སྨྲ་དེས། །ཕྱོགས་བཅུ་དག་གི་སངས་རྒྱས་བྱེ་བ་སྟོང ། བསམ་གྱིས་མི་ཁྱབ་པ་དག་དྲན་བྱས་ནས། །དེ་ནི་མངོན་པར་འཛེགས་ཏེ་འདུག་པར་གྱུར། །སེམས་ཅན་ཀུན་ལ་སྙིང་བརྩེ་བསྐྱེད་ནས་ནི། །སྙིང་རྗེའི་སེམས་ཀྱང་ཡང་དག་བསྐྱེད་བྱས་ཏེ། །རྒྱལ་པོ་ལེགས་པར་བྱུང་བ་དེ་ལ་ནི། །དེ་ཡི་ཚེ་ན་མདོ་སྡེ་འདི་བསྟན་ཏེ། །རྒྱལ་པོ་ཐལ་མོ་སྦྱར་བྱས་འདུག་ནས་སུ། །ཚིག་གཅིག་གིས་ནི་
368b
རྗེས་སུ་ཡི་རང་སྟེ། །ཆོས་ཀྱི་ཤུགས་ཀྱིས་མིག་ནས་མཆི་མ་བྱུང ། །དེ་ཡི་ལུས་ལ་དགའ་བས་ཁྱབ་པར་གྱུར། །མདོ་སྡེ་འདི་ལས་ཆོད་པ་བྱ་བའི་ཕྱིར། །དེ་ཚེ་རྒྱལ་པོ་ལེགས་པར་བྱུང་བ་ཡིས། །ཡིད་བཞིན་ནོར་བུ་རིན་ཆེན་རྒྱལ་པོ་བླངས། །སེམས་ཅན་རྣམས་ཕྱིར་སྨོན་ལམ་བཏབ་པ་ནི། །རིན་ཆེན་བདུན་དང་ལྡན་པའི་རྒྱན་རྣམས་དང ། །གང་ཡང་འཛམ་བུའི་གླིང་འདིར་སེམས་ཅན་རྣམས། །བདེ་བར་འགྱུར་བའི་ནོར་བུ་རིན་པོ་ཆེའི། །ཆར་པ་དེ་རིང་འཛམ་བུའི་གླིང་དུ་ཕོབ། །དེ་ཡི་ཚེ་ན་རིན་ཆེན་སྣ་བདུན་དང ། ། དཔུང་རྒྱན་དང་ནི་དོ་ཤལ་རྣ་ཆ་མཆོག་།དེ་བཞིན་ཟས་དང་སྐོམ་དང་གོས་རྣམས་ཀྱང ། །གླིང་བཞི་དག་ཏུ་རབ་ཏུ་བབ་པར་གྱུར། །རྒྱལ་པོ་ལེགས་པར་བྱུང་བས་འཛམ་གླིང་དུ། །རིན་ཆེན་ཆར་པ་བབ་པ་དེ་མཐོང་ནས། །གླིང་བཞི་རིན་ཆེན་གང་བར་བཅས་པ་ནི། །རིན་ཆེན་གཙུག་ཏོར་ཅན་གྱི་བསྟན་ལ་ཕུལ། །དེ་བཞིན་གཤེགས་པ་ཤཱཀྱ་ཐུབ་པ་ང། །རྒྱལ་པོ་ལེགས་པར་བྱུང་ཞེས་བྱ་བར་གྱུར། །གླིང་བཞི་དག་ན་རིན་ཆེན་གང་བཅས་ཀྱི། །ས་འདི་དེ་ཚེ་ང་ཡིས་ཡོངས་སུ་བཏང ། །གང་གིས་རྒྱལ་པོ་ལེགས་པར་བྱུང་དེ་ལ། །དེ་ཚེ་མདོ་སྡེ་འདི་ནི་རབ་བསྟན་པ། །རིན་ཆེན་སོགས་པ་ཆོས་སྨྲ་དགེ་སློང་དེ། །དེ་བཞིན་གཤེགས་པ་མི་འཁྲུགས་དེར་གྱུར་ཏོ། །ངས་གང་དེ་ཚེ་མདོ་སྡེ་འདི་ཐོས་
369a
༄#། །ཤིང། །ཚིག་གཅིག་གིས་ནི་རྗེས་སུ་ཡི་རང་སྟེ། །ངས་ནི་དགེ་བའི་ལས་ནི་དེ་ཉིད་དང ། །ཆོས་ཉན་པ་དང་རྗེས་སུ་ཡི་རང་བས། །གསེར་གྱི་མདོག་དང་བསོད་ནམས་བརྒྱ་ཡི་མཚན། །བལྟ་ན་སྡུག་ཅིང་མིག་ཏུ་མངོན་མཛེས་ལ། །ལྷ་སྟོང་བྱེ་བ་རབ་ཏུ་དགའ་བྱེད་པ། །སྐྱེ་བོས་མཐོང་ན་དགའ་ལུས་རྟག་ཏུ་ཐོབ། །བསྐལ་པ་དེ་ནི་བྱེ་བ་བརྒྱ་སྟོང་ཕྲག་།དགུ་བཅུ་རྩ་དགུ་འཁོར་ལོས་བསྒྱུར་རྒྱལ་གྱུར། །བསྐལ་པ་བརྒྱ་སྟོང་དུ་མ་མང་པོར་ཡང ། །ངས་ནི་ཁམས་ཀྱི་རྒྱལ་པོ་མྱོང་བར་འགྱུར། །བསྐལ་པ་བསམ་གྱིས་མི་ཁྱབ་བརྒྱ་བྱིན་གྱུར། །ཚངས་པའི་དབང་པོ་ཡིད་བཞིན་དེ་ཡིན་ནོ། །གང་དག་ཚད་ནི་ནམ་ཡང་ཡོད་མིན་པའི། ། སྟོབས་བཅུ་དཔག་མེད་ངས་ནི་མཉེས་པར་བྱས། །ངས་གང་མདོ་ཐོས་རྗེས་སུ་ཡི་རང་བ། །བསོད་ནམས་ཕུང་པོ་དེ་ལྟར་ཚད་མེད་མང ། །བསམ་པ་ཇི་བཞིན་ངས་ནི་བྱང་ཆུབ་ཐོབ། །ཆོས་\?\་སྐུ་དམ་པ་ཡང་ནི་ངས་ཐོབ་བོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལེགས་པར་བྱུང་བའི་ལེའུ་ཞེས་བྱ་སྟེ་ཉི་ཤུ་རྩ་གཅིག་པའོ།། །།དཔལ་ལྡན་ལྷ་མོ། རིགས་ཀྱི་བུའམ། རིགས་ཀྱི་བུ་མོ་དད་པ་གང་ལ་ལ་ཞིག་འདས་པ་དང ། མ་འོངས་དང ། ད་ལྟར་བྱུང་བའི་
369b
སངས་རྒྱས་བཅོམ་ལྡན་འདས་རྣམས་ལ། ཡོ་བྱད་ཐམས་ཅད་ཀྱིས་མཆོད་པ་ཆེན་པོ་ཤིན་ཏུ་རྒྱས་ཤིང་རྒྱ་ཆེ་བ་བསམ་གྱིས་མི་ཁྱབ་པ་བྱེད་པར་འདོད་ཅིང་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྤྱོད་ཡུལ་ཟབ་མོ་ཡོངས་སུ་ཤེས་པར་འདོད་པ་དེས། གཙུག་ལག་ཁང་ངམ། དགོན་པའི་ཕྱོགས་ཀྱང་རུང་སྟེ་གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་སྟོན་པའི་ས་ཕྱོགས་དེར་དེས་གདོན་མི་ཟ་བར་གཡེང་བ་མེད་པའི་སེམས་ཀྱིས་རྣ་བ་བླགས་ཏེ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བྱའོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་འཁོར་ལ་རྒྱ་ཆེར་བརྗོད་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ཞིག་སངས་རྒྱས་ཐམས་ཅད་ལ། །བསམ་ཡས་མཆོད་པ་བྱེད་འདོད་ཅིང ། ། སངས་རྒྱས་ཀུན་གྱི་སྤྱོད་ཡུལ་བ། །ཟབ་མོ་རབ་ཏུ་ཤེས་འདོད་པ། །གཙུག་ལག་ཁང་ངམ་གནས་ཁང་ངམ། །གང་ན་གསེར་འོད་དམ་པ་ཡི། །མདོ་སྡེའི་དམ་པ་འདི་སྟོན་པ། །ས་ཕྱོགས་དེར་ནི་འགྲོ་བར་བྱ། །མདོ་འདི་བསམ་གྱིས་མི་ཁྱབ་སྟེ། །ཡོན་ཏན་རྒྱ་མཚོ་མཐའ་ཡས་པས། །སྡུག་བསྔལ་རྒྱ་མཚོ་དུ་མ་ལས། །སེམས་ཅན་ཐམས་
370a
༄#། །ཅད་ཐར་བར་བྱེད། །མདོ་སྡེ་ཡི་ནི་ཐོག་མ་དང ། །དབུས་དང་དེ་བཞིན་མཐའ་མ་མཐོང ། །མདོ་སྡེ་དབང་པོ་རབ་ཟབ་སྟེ། །འདི་ལ་དཔེ་ནི་ཡོད་མ་ཡིན། །གང་གཱ་དང་ནི་ས་རྣམས་དང ། །རྒྱ་མཚོ་དང་ནི་ནམ་མཁའ་ལ། །གནས་པའི་རྡུལ་ནི་གང་ཡང་རུང ། །དཔེར་བྱ་བར་ནི་མི་ནུས་སོ། །ཆོས་ཀྱི་དབྱིངས་ལ་འཇུག་པ་ཡིས། །དེ་ཡི་ཚེ་ན་འཇུག་པར་བྱ། །ཆོས་ཀྱི་བདག་ཉིད་མཆོད་རྟེན་ནི། །ཟབ་མོར་རབ་བསྟན་གང་ཡིན་པ། །མཆོད་རྟེན་དེ་ཡི་དབུས་ན་ནི། །རྒྱལ་བ་ཤཱཀྱ་ཐུབ་པ་མཐོང ། ། ཡིད་དུ་འོང་བའི་དབྱངས་ཀྱིས་སུ། །མདོ་སྡེ་འདི་ནི་རབ་ཏུ་སྟོན། །གྲངས་མེད་བསམ་གྱིས་མི་ཁྱབ་པའི། །བསྐལ་པ་བྱེ་བ་ཇི་སྙེད་པར། །ལྷ་དག་དང་ནི་མི་རྣམས་ཀྱི། །བདེ་བ་དག་ནི་རྗེས་སུ་མྱོང ། །གང་ཞིག་མདོ་སྡེ་འདི་ཉན་པ། །དེ་ལྟར་བདག་གི་བསོད་ནམས་ཀྱི། །ཕུང་པོ་བསམ་ཡས་བསྒྲུབ་སྙམ་དུ། །དེ་ཚེ་དེས་ནི་དེ་ལྟར་ཤེས། །མེས་གང་འོབས་ཀྱིས་བསྐོར་བ་ཡིས། །དཔག་ཚད་བརྒྱ་དག་འདའ་བྱེད་ཅིང ། །ཚོར་བ་དྲག་པོ་བཟོད་བྱས་ནས། །མདོ་སྡེ་ཉན་པར་གང་ནུས་པ། །གཙུག་ལག་ཁང་ངམ་གནས་ཁང་དུ། །ཞུགས་ནས་དེ་མ་ཐག་ཏུ་ནི། །སྡིག་པ་རྣམས་ནི་མེད་པར་འགྱུར། །རྨི་ངན་མཚན་ཉིད་ཐམས་ཅད་དང ། །གཟའ་དང་རྒྱུ་སྐར་གནོད་
370b
པ་དང ། །བྱད་དང་གདོན་ནི་མི་བཟད་ཀྱང ། །ཞུགས་ནས་དེ་མ་ཐག་ཏུ་ནི། །ཐམས་ཅད་གཞན་དུ་ཕྱོགས་པར་འགྱུར། །ཀླུ་ཡི་རྒྱལ་པོ་རྣམས་ཀྱིས་ནི། །རྨི་ལམ་བསྟན་པ་ཅི་འདྲ་བ། །དེར་ནི་པདྨ་འདྲ་བའི་ཁྲི། །དེ་ལྟ་བུ་ཡང་བཤམས་པར་བྱ། །ཁྲི་དེ་ལ་ནི་འདུག་ནས་སུ། །མདོ་སྡེ་འདི་ནི་རབ་ཏུ་བསྟན། །ཡི་གེར་བྲིས་པ་བཀླག་པར་བྱ། ། དེ་བཞིན་ཡོངས་སུ་ཆུབ་པར་བྱ། །ཁྲི་དེ་ལ་ནི་བབས་ནས་སུ། །ཡུལ་གཞན་སོང་བར་གྱུར་ན་ཡང ། །ཁྲི་དེ་ལ་ནི་ཡོད་པ་ཡི། །ཆོ་འཕྲུལ་རྣམས་ཀྱང་སྣང་བར་འགྱུར། །ཆོས་སྨྲ་བ་ཡི་གཟུགས་སུ་ཡང ། །དེས་ན་རེས་འགའ་སྣང་བར་གྱུར། །རེས་འགའ་སངས་རྒྱས་གཟུགས་སུ་སྟེ། །རེས་འགའ་བྱང་ཆུབ་སེམས་དཔའ་ཡང ། །རེས་འགའ་ཀུན་ཏུ་བཟང་པོ་དང ། །དེ་བཞིན་འཇམ་དཔལ་གཟུགས་སུ་ཏེ། །རེས་འགའ་བྱམས་པའི་གཟུགས་སུ་ཡང ། །ཁྲི་དེ་ལ་ནི་སྣང་བར་འགྱུར། །རེས་འགའ་འོད་ནི་འབའ་ཞིག་སྣང། །རེས་དགའ་ལྷ་རྣམས་སྣང་བར་འགྱུར། །ཡུད་ཙམ་ཞིག་ནི་དེར་སྣང་ནས། །དེ་ནས་མི་སྣང་བར་ཡང་འགྱུར། །སངས་རྒྱས་མཐོང་ན་བསྔགས་པར་འགྱུར། །ཐམས་ཅད་དུ་ཡང་གྲུབ་པར་བྱེད། །དཔལ་ཡོན་བཀྲ་ཤིས་ཕུན་སུམ་ཚོགས། །མཚན་མ་སངས་རྒྱས་སྤྲུལ་པ་ཡིན། །རྒྱལ་དང་དཔལ་དང་གྲགས་པར་བྱེད། །ཕྱིར་རྒོལ་བ་ཡང་
371a
༄#། །ཟློག་པར་བྱེད། །ཕ་རོལ་དགྲ་ཚོགས་རབ་ཏུ་འཇོམས། །གཡུལ་དུ་དགྲ་རྣམས་ཕུང་བར་བྱེད། །རྨི་ངན་ཐམས་ཅད་ཞི་བར་བྱེད། །སྡིག་པ་ཐམས་ཅད་རབ་ཏུ་འཇིག་།སྡིག་པ་ཐམས་ཅད་རབ་ཞི་བྱེད། །གཡུལ་འགྱེད་པ་ན་རྒྱལ་བར་བྱེད། །ཛམྦུའི་གླིང་འདིར་ཐམས་ཅད་དུ། །གྲགས་པས་རབ་ཏུ་གང་བར་འགྱུར། །དེ་ཡི་དགྲ་རྣམས་ཐམས་ཅད་ནི། །ཤིན་ཏུ་ཕམ་པ་ཉིད་དུ་འགྱུར། །རྟག་ཏུ་དགྲ་ནི་ཆོམས་པར་འགྱུར། །སྡིག་པ་ཐམས་ཅད་རྣམ་པར་སྤངས། །གཡུལ་ངོའི་གདོང་ལས་རྣམ་པར་རྒྱལ། །དགྲ་དང་བྲལ་ཞིང་མཆོག་ཏུ་དགའ། །ཚངས་དབང་སུམ་ཅུ་རྩ་གསུམ་དབང ། །དེ་བཞིན་འཇིག་རྟེན་སྐྱོང་རྣམས་དང ། །ལག་ན་རྡོ་རྗེ་གནོད་སྦྱིན་དབང ། །རྒྱལ་བ་ཁྱུ་མཆོག་ཡང་དག་ཤེས། །ཀླུ་ཡི་རྒྱལ་པོ་མ་དྲོས་དང ། །དེ་བཞིན་དུ་ནི་རྒྱ་མཚོ་དང ། །མི་འམ་ཅི་དབང་ལྷ་མིན་དབང ། །དེ་བཞིན་ནམ་མཁའ་ལྡིང་དབང་པོས། །དེ་དག་ལ་ནི་སོགས་པ་དང ། །ལྷ་རྣམས་དེ་དག་ཐམས་ཅད་ཀྱང ། །ཆོས་ཀྱི་མཆོད་རྟེན་བསམ་ཡས་ལ། །རྟག་ཏུ་མཆོད་པ་བྱེད་པར་འགྱུར། །ཞེ་སར་བཅས་པའི་སེམས་ཅན་རྣམས། །མཐོང་ནས་ཤིན་ཏུ་དགའ་བར་འགྱུར། །ལྷ་ཡི་དབང་པོ་མཆོག་དེ་
371b
དག་།ཐམས་ཅད་འདི་སྙམ་སེམས་པར་འགྱུར། །ལྷ་རྣམས་དེ་དག་ཐམས་ཅད་ཀྱང ། །ཕན་ཚུན་དུ་ནི་སྨྲེ་བྱེད་པ། །བསོད་ནམས་དཔལ་དང་གཟི་བརྗིད་དག་།བསགས་པ་དེ་དག་ཀུན་ལ་བལྟོས། །གང་དག་མདོ་སྡེ་ཟབ་མོ་འདི། །ཉན་པའི་དོན་དུ་འདིར་ལྷགས་པ། །མི་དེ་དག་ནི་རབ་སྦྱངས་པའི། །དགེ་བའི་རྩ་བས་འདིར་ལྷགས་སོ། ། དད་པ་བསམ་གྱིས་མི་ཁྱབ་པས། །ཆོས་ཀྱི་མཆོད་རྟེན་གུས་དང་བཅས། །དེ་དག་འཇིག་རྟེན་སྙིང་རྗེར་ལྡན། །དེ་དག་སེམས་ཅན་ཕན་བྱེད་པས། །དེ་དག་ཟབ་མོའི་ཆོས་རྣམས་ཀྱི། །དམ་པའི་ཆོས་ཀྱི་རོ་ཡི་སྣོད། །ཆོས་ཀྱི་དབྱིངས་ལ་འཇུག་པ་ཡི། །དེ་དག་རབ་ཏུ་འཇུག་པ་ཡིན། །གང་དག་གསེར་འོད་དམ་པའི་མདོ། །དགེ་བ་དམ་པ་འདི་ཉན་པས། །དེ་དག་སྔོན་ཆད་སངས་རྒྱས་ནི། །བརྒྱ་སྟོང་རྣམས་ལ་མཆོད་པ་ཡིན། །དགེ་བའི་རྩ་བ་འདི་ཡིས་ནི། །མདོ་འདི་ཉན་པ་དེ་དག་ལ། །ལྷ་དབང་རྒྱལ་པོ་ཀུན་དང་ནི། །དབྱངས་ཅན་དང་ནི་དེ་བཞིན་དུ། །དཔལ་ལྡན་རྣམ་ཐོས་བུ་དང་ནི། །དེ་བཞིན་རྒྱལ་པོ་བཞི་རྣམས་དང ། །གནོད་སྦྱིན་བརྒྱ་ཕྲག་སྟོང་པོ་དག ། སྟོབས་ཆེན་རྫུ་འཕྲུལ་ལྡན་རྣམས་ཀྱིས། །ཕྱོགས་བཞི་དག་ནི་ཀུན་ནས་ཀྱང ། །སྲུང་བ་ཤིན་ཏུ་བྱེད་པར་འགྱུར། །དབང་པོ་ཟླ་བ་གཤིན་རྗེ་དང ། །རླུང་དང་ཆུ་ལྷ་
372a
