rKTs


H3

(e-text produced by ACIP)

see text in transliteration
Ca30a
།།རྒྱ་གར་སྐད་དུ། བི་ན་ཡ་བི་བྷང་ག། བོད་སྐད་དུ། འདུལ་བ་རྣམ་པར་འབྱེད་པ། བམ་པོ་དང་པོ། དཀོན་མཆོག་གསུམ་ལ་ཕྱག་འཚལ་ལོ། །དུལ་བའི་རྒྱལ་པོ་རྗེ་ཡི་རིགས་སུ་འཁྲུངས། །སློབ་མ་འདུལ་མཛད་ཉེས་པ་རབ་ཐུལ་པ། །སངས་རྒྱས་འདུལ་བའི་གཙོ་ལ་ཕྱག་འཚལ་ཏེ། །འདུལ་བའི་བསྔགས་བ་ཅུང་ཟད་བརྗོད་པར་བྱ། །ཕ་རོལ་མ་
Ca30b
མཐོང་གཏིང་རྟོགས་མ་གྱུར་ཅིང ། །གླགས་པའི་མུན་གནག་སློབ་དཔོན་ཚོགས་རྣམས་ཀྱིས། །དབྱེ་བས་ཐ་དད་འདུལ་བ་རྒྱ་མཚོ་ལ། །ཡོན་ཏན་ཀུན་བསྟོད་རྩོལ་བློ་བདག་ལ་མེད། །ཇི་ལྟར་འདི་ན་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། །དེ་བཞིན་དམ་ཆོས་ཚོགས་རྣམས་ཀུན་གྱི་ཡང ། །རྒྱུ་དང་རྩ་བ་འདུལ་བ་ཡིན་པར་གསུངས། །ཇི་ལྟར་ས་ནི་སྐྱེ་རྒུ་རྣམས་ཀྱི་གཞི། །དེ་ལས་འབྲུ་རྣམས་སྐྱེ་བར་འགྱུར་བ་ལྟར། །དེ་བཞིན་འདུལ་བའང་སྡོམ་བརྩོན་རྣམས་ཀྱི་གཞི། །དེ་བཞིན་དེ་ལས་བསོད་ནམས་རྣམས་ཀྱང་སྐྱེ། །ཚུལ་ཁྲིམས་ཡོན་ཏན་རྣམས་ཀྱི་གནས་སུ་དགོངས།། དེ་ཡི་གནས་ནི་འདུལ་བ་ཡིན་པར་གསུངས། །འདི་ལ་གནས་པར་གྱུར་ན་མཐར་ཕྱིན་འགྱུར། །འདི་ལ་མི་གནས་མཐར་ཕྱིན་ག་ལས་འགྱུར། །ཇི་ལྟར་ཆུ་ལོན་མི་ཕྱེད་སྲ་བ་ཡིས། །ཆུ་ཀླུང་ཆེ་ཡང་ཟློག་པར་འགྱུར་བ་ལྟར། །དེ་བཞིན་འདུལ་བ་འཕགས་པ་ཆུ་ལོན་འདིས། །ཚུལ་ཁྲིམས་འཆལ་བའི་ཆུ་ཀླུང་ཟློག་པར་འགྱུར། །སངས་རྒྱས་རྣམས་དང་རང་རྒྱལ་རྣམས་ཀྱིས་ཀྱང ། །བྱང་ཆུབ་གང་བརྙེས་ཐུབ་སློབ་རྣམ་དག་པའི། །སེམས་ཅན་དགྲ་བཅོམ་ཡོན་ཏན་ལྡན་པ་རྣམས། །དེ་ལའང་རྒྱུ་ནི་འདུལ་བ་ཡིན་པར་གསུངས། །ཇི་སྲིད་འགྲོ་འདིར་རྒྱལ་བ་ཐམས་ཅད་ཀྱི། མཛོད་མཆོག་འདུལ་བ་རྫོགས་པ་འདི་གནས་པ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང ། །བཟློག་པར་གྱུར་ན་ཞི་བ་ཐོབ་པར་འགྱུར། །སངས་རྒྱས་མི་བཞུགས་འཇིག་རྟེན་ཚིགས་བཅད་དང ། །མདོ་སྡེ་ཡན་
Ca31a
༄#། །ལག་དེ་དང་དེ་དག་སྤྱོད། །བསླབ་འཇུག་མེད་ན་འདུལ་བའང་མེད་འགྱུར་བས། །དེ་ཕྱིར་རྒྱལ་བ་དག་པས་ཆོས་འདི་དཀོན། །འཇོག་བྲལ་སེམས་གླང་ལྕགས་ཀྱོ་འདི་ཡིན་ཏེ། །གདུལ་བྱ་མ་དུལ་བ་ཡི་སྲབ་འདི་ཡིན། །ར་བའི་མཚམས་ཀྱི་འོབས་དང་འདྲ་བ་སྟེ། །ཟག་བ་ཀུན་གྱི་ཆུ་ལོན་འདུལ་བ་ཡིན། །རྒྱལ་བ་སྟོན་པ་དེ་ཡི་བསྟན་བཅོས་གང ། །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །གཉིས་འགྱུར་ཕྱག་བྱ་སངས་རྒྱས་ཆོས་གཅིག་བཞིན། །གང་ལ་བརྟེན་ཏེ་གནས་པའི་སངས་རྒྱས་རྣམས། །དེ་ལ་གུས་བཅས་རྗེ་སར་བཅས་གྱུར་ཅིང ། །དེ་ནི་མགོན་པས་མགོན་ཡིན་སྐྱབས་གནས་ཡིན། །དེའི་ཕྱིར་རབ་བསྒྲིམས་འདུལ་ལ་ཕྱག་ཚོལ་ཅིག་།གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་འཐོབ། །སྨྱིགས་ཚལ་བྲེགས་པས་ཨ་མྲའི་ཚལ་ཉམས་བཞིན། །འདི་ན་ལ་ལས་རྒྱལ་པོའི་ཚིག་ཆེན་ཡང ། ། འདས་ན་ལན་འགའ་ཆད་པ་འཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་བཟླ་བྱས་ན། །དུད་འགྲོར་འགྲོ་འགྱུར་ཨེ་ལའི་འདབ་ཀླུ་བཞིན། །སོ་སོར་ཐར་བྱ་གང་ཡིན་པ། །སངས་རྒྱས་འདུལ་བ་གངས་ཆེན་མཚོ། །གཏིང་མཐའ་མེད་པ་ཐམས་ཅད་ཀྱི། །གནས་པའི་སྙིང་དང་སྙིང་པོ་ཡིན། །འདི་ནི་དམ་ཆོས་རྒྱལ་པོ་ཡི། །ཆོས་རྣམས་ཀུན་གྱི་འདྲེན་པ་མཆོག་།འདི་ནི་དགེ་
Ca31b
སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཚུལ་ཁྲིམས་འཆལ་བས་ཟིན་རྣམས་ཀྱི། །གདུག་པ་རྣམས་སེལ་སྨན་འདི་ཡིན། །འདི་ནི་ལང་ཚོ་རྣམ་འཁྲུལ་པའི། །རྐང་གཉིས་གཞོན་ནུའི་ལྕགས་ཀྱོ་ཡིན། །མཚོ་བས་ཟབ་པའི་འཁོར་བ་ལས། །སྒྲོལ་བའི་རྒལ་ཐབས་འདི་ཡིན་ཏེ། །འདི་ནི་བཟང་འགྲོར་འགྲོ་བ་ཡི། །ངེས་པའི་ཆུ་ལོན་ཟམ་པ་ཡིན། །འདི་ནི་ཉོན་མོངས་ཕམ་བྱེད་ལམ། ། རྒྱལ་པོ་ཡི་ནི་འདྲེན་པ་མཆོག་།འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ང་ནི་མྱ་ངན་འདས་གྱུར་ན། འདི་ནི་ཁྱེད་ཀྱི་སྟོན་པའོ་ཞེས། །རང་བྱུང་ཉིད་ཀྱིས་གུས་བཅས་པར། །ནན་ཏན་དགེ་སློང་ཚོགས་མདུན་བསྟོད། །འདུལ་འདི་སོ་སོར་ཐར་པ་དེའི། །རྣམ་འབྱེད་ཡིན་པར་དགོངས་པས་ན། །ཐར་འདོང་རྣམས་ཀྱིས་གུས་བྱས་ཏེ། །འདི་ནི་ནན་ཏན་མཉན་པར་བྱ། །འདུལ་བ་ལ་བསྟོད་པ་རྫོགས་སོ།། །།བསྐལ་པ་བྱེ་བ་རྣམས་སུ་ཡང ། །འདུལ་བ་ཐོས་པར་འགྱུར་བ་དང ། །གཟུང་དང་འཛིན་པ་རྙེད་དཀའ་སྟེ། །བསྒྲུབ་པའང་ཤིན་ཏུ་རྙེད་པར་དཀའ། །སངས་རྒྱས་རྣམས་ནི་འབྱུང་བ་དང ། །ཆོས་བསྟན་པ་ཡང་བདེ་བ་ཡིན། །དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །འཕགས་པ་རྣམས་ནི་མཐོང་བ་བདེ།། དམ་པ་དག་དང་འགྲོགས་པ་བདེ། །བྱིས་པ་རྣམས་ནི་མ་མཐོང་ན། །རྟག་ཏུ་བདེ་བ་ཉིད་དུ་འགྱུར། །ཚུལ་ཁྲིམས་ལྡན་པ་མཐོང་བ་བདེ། །མང་དུ་ཐོས་པ་མཐོང་བ་བདེ། །ཡང་སྲིད་རྣམ་པར་གྲོལ་
Ca32a
༄#། །པ་ཡི། །དགྲ་བཅོམ་པ་དག་མཐོང་བ་བདེ། །འཇུག་ངོགས་བདེ་བའི་ཆུ་ཀླུང་བདེ། །ཆོས་ལ་གོམས་པའི་སྐྱེ་བོ་བདེ། །ཤེས་རབ་ཐོབ་པར་གྱུར་པ་བདེ། །ང་འོ་ང་རྒྱལ་ཟད་པ་བདེ། །ངེས་པར་བྱས་ཤིང་དབང་པོ་ཐུལ་བ་དག་།དགོན་པ་ཞི་བ་རྣམས་སུ་རྒས་གྱུར་དང ། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ཀྱིས་གནས་པ་བདེ། །ཤཱཀྱ་སེང་གེ་དེ་ལ་ནི། །སོར་མོ་བཅུ་ཡི་ཐལ་སྦྱར་ཏེ། །འདུལ་བ་རབ་ཏུ་གདོན་པར་བྱས། །གདུལ་བའི་དོན་དུ་ང་ལ་ཉོན། །ཐོས་ནས་དྲང་སྲོང་ཆེན་པོ་ཡིས། །ཇི་སྐད་གསུངས་བཞིན་བསྒྲུབ་བྱ་ཞིང ། །ཁ་ན་མ་ཐོ་ཕྲ་རྣམས་ལ། །བརྟུན་ཅིང་བྱེད་པ་ཉིད་དུ་གྱིས། །རྟག་ཏུ་འབད་པས་འདའ་བ་ཡི། །སེམས་རྟ་ཁ་བླན་དཀའ་བ་ལ། །མཐུན་པ་གཟེར་རྣོན་བརྒྱ་བ་ཡི། །སྲབ་ནི་འདུལ་བ་འདི་ཡིན་ནོ། །ཆེ་བ་གང་དག་ངག་ཙམ་གྱིས། །ལྡོག་ཅིང་མཚམས་ལས་མི་འདའ་བ། །དེ་དག་མི་རྟ་བཟང་པོ་སྟེ། །ཉོན་མོངས་གཡུལ་ལས་ངེས་རྒྱལ་འགྱུར། །སུ་ལ་སྲབ་འདི་མེད་པ་དང ། །ནམ་དུའང་འདོད་པར་མི་འགྱུར་ལ། །དེ་དག་ཉོན་མོངས་གཡུལ་གྱིས་དཀྲུགས། །འཇོག་བྲལ་རྣམ་པར་འཁྱམ་པར་འགྱུར། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལོ་བཅུ་གཉིས་སུ་སྐྱོན་མེད་ཅིང་ཆུ་བུར་མེད་ལ་བཅོམ་ལྡན་འདས་ཀྱིས་ཉན་ཐོས་རྣམས་ཀྱི་སོ་སོར་ཐར་པའི་མདོ་གདོན་པ་ཡང་མདོར་བསྡུས་ཏེ། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་
Ca32b
གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པའང་ལེགས་པ་ཡིན། །ཡིད་ཀྱི་སྡོམ་པའང་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱི་མི་དགེ་བ་དག་མི་བྱེད་ཅིང ། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བཏོན་པར་གྱུར་ཏོ། །ལོ་བཅུ་གསུམ་ལ་བབ་པ་ན་སངས་རྒྱས་བཅོམ་ལྡན་འདས་ཡུལ་སྤོང་བྱེད་དག་ན་ཀ་ལན་ད་ཀའི་གྲོང་ན་བཞུགས་སོ། །དེའི་ཚེ་ན་ཀ་ལན་ད་ཀའི་གྲོང་ན་ཀ་ལན་ད་ཀའི་བུ་བཟང་བྱིན་ཞེས་བྱ་བ་ཕྱུག་པ། ནོར་མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ་རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིང ། དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག་།མ་བྱིན་པར་ལེན་པ་དང ། འདོད་པ་ལ་ལོག་པར་གཡེམ་པ་དང ། བརྫུན་དུ་སྨྲ་བ་དང ། འབྲུའི་ཆང་དང ། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་
Ca33a
༄#། །བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལོག་གོ་།དེ་དད་པ་སྔ་མ་དེ་ཉིད་རྗེས་སུ་སྤེལ་ཞིང་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས།་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་འདི་ལྟ་སྟེ། སྔོན་ཁྱིམ་པ་བཞིན་དུ་ཉེ་དུ་རྣམས་དང་ལྷན་ཅིག་འདྲེ་ཞིང་གནས་སོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འདི་སྙམ་དུ་སེམས་ཏེ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འདི་ལྟ་སྟེ། སྔོན་ཁྱིམ་པ་བཞིན་དུ་ཉེ་དུ་རྣམས་དང་ལྷན་ཅིག་འདྲེ་ཞིང་གནས་པ་ནི་བདག་གིས་མ་རྙེད་དེ་རྙེད་པ་མ་ཡིན་ཞིང ། ཉེས་པ་རྙེད་དེ་ལེགས་པར་རྙེད་པ་མ་ཡིན་གྱིས། བདག་ཉེ་དུ་རྣམས་དང་འབྲལ་བའི་ཕྱིར་ལྷུང་བཟེད་དང ། ཆོས་གོས་ཐོགས་ཏེ། ལྗོངས་རྒྱུར་འགྲོའོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཉེ་དུ་རྣམས་དང་འབྲལ་བའི་ཕྱིར། ལྷུང་བཟེད་དང ། ཆོས་གོས་ཐོགས་ཏེ། ལྗོངས་རྒྱུར་སོང་ངོ་།། དེའི་ཚེ་ན་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང ། བྱ་བར་སེམས་པ་དཀའ་ན་སློང་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་ངོ ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འདི་སྙམ་དུ་སེམས་ཏེ། ད་ལྟར་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་ལ་
Ca33b
ཟས་སྦྱིན་པ་དང ། བྱ་བར་སེམས་པ་དཀའ་ན། སློང་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་ལ། བདག་ལ་ཉེ་དུ་ལོངས་སྤྱོད་ཆེན་པོ་དང་ལྡན་པ་དག་ཡོད་པས་བདག་ཀ་ལན་ད་ཀའི་གྲོང་དུ་སོང་སྟེ། ཉེ་དུ་རྣམས་ཀྱི་གན་དུ་སོང་ལ་དགེ་འདུན་ལ་ཟས་དག་སྦྱོར་དུ་གཞུག་ཅིང ། དགེ་འདུན་ལ་སྐྱོ་མ་དག་དང་ཐུག་པའི་བཏུང་བ་དག་དང་རྟག་རེས་འཁོར་དག་དང་མགྲོན་དུ་བོས་པ་དག་དང ། བརྒྱད་སྟོན་དང་བཅུ་བཞི་སྟོན་དང་ཉ་སྟོན་དང་སྤྱན་གཟིགས་ཕྲན་ཚེགས་སྦྱོར་དུ་གཞུག་གོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལྗོངས་སུ་ཇི་དགར་འདུག་ནས། ལྷུང་བཟེད་དང་ཆོས་གོས་ཐོགས་ཏེ་ཀ་ལན་ད་ཀའི་གྲོང་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་བའི་ཚེ། ཀ་ལན་ད་ཀའི་གྲོང་དུ་ཕྱིན་ནས་ཀ་ལན་ད་ཀའི་གྲོང་ན་དགོན་པའི་སྤྱིལ་བུ་ན་གནས་སོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཉེ་དུ་རྣམས་ཀྱི་གན་དུ་སོང་སྟེ་ཕྱིན་ནས་དེ་དག་གི་མདུན་དུ་སངས་རྒྱས་དང་ཆོས་དང་དགེ་འདུན་གྱི་བསྔགས་པ་བརྗོད་དེ། དགེ་འདུན་ལ་ཟས་དག་སྦྱོར་དུ་འཇུག་ཅིང ། དགེ་འདུན་ལ་སྐྱོ་མ་དག་དང་ཐུག་པའི་བཏུང་བ་དག་དང་རྟག་རས་འཁོར་དག་དང ། མགྲོན་དུ་བོས་པ་དག་དང ། བརྒྱད་སྟོན་དང་བཅུ་བཞི་སྟོན་དང ། ཉ་སྟོན་དང་སྤྱན་གཟིགས་ཕྲན་ཚེགས་སྦྱོར་དུ་འཛུད་དོ། །དེའི་ཆེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་དགོན་པ་པ་ཆོས་གོས་གསུམ་པ་ཕྱག་དར་ཁྲོད་པ་བསོད་སྙོམས་པ་མཐར་ཆགས་ཀྱིས་རྒྱུ་བར་གྱུར་ཏོ། །དེ་དུས་གཞན་ཞིག་ན་དང་པོ་ཁོ་ནར་དགེ་སློང་གི་དགེ་འདུན་ཐུག་པ་བསོད་པས་
Ca34a
༄#། །ཚིམ་པར་བྱས་ནས་སྔ་དྲོ་ཤམ་ཐབས་བགོས་ཏེ་ལྷུང་བཟེད་དང་ཆོས་གོས་ཐོགས་ནས། ཀ་ལན་ད་ཀའི་གྲོང་དུ་བསོད་སྙོམས་ལ་ཞུགས་པ་ན་མཐར་གྱིས་ཀ་ལན་ད་ཀའི་གྲོང་དུ་བསོད་སྙོམས་ལ་རྒྱུ་བའི་ཚེ་རང་གི་ཁྱིམ་དུ་ཕྱིན་ཏོ། །དེ་རང་གི་ཁྱིམ་ནས་སྦྱིན་པ་མ་ཐོབ་ཕྱིར་གཏོང་བ་མ་ཐོབ་པར་མྱུར་བ་མྱུར་བར་ཕྱིར་སོང་ངོ ། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་བྱ་བ་འགའ་ཞིག་ལ་ཕྱི་རོལ་ཏུ་སོང་བར་གྱུར་ཏོ། །བྲན་མོ་རྙིང་པ་རྒན་མོ་ཞིག་གིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་རང་གི་ཁྱིམ་ནས་སྦྱིན་པ་མ་ཐོབ་ཕྱིར་གཏོང་བ་མ་ཐོབ་པར་མྱུར་བ་མྱུར་བར་ཕྱིར་སོང་བ་མཐོང་ངོ ། །མཐོང་ནས་ཀྱང་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཇོ་མོ་མཁྱེན་པར་མཛོད་ཅིག་།ཇོ་བོ་བཟང་བྱིན་འཕྱི་བ་འཕྱི་བར་རང་གི་ཁབ་ཏུ་བྱོན་ནས་དེ་རང་གི་ཁབ་ནས་སྦྱིན་པ་མ་བརྙེས་སླར་གཏོང་བ་མ་བརྙེས་པར་མྱུར་བ་མྱུར་བར་སླར་བཞུད་དོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་འདི་སྙམ་དུ་སེམས་ཏེ། ཀྱེ་མ་མ་ལ་ཀ་ལན་ད་ཀའི་བུ་བཟང་སྦྱིན་འདོད་པའམ། མངོན་པར་མི་དགའ་བའམ་རྣམ་པར་འཁྱམ་འདོད་པར་གྱུར་ཅིང ། དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟའམ། སྨོད་པའམ། དགེ་སྦྱོང་
Ca34b
གི་ཚུལ་ཡོངས་སུ་གཏོང་འདོད་པའམ། གཅིག་ཏུ་མ་གྱུར་གྲང་སྙམ་དུ་སེམས་ཤིང་རིག་ནས། ཀ་ལན་ད་ཀའི་གྲོང་ནས་བྱུང་སྟེ། ཀ་ལན་ད་ཀའི་བུ་ཚེ་དང་ལྡན་པ་བཟང་སྦྱིན་ག་ལ་བ་དེར་སོང་སྟེ་ཕྱིན་ནས། ཀ་ལན་དཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །བུ་བཟང་བྱིན་གལ་ཏེ་ཁྱོད་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། ཁྱོད་དགེ་སྦྱོང་གི་ཚུལ་ཡོངས་སུ་གཏོང་འདོད་པ་ལྟ་ན། བུ་བཟང་བྱིན་བུད་མེད་རྣམས་ཀྱི་བུད་མེད་ནོར་ཞེས་བྱ་བའམ། བུད་མེད་ཀྱི་བག་རྫོངས་ཞེས་བྱ་བའམ། བུད་མེད་དབང་བའི་རྫས་ཞེས་བྱ་བ་གང་ཡིན་པ་དེ་ནི་ཁྱོད་ཀྱི་མའི་དབྱིག་དང་གསེར་གྱི་ཕུང་པོ་ཆེན་པོ་གང་ལ་མཐའ་གཅིག་ན་འགྲེང་བའི་མིས་མཐའ་གཅིག་ན་འདུག་པའི་མི་མི་མཐོང་ལ། མཐའ་གཅིག་ན་འདུག་པའི་མིས་མཐའ་གཅིག་ན་འགྲེང་བའི་མི་མི་མཐོང་བ་ཡིན་ཏེ། དེ་ནི་ཁྱོད་ཀྱི་མའི་ཡིན་ནོ། །གཞན་ཡང་ཁྱེད་ཀྱི་ཕའི་དབྱིག་དང་གསེར་མཚན་མ་བཏབ་པ་ཡང་བརྒྱ་ཕྲག་དུ་མ་དང ། སྟོང་ཕྲག་དུ་མ་དང ། བརྒྱ་སྟོང་ཕྲག་དུ་མ་དག་ཡོད་ན་གཞན་དང་ཕལ་ལྟ་སྨོས་ཀྱང་ཅི་དགོས། བུ་བཟང་བྱིན་ཚུར་ཤོག་།ཁྱོད་འདུག་ལ་འདོད་པ་ལ་ཡང་ལོངས་སྤྱོད་ཅིང ། སྦྱིན་པ་དག་ཀྱང་བྱིན་ཅིག། བསོད་ནམས་དག་ཀྱང་གྱིས་ཤིག་།དེ་སྐད་ཅེས་སྨྲས་པ་དང ། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་མ་ལ་འདི་སྐད་
Ca35a
༄#། །ཅེས་སྨྲས་སོ། །ཡུམ་བདག་ནི་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འཚལ་ཞིང་དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་འཚལ་བའམ། སྨོད་པའམ། བདག་དགེ་སྦྱོང་གི་ཚུལ་ཡོངས་སུ་གཏོང་བ་མི་བགྱིད་དོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་འདི་སྙམ་དུ་སེམས་ཏེ། བདག་གིས་དེ་སྐད་བྱས་ཀྱང་བུ་བཟང་བྱིན་ཕྱིར་བཟློག་པར་མ་ནུས་ཀྱིས། བདག་ཁྱིམ་དུ་སོང་ལ་འདིའི་བག་སར་སྤད་པར་བྱའོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ཁྱིམ་དུ་སོང་སྟེ། མནའ་མ་ལ་འདི་སྐད་ཅེས་སྨྲས་སོ། །ཀྱེ་སྲུ་ཁྱོད་གང་གི་ཚེ་དུས་ལ་བབ་ཅིང་ཟླ་མཚན་དང་ལྡན་པ་དེའི་ཚེ་ཁོ་མོ་ལ་སྦྲོན་ཅིག། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མས་ཡུམ་བཀའ་བཞིན་འཚལ་ཞེས་སྒྱུག་མོ་ལས་མཉན་ཏོ། །དེ་ནས་དུས་གཞན་ཞིག་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མ་དུས་ལ་བབ་ཅིང ། ཟླ་མཚན་དང་ལྡན་པར་གྱུར་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཡུམ་ངན་བུ་དུས་ལ་བབ་ཅིང ། ཟླ་མཚན་དང་ལྡན་པར་གྱུར་ན། བདག་གིས་ཅི་བགྱི་བ་དེ་མཁྱེན་པར་མཛོད་ཅིག་།སྲུ་དེའི་ཕྱིར་ཁྱོད་ཀྱིས་སྐུ་མཉེ་ཇི་ལྟ་བུས་བསྐུ་མཉེ་བྱས་པ་དང ། ཁྲུས་ཇི་ལྟ་བུས་ཁྲུས་བྱས་
Ca35b
པ་དང ། དྲི་དང་ཕྲེང་བ་རྒྱུ་དང་བདུག་སྤོས་དང ། ཕྱེ་མ་དང་གོས་དང ། རྒྱན་ཇི་ལྟ་བུ་དག་གིས་བརྒྱན་ན་བུ་བཟང་བྱིན་སྔོན་ཁྱིམ་པ་ཉིད་ན་དགའ་བ་དང ། ཡིད་དུ་འོང་བར་གྱུར་པ་དེ་ལྟ་བུའི་སྐུ་མཉེས་སྐུ་མཉེ་གྱིས་ཤིག། དེ་ལྟ་བུའི་ཁྲུས་ཀྱིས་ཁྲུས་གྱིས་ཤིག། དེ་ལྟ་བུའི་དྲི་དང་ཕྲེང་བ་རྒྱུ་དང་བདུག་སྤོས་དང ། ཕྱེ་མ་དང་གོས་དང ། རྒྱན་དག་གིས་བརྒྱན་པར་གྱིས་ཤིག། དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མས་སྒྱུག་མོ་ལས་མཉན་ཏེ། སྐུ་མཉེ་ཇི་ལྟ་བུས་སྐུ་མཉེ་བྱས་པ་དང ། ཁྲུས་ཇི་ལྟ་བུས་ཁྲུས་བྱས་པ་དང ། དྲི་དང་ཕྲེང་བ་རྒྱུ་དང་བདུག་སྤོས་དང ། ཕྱེ་མ་དང ། གོས་དང་རྒྱན་ཇི་ལྟ་བུ་དག་གིས་བརྒྱན་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་སྔོན་ཁྱིམ་པ་ཉིད་ན་དགའ་བ་དང ། ཡིད་དུ་འོང་བར་གྱུར་པ་དེ་ལྟ་བུའི་སྐུ་མཉེས་སྐུ་མཉེ་བྱས། དེ་ལྟ་བུའི་ཁྲུས་ཀྱིས་ཁྲུས་བྱས། དེ་ལྟ་བུའི་དྲི་དང་ཕྲེང་བ་རྒྱུ་དང་བདུག་སྤོས་དང ། ཕྱེ་མ་དང ། གོས་དང་བརྒྱན་དག་གིས་བརྒྱན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཡུམ་ངན་བུ་འདི་འདྲ་ན་བདག་གིས་ཅི་ཞིག་བགྱི། དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་མནའ་མ་དང་ཤིང་རྟ་གཅིག་ཏུ་ཞུགས་ཏེ། ཀ་ལན་ད་ཀའི་གྲོང་ནས་བྱུང་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་གནས་ག་ལ་བ་དེར་སོང་སྟེ་ཕྱིན་ནས་བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ། བཞོན་པ་ལས་བབས་ནས། རྐང་པ་དག་ཁོ་ནས་ཀ་
Ca36a
༄#། །ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་དྲུང་དུ་སོང་ངོ ། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གནས་ཀྱི་ཕྱི་རོལ་བླ་གབ་མེད་པའི་འཆགས་ས་ན་འཆག་ས་ན་འཆག་གོ་།ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །བུ་བཟང་བྱིན་གལ་ཏེ་ཁྱོད་མི་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་པར་མི་འགྱུར་ཞིང ། དགེ་སྦྱོང་གི་ཚུལ་དོན་དུ་མི་གཉེར་བ་མ་ཡིན་པའམ། དགེ་སྦྱོང་གི་ཚུལ་གྱིས་སྒྱིད་ལུག་པ་མ་ཡིན་པའམ། མུས་བྱུང་བ་མ་ཡིན་པའམ། ཐེ་ཚོམ་ཟ་བ་མ་ཡིན་པའམ། སྨོད་པ་མ་ཡིན་པའམ། ཁྱོད་དགེ་སྦྱོང་གི་ཚུལ་ཡོངས་སུ་གཏོང་འདོད་པ་མ་ཡིན་པ་ལྟ་ན། བུ་ཁྱོད་ཀྱི་བག་སར་འདི་དུས་ལ་བབ་ཅིང་ཟླ་མཚན་དང་ལྡན་པར་གྱུར་གྱིས་འདི་ལ་ས་བོན་གྱི་ཆོས་ཅུང་ཞིག་རྗེས་སུ་བྱིན་ཅིག་།ཁྱོད་ལ་བུ་མེད་པའི་ཕྱིར་དབང་པའི་རྫས་ཐམས་ཅད་དེ་བཞིན་དུའམ་ཇི་ལྟར་ཡང་རུང་བས་རྒྱལ་པོས་དབང་དུ་བྱས་པར་གྱུར་ན་མི་རུང་ངོ ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་སྔར་བསླབ་པའི་གཞི་མ་བཅས་ཤིང་ཉེས་པ་མ་མཐོང་ལ་བུད་མེད་ཀྱི་ཡུལ་གཞོན་ནུ་ཁ་དོག་བཟང་བ་ཆགས་པར་གྱུར་པ་མཐོང་ནས། འདོད་ཆགས་ཀྱིས་སེམས་ཟིལ་གྱིས་ནོན་ཅིང་དེ་
Ca36b
འདོད་ཆགས་ཀྱིས་སེམས་ཟིལ་གྱིས་ནོན་པས་ཡོངས་སུ་གདུང་བའི་ལུས་དང ། ཡོངས་སུ་གདུང་བའི་སེམས་དང་ལྡན་ཞིང་དེ་ཡོངས་སུ་གདུང་བཞིན་པའི་ལུས་དང་ཡོངས་སུ་གདུང་བཞིན་པའི་སེམས་ཀྱིས་མ་ལ་འདི་སྐད་ཅེས་སྨྲས་སོ། །ཡུམ་བདག་གིས་དེ་ལྟར་བགྱིར་རུང་ངམ། བུ་བཟང་བྱིན་འདི་ལྟ་སྟེ། ས་བོན་གྱི་ཆོས་ལ་བརྟེན་ནས་ཤིན་ཏུ་རུང་ངོ ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་མ་ལས་མཉན་ཏེ། སྔོན་གྱི་ཆུང་མའི་ལག་པ་གཉིས་ནས་བཟུང་སྟེ། ཕྱོགས་གཅིག་ཏུ་སོང་ནས་ཆོས་གོས་དག་བཞག་སྟེ། དེ་དང་ལྷན་ཅིག་ཏུ་མི་ཚངས་པར་སྤྱོད་པ་འཁྲིག་པའི་ཆེས་ལན་གཉིས་ལན་གསུམ་དུ་བསྟེན་ཏོ། །སེམས་ཅན་སྲིད་པ་ཐ་མས་སྤྱོད་པ་ཚོལ་བ་ཐར་པའི་སྙིང་པོ་བཟུང་བ་མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང ། སྐྱེ་བ་དོན་དུ་མི་གཉེར་བ་ལུས་ཐ་མ་འཛིན་པ་ཞིག་ཀྱང་ལྷའི་རིས་བཟང་པོ་ཞིག་ནས་ཤི་འཕོས་ཏེ། དེ་སྐྱེ་རྒུའི་བདག་མོའི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པས་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ་ཞུགས་པ་ཤེས་པ་དང།་གང་ལས་མངལ་ན་གནས་པ་ཞུགས་པ་དེ་ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་
Ca37a
༄#། །རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་སྒྱུག་མོ་ལ་སྨྲས་པ། ཡུམ་མཁྱེན་པར་མཛོད་ཅིག་།བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་རོ། །དེ་ཡང་ཡིད་དགའ་ཞིང་ཡིད་དགའ་ནས་འདི་སྐད་ཅེས། ཁོ་མོ་ཡུན་རིང་པོ་ནས་མངོན་པར་འདོད་པ་ཚ་བོའི་ངོ་མཐོང་བ་དང ། ཁོ་མོ་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་མོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། བགོ་སྐལ་སྤྱོད་པ་དང ། ཁོ་མོའི་རིགས་བརྒྱུད་ཡུན་རིང་དུ་གནས་པར་འགྱུར་པ་དང ། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུའམ། མང་པོ་ཡང་རུང་བའི་སྦྱིན་པ་དག་སྦྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར། སྟེང་གི་ཁང་བཟང་གི་གཞིར་གཏོགས་པར་གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བཅས་པའི་ཁ་ཟས་ཧ་ཅང་མི་ཁ་བ་དང ། ཧ་ཅང་མི་སྐྱུར་བ་དང ། ཧ་ཅང་ལན་ཚཝ་མི་ཆེ་བ་དང ། ཧ་ཅང་མི་མངར་བ་དང ། ཧ་ཅང་མི་ཚབ་དང ། ཧ་ཅང་མི་བསྐ་བ་དང ། ཁ་བ་དང ། སྐྱུར་བ་དང ། ལན་ཚཝ་དང ། མངར་བ་དང ། ཚ་བ་དང ། བསྐ་བ་རྣམ་
Ca37b
པར་སྤངས་པའི་ཟས་དག་དང ། དོ་ཤལ་དང་སེ་མོ་དོ་དང་རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང ། ཁྲི་ནས་ཁྲིར་དང ། ཁྲིའུ་ནས་ཁྲིའུར་དང ། ཤོད་ཀྱིས་གཞིར་མི་འབབ་པ་དང ། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུད་དོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ་བལྟ་ན་སྡུག་པ་མཛེས་པ་གསལ་བ་གསེར་གྱི་མདོག་འདྲ་བ་མགོ་གདུགས་ལྟ་བུ་དང་ལྡན་པ་ལག་པ་རིང་བ་དཔྲལ་བའི་དབྱེས་ཆེ་བ་སྨིན་མ་འཛར་བ་སྣའི་གཟེངས་མཐོ་བ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ་གང་གི་ཕྱིར་ཁྱེའུ་འདི་ས་བོན་གྱི་ཆོས་ལ་བརྟེན་ཏེ་རྙེད་པ་དེའི་ཕྱིར་ཁྱེའུ་ཡི་མིང་ས་བོན་པ་ཞེས་བྱའོ་ཞེས་དེའི་མིང་ས་བོན་པ་ཞེས་བྱ་བར་བཏགས་སོ། །ཁྱེའུ་ས་བོན་པ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང ། ནུ་མ་བསྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེད་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་ཞོ་དང ། མར་དང་ཞུན་མར་དང་མར་གྱི་ཉིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང ། རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་གྲངས་དང་རྩིས་དང་ལག་རྩིས་
Ca38a
༄#། །དང།་དབྱུང་བ་དང ། གཞུག་པ་དང ། གཞག་པ་ལ་ཉེ་བར་ཞུགས་ནས། དེ་ཡི་གེའི་མཐར་ཕྱིན་ཅིང་འབྱེད་པ་དང་ཀློག་པ་དང ། མཁས་པ་དང་སྤྱོད་པ་གསལ་བ་དང ། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང ། གཞི་བརྟག་པ་དང ། གོས་བརྟག་པ་དང ། ཤིང་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་ལ་མཁས་པར་གྱུར་ཏོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིང ། དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག་།མ་བྱིན་པར་ལེན་པ་དང ། འདོད་པ་ལ་ལོག་པར་གཡེམ་པ་དང ། བརྫུན་དུ་སྨྲ་བ་དང་འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལོག་གོ་།དེ་ཕ་ལས་བྱུང་བའི་དད་པ་སྔ་མ་དེ་ཉིད་རྗེས་སུ་སྤེལ་ཞིང་ལེགས་པར་གསུངས་པའི་ཆོས་འདུལ་བ་ལ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་གཅིག་བུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་གཏང་བར་གནས་སོ། །གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་པ་ན། རིགས་
Ca38b
ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང ། དགྲ་བཅོམ་པ། ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང་མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ་དབང་པོ་དང་ཉེ་དབང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ས་བོན་པས་དགྲ་བཅོམ་པ་ཐོབ་ཅིང་རྣམ་པར་གྲོལ་བའི་དགའ་བ་དང་བདེ་བ་སོ་སོར་ཡང་དག་པར་རིག་པ་ན་དེའི་ཚེ་ཚིགས་སུ་བཅད་པ་སྨྲས་པ། ཆོས་རྣམས་ལས་ནི་སྐལ་བ་ཐོབ། །ཡབ་ནི་དཀོར་གྱིས་བདག་མི་གཏོང ། །བདག་གིས་ཧ་ཅང་ཕྱིན་ནས་ཤེས། །བདག་ནི་ཆུ་ངུས་ཤིན་ཏུ་འདས། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་མདུན་ན་བཞུགས་ཤིང་ཉན་ཐོས་རྣམས་ལ་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་
Ca39a
༄#། །པར་གྲོལ་བའི་ཆོས་སྟོན་ཏོ། །ཞེ་སྡང་འདོད་ཆགས་དང་བྲལ་བར་བྱ་བ་དང་གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །དེའི་ཚེ་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འཁོར་དེ་ཉིད་དུ་འདུག་ཅིང་མཐུན་པར་གྱུར་ཏོ། །བཅོམ་ལྡན་འདས་ཇི་ལྟ་ཇི་ལྟར་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དང ། ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་བར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དེ་ལྟ་དེ་ལྟར་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར། རབ་ཏུ་འགྱོད་པར་གྱུར་ཅིང་འདུག་ལ། འགྱོད་པ་དང་ལྡན། འགྱོད་པ་ཐོབ་ཅིང་ཅང་མི་སྨྲ་བར་གྱུར། ཡུལ་ཡུལ་ཕོར་གྱུར། ཕྲག་པ་གློད། གདོང་སྨད་སྤོབས་པ་མེད། སེམས་ཁོང་དུ་ཆུད་ཅིང་འདུག་གོ། དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་དག་གནས་ཉུལ་ཞིང་རྒྱུ་བ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་གནས་ག་ལ་བ་དེར་དོང་སྟེ་ཕྱིན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་
Ca39b
ནས་དགེ་སློང་རབ་ཏུ་མང་པོ་དག་གིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་བཟང་ཕྱིན་ཁྱོད་སྔོན་ཆད་དགེ་སློང་གློ་བུར་དུ་ལྷགས་པ་དག་མཐོང་ན་བཤེས་པ་དང་བཅས་པ་ཉིད་ཀྱི་ཚིག་གིས་བསུ་ནས་ལྷུང་བཟེད་དང་ཆོས་གོས་དང ། འཁར་བ་དང ། གཏུར་བུ་དང ། རིལ་བ་སྤྱི་བླུགས་དང ། འབྲུ་མར་སྣོད་དང ། ཞཝ་དང ། ལྷམ་སྒྲོག་གུ་ཅན་དང ། མཆིལ་ལྷམ་དག་ལེན་པར་བྱེད་ན། ཁྱོད་ད་ལྟར་དགེ་སློང་གློ་བུར་དུ་ལྷགས་པ་དག་མཐོང་ན་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར། རབ་ཏུ་འགྱོད་པར་གྱུར་ཅིང་འདུག་ལ་འགྱོད་པ་དང་ལྡན། འགྱོད་པ་ཐོབ་ཅིང་མི་སྨྲ་བར་གྱུར། ཡུལ་ཡུལ་བོར་གྱུར། ཕྲག་པ་གློད། གདོང་སྨད། སྤོབས་པ་མེད། སེམས་ཁོང་དུ་ཆུད་ཅིང་འདུག་ན། ཚེ་དང་ལྡན་པ་བཟང་བྱིན་དེ་ལྟར་ཁྱོད་ལ་ལུས་ཀྱི་གནོད་པའམ། སེམས་ཀྱི་ཡོངས་སུ་གདུང་བ་འགའ་ཞིག་མེད་གྲང ། ཚེ་དང་ལྡན་པ་དག་བདག་ལ་ད་ལྟར་ལུས་ཀྱི་གནོད་པ་ནི་འགའ་ཡང་མེད་མོད་ཀྱི། འོན་ཀྱང་བདག་ལ་སེམས་ཀྱི་ཡོངས་སུ་གདུང་བ་ཡོད་དོ། །ཚེ་དང་ལྡན་པ་ཁྱོད་ཀྱི་སེམས་ཀྱི་ཡོངས་སུ་གདུང་བ་གང་ཡིན། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་པ་དང ། དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པར་ཡང་མ་བྱས། ཕྱིར་བཟློག་པར་ཡང་མ་བྱས་པར་སྟན་དག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་
Ca40a
༄#། །འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་ཏོ། །དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་དགེ་སློང་རབ་ཏུ་མང་པོ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཟག་པའི་གནས་ལྟ་བུའི་ཆོས་མང་པོ་རྣམས་ཀྱི་དང་པོ་ནི་ཀ་ལན་ད་ཀའི་བུ་བཟང་བྱིན་གྱིས་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང ། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པར་མི་རྨེད་པས། སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་བཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་
Ca40b
ཡིན་པས། སངས་རྒྱས་བཅོམ་ལྡན་འདས་ཀྱིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་རྨས་པ། བཟང་བྱིན་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །བཟང་བྱིན་ངས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བའི་ཆོས་བསྟན་པ་དང ། ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བའི་ཆོས་བསྟན་པ་ལ། ཁྱོད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་དེ་བྱས་པར་གྱུར། མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ་དུག་དྲག་པོ་དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླའི། དེ་ལྟར་གྱུར་པས་བུད་མེད་ཀྱི་ཡུལ་ལ་ནི་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་
Ca41a
༄#། །མི་བཀུར་བའི་གང་ཟག་རྣམས་ཚར་གཅད་པའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང ། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང ། མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་བྱ་བའི་ཕྱིར། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ་བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་དགེ་སློང་ཞིག་རྒྱལ་པོའི་ཁབ་ན་དགོན་པའི་སྤྱིལ་བུ་ན་འདུག་གོ་།དེ་ནས་དགེ་སློང་དེས་དགོན་པའི་སྤྲ་མོ་ཞིག་ཟས་ཀྱིས་བརྔོད་བརྗོད་ནས། དེ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏོ། །དེ་ནས་དགེ་སློང་རབ་ཏུ་མང་
Ca41b
པོ་དག་གནས་ཉུལ་ཞིང་རྒྱུ་བ་ན་དགེ་སློང་དེའི་སྤྱིལ་བུ་ག་ལ་བ་དེར་དོང་སྟེ་ཕྱིན་ནས། དགེ་སློང་དེ་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང ། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འཁོད་དོ། །དེ་ནས་སྤྲ་མོ་དེ་སྔོན་གྱི་སྡིག་པ་ཅན་དམ་པ་མ་ཡིན་པའི་ཆོས་དེ་ཉིད་རྗེས་སུ་དྲན་ནས་དགེ་སློང་དེ་ག་ལ་བ་དེར་སོང་སྟེ་ཕྱིན་ནས་དགེ་སློང་དེའི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས་དགེ་སློང་དེ་འདི་ལྟ་སྟེ། དགེ་སློང་དེ་དག་ལ་ངོ་ཚ་བས་དེ་ཟློག་པར་བྱེད་དོ། །སྤྲ་མོ་དེ་ལན་གཉིས་ལན་གསུམ་དུ་དགེ་སློང་དེའི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས། དགེ་སློང་དེ་འདི་ལྟ་སྟེ་དགེ་སློང་དེ་དག་ལ་ངོ་ཚ་བ། ལན་གཉིས་ལན་གསུམ་དུ་དེ་ཟློག་པར་བྱེད་དོ། །དེ་ནས་སྤྲ་མོ་དེ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས། དགེ་སློང་དེའི་གདོང་དང་སྣ་དང་ཆོས་གོས་རྐང་པའི་སེན་མོ་དག་གིས་མངོན་པར་བྲད་དེ་མཐའ་གཅིག་ཏུ་སོང་ནས་ངུ་རུ་རུ་ཟེར་ཞིང་ཁྱི་ཚུགས་སུ་འདུག་གོ་།དེ་ནས་དགེ་སློང་དེ་དག་གིས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅིའི་ཕྱིར་དགོན་པའི་སྤྲ་མོ་འདི་ཁྱོད་ཀྱི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས། ཁྱོད་འདི་ལྟ་སྟེ། ཁོ་བོ་ཅག་ལ་ངོ་ཚ་བས་དེ་ཟློག་པར་བྱེད། ཅིའི་ཕྱིར་དགོན་པའི་སྤྲ་མོ་འདི་ལན་གཉིས་ལན་གསུམ་དུ་ཁྱོད་ཀྱི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས་ཁྱོད་འདི་ལྟ་སྟེ། ཁོ་བོ་ཅག་ལ་ངོ་ཚ་བས་དེ་ཟློག་པར་བྱེད། འོན་ཀྱང་
Ca42a
༄#། །དགོན་པའི་སྤྲ་མོ་འདི་ཁྱོད་ལ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས། ཁྱོད་ཀྱི་གདོང་དང་སྣ་དང་ཆོས་གོས་རྐང་པའི་སེན་མོ་དག་གིས་མངོན་པར་བྲད་དེ་མཐའ་གཅིག་ཏུ་སོང་ནས་ངུ་རུ་རུ་ཟེར་ཞིང་ཁྱི་ཚུགས་སུ་འདུག་།དེས་སྐབས་དེ་དགེ་སློང་དེ་དག་ལ་རྒྱས་པར་བརྗོད་དོ། །དེ་སྐད་ཅེས་སྨྲས་པ་དང ། དགེ་སློང་དེ་དག་གིས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ། དེ་ཡང་མི་ཉིད་ལ་ཡིན་གྱི། དུད་འགྲོར་སྐྱེས་པ་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པར་ཡང་མ་བྱས། ཕྱིར་བཟློག་པ་ཡང་མ་བྱས་པར་སྟན་དག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས། བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཞིག་མི་ལ་ཡང་བཀག་ན་དུད་འགྲོར་སྐྱེས་པ་ལྟ་ལ་ཅི་སྨོས་ཏེ། དགེ་སློང་དག་མི་གཏི་མུག་ཅན་དེ་ནི་ཕམ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །
Ca42b
སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས་ཞེས་བྱ་བ་ནས་སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་ཞེས་བྱ་བ་ནས་མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ་དུག་དྲག་པ་རྩུབ་པ་དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླའི། དེ་ལྟར་གྱུར་པས་དུད་འགྲོའི་སྐྱེ་གནས་སུ་སྐྱེས་པ་ལ་ནི་མ་ཡིན་ནོ་ཞེས་བྱ་བའི་བར་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པའོ། །འདི་ནི་རྗེས་སུ་བཅས་པའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ། བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཐ་ན་དུད་འགྲོའི་སྐྱེ་གནས་སུ་སྐྱེ་པ་དང་ལྷན་ཅིག་ཀྱང་རུང་སྟེ་དགེ་སློང་དེ་ཕམ་པར་གྱུར་བ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་རྣམ་པ་བཞི་པོ་མིང་གི་དགེ་སློང་དང ། ཁས་འཆེ་བའི་དགེ་སློང་དང ། སློང་བའི་ཕྱིར་དགེ་སློང་དང ། ཉོན་མོངས་པ་བཅོམ་པའི་ཕྱིར་དགེ་སློང་
Ca43a
༄#། །ལས་མིང་གི་དགེ་སློང་གང་ཞེ་ན། གང་གི་མིང་དང་མིང་དུ་བརྗོད་པ་དང ། ཚིག་གཉིས་པ་དང ། ཚིག་བླ་དྭགས་དང་འདུ་ཤེས་དང ། བོད་པ་དང་གདགས་པ་དང ། ཐ་སྙད་དགེ་སློང་ཞེའམ་དགེ་སློང་གི་རིགས་ཞེས་སམ། དགེ་སློང་དང་འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་ཞེས་བྱའོ། །ཁས་འཆེ་བའི་དགེ་སློང་གང་ཞེ་ན། གང་དགེ་སློང་མ་ཡིན་བཞིན་དུ་བདག་ཉིད་དགེ་སློང་ངོ་ཞེས་ཁས་འཆེ་བར་བྱེད་པ་དང ། རྐུ་ཐབས་སུ་གནས་ཤིང་དགེ་སློང་དུ་དམ་འཆའ་བར་བྱེད་པ་ནི་ཁས་འཆེ་བའི་དགེ་སློང་ཞེས་བྱའོ། །སློང་བའི་ཕྱིར་དགེ་སློང་གང་ཞེ་ན། གང་ཆོས་དང་ལྡན་པས་སློང་མོ་སྤྱོད་པས་འཚོ་བར་བྱེད་པ་ནི་སློང་བའི་ཕྱིར་དགེ་སློང་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་གང་ཞེ་ན། གང་གི་ཟག་པ་ཀུན་ནས་ཉོན་མོངས་པར་བྱེད་པ་ཡང་སྲིང་པར་བྱེད་པ་རིམས་ནད་དང་བཅས་པ་རྣམ་པར་སྨིན་པ་སྡུག་བསྔལ་བ་ཕྱི་མ་ལ་སྐྱེ་བ་དང་རྒ་བ་དང་འཆི་བར་འགྱུར་བ་གང་དག་ཡིན་པ་དེ་དག་སྤངས་པ་དང ། ཡོངས་སུ་ཤེས་པ་དང།་རྩ་བ་ནས་བཅད་པ་དང ། ཤིང་ཏ་ལའི་མགོ་བཞིན་དུ་གཞི་མི་སྣང་བ་དང ། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་ནི་ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །དོན་འདིར་ནི་གསོལ་བ་དང ། བཞིའི་ལས་མི་གཡོ་བ་གཞག་པར་མི་འོས་པས་བསྙེན་པར་རྫོགས་པ་གང་ཡིན་པ་དེ་དགེ་སློང་དུ་དགོངས་ཏེ། དེས་ན་ཡང་དགེ་སློང་གང་ཞེས་གསུངས་སོ། །དགེ་སློང་
Ca43b
རྣམས་དང་ལྷན་ཅིག་ཅེས་བྱ་བ་ནི། དེ་ལས་གཞན་པ་ཆོས་མཐུན་པ་ཚངས་པ་མཚུངས་པར་སྤྱོད་པ་རྣམས་དང་ངོ ། །བསླབ་པ་མཚུངས་པར་གྱུར་པས་ཞེས་བྱ་བ་ནི། བསླབ་པ་གང་ལ་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པར་བྱ་བ་དེ་ལ་དེང་བསྙེན་པར་རྫོགས་པས་དང ། དེང་བསྙེན་པར་རྫོགས་པས་གང་ལ་བསླབ་པར་བྱ་བ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་ངོ་ཞེས་འདི་ལ་ཚུལ་ཁྲིམས་ཉིད་ཀྱིས་མཉམ་པ་དང ། བསླབ་པ་ཉིད་ཀྱིས་མཉམ་པ་དང ། སོ་སོར་ཐར་པའི་མདོ་གདོན་པ་ཉིད་ཀྱིས་མཉམ་པ་གང་ཡིན་པ་དེ་ནི་བསླབ་པ་མཚུངས་པར་གྱུར་པས་ཞེས་བྱ་སྟེ།་དེས་ན་བསླབ་པ་མཚུངས་པར་གྱུར་པས་ཞེས་གསུངས་སོ། །བསླབ་པ་མ་ཕུལ་ཞེས་བྱ་བ་ལ། ཇི་ཙམ་གྱིས་ན་བསླབ་པ་མ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་ཁྲོས་ཤིང་ཁྲོ་བའི་ཟིལ་གྱིས་ནོན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །མྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། ། སྨྱོན་པ་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །གླེན་པ་དང་ལྐུག་པ་དང་འོན་པ་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབེན་པར་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབེན་པར་
Ca44a
༄#། །མི་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །མི་དབེན་པར་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པས་མཐའ་འཁོབ་པའི་ཚིག་གིས་དབུས་པ་ལ་བསླབ་པ་འབུལ་བར་བྱེད་ལ། དབུས་པས་གལ་ཏེ་མཐའ་འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མཐའ་འཁོབ་པས་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་བར་བྱེད་ལ། མཐའ་འཁོབ་པས་གལ་ཏེ་དབུས་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མཐའ་འཁོབ་པས་མཐའ་འཁོབ་པའི་ཚིག་གིས་དབུས་པ་ལ་བསླབ་པ་འབུལ་བར་བྱེད་ལ་དབུས་པས་གལ་ཏེ་མཐའ་འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པས་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་བར་བྱེད་པ་ལ་མཐའ་འཁོབ་པས་གལ་ཏེ་དབུས་པའི་ཚིག་སྨྲས་པ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མི་གཉིད་ལོག་པ་དང་སྙོམས་པར་ཞུགས་པ་དང་ལྷ་དང་སྤྲུལ་པ་དང་དུད་འགྲོ་དང་གཟུགས་བརྙན་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །ཀླག་ཅོར་ཅན་གྱིས་ཀླག་ཅོར་ཅན་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །གཏོང་བའི་སེམས་མེད་པ་དང ། དགེ་སྦྱོང་གི་ཚུལ་འདོད་པ་དང ། ཁྱིམ་ན་
Ca44b
གནས་པར་མི་འདོད་པ་དང ། མི་རང་བཞིན་དུ་གནས་པ་ཤེས་པས་འགའ་ལ་ཡང་རྣམ་པར་རིག་པར་མི་བྱེད་ན་བསླབ་པ་མ་ཕུལ་བར་བརྗོད་པར་བྱ་སྟེ། དེས་ན་བསླབ་པ་མ་ཕུལ་ཞེས་གསུངས་སོ། །བསླབ་པ་ཉམས་པར་མ་བྱས་པར་ཞེས་བྱ་བ་ལ། བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཡང་ཡོད། བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡང་ཡོད། བསླབ་པ་ཉམས་པར་ཡང་བྱས་ལ་བསླབ་པ་ཕུལ་བ་ཡང་ཡོད། བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པ་ཡང་ཡོད་དོ། །དེ་ལ་རེ་ཞིག་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ནི་འདི་ལྟ་སྟེ། དགེ་སློང་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང ། དགེ་སློང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་ན་དགེ་སློང་གི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །སངས་རྒྱས་དང་ཆོས་དང་དགེ་འདུན་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །མདོ་སྡེ་དང་འདུལ་བ་དང་མ་མོ་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། ། མཁན་པོ་དང་སློབ་དཔོན་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །བདག་ཁྱིམ་པའམ། དགེ་ཚུལ་ལམ། ཟ་མའམ། མ་ནིང་ངམ། དགེ་སློང་མ་སུན་ཕྱུང་བའམ། མ་བསད་པའམ།
Ca45a
༄#། །ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། རྐུ་ཐབས་སུ་གནས་པའམ། ཐ་དད་པར་གནས་པའམ། གནས་པར་མི་བྱ་བར་གཟུང་དུ་གསོལ་ཞེའམ། ཐ་ན་འདི་སྐད་ཅེས་བདག་ཁྱེད་ལྟ་བུ་ཆོས་མཐུན་པ་ཚངས་པ་མཚུངས་པ་སྤྱོད་པ་དག་གིས་ཆོག་གོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱ་སྟེ། དེ་ལྟར་ན་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཡིན་ནོ། །ཇི་ལྟར་ན་བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་ན་དགེ་སློང་གི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་མཁྱེན་པར་མཛོད་ཅིག་།ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱའོ། །གཅིག་པུ་ཉིད་ལ་མངོན་པར་དགའ་བ་དཀའོ། །གནས་མལ་དགོན་པ་ནགས་ཁྲོད་དང ། རི་དྲུང་དང་བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཕ་མ་དང་ཕུ་ནུ་དང་བུ་སྲིང་དྲན་ནོ། །བདག་བཟོ་དག་སློབ་ཏུ་ཆུག་ཅིག་།བདག་གི་ལས་ཀྱི་མཐའ་དག་
Ca45b
ཚོལ་ཅིག་།བདག་ཁྱིམ་བཟང་པོ་དག་ཏུ་གཏོད་ཅིག་ཅེས་དེ་ལྟར་དེ་ལ་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པའི་ངག་དང་ཚིག་དང་ཐ་སྙད་དང་སྐད་དང་བརྗོད་པ་དང་ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པ་དག་ནི་རྗོད་པར་བྱེད་ལ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེའམ། སངས་རྒྱས་དང་ཆོས་དང་དགེ་འདུན་འབུལ་ལོ་ཞེའམ། མདོ་སྡེ་དང་འདུལ་བ་དང་མ་མོ་འབུལ་ལོ་ཞེའམ། མཁན་པོ་དང་སློབ་དཔོན་འབུལ་ལོ་ཞེའམ། བདག་ཁྱིམ་པའམ། དགེ་ཚུལ་ལམ། ཟ་མའམ། མ་ནིང་ངམ། དགེ་སློང་མ་སུན་ཕྱུང་བའམ། མ་བསད་པའམ། ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། རྐུ་ཐབས་སུ་གནས་པའམ། ཐ་དད་པར་གནས་པའམ། གནས་པར་མི་བྱ་བར་གཟུང་དུ་གསོལ་ཞེའམ། ཐ་ན་འདི་སྐད་ཅེས་བདག་ཁྱོད་ལྟ་བུ་ཆོས་མཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ནི་མི་ཟེར་བ་སྟེ། དེ་ལྟར་ན་བསླབ་པ་ཉམས་པར་བྱས་ལ་བསླབ་པ་མ་ཕུལ་
Ca46a
༄#། །བ་ཡིན་ནོ། །ཇི་ལྟར་ན་བསླབ་པ་ཉམས་པར་ཡང་བྱས་ལ། བསླབ་པ་ཕུལ་བ་ཡང་ཡིན་ཞེ་ན། འདི་ལྟ་སྟེ། དགེ་སློང་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་དང ། དགེ་སློང་གི་དྲུང་དུ་སོང་སྟེ་འདི་སྐད་ཅེས་ཚེ་དང་ལྡན་པ་མཁྱེན་པར་མཛོད་ཅིག། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང་རི་དྲུང་དང ། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཕ་མ་དང་ཕུ་ནུ་དང་བུ་སྲིང་དྲན་ནོ། །བདག་བཟོ་དག་སློབ་ཏུ་ཆུག་ཅིག། བདག་གིས་ལས་ཀྱི་མཐའ་དག་ཚོལ་ཅིག། བདག་ཁྱིམ་བཟང་པོ་དག་ཏུ་གཏོད་ཅིག་ཅེས་དེ་ལྟར་དེ་ལ་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་པར་གྱུར་ཅིང་དགེ་སྦྱོང་གི་ཚུལ་མི་འདོད་པའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པའི་ངག་དང་ཚིག་དང་ཐ་སྙད་དང་སྐད་དང་བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་
Ca46b
རྣམ་པར་རིག་བྱེད་གང་ཡིན་པ་དག་ཀྱང་རྗོད་པར་བྱེད་ལ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིད་འདི་ཞེས་བགྱི་བ་བསླབ་པ་འབུལ་ལོ་ཞེའམ། སངས་རྒྱས་དང་ཆོས་དང་དགེ་འདུན་འབུལ་ལོ་ཞེའམ། མདོ་སྡེ་དང་འདུལ་བ་དང ། མ་མོ་འབུལ་ལོ་ཞེའམ། མཁན་པོ་དང་སློབ་དཔོན་འབུལ་ལོ་ཞེའམ། བདག་ཁྱིམ་པའམ། དགེ་ཚུལ་ལམ། ཟ་མའམ། མ་ནིང་ངམ། དགེ་སློང་མ་སུན་ཕྱུང་བའམ། མ་བསད་པའམ། ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། རྐུ་ཐབས་སུ་གནས་པའམ། ཐ་དད་པར་གནས་པའམ། གནས་པར་མི་བྱ་བར་གཟུང་དུ་གསོལ་ཞེའམ། ཐ་ན་འདི་སྐད་ཅེས་བདག་ཁྱེད་ཅག་ལྟ་བུ་ཆོས་མཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ཀྱང་ཟེར་ན་བསླབ་པ་ཕུལ་བར་བརྗོད་པར་བྱ་སྟེ། དེ་ལྟར་ན་བསླབ་པ་ཉམས་པར་ཡང་བྱས་ལ་བསླབ་པ་ཕུལ་པ་ཡང་ཡིན་ནོ།། ཇི་ལྟར་ན་བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པ་ཡང་ཡིན་ཞེ་ན། རྣམ་པ་དེ་དག་མ་གཏོགས་པ་སྟེ། དེས་ན་བསླབ་པ་ཉམས་པར་མ་བྱས་པར་ཞེས་གསུངས་སོ། །མི་ཚངས་པར་སྤྱོད་པ་ཞེས་བྱ་བ་ནི། གཉིས་ཀྱི་གཉིས་སྤྲོད་པའོ། །འཁྲིག་པ་ཞེས་བྱ་བ་ནི་མི་ཚངས་པར་སྤྱོད་པ་གང་ཡིན་པ་དེ་འཁྲིག་པ་ཡང་ཡིན་ནོ། །ཆོས་ཤེས་བྱ་བ་ནི་ཆོས་མ་ཡིན་པ་དེ་ཆོས་