༄#། །ཉིད་དང་ནི། །སྐེམ་བྱེད་འཇུག་སེལ་དབྱངས་ཅན་དང ། །བསྲེག་བྱ་ཟ་དང་སྐྱེ་དགུ་དང ། །སྟོབས་ཆེན་ཕ་རོལ་གནོན་བྱེད་པ། །འཇིག་རྟེན་སྐྱོང་བ་དེ་ཀུན་ཀྱང ། །ཉིན་མཚན་གཡེལ་བ་མེད་པར་ནི། །དེ་དག་རྣམས་ལ་སྲུང་བར་བྱེད། །སྟོབས་ཆེན་གནོད་སྦྱིན་དབང་གཉིས་དང ། །སྲེད་མེད་བུ་དང་དབང་ཕྱུག་ཆེ། །ཡང་དག་ཤེས་ལ་སོགས་པ་དག་།གཞན་ཡང་ཉི་ཤུ་རྩ་བརྒྱད་དང ། །གནོད་སྦྱིན་བརྒྱ་ཕྲག་སྟོང་པོ་དག་།སྟོབས་ཆེན་རྫུ་འཕྲུལ་ལྡན་རྣམས་ཀྱིས། །འཇིགས་ཤིང་སྐྲག་པ་ཐམས་ཅད་ལས། །དེ་དག་ལ་ནི་སྲུང་བར་བྱེད། །ལག་ན་རྡོ་རྗེ་གནོད་སྦྱིན་དབང ། །གནོད་སྦྱིན་དག་ནི་ལྔ་བརྒྱ་དང ། །བྱང་ཆུབ་སེམས་དཔའ་ཐམས་ཅད་ཀྱང ། །དེ་དག་ལ་ནི་སྲུང་བར་བྱེད། །གནོད་སྦྱིན་དབང་པོ་ནོར་བུ་བཟང ། །དེ་བཞིན་གང་བ་བཟང་པོ་དང ། །ཇི་འཇིགས་དང་ནི་འཕྲོག་\?\་གནས་དང ། །དམར་སེར་དང་ནི་སེར་སྐྱ་དང ། །གནོད་སྦྱིན་དབང་པོ་རེ་རེ་ཡང ། །གནོད་སྦྱིན་ལྔ་བརྒྱ་དག་གིས་ནི། །གང་དག་མདོ་སྡེ་འདི་ཐོས་པས། །དེ་དག་རྣམས་ལ་སྲུང་བྱེད་འགྱུར། །དྲི་ཟ་སྣ་ཚོགས་སྡེ་དང་ནི། །རྒྱལ་བ་ཁྱུ་མཆོག་རྒྱལ་བའི་རྒྱལ། །ནོར་བུའི་མགུལ་དང་ངེས་མགྲིན་དང ། །དེ་བཞིན་ཆར་པའི་བདག་
372b
བོ་དང ། །ཁམ་པོ་ཆེ་དང་ནག་པོ་དང ། །དེ་བཞིན་གསེར་འདྲའི་སྐྲ་དང་ནི། །ལྔས་རྩེན་དང་ནི་ར་རྐང་དང ། །དེ་བཞིན་སྐལ་བ་ཆེན་པོ་དང ། །ཡུར་བ་ཅན་དང་ཆོས་སྐྱོང་དང ། སྤྲེའུ་དང་དེ་བཞིན་འཁྲི་བྱེད་དང ། །ཁབ་ཀྱི་སྤུ་དང་གཉེན་བཤེས་དང ། །དེ་བཞིན་རིན་ཆེན་སྐྲ་དང་ནི། །ཡུལ་ཆེན་ཅན་དང་ཁྱིམ་མེད་དང ། །འདོད་པའི་མཆོག་དང་ཙནྡན་དང ། །མཐུ་བོ་ཆེ་དང་གངས་ཅན་དང ། །བདེ་བའི་རི་ཉིད་དེ་བཞིན་ཏེ། །སྟོབས་ཆེན་ཕ་རོལ་གནོན་བྱེད་པ། །རྫུ་འཕྲུལ་ལྡན་པ་དེ་ཀུན་ཀྱང ། །གང་དག་མདོ་སྡེ་འདི་དགའ་བ། །དེ་དག་ལ་ནི་སྲུང་བར་བྱེད། །ཀླུ་ཡི་དབང་པོ་མ་དྲོས་དང ། །དེ་བཞིན་དུ་ནི་རྒྱ་མཚོ་དང ། །ེ་ལའི་འདབ་དང་བཏང་བཟུང་དང ། །དགའ་བོ་ཉེ་དགའ་གཉི་ག་དང ། །ཀླུ་ནི་བརྒྱ་ཕྲག་སྟོང་པོ་དག་།སྟོབས་ཆེན་རྫུ་འཕྲུལ་ལྡན་པ་རྣམས། །འཇིགས་ཤིང་སྐྲག་པ་ཐམས་ཅད་ལས། །དེ་དག་ལ་ནི་སྲུང་བར་བྱེད། ། སྟོབས་ཆེན་སྒྲ་གཅན་མི་གཏོང་དང ། །ཐག་བཟངས་རིས་དང་བདེ་མཆོག་དང ། །རབ་སིམ་བྱེད་དང་ཕྲག་རྩུབ་དང ། །དེ་བཞིན་ལྷ་མིན་དབང་གཞན་དང ། །ལྷ་མིན་བརྒྱ་ཕྲག་སྟོང་པོ་དག་།སྟོབས་ཆེན་རྫུ་འཕྲུལ་ལྡན་རྣམས་ཀྱིས། །འཇིགས་སྐྲག་བྱུང་བར་གྱུར་པ་ལས། །དེ་དག་ལ་ནི་སྲུང་བར་འགྱུར། །འབྱུང་པོའི་མ་མོ་
373a
༄#། །འཕྲོག་མ་ནི། །ལྔ་བརྒྱའི་བུ་དང་བཅས་པ་ཡང ། །འདུག་དང་ཉལ་དང་ར་རོའི་ཚེ། །དེ་དག་ལ་ནི་སྲུང་བར་བྱེད། །གདོལ་པ་མོ་དང་གཏུམ་མོ་དང ། །དེ་བཞིན་གནོད་སྦྱིན་གཏུམ་མོ་དང ། །དུང་ཅན་དང་ནི་སོ་བརྩེགས་དང ། །སེམས་ཅན་ཀུན་གྱི་གཟི་འཕྲོག་མ། །སྟོབས་ཆེན་ཕ་རོལ་གནོན་བྱེད་པ། །རྫུ་འཕྲུལ་ལྡན་པ་དེ་ཀུན་ཀྱང ། །ཕྱོགས་བཞི་དག་ནི་ཀུན་ནས་སུ། །དེ་དག་རྣམས་ལ་སྲུང་བར་བྱེད། །དབྱངས་ཅན་དག་ལ་སོགས་པ་རྣམས། །ལྷ་མོ་བསམ་གྱིས་མི་ཁྱབ་དང ། །དཔལ་ལ་སོགས་པ་དེ་བཞིན་དུ། །ལྷ་མོ་དག་ནི་ཐམས་ཅད་དང ། །ས་ཡི་ལྷ་མོ་ཉིད་དང་ནི། །ལོ་ཐོག་འབྲས་བུ་ནགས་ལྷ་དང ། ། ཀུན་དགའ་ཤིང་ལྗོན་མཆོད་རྟེན་ལ། །གནས་པ་དག་དང་རླུང་ལྷ་དང ། །ལྷ་རྣམས་དེ་དག་ཐམས་ཅད་འདིར། །རབ་ཏུ་དགའ་བའི་སེམས་ཀྱིས་ནི། །གང་དག་མདོ་སྡེ་འདི་དགའ་བ། །དེ་དག་རྣམས་ལ་སྲུང་བར་བྱེད། །ཚེ་དང་མདོག་དང་སྟོབས་རྣམས་ལ། །སེམས་ཅན་རྣམས་ནི་སྦྱོར་བར་བྱེད། །དཔལ་དང་བསོད་ནམས་གཟི་བརྗིད་ཀྱི། །ཕུན་སུམ་ཚོགས་པས་རྟག་ཏུ་བརྒྱན། །གཟའ་དང་རྒྱུ་སྐར་གནོད་པ་དག་།དེ་དག་ཐམས་ཅད་ཞི་བར་བྱེད། །རྒུད་དང་སྡིག་དང་རྨི་ངན་པ། །
373b
དེ་དག་ཐམས་ཅད་ཞི་བར་བྱེད། །ཟབ་ཅིང་སྟོབས་ཆེན་ལྡན་པ་ཡི། །ས་ཡི་ལྷ་མོ་ཉིད་ཀྱང་ནི། །གསེར་གྱི་འོད་ཀྱི་དམ་པ་ཡི། །མདོ་སྡེའི་དབང་པོའི་རོ་ཡིས་ཚིམ། །དཔག་ཚད་དག་ནི་བརྒྱ་ཡི་ཕྲག་།སྟོང་ཕྲག་དྲུག་ཅུ་རྩ་བརྒྱད་ནས། །རྡོ་རྗེའི་གདན་ལ་ཐུག་བར་དུ། །ས་ཡི་བཅུད་ནི་རབ་ཏུ་འཕེལ། །དཔག་ཚད་བརྒྱར་ནི་ཚང་བ་ཡི། །འོག་ཏུ་ས་ཡི་བཅུད་སོང་སྟེ། །དེ་ནི་ཕྱིར་ཡང་ལོག་ནས་སུ། །ས་ཡི་སྟེང་དག་སྣུམ་པར་བྱེད། །མདོ་སྡེ་མཉན་པའི་སྟོབས་ཀྱིས་ནི། །ལྷ་རྣམས་དེ་དག་ཐམས་ཅད་ཀྱང ། །གསེར་གྱི་འོད་ནི་དམ་པ་ཡི། །མདོ་སྡེའི་དབང་པོའི་རོས་ཚིམ་འགྱུར། །གཟི་བྱིན་ལྡན་པར་རབ་འགྱུར་ཞིང ། །དེ་བཞིན་རབ་ཏུ་སྟོབས་ལྡན་འགྱུར། །བདེ་བར་འགྱུར་ཞིང་ཚིམ་པར་འགྱུར། །ཛམྦུའི་གླིང་འདི་ཐམས་ཅད་ན། །འབྲས་བུ་ལོ་ཐོག་ནགས་ལྷ་རྣམས། །སྣ་ཚོགས་རོ་ཡིས་ཚིམ་འགྱུར་ཞིང ། ། ཤིན་ཏུ་རབ་ཏུ་དགའ་བར་འགྱུར། །མདོ་འདིའི་རོ་ཡིས་ཚིམ་གྱུར་ནས། །འབྲས་བུ་རྣམས་དང་ལོ་ཐོག་དང ། །མེ་ཏོག་རྣམ་པ་སྣ་ཚོགས་དང ། །འབྲས་བུ་ཤིང་ལྗོན་སྣ་ཚོགས་ཀྱང ། །ཀུན་ནས་རབ་ཏུ་སྐྱེ་བར་བྱེད། །འབྲས་བུ་ཤིང་ལྗོན་ཐམས་ཅད་ཀྱང ། །ཀུན་དགའ་དག་དང་ནགས་ཚལ་རྣམས། །མེ་ཏོག་རབ་ཏུ་འཆག་བྱེད་ཅིང ། །
374a
༄#། །སྣ་ཚོགས་དྲི་ནི་རབ་ཏུ་འབྱིན། །མེ་ཏོག་རྣམ་པ་སྣ་ཚོགས་དང ། །འབྲས་བུ་སྣ་ཚོགས་ལྡན་པ་ཡི། །རྩཝ་དང་ནགས་ཚལ་ཐམས་ཅད་དག་།ས་ཡི་སྟེང་ན་སྐྱེ་བར་བྱེད། །ཛམྦུའི་གླིང་འདི་ཐམས་ཅད་ན། །ཀླུ་ཡི་བུ་མོ་བསམ་མི་ཁྱབ། །རབ་ཏུ་དགའ་བའི་སེམས་གྱུར་ནས། །རྫིང་བུའི་དྲུང་དུ་ཉེར་སོང་སྟེ། །རྫིང་བུ་རྣམས་ནི་ཐམས་ཅད་དུ། །ཀུ་མུ་ད་དང་པདྨ་དང ། །ུཏྤ་ལ་དང་དེ་བཞིན་དུ། །པདྨ་དཀར་པོ་སྣ་ཚོགས་སྐྱེ། །ནམ་མཁའ་ལ་ནི་དུ་བ་དང ། །སྤྲིན་གྱི་དྲ་བ་མེད་ཅིང་དག་།མུན་པ་དང་ནི་རྡུལ་མེད་ཅིང ། །ཕྱོགས་རྣམས་རབ་ཏུ་འོད་གསལ་ལོ། །ཉི་མ་འོད་ཟེར་སྟོང་ལྡན་ཡང ། །འོད་ཟེར་དྲ་བས་འོད་ཀྱང་འགྱེད། །སྣང་བ་དག་ནི་ཟབ་མོ་ཡིས། །རབ་ཏུ་དགའ་བ་འཆར་བར་འགྱུར། །དབང་པོ་ཉི་མ་ལྷ་ཡི་བུ། །ཛམྦུའི་གླིང་གི་གསེར་གྱི་ནི། །གཞལ་མེད་ཁང་ན་འདུག་པ་ཡང ། །མདོ་སྡེ་འདིས་ནི་རབ་ཏུ་ཚིམ། །དབང་པོ་ཉི་མ་རབ་དགའ་ནས། །ཛམྦུའི་གླིང་དུ་འཆར་བྱེད་ཅིང ། །འོད་ཟེར་མཐའ་ཡས་དྲ་བ་ཡིས། །ཀུན་ནས་རབ་ཏུ་སྣང་བར་བྱེད། །དེ་ནི་ཤར་བ་ཙམ་གྱིས་ཀྱང ། །འོད་ཟེར་དྲ་བ་རབ་གཏོང་ཞིང ། །རྫིང་བུ་སྣ་ཚོགས་ཁེངས་པ་ཡི། །པདྨ་དག་ནི་ཁ་ཡང་འབྱེད། །ཛམྦུའི་གླིང་ནི་ཐམས་
374b
ཅད་དུ། །ལོ་ཐོག་འབྲས་བུ་སྨན་སྣ་ཚོགས། །ཡང་དག་ཡོངས་སུ་སྨིན་བྱེད་ཅིང ། །ས་རྣམས་ཐམས་ཅད་སིམ་པར་བྱེད། །ཟླ་བ་དང་ནི་ཉི་མ་ཡང ། །དེ་ཚེ་ཁྱད་འཕགས་སྣང་བར་འགྱུར། །རྒྱུ་སྐར་ཡང་དག་འབྱུང་འགྱུར་ཞིང ། །རླུང་ཡང་དེ་བཞིན་ལྡན་བར་འགྱུར། །ཛམྦུའི་གླིང་ནི་ཐམས་ཅད་དུ། །ཀུན་ཏུ་ལོ་ཡང་ལེགས་འགྱུར་ཏེ། །གང་ན་མདོ་སྡེ་འདི་ཡོད་པ། །ཡུལ་འཁོར་དེ་ནི་ཁྱད་པར་འཕགས། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། གནོད་སྦྱིན་གྱི་གནས་ཞེས་བྱ་བ་ཀུན་ཏུ་སྲུང་བའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་རིགས་ཀྱི་ལྷ་མོ་བྱང་ཆུབ་ཡང་དག་པར་སྡུད་པས། འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འབར་བའི་ཁྱད་པར་གྱི་གཟི་བརྗིད་ཀྱི་རྒྱལ་པོ་ལ་སོགས་པ་ལྷའི་བུ་ཁྲི་པོ་དག་རྒྱུ་གང་དང ། རྐྱེན་གང་དང ། དགེ་བའི་རྩ་བ་སྦྱངས་པ་ཅི་འདྲ་བ་དང ། གང་བགྱིས་ཤིང་བསགས་པས་སྐྱེས་བུ་དམ་པ་གསུམ་པོ་འདི་དག་བྱང་ཆུབ་ཏུ་ལུང་བསྟན་པ་ཐོས་ནས་ད་ལྟར་སུམ་ཅུ་རྩ་གསུམ་གྱི་གནས་ནས་ལྷགས་ཏེ་བཅོམ་ལྡན་འདས་ལ་ཆོས་ཉན་པའི་སླད་དུ་མཆིས་ཏེ། འདི་ལྟ་སྟེ། བྱང་ཆུབ་སེམས་དཔའ་མཛེས་པའི་ཏོག་སྐྱེས་བུ་དམ་པ་འདི་མ་འོངས་པའི་
375a
༄#། །དུས་ན་བསྐལ་པ་བགྲང་བ་ལས་འདས་པ། གྲངས་མ་མཆིས་པ། བྱེ་བ་ཁྲག་ཁྲིག་འབུམ་ཕྲག་དུ་མ་འདས་པ་ན་འཇིག་རྟེན་གྱི་ཁམས་གསེར་དུ་སྣང་བ་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་སྟེ། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང།་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་དང ། རིན་པོ་ཆེའི་འབྱུང་གནས་གདུགས་བརྩེགས་ཞེས་བྱ་བ་འཇིག་རྟེན་དུ་འབྱུང་ངོ ། །ཇི་ཙམ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་དང ། རིན་པོ་ཆེའི་འབྱུང་གནས་གདུགས་བརྩེགས་དེ་ཡོངས་སུ་མྱ་ངན་ལས་འདས་ནས་དམ་པའི་ཆོས་ནུབ་སྟེ་དེའི་བསྟན་པ་ཡོང་ཡེ་ཐམས་ཅད་དུ་ནུབ་པར་གྱུར་པ་ན། ཁྱེའུ་དངུལ་གྱི་ཏོག་འདི་དེ་བཞིན་གཤེགས་པ་དེའི་མཚམས་སྦྱོར་ཞིང་འཇིག་རྟེན་གྱི་ཁམས་རྡུལ་མེད་པའི་རྒྱལ་མཚན་དེ་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
375b
གསེར་ཛམྦུའི་གསེར་གྱི་རྒྱལ་མཚན་གྱི་འོད་ཅེས་བྱ་བ་འཇིག་རྟེན་དུ་འབྱུང་ངོ ། །ཇི་ཙམ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་ཛམྦུའི་གསེར་གྱི་རྒྱལ་མཚན་གྱི་འོད་དེ་ཡོངས་སུ་མྱ་ངན་ལས་འདས་ནས་དེའི་བསྟན་པ་ཡོང་ཡེ་ཐམས་ཅད་དུ་ནུབ་པའི་བར་དུ་གྱུར་པ་ན། ཁྱེའུ་དངུལ་གྱི་འོད་དེ་བཞིན་གཤེགས་པ་དེའི་མཚམས་སྦྱོར་ཞིང་འཇིག་རྟེན་གྱི་ཁམས་རྡུལ་དང་བྲལ་བའི་རྒྱལ་མཚན་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་བརྒྱའི་འོད་ཟེར་དུ་སྣང་བའི་སྙིང་པོ་ཞེས་བྱ་བ་འཇིག་རྟེན་དུ་འབྱུང་ངོ་ཞེས་དེ་དག་ཐམས་ཅད་བཅོམ་ལྡན་འདས་ཀྱིས་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བཅོམ་ལྡན་འདས་ལ་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འབར་བའི་ཁྱད་པར་གྱི་གཟི་
376a
༄#། །བརྗིད་ཀྱི་རྒྱལ་པོ་ལ་སོགས་པ་ལྷའི་བུ་ཁྲི་བོ་དེ་དག་ནི་དེ་ཙམ་དུ་བྱང་ཆུབ་སེམས་དཔའི་སྤྱོད་པ་རླབས་པོ་ཆེར་ཡང་མ་གྱུར། སྔོན་ཕ་རོལ་ཏུ་ཕྱིན་པ་དྲུག་པོ་དག་ལ་སྤྱད་སྐད་ཀྱང་མི་གདའ། རྐང་པ་དང ། མིག་དང ། ལག་པ་དང ། ཡན་ལག་གི་དམ་པ་མགོ་དང ། བུ་དང ། ཆུང་མ་དང ། བུ་མོ་ཕངས་པ་དག་སྔོན་ཡོངས་སུ་བཏང་སྐད་ཀྱང་མི་གདའ། ནོར་དང ། འབྲུ་དང ། འགྲོན་བུ་དང ། གསེར་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱུ་རུ་དང ། དངུལ་དང ། ས་ལེ་སྦྲམ་དང ། རིན་པོ་ཆེ་རྣམས་སྔོན་ཡོངས་སུ་བཏང་སྐད་ཀྱང་མི་གདའ། བཟའ་བ་དང ། བཏུང་བ་དང ། བཞོན་པ་དང ། གོས་དང ། མལ་ཆ་དང ། སྟན་དང ། ཁང་ཁྱིམ་དང ། གཞལ་མེད་ཁང་དང ། ཀུན་དགའ་ར་བ་དང ། རྫིང་བུ་དང ། ལྟེང་ཀ་དག་སྔོན་ཡོངས་སུ་བཏང་སྐད་ཀྱང་མི་གདའ། གླང་པོ་ཆེ་དང ། བ་ལང་དང ། རྟ་ཕོ་རྒོད་དང ། བྲན་ཕོ་དང ། བྲན་མོ་སྣ་ཚོགས་སྔོན་ཡོངས་སུ་བཏང་སྐད་ཀྱང་མི་གདའ། འདི་ལྟ་སྟེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་གྲངས་མ་མཆིས་པ་དུ་མ་དེ་དག་ནི་སངས་རྒྱས་བཅོམ་ལྡན་འདས་རྣམས་ལས་དེ་བཞིན་གཤེགས་པའི་མིང་དུ་ལུང་བསྟན་པ་མ་
376b
ཐོབ་ཀྱི་བར་དུ་སྔོན་བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མ་མཆིས་པ་དུ་མ་ནས་དེ་དག་ནི་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་གྲངས་མ་མཆིས་པ་དུ་མ་དག་ལ་མཆོད་པ་སྣ་ཚོགས་ཐ་དད་པ་འབུམ་ཕྲག་བསམ་གྱིས་མི་ཁྱབ་པ་དུ་མ་དག་དང ། ཡོ་བྱད་ཐམས་ཅད་ཀྱིས་མཆོད་པར་བགྱིས། ཡོངས་སུ་གཏང་བར་བགྱི་བའི་དངོས་པོ་ཐམས་ཅད་ཀྱང་ཡོངས་སུ་བཏང ། ལག་པ་དང ། རྐང་པ་དང ། མིག་དང ། ཡན་ལག་གི་དམ་པ་མགོ་དང ། བུ་དང ། ཆུང་མ་དང ། བུ་མོ་ཕངས་པ་ཡོངས་སུ་གཏང་བར་བགྱི་བ་རྣམས་ཀྱང་ཡོངས་སུ་བཏང ། ནོར་དང ། འབྲུ་དང ། འགྲོན་བུ་དང ། གསེར་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང།་བྱུ་རུ་དང ། དངུལ་དང ། ས་ལེ་སྦྲམ་རྣམས་ཡོངས་སུ་གཏང་བར་བགྱི་བ་རྣམས་ཀྱང་ཡོངས་སུ་བཏང ། བཟའ་བ་དང ། བཏུང་བ་དང ། བཞོན་པ་དང ། གོས་དང ། མལ་ཆ་དང ། སྟན་དང ། ཁང་ཁྱིམ་དང ། གཞལ་མེད་ཁང་དང ། ཀུན་དགའ་ར་བ་དང ། སྐྱེད་མོས་ཚལ་དང ། རྫིང་བུ་དང ། ལྟེང་ཀ་དང ། གླང་པོ་ཆེ་དང ། བ་ལང་དང ། རྟ་ཕོ་རྒོད་དང ། བྲན་ཕོ་དང ། བྲན་མོ་ཡོངས་སུ་གཏང་བར་བགྱི་བ་རྣམས་ཀྱང་ཡོངས་སུ་བཏང་ཞིང་རིམ་གྱིས་ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཡོངས་སུ་རྫོགས་པར་
377a
༄#། །བགྱིད། རིམ་གྱིས་ཕ་རོལ་ཏུ་ཕྱིན་པ་དྲུག་པོ་དག་རྫོགས་པར་བགྱིས་ནས་བདེ་བ་འབུམ་ཕྲག་མང་པོའང་འབྱོར་པར་འགྱུར་ན། བཙུན་པ་བཅོམ་ལྡན་འདས། རྒྱུ་གང་དང ། རྐྱེན་གང་དང ། དགེ་བའི་རྩ་བ་སྦྱངས་པ་ཅི་འདྲ་བ་ཞིག་གིས་འབར་བའི་ཁྱད་པར་གྱི་གཟི་བརྗིད་ཀྱི་རྒྱལ་པོ་ལ་སོགས་པ་ལྷའི་བུ་ཁྲི་པོ་འདི་དག་བཅོམ་ལྡན་འདས་ལ་ཆོས་ཉན་པའི་སླད་དུ་མཆིས་པ་འདི་དག་བཅོམ་ལྡན་འདས་ཀྱིས་འདི་ལྟར་མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་དུ་མ་ན་འཇིག་རྟེན་གྱི་ཁམས་སཱ་ལའི་དབང་པོ་མཐོང་པོའི་རྒྱལ་མཚན་དང་ལྡན་པ་ཞེས་བྱ་བ་དེ་ཉིད་དུ་རིགས་དང ། རུས་གཅིག་པ་དང ། མིང་གཅིག་ཏུ་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཏེ་རབ་ཏུ་དང་བའི་ཞལ་ཨུཏྤ་ལའི་དྲི་བརྩེགས་པ་ཞེས་བྱ་བ་སངས་རྒྱས་ཁྲི་འཇིག་རྟེན་དུ་འབྱུང་སྟེ། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ་ཞེས་ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ལགས། དེ་སྐད་ཅེས་
377b
གསོལ་པ་དང ། བཅོམ་ལྡན་འདས་ཀྱིས་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ། འབར་བའི་ཁྱད་པར་གྱི་གཟི་བརྗིད་ཀྱི་རྒྱལ་པོ་ལ་སོགས་པ་ལྷའི་བུ་ཁྲི་པོ་འདི་དག་གང་བྱས་ཤིང་བསགས་བས་ཆོས་མཉན་པའི་ཕྱིར་ད་ལྟར་སུམ་ཅུ་རྩ་གསུམ་གྱི་གནས་ནས་འདིར་ལྷགས་པ་དེའི་དགེ་བའི་རྩ་བ་སྦྱངས་པ་ཡོད། དེའི་རྒྱུ་ཡོད། དེའི་བྱེད་རྒྱུ་ཡོད་དེ། རིགས་ཀྱི་ལྷ་མོ། སྐྱེས་བུ་དམ་པ་འདི་གསུམ་གྱིས་བྱང་ཆུབ་ཏུ་ལུང་བསྟན་པ་འདི་ཐོས་ནས་ཐོས་མ་ཐག་ཏུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཤིན་ཏུ་རི་མོར་བྱེད་ཅིང་དགའ་བ་དང ། དང་བ་ཐོབ་པར་གྱུར་ཏོ། །དེ་ཙམ་དུ་བཻ་ཌཱུརྱ་དྲི་མ་མེད་པ་ལྟར་ཡོངས་སུ་དག་པའི་སེམས་དང་ལྡན་པར་གྱུར་ཏོ། །དྲི་མ་མེད་ལ་ཤིན་ཏུ་རྒྱ་ཆེ་ཞིང་རྒྱས་པའི་ནམ་མཁའ་ལྟར་ཟབ་པའི་སེམས་རབ་ཏུ་དྭང་བ་དང་ལྡན་པར་གྱུར་ཏོ། །བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་བཟུང་བ་དང་ལྡན་པར་གྱུར་ཏོ། །རིགས་ཀྱི་ལྷ་མོ། འབར་བའི་ཁྱད་པར་གྱི་གཟི་བརྗིད་ཀྱི་རྒྱལ་པོ་ལ་སོགས་པ་ལྷའི་བུ་ཁྲི་པོ་འདི་དག་དེ་ཙམ་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་མ་ཐག་ཏུ་ལྷག་པར་རི་མོར་བྱེད་པ་དང ། རབ་ཏུ་དྭང་བ་ཐོབ་པར་གྱུར་ཏོ། །དེ་ཙམ་དུ་བཻ་ཌཱུརྱ་དྲི་མ་མེད་པ་ལྟར་
378a
༄#། །ཡོངས་སུ་དག་པའི་སེམས་དང་ལྡན་པར་གྱུར་ཏེ་དེའི་ཕྱིར་ལུང་བསྟན་པས་རྗེས་སུ་སྟོན་ཏོ། །རིགས་ཀྱི་ལྷ་མོ། ཆོས་མཉན་པའི་དགེ་བའི་རྩ་བ་བསགས་པ་འདི་དང ། སྔོན་གྱི་སྨོན་ལམ་གྱི་སྟོབས་ཀྱིས་འབར་བའི་ཁྱད་པར་གྱི་གཟི་བརྗིད་ཀྱི་རྒྱལ་པོ་ལ་སོགས་པ་ལྷའི་བུ་ཁྲི་པོ་འདི་དག་།ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལྷའི་བུ་སྟོང་ཕྲག་བཅུ་ལུང་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །།རིགས་ཀྱི་ལྷ་མོ། སྔོན་གྱི་སྨོན་ལམ་དེ་དག་གང་ཞེ་ན། རིགས་ཀྱི་ལྷ་མོ། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཆེས་གྲངས་མེད་པ། རྒྱས་པ། བསམ་གྱིས་མི་ཁྱབ་པ། ཚད་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་ངོ ། །རིགས་ཀྱི་ལྷ་མོ། དེའི་ཚེ་དེའི་དུས་ན་དེ་བཞིན་གཤེགས་པ་དགྲ་
378b
ཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དེ་ཡོངས་སུ་མྱ་ངན་ལས་འདས་ནས་དམ་པའི་ཆོས་ནུབ་པར་གྱུར་ཏེ་དམ་པའི་ཆོས་ལྟར་བཅོས་པར་གྱུར་པ་ན་རྒྱལ་པོ་ལྷའི་དབང་ཕྱུག་འོད་ཅེས་བྱ་བ། ཆོས་ཅན་ཆོས་ཀྱི་རྒྱལ་པོ། ཆོས་ཀྱིས་རྒྱལ་སྲིད་སྐྱོང་གི་།ཆོས་མ་ཡིན་པས་མ་ཡིན་ཏེ་ཡུལ་ཐམས་ཅད་ན་གནས་པའི་སེམས་ཅན་རྣམས་ཀྱི་ཕ་མར་གྱུར་པ་ལྟ་བུ་ཞིག་བྱུང་ངོ ། །རིགས་ཀྱི་ལྷ་མོ། དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་དུ་ཚོང་དཔོན་རལ་པ་འཛིན་ཅེས་བྱ་བ། སྨན་པ་གསོ་བར་བྱེད་པ་ཁམས་ལ་མཆོག་ཏུ་མཁས་པ། ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་ཞིག་བྱུང་བར་གྱུར་ཏོ། །ཀྱེ་རིགས་ཀྱི་ལྷ་མོ། དེའི་ཚེ་དེའི་དུས་ན་ཚོང་དཔོན་རལ་པ་འཛིན་ཅེས་བྱ་བ་དེའི་ཚོང་དཔོན་གྱི་བུ་ཆུ་འབེབས་ཞེས་བྱ་བ། གཟུགས་བཟང་བ། མཛེས་པ། ལྟ་ན་སྡུག་པ། ཁ་དོག་བཟང་པོ། རྒྱས་པ། མཆོག་དང་ལྡན་པ། བསྟན་བཅོས་སྣ་ཚོགས་ལ་མཁས་པ། བསྟན་བཅོས་ཐམས་ཅད་རྟོགས་པར་ཁོང་དུ་ཆུད་པ། ཡི་གེ་དང ། གྲངས་དང ། ལག་རྩིས་དང ། རྩིས་རྣམས་ཤིན་ཏུ་བསླབས་པར་གྱུར་པ་ཞིག་བྱུང་ངོ ། །རིགས་ཀྱི་ལྷ་མོ། དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་དེའི་ཡུལ་དེ་ན་སེམས་ཅན་འབུམ་ཕྲག་དུ་མ་ནད་སྣ་ཚོགས་ཀྱིས་བཏབ་པར་གྱུར་ཅིང ། ནད་སྣ་ཚོགས་ཀྱིས་ཡོངས་སུ་གཟིར་ཏེ་སྡུག་བསྔལ་མི་
379a
༄#། །བཟད་པ། རྩུབ་པ། དྲག་པོ་ཡིད་དུ་མི་འོང་བའི་ཚོར་བ་རྣམས་མྱོང་བར་གྱུར་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས་དེ་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་འབུམ་ཕྲག་དུ་མ་དེ་དག་གི་དོན་གྱི་ཕྱིར་སྙིང་རྗེ་ཆེན་པོ་སེམས་སྐྱེས་པར་གྱུར་ཏོ།། སེམས་ཅན་འབུམ་ཕྲག་དུ་མ་དེ་དག་ནི་ནང་སྣ་ཚོགས་ཀྱིས་བཏབ་ཅིང་ནད་སྣ་ཚོགས་ཀྱིས་ཡོངས་སུ་གཟིར་ཏེ་དེ་ལྟར་སྡུག་བསྔལ་མི་བཟད་པ། རྩུབ་པ། དྲག་པོ་ཡིད་དུ་མི་འོང་བའི་ཚོར་བ་རྣམས་མྱོང་ལ། བདག་གི་ཕ་ཚོང་དཔོན་རལ་པ་འཛིན་སྨན་པ་གསོ་བར་བྱེད་པ། ཁམས་ལ་མཆོག་ཏུ་མཁས་པ། ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་འདི་ནི་རྒས། འཁོགས། གཏུགས། ལམ་དུ་ཞུགས། ན་ཚོད་རྗེས་སུ་ཐོབ། འཁར་བ་ལ་བརྟེན་ཅིང་འདར་ཏེ་གྲོང་དང ། གྲོང་ཁྱེར་དང ། གྲོང་རྡལ་དང།་ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་རྣམས་སུ་འགྲོ་བར་མི་ནུས་ན་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ།་འབུམ་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་བར་བྱ་བའི་ཕྱིར་བདག་ཉིད་བདག་གི་ཕ་རལ་པ་འཛིན་གྱི་ནང་དུ་སོང་ལ། ནད་ཀྱི་ཕྱིར་ཁམས་
379b
ལ་མཁས་པར་བྱ་བ་ཡོངས་སུ་དྲིས་ཏེ་ཁམས་ལ་མཁས་པར་བྱ་བ་དྲིས་པ་དེས་བདག་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་རྣམས་སུ་འགྲོ་བར་བྱའོ། །སོང་ནས་ཀྱང་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དག་ནད་སྣ་ཚོགས་ལས་ཡོངས་སུ་ཐར་བར་བྱའོ་སྙམ་ནས་རིགས་ཀྱི་ལྷ་མོ། དེའི་ཚེ་དེའི་དུས་ན་ཚོགས་དཔོན་གྱི་བུ་ཆུ་འབེབས་རང་གི་ཕ་རལ་པ་འཛིན་གལ་བ་དེར་སོང་སྟེ་ཕྱིན་ནས་རང་གི་ཕ་རལ་པ་འཛིན་གྱི་རྐང་པ་ལ་མགོ་བོས་ཕྱག་བཙལ་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ཀྱང་ཚོང་དཔོན་གྱི་བུ་ཆུ་འབེབས་ཀྱིས་རང་གི་ཕ་རལ་པ་འཛིན་ལ་ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་དྲིས་པ། ཇི་ལྟར་དབང་པོ་འཇིག་འགྱུར་ཞིང ། །ཁམས་རྣམས་ཀྱང་ནི་ཡོངས་སུ་འགྱུར། །གང་གི་དུས་ན་ལུས་ཅན་ལ། །ནད་ཀྱི་རིགས་རྣམས་འབྱུང་བར་འགྱུར། །དུས་དང་དུས་མིན་ཟས་ཟོས་པ། །ཇི་ལྟ་བུར་ནི་བདེ་བར་འགྱུར། །རང་གི་ལུས་ཀྱི་ནང་དུ་ནི། །ལུས་ཀྱི་མི་ལ་གནོད་མི་འགྱུར། །རླུང་ལས་གྱུར་དང་མཁྲིས་གྱུར་དང ། །འདུས་ལས་གྱུར་དང་བད་ཀན་གྱུར། །ནད་རྣམས་ཞི་བར་བགྱི་སླད་དུ། །ཇི་ལྟ་བུར་ནི་གསོ་