Ca47a
༄#། །ཀྱི་སྒྲར་གསུངས་པའོ། །བརྟེན་ན་ཞེས་བྱ་བ་ནི་ལྷག་པར་སྤྱད་ནའོ། །ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ་ཞེས་བྱ་བ་ནི་སྤྲ་མོའམ་སྤྲ་མོ་དང་འདྲ་བར་གཏོགས་པ་དང་ངོ ། །དགེ་སློང་ཞེས་བྱ་བ་ནི། གང་ལ་དགེ་སློང་གི་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང ། རྟོག་པ་ཉིད་དང ། ཡང་དག་པར་རྟོག་པ་ཉིད་དང ། མཐར་ཕྱིན་པར་བྱེད་པ་ཉིད་དང ། ཡང་དག་པར་མཐར་བྱིན་པར་བྱེད་པ་ཉིད་གང་ཡིན་པ་དང ། གང་ཟག་དེའི་ཁས་ལེན་པ་དང ། མངོན་པར་ཁས་ལེན་པ་དང ། ཕྱིར་མི་ཟློག་པ་དང ། ཕྱིར་མི་འགོག་པ་ཉིད་དང ། ངག་དང་ཚིག་དང ། ཐ་སྙད་དང ། སྐད་དང་བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པའོ། །དེ་ཞེས་བྱ་བ་ནི། ཉེ་བར་བསྟན་པ་དང ། ཀུན་ཏུ་བསྟན་པའི་ཚིག་བླ་དྭགས་དེའོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི། དེ་མཐའ་གྱུར་པ་དང ། ལྟུང་བ་དང ། དམན་པ་དང ། མཇུག་ན་འདུག་པ་དང ། ཐ་ཆད་དང་ཡིད་དང་མི་མཐུན་པ་ཡིན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སྦྱོང་གི་དངོས་པོ་ལས་ཉམས་པར་
Ca47b
འགྱུར་པ་སྟེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ། བཅོམ་པ། ལྟུང་བ་ཕམ་པར་གྱུར་པ་སྟེ། དེའི་དགེ་སློང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན། ཤིང་ཏ་ལའི་མགོ་བཅད་སྔོན་པོར་འགྱུར་དུ་མི་རུང་བ་འཕེལ་ཞིང་རྒྱས་པ་དང ། ཡངས་པར་འགྱུར་དུ་མི་རུང་བ་དེ་བཞིན་དུ་དགེ་སློང་གིས་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ། བཅོམ་པ། ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་བས། དེས་ན་ཕམ་པར་གྱུར་པ་ཡིན་གྱིས་ཞེས་གསུངས་སོ། །གནས་པར་མི་བྱའོ་ཞེས་བྱ་བ་ནི། དགེ་སློང་རྣམས་ཀྱིས་དེ་དང་གསོ་སྦྱོང་དང་དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ལ་གནས་པར་མི་བྱའོ། །གང་ཟག་བཅུ་གཉིས་པོ་དག་ཏུ་བསྐོ་བས་བསྐོ་བར་མི་བྱ་བ་སྟེ་དེས་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། སྡོམ་ལ། འབའ་ཞིག་དང་ནི་གནས་གསུམ་དང ། །བུད་མེད་སྐྱེས་པ་མ་ནིང་དང ། །སྟེན་ལ་གཞོལ་དང་རྩོལ་བ་དང ། །མྱོས་པར་བྱས་དང་མཐུས་འཛིན་པའོ།། དགེ་སློང་གིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་རོ། །དགེ་སློང་གིས་གནས་གསུམ་གྱིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་རོ། །
Ca48a
༄#། །ཟག་བྱེད་ཟག་བྱེད་དམ་ཁའམ། བཤང་བའི་ལམ་དུ་འཛུད་ན། བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གིས་བུད་མེད་དང་སྐྱེས་པ་དང་མ་ནིང་གསུམ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང་སྟེན་པ་ལ་འབབ་པ་དང་སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང།་སྟེན་པ་ལ་འབབ་པ་དང ། སྟེན་པ་ལ་བབ་པས་མིའི་བུད་མེད་གསོན་པོ་མ་ཉམས་པ་ལ་ཟག་བྱེད་པར་དང་བཅས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ། ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་མིའི་བུད་མེད་གསོན་པོ་ཉམས་པ་ལ། ཟག་བྱེད་པར་དང་བཅས་པས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ། ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཉེས་པ་སྦོམ་པོར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་
Ca48b
པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་མིའི་བུད་མེད་ཤི་བ་མ་ཉམས་པ་ལ། ཟག་བྱེད་བར་དང་བཅས་པས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ། ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང་སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་མིའི་བུད་མེད་ཤི་བ་ཉམས་པ་ལ། ཟག་བྱེད་བར་དང་བཅས་པས་བར་ཆད་དང་བཅས་པ་དང ། བར་དང་བཅས་པས་བར་ཆད་མེད་པ་དང ། བར་མེད་པས་བར་ཆད་དང་བཅས་པ་དང ། བར་མེད་པས་བར་ཆད་མེད་པ་ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཉེས་པ་སྦོམ་པོར་འགྱུར་རོ། །མིའི་བུད་མེད་གསོན་པོ་དང་ཤི་བ་ལ་ཇི་ལྟ་བ་དེ་བཞིན་དུ་མི་མ་ཡིན་པ་མོ་གསོན་པོ་དང་ཤི་བ་དང ། དུད་འགྲོའི་སྐྱེས་གནས་སུ་སྐྱེས་པ་མོ་གསོན་པོ་དང་ཤི་བ་ལ་ཡང་དེ་བཞིན་ནོ། །སྐྱེས་པ་གསོན་པོ་དང་ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །སྐྱེས་པ་གསོན་པོ་དང་ཤི་བ་ལ་རྨའི་སྒོ་གཉིས་སུ་ཇི་ལྟ་བ་དེ་བཞིན་དུ། མི་མ་ཡིན་པ་ཕོ་གསོན་པོ་དང་ཤི་བ་ལ་རྨའི་སྒོ་གཉིས་སུ་དང ། དུད་འགྲོའི་སྐྱེ་གནས་སུ་སྐྱེས་པ་ཕོག་གསོན་པོ་དང་ཤི་བ་ལ་རྨའི་སྒོ་གཉིས་སུ་ཡང་དེ་བཞིན་
Ca49a
༄#། །ནོ། །སྐྱེས་པ་ལ་ཇི་ལྟ་བ་དེ་བཞིན་དུ་མིའི་མ་ནིང་ཕོ་གསོན་པོ་དང་ཤི་བ་ལ་རྨའི་སྒོ་གཉིས་སུ་དང ། མི་མ་ཡིན་པའི་མ་ནིང་ཕོ་གསོན་པོ་དང་ཤི་བ་ལ་རྨའི་སྒོ་གཉིས་སུ་དང ། དུད་འགྲོའི་སྐྱེ་གནས་སུ་སྐྱེས་པའི་མ་ནིང་ཕོ་གསོན་པོ་དང་ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་མ་ཤེས་བར་དུ་ཡང་མ་ཤེས་ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཤེས་ཤིང་བར་དུ་ཡང་མ་ཤེས་ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཤིང་ཐ་མར་མ་ཤེས་ན། གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་མར་ཡང་ཤེས་ལ། ཤེས་ནས་ཀྱང་བདག་གིར་མི་བྱེད་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བ་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་མར་ཡང་ཤེས་ལ་ཤེས་ནས་ཀྱང་བདག་གིར་བྱེད་ན་གཉི་ག་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ་དགེ་སློང་གིས་དགེ་སློང་མ་
Ca49b
དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་ལ་དང ། དགེ་སློང་མས་དགེ་སློང་དང ། དགེ་ཚུལ་ལ་དང ། དགེ་སློབ་མས་དགེ་སློང་དང ། དགེ་ཚུལ་ལ་དང ། དགེ་ཚུལ་མས་དགེ་སློང་དང ། དགེ་ཚུལ་ལ་དང ། དགེ་ཚུལ་གྱིས་དགེ་སློང་དང ། དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་ལ་ཡང་དེ་བཞིན་ནོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ།་རྩོལ་བར་བྱེད་ཅིང ། གལ་ཏེ་དགེ་སློང་གིས་དེ་དང་པོར་ཡང་མ་ཤེས་བར་དུ་ཡང་མ་ཤེས་ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཤེས་ཤིང་བར་དུ་ཡང་མ་ཤེས་ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཡང་ཤེས་པར་དུ་ཡང་ཤེས་ཤིང་ཐ་མར་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་མར་ཡང་ཤེས་ལ་ཤེས་ནས་ཀྱང་བདག་གིར་མི་བྱེད་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་
Ca50a
༄#། །མར་ཡང་ཤེས་ལ་ཤེས་ནས་ཀྱང་བདག་གིར་བྱེད་ན་གཉི་ག་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ། དགེ་སློང་གིས་དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་དང ། དགེ་སློང་མས་དགེ་སློང་དང ། དགེ་ཚུལ་དང ། དགེ་སློབ་མས་དགེ་སློང་དང ། དགེ་ཚུལ་དང ། དགེ་ཚུལ་མས་དགེ་སློང་དང་དགེ་ཚུལ་དང ། དགེ་ཚུལ་གྱིས་དགེ་སློང་དང ། དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་ལ་ཡང་དེ་བཞིན་ནོ། །འབྲུའི་ཆང་གིས་ཇི་ལྟ་བ་དེ་བཞིན་དུ་བཅོས་པའི་ཆང་དང ། སྦྱར་བའི་ཆང་དང ། རྩ་བའི་བཏུང་བ་དང ། སྡོང་བུའི་བཏུང་བ་དང ། འདབ་མའི་བཏུང་བ་དང ། མེ་ཏོག་གི་བཏུང་བ་དང ། འབྲས་བུའི་བཏུང་བས་སམ། གསང་སྔགས་དག་དང་རིག་སྔགས་དག་དང ། སྨན་གྱིས་སེམས་འཁྲུགས་པར་བྱས་པའམ། གཉིད་ལོག་པར་བྱས་ཏེ་ཡང་དེ་བཞིན་ནོ། །དགེ་སློང་གིས་དགེ་སློང་གྱ་ཚོམ་དུ་མཐུས་བཟུང་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་འཛུད་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཛུད་པ་ན་མི་བྱེད་ཀྱང་བཅུག་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཛུད་པ་ན་ཡང་མི་བྱེད། བཅུག་པ་ན་ཡང་མི་བྱེད་མོད་ཀྱི་འབྱིན་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཛུད་པ་ན་ཡང་བདག་གིར་མི་བྱེད། བཅུག་པ་ན་ཡང་མི་བྱེད། འབྱིན་པ་ན་ཡང་མི་བྱེད་ན་གང་རྩོལ་བ་དེ་བསྙིལ་བར་བྱའོ། །དགེ་སློང་གིས་
Ca50b
དགེ་སློང་ལ་ཇི་ལྟ་བ་བཞིན་དུ་དགེ་སློང་གིས་དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་དང ། དགེ་སློང་མས་དགེ་སློང་དང ། དགེ་ཚུལ་དང ། དགེ་སློབ་མས་དགེ་སློང་དང ། དགེ་ཚུལ་དང ། དགེ་ཚུལ་མས་དགེ་སློང་དང ། དགེ་ཚུལ་དང ། དགེ་ཚུལ་གྱིས་དགེ་སློང་དང ། དགེ་སློང་མ་དང ། དགེ་སློབ་མ་དང ། དགེ་ཚུལ་དང ། དགེ་ཚུལ་མ་ལ་ཡང་དེ་བཞིན་ནོ།། །། འདུལ་བ་རྣམ་པར་འབྱེད་པ། བམ་པོ་གཉིས་པ། སྡོམ་ལ། རྒྱབ་གཉེན་དང་ནི་འཕྱང་བ་ཅན། །མཛེས་དགའ་ཚོགས་ཅན་རྒན་མོ་དང ། །དགེ་སློང་གཉིད་ཀྱིས་ལོག་པ་ལ། །ལྕི་ཐུན་མས་བརྩལ་ཉེས་མེད་པའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་བ་དེའི་རྒྱབ་འདི་ལྟ་སྟེ། དཔེར་ན་རི་བོང་ངམ་བྱི་ལའི་ལྟར་མཉེན་པ་དང ། ཤིན་ཏུ་མཉེན་པར་གྱུར་ཏོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཅས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་
Ca51a
༄#། །དག་འདི་སྙམ་དུ་སེམས་ཏེ་གང་གི་ཕྱིར་ཁྱེའུ་འདིའི་རྒྱབ་འདི་ལྟ་སྟེ། དཔེར་ན་རི་བོང་ངམ་བྱི་ལའི་ལྟར་མཉེན་པ་དང་ཤིན་ཏུ་མཉེན་པ་དེའི་ཕྱིར་ཁྱེའུ་འདིའི་མིང་རྒྱབ་མཉེན་ཞེས་བྱའོ། །ཞེས་དེའི་མིང་རྒྱབ་མཉེན་ཞེས་བྱ་བར་བཏགས་སོ། །དེ་འོ་མ་དང་ཞོ་དང་མར་དང་ཞུན་མར་དང་མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་དེ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ཏེ། གྲོང་ངམ་གྲོང་རྡལ་གང་ན་ཉེ་བར་རྟེན་ཅིང་གནས་པའི་གྲོང་ངམ་གྲོང་རྡལ་དེ་ཉིད་དུ་ལུས་མ་བསྲུངས་དབང་པོ་དག་མ་བསྡམས་དྲན་པ་ཉེ་བར་མ་བཞག་པར་བསོད་སྙོམས་ལ་ཞུགས་སོ། །དེས་གྲོང་ངམ། གྲོང་རྡལ་དེ་ཉིད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་ནང་དུ་ཡང་དག་འཇོག་གི་ཕྱིར་གནས་སུ་ཞུགས་སོ། །དེའི་སེམས་གང་གི་ཚེ་འདོད་པ་ལ་འདོད་ཆགས་ཀྱིས་ཀུན་ནས་བཀྲིས་པར་གྱུར་པ་དེའི་ཚེ། དེས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ་རང་གི་ཁར་བཅུག་ནས་རྩོལ་བ་བྱེད་དོ། །དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་
Ca51b
གནས་ཉུལ་ཞིང་རྒྱུ་བ་དག་དགེ་སློང་དེའི་གནས་ག་ལ་བ་དེར་ཕྱིན་པ་དང ། དགེ་སློང་དེ་དག་གིས་དགེ་སློང་དེ་དེ་ལྟར་བྱེད་པ་མཐོང་ངོ ། །མཐོང་ནས་ཀྱང་ཡིད་མི་དགའ་ཞིང་མངོན་པར་མ་མགུ་ནས། དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅི་བྱེད། རེག་པ་བདག་གིར་བྱེད་དོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ།་དེ་ནི་གཞན་གྱི་ལ་ཡིན་གྱི་རང་གི་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པར་ཡང་མ་བྱས། ཕྱིར་བཟློག་པར་ཡང་མ་བྱས་པར་དོང་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཞིག་གཞན་གྱི་ལ་ཡང་བཀག་ན་རང་གི་ལ་ལྟ་སྨོས་ཀྱང་ཅི་དགོས་ཏེ། མི་གཏི་མུག་ཅན་དེ་ནི་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། རང་གིའམ་གཞན་གྱི་ཁར་བཅུག་ནས་རྩོལ་བར་བྱེད་ན་བཅུག་མ་ཐག་ཏུ་ཕམ་པར་འགྱུར་
Ca52a
༄#། །རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཡན་ལག་གི་རྣམ་པ་ཚད་ལས་ཤིན་ཏུ་འདས་པ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ་གང་གི་ཕྱིར་ཁྱེའུ་འདིའི་ཡན་ལག་གི་རྣམ་པ་ཚད་ལས་ཤིན་ཏུ་འདས་པ་དེའི་ཕྱིར་ཁྱེའུ་འདི་འཕྱང་བ་ཅན་ཞེས་བྱའོ་ཞེས་དེའི་མིང་འཕྱང་བ་ཅན་ཞེས་བྱ་བར་བཏགས་སོ། །དེ་འོ་མ་དང་ཞོ་དང་མར་དང་ཞུན་མར་དང་མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །དེ་དེ་ལྟར་རབ་ཏུ་བྱུང་ནས་དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། གྲོང་ངམ་གྲོང་རྡལ་གང་ན་ཉེ་བར་རྟེན་ཅིང་གནས་པའི་
Ca52b
གྲོང་ངམ་གྲོང་རྡལ་དེ་ཉིད་དུ་ལུས་མ་བསྲུངས། དབང་པོ་དག་མ་བསྡམས། དྲན་པ་ཉེ་བར་མ་བཞག་པར་བསོད་སྙོམས་ལ་ཞུགས་སོ། །དེས་གྲོང་ངམ་གྲོང་རྡལ་དེ་ཉིད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས། ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་ནང་དུ་ཡང་དག་འཇོག་གི་ཕྱིར་གནས་སུ་ཞུགས་སོ། །དེའི་སེམས་གང་གི་ཚེ་འདོད་པ་ལ་འདོད་ཆགས་ཀྱི་ཀུན་ནས་དཀྲིས་པར་གྱུར་པ་དེའི་ཚེ། དེས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ་རང་གི་བཤང་བའི་ལམ་དུ་བཅུག་ནས་རྩོལ་བར་བྱེད་དོ། །དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་གནས་ཉུལ་ཞིང་རྒྱུ་བ་དག་དགེ་སློང་དེའི་གནས་ག་ལ་བ་དེར་ཕྱིན་པ་དང ། དགེ་སློང་དེ་དག་གིས་དགེ་སློང་དེ་དེ་ལྟར་བྱེད་པ་མཐོང་ངོ ། །མཐོང་ནས་ཀྱང་ཡིད་མི་དགའ་ཞིང་མངོན་པར་མ་མགུ་ནས། དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅི་བྱེད། རེག་པ་བདག་གིར་བྱེད་དོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ་དེ་ནི་གཞན་གྱི་ལ་ཡིན་གྱི་རང་གི་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང ། མངོན་པར་བསྟོད་པར་ཡང་མ་བྱས། ཕྱིར་བཟློག་པར་ཡང་མ་བྱས་པར་དོང་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་
Ca53a
༄#། །ནས། བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཞིག་གཞན་གྱི་ལ་ཡང་བཀག་ན་རང་གི་ལ་ལྟ་སྨོས་ཀྱང་ཅི་དགོས་ཏེ། མི་གཏི་མུག་ཅན་དེ་ནི་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། རང་གིའམ་གཞན་གྱི་བཤང་བའི་ལམ་དུ་བཅུག་ནས་རྩོལ་བར་བྱེད་ན། བཅུག་མ་ཐག་ཏུ་ཕམ་པར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། དེའི་ཚེ་ན་འཕགས་རྒྱལ་ན་དེད་དཔོན་དགའ་བོ་ཞེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ་རྣམས་ཐོས་ཀྱི་བུའི་ནོར་དང་ལྡན་པ་རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེ་ལ་བུ་ཡང་མེད། བུ་མོ་ཡང་མེད་ནས། དེ་བུ་མེད་ཅིང་བུ་མངོན་པར་འདོད་པས་ཞི་བ་དང་ཆུ་ལྷ་དང་ལུས་ངན་དང་བརྒྱ་བྱིན་དང་ཚངས་པ་ལ་སོགས་པ་དག་ལ་
Ca53b
གསོལ་བ་འདེབས་ཤིང ། ལྷའི་བྱེ་བྲག་གཞན་འདི་ལྟ་སྟེ། ཀུན་དགའ་ར་བའི་ལྷ་དག་དང ། ཚལ་གྱི་ལྷ་དག་དང ། བཞི་མདོའི་ལྷ་གད་དང ། སུམ་མདོའི་ལྷ་དག་དང ། གཏོར་མ་ལེན་པའི་ལྷ་དག་དང ། ལྷན་ཅིག་སྐྱེས་པ་དག་དང ། ཆོས་མཐུན་པ་དག་དང ། རྟག་ཏུ་རྗེས་སུ་འབྲང་བའི་ལྷ་དག་ལ་ཡང་གསོལ་བ་འདེབས་སོ། །འཇིག་རྟེན་ན་གང་གསོལ་བ་འདེབས་པའི་རྒྱུ་ལས་བུ་དག་དང་བུ་མོ་དག་སྐྱེའོ་ཞེས་བྱ་བའི་གཏམ་དེ་ལྟ་བུ་ཡོད་དེ། དེ་ནི་དེ་ལྟ་མ་ཡིན་ཏེ་གལ་ཏེ་དེ་ལྟར་གྱུར་དུ་ཟིན་ན་རེ་རེ་ལ་ཡང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འདི་ལྟར་གནས་གསུམ་པོ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཕ་དང་མ་གཉིས་ཆགས་པར་གྱུར་ཅིང་འདུས་པ་དང ། མ་དུས་ལ་བབ་ཅིང་ཟླ་མཚན་དང་ལྡན་པ་དང ། དྲི་ཟ་ཉེ་བར་གནས་ཤིང་འཇུག་འདོད་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་ཅིང་འདུག་པ་ན། སེམས་ཅན་ཞིག་ཀྱང་ལྷའི་རིས་ནས་ཤི་འཕོས་ཏེ། དེའི་སྐྱེ་དགུའི་བདག་མོའི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་ན་གནས་པ་ཞུགས་པ་ཤེས་པ་དང ། གང་ལས་མངལ་ན་གནས་པ་ཞུགས་པ་དེ་
Ca54a
༄#། །ཤེས་པ་དང ། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་ནི་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས། ཁྱིམ་ཐབ་ལ་སྨྲས་པ། རྗེའི་སྲས། བདག་ལ་སེམས་ཅན་ཞུགས་པར་གྱུར་པ་ནི། འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་གྱིས། དགྱེས་པ་བསྐྱེད་དུ་གསོལ། དེ་ཡང་ཡིད་དགའ་ཞིང་ཡིད་དགའ་ནས་རོ་སྟོད་བསྲང་སྟེ་ལག་པ་གཡས་པ་བརྐྱངས་ནས། འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པ་བུའི་ངོ་མཐོང་བ་དང ། ཁོ་བོ་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་བོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། བགོ་སྐལ་ལ་སྤྱོད་པ་དང ། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང ། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུའམ་མང་པོ་ཡང་རུང་བའི་སྦྱིན་པ་དག་བྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟང་གི་གཞིར་གཏོགས་པ་ན་གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བཅས་པའི་
Ca54b
ཟས་ཧ་ཅང་མི་ཁ་བ་དང ། ཧ་ཅང་མི་སྐྱུར་བ་དང ། ཧ་ཅང་ལན་ཚཝ་མི་ཆེ་བ་དང ། ཧ་ཅང་མི་མངར་བ་དང ། ཧ་ཅང་མི་ཚ་བ་དང ། ཧ་ཅང་མི་བསྐ་བ་དང ། ཁ་བ་དང ། སྐྱུར་བ་དང ། ལན་ཚཝ་དང ། མངར་བ་དང ། ཚ་བ་དང ། བསྐ་བ་རྣམ་པར་སྤངས་པའི་ཟས་དག་དང ། དོ་ཤལ་དང ། སེ་མོ་དོ་དང ། རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང ། ཁྲི་ནས་ཁྲིར་དང ། ཁྲིའུ་ནས་ཁྲིའུར་རྒྱུ་ཞིང ། ཤོད་ཀྱི་ས་གཞིར་མི་འབབ་པ་དང ། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུད་དོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས། ཁྱེའུ་གཟུགས་བཟང་བ་བལྟ་ན་སྡུག་པ་མཛེས་པ་གསལ་བ། གསེར་གྱི་མདོག་འདྲ་བ། མགོ་བོ་གདུགས་ལྟ་བུ་དང་ལྡན་པ། ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཛར་བ། སྣའི་གཟེངས་མཐོ་བ་ཞིག་བྱུང་ངོ་།། དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །ཡུལ་དབུས་ན་གང་གཟུགས་བཟང་བ་བལྟ་ན་སྡུག་པ་མཛེས་པ་དེ་ལ་མཛེས་པ་ཞེས་བྱའོ་ཞེས་ཀུན་ཏུ་སྤྱོད་པས་དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་གཟུགས་བཟང་བ་བལྟ་ན་སྡུག་པ་མཛེས་པ་ཡིན་ལ། དེ་དེད་དཔོན་དགའ་བོའི་བུ་ཡིན་པ་དེའི་ཕྱིར་ཁྱེའུ་ཡི་མིང་མཛེས་དགའ་ཞེས་བྱའོ་ཞེས་དེའི་མིང་མཛེས་དགའ་ཞེས་བྱ་བར་བཏགས་སོ། །ཁྱེའུ་མཛེས་དགའ་མ་མ་བརྒྱད་པོ། པང་ན་འཚོ་བའི་མ་མ་
Ca55a
༄#། །གཉིས་དང ། ནུ་མ་སྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེད་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དེ་དག་གིས་འོ་མ་དང་ཞོ་དང་མར་དང་ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེ་པར་བྱེད་དོ། དེ་གང་གི་ཚེ་ཆེན་པོར་གྱུར་པ་དེའི་ཚེ། ཡི་གེ་དང་གྲངས་དང ། རྩིས་དང་ལག་རྩིས་དང་དབྱུང་བ་དང ། གཞུག་པ་དང་གཞག་པ་ལ་ཉེ་བར་ཞུགས་ནས། དེ་ཡི་གེའི་མཐར་ཕྱིན་ཅིང་འབྱེད་པ་དང ། ཀློག་པ་དང་མཁས་པ་དང་སྤྱོད་པ་གསལ་བ་དང ། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང ། གཞི་བརྟག་པ་དང ། གོས་བརྟག་པ་དང ། ཤིང་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་ལ་མཁས་པར་གྱུར་ཏོ། །ཕས་དེའི་ཆུང་མའི་འཁོར་གསུམ་པོ་རབ་དང ། འབྲིང་དང ། ཐ་མ་དག་རྣམ་པར་བཞག་གོ་།འདུག་པའི་གནས་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ་།སྐྱེད་མོས་ཚལ་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་དག་བྱེད་དུ་བཅུག་གོ་།དེ་སྟེང་གི་ཁང་བཟང་གི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱི་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེད་དཔོན་དགའ་བོ་རྟག་ཏུ་རྩིས་ལ་ཆགས་ཤིང་འདུ་བ་དང་འགོད་པ་དག་ཀྱང་སྦྱོང་བར་
Ca55b
བྱེད་ནས། མཛེས་དགས་སྨྲས་པ། ཡབ་ཁྱོད་ཅིའི་སླད་དུ་རྟག་ཏུ་རྩིས་ལ་ཆགས་ཤིང་བཞུགས། དེས་སྨྲས་པ། བུ་ཅི་སྟེང་གི་ཁང་བཟང་གི་གཞིར་གཏོགས་པ་ན། རྩེ་བ་ཉིད་ཀྱིས་ནོར་བསྒྲུབ་པར་བྱར་ནུས་སམ། ངས་ཁྱིམ་གྱི་བྱ་བ་ལོས་ཀྱང་བསམ་དགོས་སོ། །མཛེས་དགས་དོན་གྱིས་འདིས་བདག་ལ་བསྐུལ་ཏོ་སྙམ་དུ་རིག་ནས། དེས་དེའི་རྐང་པ་གཉིས་ལ་གཏུགས་ཏེ་སྨྲས་པ། ཡབ་གལ་ཏེ་དེ་ལྟར་རྗེས་སུ་གནང་ན་ཡུལ་གཞན་དུ་མཆིས་ལ་ནོར་བསྒྲུབ་པར་བགྱིའོ། །དེས་སྨྲས་པ། བུ་ནོར་གྱི་རྣམ་པ་མང་པོ་ཡོད་ན་ཅིའི་ཕྱིར་ཡུལ་གཞན་དུ་འགྲོ། འདུག་ཅིག། དེས་སྨྲས་པ། ཡབ་ངན་བུ་གོར་མ་བཀུམ་པར་མཆིའོ། །དེད་དཔོན་དགའ་བོས་འདི་འདོད་པ་ལ་བབ་པར་བྱའོ་སྙམ་དུ་བསམས་ནས་དེས་ལྡེ་མིག་དང་ལྡེ་མིག་ཀྱོག་པོ་ལ་སོགས་པ་བླངས་ཏེ། དབྱིག་དང་གསེར་བྱས་པ་དང་མ་བྱས་པ་དེའི་མཛོད་གང་བ་བདུན་ཕྱེ་སྟེ་བསྟན་ནས་སྨྲས་པ། བུ་མཛེས་དགའ་ནོར་གྱི་རྣམ་པ་འདི་སྙེད་ཡོད་ཀྱིས་ཁྱོད་འདི་ཉིད་དུ་འདུག་ལ་འདོད་པ་ལ་ཡང་ལོངས་སྤྱོད་ཅིག་།སྦྱིན་པ་དག་ཀྱང་བྱིན་ཅིག། བསོད་ནམས་དག་ཀྱང་གྱིས་ཤིག། ཡུལ་གཞན་དུ་འགྲོ་མི་དགོས་སོ། །དེས་སྨྲས་པ། ཡབ་ཁྱོད་ངན་བུ་ལ་སྟོན་པར་མཛད་ན། ངན་བུས་བུ་རྣམས་ལ་ཅི་ཞིག་བསྟན་པར་བགྱི། དེད་དཔོན་དགའ་བོས་དེ་ཟེར་བ་བཟང་སྟེ། བདག་འདས་ནས་འདིས་ཁྱིམ་གྱི་བྱ་བ་སྦྱོང་བར་འགྱུར་བས། དེའི་ཕྱིར་ཇི་སྲིད་བདག་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ། ཡུལ་གཞན་དུ་འདི་ལ་ཕའི་གྲོགས་དག་ཀྱང་མངོན་དུ་གྱུར་པས་དེ་ལྟ་ན་བདག་འདས་ནས་འདིའི་འགོ་བའི་ཕྱོགས་མུན་པ་མེད་པར་འགྱུར་རོ་སྙམ་དུ་
Ca56a
༄#། །ཤེས་ཤིང་རིག་ནས་ཆུང་མ་ལ་སྨྲས་པ། བཟང་མོ་ཁོ་བོ་འདས་ནས་མཛེས་དགས་ཁྱིམ་གྱི་བྱ་བ་སྦྱོང་བར་འགྱུར་བས་དེའི་ཕྱིར་ཇི་སྲིད་ཁོ་བོ་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ་ཡུལ་གཞན་དུ་འདི་ལ་ཕའི་གྲོགས་དག་ཀྱང་མངོན་དུ་གྱུར་པས། དེ་ལྟར་ན་ཁོ་བོ་འདས་ནས་འདིའི་འགྲོ་བའི་ཕྱོགས་མུན་པ་མེད་པར་འགྱུར་རོ། །དེས་སྨྲས་པ། རྗེའི་སྲས། མ་ནོངས་ཏེ་དེ་བཞིན་མཆི་ལ་རག་གོ་།དེ་ནས་དེད་དཔོན་དགའ་བོས། མཛེས་དགའ་བོས་ཏེ་སྨྲས་པ། བུ་ཁྱོད་ཀྱིས་ཟོང་མནོས་ཏེ་ཡུལ་གཞན་དུ་འགྲོའོ་སྙམ་དུ་སེམས་བསྐྱེད་པ་མ་ཉེས་ཏེ། ཁོ་བོ་འདས་ནས་ཁྱོད་ཀྱིས་ཁྱིམ་གྱི་བྱ་བ་སྦྱོང་བར་འགྱུར་བས་དེའི་ཕྱིར་ཇི་སྲིད་ཁོ་བོ་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ། ཡུལ་གཞན་དུ་ཁྱོད་ལ་ཕའི་གྲོགས་དག་ཀྱང་མངོན་དུ་གྱུར་པས་དེ་ལྟ་ན་ཁོ་བོ་འདས་ནས་ཁྱོད་ཀྱིས་འགྲོ་བའི་ཕྱོགས་མུན་པ་མེད་པར་འགྱུར་རོ། །མཛེས་དགས་སྨྲས་པ། ཡབ་བཀའ་བཞིན་འཚལ་མཆིའོ། །དེ་ནས་དེད་དཔོན་དགའ་བོས་འཕགས་རྒྱལ་དུ་དྲིལ་བསྒྲག་པ་བྱེད་དུ་བཅུག་སྟེ་འཕགས་རྒྱལ་ན་གནས་པ་དང ། ཕྱོགས་གཞན་ཐ་དད་པ་ནས་ལྷགས་པའི་ཚོང་པ་རྣམས་ལ་ཤེས་ལྡན་དག་ཉོན་ཅིག་།དེད་དཔོན་མཛེས་དགས་ཟོང་མནོས་ཤིང་ཡུལ་གཞན་དུ་འགྲོའི། ཁྱེད་ཅག་ལས་དེད་དཔོན་མཛེས་དགའ་དང་ལྷན་ཅིག་ཏུ་ཤོ་གམ་མེད་པ་དང ། ལ་གཅན་མེད་པ་དང ། གྲུ་བཙས་མེད་པར་ཡུལ་གཞན་དུ་འགྲོ་བར་སྤྲོ་བ་གང་ཡིན་པ་དེས་ཡུལ་གཞན་དུ་འགྲོ་བ་དང་མཐུན་པའི་ཟོང་བསྡོགས་ཤིག་།ཚོང་པ་ལྔ་བརྒྱས་ཡུལ་གཞན་དུ་འགྲོ་བ་དང་མཐུན་པའི་ཟོང་བསྡོགས་སོ། །དེད་དཔོན་དགའ་བོས་ཚོང་
Ca56b
པ་དེ་དག་མགྲོན་དུ་བོས་ཏེ་ཟན་བྱིན་ནས་སྨྲས་པ། ཤེས་ལྡན་དག་ཇི་ལྟར་མཛེས་དགའ་འདི་ཁོ་བོའི་བུ་ཡིན་པ་དེ་ཁོ་ན་བཞིན་དུ་ཁྱེད་ཅག་གི་ཡང་ཡིན་གྱིས། ཚོང་པ་ཡུལ་གཞན་དུ་དོང་བ་རྣམས་ཀྱི་བར་ཆད་ནི་གསུམ་ཡོད་དེ། རྒྱན་པོ་དང ། འཇུད་མཐུན་མ་དང ། ཆང་གི་གནས་སོ། །ཁྱེད་ཅག་གི་འདི་གནོད་པ་ལས་ངེས་པར་བཟློག་པར་བྱ་ཞིང་ཕན་པ་ལ་ཡང་དག་པར་སྦྱར་བར་བྱའོ། གལ་ཏེ་གནོད་པ་ལས་ངེས་པར་བཟློག་ཅིང་ཕན་པ་ལ་ཡང་དག་པར་སྦྱོར་བར་བྱེད་པ་ན་རབ་ཏུ་གནས་པར་གྱུར་ན་དེ་ལྟ་ན་ལེགས། གལ་ཏེ་རབ་ཏུ་མི་གནས་པར་གྱུར་ན་ཁྱེད་ཀྱིས་ཟོང་རྣམ་པར་སྤངས་ཤིང་རིན་མནོས་ཏེ་འགྲོ་བར་བྱའོ། །མཛེས་དགའ་ལ་ཡང་སྨྲས་པ། བུ་མཛེས་དགའ་ཇི་ལྟར་ཁྱོད་ཁོ་བོའི་བུ་ཡིན་པ་དེ་ཁོ་ན་བཞིན་དུ་ཚོང་པ་འདི་དག་གི་ཡང་ཡིན་གྱིས། ཁྱོད་ཀྱིས་འདི་དག་གི་ཚིག་དད་པས་མཉན་ཅིང་བྱ་བར་སོམས་ཤིག་།དེད་དཔོན་མཛེས་དགས་ཡབ་བཀའ་བཞིན་འཚལ་ཞེས་དེད་དཔོན་དགའ་བོ་ལས་མཉན་ནས། དགེ་མཚན་དང་བཀྲ་ཤིས་དང་བདེ་ལེགས་སུ་འགྱུར་བ་བྱས་ཏེ། ཤིང་རྟ་དག་དང ། ཁུར་དག་དང ། སྦྱང་དག་དང ། གླེང་བ་དག་དང ། རྔ་མོ་དག་དང ། བ་ལང་དག་དང ། བོང་བུ་དག་གིས་ཟོང་མང་པོ་བླངས་ཏེ། ཚོང་པ་ལྔ་བརྒྱ་དང་ལྷན་ཅིག་ཡུལ་གཞན་དུ་འཕགས་སོ། །དེ་མཐར་གྱིས་གྲོང་དང་གྲོང་རྡལ་དང་ཡུལ་འཁོར་དང ། རྒྱལ་པོའི་ཕོ་བྲང་གི་གནས་དག་ཏུ་ཁད་ཀྱིས་རྒྱུ་བ་ན་མཉན་ཡོད་དུ་ཕྱིན་ནས། མཉན་ཡོད་དུ་མཛོད་ཅིག་ཏུ་ཟོང་བཙུད་དེ་འདུག་གོ་།དེའི་ཚེ་ན་མཉན་ཡོད་ན་གཟུགས་འཚོ་མ་བཟང་མོ་ཞེས་བྱ་བ་གཟུགས་བཟང་བ་བལྟ་ན་
Ca57a
༄#། །སྡུག་པ་མཛེས་པ་སྐྱེས་བུ་དགའ་བ་ཞིག་འདུག་སྟེ། དེ་ཀར་ཤ་པ་ཎ་ལྔ་བརྒྱས་སྐྱེས་པ་དང་ལྷན་ཅིག་དགའ་མགུར་སྤྱོད་པར་བྱེད་དོ། །དེས་འཕགས་རྒྱལ་ན་དེད་དཔོན་དགའ་བོ་ཞེས་བྱ་བ་འདུག་པ་དེའི་བུ་མཛེས་དགའ་ཞེས་བྱ་བ་གཟུགས་བཟང་བ་བལྟ་ན་སྡུག་པ་མཛེས་པ་དེ་ཚོང་པ་ལྔ་བརྒྱ་དང་ལྷན་ཅིག་ཏུ་འདིར་ཕྱིན་ནས་མཛོད་ཆེ་གེ་མོ་ཞིག་ཏུ་ཟོང་མཁོས་སུ་ཕབ་སྟེ། འདུག་གོ་ཞེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། གལ་ཏེ་བདག་གིས་དེའི་ཟོང་ཐམས་ཅད་མ་འཕྲོགས་ན་བཟང་མོ་ཞེས་བྱ་བའི་མིང་མི་བཟུང་ངོ་སྙམ་མོ། །དེས་བུ་མོ་མངག་གཞུག་མ་ལ་སྨྲས་པ།་བུ་མོ་དེད་དཔོན་མཛེས་དགའ་ཞེས་བྱ་བ་འབྱོར་བ་རྒྱ་ཆེན་པོ་དང་ལྡན་པས་ཟོང་ཁྱེར་ཏེ་འོངས་ནས་མཛོད་ཆེ་གེ་མོ་ཞིག་ཏུ་བཙུད་ཀྱིས། དྲི་དང་ཕྲེང་བ་རྒྱུ་ཐོགས་ཏེ་དེའི་དྲུང་དུ་སོང་ལ་འདི་སྐད་ཅེས་ཇོ་མོ་བཟང་མོ་ཁྱོད་ཀྱི་ཞབས་ལ་ཕྱག་འཚལ་ཞིང ། རྗེའི་སྲས་ཀྱིས་ཅིའི་སླད་དུ་རང་གི་ཕོ་བྲང་སྤངས་ཏེ་མི་ཕལ་བ་བཞིན་དུ་མཛོད་ན་བཞུགས། འདི་ནི་ཁྱོད་ཉིད་ཀྱི་ཕོ་བྲང་ལགས་ཀྱིས་ཚུར་སྤྱོན་ཅིག་ཅེས་ཀྱང་མཆིའོ་ཞེས་གྱིས་ཤིག་།ཇོ་མོ་བཀའ་བཞིན་དུ་འཚལ་ཞེས་བུ་མོ་མངག་གཞུག་མ་དེས་གཟུགས་འཚོ་མ་བཟང་མོ་ལས་མཉན་ཏེ། དྲི་དང་ཕྲེང་བ་རྒྱུ་ཐོགས་ནས་དེད་དཔོན་མཛེས་དགའ་ག་ལ་བ་དེར་སོང་སྟེ་ཕྱིན་ནས། དེད་དཔོན་མཛེས་དགའ་ལ་འདི་སྐད་ཅེས་སྨྲས་སོ། །ཇོ་མོ་བཟང་མོ་ཁྱོད་ཀྱི་ཞབས་ལ་ཕྱག་འཚལ་ཞིང་དྲི་དང་ཕྲེང་བ་རྒྱུ་འདི་ཡང་བསྐུར། རྗེའི་སྲས་
Ca57b
ཀྱིས་ཅིའི་སླད་དུ་རང་གི་ཕོ་བྲང་སྤངས་ཏེ་མི་ཕལ་བ་བཞིན་དུ་མཛོད་ན་བཞུགས། འདི་ནི་ཁྱོད་ཉིད་ཀྱི་ཕོ་བྲང་ལགས་ཀྱིས་ཚུར་སྤྱོན་ཅིག་ཅེས་ཀྱང་མཆིའོ། །མཛེས་དགས་སྨྲས་པ། བུ་མོ་སོང་ཞིག་དང ། ཁོ་བོ་དྲི་དང་ཕྲེང་བ་རྒྱུ་འདི་བཏགས་ཏེ་འོང་ངོ ། །དེ་ནས་བུ་མོ་མངག་གཞུག་མ་དེ་གཟུགས་འཚོ་མ་བཟང་མོ་ག་ལ་བ་དེར་སོང་སྟེ་ཕྱིན་ནས། དེས་དེད་དཔོན་མཛེས་དགའ་དང་ལྷན་ཅིག་སྐབས་ཀྱི་གཏམ་ཇི་སྙེད་བྱས་པར་གྱུར་པ་དེ་དག་ཐམས་ཅད་གཟུགས་འཚོ་མ་བཟང་མོ་ལ་བསྙད་དོ། །དེ་ནས་གཟུགས་འཚོ་མ་བཟང་མོས་བུ་མོ་མངག་གཞུག་མ་ལས་ཐོས་ནས་དགའ་བ་དང་ཡིད་བདེ་བ་སྐྱེས་ཏེ། ཁྱིམ་བྱུག་པས་བསྐུས་ཤིང ། བྱི་དོར་བྱེད་དུ་བཅུག་ནས་མེ་ཏོག་སྣ་ཚོགས་བཀྲམ་ཞིང་འདུག་སྤོས་ཞིམ་པོས་བདུགས་ཏེ། བླ་རེས་བྲེས་པ་དང་བཅས་པའི་མལ་བཤམས་ནས་གཙོ་ཆེར་དེད་དཔོན་མཛེས་དགའ་ལ་སྡོད་ཅིང་འདུག་གོ་།དེད་དཔོན་མཛེས་དགའ་ཡང་དྲི་དང་ཕྲེང་བ་རྒྱུ་དང་རྒྱན་གྱིས་ཀླུབས་ཏེ་བཞོན་པ་ལ་ཞོན་ནས། ཁྱེའུ་མངག་གཞུག་པས་ཡོངས་སུ་བསྐོར་ཅིང་ལང་ཚོའི་གཟུགས་མཆོག་ཏུ་སྡུག་པས་རྣམ་པར་མཛེས་ཤིང་གཟུགས་འཚོ་མ་བཟང་མོའི་གནས་ག་ལ་བ་དེར་སོང་ངོ ། །གཟུགས་འཚོ་མ་བཟང་མོ་དེད་དཔོན་མཛེས་དགའ་ལང་ཚོའི་གཟུགས་མཆོག་ཏུ་སྡུག་པས། རྣམ་པར་མཛེས་པ་མཐོང་ངོ ། །མཐོང་ནས་ཀྱང་བྲན་མོ་མངག་གཞུག་མ་ལ་དྲིས་པ། བུ་མོ་འདི་དེད་དཔོན་མཛེས་དགའ་ཡིན་ནམ། དེས་སྨྲས་པ། ཇོ་མོ་དེད་དཔོན་མཛེས་དགའ་ནི་འདི་ཁོ་ན་ལགས་སོ། །
Ca58a
༄#། །དེ་ནས་གཟུགས་འཚོ་མ་བཟང་མོ་དགའ་བ་དང་ཡིད་བདེ་བ་སྐྱེས་ནས། ཚིགས་སུ་བཅད་པ་སྨྲས་པ། རིགས་སྐྱེས་རིགས་མིན་སྐྱེས་པའམ། ནོར་ཉམས་ནོར་ཀྱིས་འབྱོར་པའང་རུང ། ། གཟུགས་ཀྱིས་ཕྱུག་པ་མཐོང་བས་ནི། །བུད་མེད་རྣམས་ཀྱི་ཡིད་འཕྲོག་བྱེད། །དེ་བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པ་དག་ཁོ་ནས་གཟུགས་འཚོ་མ་བཟང་མོའི་ཁྱིམ་དུ་འཇུག་པར་བརྩམས་པ་དང ། དེས་མྱུར་བ་མྱུར་བར་ཁང་ཐོག་ནས་བབས་ཏེ་དེ་བསུ་ནས་ཡན་ལག་ཐམས་ཅད་ཀྱིས་འཁྱུད་དེ། ཁྱིམ་གྱི་ནང་དུ་ཁྲིད་ནས་བུད་མེད་ཀྱི་ཁྲི་ལ་བཞག་སྟེ་སྨྲས་པ། རྗེའི་སྲས་ཀྱི་མཚན་ཅི། དེས་སྨྲས་པ། མཛེས་དགའོ། །དེས་སྨྲས་པ། ཨེ་མའོ་ཁྱོད་ཀྱི་མཚན་ནི་གཟུགས་དང་འདྲ་ལ་གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་དག་གིས་ཁྱོད་ཀྱི་མཚན་མཛེས་དགའ་ཞེས་བགྱི་བར་མ་གསོལ་བར་གྱུར་ན། དེང་བདག་གིས་ཁྱོད་ཀྱི་མཚན་མཛེས་དགའ་ཞེས་བགྱི་པར་གསོལ་པར་འགྱུར་རོ། །དེས་སྨྲས་པ། ཁྱོད་ཀྱི་མཚན་ཅི། དེས་སྨྲས་པ། བཟང་མོའོ། །དེས་སྨྲས་པ། ཨེ་མའོ་ཁྱོད་ཀྱི་མཚན་ནི་གཟུགས་དང་འདྲ་ལ་གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་དག་གིས་ཁྱོད་ཀྱི་མཚན་བཟང་མོ་ཞེས་བགྱི་བར་མ་གསོལ་བར་གྱུར་ན། དེང་བདག་གིས་ཁྱོད་ཀྱི་མཚན་བཟང་མོ་ཞེས་བགྱི་བར་གསོལ་བར་འགྱུར་རོ། །མཛེས་དགས་སྨྲས་པ། བཟང་མོ་དགུང་གཅིག་གི་གླ་ཇི་ཙམ། དེས་སྨྲས་པ། རྗེའི་སྲས་ཀྱིས་མི་ཕལ་བ་བཞིན་དུ་མི་
Ca58b
གཤའ་བ་ཞིག་བཀའ་སྩལ་ཏོ། །དེའི་བུ་མོ་མངག་གཞུག་མས་སྨྲས་པ། དགུང་རེ་ཞིང་ཀར་ཤ་པ་ཎ་ལྔ་བརྒྱ་ལྔ་བརྒྱའོ། །དེས་མི་ལ་ཁྱོད་ཀྱིས་ཉིན་རེ་ཞིང་ཀར་ཤ་པ་ཎ་ལྔ་བརྒྱ་ལྔ་བརྒྱ་བསྐུར་བར་བྱའོ་ཞེས་བསྒོ་ནས། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །འདོད་པ་དག་ནི་བསྟེན་པ་ན་ལོག་པའམ་ངོམས་པའམ། མཐར་ཐུག་པ་མེད་པས། དེ་ཉི་མ་མང་པོ་འདས་ཀྱང་ངོམས་པར་མ་གྱུར་ཅིང ། མིས་ཀྱང་ཉིན་རེ་ཞིང་ཀར་ཤ་པ་ཎ་ལྔ་བརྒྱ་ལྔ་བརྒྱ་འབུལ་བ་ཁོ་ནར་བྱེད་དོ། །ཚོང་པ་དག་གིས་སྨྲས་པ། ཤེས་ལྡན་དག་དེད་དཔོན་མཛེས་དགའ་མི་སྣང་ན། དེ་བདག་ཅག་ལ་གྲོགས་པོས་གཏད་པས་ཀུན་ཏུ་བཙལ་བར་བྱའོ། །ཚོང་པ་དག་གིས་དེའི་གཡོག་དག་ལ་དྲིས་པ། དེད་དཔོན་གར་བཞུད། དེ་དག་གིས་སྨྲས་པ། དེད་དཔོན་ཉི་མ་གང་ཁོ་ན་ལ་མཉན་ཡོད་དུ་ཕྱིན་པའི་ཉི་མ་དེ་ཉིད་ལ་འཇུད་མཐུན་མའི་ཁྱིམ་དུ་ཞུགས་ཏེ་འདུག་ན་ཁྱེད་ཅག་གིས་དེང་གཟོད་དྲན་ནམ། ཚོང་པ་དག་གིས་སྨྲས་པ། ཤེས་ལྡན་དག་ཡུ་བུ་ཅག་གིས་དེད་དཔོན་མཛེས་དགའ་ཡལ་བར་བོར་བ་ནི་མ་ལེགས་པར་བྱས་ཏེ། འདིའི་ཕས་ཡུ་བུ་ཅག་ལ་ཀླན་ཀར་འགྱུར་རོ། །ཚོང་པ་དག་གིས་མཛེས་དགའ་ལ་དོན་མཐུན་རྣམས་ཀྱི་མཆིད་ནས་ཚུར་སྤྱོན་ཅིག་ཅེས་མཆིའོ་ཞེས་བང་ཆེན་བཏང་ངོ ། །བང་ཆེན་དེས་མཛེས་དགའ་ལ་བསྒོ་ནས། མཛེས་དགས་འབྱུང་བར་བརྩམས་པ་དང ། བཟང་མོས་གོས་ཀྱི་མཐའ་ནས་བཟུང་སྟེ་སྨྲས་པ། རྗེའི་སྲས་འདོད་པ་དག་ནི་རྒྱུ་གཉིས་ཀྱིས་བསྟེན་པར་བགྱི་སྟེ། གཟུགས་
Ca59a
༄#། །བཟང་བ་ཉིད་དང ། ལང་ཚོ་ཉིད་ཀྱིས་སོ། །ཁྱོད་ནི་གཟུགས་བཟང་བ་དང ། ལང་ཚོ་ལ་བབ་པ་ལེགས་ན། གཞོན་པའི་གནས་སྐབས་སུ་རེ་ཞིག་རྩེ་བ་དང་དགའ་བ་དང་དགའ་མགུར་སྤྱོད་པ་མཛོད་ལ་བགྲེས་པའི་གནས་སྐབས་སུ་ནོར་བསྒྲུབ་པ་མཛོད་ཅིག་།མཛེས་དགས་བང་ཆེན་དེ་ལ་སྨྲས་པ། ཀྱེ་ཁྱོ་ག་སོང་ཞིག་དང ། འོང་ངོ ། །བང་ཆེན་དེ་སོང་སྟེ་ཚོང་པ་རྣམས་ལ་སྨྲས་པ། དེད་དཔོན་གྱི་ཞལ་ནས་སོང་ཞིག་དང་འོང་ངོ་ཞེས་གསུང་ངོ ། །ཚོང་པ་དེ་དག་འདུས་ཏེ་སྡོད་པ་ན་མཛེས་དགའ་ཐོགས་ནས། ཚོང་པ་དེ་དག་ཐམས་ཅད་འདུས་ཏེ་འཇུད་མཐུན་མའི་ཁྱིམ་དུ་དོང་ནས་ཚོང་པ་དེ་དག་གིས་སྒོར་བསྡད་དེ། མི་ལ་སྨྲས་པ། ཀྱེ་ཁྱོ་ག་སོང་ལ་དེད་དཔོན་ལ་ཚོང་པའི་ཚོགས་རྣམས་སྒོ་ན་སྡོད་ཅིང་དེད་དཔོན་ལྟ་བར་འཚལ་ལོ་ཞེས་གྱིས་ཤིག་།མི་དེས་སོང་སྟེ་མཛེས་དགའ་ལ་བརྗོད་ནས། མཛེས་དགས་འབྱུང་བར་བརྩམས་པ་དང ། ཡང་གཟུགས་འཚོ་མ་བཟང་མོས་གོས་ཀྱི་མཐའ་ནས་བཟུང་སྟེ་སྨྲས་པ། རྗེའི་སྲས་ཚོང་བ་དེ་དག་ཀྱང་བདག་དང་ལྷན་ཅིག་དགའ་མགུར་སྤྱོད་འཚལ་ཏེ། དེ་དག་དང་ལྷན་ཅིག་དགའ་མགུར་སྤྱད་དུ་ག་ལ་རུང་བཞུགས་ཤིག་།འདོད་པ་དག་ནི་བསྟེན་པ་ན་ཀུན་ཏུ་སྦྱོར་བ་དག་འཕེལ་བར་བྱེད་པ་ཡིན་པས། མཛེས་དགས་སྨྲས་པ། གང་གི་ཚེ་ཁོ་བོ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་འབྱུང་བར་འགྱུར་རོ། །མི་དེས་སོང་སྟེ་ཚོང་པའི་ཚོགས་རྣམས་ལ་སྨྲས་པ། དེད་དཔོན་གྱི་ཞལ་ནས་གང་གི་ཚེ་ཁོ་བོ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་འབྱུང་ངོ་
Ca59b
ཞེས་གསུང་ངོ ། །ཚོང་པ་དག་གིས་སྨྲས་པ། ཀྱེ་མ་མཛེས་དགའ་འདི་བྱ་བ་མ་ཡིན་པ་ལ་ཞུགས་ཀྱིས་འདོང་ངོ་ཞེས་དེ་དག་གིས་ཟོང་རྣམ་པར་སྤངས་ནས་རིན་བླངས་ཏེ་འཕགས་སོ། །དེ་ནས་མི་གང་གིས་ཉི་མ་རེ་རེ་ཞིང་བཟང་མོ་ལ་ཀར་ཤ་པ་ཎ་ལྔ་བརྒྱ་ཕུལ་བར་གྱུར་པ་དེས་ཕྱིན་ཆད་འབུལ་བར་མི་བྱེད་དོ། །དེ་ནས་དུས་གཞན་ཞིག་ན་བཟང་མོས་མི་དེ་ལ་དྲིས་ཤིང་སྨྲས་པ། ཀྱེ་ཁྱོ་ག་ཅིའི་ཕྱིར་ཕྱིན་ཆད་ཀར་ཤ་པ་ཎ་དག་འབུལ་བར་མི་བྱེད། དེས་སྨྲས་པ། དོན་མཐུན་དག་དོང་བས་བདག་གིས་ག་ལས་དབུལ། ཅི་དོན་མཐུན་དག་གིས་མཛེས་དགའི་ཟོང་ཡང་ཁྱེར་རམ། ཁྱེར་རོ། །བཟང་མོས་མཛེས་དགའ་དང་ལྷན་ཅིག་ཉི་མ་གཉིས་སམ་གསུམ་དགའ་མགུར་སྤྱད་ནས་སྨྲས་པ། རྗེའི་སྲས་བདག་ལ་ཞིང་ཡང་མ་མཆིས། ལས་ཀྱི་མཐའ་བགྱིད་པ་དག་ཀྱང་མ་མཆིས། གྲོང་མི་ཟོང་མ་ནོས་ཏེ་ཡུལ་གཞན་དུ་མཆི་བ་དག་ཀྱང་མ་མཆིས་ཏེ། ཁྱོད་ལྟ་བུ་དག་གི་དྲུང་ནས་གང་ཐོབ་བ་དེས་བདག་འཚོ་བར་འགྱུར་བ་ཁོ་ནར་བས་ན། ཡང་ན་ནི་ཀར་ཤ་པ་ཎ་དག་སྩོལ་ཅིག་།ཡང་ན་ནི་སྐྱེས་པ་གཞན་གྱི་སྐབས་དབྱེ་བ་མཛོད་ཅིག་།མཛེས་དགས་སྨྲས་པ། བཟང་མོ་ཁྱོད་ལ་སྡུག་པ་འགའ་ཡང་མེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། ཚོགས་ཅན་རྣམས་ལ་སྡུག་པ་མེད། དེ་དག་རང་བཞིན་རིང་མི་གནས། བྱ་རྣམས་འབྲས་མེད་ལྗོན་པ་བཞིན། །དེ་དག་རྙིང་པ་རྣམ་པར་སྤོང ། །ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་ལ་ཇི་སྲིད་དུ་ནོར་སྦྱིན་པར་བྱེད་པ་དེ་སྲིད་དུ་ཁྱོད་སྐྱེས་པའི་དབང་དུ་འགྱུར་རམ། བཟང་མོ་སྨྲས་པ།
Ca60a
༄#། །རྗེའི་སྲས་ཁྱོད་ཀྱིས། ཇི་སྲིད་བརྒྱ་བྱིན་ཆར་འབེབས་པ། །དེ་སྲིད་རི་ཀླུང་ཆུ་འབེབས་ལྟར། །ཇི་སྲིད་ནོར་ནི་སྦྱིན་བྱེད་པ། །དེ་སྲིད་འཇུད་མཐུན་སྐྱེས་བུ་དབང ། །ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་སུ་ལ་ཡང་ཡིད་འབེབས་པར་མི་བྱེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། འཇུད་མཐུན་དགོངས་ཀར་རང་ལུས་བཞིན། ། གཅུགས་དང་གཏམ་གྱིས་དགའ་བར་བྱེད། །དེ་ནས་ནམ་ཕྱེད་དབུས་གནས་ཤིང ། །ནམ་ལངས་ཕན་ཆད་རྩཝ་བཞིན་སྤོང ། །ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་ནོར་དང་བཅས་པའི་མི་དག་ལ་སྤྱོད་པར་བྱེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། ནོར་དང་བཅས་པའི་མི་དག་དང ། །ནོར་མ་སྤྱད་པ་རྣམས་ལ་ཡང ། །སར་པའི་རྩཝ་ལ་བ་ལང་བཞིན།། བདག་ཅག་རྣམས་ཀྱིས་སྤྱད་པར་བྱ། །ཞེས་བགྱི་བ་མ་གསན་ཏམ། མཛེས་དགས་འབྱུང་བར་བརྩམས་པ་དང ། བཟང་མོས་བསམས་པ། མཛེས་དགའ་འདི་ནི་གཟུགས་བཟང་བ་བལྟ་ན་སྡུག་པ་མཛེས་པ་ཡིན་པས་ཤིན་ཏུ་ཐག་རིང་བར་སོང་ཡང་སྐྱེས་བུ་འདི་ལྟ་བུ་འདི་ལྟ་བུ་དང་ལྷན་ཅིག་རྩེ་བར་བྱ། དགའ་བར་བྱ། དགའ་མགུར་སྤྱོད་པར་བྱ་བ་ཡིན་པས། དེའི་ཕྱིར་ཇི་སྲིད་དུ་གཞན་ཀར་ཤ་པ་ན་དག་ཐོགས་ཏེ། མ་འོང་བ་དེ་སྲིད་དུ་འདི་དང་ལྷན་ཅིག་རྩེ་བར་བྱ། དགའ་བར་བྱ། དགའ་མགུར་སྤྱད་པར་བྱའོ་སྙམ་དུ་ཤེས་ཤིང་རིག་ནས། བཟང་མོས་མཛེས་དགའི་གོས་ཀྱི་མཐའ་ནས་བཟུང་སྟེ། འཛིན་
Ca60b
ཅིང་སྨྲས་པ། རྗེའི་སྲས་ཁྱོད་ལ་ཁབ་ན་བཞད་གད་དག་མི་བགྱིད་དམ། དེ་ནི་བདག་གིས་བཞད་གད་བགྱིས་པ་ལགས་ཀྱིས་བཞེས་ཤིག་།མ་བཞུད་ཅིག་།མཛེས་དགའ་འདོད་ཆགས་ཤས་ཆེན་པོས་འདུག་པ་དང ། སྐྱེས་པ་གཞན་ཞིག་ཀར་ཤ་པ་ན་ལྔ་བརྒྱ་ཐོགས་ཏེ་དེར་ཞུགས་ནས། དེས་བཟང་མོ་དགའ་མགུར་སྤྱད་ཀྱིས་བཞུད་ཅེས་སྨྲས་པ་དང ། བཟང་མོ་མཛེས་དགའ་ཉིད་ཀྱི་མདུན་དུ་ཡོལ་བས་བཅད་དེ་དགའ་མགུར་སྤྱད་པར་བརྩམས་ནས། མཛེས་དགས་འདི་བདག་ཁོ་ནའི་མདུན་དུ་སྐྱེས་པ་འདི་དང་ལྷན་ཅིག་དགའ་མགུར་སྤྱོད་པར་བྱེད་དོ་སྙམ་དུ་ཤེས་ཤིང་རིག་ནས་སོང་ངོ ། །མཛེས་དགའ་ལམ་པོ་ཆེ་ལ་མི་མཁས་པས་གང་དུ་འགྲོ་བར་བྱ་བ་མི་ཤེས་ནས། ཇི་ཙམ་ན་དགེ་སློང་ཞིག་མཉན་ཡོད་དུ་བསོད་སྙོམས་ལ་བརྒྱུས་ནས་ཕྱིར་བྱུང་བ་དེ་མཛེས་དགས་མཐོང་ནས་དགེ་སློང་དེའི་ཕྱི་ཐོག་ཐག་རྗེས་སུ་སོང་ངོ ། །དེ་ནས་དགེ་སློང་དེ་གཙུག་ལག་ཁང་དུ་སོང་སྟེ། ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་ནས། སྣམ་སྦྱར་སྤྲུགས་ཏེ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱ་བར་བརྩམས་པ་དང ། མཛེས་དགའ་དེའི་མདུན་ན་འགྲེང་ངོ ། །དགེ་སློང་དེས་མཛེས་དགའ་ལ་སྨྲས་པ། བཞིན་བཟང་ལྷུང་བཟེད་ཀྱི་ལྷག་མ་འདོད་དམ། མཛེས་དགས་གལ་ཏེ་མ་ཟོས་ན་བཀྲེས་པས་འཆི་བར་འགྱུར་བར་ཤེས་ཤིང་རིག་ནས་སྨྲས་པ། འཕགས་པ་འཚལ་ལོ། །དགེ་སློང་དེས་མཛེས་དགའ་ལ་ལྷུང་བཟེད་ཀྱི་ལྷག་མ་
Ca61a
༄#། །བྱིན་པ་དང ། མཛེས་དགས་ཟོས་སོ། །ཟོས་ནས་དྲིས་པ། བཞིན་བཟང་ཁྱོད་ག་ལ་འོངས། མཛེས་དགས་སྨྲས་པ། འཕགས་པ་བདག་ནི་ཡུལ་སྲུང་བྱེད་དག་ན་གྲོང་ཁྱེར་འཕགས་རྒྱལ་ཞེས་བགྱི་བ་དེ་ན་དེད་དཔོན་དགའ་བོ་ཞེས་བགྱི་བ་མཆིས་པ་དེའི་བུ་མཛེས་དགའ་ཞེས་བགྱི་བ་ལགས་ཏེ་བདག་ཟོང་མང་པོ་འཚལ་ཏེ་མཆིས་པ་ལས་འཇུད་མཐུན་མས་ཚུལ་མ་ལགས་པས་གནོད་པ་བསྒྲུབས་པར་གྱུར་ཏོ། །དགེ་སློང་དེས་སྨྲས་པ། བཞིན་བཟང་ཅིའི་ཕྱིར་རབ་ཏུ་མི་འབྱུང ། མཛེས་དགས་གལ་ཏེ་བདག་འཕགས་རྒྱལ་དུ་སོང་བར་གྱུར་ན། སུ་ཞིག་མཆིལ་མ་དག་ས་ལ་འདོར་བར་འགྱུར་ཏེ། བདག་ཁོ་ནའི་སྟེང་འབའ་ཞིག་ཏུའོ་སྙམ་དུ་ཤེས་ཤིང་རིག་ནས་སྨྲས་པ། འཕགས་པ་བདག་རབ་ཏུ་འབྱུང་ངོ ། །དགེ་སློང་དེས་མཛེས་དགའ་རབ་ཏུ་ཕྱུང་བསྙེན་པར་རྫོགས་པར་བྱས་ནས་དེའི་འོག་ཏུ་ཉི་མ་གཉིས་སམ་གསུམ་དུ་ཀུན་ཏུ་སྤྱད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟང་རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་བསྒྲུབས་ལ་འཚོ་བར་གྱིས་ཤིག་།མཛེས་དགའ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་དུ་བསོད་སྙོམས་ལ་ཞུགས་སོ། །གཟུགས་འཚོ་མ་བཟང་མོ་ཡང་འགྱོད་པ་སྐྱེས་ཏེ་བདག་གིས་ཀར་ཤ་པ་ན་འདོད་པའི་རྒྱུས་དེད་དཔོན་མཛེས་དགའ་དེ་ཙམ་དུ་མཛེས་ཤིང་ལང་ཚོ་ལ་བབ་པ་དེ་བསྐྲད་པ་ནི་མ་
Ca61b
ལེགས་པ་བྱས་ཏེ། ཤིན་ཏུ་ཐག་རིང་བར་སོང་ཡང་སྐྱེས་བུ་དེ་ལྟ་བུ་ལྷན་ཅིག་དགའ་མགུར་སྤྱད་པར་བྱ་བ་ཡིན་པར་ཤེས་ཤིང་རིག་ནས། བུ་མོ་མངག་གཞུག་མ་ལ་བུ་མོ་གལ་ཏེ་དེད་དཔོན་མཛེས་དགའ་མཐོང་ན་ཡང་འཇུག་ཏུ་ཆུག་ཅིག་ཅེས་བསྒོའོ། །མཛེས་དགའ་སྤྱོད་ཡུལ་ལ་མི་མཁས་པས་བསོད་སྙོམས་སྒྲུབ་པ་ན་འཇུད་མཐུན་མའི་ཁྱིམ་དེ་ཉིད་དུ་ཕྱིན་པ་དང ། བུ་མོ་མངག་གཞུག་མ་དེས་མཐོང་ནས་ཡོངས་སུ་དགའ་བས་བཟང་མོ་ལ་ཇོ་མོ་མཛེས་དགའ་ཁབ་སྒོར་མཆིས་སོ་ཞེས་སྦྲན་ཏོ། །བཟང་མོས་སྨྲས་པ། འཇུག་ཏུ་ཆུག་ཅིག་།བུ་མོས་སྨྲས་པ། རབ་ཏུ་བྱུང་ངོ ། །བཟང་མོས་སྨྲས་པ། རབ་ཏུ་བྱུང་ཡང་འཇུག་ཏུ་ཆུག་ཅིག་།མངག་གཞུག་མ་དེས་མཛེས་དགའ་འཇུག་ཏུ་བཅུག་ནས་གཟུགས་འཚོ་མ་བཟང་མོས་མཐོང་བ་དང ། བཟང་མོས་བྲང་བརྡུངས་ཏེ་སྨྲས་པ། མཛེས་དགའ་ཁྱོད་ཀྱིས་ཅིའི་སླད་དུ་ངན་བུ་སྤངས་ཏེ་རབ་ཏུ་བྱུང ། མཛེས་དགས་སྨྲས་པ། སྐལ་ཆད་མ་ཁྱོད་ཁོ་བོ་ཁོ་ནའི་མདུན་དུ་སྐྱེས་པ་གཞན་དང་ལྷན་ཅིག་དགའ་མགུར་སྤྱོད་པར་བྱེད་ན་ཁོ་བོ་ཇི་ལྟར་རབ་ཏུ་མི་འབྱུང ། བཟང་མོས་སྨྲས་པ། རྗེའི་སྲས་བུད་མེད་ཀྱི་ཡུལ་ནི་རྟག་ཏུ་ནོངས་པ་མཆིས་པས་བདག་ནོངས་པ་མཆིས་པ་དེ་བཟོད་པར་མཛད་ཅིང ། ད་ནི་བདག་དང་རྫས་ཀྱང་ཁྱོད་ཀྱི་ལགས་ཀྱིས་ཚུར་སྤྱོན་བདག་དང་ལྷན་ཅིག་དགའ་མགུར་སྤྱད་དུ་གསོལ། མཛེས་དགས་སྨྲས་པ། དེའི་ཡང་ཁྱོད་ཀྱིས་ཁོ་བོ་རེ་ཞིག་ནོར་དང་དོན་མཐུན་དག་ལས་ཡོངས་སུ་ཉམས་པ་བྱས་ན། ཅི་ད་ཚུལ་ཁྲིམས་ལས་ཀྱང་ཡོངས་སུ་ཉམས་པར་བྱེད་
Ca62a
༄#། །འདོད་དམ། བཟང་མོས་སྨྲས་པ། འཕགས་པ་སླད་རོལ་དུ་དྲུད་ཅིང་ནང་དུ་ཕོ་ལ་ནང་དུ་དྲུད་ཅིང་སླད་རོལ་ཏུ་ཕོ་ཞིག་དང ། འདི་ལ་ཚུལ་ཁྲིམས་འཆལ་བ་ཅི་མཆིས། མཛེས་དགས་དགེ་སློང་གནས་བརྟན་ནོ་ཅོག་འདིར་བསོད་སྙོམས་ལ་འཇུག་པ་དེ་དག་ཀྱང་གོར་མ་ཆག་པར་འདི་ལྟར་བྱེད་པས་དེས་ན་འདི་སྐད་ཟེར་རོ་སྙམ་དུ་ཤེས་ཤིང་རིག་ནས། མཛེས་དགས་ལྷུང་བཟེད་དང་ཆོས་གོས་མཐའ་གཅིག་ཏུ་གཞག་སྟེ། ཕྱི་རོལ་དུ་དྲུད་ཅིང་ནང་དུ་ཕོ་ནང་དུ་དྲུད་ཅིང་ཕྱི་རོལ་དུ་ཕོ་ནས་ཡ་མཚན་དང་བྲལ་བར་གྱུར་ཏོ། །དེ་ནས་བཟང་མོས་བཅའ་བ་དང ། བཟའ་བ་གཙང་མ་བསོད་པས་ལྷུང་བཟེད་འགེངས་སུ་བཅུག་སྟེ་བྱིན་ནས། འཕགས་པ་གལ་ཏེ་ཡང་བཞེད་པར་གྱུར་ན་སྤྱོན་ཅིག་ཅེས་ཀྱང་སྨྲས་སོ། །མཛེས་དགས་བསོད་སྙོམས་བླངས་ཏེ་སོང་ངོ ། །ཇི་ཙམ་ན་བཅོམ་ལྡན་འདས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །ཞེ་སྡང་འདོད་ཆགས་དང་བྲལ་བར་བྱ་བའི་ཕྱིར་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །བཅོམ་ལྡན་འདས་ཇི་ལྟ་ཇི་ལྟར་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དང ། ཞེ་སྡང་འདོད་ཆགས་དང་བྲལ་བར་བྱ་བའི་ཕྱིར་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་
Ca62b
གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་སྟོན་པ་དེ་ལྟ་དེ་ལྟར། ཚེ་དང་ལྡན་པ་མཛེས་དགའ་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར། རབ་ཏུ་འགྱེད་པར་གྱུར་ཅིང་འདུག་ལ། འགྱོད་པ་དང་ལྡན། འགྱོད་པ་ཐོབ། ཅང་མི་སྨྲ་བར་གྱུར། ཡུལ་ཡུལ་པོར་གྱུར། ཕྲག་པ་གློད། གདོང་སྨད། སྤོབས་པ་མེད། སེམས་ཁོང་དུ་ཆུད་ཅིང་འདམ་བུ་སྔོན་པོ་བརྔས་པ་རྙིངས་པར་འགྱུར། སྐམ་པར་འགྱུར་བ་ལྟར་འདུག་གོ་།དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མཛེས་དགའ་ཁྱོད་ལ་ལུས་ཀྱི་གནོད་པའམ། སེམས་ཀྱི་ཡོངས་སུ་གདུང་བ་འགའ་ཞིག་མེད་དམ། དེ་ངོ་ཚ་བས་སྨྲ་བར་མི་བྱེད་ཅིང་འགའ་ཡང་མེད་དོ་ཞེས་ཟེར་རོ། །སྨན་པ་ཞིག་ཕྱོགས་དེར་འོངས་པ་དེ་ལ་དགེ་སློང་རྣམས་ཀྱིས་སྨྲས་པ། བཞིན་བཟང་གཞོན་ནུ་འདི་ནད་ཅི་ཡིན་པ་དེ་ལྟོས་ཤིག་།སྨན་པ་དེས་དེ་བརྟག་པར་བརྩམས་པ་དང ། དབང་པོ་གསལ་བ་མཐོང་ནས་སྨྲས་པ། འཕགས་པ་དག་འདིའི་དབང་པོ་དག་གསལ་བས། འདི་ལ་ལུས་ཀྱི་ནད་ནི་འགའ་ཡང་མ་མཆིས་ཀྱི། འདི་ལ་སེམས་ཀྱི་ཡོངས་སུ་གདུང་བ་ནི་གོར་མ་བཀུམ་པར་མཆིས་སོ། །དགེ་སློང་རྣམས་ཀྱིས་སྨྲས་པ། བཞིན་བཟང་འདིའི་སེམས་ཀྱི་ཡོངས་སུ་གདུང་བ་ཇི་ལྟ་བུ་ཡིན། སྨན་པས་སྨྲས་པ། འཕགས་པ་བདག་ཅག་སྨན་པ་དག་ནི་ལུས་གསོ་བར་བགྱིད་པ་ལགས་ཀྱི་སེམས་གསོ་བར་བགྱིད་པ་མ་ལགས་ཏེ། འདི་ལྟར་འཕགས་པ་དག་ཉིད་སེམས་གསོ་བར་མཛད་པ་ལགས་པས། འཕགས་པ་དག་ཉིད་ཀྱིས་མཁྱེན་པར་འགྱུར་རོ་ཞེས་སྨྲས་ཏེ་སོང་ངོ ། །
Ca63a
༄#། །དགེ་སློང་རྣམས་ཀྱིས་མཛེས་དགའ་ལ་སྨྲས་པ། ཚེ་དང་ལྡན་པ་འདི་ན་ཁྱོད་ཀྱི་ཕ་ཡང་མེད་མ་ཡང་མེད་རྩ་ལག་གཞན་ཡང་མེད་དེ། ཚངས་པ་མཚུངས་པར་སྤྱོད་པ་ངེད་ཅག་ཁོ་ནར་ཟད་པས་ངེས་ཀྱིས་ཁྱོད་ཀྱི་བསྙེན་བཀུར་བྱས། ཇི་ལྟར་གྱུར་པ་སྨྲོས་ཤིག་།མཛེས་དགས་དགེ་སློང་དེ་དག་ལ་སྐབས་དེ་རྒྱས་པར་བརྗོད་དོ། །དགེ་སློང་དེ་དག་གིས་སྨྲས་པ། ཚེ་དང་ལྡན་པ་ནི་འབྲས་བུ་ཁོ་ནས་ཚ་བར་གྱུར་ཏེ། ཚེ་དང་ལྡན་པས་རབ་ཏུ་བྱུང་བ་ཙམ་ཉིད་ཀྱིས་བསྟན་པ་ལ་ཆུ་བུར་ཕྱུང་བར་གྱུར་ཏོ་ཞེས་དགེ་སློང་དེ་དག་མཛེས་དགས་སྨྲས་པ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང ། མངོན་པར་བསྟོད་པ་ཡང་མ་བྱས། ཕྱིར་བཟློག་པ་ཡང་མ་བྱས་པར་དོང་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་དེ་དག་གི་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེས་ཀྱང་མི་གཏི་མུག་ཅན་དེ་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་ཅིང ། དེ་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པས་ཟག་བྱེད་ཟག་བྱེད་ཀྱི་ཕྱི་རོལ་ཏུ་དྲུད་ཅིང་ནང་དུ་འབོ་བ་དང ། ནང་དུ་དྲུད་ཅིང་ཕྱི་རོལ་ཏུ་འབོ་བར་བྱེད་ན་ཕམ་པར་འགྱུར་རོ། །
Ca63b
སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་པ་དང་ཆུང་མ་དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་ཆུང་མ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །ཁྱིམ་ཐབ་དེ་ཡང་སྐུར་པ་གདབ་པར་འགྱུར་བའི་ལས་དག་གིས་ཆུང་མ་གསོད་པ་ཆུང་མ་གསོད་ཅེས་བྱ་བའི་མིང་དུ་གྱུར་ཏོ། །ཁྱིམ་བདག་དེས་ཡང་བུ་མོ་བླངས་པ་དང ། མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང ། མི་སྦྱིན་ནོ་ཞེས་ཀྱང་ཟེར་རོ། །ཁྱིམ་བདག་དེས་ཡུགས་མོ་དག་བླངས་པ་དང ། ཡུག་ས་མོ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་གཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེ་རྣམ་པ་ཐམས་ཅད་དུ་ཡི་ཆད་ནས། རང་ཉིད་ཀྱིས་ཁྱིམ་གྱི་སོ་ཚིས་དག་བྱ་བར་བརྩམས་པ་དང ། དུས་གཞན་ཞིག་ན་ཁྱིམ་བདག་དེའི་ཆུང་པོ་གྲོགས་ཤིག་འོངས་ནས་དེས་ཁྱིམ་བདག་དེ་མཐོང་ནས་དྲིས་པ་ཁྱོད་ཅི་བྱེད། ཁྱིམ་བདག་གིས་སྨྲས་པ། ཁྱིམ་གྱི་སོ་ཚིས་དག་བྱེད་དོ། །དེས་སྨྲས་པ། ཁྱོད་ཅིའི་ཕྱིར་རང་ཉིད་ཀྱིས་ཁྱིམ་གྱི་སོ་ཚིས་དག་བྱེད། ཁྱིམ་བདག་གིས་སྨྲས་པ། ཁོ་བོས་ཆུང་མ་གཅིག་བླངས་པ་དང ། དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །དེས་སྨྲས་
Ca64a
༄#། །པ།་གཞན་དག་ཅིའི་ཕྱིར་མི་སློང ། ཁྱིམ་བདག་གིས་སྨྲས་པ། བསླངས་ན་མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང ། མི་སྦྱིན་ནོ་ཞེས་ཟེར་རོ། །དེས་སྨྲས་པ།་ཡུག་ས་མོ་དག་ཅིའི་ཕྱིར་མི་སློང ། ཁྱིམ་བདག་གིས་སྨྲས་པ། བསླངས་ཏེ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་གཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེའི་ཁྱིམ་གྱི་ཧ་ཅང་ཡང་མི་རིང་བ་ན་ཚོགས་ཅན་མ་རྒན་མོ་ཞིག་འདུག་ནས་ཆུང་པོ་གྲོགས་དེས་ཁྱིམ་བདག་ལ་སྨྲས་པ། ཚོགས་ཅན་མ་རྒན་མོ་དེ་ཅིའི་ཕྱིར་འཇུག་ཏུ་མི་གཞུག་།ཁྱིམ་བདག་གིས་སྨྲས་པ།་ཅི་ཁོ་བོས་འཇུད་མཐུན་མའི་ཁྱིམ་བྱའམ། དེས་སྨྲས་པ། ཚོགས་ཅན་མ་དེ་སྡིག་པ་ཅན་དམ་པ་མ་ཡིན་པའི་ཆོས་དེ་ལས་ཕྱིར་ལྡོག་གིས་འཇུག་ཏུ་ཆུག་ཅིག་།ཁྱིམ་བདག་དེ་ཆུང་པོ་གྲོགས་དེས་ནན་གྱི་མནན་པ་ན་ཚོགས་ཅན་མ་དེའི་གན་དུ་སོང་སྟེ། བདེ་ལེགས་བདེ་ལེགས་ཞེས་སྨྲས་པ་དང ། རྒན་མོས་སྨྲས་པ། བྱོན་པ་ལེགས་སོ་ཅི་བཞེད། ཁྱིམ་བདག་གིས་སྨྲས་པ། ཁྱོད་འཚལ་ན་ཁྱོད་སུའི། རྒན་མོས་སྨྲས་པ། བདག་ལ་ཟས་དང་གོས་སྦྱིན་པ་གང་ལགས་པའིའོ། །ཁྱིམ་བདག་གིས་སྨྲས་པ། ཁྱོད་སྔོན་གྱི་ཉོན་མོངས་པ་དག་ཀུན་ཏུ་མི་སྤྱོད་དམ། རྒན་མོས་སྨྲས་པ། ཅི་བདག་གིས་སྐྱེས་པ་མ་མཐོང་ངམ། བདག་སྡིག་པ་ཅན་དམ་པ་མ་ལགས་པའི་ཆོས་དེ་ལས་ནི་ཕྱིར་ལོག་གོ་།ཁྱིམ་བདག་གིས་སྨྲས་པ། ཚུར་སྤྱོན་བཞུད་བདག་གིས་ཁྱོད་ཀྱི་ན་བཟའ་དང་
Ca64b
བཤོས་གསོལ་གྱིས། ཁྱོད་ཀྱིས་བདག་གི་ཁྱིམ་གྱི་སོ་ཚིས་དག་མཛོད་ཅིག་།ཁྱིམ་བདག་དེས་ཚོགས་ཅན་མ་རྒན་མོ་དེ་ཁྱིམ་དུ་བཅུག་སྟེ། ལྡེ་མིག་དང ། ལྡེ་མིག་འཁྱོག་པོ་དག་གཏད་ནས་སྨྲས་པ།་འདི་ཁྱོད་ཀྱི་ཁྱིམ་ཡིན་གྱིས་ཁྱོད་ཀྱིས་བྱིན་པས་ཁོ་བོ་བྱ་བ་བྱེད་དོ། །ཚོགས་ཅན་མ་རྒན་མོ་དེས་ཁྱིམ་བདག་དེའི་ཁྱིམ་གྱི་སོ་ཚིས་དག་བྱ་བར་བརྩམས་ནས། དེའི་འོག་ཏུ་གོས་དང་ཟས་བཟང་པོས་དུས་ཡུན་མི་རིང་བ་ཞིག་གིས་པགས་པ་དང་ཤ་དང་ཁྲག་དག་རྟས་པར་གྱུར་ཏོ། །དེའི་སྒོའི་ཉེ་འཁོར་ནས་བུ་མོ་རབ་ཏུ་མང་པོ་དག་ཅིག་རྒྱལ་བྱེད་ཀྱི་ཚལ་དུ་འདོང་བ་ཚོགས་ཅན་མ་རྒན་མོས་མཐོང་ནས། གར་འདོང་ཞེས་དྲིས་པ་དང ། བུ་མོ་དག་གིས་སྨྲས་པ། རྒྱལ་བྱེད་ཀྱི་ཚལ་དུ་འདོང་ངོ ། །རྒན་མོས་སྨྲས་པ། ཁོ་མོ་གོས་དང་རྒྱན་ཐོགས་ཀྱི་བར་དུ་རེ་ཞིག་སྡོད་ཅིག། །རྒན་མོ་གོས་དང་རྒྱན་ཐོགས་པ་དེའི་བར་དུ་བུ་མོ་དག་ཐལ་ཏེ་དོང་ངོ ། །རྒན་མོ་ཡང་གོས་དང་རྒྱན་ཐོགས་ནས་ཕྱི་བཞིན་མྱུར་བ་མྱུར་བར་འཕགས་སོ། །ཇི་ཙམ་ན་བུ་མོ་དེ་དག་གཙུག་ལག་ཁང་དུ་ཞུགས་པ་ན། གཙུག་ལག་ཁང་དེ་ན་དགེ་སློང་ཞིག་གནས་ཁང་སྒོ་མ་བཅད་པ་ན་གཉིད་ལོག་པར་གྱུར་པ་དེའི་གོས་རྣམ་པར་འཐོར་བར་གྱུར་ཅིང ། དེའི་ཡན་ལག་གི་རྣམ་པ་ཡང་ལས་སུ་རུང་བར་གྱུར་པ་བུ་མོ་དེ་དག་གིས་མཐོང་ནས། བུ་མོ་དེ་དག་དགོད་ཅིང་གཙུག་ལག་ཁང་ནས་ཕྱིར་བྱུང་ངོ ། །ཚོགས་ཅན་མ་རྒན་མོ་ཡང་འཇུག་ཅིང་རྒན་མོས་བུ་མོ་དེ་དག་མཐོང་ནས་སྨྲས་པ། ཁྱེད་ཅག་ཅི་ལ་དགོད། གང་བསྟི་གནས་སུ་དགོད་
Ca65a
༄#། །པ་དེ་སོ་སྟོ་མར་འགྱུར་རོ་ཞེས་བྱ་བ་ཁྱེད་ཀྱིས་མ་ཐོས་སམ། བུ་མོ་དེ་དག་ཅང་མི་སྨྲ་བར་ཉིད་དུ་བྱུང་སྟེ་དོང་ངོ ། །ཚོགས་ཅན་རྒན་མོས་བུ་མོ་དེ་དག་གིས་འདིར་བྱ་གག་གམ་སྤྲེའུ་ཞིག་མཐོང་བར་གྱུར་གོར་མ་ཆག་སྙམ་དུ་ཤེས་ཤིང་རིག་ནས་སེམས་གཏོད་ཅིང་ངེས་པར་རྟོག་བཞིན་དུ་ཞུགས་པ་དང ། ཇི་ཙམ་ན་དགེ་སློང་དེ་དེ་ལྟར་རྣམ་པར་གྱུར་པ་མཐོང་ངོ ། །མཐོང་ནས་ཀྱང་དེ་ལ་འདོད་པའི་ཆོས་སྐྱེས་ནས། ཚོགས་ཅན་མ་རྒན་མོ་དེས་དགེ་སློང་དེའི་སྟེང་དུ་བགྲད་དེ་བརྩལ་བར་བརྩམས་པ་དང ། དགེ་སློང་དེ་གཉིད་སྟུག་པོས་ནོན་པས་ཕྱིར་མ་སད་དོ། །ཚོགས་ཅན་མ་རྒན་མོས་བདག་ཅག་ཚོགས་ཅན་མ་དག་གིས་ནི་སྒྱུ་རྩལ་དྲུག་ཅུ་རྩ་བཞི་མངོན་པར་ཤེས་ན་རབ་ཏུ་བྱུང་བ་འདིས་ཀོ་སྒྱུ་རྩལ་དྲུག་ཅུ་རྩ་ལྔ་ཤེས་ཏེ་འདི་ལྟར་རེག་པ་ནི་བདག་གིར་བྱེད་ལ་ཚིག་ནི་མི་སྟེར་ཏོ་སྙམ་དུ་ཤེས་ཤིང་རིག་ནས། གང་གི་ཚེ་ཚོགས་ཅན་མ་རྒན་མོ་དེས་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་དགེ་སློང་དེ་སད་པར་བྱས་ཏེ་སྨྲས་པ། འཕགས་པ་བདག་གི་སྡུམ་པ་ཕྱོགས་ག་གེ་མོ་ཞིག་ན་མཆིས་ཀྱིས། གལ་ཏེ་ཡང་བཞེད་པར་གྱུར་ན་སྤྱོན་ཅིག་།དགེ་སློང་དེས་སྨྲས་པ། སྐལ་ཆད་མ་བསྟི་གནས་སུ་ན་པར་བྱེད་པ་དེ་ཡང་རེ་ཞིག་ཁོ་བོ་བདག་གིར་མི་བྱེད་ན། ཁྱོད་ཀྱི་ཁྱིམ་དུ་འོང་བར་འགྱུར་རེ་སྐན། དགེ་སློང་དེ་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེས་དགེ་སློང་རྣམས་ལ་སྐབས་དེ་རྒྱས་པར་བརྗོད་དོ། །དགེ་སློང་རྣམས་ཀྱིས་
Ca65b
བཅོམ་ལྡན་འདས་ལ་གསོལ་པ་དང ། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། དགེ་སློང་ཁྱོད་ཀྱིས་རེག་པ་བདག་གིར་མ་བྱས་སམ། དེས་གསོལ་པ། བཙུན་པ་བདག་གིས་རེག་པ་བདག་གིར་མ་བགྱིས་ཏེ། བདག་དང་པོ་ཉིད་ནས་གཉིད་སྟུག་པོས་ནོན་པས་བདག་རེག་པ་བདག་གིར་བགྱིད་པར་ག་ལ་འགྱུར། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་རེག་པ་བདག་གིར་མ་བྱས་པ་འདི་ལ་ནི་ལྟུང་བ་མེད་མོད་ཀྱི་འོན་ཀྱང་ངས་དགེ་སློང་གྲོང་མཐའ་བའི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་གྲོང་མཐའ་པ་ཉིན་པར་གློས་ཕབ་སྟེ་གཉིད་ལོག་པས་སྒོ་སྒོ་གཏན་གྱིས་གཅད་པར་བྱ་བའམ། སྲུང་མ་དགེ་སློང་གཞག་པར་བྱ་བའམ། གོས་བཅིང་བར་བྱའོ། །སྒོ་སྒོ་གཏན་གྱིས་གཅོད་པར་མི་བྱེད་དམ། སྲུང་མ་དགེ་སློང་འཇོག་པར་མི་བྱེད་དམ། གོས་འཆིང་བར་མི་བྱེད་པར་ཉིན་པར་དེ་བཞིན་དུ་གློས་ཕབ་སྟེ། གཉིད་ལོག་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་དགོན་པ་པ་བསམ་གཏན་བཞི་པ་ཐོབ་པ་ཞིག་འདུག་པ་དེ་ཡང་དང་ཡང་དུ་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་བྱ་བའི་ཕྱིར་ཉེ་བར་འགྲོ་བས་དེ་དགེ་སློང་གསར་བུ་གསར་བུ་དག་གིས་ངོ་ཤེས་པར་བྱས་སོ། །དེ་ལ་དུས་གཞན་ཞིག་ན་གཡན་པའི་ནད་
Ca66a
༄#། །བྱུང་ནས། དེ་ལ་དགེ་སློང་གསར་བུ་གསར་བུ་དེ་དག་གིས་སྨྲས་པ། གནས་བརྟན་ཁྱོད་ལ་གཡན་པའི་སྙུན་བྱུང་ངམ། དེས་སྨྲས་པ། བཞིན་བཟང་དག་དེ་དེ་བཞིན་ནོ། །དེ་དག་གིས་སྨྲས་པ། གནས་བརྟན་ཅིའི་སླད་དུ་སྨན་པ་ལ་རྨས་ཏེ་བྱ་བ་མི་མཛད། དེས་སྨྲས་པ། བཞིན་བཟང་དག་སྐྱེ་བོ་མང་པོ་མི་འདོད་པ་དང ། སྐྱེ་བོ་མང་པོ་མི་དགའ་བ་དང ། སྐྱེ་བོ་མང་པོ་ལ་མི་སྡུག་བ་དང ། སྐྱེ་བོ་མང་པོའི་ཡིད་དུ་མི་འོང་བ་འཇིག་རྟེན་ཐམས་ཅད་དང་ཐུན་མོང་བ་འདི་ལྟ་སྟེ། འཆི་བ་ཞེས་བྱ་བའི་ཆོས་དེ་འོང་བར་འགྱུར་ཞིང་དེས་ནད་འདི་དང་ཁོ་བོ་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་ཁྲིད་པར་འགྱུར་བས་བྱ་བ་བྱར་ཅི་ཡོད། དེ་དག་གིས་སྨྲས་པ། གནས་བརྟན་འོ་ན་བཅོམ་ལྡན་འདས་ཀྱིས་སྐྱེས་བུ་གང་ཟག་ཚུལ་ཁྲིམས་དང་ལྡན་པ་ཡུན་རིང་པོ་ཇི་སྲིད་དུ་འཚོ་བ་དེ་སྲིད་དུ་བསོད་ནམས་མང་པོ་འཕེལ་ཞིང་ཇི་སྲིད་དུ་བསོད་ནམས་མང་པོ་འཕེལ་བ་དེ་སྲིད་དུ་ཡུན་རིང་པོར་མཐོ་རིས་དག་ཏུ་དགའ་བར་འགྱུར་རོ་ཞེས་མ་གསུངས་སམ། བཞུད་ལ་བྱ་བ་མཛོད་ཅིག་།དེ་དེ་དག་གིས་ནན་གྱིས་མནན་པ་ན་སྨན་པའི་གན་དུ་སོང་བ་དང ། སྨན་པས་དེ་མཐོང་ནས་སྨྲས་པ། འཕགས་པ་ཁྱོད་ལ་གཡན་པའི་སྙུན་བྱུང་ངམ། དེས་སྨྲས་པ། བཞིན་བཟང་དེ་བཞིན་ཏེ། དེའི་དོན་ཁོ་ནར་ཁོ་བོ་འོངས་ཀྱིས་བདག་ལ་སྨན་སྟོན་ཅིག་།འཕགས་པ་བཤོས་བསོད་པ་གསོལ་ལ་ཡུངས་མར་གྱིས་སྐུ་དག་བསྐུས་ཏེ། གདུགས་ལ་བཞུགས་ཤིག་དང་ཁྱོད་སོས་པར་འགྱུར་རོ། །བཞིན་
Ca66b
བཟང་ཁོ་བོ་ལ་ཡུངས་མར་སྩོལ་ཅིག་།འཕགས་པ་བདག་ཅག་སྨན་པ་དག་ནི་སྨན་སྟོན་པ་ལགས་ཀྱི་འབུལ་བ་ནི་མ་ལགས་ཏེ། གལ་ཏེ་རེ་རེ་ལ་ཡང་འབུལ་ན་བདག་ཅག་ལ་འཚལ་མ་ཡང་མ་མཆིས། རད་པ་ཡང་མ་མཆིས་པར་འགྱུར་རོ། །འདི་ལྟར་ཁྱིམ་བདག་ཆེ་གེ་མོ་ཞིག་ལ་བྲོ་ནད་འདི་ལྟ་བུ་བྱུང་བར་གྱུར་ནས། བདག་གིས་དེའི་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་བསྐོལ་གྱིས།་དེའི་གན་དུ་བཞུད་ལ་སློངས་ཤིག་།བཞིན་བཟང་མི་སྟེར་བར་འགྱུར་རོ། །འཕགས་པ་བཞུད་ཅིག་དང ། དེ་དད་པ་ཅན་ལགས་པས་འབུལ་བར་འགྱུར་རོ། །བཞིན་བཟང་ཨ་རོག་གྱ། དོན་གྱིས་ན་ཁྱོད་ཉིད་ཀྱིས་བྱིན་ནོ་ཞེས་སྨྲས་ཏེ་སོང་ནས་ཁྱིམ་བདག་དེའི་ཁྱིམ་ག་ལ་བ་དེར་སོང་བ་དང ། ཁྱིམ་བདག་དེས་དེ་ཐག་རིང་པོ་ནས་མཐོང་ནས་སྨྲས་པ། འཕགས་པ་ཁྱོད་ལ་གཡན་པའི་སྙུན་བྱུང་ངམ།་བཞིན་བཟང་དེ་དེ་བཞིན་ནོ། །འཕགས་པ་ཡུངས་མར་གྱིས་སྐུ་དག་བསྐུས་ཏེ་གདུགས་ལ་བཞུགས་ཤིག་དང་ཁྱོད་སོས་པར་འགྱུར་རོ། །བཞིན་བཟང་དེའི་དོན་ཁོ་ནར་ཁོ་བོ་འོངས་ཏེ། ཁོ་བོས་ཁྱོད་ལ་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་ཡོད་པར་ཤེས་ཀྱིས་དེ་བྱིན་ཅིག་དང ། ཁྱོད་ལ་བསོད་ནམས་སུ་འགྱུར་རོ། །འཕགས་པ་དམ་ཚིག་ལ་དབུལ་བར་བགྱི་སྟེ། གལ་ཏེ་བདག་ལས་བསོད་སྙོམས་གསོལ་བར་འགྱུར་ནའོ། །བཞིན་བཟང་བཟའ་བར་བྱའོ། །ཁྱིམ་བདག་དེས་དེ་ཟས་བསོད་པས་ཚིམ་པར་བྱས་ནས་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་གྱིས་
Ca67a
༄#། །ལྷུང་བཟེད་ཆུང་ངུ་འགེངས་སུ་བཅུག་སྟེ་བྱིན་ནོ། །དགེ་སློང་དེས་ཨ་རོག་གྱ་ཞེས་བརྗོད་དེ་སོང་ནས། དགོན་པའི་གནས་སུ་སོང་སྟེ་དམ་དུམ་དག་གྱོན་ནས་ཡུངས་མར་དེས་ལུས་དག་བསྐུས་ཏེ་ཉི་མ་ལ་འདུག་པ་དང་དེ་ལ་བདེ་བའི་འདུ་ཤེས་སྐྱེས་པར་གྱུར་ནས་གཉིད་ལོག་པ་དང ། དེའི་ཡན་ལག་གི་རྣམ་པ་སྲོག་ཆགས་ཨུད་ཙ་ཏིང་གས་ཟིན་ཅིང་ལས་སུ་རུང་བར་གྱུར་ནས། དེའི་གོས་ཀྱང་འཐོར་བར་གྱུར་པ་དང ། ཇི་ཙམ་ན་གཞོན་ནུ་མ་ཆེན་མོ་ཞིག་ལྕི་བ་ཐུ་བ་ན་ཕྱོགས་དེར་སོན་པ་དང ། དེས་དགེ་སློང་དེ་དེ་ལྟར་རྣམ་པར་གྱུར་པ་མཐོང་ངོ ། །མཐོང་ནས་དེ་ལ་འདོད་པ་ལ་འདོད་ཆགས་ཀྱི་ཀུན་ནས་དཀྲིས་པ་སྐྱེས་ནས། དེས་དགེ་སློང་དེའི་སྟེང་དུ་བརྩལ་བར་བརྩམས་པ་དང ། དགེ་སློང་དེ་སད་ན་ཉམས་ཆུང་བས་ཕྱིར་བཟློག་པར་མ་ནུས་སོ། ། གང་གི་ཚེ་དེ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་སྨྲས་པ། འཕགས་པ་བདག་གི་སྡུམ་བ་ཕྱོགས་ག་གེ་མོ་ཞིག་ན་མཆིས་ཀྱིས་གལ་ཏེ་ཡང་བཞེད་པར་གྱུར་ན་སྤྱོན་ཅིག་།དགེ་སློང་དེས་སྨྲས་པ། སྐལ་ཆད་མ་བསྟི་གནས་སུན་པར་བྱེད་པ། ཁོ་བོ་རེ་ཞིག་དེ་ཡང་བདག་གིར་མི་བྱེད་ན། ཁྱོད་ཀྱི་ཁྱིམ་དུ་འོང་བར་འགྱུར་རེ་སྐན། དགེ་སློང་དེ་བདག་ལ་ཕམ་པར་གྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་དགེ་སློང་རྣམས་ལ་སྐབས་དེ་རྒྱས་པར་བརྗོད་པ་དང ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། དེ་ནས་བཅོམ་
Ca67b
ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། དགེ་སློང་ཁྱོད་ཀྱིས་རེག་པ་བདག་གིར་མ་བྱས་སམ། དེས་གསོལ་པ། བཙུན་པ་བདག་གིས་རེག་པ་བདག་གིར་མ་བགྱིས་ཏེ། བདག་དང་པོ་ཉིད་ནས་འདོད་པ་ལས་འདོད་ཆགས་དང་བྲལ་བས་བདག་རེག་པ་བདག་གིར་ག་ལ་བགྱིད། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་རེག་པ་བདག་གིར་མི་བྱེད་པ་འདི་ལ་ནི་ལྟུང་བ་མེད་མོད་ཀྱིས། འོན་ཀྱང་ངས་དགེ་སློང་དགོན་པ་པའི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་དགོན་པ་པ་ཉིན་པར་གློས་ཕབ་སྟེ་གཉིད་ལོག་པས་ཕྱོགས་དེ་ཡལ་ག་དག་གམ། སེག་དག་གམ། རེ་ལྡེ་དག་གིས་བསྐོར་བར་བྱ་བའམ། སྲུང་མ་དགེ་སློང་གཞག་པར་བྱ་བའམ། གོས་བཅིང་བྱའོ། །ཕྱོགས་དེ་ཡལ་ག་དག་གམ། སེག་དག་གམ། རེ་ལྡེ་དག་གིས་བསྐོར་བར་མི་བྱེད་དམ། སྲུང་མ་དགེ་སློང་འཇོག་པར་མི་བྱེད་དམ། གོས་འཆིང་བར་མི་བྱེད་པ་དེ་བཞིན་དུ་གློས་ཕབ་སྟེ་གཉིད་ལོག་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་གལ་ཏེ་དགེ་སློང་འདི་རེ་ཞིག་འདོད་པ་ལས་འདོད་ཆགས་དང་བྲལ་བ་ལགས་ན་ཅིའི་སླད་དུ་དེའི་ཡན་ལག་གི་རྣམ་པ་ལས་སུ་རུང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདོད་ཆགས་དང་མ་བྲལ་བའི་ཡན་ལག་གི་རྣམ་པ་ནི་རྒྱུ་ལྔས་ལས་སུ་རུང་བར་འགྱུར་ལ། འདོད་
Ca68a
༄#། །ཆགས་དང་བྲལ་བའི་ནི་རྒྱུ་བཞིས་སོ། །འདོད་ཆགས་དང་མ་བྲལ་བའི་རྒྱུ་ལྔ་གང་ཞེ་ན། བཤང་བས་ཉེ་བར་ནོན་པ་དང ། གཅི་བས་ཉེ་བར་ནོན་པ་དང ། རླུང་གིས་ཉེ་བར་ནོན་པ་དང ། སྲོག་ཆགས་ཨུ་ཙ་ཏིང་གས་ཟིན་པ་དང ། འདོད་པ་ལ་འདོད་ཆགས་ཀྱིས་ཀུན་ནས་དཀྲིས་པ་ཉིད་ནི་ལྔ་པ་སྟེ། འདོད་ཆགས་དང་མ་བྲལ་བ་ནི་རྒྱུ་ལྔ་པོ་དེ་དག་གིས་སོ། །འདོད་ཆགས་དང་བྲལ་བའི་རྒྱུ་བཞི་པོ་གང་ཞེ་ན། བཤང་བས་ཉེ་བར་ནོན་པ་དང ། གཅི་བས་ཉེ་བར་ནོན་པ་དང ། རླུང་གིས་ཉེ་བར་ནོན་པ་དང ། སྲོག་ཆགས་ཨུ་ཙ་ཏིང་གས་ཟིན་པ་སྟེ། འདོད་ཆགས་དང་བྲལ་བའི་རྒྱུ་ནི་བཞི་པོ་དེ་དག་གིས་སོ། །དགེ་སློང་འདིའི་ཡན་ལག་གི་རྣམ་པ་ནི་དེའི་ཚེ་ན་སྲོག་ཆགས་ཨུ་ཙ་ཏིང་གས་ཟིན་པས་དེས་ན་འདིའི་ལས་སུ་རུང་བར་གྱུར་ཏོ།། །། འདུལ་བ་རྣམ་པར་འབྱེད་པ། བམ་པོ་གསུམ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀ་ལན་དཀའི་བུ་ཚེ་དང་ལྡན་པ་བཟང་བྱིན་གྱིས་དགེ་སློང་གི་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་ཀྱི་འདི་ལྟར་འདས་པའི་དུས་ན་ཡང་འདིས་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་
Ca68b
པའི་རྐྱེན་གྱིས་ཆུ་བུར་ཕྱུང་སྟེ། དེ་ཉོན་ཅིག་།དགེ་སློང་དག་འཇིག་རྟེན་འདི་འཇིག་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཇིག་པ་ན། སེམས་ཅན་དག་ཕལ་ཆེར་འོད་གསལ་གྱི་ལྷའི་རིས་སུ་སྐྱེའོ། །དེ་དག་དེ་ནི་གཟུགས་ཅན་ཡིད་ལས་བྱུང ། མ་ཚང་བ་མེད་པ། དབང་པོ་མ་ཉམས་པ། ཡན་ལག་ཉིང་ལག་ཐམས་ཅད་དང་ལྡན་པ། བཟང་བ་ཁ་དོག་དང་ལྡན་པ། རང་ལས་འོད་འབྱུང་བ།་ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་ས་ཆེན་པོ་འདི་ཆུ་འབའ་ཞིག་དང་རྒྱ་མཚོ་འབའ་ཞིག་ཏུ་གྱུར་ཏེ། ས་ཆེན་པོ་ཆུ་འབའ་ཞིག་དང ། རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དེ། འདི་ལྟ་སྟེ་དཔེར་ན་འོ་མ་བསྐོལ་བ་གྲང་པར་གྱུར་པའི་སྟེང་དུ་ཡང་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་པ་དེ་བཞིན་དུ། ས་ཆེན་པོ་ཆུ་འབའ་ཞིག་དང་རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་ཡང་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དོ། །དེ་ནི་སའི་བཅུད་ཁ་དོག་ཕུན་སུམ་ཚོགས་པ་དྲི་ཕུན་སུམ་ཚོགས་པ་རོ་ཕུན་སུམ་ཚོགས་པ་ཡིན་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན་མར་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དགེ་སློང་དག་འཇིག་
Ca69a
༄#། །རྟེན་འདི་འཆགས་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཆགས་པ་ན་འོད་གསལ་གྱི་ལྷའི་རིས་དེ་ནས་སེམས་ཅན་ཁ་ཅིག་ཚེ་ཟད་ལས་ཟད་བསོད་ནམས་ཟད་པས་ཤི་འཕོས་ཏེ། འདི་ལྟ་བུ་ཉིད་དུ་མི་རྣམས་དང་སྐལ་བ་མཐུན་པ་ཉིད་དུ་འོང་ཞིང་འདིར་ཡང་གཟུགས་ཅན་ཡིད་ལས་བྱུང་བ། མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་མ་བྱུང་ངོ ། །འཇིག་རྟེན་དུ་རྒྱུ་སྐར་དག་ཀྱང་མ་བྱུང ། མཚན་མོ་དང་ཉིན་མོ་དག་ཀྱང་མ་བྱུང ། སྐད་ཅིག་དང་ཐང་ཅིག་དང་ཡུད་ཙམ་དག་ཀྱང་མ་བྱུང་ངོ ། །ཟླ་བ་དང ། ཟླ་བ་ཕྱེད་དང་དུས་ཚིགས་དང་ལོ་དག་ཀྱང་མ་བྱུང་ངོ ། །བུད་མེད་ཀྱང་མེད། སྐྱེས་པ་ཡང་མེད་དེ། སེམས་ཅན་སེམས་ཅན་ཞེས་བྱ་བ་འབའ་ཞིག་གི་གྲངས་སུ་འགྲོའོ། །དེ་ནས་སེམས་ཅན་བརྐམ་པའི་རང་བཞིན་ཅན་ཞིག་གི་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །སེམས་ཅན་གཞན་དག་གིས་ཀྱང་སེམས་ཅན་དེ་སོར་མོའི་རྩེ་མོས་སའི་བཅུད་མྱང་བར་བྱེད་པ་ན། ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་པ་དང ། ཇི་ལྟ་ཇི་ལྟར་འདོད་
Ca69b
པར་བྱེད་པ་དེ་ལྟ་དེ་ལྟར་ཁམས་ཀྱི་ཟས་ཀྱི་རྩོམ་པས་ཟོས་པར་གྱུར་པ་མཐོང་ངོ ། །མཐོང་ནས་སེམས་ཅན་དེ་དག་ཀྱང་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམས་ཀྱི་ཟས་ཀྱི་རྩོམ་པས་ཟོས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་གི་ལུས་ལ་སྲ་བ་ཉིད་དང ། ལྕི་བ་ཉིད་བྱུང་ཞིང་དེ་དག་གི་ཁ་དོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །དགེ་སློང་དག་ཆོས་ཉིད་ཀྱིས་ན་འཇིག་རྟེན་དུ་མུན་པ་བྱུང་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་འབྱུང་བར་འགྱུར་རོ། །འཇིག་རྟེན་དུ་རྒྱུ་སྐར་དག་དང ། མཚན་མོ་དང ། ཉིན་མོ་དག་དང ། སྐད་ཅིག་དང་ཐང་གཅིག་དང་ཡུད་ཙམ་དག་དང ། ཟླ་བ་དང་ཟླ་བ་ཕྱེད་དང ། དུས་ཚིགས་དང་ལོ་དག་ཀྱང་འབྱུང་བར་འགྱུར་རོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ། ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་
Ca70a
༄#། །ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་སའི་བཅུད་མེད་པར་གྱུར་པ་ན། འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཀྱེ་མའོ་བཅུད་ཀྱེ་མའོ་བཅུད་ཅེས་ཀྱང་ཟེར་ཅིང་འདི་ལྟ་སྟེ་དཔེར་ན།་དེང་སང་མི་དག་ཟས་ཞིམ་པ་བཟང་པོ་ཅུང་ཞིག་རྙེད་ནས། ཡི་གེ་དང་སྦྱར་བ་དང ། ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཀྱེ་མའོ་བཅུད་ཀྱེ་མའོ་བཅུད་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་སའི་བཅུད་མེད་པར་གྱུར་པ་རྣམས་འདུས་ཤིང་ལྷགས་ནས། མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཀྱེ་མའོ་བཅུད་ཀྱེ་མའོ་བཅུད་ཅེས་ཟེར་ཡང ། སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་གི་སའི་བཅུད་མེད་པར་གྱུར་པ་ན། ས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། དོང་ཀའི་མེ་ཏོག་ལྟ་བུའོ། ། རོས་ནི་འདི་ལྟ་བུ་འདི་ལྟ་སྟེ་དཔེར་ན། སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་
Ca70b
ཁ་དོག་དང་ལྡན་པར་གྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ། ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་ཏེ། འདི་ལྟ་སྟེ་དཔེར་ན། དེང་སང་མི་དག་སྡུག་བསྔལ་དང་ཡིད་མི་བདེ་བ་འགའ་ཞིག་གིས་རེག་པ་ན་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང ། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་ས་ཞག་མེད་པར་གྱུར་པ་ན། འདུས་ཤིང་ལྷགས་ནས། མྱ་ངན་བྱེད་སྒྱིད་ལུག་པར་བྱེད་སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཟེར་ཡང ། སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་ས་ཞག་མེད་པར་གྱུར་པ་ན། མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ།
Ca71a
༄#། །ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། ཀ་དམ་བུ་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། ། དེ་དག་དེ་ཟ་ཞིང་ཟས་དེ་དང་ལྡན་པ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀཝའི་སེམས་ཅན་ང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་ཏེ། འདི་ལྟ་སྟེ་དཔེར་ན། དེང་སང་མི་དག་སྨད་པ་རྣོན་པོ་འབའ་ཞིག་གིས་སྨད་པ་ན་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང ། འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་
Ca71b
པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཕར་སོང་ཕར་སོང་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་མི་ཤེས་སོ། །དགེ་སློང་དག་སེམས་ཅན་དེ་དག་གི་མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ། སོ་བ་མེད་པ། སྦུན་པ་མེད་པ། དག་པ་གཙང་བ། སོར་བཞི་པ། ཀུན་ནས་མ་དཀྲིས་པ་ནུབ་བརྔས་ན་ནང་རྒྱས་ཤིང་ཕྱིར་སྐྱེ་ལ། ནང་བརྔས་ན་ནུབ་རྒྱས་ཤིང་ཕྱིར་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་བྱུང་བར་གྱུར་ཏེ། དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་ལ་དབང་པོ་ཐ་དད་པ་བྱུང་བར་གྱུར་ཏེ། ཁ་ཅིག་ནི་ཕོའི་དབང་པོ་དང་ལྡན། ཁ་ཅིག་ནི་མོའི་དབང་པོ་དང་ལྡན་ནོ། །དེ་ན་གང་དག་ཕོའི་དབང་པོ་དང་ལྡན་པ་དང ། གང་དག་མེའི་དབང་པོ་དང་ལྡན་པ་དེ་དག་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་དོ། །ཇི་ལྟ་ཇི་ལྟར་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་པ་དེ་ལྟ་དེ་ལྟར་ཀུན་ཏུ་ཆགས་སོ། །ཇི་ལྟ་ཇི་ལྟར་ཀུན་ཏུ་ཆགས་པ་དེ་ལྟ་དེ་ལྟར་བྲལ་ཏོ། །ཇི་ལྟ་ཇི་ལྟར་བྲལ་བ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ངོ ། །མཐོང་ནས་སས་ཀྱང་འཐོར་བར་བྱེད། བོང་བ་དང ། གསེག་
Ca72a
༄#། །མ་དང་གྱོ་མོ་དང་གྱོ་དུམ་དག་ཀྱང་འཕེན་པར་བྱེད་ཅིང ། འདི་སྐད་ཅེས་སེམས་ཅན་ངན་བ་གྲོང་བ་བྱ་བ་མ་ཡིན་པ་བྱེད། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀཝའེ་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་ཏེ་འདི་ལྟ་སྟེ་དཔེར་ན། དེང་སང་སེམས་ཅན་དག་བག་སར་བག་མར་ལེན་པ་ན་ཕྱེ་མས་ཀྱང་འཐོར་བར་བྱེད ། དྲི་དང་མེ་ཏོག་དང་འབྲས་ཡོས་དག་གིས་ཀྱང་འཐོར་བར་བྱེད་ཅིང ། འདི་སྐད་ཅེས་སྲུ་བདེ་བར་གྱུར་ཅིག་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དང་དེ་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ནས་སས་ཀྱང་འཐོར་བར་བྱེད། བོང་བ་དང་གསེག་མ་དང ། གྱོ་མོ་དང་གྱོ་དུམ་དག་ཀྱང་འཕེན་པར་བྱེད་ཅིང་འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀཝའི་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་རོ། །དགེ་སློང་དག་དེ་ལྟར་ན་སྔོན་ཆོས་མ་ཡིན་པར་གྲགས་པ་གང་ཡིན་པ་དེ་ནི་དེང་སང་ཆོས་སུ་གྲགས་ལ། སྔོན་འདུལ་བ་མ་ཡིན་པར་གྲགས་པ་གང་ཡིན་པ་དེ་ནི་དེང་སང་འདུལ་བར་གྲགས། སྔོན་སྨད་པར་བྱ་བ་གང་ཡིན་པ་དེ་ནི་དེང་སང་བསྟོད་པར་བྱ་བ་ཡིན་ནོ། །དེ་ཉི་མ་གཅིག་ཙམ་སྤོང་བར་བྱེད། ཉི་མ་གཉིས་སམ་གསུམ་མམ་བདུན་ཙམ་སྤོང་བར་བྱེད་དོ། །གང་གི་ཕྱིར་སེམས་ཅན་དེ་དག་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ཤིན་ཏུ་སྡང་བར་བྱེད་པས་
Ca72b
བརྟུལ་ཞུགས་ལ་ཞུགས་པ་དེའི་ཕྱིར། དེ་དག་ཁྱིམ་རྩིག་པ་ལ་ཞུགས་ཏེ་བདག་ཅག་གིས་འདིར་བྱ་བ་མ་ཡིན་པ་བྱའོ། །བདག་ཅག་གིས་འདིར་བྱ་བ་མ་ཡིན་པ་བྱའོ་ཞེས་ཟེར་བ་ལས་ཁྱིམ་ཁྱིམ་ཞེས་བྱ་བའི་མིང་བྱུང་ངོ ། །དགེ་སློང་དག་འདི་ནི་ཁྱིམ་གྱི་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་དེ་ལ་དེའི་ཚེ་དེའི་དུས་ན་གང་གིས་དེའི་དང་པོར་སེམས་ཅན་སུན་ཕྱུང་བར་གྱུར་པའི་སེམས་ཅན་གང་ཡིན་པ་དེ་ནི་ཀ་ལན་ད་ཀའི་བུ་བཟང་བྱིན་ཡིན་ཏེ། འདིས་དེའི་ཚེ་ཡང་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་བྱུང་ངོ ། །འདིས་ད་ལྟར་ཡང་དགེ་སློང་གི་དགེ་འདུན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་ངོ ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། འདོད་ཆགས་སྤང་བའི་ཕྱིར་འབད་པར་བྱའོ། །ཞེ་སྡང་སྤང་བའི་ཕྱིར་དང ། གཏི་མུག་སྤང་བར་བྱ་བའི་ཕྱིར་འབད་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང།་ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཕམ་པར་འགྱུར་བ་དང་པོ་རྫོགས་སོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་
Ca73a
༄#། །བཞུགས་སོ། །དེའི་ཚེ་ན་སྔོན་རྫ་མཁན་དགེ་སློང་ནོར་ཅན་རྒྱལ་པོའི་ཁབ་ན་དགོན་པའི་སྤྱིལ་བུ་ན་གནས་སོ། །དེ་ནས་སྔོན་རྫ་མཁན་དགེ་སློང་ནོར་ཅན་རྒྱལ་པོའི་ཁབ་ཏུ་སྤྱོད་ཡུལ་དུ་ཞུགས་པ་དང ། རྒྱལ་པོའི་ཁབ་ཀྱི་མི་བ་ལང་རྫི་དག་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང་ཤིང་ཐམས་ཅད་ཀྱང་ཁྱེར་རོ། །དེའི་འོག་ཏུ་སྔོན་རྫ་མཁན་དགེ་སློང་ནོར་ཅན་འོངས་པ་དང ། སྔོན་རྫ་མཁན་དགེ་སློང་ནོར་ཅན་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང་ཤིང་ཐམས་ཅད་ཀྱང་ཁྱེར་བ་མཐོང་ངོ ། །མཐོང་ནས་ཡང་རྩཝ་དང་ཤིང་བླངས་ཏེ་སྤྱིལ་བུ་གཞན་བྱེད་དོ། །སྔོན་རྫ་མཁན་དགེ་སློང་ནོར་ཅན་ལན་གཉིས་ལན་གསུམ་དུ་རྒྱལ་པོའི་ཁབ་ཏུ་སྤྱོད་ཡུལ་དུ་ཞུགས་པ་དང ། རྒྱལ་པོའི་ཁབ་ཀྱི་མི་བ་ལང་རྫི་དག་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང་ཤིང་ཐམས་ཅད་ཀྱང་ཁྱེར་རོ། །དེའི་འོག་ཏུ་སྔོན་རྫ་མཁན་དགེ་སློང་ནོར་ཅན་འོངས་པ་དང ། སྔོན་རྫ་མཁན་དགེ་སློང་ནོར་ཅན་གྱིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང་ཤིང་ཐམས་ཅད་ཀྱང་ཁྱེར་བ་མཐོང་ངོ ། །དེ་ནས་སྔོན་རྫ་མཁན་དགེ་སློང་ནོར་ཅན་འདི་
Ca73b
སྙམ་དུ་སེམས་ཏེ། འདི་ལྟར་བདག་རྒྱལ་པོའི་ཁབ་ཏུ་སྤྱོད་ཡུལ་དུ་ཞུགས་པ་དང ། རྒྱལ་པོའི་ཁབ་ཀྱི་མི་བ་ལང་རྫི་དག་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་ལན་གསུམ་གྱི་བར་དུ་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ། རྩཝ་དང་ཤིང་ཐམས་ཅད་ཀྱང་ཁྱེར་བ་ནི། ཀྱེ་མའོ་སྡུག་བསྔལ་ཀྱེ་མའོ་མི་བཟང་སྟེ། བདག་ཕའི་བཟོའི་གནས་དང་ལས་ཀྱི་གནས་ལ་མཁས་ཀྱིས་བདག་གི་གནས་ཁང་ཐམས་ཅད་ས་ལས་བྱས་པ་ཞིག་བྱའོ་སྙམ་མོ། །དེ་ནས་སྔོན་རྫ་མཁན་དགེ་སློང་ནོར་ཅན་གྱིས་ལུས་ཀྱིས་ས་དག་བསྐྱས་ཤིང་བསྐྱས་ཤིང་སྲོག་ཆགས་མེད་པའི་ཆུས་སྦངས་ཏེ། གནས་ཁང་གི་གཞིའི་རྨང་དང་ཐོག་དང་ཀ་བ་དང་སྟེང་རིམ་རྩིག་པར་བྱེད་ཅིང ། ཆོས་གོས་ཀྱི་གདང་ཁུང་དང་ཆོས་གོས་ཀྱི་གདང་དང་སྟེགས་དང་ཁྲི་དང་ཁྲིའུ་དང་ཨན་ཁྲིའུ་དང ། སྒོ་སྐྱེས་དག་ཀྱང་བྱེད་དོ། །དེ་བསྐམས་པར་རིག་ནས། ཁ་དོག་ཅན་གྱིས་སྐུད་པར་བྱེད་ཅིང་ཁ་དོག་ཅན་གྱིས་བསྐུས་ནས་ཤིང་དང་ལྕི་བ་དང་རྩཝ་སྐམ་པོ་དག་བཅེར་ཏེ་སོ་གཏོང་བར་བྱེད་དོ། །དེའི་གནས་ཁང་དེ་ཚོས་པ་ཤིན་ཏུ་ཚོས་པ། གྲུབ་པ་མཆོག་ཏུ་གྲུབ་པ། དམར་བ་མདོག་དམར་བ་འོད་དམར་བ་འདི་ལྟ་སྟེ་དཔེར་ན། མེ་ཏོག་བན་དྷུ་ཛི་བ་ཀ་འདྲའོ། །དེ་ནས་སྔོན་རྫ་མཁན་དགེ་སློང་ནོར་ཅན་འདི་སྙམ་དུ་སེམས་ཏེ། བདག་གི་གནས་ཁང་ཚོས་པ་ཤིན་ཏུ་ཚོས་པ། གྲུབ་པ་མཆོག་ཏུ་གྲུབ་པ། དམར་བ་མདོག་དམར་པོ་འོད་དམར་བ་འདི་ལྟ་སྟེ་དཔེར་ན།
Ca74a
༄#། །མེ་ཏོག་བན་དྷུ་ཛི་བ་ཀ་འདྲས། བདག་གིས་ད་ནི་གནས་ཁང་གི་དུས་སྟོན་བྱའོ་སྙམ་མོ། །དེ་ནས་སྔོན་རྫ་མཁན་དགེ་སློང་ནོར་ཅན་གྱིས་དགེ་སློང་ཉེ་འཁོར་བ་དག་ལ་གནས་ཁང་ལྟར་བཅུག་སྟེ། ལྷུང་བཟེད་དང་ཆོས་གོས་ཐོགས་ནས་ལྗོངས་རྒྱུར་སོང་ངོ ། །ཆོས་ཉིད་ཀྱིས་ན་སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ། འཚོ་ཞིང་གཞེས་པ་དག་ནི་འདུལ་བར་གྱུར་པའི་དབང་གིས་དུས་དང་དུས་སུ་སེམས་ཅན་དམྱལ་བར་རྒྱུར་གཤེགས་པ་དང ། དུད་འགྲོ་རྒྱུ་བ་དང ། ཡི་དྭགས་རྒྱུ་བ་དང ། ལྷ་རྒྱུ་བ་དང ། ལྗོངས་རྒྱུ་བ་དང ། ཆུ་ཀླུང་རྒྱུ་བ་དང ། དགོན་པ་རྒྱུར་བ་དང ། དུར་ཁྲོད་རྒྱུ་བ་དང ། རི་རྒྱུ་བ་དང ། གཙུག་ལག་ཁང་རྒྱུར་གཤེགས། དོན་འདིར་ནི་སངས་རྒྱས་བཅོམ་ལྡན་འདས་གཙུག་ལག་ཁང་རྒྱུར་གཤེགས་པར་བཞེད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ། དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ད་གཙུག་ལག་ཁང་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་གཙུག་ལག་ཁང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཞིག་ཅེས་བསྒོ་ཞིག་།ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ལྡེ་མིག་ཀྱོག་པོ་ཐོགས་ཏེ་ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ །
Ca74b
འཆག་ས་ནས་འཆག་སར། གོལ་བར་འགྲོ་ཞིང་དྲང་པོར་འགྲོ་བ་ན་དགེ་སློང་དེ་དག་མཐོང་ནས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་བཅོམ་ལྡན་འདས་དེ་གཙུག་ལག་ཁང་རྒྱུར་གཤེགས་ཀྱིས་ཁྱེད་ཅག་ལས་གང་བཅོམ་ལྡན་འདས་དང་ཐབས་ཅིག་གཙུག་ལག་ཁང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཞིག་།དགེ་སློང་དེ་དག་གིས་ཚེ་དང་ལྡན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོ་ལས་མཉན་ནས་ཆོས་གོས་དག་བླངས་ཏེ། བཅོམ་ལྡན་འདས་ག་ལ་བ་དེར་དོང་ངོ ། །དེ་ནས་བཅོམ་ལྡན་འདས་དགེ་སློང་རབ་ཏུ་མང་པོ་དག་དང་ཐབས་ཅིག་གཙུག་ལག་ཁང་རྒྱུར་གཤེགས་ཏེ།་མཐར་གྱིས་གཙུག་ལག་ཁང་རྒྱུ་ཞིང་གཤེགས་པ་ན་སྔོན་རྫ་མཁན་དགེ་སློང་ནོར་ཅན་གྱི་གཙུག་ལག་ཁང་ག་ལ་བ་དེར་གཤེགས་པ་དང ། བཅོམ་ལྡན་འདས་ཀྱིས་སྔོན་རྫ་མཁན་དགེ་སློང་ནོར་ཅན་གྱི་གནས་ཁང་ཚོས་པ་ཤིན་ཏུ་ཚོས་པ། གྲུབ་པ་མཆོག་ཏུ་གྲུབ་པ། དམར་བ་མདོག་དམར་བ་འོད་དམར་བ་འདི་ལྟ་སྟེ་དཔེར་ན། མེ་ཏོག་བན་དྷུ་ཛི་བ་ཀ་འདྲ་བ་གཟིགས་སོ། །གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་གནས་ཁང་འདི་སུའི་ཡིན། བཙུན་པ་སྔོན་རྫ་མཁན་དགེ་སློང་ནོར་ཅན་གྱི་ལགས་སོ། །དགེ་སློང་དག་ང་ལ་གཞི་འདིས་མུ་སྟེགས་ཅན་དག་དགེ་སྦྱོང་གོའུ་ཏ་མ་འདུག་བཞིན་དུ་ཉན་ཐོས་རྣམས་ལ་ཟག་པའི་གནས་ལྟ་བུའི་ཆོས་ཁ་ཅིག་བྱུང་བར་གྱུར་ཏོ་ཞེས་ཁ་ཟེར་བར་འགྱུར་གྱིས་གནས་ཁང་ཤིག་ཅིག་།རྣམ་པར་དཀྲུགས་ཤིག་།དགེ་སློང་དེ་དག་གིས་འདི་ལྟ་སྟེ། སྟོན་པའི་
Ca75a
༄#། །བཀའ་ལུང་གིས་གནས་ཁང་བཤིག་ཅིང་རྣམ་པར་དཀྲུགས་སོ། །བཅོམ་ལྡན་འདས་ཀྱང་གནས་ཁང་བཤིག་ཅིང་རྣམ་པར་དཀྲུགས་ནས་གཤེགས་སོ། །སྔོན་རྫ་མཁན་དགེ་སློང་ནོར་ཅན་འོངས་པ་དང ། སྔོན་རྫ་མཁན་དགེ་སློང་ནོར་ཅན་གྱི་གནས་ཁང་བཤིག་ཅིང་རྣམ་པར་དཀྲུགས་པ་མཐོང་ངོ ། །མཐོང་ནས་དགེ་སློང་ཉེ་འཁོར་བ་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་གནས་ཁང་སུས་བཤིག་ཅིང་རྣམ་པར་དཀྲུགས། ཚེ་དང་ལྡན་པ་འདི་ལྟ་སྟེ། སྟོན་པའི་བཀའ་ལུང་གིས་དགེ་སློང་དག་གིས་སོ། །གལ་ཏེ་བཅོམ་ལྡན་འདས་ཆོས་ཀྱི་རྗེ། བདེ་བར་གཤེགས་པ་ཆོས་ཀྱི་རྗེས་བཤིག་ན་བཤིག་པ་ལེགས་སོ། །དེའི་ཚེ་ན་གྲོང་ཁྱེར་རྒྱལ་པོའི་ཁབ་ན་ཤིང་སྲུང་བའི་མི་སྣ་ཆེན་པོ་ལ་གཏོགས་པ་སྔོན་རྫ་མཁན་དགེ་སློང་ནོར་ཅན་གྱི་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཤིག་འདུག་གོ་།དེ་ནས་སྔོན་རྫ་མཁན་དགེ་སློང་ནོར་ཅན་འདི་སྙམ་དུ་སེམས་ཏེ། གྲོང་ཁྱེར་རྒྱལ་པོའི་ཁབ་ན་ཤིང་སྲུང་བའི་མི་སྣ་ཆེན་པོ་ལ་གཏོགས་པ་བདག་གི་གཏམ་འདྲེས་པ། ཕེབས་པ་སྨྲ་བ། སྨོས་འདྲིན་འགྲོགས་བཤེས་ཤིག་ཡོད་ཀྱིས་བདག་གིས་གནས་ཁང་ཐམས་ཅད་ཤིང་ལས་བྱས་པ་ཞིག་བྱའོ་སྙམ་དུ་ཤེས་ཤིང་རིག་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་སྟེ་ཕྱིན་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས་སྨྲས་སོ། །ཀྱེ་ནང་པོ་ཤེས་པར་གྱིས་ཤིག་།ལུས་འཕགས་
Ca75b
མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་དག་འདྲེན་པར་འདོད་ཀྱིས་བདག་ལ་བྱིན་ཅིག་།འཕགས་པ་གལ་ཏེ་ལྷས་ཁྱོད་ལ་ཞུགས་ཤིང་དག་གསོལ་ན་གསོལ་བ་ལེགས་ཀྱིས་ཁྱོད་ཅི་བདེར་སྣོམས་ཤིག་།དེ་ནས་སྔོན་རྫ་མཁན་དགེ་སློང་ནོར་ཅན་གྱིས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་ཏུ་སྦས་པ། བསྲུངས་པ་ཤིན་ཏུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ། བཅད་ཅིང་གཤགས་ནས་འདྲེན་པར་བྱེད་དོ། །གྲོང་ཁྱེར་སྲུང་བའི་མི་སྣ་ཆེན་པོ་ལ་གཏོགས་པ་ཞིག་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་ཏུ་སྦས་པ། བསྲུངས་པ་ཤིན་ཏུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ་བཅད་ཅིང ། གཤགས་ནས་དྲངས་པ་མཐོང་ངོ ། །མཐོང་ནས་དེ་འདི་ལྟར་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་ཏུ་སྦས་པ། བསྲུངས་པ་ཤིན་ཏུ་བསྲུངས་པ། གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ་བཅད་ཅིང་
Ca76a
༄#། །གཤགས་ནས་དྲངས་པ་ལས་ན། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གྲོང་ཁྱེར་རྒྱལ་པོའི་ཁབ་ཏུ་ཐོང་མི་པའམ། ཆོམ་རྐུན་པའམ། དགྲ་པོ་འགའ་ཞིག་ཞུགས་པར་མ་གྱུར་ཏམ་སྙམ་དུ་འཇིགས་པར་གྱུར། སྔངས་པར་གྱུར། སྤུ་ཟིང་ཞེས་བྱེད་པར་གྱུར་ཏོ། །དེ་ནས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་སྟེ་ཕྱིན་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་དེ་ལ་འདི་སྐད་ཅེས་སྨྲས་སོ། །ཀྱེ་ནང་པོ་ཤེས་པར་གྱིས་ཤིག། བདག་འདི་ན་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང་འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་ཏུ་སྦས་པ། བསྲུངས་པ་ཤིན་ཏུ་བསྲུངས་པ། གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ། བཅད་ཅིང་གཤགས་ནས་དྲངས་པ་མཐོང་ངོ ། །མཐོང་ནས་བདག་འདི་ལྟར་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང ། འདྲུམས་པ་བཅོས་པའི་ཕྱིར་བྲེལ་བའི་དོན་དུ་བཞག་པ། སྦས་པ་ཤིན་ཏུ་སྦས་པ།་བསྲུངས་པ་ཤིན་ཏུ་བསྲུངས་པ་གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཅིག་ཕྱུང་སྟེ། བཅད་ཅིང་གཤགས་ནས་དྲངས་པ་ལས་ན། ལུས་འཕགས་མའི་
Ca76b
བུམ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གྲོང་ཁྱེར་རྒྱལ་པོའི་ཁབ་ཏུ་ཐོང་མི་པའམ། ཆོམ་རྐུན་པའམ། དགྲ་བོ་འགའ་ཞིག་ཞུགས་པར་མ་གྱུར་ཏམ་སྙམ་དུ་འཇིགས་པར་གྱུར། སྔངས་པར་གྱུར། སྤུ་ཟིང་ཞེས་བྱེད་པར་གྱུར་ན། ཀྱེ་ནང་པོ་ཁྱོད་ཀྱིས་ཤིང་དག་སུ་ལ་ཡང་མ་བྱིན་ནམ། ཀྱེ་ནང་པོ་སུ་ལ་ཡང་མ་བྱིན་ཏེ། འོན་ཀྱང་སྔོན་རྫ་མཁན་དགེ་སློང་ནོར་ཅན་འོངས་ནས་དེ་འདི་སྐད་ཅེས། ཀྱེ་ནང་པོ་ཤེས་པར་གྱིས་ཤིག་།ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་དག་འདྲེན་པར་འདོད་ཀྱིས་བདག་ལ་བྱིན་ཅིག་ཅེས་ཟེར་ནས། བདག་གིས་དེ་ལ་འདི་སྐད་ཅེས་འཕགས་པ་གལ་ཏེ་ལྷས་ཁྱོད་ལ་ཞུགས་ཤིང་དག་གསོལ་ན། གསོལ་བ་ལེགས་ཀྱིས་ཁྱོད་ཅི་བདེར་སྣོམས་ཤིག་ཅེས་བརྗོད་པས་དེས་དྲངས་པའམ་གཅིག་ཏུ་མ་གྱུར་ཏམ། དེ་ནས་གྲོང་ཁྱེར་སྲུང་བའི་མི་སྣ་ཆེན་པོ་ལ་གཏོགས་པ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ག་ལ་བ་དེར་སོང་སྟེ་ཕྱིན་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག་།བདག་འདི་ན་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ཤུལ་ཉུལ་བ་ན་ལྷའི་ཞུགས་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང ། འདྲུམས་པ་བཅོས་པའི་སླད་དུ་བྲེལ་བའི་དོན་དུ་བཞག་པ། སྦས་པ་ཤིན་ཏུ་སྦས་པ། བསྲུངས་པ་ཤིན་ཏུ་བསྲུངས་པ་གང་ལགས་པ་སུ་ལ་ཡང་སྩལ་བར་སླ་བ་མ་ལགས་པ་དེ་དག་ལས་ཞུགས་ཤིང་ཁ་ཅིག་ཕྱུང་སྟེ།
Ca77a
༄#། །བཅད་ཅིང་གཤགས་ནས་དྲངས་པ་མཐོང་ངོ ། །མཐོང་ནས་བདག་འདི་ལྟར་ལྷའི་ཞུགས་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང ། འདྲུམས་པ་བཅོས་པའི་སླད་དུ་བྲེལ་བའི་དོན་དུ་བཞག་པ། སྦས་པ་ཤིན་ཏུ་སྦས་པ། བསྲུངས་པ་ཤིན་ཏུ་བསྲུངས་པ་གང་ལགས་པ་སུ་ལ་ཡང་སྩལ་བར་སླ་བ་མ་ལགས་པ་དེ་དག་ལས་ཞུགས་ཤིང་ཁ་ཅིག་ཕྱུང་སྟེ།་བཅད་ཅིང་གཤགས་ནས་དྲངས་པ་ལས་ན། ལྷའི་གྲོང་ཁྱེར་རྒྱལ་པོའི་ཁབ་ཏུ་ཐོང་མི་པའམ། ཆོམ་རྐུན་པའམ། དགྲ་བོ་འགའ་ཞིག་ཞུགས་པར་མ་གྱུར་ཏམ་སྙམ་དུ་འཇིགས་པར་གྱུར།་སྔངས་པར་གྱུར། སྤུ་ཟིང་ཞེས་བགྱིད་པར་གྱུར་ནས། ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་མཆིས་ཏེ་མཆིས་ནས། ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས་ཀྱེ་ནང་པོ་ཤེས་པར་གྱིས་ཤིག་།བདག་འདི་ན་གྲོང་ཁྱེར་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་ལྷའི་ཤིང་གང་དག་གྲོང་ཁྱེར་རྒྱལ་པོའི་ཁབ་རལ་བ་དང ། འདྲུམས་པ་བཅོས་པའི་ཕྱིར་བྲེལ་བའི་དོན་བཞག་པ། སྦས་པ་ཤིན་ཏུ་སྦས་པ། བསྲུངས་པ་ཤིན་ཏུ་བསྲུངས་པ། གང་ཡིན་པ་སུ་ལ་ཡང་སྟེར་བར་སླ་བ་མ་ཡིན་པ་དེ་དག་ལས་ཤིང་ཁ་ཕྱུང་སྟེ་བཅད་ཅིང་གཤགས་ནས་དྲངས་པ་མཐོང་ན། ཀྱེ་ནང་པོ་ཁྱོད་ཀྱིས་ཤིང་དག་སུ་ལ་ཡང་མ་བྱིན་ནམ་ཞེས་བགྱིས་ན། དེ་འདི་སྐད་ཅེས་ཀྱེ་ནང་པོ་སུ་ལ་ཡང་མ་བྱིན་ཏེ། འོན་ཀྱང་སྔོན་རྫ་མཁན་དགེ་སློང་ནོར་ཅན་
Ca77b
འོངས་ནས་དེ་འདི་སྐད་ཅེས། ཀྱེ་ནང་པོ་ཤེས་པར་གྱིས་ཤིག་།ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་དག་འདྲེན་པར་འདོད་ཀྱིས་བདག་ལ་བྱིན་ཅིག་ཅེས་ཟེར་ནས། བདག་གིས་དེ་ལ་འདི་སྐད་ཅེས་འཕགས་པ་གལ་ཏེ་ལྷས་ཁྱོད་ལ་ཞུགས་ཤིང་དག་གསོལ་ན་གསོལ་བ་ལེགས་ཀྱིས་ཁྱོད་ཅི་བདེར་སྣོམས་ཤིག་ཅེས་བརྗོད་པས་དེས་དྲངས་པའམ་གཅིག་ཏུ་མ་བྱུར་ཏམ་ཞེས་མཆི་ན། ལྷས་ཞུགས་ཤིང་དག་སུ་ལ་ཡང་སྩལ་ཏམ། ཀཝའེ་ནང་རྗེ་སུ་ལ་ཡང་མ་བྱིན་ནོ། །ལྷ་ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དེ་སྐད་མཆིའོ། །དེ་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་མི་ཞིག་ལ་སྨྲས་པ། ཀཝའེ་ནང་རྗེ་ཚུར་ཤོག་།ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་ལ་ཕྱིན་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས། ཀཝའེ་ནང་རྗེ་ཁྱོད་ལ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གསུང་ངོ་ཞེས་གྱིས་ཤིག་།མི་དེས་ལྷ་བཀའ་བཞིན་འཚལ་ཞེས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལས་མཉན་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ག་ལ་བ་དེར་སོང་སྟེ་ཕྱིན་ནས། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ལ་འདི་སྐད་ཅེས་སྨྲས་སོ།། ཀྱེ་ནང་པོ་ཤེས་པར་གྱིས་ཁྱོད་ལ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གསུང་ངོ ། །ཤིང་སྲུང་བའི་མི་སྣ་ཆེན་པོ་ལ་གཏོགས་པས་ཀྱེ་ནང་པོ་བཀའ་བཞིན་འཚལ་ཞེས་མི་དེ་
Ca78a