380a
༄#། །པར་བགྱི། །གང་གིས་མི་ལ་གནོད་གྱུར་པས། །རླུང་ནི་གང་གི་དུས་ན་གཡོ། །གང་གི་དུས་ན་མཁྲིས་པ་གཡོ། །བད་ཀན་གང་གིས་དུས་ན་གཡོ།། དེ་ནས་ཚོང་དཔོན་རལ་པ་འཛིན་གྱིས་ཚོང་དཔོན་གྱི་བུ་ཆུ་འབེབས་ལ་ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་རྣམ་པར་བསྟན་ཏོ། །ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། །གསུམ་ནི་དགུན་ཏེ་གསུམ་ནི་དཔྱིད་ཡིན་ནོ། །དེ་ལྟར་ཟླ་བའི་གོ་རིམས་དུས་ནི་དྲུག་།ལོ་གཅིག་ལ་ནི་ཟླ་བ་བཅུ་གཉིས་འདོད། །གསུམ་གསུམ་དུ་ནི་ཚིགས་རྣམས་སྡུད་པར་ཤེས། །ཟླ་བ་གཉིས་གཉིས་ཤིང་ནི་དུས་སུ་བསྟན། །ཟས་དང་སྐོམ་ནི་དེ་ལྟར་འཇུག་པར་འགྱུར། །སྨན་པ་དང་ནི་ཁམས་དང་དུས་ཀྱང་བསྟན། །དབང་པོ་དང་ནི་ཁམས་རྣམས་དེ་དག་ཀྱང ། །ལོ་གཅིག་ནང་གི་ཚིགས་ཚིགས་ཡོངས་སུ་འགྱུར། །དབང་པོ་དག་ནི་ཡོངས་སུ་འགྱུར་བ་ན། །ལུས་ཅན་རྣམས་ལ་སྣ་ཚོགས་ནད་ཀྱང་འབྱུང ། །དེ་ཉིད་ལ་ནི་སྨན་པས་ཟླ་གསུམ་བཞི། །ཚིགས་ཀྱི་བར་དང་དུས་དྲུག་རྣམས་དང་ནི། །ཁམས་དྲུག་མཁས་པར་བྱ་བ་ཤེས་པར་བྱ། །ཟས་སྐོམ་སྨན་རྣམས་གོ་རིམས་ཇི་བཞིན་ཏེ། །རླུང་གི་ཤས་ཆེའི་ནད་ནི་དབྱར་ན་ལྡང ། །སྟོན་དུ་གྱུར་པ་ན་ནི་མཁྲིས་པ་གཡོ། །དགུན་གྱི་དུས་
380b
སུ་དེ་བཞིན་འདུས་པ་སྟེ། །བད་ཀན་ཤས་ཆེའི་ནད་ནི་དཔྱིད་ལྡང་ངོ ། །དབྱར་ནི་སྣུམ་དྲོ་ལན་ཚཝ་སྐྱུར་བའི་རོ། །སྟོན་ནི་མངར་དང་སྣུམ་དང་བསིལ་བག་གོ་།དགུན་ནི་མངར་དང་སྐྱུར་དང་སྣུམ་པ་སྟེ། །དབྱིད་ཀྱི་དུས་ན་རྩུ་བ་རོ་ཚ་བ་འོ། །བད་ཀན་ཆེ་བ་ཟོས་མ་ཐག་ཏུ་ལྡང ། །མཁྲིས་པ་ཆེ་བ་འཇུ་བའི་དུས་ན་ལྡང ། །རླུང་ཤས་ཆེ་བ་ཞུ་མ་ཐག་ཏུ་ལྡང ། །ཁམས་གསུམ་གཡོ་བ་དེ་ནི་དེ་ལྟ་འོ། །རླུང་གི་བདག་ཉིད་ལ་ནི་བཅུད་ཀྱིས་གསོ། །བཀྲུ་སྨན་གྱིས་ནི་མཁྲིས་པ་བསལ་བར་བྱ། །འདུས་པ་ལ་ནི་གསུམ་དང་མཐུན་ལྡན་པ། །བད་ཀན་ཚིགས་སུ་བབ་ན་སྐྱུགས་སྨན་གཏང ། །རླུང་ཤས་ཆེ་དང་མཁྲིས་དང་འདུས་པ་དང ། །བད་ཀན་ཤས་ཆེའི་ཚིགས་རྣམས་ཤེས་པར་བྱ། །དུས་གང་ཁམས་གང་ལུས་ནི་གང་ཡིན་པ། །དེ་ཡི་སྨན་དང་བཟའ་བཏུང་བསྟེན་པར་བྱ། །དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཁམས་ལ་མཁས་པར་བྱ་བ་འདི་ལྟ་བུ་དེ་ཙམ་ཞིག་ཡོངས་སུ་དྲིས་བ་དེས་ཚེའི་རིག་བྱེད་ཀྱི་ཡན་ལག་བརྒྱད་པོ་ཐམས་ཅད་ཁོང་དུ་ཆུད་པར་གྱུར་ཏོ། །རིགས་ཀྱི་ལྷ་མོ། དེའི་ཚེ་\?\་དེའི་དུས་ན་ཚོང་དཔོན་གྱི་བུ་ཆུ་འབེབས་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་གྲོང་དང།་གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ཐམས་ཅད་དུ་སོང་ནས་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་
381a
༄#། །གཟིར་བ་འབུམ་ཕྲག་དུ་མ་དེ་དག་ལ་ཁོ་བོ་ནི་སྨན་པའོ། །ཁོ་བོ་ནི་སྨན་པའོ་ཞེས་བདག་ཉིད་ཀྱིས་ཁས་འཆེས་ཏེ་ཁོ་བོས་ཁྱེད་རྣམས་ནད་སྣ་ཚོགས་ལས་ཡོངས་སུ་ཐར་བར་བྱའོ་ཞེས་དབུགས་ཕྱུང་ངོ ། །རིགས་ཀྱི་ལྷ་མོ། ཚོང་དཔོན་གྱི་བུ་ཆུ་འབེབས་ཀྱིས་འདི་ལྟ་བུའི་ཚིག་བརྗོད་པ་དེ་ཐོས་མ་ཐག་ཏུ་སྲོག་ཆགས་འབུམ་ཕྲག་དུ་མ་དེ་དག་ཐམས་ཅད་རབ་ཏུ་དགའ་བ་ཆེན་པོ་སྐྱེས་པར་གྱུར་ཏོ། །དབུགས་ཕྱིན་པ་རྙེད་ནས་ཀྱང་དགའ་བ་དང ། བདེ་བ་དང ། ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་འབུམ་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་ཏེ་ནད་མེད་པར་གྱུར་ཏོ། །ནད་མེད་པར་གྱུར་ནས་ཀྱང་སྔ་མཁོ་བཞིན་དུ་མཐུ་དང ། སྟོབས་དང ། བརྩོན་འགྲུས་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ་ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དེ་དག་གི་ནང་ནས་གང་སུ་དག་ནད་དྲག་པོས་བཏབ་པ་དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ག་ལ་བ་དེར་དོང་ནས་
381b
ཕྱིན་པ་དང ། སེམས་ཅན་ནད་སྣ་ཚོགས་ཀྱི་བཏབ་པ། ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དེ་དག་ལ་ཚོང་དཔོན་གྱི་བུ་ཆུ་འབེབས་ཀྱིས་སྨན་དཔྱད་གང་ཅི་བསྟན་པ་དེས་སེམས་ཅན་དེ་དག་ཐམས་ཅད་ཀྱི་ནད་ཐམས་ཅད་རབ་ཏུ་ཞི་བར་བྱས་སོ། །ནད་མེད་པ་དང ། ནད་ཉུང་བར་གྱུར་ནས་ཀྱང་སྔ་མཁོ་བཞིན་དུ་མཐུ་དང།་སྟོབས་དང ། བརྩོན་འགྲུས་དང་ལྡན་པར་གྱུར་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ཐམས་ཅད་ན་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་འབུམ་ཕྲག་དུ་མ་དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ཀྱིས་ནད་སྣ་ཚོགས་ལས་ཡོངས་སུ་ཐར་བར་བྱས་པར་གྱུར་ཏོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ནད་ཐམས་ཅད་རབ་ཏུ་ཞི་བར་བྱས་པའི་ལེའུ་ཞེས་བྱ་སྟེ་ཉི་ཤུ་རྩ་བཞི་པའོ།། །།རིགས་ཀྱི་ལྷ་མོ། གཞན་ཡང ། རྒྱལ་པོ་ལྷའི་དབང་ཕྱུག་འོད་ཀྱི་ཡུལ་དུ་ཚོང་དཔོན་གྱི་བུ་ཆུ་འབེབས་ཀྱིས་སེམས་ཅན་ཐམས་ཅད་ནད་མེད་པར་བྱས་ནས་ཉུང་ཞིང་སྔ་མཁོ་བཞིན་དུ་སྤྲོ་པ་དང །
382a
༄#། །ལྡན་པའི་ལུས་སུ་གྱུར་ཏོ། །རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་སེམས་ཅན་ཐམས་ཅད་དགའ་ཞིང་རྩེ་ལ་དགའ་མགུར་སྤྱོད་དེ་སྦྱིན་པ་དག་ཀྱང་སྦྱིན་པར་བྱེད། བསོད་ནམས་དག་ཀྱང་བྱེད་དེ་ཚོང་དཔོན་གྱི་བུ་ཆུ་འབེབས་ལའང་ཚོང་དཔོན་གྱི་ཁྱེའུ་ཆུ་འབེབས་རྒྱལ་བར་གྱུར་ཅིག ། རྒྱལ་བར་གྱུར་ཅིག་།སྨན་པའི་རྒྱལ་པོ། སེམས་ཅན་ཐམས་ཅད་ཀྱི་ནད་གསོ་བ། མངོན་སུམ་དུ་བྱང་ཆུབ་སེམས་དཔར་ངེས་པ། ཚེའི་རིག་བྱེད་ཡན་ལག་བརྒྱད་པ་ཐམས་ཅད་རྟོགས་པ་ཞེས་མངོན་པར་འདུ་བྱེད་དོ། །རིགས་ཀྱི་ལྷ་མོ། ཚོང་དཔོན་གྱི་ཁྱེའུ་ཆུ་འབེབས་དེ་ལ་ཆུང་མ་ཆུའི་པདྨའི་སྙིང་པོ་ཞེས་བྱ་བ་ཞིག་ཡོད་དེ། རིགས་ཀྱི་ལྷ་མོ། ཆུའི་པདྨའི་སྙིང་པོ་དེ་ལ་ཁྱེའུ་གཉིས་ཡོད་དེ། གཅིག་གི་མིང་ནི་ཆུའི་གོས་ཞེས་བྱ། གཅིག་གི་མིང་ནི་ཆུའི་སྙིང་པོ་ཞེས་བྱའོ། ། རིགས་ཀྱི་ལྷ་མོ། དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཁྱེའུ་དེ་གཉིས་དང་ལྷན་ཅིག་ཏུ་མཐར་གྱིས་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང་རྒྱལ་པོའི་ཕོ་བྲང་འཁོར་རྣམས་སུ་འགྲོའོ། །རིགས་ཀྱི་ལྷ་མོ། དེ་ནས་དུས་གཞན་ཞིག་ན་ཚོང་དཔོན་གྱི་བུ་ཆུ་འབེབས་འབྲོག་ཁོང་ཁོང་
382b
ཞིག་ཏུ་ཕྱིན་ཏོ། །དེ་ནས་འབྲོག་ཁོང་ཁོང་དེར་ཤ་ཟ་བའི་ཁྱི་དང ། སྤྱང་ཀི་དང ། ཝ་དང ། ཁཝ་དང ། བྱ་དག་འབྲོག་ཁོང་ཁོང་ན་རྫིང་ཞིག་ཡོད་པ་ག་ལ་བ་དེར་རྒྱུག་པ་མཐོང་ནས་དེ་འདི་སྙམ་དུ་སེམས་ཏེ་ཅིའི་ཕྱིར་ཤ་ཟ་བའི་ཁྱི་དང ། སྦྱང་ཀི་ནས། བྱའི་བར་འདི་དག་ཕྱོགས་འདིར་རྒྱུག་སྙམ་མོ། །དེ་ནས་ཡང་འདི་སྙམ་དུ་སེམས་ཏེ་བདག་ཁྱི་དང ། སྤྱང་ཀི་དང ། ཝ་དང ། ཁཝ་དང ། བྱ་རྣམས་ཕྱོགས་གང་དུ་རྒྱུག་པའི་ཕྱོགས་དེར་འགྲོ་བར་བྱའོ་སྙམ་མོ། །རིགས་ཀྱི་ལྷ་མོ།། དེ་ནས་ཚོང་དཔོན་གྱི་བུ་ཆུ་འབེབས་མཐར་གྱིས་རྒྱུ་ཞིང་སོང་སོང་ནས་འབྲོག་ཁོང་ཁོང་ན་རྫིང་ཞིག་ག་ལ་ཡོད་པ་དེར་ཕྱིན་ཏོ། །རྫིང་ཆེན་པོ་དེ་ན་ཉ་ཁྲི་ཞིག་གནས་ཏེ་དེས་དེར་ཉ་བརྒྱ་ཕྲག་མང་པོ་ཞིག་ཆུ་དང་བྲལ་བར་མཐོང་ནས་དེས་དེ་ལ་སྙིང་རྗེ་བའི་སེམས་སྐྱེས་པ་དང ། དེ་ན་ལྷ་མོ་ཤིང་ལས་ལུས་ཕྱེད་ཙམ་ཕྱུང་བ་ཞིག་མཐོང་སྟེ་ལྷ་མོ་དེས་ཚོང་དཔོན་གྱི་བུ་ཆུ་འབེབས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ལེགས་སོ། །ལེགས་སོ། །གང་གི་ཕྱིར་ཆུ་འབེབས་ཞེས་བྱ་བ་ཁྱོད་ཀྱིས་ཉ་འདི་རྣམས་ལ་ཆུ་བྱིན་ཅིག་།རྣམ་པ་གཉིས་ཀྱི་ཕྱིར་ཆུ་འབེབས་ཞེས་བྱ་སྟེ་གང་ཆུ་འབེབས་པ་དང ། གང་ཆུ་སྦྱིན་པའོ། །དེ་བས་ན་རང་
383a
༄#། །གི་མིང་དང་མཐུན་པར་བྱ་བ་བྱོས་ཤིག་།ཆུ་འབེབས་ཀྱིས་སླར་སྨྲས་པ། ལྷ་མོ། ཉ་འདི་དག་ལ་ཇི་སྙེད་ཅིག་མཆིས། ལྷ་མོས་སྨྲས་པ་ཉ་ཁྲི་ཐ་མ་པའོ། །རིགས་ཀྱི་ལྷ་མོ། དེ་ནས་ཚོང་དཔོན་གྱི་བུ་ཆུ་འབེབས་ཆེར་མཆོག་ཏུ་སྙིང་རྗེ་བའི་སེམས་སྐྱེས་སོ། །རིགས་ཀྱི་ལྷ་མོ། དེའི་ཚེ་འབྲོག་ཁོང་ཁོང་ན་ཡོད་པའི་རྫིང་བུ་ཆེན་པོ་དེ་ན་ཆུའི་ལྷག་མ་ཅུང་ཟད་ཙམ་ཞིག་ལུས་ཏེ་དེ་ནས་ཉ་ཁྲི་འཆི་བའི་སྒོར་ཞུགས་ཤིང་ཆུ་དང་བྲལ་བ་དེ་དག་རྒྱུག་ཅིང་རྣམ་པར་རྒྱུག་གོ་།རིགས་ཀྱི་ལྷ་མོ། དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་ཕྱོགས་བཞིར་རྒྱུགས་པ་དང ། ཉ་ཁྲི་པོ་དེ་དག་ཚོང་དཔོན་གྱི་ཁྱེའུ་ཆུ་འབེབས་གང་དུ་འགྲོ་བའི་ཕྱོགས་དེ་ལོགས་སུ་ཆུ་འབེབས་ལ་སྙིང་རྗེ་རྗེ་ལྟར་བ་ལྟའོ། །རིགས་ཀྱི་ལྷ་མོ། དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་ཕྱོགས་བཞིར་བརྒྱུགས་ཏེ་ཆུ་བཙལ་ཀྱང་དེར་ཆུ་མ་སྙེད་ནས་ཕྱོགས་བཞིར་བལྟས་པ་དང ། དེས་ཧ་ཅང་ཡང་ཐག་མི་ ་བ་ཞིག་ན་ཤིང་ལྗོན་པ་ཆེན་པོ་མང་པོ་ཞིག་མཐོང་ནས་ཤིང་ལྗོན་པ་དེ་དག་ལ་འཛེགས་ཏེ་ཤིང་གི་ཡལ་ག་རྣམས་བཅད་ནས་ཤིང་གི་ཡལ་ག་དེ་དག་ཁྱེར་ཏེ་རྫིང་ཆེན་པོ་ག་ལ་བ་དེར་སོང་སྟེ་
383b
ཕྱིན་པ་དང ། ཤིང་གི་ཡལ་ག་དེ་རྣམས་ཀྱིས་ཉ་ཁྲི་པོ་དེ་དག་ལ་ཤིན་ཏུ་བསིལ་བའི་གྲི་བ་མར་བྱས་སོ། །\?\་ཀྱི་ལྷ་མོ། དེ་ནས་ཚོང་དཔོན་གྱི་ཁྱེའུ་ཆུ་འབེབས་རྫིང་དེར་ཆུ་འབབ་པ་ཚོལ་ཏེ་གང་ནས་ཆུ་འབབ་ཅེས་དེ་ཕྱོགས་བཞིར་བརྒྱུགས་པ་དང་ཆུ་མ་རྙེད་ནས་དེར་མྱུར་བ་མྱུར་བར་ཆུའི་རྒྱུན་དེ་ཉིད་ཀྱི་སྲོལ་དུ་སོང་སྟེ། རིགས་ཀྱི་ལྷ་མོ། འབྲོག་ཁོང་ཁོང་ན་ཡོད་པའི་རྫིང་དེར་ཆུ་འབབ་པ་ཞེས་བྱ་བའི་ཆུ་ཀླུ་\?\་ཆེན་བོ་དེ་ལས་དེར་ཆུ་འབབ་པའི་ཀླུང་དེའང་དེའི་ཚེ་སྡིག་པ་ཅན་གྱི་སེམས་ཅན་ཞིག་གིས་ཉ་ཁྲི་པོ་དེ་དག་གི་ཕྱིར་ཅི་ནས་ཀྱང་ཉ་དེ་དག་ལ་ཆུ་འབབ་པར་མི་འགྱུར་བུ་དེ་ལྟ་བུའི་ཕྱོགས་ཀྱི་གྲོག་པོ་ཆེན་པོར་ཀླུང་དེ་ཕབ་\?\་བོ། །དེས་དེ་མཐོང་ནས་ཀྱང་བསམ་པ། ཀླུང་འདི་ནི་སྐྱེ་བོ་སྟོང་གིས་ཀྱང་སྲོལ་དེ་ཉིད་དུ་དབབ་པར་མི་ནུས་ན་བདག་གིས་ལྟ་དབབ་པར་ག་ལ་ནུས་སྙམ་ནས་དེ་ཕྱིར་ལོག་གོ་།རིགས་ཀྱི་ལྷ་མོ། དེ་ནས་ཚོང་དཔོན་གྱི་ཁྱེའུ་ཆུ་འབེབས་རངས་པ་རིངས་པར་རྒྱལ་པོ་ལྷའི་དབང་ཕྱུག་འོད་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ལྷའི་དབང་ཕྱུག་འོད་ཀྱི་རྐང་པ་ལ་མ་གོ་བོས་མཆོད་དེ་ཕྱོགས་གཅིག་ཏུ་འདུག་ནས་དེ་དག་རྒྱུས་ཀྱིས་སྨྲས་ཏེ་བདག་གིས་ལྷའི་ཆགས་འོག་ཏུ་གྲོང་དང ། གྲོང་ཁྱེར་དང ། གྲོང་རྡལ་ཐམས་
384a
༄#། །ཅད་དུ་སེམས་ཅན་རྣམས་ཀྱི་ནད་ཀྱི་རྒྱུན་ནི་བཀུམ་ན་གནས་ཆེ་གེ་མོ་ཞེས་བགྱི་བ་ཞིག་འབྲོག་ཁོང་ཁོང་ན་ཡོད་ཅེས་བགྱི་བའི་རྫིང་ཞིག་མཆིས་པ་དེ་ན་ཉ་ཁྲི་ཞིག་གནས་པ་ཆབ་དང་བྲལ་ནས་གདུགས་ཀྱིས་གདུགས་ཤིང་མཆིས་ཏེ་ཇི་ལྟར་མི་རྣམས་ལ་སྩལ་བ་ལྟར་ཅི་ནས་དུད་འགྲོའི་སྐྱེ་གནས་སུ་གྱུར་པ། དེ་དག་ལའང་སྲོག་སྩོལ་བར་འཚལ་ན་ལྷས་གླང་པོ་ཆེ་ཉི་ཤུ་ཞིག་བདག་ལ་སྩལ་དུ་གསོལ། རྒྱལ་པོ་ལྷའི་དབང་ཕྱུག་འོད་ཀྱིས་སྨན་པའི་རྒྱལ་པོ་ལ་གླང་པོ་ཆེ་ཉི་ཤུ་ཞིག་བྱིན་ཅིག་ཅེས་བློན་པོ་རྣམས་ལ་བསྒོའོ། །བློན་པོ་རྣམས་ཀྱིས་སྨྲས་པ། སེམས་ཅན་ཆེན་པོ ། གླང་པོ་ཆེའི་ལྷས་ག་ལ་བ་དེར་སོང་ལ་གླང་པོ་ཆེ་ཉི་ཤུ་ཁྲིད་དེ་སེམས་ཅན་རྣམས་ལ་ཕན་གདགས་པ་དང ། བདེ་བ་གྱིས་ཤིག་།རིགས་ཀྱི་ལྷ་མོ། དེ་ནས་ཚོང་དཔོན་གྱི་ཁྱེའུ་ཆུ་འབེབས་རང་གི་བུ་ཆུའི་གོས་དང ། ཆུའི་སྙིང་པོ་དང་ལྷན་ཅིག་ཏུ་གླང་པོ་ཆེ་ཉི་ཤུ་ཁྲིད་ནས་གླང་པོ་ཆེའི་རྫི་བོ་ལས་བ་ལང་གི་རྐྱལ་པ་བརྒྱ་བླངས་ཏེ་སླར་ལོག་ནས་ཆུ་འབབ་ཅེས་བྱ་བའི་ཆུ་ཀླུང་ཆེན་པོ་གང་དུ་བབ་པ་དེར་སོང་སྟེ་རྐྱལ་པ་དེ་དག་ཆུས་བཀང་ནས་གླང་པོ་ཆེའི་
384b
རྒྱབ་ཏུ་ཆུ་བཀལ་ཏེ་མྱུར་བ་མྱུར་བར་འབྲོག་ཁོང་ཁོང་ན་ཡོད་པའི་རྫིང་ག་ལ་བ་དེར་སོང་ནས་ཕྱིན་པ་དང ། ཆུ་དེ་གླང་པོ་ཆེའི་སྟེང་ནས་ཕབ་སྟེ་ཕྱོགས་བཞི་ནས་རྫིང་བུ་ཆུས་བཀང་ནས་ཕྱོགས་བཞིར་འགྲོ་བ་དང ། ཚོང་དཔོན་གྱི་ཁྱེའུ་ཆུ་འབེབས་གང་དང ། གང་དུ་འགྲོ་བ་དེ་དང ། དེ་ལོགས་སུ་ཉ་ཁྲི་པོ་དེ་དག་རྒྱུག་གོ་།རིགས་ཀྱི་ལྷ་མོ། དེ་ནས་ཚོང་དཔོན་གྱི་ཁྱེའུ་ཆུ་འབེབས་འདི་སྙམ་དུ་སེམས་ཏེ་ཅིའི་ཕྱིར་ཉ་ཁྲི་པོ་འདི་དག་བདག་ག་ལ་བ་དེ་ལོགས་སུ་རྒྱུག་སྙམ་མོ། །དེའང་འདི་སྙམ་དུ་སེམས་ཏེ་ཉ་ཁྲི་པོ་འདི་དག་ནི་བཀྲེས་པའི་མེས་ཡོངས་སུ་ཉེན་ནས་བདག་ལ་བཟའ་བ་སློང་དུ་ངེས་ཀྱི། བདག་གིས་ཁ་ཟས་སྦྱིན་པར་བྱའོ་སྙམ་མོ། །རིགས་ཀྱི་ལྷ་མོ། དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་རང་གི་བུ་ཆུའི་གོས་ལ་འདི་སྐད་ཅེས་སྨྲས་སོ། །བུ། གླང་པོ་ཆེ་ཐམས་ཅད་ཀྱི་ནང་ནས་མགྱོགས་པའི་མཆོག་ལ་ཞོན་ཏེ་བདག་ཅག་གི་ཁྱིམ་དུ་མྱུར་བ་མྱུར་བར་སོང་སྟེ་མེས་པོ་ཚོང་དཔོན་ལ། ཀྱེ་མེས་པོ། ཆུ་འབེབས་ཀྱི་མཆིད་ནས་ཁྱིམ་འདི་ན་ཕ་མ་དང ། སྤུན་དང ། སྲིང་མོ་དང ། བྲན་ཕོ་དང ། བྲན་མོ་དང ། ལས་བགྱིད་པ་རྣམས་ཀྱི་ཁ་ཟས་སྦྱར་བ་གང་ཅི་མཆིས་པ་ཐམས་ཅད་གཅིག་ཏུ་བསྡུས་ཏེ་ཆུའི་གོས་གླང་པོ་ཆེ་ལ་ཞོན་པའི་ལག་ཏུ་མྱུར་བར་རྫོངས་
385a
༄#། །ཤིག་ཅེས་མཆིའོ་ཞེས་དེ་སྐད་གྱིས་ཤིག་།དེ་ནས་ཁྱེའུ་ཆུའི་གོས་གླང་པོ་ཆེ་དེ་ལ་ཞོན་ནས་མྱུར་བ་མྱུར་བར་རྒྱུག་ཅིང་རབ་ཏུ་རྒྱུག་སྟེ་རང་གི་ཁྱིམ་ག་ལ་བ་དེར་སོང་ནས་ཕྱིན་པ་དང་དེ་དག་རྒྱུས་ཀྱིས་ཞིབ་ཏུ་སྨྲས་ཏེ་དེ་ནས་ཁྱེའུ་ཆུའི་གོས་ཀྱིས་སྔར་སྨོས་པའི་ཁ་ཟས་སྦྱར་བ་དེ་ཐམས་ཅད་གླང་པོ་ཆེའི་རྒྱབ་དུ་བཀལ་ནས་གླང་པོ་ཆེ་དེ་ལ་ཞོན་ཏེ་འབྲོག་ཁོང་ཁོང་ན་ཡོད་པའི་རྫིང་ག་ལ་བ་དར་དོང་བ་དང ། ཆུ་འབེབས་ཀྱིས་རང་གི་བུ་ཆུའི་གོས་མཐོང་ནས་དགའ་མགུ་སྟེ་བུ་ལས་ཟན་བླངས་ནས་ཕྲུལ་ཏེ་རྫིང་དེར་གཏོར་ནས་ཉ་ཁྲི་པོ་དེ་དག་ཚིམ་པར་བྱས་ནས་འདི་སྙམ་དུ་བདག་གིས་དུས་གཞན་ཞིག་ན་དགོན་པའི་གནས་ཤིག་ན་དགེ་སློང་ཐེག་པ་ཆེན་པོ་ཀློག་པ་ལས་ཐོས་ན། སུ་འཆི་བའི་དུས་ཀྱི་ཚེ་དེ་བཞིན་གཤེགས་པ་རིན་ཆེན་གཙུག་ཏོར་ཅན་གྱི་མཚན་ཐོས་པ་དེ་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེའོ་ཞེས་ཐོས་ཀྱི། བདག་གིས་ཉ་དེ་དག་ལ་རྟེན་ཅིང་འབྲེལ་བར་འབྱུང་བའི་ཆོས་ཟབ་མོའང་བཤད་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་དེའི་མཚན་ཀྱང་བསྒྲགས་པར་བྱའོ་སྙམ་མོ།།
385b
དེའི་ཚེ་ན་ཛམྦུའི་གླིང་འདི་ན་སེམས་ཅན་རྣམས་ཀྱི་ལྟ་བ་གཉིས་གྱུར་ཏེ་ཁ་ཅིག་ནི་ཐེག་པ་ཆེན་པོ་ལ་མངོན་པར་དད་དོ། །ཁ་ཅིག་ནི་སྨོད་དོ། །དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་དེའི་ཚེ་རྫིང་བུ་དེར་རྐང་པ་གཉིས་ཀའི་པུས་མོ་ནུབ་ཙམ་དུ་འབོགས་ཏེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་དེ་སྐད་དུ་ཆེད་དུ་བརྗོད་དོ། །དེ་བཞིན་གཤེགས་པ་རིན་ཆེན་གཙུག་ཏོར་ཅན་སྔོན་བྱང་ཆུབ་སེམས་དཔའ་སྤྱད་པ་སྤྱོད་པ་ན་ཕྱོགས་བཅུ་དག་ན་གང་སུ་དག་འཆི་བའི་དུས་ཀྱི་ཚེ་ངའི་མིང་ཐོས་པ་དེ་དག་དེ་ནས་ཤི་འཕོས་ནས་སུམ་ཅུ་རྩ་གསུམ་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེས་སྨོན་ལམ་དེ་སྐད་བཏབ་པོ། །དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་དུད་འགྲོའི་སྐྱེ་གནས་སུ་གྱུར་པ་དེ་དག་ལ་ཆོས་འདི་བཤད་དེ། འདི་ལྟ་སྟེ། འདི་ཡོད་པའི་ཕྱིར་འདི་འབྱུང ། འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང ། གཟུགས། མིང་དང ། གཟུགས་ཀྱི་
386a
༄#། །རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུགས་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་དག་འབྱུང་བར་འགྱུར་རོ། །འདི་ལྟ་སྟེ། མ་རིག་པ་འགགས་པས་འདུ་བྱེད་རྣམས་འགག་པར་འགྱུར་བ་ནས། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདིའང་འགག་པར་འགྱུར་རོ་ཞེས་བྱ་བའི་བར་དུའོ། །རིགས་ཀྱི་ལྷ་མོ། དེ་ལྟར་དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས་ཀྱིས་དུད་འགྲོའི་སྐྱེ་གནས་སུ་གྱུར་པ་དེ་དག་ལ་ཆོས་དང་ལྡན་པའི་གཏམ་འདི་བརྗོད་ནས་རང་གི་བུ་ཆུའི་གོས་དང ། ཆུའི་སྙིང་པོ་དང་ལྷན་ཅིག་ཏུ་རང་གི་ཁྱིམ་དུ་ཕྱིན་པའི་བར་་\?\་དེ་ནས་དུས་གཞན་ཞིག་ན་ཚོང་དཔོན་གྱི་ཁྱེའུ་ཆུ་འབེབས་དུས་སྟོན་ཆེན་པོ་ཟོས་ནས་ཆང་གིས་ར་རོ་སྟེ་མལ་ན་ཉལ་བ་དང ། དེའི་ཚེ་དེའི་དུས་ན་
386b
ལྟས་ཆེན་པོ་བྱུང་བར་གྱུར་ཏེ་མཚན་མོ་དེ་འདས་པ་དང ། ཉ་ཁྲི་པོ་དེ་དག་འཆི་བའི་དུས་བྱས་པར་གྱུར་ནས་སུམ་ཅུ་རྩ་གསུམ་གྱི་ལྷ་རྣམས་དང་\?\་སྐལ་བ་མཉམ་པར་སྐྱེས་སོ། །སྐྱེས་མ་ཐག་ཏུ་དེ་དག་འདི་ལྟ་བུའི་ཚུལ་གྱིས་སེམས་ཀྱི་རྣམ་པར་རྟོག་པ་སྐྱེས་ཏེ་བདག་ཅག་དགེ་བའི་ལས་ཀྱི་རྒྱུ་གང་གིས་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་འདིར་སྐྱེས་སྙམ་མོ། །དེ་དག་ཡང་འདི་སྙམ་དུ་སེམས་ཏེ་བདག་ཅག་ཛམྦུའི་གླིང་དེ་ན་ཉ་ཁྲིར་གྱུར་ཏེ་བདག་ཅག་དུད་འགྲོའི་སྐྱེ་གནས་སུ་གྱུར་པ་ལས་ཚོང་དཔོན་གྱི་ཁྱེའུ་ཆུ་འབེབས་ཀྱིས་ཆུ་མང་པོ་དང ། ཁ་ཟས་ཀྱི་མཆོག་གིས་ཚིམ་པར་བྱས་ཏེ་བདག་ཅག་ལ་རྟེན་ཅིང་འབྲེལ་པར་འབྱུང་བ་ཟབ་མོའི་ཆོས་ཀྱང་བསྟན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་མཚན་ཀྱང་བསྒྲགས་པས་དགེ་བའི་ཆོས་ཀྱི་རྒྱུ་དེ་དང ། རྐྱེན་དེས་བདག་ཅག་ལྷ་རྣམས་ཀྱི་ནང་འདིར་སྐྱེས་ཀྱི། བདག་ཅག་ཚོང་དཔོན་གྱི་ཁྱེའུ་ཆུ་འབེབས་ག་ལ་བ་དེར་སོང་སྟེ་ཕྱིན་ནས་དེ་ལ་མཆོད་པར་བྱའོ་སྙམ་ནས་དེ་ནས་ལྷའི་བུ་ཁྲི་པོ་དེ་དག་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་ནས་མི་སྣང་བར་གྱུར་ནས་ཚོང་དཔོན་
387a
༄#། །གྱི་བུ་ཆུ་འབེབས་ཀྱི་ཁྱིམ་དུ་ལྷགས་ཏེ་དེའི་ཚེ་ཚོང་དཔོན་གྱི་ཁྱེའུ་ཆུ་འབེབས་མལ་ན་ཉལ་ཞིང་འདུག་པ་དེ་ལ་ལྷའི་བུ་དེ་དག་གིས་མུ་ཏིག་གི་སེ་མོ་དོ་ཁྲི་ནི་མགོའི་ཐད་ཀར་བཞག་།མུ་ཏིག་གི་སེ་མོ་དོ་ཁྲི་ནི་རྐང་པའི་དྲུང་དུ་བཞག་།མུ་ཏིག་གི་སེ་མོ་དོ་ཁྲི་ནི་གཡས་ལོགས་སུ་བཞག། མུ་ཏིག་གི་སེ་མོ་དོ་ཁྲི་ནི་གཡོན་ལོགས་སུ་བཞག་སྟེ་པུས་མོ་ནུབ་ཙམ་དུ་མེ་ཏོག་མན་དཱ་ར་བའི་ཆར་ཆེན་པོ་ཡང་ཕབ། ལྷའི་སིལ་སྙན་རྣམས་ཀྱང་དཀྲོལ། ནས་དེས་ཛམྦུའི་གླིང་པ་ཐམས་ཅད་ཀྱང་སད། ཚོང་དཔོན་གྱི་བུ་ཆུ་འབེབས་ཀྱང་སད་དོ། །དེ་ནས་ལྷའི་བུ་ཁྲི་པོ་དེ་དག་ནམ་མཁའ་ལ་དོང་སྟེ་ལྷའི་བུ་དེ་དག་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་གྱི་གནས་དང ། གནས་གཞན་དག་ཏུའང་མེ་ཏོག་མན་དཱ་ར་བའི་ཆར་འབེབས་ཤིང་ནགས་ཁོང་ཁོང་ན་ཡོད་པའི་རྫིང་ཆེན་པོ་ག་ལ་བ་དེར་དོང་ནས་དེ་དག་གིས་རྫིང་ཆེན་པོ་དེར་མེ་ཏོག་མན་དཱ་ར་བའི་ཆར་ཆེན་པོ་མངོན་པར་ཕབ་སྟེ་དེ་ཉིད་དུ་མི་སྣང་བར་གྱུར་ནས་སླར་ཡང་ལྷའི་གནས་སུ་དོང་སྟེ་དེ་ནས་འདོད་པའི་ཡོན་ཏན་ལྔ་པོ་དག་གིས་དགའ་ཞིང་རྩེ་སྟེ་དགའ་མགུར་སྤྱོད་ཅིང་དཔལ་དང ། སྐལ་བ་བཟང་པོ་
387b