༄#། །ལས་མཉན་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་དྲུང་དུ་འཕགས་སོ། །དེའི་ཚེ་ན་སྔོན་རྫ་མཁན་དགེ་སློང་ནོར་ཅན་བྱ་བ་འགའ་ཞིག་ལ་རྒྱལ་པོའི་ཁབ་ཏུ་འཕགས་པར་གྱུར་པ་དང ། ཤིང་སྲུང་བའི་མི་སྣ་ཆེན་པོ་ལ་གཏོགས་པས་སྔོན་རྫ་མཁན་དགེ་སློང་ནོར་ཅན་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་སྔོན་རྫ་མཁན་དགེ་སློང་ནོར་ཅན་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།བདག་ནི་ཞུགས་ཤིང་དེ་དག་གི་སླད་དུ་བཀུག་གོ་།ཀྱེ་ནང་པོ་ཁྱོད་སོང་ཞིག་དང་བདག་ཀྱང་འོང་ངོ ། །དེ་ནས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དང ། སྔོན་རྫ་མཁན་དགེ་སློང་ནོར་ཅན་དང ། མི་དེ་ཡང་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲའི་གནས་ག་ལ་བ་དེར་དོང་སྟེ་ཕྱིན་ནས། རྒྱལ་པོའི་སྒོར་བསྡད་དོ། །དེ་ནས་མི་དེ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ག་ལ་བ་དེར་སོང་སྟེ་ཕྱིན་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་ཞུགས་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དེ་ཆབ་སྒོ་ན་སྡོད་དོ། །རབ་ཏུ་བྱུང་བ་དེ་ཡང་མ་སྦྲན་པ་ཉིད་དུ་མཆིས་སོ། །ཀཝའེ་ནང་རྗེ་ཤིང་སྲུང་བའི་མི་སྣ་ཆེན་པོ་ལ་གཏོགས་པ་རེ་ཞིག་ཞོག་ལ་རབ་ཏུ་བྱུང་བ་དེ་འཇུག་ཏུ་ཆུག་ཅིག་།མི་དེས་ལྷ་བཀའ་བཞིན་འཚལ་ཞེས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་
Ca78b
ལས་མཉན་ནས། སྔོན་རྫ་མཁན་དགེ་སློང་ནོར་ཅན་ག་ལ་བ་དེར་སོང་སྟེ་ཕྱིན་ནས། སྔོན་རྫ་མཁན་དགེ་སློང་ནོར་ཅན་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།ཁྱོད་ལ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གསུང་ངོ ། །སྔོན་རྫ་མཁན་དགེ་སློང་ནོར་ཅན་གྱི་ཀྱེ་ནང་པོ་བཀའ་བཞིན་འཚལ་ཞེས་མི་དེ་ལས་མཉན་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ག་ལ་བ་དེར་སོང་སྟེ་ཕྱིན་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ལ་ཨ་རོག་གྱ་ཞེས་བྱས་ཏེ་མཐའ་གཅིག་ཏུ་འདུག་གོ། །སྔོན་རྫ་མཁན་དགེ་སློང་ནོར་ཅན་མཐའ་གཅིག་ཏུ་འདུག་པ་ལ་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་འདི་སྐད་ཅེས་སྨྲས་སོ། །འཕགས་པས་ཤིང་མ་བྱིན་པ་དག་བླང་དུ་རུང་ངམ། ལྷ་མི་རུང་ངོ ། །འོན་ཁྱོད་ཀྱིས་ཅིའི་ཕྱིར་བླངས། ལྷས་སྩལ་པ་དག་གོ་།འཕགས་པ། མི་དྲན་ནོ། །བདག་གིས་ལྷས་དགོངས་པར་བགྱིའོ། །ལྷས་ཡབ་ཀྱི་རྒྱལ་སྲིད་ཀྱི་དབང་ཕྱུག་མངའ་བདག་ཏུ་མངའ་བཞེས་པར་གྱུར་ནས་རིང་པོ་མ་ལགས་པར་ངའི་མངའ་རིས་ན་དགེ་སྦྱོང་དང་བྲམ་ཟེར་རང་བཞིན་བཟང་བར་གྲགས་པ་རྩཝ་དང་ཤིང་དང་ཆུ་མ་བྱིན་པ་ཡོངས་སུ་མི་སྤྱོད་པ་གང་དག་འཁོད་པ་དེ་དག་དེང་ཕྱིན་ཆད་ནི་བདེར་སྤྱོད་ཅིག་།ཅེས་དེ་ལྟ་བུའི་ཁྱུ་མཆོག་གི་བཀའ་རྒྱ་ཆེན་པོ་བཏགས་ཏེ། གཅིག་ཏུ་དང་དུ་བཞེས་ཤིང་འཁོར་གྱི་ནང་དུ་ཡང་དག་པར་སེང་གེའི་སྒྲ་བསྒྲགས་པ་ལྷས་དགོངས་ཤིག་།འཕགས་པ་དེ་ནི་ཁོ་བོས་ཡོངས་སུ་མ་
Ca79a
༄#། །བཟུང་བ་ལ་བསམས་ཏེ་སྨྲས་ཀྱི་འདི་ནི་ཡོངས་སུ་བཟུང་བ་དང་བཅས་པ་ཡིན་ནོ། །ལྷ་རེ་ཞིག་ཡོངས་སུ་མ་བཟུང་བ་གང་ལགས་པ་དེ་ལ་ལྷས་ཅི་ཞིག་བགྱིར་མཆིས། དེ་སྐད་ཅེས་སྨྲས་པ་དང ། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས་དཔྲལ་བར་དཔྲལ་རྩ་གསུམ་བསྒྲེངས་ཞིང་ཁྲོ་གཉེར་བསྡུས་བཞིན་སྒྱུར་མིག་དགྲད་དེ་ལག་མཐིལ་གཉིས་འདྲིལ་ཞིང་འདི་སྐད་ཅེས་སྨྲས་སོ། །དགེ་སྦྱོང་གསད་པའི་རིགས་པ་ཁྱོད་སོང་ལ་ཕྱིན་ཆད་དེ་ལྟ་མ་བྱེད་ཅིག་།དེ་ནས་འཁོར་དེས་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་འདི་ཙམ་དུ་གཏུམ་པ། འདི་ཙམ་དུ་རྟུན་ངས་པ། འདི་ཙམ་དུ་དྲག་ཤུལ་ཆེ་བ། འདི་ཙམ་དུ་ཚ་མ་ཚོམ་མེད་པ་དེས་དགེ་སྦྱོང་གསད་པའི་རིགས་པ་ཁྱོད་ཅེས་པའི་ཚིག་སྙིང་པོ་མེད་པས་སྤྱོས་ཏེ་བཏང་བ་ནི་ངོ་མཚར་ཏོ་ཞེས་སྐད་ཕྱུང་ཞིང་སྒྲ་མཐོན་པོ་དང ། སྒྲ་ཆེན་པོ་ཕྱུང་བར་གྱུར་ཏོ། །དེ་ནས་སྔོན་རྫ་མཁན་དགེ་སློང་ནོར་ཅན་གཙུག་ལག་ཁང་དུ་སོང་སྟེ་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཁོ་བོ་གྱོད་ལ་སྐྲིན་ཅིང་སྲོག་དང་བྲལ་བར་དེའུ་བྱས་སོ། །དགེ་སློང་དག་གིས་ཅིའི་ཕྱིར་ཞེས་དྲིས་པ་དང ། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་
Ca79b
འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྣམ་སྦྱར་གྱོན་ཏེ་དགེ་སློང་ཕྱིར་བཞིན་འབྲང་བའི་དགེ་སྦྱོང་ཞིག་དང་སོང་ལ། རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་དང་བཀའ་འདོགས་པའི་གནས་དག་ཏུ་འདུག་ལ། དད་པ་ཅན་དག་དང ། མ་དད་པ་དག་དང ། བྲམ་ཟེ་དང ། ཁྱིམ་བདག་དང ། གྲོང་རྡལ་པ་དག་དང ། ཡུལ་མི་དག་དང ། ནོར་ཅན་དག་དང ། ཚོང་དཔོན་དག་དང ། དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་འབྲལ་བར་བྱེད་ཅེས་དྲིས་ཤིག་།ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་དང་བཀའ་འདོགས་པའི་གནས་དག་ཏུ་འདུག་ནས། དད་པ་ཅན་དག་དང་མ་དད་པ་དག་དང་བྲམ་ཟེ་དང་ཁྱིམ་བདག་དང་གྲོང་རྡལ་པ་དག་དང ། ཡུལ་མི་དག་དང་ནོར་ཅན་དག་དང་ཚོང་དཔོན་དག་དང་དེད་དཔོན་དག་ལ་སྨྲས་པ། ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་འབྲལ་བར་བྱེད། དེ་དག་གིས་སྨྲས་པ། བཙུན་པ་ཀུན་དགའ་བོ། མ་ཤ་ཀ་ལྔའམ་མ་ཤ་ཀ་ལྔ་ལས་ལྷག་བས་སོ། །དེ་ནས་ཚེ་དང་ལྡན་
Ca80a
༄#། །པ་ཀུན་དགའ་བོ་རྒྱལ་པོའི་ཁབ་ནས་བྱུང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མ་གོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བདག་གཟོད་སྣམ་སྦྱར་འཚལ་ཏེ་དགེ་སློང་སླད་བཞིན་འབྲང་བའི་དགེ་སྦྱོང་ཞིག་དང་རྒྱལ་པོའི་ཁབ་ཏུ་ཞུགས་ནས། གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་དང་བཀའ་འདོགས་པའི་གནས་དག་ཏུ་མཆིས་ཏེ། དད་པ་ཅན་དག་དང་མ་དད་པ་དང་བྲམ་ཟེ་དང་ཁྱིམ་བདག་དང་གྲོང་རྡལ་བ་དང་ཡུལ་མི་དག་དང ། ནོར་ཅན་དག་དང ། ཚོང་དཔོན་དག་དང་དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་བྲལ་བར་བགྱིད་ཅེས་རྨས་ན། དེ་དག་གི་མཆིད་ནས་བཙུན་པ་ཀུན་དགའ་བོ་མ་ཤ་ཀ་ལྔའམ་མ་ཤ་ཀ་ལྔ་ལས་ལྷག་པས་སོ་ཞེས་མཆིའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན། དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ་ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང །
Ca80b
ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས། སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་བཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་སྔོན་རྫ་མཁན་དགེ་སློང་ནོར་ཅན་ལ་རྨས་པ། ནོར་ཅན་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ནོར་ཅན་ངས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བའི་ཆོས་བསྟན་པ་དང ། ཞེ་སྡང་འདོད་ཆགས་དང་བྲལ་བར་བྱ་བ་དང ། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བར་བྱ་བའི་ཕྱིར་ཆོས་སྟོན་པ་ལ་ཁྱོད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་དེ་བྱས་པར་གྱུར་ཅེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་
Ca81a
༄#། །པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང ། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པ་རྐུ་བའི་གྲངས་སུ་གཏོགས་པ་བླངས་ན་ཇི་ཙམ་མ་བྱིན་པར་བླངས་པས་དེ་རྒྱལ་པོའམ། བློན་པོ་ཆེན་པོས་བཟུང་ནས་དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ་བྱིས་པའི་བླུན་པའོ་རྐུན་པའོ་ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ། དགེ་སློང་
Ca81b
དེ་ལྟར་མ་བྱིན་པར་ལེན་ན་དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི། དགེ་སློང་བཞི་པོ་མིང་གི་དགེ་སློང་དང ། ཁས་འཆེ་བའི་དགེ་སློང་དང ། སློང་བའི་ཕྱིར་དགེ་སློང་དང ། ཉོན་མོངས་པ་བཅོམ་པའི་ཕྱིར་དགེ་སློང་ལས་ཞེས་བྱ་བ་ནས། དེ་ན་འདིར་ནི་གསོལ་བ་དང་བཞིའི་ལས་མི་གཡོ་བ་གཞག་པར་མི་འོས་པས་བསྙེན་པར་རྫོགས་པ་གང་ཡིན་པར་དེ་དགེ་སློང་དུ་དགོངས་ཏེ་ཞེས་བྱ་བའི་བར་དུ་སྔ་མ་བཞིན་ཏེ། དེས་ན་ཡང་དགེ་སློང་གང་ཞེས་གསུངས་སོ། །གཞན་དག་གི་ཞེས་བྱ་བ་ནི། སྐྱེས་པ་དང་བུད་མེད་དང་མ་ནིང་དག་གིའོ། །གྲོང་ན་འདུག་པའམ་ཞེས་བྱ་བ་ནི་ར་བའི་ནང་ན་འདུག་པའོ། །དགོན་པ་ན་འདུག་པ་ཞེས་བྱ་བ་ནི་ར་བའི་ཕྱི་རོལ་ན་འདུག་པའོ། །མ་བྱིན་པ་ཞེས་བྱ་བ་ནི། དེ་ལ་སྐྱེས་པའམ་བུད་མེད་དམ་མ་ནིང་གང་གིས་ཀྱང་མ་བྱིན་པའོ། །རྐུ་བའི་གྲངས་སུ་གཏོགས་པ་ཞེས་བྱ་བ་ནི། མ་བྱིན་པ་གང་ཡིན་པ་དེ་རྐུ་བའི་གྲངས་སུ་གཏོགས་པ་ཡང་ཡིན་ནོ། །བླངས་ན་ཞེས་བྱ་བ་ནི། ལེན་ནའོ། །ཇི་ཙམ་མ་བྱིན་པར་བླངས་པས་ཞེས་བྱ་བ་ནི། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པས་སོ། །དེ་རྒྱལ་པོའམ། ཞེས་བྱ་བ་ནི་འདི་ལྟ་སྟེ། བུད་མེད་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ལ། རྒྱལ་རིགས་དང་བྲམ་ཟེ་དང་རྗེའུ་རིགས་དང་དམངས་རིགས་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན། དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་
Ca82a
༄#། །པ་ཡིན་ནོ། །བློན་པོ་ཆེན་པོས་ཞེས་བྱ་བ་ནི་དེ་ལས་གཞན་པ་བློན་པོ་དང་རྩིས་མཁན་དང་སྣ་ཆེན་པོ་ལ་གཏོགས་པ་རྒྱལ་སྲིད་བྱེད་པ་གསང་ཚིག་མཐུན་པས་འཚོ་བ་གང་དག་དེ་ལ་བརྟེན་ནས་འཚོ་བར་བྱེད་པ་དག་གིས་སོ། །བཟུང་ནས་ཞེས་བྱ་བ་ནི་བླངས་ནས་སོ། །དེ་ལ་འདི་སྐད་ཅེས་ཀྱེ་མི་ཁྱོད་ནི་རྐུན་མའོ་བྱིས་པའོ་བླུན་པའོ་རྐུ་བའོ་ཞེས་བྱ་བ་དེ་དག་ནི་སྤྱོ་བའི་ཚིག་གོ་།ཟེར་ཞིང་ཞེས་བྱ་བ་ནི་རྗོད་ཅིང་ངོ ། །གསོད་དམ་ཞེས་བྱ་བ་ནི་སྲོག་དང་བྲལ་བར་བྱེད་པའོ། །འཆིང་ངམ་ཞེས་བྱ་བ་ནི། ཆིངས་མ་གསུམ་པོ་ལྕགས་ལས་བྱས་པ་དང ། ཤིང་ལས་བྱས་པ་དང ། རྩཝ་ལས་བྱས་པ་དག་གི་སོ། །སྤྱུག་ཀྱང་རུང་སྟེ་ཞེས་བྱ་བ་ནི། ཡུལ་མེད་པར་བྱེད་ཀྱང་རུང་སྟེའོ། །དགེ་སློང་ཞེས་བྱ་བ་ནི་གང་ལ་དགེ་སློང་གིས་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང ། རྟོག་པ་ཉིད་དང ། ཡང་དག་པར་རྟོག་པ་ཉིད་དང ། མཐར་ཕྱིན་པར་བྱེད་པ་ཉིད་དང ། ཡང་དག་པར་མཐར་ཕྱིན་པར་བྱེད་པ་གང་ཡིན་པ་དང ། གང་ཟག་དེའི་ཁས་ལེན་པ་དང ། མངོན་པར་ཁས་ལེན་པ་དང ། ཕྱིར་མི་ཟློག་པ་དང ། ཕྱིར་མི་ཟློག་པ་ཉིད་དང ། ངག་དང ། ཚིག་དང ། ཐ་སྙད་དང ། སྐད་དང ། རྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་
Ca82b
གི་སྒྲ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པའོ། །དེ་ཡང་ཞེས་བྱ་བ་ནི་ཉེ་བར་བསྟན་པ་དང ། ཀུན་ཏུ་བསྟན་པའི་ཚིག་བླ་དྭགས་དེ་ཡང་ངོ ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི། དེ་མཐར་གྱུར་པ་དང ། ལྟུང་བ་དང ། དམན་པ་དང ། མཇུག་ན་འདུག་པ་དང ། ཐ་ཆད་དང ། ཡིད་དང་མི་མཐུན་པ་གང་ཡིན་པའོ། །ཡང་གང་གིས་ལྟུང་བ་དེ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན། ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང ། ཡངས་པར་འགྱུར་དུ་མི་རུང་བ་དེ་བཞིན་དུ། དགེ་སློང་གིས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང ། ཤཱཀྱའི་སྲས་ཀྱིར་མི་རུང ། དགེ་སློང་གི་དངོས་པོ་ལས་ཉམས་པར་གྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང ། ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་བས། དེས་ན་ཕམ་པར་གྱུར་བ་ཡིན་གྱིས་ཞེས་གསུངས་སོ། །གནས་པར་མི་བྱའོ། །ཞེས་བྱ་བ་ནི་དགེ་སློང་རྣམས་ཀྱིས་དེ་དང་གསོ་སྦྱོང་དང ། དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་
Ca83a
༄#། །དང་བཞིའི་ལས་ལ་གནས་པར་མི་བྱའོ། །ཡང་གང་ཟག་བཅུ་གཉིས་པོ་དག་ཏུ་བསྐོ་བས་བསྐོ་བར་མི་བྱ་སྟེ། དེ་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། སྤྱི་སྡོམ་ལ། བདག་ཉིད་ས་དང་ནམ་མཁའ་དང ། །ས་ཡི་གཅལ་དང་བཞོན་དང་གྲུ། །སྟོན་ཀ་འབྱུང་དང་ཆུ་དང་ནི། །རྐུ་དང་ས་གཞི་འཆོལ་བ་དང ། །རྐང་མེད་དང་ནི་གདོལ་པ་དང ། །འཕྱང་བར་གྱུར་པ་ཐ་མ་ཡིན། །སྡོམ་ལ། བདག་ཉིད་དང་ནི་མ་བྱིན་དང ། །སེམས་དང་ཡོངས་སུ་བཟུང་བ་དང ། །འདུ་ཤེས་དང་ནི་བཞི་པ་བཞི། །ལྔ་པ་གཉིས་སུ་བྱས་པ་ཡིན།། དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། བདག་ཉིད་ཀྱིས་དང ། ཞལ་ཏ་བྱས་ཏེ་དང ། མངགས་པས་སོ། །ཇི་ལྟར་བདག་ཉིད་ཀྱིས་ཤེ་ན། བདག་ཉིད་ཀྱིས་རྐུ་བ་དང ། བདག་ཉིད་ཀྱིས་རྐུར་འཇུག་པ་དང ། བདག་ཉིད་ཀྱིས་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་བདག་ཉིད་ཀྱིས་སོ། །ཇི་ལྟར་ཞལ་ཏ་བྱས་ཏེ་ཞེ་ན། ཞལ་ཏ་བྱས་ཏེ་རྐུ་བ་དང ། ཞལ་ཏ་བྱས་ཏེ་རྐུར་འཇུག་པ་དང ། ཞལ་ཏ་བྱས་ཏེ་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་ཞལ་ཏ་བྱས་ཏེའོ། །ཇི་ལྟར་མངགས་པས་ཤེ་ན། མངགས་པས་རྐུ་བ་དང ། མངགས་པས་རྐུར་འཇུད་པ་དང ། མངགས་པས་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་མངགས་པས་སོ། །དགེ་སློང་གིས་གཞན་དག་གི་ཡོ་བྱད་ལྕི་བ་
Ca83b
དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན།་མ་བྱིན་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་མ་བྱིན་པ་ཡིན་ཞེ་ན། དེ་ལ་སྐྱེས་པའམ། བུད་མེད་དམ་མ་ནིང་གང་གིས་ཀྱང་མ་བྱིན་པ་སྟེ། དེ་ལྟར་མ་བྱིན་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་པ་ཡིན་ཞེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། སེམས་པར་བྱེད་པ་དང ། རྩོལ་བར་བྱེད་པ་དང ། གནས་ནས་གནས་སུ་སྦེད་པའོ། །ཇི་ལྟར་སེམས་པར་བྱེད་ཅེ་ན། དེ་ལ་རྐུ་སེམས་ཉེ་བར་གནས་པར་གྱུར་པ་སྟེ། དེ་ལྟར་སེམས་པར་བྱེད་དོ། །ཇི་ལྟར་རྩོལ་བར་བྱེད་ཅེ་ན། ལག་པ་དག་དང་རྐང་པ་དག་གིས་རྩོལ་བར་བྱེད་པ་སྟེ། དེ་ལྟར་རྩོལ་བར་བྱེད་དོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་
Ca84a
༄#། །འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། གཞན་གྱིས་ཡོངས་སུ་བཟུང་བ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་གཞན་གྱིས་ཡོངས་སུ་བཟུང་བ་ཡིན་ཞེ་ན། འདི་ལྟ་སྟེ་ཡོ་བྱད་ལྕི་བ་དག་གཞན་སྐྱེས་པའམ། བུད་མེད་དམ་མ་ནིང་དག་གིས་ཡོངས་སུ་བཟུང་བར་གྱུར་པ་སྟེ། དེ་ལྟར་གཞན་གྱིས་ཡོངས་སུ་བཟུང་བ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ། །གསུམ་གང་ཞེ་ན། གཞན་གྱིས་ཡོངས་སུ་བཟུང་བར་འདུ་ཤེས་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ཞེ་ན། འདི་ལྟ་སྟེ་དགེ་
Ca84b
སློང་གིས་འདི་ལྟར་ཡོ་བྱད་ལྕི་བ་འདི་དག་གཞན་སྐྱེས་པའམ། བུད་མེད་དམ་མ་ནིང་དག་གིས་ཡོངས་སུ་བཟུང་བར་འདུ་ཤེས་པ་སྟེ། དེ་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་གསུམ་གྱིས་མ་བྱིན་པར་ལེན་ན་ཕམ་པར་འགྱུར་རོ།། དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ། །བཞི་གང་ཞེ་ན། གཞན་གྱིས་ཡོངས་སུ་བཟུང་བ་དང ། གཞན་གྱིས་ཡོངས་སུ་བཟུང་བར་འདུ་ཤེས་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་གཞན་གྱིས་ཡོངས་སུ་བཟུང་བ་ཡིན་ཞེ་ན། འདི་ལྟ་སྟེ་ཡོ་བྱད་ལྕི་བ་དག་གཞན་སྐྱེས་པའམ། བུད་མེད་དམ་མ་ནིང་དག་གིས་ཡོངས་སུ་བཟུང་བར་གྱུར་པ་སྟེ། དེ་ལྟར་གཞན་གྱིས་ཡོངས་སུ་བཟུང་བ་ཡིན་ནོ། །ཇི་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ཞེ་ན། འདི་ལྟ་སྟེ་དགེ་སློང་གིས་འདི་ལྟར་ཡོ་བྱད་ལྕི་བ་འདི་དག་གཞན་སྐྱེས་པའམ། བུད་མེད་དམ་མ་ནིང་དག་གིས་ཡོངས་སུ་བཟུང་བར་འདུ་ཤེས་པ་སྟེ། དེ་ལྟར་གཞན་གྱིས་ཡོངས་སུ་བཟུང་བར་འདུ་ཤེས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་
Ca85a
༄#། །ལྔའམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ། །བཞི་གང་ཞེ་ན། སེམས་པར་བྱེད་པ་དང ། རྩོལ་བར་བྱེད་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་སེམས་པར་བྱེད་ཅེ་ན། དེ་ལྟ་རྐུ་སེམས་ཉེ་བར་གནས་པར་གྱུར་པ་སྟེ། དེ་ལྟར་སེམས་པར་བྱེད་དོ། །ཇི་ལྟར་རྩོལ་བར་བྱེད་ཅེ་ན། ལག་པ་དག་དང་རྐང་པ་དག་གིས་རྩོལ་བར་བྱེད་པ་སྟེ། དེ་ལྟར་རྩོལ་བར་བྱེད་དོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་བཞིས་མ་བྱིན་པར་ལེན་ན་ཕམ་
Ca85b
པར་འགྱུར་རོ། །བཞི་གང་ཞེ་ན། བསྲུངས་པ་དང ། བདག་གིར་བྱས་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་བསྲུངས་པ་ཡིན་ཞེ་ན། འདི་ལྟ་སྟེ་མི་རྣམས་ཀྱི་ཡོ་བྱད་ལྕི་བ་དག་སྣོད་འདི་ལྟ་སྟེ། ཟངས་པོ་ཆེ་དང ། ཟངས་དང ། རྫ་བོ་དང ། སྒྲོམ་དང ། ཀོ་ལྤགས་སུ་བཅུག་པར་གྱུར་ཅིང ། དེར་ཡང་སྲུང་མ་འདི་ལྟ་བུ་འདི་ལྟ་སྟེ། གླང་པོ་ཆེ་བའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚིགས་དག་བཀོད་པར་གྱུར་ཅིང ། དེ་དག་དེ་ན་སྲུང་བར་བྱེད་པ་སྟེ། དེ་ལྟར་བསྲུངས་པ་ཡིན་ནོ། །ཇི་ལྟར་བདག་གིར་བྱས་པ་ཡིན་ཞེ་ན། འདི་ལྟ་སྟེ ། མི་རྣམས་ཀྱི་ཡོ་བྱད་ལྕི་བ་དག་སྣོད་འདི་ལྟ་སྟེ། ཟངས་པོ་ཆེ་དང ། ཟངས་དང ། རྫ་བོ་དང ། སྒྲོམ་དང ། ཀོ་ལྤགས་སུ་བཅུག་པར་གྱུར་ཅིང ། དེ་དག་གིས་འདི་དག་བདག་ཅག་གི་ཡིན་ནོ་ཞེས་དེ་དག་བདག་གིར་བྱེད་པ་སྟེ། དེ་ལྟར་བདག་གིར་བྱས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །གཞན་ཡང་དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ། །བཞི་གང་ཞེ་ན། བསྲུངས་
Ca86a
༄#། །ཤིང་བདག་གིར་མ་བྱས་པ་དང ། བདག་གིར་བྱས་ཤིང་མ་བསྲུངས་པ་དང ། ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་བསྲུངས་ཤིང་བདག་གིར་མ་བྱས་པ་ཡིན་ཞེ་ན། འདི་ལྟ་སྟེ། ཆོམ་རྐུན་པ་དག་གིར་གྲོང་གཞོམ་པ་དང ། གྲོང་ཁྱེར་གཞོམ་པ་དང ། ཡུལ་གཞོམ་པར་བྱས་ཏེ། དགོན་པར་ཀུན་ནས་འདུ་བར་བྱེད་ཅིང ། དེར་མི་ཁ་ལུངས་པ་ལ་གཅན་བདག་གིས་དེ་དག་ལས། རྐུན་རྫས་ཕྲོགས་ཏེ་སྤུངས་ནས་སྲུང་བར་བྱེད་ཅིང ། བདག་གིར་མི་བྱེད་པ་སྟེ། དེ་ལྟར་བསྲུངས་ཤིང་བདག་གིར་མ་བྱས་པ་ཡིན་ནོ། །ཇི་ལྟར་བདག་གིར་བྱས་ཤིང་མ་བསྲུངས་པ་ཡིན་ཞེ་ན། འདི་ལྟ་སྟེ། མི་རྣམས་ཀྱི་ཡོ་བྱད་ལྕི་བ་དག་སྣོད་འདི་ལྟ་སྟེ། ཟངས་པོ་ཆེ་དང ། ཟངས་དང ། རྫ་བོ་དང ། སྒྲོམ་དང ། ཀོ་ལྤགས་སུ་བཅུག་པར་གྱུར་ཅིང ། དེ་དག་གིས་འདི་དག་བདག་ཅག་གི་ཡིན་ནོ་ཞེས་དེ་དག་བདག་གིར་བྱེད་ཅིང ། སྲུང་མ་འདི་ལྟ་བུ། འདི་ལྟ་སྟེ། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་དག་བཀོད་པར་ནི་མ་གྱུར་པ་སྟེ། དེ་ལྟར་བདག་གིར་བྱས་ཤིང་མ་བསྲུངས་པ་ཡིན་ནོ། །ཇི་ལྟར་ལྕི་བ་ཡིན་ཞེ་ན། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་ཅེ་ན། གནས་གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གནས་གཞན་དག་ཏུ་འཇོག་པར་བྱེད་པ་སྟེ། དེ་ལྟར་གནས་ནས་གནས་སུ་སྦེད་དོ། །
Ca86b
དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་བཞིས་མ་བྱིན་པར་ལེན་ན་ཕམ་པར་འགྱུར་རོ། །དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་ལྔས་མ་བྱིན་པར་ལེན་ན་ཕམ་པར་འགྱུར་རོ། །ལྔ་གང་ཞེ་ན། རང་གི་འདུ་ཤེས་ཀྱིས་ལེན་པར་མི་བྱེད་པ་དང ། ཡིད་གཅུགས་པའི་འདུ་ཤེས་ཀྱིས་ལེན་པར་མི་བྱེད་པ་དང ། རེ་ཞིག་གི་འདུ་ཤེས་ཀྱིས་ལེན་བར་མི་བྱེད་པ་དང ། ལེན་པ་ན་གཞན་ལ་གོ་བར་མི་བྱེད་པ་དང ། དེ་ལ་རྐུ་སེམས་ཉེ་བར་གནས་པར་གྱུར་པ་སྟེ། དགེ་སློང་གིས་གཞན་དག་གི་ཡོ་བྱད་ལྕི་བ་དག་རྒྱུ་དེ་ལྔས་མ་བྱིན་པར་ལེན་ན་ཕམ་པར་འགྱུར་རོ། །རྒྱུ་ལྔས་ནི་ལྟུང་བ་མེད་དེ། ལྔ་གང་ཞེ་ན། རང་གི་འདུ་ཤེས་ཀྱིས་ལེན་པར་བྱེད་པ་དང ། ཡིད་གཅུགས་པའི་འདུ་ཤེས་ཀྱིས་ལེན་པར་བྱེད་པ་དང ། རེ་ཞིག་གི་འདུ་ཤེས་ཀྱིས་ལེན་པར་བྱེད་པ་དང ། ལེན་པ་ན་གཞན་ལ་གོ་བར་བྱེད་པ་དང ། དེ་ལ་རྐུ་སེམས་ཉེ་བར་གནས་པར་མ་གྱུར་པ་སྟེ། རྒྱུ་དེ་ལྔས་ལྟུང་བ་མེད་དོ།། །།འདུལ་བ་རྣམ་པར་འབྱེད་པ། བམ་པོ་བཞི་པ། སྡོམ་ལ། ས་ལ་འདུག་དང་སྣོད་འདུག་དང ། །གཡུལ་ན་འདུག་དང་དོང་ན་འདུག་།རྩ་བའི་སྨན་ནི་ལྔ་པ་སྟེ། །སྡེ་ཚན་ཡང་དག་བསྡུས་པ་ཡིན། །འདི་ལྟར་གཞན་དག་གི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་ས་ལ་འདུག་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་
Ca87a
༄#། །བར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ས་དེ་འཇམ་ཞིང་མུ་གཅིག་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གྱོད་གྲུགས་སམ། གས་པའམ། ཡི་གེ་བྲིས་པའམ། ཚོན་སྣ་ཚོགས་བཀྲ་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །འདི་ལྟར་གཞན་དག་གི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་སྣོད་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད་འགྲོ་བར་བྱེད་ཅིང ། ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་སྣོད་དེ་འཇམ་ཞིང་
Ca87b
དུམ་བུ་གཅིག་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གྱོང་གྲུགས་སམ། གས་པའམ། མཚམས་ཅན་ནམ། ཡི་གེ་བྲིས་པའམ། ཚོན་སྣ་ཚོགས་བཀྲ་བ་ཡིན་ན། ཕྱོགས་ཐ་དད་པར་བརྗོད་པར་བྱའོ། །འདི་ལྟར་གཞན་དག་གིས་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གཡུལ་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང ། ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན། བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གཡུལ་དེ་འབྲུ་ཁ་དོག་གཅིག་པ་གང་བ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་འབྲུ་ཁ་དོག་སྣ་ཚོགས་ཀྱིས་གང་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །འདི་ལྟར་གཞན་དག་གི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། །དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་དོང་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་
Ca88a
༄#། །གྱོན་པར་བྱེད། འགྲོ་བར་བྱེད་ཅིང ། ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན། བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱེ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དོང་དེ་འབྲུ་ཁ་དོག་གཅིག་པས་གང་བ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་འབྲུ་ཁ་དོག་སྣ་ཚོགས་ཀྱིས་གང་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །གལ་ཏེ་དོང་དེ་གང་ཞིང་མུ་དང་ཁད་ཆད་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་མ་གང་བ་ཡིན་ན་དེ་ལ་ཤིང་བུས་བར་དུ་ཆོད་པའམ། སེག་གིས་བར་དུ་ཆོད་པའམ། རེ་ལྡེས་པར་དུ་ཆོད་པ་གང་དག་ཡོད་པ་དེ་དག་ཕྱོགས་ཐ་དད་པར་བརྗོད་པར་བྱའོ། །འདི་ལྟར་མི་རྣམས་ཀྱི་རྩ་བའི་ལས་ཀྱི་མཐའ་འདི་ལྟ་སྟེ། གླ་སྒང་ངམ་ཤུ་དག་གམ་ཡུང་ངམ་སྒེའུ་གཤེར་རམ་བོང་ང་དཀར་པོ་དེ་ལྟ་བུ་དེ་དག་ཉེ་བར་གནས་པ་ལ་དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པ་བྱེད། འགྲོ་བར་བྱེད་ཅིང ། ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་འབྱིན་པར་བྱེད་ཁུར་འདྲག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་
Ca88b
སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །སྡོམ་ལ། ནམ་མཁའ་ལ་ནི་གསུམ་དུ་བྱ། །བྱ་རྣམས་ཀྱིས་ནི་གཞན་གསུམ་དང ། །གསང་སྔགས་དག་གིས་འདྲེན་བྱས་ཏེ། །སྡེ་ཚན་ཡང་དག་བསྡུས་པ་ཡིན། །འདི་ལྟར་མི་རྣམས་ཀྱིས་ཁང་ཐོག་དག་ཏུ་གོས་ཁ་དོག་སྣ་ཚོགས་དག་བཏིང་བ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། ཡ་གད་འཛུགས་པར་བྱེད། ཁྲི་འཕང་དང།་ཐག་སྐས་འཆའ་བར་བྱེད། །དཔྱང་ཐག་འདོར་བར་བྱེད། །འཛེག་པར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་གོས་དག་སྡུད་པར་བྱེད་བམ་པོར་སྒྲེ་བར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་བཙོ་བླག་མཁན་གྱི་གོས་དག་བཏིང་བ་རླུང་གིས་ཁྱེར་ཞིང་དེ་དག་དགེ་སློང་རྣམས་ཀྱི་འཆག་ས་དག་གམ། དགར་དག་གམ། སྒོ་ཁང་དག་ཏུ་ལྟུང་བ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང ། ཇི་སྲིད་དུ་ནོམ་པར་མི་
Ca89a
༄#། །བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་གོས་དག་སྡུད་པར་བྱེད། བམ་པོར་སྒྲེ་བར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁང་པ་བརྩེགས་པའམ་ཁང་པ་བརྩེགས་པའི་སྟེང་དུ་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། །གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་བཞག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། ཡ་གད་འཛུགས་པར་བྱེད། ཁྲི་འཕང་དང་ཐག་སྐས་འཆའ་བར་བྱེད། དཔྱང་ཐག་འདོར་བར་བྱེད། འཛེག་པར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། ། ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན། བརྐུས་པར་བརྗོད་པར་བྱ་སྟེ ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁྱིམ་དག་གམ། ཆུའི་གནས་དག་ཏུ་འདུག་པའི་ཤིང་ལྗོན་པ་
Ca89b
དག་བསྐྱེད་པ་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གིས་བརྒྱན་པ་དེ་ལས་ཟས་ལ་ཆགས་པའི་བྱས་རྒྱན་གང་ཡང་རུང་བ་ཁྱེར་བ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བྱ་འཛིན་པར་བྱེད་ཅིང ། ཇི་སྲིད་དུ་རྒྱན་ལ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་ལ་དེ་འདི་སྙམ་དུ་བྱ་ལས་བརྐུ་བར་བྱའི། མི་ལས་མ་ཡིན་ནོ་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁང་ཐོག་དག་གམ། སྐོན་པ་དག་ཏུ་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་
Ca90a
༄#། །དང།་མུ་ཏིག་གི་ཆུན་པོ་དག་བཞག་པ་དེ་ལས་ཟས་ལ་ཆགས་པའི་བྱས་རྒྱན་གང་ཡང་རུང་བ་ཁྱེར་བ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བྱ་འཛིན་པར་བྱེད་ཅིང ། ཇི་སྲིད་དུ་རྒྱན་ལ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་ལ། དེ་འདི་སྙམ་དུ་བྱ་ལས་བརྐུ་བར་བྱའི་མི་ལས་མ་ཡིན་ནོ་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན། བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁྱིམ་དག་གམ། ཆུའི་གནས་དག་ཏུ་རྩེད་མོའི་བྱ་འདི་ལྟ་སྟེ། ནེ་ཙོ་འམ། རི་སྐེགས་སམ།་ཁུ་བྱུག་གམ། ཤང་ཤང་ཏེའུའམ། རྨ་བྱ་དག་བཞག་པ་དེ་དག་ལ་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་
Ca90b
དང།་སེ་མོ་དོ་དག་དང ། མུ་ཏིག་གི་ཆུན་པོ་དག་གིས་བརྒྱན་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བྱ་འཛིན་པར་བྱེད་ཅིང ། ཇི་སྲིད་དུ་རྒྱན་ལ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་ལ། དེ་འདི་སྙམ་དུ་བྱས་ལས་བརྐུ་བར་བྱའི་མི་ལས་མ་ཡིན་ནོ་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གཏེར་གཉིས་པོ་བདག་པོ་དང་བཅས་པ་དང ། བདག་པོ་མེད་པ་ལས་དགེ་སློང་གིས་བདག་པོ་དང་བཅས་པའི་གཏེར་གྱི་ཕྱིར་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། དཀྱིལ་འཁོར་ཉུག་པར་བྱེད། ཕྱོགས་གཞིར་སེང་ལྡེང་གི་ཕུར་པ་འཛུགས་པར་བྱེད། ཚོན་སྐུད་སྣ་ལྔས་བསྐོར་ཏེ་མེ་སྦར་བར་བྱེད། ཡམ་སྲེག་ཤིང་འཛུད་པར་བྱེད། གསང་སྔགས་རྗོད་པར་བྱེད་
Ca91a
༄#། །ཅིང་བདག་ལ་བདག་པོ་དང་བཅས་པའི་གཏེར་འོང་བར་གྱུར་ལ། བདག་པོ་མེད་པ་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་དང་བཅས་པའི་གཏེར་འོང་བར་གྱུར་ཅིང་བདག་པོ་མེད་པ་འོང་བར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །དགེ་སློང་གིས་བདག་པོ་དང་བཅས་པའི་གཏེར་གྱི་ཕྱིར་སྦྱོར་བ་བྱས་ནས། དེ་འདི་སྙམ་དུ་བདག་ལ་བདག་པོ་མེད་པའི་གཏེར་འོང་བར་གྱུར་ལ། བདག་པོ་དང་བཅས་པ་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་མེད་པའི་གཏེར་འོང་བར་གྱུར་ཅིང ། བདག་པོ་དང་བཅས་པ་འོང་བར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་བྱས་སུ་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །དགེ་སློང་གིས་བདག་པོ་མེད་པའི་གཏེར་གྱི་ཕྱིར་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད།་དཀྱིལ་འཁོར་ཉུག་པར་བྱེད། ཕྱོགས་བཞིར་སེང་ལྡེང་གི་ཕུར་པ་འཛུགས་པར་བྱེད། ཚོན་སྐུད་སྣ་ལྔས་བསྐོར་ཏེ་མེ་སྦར་བར་བྱེད། ཡམ་སྲེག་ཤིང་འཛུད་པར་བྱེད། གསང་སྔགས་
Ca91b
རྗོད་པར་བྱེད་ཅིང ། བདག་ལ་བདག་པོ་མེད་པའི་གཏེར་འོང་བར་གྱུར་ལ་བདག་པོ་དང་བཅས་པ་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་མེད་པའི་གཏེར་འོང་བར་གྱུར་ཅིང ། བདག་པོ་དང་བཅས་པ་འོང་བར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་བྱས་སུ་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །དགེ་སློང་གིས་བདག་པོ་མེད་པའི་གཏེར་གྱི་ཕྱིར་སྦྱོར་བ་བྱས་ནས། དེ་འདི་སྙམ་དུ་བདག་ལ་བདག་པོ་དང་བཅས་པའི་གཏེར་འོང་བར་གྱུར་ལ། བདག་པོ་མེད་པའི་འོང་བར་མ་གྱུར་ཅིག་སྙམ་པ་ལས། གལ་ཏེ་དེ་ལ་བདག་པོ་དང་བཅས་པའི་གཏེར་འོང་བར་གྱུར་ཅིང ། བདག་པོ་མེད་པའི་འོང་པར་མི་འགྱུར་ན། ཇི་སྲིད་དུ་མིག་སྔར་སྣང་བར་མ་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གལ་ཏེ་མིག་སྔར་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །སྡོམ་ལ། ས་ཡི་གཅལ་དང་རྡོ་དང་ནི། །སྤང་ལེབ་དང་ནི་རྩིག་མང་དང ། །རྩིག་པའི་སྟེང་དང་གཡོགས་མ་དང ། །རིམ་པ་ཆོས་གོས་གདང་ཁུང་དང ། །ཆོས་གོས་གདང་དང་ཟུང་ང་དང ། །ལྕགས་སྒྱེད་ཁྲི་དང་ཁྲེའུ་དང་ནི། ། ན་ཁྲིའུ་དང་སྒོ་སྐྱེས་དང ། །ཤིང་ལྗོན་རྣམ་པ་གསུམ་པོ་ཡིན། །འདི་ལྟར་མི་རྣམས་ཀྱི་ཡོ་བྱད་ལྕི་
Ca92a
༄#། །བ་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་ས་ལ་གཅལ་བཏིང་བའི་སྟེང་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང ། ཇི་སྲིད་དུ་ནོམ་པར་མི་བྱད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གཅལ་ཏེ་རྩཝ་ཁ་དོག་གཅིག་པ་དག་གིས་བཀྲམ་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་རྩཝ་ཁ་དོག་སྣ་ཚོགས་དག་གིས་བཀྲམ་པ་ཡིན་ན་ཕྱོགས་ཐ་དད་པར་བརྗོད་པར་བྱའོ། །འདི་ལྟར་མི་རྣམས་ཀྱི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང།་གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་རྡོའི་སྟེང་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད་ཅེས་བྱ་བ་ནས། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་སྔ་མ་བཞིན་ནོ། །གལ་ཏེ་རྡོ་དེ་འཇམ་ཞིང་མུ་གཅིག་པ་ཡིན་ན་ཕྱོགས་གཅིག་པར་བརྗོད་པར་བྱའོ། །
Ca92b
གལ་ཏེ་གྱོང་གྲུགས་སམ། གས་པའམ། མཚམས་ཅན་ནམ། ཡི་གེ་བྲིས་པའམ། ཚོན་སྣ་ཚོགས་བཀྲ་བ་ཡིན་ན་ཕྱོགས་ཐ་དད་པར་བརྗོད་པར་བྱའོ། །རྡོ་ལ་ཇི་ལྟ་བ་བཞིན་དུ་སྤང་ལེབ་དང་རྩིག་པ་དང་སྟེང་དང་གཡོགས་མ་དང་རིམ་པ་དང ། ཆོས་གོས་ཀྱི་གདང་ཁུང་དང ། ཆོས་གོས་ཀྱི་གདང་དང ། ཟུང་དང ། ལྕགས་སྒྱེད་དང ། ཁྲི་དང་ཁྲིའུ་དང ། ན་ཁྲིའུ་དང ། སྒོ་སྐྱེས་དང ། ཤིང་ལྗོན་པ་གསུམ་པོ་མེ་ཏོག་གི་ཤིང་ལྗོན་པ་དང ། འབྲས་བུའི་ཤིང་ལྗོན་པ་དང ། བདུག་པའི་ཤིང་ལྗོན་པ་ལ་ཡང་དེ་བཞིན་ཏེ། དགེ་སློང་གིས་མེ་ཏོག་གི་ཤིང་ལྗོན་པ་ཕྱུང་སྟེ་རྐུ་ན་མེ་ཏོག་གི་ཤིང་ལྗོན་པའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །མེ་ཏོག་གི་ཤིང་ལྗོན་པ་ལ་ཇི་ལྟ་བ་བཞིན་དུ་འབྲས་བུའི་ཤིང་ལྗོན་པ་དང ། བདུག་པའི་ཤིང་ལྗོན་པ་ལ་ཡང་དེ་བཞིན་ནོ། །སྡོམ་ལ། བཞོན་དང་སྲང་གི་ཁང་པ་དང ། །གླང་ཆེན་བཞོན་དང་རྟ་བཞོན་དང ། །ཤིང་རྟའི་བཞོན་དང་རྐང་འགྲོ་དང ། །ཟུང་ཁྱོགས་བཞོན་དང་ཤིང་རྟ་དང ། །ཁྱོགས་སྤྱིལ་པ་ཡི་བཞོན་པ་ཡིན། ། འདི་ལྟར་མི་རྣམས་ཀྱི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་བཞོན་པའི་སྟེང་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། བཞོན་པ་ལ་ཞོན་པར་བྱེད་ཅིང ། ཇི་སྲིད་དུ་ནོམ་པར་མི་བྱེད།
Ca93a
༄#། །ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བཞོན་པ་དེ་གོས་ཁ་དོག་གཅིག་པ་དག་གིས་བཤམས་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གོས་ཁ་དོག་སྣ་ཚོགས་དག་གིས་བཤམས་པ་ཡིན་ན་ཕྱོགས་ཐ་དད་པར་བརྗོད་པར་བྱའོ། །བཞོན་པ་ལ་ཇི་ལྟ་བ་བཞིན་དུ་སྲང་གི་ཁང་པ་ལ་ཡང་དེ་བཞིན་ནོ། །འདི་ལྟར་མི་རྣམས་ཀྱི་ཡོ་བྱད་ལྕི་བ་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང།་དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གླང་པོ་ཆེའི་བཞོན་པའི་སྟེང་ན་འདུག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད།་འགྲོ་བར་བྱེད། གླང་པོ་ཆེ་ལ་ཞོན་པར་བྱེད་ཅིང ། ཇི་སྲིད་དུ་ནོམ་པར་མི་བྱེད་ཅིང ། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་
Ca93b
པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གླང་པོ་ཆེ་དེ་ཚོ་བ་དང་པགས་པ་དང་ཤ་དང་ཁྲག་རྒྱས་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་རིད་པ་དང་ཉམ་ཆུང་བ་དང ། རྐེ་བ་དང་སྐམ་པ་དང་ལུས་མ་ཐོབ་པ་ཡིན་ན། དེ་ལ་སོས་པར་དུ་ཆོད་པའམ། སྣས་པར་དུ་ཆོད་པའམ། རྣ་བས་བར་དུ་ཆོད་པའམ། རྩིབ་མས་བར་དུ་ཆོད་པའམ། རྐེད་པས་བར་དུ་ཆོད་པའམ། མཇུག་ངོས་པར་དུ་ཆོད་པ་གང་དག་ཡིན་པ་དེ་དག་ཕྱོགས་ཐ་དད་པར་བརྗོད་པར་བྱའོ། །གླང་པོ་ཆེའི་རྒྱབ་དེར་ཁང་པ་བརྩེགས་པ་དང་བཅས་ཤིང་ཁང་པ་བརྩེགས་པ་དེར་རྒྱན་སྣ་ཚོགས་པའི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་བཞག་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གླང་པོ་ཆེ་ལ་ཞོན་པར་བྱེད། ཁང་པ་བརྩེགས་པ་ལ་འཇུག་པར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཁང་པ་བརྩེགས་པ་དེ་གོས་ཁ་དོག་གཅིག་
Ca94a
༄#། །པ་དག་གིས་བཤམས་པ་ཡིན་ན་ཕྱོགས་གཅིག་པར་བརྗོད་པར་བྱའོ། །གལ་ཏེ་གོས་ཁ་དོག་སྣ་ཚོགས་དག་གིས་བཤམས་པ་ཡིན་ན་ཕྱོགས་ཐ་དད་པར་བརྗོད་པར་བྱའོ། ། ཁང་པ་བརྩེགས་པ་ལ་ཇི་ལྟ་བ་བཞིན་དུ་ཁང་པ་བརྩེགས་པ་ཕྱེད་མ་ལ་ཡང་དེ་བཞིན་ནོ། །གླང་པོ་ཆེའི་བཞོན་པ་ལ་ཇི་ལྟ་བ་བཞིན་དུ་རྟའི་བཞོན་པ་དང ། ཤིང་རྟའི་བཞོན་པ་དང ། རྐང་གིས་འགྲོ་བ་དང ། ཟུང་ཁྱོགས་ཀྱི་བཞོན་པ་དང ། ཤིང་རྟ་དང་ཁྱོགས་སྤྱིལ་དང ། བྱིས་པའི་བཞོན་པ་ལ་ཡང་དེ་བཞིན་ནོ། །སྡོམ་ལ། གྲུ་སྐྱོད་རྒྱུན་ཕྱོགས་བཟློག་ཕྱོགས་དང ། །ཚུ་རོལ་ཕ་རོལ་སྐམ་ས་དང ། །རྫབ་ཏུ་སྦེད་པར་བྱེད་པ་དང ། །བདེ་བ་མེད་པར་ཆུད་གཟོན་པའོ། །དགེ་སློང་གི་རྐུན་སེམས་ཀྱིས་གྲུ་ཕུར་པ་ལ་བཏགས་པ་སྐྱོད་པར་བྱེད་ན་ཉེས་བྱས་སུ་འགྱུར་རོ། །གལ་ཏེ་ཆུའི་རྒྱུན་ཕྱོགས་སུ་ཁྲིད་པར་བྱེད་ན། ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཆུའི་རྒྱུན་ལས་བཟློག་ཕྱོགས་སུ་ཁྲིད་པར་བྱེད་ན། ཇི་སྲིད་དུ་གྲུ་ཚུགས་ལས་འདས་པར་མ་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གྲུ་ཚུགས་ལས་འདས་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་
Ca94b
འགྱུར་རོ། །གལ་ཏེ་ཚུ་རོལ་ནས་ཕ་རོལ་ཏུ་ཁྲིད་པར་བྱེད་དམ། ཕ་རོལ་ནས་ཚུ་རོལ་དུ་འདྲེན་པར་བྱེད་ན། ཇི་སྲིད་དུ་མིག་སྔར་སྣང་བར་འགྱུར་བ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་སྐམ་ས་ལ་ཕྱུང་སྟེ་རྐུ་བར་བྱེད་ན། ཇི་སྲིད་དུ་མིག་སྔར་སྣང་བར་འགྱུར་བ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕྱིས་བཀུར་རོ་སྙམ་པས་རྫབ་ཏུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་རྫབ་ཏུ་སྦེད་པར་བྱེད་དམ། སྲེག་པར་བྱེད་དམ། གཅོག་པར་བྱེད་དམ། འཆག་པར་བྱེད་ན་ཉེས་པ་སྦོམ་པོར་འགྱུར་རོ། །སྡོམ་ལ། སྟོན་ཀ་འབྱུང་དང་གྲུ་གསུམ་དང ། །ངང་པ་དང་ནི་ཨུཏྤ་ལ། །ཆུ་ནས་སྐྱེ་དང་སྐམ་ལས་སྐྱེ། །རྔོན་སྤྱད་དང་ནི་ཉ་གདང་ངོ ། ། འདི་ལྟར་མི་རྣམས་ཀྱི་སྟོན་ཀ་འབྱུང་བའི་ལས་ཀྱི་མཐའ་འདི་ལྟ་སྟེ། སཱ་ལུའི་ལས་ཀྱི་མཐའ་དང ། བུ་རམ་ཤིང་གི་ལས་ཀྱི་མཐའ་དང ། ལན་ཚཝའི་ལས་ཀྱི་མཐའ་དེ་ལྟ་བུ་དེ་ལྟ་བུ་དེ་དག་ཉེ་བར་གནས་པར་
Ca95a
༄#། །གྱུར་ཅིང ། དེ་དག་ལན་འགའ་ནི་ཆུ་ཤིན་ཏུ་མོད་ཅིང ། ལན་འགའ་ནི་ཆུ་ཤིན་ཏུ་དཀོན་པར་གྱུར་པ་ན། དགེ་སློང་གིས་ཆུ་ཤིན་ཏུ་དཀོན་པའི་ཚེ་བདག་གི་འབྱོར་བར་གྱུར་ལ།་གཞན་གྱི་རྒུད་པར་གྱུར་ཅིག་སྙམ་པས་བདག་གི་སཱ་ལུའི་རྣང་ལ་ཡུར་བ་གཏོང་བར་བྱེད་ཅིང་གཞན་གྱི་ལ་གཅོད་པར་བྱེད་ན། གལ་ཏེ་དེའི་འབྱོར་བར་གྱུར་ཅིང་གཞན་གྱི་རྒུད་པར་གྱུར་ན། དེའི་འབྱོར་པའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །ཆུ་ཤིན་ཏུ་མོད་པའི་ཚེ་བདག་གི་འབྱོར་བར་འགྱུར་ལ་གཞན་གྱི་རྒུད་པར་གྱུར་ཅིག་སྙམ་པས་བདག་གི་ལ་གཅོད་པར་བྱེད་ཅིང ། གཞན་གྱི་ལ་གཏོང་བར་བྱེད་ན། གལ་ཏེ་དེའི་འབྱོར་པར་གྱུར་ཅིང་གཞན་གྱི་རྒུད་པར་གྱུར་ལ། དེའི་འབྱོར་བའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་བདག་གི་ལ་ཡང་གཏོང་བར་བྱེད་ཅིང ། གཞན་གྱི་ལ་ཡང་གཏོང་བར་བྱེད་ན་ཉེས་པ་སྦོམ་པོར་འགྱུར་རོ། །སཱ་ལུའི་ལས་ཀྱི་མཐའ་ལ་ཇི་ལྟ་བ་བཞིན་དུ་བུ་རམ་ཤིང་གི་ལས་ཀྱི་མཐའ་དང་ལན་ཚཝའི་ལས་ཀྱི་མཐའ་ལ་ཡང་དེ་བཞིན་ནོ། །གྲུ་ནི་གསུམ་སྟེ། བུམ་པའི་གྲུ་དང ། རྫ་མའི་གྲུ་དང ། ར་རྐྱལ་གྱིའོ། །ཟོང་ནི་བཞི་སྟེ། ཟོང་ལྕི་ཞིང་རིན་ལྕི་བ་ཡང་ཡོད། ཟོང་ཡང་ཞིང་རིན་ལྕི་
Ca95b
བ་ཡང་ཡོད། ཟོང་ལྕི་ཞིང་རིན་ཡང་བ་ཡང་ཡོད། ཟོང་ཡང་ཞིང་རིན་ཡང་བ་ཡང་ཡོད་དོ། །ཟོང་ལྕི་ཞིང་རིན་ལྕི་བ་གང་ཞེ་ན། འདི་ལྟ་སྟེ་ནོར་བུ་དག་དང ། མུ་ཏིག་དང ། བཻཌཱུ་ ་དང ། མན་ཤེལ་དཀར་པོ་དང།་བྱུ་རུ་དང ། དངུལ་དང ། ས་ལེ་སྦྲམ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་བ་སྟེ། དེ་ནི་ཟོང་ལྕི་ཞིང་རིན་ལྕི་བ་ཡིན་ནོ། །ཟོང་ཡང་ཞིང་རིན་ལྕི་བ་གང་ཞེ་ན། འདི་ལྟ་སྟེ་དར་དག་དང ། སྲིན་བལ་དང ། གུར་ཀུམ་དང ། སུག་སྨེལ་ཏེ། དེ་ནི་ཟོང་ཡང་ཞིང་རིན་ལྕི་བ་ཡིན་ནོ། །ཟོང་ལྕི་ཞིང་རིན་ཡང་བ་གང་ཞེ་ན། འདི་ལྟ་སྟེ་ལྕགས་དང ། རྡོ་དང ། ཁྲོ་ཆུ་སྟེ། དེ་ནི་ཟོང་ལྕི་ཞིང་རིན་ཡང་བ་ཡིན་ནོ། །ཟོང་ཡང་ཞིང་རིན་ཡང་བ་གང་ཞེ་ན། འདི་ལྟ་སྟེ། བལ་དང ། ཤ་ན་དང ། རས་བལ་དང ། ན་མེ་རུ་སྟེ། དེ་ནི་ཟོང་ཡང་ཞིང་རིན་ཡང་བ་ཡིན་ནོ། །དེ་ལ་ཟོང་ལྕི་ཞིང་རིན་ལྕི་བ་གང་ཡིན་པ་དེ་དང ། ཟོང་ཡང་ཞིང་རིན་ཡང་བ་གང་ཡིན་པ་དེ་གྲུ་གཅིག་ཏུ་བཅུག་པར་གྱུར་པ་ལས། དེ་དག་གི་གྲུ་དེ་རྒུད་པར་གྱུར་ཅིང་འབྱོར་པར་མ་གྱུར་ཏེ་ཟོང་འཕྱོ་བ་ན་ཤེས་ལྡན་དག་བྱིང་བ་གང་ཡིན་པ་དེ་ནི་ཁོ་བོ་ཅག་གི་ཡིན་ལ། འཕྱོ་བ་གང་ཡིན་པ་དེ་ནི་ཅི་བདེ་ཁོ་ནར་འབྱིན་ལ་རག་གོ་ཞེས་ཐོབ་རྒྱལ་དུ་སྒྲོགས་པར་བྱེད་པ་ན། དགེ་སློང་གིས་ཟོང་བྱིང་བའི་ཕྱིར་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད།་འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད། འབྱུང་བར་བྱེད་ཅིང ། ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །
Ca96a
༄#། །ནོམ་པར་བྱེད་ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕྱིས་བཀུར་རོ་སྙམ་པས་རྫབ་ཏུ་འཇུད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་རྫབ་ཏུ་འཇུག་པར་བྱེད་ན་ཉེས་པ་སྦོམ་པོར་འགྱུར་རོ། །དེ་ལ་ཟོང་ཡང་ཞིང་རིན་ལྕི་བ་གང་ཡིན་པ་དེ་དང ། ཟོང་ལྕི་ཞིང་རིན་ཐང་ཡང་བ་གང་ཡིན་པ་དེ་གྲུ་གཅིག་ཏུ་བཅུག་པར་གྱུར་པ་ལས། དེ་དག་གི་གྲུ་དེ་རྒུད་པར་གྱུར་ཅིང་འབྱོར་བར་མ་གྱུར་ཏེ། ཟོང་བྱིན་བ་ན། ཤེས་ལྡན་དག་འཕྱོ་བ་གང་ཡིན་པ་དེ་ནི་ཁོ་བོ་ཅག་གི་ཡིན་ལ།་བྱིང་བ་གང་ཡིན་པ་དེ་ནི་ཅི་བདེ་ཁོ་ནར་འབྱིན་ལ་རག་གོ་ཞེས་ཐོབ་རྒྱལ་དུ་སྒྲོགས་པར་བྱེད་པ་ན། དགེ་སློང་གིས་ཟོང་འཕྱོ་བའི་ཕྱིར་ཁྲི་ལས་ལྡང་བར་བྱེད། །ཤམ་ཐབས་གྱོན་པར་བྱེད། འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད། འབྱུང་བར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །
Ca96b
ནོམ་པར་བྱེད་ཉུག་པར་མི་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕྱིས་བཀུར་རོ་སྙམ་པས་རྫབ་ཏུ་འདུད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་རྫབ་ཏུ་འཇུད་པར་བྱེད་ན། ཉེས་པ་སྦོམ་པོར་འགྱུར་རོ། །འདི་ལྟར་མི་རྣམས་ཀྱི་ཁྱིམ་དག་གམ། ཆུའི་གནས་དག་ཏུ་རྫིང་བུ་སྣ་ཚོགས་དག་བྱས་ཤིང་རྫིང་བུ་དེ་དག་ཏུ་རྩེད་མོའི་བྱ་སྣ་ཚོགས་འདི་ལྟ་སྟེ། ངང་པ་དག་དང ། ཀ་རན་ད་ཀ་དག་དང ། ངུར་པ་དག་བཞག་པར་གྱུར་ལ་དེ་དག་ཀྱང་རྒྱན་སྣ་ཚོགས་འདི་ལྟ་སྟེ། མགུལ་གདུབ་དག་དང ། གདུབ་བུ་རྒྱན་ཅན་དག་དང ། དཔུང་རྒྱན་དག་དང ། དོ་ཤལ་དག་དང ། སེ་མོ་དོ་དག་དང ། མུ་ཏིག་གི་ཆུན་པོ་དག་གིས་བརྒྱན་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད། བྱ་འཛིན་པར་བྱེད་ཅིང ། ཇི་སྲིད་དུ་རྒྱན་ལ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་
Ca97a
༄#། །པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གལ་ཏེ་དེ་འདི་སྙམ་དུ་བྱ་ལས་བརྐུ་བར་བྱའི་མི་ལས་མ་ཡིན་སྙམ་དུ་སེམས་ན་ཉེས་བྱས་སུ་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །གལ་ཏེ་དེ་འདི་སྙམ་དུ་མི་ལས་བརྐུ་བར་བྱའི། །བྱ་ལ་རྒྱན་ག་ལ་ཡོད་སྙམ་དུ་སེམས་ན། དེ་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །རྫིང་བུ་དེ་དག་ཏུ་ཕྲེང་བ་རྒྱུ་ཆུ་ནས་སྐྱེ་བ་སྣ་ཚོགས་འདི་ལྟ་སྟེ། ཨུཏྤ་ལ་དང ། ཀུ་མུད་དང ། པདྨ་དཀར་པོ་དང ། དྲི་མཆོག་དང ། དྲི་ངད་འཇམ་དང ། དུས་ཚིགས་ཐམས་ཅད་དང ། དུས་ཐམས་ཅད་པ་སྐྱེ་བོ་ཐམས་ཅད་ལས་བསྐྱབས་པ་དག་བསྐྱེད་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། གོས་འཆིང་བར་བྱེད། ཆུར་འཇུག་པར་བྱེད། གཏིང་དུ་འཇུག་པར་བྱེད་ཅིང་ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང ། ཇི་སྲིད་དུ་འཐོག་པར་མི་བྱེད། ཁུར་འདྲག་པར་མི་བྱེད། གནས་ནས་