ཆེན་པོ་དག་ཀྱང་མྱོང་ངོ ། །ཛམྦུའི་གླིང་དུ་ནམ་ལངས་པ་དང་དེ་ནས་རྒྱལ་པོ་ཆེན་པོ་ལྷའི་དབང་ཕྱུག་འོད་ཀྱིས་སྐར་མཁན་དང ། བློན་པོ་ཆེན་པོ་རྣམས་ལ་སྨྲས་པ། ཅིའི་ཕྱིར་མདངས་སུམ་ལྟས་འདི་དག་བྱུང ། དེ་དག་གིས་སྨྲས་པ། ལྷ། མཁྱེན་པར་མཛད་དུ་གསོལ། ཚོང་དཔོན་གྱི་ཁྱེའུ་ཆུ་འབེབས་ཀྱི་ཁྱིམ་དུ་མུ་ཏིག་གི་སེ་མོ་དོ་བཞི་ཁྲིའི་ཆར་བབ་ཅིང་མེ་ཏོག་མན་དཱ་ར་བའི་ཆར་ཡང་ཕབ་བོ་ཞེས་བྱས་པ་དང ། ཁྱེད་དོང་ལ་ཚོང་དཔོན་གྱི་བུ་ཆུ་འབེབས་ལ་སྙན་པའི་ཚིག་གིས་ཕོས་\?\་ཤིག་།དེ་ནས་སྐར་མཁན་དང ། བློན་པོ་ཆེན་པོ་རྣམས་ཆུ་འབེབས་ཀྱི་ཁྱིམ་ག་ལ་བ་དེར་དོང་སྟེ་ཕྱིན་ནས་ཚོང་དཔོན་གྱི་བུ་ཆུ་འབེབས་ལ་འདི་སྐད་ཅེས་སྨྲས་སོ། །རྒྱལ་པོ་ལྷའི་དབང་ཕྱུག་འོད་ཁྱོད་ལ་འབོད་དོ། །དེ་ནས་ཚོང་དཔོན་གྱི་ཁྱེའུ་ཆུ་འབེབས་བློན་པོ་རྣམས་དང་ལྷན་ཅིག་ཏུ་རྒྱལ་པོ་ལྷའི་དབང་ཕྱུག་འོད་ག་ལ་བ་དེར་སོང་པ་དང ། རྒྱལ་པོས་སྨྲས་པ། ཆུ་འབེབས། མདངས་སུམ་དེ་འདྲ་བའི་ལྟས་བྱུང་བ་འདི་ཅིའི་ལྟས་ཤེས་སམ། དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་རྒྱལ་པོ་ལྷའི་དབང་ཕྱུག་འོད་ལ་འདི་སྐད་ཅེས་སྨྲས་སོ། །ལྷ། བདག་གིས་འཚལ་ཏེ་ཉ་ཁྲི་པོ་དེ་དག་གུམ་པར་གྱུར་དུ་ངེས་སོ། །
388a
༄#། །རྒྱལ་པོས་སྨྲས་པ། ཇི་ལྟར་ཤེས། ཆུ་འབེབས་ཀྱིས་སྨྲས་པ། ལྷ། ཆུའི་གོས་རྫིང་དེར་ཉ་ཁྲི་པོ་དེ་དག་གུམ་མམ། མ་གུམ་བལྟར་སྩལ་ཏོ། །རྒྱལ་པོས་སྨྲས་པ། དེ་ལྟར་གྱིས་ཤིག་།དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཁྱེའུ་ཆུའི་གོས་ལ་འདི་སྐད་ཅེས་སྨྲས་སོ། །འབྲོག་ཁོང་ཁོང་ན་ཡོད་པའི་རྫིང་གི་ཉ་ཁྲི་པོ་དེ་དག་ཤིའམ། མ་ཤི་ལྟོས་ཤིག་།དེ་ནས་ཁྱེའུ་ཆུའི་གོས་མྱུར་བ་མྱུར་བར་འབྲོག་ཁོང་ཁོང་ན་ཡོད་པའི་རྫིང་ཆེན་པོ་ག་ལ་བ་དེར་སོང་བ་དང ། ཉ་ཁྲི་པོ་དེ་དག་ཤི་བའི་དུས་བྱས་པར་གྱུར་ཅིང་མེ་ཏོག་མན་དཱ་ར་བའི་ཆར་ཆེན་པོ་བབ་པའང་མཐོང་ནས་སླར་ལོགས་ཏེ་ཕ་ལ་སྨྲས་པ། ཉ་རྣམས་གུམ་པར་གྱུར་ཏོ། །དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཁྱེའུ་ཆུའི་གོས་ལ་ཚིག་དེ་ཐོས་པ་དང ། རྒྱལ་པོ་ལྷའི་དབང་ཕྱུག་འོད་ག་ལ་བ་དེར་སོང་ནས་\?\་དེ་དག་རྒྱུས་ནས་ཞིབ་ཏུ་སྨྲས་ཏེ། ལྷ། མཁྱེན་པར་མཛད་དུ་གསོལ། ཉ་ཁྲི་པོ་དེ་དག་ཐམས་ཅད་ནི་གུམ་པར་གྱུར་ནས་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་ཏེ་དེ་དག་བདག་གིས་མཐུས་མདང་སུམ་དེ་ལྟ་བུའི་དགེ་བའི་ལྟས་དེ་དག་བྱུང་སྟེ་བདག་གི་ཁྱིམ་དུའང་མུ་ཏིག་གི་སེ་མོ་དོ་བཞི་ཁྲི་དང ། ལྷའི་\?\་
388b
མེ་ཏོག་མན་དཱ་ར་བའི་ཆར་ཡང་ཕབ་པོ། དེ་ནས་རྒྱལ་པོ་དེ་དགའ་ཞིང་མགུ་ཞིང་དགའ་སྟེ་ཡི་རངས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་རིགས་ཀྱི་ལྷ་མོ་བྱང་ཆུབ་ཡང་\?\་དག་པར་བསྡུས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་ཅེས་བྱ་བར་གྱུར་པ་དེ་གཞན་ཞིག་ཡིན་\?\་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཤཱཀྱ་ལག་ན་བེ་ཅོན་ཅན་དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་ཅེས་བྱ་བར་གྱུར་\?\་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་ཚོང་དཔོན་རལ་པ་འཛིན་ཅེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཟས་གཙང་མ་དེའི་ཚེ་དེའི་དུས་ན་ཚོང་དཔོན་རལ་པ་འཛིན་ཅེས་བྱ་བར་གྱུར་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་ ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་ང་ཚོང་དཔོན་རལ་པ་འཛིན་གྱི་བུ་ཆུ་ ་ཞེས་བྱ་བར་གྱུར་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་ཆུང་མ་ཆུའི་པདྨའི་སྙིང་པོ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །
389a
༄#། །དེ་ཅིའི་ཕྱིར་ཞེ་ན། ཤཱཀྱའི་བུ་མོ་ས་འཚོ་མ་དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས་ཀྱི་ཆུང་མ་ཆུའི་པདྨའི་སྙིང་པོ་ཞེས་བྱ་བར་གྱུར་ཏོ། །སྒྲ་གཅན་ཟིན་ནི་དེའི་ཚེ་དེའི་དུས་ན་ཁྱེའུ་ཆུའི་གོས་ཞེས་བྱ་བར་གྱུར་ཏོ། །ཀུན་དགའ་བོ་ནི་དེའི་ཚེ་དེའི་དུས་ན་ཁྱེའུ་ཆུའི་སྙིང་པོ་ཞེས་བྱ་བར་གྱུར་ཏོ། །རིགས་ཀྱི་ལྷ་མོ། །དེའི་ཚེ་དེའི་དུས་ན་ཉ་ཁྲི་པོར་གྱུར་པ་དེ་དག་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། འབར་བའི་ཁྱད་པར་གྱི་གཟི་བརྗིད་ཀྱི་རྒྱལ་པོ་ལ་སོགས་པ་ལྷའི་བུ་ཁྲི་པོ་འདི་དག་དེའི་ཚེ་དེའི་དུས་ན་ཉ་ཁྲིར་གྱུར་ཏོ། །གང་དག་ངས་ཆུ་དང ། ཁ་ཟས་ཀྱི་མཆོག་གིས་ཚིམ་པར་བྱས་ཤིང།་རྟེན་ཅིང་འབྲེལ་པར་འབྱུང་བའི་ཟབ་མོའི་ཆོས་ཀྱང་བསྟན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་མཚན་ཡང་བསྒྲགས་པ་སྟེ་དགེ་བའི་ལས་ཀྱི་རྒྱུ་དེས་ངའི་གན་དུ་འདིར་ལྷགས་ཏེ་དེས་ན་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ་རབ་ཏུ་དགའ་བ་དང ། རབ་ཏུ་དང་བ་དང ། མཆོག་ཏུ་དགའ་བ་དང ། གུས་པར་ཆོས་མཉན་པས་ཐམས་ཅད་ལུང་བསྟན་པ་ཐོབ་པར་བྱ་བའི་
389b
མིང་ཐོབ་པར་གྱུར་ཏོ། །རིགས་ཀྱི་ལྷ་མོ། དེའི་ཚེ་དེའི་དུས་ན་ཤིང་གི་ལྷ་མོར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་ལྷ་མོ། ཁྱོད་དེའི་ཚེ་དེའི་དུས་ན་ཤིང་གི་ལྷ་མོར་གྱུར་ཏོ། །རིགས་ཀྱི་ལྷ་མོ། རྣམ་གྲངས་འདིས་ན་འཁོར་བ་ན་འཁོར་བའི་ཚེངས་ཇི་ལྟར་སེམས་ཅན་མང་པོ་བྱང་ཆུབ་ཏུ་ཡོངས་སུ་སྨིན་པར་བྱས་ཏེ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ས་ཐོབ་པར་འགྱུར་བར་རིག་པར་བྱའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ཆུ་འབེབས་ཀྱིས་གདུལ་བྱའི་ཉའི་སྔོན་བྱུང་བའི་ལེའུ་ཞེས་བྱ་སྟེ་ཉི་ཤུ་རྩ་ལྔ་པའོ།། །།བམ་པོ་བཅུ་པ་\?\།རིགས་ཀྱི་ལྷ་མོ། གཞན་ཡང ། བྱང་ཆུབ་སེམས་དཔའ་ནི་གཞན་ལ་ཕན་པའི་ཕྱིར་ལུས་ཀྱང་ཡོངས་སུ་གཏོང་ངོ ། །དེ་ཇི་ལྟ་ཞེ་ན། དྲི་མ་མེད་ཅིང་ཤིན་ཏུ་རྒྱས་པའི་ཡོན་ཏན་རྣམ་པ་སྣ་ཚོགས་བརྒྱའི་འོད་ཟེར་སྣང་བ་དང ། ལྷ་ཡུལ་དུ་རྣམ་པར་འཕྲོ་བ་ཐོགས་པ་མེད་པའི་ཡེ་ཤེས་མཐོང་བ་དང ། སྟོབས་ཀྱིས་ཕ་རོལ་གནོན་པའི་བཅོམ་ལྡན་འདས་དགེ་སློང་སྟོང་གིས་ཡོངས་སུ་བསྐོར་ཏེ་ཡུལ་ལྔ་ལེན་གྱི་ལྗོངས་སུ་ལྗོངས་རྒྱུ་ཞིང་གཤེགས་ནས་ནགས་སྣ་ཚོགས་ཞིག་ཏུ་བྱོན་པ་དང ། དེས་དེར་སྔོ་ཞིང་འཇམ་ལ་མཐིང་ཀར་འདུག་པའི་སྤང་གི་ངོས་ལ་མེ་ཏོག་དྲི་ཞིམ་པ་རྣམ་པ་སྣ་ཚོགས་ཀྱིས་རབ་ཏུ་བརྒྱན་པའི་ས་ཕྱོགས་ཤིག་
390a
༄#། །གཟིགས་སོ། །གཟིགས་ནས་ཀྱང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ས་ཕྱོགས་འདི་ནི་མཛེས་པ་སྟེ་འདི་ན་གཏམ་གྱི་གནས་ཀྱི་མཚན་མ་ཡོད་ཀྱི། ད་དེ་བཞིན་གཤེགས་པའི་གདན་ཐིངས་ཤིག་།དེ་ནས་དེས་བཅོམ་ལྡན་འདས་ཀྱི་བཀའ་བཞིན་དུ་གཏན་བཏིང་ངོ། །གདན་བཏིང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གདན་བཏིང་ལགས་ན་བཅོམ་ལྡན་གཙོ་བོ་མཆོག་།མི་ལ་མཆོག་སྩོལ་དམ་པ་སྲིད་བཅིངས་དཀྲོལ། །བཞུགས་ཏེ་མི་ལ་སྨན་སླད་མཐར་བགྱིད་ཀྱི། །བཀའ་མཆིད་དམ་པ་བདུད་རྩི་གསུང་དུ་གསོལ། །དེ་ནས་བཅོམ་ལྡན་འདས་གདན་དེ་ལ་བཞུགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱེད་བྱ་དཀའ་བ་བྱེད་པའི་བྱང་ཆུབ་སེམས་དཔའི་རུས་པ་རྣམས་བལྟ་བར་འདོད་དམ། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་དགེ་སློང་དག་གིས་འདི་སྐད་ཅེས་གསོལ་ཏོ། །དྲང་སྲོང་དམ་པ་སེམས་ཅན་མཆོག་གི་སྙིང་པོ་པ། །བཟོད་དང་བརྩོན་འགྲུས་ཆེ་ལ་ཞི་དང་དུལ་དགའ་ཞིང ། །བློ་གྲོས་དྲན་དགའ་ཡོན་ཏན་དཔག་མེད་གནས་གྱུར་གྱི། །རུས་པ་བདག་ཅག་བལྟ་བའི་དུས་ལགས་དེ་ལེགས་ཤོད། །དེ་ནས་
390b
བཅོམ་ལྡན་འདས་ཀྱིས་ཞབས་ཀྱི་མཐིལ་འཁོར་ལོ་རྩིབས་སྟོང་གི་རི་མོ་ཅན་དང ། མེ་ཏོག་ཀ་མ་ལ་གསར་དུ་ཁ་བྱེ་བ་ལྟར་འཇམ་པའི་ཕྱག་གིས་སའི་ངོས་ལ་བརྡབས་ཏེ་བསྣུན་མ་ཐར་\?\་ཏུ་ས་རྣམ་པ་དྲུག་ཏུ་གཡོས་ཏེ་ནོར་བུ་དང ། གསེར་དང ། དངུལ་ལས་བྱས་པའི་མཆོད་རྟེན་ཞིག་དེ་ནས་བྱུང་ངོ ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་\?\་བཀའ་སྩལ་པ། ཀུན་དགའ་བོ། མཆོད་རྟེན་འདི་ཕྱེ་ཞིག་།དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་མཆོད་རྟེན་དེ་ཕྱེ་བ་དང ། དེས་དེར་གསེར་གྱི་\?\་འཕྲོ་བ་ཅན་གྱི་ནོར་བུ་དང ། མུ་ཏིག་གིས་ཁེབས་པར་གཡོགས་པའི་གསེར་གྱི་ཟ་མ་ཏོག་གཅིག་མཐོང་ངོ ། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་\?\་ལྡན་འདས། གསེར་གྱི་ཟ་མ་ཏོག་དག་ཅིག་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཟ་མ་ཏོག་བདུན་པོ་འདི་དག་ཐམས་ཅད་ཕྱེ་ཞིག་།དེ་བཞིན་དུ་ཐམས་ཅད་ཁ་ཕྱེ་བ་\?\་དེས་དེར་རུས་པའི་ཁ་དོག་ཁ་བ་དང ། མེ་ཏོག་ཀུ་མུ་ད་འདྲ་བ་དག་གཅིག་མཐོང་ངོ ། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རུས་པ་\?\་དག་གཅིག་གདའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། སྐྱེས་བུ་ཆེན་པོའི་རུས་པ་རྣམས་ཁྱེར་ཏེ་ཤོག་།དེ་ནས་ཚེ་དང་ལྡན་པ་ཀུན་དགའ་བོས་རུས་\?\་
391a
༄#། །དག་བླངས་ཏེ་སངས་རྒྱས་བཅོམ་ལྡན་འདས་ལ་ཕུལ་བ་དང ། བཅོམ་ལྡན་འདས་ཀྱིས་རུས་པ་རྣམས་དགེ་འདུན་གྱི་མདུན་དུ་བསྣམས་ཏེ་ཕྱག་བཞེས་ནས་བཀའ་སྩལ་པ། རུས་པ་འདི་དག་ཡོན་ཏན་མཆོག་རབ་ཚོགས་ལྡན་བློ་གྲོས་མཆོག་།དུལ་དང་བསམ་གཏན་བཟོད་པ་སྤྲོ་བ་གྲགས་མཆོག་དམ་པ་སྟེ། ། བློ་གྲོས་ལྡན་རྣམས་ཕྱིར་ཞིང་རྟག་ཏུ་བྱང་ཆུབ་འདི་ལ་ནི། །སྤྲོ་བརྟན་མོས་དང་བློ་གྲོས་མཆོག་ཏུ་སྦྱིན་ལ་དགའ་བར་བྱས། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།བྱང་ཆུབ་སེམས་དཔའི་རུས་པ་ཚུལ་ཁྲིམས་དང ། ཡོན་ཏན་གྱིས་ཡོངས་སུ་བསྒོས་པ། མཆོག་ཏུ་མཐོང་བར་དཀའ་བ། བསོད་ནམས་ཀྱི་ཞིང་དུ་གྱུར་པ་རྣམས་ལ་ཕྱག་ཚོལ་ཅིག་།དེ་ནས་དགེ་སློང་དེ་དག་གིས་ཐལ་མོ་སྦྱར་ཏེ་འདུན་པའི་ཡིད་ཀྱིས་རུས་པ་རྣམས་ལ་ཕྱག་བཙལ་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་ནི་འཇིག་རྟེན་ཐམས་ཅད་ལས་མངོན་པར་འཕགས་པ་སེམས་ཅན་ཐམས་ཅད་ཀྱི་ཕྱག་བགྱིས་པ་ལགས་ན་ཇི་ལྟར་དེ་བཞིན་གཤེགས་པ་ཉིད་རུས་པ་འདི་དག་ལ་ཕྱག་བཞེས། དེ་ནས་