Ca97b
གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །རྫིང་བུ་དེ་དག་གི་འགྲམ་གཉིས་སུ་ཕྲེང་བ་རྒྱུ་སྐམ་ལས་སྐྱེ་བ་སྣ་ཚོགས་འདི་ལྟ་སྟེ། ཨ་ཏི་མུག་ཏ་ཀ་དང ། ཙམ་པ་ཀ་དང ། སྐྱ་སྣར་དང ། པར་ཤི་ཀ་དང།་མ་ལི་ཀ་དང ། ན་བ་མ་ལི་ཀ་དང ། ཡིད་དགའ་དང ། ཡུ་ཏི་ཤ་དང ། དྷ་ནུ་སྐ་རི་དང ། དུས་ཚིགས་ཐམས་ཅད་པ་དང ། དུས་ཐམས་ཅད་པ་སྐྱེ་བོ་ཐམས་ཅད་ལས་བསྐྱབས་པ་དག་བསྐྱེད་པ་ལ། དགེ་སློང་གིས་དེ་ལ་སྦྱོར་བས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་ཅིང ། ཇི་སྲིད་དུ་ནོམ་པར་མི་བྱེད། ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད། མེ་ཏོག་གི་ཤིང་ལ་འཛེག་པར་བྱེད། མེ་ཏོག་འཐོག་པར་བྱེད། ཐུ་བ་འགེངས་པར་བྱེད་ཅིང ། ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མེ་ཏོག་འཐོག་པར་བྱེད་ཅིང་ཐུ་བཀང་སྟེ་གནས་ནས་གནས་སུ་སྦེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་རི་དྭགས་ཀྱི་རྔོན་པའམ། རི་དྭགས་ཀྱི་རྔོན་པའི་སློབ་མ་མཁས་པས་དགོན་པ་ནགས་མཆོག་ཏུ་འདི་ལྟ་སྟེ། རི་དྭགས་མང་པོ་དྲུངས་དབྱུང་བའི་ཕྱིར་དང་ཉམས་པར་བྱ་
Ca98a
༄#། །བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་བཙུགས་པ་ལ་དགེ་སློང་གིས་རྐུ་སེམས་ཀྱིས་རྔོན་སྤྱད་རྐུ་བར་བྱེད་ན། རྔོན་སྤྱད་ཀྱི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕན་པ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་སྲེག་པར་བྱེད་དམ། གཅོག་པར་བྱེད་དམ། འཆག་པར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་སྙིང་རྗེའི་བསམ་པས་འདིས་སེམས་ཅན་འདི་དག་སྲོག་དང་བྲལ་བར་གྱུར་ན་མི་རུང་ངོ ། །གཞི་འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་པས་སྲེག་པར་བྱེད་དམ། གཅོག་པར་བྱེད་དམ། འཆག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་རྔོན་སྤྱད་ལ་ཐོགས་པའི་རི་དྭགས་རྐུ་བར་བྱེད་ན། རི་དྭགས་ཀྱི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་གཏོང་བར་བྱེད་ན་ཉེས་པ་སྦོམ་པོར་འགྱུར་རོ། ། གལ་ཏེ་སྙིང་རྗེའི་བསམ་པས་འདིས་སེམས་ཅན་འདི་དག་སྲོག་དང་བྲལ་བར་གྱུར་ན་མི་རུང་ངོ ། །གཞི་འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་
Ca98b
སྙམ་པས་གཏོང་བར་བྱེད་ན་ཉེས་བྱས་སུ་འགྱུར་རོ། །འདི་ལྟར་ཉ་པའམ་ཉ་པའི་སློབ་མ་མཁས་པས་ཆུ་ཀླུང་གི་ཁར་རམ། ཡུར་པོ་ཆེའི་ཁར་འདི་ལྟ་སྟེ། ཉ་མང་པོ་དག་དྲུངས་དབྱུང་བའི་ཕྱིར་དང་ཉམས་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་ཉ་གདང་བཙུགས་པ་ལ། དགེ་སློང་གིས་རྐུ་སེམས་ཀྱིས་ཉ་གདང་རྐུ་བར་བྱེད་ན། ཉ་གདང་གི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་ཕན་པ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས། སྲེག་པར་བྱེད་དམ་གཅོག་པར་བྱེད་དམ་འཆག་པར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་སྙིང་རྗེའི་བསམ་པས་འདིས་སེམས་ཅན་འདི་དག་སྲོག་དང་བྲལ་བར་གྱུར་ན་མི་རུང་ངོ ། །གཞི་འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་པས་སྲེག་པར་བྱེད་དམ་གཅོག་པར་བྱེད་དམ་འཆག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་གིས་ཉ་གདང་ལ་ཐོགས་པའི་ཉ་རྐུ་བར་བྱེད་ན། ཉའི་རིན་ཐང་བརྩི་བར་བྱ་ཞིང ། དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་བདེ་བ་མེད་པར་བྱ་བའི་བསམ་པས་དེ་ཡིར་ཡང་མ་གྱུར་ལ། བདག་གིར་ཡང་མ་གྱུར་ཅིག་སྙམ་པས་གཏོང་བར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་སྙིང་རྗེའི་བསམ་པས་འདིས་སེམས་ཅན་འདི་དག་སྲོག་དང་བྲལ་བར་འགྱུར་ན་མི་རུང་ངོ ། །གཞི་
Ca99a
༄#། །འདིས་སེམས་ཅན་དེ་ལ་ཡང་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་པས་གཏོང་བར་བྱེད་ན་ཉེས་བྱས་སུ་འགྱུར་རོ། །སྡོམ་ལ། སྐམ་སར་མི་ཡི་ཆུ་དང་ནི། དེ་བཞིན་དུད་འགྲོའི་ཆུ་དང་ཡང ། །རྒྱ་མཚོར་མི་ཡི་ཆུ་དག་དང ། །དུད་འགྲོའི་ཆུ་ཡང་དེ་བཞིན་ནོ། །འདི་ལྟར་ཚོང་པ་རབ་ཏུ་མང་པོ་དག་ཟོང་ཁྱེར་ཏེ་དགོན་པའི་ལམ་དུ་ཞུགས་པ་ན་དེ་ན་ཆུ་དཀོན་ཞིང་རིན་ཆེ་བར་གྱུར་པའི་ཚེ། །དེ་དག་གིས་དེར་སྣོད་སྣ་ཚོགས་འདི་ལྟ་སྟེ། རྫ་མ་དག་དང ། ཕྲུ་བ་དག་དང ། རིལ་བ་དག་དང ། ར་རྐྱལ་དག་གིས་ཆུའི་ཚོགས་བྱས་ཤིང ། དེ་ན་ཆུའི་ཚད་མི་ལ་ནི་འདི་ཙམ་ཞིག་གོ། དུད་འགྲོ་ལ་ནི་འདི་ཙམ་ཞིག་གོ་ཞེས་སྦྱིན་པར་བྱེད་པ་ན། དགེ་སློང་གིས་རྐུ་སེམས་ཀྱིས་མིའི་སྐལ་བའི་ཆུ་བདག་གིར་བྱེད་ན་དེའི་གནས་སྐབས་སུ་མིའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དུད་འགྲོའི་སྐལ་བའི་ཆུ་བདག་གིར་བྱེད་ན། དེའི་གནས་སྐབས་སུ་དུད་འགྲོའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །འདི་ལྟར་འཛམ་བུའི་གླིང་པའི་ཚོང་པ་རབ་ཏུ་མང་པོ་ནོར་སྒྲུབ་པ་དག་རྒྱ་མཚོའི་གྲུར་ཞུགས་ཏེ་རྒྱ་མཚོ་ཆེན་པོར་འཇུག་པ་ན། རྒྱ་མཚོ་ཆེན་པོ་ལན་ཚཝའི་རོ་འབའ་ཞིག་ཡིན་པས་དེ་དག་གིས་དེར་སྣོད་སྣ་ཚོགས་འདི་ལྟ་སྟེ། རྫ་མ་དག་དང ། ཕྲུ་བ་དག་དང ། རིལ་བ་དག་དང་ར་རྐྱལ་དག་གིས་
Ca99b
ཆུའི་ཚོགས་བྱས་ཤིང ། དེ་ན་ཆུའི་ཚད་མི་ལ་ནི་འདི་ཙམ་ཞིག་གོ་།དུད་འགྲོ་ལ་ནི་འདི་ཙམ་ཞིག་གོ་ཞེས་སྦྱིན་པར་བྱེད་པ་ན། དགེ་སློང་གིས་རྐུ་སེམས་ཀྱིས་མིའི་སྐལ་བའི་ཆུ་བདག་གིར་བྱེད་ན།་དེའི་གནས་སྐབས་སུ་མིའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དུད་འགྲོའི་སྐལ་བའི་ཆུ་བདག་གིར་བྱེད་ན། དེའི་གནས་སྐབས་སུ་དུད་འགྲོའི་སྐལ་བའི་ཆུའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཉེས་པ་སྦོམ་པོར་འགྱུར་ལ། དངོས་པོ་མ་ཚང་ན་ཉེས་བྱས་སུ་འགྱུར་རོ། །སྡོམ་ལ། རྐུ་བ་གོམ་པ་སྲི་བ་དང ། དེ་བཞིན་གོམ་པ་སྐྱེད་པ་དང ། གནས་ནས་ཁྱམས་སུ་འགྲོ་ལ་སོགས། སྡེ་ཚན་ཡང་དག་བསྡུས་པ་ཡིན། འདི་ལྟར་མཁན་པོ་དང ། སློབ་དཔོན་ལམ་གྱི་བགྲོད་པར་ཞུགས་པ་དེ་དག་གིས་ལྷན་ཅིག་གནས་པ་དང་ཉེ་གནས་དག་གི་ལག་ཏུ་ཆོས་གོས་དག་གཏད་པ་ན། དེ་ལ་དེ་དག་རྐུ་སེམས་ཉེ་བར་གནས་པར་གྱུར་ཅིང་དེ་དག་གོམ་པ་སྲི་བས་འགྲོ་ཞིང་སྦྱང་འབྲང་དུ་འགྲོ་ན་གོམ་པ་རེ་རེ་ལ་ཉེས་བྱས་སུ་འགྱུར་རོ། །ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང ། དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་གོམ་པ་བསྐྱེད་དེ་མདུན་དུ་འགྲོ་ན་གོམ་པ་རེ་རེ་ལ་ཉེས་བྱས་སུ་འགྱུར་རོ། །ཇི་སྲིད་དུ་
Ca100a
༄#། །མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །འདི་ལྟར་དགེ་སློང་ལྷན་ཅིག་གནས་པ་དང་ཉེ་གནས་དག་གིས་རྐུ་སེམས་ཀྱིས་མཁན་པོ་དང་སློབ་དཔོན་དག་གི་ཆོས་གོས་དག་རྐུ་བར་བྱེད་ཅིང ། དེ་དག་གིས་དེ་དག་ཁྱེར་ཏེ་གནས་ཁང་ནས་ཁྱམས་སུ་དང་ཁྱམས་ནས་གནས་ཁང་དུ་འཇུག་པ་དང ། གནས་ཁང་ནས་ཡང་ཁྱམས་སུ་འབྱུང་བ་དང ། སྟེང་གི་གཞིར་འཛེག་པ་དང ། དེ་ནས་ཡང་འབབས་ཤིང་འོག་གི་གཞིར་འབབ་པ་དང ། སྒོ་ཁང་དུ་འཇུག་པ་དང ། སྒོ་ཁང་ནས་ཕྱི་རོལ་གྱི་བང་རིམ་དུ་འབྱུང་བ་དང ། ཕྱི་རོལ་གྱི་བང་རིམ་ནས་ལྕོང་དུ་འབབ་པ་དང ། ལྕོང་ནས་ཐང་ལ་འཛེག་པ་དང ། ཐང་ནས་ཡང་ལྕོང་དུ་འབབ་པ་དང ། ལྕོང་ནས་ཐིབས་པོར་འཇུག་པ་དང ། ཐིབས་པོ་ནས་བླ་གབ་མེད་པར་འབྱུང་བར་བྱེད་ན། ཐམས་ཅད་དུ་ཡང་གོམ་པ་རེ་རེ་ལ་ཉེས་བྱས་སུ་འགྱུར་རོ། །ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །སྡོམ་ལ། རྐུན་ཤས་ནོད་པར་བྱེད་པ་དང ། འགྱོད་པར་གྱུར་ཅིང་ཟློག་བྱེད་དང ། །
Ca100b
ཁྱིམ་དུ་སྦྲོན་པར་བྱེད་པ་ཡི། །སྡེ་ཚན་ཡང་དག་བསྡུས་པ་ཡིན། །འདི་ལྟར་དགེ་སློང་དགོན་པ་ན་གནས་པ་དེ་ལ་ཆོམ་རྐུན་པ་གྲོང་འཇོམས་པ་དག་འོངས་ཏེ་རྨས་པ། འཕགས་པ་གྲོང་ཆེ་གེ་མོ་ཞིག་ཤེས་སམ། ཤེས་སོ། །འཕགས་པ་འོ་ན་གྲོང་དེར་བུད་མེད་མང་བ་དང ། སྐྱེས་པ་ཉུང་བ་དང ། ལ་གཅན་པ་དང་ཐག་རིང་བ་དང ། ཁྱི་ཟ་བ་མེད་པ་དང ། འཇུག་སླ་བ་དང ། འབྱུང་སླ་བ་དང ། བདག་ཅག་གིས་དེར་མི་སྨས་མི་ཉམས་པར་ལས་བྱ་བར་ནུས་སམ། བདེ་ལེགས་སུ་ཕྱིར་འོངས་ན་འཕགས་པ་ལ་ཡང་སྐལ་བ་སྦྱིན་ནོ་ཞེས་ཟེར་བ་ལ། གལ་ཏེ་དགེ་སློང་གིས་འདི་སྐད་ཅེས། ཤེས་ལྡན་དག་གྲོང་དེ་ཏེ་པོར་བུད་མེད་མང་བ་དང ། སྐྱེས་པ་ཉུང་བ་དང ། ལ་གཅན་པ་དང་ཐག་རིང་བ་དང ། ཁྱི་ཟ་བ་མེད་པ་དང ། འཇུག་སླ་བ་དང ། འབྱུང་སླ་བ་དང ། ཁྱེད་ཅག་གིས་དེར་མི་སྨས་མི་ཉམས་པར་ལས་བྱ་བར་ནུས་སོ་ཞེས་སྨྲས་ཏེ། ཆོམ་རྐུན་པ་དག་གིས་དེར་ལས་བྱས་ཤིང་བདེ་ལེགས་སུ་ཕྱིར་འོངས་ནས་དགེ་སློང་ལ། རྐུན་ཤས་འབུལ་བར་བྱེད་ཅིང་དགེ་སློང་གིས་རྐུན་ཤས་བདག་གིས་བྱེད་ན། རྐུན་ཤས་ཀྱི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་དེ་ཆོམ་རྐུན་པ་དེ་དག་གི་གན་དུ་སོང་སྟེ་འདི་སྐད་ཅེས། ཤེས་ལྡན་དག་ཤེས་པར་གྱིས་ཤིག་།འདི་ལྟ་སྟེ་བྱིས་པ་བླུན་པ་མི་གསལ་བ་མི་མཁས་པ་བདག་གིས་ཏེ་པོར་གྱ་ཚོམ་དང ། བྱུང་རྒྱལ་གྱིས་སོ་སོར་མ་བ་རྟགས་པར་ཚིག་སྨྲས་
Ca101a
༄#། །ཏེ།་གྲོང་དེ་ནི་ཏེ་པོར་བུད་མེད་ཉུང་བ་དང ། སྐྱེས་པ་མང་བ་དང ། ལ་གཅན་པ་དང་ཐག་ཉེ་བ་དང ། ཁྱི་ཟ་བ་དང ། འཇུག་དཀའ་བ་དང ། འབྱུང་དཀའ་བ་དང ། ཁྱེད་ཅག་གིས་དེར་མི་སྨས་མི་ཉམས་པར་ལས་བྱ་བར་མི་ནུས་སོ་ཞེས་སྨྲས་ན་ཆོམ་རྐུན་པ་དག་གིས་དེར་ལས་བྱས་ཀྱང་རུང ། མ་བྱས་ཀྱང་རུང་སྟེ། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེས་ཆོམ་རྐུན་པ་དེ་དག་བཙལ་བ་ན་མ་མཐོང་ནས་ཁྱིམ་དེར་སོང་སྟེ། འདི་སྐད་ཅེས་ཤེས་ལྡན་དག་བྱར་གྱིས་ཤིག་།ཤེས་ལྡན་དག་བག་གྱིས་ཤིག་།དེང་འདིར་ཆོམ་རྐུན་པ་གྲོང་འཇོམས་པ་དག་འོང་བར་འགྱུར་གྱིས། དེ་དག་གིས་ཁྱེད་ཀྱི་རྫས་ཕྲོགས་པར་གྱུར་ཏམ། ཐམས་ཅད་དང་ཐམས་ཅད་དུ་སྲོག་དང་བྲལ་བར་གྱུར་ན་མི་རུང་ངོ་ཞེས་སྨྲས་ན། ཆོམ་རྐུན་པ་དག་གིས་དེར་ལས་བྱས་ཀྱང་རུང ། མ་བྱས་ཀྱང་རུང་སྟེ། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །སྡོམ་ལ། ཞིང་གི་ས་གཞི་འོག་ཟུར་དང ། །བླ་ཡི་གྲཝར་ཡང་དེ་བཞིན་ཏེ། །ཁྱིམ་གྱི་གཞི་ལའང་རྣམ་གཉིས་དང ། །ཟོང་གི་གཞི་ཡང་རྣམ་གཉིས་ཡིན། །ས་གཞི་ནི་གསུམ་སྟེ། ཞིང་གི་ས་གཞི་དང ། ཁྱིམ་གྱི་ས་གཞི་དང ། ཟོང་གི་ས་གཞིའོ། །ཞིང་གི་ས་གཞི་ནི་རྣམ་པ་གཉིས་ཀྱིས་བརྐུས་པ་ཡིན་ཏེ། ཤགས་ཀྱིས་དང་ཡོངས་སུ་བསྐོར་བས་སོ། །ཇི་ལྟར་ཤགས་ཀྱིས་ཤེ་ན། དགེ་སློང་གིས་ཞིང་གི་ས་གཞིའི་ཕྱིར་ཁྱིམ་
Ca101b
པ་དང་ལྷན་ཅིག་འོག་ཟུར་ཤགས་འགྱེད་པར་བྱེད་ན། གལ་ཏེ་དགེ་སློང་ཁྱིམ་པས་ཕམ་པར་བྱས་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་གིས་ཁྱིམ་པ་ཕམ་པར་བྱས་ན།་ཇི་སྲིད་དུ་ཁྱིམ་པས་སྦྱོར་བ་མ་བཏང་བ་དེ་སྲིད་དུ་དགེ་སློང་ལ་ཉེས་པ་སྦོམ་པོར་འགྱུར་རོ། །ཁྱིམ་པས་སྦྱོར་བ་གཏང་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་ཁྱིམ་པ་དང་ལྷན་ཅིག་བླའི་གྲར་ཤགས་འགྱེད་པར་བྱེད་ན། གལ་ཏེ་དགེ་སློང་ཁྱིམ་པས་ཕམ་པར་བྱས་ན་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་གིས་ཁྱིམ་པ་ཕམ་པར་བྱས་ན། དགེ་སློང་དག་རྒྱལ་པོ་ནི་རྩོད་པ་ཐམས་ཅད་ཀྱི་དཔོན་པོ་ཡིན་པས་བརྐུས་པར་བརྗོད་པར་བྱ་སྟེ། རིན་ཐང་བརྩེ་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་ཤགས་ཀྱིས་སོ། །ཇི་ལྟར་ཡོངས་སུ་བསྐོར་བར་ཞེ་ན། འདི་ལྟར་དགེ་སློང་གིས་ཞིང་གི་ས་གཞི་རྩིག་པ་དག་གམ། ཡ་གད་དག་གམ། སེག་དག་གམ། རེ་ལྡེ་དག་གམ། འོབས་དག་གམ། ཚེར་མ་དག་གིས་ཡོངས་སུ་སྐོར་བར་བྱེད་ན་ཇི་སྲིད་དུ་མཚམས་ཀྱི་སྣ་དང ། མཚམས་ཀྱི་སྣར་མ་ཕྲད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མཚམས་ཀྱི་སྣ་དང་མཚམས་ཀྱི་སྣར་ཕྲད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་
Ca102a
༄#། །མ་ཚང་ན་ཉེས་པ་སྦོམ་པོར་འགྱུར་རོ། །ཞིང་གི་ས་གཞི་ལ་ཇི་ལྟ་བ་བཞིན་དུ་ཁྱིམ་གྱི་ས་གཞི་དང་ཟོང་གི་ས་གཞི་ཡང་དེ་བཞིན་ནོ། །སྡོམ་ལ། འཆོལ་དང་ལེན་དང་སྲུང་མ་དང ། །ཀླག་ཅོར་ཕ་མ་མདུན་བྱུང་སློང ། །ཡུག་ཆེན་རྒན་གཞོན་རུང་བྱ་དང ། །དྲི་བྱ་སྒེའུ་ཆུང་སྨོད་པའོ། །གང་གི་ཚེ་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་ཐུགས་སུ་ཆུད་ཅིང་བསྟན་པ་རྒྱས་པར་མ་གྱུར་པ་དེའི་ཚེ་ན། དགེ་སློང་དག་སྤ་བཀོང་སླ་ཞིང ། ཁྱིམ་བདག་སྤ་བཀོང་དཀའ་བའི་ཚེ། ཇི་ཙམ་ན་དགེ་སློང་རབ་ཏུ་མང་པོ་དག་ཚོང་པ་དོན་མཐུན་དང་ལྷན་ཅིག་ལྗོངས་རྒྱུར་འདོང་བ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། དེ་དག་གིས་ཚོང་པ་རྣམས་ལ་སྨྲས་པ། བཞིན་བཟང་དག་ཁོ་བོ་ཅག་ལ་ཤོ་གམ་གཞལ་དགོས་པའི་རྫས་ཅུང་ཞིག་ཡོད་པ་དེ་ཤོ་གམ་པ་དག་གིས་ཤོ་གམ་འཇལ་དུ་འཇུག་པར་མི་འགྱུར་བར་རེ་ཞིག་ཤོ་གམ་གྱི་གནས་ནས་ཟློས་ལ་ཕྱིར་བྱིན་ཅིག། ཚོང་པ་དག་གིས་སྨྲས་པ། འཕགས་པ་དག་བཀའ་བཞིན་འཚལ། བཟླ་བར་བགྱིའོ། །ཚོང་པ་དེ་དག་གིས་དགེ་སློང་དེ་དག་གི་ཤོ་གམ་གཞལ་དགོས་པའི་རྫས་དེ་ཤོ་གམ་གྱི་གནས་ནས་བཟླས་ཏེ་བྱིན་ནོ། །དགེ་སློང་དག་མཐར་གྱིས་རྒྱུ་ཞིང་འདོང་བ་ན། གཙུག་ལག་ཁང་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། ཁྱེད་ཅག་ཤོ་གམ་པ་
Ca102b
དག་དང ། ལ་གཅན་པ་དག་དང ། གྲུ་བཙས་གཅོད་པ་དག་གིས་ཡོངས་སུ་གཙེས་པར་མ་གྱུར་ཏམ། དེ་དག་གིས་སྨྲས་པ། ཚ་དང་ལྡན་པ་དག་བདེ་བར་བརྒྱུས་ཏེ། སུས་ཀྱང་ཡོངས་སུ་གཙེས་པར་མ་གྱུར་ཏོ། །ཅི་ཁྱེད་ཅག་གིས་སར་ཕྱིན་པའི་ཤོ་གམ་གཞལ་དགོས་པའི་རྫས་མེད་དམ། དེ་དག་གིས་སྨྲས་པ། བདག་ཅག་ལ་ཤོ་གམ་གཞལ་དགོས་པའི་རྫས་ཡོད་མོད་ཀྱི། འོན་ཀྱང་ཚོང་པ་བཤེས་པ་དག་གིས་ཤོ་གམ་གྱི་གནས་ནས་བཟླས་ཏེ་བྱིན་ནོ། །དགེ་སློང་དེ་དག་གིས་སྨྲས་པ། ཁྱེད་ཅག་གིས་སར་ཕྱིན་པའི་ཤོ་གམ་བཟླར་རུང་ངམ། དེ་དག་གིས་སྨྲས་པ། རུང་ཡང་སྲིད་མི་རུང་ཡང་སྲིད་དེ།་འདི་ལྟར་བདག་ཅག་གིས་ནི་བཟླས་སོ། །དགེ་སློང་དེ་དག་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི། ཡང་དགེ་སློང་གིས་སར་ཕྱིན་པའི་ཤོ་གམ་བཟླར་གཞུག་པར་མི་བྱའོ། །དགེ་སློང་གིས་སར་ཕྱིན་པའི་ཤོ་གམ་བཟླར་འཇུག་པར་བྱེད་ན། འགལ་ཚབས་ཅན་དུ་འགྱུར་རོ། །གང་གི་ཚེ་བཅོམ་ལྡན་འདས་ཀྱིས་ཤར་བའི་ཚལ་གསེབ་ཏུ་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་མ་ག་དྷར་བྱུང་བའི་བྲམ་ཟེ་དང་ཁྱིམ་བདག་འབུམ་ཕྲག་དུ་མ་དག་དང་ལྷན་ཅིག་བདེན་པ་དག་ལ་བཀོད་ནས་མཉན་ཡོད་
Ca103a
༄#། །དུ་གཤེགས་ཏེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་ནས། དེ་གཉིས་ཀྱིས་དགེ་སློང་རྣམས་ལ་གཞོན་ནུའི་ཡོངས་སུ་སྤང་བ་བྱིན་ཞིང ། དགེ་སློང་མ་རྣམས་ལ་བཙུན་མའི་འཁོར་གྱི་ཡོངས་སུ་སྤང་བ་བྱིན་ཞིང ། དགེ་སློང་མ་རྣམས་ལ་ཤོ་གམ་མེད་པ་དང ། ལ་གཅན་མེད་པ་དང ། གྲུ་བཙས་མེད་པར་བཏང་བ་དེའི་ཚེ་ན། བཅོམ་ལྡན་འདས་ཀྱི་བསྟན་པ་རྒྱས་པར་གྱུར་ཏེ། ཁྱིམ་པ་དག་སྤ་བཀོང་སླ་ཞིང་དགེ་སློང་དག་སྤ་བཀོང་དཀའ་བའི་ཚེ། ཇི་ཙམ་དུས་གཞན་ཞིག་ན་དགེ་སློང་རབ་ཏུ་མང་པོ་དག་ཚོང་པ་དོན་མཐུན་དང་ལྷན་ཅིག་ལྗོངས་རྒྱུར་འདོང་བ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། ཚོང་པ་དེ་དག་གིས་དགེ་སློང་རྣམས་ཀྱི་རྐང་པ་གཉིས་ལ་གཏུགས་ཏེ་སྨྲས་པ། འཕགས་པ་དག་བདག་ཅག་གྲང་བ་ན་གྲང་བས་སྦྲེབས་བཞིན་པ་དང ། ཚ་བ་ན་ཚ་བས་གདུངས་བཞིན་པ་དང ། བཀྲེས་པ་དང ། སྐོམ་པ་དག་གིས་གནོད་པ་བཞིན་པ་དང ། ཤ་སྦྲང་དང་སྦྲང་བུ་དང་རླུང་དང་ཉི་མ་དང་སྡིག་སྤྲུལ་གྱི་རེག་པ་དག་གིས་ཉེན་བཞིན་དུ། ལོངས་སྤྱོད་དག་མངོན་པར་བསྒྲུབ་པའི་སླད་དུ་སྤྲོ་བར་བགྱིད། འབད་པར་བགྱིད། རྩོལ་བར་བགྱིད་པ་གང་ལགས་པ་དེ་དག་ཐམས་ཅད་སངས་རྒྱས་དང ། ཆོས་དང ། དགེ་འདུན་ལ་མཆོད་པ་དག་བགྱིའོ་སྙམ་པ་ལགས་པས། དེའི་སླད་དུ་བདག་ཅག་ལ་ཤོ་གམ་གཞལ་འཚལ་བའི་རྫས་མཆིས་པ་
Ca103b
ཤོ་གམ་གྱི་གནས་ནས་བཟླས་ཏེ་སྩལ་བར་རིགས་སོ། །དགེ་སློང་དེ་དག་གིས་སྨྲས་པ། བཞིན་བཟང་དག་འཇལ་གྱིས་བཟླ་བར་བྱའོ། །དགེ་སློང་དེ་དག་གིས་ཚོང་པ་དེ་དག་གི་ཤོ་གམ་གཞལ་དགོས་པའི་རྫས་ཤོ་གམ་གྱི་གནས་ནས་བཟླས་ཏེ་བྱིན་ནོ། །དགེ་སློང་དག་མཐར་གྱིས་རྒྱུ་ཞིང་འདོང་བ་ན། མཉན་ཡོད་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། ཁྱེད་ཅག་ཤོ་གམ་པ་དག་དང ། ལ་གཅན་པ་དག་དང ། གྲུ་བཙས་གཅོད་པ་དག་གིས་ཡོངས་སུ་གཙེས་པར་མ་གྱུར་ཏམ།་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་རེ་ཞིག་གཞན་དག་ཀྱང་དགའ་བར་བྱས་ན། བདག་ཅག་ལྟ་ཅི་སྨོས་ཏེ་སུས་ཀྱང་ཡོངས་སུ་གཙེས་པར་མ་གྱུར་ཏོ། །དགེ་སློང་དེ་དག་གིས་སྨྲས་པ། ཇི་ལྟར་གྱུར། དེ་དག་གིས་སྐབས་དེ་དགེ་སློང་དེ་དག་ལ་རྒྱས་པར་བརྗོད་དོ། །དགེ་སློང་དེ་དག་གིས་སྨྲས་པ། ཁྱེད་ཅག་གིས་སར་ཕྱིན་པའི་ཤོ་གམ་བཟླར་རུང་ངམ། དེ་དག་གིས་སྨྲས་པ། རུང་ཡང་སྲིད་མི་རུང་ཡང་སྲིད་དེ། འདི་ལྟར་བདག་ཅག་གིས་ནི་བཟླས་སོ། །དགེ་སློང་དེ་དག་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་
Ca104a
༄#། །མོད་ཀྱི། ཡང་དགེ་སློང་གིས་སར་ཕྱིན་པའི་ཤོ་གམ་བཟླ་བར་མི་བྱའོ། །དགེ་སློང་གིས་སར་ཕྱིན་པའི་ཤོ་གམ་ཟློ་བར་བྱེད་ན། འགལ་ཚབས་ཅན་དུ་འགྱུར་རོ། ། ཞེས་དེ་ལྟར་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་དོ། །ཇི་ཙམ་དུས་གཞན་ཞིག་ན། དགེ་སློང་རབ་ཏུ་མང་པོ་དག་ཚོང་པ་དོན་མཐུན་དང་ལྷན་ཅིག་ལྗོངས་རྒྱུར་འདོང་བ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། ཚོང་པ་དེ་དག་གིས་དགེ་སློང་རྣམས་ཀྱི་རྐང་པ་གཉིས་ལ་གཏུགས་ཏེ་སྨྲས་པ། འཕགས་པ་དག་བདག་ཅག་གྲང་བ་ན་གྲང་བས་སྦྲེབས་བཞིན་པ་དང ། ཚ་བ་ན་ཚ་བས་གདུངས་བཞིན་པ་དང ། བཀྲེས་པ་དང ། སྐོམ་པ་དག་གིས་གནོད་བཞིན་པ་དང ། ཤ་སྦྲང་དང་སྦྲང་བུ་དང་རླུང་དང་ཉི་མ་དང་སྡིག་སྦྲུལ་གྱི་རེག་པ་དག་གིས་ཉེན་བཞིན་དུ་ལོངས་སྤྱོད་དག་མངོན་པར་བསྒྲུབ་པའི་སླད་དུ་སྤྲོ་བར་བགྱིད། འབད་པར་བགྱིད། རྩོལ་བར་བགྱིད་པ་གང་ལགས་པ་དེ་དག་ཐམས་ཅད་སངས་རྒྱས་དང ། ཆོས་དང ། དགེ་འདུན་ལ་མཆོད་པ་དག་བགྱིའོ་སྙམ་པ་ལགས་པས། དེའི་སླད་དུ་བདག་ཅག་ལ་ཤོ་གམ་གཞལ་འཚལ་བའི་རྫས་མཆིས་པ་ཤོ་གམ་གྱི་གནས་ནས་བཟླས་ཏེ་སྩལ་བར་རིགས་སོ། །དགེ་སློང་དེ་དག་གིས་སྨྲས་པ།་བཞིན་བཟང་དག་བཅོམ་ལྡན་འདས་ཀྱིས་ཡང་དགེ་སློང་གིས་སར་ཕྱིན་པའི་ཤོ་གམ་བཟླ་བར་མི་བྱའོ་ཞེས་བསླབ་པའི་གཞི་བཅའ་བ་མཛད་པས། བདག་ཅག་གིས་བཟླ་བར་མི་བྱའོ། །
Ca104b
ཚོང་པ་རྣམས་ཀྱིས་འཕགས་པ་འདི་དག་ནི་མི་མཐུན་པར་བྱེད་པ་ཡིན་པས་བཟླ་བར་མི་བྱེད་ཀྱིས་ཐབས་ཀྱི་རྣམ་པ་བྱའོ་སྙམ་དུ་ཤེས་ཤིང་རིག་ནས་དེ་དག་གིས་ཕན་ཚུན་གྲོས་བྱས་ཏེ་སྨྲས་པ། འཕགས་པ་དག་དེང་བདག་ཅག་བྲེལ་བས། ཁྱེད་ཅག་ལ་བསོད་སྙོམས་དབུལ་བའི་རྔོ་མི་ཐོག་གིས་བཞུད་ལ་གྲོང་དུ་བསོད་སྙོམས་ལ་འཇུག་པར་མཛོད་ཅིག་།དགེ་སློང་དེ་དག་གྲོང་དུ་བསོད་སྙོམས་ལ་ཞུགས་པ་དང།་ཚོང་པ་དེ་དག་གིས་དགེ་སློང་བསོད་སྙོམས་ལ་ཞུགས་པ་དེ་དག་གི་གཏུར་བུ་དག་དང་ལྷུང་བཟེད་ཀྱི་སྣོད་དག་དང་པར་བུར་སྣོད་དག་ཏུ་ཤོ་གམ་གཞལ་དགོས་པའི་རྫས་བཅུག་གོ་།དགེ་སློང་དག་བསོད་སྙོམས་བརྒྱུས་ནས་གྲོང་ནས་ཕྱིར་བྱུང་སྟེ། དེ་དག་ཟས་ཀྱི་བྱ་བ་བྱས་ནས་གང་གི་ཚེ་ཤོ་གམ་གྱི་གནས་ནས་འདས་པ་དེའི་ཚེ་ཚོང་པ་དེ་དག་གིས་དགེ་སློང་དེ་དག་གི་སྣོད་ལ་ནོམ་པར་བརྩམས་པ་དང ། དགེ་སློང་རྣམས་ཀྱིས་སྨྲས་པ། བཞིན་བཟང་དག་ཁྱེད་ཅིའི་ཕྱིར་ཁོ་བོ་ཅག་གི་སྣོད་དག་ལ་ནོམ་པར་བྱེད། ཚོང་པ་དག་གིས་སྨྲས་པ། འཕགས་པ་དག་བདག་ཅག་གིས་འདིར་ཤོ་གམ་གཞལ་འཚལ་བའི་རྫས་བཅུག་པ་དེ་འབྱིན་ཏོ། །དགེ་སློང་དག་གིས་སྨྲས་པ། བཞིན་བཟང་དག་ཁྱེད་ཀྱིས་ཆེད་དུ་བསམས་ཏེ། ཁོ་བོ་ཅག་ལྟུང་བ་དང་བཅས་པར་བྱས་མོད། ཚོང་པ་དག་གིས་སྨྲས་པ། འཕགས་པ་དག་འདི་ལ་ཁྱེད་ཀྱི་ལུས་ཀྱིས་ལས་ཀྱང་མ་མཆིས། ངག་གི་ལས་ཀྱང་མ་མཆིས་ན། ཇི་ལྟར་ཁྱེད་ཅག་ལྟུང་བ་དང་བཅས་པ་ལགས། དགེ་སློང་དེ་དག་བདག་ཅག་
Ca105a
༄#། །ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེ་དག་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། ཁྱེད་ཅག་ཤོ་གམ་པ་དག་དང་ལ་གཅན་པ་དག་དང་གྲུ་བཙས་གཅོད་པ་དག་གིས་ཡོངས་སུ་གཙེས་པར་མ་གྱུར་ཏམ། དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་དེ་དག་གིས་ཡོངས་སུ་གཙེས་པར་མ་གྱུར་མོད་ཀྱི། འོན་ཀྱང་བདག་ཅག་བསོད་སྙོམས་ལ་ཞུགས་པ་དག་གི་གཏུར་བུ་དག་དང ། ཆོས་གོས་ཀྱི་སྣོད་དག་དང ། བར་བུར་སྣོད་དག་ཏུ་ཚོང་པ་དག་གིས་ཤོ་གམ་གཞལ་དགོས་པའི་རྫས་བཅུག་པ་དེ་བདག་ཅག་གིས་མ་ཤེས་ནས་ཤོ་གམ་གྱི་གནས་ནས་བཟླས་པས། དེའི་ཕྱིར་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་སོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི། ཡང་དགེ་སློང་གིས་སྣོད་དག་ཡལ་བར་བོར་ཏེ། འགྲོ་བར་མི་བྱ་བར་འདི་ལྟར་སྲུང་མ་དགེ་སློང་གཞག་པར་བྱའོ། །དེ་དག་གིས་དགེ་སློང་བཞག་སྟེ་བསོད་སྙོམས་ལ་ཞུགས་པ་ན། དགེ་སློང་དེ་གང་གི་ཚེ་བཤང་བ་དང ། གཅི་བའམ། ཆུ་འཚག་ཏུ་འགྲོ་བ་དེའི་ཚེ། ཚོང་པ་དེ་དག་
Ca105b
གིས་དེ་ཁོ་ན་བཞིན་དུ་ཤོ་གམ་གཞལ་དགོས་པའི་རྫས་དག་གཏུར་བུ་དག་དང ། ལྷུང་བཟེད་ཀྱི་སྣོད་དང ། བར་བུར་སྣོད་དག་ཏུ་འཇུག་པར་བྱེད་ཅིང་དེ་ཁོ་ན་བཞིན་དུ་ཤོ་གམ་གྱི་གནས་ནས་འདས་པ་དང ། དེའི་ཚེ་ཚོང་པ་དག་དགེ་སློང་དེ་དག་གི་སྣོད་དག་ལ་ནོམ་པར་བྱེད་ནས། དགེ་སློང་དག་འགྱོད་པར་གྱུར་པ་ན། དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི། འོན་ཀྱང་སྲུང་མ་དགེ་སློང་གཉིས་གཞག་པར་བྱའོ། །དགེ་སློང་རབ་ཏུ་མང་པོ་དག་ཚོང་པ་དོན་མཐུན་དང་ལྷན་ཅིག་འདོང་བ་ན། སྲུང་མ་དགེ་སློང་གཉིས་བཞག་སྟེ། བསོད་སྙོམས་ལ་ཞུགས་པ་དང ། དེ་གཉིས་ལས་གཅིག་ཇི་སྲིད་དུ་བཤང་བ་དང ། གཅི་བ་དང ། ཆུ་འཚག་ཏུ་སོང་པ་དེ་སྲིད་དུ་ཚོང་པ་དེ་དག་གིས་ཅིག་ཤོས་དེའི་ལག་པ་ལ་འཇུ་བར་བྱེད། རྐང་པ་ལ་འཇུ་བར་བྱེད་ཅིང ། གཞན་གྱིས་སྣོད་དག་ཏུ་འཇུག་པར་བྱེད་དོ། །དགེ་སློང་དེས་ཚངས་པ་མཚུངས་པར་སྤྱོད་པ་ལྷགས་པ་རྣམས་ལ་བརྗོད་པར་བྱའོ་སྙམ་དུ་ཤེས་ནས་དགེ་སློང་དེ་དག་ཀྱང་སྤྱོད་ཡུལ་ནས་ལྷགས་པ་དང ། ཚོང་པ་རྣམས་ཀྱིས་ཇི་ནས་ཀྱང་དགེ་སློང་དེ་གཉིས་ཀྱིས་དགེ་སློང་དེ་དག་ལ་བརྗོད་མི་ནུས་པར་འགྱུར་བ་དེ་ལྟ་བུའི་ཀླག་ཅོར་དག་བྱས་སོ། །དེ་དག་གང་གི་ཚེ་ཤོ་གམ་གྱི་གནས་ནས་འདས་པ་དེའི་ཚེ། སྣོད་དག་ལ་ནོམ་པར་བྱེད་ནས་
Ca106a
༄#། །དགེ་སློང་རྣམས་ཀྱིས་དེ་དག་ལ་སྨྲས་པ། བཞིན་བཟང་དག་ཅིའི་ཕྱིར་སྣོད་དག་ལ་ནོམ་པར་བྱེད། དེ་དག་གིས་སྨྲས་པ། འཕགས་པ་དག་འདིར་བདག་ཅག་གི་ཤོ་གམ་གཞལ་འཚལ་བའི་རྫས་བཅུག་པ་འབྱིན་ཏོ། །དགེ་སློང་རྣམས་ཀྱིས་སྲུང་མའི་དགེ་སློང་དེ་གཉིས་ལ་ཁྱེད་གཉིས་འདིར་བཞག་པ་དག་གིས་ཁོ་བོ་ཅག་ལྟུང་བ་དང་བཅས་པར་བྱས་སོ་ཞེས་གྱོད་རྨས་པ་དང ། དེ་གཉིས་ཀྱིས་བྱུང་བའི་མཐའ་ཇི་ལྟ་བ་བཞིན་དུ་བརྗོད་དོ། །དགེ་སློང་དེ་དག་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེ་དག་གིས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་དག་ལ་ནི་ལྟུང་བ་མེད་མོད་ཀྱི། ཤོ་གམ་གཞལ་དགོས་པའི་རྫས་དེ་ཁྱིམ་པའམ། དགེ་ཚུལ་གྱིས་ཕྱུང་སྟེ་ཚོང་པ་དེ་དག་ལ་ཕྱིར་གཏད་པར་བྱའོ། །ཁྱིམ་པའམ་དགེ་ཚུལ་མེད་ན་རང་ཉིད་ཀྱིས་ཕྱུང་སྟེ། མདུན་དུ་གཞག་པར་བྱ་ཞིང་ཁྱེད་ཀྱི་རྫས་འདི་ཡིན་གྱིས་ཤེས་པར་གྱིས་ཤིག་ཅེས་ཀྱང་བརྗོད་པར་བྱའོ།། །།འདུལ་བ་རྣམ་པར་འབྱེད་པ། བམ་པོ་ལྔ་པ། སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་
Ca106b
དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱད་པར་བྱེད་པ་དེའི་ཆུང་མ་ལས་བུ་བྱུང་ནས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ་ཞེས་བྱ་བའི་བར་དུ་སྔ་མ་བཞིན་ནོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ ། །དེ་ལྗོང་\་LJཱོཎGཥ?\་རྒྱུར་སོང་བས་རས་ཡུག་ཆེན་གཉིས་ཤིག་རྙེད་ནས། དེས་བཅོམ་ལྡན་འདས་ཀྱིས་རབ་ཏུ་བྱུང་བས་ཀྱང་ཕ་མ་དག་ལ་མཁོ་བ་བསྟབ་པར་བྱའོ་ཞེས་གསུངས་པས།་དེའི་ཕྱིར་གཅིག་ནི་ཕ་ལ་དབུལ་ལོ། །ཅིག་ཤོས་ནི་མ་ལ་དབུལ་ལོ་སྙམ་དུ་ཤེས་ནས། དེ་ཇི་དགའ་བར་ལྗོངས་སུ་འདུག་ནས་ལྷུང་བཟེད་དང ། ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་འགྲོ་བ་ན་མཐར་གྱིས་རྒྱུ་ཞིང་འགྲོ་བའི་ཚེ་ཤོ་གམ་གྱི་གནས་སུ་ཕྱིན་པ་དང ། ཤོ་གམ་པས་སྨྲས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མ་མཆིས་སམ། དགེ་སློང་དེས་སྨྲས་པ། བཞིན་བཟང་མེད་དོ། །ཤོ་གམ་པས་སྨྲས་པ། བལྟས་གཞག་ཏུ་གསོལ་ཞེས་དེས་བརྟག་པར་བརྩམས་པ་དང ། ཇི་ཙམ་ན་རས་ཡུག་ཆེན་གཉིས་མཐོང་ནས་དེས་སྨྲས་པ། འཕགས་པ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བས་རས་ཡུག་ཆེན་གཉིས་ཙམ་གྱི་སླད་དུ་བརྫུན་དུ་སྨྲ་བ་གསུང་ངམ། དགེ་སློང་དེས་སྨྲས་པ། བཞིན་བཟང་འདི་གཉིས་ནི་ཁོ་བོ་མི་དབང་
Ca107a
༄#། །ངོ། །འཕགས་པ་འོ་ན་སུ་དབང ། བཞིན་བཟང་གཅིག་ནི་ཕའི་འོ། །ཅིག་ཤོས་ནི་མའི་འོ། །འཕགས་པ་བདག་གིས་ཡབ་ཀྱང་མ་འཚལ། ཡུམ་ཀྱང་མ་འཚལ་གྱིས་ཤོ་གམ་སྩོལ་ལ་བཞུད་ཅིག་།དགེ་སློང་དེ་ཤོ་གམ་པ་དེས་ཡུན་རིང་ཞིག་བསྒྱངས་ཏེ་བཏང་ནས། དེ་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དེ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི།་ཡང་དགེ་སློང་གིས་དེ་བཞིན་དུ་འགྲོ་བར་མི་བྱ་བར་འདི་ལྟར་ཤོ་གམ་པའི་མདུན་དུ་ཕ་མའི་བསྔགས་པ་བརྗོད་པར་བྱ་སྟེ། བཞིན་བཟང་བཅོམ་ལྡན་འདས་ཀྱིས་དགེ་སློང་དག་བུའི་ཕ་མ་སྙོད་པར་བྱེད་པ། གསོ་བར་བྱེད་པ། སྐྱེད་པར་བྱེད་པ། ནུ་མ་སྣུན་པར་བྱེད་པ། འཛམ་བུའི་གླིང་སྣ་ཚོགས་སྟོན་པར་བྱེད་པ་གཉིས་ནི་བྱ་དཀའ་བ་བྱེད་པ་དག་ཡིན་ཏེ། བུས་ཕྲག་པ་གཅིག་གིས་ནི་ཕ། ཅིག་ཤོས་ཀྱིས་ནི་མ་ལོ་བརྒྱ་ཐམ་པར་ཡོངས་སུ་པང་བ་བྱས་སམ། ས་ཆེན་པོ་འདིར་ནོར་བུ་དང ། མུ་ཏིག་དང ། བཻ་ཌཱུརྱ་དང ། མན་ཤེལ་དཀར་པོ་དང ། བྱུ་རུ་དང ། དངུལ་དང ། ས་ལེ་སྦྲམ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་དང ། དེ་ལྟ་བུའི་དབང་ཕྱུག་གི་བདག་པོ་ལ་བཀོད་པར་གྱུར་པ་གང་ཡིན་པ་དེ་ཙམ་གྱིས་ནི་བུས་ཕ་
Ca107b
མ་གཉིས་ལ་བྱས་པ་དང ། ཉེ་བར་བྱས་པར་མི་འགྱུར་གྱི། དེས་ཕ་མ་མ་དད་པ་གཉིས་དད་པ་ཕུན་སུམ་ཚོགས་པ་ཡང་དག་པར་འཛིན་དུ་འཇུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་པ་དང ། ཚུལ་ཁྲིམས་འཆལ་བ་གཉིས་ཚུལ་ཁྲིམས་ཕུན་སུམ་ཚོགས་པ་དང ། སེར་སྣ་ཅན་གཉིས་གཏོང་བ་ཕུན་སུམ་ཚོགས་པ་དང ། ཤེས་རབ་འཆལ་བ་གཉིས་ཤེས་རབ་ཕུན་སུམ་ཚོགས་པ་ཡང་དག་པར་འཛིན་དུ་འཇུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་ན། དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང ། ཉེ་བར་བྱས་པར་འགྱུར་ཞེས་གསུངས་སོ། ། ཞེས་བརྗོད་པར་བྱའོ། །གལ་ཏེ་དེ་ལྟར་ཕ་མ་གཉིས་ཀྱི་བསྔགས་པ་བརྗོད་པ་ན་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཤོ་གམ་གཞལ་ཏེ་འགྲོ་བར་བྱའོ། །དེ་བཞིན་དུ་མི་འགྲོ་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་བརྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་བཙས་ནས་སྲིང་པར་བྱེད་སྐྱེད་པར་བྱེད་ཅིང ། རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །ཞེས་བྱ་བའི་བར་དུ་སྔ་མ་བཞིན་ནོ། །གང་གི་ཚེ་དེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་
Ca108a
༄#། །རབ་ཏུ་བྱུང་ངོ ། །བཅོམ་ལྡན་འདས་ཀྱིས། བསོད་ནམས་དག་ནི་བྱ་བ་སྟེ། །བསོད་ནམས་མ་བྱས་སྡུག་བསྔལ་འགྱུར། །འཇིག་རྟེན་འདི་དང་ཕ་རོལ་ཏུ། །བསོད་ནམས་བྱས་པ་དགའ་བར་འགྱུར། །ཞེས་གསུངས་པ་ཐོས་ནས་དགེ་སློང་དག་གིས་འདུན་པ་ལས་བྱུང་བའི་སློང་མོ་བྱས་ཏེ། སངས་རྒྱས་དང་ཆོས་དང་དགེ་འདུན་དག་ལ་མཆོད་པ་དག་བྱ་བར་བརྩམས་ཤིང།་བཅོམ་ལྡན་འདས་ཀྱི་བསྟན་པ་རྒྱས་པར་གྱུར་པ་ན། དགེ་སློང་དེས་དགེ་སློང་འདུན་པ་ལས་བྱུང་བ་སློང་བ་མང་ཞིང་འདི་དག་ཟད་པར་གྱིས་མཉན་ཡོད་ཁྱབ་པར་འགྱུར་གྱི། བདག་ལྗོངས་སུ་འགྲོ་ཞིང་སོང་ནས་ཡང་དག་པར་སྦྱོར་དུ་གཞུག་གོ་སྙམ་དུ་ཤེས་ནས་དེ་ལྗོངས་སུ་སོང་བ་དང ། དེས་ལྗོངས་དག་ཏུ་སངས་རྒྱས་དང་ཆོས་དང་དགེ་འདུན་གྱི་ཕྱིར་གོས་ཁ་དོག་སྣ་ཚོགས་ཀྱིས་གང་བའི་གཏུར་བུ་གསུམ་ཡང་དག་པར་སྦྱོར་དུ་བཅུག་གོ་།དེ་ལྗོངས་སུ་ཅི་དགར་འདུག་ནས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་ཞིང་འགྲོ་བའི་ཚེ་ཤོ་གམ་གྱི་གནས་སུ་ཕྱིན་པ་དང ། ཤོ་གམ་པས་སྨྲས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མ་མཆིས་སམ། དགེ་སློང་དེས་སྨྲས་པ། བཞིན་བཟང་མེད་དོ། །ཤོ་གམ་པས་སྨྲས་པ།་བལྟས་གཞག་ཏུ་གསོལ་ཞེས་དེས་བརྟག་པར་བརྩམས་པ་དང ། ཇི་ཙམ་ན་གོས་ཁ་དོག་སྣ་ཚོགས་ཀྱིས་གང་བ་གཏུར་བུ་གསུམ་མཐོང་ནས། དེས་སྨྲས་པ། འཕགས་པ་གོས་ཁ་དོག་སྣ་ཚོགས་
Ca108b
ཀྱིས་གང་བའི་གཏུར་བུ་གསུམ་པོ་འདི་དག་ནི་ཉུང་བས། གལ་ཏེ་རྔ་མོའི་ཁལ་ལོངས་པར་གྱུར་ན། དེ་ལྟ་ན་ཁྱོད་ཀྱིས་ཤོ་གམ་གཞལ་དགོས་པར་འགྱུར་རོ། །དགེ་སློང་དེས་སྨྲས་པ། བཞིན་བཟང་འདི་དག་ནི་ཁོ་བོ་མི་དབང་ངོ ། །འཕགས་པ་འོ་ན་སུ་དབང ། བཞིན་བཟང་གཅིག་ནི་སངས་རྒྱས་ཀྱིའོ། །གཅིག་ནི་ཆོས་ཀྱིའོ། །གཅིག་ནི་དགེ་འདུན་གྱིའོ། །འཕགས་པ་བདག་གིས་སངས་རྒྱས་ཀྱང་མ་འཚལ། ཆོས་ཀྱང་མ་འཚལ། དགེ་འདུན་ཀྱང་མ་འཚལ་གྱིས་ཤོ་གམ་སྩལ་ལ་བཞུད་ཅིག་།དགེ་སློང་དེ་ཤོ་གམ་པ་དེས་ཡུན་རིང་ཞིག་བསྒྱངས་ཏེ་བཏང་ནས་དེ་མཐར་གྱིས་མཉན་ཡོད་དུ་ཕྱིན་པ་དང ། དེ་འགྱོད་པ་སྐྱེས་ནས་དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི། ཡང་དགེ་སློང་གིས་དེ་བཞིན་དུ་འགྲོ་བར་མི་བྱ་བར་འདི་ལྟར་ཤོ་གམ་པའི་མདུན་དུ་སངས་རྒྱས་དང་ཆོས་དང་དགེ་འདུན་གྱི་བསྔགས་པ་བརྗོད་པར་བྱ་སྟེ། འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེ་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ནོ། །བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་
Ca109a
༄#། །བ་ལ་དོན་ཡོད་པ། མཁས་པ་རྣམས་ཀྱིས་སོ་སོར་རང་རིག་པར་བྱ་བ་ཡིན་ནོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ། རིགས་པར་ཞུགས་པ། དྲང་པོར་ཞུགས་པ། མཐུན་པར་ཞུགས་པ། ཆོས་ཀྱི་རྗེས་སུ་མཐུན་པའི་ཆོས་ལ་ཞུགས་པ། ཆོས་ཀྱི་རྗེས་སུ་མཐུན་པར་སྤྱོད་པ་སྟེ། དགེ་འདུན་ལ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་རྒྱུན་དུ་ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བ་དག་ཀྱང་ཡོད། དགེ་འདུན་ལ་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ཕྱིར་མི་འོང་བ་དག་ཀྱང་ཡོད། དགེ་འདུན་ལ་དགྲ་བཅོམ་པ་ཉིད་ཀྱི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད་དོ། །དགེ་འདུན་ལ་དགྲ་བཅོམ་པ་དག་ཀྱང་ཡོད་དེ། དེ་ལྟར་དེ་དག་ནི་སྐྱེས་བུ་ཟུང་བཞི་དང ། སྐྱེས་བུ་གང་ཟག་བརྒྱད་ཡིན་ནོ། ། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དེ་ནི་ཚུལ་ཁྲིམས་ཕུན་སུམ་ཚོགས་པ། ཏིང་ངེ་འཛིན་ཕུན་སུམ་ཚོགས་པ། ཤེས་རབ་ཕུན་སུམ་ཚོགས་པ། རྣམ་པར་གྲོལ་བ་ཕུན་སུམ་ཚོགས་པ། རྣམ་པར་གྲོལ་བ་ཤེས་པ་དང་མཐོང་བ་ཕུན་སུམ་ཚོགས་པ། ཀུན་ནས་སྦྱིན་པའི་འོས་སུ་གྱུར་པ། རབ་ཏུ་སྦྱིན་པའི་འོས་སུ་གྱུར་པ། ཐལ་མོ་སྦྱར་བའི་འོས་སུ་གྱུར་པ། ཕྱག་བྱ་བའི་འོས་སུ་གྱུར་པ།
Ca109b
བསོད་ནམས་ཀྱི་ཞིང་བླ་ན་མེད་པ། འཇིག་རྟེན་གྱི་ཡོན་གནས་ཡིན་ནོ་ཞེས་བརྗོད་པར་བྱའོ། །གལ་ཏེ་དེ་ལྟར་སངས་རྒྱས་དང་ཆོས་དང་དགེ་འདུན་གྱི་བསྔགས་པ་བརྗོད་པ་ན་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཤོ་གམ་གཞལ་ཏེ་འགྲོ་བར་བྱའོ། །དེ་བཞིན་དུ་མི་འགྲོ་ན་འགལ་ཚབས་ཅན་དུ་འགྱུར་རོ། །དགེ་སློང་དག་གིས་དཀོན་མཆོག་གསུམ་གྱི་ཕྱིར་ཤོ་གམ་གཞལ་དགོས་པའི་རྫས་བསྐུར་བར་བརྩམས་ཤིང་ཤོ་གམ་གྱི་གནས་སུ་སངས་རྒྱས་དང་ཆོས་དང་དགེ་འདུན་དག་གི་བསྔགས་པ་བརྗོད་པ་ན་མི་གཏོང་ནས། དགེ་སློང་དག་གཅིག་གི་སྐལ་བ་ལས་སྦྱིན་པར་བྱེད་པ་དང ། བཅོམ་ལྡན་འདས་ཀྱིས་བཀའ་སྩལ་པ། གསུམ་ཆར་ལས་ཀྱང་སྤྱིར་སྦྱིན་པར་བྱའོ། །དགེ་སློང་དག་གསུམ་ཆར་ལས་སྤྱིར་སྦྱིན་པར་བྱེད་པ་ན། དོན་མཐུན་དང་ཡོངས་སུ་བྲལ་ནས་དེ་དག་སེང་གེ་དག་དང ། སྟག་དག་དང ། ཆོམ་རྐུན་པ་དག་གིས་བགྲོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གཅིག་གི་ལས་བྱིན་ལ་ཆས་སྐལ་བ་བསབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་སྡེ་སྣོད་གསུམ་དང་ལྡན་པ། ཆོས་སྨྲ་བ་རིག་པ་དང་གྲོལ་བའི་སྤོབས་པ་དང་ལྡན་པ་ཞིག་འདུག་པ་དེ་ལྗོངས་རྒྱུར་སོང་བ་ན་མཐར་གྱིས་རྒྱལ་པོའི་ཁབ་ཏུ་ཕྱིན་ནས་རྒྱལ་པོའི་ཁབ་ཏུ་དབྱར་གནས་ཏེ་ཟླ་བ་གསུམ་འདས་པ་དང་མཉན་ཡོད་དུ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏུ་འཕགས་པ་ན། དོན་མཐུན་
Ca110a
༄#། །བཙལ་བ་དང་ཇི་ཙམ་ན་དེད་དཔོན་ཞིག་གིས་རྒྱལ་པོའི་ཁབ་ནས་ཟོང་བླངས་ཏེ། མཉན་ཡོད་དུ་འཕགས་ནས་དེའི་དྲུང་དུ་སོང་སྟེ་བསོད་ནམས་བྱ་བའི་གཞི་གསུམ་པོ་དག་གི་བསྔགས་པ་བརྗོད་ཅིང་དེ་དག་ལ་བཀོད་ནས་ཅི་ནས་ཀྱང་དེའི་ཚེ་སེམས་མངོན་པར་དད་པར་འགྱུར་བ་དེ་ལྟ་དེ་ལྟར་རྣམ་པར་བཤད་པ་དང ། དེ་དད་པ་སྐྱེས་པས་དགེ་སློང་དེ་ལ་ཟན་བྱིན་ཏེ། རས་ཡུག་ཆེན་རིན་ཆེ་བ་ཆེ་བར་འོས་པས་བཀབ་ནས་དེའི་འོག་ཏུ་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་གིས་ཅི་བགྱི་བ་བཀའ་སྩོལ་ཅིག་།དགེ་སློང་དེས་སྨྲས་པ། བཞིན་བཟང་བདག་མཉན་ཡོད་དུ་སྟོན་པའི་ཞབས་ལ་ཕྱག་འཚལ་དུ་འགྲོ་འདོད་ཀྱིས་དེའི་ཕྱིར་བདག་ལ་བྱམས་པས་བསྐྱང་བ་གྱིས་ཤིག་།ཁྱིམ་བདག་དེས་སྨྲས་པ། འཕགས་པ་བཀའ་བཞིན་འཚལ་མ་ནོངས་ཀྱིས་གཤེགས་སོ། །དགེ་སློང་དེ་དེད་དཔོན་དེ་དང་ལྷན་ཅིག་འཕགས་པ་དང ། དེད་དཔོན་དེས་སྨྲས་པ། འཕགས་པ་ཁྱོད་ནི་བསོད་སྙོམས་བཞེད་པ་ལགས་ལ། བདག་ནི་བསོད་ནམས་འཚལ་བ་ལགས་ཀྱིས། རྒྱལ་པོའི་ཁབ་ནས་མཉན་ཡོད་ཀྱི་བར་ཇི་སྲིད་པར་ཆོས་གོས་དང་བསོད་སྙོམས་དང ། གནས་མལ་དང ། ནད་པའི་རྐྱེན་དང་སྨན་གྱི་ཡོ་བྱད་དག་གིས་ཐུགས་ལས་ཆུང་ངུར་མཛད་དུ་གསོལ། དགེ་སློང་དེས་དང་དུ་བླངས་ནས་ཇི་ཙམ་ན་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། དེད་དཔོན་གྱིས་རྫས་ཤོ་གམ་བཅད་ནས། དེད་དཔོན་དེས་བདག་གི་རྫས་ཤོ་གམ་བཅད་ཅིང །
Ca110b
འཕགས་པའི་རས་ཡུག་ཆེན་ནི་ཤོ་གམ་མ་བཅད་པས་བདག་ཁོ་ནས་ཤོ་གམ་གཞལ་དགོས་པར་འགྱུར་བའི་གནས་དེ་ལྟ་བུ་ཡོད་པས་བདག་ཉིད་ཀྱི་སྣོད་དུ་གཞུག་པར་བྱའོ་སྙམ་དུ་ཤེས་ནས། དེད་དཔོན་དེས་དགེ་སློང་དེ་ལ་སྨྲས་པ། འཕགས་པ་རས་ཡུག་ཆེན་སླར་སྩོལ་ཅིག་།དགེ་སློང་དེས་སྨྲས་པ། བཞིན་བཟང་ཅི་ཟེར། ཁྱོད་འགྱོད་པ་སྐྱེས་པར་མ་གྱུར་ཏམ། དེད་དཔོན་གྱིས་སྨྲས་པ། འཕགས་པ་བདག་ལ་འགྱོད་པ་མ་མཆིས་ཏེ། འདི་ལྟར་བདག་གི་རྫས་ནི་ཤོ་གམ་བཀུམ་ལ་ཁྱོད་ཀྱི་རས་ཡུག་ཆེན་འདི་ནི་ཤོ་གམ་མ་བཀུམ་པས་གལ་ཏེ་ཤོ་གམ་པ་དག་རས་ཡུག་ཆེན་གྱི་ཤོ་གམ་འཚལ་ན། དོན་གྱིས་བདག་ཁོ་ནས་གཞལ་བར་བགྱི་བ་ལགས་པས། ཤོ་གམ་གྱི་གནས་ནས་བཟླས་ཏེ་དབུལ་བར་བགྱིའོ། །དགེ་སློང་དེས་སྨྲས་པ། བཞིན་བཟང་བཅོམ་ལྡན་འདས་ཀྱིས་དགེ་སློང་གིས་ཤོ་གམ་གཞལ་དགོས་པའི་རྫས་ཤོ་གམ་གྱི་གནས་ནས་བཟླ་བར་མི་བྱའོ་ཞེས་བསླབ་གཞི་བཅའ་བ་མཛད་པས་བདག་ལྟུང་བ་དང་བཅས་པར་གྱུར་ན་མི་རུང་བས། མི་སྦྱིན་ནོ། །དེད་དཔོན་དེས་འཕགས་པ་དག་ནི་མི་མཐུན་པ་བྱེད་པ་ཡིན་པས། འདི་ལ་བདག་གིས་དུས་ཤེས་པར་འགྱུར་རོ་སྙམ་དུ་ཤེས་ནས། དེད་དཔོན་དེས་དགེ་སློང་དེ་ལ་སྨྲས་པ། འཕགས་པ་དེས་བདག་བྲེལ་བས་ཁྱོད་ཀྱི་བསོད་སྙོམས་འགའ་ཡང་སྒྲུབ་པར་རྔོ་མི་ཐོག་གིས་བཞུད་ལ་གྲོང་དུ་བསོད་སྙོམས་ལ་འཇུག་པར་མཛོད་ཅིག་།དགེ་སློང་དེ་བསོད་སྙོམས་ལ་ཞུགས་པ་དང ། ཇི་སྲིད་དུ་དེ་ཞུགས་པ་དེའི་བར་དུ་དེད་དཔོན་དེས་རས་ཡུག་
Ca111a
༄#། །ཆེན་དེ་བདག་ཉིད་ཀྱི་སྣོད་དུ་བཅུག་གོ་།ཇི་ཙམ་ན་དགེ་སློང་དེ་ལ་ཤོ་གམ་པས་དྲིས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ། དགེ་སློང་དེས་སྨྲས་པ། བཞིན་བཟང་རས་ཡུག་ཆེན་གཅིག་ཡོད་དོ། །ཤོ་གམ་པས་སྨྲས་པ། འཕགས་པ་བལྟས་གཞག་ཏུ་གསོལ། དགེ་སློང་དེས་གཏུར་བུར་བརྟགས་པ་དང ། རས་ཡུག་ཆེན་མི་སྣང་ནས་དེ་བཞིན་བསྒྱུར་ཞིང་ལག་པ་གཉིས་འདྲིལ་བར་བྱེད་དོ། །ཤོ་གམ་པས་སྨྲས་པ། འཕགས་པ་ཅིའི་སླད་དུ་འདི་ལྟར་མཛད། དགེ་སློང་དེས་སྨྲས་པ། བཞིན་བཟང་ཁོ་བོའི་རས་ཡུག་ཆེན་དེ་མ་བྱིན་པར་ལེན་པ་དག་གིས་བརྐུས་སོ། །ཤོ་གམ་པས་སྨྲས་པ། འཕགས་པ་དེ་ནི་ཁྱོད་ཀྱིས་མ་བརྐུས་ཀྱི་འདི་ལྟར་བདག་གིས་བརྐུས་པ་ལགས་ཏེ། དེས་ན་བདག་གིས་ཤོ་གམ་མ་ཐོབ་བོ། །གང་གི་ཚེ་དགེ་སློང་དེ་ཤོ་གམ་གྱི་གནས་ནས་འདས་པ་དེའི་ཚེ་དེད་དཔོན་དེས་སྨྲས་པ། འཕགས་པ་ཅིའི་སླད་དུ་སེམས་ཁོང་དུ་ཆུད། བཞིན་བཟང་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་སྐྱེས་མོད་ཀྱི། ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ནི་མ་སྐྱེས་སོ། །འཕགས་པ་ཅིའི་སླད་དུ། ཁོ་བོའི་རས་ཡུག་ཆེན་དེ་མ་བྱིན་པར་ལེན་པ་དག་གིས་བརྐུས་སོ། །དེད་དཔོན་དེས་སྨྲས་པ། འཕགས་པ་དེ་ནི་མ་བྱིན་པར་ལེན་པར་ལེན་པ་དག་གིས་མ་བརྐུས་ཏེ། འདི་ལྟར་བདག་གིས་ཤོ་གམ་གྱིས་འཇིགས་པས་རང་གི་སྣོད་དུ་སྩལ་ཏེ། འཚལ་ཏེ་མཆིས་ན་ཇི་ལྟར་བགྱི།
Ca111b
དབུལ་ལམ། དགེ་སློང་དེས་སྨྲས་པ། བཞིན་བཟང་བདག་ལ་མ་བྱིན་པར་ལེན་པ་དག་གིས་བརྐུས་པ་ནི་ལེགས་ཀྱི། བདག་ལྟུང་བ་དང་བཅས་པར་གྱུར་པ་ནི་མ་ལེགས་སོ། །འཕགས་པ་འདི་ལ་ཁྱོད་ཀྱི་ལུས་ཀྱི་ལས་ཀྱང་མ་མཆིས། ངག་གི་ལས་ཀྱང་མ་མཆིས་ན། ཅིའི་སླད་དུ་ཁྱོད་ལྟུང་བ་དང་བཅས་པར་འགྱུར། དགེ་སློང་དེ་འགྱོད་པ་སྐྱེས་ནས་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དགེ་སློང་དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི། འོན་ཀྱང་ངས་དགེ་སློང་ལམ་དུ་ཞུགས་པའི་ཀུན་ཏུ་སྤྱད་པའི་ཆོས་དག་བཅའ་བར་བྱ་སྟེ། དགེ་སློང་ལམ་དུ་ཞུགས་པ་གྲོང་དུ་བསོད་སྙོམས་ལ་འཇུག་པས་སྣོད་ལ་མཚན་མ་བཏབ་སྟེ་འགྲོ་བར་བྱ་ཞིང ། ཕྱིར་འོངས་ནས་ཀྱང་སོ་སོར་བརྟག་པར་བྱའོ།། དགེ་སློང་ལམ་དུ་ཞུགས་པས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྒན་པོ་ཞིག་དང་གཞོན་ནུ་ཞིག་ལྗོངས་རྒྱུར་འཕགས་སོ། །དེ་ན་རྒན་པོ་ནི་ཤེས་པ་ཆེ་བ། རྫས་
Ca112a
༄#། །མང་བ་ཡོ་བྱད་མང་བ་ཡིན་ལ། གཞོན་ནུ་ནི་ཤེས་པ་ཆུང་བ། ཆོས་གོས་གསུམ་ལ་འཆེལ་བ་ཡིན་པས་རྒན་པོ་ལ་ཤོ་གམ་གཞལ་དགོས་པའི་རྫས་ཡོད་ནས་ཇི་ཙམ་ན་མཐར་གྱིས་ཤོ་གམ་གྱི་གནས་ཀྱི་དྲུང་དུ་ཕྱིན་པ་དང ། རྒན་པོས་བདག་ལ་ཤོ་གམ་གཞལ་དགོས་པའི་རྫས་ཡོད་པས་གལ་ཏེ་ཤོ་གམ་པ་དག་འཕགས་པ་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ་ཞེས་འདྲི་ན་གལ་ཏེ་མེད་དོ་ཞེས་བརྗོད་ན་ནི་བརྫུན་དུ་སྨྲ་བར་འགྱུར་ལ། གལ་ཏེ་ཡོད་དོ་ཞེས་བརྗོད་ན་ནི་ངེས་པར་ཤོ་གམ་གཞལ་དགོས་པར་འགྱུར་པས། དེའི་ཕྱིར་གང་གིས་ཤོ་གམ་ཡང་གཞལ་མི་དགོས་ལ་བརྫུན་དུ་སྨྲ་བར་ཡང་མི་འགྱུར་བའི་ཐབས་ཅི་ཡོད་སྙམ་དུ་ཤེས་ནས་དེ་འདི་སྙམ་དུ་སེམས་ཏེ། གཞོན་ནུ་འདི་ལ་སྦྱིན་ཞིང་ཤོ་གམ་གྱི་གནས་ནས་འདས་ན་བླང་བར་བྱའོ་སྙམ་ནས། དེས་གཞོན་ནུ་དེ་ལ་སྨྲས་པ། ཚེ་དང་ལྡན་པ་རེ་ཞིག་ཡུད་ཙམ་ཞིག་ལྷུང་བཟེད་དང་ཆོས་གོས་ལོང་ཞིག་།གཞོན་ནུ་དེས་གནས་བརྟན་ངལ་བར་གྱུར་པས་དེས་ན་བདག་ལ་སྦྱིན་གོར་མ་ཆག་སྙམ་དུ་ཤེས་ནས། དེས་བླངས་ཤིང་དེས་དེ་ཁྱེར་ཏེ་མདུན་དུ་འཕགས་པ་དང ། ཤོ་གམ་པས་མཐོང་ནས་དེས་སྨྲས་པ། འཕགས་པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ། དགེ་སློང་དེས་སྨྲས་པ། བཞིན་བཟང་མེད་དོ། །ཤོ་གམ་པ་དེས་དགེ་སློང་དེ་ཡལ་བར་བོར་ནས། ཤོ་གམ་གྱི་གནས་ནས་འདས་པ་དང ། རྒན་
Ca112b
པོ་ཡང་སྟོང་པར་འབྲང་ཞིང་འོངས་ནས་ཤོ་གམ་པ་དེས་རྒན་པོ་དེ་ལ་ནི་མ་དྲིས་སོ། །རྒན་པོ་དེ་གང་གི་ཚེ་ཤོ་གམ་གྱི་གནས་ནས་འདས་པ་དེའི་ཚེ་སྨྲས་པ། ཚེ་དང་ལྡན་པ་རྫས་ཁྱེར་ཤོག་།གཞོན་ནུ་སྨྲས་པ། གནས་བརྟན་ཅི་ལགས། བསྙེལ་བ་སོས་ལགས་སམ། རྒན་པོས་སྨྲས་པ། ཚེ་དང་ལྡན་པ་ཁོ་བོ་ངལ་བས་ཁྱོད་ལ་བྱིན་པ་ནི་མ་ཡིན་གྱི་འདི་ལྟར་ཁོ་བོ་ལ་ཤོ་གམ་གཞལ་དགོས་པའི་རྫས་ཡོད་པས་གལ་ཏེ་ཁོ་བོ་ལ་ཤོ་གམ་པ་འཕགས་པ་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ་ཞེས་འདྲི་ན་གལ་ཏེ་མེད་དོ་ཞེས་བརྗོད་ན་ནི་བརྫུན་དུ་སྨྲ་བར་འགྱུར་ལ། གལ་ཏེ་ཡོད་དོ་ཞེས་བརྗོད་ན་ནི་ངེས་པར་ཤོ་གམ་གཞལ་དགོས་པར་འགྱུར་རོ་སྙམ་པའི་བློ་སྐྱེས་པས་དེའི་ཕྱིར་ཁོ་བོས་ལྷུང་བཟེད་དང་ཆོས་གོས་བྱིན་པ་ཡིན་པས་དེ་ནི་ཤོ་གམ་གྱི་གནས་ལས་འདས་པས་དེས་ན་ཡང་ཕྱིར་ལེན་ཏོ། །གཞོན་ནུས་སྨྲས་པ། དེ་ལྟ་ན་གནས་བརྟན་གྱིས་བདག་ཉིད་ཐར་པར་མཛད་ལ་ངན་བུ་ནི་ལྟུང་བ་དང་བཅས་པར་བགྱིས་སོ། །རྒན་པོས་སྨྲས་པ། ཚེ་དང་ལྡན་པ་ཁྱོད་ཀྱིས་མི་ཤེས་པས་འདི་ལ་ཁྱོད་ཀྱིས་ལྟུང་བ་ཅི་ཞིག་ཡོད། དགེ་སློང་གཞོན་ནུ་དེ་འགྱོད་པ་སྐྱེས་ནས་མཐར་གྱིས་མཉན་ཡོད་དུ་ཕྱིར་ཕྱིན་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དགེ་སློང་དེས་སྨྲས་པ། འདིར་ག་ལ་བདེ་བར་བརྒྱུས། དགེ་སློང་རྣམས་ཀྱིས་སྨྲས་པ་ཚེ་དང་ལྡན་པ་ཅིའི་ཕྱིར་དེ་སྐད་ཟེར།
Ca113a