391b
བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། རུས་པ་འདི་དག་གིས་ང་འདི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ། སྔོན་བྱུང་བ་འདས་པའི་དུས་རྒྱལ་པོ་ཤིང་རྟ་ཆེན་པོ་ཞེས་བྱ་བ་བཞོན་པ་དང ། སྟོབས་དུ་མ་དང་ལྡན་པ། ཐོགས་པ་མེད་པའི་སྟོབས་ཀྱིས་ཕ་རོལ་གནོན་པ་ཞིག་བྱུང་སྟེ་དེ་ལ་བུ་ལྷ་གཞོན་ནུ་དང་འདྲ་བ་གསུམ་ཞིག་ཡོད་དེ་སྒྲ་ཆེན་པོ་དང ། ལྷ་ཆེན་པོ་དང ། སྙིང་སྟོབས་ཆེན་པོའོ། །དེ་ནས་རྒྱལ་པོ་ཆེན་པོ་རྩེ་བའི་ཕྱིར་སྐྱེད་མོས་ཚལ་གྱི་སར་བྱུང་བ་དང ། གཞོན་ནུ་དེ་དག་སྐྱེད་མོས་ཚལ་དེའི་ཡོན་ཏན་ལ་ཆགས་ཤིང་མེ་ཏོག་འདོད་པས་ཕན་ཚུན་དུ་རྒྱུ་སྟེ་ནགས་ཁྲོད་ཆེན་པོ་བཅུ་གཉིས་སུ་ཞུགས་སོ། །དེ་ནས་རྒྱལ་པོའི་བུ་དག་དོང་བ་དང ། གཞོན་ནུའི་རིམ་གྲོ་པ་རྣམས་ཀྱང་རྒྱལ་བུས་བསྐྲད་ནས་ཕན་ཚུན་དུ་དོང་སྟེ་ཀུན་ཏུ་བསྲུངས་པའི་སྐྱེད་མོས་ཚལ་ཆེན་པོའི་ནགས་ཁྲོད་བཅུ་གཉིས་སུ་ཞུགས་སོ། །དེ་ནས་སྒྲ་ཆེན་པོས་ནུ་བོ་གཉིས་ལ་སྨྲས་པ། ཁོ་བོའི་སྙིང་ལ་འཇིགས་པས་ནོན་ན་འདིར་བདག་ཅག་གཅན་གཟན་གྱིས་བསད་དུ་འོང་གི་ཚུར་ཤོག་།ལྷ་ཆེན་པོས་སྨྲས་པ། བདག་ལ་འཇིགས་པ །
392a
༄#། །ནི་མ་མཆིས་ན་སྐྱེ་བོ་སྡུག་པ་དང་བྲལ་བ་སྙམ་བགྱིད་པའི་སྙིང་དུ་གྱུར་ཏོ། །སྙིང་སྟོབས་ཆེན་པོས་སྨྲས་པ། ཐུབ་པས་བསྔགས་པའི་ ་ཁྲོད་དབེན་པ་འདིར། །བདག་ནི་མི་འཇིགས་མྱ་ངན་མ་མཆིས་ཀྱི། །ཤིན་ཏུ་རྒྱས་མཆོག་དོན་ཆེན་རྙེད་སྙམ་སྟེ། །བདག་གི་སྙིང་འདི་རབ་ཏུ་དགའ་བར་གྱུར།། དེ་ནས་རྒྱལ་བུ་གཞོན་ནུ་དེ་དག་ནགས་ཁྲོད་བཅུ་གཉིས་པོ་དེ་དག་གི་ཁྲོད་དུ་རྒྱུ་བ་ན་སྟག་མོ་བུ་བྱུང་ནས་ཞག་དྲུག་གམ། ཞག་བདུན་ཞིག་ལོན་པར་གྱུར་ལ་བུ་ལྔས་བསྐོར་ཏེ་བཀྲེས་ཤིང་སྐོམ་པས་ཉམས་སུ་སྨད་ནས་ལུས་ཤིན་ཏུ་ཉམ་ཆུང་བར་གྱུར་པ་དེ་འདྲ་བ་ཞིག་མཐོང་ངོ ། །མཐོང་ནས་ཀྱང་སྒྲ་ཆེན་པོས་སྨྲས་པ།་ཀྱེ་མའོ། ཉོན་མོངས་མ་འདི་བུ་བྱུང་ནས་ཞག་དྲུག་གམ། ཞག་བདུན་ཞིག་ལོན་པར་གྱུར་ལ་དེ་ལྟར་ཟས་མ་རྙེད་པས་ཡང་ན་ནི་རང་གི་བུ་ལ་ཟ་བར་འགྱུར། ཡང་ན་ནི་བཀྲེས་པས་འཆི་བའི་དུས་བྱེད་པར་འགྱུར་རོ། །སྙིང་སྟོབས་ཆེན་པོས་སྨྲས་པ། ཉོན་མོངས་མ་འདིའི་ཟས་ཅི། སྒྲ་ཆེན་པོས་སྨྲས་པ། འདིར་གང་ཤ་སར་པ་དང ། ཁྲག་དྲོན་མོ་ཡོད་ན་དེ་ནི་སྟག་དང ། དོམ་དང ། དྲེད་དང ། སེང་གེ་རྣམས་ཀྱི་ཟས་ཡིན་ནོ་ཞེས་ཟེར་རོ། །ལྷ་ཆེན་པོས་སྨྲས་པ། འདིར་ཉོན་མོངས་
392b
མ་འདི་བཀྲེས་པ་དང ། སྐོམ་པ་དང་ལྡན་པའི་ལུས་སུ་གྱུར་པས་སྲོག་གི་ལྷག་མ་ཅུང་ཟད་གཅིག་ལུས་ཏེ་རབ་ཏུ་ཉམ་ཆུང་བ་འདིས་གནས་འདིར་ཟས་སྐོམ་ཚོལ་ནི་མི་ནུས་ན་འདིའི་སྲོག་ཡོངས་སུ་བསྲུང་བའི་ཕྱིར་སུ་ཞིག་རང་གི་ལུས་ཡོངས་སུ་གཏོང་བར་བྱེད་པར་འགྱུར་ཞིག་གུ་།སྒྲ་ཆེན་པོས་སྨྲས་པ། ཀྱེ། རང་གི་ལུས་ཡོངས་སུ་བཏང་བ་ནི་བྱ་དཀའ་བའོ། །སྙིང་སྟོབས་ཆེན་པོས་སྨྲས་པ། བདག་ཅག་ལྟ་བུ་སྲོག་དང ། ལུས་ལ་མངོན་པར་ཆགས་པ་བློ་ཆུང་བ་རྣམས་ལ་ནི་ཚུལ་འདི་བྱ་དཀའ་བ་ལགས་ཀྱི། གཞན་ལུས་ཡོངས་སུ་གཏོང་བ་ལ་ཞུགས་པ། གཞན་ལ་ཕན་པར་བརྩོན་པའི་སྐྱེས་བུ་དམ་པ་རྣམས་ལ་ནི་བྱ་དཀའ་བ་མ་ལགས་སོ། ། ཡང།་བརྩེ་བའི་སྙིང་རྗེ་ལས་བྱུང་འཕགས་པའི་སེམས་ཅན་དག་།ལྷ་ཡུལ་དང་ནི་ས་འདིར་རང་ལུས་རྙེད་སྙམ་སྟེ། །གཞན་གྱི་སྲོག་ཕྱིར་མཐུན་པའི་དགའ་བའི་ཡིད་ཀྱིས་ནི། །འགྱུར་བ་མེད་པར་འདིར་ནི་རྣམ་པ་བརྒྱ་ཡིས་གཙེ། །དེ་ནས་རྒྱལ་བུ་གཞོན་ནུ་དེ་ཤིན་ཏུ་མི་དགའ་སྟེ་སྟག་མོ་དེ་ལ་མིག་མི་འཛུམས་པར་རིང་ཞིག་ཏུ་བལྟས་ནས་སོང་ངོ ། །དེ་ནས་སྙིང་སྟོབས་ཆེན་པོ་འདི་སྙམ་དུ་སེམས་ཏེ་ད་ནི་བདག་གིས་ལུས་འདི་ཡོངས་སུ་བཏང་བའི་དུས་ལ་བབ་བོ། །དེ་ཅིའི་ཕྱིར་ཞེ་ན། འཇིག་ཅིང་འགྱེས་
393a
༄#། །པའི་ཆོས་ཅན་མཐར་འབྱེད་མཐར་ངན་པ། །རྣག་ཅན་ལུས་འདི་ཟས་དང་སྐོམ་དང་མལ་ཆ་དང ། །བཞོན་པ་འོས་པ་ཆེན་པོ་དག་གིས་རིང་བསྲུངས་ཀྱང ། །སྔར་མེད་རང་གི་རང་བཞིན་མི་འདོར་བྱས་དོན་མེད། །ཡང་ན་ཐམས་ཅད་དུ་མི་གཙང་བར་གྱུར་པས་ན་དེའི་འཚོ་བ་མེད་ཀྱི།་དེ་བདག་གིས་དེ་ལས་བཟང་པོའི་ལས་ལ་སྦྱར་བར་བྱའོ། །དེའི་ཕྱིར་བདག་སྐྱེ་བ་དང ། འཆི་བའི་རྒྱ་མཚོ་ལས་བསྒྲལ་བའི་གྲུ་བོ་ཆེ་ལྟ་བུར་འགྱུར་རོ། ། ཡང།་སྙིང་པོ་མེད་ལུས་དབུ་བ་འདྲ་ལ་སྲིན་བུ་བརྒྱས་གང་བྱས་པ་ཆུད་གཟོན་པ། །འབྲས་དང་འདྲ་བའི་སྲིད་པ་བརྒྱ་ལྡན་གཅིན་དང་ཕྱི་སས་གང་བ་འདི་བཏང་སྟེ། །མྱ་ངན་མེད་ཅིང་འགྱུར་མེད་ཕུང་མེད་དྲི་མེད་བསམ་གཏན་ལ་སོགས་ཡོན་ཏན་གྱིས། །ཀུན་ཏུ་གང་བའི་ཆོས་སྐུ་ཡོན་ཏན་བརྒྱས་གང་རྡུལ་དང་བྲལ་བ་ཐོབ་པར་བྱ། །དེ་སྙིང་རྗེ་ཆེན་པོ་མཆོག་དང་ལྡན་པའི་སྙིང་དུ་གྱུར་པས་དེ་ལྟར་བཏུལ་ནས་ཁྱེད་གཉིས་གཤེགས་སུ་གསོལ། བདག་ནི་རང་གི་བགྱི་བ་ཞིག་གི་སླད་དུ་ནགས་ཁྲོད་ཆེན་པོ་བཅུ་གཉིས་སུ་འཇུག་གོ་ཞེས་དེ་གཉིས་བསྐྲད་དོ། །དེ་ནས་རྒྱལ་པུ་གཞོན་ནུ་སྙིང་སྟོབས་ཆེན་པོ་ནགས་འདབ་དེ་ནས་སླར་ལོག་
393b
སྟེ་སྟག་གི་གནས་སུ་སོང་ནས་ནགས་ཀྱི་ཡལ་ག་ལ་གོས་གཟར་ཏེ། བདག་ནི་འགྲོ་ལ་ཕན་\?\་ཕྱིར་བྱང་ཆུབ་མཚུངས་པ་མེད་པ་ཞི་བ་ཐོབ་འདོད་དེ། གཞན་གྱིས་བཏང་བར་དཀའ་བའི་ལུས་ནི་བློ་གྲོས་འགྱུར་བ་མེད་པའི་སྙིང་རྗེས་སྦྱིན། །བདག་གིས་སྐྱོན་མེད་བྱང་ཆུབ་རིང་མེད་རྒྱལ་སྲས་རྣམས་ཀྱིས་གཉེར་བ་ཐོབ་པར་ཤོག་།བདག་གིས་སྲིད་བའི་རྒྱ་མཚོ་རབ་ཏུ་འཇིགས་ལས་འཇིག་རྟེན་གསུམ་པོ་བསྒྲལ་བར་བྱ། ཞེས་སྨོན་ལམ་བཏབ་བོ། །དེ་ནས་སྙིང་སྟོབས་ཆེན་པོས་སྟག་མོའི་མདུན་དུ་ཉལ་བ་དང ། དེ་ནས་བྱམས་པ་དང་ལྡན་པའི་བྱང་ཆུབ་སེམས་དཔའ་ལ་སྟག་མོས་ཅིའང་མ་བྱས་སོ། །དེ་ནས་བྱང་ཆུབ་སེམས་དཔས། ཀྱེ་མའོ། འདི་ནི་ཉམ་ཆུང་པས་མི་ནུས་སོ་སྙམ་ནས་ལངས་ཏེ། སྙིང་བརྩེ་བའི་བློ་གྲོས་ཀྱིས་མཚོན་ཆ་བཙལ་ན་གང་ནས་ཀྱང་མཚོན་ཆ་མ་རྙེད་ནས་དེ་ནས་འོད་མའི་ཡལ་ག་ལོ་བརྒྱ་ལོན་པ་སྲ་བ་ཞིག་བླངས་ཏེ་བདག་གིས་མགུལ་བ་བཅད་ནས་སྟག་མོའི་མདུན་དུ་འགྱེལ་ཏོ། །བྱང་ཆུབ་སེམས་དཔའ་འགྱེལ་མ་ཐག་ཏུ་ཆུའི་དབུས་སུ་སོན་པའི་གྲུ་རླུང་གིས་བསྐྱོད་པ་བཞིན་དུ་ས་འདི་རྣམ་པ་དྲུག་ཏུ་གཡོས་སོ། །ཉི་མའང་སྒྲ་གཅན་གྱིས་ཟིན་པ་བཞིན་དུ་འོད་ཟེར་རྣམས་ཀྱིས་མཛེས་པ་མེད་
394a
༄#། །དོ། །ལྷའི་སྤོས་དང ། ཕྱེ་མ་དང་འདྲེས་པའི་མེ་ཏོག་གི་ཆར་ཡང་བབ་བོ། །དེ་ནས་ལྷ་ཞིག་གིས་ངོ་མཚར་དུ་གྱུར་པའི་ཡིད་ཀྱིས་བྱང་ཆུབ་སེམས་དཔའ་ལ་བསྟོད་པ། བློ་གྲོས་བཟང་པོ་ཁྱོད་འདིར་ཇི་ལྟར་ཐུགས་རྗེས་སེམས་ཅན་རྣམས་ཁྱབ་སྟེ། །མི་ཡི་དབང་པོ་རབ་ཏུ་དགྱེས་པས་ཇི་ལྟར་སྐུ་འདི་བཏང་བས་ན། །སྐྱེ་བ་དང་ནི་འཆི་བའི་དོན་དང་བྲལ་བ་ཞི་བའི་གནས་ཀྱི་མཆོག་།ཞི་བ་གཙང་མ་ཁྱོད་ཀྱིས་འདིར་ནི་ཚེགས་མེད་རིང་པོར་མི་ཐོགས་བརྙེས། དེ་ནས་སྟག་མོ་དེས་བྱང་ཆུབ་སེམས་དཔའི་ལུས་ཁྲག་གིས་སྦགས་པ་ལ་བལྟས་ནས་ཡུད་ཙམ་གྱིས་ཤ་དང ། ཁྲག་མེད་པར་རུས་པ་ཙམ་ཞིག་ལུས་པར་བྱས་སོ། །དེ་ནས་སྒྲ་ཆེན་པོས་ས་གཡོས་པ་དེ་ལ་བསམས་ནས་ལྷ་ཆེན་པོ་ལ་འདི་སྐད་ཅེས་སྨྲས་སོ། །ཇི་ལྟར་ཕྱོགས་བཅུར་རྒྱ་མཚོ་མཐར་ཐུག་རྒྱ་མཚོར་བཅས་པ་ཡི། །ས་འདི་རབ་ཏུ་གཡོས་ཤིང་ཉི་མའང་འོད་ནི་མེད་གྱུར་ལ། །མེ་ཏོག་ཆར་པ་འབབ་ཅིང་ཁོ་པོའི་ཡིད་ཀྱང་འཁྲུགས་པས་ན། །ད་གཟོད་བདག་གི་ནུ་བོས་རང་གི་ལུས་ནི་བཏང་ཡང་དག་།ལྷ་ཆེན་པོས་སྨྲས་པ། དེ་ནི་ཇི་ལྟར་སྙིང་རྗེའི་ཚིག་སྨྲ་ལ། །བཀྲེས་དང་ལྡན་ཞིང་སྡུག་བསྔལ་བརྒྱས་གཙེས་པ། །ཤིན་
394b
ཏུ་ཉམ་ཆུང་རང་གི་བུ་ལ་ཡང ། །ཟ་བར་ཆས་ལ་ལྟ་བས་བདག་ཀྱང་དོགས། །དེ་ནས་རྒྱལ་བུ་གཞོན་ནུ་དེ་གཉིས་རབ་ཏུ་མྱ་ངན་གྱིས་ནོན་ནས་མཆི་མས་མིག་གང་སྟེ་ལམ་དེ་ཉིད་ལ་སླར་ལོག་ནས་སྟག་མོའི་དྲུང་དུ་ཕྱིན་པ་དང ། གོས་ཐམས་ཅད་ནི་འོད་མའི་ཡལ་ག་དག་ལ་གཟར། རུས་པ་རྣམས་ནི་བྱེ་ཞིང་བྲལ། ཁྲག་ནི་རྫབ་དུ་གྱུར།་སྐྲ་ནི་ཕྱོགས་དང ། ཕྱོགས་མཚམས་སུ་འཐོར་བ་མཐོང་ངོ ། །མཐོང་ནས་ཀྱང་བརྒྱལ་ཏེ་རུས་པའི་སྟེང་དུ་འགྱེལ་ནས་རིང་ཞིག་ལོན་པ་དང ། འདུ་ཤེས་རྙེད་དེ་ལངས་ནས་ལག་པ་བསྒྲེང་སྟེ་ཉམ་ཐག་པའི་སྒྲ་ཕྱུང་ངོ ། །ཀྱེ་མའོ་ནུ་བོ་སྡུག་པ་དང་ནི་རྒྱལ་པོ་དང ། །དེ་བཞིན་དུ་ནི་བུ་ལ་རབ་ཏུ་གདུང་བའི་མ། །པདྨ་འདྲ་བའི་མིག་རིང་ཁྱོད་ཀྱིས་གར་བཞག་ཅེས། །མ་ནི་བདག་ཅག་ལ་ཡང་ཐ་ཆུང་འདྲི་བར་འགྱུར། །ཀྱེ་མ་བདག་ཅག་གཉིས་ནི་ས་ཕྱོགས་འདི་ཉིད་དུ། །ཤི་ན་ལེགས་ཀྱི་གསོན་པ་དེ་ལྟ་མ་ཡིན་ནོ། །སྙིང་སྟོབས་ཆེན་པོ་མེད་པར་གྱུར་པས་བདག་ཅག་ལ། །ཕ་མ་དག་གིས་ཇི་ལྟར་ལྟོ་བ་སྟེར་བར་འགྱུར། །དེ་ནས་རྒྱལ་བུ་གཞོན་ནུ་དེ་གཉིས་སྙིང་རྗེ་རྗེའི་སྐད་དུ་རྣམ་པ་མང་པོར་དུས་ནས་དོང་ངོ ། །དེ་ནས་རྒྱལ་བུ་གཞོན་ནུའི་རིམ་གྲོ་པ་རྣམས་ཀྱང་གཞོན་ནུ་ཚོལ་ཞིང་ཕྱོགས་དང ། ཕྱོགས་མཚམས་སུ་རྒྱུག་པ་དང ། གཅིག་
395a
༄#། །གིས་གཅིག་མཐོང་ནས། གཞོན་ནུ་ག་རེ། གཞོན་ནུ་ག་རེ་ཞེས་འདྲིའོ། །དེའི་ཚེ་བཙུན་མོ་མལ་ན་ཉལ་བའི་རྨི་ལམ་ན་སྡུག་པ་དང་བྲལ་བར་རྨིས་པ་ལ། འདི་ལྟ་སྟེ། ནུ་མ་གཉིས་བཅད་པ་དང ། སོ་ཕྱུང་བ་དང ། ཐི་བའི་ཕྲུག་གུ་སྐྲག་པ་གསུམ་ཞིག་རྙེད་པ་ལས་གཅིག་ཁྲས་ཁྱེར་བར་རྨིས་སོ། །དེ་ནས་བཙུན་མོ་ས་གཡོས་པས་སྙིང་དངངས་ཏེ་མོད་ལ་སད་ནས་སེམས་པ་ལ་ཞུགས་ཏེ། འབྱུང་པོའི་རྟེན་མ་རྒྱ་མཚོའི་གོས་ཅན་འདི་ནི་ཀུན་ཏུ་རབ་གཡོ་ཅི་ཞིག་གུ། །ཉི་མའི་འོད་ཟེར་མེད་པར་གྱུར་པས་ང་ཡི་སྙིང་ལ་མྱ་ངན་འགྱུར་བ་སྟོན། །ང་ཡི་ལུས་ནི་ཞུམ་ཞིང་མིག་ཀྱང་གཡོ་ལ་རང་གི་ནུ་མ་བཅད་རྨིས་པ། །ང་ཡི་བུ་རྣམས་ནགས་ཁྲོད་འདིར་ནི་རྩེར་དོང་བ་ལ་དགེ་བར་འགྱུར་རམ་ཀྱེ། །དེ་ནས་དེ་སྙམ་དུ་བསམས་པ་དང ། བྲན་མོའང་སྙིང་མྱོས་ཏེ་འོངས་ནས་བཙུན་མོ་ལ་སྨྲས་པ། ཇོ་མོ། གཞོན་ནུའི་རིམ་གྲོ་པ་དག་གཞོན་ནུ་ཚོལ་ཞིང་མཆིས་ན་ཇོ་བོ་སྟོར་ཅེས་གདའོ། །དེ་སྐད་ཅེས་ཐོས་མ་ཐག་ཏུ་བཙུན་མོའི་སྙིང་འདར་ཞིང་མིག་དང ། གདོང་མཆི་མས་གང་སྟེ་རྒྱལ་པོའི་གན་དུ་སོང་ནས་སྨྲས་པ། ལྷ། བདག་གི་བུ་སྡུག་པ་སྟོར་ཅེས་ཐོས་སོ། །རྒྱལ་པོའང་སྙིང་འདར་ཞིང་ཤིན་ཏུ་མྱོས་ཏེ། ཀྱི་ཧུད། བདག་གི་བུ་སྡུག་པ་དང་བྲལ་
395b
བ་ལྟ་ཞེས་སྨྲས་སོ། །དེ་ནས་རྒྱལ་པོས་བཙུན་མོ་དབུགས་དབྱུང་བའི་ཕྱིར། ང་གཞོན་ནུ་བཙལ་བ་ལ་ནན་ཏན་དུ་བྱེད་ཀྱི་བཟང་མོ། མྱ་ངན་མ་བྱེད་ཅིག་།དེར་གཞོན་ནུ་ཚོལ་བ་ལ་ཞུགས་པ་དང ། སྐྱེ་བོའི་ཚོགས་དག་རོང་རོང་པོར་གྱུར་ཏོ། །དེ་ནས་རིང་པོ་མ་ལོན་པར་རྒྱལ་པོས་རྒྱལ་བུ་གཞོན་ནུ་གཉིས་རྒྱང་རིང་པོ་ནས་འོང་བ་མཐོང་ངོ ། །མཐོང་ནས་ཀྱང་སྨྲས་པ། གཞོན་ནུ་དེ་དག་ནི་འོང་ན་ཐམས་ཅད་ནི་མ་ཡིན་ཏེ། ཀྱི་ཧུད། བུ་དང་བྲལ་བ་ཞེས་བྱ་བ་ནི་སྡུག་བསྔལ་པའོ། །ཇི་ལྟར་བུ་དང་བྲལ་བར་གྱུར་ན་ཡིད་ནི་མི་བདེ་བ་མི་རྣམས་བུ་རྙེད་པ་ནི་དེ་ལྟར་དགའ་བ་མ་ཡིན་ནོ། །འཇིག་རྟེན་ན་ནི་གང་དག་བུ་མེད་པ་དང་ཤི་བའམ། །མི་རྣམས་གང་དག་བུ་གསོན་དེ་དག་བདེ་བ་ཡིན་ནམ་ཅི། །དེ་ནས་བཙུན་མོ་ཤིན་ཏུ་མྱ་ངན་གྱིས་ནོན་ནས་རྔ་མོ་གནད་དུ་བསྣུན་པ་བཞིན་དུ་ཤིན་ཏུ་མི་བཟད་པའི་སྒྲ་བྱུང་ངོ ། །དེ་ལྟར་བུ་གསུམ་དག་ནི་གཡོག་གི་ཚོགས་བཅས་ཏེ། །མེ་ཏོག་རྣམས་ཀྱིས་གང་བའི་ནག་ཁྲོད་ཞུགས་པ་ལས། །བདག་གི་བུ་དགེ་ཐ་ཆུང་འོངས་པར་མ་གྱུར་ན། །བདག་གི་སྙིང་དང་འདྲ་བའི་ཐ་ཆུང་དེ་ག་རེ། །དེ་ནས་དེ་གཉིས་ལྷགས་པ་དང ། རྒྱལ་པོས་བུ་ལ་དྲིས་པ། ཁྱེའུ་ཐ་ཆུང་ག་རེ་ཞེས་གཞོན་ནུ་གཉིས་ལ་དྲིས་པ་དང ། དེ་ནས་མྱ་ངན་གྱིས་ཉམ་ཐག་ཅིང་མིག་མཆི་མས་གང་སྟེ་རྐན་དང །
396a
༄#། །མཆུ་དང ། ཁ་དང ། སོ་བསྐམས་ནས་ཅང་མི་ཟེར་རོ། །བཙུན་མོས་སྨྲས་པ། ཁོ་མོའི་བུ་སྡུག་ཐ་ཆུང་དེ་ག་རེ། ཁོ་མོའི་སྙིང་འདི་གསལ་ཐུག་གྱུར་ཅིང ། །ལུས་ནི་མི་བཟད་རབ་ཏུ་གཟིར་གྱུར་ཏེ། །ཁོ་མོའི་དྲན་པ་ཉམས་གྱུར་མྱུར་དུ་སྨྲོས། །དེ་ནས་གཞོན་ནུ་དེ་གཉིས་ཀྱིས་ཇི་ལྟར་གྱུར་པ་དེ་ཞིབ་ཏུ་སྨྲས་སོ། །དེ་ཐོས་མ་ཐག་ཏུ་རྒྱལ་པོ་དང ། བཙུན་མོ་མྱོས་བར་གྱུར་ཏེ་མྱོས་པ་སངས་ནས་སྙིང་རྗེ་རྗེའི་སྐད་དུ་ངུ་ཞིང་ཕྱོགས་དེར་དོང་ངོ ། །དེ་ནས་རྒྱལ་པོ་དང ། བཙུན་མོས་རུས་པ་དེ་དག་ཤ་དང ། ཁྲག་དང ། རྒྱུས་པ་མེད་ཅིང ། སྐྲ་ཕྱོགས་དང ། ཕྱོགས་མཚམས་སུ་འཐོར་བ་མཐོང་ནས་ཤིང་རླུང་གིས་བཏབ་པ་བཞིན་དུ་འགྱེལ་ཏོ། །དེ་ནས་མདུན་ན་འདོན་པ་དང ། བློན་པོ་དེ་དག་དེ་ལྟར་གྱུར་པ་དེ་མཐོང་ནས། ཆུ་དང ། རི་མ་ལ་ཡའི་ཙནྡན་གྱི་ལྡེ་གུས་རྒྱལ་པོ་དང ། བཙུན་མོའི་ལུས་སིམ་པར་བྱས་སོ། །དེ་ནས་རིང་ཞིག་ལོན་པ་དང་འདུ་ཤེས་རྙེད་ནས་རྒྱལ་པོ་ལངས་ཏེ་སྙིང་རྗེ་རྗེའི་སྐད་དུ་འབོད་པ། ཀྱི་ཧུད་བུ་སྡུག་ཡིད་འོང་མཐོང་དགའ་བ། །འཆི་བདག་དབང་དུ་ཅི་ཕྱིར་མྱུར་དུ་སོང ། །འཆི་བདག་ཅི་ཕྱིར་ང་ལ་སྔར་མ་འོངས། །དེ་ལ་སྡུག་བསྔལ་འདི་ལས་གཞན་མི་འབྱུང ། །བཙུན་མོའང་མྱོས་
396b
པ་ལས་སངས་ནས། སྐྲ་ཞིག་ཅིང་ལག་པ་གཉིས་ཀྱིས་བྲང་ལ་བརྡུངས་ཏེ་ཉ་ཐང་ལ་ཕྱུང་བ་བཞིན་དུ་སའི་སྟེང་དུ་འགྲེ་ལྡོག་ཅིང་མ་ཧེ་བེའུ་སྟོར་བ་དང ། རྔ་མོ་རྡེའུ་སྟོར་བ་བཞིན་དུ་སྙིང་རྗེ་རྗེའི་སྐད་དུ་ངུའོ། །ཀྱི་ཧུད་སྡུག་ཅིང་གཅེས་པའི་བུ་ནི་པདྨ་འདི། །སུ་ཡིས་ས་ཡི་སྟེང་དུ་བཤིག་ནས་རབ་ཏུ་གཏོར། །ཡིད་འོང་མིག་ལྡན་ཟླ་འདྲའི་བཞིན་ཅན་བདག་གི་བུ། །བདག་གི་དགྲ་བོ་གང་གི་དེ་རིང་ས་འདིར་བཅོམ། །ཀྱི་ཧུད་ས་འདིར་བུ་མཆོག་བསད་མཐོང་བ། །ལུས་འདི་ཅི་ཕྱིར་དེ་རིང་ཞིག་མ་གྱུར། ། སྡུག་བསྔལ་འདི་འདྲ་མཐོང་ཡང་མ་གས་པ། །བདག་གི་སྙིང་འདི་ལྕགས་ནི་ཡིན་ཡང་དག་།དེ་རིང་རྨི་ལམ་དུ་ནི་བདག་གི་ནུ་མ་འགའ་ཞིག་གིས་ནི་རལ་གྲིས་བཅད། །སོ་ཡང་ཕྱུང་བས་དེ་རིང་བདག་གི་བུ་སྡུག་དེ་ནི་མྱུར་དུ་མ་རུང་གྱུར། །བདག་གིས་ཐི་བའི་ཕྲུ་གུ་གསུམ་ཞིག་རྙེད་པ་གཅིག་འདིར་ཇི་ལྟར་ཁྲས་ཁྱེར་བཞིན། །བདག་ནི་བུ་གསུམ་དག་གིས་བསྐོར་བ་ལས་ཀྱང་གཅིག་ནི་དེ་རིང་འཆི་བདག་ཁྱེར། །ཀྱི་ཧུད་སྡིག་པ་ཅན་གྱི་རྨི་ལམ་དེ་ཡི་འབྲས་བུ་གྲུབ་པ་ནི་འདི་ཡིན་ནོ། །དེ་ནས་རྒྱལ་པོ་དང་བཙུན་མོ་སྙིང་རྗེ་རྗེའི་སྐད་དུ་རྣམ་པ་མང་པོ་སྨྲེ་ཞིང་རྒྱན་ཐམས་ཅད་བཀྲོལ་ནས། སྐྱེ་བོའི་ཚོགས་ཆེན་པོ་དང་ལྷན་ཅིག་ཏུ་བུའི་རུས་པ་ལ་མཆོད་པ་བྱས་ནས་
397a
༄#། །གཞོན་ནུའི་རུས་པ་རྣམས་ས་ཕྱོགས་འདིར་བཞག་གོ། ཀུན་དགའ་བོ། དེའི་ཚེ་དེའི་དུས་ན་རྒྱལ་བུ་གཞོན་ནུ་སྙིང་སྟོབས་ཆེན་པོ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་སྙིང་སྟོབས་ཆེན་པོ་ཞེས་བྱ་བར་གྱུར་ཏོ། །ཀུན་དགའ་བོ། འདོད་ཆགས་དང ། ཞེ་སྡང་དང ། གཏི་མུག་ལས་ཡོངས་སུ་མ་གྲོལ་བ་དེའི་ཚེའང་སེམས་ཅན་དམྱལ་བ་ལ་སོགས་པའི་སྡུག་བསྔལ་ལས་ངས་འགྲོ་བ་མཐའ་དག་ལ་ཕན་བཏགས་ནས་སྐྱོན་ཐམས་ཅད་དང་བྲལ་ཏེ་ཡང་དག་པར་རྫོགས་པར་སངས་རྒྱས་པ་ད་ལྟར་ལྟ་སྨོས་ཀྱང་ཅི་དགོས། དེ་ལྟར་སེམས་ཅན་རེ་རེའི་ཕྱིར་ཡང་སེམས་ཅན་དམྱལ་བ་རྣམས་སུ་བསྐལ་པར་གནས་པར་སྤྲོ་ཞིང་སྐྱེ་བོའི་འཁོར་བ་ལས་རྣམ་པར་གྲོལ་ལོ། །སེམས་ཅན་གྱི་སྙིང་པོས་ཤིན་ཏུ་བྱ་དཀའ་བ་རྣམ་པ་སྣ་ཚོགས་དུ་མས་འགྲོ་བ་མཐའ་དག་ལ་ཕན་བཏགས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་མཆོག་འདི་ཡོངས་སུ་ཚོལ་བ་ན། །བསྐལ་བ་མང་པོར་ངས་ནི་ལུས་བཏང་སྟེ། །ཇི་
397b
ལྟར་རྒྱལ་པོ་དང་ནི་རྒྱལ་བུར་གྱུར། །དེ་ལྟར་ངས་ནི་ལུས་རྣམས་ཡོངས་སུ་བཏང ། །སྔོན་གྱི་ཚེ་རབས་རྣམས་ནི་རྗེས་དྲན་ཏེ། །ཤིང་རྟ་ཆེན་པོ་ཞེས་བྱའི་རྒྱལ་པོ་བྱུང། །དེ་ལ་བུ་ནི་གཏོང་བ་ཆེ་ལྡན་པ། །སྙིང་སྟོབས་ཆེ་ཞེས་བྱ་བ་དམ་པ་ཡོད། །དེ་ལ་ཕུ་བོ་དག་ནི་གཉིས་ཡོད་དེ། །མིང་ནི་སྒྲ་ཆེན་པོ་དང་ལྷ་ཆེན་པོ། །སྤུན་ཚོགས་དེ་དག་ནགས་ཚལ་ཁྲོད་དུ་དོང ། །དེ་དག་སྟག་མོ་བཀྲེས་པས་གཟིར་བ་མཐོང ། །དེ་ལ་སེམས་ཅན་མཆོག་དེ་སྙིང་རྗེ་སྐྱེས། །སྟག་མོ་འདི་ནི་བཀྲེས་སྐོམ་གཟིར་བས་ན། །བདག་བུ་དེ་དག་ཟ་བར་འགྱུར་འོང་གི། །དེ་ལྟར་བདག་ལུས་ད་ནི་བཏང་བར་བྱ། །ཤིང་རྟ་ཆེ་ལ་བུ་ནི་སྙིང་སྟོབས་ཆེ། །སྟག་མོ་བཀྲེས་མཐོང་སྟག་ཕྲུག་རྣམས། །ཐར་བར་བྱ་ཕྱིར་སྙིང་རྗེ་ཡིས། །རི་ངོས་གཟར་བ་མཆོངས་པ་དང ། །ས་ནི་རི་དང་བཅས་སུ་གཡོས། །བྱ་ཚོགས་རྣམ་མང་རྣམ་པར་འཐོར། ། རི་དྭགས་ཚོགས་སྐྲག་འཇིག་རྟེན་འདི། །མུན་པས་ཐིབས་པོར་གནས་པར་གྱུར། །དེ་ཡི་ཕུ་པོ་སྒྲ་ཆེན་དང ། །དེ་བཞིན་ལྷ་ཆེན་དེ་གཉིས་ཀྱིས། །ནགས་ཚོགས་ཆེན་པོ་དེར་བལྟས་ན། །སྙིང་སྟོབས་ཆེན་པོ་མ་རྙེད་ནས། །ཤིན་ཏུ་མྱ་ངན་ཟུག་རྔུའི་སྙིང ། །དྲན་མེད་ནགས་ཀྱི་ནང་ན་རྒྱུ། །ནུ་པོ་དེ་ནི་ཡོངས་ཚོལ་ཞིང ། །
398a
༄#། །གདོང་ལ་མཆི་ཟག་ནགས་ཁྲོད་རྒྱུ། །སྒྲ་ཆེན་དེ་བཞིན་ལྷ་ཆེན་པོ། །རྒྱལ་བུ་གཞོན་ནུ་དེ་དག་གཉིས། །སྟག་མོ་ཉམ་ཆུང་གར་ཉལ་བ། །དེར་ནི་ཉེ་བར་སོང་བ་དང ། །སྟག་མོ་དང་ནི་སྟག་ཕུག་གི། །སྟག་གི་མཆུ་ལ་ཁྲག་ཆགས་མཐོང ། །སྐྲ་དང་རུས་པ་ཅུང་ཟད་ཅིག་།ས་ལ་རྣམ་པར་འཐོར་བ་མཐོང ། །དེ་ཡི་ཁྲག་གི་ཐིགས་པ་ནི། །ཉུང་ཞིག་ས་ལ་ཡོད་པར་གྱུར། །རྒྱལ་པོའི་བུ་ནི་དེ་གཉིས་ཀྱིས། །ཁྲག་ཆགས་པ་ཡི་ས་དེ་མཐོང ། །རབ་ཏུ་བརྒྱ་ལ་ཏེ་ས་འདི་ལ། །འགྱེལ་ནས་ཡིད་ནི་ཉམས་པར་གྱུར། །ལུས་རྣམས་ལ་ནི་རྡུལ་གྱི་གོས། །དྲན་དབང་ཉམས་ཤིང་སེམས་ཀྱང་མྱོས། །དེ་དག་གི་ནི་འཁོར་རྣམས་ཀྱང ། །སྙིང་རྗེར་ངུ་ཞིང་མྱ་ངན་ནོན། །དེ་དག་ཆུས་ནི་རབ་འཐོར་ཞིང ། །ལག་པ་བསྒྲེང་སྟེ་དུ་ཞིང་གནས། །དེ་ནི་འགྱེལ་མ་ཐག་ཏུ་ཡང ། །བཙུན་མོ་གཅེས་མཆོག་བསྐྱེད་པའི་མ། །བུད་མེད་དག་ནི་ལྔ་བརྒྱ་དང ། །ཕོ་བྲང་ནང་ན་དེར་འདུག་བ། །ནུ་སོར་གཉིས་ཀའི་རྩེ་མོ་ནས། །འོ་མ་ཁྲག་ཏུ་འབྱུང་ཞིང་འཛག་།དེ་ཡི་ལུས་དང་ཡན་ལག་
398b
ཀུན། །ཁབ་ཀྱིས་བཙགས་པ་བཞིན་དུ་ཚ། །སྙིང་ནི་རབ་ཏུ་མྱ་ངན་གང ། །བུ་བྲལ་མྱ་ངན་དྲག་མངས་ཕོག་།རྒྱལ་པོའི་གན་དུ་ཉེར་སོང་སྟེ། །མྱ་ངན་རབ་\?\་གདུང་ཡིད་མི་དགའ། །སྙིང་རྗེའི་སྒྲ་ཡིས་རབ་དུ་ཞིང ། །རྒྱལ་པོ་ཤིང་རྟ་ཆེ་ལ་སྨྲས། །མི་དབང་རྒྱལ་པོ་བདག་ལ་གསོན། །བདག་ལུས་མྱ་ངན་མ་ཡིས་ཚིག ། བདག་གི་ནུ་སོར་རྩེ་གཉིས་ནས། །འོ་མ་ཁྲག་ཏུ་རབ་ཏུ་འབྱུང ། །བདག་ལུས་ཁབ་ཀྱིས་བཙགས་བཞིན་ཚ། །བདག་གི་སྙིང་ཡང་གསལ་ཐུག་།ཇི་ལྟར་སྡུག་པའི་བུ་རྣམས་ནི། །ཕྱིན་ཆད་མི་མཐོང་འདི་འདྲའི་ལྟས། །བདག་གི་བུ་རྣམས་དེ་ལྟར་འཚལ། །ཐུགས་རྗེ་མཛོད་དེ་བདག་སྲོག་སྩོལ། །དེ་རིན་བདག་གི་རྨི་ལམ་ན། །ཐི་བའི་ཕྲུ་གུ་གསུམ་རྙེད་ན། །བདག་གི་ཐི་བའི་ཕྲུ་གུ་ནི། །སྡུག་ཅིང་ཡིད་འོང་གང་ལགས་པ། །དེར་ནི་ཁྲ་མཆིས་བདག་གི་ནི། ། ཐི་བ་ཕྲུ་གུ་ད་ཁྲས་འཚལ། །བདག་གི་རྨི་ལམ་འདི་འདྲ་ཡི། །མྱ་ངན་སྙིང་འདིར་རབ་ཏུ་ཞུགས། །སེམས་ནི་མྱ་ངན་རབ་གདུངས་པས། །བདག་ནི་རིང་པོར་མི་ཐོགས་འགུམ། །བདག་གི་བུ་རྣམས་དེ་ལྟར་འཚལ། །ཐུགས་རྗེས་ལྡན་པ་བདག་སྲོག་རྩོལ། །དེ་སྐད་སྨྲས་ནས་བཙུན་མོ་མཆོག་།བརྒྱལ་ནས་ས་
399a
༄#། །དེར་འགྱེལ་བར་འགྱུར། །དྲན་པའི་དབང་པོ་རྣམ་པར་ཉམས། །སེམས་ཀྱང་སྟོར་ཅིང་དྲན་པ་མེད། །བཙུན་མོའི་འཁོར་ཚོགས་ཐམས་ཅད་ཀྱང ། །སྙིང་རྗེའི་སྐད་ཀྱི་རབ་ཏུ་དུ། །བཙུན་མོ་དམ་པ་བརྒྱལ་གྱུར་ཏེ། །ས་ལ་འགྱེལ་བ་མཐོང་ནས་ནི། །དེ་མ་ཐག་ཏུ་རྒྱལ་དབང་སྟེ། །བུ་དང་བྲལ་བའི་མྱ་