༄#། །དགེ་སློང་དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི། ཡང་དགེ་སློང་ལམ་དུ་ཞུགས་པས་མ་དྲིས་པར་རྫས་བླང་བར་མི་བྱ་བར་ལེན་པ་ཉིད་ན་འདི་ན་ཤོ་གམ་གཞལ་དགོས་པའི་རྫས་ཅུང་ཟད་མེད་དམ་ཞེས་དྲི་བར་བྱ་བའོ། །མ་དྲིས་པར་ལེན་ན་འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་ཤོ་གམ་གཞལ་དགོས་པའི་རྫས་ལམ་དུ་བཟླ་བར་མི་བྱའོ། །ཟློ་བར་བྱེད་ན་འགལ་ཚབས་ཅན་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ཤོ་ག་མ་གཞལ་དགོས་པའི་རྫས་ལམ་དུ་བཟླ་བར་མི་བྱའོ་ཞེས་བཀའ་སྩལ་པ་ན། དགེ་སློང་དྲུག་ཅུ་ལྗོངས་རྒྱུ་ཞིང་འདོང་བའི་ཚེ།་རི་བྲགས་ཤིག་ཏུ་ཕྱིན་པ་དང ། རི་བྲགས་དེ་ན་ཁྱིམ་བདག་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་འདུག་ཅིང་དེ་ཡང་དད་པ་དང་ལྡན་པ་ཡིན་པས་དེས་དགེ་སློང་དེ་དག་མགྲོན་དུ་བོས་ཏེ།་ཟས་བྱིན་ནས་རེ་རེ་ལ་གོས་ཕྲུགས་རེ་བསྐོན་པར་བྱས་པ་དང ། དགེ་སློང་རྣམས་ཀྱིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་ཤོ་གམ་གཞལ་དགོས་པའི་རྫས་ལམ་དུ་བཟླ་བར་མི་བྱའོ་ཞེས་དགག་པ་མཛད་པས། དེའི་ཕྱིར་བདག་ཅག་གིས་ཇི་ལྟར་བླང་བར་བྱ། ཁྱིམ་བདག་དེ་ཅང་མི་སྨྲ་བར་འདུག་པ་དང ། དགེ་སློང་རྣམས་ཀྱི་ཡོན་བཤད་པ་བྱས་ཏེ། དོང་ནས་མཐར་
Ca113b
གྱིས་མཉན་ཡོད་དུ་ཕྱིར་ཕྱིན་པ་དང ། དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དེ་དག་གིས་སྨྲས་པ། བདེ་བར་བརྒྱུས་མོད་ཀྱི། འོན་ཀྱང་ཁྱིམ་བདག་གཅིག་གིས་བདག་ཅག་ལ་ཟན་བྱིན་ཏེ་གོས་ཕྲུགས་རེ་བསྐོན་པར་བྱས་ན། དེ་ལ་བདག་ཅག་གིས་ཁྱིམ་བདག་བཅོམ་ལྡན་འདས་ཀྱིས་དགེ་སློང་གིས་ཤོ་གམ་གཞལ་དགོས་པའི་རྫས་ལམ་དུ་བཟླ་བར་མི་བྱའོ་ཞེས་དགག་པ་མཛད་པས། དེའི་ཕྱིར་བདག་ཅག་གིས་ཇི་ལྟར་བླང་བར་བྱ་ཞེས་མ་བླངས་སོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་རུང་བར་བྱ་སྟེ། ལམ་དུ་བཟླ་བར་བྱའོ། །དགེ་སློང་དག་ཚོན་རྩི་དང་ཤིང་དང་ཟངས་དང་བུམ་པ་དག་ཚོལ་བ་ན་ལམ་གྱིས་དུབ་ཅིང་སྒྱིད་ལུག་པ་དང་དོན་མཐུན་དང་བྲལ་བར་གྱུར་ནས། དེ་དག་སེང་གེ་དང ། སྟག་དག་དང ། ཚོམ་རྐུན་པ་དག་གིས་བགྲོད་པར་གྱུར་ཏོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། མཐའ་ཆག་གམ་རང་ཆག་བྱས་ཏེ་འགྲོ་བར་བྱའོ། །ཉེས་དམིགས་དེ་ཉིད་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། བ་ལང་གི་ལྕི་བ་བཙིར་བས་རུང་བར་བྱ་བའམ་བཀྲུ་བར་བྱའོ། །དེ་ལྟ་ནའང་ཉེས་དམིགས་དེ་ཉིད་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཐ་ན་ཁ་ཚར་རམ་
Ca114a
༄#། །ཕུན་ཚར་ཡང་གཅད་པར་བྱའོ། །ངས་ཕོངས་པ་དག་ཏུ་རྗེས་སུ་གནང་བ་གང་ཡིན་པ་དེ་གནས་སྐབས་ཐ་མལ་པ་དག་ཏུ་ལྷག་པར་སྤྱད་པར་མི་བྱའོ། །ལྷག་པར་སྤྱོད་པར་ཕྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་ཞིག་རྒྱལ་པོའི་ཁབ་ཏུ་དབྱར་གནས་པར་ཁས་བླངས་ནས། དེ་དབྱར་ཟླ་བ་གསུམ་འདས་ནས་ཆོས་གོས་མ་རྙེད་པ་ཁོ་ནར་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་འཕགས་པ་དང།་དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཆོས་གོས་ཀྱིས་རྙེད་པ་མ་ཐོབ་ཀྱི་བར་དུ་ཁྱོད་མ་རིངས་ཤིག་།དེ་མངོན་པར་མི་དགའ་བས་མི་སྡོད་པ་དང ། དེ་ལ་དགེ་སློང་ཞིག་གིས་རས་ཡུག་ཆེན་བྱིན་ནས། དེས་གལ་ཏེ་འདི་རུང་བར་བྱེད་ན་ཚངས་པ་མཚུངས་པར་སྤྱོད་པ་དག་མི་མཐོང་བར་འགྱུར་བས་དགེ་སློང་བཤེས་པ་ཞིག་ལ་རུང་བར་བྱེད་དུ་གཞུག་གོ་སྙམ་དུ་ཤེས་ནས་དེས་དགེ་སློང་བཤེས་པ་ལ་སྨྲས་པ། ཁོ་བོ་ཚངས་པ་མཚུངས་པར་སྤྱོད་པ་དག་ལ་ལྟ་བའི་བར་དུ་རས་ཡུག་ཆེན་འདི་རུང་བར་གྱིས་ལ་གཏུར་བུར་ཆུག་ཅིག་།དེ་ལེ་ལོ་ཅན་ཞིག་པས་དེས་རུང་བར་མ་བྱས་པ་ཁོ་ནར་གཏུར་བུར་བཅུག་གོ་།ཇི་ཙམ་ན་དགེ་སློང་དེས་གཏོར་བུ་ཐོགས་ཏེ་འཕགས་ནས། མཐར་གྱིས་ཤོ་གམ་གྱི་གནས་སུ་ཕྱིན་པ་དང ། ཤོ་གམ་པས་སྨྲས་པ། འཕགས་
Ca114b
པ་ཁྱོད་ལ་ཤོ་གམ་གཞལ་འཚལ་བའི་རྫས་ཅུང་ཟད་མཆིས་སམ། བཞིན་བཟང་མེད་དོ། །བལྟས་གཞག་ཏུ་གསོལ། དེས་བཞག་ནས་དེས་བརྟག་པར་བརྩམས་པ་དང་རས་ཡུག་ཆེན་མཐོང་ནས་དེས་སྨྲས་པ། འཕགས་པ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ན་ཇི་ལྟར་རས་ཡུག་ཆེན་གྱི་སླད་དུ་བརྫུན་དུ་སྨྲ་བ་གསུང ། དགེ་སློང་དེས་སྨྲས་པ། བཞིན་བཟང་ཁོ་བོས་མི་ཤེས་ཏེ་ཁོ་བོ་འཕགས་པ་ན་རས་ཡུག་ཆེན་འདི་རྙེད་ནས་ཁོ་བོས་བཤེས་པ་ལ་ཁོ་བོ་ཚངས་པ་མཚུངས་པར་སྤྱོད་པ་དག་ལ་ལྟ་བའི་བར་དུ་རས་ཡུག་ཆེན་འདི་རུང་བར་གྱིས་ལ་གཏུར་བུར་ཆུག་ཅིག་ཅེས་སྨྲས་ནས། དེ་ལེ་ལོ་ཅན་ཞིག་པས་དེས་འདི་རུང་བར་མ་བྱས་པ་ཁོ་ནར་གཏུར་བུར་བཅུག་གོ་།ཤོ་གམ་པས་སྨྲས་པ། འཕགས་པ་དེ་ནི་ཁྱོད་ཀྱི་བཤེས་པ་མ་ལགས་ཀྱི་འདི་ལྟར་དེ་ནི་བདག་གི་བཤེས་པ་ལགས་ཏེ་དེས་ན་བདག་ལ་ཤོ་གམ་བྱུང་གིས་སྩོལ་ལ་བཞུད་ཅིག་།དགེ་སློང་དེ་འགྱོད་པ་སྐྱེས་ནས་དེ་མཐར་གྱིས་མཉན་ཡོད་དུ་ཕྱིན་པ་དང ། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དེས་སྨྲས་པ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། དེ་དག་གིས་སྨྲས་པ། ཚེ་དང་ལྡན་པ་ཅིའི་ཕྱིར་དེ་སྐད་ཟེར། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་
Ca115a
༄#། །མོད་ཀྱི། ཡང་དགེ་སློང་གིས་མ་དྲིས་པར་བླང་བར་མི་བྱ་བར་ཅི་ཁྱོད་ཀྱིས་རུང་བར་བྱས་སམ། འོན་ཏེ་མ་བྱས་ཞེས་དྲི་བར་བྱའོ། །མ་དྲིས་པར་ལེན་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུ་ཞག་གིས་བསྐུས་ཏེ། འགྲོ་ན་ཡང་འགྲོ་བར་ཆས་པའི་རྙེད་པ་སྒྲུབ་པར་བྱེད། འོང་ན་ཡང་གློ་བུར་དུ་འོངས་པའི་རྙེད་པ་སྒྲུབ་པར་བྱེད་ཅིང་སྐྱེ་བོ་མང་པོ་དགའ་བ་དང ། ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང ། གང་ནས་ཀྱང་མི་འོང་བས་རྙེད་པ་འཐོབ་པ་དང་སྐྱེ་བོ་མང་པོ་དགའ་བ་དང ། ཡིད་དུ་འོང་བར་ག་ལ་འགྱུར་གྱིས་ཡུ་བུ་ཅག་ཀྱང་འདོང་ངོ ། །གང་དུ་འདོང ། གང་དུ་དོན་མཐུན་འགྲུབ་པར་རོ། །དེ་དག་གིས་དོན་མཐུན་བཙལ་བར་བརྩམས་པ་དང ། དེ་དག་གིས་བྱང་ལམ་དུ་འགྲོ་བའི་དོན་མཐུན་མཐོང་ནས་དེའི་དྲུང་དུ་སོང་སྟེ་སྨྲས་པ། བཞིན་བཟང་དག་ཁྱེད་གང་དུ་འཕགས། འཕགས་པ་དག་བྱང་ལམ་དུའོ། །བཞིན་བཟང་ཁོ་བོ་ཅག་ཀྱང་ཁྱེད་དང་ལྷན་ཅིག་འདོང་ངོ ། ། འཕགས་པ་དག་བྱང་ལམ་ནི་མཐོ་དམན་ཅན་ཁྱི་ཟ་བ་བུད་མེད་ཀྱི་ཡུལ་གནས་ངན་ལེན་ཀུན་ཏུ་སྤྱོད་པ་ལགས་པས། ཁྱེད་ཅག་དེར་དགེས་པར་མི་འགྱུར་རོ། །བཞིན་བཟང་དག་གལ་ཏེ་དེ་
Ca115b
ལྟ་བུ་ཡིན་དུ་ཟིན་ཀྱང་ཡུལ་མཐོང་བར་འགྱུར་བས་འདོང་བར་བྱའོ། །འཕགས་པ་དག་གལ་ཏེ་དེ་ལྟ་ན་ཚུར་སྤྱོན་བཞུད་དོ། །དྲུག་སྡེ་དག་དོན་མཐུན་དེ་དང་ལྷན་ཅིག་བྱང་ལམ་དུ་འཕགས་ནས་མཐར་གྱིས་བྱང་ལམ་དུ་ཕྱིན་པ་དང ། ཉི་མ་གང་ཁོ་ན་ལ་བྱང་ལམ་དུ་ཕྱིན་པའི་ཉི་མ་དེ་ཉིད་ལ་མངོན་པར་མི་དགའ་བར་གྱུར་ནས། དེ་དག་ནང་པར་སྔར་ལངས་ཏེ་ལམ་སྲང་དུ་འདོང་བ་དང ། ཚོང་པ་དེ་དག་གིས་དྲུག་སྡེ་དག་མཐོང་ནས་དེ་དག་གི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་བྱང་ལམ་ཅི་འདྲ། ཁྱེད་ཅག་མངོན་པར་མི་དགེས་པར་མ་གྱུར་ཏམ། བཞིན་བཟང་དག་ཉི་མ་གང་ཁོ་ན་ལ་བྱང་ལམ་དུ་ཕྱིན་པའི་ཉི་མ་དེ་ཉིད་ལ་མངོན་པར་མི་དགའ་བར་གྱུར་ཏོ། །འཕགས་པ་དག་བདག་ཅག་གིས། ཁྱེད་ལ་དང་པོ་ཁོ་ན་ནས་བྱང་ལམ་ནི་མཐོན་དམན་ཅན་ཁྱི་ཟ་བ་བུད་མེད་ཀྱི་ཡུལ་གནས་ངན་ལེན་ཀུན་ཏུ་སྤྱོད་པ་ལགས་པས། ཁྱེད་ཅག་དེར་དགེས་པར་མི་འགྱུར་རོ་ཞེས་མ་བགྱིས་སམ། བཞིན་བཟང་དག་ཅི་དེ་ལྟ་ན་འགྲོའམ་འདོང་ངོ ། །འཕགས་པ་དག་བདག་ཅག་གིས་ཟོང་མ་བསྒྱུར་ཏེ།་དེ་ལྟ་ལགས་མོད་ཀྱི་འོན་ཀྱང་བདག་ཅག་དང་བཤེས་པའི་ཚོང་པ་གཞན་དག་མཆིས་པ་དེ་དག་གིས་ཟོང་བསྒྱུར་པས། དེ་དག་ལ་གཏད་པར་བགྱིས། དེ་དག་དང་ཐབས་ཅིག་བཞུད་ཅིག་།དྲུག་སྡེ་དག་གིས་སྨྲས་པ་དེ་མ་ནོངས་ཀྱི་དེ་བཞིན་བགྱིའོ། །དྲུག་སྡེ་དག་དོན་མཐུན་དེ་དག་གིས་གཏད་པའི་དོན་མཐུན་དེ་དང་ལྷན་ཅིག་འཕགས་སོ། །དྲུག་སྡེ་དག་གིས་ཀུན་ཏུ་སྤྱོད་པ་ནི་རྡུལ་གྱིས་འཇིགས་པས་
Ca116a
༄#། །ཡང་ན་ནི་དོན་མཐུན་གྱི་མདུན་དུ་འགྲོའོ། །ཡང་ན་ནི་ཕྱི་ནས་འགྲོ་བས་དེ་དག་ཕྱི་ནས་འགྲོ་བར་བརྩམས་པ་དང ། ཇི་ཙམ་ན་ཡུལ་དབུས་ནས་ཕྱིར་འོང་བའི་དོན་མཐུན་འོངས་ནས་ཚོང་པ་དེ་དག་གིས་ཚོང་པ་དོན་མཐུན་ཕྱིར་འོངས་པ་དེ་དག་ལ་འོངས་པ་ལེགས་སོ་ཞེས་བརྗོད་པས་སོ་སོར་ཡང་དག་པར་དགའ་བར་བྱས་ཏེ་སྨྲས་པ། ཁྱེད་ག་ལས་འོངས། ཡུལ་དབུས་ནས་སོ། །ཤེས་ལྡན་དག་ཇི་ལྟར་ཡུལ་དབུས་སུ་ཁེ་སྤོགས་མང་པོ་གྲུབ་བམ། ཤོ་གམ་མམ་ལ་གཅན་ནམ་གྲུ་བཙས་ཀྱིས་ཡོངས་སུ་ཡི་ཆད་པ་མེད་དམ། དེ་དག་གིས་སྨྲས་པ། ཤེས་ལྡན་དག་ཡུལ་དབུས་སུ་ཁེ་སྤོགས་མང་པོ་གྲུབ་མོད་ཀྱི་འོན་ཀྱང་དེ་ན་གོས་དཀར་པོ་ཅན་ཆོམ་རྐུན་པ་ལྟ་བུ་ཤོ་གམ་དང་ལ་གཅན་དང་གྲུ་བཙས་ཀྱི་ལྕེ་རྟེན་གྱིས་བདེན་པས་མི་མགུ་བ་དག་འཁོད་པས་རྫས་ཐམས་ཅད་འཕྲོག་པར་བྱེད་པས་ཤོ་གམ་དང་ལ་གཅན་དང་གྲུ་བཙས་ཀྱིས་ཡོངས་སུ་ཡི་ཆད་པ་ཡོད་དོ། །དེ་དག་གིས་ཐོས་ནས་འཚེར་ཞིང་ཕྱོགས་གཅིག་ཏུ་དོང་ནས་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འཁོད་དོ། །དྲུག་སྡེ་དག་ལྷག་ནས་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་།ཚོང་པ་དག་གིས་སྨྲས་པ། འཕགས་པ་དག་བདག་ཅག་གྲང་བ་ན་གྲང་བས་སྦྲེབས་བཞིན་པ་དང ། ཚ་བ་ན་ཚ་བས་གདུང་བཞིན་པ་དང ། བཀྲེས་པ་དང་སྐོམ་པ་དག་གིས་གནོད་བཞིན་པ་དང ། ཤ་སྦྲང་དང་སྦྲང་བུ་དང་རླུང་དང་
Ca116b
ཉི་མ་དང་སྡིག་སྦྲུལ་གྱི་རེག་བ་དག་གིས་ཉེན་བཞིན་དུ་ལོངས་སྤྱོད་དག་མངོན་པར་སྒྲུབ་པའི་སླད་དུ་སྤྲོ་བར་བགྱིད། འབད་པར་བགྱིད། རྩོལ་པར་བགྱིད་པ་གང་ལགས་པ་དེ་དག་ཐམས་ཅད་བདག་ཅག་ཡུལ་དབུས་སུ་འཕགས་པ་ལགས་ཏེ་ཡུལ་དབུས་སུ་ཁེ་སྤོགས་མང་པོ་འགྲུབ་པ་ལགས་མོད་ཀྱི། འོན་ཀྱང་བདག་ཅག་གི་དོན་མཐུན་སླར་མཆི་བ་དག་ལས་ཐོས་ན། དེ་ན་གོས་དཀར་པོ་ཅན་ཆོམ་རྐུན་པ་ལྟ་བུ་ཤོ་གམ་དང་ལ་གཅན་དང་གྲུ་བཙས་ཀྱི་ལྕེ་རྟེན་གྱི་བདེན་པས་མི་མགུ་བ་དག་འཁོད་པས་རྫས་ཐམས་ཅད་འཕྲོག་པར་བགྱིད་པས་ཤོ་གམ་དང་ལ་གཅན་དང་གྲུ་བཙས་ཀྱིས་ཡོངས་སུ་ཡི་ཆད་པར་འགྱུར་རོ། །ཞེས་མཆིའོ། །དྲུག་སྡེ་དག་གིས་སྨྲས་པ། བཞིན་བཟང་དག་གང་དག་ལ་ཁོ་བོ་ཅག་བཤེས་སུ་བདོག་པ་ཁྱེད་ཀྱང་སེམས་ཁོང་དུ་ཆུད་ཅིང་འཁོད་དམ། འཕགས་པ་དག་ཅི་ལགས། ཁྱེད་ཀྱིས་བདག་ཅག་གི་སླད་དུ། རྒྱལ་པོ་ལ་གསོལ་བ་བགྱིའམ། བཞིན་བཟང་དག་རྒྱལ་པོ་ལ་ནི་གསོལ་བར་མི་བྱེད་དེ། འོན་ཀྱང་མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་ལ། དེ་ལ་སྒོ་ནི་བཅོ་བརྒྱད། སྒེའུ་ཆུང་ནི་སུམ་ཅུ་རྩ་དྲུག་ཡོད་པས་ཁྱེད་ཅག་སྒེའུ་ཆུང་ནས་འཇུག་ཏུ་གཞུག་གིས། ལོངས་ཤིག་འདོང་ངོ ། །ཚོང་པ་དེ་དག་ཡོངས་སུ་མགུ་ནས་འཕགས་པ་དང་མཉན་ཡོད་དང་ཧ་ཅང་མི་རིང་བའི་རི་བྲགས་ཤིག་ཏུ་ཕྱིན་ནས། དྲུག་སྡེ་དག་གིས་སྨྲས་པ། བཞིན་བཟང་དག་རེ་ཞིག་ངལ་བསོས་ལ་མཉན་
Ca117a
༄#། །ཡོད་དུ་མཚན་མོ་འཇུག་པར་བྱས། རྔ་མོ་དང་གླང་དང་བོང་བུ་དག་ཐོང་ཞིག་།ཚོང་བ་དེ་དག་གིས་དེ་དག་བཏང་ནས། ཇི་ཙམ་ན་ཉི་མ་ནུབ་པར་འགྱུར་བ་དེའི་ཚེ། དུས་ཡིན་ནོ་ཞེས་རེ་ཞིག་ངལ་བསོ་བར་བྱེད་དོ། །མཉན་ཡོད་ན་ཤོ་གམ་པ་དག་གིས་བྱང་ལམ་ནས་དོན་མཐུན་ཕུན་སུམ་ཚོགས་པ་འོངས་སོ་ཞེས་ཐོས་ནས། དེ་དག་གིས་གནོད་སྦྱིན་ལ་གཏོར་མ་བྱས་ཏེ་སྒོ་དག་མནན་ཏེ་སྡོད་དོ། །དྲུག་སྡེ་དག་གིས་སྨྲས་པ། ཤེས་ལྡན་དག་མིག་ལམ་ཆད་ཀྱིས། ལོངས་ཤིག་།འདོང་ངོ ། །ཡོངས་སུ་མི་ཤེས་པར་སྒེའུ་ཆུང་ནས་བདེ་བར་འཇུག་ཏུ་གཞུག་གོ་།དེ་དག་འཕགས་ཏེ་མཐར་གྱིས་བོང་བུ་དང་རྔ་མོ་དང་གླང་དག་འདེབས་ཤིང་སྒེའུ་ཆུང་ནས་མཉན་ཡོད་དུ་ཞུགས་ནས་མཚན་མོ་ནམ་ལངས་པ་དང ། སྲང་དུ་དོང་སྟེ་བྱང་ལམ་པའི་ཟོང་བཀྲམ་ནས་བཙོངས་པར་བརྩམས་སོ། །མི་ཞིག་དོན་མཐུན་དེ་ཉིད་དང་བྲལ་བ་སྒོ་ནས་ཞུགས་པ་ཤོ་གམ་པ་དག་གིས་མཐོང་ནས་སྨྲས་པ། ཀྱེ་ནང་རྗེ་ག་ལས་འོངས། མི་དེས་སྨྲས་པ། རི་བྲགས་ཆེ་གེ་མོ་ཞིག་ནས་སོ། །དེ་དག་གིས་སྨྲས་པ། ཀྱེ་ནང་རྗེ་རི་བྲགས་དེ་ན་བྱང་ལམ་པའི་དོན་མཐུན་འདུག་ཅེས་གྲགས་ན། ཁྱོད་ཀྱིས་དེ་མ་མཐོང་ངམ།་མི་དེས་སྨྲས་པ། ཤེས་ལྡན་དག་ཁོ་བོ་ནི་དོན་མཐུན་དེ་ཉིད་དང་བྲལ་ཞིང་འགྲོ་བ་ཡང་ཡིན་ཏེ། དེ་ནི་སྔར་སོང་ཟིན་ཏོ། །ཤོ་གམ་པ་དག་གིས་ཐོས་ནས་ཡིད་མི་བདེ་བར་གྱུར་ཏེ་སྨྲས་
Ca117b
པ།་ཀྱེ་ནང་རྗེ་ཁོ་བོ་ཅག་སྒོ་གནོན་ཅིང་འཁོད་ན་དེ་ག་ལས་ཞུགས། མི་དེས་སྨྲས་པ། ཤེས་ལྡན་དག་གལ་ཏེ་ཁྱེད་ཅག་ཡིད་མི་ཆེས་ན་ཚུར་ཤོག་སྲང་དུ་འདོང་དང་རང་ཉིད་ཀྱིས་མཐོང་བར་འགྱུར་རོ། །དེ་དག་དེ་དང་ལྷན་ཅིག་སྲང་དུ་དོང་བ་དང་དོན་མཐུན་དག་བྱང་ལམ་པའི་ཟོང་བཀྲམ་ཞིང་འཚོང་བ་མཐོང་ནས། དེ་དག་གིས་དྲིས་པ། ཤེས་ལྡན་དག་ཁྱེད་ཅག་གང་གིས་ཞུགས། དོན་མཐུན་དག་གིས་སྨྲས་པ། རྐང་པ་དག་གིས་སོ། །ཤོ་གམ་པ་དག་གིས་སྨྲས་པ། ཁྱེད་ཅག་ཇི་ལྟར་རྐང་པ་དག་གིས་ཞུགས་པར་ལྟ་ཁོ་བོ་ཅག་གིས་ཀྱང་ཤེས་ཀྱི། འདི་ལྟར་ཁྱེད་ཅག་གང་གིས་འཇུག་ཏུ་བཅུག་པ་དང ། སྒོ་གང་ནས་ཞུགས་པ་དེ་འདྲིས་སྨྲོས་ཤིག་དང་ཁྱེད་ཅག་དང་བཤེས་པར་བྱའོ། །དོན་མཐུན་དག་གིས་སྨྲས་པ། འཕགས་པ་དྲུག་སྡེ་དག་གིས་སྒེའུ་ཆུང་ནས་འཇུག་ཏུ་བཅུག་གོ་།ཤོ་གམ་པ་དེ་དག་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་པ་ཡིན་ནོ། །བྲམ་ཟེའི་ཚུལ་ནི་ཚིག་པ་ཡིན་ཏེ། གང་ལ་ད་ལྟར་གཞན་གྱི་འཚོ་བ་ལ་ཡང་གནོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ།་དགེ་སློང་གིས་གཞན་གྱི་འཚོ་བ་ལ་གནོད་པར་མི་བྱའོ། །གནོད་པར་བྱེད་ན་འགལ་ཚབས་ཅན་དུ་འགྱུར་རོ། །ཤོ་གམ་པ་དག་གིས་དྲུག་སྡེ་འདི་དག་ནི་དགེ་སྦྱོང་མི་སྲུན་པ་དག་
Ca118a
༄#། །ཡིན་པས་དོ་བྱའོ་སྙམ་དུ་བསམས་ནས། ཇི་ཙམ་དུས་གཞན་ཞིག་ན་ཚེ་དང་ལྡན་པ་ཉེ་དགའ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ། ཤོ་གམ་པ་ཞིག་གིས་མཐོང་ནས་དེས་སྨྲས་པ། འཕགས་པ་ཕྱག་འཚལ་ལོ། ལྷུང་བཟེད་ན་ཅུང་ཟད་མཆིས་སམ་གཟིགས། ཉེ་དགས་སྨྲས་པ། བཞིན་བཟང་ཅི་སེམས། ལྷུང་བཟེད་ན་ཤོ་གམ་གཞལ་དགོས་པའི་རྫས་མེད་དོ། །དེས་སྨྲས་པ། འཕགས་པ་སྡིག་པ་ཞི་བར་གྱུར་ཅིག་།བདག་དེ་སྙམ་མི་སེམས་ཀྱི་འདི་ལྟར་བཅའ་བ་དང་བཟའ་བ་བསོད་པ་ཅུང་ཟད་མཆིས་ན། དེ་ཁྱོད་ལས་བསླངས་ཏེ་འཚལ་སྙམ་མོ། །ཉེ་དགས་སྨྲས་པ། བཞིན་བཟང་ཅི་ཆུ་ཀླུང་རྒྱུན་ལས་བཟློག་ཕྱོགས་སུ་འབབ་བམ།་ཁྱོད་ཀྱིས་ཁོ་བོ་ལ་སྦྱིན་པར་བྱ་བ་ཡིན་གྱི། ཁོ་བོས་ཁྱོད་ལ་སྦྱིན་པར་བྱ་བ་མ་ཡིན་ནོ། །དེས་སྨྲས་པ། འཕགས་པ་བཞད་གད་བགྱིའོ། །ཚུར་སྤྱོན་ཁྱིམ་དུ་བཞུད་དོ། །ཤོ་གམ་པ་དེས་ཉེ་དགའ་ཁྱིམ་དུ་ཁྲིད་ནས་བཅའ་བ་དང་བཟའ་བ་བསོད་པས་ལྷུང་བཟེད་བཀང་སྟེ་བྱིན་ནས་སྨྲས་པ། འཕགས་པ་བདག་ལ་བཀའ་སྩོལ་ཅིག་དང ། བཀའ་བཞིན་བགྱིད་ཅིང།་འཕགས་པས་བཀའ་སྩལ་པ་ཐམས་ཅད་བསྒྲུབ་པར་བགྱིའོ། ཉེ་དགས་བཞིན་བཟང་ཁྱོད་ནད་མེད་པར་གྱུར་ཅིག་ཅེས་སྨྲས་ཏེ་སོང་ངོ ། །དྲུག་སྡེ་དག་གི་ཀུན་ཏུ་སྤྱོད་པ་ནི་
Ca118b
འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཆོས་བསྟན་པར་བྱ། རྒོལ་བ་དག་ཚར་གཅད་པར་བྱ། །རང་གི་གྲགས་པ་བསྒྲག་པར་བྱ། །རྙེད་པ་ཡང་བསྒྲུབ་པར་བྱའོ་ཞེས་ཡང་ན་ནི་སྒོ་དྲུང་དུ་བཙུག་\་GཊZཱུG\་ལག་ཁང་ནོད་པར་བྱེད། ཡང་ན་ནི་ལམ་དང་ཉེ་བར་གཙུག་ལག་ཁང་ནོད་པར་བྱེད་པས། ཉེ་དགས་ལམ་དང་ཉེ་བར་གཙུག་ལག་ཁང་མནོས་ནས། དེ་དེའི་སྟེང་དུ་ནམ་གྱི་ཆ་སྟོད་དང ། ནམ་གྱི་ཆ་སྨད་ལ་མི་ཉལ་བའི་སྦྱོར་བ་ལ་རྗེས་སུ་བརྩོན་པར་གནས་སོ། །ཇི་ཙམ་དུས་གཞན་ཞིག་ན་ཚོང་པ་ཤོ་གམ་འདྲལ་བ་དག་གཙུག་ལག་ཁང་དང་ཧ་ཅང་ཐག་མི་རིང་བ་ནས་འདོང་བ་དང ། ཉེ་དགའ་སྒྲ་ལ་མཁས་པས་དེས་དེ་དག་གི་རྟིང་སྒྲ་ཐོས་ནས། ཡོངས་སུ་གཡོ་བ་དང་བཅས་བཞིན་དུ་སྨྲས་པ། འདོང་བ་འདི་དག་སུ་ཡིན། ཚོང་པ་དེ་དག་ཅང་མི་སྨྲ་པར་སྡོད་པ་དང ། ཉེ་དགའ་མྱུར་བ་མྱུར་བར་གཙུག་ལག་ཁང་གི་སྟེང་ནས་བབས་ཏེ། ཚོང་པ་དེ་དག་གི་དྲུང་དུ་སོང་ནས་སྨྲས་པ། ཤེས་ལྡན་དག་མཚན་མོ་ནོར་དང་བཅས་པ་ཁོ་ནར་འདོང་བ་འདི་དག་སུ་ཡིན། ཚོང་པ་དེ་དག་གིས་སྨྲས་པ། འཕགས་པ་བདག་ཅག་ནི་ཚོང་པ་ཤོ་གམ་འདྲལ་བ་དག་ལགས་སོ། །ཉེ་དགས་སྨྲས་པ་བཀྲེན་པ་དག་ཁོ་བོ་ཅག་ལ་རྒྱལ་པོ་ཡོ་བྱད་ཐམས་ཅད་ཀྱིས་ཉེ་བར་གནས་པ་ཡིན་ཏེ། གནས་བརྟན་ཀུན་ཤེས་ཀོའུ་དི་ནྱ་ཡང་དེ་ལ་འདི་སྐད་ཅེས་ཇི་ནས་ཀྱང་རྒྱལ་པོ་འདིའི་ལོངས་སྤྱོད་མ་བྱུང་བ་དག་ནི་འབྱུང་བར་གྱུར་ཅིག་།བྱུང་བ་དག་ནི་རྒྱས་པ་དང་
Ca119a
༄#། །འཕེལ་བ་དང་ཡངས་པར་གྱུར་ཅིག་ཅེས་ཡོན་བཤད་པ་བྱེད་པ་ཡིན་ན། ཁྱེད་ཅག་དེ་དབང་བའི་ཤོ་གམ་དྲལ་ཏེ་འདོང་ན་ཁོ་བོ་ཅག་གིས་ཅིའི་ཕྱིར་ཡལ་བར་དོར་བར་བྱ། དེང་ཁྱེད་ལ་གནོད་པ་བྱེད་དུ་གཞུག་གོ་།དེ་དག་སྐྲག་ནས་སྨྲས་པ། འཕགས་པ་ཁྱེད་ནི་ཐུགས་རྗེ་ཅན་དག་ལགས་པས་བཟོད་པར་མཛོད་ཅིག་དང་བདག་ཅག་གིས་འཕགས་པ་ལ་མཁོ་བ་དག་བགྱིའོ། ། ཉེ་དགས་སྨྲས་པ་ཅི་ཞིག་བྱ། བཅའ་བའི་ཆ་བ་རིན་དག་དབུལ་ལོ། །འབུལ་ལམ། འབུལ་ལོ། །དེང་ཞིག་།དེ་དག་དེ་ནས་དོང་སྟེ་ཉེ་དགའི་དྲུང་ནས་བྲལ་བ་དང ། འདི་སྐད་ཅེས་ཡུ་བུ་ཅག་ཀོ་ས་ལ་ར་བྱུང་བའི་རྒྱལ་པོ་གསལ་རྒྱལ་ལ་ཡང་ཤོ་གམ་མི་འཇལ་ན། དགེ་སྦྱོང་མགོ་རེག་ཉེ་དགའ་ལ་འཇལ་བ་ལྟ་སྨོས་ཀྱང་ཅི་དགོས་ཞེས་ཀུན་ཏུ་བརྗོད་པར་བྱེད་དོ། །ཉེ་དགའ་ཡང་མྱུར་བ་མྱུར་བར་ཟས་ཀྱི་བྱ་བ་བྱས་ཏེ། སྒོ་དྲུང་ན་ལྷུང་བཟེད་འཁྲུ་ཞིང་ཕྱོགས་བཞིར་རྣམ་པར་ལྟ་བར་བྱེད་དོ། །གཞོན་ནུ་ཞིག་གིས་ཉེ་དགའ་ཕྱོགས་བཞིར་རྣམ་པར་ལྟ་བར་བྱེད་པ་མཐོང་ནས། དེས་སྨྲས་པ། གནས་བརྟན་ཅིའི་སླད་དུ་ཕན་ཚུན་རྣམ་པར་གཟིགས་པ་མཛད། ཉེ་དགས་སྨྲས་པ། ཚེ་དང་ལྡན་པ་ཁོ་བོའི་མཛའ་བཤེས་ཚོང་པ་དག་ཟོང་ཐོགས་ཏེ་མཉན་ཡོད་དུ་ཞུགས་པ་དེ་དག་ལྟའོ། །གཞོན་ནུ་དེས་སྨྲས་པ།་གནས་བརྟན་ཁྱོད་ཇི་ཙམ་ན་ཟས་ཀྱི་བྱ་བ་མཛད་པ་དེ་ཙམ་ན་དེ་དག་དོང་ལགས་སོ། །ཉེ་དགའ་མི་བཟོད་པ་སྐྱེས་ནས་ཁོ་བོ་ཡང་དེ་དག་གིས་བསླུས་ཏེ་སྤུ་གྲི་ལ་ཁུ་ཚུར་གྱིས་བརྡེགས་ཤིང་རང་ཐགས་
Ca119b
ཀྱི་རྡོ་ལ་རྩཝས་ཕུག་གིས། ཁོ་བོས་དེ་དག་ལ་གང་བྱ་བ་ཤེས་སོ་སྙམ་དུ་སེམས་སོ། །ཇི་ཙམ་ན་ཚོང་པ་དེ་དག་ཡང་དེ་ཁོ་ན་བཞིན་དུ་འོངས་པ་དང ། ཉེ་དགས་ཀྱང་དེ་ཁོ་ན་བཞིན་ལན་གཉིས་སུ་བཟུང་སྟེ་ཁྱེད་ཀྱིས་ཁོ་བོ་ཡང་བསླུས་སོ་ཞེས་སྨྲས་པ་དང ། ཚོང་པ་དེ་དག་གིས་སྨྲས་པ། འཕགས་པ་བདག་ཅག་ལ་བགྱི་བ་ཅུང་ཞིག་བྱུང་བས་དེས་ན་བདག་ཅག་མ་ཞུས་པར་མཆིས་ཏེ། ད་ནི་དེ་དང་གཞན་ཡང་ཐམས་ཅད་འབུལ་ལོ། །འབུལ་ལམ། འབུལ་ལོ། །དེད་ཞིག། དེ་དག་དེ་དག་དེ་ནས་དོང་སྟེ་ཉེ་དགའི་དྲུང་ནས་བྲལ་བ་དང ། འདི་སྐད་ཅེས་ཡུ་བུ་ཅག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཡང་ཤོ་གམ་མི་འཇལ་ན། དགེ་སྦྱོང་མགོ་རེག་ཉེ་དགའ་ལ་འཇལ་བ་ལྟ་སྨོས་ཀྱང་ཅི་དགོས་ཞེས་ཀུན་ཏུ་རྗོད་པར་བྱེད་དོ། །ཉེ་དགས་ཚོང་པ་དེ་དག་གིས་བདག་ལ་མང་པོ་ཞིག་ཁས་བླངས་པས་ཡང་དེ་ཁོ་ན་བཞིན་དུ་མི་ལྟ་བར་སོང་ན་མི་རུང་གིས་མཚན་མ་དང་བཅས་པ་ཁོ་ནར་ལངས་ཏེ། དེ་དག་གི་དྲུང་དུ་འགྲོ་བར་བྱའོ་སྙམ་དུ་བསམས་ནས་དེས་སྣམ་སྦྱར་བགོས་ཏེ་སྲང་དུ་སོང་བ་དང ། ཚོང་པ་དེ་དག་ཀྱང་ཟོང་བཀྲམ་སྟེ་འཚོང་བར་བྱེད་ནས། ཉེ་དགས་དེ་དག་ལ་མཚན་མ་བརྟན་པར་བརྩམས་པ་དང ། དེ་དག་གིས་སྨྲས་པ། འཕགས་པ་ཇེ་ཟོང་བསྒྱུར་བར་བགྱིས། བཞུད་ཅིག་དང ། བདག་ཅག་མཆིས་ཏེ་དབུལ་བར་བགྱིའོ། །ཉེ་དགས་སྨྲས་པ། གལ་ཏེ་བདེན་ནའོ། །དེ་དག་གིས་སྨྲས་པ། འཕགས་པ་ཁྱོད་ནི་འདའ་བར་བགྱི་བ་མ་ལགས་ཀྱིས་བཞུད་ཅིག་།ཉེ་དགའ་སོང་སྟེ། མྱུར་བ་མྱུར་བར་གཙུག་ལག་ཁང་དུ་སོང་ནས་
Ca120a
༄#། །ཟས་ཀྱི་བྱ་བ་བྱས་ཏེ། ལྷུང་བཟེད་འཁྲུ་ཞིང་ཕྱོགས་སུ་རྣམ་པར་ལྟ་བར་བྱེད་དོ། །དེ་བཞིན་དུ་གཞོན་ནུ་ཞིག་གིས་སྨྲས་པ། གནས་བརྟན་ཅིའི་སླད་དུ་ཕན་ཚུན་རྣམ་པར་གཟིགས་པར་མཛད། ཉེ་དགས་སྨྲས་པ། ཚེ་དང་ལྡན་པ་ཁོ་བོའི་མཛའ་བཤེས་ཚོང་པ་དག་ཟོང་ཐོགས་ཏེ་མཉན་ཡོད་དུ་ཞུགས་པ་དེ་དག་ལྟའོ། །གཞོན་ནུ་དེས་སྨྲས་པ། གནས་བརྟན་ཁྱོད་ཇི་ཙམ་ན་ཟས་ཀྱི་བྱ་བ་མཛད་པ་དེ་ཙམ་ན་དེ་དག་དོང་ལགས་སོ། །ཉེ་དགའ་རྒྱ་ཆེར་མི་བཟོད་པ་སྐྱེས་ནས་མགོ་བསིགས་ཏེ་ཁོ་བོ་དེ་དག་གིས་ལན་གཉིས་སུ་བསླུས་ཀྱིས། ད་ནི་གལ་ཏེ་དེ་དག་མཐོང་ན་གང་གིས་ཕྱིན་ཆད་ཚོང་པར་མི་འགྱུར་བ་དེ་འདྲ་བའི་ཁྲིམས་འཆར་གཞུག་གོ་སྙམ་དུ་སེམས་སོ། །ཇི་ཙམ་ན་ཡང་ཚོང་པ་དེ་དག་དེ་ཁོ་ན་བཞིན་དུ་འོངས་པ་དང ། ཉེ་དགས་སྨྲས་པ། ཤེས་ལྡན་དག་ཁྱེད་ཀྱིས་ཡང་དང་ཡང་དུ་ཁོ་བོ་བསླུས་པས་ད་ནི་གང་བྱ་བ་དེ་ལྟོས་ཤིག་།དེ་དག་གིས་སྨྲས་པ། འཕགས་པ་བཟོད་པར་མཛོད་ཅིག་།བདག་ཅག་ཚོང་པ་དག་ནི་རྟག་ཏུ་འཇལ་ཚོངས་ཀྱིས་སེམས་གཡེངས་པ་ལགས་པས། ད་ནི་སྔར་མཆིད་ཀྱིས་འཚལ་བ་གང་ལགས་པ་དང ། སླད་ཀྱི་མཆིད་ཀྱིས་འཚལ་བ་གང་ལགས་པ་དེ་དང་གཞན་ཐམས་ཅད་ཀྱང་དབུལ་བར་བགྱིའོ། །ཉེ་དགས་གལ་ཏེ་འདི་དག་ལ་གཟུ་ལུམས་སུ་འཇུག་པར་བྱས་ན་ཤེས་པར་འགྱུར་གྱིས་མཐུན་པར་བརྗོད་པར་བྱའོ་སྙམ་དུ་ཤེས་ཤིང་རིག་ནས་སྨྲས་པ། བཞིན་
Ca120b
བཟང་དག་ངེས་པར་འབུལ་ལམ། འཕགས་པ་ངེས་པར་འབུལ་ལོ། །གལ་ཏེ་དེ་ལྟ་ན་ཁྱེད་ཅག་ལ་ཉེས་དམིགས་འགའ་ཞིག་བྱུང་བར་གྱུར་ཏམ། ཁོ་བོ་ཅག་ལ་ཡང་གཙུག་ལག་ཁང་གི་དྲུང་དུ་ཚོང་པ་དག་ཚོང་པ་མ་ཡིན་པར་རྣམ་པར་གཞག་པར་གྱུར་ན་མ་ལེགས་ཀྱིས་རེ་ཞིག་ལམ་ལྟ་བ་དེ་སྲིད་ཀྱི་བར་དུ་སྡོད་ཅིག་།དེ་དག་སྡོད་པ་དང་ཉེ་དགའ་དེ་ན་ཤོ་གམ་པ་དག་གི་དྲུང་དུ་སོང་ངོ ། ། དེའི་ཚེ་ན་ཤོ་གམ་པ་དག་ཤེས་ལྡན་དག་ཚོང་པ་ཤོ་གམ་འདྲལ་བ་དག་གིས་ཤོ་གམ་དྲལ་ཅིང་དྲལ་ཅིང་སྒེའུ་ཆུང་ནས་འཇུག་པས། ལོ་ཐང་འདུ་བ་མི་འབྱུང་ལ། དུས་ལ་ནི་བབ། རྒྱལ་པོ་ནི་གཏུམ་པས་བདག་ཅག་བུ་དང་ཆུང་མ་དང་རྩ་ལག་དག་དང་བཅས་པ་བཙོན་རར་བཅུག་སྟེ། གསད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ་ཞེས་ཟེར་ཞིང་སེམས་ཁོང་དུ་ཆུད་ཅིང་འདུག་གོ་།དེ་དག་དེ་ལྟར་སེམས་ཁོང་དུ་ཆུད་ཅིང་འདུག་པ་ན་ཉེ་དགས་སྨྲས་པ། ཁྱེད་ཅག་ཅིའི་ཕྱིར་འདི་ལྟར་སེམས་ཁོང་དུ་ཆུད་ཅིང་འདུག་།འཕགས་པ་ཇི་ལྟར་སེམས་ཁོང་དུ་ཆུད་ཅིང་མི་མཆིས། ཚོང་པ་ཤོ་གམ་འདྲལ་བ་དག་གིས་ཤོ་གམ་དྲལ་ཅིང་དྲལ་ཅིང་སྒེའུ་ཆུང་ནས་འཇུག་པས་ལོ་ཐང་འདུ་བ་མི་འབྱུང་ལ་དུས་ལ་ནི་བབ། རྒྱལ་པོ་ནི་གཏུམ་པས། བདག་ཅག་བུ་དང་ཆུང་མ་དང་རྩ་ལག་དག་དང་བཅས་པ་བཙོན་རར་བཅུག་སྟེ། གསད་པར་འགྱུར་བ་གང་ལགས་པ་དེ་ལྟ་བུའི་གནས་མཆིས་སོ། །བཀྲེན་པ་དག་ཁྱེད་ཅག་སུས་ཤོ་གམ་གྱི་
Ca121a
༄#། །གནས་སུ་བཞག་།ཁྱེད་ཅག་ནི་ལྕག་རྒོད་མང་པོས་བྲིམས་ལས་སྐྱེད་པའམ། ཤིང་འཆག་ཏུ་གཞུག་པར་བྱ་བ་ཡིན་ནོ། །ཅིའི་ཕྱིར་ཁྱེད་ཀྱིས་ཚོང་པ་ཤོ་གམ་འདྲལ་བ་གཅིག་ཙམ་ཡང་ནོར་ཐམས་ཅད་དང་བྲལ་བར་མི་བྱེད། འཕགས་པ་མཉན་ཡོད་ནི་ཀུན་ཤེས་པའི་ཤོ་གམ་ཅན་ལགས་ཀྱི། ཉེས་པ་བྱེད་པའི་ཤོ་གམ་ཅན་མ་ལགས་པས་ཇི་ལྟར་ནོར་ཐམས་ཅད་དང་བྲལ་བར་བགྱི། བཀྲེན་པ་དག་མཉན་ཡོད་ནི་ཉེས་པ་བྱེད་པའི་ཤོ་གམ་ཅན་ཡིན་གྱི་ཀུན་ཤེས་པའི་ཤོ་གམ་ཅན་མ་ཡིན་ནོ། །འཕགས་པ་བདག་ཅག་གིས་ཡུན་དེ་སྲིད་དུ་ཤོ་གམ་བསྒྲུབས་ན་ལན་འགའ་ཡང་ཉེས་པ་བགྱིད་པའི་ཤོ་གམ་ཅན་མ་ལགས་ན། ད་ཇི་ལྟར་ཉེས་པ་བགྱིད་པའི་ཤོ་གམ་ཅན་དུ་འགྱུར། བཀྲེན་བ་དག་སྡོད་ཅིག་དང ། ང་སོང་ལ་ཚོང་པ་ཤོ་གམ་འདྲལ་བ་དག་གཏང་བར་བྱས། དེ་དག་ཁྱེད་ཀྱིས་ཟུང་ལ་ནོར་ཐམས་ཅད་དང་བྲལ་བར་གྱིས་ཤིག་།གལ་ཏེ་མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་གྱི་ཉེས་པ་བྱེད་པའི་ཤོ་གམ་ཅན་ནི་མ་ཡིན་ནོ་ཞེས་ཟེར་ན། མཉན་ཡོད་ནི་ཉེས་པ་བྱེད་པའི་ཤོ་གམ་ཅན་ཡིན་གྱི་ཀུན་ཤེས་པའི་ཤོ་གམ་ཅན་ནི་མ་ཡིན་ནོ་ཞེས་བརྗོད་པར་བྱའོ། །གལ་ཏེ་ཡུན་དེ་སྲིད་དུ་ཁོ་བོ་ཅག་ཚོང་པའི་ཐ་སྙད་བྱེད་པ་ན་ལན་འགའ་ཡང་མཉན་ཡོད་ཉེས་པ་བྱེད་པའི་ཤོ་གམ་ཅན་མ་ཡིན་ན། ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ། ཚུར་ཤོག་ཚོང་པའི་ཚོགས་ཀྱི་ནང་དུ་
Ca121b
འདོང་ངོ་ཞེས་ཟེར་ན། རྒྱལ་པོའི་ཕོ་བྲང་དུ་བཀྲི་བར་བྱའོ། །གལ་ཏེ་རྒྱལ་པོ་ན་རེ། ཤེས་ལྡན་དག་ཡུན་དེ་སྲིད་དུ་ངའི་རྒྱལ་སྲིད་བྱེད་དུ་བཅུག་ན་ལན་འགའ་ཡང་ངས་མཉན་ཡོད་ཉེས་པ་བྱེད་པའི་ཤོ་གམ་ཅན་དུ་མ་ཐོས་ན། ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ་ཞེས་ཟེར་ན། རྒྱལ་པོ་ཨ་ར་ད་ཚངས་བྱིན་ཚོང་པའི་ཚོགས་དང་བཅས་པས་གང་སྐྱེད་མོས་ཚལ་ལམ། མདུན་སའམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་པ་དེ་ལ་ནི་ཀུན་ཤེས་པའི་ཤོ་གམ་ཅན་ཡིན་ལ། གང་སྐྱེད་མོས་ཚལ་ལམ། འདུན་སའམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་བ་དེ་ལ་ཉེས་པ་བྱེད་བའི་ཤོ་གམ་ཅན་ཡིན་ནོ་ཞེས་ཁྲིམས་སུ་བྱ་བ་རྣམ་པར་གཞག་པ་གང་ལགས་པ་དེ་ལྷ་ལ་བཙན་ནམ་ཞེས་བརྗོད་པར་བྱའོ། །གལ་ཏེ་བཙན་ནོ་ཞེས་ཟེར་ན། ལྷ་མཛོད་ཆེ་གེ་མོ་ཞིག་ན་སྒྲོམ་མཆིས་པ་དེ་ན་ཟངས་མའི་གླེགས་བུ་ལ་ཡི་གེ་བྲིས་པ་མཆིས་པ་དེ་ལྷས་གཟིགས་སུ་གསོལ་ཞེས་བརྗོད་པར་བྱའོ། །ཇི་ཙམ་ན་ཤོ་གམ་པ་དེ་དག་གིས་ཚོང་པ་ཤོ་གམ་འདྲལ་བ་དེ་དག་བཟུང་སྟེ་ནོར་ཐམས་ཅད་དང་བྲལ་བར་བྱས་པ་ན་ཚོང་པ་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་ཁོ་བོ་ཅག་ནོར་ཐམས་ཅད་དང་བྲལ་པར་བྱེད། མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་གྱི་ཉེས་པ་བྱེད་པའི་ཤོ་གམ་ཅན་ནི་མ་ཡིན་ནོ། །ཤོ་གམ་པ་དག་གིས་སྨྲས་པ། མཉན་ཡོད་ནི་ཉེས་པ་བྱེད་པའི་ཤོ་གམ་ཅན་ཡིན་གྱི་ཀུན་ཤེས་པའི་ཤོ་གམ་ཅན་ནི་མ་ཡིན་ནོ། །ཚོང་པ་དག་གིས་སྨྲས་པ། ཡུན་དེ་སྲིད་དུ་ཁོ་
Ca122a
༄#། །བོ་ཅག་ཚོང་པའི་ཐ་སྙད་བྱེད་བྱེད་ན་ལན་འགའ་ཡང་མཉན་ཡོད་ཉེས་པ་བྱེད་པའི་ཤོ་གམ་ཅན་མ་ཡིན་ན། ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ། ཚུར་ཤོག་ཚོང་པའི་ཚོགས་ཀྱི་ནང་དུ་འདོང་ངོ ། །ཤོ་གམ་པ་དག་གིས་སྨྲས་པ། ཚོང་པའི་ཚོགས་ཀྱི་ནང་དུ་མི་འགྲོས། ཚུར་ཤོག་རྒྱལ་པོའི་ཕོ་བྲང་དུ་འདོང་ངོ་ཞེས་དེ་དག་འཁང་བཞིན་དུ་མཐུས་རྒྱལ་པོའི་ཕོ་བྲང་དུ་ཁྲིད་པ་དང ། དེ་དག་གིས་ཚོང་པའི་ཚོགས་ལ་ཤེས་ལྡན་དག་ཁོ་བོ་ཅག་ཤོ་གམ་པ་དག་གིས་ནོར་ཐམས་ཅད་དང་བྲལ་བར་བྱས་ཀྱིས་གྲོགས་གྱིས་ཤིག་ཅེས་ར་མདའ་བཟློག་པའི་སྐད་ཕྱུང་ངོ ། ། ཚོང་པའི་ཚོགས་ཀྱང་དེ་དག་དང་ལྷན་ཅིག་རྒྱལ་པོའི་སྤྱན་སྔར་སོང་ནས། ལྷ་ཁྱོད་ཀྱི་རྒྱལ་སྲིད་ལ་ཤོ་གམ་པ་དག་གིས་ཚོང་པ་གློ་བུར་དུ་ལྷགས་པ་དག་ནོར་ཐམས་ཅད་བྲལ་བར་བགྱིས་ཀྱིས་ཡོངས་སུ་བསྐྱབ་ཏུ་གསོལ་ཞེས་སྨྲས་སོ། །རྒྱལ་པོས་བློན་པོ་རྣམས་ལ་ཤེས་ལྡན་དག་ཤོ་གམ་པ་དག་ཁུག་ཅིག་ཅེས་བསྒོ་ནས། བློན་པོ་རྣམས་ཀྱིས་ཤོ་གམ་པ་དག་པ་བཀུག་པ་དང ། རྒྱལ་པོས་སྨྲས་པ། ཤེས་ལྡན་དག་ཅིའི་ཕྱིར་ཁྱེད་ཀྱིས་ཚོང་པ་དག་ནོར་ཐམས་ཅད་དང་བྲལ་བར་བྱས། ཤོ་གམ་པ་དག་གིས་སྨྲས་པ། ལྷ་ཚོང་པ་འདི་དག་ནི་ཤོ་གམ་འདྲལ་བ་ལགས་ལ་མཉན་ཡོད་ནི་ཉེས་པ་བགྱིད་པའི་ཤོ་གམ་ཅན་ལགས་པས། དེའི་སླད་དུ་བདག་ཅག་གིས་འདི་དག་ནོར་ཐམས་ཅད་དང་བྲལ་བར་བགྱིས་སོ། །རྒྱལ་པོས་སྨྲས་པ། ཤེས་ལྡན་དག་ཡུན་དེ་སྲིད་དུ་ངའི་རྒྱལ་སྲིད་བྱེད་དུ་བཅུག་ན་ལན་
Ca122b
འགའ་ཡང་ངས་མཉན་ཡོད་ཉེས་པ་བྱེད་པའི་ཤོ་གམ་ཅན་དུ་མ་ཐོས་ན། ད་ཉེས་པ་བྱེད་པའི་ཤོ་གམ་ཅན་དུ་གྱུར་ཏམ། ཤོ་གམ་ཡང་དག་པ་ལོང་ལ་ཐོང་ཞིག་།ཤོ་གམ་པ་དག་གིས་སྨྲས་པ།་རྒྱལ་པོ་ཨ་ར་ད་ཚངས་བྱིན་ཚོང་པའི་ཚོགས་དང་བཅས་པས་གང་སྐྱེད་མོས་ཚལ་ལམ། འདུན་སའམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་པ་དེ་ལ་ནི་ཀུན་ཤེས་པའི་ཤོ་གམ་ཅན་ཡིན་ལ། གང་སྐྱེད་མོས་ཚལ་ལམ། འདུན་སའམ། ལྷའི་གནས་ཆེ་གེ་མོ་ནས་མཉན་ཡོད་དུ་འཇུག་པ་དེ་ལ་ནི་གནོད་པ་བྱེད་པའི་ཤོ་གམ་ཅན་ཡིན་ནོ་ཞེས་ཁྲིམས་སུ་བྱ་བ་རྣམ་པར་གཞག་པ་གང་ལགས་པ་དེ་ལྷ་ལ་བཙན་ནམ། རྒྱལ་པོས་སྨྲས་པ། ཤེས་ལྡན་དག་ངའི་ཡབ་ཀྱིས་མཛད་པ་གང་ཡིན་པ་དེ་ནི་བརྒྱ་བྱིན་གྱིས་མཛད་པ། ཚངས་པས་མཛད་པ་ཡིན་ཏེ། མཆོག་ཏུ་བཙན་ནོ། །ཤོ་གམ་པ་དག་གིས་སྨྲས་པ། ལྷ་མཛོད་ཆེ་གེ་མོ་ཞིག་ན་སྒྲོམ་མཆིས་པ་དེ་ན་ཟངས་མའི་གླེགས་བུ་ལ་ཡི་གེ་བྲིས་པ་མཆིས་པ་དེ་ལྷས་གཟིགས་སུ་གསོལ།་རྒྱལ་པོས་གཏོགས་པར་བྱས་བདག་ལ་ཟངས་མའི་གླེགས་བུ་དེ་འོན་ཅིག་ཅེས་བསྒོ་ནས། བླངས་ཏེ་བཀླགས་པ་དང ། རྒྱལ་པོས་ཕའི་བསྔགས་པ་ཐོས་ནས། མཆི་མ་དང་བཅས་པའི་སྐད་ཀྱིས་སྨྲས་པ། ཤེས་ལྡན་དག་ངའི་ཡབ་ཀྱིས་མཛད་པ་གང་ཡིན་པ་དེ་ནི་བརྒྱ་བྱིན་གྱིས་མཛད་པ། ཚངས་པས་མཛད་པ་ཡིན་ཏེ་གལ་ཏེ་ནོར་ཐམས་ཅད་དང་བྲལ་བར་
Ca123a
༄#། །བྱས་ན་ལེགས་སོ། །ཚོང་པ་དེ་དག་རེ་བ་མེད་པར་གྱུར་ནས། མཆི་མ་དང་བཅས་པའི་སྐད་ཀྱིས་དོང་ནས། དེ་དག་གིས་ཤོ་གམ་པ་དེ་དག་ལ་སྨྲས་པ། ཤེས་ལྡན་དག་ཁྱེད་ལ་སུས་སྦྲན་པ་སྨྲོས་ཤིག་།ཤོ་གམ་པ་དག་གིས་སྨྲས་པ། ཁོ་བོ་ཅག་ལ་སུ་ཞིག་སྦྲན་པར་འགྱུར། ཁོ་བོ་ཅག་ཉིད་ཀྱིས་ཤེས་མོད་ཀྱི་འོན་ཀྱང་ཁོ་བོ་ཅག་ཁྱེད་ལ་སྙིང་རྗེ་བས་ཡལ་བར་བོར་རོ། །ཁྱེད་ཅག་ཧ་ཅང་བྱ་བ་བྱེད་པར་བརྩམས་པས་དེས་ན་ཁོ་བོ་ཅག་མི་བཟོད་པ་སྐྱེས་སོ། །ཚོང་པ་དག་གིས་སྨྲས་པ། ཁྱེད་ལ་སྙིང་རྗེ་ག་ལ་ཡོད། སྨྲོས་ཤིག་དང་ཁོ་བོ་ཅག་ཁྱེད་དང་མཛའ་བོར་འགྱུར་རོ། །ཤོ་གམ་པ་དག་གིས་སྨྲས་པ། འཕགས་པ་དྲུག་སྡེ་དག་གིས་སོ། །ཚོང་པ་དེ་དག་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་པ་ཡིན་ནོ། །བྲམ་ཟེའི་ཚུལ་ནི་ཚིག་པ་ཡིན་ཏེ། གང་ལ་ད་ལྟར་གཞན་གྱི་འཚོ་བ་ལ་ཡང་གནོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གཞན་གྱི་འཚོ་བ་ལ་གནོད་པར་མི་བྱའོ། །གནོད་པ་བྱེད་ན་འགལ་ཚབས་ཅན་དུ་འགྱུར་རོ། །སྡོམ་ལ། རྐང་མེད་དང་ནི་རྐང་གཉིས་དང ། །རྐང་བཞི་པ་དང་རྐང་མངས་ཀྱི། །སྡེ་ཚན་ཡང་དག་བསྡུས་པ་ཡིན། །རྐང་མེད་ཅེས་བྱ་བ་ནི། སྦྲུལ་དང ། པད་པ་དང ། སྲོག་ཆགས་དྲེའུ་སྲིན་དག་གོ་།དེ་དག་ནི་
Ca123b
གསུམ་གྱིས་སོགས་པར་བྱེད་དེ། སྦྲུལ་ཁས་བསྡིགས་པ་དག་དང ། རྒྱལ་པོའི་སྨན་པ་དག་དང ། ཁ་ལུངས་པའི་ཡབ་ན་དག་གིས་སོ། །ཇི་ལྟར་སྦྲུལ་ཁས་བསྡིགས་པ་དག་གིས་ཤེ་ན། འདི་ལྟར་སྦྲུལ་ཁས་བསྡིགས་པ་དག་སྦྲུལ་ལ་བརྟེན་ཏེ་འཚོ་བར་བྱེད་པ་སྟེ། དེ་ལྟར་སྦྲུལ་ཁས་བསྡིགས་པ་དག་གིས་སོ། །ཇི་ལྟར་རྒྱལ་པོའི་སྨན་པ་དག་གིས་ཤེ་ན། འདི་ལྟར་རྒྱལ་པོའི་སྨན་པ་དག་པད་པ་ལ་བརྟེན་ཏེ་འཚོ་བར་བྱེད་པ་སྟེ། དེ་ལྟར་རྒྱལ་པོའི་སྨན་པ་དག་གིས་སོ། །ཇི་ལྟར་ཁ་ལུངས་པའི་ཡ་བ་ན་དག་གིས་ཤེ་ན། འདི་ལྟར་ཁ་ལུངས་པའི་ཡ་བ་ན་དག་སྲོག་ཆགས་དྲིའུ་སྲིན་དག་བག་བྱེ་སོན་པར་བྱེད། ས་འབྱིན་པར་བྱེད་ཅིང་སླ་ང་ལ་རྔོ་བར་བྱེད་དེ། དེ་དག་དེ་འཆའ་ཞིང་མྱོས་པ་འགྱུར་བའི་བཏུང་བ་རྣམ་པ་དུ་མ་འཐུང་བར་བྱེད་དེ། དེ་ལྟར་ཁ་ལུངས་པའི་ཡ་བ་ན་དག་གིས་སོ། །དགེ་སློང་གིས་སྲོག་ཆགས་རྐང་མེད་དག་རྐུ་བར་བྱེད་ན། སྲོག་ཆགས་རྐང་མེད་དག་གི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །རྐང་གཉིས་ཞེས་བྱ་བ་ནི་མི་རྣམས་དང ། བྱ་ཁ་ཅིག་གོ་།མི་རྣམས་ནི་རྣམ་པ་གསུམ་གྱིས་རྐུ་སྟེ། ཡུལ་ཕྱོགས་དང ། བརྡ་དང ། མཚན་མས་སོ། ། ཇི་ལྟར་ཡུལ་ཕྱོགས་ཀྱིས་ཤེ་ན། གང་གི་ཚེ་ན་ཁོ་བོ་སྐྱེད་མོས་ཚལ་ལམ། འདུན་སའམ། ལྷའི་གནས་ཆེ་གེ་མོ་ཞིག་ཏུ་མཐོང་བ་དེའི་ཚེ་ཁྱོད་ཀྱིས་བྱ་བ་དེ་བྱས་པར་ཤེས་པར་གྱིས་ཤིག་
Ca124a
༄#། །ཅེས་བྱ་བ་སྟེ། དེ་ལྟར་ཡུལ་ཕྱོགས་ཀྱིས་སོ། །ཇི་ལྟར་བརྡས་ཤེ་ན། གང་གི་ཚེ་ཁོ་སྔ་དྲོའམ་གུང་ཚིགས་སམ། ཕྱེ་མ་བྲེད་མཐོང་བ་དེའི་ཚེ་ཁྱོད་ཀྱིས་བྱ་བ་དེ་བྱས་པར་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་བརྡས་སོ། །ཇི་ལྟར་མཚན་མས་ཤེ་ན། གང་གི་ཚེ་ཁོ་བོ་སྐྲ་དང་ཁ་སྤུ་བྲེགས་ནས་རིང་པོར་མ་ལོན་པའམ། སྣམ་སྦྱར་དམར་སེར་རམ། ཞ་ཉེའི་དབྱར་འདབ་ཀྱིས་གླན་པའི་ལྷུང་བཟེད་དམ། འཁར་བ་སྦུབས་ཅན་ནམ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཐོགས་པར་མཐོང་བ་དེའི་ཚེ་ཁྱོད་ཀྱིས་བྱ་བ་དེ་བྱས་པར་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་མཚན་མས་སོ། །དགེ་སློང་གིས་མི་རྐུ་བར་བྱེད་ན་མིའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །བྱ་ནི་རྣམ་པ་གཉིས་ཀྱིས་རྐུ་སྟེ། སྤར་བ་དང ། མངོན་སུམ་དུ་བབས་པས་སོ། །ཇི་ལྟར་སྤར་བས་ཤེ་ན། འདི་ལྟར་དགེ་སློང་གིས་བྱ་སྤར་ཏེ་རྐུ་བར་བྱེད་ན་བྱའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་སྤར་བས་སོ། །ཇི་ལྟར་མངོན་སུམ་དུ་བབས་པས་ཤེ་ན། འདི་ལྟར་བྱ་བའམ། བྱ་བའི་སློབ་མ་མཁས་པ་ཞིག་གིས་བྱ་དྲུངས་དབྱུང་བའི་ཕྱིར་དང །
Ca124b
ཆུད་གཟན་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་ནགས་མེས་བཏང་བར་གྱུར་ཅིང ། དེ་ན་བྱ་ཁ་ཅིག་དུ་བས་ཁྱབ་ཅིང་འཁྲུགས་པར་གྱུར་ནས། དགེ་སློང་རྣམས་ཀྱི་འཆག་ས་དག་ཏུ་བབས་སམ། དང་ར་དག་གམ། སྒོ་ཁང་དག་ཏུ་བབས་པར་གྱུར་པ་ན། དགེ་སློང་གིས་དེ་ལྟར་བབས་པའི་བྱ་རྐུ་བར་བྱེད་ན། བྱའི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་མངོན་སུམ་དུ་བབས་པས་སོ།། །།འདུལ་བ་རྣམ་པར་འབྱེད་པ། བམ་པོ་དྲུག་པ། རྐང་བཞི་པ་ཞེས་བྱ་བ་ནི། གླང་པོ་ཆེ་དང ། རྟ་དང ། རྔ་མོ་དང ། བ་ལང་དང ། བོང་བུ་དང ། ར་དང ། རི་དྭགས་དང ། མ་ཧེ་དང ། ཕག་དག་གོ་།དེ་དག་ནི་རྣམ་པ་གཉིས་ཀྱིས་རྐུ་སྟེ། ཁྱུ་ནས་དགར་བ་དང ། བརྟོད་པས་སོ། །ཇི་ལྟར་ཁྱུ་ནས་དགར་བས་ཤེ་ན། དགེ་སློང་གིས་གླང་པོ་ཆེ་ཁྱུ་ནས་དགར་བས་རྐུ་བར་བྱེད་ན། ཇི་སྲིད་མིག་སྔར་སྣང་བ་དེ་སྲིད་དུ་ཉེས་པ་སྦོམ་པོར་འགྱུར་ལ། མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་ཁྱུ་ནས་དགར་བས་སོ། །ཇི་ལྟར་བརྟོད་པས་ཤེ་ན། དགེ་སློང་གིས་གླང་པོ་ཆེ་བརྟོད་པ་སྣ་ཚོགས་ཤིང་ལྗོན་པའམ། རྩིག་པའམ། གཞན་དག་ལ་བརྟོད་པར་
Ca125a
༄#། །བྱེད་ནས། ཇི་སྲིད་མིག་སྔར་སྣང་བ་དེ་སྲིད་དུ་ཉེས་པ་སྦོམ་པོར་འགྱུར་ཏེ། མིག་སྔར་མི་སྣང་བར་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་བོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་ཏེ། དེ་ལྟར་བརྟོད་པས་སོ། །གླང་པོ་ཆེ་ལ་ཇི་ལྟ་བ་བཞིན་དུ་རྟ་ལ་སོགས་པ་རྐང་བཞི་པ་ལྷག་མ་རྣམས་ལ་ཡང་དེ་བཞིན་ནོ། །རྐང་མངས་ཞེས་བྱ་བ་ནི་གྲོག་མ་དང ། ཕྱེ་མ་ལེབ་དང ། ཏིལ་དང་ཕུབ་མ་དང་རུལ་བ་ཟ་བ་དང ། སྡིག་པ་དང ། ཏྲྱ་མ་བུ་ཀ་དང ། ཏྲེའི་ལ་ཏ་དག་གོ་།དེ་དག་ནི་གསུམ་གྱིས་སོགས་པར་བྱེད་དེ། གནོད་བྱེད་དག་དང ། གྲོང་ཁྱེར་སྲུང་བའི་སྣ་ཆེན་པོ་ལ་གཏོགས་པ་དག་དང ། རྒྱ་མཚོའི་ཚོང་བ་དག་གིས་སོ། །ཇི་ལྟར་གནོད་བྱེད་དག་གིས་ཤེ་ན། འདི་ལྟར་གནོད་བྱེད་དག་གིས་སྲོག་ཆགས་རྐང་མངས་དག་གིས་བུམ་པས་སོ་བཏང་བ་བཀང་སྟེ་འཇོག་པར་བྱེད་ཅིང ། དེ་དག་གིས་གང་གི་ཚེ་ཆད་པས་གཅད་པ་དག་ཁྲིད་དེ། དེ་དག་གི་རྐང་པའམ། ལག་པ་བུམ་པ་དེ་དག་གི་ནང་དུ་འཇུག་པར་བྱེད་ཅིང ། དེ་དག་དེ་དག་གིས་ཟིན་པ་ན་མྱུར་དུ་དཔྱ་དང་གསུག་མང་པོ་འཇལ་བར་བྱེད་དེ། དེ་ལྟར་གནོད་བྱེད་དག་གིས་སོ། །ཇི་ལྟར་གྲོང་ཁྱེར་སྲུང་བའི་སྣ་ཆེན་པོ་ལ་གཏོགས་པ་དག་གིས་ཤེ་ན། འདི་ལྟར་གྲོང་ཁྱེར་སྲུང་བའི་སྣ་ཆེན་པོ་ལ་གཏོགས་པ་དག་གིས་སྲོག་ཆགས་རྐང་མངས་དག་གིས་བུམ་པ་སོ་མ་བཏང་བ་བཀང་སྟེ་འཇོག་པར་བྱེད་ཅིང ། དེ་དག་གིས་གང་གི་ཚེ་ཕ་རོལ་ཀྱི་དཔུང་འོང་བ་དེའི་ཚེ་དེ་དང་ལྷན་ཅིག་གཡུལ་སྤྲོད་པར་བྱེད་པ་ན། གལ་ཏེ་དེ་དག་
Ca125b
གིས་འཇོམས་པར་ནུས་ན་དེ་ལྟ་ན་ལེགས། གལ་ཏེ་མི་ནུས་ན་སྲོག་ཆགས་རྐང་མངས་དག་གིས་བཀང་བའི་བུམ་པ་སོ་མ་བཏང་བ་ར་བ་ལ་གནས་པ་འཕེན་པར་བྱེད་ཅིང་དེ་དག་སྲོག་ཆགས་རྐང་མངས་དག་གིས་ཟིན་པ་ན་འབྱེར་བར་འགྱུར་ཏེ། དེ་ལྟར་གྲོང་ཁྱེར་སྲུང་བའི་སྣ་ཆེན་པོ་ལ་གཏོགས་པ་དག་གིས་སོ། །ཇི་ལྟར་རྒྱ་མཚོའི་ཚོང་པ་དག་གིས་ཤེ་ན། འདི་ལྟར་རྒྱ་མཚོའི་ཚོང་པ་དག་གིས་སྲོག་ཆགས་རྐང་མངས་དག་གིས་བུམ་བ་སོ་མ་བཏང་བ་བཀང་སྟེ་རྒྱ་མཚོའི་གྲུ་སྦྱར་ནས་ནོར་སྒྲུབ་པ་དག་རྒྱ་མཚོ་ཆེན་པོར་རྒལ་བ་ན་དེར་དེ་དག་ལ་ཆོམ་རྐུན་པ་རྟགས་མཚན་སྔོན་པོའམ་ནག་པོ་ཅན་དག་འོང་ཞིང་གྲུ་འཇོམས་པར་བྱེད་པ་ན། ཚོང་པ་དག་གིས་དེ་དག་དང་ལྷན་ཅིག་གཡུལ་སྤྲོད་པར་བྱེད་པ་ན། གལ་ཏེ་དེ་དག་གིས་འཇོམས་པར་བྱེད་ནུས་ན་དེ་ལྟ་ན་ལེགས། གལ་ཏེ་མི་ནུས་ན་སྲོག་ཆགས་རྐང་མངས་དག་གིས་བཀང་བའི་བུམ་པ་སོ་མ་བཏང་བ་འཕེན་པར་བྱེད་ཅིང ། དེ་དག་སྲོག་ཆགས་རྐང་མངས་དག་གིས་ཟིན་པ་ན་འབྱེར་བར་འགྱུར་ཏེ། དེ་ལྟར་རྒྱ་མཚོའི་ཚོང་པ་དག་གིས་སོ། །དགེ་སློང་གིས་སྲོག་ཆགས་རྐང་མངས་དག་རྐུ་བར་བྱེད་ན་སྲོག་ཆགས་རྐང་མངས་དག་གི་རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །སྡོམ་ལ། གདོལ་པ་དང་ནི་བག་རྫངས་ཅན། །སྣམ་སྦྱར་རེ་ཞིག་དུས་དང་ནི། །མཚན་བཟང་དང་ནི་ནོར་གྱིས་བྱིན། །རང་གིར་ཤེས་པས་ལྷུང་བཟེད་ལེན། །མི་ཕམ་དང་ནི་ཟླ་བས་སྦས། །བདག་ཉིད་སུན་འབྱིན་རྐུ་བ་ཡིན། སངས་
Ca126a
༄#། །རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་གདོལ་པ་དང ། བག་རྫངས་ཅན་ཞེས་བྱ་བ་གཏམ་འདྲེ་བ་ཕེབས་པར་སྨྲ་བ་འགྲོགས་བཤེས་སྨོས་འདྲིན་གནས་སྐབས་མཉམ་པར་སྤྱོད་པ་གཉིས་ཤིག་འཁོད་དེ། དེ་ལ་གདོལ་པ་ནི་གྲགས་པ་དང་བསོད་ནམས་ཆེ་བ་ཡིན་མོད་ཀྱི་ལུས་ཆུང་སྟེ་དེ་ལ་ལྷུང་བཟེད་དང་ཆོས་གོས་དང་འདྲ་བ་དང་ཕོར་བུ་དང་སྐ་རགས་ལྷག་པ་དག་ཡོད་དོ། །བག་རྫངས་ཅན་ནི་ལུས་ཆེ་བ་ཡིན་མོད་ཀྱི་གྲགས་པ་དང་བསོད་ནམས་ཆུང་སྟེ། ཆོས་གོས་གསུམ་ལྷུར་ལེན་ཅིང་དེའི་ཆོས་གོས་གསུམ་ངན་ཅིང་སྣམ་སྦྱར་ཡང་ཡོངས་སུ་རྙིངས་པ་ཡིན་ནོ། །དགེ་སློང་རྣམས་ཀྱིས་བག་རྫངས་ཅན་ལ་སྨྲས་པ། ཚེ་དང་ལྡན་པ་ཁྱོད་ཏེ་བོར་འདོད་པ་ཆུང་བར་གྱུར་ན། ཅིའི་ཕྱིར་བདག་ཉིད་གཅེར་བུར་སྟོན་པར་བྱེད། ཅི་རྙེད་པས་སམ། མ་རྙེད་པས། བག་རྫངས་ཅན་གྱིས་སྨྲས་པ། མ་རྙེད་པས་སོ། །ཅིའི་ཕྱིར་སྦྱོར་དུ་མི་འཇུད། སངས་རྒྱས་དང ། ཚེས་དང ། དགེ་འདུན་སྤངས་ཏེ་སུ་ཞིག་ཁོ་བོ་ལ་སྦྱིན་པར་བྱེད། དགེ་སློང་གདོལ་པ་དེ། ཁྱོད་ཀྱི་གཏམ་འདྲེ་བ་ཕེབས་པར་སྨྲ་བ་འགྲོགས་བཤེས་སྨོས་འདྲིན་ཡིན། དེ་ལ་ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ལྷག་པ་དག་ཡོད་ན་ཅིའི་ཕྱིར་དེ་ལ་མི་སློང ། བག་རྫངས་ཅན་གྱིས་སྨྲས་པ། མི་སྟེར་རོ། །ཅི་ཁྱོད་ཀྱིས་སྔོན་ལན་འགའ་བསླངས་སམ། ལན་འགའ་ཡང་མ་བསླངས་སོ། །ཅི་ཆུའི་
Ca126b
སྒྲ་ཁོ་ནས་ལྷམ་དག་འབུད་པར་བྱེད་དམ། སོང་ལ་སློང་ཤིག་དང་སྟེར་རོ། །བག་རྫངས་ཅན་དེ་དགེ་སློང་དེ་དག་གིས་སྤྲོ་བར་བྱས་ནས་གདོལ་པའི་གན་དུ་སོང་བ་དང ། གདོལ་པ་མེད་ནས་བག་རྫངས་ཅན་གྱིས་གདོལ་པ་ནི་ལུས་ཆུང་བ་ཡིན་པས་ཇི་འདིའི་ཆོས་གོས་གཞལ་བར་བྱ་སྟེ། གལ་ཏེ་བདག་གི་ལུས་ཀྱི་ཚད་དུ་འགྱུར་ན་བསླང་བར་བྱའི། གལ་ཏེ་མི་འགྱུར་ན། ཅིའི་ཕྱིར་དེ་དྲིན་བགྲང་དུ་གཞུག་པར་བྱ་སྙམ་དུ་བསམས་ནས། བག་རྫངས་ཅན་གདོལ་པའི་གནས་ཁང་དུ་ཞུགས་ཏེ། སྣམ་སྦྱར་ལྟ་བར་བརྩམས་པ་དང ། ཇི་ཙམ་ན་ཆོས་གོས་ཀྱི་གདང་ལ་སྣམ་སྦྱར་དམར་སེར་འདུག་པ་མཐོང་ནས་བག་རྫངས་ཅན་གྱིས་ཕོག་སྟེ་གྱོན་ཞིང་བསྙམས་ནས། ངོས་དང་ངོས་ལ་རྟོག་པར་བྱེད་པ་ན། གདོལ་པ་འོངས་ཏེ་མཐོང་མ་ཐག་ཏུ་སྨྲས་པ། ཚེ་དང་ལྡན་པ་ཁྱོད་ཀྱིས་སྣམ་སྦྱར་འདི་རྐུ་སེམས་ཀྱིས་བླངས་སོ། །བག་རྫངས་ཅན་གྱིས་སྨྲས་པ། ཚེ་དང་ལྡན་པ་ཁོ་བོས་རྐུ་སེམས་ཀྱིས་མ་བླངས་ཏེ། འདི་ལྟར་ཁོ་བོ་ལ་གདོལ་པ་ནི་ལུས་ཆུང་བ་ཡིན་པས། ཇེ་འདིའི་ཆོས་གོས་གཞལ་པར་བྱ་སྟེ། གལ་ཏེ་བདག་གི་ལུས་ཀྱི་ཚད་དུ་འགྱུར་ན་བསླང་བར་བྱའི། གལ་ཏེ་མི་འགྱུར་ན་ཡོ་བྱད་དོན་མེད་པ་འདིས་ཅི་བྱ་སྙམ་པའི་བློ་སྐྱེས་སོ། །གདོལ་པས་སྨྲས་པ། ཚེ་དང་ལྡན་པ་ཅིའི་ཕྱིར་གཞན་ནས་གཞན་དུ་འཕྲོ་བར་བྱེད། ཁྱོད་ཀྱི་རྐུ་སེམས་ཀྱིས་བླངས་པས་ཁྱོད་ལ་ཕམ་པར་འགྱུར་བའི་ལྟུང་བ་བྱུང་ངོ ། །བག་རྫངས་ཅན་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་
Ca127a
༄#། །རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་ཀྱི་བསམ་པ་ཇི་ལྟ་བུས་སྣམ་སྦྱར་དེ་བགོས། བག་རྫངས་ཅན་གྱིས་ཇི་ལྟར་གྱུར་པ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དཔྱོད་པའི་བསམ་པ་ཅན་འདི་ལ་ནི་ལྟུང་བ་མེད་དེ། ཡང་དགེ་སློང་གིས་ཡིད་གཅུགས་པ་མ་ཡིན་པ་ལ་ཡིད་གཅུགས་པ་བསྐྱེད་པར་མི་བྱའོ། །འདི་ལྟར་མཛའ་བཤེས་ནི་གསུམ་སྟེ། ཐ་མ་དང་འབྲིང་དང་ཆེན་པོའོ། །འདི་ལ་མཛའ་བཤེས་ཐ་མ་ལ་ནི་ཡིད་གཅུགས་པ་ཆུང་བྱའི། འབྲིང་ཡང་མི་བྱ། །ཆེན་པོ་ཡང་མི་བྱའོ། །མཛའ་བཤེས་འབྲིང་ལ་ནི་ཡིད་གཅུགས་པ་ཆུང་ངུ་དང་འབྲིང་བྱའི། ཆེན་པོ་མི་བྱའོ། །མཛའ་བཤེས་ཆེན་པོ་ལ་ནི་ཡིད་གཅུགས་པ་ཆུང་ངུ་དང་འབྲིང་དང་ཆེན་པོ་ཡང་བྱའོ། །དགེ་སློང་གིས་ཡིད་གཅུགས་པ་མ་ཡིན་པ་ལ་ཡིད་གཅུགས་པ་སྐྱེད་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མཚན་བཟང་དང ། ནོར་གྱིས་བྱིན་ཞེས་བྱ་བ་གཏམ་འདྲེ་བ་ཕེབས་པར་སྨྲ་བ་འགྲོགས་བཤེས་སྨོས་འདྲིན་མཚུངས་པར་འདོན་པ་གཉིས་ཤིག་འཁོད་དེ། མཚན་བཟང་གི་ལྷུང་བཟེད་ནི་མཛེས་པ་གསལ་བ་ཟླུམ་པ་ལོངས་སྤྱོད་བཟོད་པ་ཡིན་ལ།
Ca127b
ནོར་གྱིས་བྱིན་གྱི་ལྷུང་བཟེད་ཆུང་ངུ་ཡང་མཛེས་པ་གསལ་བ་ཟླུམ་པ་ལོངས་སྤྱད་བཟོད་པ་ཡིན་ནོ། །དེ་གཉིས་དུས་གཞན་ཞིག་ན་ཟས་ཀྱི་བྱ་བ་བྱས་ཏེ། འཆགས་ན་ལྷུང་བཟེད་འཁྲུ་བའི་ཚེ་མཚན་བཟང་གིས་ནོར་གྱིས་བྱིན་དབང་བའི་ལྷུང་བཟེད་ཆུང་ངུ་རང་གི་ལྷུང་བཟེད་དུ་བཅུག་སྟེ་སྨྲས་པ། ཚེ་དང་ལྡན་པ་ནོར་གྱིས་བྱིན་གང་ལ་ལྷུང་བཟེད་དང་ལྷུང་བཟེད་ཆུང་ངུ་འདི་ལྟ་བུ་བདོག་པ་དེ་ནི་སྙིང་ལས་ཆུང་ངུ་དགེ་བའི་ཕྱོགས་སྤྱོད་པར་བྱེད་དོ། །ནོར་གྱིས་བྱིན་གྱིས་སྨྲས་པ། གལ་ཏེ་ཐོབ་ན་ཁྱེར་ཤིག་།ཇི་ཙམ་དུ་གཞན་ཞིག་ན་ནོར་གྱིས་སྦྱིན་ལ་རི་བྲགས་ཤིག་ཏུ་བྱ་བ་ཅུང་ཞིག་བྱུང་ནས། དེས་སྨྲས་པ། ཚེ་དང་ལྡན་པ་མཚན་བཟང་ཁོ་བོ་ལ་རི་བྲགས་ཤིག་ཏུ་བྱ་བ་ཅུང་ཞིག་བྱུང་ན། ཁོ་བོའི་བྱ་བ་དེ་བྱེད་པ་དེ་ལ་ཁོ་བོས་ལྷུང་བཟེད་ཆུང་ངུ་སྦྱིན་ནོ། །མཚན་བཟང་གིས་སྨྲས་པ། སྦྱིན་ནམ། སྦྱིན་ནོ། །ཐབས་ཡིན་ནོ། །མཚན་བཟང་གིས་ཐབས་ཀྱིས་ཡིན་ནོ་ཞེས་བྱས་ནས་བདག་ལ་གཞི་འདིས་ཚངས་པ་མཚུངས་པར་སྤྱོད་པ་རྣམས་མཚན་བཟང་ནི་གླ་རྔན་གྱིས་ལས་བྱེད་དོ་ཞེས་ཟེར་བར་འགྱུར་རོ་སྙམ་ནས་འགྱོད་པ་སྐྱེས་ཏེ་མ་སོང་ངོ། །ཇི་ཙམ་དུ་གཞན་ཞིག་ན་མཚན་བཟང་ལ་རི་བྲགས་དེར་བདག་ཉིད་ཀྱི་བྱ་བ་ཞིག་བྱུང་ནས། དེས་སོང་ལ་དེ་གཉི་ག་བྱས་ཏེ་ཕྱིར་འོང་ངོ་སྙམ་དུ་བསམས་ནས། མཚན་བཟང་སོང་སྟེ་གཉི་ག་བྱས་ནས་ཕྱིར་འོངས་ཏེ་སྨྲས་པ། ཚེ་དང་ལྡན་པ་ནོར་གྱིས་བྱིན་ཁོ་བོས་ཁྱོད་ཀྱི་དགོས་པ་དེ་བསྒྲུབས་ཀྱིས་ལྷུང་བཟེད་ཆུང་ངུ་བྱིན་ཅིག་།ནོར་གྱིས་བྱིན་གྱིས་སྨྲས་པ། ཁྱོད་བདག་ཉིད་ཀྱི་དགོས་པ་ལ་སོང་བ་ཡིན་
Ca128a
༄#། །གྱི་ཁོ་བོའི་དོགས་པ་ལ་སོང་བ་མ་ཡིན་པས། ཁོ་བོས་མི་སྦྱིན་ནོ། །མཚན་བཟང་གིས་སྨྲས་པ། གལ་ཏེ་མི་སྦྱིན་ན་ཁོ་བོ་རང་ཉིད་ཀྱིས་བླང་བར་བྱའོ། །གལ་ཏེ་ཐོབ་ནའོ།། ཇི་ཙམ་ན་ནོར་གྱིས་བྱིན་ཕྱིར་བྱུང་བ་དེ་ན། མཚན་བཟང་གིས་ལྷུང་བཟེད་ཆུང་ངུ་བླངས་ཏེ། རང་གི་ལྷུང་བཟེད་དུ་བཅུག་སྟེ་བཞག་གོ་།ཇི་ཙམ་ན་ནོར་གྱིས་བྱིན་འོངས་པ་ན་ལྷུང་བཟེད་ཆུང་ངུ་མི་སྣང་ནས་དེས་སྨྲས་པ། ཚེ་དང་ལྡན་པ་ཁོ་བོའི་ལྷུང་བཟེད་ཆུང་ངུ་སུས་བླངས། མཚན་བཟང་གིས་སྨྲས་པ། སུ་དབང་བས་སོ། །སུ་དབང ། ཁོ་བོ་དབང་ངོ ། །ནོར་གྱིས་བྱིན་གྱིས་སྤྱོས་ཏེ་སྨྲས་པ། ཁྱོད་ཀྱིས་རྐུ་སེམས་ཀྱིས་བླངས་པས་ཁྱོད་ལ་ཕམ་པར་འགྱུར་བའི་ལྟུང་བ་བྱུང་ངོ ། །མཚན་བཟང་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་མཚན་བཟང་ལ་རྨས་པ། དགེ་སློང་ཁྱོད་ཀྱིས་བསམ་པ་ཇི་ལྟ་བུས་ལྷུང་བཟེད་ཆུང་ངུ་དེ་བླངས། དེས་ཇི་ལྟར་གྱུར་པ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་རང་གིར་འདུ་ཤེས་པས་ལྷུང་བཟེད་ཆུང་ངུ་བླངས་པས་འདི་ལ་ནི་ལྟུང་བ་མེད་དེ། ཡང་དགེ་སློང་གི་གླ་རྔན་གྱི་ལས་མི་བྱ་བར་འདི་ལྟར་ལག་པོད་དམ། བསོད་ནམས་འདོད་པས་ལས་བྱའོ། །དགེ་སློང་གིས་གླ་རྔན་གྱིས་
Ca128b
ལས་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མི་ཕམ་དང་ཟླ་བས་སྦས་ཞེས་བྱ་བ་གཏམ་འདྲེ་བ་ཕེབས་པར་སྨྲ་བ་འགྲོགས་བཤེས་སྨོས་འདྲིན་གཉིས་ཤིག་འཁོད་དོ། །ཟླ་བས་སྦས་ནི་གྲགས་པ་དང་བསོད་ནམས་ཆེ་བ་ཡིན་ཏེ། དེ་ལ་ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ལྷག་པ་དག་ཡོད་དོ། །མི་ཕམ་ནི་གྲགས་པ་དང་བསོད་ནམས་ཆུང་སྟེ་ཆོས་གོས་གསུམ་ལྷུར་ལེན་ཅིང་དེའི་ཆོས་གོས་གསུམ་ངན་ཅིང་སྣམ་སྦྱར་ཡང་ཡོངས་སུ་རྙིངས་པ་ཡིན་ནོ། །དགེ་སློང་རྣམས་ཀྱི་མི་ཕམ་ལ་སྨྲས་པ། ཚེ་དང་ལྡན་པ་ཁྱོད་ཏེ་པོར་འདོད་པ་ཆུང་བར་གྱུར་ན། ཅིའི་ཕྱིར་བདག་ཉིད་གཅེར་བུར་སྟོན་པར་བྱེད། ཅི་རྙེད་པས་སམ། མ་རྙེད་པས། མི་ཕམ་གྱིས་སྨྲས་པ། མ་རྙེད་པས་སོ། །ཅིའི་ཕྱིར་སྦྱར་དུ་མི་འཇུད། སངས་རྒྱས་དང་ཆོས་དང་དགེ་འདུན་སྤངས་ཏེ་སུ་ཞིག་ཁོ་བོ་ལ་སྦྱིན་པར་བྱེད། དགེ་སློང་ཟླ་བས་སྦས་དེ་ཁྱོད་ཀྱི་གཏམ་འདྲེ་བ་ཕེབས་པར་སྨྲ་བ་འགྲོགས་བཤེས་སྨོས་འདྲིན་ཡིན་ལ། དེ་ལ་ལྷུང་བཟེད་དང་ཆོས་གོས་དང་དྲ་བ་དང་ཕོར་བུར་དང་སྐ་རགས་ལྷག་པ་དག་ཡོད་ན། ཅིའི་ཕྱིར་དེ་ལ་མི་སློང ། མི་ཕམ་གྱིས་སྨྲས་པ། མི་སྟེར་རོ། །ཅི་ཁྱོད་ཀྱིས་སྔོན་ལན་འགའ་བསླངས་སམ། ལན་འགའ་ཡང་མ་བསླངས་སོ། །ཅི་ཆུའི་སྒྲ་ཁོ་ནས་ལྷམ་དག་འབུད་པར་བྱེད་དམ། སོང་ལ་སློངས་ཤིག་དང་སྟེར་རོ། །
Ca129a
༄#། །མི་ཕམ་དེ་དགེ་སློང་དེ་དག་གིས་སྤྲོ་བར་བྱས་ནས་ཟླ་བས་སྦས་ཀྱི་གན་དུ་སོང་སྟེ་སྨྲས་པ། ཚེ་དང་ལྡན་པ་ཟླ་བས་སྦས་བདག་ལ་ལྷུང་བཟེད་བྱིན་ཅིག་།ཟླ་བས་སྦས་ཀྱིས་སྨྲས་པ། མི་སྦྱིན་ནོ། །མི་ཕམ་གྱིས་སྨྲས་པ། གལ་ཏེ་ལྷུང་བཟེད་མི་སྦྱིན་ན་ཆོས་གོས་བྱིན་ཅིག་།ཟླ་བས་སྦས་ཀྱིས་སྨྲས་པ། ཅི་ཁོ་བོ་ཁྱོད་ཀྱིས་ཁྱིམ་བདག་མགོ་རེག་ཏུ་མཐོང་ངམ། ཁྱོད་ལ་ཁ་ཚར་ཡང་ཡོངས་སུ་མི་གཏང་ན། ཆོས་གོས་ལྟ་སྨོས་ཀྱང་ཅི་དགོས། མི་ཕམ་གྱིས་སྤྱོས་ཏེ། ཁོ་བོ་འདིའི་འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་ན། འདི་དེ་སྐད་ཅེས་ཁ་ཚར་ཡང་ཁྱོད་ལ་ཡོངས་སུ་མི་གཏང་ན། ཆོས་གོས་ལྟ་སྨོས་ཀྱང་ཅི་དགོས་ཞེས་ཟེར་རོ་སྙམ་དུ་བསམས་ནས། མི་ཕམ་གྱིས་སྨྲས་པ། དེང་གོས་ཐམས་ཅད་མ་ཕྲོགས་ན། མི་ཕམ་ཞེས་བྱ་བའི་མིང་མི་བཟུང་ངོ་ཞེས་མི་ཕམ་དེ་ནམ་ཞིག་ན་འདིའི་ཆོས་གོས་དག་རྐུ་བར་བྱ་སྙམ་དུ་སྐབས་ཚོལ་ཞིང་དེ་ལྷུར་ལེན་བཞིན་དུ་སྡོད་དོ། །ཇི་ཙམ་དུས་གཞན་ཞིག་ན་ཟླ་བས་སྦས་ལ་བཙོ་བླག་གི་ལས་ཉེ་བར་གནས་པར་གྱུར་པ་དང ། མི་ཕམ་དེ་ཟླ་བས་སྦས་ཀྱི་དྲུང་དུ་སོང་སྟེ་སྨྲས་པ། ཚེ་དང་ལྡན་པ་ཟླ་བས་སྦས་ཁོ་བོས་ཀྱང་གྲོགས་བྱའོ། །ཟླ་བས་སྦས་ཀྱིས་སྨྲས་པ། མ་ཉེས་ཀྱིས་དེ་བཞིན་གྱིས་ཤིག། མི་ཕམ་དེ་ཟླ་བས་སྦས་ཀྱི་ཆོས་གོས་དག་འཚེང་པར་བྱེད། བྱི་དོར་བྱེད། འདྲེན་པར་བྱེད་ཅིང་བཟློག་ཅིང་བཟློག་ཅིང་རྟོག་པར་བྱེད་དོ། །ཟླ་བས་སྦས་ཀྱིས་འདི་འདི་ལྟར་ལྟ་བས་བདག་གི་ཆོས་གོས་དག་བཟློག་ཅིང་བཟློག་ཅིང་རྟོག་པར་བྱེད་པ་ལས་ན་
Ca129b
གདོན་མི་ཟ་བར་བདག་གི་ཆོས་གོས་འདི་དག་རྐུ་བར་བྱེད་དོ་སྙམ་དུ་བསམས་ནས། ཟླ་བས་སྦས་དོགས་པ་དང་བཅས་པས་ཆོས་གོས་དག་ཁ་བསྒྱུར་ནས་གཏུར་བུར་བཅུག་སྟེ་དེ་དག་སྔས་སུ་བཅུག་ནས་ཉལ་ལོ། ། དགེ་སློང་དག་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་སྤྱོད་པས། མི་ཕམ་གྱིས་སྨྲས་པ། ཚེ་དང་ལྡན་པ་ཟླ་བ་སྦས་ཚུར་ཤོག་དགེ་བའི་ཕྱོགས་བྱེད་དུ་འདོང ། ཟླ་བས་སྦས་ཀྱིས་སྨྲས་པ། ཁྱོད་སོང་ཞིག་།ཁོ་བོ་ངལ་བས་ཕྱི་བཞིན་འོང་ངོ ། །མི་ཕམ་པ་ཚེ་དང་ལྡན་པ་ཤོག་ཅིག་ཅེས་ཟེར་ཏེ་ཕྱིར་བྱུང་ངོ ། །ཟླ་བས་སྦས་ཀྱིས། གལ་ཏེ་འགྲོ་ན་ནི་ཆོས་གོས་དག་བརླག་པར་འགྱུར། འོན་ཏེ་མི་འགྲོ་ན་ནི་བདག་གི་དགེ་བའི་ཕྱོགས་ཡོངས་སུ་ཉམས་པར་འགྱུར་ན། གང་གི་ཕྱིར་བདག་གི་ཆོས་གོས་དག་ཀྱང་བརླག་པར་མི་འགྱུར་ལ། དགེ་བའི་ཕྱོགས་ཀྱང་ཡོངས་སུ་ཉམས་པར་མི་འགྱུར་བའི་ཐབས་ཅི་ཡོད་སྙམ་དུ་སེམས་ཤིང་རིག་ནས། བདག་ཉིད་ཀྱི་གཏུར་བུ་མི་ཕམ་གྱི་སྔས་སུ་བཅུག་སྟེ། མི་ཕམ་དབང་བའི་གཏུར་བུ་བདག་ཉིད་ཀྱི་སྔས་སུ་བཅུག་ནས་ཉལ་ལོ། ། དགེ་སློང་དག་གིས་ནམ་གྱི་ཆ་སྨད་ལ་ཁ་ཏོན་བྱ་བར་བརྩམས་པ་དང ། ཟླ་བས་སྦས་ཀྱིས་མི་ཕམ་ལ་སྨྲས་པ། ཚེ་དང་ལྡན་པ་མི་ཕམ་ལོངས་ལ་དགེ་བའི་ཕྱོགས་སྤྱོད་ཅིག་།མི་ཕམ་གྱིས་སྨྲས་པ། ཁོ་བོས་དགེ་བའི་ཕྱོགས་བྱས་ཟིན་གྱིས། ད་ཁྱོད་སོང་ལ་དགེ་བའི་ཕྱོགས་སྤྱོད་ཅིག་།ཁོ་བོ་ངལ་བ་ངལ་སོས་སོ་ཞེས་ཟླ་བས་སྦས་དགེ་བའི་ཕྱོགས་ཀྱི་ཆེད་དུ་སོང་ངོ ། །མི་ཕམ་གྱིས་རེ་ཞིག་དུས་ནི་སྣང་ན། ལམ་གྱི་
Ca130a
༄#། །དུས་ཡིན་ནམ་མ་ཡིན་སྙམ་དུ་བསམས་ནས། དུས་བཟང་པོ་མཐོང་བ་དང་དེས་ཟླ་བས་སྦས་ཀྱི་སྔ་ནས་བདག་ཉིད་ཀྱི་གཏུར་བུ་ཁྱེར་ཏེ་སོང་ངོ ། །ཇི་ཙམ་ན་མཚན་མོ་ནམ་ནངས་པར་གྱུར་པ་དང ། དེས་རེ་ཞིག་གོས་ཅི་འདྲ་བ་དག་གིས་བདག་ཕམ་པར་གྱུར་པའི་ལྟུང་བ་བྱུང་བ་བལྟའོ་སྙམ་དུ་བསམས་ནས། ཇི་ཙམ་ན་བདག་ཉིད་ཀྱི་རྙང་རྙིང་དག་མཐོང་ནས་ཡིད་མི་བདེ་བར་གྱུར་ཏེ། བདག་ཉིད་ཀྱི་ཆོས་གོས་དག་ཁོ་ནས་བདག་ཕམ་པར་གྱུར་གྱིས་ལྕགས་ཀྱི་ཐུ་ལུམ་འཆའ་བས་ཅི་བྱ། ཕྱིར་འབབས་པར་བྱའོ་སྙམ་མོ། །དེས་ཡང་ཇེ་བཅོམ་ལྡན་འདས་ཀྱི་སྤྱན་སྔར་འགྲོ་བར་བྱ་སྟེ། གལ་ཏེ་སྐལ་པ་ཡོད་པར་འགྱུར་ན་ནི་བཅོམ་ལྡན་འདས་ཀྱི་དྲུང་དུ་ཚངས་པར་སྤྱོད་པ་སྤྱད་པར་བྱའོ། །འོན་ཏེ་སྐལ་པ་མེད་ན་ནི་ཕྱིར་འབབས་སོ་སྙམ་དུ་བསམས་ནས། དེ་བཅོམ་ལྡན་འདས་གང་ན་བ་དེར་སོང་ངོ ། །དེའི་ཚེ་ན་བཅོམ་ལྡན་འདས་དགེ་སློང་བརྒྱ་ཕྲག་དུ་མའི་འཁོར་གྱི་མདུན་ན་ཆོས་སྟོན་པའི་ཕྱིར་བཞུགས་ཤིང་ཆོས་སྟོན་ཏོ། །བཅོམ་ལྡན་འདས་ཀྱིས་ཚེ་དང་ལྡན་པ་མི་ཕམ་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེར་གྱིས་ཐག་རིང་པོ་ཁོ་ན་ནས་འོང་བའི་དགེ་སློང་དེ་མཐོང་ངམ། བཙུན་པ་མཐོང་ངོ ། །དགེ་སློང་དག་མི་ཕམ་མི་གཏི་མུག་ཅན་འདི་ནི་རང་གི་ཆོས་གོས་རྙང་རྙིང་དག་གིས་ཉེས་པ་སྦོམ་པོའི་ལྟུང་བ་བྱུང་ངོ ། །དགེ་སློང་དག་དེ་ལྟར་རྐུ་སེམས་ལ་ནི་ཉེས་
Ca130b
དམིགས་འདི་དང་གཞན་དག་ཀྱང་ཡོད་པས། དེའི་ཕྱིར་དགེ་སློང་གིས་རྐུ་སེམས་ཀྱིས་རང་གི་ལྷུང་བཟེད་དང་ཆོས་གོས་ཀྱང་བླང་བར་མི་བྱའོ། །དགེ་སློང་གིས་རྐུ་སེམས་ཀྱིས་རང་གི་ལྷུང་བཟེད་དང་ཆོས་གོས་ལེན་ན་ཉེས་པ་སྦོམ་པོར་འགྱུར་རོ། །སྡོམ་ལ། སྣམ་སྦྱར་འཕྱང་བར་གྱུར་པ་དང ། །བགམ་ཕྱིར་འབྲུ་མར་སློང་བ་དང ། །ཁྱིམ་བདག་བུ་དང་ཚ་བོ་དང ། །ལྷ་འབངས་པི་ལི་ད་ཡི་བུ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མ་ཤར་ནས་སྐྱེས་པ་དང ། ལྷོ་ནས་སྐྱེས་པ་གཉིས་ཤིག་འདུག་སྟེ།་ཤར་ནས་སྐྱེས་པ་ནི་མདུན་དུ་འགྲོ་བའི་དགེ་སྦྱོང་མ་ཡིན། ལྷོ་ནས་སྐྱེས་པ་ནི་ཕྱི་བཞིན་འབྲང་བའི་དགེ་སྦྱོང་མ་ཡིན་ནོ། །དེ་གཉིས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཞིང་སྤྱན་སྔར་སོང་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །བཅོམ་ལྡན་འདས་ཀྱིས་དེ་གཉིས་ལ་ཆོས་བསྟན་ནས། དེ་གཉིས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་དོང་བ་དང ། ཤར་ནས་སྐྱེས་པ་མདུན་དུ་འགྲོ་བ་དེའི་སྣམ་སྦྱར་ཕྲག་པ་ལ་གྱོན་པ་འཕྱང་བར་གྱུར་ནས་ལྷོ་ནས་སྐྱེས་པ་ཕྱི་བཞིན་འོང་བས་སྨྲས་པ། འཕགས་མ་ཨ་བ་ས་ཋ་ཨ་བ་ས་ཋ། ཤར་ནས་སྐྱེས་པ་དེ་ཆོས་ཀྱི་ཤུགས་ཐོབ་པས་མི་སེམས་པས་སྣམ་སྦྱར་ལྷུང་བར་གྱུར་ནས། ལྷོ་ནས་སྐྱེས་པས་བླངས་ཏེ། དེས་འདི་ལྟར་བདག་གིས་དེ་ཕུལ་ན། འཕགས་མའི་དགེ་བའི་ཕྱོགས་ཡོངས་
Ca131a
༄#། །སུ་ཉམས་པར་འགྱུར་བས་དབྱར་ཁང་དུ་ཕྱིན་ནས་དབུལ་བར་བྱའོ་སྙམ་དུ་བསམས་ནས་དེ་གཉིས་དབྱར་ཁང་དུ་སོན་པ་དང ། ཤར་ནས་སྐྱེས་མྱུར་བ་མྱུར་བ་ཁོ་ནར་གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ནས། གཙུག་ལག་ཁང་དུ་ཞུགས་ཏེ་སྐྱིལ་མོ་ཀྲུང་ཕྱེད་ཀྱིས་འདུག་གོ་།ལྷོ་ནས་སྐྱེས་པས་གལ་ཏེ་ཕུལ་ན་ཉེས་དམིགས་དེ་ཁོ་ན་བསྟབ་པར་འགྱུར་བས། རེ་ཞིག་ཕྱིས་ལངས་པ་ལ་དབུལ་ལོ་སྙམ་དུ་བསམས་ནས། དེས་སྣམ་སྦྱར་དེ་རང་གི་གནས་ཁང་དུ་ཁྱེར་ཏེ་ཆོས་གོས་ཀྱི་གདང་ལ་བཞག་གོ་།ཇི་ཙམ་ཉི་མ་གཞན་ཞིག་ན་མཚན་མོ་ནམ་ནངས་པ་དང ། ཤར་ནས་སྐྱེས་པས་སྨྲས་པ། གཞོན་ནུ་མ་སྣམ་སྦྱར་ཁྱེར་ཤོག་།བསོད་སྙོམས་ལ་འགྲོའོ། །གཞོན་ནུ་མ་དེ་གནས་ཁང་དུ་ཞུགས་ཏེ། ཆོས་གོས་ཀྱི་གདང་ལ་བལྟས་པ་དང ། སྣམ་སྦྱར་མ་མཐོང་ནས། དེས་སྨྲས་པ། འཕགས་མ་སྣམ་སྦྱར་མ་མཆིས་སོ། །ཤར་ནས་སྐྱེས་པས་སྨྲས་པ། ལྷོ་ནས་སྐྱེས་པའི་གནས་ཁང་དུ་ལྟོས་ཤིག་།གཞོན་ནུ་མ་དེ་ལྷོ་ནས་སྐྱེས་པའི་གནས་ཁང་དུ་ཞུགས་པ་དང ། ཆོས་གོས་ཀྱི་གདང་ལ་སྣམ་སྦྱར་བཞག་པ་མཐོང་ངོ ། །མཐོང་ནས་ཀྱང་སུས་འཕགས་མའི་སྣམ་སྦྱར་འདི་འདིར་ཁྱེར་སྙམ་དུ་སེམས་སོ། །ལྷོ་ནས་སྐྱེས་པས་ཐོས་ནས་དེས་སྨྲས་པ། ཁོ་མོས་ཁྱེར་ཏེ་འོངས་སོ། །ཅིའི་ཕྱིར་ལྷོ་ནས་སྐྱེས་པས་ཇི་ལྟར་གྱུར་པ་དེ་ལ་གོ་བར་བྱས་སོ། །དགེ་སློང་མ་དེ་དེ་ལ་ནང་དང་བཅས་པས་གཤེ་ཞིང་སྨྲས་པ། ཁྱོད་ཀྱིས་རྐུ་སེམས་ཀྱིས་
Ca131b
རང་གི་གནས་ཁང་དུ་བཅུག་སྟེ་བཞག་པས། ཁྱོད་ལ་ཕམ་པར་འགྱུར་བའི་ལྟུང་བ་བྱུང་ངོ ། །ལྷོ་ནས་སྐྱེས་པའི་དགེ་སློང་མ་དེ་བདག་ལ་ཡང་དག་པ་ཁོ་ནར་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་མ་རྣམས་ལ་བརྗོད་པ་དང ། དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་དགེ་སློང་མ་དེ་ལ་སྨྲས་པ། དགེ་སློང་མ་ཁྱོད་ཀྱིས་ཨ་བ་ས་ཋ་ཞེས་བརྗོད་པ་ཅིའི་ཐ་ཚིག་།བཙུན་པ་ཡུལ་དབུས་ན་ནར་བ་དང ། ལྷུང་བ་གང་ལགས་པ་དེ་ལ་བདག་ཅག་ཨ་བ་ས་ཋ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་འདི་ལ་ནི་སྐད་ཀྱི་ངེས་པའི་ཚིག་དང ། ཡུལ་གྱི་ངེས་པའི་ཚིག་དང ། ལྗོངས་ཀྱི་ངེས་པའི་ཚིག་གིས་ལྟུང་བ་མེད་མོད་ཀྱི།་འོན་ཀྱང་ཉེས་དམིགས་གང་ཡིན་པ་དེ་ཐམས་ཅད་གཞན་གྱི་དངོས་པོ་ལྷུང་བ་ཡུན་རིང་དུ་འཆང་བ་ལས་གྱུར་པ་ཡིན་པས། དེ་ལྟ་བས་ན་དགེ་སློང་ངམ། དགེ་སློང་མས་གཞན་གྱི་དངོས་པོ་ལྷུང་བ་ཡུན་རིང་དུ་བཅང་བར་མི་བྱ་སྟེ། འཆང་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་ངམ། དགེ་སློང་མས་གཞན་གྱི་དངོས་པོ་ལྷུང་བ་ཡུན་རིང་དུ་བཅང་བར་མི་བྱའོ་ཞེས་གསུངས་ནས། དགེ་སློང་ཞིག་གིས་གཞན་གྱི་དངོས་པོ་ལྷུང་བ་མཐོང་ནས། འདི་དགེ་སློང་ཆེ་གེ་མོ་ཞིག་གི་ཡིན་ནོ་ཞེས་ངོ་ཤེས་ནས། དགེ་སློང་དེའི་གནས་ཁང་དུ་སོང་སྟེ། དལ་བུས་ཁད་ཀྱིས་
Ca132a
༄#། །ཁད་ཀྱིས་སྒོ་གཏན་ལ་བརྡུངས་པ་དང ། དགེ་སློང་དེ་ཏིང་ངེ་འཛིན་ལས་ལངས་ནས་སྨྲས་པ། འདི་སུ། དེས་སྨྲས་པ། ཚེ་དང་ལྡན་པ་ཁྱོད་ཀྱི་དངོས་པོ་ལྷུང་བ་འདི་ཁོ་བོས་མཐོང་གིས་ལོངས་ཞིག་།དེས་སྨྲས་པ། ཚེ་དང་ལྡན་པ་ཁོ་བོ་ལ་དངོས་པོ་དེ་མ་བྱིན་པར་ལེན་པ་དག་གིས་བརྐུས་པར་གྱུར་པ་ནི་བླའི། ཁོ་བོ་ཁྱོད་ཀྱི་ཏིང་ངེ་འཛིན་གྱི་མཚན་མ་བཟང་པོ་འདི་འདྲ་བ་ལས་བསླང་བ་ནི་མ་ཡིན་ནོ། །དགེ་སློང་དེ་བདག་ལ་དགེ་སློང་ཏིང་ངེ་འཛིན་ལས་བསླང་བས་ལྟུང་བ་དང་བཅས་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས་དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་དགེ་སློང་དོན་དེའི་ཕྱིར་ཏིང་ངེ་འཛིན་ལས་བསླང་བར་མི་བྱ་བར་འདི་ལྟར་དེའི་མངོན་སུམ་དུ་གཟར་ཐག་ལ་བཏགས་ཏེ་གཞག་པར་བྱའོ། །དགེ་སློང་ཞིག་གིས་གཞན་གྱི་དངོས་པོ་ལྷུང་བ་མཐོང་ནས། དེས་འདི་དགེ་སློང་ཆེ་གེ་མོ་ཞིག་གི་ཡིན་ནོ་ཞེས་ངོ་ཤེས་ནས། དེས་དེ་ཁྱེར་ཏེ་དགེ་སློང་དེའི་དྲུང་དུ་སོང་ནས་ཚེ་དང་ལྡན་པ་ཁྱོད་ཀྱི་དངོས་པོ་ལྷུང་བ་འདི་ཁོ་བོས་མཐོང་གིས་ལོང་ཞིག་།དགེ་སློང་དེ་དེ་ལ་ནང་དང་བཅས་པ་ཡིན་པས་སྨྲས་པ། ཚེ་དང་ལྡན་པ་ཁྱོད་ཀྱིས་འདི་ལྷུང་བ་མཐོང་བ་མ་ཡིན་གྱི་འདི་ལྟར་ཁྱོད་ཀྱི་རྐུ་སེམས་ཀྱིས་བརྐུས་སོ། །དགེ་སློང་དེ་བདག་ལྟུང་བ་དང་བཅས་པར་མ་གྱུར་ཏམ་སྙམ་
Ca132b
དུ་འགྱོད་པ་སྐྱེས་པར་གྱུར་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་མོད་ཀྱི། འོན་ཀྱང་དགེ་སློང་གིས་དགེ་སློང་གི་ཡོ་བྱད་ལྷུང་བ་མཐོང་ན་དགེ་སྐོས་ལ་གཏད་པར་བྱ་ཞིང ། དགེ་སྐོས་ཀྱིས་ཀྱང་ཉི་མ་གཉིས་སམ་གསུམ་དུ་དགེ་འདུན་གྱི་ནང་དུ་བྲིམ་པར་བྱ་ཞིང་གལ་ཏེ་ངོ་ཤེས་པ་ཡོད་ན་དེ་གཏད་པར་བྱའོ། །གལ་ཏེ་མེད་ན་དགེ་འདུན་གྱིས་ཅི་བདེར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མ་རི་མ་ཞེས་བྱ་བ་དགྲ་བཅོམ་པ་རྣམ་པར་རྒྱལ་བར་བྱ་བ་ལས་རྣམ་པར་རྒྱལ་བ་ཞིག་འདུག་པ་དེ་ལ། སྤོས་འཚོང་གི་ཁྱེའུ་ཞིག་མངོན་པར་དད་པར་གྱུར་ནས། དེས་དེའི་རྐང་པ་གཉིས་ལ་ཕྱག་འཚལ་ཏེ། འཕགས་མ་ཁྱོད་ལ་ཅི་དང་ཅི་འཚལ་བ་དེའི་སླད་དུ་བཀའ་སྩོལ་ཅིག་དང ། ཐམས་ཅད་བསྒྲུབ་པར་བགྱིའོ་ཞེས་ཡོ་བྱད་ཐམས་ཅད་ཀྱིས་བསྟབས་པ་དང ། དེས་ཀྱང་བཞིན་བཟང་ཨ་རོག་གྱ་དེ་ལྟར་བྱའོ་ཞེས་དང་དུ་བླངས་སོ། །ཇི་ཙམ་དུས་གཞན་ཞིག་ན་དགེ་སློང་མ་རི་མ་ན་བར་གྱུར་ནས་བསོད་སྙོམས་ལ་མ་སོང་ཞིང་དགེ་སློང་མ་དག་བསོད་སྙོམས་ལ་ཞུགས་པ་དང ། སྤོས་འཚོང་གི་ཁྱེའུ་དེས། དེ་དག་ལ་ཕྱག་འཚལ་ཏེ་སྨྲས་པ། འཕགས་མ་དག་འཕགས་མ་རི་མ་རེ་ཞིག་མི་གདའ་ན་གར་བཞུད་ཞུའོ། །དེ་
Ca133a
༄#། །དག་གིས་སྨྲས་པ། བཞིན་བཟང་ཐུགས་མི་བདེའོ། །དེས་སྨྲས་པ། འཕགས་མ་དེ་ལ་བདག་གིས་ཡོ་བྱད་ཐམས་ཅད་ཀྱིས་བསྟབས་ན། དེས་བདག་ལ་ལན་འགའ་ཡང་ཅུང་ཟད་ཀྱང་མ་བླངས་ནས། དེའི་སླད་དུ་གལ་ཏེ་དེ་ལ་འཚལ་བ་འགའ་ཞིག་མཆིས་ན་སྤྱོན་ལ་སྙོམས་ཤིག་།དེ་དག་གིས་སྨྲས་པ། བཞིན་བཟང་ཨ་རོག་གྱ་དེ་བཞིན་བྱའོ་ཞེས་སྨྲས་ཏེ་དོང་ངོ ། ། དེས་དེ་བཞིན་ལན་གསུམ་གྱི་བར་དུ་བསྟབས་པ་དང ། དེ་ན་གཞོན་ནུ་མ་ཞིག་གིས་སྤོས་འཚོང་གི་ཁྱེའུ་འདི་ཡང་དང་ཡང་དུ་སྟོབས་པར་བྱེད་ན། ཅི་འདིའི་ཡང་དག་པར་སྟོབས་པས་སྟོབས་པར་བྱེད་དམ། འོན་ཏེ་རྟོག་པས་སྟོབས་པར་བྱེད་པ་བགམ་པར་བྱའོ་སྙམ་དུ་བསམས་ནས་དེས་དེ་ལ་འཕགས་མ་རི་མ་ལ་འབྲུ་མར་དགོས་སོ་ཞེས་ལྷུང་བཟེད་ཆུང་ངུ་ཕུལ་བ་དང ། དེས་དེ་ཉིད་ལ་འཕྲལ་ལ་བཙིར་བའི་འབྲུ་མར་གྱིས་ལྷུང་བཟེད་ཆུང་ངུ་བཀང་སྟེ་བྱིན་ནས་སྨྲས་པ། འཕགས་མ་གལ་ཏེ་ཡང་དེ་ལ་འཚལ་བ་ཅུང་ཟད་མཆིས་ན་སྤྱོན་ལ་སྣོམས་ཤིག་།གཞོན་ནུ་མ་དེས། བཞིན་བཟང་ཨ་རོག་གྱ་དེ་ལྟར་བྱའོ་ཞེས་སྨྲས་ཏེ་སོང་ནས། དེས་འབྲུ་མར་དེ་དགེ་སློང་མ་རི་མའི་ལག་པའི་བསྐུ་མཉེ་དང ། རྐང་པའི་བསྐུ་མཉེ་དང ། མགོ་དང་ལུས་ཀྱི་བསྐུ་མཉེ་དང ། མར་མེའི་འབྲུ་མར་དུ་སྤྱད་དོ། །ཇི་ཙམ་དུས་གཞན་ཞིག་ན་དགེ་སློང་མ་རི་མ་ནད་སོས་ཏེ་བསོད་སྙོམས་ལ་ཞུགས་པ་དང་སྤོས་འཚོང་གི་ཁྱེའུ་དེས་མཐོང་ནས། དེས་ཕྱག་འཚལ་ཏེ་སྨྲས་པ། འཕགས་མ་ཧ་ཅང་ཡུན་རིང་
Ca133b
ཞིག་མཐོང་ངོ ། །དེས་སྨྲས་པ། བུ་བདག་བྲོ་འཚལ་བར་གྱུར་ཏོ། །འཕགས་མ་བདག་གིས་ཡོ་བྱད་ཐམས་ཅད་ཀྱིས་བསྟབས་ན། ཁྱོད་ཀྱིས་ལན་འགའ་ཡང་ཅུང་ཟད་ཀྱང་བཀའ་སྩལ་ནས། འདི་ལྟར་འཕགས་མ་གཅིག་ཅིག་མཆིས་ཏེ། འཕགས་མ་རི་མ་ལ་འབྲུ་མར་འཚལ་ལོ་ཞེས་མཆི་ནས། བདག་གིས་དེ་ཉིད་ཀྱི་སུག་པར་འབྲུ་མར་འཕྲལ་ལ་བཙིར་བས་ལྷུང་བཟེད་ཆུང་ངུ་བཀང་སྟེ་སྩལ་ཏོ། །དེས་སྨྲས་པ། ཨ་རོག་གྱ་མ་ནོངས་སོ་ཞེས་སྨྲས་ཏེ་སོང་ནས། བསོད་སྙོམས་བརྒྱུས་ཏེ་དབྱར་ཁང་དུ་ཕྱིན་ནས། སྨྲས་པ། གཞོན་ནུ་མ་ཁྱེད་ཀྱིས་ཁོ་མོའི་མིང་གིས་སྤོས་འཚོང་གི་ཁྱེའུ་ཆེ་གེ་མོ་ཞིག་ལས་ལན་ཅིག་འབྲུ་མར་བླངས་སམ། གཞོན་ནུ་མ་དེས་སྨྲས་པ། འཕགས་མ་བདག་བསོད་སྙོམས་ལ་ཞུགས་པ་ན། དེས་ལན་གསུམ་གྱི་བར་དུ་འཕགས་མ་རི་མ་ལ་བདག་གིས་ཡོ་བྱད་ཐམས་ཅད་ཀྱིས་བསྟབས་ན། དེས་བདག་ལ་ལན་འགའ་ཡང་ཅུང་ཟད་ཀྱང་མ་བསླངས་ན། གལ་ཏེ་འཕགས་མ་ལ་འཚལ་བ་ཅུང་ཟད་མཆིས་ན། སྤྱོན་ལ་སྣོམས་ཤིག་ཅེས་མཆིས་ན། བདག་ལ་འདི་ཡང་དང་ཡང་དུ་སྟོབས་ན། ཅི་འདི་ཡང་དག་པར་སྟོབས་པས་སྟོབས་པར་བགྱིད་དམ། འོན་ཏེ་རྟོག་པས་སྟོབས་པར་བགྱིད་པ་བག་མ་མོ་སྙམ་པའི་བསམ་པ་བྱུང་ནས་བདག་གིས་དེ་ལ་འཕགས་མ་རི་མ་ལ་འབྲུ་མར་འཚལ་ལོ་ཞེས་ལྷུང་བཟེད་ཆུང་ངུ་ཕུལ་བ་དང ། དེས་འབྲུ་མར་གྱི་ལྷུང་བཟེད་ཆུང་ངུ་གཏམས་ཏེ་སྩལ་ནས། བདག་གིས་དེ་འཕགས་མའི་ཕྱག་དང་ཞབས་དང་དབུ་དང་སྐུའི་བསྐུ་མཉེ་
Ca134a
༄#། །དང་ཞུགས་མར་གྱི་འབྲུ་མར་དུ་སྤྱད་དོ། །དེས་སྨྲས་པ། ཅི་ཁོ་མོས་ཁྱོད་ལ་ལན་འགའ་ཞིག་དེའི་གན་དུ་སོང་ལ་འབྲུ་མར་ཁྱེར་ཏེ་ཤོག་ཅིག་ཅེས་སྨྲས་སམ། ལན་འགའ་ཡང་བཀའ་མ་སྩལ་ཏོ། །དེ་ལ་ནང་དང་བཅས་པའི་དགེ་སློང་མ་གཞན་ཞིག་གིས་སྨྲས་པ། འཕགས་མ་ཅི་འདི་འབའ་ཞིག་ཏུ་བས་སྙམ་མམ། འདིས་འཕགས་མ་རི་མ་རྒྱུར་བགྱིས་ཏེ་མཉན་ཡོད་ཐམས་ཅད་ཁྱབ་པར་བགྱིས་པས། ཕམ་པར་གྱུར་པ་དག་གིས་ལྟོ་གང་ངོ ། །དགེ་སློང་མ་དེ་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་མ་རྣམས་ལ་བརྗོད་དོ། །དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་ཀྱིས་དགེ་སློང་མ་དེ་ལ་རྨས་པ། དགེ་སློང་མ་ཁྱོད་ཀྱིས་བསམ་པ་ཇི་ལྟ་བུས་འབྲུ་མར་བླངས། བཅོམ་ལྡན་འདས་བགམ་པའི་བསམ་པས་སོ། །བཅོམ་ལྡན་འདས་ཀྱིས་བཀའ་སྩལ་པ།་དགེ་སློང་དག་དགེ་སློང་མ་བགམ་པའི་བསམ་པ་ཅན་འདི་ལ་ནི་ལྟུང་བ་མེད་དེ། ཡང་དགེ་སློང་ངམ། དགེ་སློང་མས་ནད་པ་ལ་མ་དྲིས་པར་སྨན་སྦྱོར་དུ་གཞུག་པར་མི་བྱ་བར་འདི་ལྟར་དགེ་འདུན་གྱི་ནད་པའི་སྨན་ཁང་ནས་བསླང་བར་བྱ་བའམ། འོན་ཏེ་དད་པ་ཅན་ལས་སམ། ཉེ་དུ་མང་བ་ཉིད་ཡིན་ན་ཡང་གང་སྦྱོར་དུ་གཞུག་ཅེས་ནད་པ་ལ་དྲི་བར་བྱ་ཞིང་དེས་གང་བརྗོད་པ་དེ་ལས་
Ca134b
བླང་བར་བྱའོ། །དགེ་སློང་ངམ་དགེ་སློང་མས་ནད་པ་ལ་མ་དྲིས་པར་སྨན་སྦྱོར་དུ་བཅུག་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། མཐར་གྱིས་བསོད་སྙོམས་ལ་རྒྱུ་ཞིང་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་ག་ལ་བ་དེར་སོང་ངོ ། །དེའི་ཚེ་ན་ཁྱིམ་བདག་མགོན་མེད་ཟས་སྦྱིན་གྱི་བུ་དག་ཕྱི་རོལ་གྱི་བསྟན་བཅོས་དག་ཀློག་གོ་།ཚེ་དང་ལྡན་པ་མོའུ་འགལ་གྱི་བུ་ཆེན་པོས་ཁྱིམ་བདག་མགོན་མེད་ཟས་སྦྱིན་གྱི་བུ་དག་ཕྱི་རོལ་གྱི་བསྟན་བཅོས་དག་ཀློག་པ་མཐོང་ངོ ། །མཐོང་ནས་ཀྱང་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱེའུ་དག་ཅི་ཀློག་།འཕགས་པ་སླད་རོལ་གྱི་བསྟན་བཅོས་དག་གོ་།ཁྱིམ་བདག་ཕྱི་རོལ་གྱི་བསྟན་བཅོས་དག་ནི་ལྕགས་ཀྱི་སེའུ་དང་འདྲ་སྟེ། རྟོགས་པར་དཀའ་ཞིང་རྟོགས་ན་ཡང་དེ་དག་གིས་ངེས་པ་ལ་འཇུག་པར་ཡང་མི་འགྱུར། ཟག་པ་ཟད་པར་ཡང་མི་འགྱུར་རོ། །སངས་རྒྱས་ཀྱི་བཀར་ནི་ཐོག་མ་དང་བར་དང་ཐ་མར་དགེ་བ། མངོན་པར་ཤེས་པ་དང ། རྫོགས་པར་བྱང་ཆུབ་པ་དང ། མྱ་ངན་ལས་འདའ་བར་འགྱུར་བ་ཡིན་ན། ཅིའི་ཕྱིར་དེ་མི་ཀློག་།འཕགས་པ་སུས་དེ་ཀློག་ཏུ་སྩོལ། ཁོ་བོས་ཀློག་ཏུ་གཞུག་
Ca135a
༄#། །གོ་།འཕགས་པ་མ་ནོངས་ཀྱིས་ཀློག་ཏུ་སྩོལ་ཅིག་།ཁྱིམ་བདག་མགོན་མེད་ཟས་སྦྱིན་གྱིས། ཁྱེའུ་དེ་དག་ལ་སྨྲས་པ། ཁྱེའུ་དག་འཕགས་པའི་དྲུང་དུ་རྒྱལ་བྱེད་ཀྱི་ཚལ་དུ་དེང་ལ་སངས་རྒྱས་ཀྱི་བཀའ་ཀློགས་ཤིག་།ཁྱེའུ་དེ་དག་ཉི་མ་རེ་རེ་ཞིང་རྒྱན་གྱིས་ཀླུབས་ཏེ་ཁྱེའུ་མངག་གཞུག་པ་དག་གིས་ཡོངས་སུ་བསྐོར་ནས་རྒྱལ་བྱེད་ཀྱི་ཚལ་དུ་དོང་སྟེ། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་སངས་རྒྱས་ཀྱི་བཀའ་བཀླག་པར་བརྩམས་སོ། །མཉན་ཡོད་ན་སྟོན་ཟླ་ཐ་ཆུང་གི་གཡོན་ཅན་ཞེས་བྱ་བ་ཆོམ་རྐུན་པ་དག་གི་ཀུན་ཏུ་སྤྱོད་པ་ནི་དེ་དག་དགག་དབྱེ་བྱས་མ་ཐག་ཏུ་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན། དེས་བཙལ་མི་དགོས་པར་ལོ་བསྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་ལ་ཁྱིམ་བདག་མགོན་མེད་ཟས་སྦྱིན་གྱི་བུ་དག་ཉི་མ་རེ་རེ་ཞིང ། རྒྱན་ཐམས་ཅད་ཀྱིས་ཀླུབས་ཏེ་ཁྱེའུ་མངག་གཞུག་པ་དག་གིས་བསྐོར་ནས་རྒྱལ་བྱེད་ཀྱི་ཚལ་དུ་འདོང་ཞིང་འཕགས་པ་མོའུ་འགལ་གྱི་བུ་ཆེན་པོ་ལས་སངས་རྒྱས་ཀྱི་བཀའ་ཀློག་པར་བྱེད་ཀྱིས་ལམ་གྱི་བར་དུ་བསྡད་དེ། དེ་དག་བཟུང་ན་འཕགས་པ་མོའུ་འགལ་གྱི་བུ་ཆེན་པོས་ནི་ཁྱེའུ་དག་ཁྱིམ་ན་འཁོད་དོ་སྙམ་དུ་ཤེས་ལ། ཁྱིམ་བདག་གིས་ཀྱང་འཕགས་པ་མོའུ་འགལ་གྱི་བུ་ཆེན་པོའི་དྲུང་ན་འཁོད་དོ་སྙམ་དུ་ཤེས་པས་གལ་ཏེ་ཁྱེའུ་དག་དབྲོག་པར་ནུས་ན་ནི་བདག་ཅག་གི་འཚོ་བའི་བར་གྱི་འཚོ་བ་ཡོད་ལ། ཇི་སྟེ་མ་ནུས་ན་རྒྱན་
Ca135b
དབྲོག་པར་བྱ་སྟེ། དེས་ཀྱང་བདག་ཅག་བརྩལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་རོ་སྙམ་པའི་བློ་སྐྱེས་སོ། །དེ་དག་བརྡ་བྱས་ཏེ་ལམ་གྱི་བར་དུ་དོང་ནས་འཁོད་པ་དང ། ཁྱེའུ་དེ་དག་ཀྱང་རྒྱན་ཐམས་ཅད་ཀྱིས་ཀླུབས་ཏེ་འོངས་ནས། ཆོམ་རྐུན་པ་དེ་དག་གིས་ཁྱེའུ་དེ་དག་ཁྱེར་རོ། །ཁྱེའུ་དེ་དག་གི་ཕྱི་བཞིན་ཁྱེའུ་མངག་གཞུག་པ་དག་འདོང་བ་དེ་དག་གིས་ཁྱེའུ་དེ་དག་ཆོམ་རྐུན་པ་དག་གིས་བརྐུས་པ་མཐོང་ནས། དེ་དག་གིས་ཁྱིམ་བདག་མགོན་མེད་ཟས་སྦྱིན་གྱི་དྲུང་དུ་བརྒྱུགས་ཏེ་སྦྲན་པ། ཁྱིམ་བདག་ཁྱོད་ཀྱི་སྲས་བུ་དག་།སྟོན་ཟླ་ཐ་ཆུང་གི་གཡོན་ཅན་དག་གིས་བརྐུས་ཀྱི།་ཐབས་དགོངས་ཤིག་།ཁྱིམ་བདག་མགོན་མེད་ཟས་བྱིན་བརྒྱུགས་ཏེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་གན་དུ་སོང་ནས་སྨྲས་པ། ལྷ་བདག་གི་བུ་དག་སྟོན་ཟླ་ཐ་ཆུང་གི་གཡོན་ཅན་དག་གིས་ཕྲོགས་ཀྱིས། བུའི་སློང་མོ་སྩལ་དུ་གསོལ། རྒྱལ་པོ་གསལ་རྒྱལ་གྱིས་རྒྱལ་བུ་གཞོན་ནུ་འཕགས་སྐྱེས་པོ་ལ་བསྒོ་བ། སོང་ལ་ཁྱིམ་བདག་གི་བུ་རྣམས་དང་ཆོམ་རྐུན་པ་དག་མྱུར་དུ་ཁུག་ཅིག་།འཕགས་སྐྱེས་པོ་ཡུན་རིང་པོ་ནས་ཁྱིམ་བདག་མགོན་མེད་ཟས་སྦྱིན་དང་ནང་དང་བཅས་པར་གྱུར་པས་དེའི་མོད་ལ་མ་སོང་ངོ ། །དེ་ནས་ལྷ་གང་དག་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་མངོན་པར་དད་པ་དེ་དག་གིས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།ཁྱོད་ཀྱི་ཉེ་གནས་དག་སྟོན་ཟླ་ཐ་ཆུང་གི་
Ca136a
༄#། །གཡོན་ཅན་དག་གིས་ཕྲོགས་ཀྱིས། བརྩོན་པར་མཛད་དུ་གསོལ། ཚེ་དང་ལྡན་པ་མོའུ་འགལ་གྱི་བུ་ཆེན་པོས་གལ་ཏེ་ཁྱེའུ་དག་ལ་མ་བསམས་ན། རེ་ཞིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང་ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་གླགས་རྙེད་པར་འགྱུར་ཞིང་དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུང་གི་གཡོན་ཅན་དག་གི་འཕྲོག་པར་བྱེད་ན། ཕྱིན་ཆད་སུ་ཞིག་རྒྱལ་བྱེད་ཀྱི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས་བདག་གིས་རྫུ་འཕྲུལ་རྣམ་པར་བསྟན་པར་བྱའོ་སྙམ་དུ་བསམས་ཤིང་རིག་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོས་རྫུ་འཕྲུལ་གྱིས། འཕགས་སྐྱེས་པོའི་དཔུང་མངོན་པར་སྤྲུལ་ཏེ། ཕྱོགས་བཞིར་རྔ་པ་ཊ་ཧ་བརྡུངས་པ་དང ། སྟོན་ཟླ་ཐ་ཆུང་གི་གཡོན་ཅན་དག་གིས་ཤེས་ལྡན་དག་བདག་ཅག་དམག་དཔོན་འཕགས་སྐྱེས་པོས་ཕྱོགས་བཞི་ནས་བསྐོར་གྱིས་ཟིན་པར་གྱུར་ན་མི་རུང་གིས་བོར་ལ་འདོང་ངོ་སྙམ་དུ་བསམས་ནས། དེ་དག་གིས་ཁྱེའུ་དེ་དག་བོར་ཏེ་བྱེར་རོ། །ཚེ་དང་ལྡན་པ་མོའུ་འགལ་གྱི་བུ་ཆེན་པོས་ཀྱང་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བརྟུལ་ནས་ལམ་དང་ཉེ་བར་ཤིང་ལྗོན་པའི་དྲུང་དུ་འདུག་གོ་།ཁྱེའུ་དེ་དག་ཀྱང་འོངས་པ་དང ། འཕགས་པ་མོའུ་འགལ་གྱི་བུ་ཆེན་པོས་སྨྲས་པ། ཁྱེའུ་དག་ཁྱེད་ཅག་གར་
Ca136b
དོང་དོང ། འཕགས་པ་བདག་ཅག་སྟོན་ཟླ་ཐ་ཆུང་གི་གཡོན་ཅན་དག་གིས་བརྐུས་སོ། །འོ་ན་སུས་ཐར་བར་བྱས། དམག་དཔོན་འཕགས་སྐྱེས་པོས་སོ། །ཁྱེའུ་དག་དེ་རིང་ཁྱེད་ཅག་གི་ཕ་མ་དག་ཡིད་མི་བདེ་བར་འཁོད་ཀྱིས་དེང་ལ་སང་ལྷོགས་ཤིག་།ཁྱེའུ་དེ་དག་ཁྱིམ་དུ་འཕགས་པ་དང ། དམག་དཔོན་འཕགས་སྐྱེས་པོ་ཡང་དཔུང་གི་ཚོགས་ཡན་ལག་བཞི་པ་གླང་པོ་ཆེ་བའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ་མཉན་ཡོད་ནས་བྱུང་ངོ ། །འཕགས་སྐྱེས་པོས་ཁྱེའུ་དེ་དག་མཐོང་ནས་སྨྲས་པ། ཁྱེའུ་དག་ཁྱེད་ཅག་གར་དོང་དོང ། དེ་དག་གིས་སྨྲས་པ། རྒྱལ་བྱེད་ཀྱི་ཚལ་དུ་འདོང་བ་ན། བདག་ཅག་སྟོན་ཟླ་ཐ་ཆུང་གི་གཡོན་ཅན་དག་གིས་བརྐུས་སོ། །འོ་ན་ཁྱེད་ཅག་སུས་ཐར་བར་བྱས། དམག་དཔོན་འཕགས་སྐྱེས་པོས་སོ། །འཕགས་སྐྱེས་པོས་བདག་ད་ལྟར་འགྲོ་བས་བདག་གིས་ཇི་ལྟར་འདི་དག་ཐར་བར་བྱས། འཕགས་པ་རྫུ་འཕྲུལ་ཆེ་བ་མཐུ་ཆེ་བ་འགའ་ཞིག་གིས་འདི་དག་ཐར་བར་བྱས་གོར་མ་ཆག་སྙམ་དུ་བསམས་ཤིང་རིག་ནས་སྨྲས་པ། ཁྱེའུ་ངག་ཁྱེད་ཅག་གིས་ཕྱོགས་དེ་ན་སུ་མཐོང ། འཕགས་པ་མོའུ་འགལ་གྱི་བུ་ཆེན་པོའོ། །འཕགས་སྐྱེས་པོ་དེས་འདི་དག་ཐར་བར་བྱས་ཀྱི།་གཞན་སུ་ཞིག་གིས་ནུས་སྙམ་དུ་བསམས་ཤིང་རིག་ནས་ཡིད་དགའ་ཞིང་ཡིད་དགའ་ནས། བདག་ཅག་གི་ཡུལ་ན་འཕགས་པ་དེ་ལྟར་རྫུ་འཕྲུལ་ཆེ་བ་མཐུ་ཆེ་བ་འཚེ་འདིའི་དོན་དང ། ཚེ་ཕྱི་
Ca137a
༄#། །མའི་དོན་དང ། ཚེ་འདི་དང་ཚེ་ཕྱི་མའི་དོན་ལ་སྐྱབས་མཛད་པ་བཞུགས་པ་ནི་བདག་ཅག་གིས་རྙེད་པ་ལེགས་པར་རྙེད་དོ་ཞེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་བསྔགས་པ་བརྗོད་ཅིང་མཉན་ཡོད་དུ་འཇུག་པ་ན་དྲུག་སྡེ་དག་ཀྱང་ཕྱིར་འབྱུང་ཞིང ། དྲུག་སྡེ་དག་གིས་སྨྲས་པ། ཁྱོད་སུའི་བསྔགས་པ་བརྗོད། འཕགས་སྐྱེས་པོས་སྨྲས་པ ། ཁྱེད་ཀྱིའོ། །ངེད་ཀྱིས་ཅི་བྱས། འཕགས་པ་མོའུ་འགལ་གྱི་བུ་ཆེན་པོས་ཁྱིམ་བདག་མགོན་མེད་ཟས་སྦྱིན་གྱི་བུ་དག་སྟོན་ཟླ་ཐ་ཆུང་གི་གཡོན་ཅན་དག་གིས་ཕྲོགས་པ་ཐར་པར་བྱས་སོ།། བཀྲེན་པ་དག་ཁོ་བོ་ཅག་དེ་འདྲ་ཡང་འོན་ཀྱང་འདི་ན་ལ་ལ་བྱི་བོ་གཅེར་བུ་དག་ལ་མངོན་པར་དད་དེ། གལ་ཏེ་གཅེར་བུ་དག་གིས་མཐོང་བར་གྱུར་དུ་ཟིན་ན། དེ་དག་གིས་ལམ་ཡང་ཉེ་བར་བསྟན་པར་འགྱུར་རོ། །དེ་དག་ཅང་མི་སྨྲ་བར་འཁོད་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་སོ། །དོན་ཉུང་ངུ་ལ་ལྟུང་བ་བྱུང་གིས་དོང་ལ་འཆགས་སུ་བཞུག་གོ་།དྲུག་སྡེ་དག་གཙུག་ལག་ཁང་དུ་དོང་སྟེ་ཟས་ཀྱི་བྱ་བ་བྱས་ནས། རྒན་རིམས་ཀྱིས་ཕྱག་འཚལ་ཏེ། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་གྱ། གནས་བརྟན་ཇེ་སྐབས་ཕྱེ་ཤིག་།ལྟུང་བ་སྡེ་ལྔ་པོ་
Ca137b
དག་ལ་སྐབས་ཕྱེའོ། །གནས་བརྟན་གྱིས་ཁྱིམ་བདག་མགོན་མེད་ཟས་སྦྱིན་གྱི་བུ་དག་སྟོན་ཟླ་ཐ་ཆུང་གི་གཡོན་ཅན་དག་གིས་ཕྲོགས་པ་ཐར་བར་བགྱིས་སམ། དེ་བཞིན་ཏེ་ཐར་པར་བྱས་སོ། ། གནས་བརྟན་བདག་ཅག་གིས་གནས་བརྟན་གོ་བསམ་གཏན་དང་རྣམ་པར་ཐར་པ་དང ། ཏིང་ངེ་འཛིན་དང་སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱིས་བདག་ཅག་གིས་ཐུགས་རྗེ་ཕྱོགས་གཅིག་པ་དང་ལྡན་ཞིང་ཉེ་གནས་ལ་ཐུགས་རྗེ་བར་མཛད་ལ་སྟོན་ཟླ་ཐ་ཆུང་གི་གཡོན་ཅན་དག་ལ་ཐུགས་རྗེ་བར་མི་མཛད་པར་མ་འཚལ་ཏོ། །གཞན་དག་གིས་བདག་གིར་བགྱིས་པའི་ནོར་དག་ཐར་པར་བགྱིས་པའི་ལྟུང་བ་བྱུང་བ་ཆོས་བཞིན་དུ་སླར་མཛོད་ཅིག་།ལྟུང་བ་མ་མཐོང་ངོ ། །ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་ཀྱིས་ཁང་སྐྱོང་སུ་སྣང ། གཎྜཱི་རྡུངས་ཤིག་།འདི་གནས་ནས་དབྱུང་བའི་ལས་བྱའོ་ཞེས་ཁང་སྐྱོང་གི་གན་དུ་དོང་ནས། སྨྲས་པ། ཚེ་དང་ལྡན་པ་གཎྜཱི་རྡུངས་ཤིག། ཅིའི་ཕྱིར། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་གནས་ནས་དབྱུང་བའི་ལས་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང་བསྟན་པ་ལ་ཆོས་ཀྱི་སྒྱུ་ཐབས་ཀྱིས་མི་མཐུན་པ་འགའ་མི་འབྱུང་ངམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས། དེས་ཁང་སྐྱོང་ལ་སྨྲས་པ། ཚེ་དང་ལྡན་པ་སུ་ཞིག་ཡོངས་སུ་གནས་
Ca138a
༄#། །པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད། གནས་བརྟན་སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལྟུང་བ་བྱུང་བ་ཆོས་བཞིན་སླར་མི་བགྱིད་པས། དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་མཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་སོང་ལ་ཞུས་ཤིག་དང ། བཅོམ་ལྡན་འདས་ཀྱིས་ཁྱེད་ཅག་ལ་ཇི་སྐད་ལུང་སྟོན་པར་མཛད་པ་དེ་དེ་བཞིན་དུ་ཟུངས་ཤིག་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་རྨས་པ། མོའུ་འགལ་གྱི་བུ་ཁྱོད་ཀྱི་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན། བཙུན་པ་བདག་འདི་སྙམ་བགྱིད་དེ། གལ་ཏེ་ཁྱེའུ་དག་ལ་མ་བསམས་ན་རེ་ཞིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང ། ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་
Ca138b
དད་པ་དག་གིས་ཀྱང་གླགས་རྙེད་པར་འགྱུར་ཞིང་དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུང་གི་གཡོན་ཅན་དག་གིས་འཕྲོག་པར་བྱེད་ན། ཕྱིན་ཆད་སུ་ཞིག་རྒྱལ་བྱེད་ཀྱི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས། བདག་གིས་རྫུ་འཕྲུལ་རྣམ་པར་བསྟན་པར་བགྱིའོ་སྙམ་དུ་བསམས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མོའུ་འགལ་གྱི་བུས་བསམ་པ་དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེ་ནས་ཚེ་དང་ལྡན་པ་པི་ལིན་དའི་བུ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ནས། མཐར་གྱིས་བསོད་སྙོམས་ལ་རྒྱུ་ཞིང་མག་པའི་ཁྱིམ་ག་ལ་བ་དེར་སོང་ངོ ། །དེའི་ཚེ་ན་ཚེ་དང་ལྡན་པ་པི་ལིན་དའི་བུའི་ཚ་བོ་དག་ཕྱི་རོལ་གྱི་བསྟན་བཅོས་དག་ཀློག་གོ་།ཚེ་དང་ལྡན་པ་པི་ལིན་དའི་བུས་ཚ་བོ་དག་ཕྱི་རོལ་གྱི་བསྟན་བཅོས་དག་ཀློག་པ་མཐོང་ངོ ། ། མཐོང་ནས་ཀྱང་མག་པ་ལ་འདི་སྐད་ཅེས་སྨྲས་སོ། །ཚ་བོ་ཁྱེའུ་དག་ཅི་ཀློག་།འཕགས་པ་སླད་རོལ་གྱི་བསྟན་བཅོས་དག་གོ་།ཚ་བོ་ཕྱི་རོལ་གྱི་བསྟན་བཅོས་དག་ནི་ལྕགས་ཀྱི་སེའུ་དང་འདྲ་སྟེ་རྟོགས་པར་དཀའ་ཞིང་རྟོགས་ན་ཡང་དེ་དག་གིས་ངེས་པ་ལ་འཇུག་པར་ཡང་མི་འགྱུར། ཟག་པ་ཟད་པར་ཡང་མི་འགྱུར་རོ། །སངས་རྒྱས་ཀྱི་བཀའ་ནི་ཐོག་མ་དང་བར་དང་ཐ་མར་དགེ་བ། མངོན་པར་
Ca139a
༄#། །ཤེས་པ་དང ། རྫོགས་པར་བྱང་ཆུབ་པ་དང ། མྱ་ངན་ལས་འདའ་བར་འགྱུར་བ་ཡིན་ན་ཅིའི་ཕྱིར་དེ་མི་ཀློག་།འཕགས་པ་སུས་དེ་ཀློག་ཏུ་སྩོལ། ཁོ་བོས་ཀློག་ཏུ་གཞུག་གོ་།འཕགས་པ་མ་ནོངས་ཀྱིས་ཀློག་ཏུ་སྩོལ་ཅིག་།མག་པ་དེས་ཁྱེའུ་དེ་དག་ལ་སྨྲས་པ། ཁྱེའུ་དག་འཕགས་པའི་དྲུང་དུ་འོད་མའི་ཚལ་དུ་དེང་ལ་སངས་རྒྱས་ཀྱི་བཀའ་ལྷོགས་ཤིག ། ཁྱེའུ་དེ་དག་ཉི་མ་རེ་རེ་ཞིང་རྒྱན་གྱིས་ཀླུབས་ཏེ་ཁྱེའུ་མངག་གཞུག་པ་དག་གིས་ཡོངས་སུ་བསྐོར་ནས། འོད་མའི་ཚལ་དུ་དོང་སྟེ། ཚེ་དང་ལྡན་པ་པི་ལིན་དའི་བུ་ལས་སངས་རྒྱས་ཀྱི་བཀའ་བཀླག་པར་བརྩམས་སོ། །རྒྱལ་པོའི་ཁབ་ན་སྟོན་ཟླ་ཐ་ཆུང་གི་གཡོན་ཅན་ཞེས་བྱ་བ་ཆོམ་རྐུན་པ་དག་གི་ཀུན་ཏུ་སྤྱོད་པ་ནི་དེ་དག་དགག་དབྱེ་བྱས་མ་ཐག་ཏུ་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན། དེས་བརྩལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་ལ་འཕགས་པ་པི་ལིན་དའི་བུའི་ཚ་བོ་དག་ཉི་མ་རེ་རེ་ཞིང ། རྒྱན་ཐམས་ཅད་ཀྱིས་ཀླུབས་ཏེ་ཁྱེའུ་མངག་གཞུག་པ་དག་གིས་བསྐོར་ནས། འོད་མའི་ཚལ་དུ་འདོང་ཞིང་འཕགས་པ་པི་ལིན་དའི་བུ་ལས་སངས་རྒྱས་ཀྱི་བཀའ་ཀློག་པར་བྱེད་ཀྱིས་ལམ་གྱི་བར་དུ་བསྡད་དེ། དེ་དག་བཟུང་ན་འཕགས་པ་པི་ལིན་དའི་བུས་ནི་ཁྱེའུ་དག་ཁྱིམ་ན་འཁོད་དོ་སྙམ་དུ་ཤེས་ལ། བྲམ་ཟེས་ཀྱང་འཕགས་པ་པི་ལིན་དའི་བུའི་དྲུང་ན་འཁོད་
Ca139b
དོ་སྙམ་དུ་ཤེས་པས་གལ་ཏེ་ཁྱེའུ་དག་དབྲོག་པར་ནུས་ན་ནི་བདག་ཅག་གི་འཚོ་བའི་བར་གྱི་འཚོ་བ་ཡོད་ལ། ཅི་སྟེ་མ་ནུས་ན་ནི་རྒྱན་དབྲོག་པར་བྱ་སྟེ། དེས་ཀྱང་བདག་ཅག་བརྩལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་རོ་སྙམ་པའི་བློ་སྐྱེས་སོ། །དེ་དག་བརྡ་བྱས་ཏེ་ལམ་གྱི་བར་དུ་དོང་ནས་འཁོད་པ་དང ། ཁྱེའུ་དེ་དག་ཀྱང་རྒྱན་ཐམས་ཅད་ཀྱིས་ཀླུབས་ཏེ་འོངས་ནས། ཆོམ་རྐུན་པ་དེ་དག་གིས་ཁྱེའུ་དེ་དག་གྲུར་བཅུག་སྟེ་ཁྱེར་རོ། །ཁྱེའུ་དེ་དག་གི་ཕྱི་བཞིན་ཁྱེའུ་མངག་གཞུག་པ་དག་འདོང་བ་དེ་དག་གིས་ཁྱེའུ་དེ་དག་ཆོམ་རྐུན་པ་དག་གིས་བརྐུས་པ་མཐོང་ནས། དེ་དག་གིས་ཚེ་དང་ལྡན་པ་པི་ལིན་དའི་བུའི་མག་པའི་དྲུང་དུ་བརྒྱུགས་ཏེ་སྦྲན་པ། ཇོ་བོ་ཁྱོད་ཀྱི་སྲས་བུ་དག་སྟོན་ཟླ་ཐ་ཆུང་གི་གཡོན་ཅན་དག་གིས་བརྐུས་ཀྱིས་ཐབས་དགོངས་ཤིག་།བྲམ་ཟེ་ཡང་བརྒྱུགས་ཏེ་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་གན་དུ་སོང་ནས་སྨྲས་པ། ལྷ་བདག་གི་བུ་དག་སྟོན་ཟླ་ཐ་ཆུང་གི་གཡོན་ཅན་དག་གིས་ཕྲོགས་ཀྱིས་བུའི་སློང་མོ་སྩལ་དུ་གསོལ།་རྒྱལ་པོ་གཟུགས་ཅན་སྙིང་པོས་རྒྱལ་པོ་གཞོན་ནུ་མ་སྐྱེས་དགྲ་ལ་བསྒོ་བ། སོང་ལ་བྲམ་ཟེའི་བུ་རྣམས་དང་ཆོམ་རྐུན་པ་དག་མྱུར་དུ་ཁུག་ཅིག་།མ་སྐྱེས་དགྲ་ཡུན་རིང་པོ་ནས་བྲམ་ཟེ་དེ་དང་ནང་དང་བཅས་པར་གྱུར་པས། དེའི་མོད་ལ་མ་སོང་ངོ ། །དེ་ན་ལྷ་གང་དག་ཚེ་དང་ལྡན་པ་པི་ལིན་དའི་བུ་ལ་མངོན་པར་དད་པ་དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །
Ca140a
༄#། །འཕགས་པ་མཁྱེན་པར་མཛོད་ཅིག་།ཁྱོད་ཀྱི་ཚ་བོ་དག་སྟོན་ཟླ་ཐ་ཆུང་གི་གཡོན་ཅན་དག་གིས་ཕྲོགས་ཀྱི་བརྩོན་པར་མཛད་དུ་གསོལ། ཚེ་དང་ལྡན་པ་པི་ལིན་དའི་བུས་གལ་ཏེ་ཁྱེའུ་དག་ལ་མ་བསམས་ན་རེ་ཞིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང ། ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ་མ་དད་པ་དག་གིས་ཀྱང་གླགས་རྙེད་པར་གྱུར་ཞིང ། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུང་གི་གཡོན་ཅན་དག་གིས་འཕྲོག་པར་བྱེད་ན། ཕྱིན་ཆད་སུ་ཞིག་འོད་མའི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས་བདག་གིས་རྫུ་འཕྲུལ་རྣམ་པར་བསྟན་པར་བྱའོ་སྙམ་དུ་བསམས་ཤིང་རིག་ནས་ཚེ་དང་ལྡན་པ་པི་ལིན་དའི་བུས་རྫུ་འཕྲུལ་གྱིས་སོང་སྟེ། གྲུའི་དྲུང་དུ་འདུག་པ་དང ། གྲུ་དེ་མི་འགུལ་བར་འདུག་གོ་།ཆོམ་རྐུན་པ་དག་གིས་ཅིའི་ཕྱིར་གྲུ་འདི་མི་འགུལ་པར་འདུག་སྙམ་དུ་བསམས་པ་དང ། ཚེ་དང་ལྡན་པ་པི་ལིན་དའི་བུ་གྲུ་དང་ཉེ་བ་ན་འདུག་པ་མཐོང་ངོ ། །མཐོང་ནས་ཀྱང་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་ཅིའི་སླད་དུ་མཐོ་འཚམ་པར་མཛད། རྒ་བའི་ཆོས་ཅན་དག་ཁོ་བོ་འགའ་ཞིག་མཐོ་འཚམ་པར་བྱེད་དམ། གལ་ཏེ་ཁོ་བོས་ཡོན་ཏན་གྱི་ཚོགས་འདི་ལྟ་བུ་རྟོགས་པར་མ་གྱུར་དུ་ཟིན་ན། དེང་ཁྱེད་ཀྱིས་ཁོ་བོའི་ཚ་བོ་དག་བརྐུས་པར་མི་འགྱུར་
Ca140b
རམ།་འཕགས་པ་གཏང་དུ་གསོལ། དེང་ཞིག་།ཚེ་དང་ལྡན་པ་པི་ལིན་དའི་བུས་རྫུ་འཕྲུལ་མངོན་པར་འདུ་བྱ་བ་དེ་དག་ཕྱིར་བརྟུལ་ནས་ཁྱེའུ་དེ་དག་ལ་འདི་སྐད་ཅེས་སྨྲས་སོ། ། ཁྱེའུ་དག་དེ་རིང་ཁྱེད་ཅག་གི་ཕ་མ་དག་ཡིད་མི་བདེ་བར་འཁོད་ཀྱིས་དེང་ལ་སང་ལྷོགས་ཤིག་།ཁྱེའུ་དེ་དག་ཁྱིམ་དུ་འཕགས་པ་དང ། གཞོན་ནུ་མ་སྐྱེས་དགྲ་ཡང་དཔུང་གི་ཚོགས་ཡན་ལག་བཞི་པ་གླང་པོ་ཆེ་བའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ་རྒྱལ་པོའི་ཁབ་ནས་བྱུང་ངོ ། །མ་སྐྱེས་དགྲས་ཁྱེའུ་དེ་དག་མཐོང་ནས་སྨྲས་པ་ཁྱེའུ་དག་ཁྱེད་ཅག་གར་དོང་དོང ། དེ་དག་གིས་སྨྲས་པ། འོད་མའི་ཚལ་དུ་འདོང་བ་ན་བདག་ཅག་སྟོན་ཟླ་ཐ་ཆུང་གི་གཡོན་ཅན་དག་གིས་བརྐུས་སོ། །འོ་ན་ཁྱེད་ཅག་སུས་ཐར་བར་བྱས། འཕགས་པ་པི་ལིན་དའི་བུས་སོ། །མ་སྐྱེས་དགྲ་ཡིད་དགའ་ཞིང་ཡིད་དགའ་ནས་བདག་ཅག་གི་ཡུལ་ན་འཕགས་པ་དེ་ལྟར་རྫུ་འཕྲུལ་ཆེ་བ་དེ་ལྟར་མཐུ་ཆེ་བ། ཚེ་འདིའི་དོན་དང་ཚེ་ཕྱི་མའི་དོན་དང ། ཚེ་འདི་དང་ཕྱི་མའི་དོན་ལ་སྐྱབས་མཛད་པ་བཞུགས་པ་ནི་བདག་ཅག་གིས་རྙེད་པ་ལེགས་པར་རྙེད་དོ་ཞེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་བསྔགས་པ་བརྗོད་ཅིང་རྒྱལ་པོའི་ཁབ་ཏུ་འཇུག་པ་ན་དྲུག་སྡེ་དག་ཀྱང་ཕྱིར་འབྱུང་ཞིང་དྲུག་སྡེ་དག་གིས་སྨྲས་པ། ཁྱོད་སུའི་བསྔགས་པ་བརྗོད། མ་སྐྱེས་དགྲས་སྨྲས་པ། ཁྱེད་ཀྱིའོ། །ངེད་ཀྱིས་ཅི་བྱས། འཕགས་པ་པི་ལིན་དའི་བུས། བྲམ་
Ca141a
༄#། །ཟེའི་བུ་དག་སྟོན་ཟླ་ཐ་ཆུང་གི་གཡོན་ཅན་དག་གིས་ཕྲོགས་པ་ཐར་བར་བྱས་སོ། །བཀྲེན་པ་དག་ཁོ་བོ་ཅག་དེ་འདྲ་ཡང་འོན་ཀྱང་འདི་ན་ལ་ལ་བྱི་བོ་གཅེར་བུ་དག་ལ་མངོན་པར་དད་དེ། གལ་ཏེ་གཅེར་བུ་དག་གིས་མཐོང་བར་གྱུར་ཏུ་ཟིན་ན། དེ་དག་གིས་ལམ་ཡང་ཉེ་བར་བསྟན་པར་འགྱུར་རོ། །དེ་དག་ཅང་མི་སྨྲ་བར་འཁོད་པ་དང ། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་སོ། །དོན་ཉུང་ངུ་ལ་ལྟུང་བ་བྱུང་གིས་དོང་ལ་འཆགས་སུ་གཞུག་གོ་།དྲུག་སྡེ་དག་གཙུག་ལག་ཁང་དུ་དོང་སྟེ་ཟས་ཀྱི་བྱ་བ་བྱས་ནས།་རྒན་རིམས་ཀྱིས་ཕྱག་འཚལ་ཏེ། ཚེ་དང་ལྡན་པ་པི་ལིན་དའི་བུ་ག་ལ་བ་དེར་དོང་ནས་ཕྱིན་པ་དང ། ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་ཨ་རོག་གྱ། གནས་བརྟན་ཇེ་སྐབས་ཕྱེ་ཞིག་།ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་བྲམ་ཟེའི་བུ་དག་སྟོན་ཟླ་ཐ་ཆུང་གི་གཡོན་ཅན་དག་གིས་ཕྲོགས་པ་ཐར་བར་བགྱིས་སམ། དེ་བཞིན་དུ་ཐར་བར་བྱས་སོ། །གནས་བརྟན་བདག་ཅག་གིས་གནས་བརྟན་གོ་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱི། བདག་ཅག་གིས་ཐུགས་རྗེ་ཕྱོགས་གཅིག་པ་དང་ལྡན་ཞིང་བྲམ་ཟེའི་བུ་དག་ལ་ཐུགས་རྗེ་བར་
Ca141b
མཛད་ལ། སྟོན་ཟླ་ཐ་ཆུང་གི་གཡོན་ཅན་དག་ལ་ཐུགས་རྗེ་བར་མི་མཛད་པར་མ་འཚལ་ཏོ། །གཞན་དག་གིས་བདག་གིར་བགྱིས་པའི་ནོར་དག་ཐར་བར་བགྱིས་པའི་ལྟུང་བ་བྱུང་བ་ཆོས་བཞིན་དུ་མཛོད་ཅིག། ལྟུང་བ་མ་མཐོང་ངོ ། །ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་ཀྱི་ཁང་སྐྱོང་སུ་སྣང ། གཎྜཱི་རྡུངས་ཤིག་།འདི་གནས་ནས་དབྱུང་བའི་ལས་བྱའོ་ཞེས་ཁང་སྐྱོང་གི་གན་དུ་དོང་ནས་སྨྲས་པ། ཚེ་དང་ལྡན་པ་གཎྜཱི་བརྡུངས་ཤིག་།ཅིའི་ཕྱིར། ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས། དེ་གནས་ནས་དབྱུང་བའི་ལས་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང་བསྟན་པ་ལ་ཆོས་སྒྱུ་ཐབས་ཀྱིས་མི་མཐུན་པ་འགའ་མི་འབྱུང་ངམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས་དེས་ཁང་སྐྱོང་ལ་སྨྲས་པ། ཚེ་དང་ལྡན་པ་སུ་ཞིག་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད། གནས་བརྟན་སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་མཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་
Ca142a
༄#། །ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་སོང་ལ་ཞུས་ཤིག་དང ། བཅོམ་ལྡན་འདས་ཀྱིས་ཁྱེད་ཅག་ལ་ཇི་སྐད་ལུང་སྟོན་པར་མཛད་པ་དེ་དེ་བཞིན་དུ་ཟུང་ཞིག་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་པི་ལིན་དའི་བུ་ལ་རྨས་པ། པི་ལིན་དའི་བུ་ཁྱོད་ཀྱིས་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན། བཙུན་པ་བདག་འདི་སྙམ་བགྱིད་དེ། གལ་ཏེ་ཁྱེའུ་དག་ལ་མ་བསམས་ན་རེ་ཞིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང།་ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་གླགས་རྙེད་པར་འགྱུར་ཞིང ། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུང་གི་གཡོན་ཅན་དག་གིས་འཕྲོག་པར་བྱེད་ན། ཕྱིན་ཆད་སུ་ཞིག་འོད་མའི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས་བདག་གིས་རྫུ་འཕྲུལ་རྣམ་པར་བསྟན་པར་བགྱིའོ་སྙམ་དུ་བསམས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་པི་ལིན་དའི་བུས་བསམ་པ་དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ།། །།
Ca142b
འདུལ་བ་རྣམ་པར་འབྱེད་པ། བམ་པོ་བདུན་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོ་གཟུགས་ཅན་སྙིང་པོའི་ཀུན་ཏུ་སྤྱོད་པ་ནི་ཉི་མ་རེ་རེ་ཞིང་བཅོམ་ལྡན་འདས་དང ། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོའོ། །ཇི་ཙམ་ན་དུས་གཞན་ཞིག་ན་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་།བཅོམ་ལྡན་འདས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་མཐའ་གཅིག་ཏུ་འདུག་པ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ། །དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས། སྟན་ལས་ལངས་ཏེ་སོང་ནས། ཚེ་དང་ལྡན་པ་པི་ལིན་དའི་བུའི་གཙུག་ལག་ཁང་ག་ལ་བ་དེར་སོང་ངོ ། །དེའི་ཚེ་ན་ཚེ་དང་ལྡན་པ་པི་ལིན་དའི་བུ་གཙུག་ལག་ཁང་དེ་རལ་བ་དང ། འདྲུམས་པ་རང་ཉིད་ཀྱིས་ཕྱིར་འཆོས་པར་བྱེད་དོ། །ཚེ་དང་ལྡན་པ་པི་ལིན་དའི་བུས་མ་
Ca143a
༄#། །ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ན་ནས་མཐོང་ངོ ། །མཐོང་ནས་ཀྱང་ལག་པ་དང་རྐང་པ་དག་བཀྲུས་ཏེ་སྟན་བཤམས་པ་ཉིད་ལ་འདུག་གོ་།དེ་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཚེ་དང་ལྡན་པ་པི་ལིན་དའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་ཅི་ལགས། རང་ཉིད་ཀྱིས་རལ་བ་དང ། འདྲུམས་པ་སླར་འཆོས་པར་མཛད་དམ། རྒྱལ་པོ་ཆེན་པོ་རབ་ཏུ་བྱུང་བ་ནི་རང་ཉིད་ཀྱིས་བྱེད་པ་ཡིན་ཏེ། བདག་ཅག་ནི་རབ་ཏུ་བྱུང་བ་ཡིན་པས་གཞན་སུ་ཞིག་བྱེད་པར་འགྱུར། འཕགས་པ་གལ་ཏེ་དེ་ལྟ་ན་བདག་གིས་འཕགས་པ་ལ་ཞམ་རིང་བ་དབུལ་ལོ། །རྒྱལ་པོ་ཆེན་པོ་ཨ་རོག་གྱ། དེ་བཞིན་ལན་བཞིའི་བར་དུ་སྨྲས་ནས་ལན་ལྔ་པ་ལ་ཡང་དེ་ཁོ་ན་སྐད་དུ། བདག་གིས་འཕགས་པ་ལ་ཞམ་རིང་བ་དབུལ་ལོ་ཞེས་ཟེར་བ་དང ། ཚེ་དང་ལྡན་པ་པི་ལིན་དའི་བུའི་ལྷན་ཅིག་གནས་པ་བདེན་པ་དང་མཐུན་པ་དང་ངོ་ཟློག་ཕོད་པར་སྨྲ་བ་ཞིག་གིས་སྨྲས་པ། རྒྱལ་པོ་ཆེན་པོ་གང་ཚུན་ཆད་ནས་རྒྱལ་པོ་ཆེན་པོས་མཁན་པོ་ལ་ཞམ་རིང་དག་གིས་བསྟབས་པ་ནས། མཁན་པོས་གལ་ཏེ་གཙུག་ལག་ཁང་འདི་ཡལ་བར་བོར་དུ་ལགས་ན་ད་ཙམ་ངོས་རྡིབ་པར་ཡང་གྱུར་ཏོ། །རྒྱལ་པོས་སྨྲས་པ། འཕགས་
Ca143b
པ་ཅི་ལགས། བདག་ཅག་གིས་ཡང་དང་ཡང་དུ་ཁས་བླངས་སམ། རྒྱལ་པོ་ཆེན་པོ་ལན་ཅིག་ཏུ་མ་བས་ཀྱི་འདི་ལྟར་འདི་ནི་ལན་ལྔ་པ་ལགས་སོ། །རྒྱལ་པོ་དེ་བརྗེད་ངས་པས་རྒྱལ་པོ་དེའི་ཀུན་ཏུ་སྤྱོད་པ་ནི་གང་ཡང་རུང་བ་ལ་ཅུང་ཟད་ཁས་བླངས་པ་ཅི་ཡང་རུང་སྟེ། དེ་ཐམས་ཅད་ཕྱི་ན་འདུག་པའི་མིས་ཡི་གེར་འདྲི་བར་བྱེད་པས་རྒྱལ་པོ་དེས་མི་དེ་ལ་སྨྲས་པ། ཀཝའེ་ནང་རྗེ་ཁོ་བོས་ཡང་དང་ཡང་དུ་ཁས་བླངས་པ་བདེན་ནམ། ལྷ་མད་དེ། འདི་ནི་ལན་ལྔ་པ་ལགས་སོ། །དེ་ལྟ་ན་ཁོ་བོ་ཆད་པའི་ལས་ལ་ཐུག་གིས། ཁོ་བོས་འཕགས་པ་ལ་ཞམ་རིང་པ་ལྔ་བརྒྱ་དབུལ་ལོ། །དེས་བློན་པོ་རྣམས་ལ་བསྒོ་བ། འཕགས་པ་ལ་ཞམ་རིང་པ་ལྔ་བརྒྱ་ཕུལ་ཅིག་།ཚེ་དང་ལྡན་པ་པི་ལིན་དའི་བུས་སྨྲས་པ། རྒྱལ་པོ་ཆེན་པོ་ཁོ་བོ་རང་གི་གཡོག་ཉིད་སྤངས་ཏེ། རབ་ཏུ་བྱུང་བ་ལ་གཡོག་དག་གིས་ཅི་བྱ། འཕགས་པ་དགེ་འདུན་གྱི་དོན་དུ་བཞེས་ཤིག་།རྒྱལ་པོ་ཆེན་པོ་གལ་ཏེ་དེ་ལྟ་ན་བཅོམ་ལྡན་འདས་ལ་ཞུའོ། །འཕགས་པ་དེ་མ་ནོངས་ཀྱིས་ཞུས་ཤིག་།སྐབས་དེ་ཚེ་དང་ལྡན་པ་པི་ལིན་དའི་བུས། བཅོམ་ལྡན་འདས་ལ་ཞུས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་དོན་དུ་གཡོག་དག་བླང་བར་བྱའོ། །ཚེ་དང་ལྡན་པ་པི་ལིན་དའི་བུས་གཡོག་དེ་དག་བླངས་པ་དང ། གཡོག་དེ་དག་ཡང་དང་ཡང་དུ་རྒྱལ་པོའི་ཕོ་བྲང་དུ་ལས་བྱེད་དུ་བཅུག་ནས། དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་བདག་ཅག་འཕགས་པ་དག་གི་ཞམ་རིང་པར་ཕུལ་
Ca144a
༄#། །བ་ནི་བདག་ཅག་གློ་བ་དགའ་ན་ཅིའི་སླད་དུ་བདག་ཅག་ཡང་དང་ཡང་དུ་རྒྱལ་པོའི་ཕོ་བྲང་དུ་སུག་ལས་བགྱིད། བཞིན་བཟང་དག་འཁྲུག་ལོངས་མ་བྱེད་ཅིག་དང ། ཁོ་བོས་རྒྱལ་པོ་ལ་གསོལ་བ་བྱའོ། །ཇི་ཙམ་དུས་གཞན་ཞིག་ན། མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་ཚེ་དང་ལྡན་པ་བི་ལིན་དའི་བུའི་དྲུང་དུ་འོངས་ཏེ། རྐང་པ་ལ་ཕྱག་འཚལ་ནས། ཚེ་དང་ལྡན་པ་པི་ལིན་དའི་བུའི་མདུན་དུ་འདུག་པ་དང ། ཚེ་དང་ལྡན་པ་པི་ལིན་དའི་བུས་སྨྲས་པ། རྒྱལ་པོ་ཆེན་པོ་ཁྱོད་དགེ་འདུན་གྱི་དོན་དུ་གཡོག་དག་ཕུལ་བས་འགྱོད་པར་མ་གྱུར་ཏམ། འཕགས་པ་བདག་ལ་འགྱོད་པ་འགའ་ཡང་མ་མཆིས་སོ། །འོ་ན་ཅིའི་ཕྱིར་གཡོག་དེ་དག་ཡང་རྒྱལ་པོའི་ཕོ་བྲང་དུ་ལས་བྱེད་དུ་བཅུག་།རྒྱལ་པོས་སྟན་དེ་ཉིད་ལ་འདུག་བཞིན་དུ་བློན་པོ་རྣམས་ལ་བསྒོ་བ། ཤེས་ལྡན་དག་འཕགས་པ་རྣམས་ཀྱི་ཞམ་རིང་བ་དག་ཕྱིན་ཆད་རྒྱལ་པོའི་ཕོ་བྲང་དུ་ལས་བྱེད་དུ་མ་གཞུག་ཅིག་།བློན་པོ་རྣམས་ཀྱིས་གང་ཡང་རུང་བ་དག་ལ་རྒྱལ་པོའི་ཕོ་བྲང་དུ་ལས་གྱིས་ཤིག་ཅེས་བསྒོ་བ་ན། དེ་དག་ན་རེ། བདག་ཅག་འཕགས་པ་དག་གི་ཡིན་ནོ་ཞེས་ཟེར་ནས། བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་གང་ལ་ཡང་མཆིད་སྩལ་བར་རྔོ་མ་ཐོག་སྟེ།་གང་ཡང་རུང་བ་དག་ལ་རྒྱལ་པོའི་ཕོ་བྲང་དུ་སུག་ལས་ཚོལ་ཅིག་ཅེས་བགྱིས་ན། དེ་དག་བདག་ཅག་འཕགས་པ་རྣམས་ཀྱི་ལགས་སོ་ཞེས་མཆིའོ། །རྒྱལ་པོས་སྨྲས་པ། སོང་ལ་ཐམས་
Ca144b
ཅད་ལས་བྱེད་དུ་ཆུག་ཅིག་།དེ་དག་ཐམས་ཅད་ཡང་རྒྱལ་པོའི་ཕོ་བྲང་དུ་ལས་བྱེད་དུ་བཅུག་ནས། དེ་དག་གིས་ཡང་ཚེ་དང་ལྡན་པ་པི་ལིན་དའི་བུ་ལ་སྨྲས་པ། འཕགས་པ་བདག་ཅག་ཡང་དེ་ཁོ་ན་བཞིན་དུ་རྒྱལ་པོའི་ཕོ་བྲང་དུ་སུག་ལས་བགྱིད་དུ་སྩལ་ན། འཕགས་པས་མ་གསོལ་ཏམ། བཞིན་བཟང་དག་གསོལ་ཏེ། ཡང་གསོལ་བ་བྱའོ། །ཚེ་དང་ལྡན་པ་པི་ལིན་དའི་བུས། མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་དེ་ཁོ་ན་བཞིན་འོངས་པ་ལ་སྨྲས་པ། རྒྱལ་པོ་ཆེན་པོ་ཅི་ལགས། ཁྱོད་ཀྱང་འགྱོད་པ་སྐྱེས་པར་གྱུར་ཏམ། འཕགས་པ་ཅི་ནོངས། གཡོག་དག་ཡང་དེ་ཁོ་ན་བཞིན་དུ་ལས་བྱེད་དུ་བཅུག་གོ་།འཕགས་པ་གང་ལ་ཡང་མཆིད་སྩལ་པར་རྔོ་མ་ཐོག་སྟེ། གང་ཡང་རུང་བ་ལ་མཆིད་སྩལ་བ་ན། དེ་དག་བདག་ཅག་འཕགས་པ་དག་གི་ལགས་སོ་ཞེས་མཆིའོ། །ེ་མ་འཕགས་པ་དག་གི་ལྷ་འབངས་ཀྱི་སྡུམ་པ་ལོགས་ཤིག་ཏུ་བརྩིག་ཏུ་སྩལ་ན་འདི་དག་ནི་རྒྱལ་པོའི་འོ། །འདི་དག་ནི་འཕགས་པ་དག་གིའོ་ཞེས་འཚལ་བར་འགྱུར་རོ། །ཚེ་དང་ལྡན་པ་པི་ལིན་དའི་བུས་སྨྲས་པ། བཅོམ་ལྡན་འདས་ལ་ཞུའོ། །དེ་ནས་ཚེ་དང་ལྡན་པ་པི་ལིན་དའི་བུས་དོན་དེ་བཅོམ་ལྡན་འདས་ལ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལྷ་འབངས་ཀྱི་སྡུམ་པ་བརྩིག་ཏུ་འཇུད་པར་རྗེས་སུ་གནང་ངོ ། །དགེ་སློང་དག་གིས་གནས་གང་དུ་ལྷ་འབངས་ཀྱི་སྡུམ་པ་བརྩིག་ཏུ་འཇུག་པ་མི་ཤེས་
Ca145a
༄#། །ནས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོའི་ཕོ་བྲང་གི་ཕྱི་རོལ་དང ། འོད་མའི་ཚལ་གྱི་ཕྱི་རོལ་གྱི་བར་གང་དུ་སྐད་ཀྱིས་བོས་པ་ཐོས་ནས། དགེ་འདུན་གྱི་དོན་སྒྲུབ་པར་འགྱུར་བ་དེར་ལྷ་འབངས་ཀྱི་སྡུམ་པ་བརྩིག་ཏུ་གཞུག་གོ་།དགེ་སློང་རྣམས་ཀྱིས་ཞང་བློན་དག་ལ་བསྒོ་བ། བཅོམ་ལྡན་འདས་ཀྱིས་ཕྱོགས་འདིར་ལྷ་འབངས་ཀྱི་སྡུམ་པ་བརྩིག་ཏུ་ཆུག་ཅིག་ཅེས་བཀའ་སྩལ་གྱིས། དེ་ཁྱེད་ཅག་གིས་ཤེས་པར་གྱིས་ཤིག་།ཞང་བློན་དག་གིས་རྒྱལ་པོའི་ཁབ་ཏུ་དྲིལ་གྱི་སྒྲ་སྒྲོག་ཏུ་བཅུག་སྟེ། གང་དག་འཕགས་པ་རྣམས་ཀྱི་ཞམ་རིང་པ་ཡིན་པ་དེ་དག་རྒྱལ་པོའི་ཁབ་ཀྱི་ཕྱི་རོལ་དང ། འོད་མའི་ཚལ་གྱི་ཕྱི་རོལ་གྱི་བར་དུ་འདུག་པར་ཆད་ཀྱིས་དེང་ལ་དེར་སྡུམ་པ་རྩིགས་ཤིག་ཅེས་བསྒོ་ནས། དེ་དག་དེར་དོང་སྟེ་སྡུམ་པ་བརྩིགས་སོ། ། ལྷ་འབངས་ཀྱི་སྡུམ་པ་བརྩིགས་ནས་དེ་དག་གཙུག་ལག་ཁང་དུ་དོང་སྟེ་ལས་བྱེད་ཅིང ། དགེ་སློང་རྣམས་ཀྱིས་དེ་དག་ལ་ལས་འདི་ནི་རུང་བ་ཡིན་གྱིས་ཁྱེད་ཀྱིས་བྱའོ། །འདི་ནི་རུང་བ་མ་ཡིན་གྱིས་ཁྱེད་ཀྱིས་མི་བྱའོ་ཞེས་ལས་བསྟན་ནས། དེ་དག་ལས་རུང་བ་བྱེད་པས། ལྷ་འབངས་ལྷ་འབངས་ཞེས་བྱ་བའི་མིང་དུ་གྱུར་ཏོ། །དགེ་འདུན་གྱི་ཀུན་དགའ་ར་བ་སྐྱོང་བར་བྱེད་པས། རྩེ་རྒོད་རྩེ་རྒོད་ཅེས་བྱ་བའི་མིང་དུ་གྱུར་ཏོ། །དེ་དག་ཐམས་ཅད་གཙུག་ལག་ཁང་དུ་འཇུག་པས་ཀླག་ཅོར་གྱི་སྒྲས་དགེ་སློང་དག་གིས་སེམས་རྩེ་གཅིག་པ་ཉིད་མི་འགྲུབ་ནས། བཅོམ་ལྡན་འདས་ཀྱིས་བཀའ་སྩལ་
Ca145b
པ།་ཇི་སྙེད་དག་གིས་ལས་འགྲུབ་པ་དེ་སྙེད་འཇུག་པར་བྱའི་ཐམས་ཅད་མི་བྱའོ། །དགེ་སློང་དག་གིས་དེ་དག་ཐམས་ཅད་ལ་ཟས་དང་གོས་སྦྱིན་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ།་གང་དག་ལས་བྱེད་པ་དེ་དག་ལ་ཟས་དང་གོས་སྦྱིན་པར་བྱའི། །ཐམས་ཅད་ལ་མི་བྱའོ། །དགེ་སློང་རྣམས་ཀྱིས་དེ་དག་ན་བ་ཡལ་བར་བོར་ནས། བཅོམ་ལྡན་འདས་ཀྱིས་བཀའ་སྩལ་པ། གང་དག་ན་བ་དེ་དག་ལ་ཟས་དང་གོས་སྦྱིན་པར་བྱ་ཞིང་བསྙེན་བཀུར་ཡང་བྱའོ། །ཇི་ཙམ་དུས་གཞན་ཞིག་ན། ཉེ་དགའ་དགེ་སྐོས་བྱེད་པས་དེས་ལྷ་འབངས་དེ་དག་ལ་སྨྲས་པ། བཞིན་བཟང་དག་ཁོ་བོ་དགེ་སྐོས་བྱེད་ཀྱིས་ཁྱེད་ཅག་ནང་པར་སྔར་ཤོག་ཅིག་།རྒྱལ་པོའི་ཁབ་ན་སྟོན་ཟླ་ཐ་ཆུང་གི་གཡོན་ཅན་ཞེས་བྱ་བ་ཆོམ་རྐུན་པ་དག་གི་ཀུན་ཏུ་སྤྱོད་པ་ནི་དེ་དག་དགག་དབྱེ་བྱས་མ་ཐག་ཏུ་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན་དེས་བརྩལ་མི་དགོས་པར་ལོ་བསྐོར་དུ་ལོངས་སྤྱོད་ཅིང་བདེ་བར་གནས་པར་འགྱུར་ཞེས་ཕན་ཚུན་གྲོས་བྱེད་དོ། །དེ་ན་དགེ་སློང་གི་རྒྱུས་ཤེས་པ་ཞིག་འདུག་པ་དེས་སྨྲས་པ། ཤེས་ལྡན་དག་འཕགས་པ་དག་གི་གཡོག་གང་དག་གྲོང་ཁྱེར་གྱི་ཕྱི་རོལ་ན་འཁོད་པ་དེ་དག་གཞོམ་པར་བྱའོ། །གཞན་དག་གིས་སྨྲས་པ། རེ་ཞིག་དེ་དག་གི་ཇོ་བོ་གང་དག་ཡིན་པ་དེ་དག་ཀྱང་སྒོ་འཕར་བརྒྱ་སྙེད་བཟླ་བ་བྱས་ཀྱང་ལྟོ་ཁེངས་པ་འགྲུབ་པར་དཀའ་བས་དེ་དག་ལ་ཡང་ཅུང་ཟད་ཀྱང་མེད་ན་དེ་དག་གི་གཡོག་དེ་དག་ལྟ་ལྟ་སྨོས་ཀྱང་ཅི་དགོས། དགེ་
Ca146a
༄#། །སློང་གི་རྒྱུས་ཤེས་པ་དེས་སྨྲས་པ། ཤེས་ལྡན་དག་ཁྱེད་མི་ཤེས་ཏེ། དེ་དག་ནི་ཟན་གཞན་ལས་ཟ་ཞིང་རང་གི་ལས་རྗེས་སུ་བསྒྲུབ་པ་དེ་ལྷུར་ལེན་ཏེ། ཐབས་དུ་མ་དག་གིས་ནོར་སྒྲུབ་པར་བྱེད་པས་དེ་དག་ལ་གང་ཡོད་པ་དེ་ནི་གྲོང་ཁྱེར་འདི་ན་ཡང་མེད་ཀྱི་ཅུང་ཞིག་གཞོམ་པར་བྱའོ། །དེ་དག་གིས་བརྡ་བྱས་ཏེ། དོང་ནས་དེ་དག་གཞོམ་པར་བརྩམས་སོ། །དེ་ནས་ལྷ་གང་དག་ཚེ་དང་ལྡན་པ་པི་ལིན་དའི་བུ་ལ་མངོན་པར་དད་པ་དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག་།ཁྱེད་ཀྱི་ཞམ་རིང་བ་དག་སྟོན་ཟླ་ཐ་ཆུང་གི་གཡོན་ཅན་དག་གིས་འཇོམས་པར་འགྱུར་གྱིས་བརྩོན་པར་མཛད་དུ་གསོལ། ཚེ་དང་ལྡན་པ་པི་ལིན་དའི་བུས་གལ་ཏེ་གཡོག་དག་ལ་མ་བསམས་ན། གཡོག་དག་ཀྱང་རེ་ཞིག་ནོར་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་རྣམས་ཀྱིས་ཀྱང་གླགས་རྙེད་པར་འགྱུར་ཞིང ། དད་པ་རྣམས་ཀྱང་འདི་ལྟར་སྦྱིན་པར་བྱ་བའི་ཆོས་བྱིན་པ་དག་ཡོངས་སུ་སྐྱོང་བར་མི་བྱེད་ན། ཕྱིན་ཆད་སུ་ཞིག་ཤཱཀྱའི་སྲས་ཀྱི་དགེ་སྦྱོང་རྣམས་ལ་སྦྱིན་པ་དང་བྱ་བར་སེམས་ཞེས་གཞན་དུ་གྱུར་པ་ཉིད་དུ་འགྱུར་གྱིས་རྫུ་འཕྲུལ་རྣམ་པར་བསྟན་པར་བྱའོ་སྙམ་དུ་བསམས་ཤིང་རིག་ནས་ཚེ་དང་ལྡན་པ་པི་ལིན་དའི་བུས། ལྷ་འབངས་ཀྱི་སྡུམ་པ་དེ་ལྕགས་ཀྱི་ར་བས་བསྐོར་ཏོ། །ཆོམ་རྐུན་པ་དག་གིས་རྐུན་རྫས་ཐོགས་ཏེ་འཕགས་པ་དང ། ལྕགས་
Ca146b
ཀྱི་ར་བ་མཐོང་ནས། དེ་དག་གིས་ཕན་ཚུན་ཀུན་ཏུ་འགྲོ་བར་བརྩམས་ན་ལམ་མ་རྙེད་དོ། །དེ་དག་གིས་རྐུན་རྫས་བོར་ཏེ་འཕགས་པ་དང་ལྕགས་ཀྱི་ར་བ་དེ་ཡང་མི་སྣང་བར་གྱུར་ཏོ། །དེ་དག་གིས་ཡང་རྐུན་རྫས་བླངས་པ་དང ། ལྕགས་ཀྱི་ར་བ་དེ་ཡང་ཡང་ཕྱིར་བྱུང་སྟེ་ལན་བདུན་གྱི་བར་དུ་དེ་ལྟར་གྱུར་པ་དང ། དེ་དག་གིས་སྨྲས་པ། ཤེས་ལྡན་དག་འཕགས་པ་རྫུ་འཕྲུལ་ཆེ་བ་མཐུ་ཆེ་བ་འགའ་ཞིག་གིས་འདི་དག་ལ་དགོངས་པ་འདྲའི་རྐུན་རྫས་བོར་ལ་འབྲོས་པར་བྱའོ། །དེ་དག་གིས་རྐུན་རྫས་ཕྱོགས་གཅིག་ཏུ་བོར་ཏེ་བྲོས་སོ། །ལྷ་འབངས་དེ་དག་སད་པ་དང ། ཤེས་ལྡན་དག་བདག་ཅག་བཅོམ་མོ། །བདག་ཅག་བཅོམ་མོ་ཞེས་ཀུ་ཅོ་འདོན་ཞིང་དེ་དག་ནོར་དང་བྲལ་བ་ལས་བྱུང་བའི་ཡིད་མི་བདེ་བ་དང་ལྡན་ཞིང་ཐམས་ཅད་འདུས་ནས། ལྷ་འབངས་ཀྱི་སྡུམ་པ་ཀུན་ཏུ་བྱུལ་བར་བརྩམས་པ་དང།་ཕྱོགས་གཅིག་ན་རྫས་ཐམས་ཅད་སྤུངས་ཏེ་བཞག་པ་མཐོང་ངོ ། །དེ་ནས་དགའ་བ་དང་ཡིད་བདེ་བ་སྐྱེས་ཏེ། རང་རང་གི་རྫས་དེ་བླངས་ནས་ཁྱིམ་ཁྱིམ་དུ་དོང་ངོ ། །དེ་དག་གིས་སོ་སོའི་ཁྱིམ་སྲུང་བ་བཞག་སྟེ། གཉིད་ལོག་པ་ན་ལྷ་དེས་དེ་དག་གི་རྨི་ལམ་དུ་སྦྲན་པ། ཤེས་ལྡན་དག་ཁྱེད་ཅག་སྟོན་ཟླ་ཐ་ཆུང་གི་གཡོན་ཅན་དག་གིས་མ་བཅོམ་པ་འདི་ཐམས་ཅད་ནི་འཕགས་པ་པི་ལིན་དའི་བུའི་མཐུ་ཡིན་ནོ། །དེ་ནས་མཚན་མོ་ནམ་ལངས་པ་དང ། ཐམས་ཅད་འདུས་ཏེ་སྨྲས་པ། ཤེས་ལྡན་དག་ལྷས་རྨི་ལམ་དུ་ཁྱེད་ཅག་སྟོན་ཟླ་ཐ་ཆུང་གི་གཡོན་ཅན་དག་གིས་མ་བཅོམ་
Ca147a
༄#། །པ་འདི་དག་ཐམས་ཅད་ནི། འཕགས་པ་པི་ལིན་དའི་བུའི་མཐུ་ཡིན་ནོ་ཞེས་བསྟན་ཏེ། དེ་ནི་དེ་ཁོ་ན་བཞིན་ཡིན་གྱི་གཞན་དུ་ན་འཕགས་པ་པི་ལིན་དའི་བུ་མ་གཏོགས་པ་གཞན་སུ་ཞིག་བདག་ཅག་ལ་སྙིང་རྗེ་བར་འགྱུར། དེའི་ཚེ་དེ་དག་བྱི་དོར་བྱས་ལ་ཕྱིས་གཙུག་ལག་ཁང་དུ་འདོང་ཞེས་དེ་དག་ཁྲུས་བྱས་ཤིང་གོས་དཀར་པོ་དང་དྲི་དང་ཕྲེང་བ་བརྒྱུས་བརྒྱན་ཏེ།་བྱི་དོར་བྱས་ཏེ། གཙུག་ལག་ཁང་དུ་དོང་ངོ ། །ཉེ་དགའ་ཡང་ནང་པར་སྔར་ལངས་ནས་ལྡེ་མིག་དང་ལྡེ་མིག་ཀྱོག་པོ་ཐོགས་ནས། གཙུག་ལག་ཁང་གི་སྒོ་ཕྱེ་སྟེ་མར་མེའི་ཀོང་བུ་བསལ་ནས། གཙུག་ལག་ཁང་དུ་ཆག་ཆག་དང་བྱུག་པ་བྱས་ཏེ་གནས་མལ་བཤམས་ནས། མཆོད་རྟེན་གྱི་འཁོར་སར་བདུག་སྤོས་བྲིམས་ནས། ཁང་སྟེང་དུ་འཛེགས་ཏེ་གཎྜཱི་རྡུང་ཞིང་ཕྱོགས་བཞིར་རྣམ་པར་བལྟའོ། །དེས་དེ་དག་གོས་དཀར་པོ་དང་དྲི་དང་ཕྲེང་བ་བརྒྱུས་བརྒྱན་པ་མཐོང་ནས། དེ་འདི་དག་ནོར་ཅན་དག་གམ། ཚོང་དཔོན་དག་གམ། དེད་དཔོན་གཙུག་ལག་ཁང་ལྟར་འོང་བ་སུ་ཞིག་ཡིན་སྙམ་དུ་སེམས་སོ། །གང་གི་ཚེ་མཆོད་རྟེན་གྱི་འཁོར་སར་ཞུགས་པ་དེའི་ཚེ། དེས་དེ་དག་ངོ་ཤེས་ནས། ཉེ་དགས་གཤེ་ཞིང་སྨྲས་པ། ངས་ཁྱེད་ཅག་ལ་སང་ནང་བར་སྔར་ཤོག་ཅིག་ཅེས་མ་བསྒོ་འམ། ཁྱེད་གར་དོང་དོང ། དེ་དག་གིས་སྨྲས་པ། འཕགས་པ་གལ་ཏེ་བདག་ཅག་ལ་འཕགས་པ་པི་ལིན་དའི་བུས་མ་དགོངས་སུ་ལགས་ན།
Ca147b
བདག་ཅག་དེང་ཁོ་ནར་སྟོན་ཟླ་ཐ་ཆུང་གི་གཡོན་ཅན་དག་གིས་ཚུལ་མ་ལགས་པས་སྡུག་བསྔལ་བསྒྲུབས་པར་འགྱུར་རོ། །ཉེ་དགས་གཤེ་ཞིང་སྨྲས་པ། ཁྱེད་ཅག་རེ་ཞིག་གང་གི་མཐུས་སྙེམ་པ་དེ་ལ་ཡང་ཇེ་ཁྲིམས་བཅའ་བར་བྱའོ་ཞེས་རིག་ནས་དྲུག་སྡེ་དག་སྦྲན་ཏེ། ཚེ་དང་ལྡན་པ་པི་ལིན་དའི་བུ་ག་ལ་བ་དེར་སོང་ནས་ཕྱིན་པ་དང ། ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །གནས་བརྟན་ལ་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་གྱ། གནས་བརྟན་ཇེ་སྐབས་ཕྱེ་ཤིག་།ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་ཞམ་རིང་བ་དག་གི་ནོར་སྟོན་ཟླ་ཐ་ཆུང་གི་གཡོན་ཅན་དག་གིས་བརྐུས་པ་ཐར་པར་བགྱིས་སམ། དེ་བཞིན་ཏ་ཐར་བར་བྱས་སོ། །གནས་བརྟན་བདག་ཅག་གིས་གནས་བརྟན་གོ་བསམ་གཏན་དང་རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དག་གི་བདེ་བ་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱིས། བདག་ཅག་གིས་ཐུགས་རྗེ་ཕྱོགས་གཅིག་པ་དང་ལྡན་ཞིང་ཞམ་རིང་བ་དག་ལ་ཐུགས་རྗེ་བར་མཛད་ལ། སྟོན་ཟླ་ཐ་ཆུང་གི་གཡོན་ཅན་དག་ལ་མི་མཛད་པར་མ་འཚལ་ཏེ། གཞན་དག་གིས་བདག་གིར་བགྱིས་པའི་ནོར་དག་ཐར་པར་བགྱིས་པའི་ལྟུང་བ་བྱུང་བ་ཆོས་བཞིན་དུ་སླར་མཛོད་ཅིག་།ལྟུང་བ་མ་མཐོང་ངོ ། ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་ཀྱིས་ཁང་སྐྱོང་སུ་སྣང ། གཎྜཱི་རྡུངས་ཤིག་།འདི་གནས་ནས་དབྱུང་བའི་ལས་
Ca148a
༄#། །བྱའོ་ཞེས་དེ་དག་ཁང་སྐྱོང་གི་གན་དུ་དོང་ནས་སྨྲས་པ། ཚེ་དང་ལྡན་པ་གཎྜཱི་རྡུངས་ཤིག་།ཅིའི་ཕྱིར། དོན་ཉུང་དུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་འཆོས་པས་དེ་གནས་ནས་དབྱུང་བའི་ལས་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང ། བསྟན་པ་ལ་ཆོས་ཀྱི་སྒྱུ་ཐབས་ཀྱིས་མི་མཐུན་པ་འགའ་འབྱུང་བར་མི་འགྱུར་རམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས་དེས་ཁང་སྐྱོང་ལ་རྨས་པ། ཚེ་དང་ལྡན་པ་སུ་ཞིག་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད། སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པ་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་མཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག་དང ། བཅོམ་ལྡན་འདས་ཀྱིས་ཁྱོད་ལ་ཇི་སྐད་ལུང་བསྟན་པ་དེ། དེ་ཁོ་ན་བཞིན་དུ་ཟུང་ཞིག་།སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་
Ca148b
ཡིན་པས་སངས་རྒྱས་བཅོམ་ལྡན་འདས་རྣམས་ཀྱིས། ཚེ་དང་ལྡན་པ་པི་ལིན་དའི་བུ་ལ་རྨས་པ། པི་ལིན་དའི་བུ་ཁྱོད་ཀྱིས་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན། བཙུན་པ་བདག་འདི་སྙམ་བགྱིད་དེ། གལ་ཏེ་སུག་རྗེད་དག་ལ་མ་བསམས་ན། སུག་རྗེད་དག་ཀྱང་རེ་ཞིག་ནོར་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང་མ་དད་པ་རྣམས་ཀྱིས་ཀྱང་གླགས་རྙེད་པར་འགྱུར་ལ། དད་པ་རྣམས་ཀྱང་འདི་ལྟར་སྦྱིན་པར་བྱ་བའི་ཆོས་བྱིན་པ་ཡོངས་སུ་སྐྱོང་བར་མི་བྱེད་པས། ཕྱིན་ཆད་སུ་ཞིག་ཤཱཀྱའི་སྲས་ཀྱི་དགེ་སློང་རྣམས་ལ་སྦྱིན་པ་དང་བྱ་བར་སེམས་ཞེས་གཞན་དུ་གྱུར་པ་ཉིད་དུ་འགྱུར་གྱིས་བདག་གིས་རྫུ་འཕྲུལ་རྣམ་པར་བསྟན་པར་བགྱིའོ་སྙམ་པས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་པི་ལིན་དའི་བུས་བསམ་པ་དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ནོར་ཅན་གྱིས་དགེ་སློང་གི་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་བྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་ཀྱི་འདི་ལྟར་འདས་པའི་དུས་ན་ཡང་འདིས་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་
Ca149a
༄#། །བུར་ཕྱུང་སྟེ། དེ་ཉོན་ཅིག་།དགེ་སློང་དག་འཇིག་རྟེན་འདི་འཇིག་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཇིག་པ་ན་སེམས་ཅན་དག་ཕལ་ཆེར་འོད་གསལ་གྱི་ལྷའི་རིས་སུ་སྐྱེའོ། །དེ་དག་དེ་ན་གཟུགས་ཅན་ཡིད་ལས་བྱུང་བ་མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིད་ལག་ཐམས་ཅད་དང་ལྡན་པ། བཟང་བ་ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ་ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ནས་ཆེན་པོ་འདི་ཆུ་འབའ་ཞིག་དང་རྒྱ་མཚོ་འབའ་ཞིག་ཏུ་གྱུར་ཏེ། ས་ཆེན་པོ་ཆུ་འབའ་ཞིག་དང་རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དེ། འདི་ལྟ་སྟེ་དཔེར་ན། འོ་མ་བསྐོལ་བ་གྲང་བར་གྱུར་པའི་སྟེང་དུ་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་པ་དེ་བཞིན་དུ་ས་ཆེན་པོ་ཆུ་འབའ་ཞིག་དང་རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་ཡང་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དོ། །དེ་ནི་སའི་བཅུད་ཁ་དོག་ཕུན་སུམ་ཚོགས་པ།་དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་ཡིན་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན། མར་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། སྦྲང་བུའི་
Ca149b
སྦྲང་རྩི་མ་བསྐོལ་བ་ལྟ་བུའོ། །དགེ་སློང་དག་འཇིག་རྟེན་འདི་ཆགས་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཆགས་པ་ན་འོད་གསལ་གྱི་ལྔའི་རིས་དེ་ནས་སེམས་ཅན་ཁ་ཅིག་ཚེ་ཟད། ལས་ཟད། བསོད་ནམས་ཟད་པས། ཤི་འཕོས་ཏེ་འདི་ལྟ་བུ་ཉིད་དུ་མི་རྣམས་དང་སྐལ་བ་མཐུན་པ་ཉིད་དུ་འོང་ཞིང ། འདིར་ཡང་གཟུགས་ཅན་ཡིད་ལས་བྱུང་བ་མ་ཚང་བ་མེད་པ་དབང་པོ་མ་ཉམས་པ།་ཡན་ལག་དང་ཉིད་ལག་ཐམས་ཅད་དང་ལྡན་པ། བཟང་བ་ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་མ་བྱུང་ངོ ། །འཇིག་རྟེན་དུ་རྒྱུ་སྐར་དག་ཀྱང་མ་བྱུང ། མཚན་མོ་དང་ཉིན་མོ་དག་ཀྱང་མ་བྱུང ། སྐད་ཅིག་དང་ཐང་ཅིག་དང་ཡུད་ཙམ་དག་ཀྱང་མ་བྱུང ། ཟླ་བ་དང་ཟླ་བ་ཕྱེད་དང་དུས་ཚིགས་དང་ལོ་དག་ཀྱང་མ་བྱུང་ངོ ། །བུད་མེད་ཀྱང་མེད། སྐྱེས་པ་ཡང་མེད་དེ། སེམས་ཅན་སེམས་ཅན་ཞེས་བྱ་བ་འབའ་ཞིག་གི་གྲངས་སུ་འགྲོའོ། །དེ་ནས་སེམས་ཅན་བརྐམ་པའི་རང་བཞིན་ཅན་ཞིག་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །སེམས་ཅན་གཞན་དག་གིས་ཀྱང་སེམས་ཅན་དེ་སོར་མོའི་རྩེ་མོས་སའི་བཅུད་མྱང་བར་བྱེད་པ་ན། ཇི་ལྟ་ཇི་ལྟར་
Ca150a
༄#། །མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་པ་དང ། ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་མཐོང་ངོ ། །མཐོང་ནས་སེམས་ཅན་དེ་དག་ཀྱང་འདི་སྙམ་དུ་ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ ། །བདག་ཅག་གིས་ཀྱང་སོར་མོའི་རྩེ་མོས་སའི་བཅུད་མྱང་བར་བྱའོ་སྙམ་དུ་སེམས་ཤིང་དེ་དག་ཀྱང་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། ། གང་གི་ཕྱིར་སེམས་ཅན་དེ་དག་གིས་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར། དེ་དག་གིས་ལུས་ལ་སྲ་བ་ཉིད་དང ། ལྕི་བ་ཉིད་བྱུང་ཞིང ། དེ་དག་གི་ཁ་དོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །དགེ་སློང་དག་ཆོས་ཉིད་ཀྱིས་ནི་འཇིག་རྟེན་དུ་མུན་པ་བྱུང་བ་ན། འཇིག་རྟེན་དུ་ཉི་མ་དང་ཟླ་བ་དག་ཀྱང་འབྱུང་བར་འགྱུར་རོ། །འཇིག་རྟེན་དུ་རྒྱུ་སྐར་དག་དང ། མཚན་མོ་དག་དང ། ཉིན་མོ་དག་དང ། སྐད་ཅིག་དང་ཐང་ཅིག་དང་ཡུད་ཙམ་དག་དང ། ཟླ་བ་དང་ཟླ་བ་ཕྱེད་དང་དུས་ཚིགས་དང ། ལོ་དག་ཀྱང་འབྱུང་བར་འགྱུར་རོ། །དེ་དག་དེ་ཟ་ཞིང་ཟས་དེ་དག་དང་ལྡན་པ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་
Ca150b
འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས། ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ། ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས། སའི་བཅུད་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་སའི་བཅུད་མེད་པར་གྱུར་པ་ན། འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཀྱང་ཟེར་ཏོ། །འདི་ལྟ་སྟེ་དཔེར་ན། དེང་སང་མི་དག་ཟས་ཞིམ་པ་བཟང་པོ་ཅུང་ཞིག་རྙེད་ནས། ཡི་གེ་དང་སྦྱར་བ་དང ། ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་སའི་བཅུད་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད་དེ། སྨྲེ་སྔགས་འདོན་པར་བྱེད་ཅིང་འདི་སྐད་ཅེས། ཀྱེ་མའོ་བཅུད། ཀྱེ་མའོ་བཅུད་ཅེས་ཟེར་ཡང་སྨྲས་པ་འདིའི་དོན་འདིའོ། །སྨྲས་པ་འདིའི་དོན་འདིའོ་ཞེས་སྨྲས་པ་དེའི་དོན་མི་ཤེས་སོ། །དགེ་སློང་དག་སེམས་ཅན་དེ་དག་གི་སའི་བཅུད་མེད་པར་གྱུར་པ་ན། ས་ཞག་ཁ་དོག་ཕུན་སུམ་
Ca151a
༄#། །ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། དོང་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ། ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས། ཁ་དོག་རྣམས་གཉིས་ཉིད་དུ་མངོན་ལ། ཁ་དོག་རྣམས་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀཝའི་སེམས་ཅན་ང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན ། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་ཏེ། འདི་ལྟ་སྟེ་དཔེར་ན། དེང་སང་མི་དག་སྡུག་བསྔལ་དང་ཡིད་མི་བདེ་བ་འགའ་ཞིག་གིས་རེག་པ་ན། ཡི་གེ་དང་སྦྱར་བ་དང ། །ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང ། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་
Ca151b
ཀྱང་ས་ཞག་མེད་པར་གྱུར་པ་ན། འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཟེར་ཡང་སྨྲས་པ་འདིའི་དོན་ནི་འདིའོ།། སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་གིས་ཞག་མེད་པར་གྱུར་པ་ན། མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པར་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། ཀ་དམ་བུ་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ། ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་
Ca152a
༄#། །འདོན་པར་བྱེད་ཅིང ། འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་ཏེ། འདི་ལྟ་སྟེ་དཔེར་ན། དེང་སང་མི་དག་སྨད་པ་རྣོན་པོ་འགའ་ཞིག་གིས་སྨད་པ་ན་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་བ་དེ་བཞིན་དུ་སེམས་ཅན་དེ་དག་ཀྱང་མྱུ་གུའི་ཚལ་མེད་པར་གྱུར་པ་ན། འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། འདི་སྐད་ཅེས་ཕར་སོང་ཕར་སོང་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་གི་མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ་སོ་བ་མེད་པ། སྦུན་པ་མེད་པ་དག་པ་གཙང་བ་སོར་བཞི་པ། ཀུན་ནས་མ་དཀྲིས་པ། ནུབ་བརྔས་ན་ནང་རྒྱས་ཞིང་ཕྱིར་སྐྱེ་ལ། ནང་བརྔས་ན་ནུབ་རྒྱས་ཞིང་ཕྱིར་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་འབྱུང་བར་འགྱུར་ཏེ། དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་ལ་དབང་པོ་ཐ་དད་པ་བྱུང་བར་གྱུར་ཏེ། ཁ་ཅིག་ནི་ཕོའི་དབང་པོ་དང་ལྡན། ཁ་ཅིག་ནི་མོའི་དབང་པོ་དང་ལྡན་ནོ། །དེ་ན་གང་དག་ཕོའི་དབང་པོ་དང་ལྡན་པ་དང ། གང་དག་མོའི་དབང་པོ་དང་ལྡན་པ་དེ་དག་
Ca152b
གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་དོ། །ཇི་ལྟ་ཇི་ལྟར་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་པ་དེ་ལྟ་དེ་ལྟར་ཀུན་ཏུ་ཆགས་སོ། །ཇི་ལྟ་ཇི་ལྟར་ཀུན་ཏུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ངོ ། །མཐོང་ནས་སས་ཀྱང་འཐོར་བར་བྱེད། བོང་པ་དང་གསེག་མ་དང ། གྱོ་མོ་དང་གྱོ་དུ་མ་དག་ཀྱང་འཕེན་པར་བྱེད་ཅིང ། འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ།་ཀཝའི་སེམས་ཅན་ཁྱོད་ཅིའི་ཕྱིར། སེམས་ཅན་སུན་པར་བྱེད་ཅེས་ཀྱང་ཟེར་ཏེ། འདི་ལྟ་སྟེ་དཔེར་ན་དེང་སང་སེམས་ཅན་དག་བག་སར་བག་མར་ལེན་པ་ན་ཕྱེ་མས་ཀྱང་འཐོར་བར་བྱེད། དྲི་དང་མེ་ཏོག་དང་འབྲས་ཡོས་དག་གིས་ཀྱང་འཐོར་བར་བྱེད་ཅིང ། འདི་སྐད་ཅེས་སྲུ་བདེ་བར་གྱུར་ཅིག་ཅེས་ཀྱང་ཟེར་བ་དེ་བཞིན་དུ་སེམས་ཅན་དེ་དག་གིས་ཀྱང་སེམས་ཅན་ལ་ལོག་པར་ཞུགས་པ་མཐོང་ནས་སས་ཀྱང་འཐོར་བར་བྱེད། བོང་བ་དང་གསེག་མ་དང་གྱོ་མོ་དང་གྱོ་དུམ་དག་ཀྱང་འཕེན་པར་བྱེད་ཅིང ། འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀཝའེ་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་རོ། །དགེ་སློང་དག་དེ་ལྟར་ན་སྔོན་ཆོས་མ་ཡིན་པར་གྲགས་པ་གང་ཡིན་པ་དེ་ནི་
Ca153a
༄#། །དེང་སངས་ཆོས་སུ་གྲགས་ལ། སྔོན་འདུལ་བ་མ་ཡིན་པར་གྲགས་པ་གང་ཡིན་པ་དེ་ནི་དེང་སང་འདུལ་བར་གྲགས། སྔོན་སྨད་པར་བྱ་བ་གང་ཡིན་པ་དེ་ནི་དེང་སང་བསྟོད་པར་བྱ་བ་ཡིན་ནོ། །དེ་ཉི་མ་གཅིག་ཙམ་སྤོང་བར་བྱེད། ཉི་མ་གཉིས་སམ་གསུམ་མམ་བདུན་ཙམ་སྤོང་བར་བྱེད་དོ། །གང་གི་ཕྱིར་སེམས་ཅན་དེ་དག་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ཤིན་ཏུ་ལྟུང་བར་བྱེད་པས་བརྟུལ་ཞུགས་ལ་ཞུགས་པ་དེའི་ཕྱིར་དེ་དག་ཁྱིམ་བརྩིག་པ་ལ་ཞུགས་ཏེ་བདག་ཅག་གིས་འདིར་བྱ་བ་མ་ཡིན་པ་བྱའོ། །བདག་ཅག་གིས་འདིར་བྱ་བ་མ་ཡིན་པར་བྱའོ་ཞེས་ཟེར་བ་ལས་ཁྱིམ་ཁྱིམ་ཞེས་བྱ་བའི་མིང་བྱུང་ངོ ། །དགེ་སློང་དག་འདི་ནི་ཁྱིམ་གྱི་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དེ་དག་དགོངས་ཀར་ཡང་དགོངས་ཀ་ཟ་འདོད་པས་སཱ་ལུའི་དོན་དུ་འདོང་པར་བྱེད། ནང་པར་ཡང་ནང་པར་ཟ་འདོད་པས་སཱ་ལུའི་དོན་དུ་འདོང་བར་བྱེད་དོ། །དེ་ནས་སེམས་ཅན་ལེ་ལོའི་རང་བཞིན་ཅན་ཞིག་གིས་དགོངས་ཀ་དང་ངན་པར་གྱི་སཱ་ལུ་གཅིག་ཅར་བླངས་པར་གྱུར་ཏོ། ། སེམས་ཅན་ཞིག་གིས་སེམས་ཅན་དེ་ལ་སྨྲས་པ། ཀཝའེ་སེམས་ཅན་ཚུར་ཤོག་།སཱ་ལུའི་ཕྱིར་འདོང་ངོ ། །སེམས་ཅན་དེས་སྨྲས་པ། ཀཝའེ་སེམས་ཅན་ཁྱོད་རང་གི་སཱ་ལུའི་ཕྱིར་སོམས་ཤིག །
Ca153b
བདག་གིས་དགོངས་ཀ་དང་ནང་པར་གྱི་སཱ་ལུ་གཅིག་ཅར་བླངས་ཟིན་ཏོ། །དེ་ནས་སེམས་ཅན་དེ་འདི་སྙམ་དུ་ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ ། །བདག་གིས་ཀྱང་ཉི་མ་གཉིས་ཀྱི་དང་ཉི་མ་གསུམ་གྱི་དང་ཉི་མ་བདུན་གྱི་བར་གྱི་སཱ་ལུ་བླང་བར་བྱའོ་སྙམ་ནས། དེས་ཉི་མ་གཉིས་ཀྱི་དང་ཉི་མ་གསུམ་གྱི་དང་ཉི་མ་བདུན་གྱི་བར་གྱི་སཱ་ལུ་བླངས་པར་གྱུར་ཏོ། །དེ་ནས་སེམས་ཅན་ཞིག་གིས་སེམས་ཅན་དེ་དག་ལ་འདི་སྐད་ཅེས་སྨྲས་སོ། །ཀཝའེ་སེམས་ཅན་ཚུར་ཤོག་།སཱ་ལུའི་ཕྱིར་འདོང་ངོ ། །སེམས་ཅན་དེས་སྨྲས་པ། ཀཝའེ་སེམས་ཅན་ཁྱོད་རང་གི་སཱ་ལུའི་ཕྱིར་སོམས་ཤིག་།བདག་གིས་ཉི་མ་གཉིས་ཀྱི་དང་ཉི་མ་གསུམ་གྱི་དང་ཉི་མ་བདུན་གྱི་སཱ་ལུ་བླངས་ཟིན་ཏོ། །དེ་ནས་སེམས་ཅན་དེ་འདི་སྙམ་དུ་ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ ། །བདག་གིས་ཀྱང་ཟླ་བ་ཕྱེད་ཀྱི་དང ། ཟླ་བ་གཅིག་གི་སཱ་ལུ་བླང་བར་བྱའོ་སྙམ་ནས། དེས་ཟླ་བ་ཕྱེད་ཀྱི་དང་ཟླ་བ་གཅིག་གི་སཱ་ལུ་བླངས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས། མ་རྨོས་མ་བཏབ་པའི་འབྲས་སཱ་ལུའི་འབྲུ་གསོག་འཇོག་གི་ཡོངས་སུ་སྤྱོད་པས་ཟོས་པར་གྱུར་པ་དེའི་ཕྱིར་སཱ་ལུ་དེ་ལ་སོ་བ་དང ། སྦུན་པ་དང་འབྲས་ཀུན་ནས་དཀྲིས་པར་གྱུར་ཅིང་བརྔས་སོ་ཅོག་ཀྱང་ཕྱིར་མི་སྐྱེ་ལ་བརྔས་པར་ཡང་མངོན་ཞིང ། སཱ་ལུ་བྱིངས་དང་བྱིངས་མ་ཡིན་པ་དག་ན་རྣམ་པར་གནས་སོ། །དེ་ནས་སེམས་ཅན་དེ་དག་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང ། ཤེས་ལྡན་དག་བདག་ཅག་སྔོན་གཟུགས་ཅན་ཡིད་
Ca154a
༄#། །ལས་བྱུང་བ་མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ་ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་པ་ན། བདག་ཅག་ལ་སའི་བཅུད་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ། བྱུང་བར་གྱུར་ནས། གང་གི་ཕྱིར་བདག་གི་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་བདག་ཅག་གི་ལུས་ལ་སྲ་བ་ཉིད་དང་ལྕི་བ་ཉིད་བྱུང་ཞིང ། བདག་ཅག་གི་ཁ་དོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །བདག་ཅག་དེ་ཟ་ཞིང་ཟས་དེ་དང་ལྡན་ལ། ཚེ་རིང་ཞིང་ཡུན་རིང་དུ་གནས་པ་ལས་བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ།་ཁ་དོག་རྣམ་གཉིས་ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ། ཀཝའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། ། བདག་ཅག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །སའི་བཅུད་མེད་པར་གྱུར་པ་
Ca154b
ན་ས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ། ཚེ་རིང་ཞིང་ཡུན་རིང་དུ་གནས་སོ། །བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀཝའི་སེམས་ཅན་ནང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །ས་ཞག་མེད་པར་གྱུར་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ་ཚེ་རིང་དུ་གནས་སོ། །བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀཝའི་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ལ་ཁ་དོག་གིས་
Ca155a
༄#། །མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏོ། །མྱུ་གུའི་ཚལ་མེད་པར་གྱུར་བ་ན། མ་རྨོས་མ་བཏབ་པའི་འབྲས་སཱ་ལུའི་འབྲུ་སོ་བ་མེད་པ། སྦུན་པ་མེད་པ་དག་པ་གཙང་བ་སོར་བཞི་པ། ཀུན་ནས་མ་དཀྲིས་པ། ནུབ་བརྔས་ན་ནང་རྒྱས་ཤིང་ཕྱིར་སྐྱེ་ལ། ནང་བརྔས་ན་ནུབ་རྒྱས་ཞིང་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ། ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་བདག་ཅག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་གསོག་འཇོག་གི་ཡོངས་སུ་སྤྱོད་པས་ཟོས་པར་གྱུར་པ་དེའི་ཕྱིར་བདག་ཅག་ལ་འབྲས་སཱ་ལུ་སོ་བ་དང་སྦུན་པ་དང་འབྲས་ཀུན་ནས་དཀྲིས་པར་གྱུར་ཅིང་བརྔས་སོ་ཅོག་ཀྱང་ཕྱིར་མི་སྐྱེ་ལ། བརྔས་པར་ཡང་མངོན་ཞིང་སཱ་ལུ་བྱིངས་དང་བྱིངས་མ་ཡིན་པ་དག་ན་རྣམ་པར་གནས་པར་གྱུར་གྱིས་བདག་ཅག་འདུས་ཤིང་ལྷགས་ནས། མཚམས་གཅད་བར་བྱ་ཞིང་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་མུ་ཐུག་རྣམ་པར་གཞག་པར་བྱ་བ་སྙམ་ཞེས་དེ་དག་འདུས་ཤིང་ལྷགས་ནས། མཚམས་གཅོད་པར་བྱེད་ཅིང་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་མུ་ཐུག་རྣམ་པར་འཇོག་པར་བྱེད་དོ། །དགེ་སློང་དག་འདི་ནི་མུ་ཐུག་གི་ཡས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི། ཆོས་མ་ཡིན་པས་
Ca155b
ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དེ་ནས་སེམས་ཅན་ཞིག་གིས་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་ཞིག་གིས་སེམས་ཅན་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དེ་མཐོང་ངོ ། །མཐོང་ནས་ཀྱང་སེམས་ཅན་དེ་ལ་འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན། ཀཝའི་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིང ། སེམས་ཅན་དེས་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་དེས་ཀྱང ། སེམས་ཅན་གཞན་དེ་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དེ་མཐོང་ངོ ། །མཐོང་ནས་ཀྱང་ཡང་སེམས་ཅན་དེ་ལ་འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་ཅེས་སེམས་ཅན་དེས་སེམས་ཅན་དེ་འདྲེན་པར་བྱེད། ཁྲིད་པར་བྱེད་ཅིང་འཁོར་གྱི་ནང་དུ་ཡང་ཤེས་ལྡན་དག་སེམས་ཅན་འདི་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་ཏོ་ཞེས་སྨོད་པའི་བར་དུ་བྱེད་དོ། །དེ་ནས་སེམས་ཅན་དེ་དག་གིས་སེམས་ཅན་དེ་དག་ལ་འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན། ཀཝའི་
Ca156a
༄#། །སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་།དེ་ནས་སེམས་ཅན་མ་བྱིན་པར་ལེན་པ་དེས་སེམས་ཅན་དེ་དག་ལ་འདི་སྐད་ཅེས་སྨྲས་སོ། །ཤེས་ལྡན་དག་སེམས་ཅན་འདིས་ཁོ་བོ་ལ་སཱ་ལུའི་ཕྱིར་སྨྲས་ཏེ། འདྲེན་པར་བྱེད་ཁྲིད་པར་བྱེད་ཅིང་འཁོར་གྱི་ནང་དུ་སྨོད་པའི་བར་དུ་བྱེད་དོ། །དེ་ནས་སེམས་ཅན་དེ་དག་གིས་སེམས་ཅན་སཱ་ལུའི་ཕྱིར་སྨྲ་བ་དེ་ལ་འདི་སྐད་ཅེས་སྨྲས་སོ། །ཀཝའི་སེམས་ཅན་ཁྱོད་ཅིའི་ཕྱིར་སཱ་ལུའི་ཕྱིར་སེམས་ཅན་ལ་སྨྲ་ཞིང་འདྲེན་པར་བྱེད། ཁྲིད་པར་བྱེད་ལ་འཁོར་གྱི་ནང་དུ་སྨོད་པའི་བར་དུ་བྱེད། ཀཝའེ་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་།དེ་ནས་སེམས་ཅན་དེ་དག་འདི་སྙམ་དུ་ཤེས་ལྡན་དག་སཱ་ལུའི་ཕྱིར་འདྲེན་པར་བྱེད། ཁྲིད་པར་བྱེད་པ་ནས། འཁོར་གྱི་ནང་དུ་སྨོད་པར་བྱེད་པའི་བར་དག་སྣང་གིས། བདག་ཅག་འདུས་ཤིང་ལྷགས་ནས་བདག་ཅག་གི་ནང་ནས་སེམས་ཅན་གང་ཆེས་གཟུགས་བཟང་བ། ཆེས་བལྟ་ན་སྡུག་པ། ཆེས་མཛེས་པ། ཆེས་ལུས་ཆེ་བ། དེ་དག་བདག་ཅག་གིས་ཞིང་རྣམས་ཀྱི་བདག་པོར་བསྐོས་ན། བདག་ཅག་ལས་གང་ཆད་པས་གཅད་པར་བྱ་བ་ཡང་ཆད་པས་གཅོད་པར་འགྱུར་ཞིང ། ཕན་གདགས་པར་བྱ་བ་ལ་ཡང་ཕན་འདོགས་པར་འགྱུར་ལ། བདག་ཅག་གི་ཞིང་དག་ལས་ཅི་འབྱུང་བར་འགྱུར་བ་དེ་ལས་ཆོས་དང་ལྡན་པའི་ཐོག་ཤས་ཀྱང་དབུལ་བར་བྱའོ་སྙམ་ནས། སེམས་ཅན་དེ་དག་འདུས་ཤིང་ལྷགས་
Ca156b
ནས་དེ་དག་གི་ནང་ནས། སེམས་ཅན་གང་ཆེས་གཟུགས་བཟང་བ། ཆེས་བལྟ་ན་སྡུག་པ། ཆེས་མཛེས་པ། ཆེས་ལུས་ཆེ་བ་དེ་ཞིང་རྣམས་ཀྱི་བདག་པོར་སྐོ་ཞིང་འདི་སྐད་ཅེས། ཀྱེ་སེམས་ཅན་ཁྱོད་ཚུར་སྤྱོན། ཁྱོད་ཀྱིས་བདག་ཅག་ལས་གང་ཆད་པས་གཅད་པར་བྱ་བ་ཡང་ཆད་པས་ཆོད་ཅིག་།ཕན་གདགས་པར་བྱ་བ་ལ་ཡང་ཕན་ཐོགས་ཤིག་།བདག་ཅག་གི་ཞིང་དག་ལས་ཅི་འབྱུང་བ་དེ་ལས་ཀྱང་བདག་ཅག་གིས་ཁྱོད་ལ་ཆོས་དང་མཐུན་པའི་ཐོག་ཤས་དབུལ་ལོ་ཞེས་སྨྲས་ཏེ། དེ་ལྟར་སྐྱེ་བོ་མང་པོས་བཀུར་ཞིང་སྐྱེ་བོ་མང་པོས་བཀུར་བས། དེ་མང་པོས་བཀུར་བ་མང་པོས་བཀུར་བ་ཞེས་བྱ་བའི་མིང་དུ་གྱུར་ཏོ། །ཞིང་རྣམས་ཀྱི་བདག་པོ་དང་སྨས་པ་ལས་སྐྱོབ་པར་བྱེད་པས། རྒྱལ་རིགས་རྒྱལ་རིགས་ཞེས་བྱ་བའི་མིང་དུ་གྱུར་ཏོ། །ཚུལ་ཁྲིམས་ཀྱི་སྤྱོད་པ་ཀུན་ཏུ་སྤྱོད་པ་དང ། ཤེས་རབ་ཀྱི་སྤྱོད་པ་ཀུན་ཏུ་སྤྱོད་པས་ཆོས་ཀྱི་སྐྱེ་དགུ་དགའ་བར་བྱེད་པས་རྒྱལ་པོ་རྒྱལ་པོ་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་རྒྱལ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི། ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་བྲམ་ཟེའི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་གང་ཞེ་ན། དགེ་སློང་དག་དེ་ནས་སེམས་ཅན་ཁ་ཅིག་གིས་ཡོངས་སུ་འཛིན་པ་ནི་ནད་དོ། །ཡོངས་སུ་འཛིན་པ་ནི་འབྲས་སོ། །
Ca157a
༄#། །ཡོངས་སུ་འཛིན་པ་ནི་ཟུག་རྔུའོ། །ཡོངས་སུ་འཛིན་པ་ནི་སྡུག་བསྔལ་གྱི་རྩ་བའོ་ཞེས་བྱ་བར་རིག་ནས། གྲོང་ནས་དགོན་པའི་གནས་སུ་དོང་སྟེ་ཡལ་ག་དང ། ལོ་མའི་སྤྱིལ་པོ་དག་བྱས་ནས་གནས་བཅས་ཏེ་འཁོད་དོ། །དེ་དག་དགོངས་ཀར་ཡང་དགོངས་ཀའི་ཟས་འདོད་པས། གྲོང་དུ་བསོད་སྙོམས་ལ་ཞུགས་སོ། །ནང་པར་ཡང ། ནང་པར་གྱི་ཟས་འདོད་པས་གྲོང་དུ་བསོད་སྙོམས་ལ་ཞུགས་སོ། །དེ་ནས་སེམས་ཅན་གཞན་དག་འདི་སྙམ་དུ་ཤེས་ལྡན་འདི་དག་གིས་འདི་ལྟར་ཡོངས་སུ་འཛིན་པ་ནི་ནད་དོ། །ཡོངས་སུ་འཛིན་པ་ནི་འབྲས་སོ། །ཡོངས་སུ་འཛིན་པ་ནི་ཟུག་རྔུའོ། །ཡོངས་སུ་འཛིན་པ་ནི་སྡུག་བསྔལ་གྱི་རྩ་བའོ་ཞེས་བྱ་བར་རིག་ནས། གྲོང་ནས་དགོན་པའི་གནས་སུ་དོང་སྟེ་ཡལ་ག་དང་ལོ་མའི་སྤྱིལ་པོ་དག་བྱས་ནས་གནས་བཅས་ཏེ། འཁོད་ཅིང་དགོངས་ཀར་ཡང་དགོངས་ཀའི་ཟས་འདོད་པས། གྲོང་དུ་བསོད་སྙོམས་ལ་འཇུག་པར་བྱེད། ནང་པར་ཡང་ནང་པར་གྱི་ཟས་འདོད་པས། གྲོང་དུ་བསོད་སྙོམས་ལ་འཇུག་པར་བྱེད་པ་ནི་དཀའ་བ་བྱེད་པ་ཡིན་ནོ་སྙམ་ནས། དེ་དག་ལ་ཏེ་པོར་སྦྱིན་པ་དག་བྱ་བར་སེམས་སོ། །དེ་ནས་སེམས་ཅན་ཁ་ཅིག་བསམ་གཏན་དེ་དང་རབ་ཏུ་དབེན་པ་དེ་མངོན་པར་རྫོགས་པར་མ་རྟོགས་པ་ན། མཐའ་གཅིག་ཏུ་དོང་སྟེ། ཡལ་ག་དང་ལོ་མའི་སྤྱིལ་པོ་དག་བྱས་ནས། འདིར་བདག་ཅག་གིས་
Ca157b
གསང་སྔགས་ཀྱི་གཞུང་དག་བྱ། རིག་བྱེད་དག་སྦྱོར་བར་བྱའོ་ཞེས་གནས་བཅས་ཏེ་འཁོད་པར་གྱུར་ཅིང་དེ་དག་དེ་ན་གསང་སྔགས་ཀྱི་གཞུང་དག་བྱེད། རིག་བྱེད་དག་སྦྱོར་བར་བྱེད་དོ། །དེ་ནས་དེ་ལས་སེམས་ཅན་ཁ་ཅིག་གིས་བསམ་གཏན་དེ་དང ། རབ་ཏུ་དབེན་པ་དེ་དང ། གསང་སྔགས་ཀྱི་གཞུང་དེ་དང ། རིག་བྱེད་སྦྱར་བ་དེ་མངོན་པར་རྫོགས་པར་མ་རྟོགས་པ་ན་ཡང་ཕྱིར་དགོན་པ་ནས་གྲོང་མཐར་ལྷགས་ཏེ། ཁང་ཁྱིམ་སྒོ་བཞི་པ་དག་བརྩིགས་ནས། འདིར་བདག་ཅག་གིས་སྦྱིན་པ་དག་སྦྱིན་པར་བྱ། བསོད་ནམས་དག་སྤེལ་བར་བྱ། སྐྱེ་བོ་མགྲོན་པ་འོངས་ཤིང་ལྷགས་པ་རྣམས་ལ་ཅི་ནུས་ཅི་ལྕོགས་སུ་བཟའ་བ་དང ། བཏུང་བས་ཚིམ་པར་བྱའོ་ཞེས་དེ་དག་དེ་ན་སྦྱིན་པ་དག་སྦྱིན། བསོད་ནམས་དག་བྱེད། སྐྱེ་བོ་མགྲོན་པ་འོངས་ཤིང་ལྷགས་པ་རྣམས་ལ་ཅི་ནུས་ཅི་ལྕོགས་སུ་བཟའ་བ་དང ། བཏུང་བས་ཚིམ་པར་བྱེད་དོ། །འདི་དག་གྲོང་ལས་ཕྱི་རོལ་ཏུ་རྟེན་ཅིང ། ཕྱི་རོལ་ཏུ་སེམས་པ་ཞེས་བྱ་བ་ལས་བྲམ་ཟེ་བྲམ་ཟེ་ཞེས་བྱ་བའི་མིང་དུ་གྱུར་ཏོ། །ཡང་འདི་དག་ནི་བསམ་གཏན་མི་བྱེད་དོ་ཞེས་བྱ་བ་ལས་ཀློག་ཏུ་འཇུད་པ་ཀློག་ཏུ་འཇུད་པ་ཞེས་བྱ་བའི་མིང་དུ་གྱུར་ཏོ། །དགོན་པ་ནས་ཡང་ཕྱིར་གྲོང་མཐར་ལྷགས་པས། གྲོང་པ་གྲོང་པ་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་བྲམ་ཟེའི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་
Ca158a
༄#། །ཏེ།་རྒྱལ་བ་དབང་པོ་རྣམས་ཀྱིས་ཆོས་མཆོག་ཡིན་ནོ། །དགེ་སློང་དག་རྗེའུ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་གང་ཞེ་ན། དགེ་སློང་དག་དེ་ནས་སེམས་ཅན་ཁ་ཅིག་ཁང་ཁྱིམ་སོ་སོ་དང་ལྡན་པའི་བཟོའི་གནས་དང ། ལས་ཀྱི་གནས་དག་ལ་བརྩོན་པ་དག་ལ། སེམས་ཅན་འདི་དག་བཟོའི་གནས་དང ། ལས་ཀྱི་གནས་སོ་སོར་སྒྲུབ་པར་བྱེད་དོ་ཞེས་བྱ་བ་ལས་རྗེའུ་རིགས་རྗེའུ་རིགས་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་རྗེའུ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་ཆོས་ཉིད་ཀྱིས་ན་དཀྱིལ་འཁོར་གསུམ་པོ་དག་འཇིག་རྟེན་དུ་བྱུང་བས། བཞི་པ་དགེ་སྦྱོང་གི་དཀྱིལ་འཁོར་ཡང་འཇིག་རྟེན་དུ་འབྱུང་བར་འགྱུར་རོ། །ཇི་ལྟར་ཞེ་ན། དགེ་སློང་དག་རྒྱལ་རིགས་ཀྱི་ཁྱིམ་ནས་ཀྱང་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པས། རྒྱལ་རིགས་ཀྱིས་ཀྱང་དེ་དག་ལ་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང ། ཐལ་མོ་སྦྱར་བ་དང ། འདུད་པའི་ལས་བྱ་བར་འོས་པ་ཡིན་ལ། བྲམ་ཟེ་དང ། རྗེའུ་རིགས་དག་གིས་ཀྱང་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང །
Ca158b
ཐལ་མོ་སྦྱར་བ་དང ། འདུད་པའི་ལས་བྱ་བར་འོས་པ་ཡིན་ནོ། །བྲམ་ཟེའི་ཁྱིམ་དང ། རྗེའུ་རིགས་ཀྱི་ཁྱིམ་ནས་ཀྱང་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་ཅིང ། རྒྱལ་རིགས་ཀྱིས་ཀྱང་དེ་དག་ལ་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང ། ཐལ་མོ་སྦྱར་བ་དང ། འདུད་པའི་ལས་བྱ་པར་འོས་པ་ཡིན་ལ། བྲམ་ཟེ་དང ། རྗེའུ་རིགས་དག་གིས་ཀྱང་དེ་དག་ལ་མངོན་དུ་སྨྲ་བ་དང ། ཕྱག་བྱ་བ་དང ། ལྡང་བ་དང ། ཐལ་མོ་སྦྱར་བ་དང ། འདུད་པའི་ལས་བྱ་བར་འོས་པ་ཡིན་ནོ། །དགེ་སློང་དག་དེ་ལ་དེའི་ཚེ་དེའི་དུས་ན། གང་གིས་དེའི་དང་པོར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་པའི་སེམས་ཅན་དེ་ནི་དགེ་སློང་ནོར་ཅན་ཏེ། འདིས་དེའི་ཚེ་ཡང་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་ངོ ། །འདིས་ད་ལྟར་ཡང་དགེ་སློང་གི་དགེ་འདུན་སྐྱོན་མེད་ཅིང་ཆུ་བུར་མེད་པ་ལ། དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་ངོ ། །དགེ་སློང་དག་དེ་ལྟ་བས་ན། འདི་ལྟར་བསླབ་པར་བྱ་སྟེ། འདོད་ཆགས་སྤང་བའི་ཕྱིར་འབད་པར་བྱའོ། །ཞེ་སྡང་སྤང་བའི་ཕྱིར་དང ། གཏི་མུག་སྤང་བའི་ཕྱིར་འབད་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང ། སྨྱོས་པ་དང་སེམས་འཁྲུགས་པ་དང ། ཚོར་བ་དག་གིས་ཉེན་པ་ལ་ནི་ལྟུང་བ་མེད་
Ca159a
༄#། །དོ། །ཕམ་པར་འགྱུར་བ་གཉིས་པ་རྫོགས་སོ།། །།འདུལ་བ་རྣམ་པར་འབྱེད་པ། བམ་པོ་བརྒྱད་པ། ཕམ་པར་འགྱུར་བ་གསུམ་པའི་སྤྱི་སྡོམ་ལ།་བྲན་པ་དང་ནི་བདག་ཉིད་དང ། །དུག་དང་རོ་ལངས་བསྲོ་ཁང་ངོ ། །སྡོམ་ལ། བྲན་པ་དང་ནི་སྐྱོང་བ་དང ། །མཆུ་ཅན་དང་ནི་ཤི་རི་ཀ། ལྷུང་བཟེད་དང་ནི་ཆོས་གོས་དང ། །མངལ་ན་གནས་དང་ཚོང་དཔོན་ནོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་བྲན་པ་དང་སྐྱོང་བ་ཞེས་བྱ་བ་ཕན་ཚུན་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས་སྨོས་འདྲིན་མཐུན་པར་བརྗོད་པ་གཉིས་ཤིག་འཁོད་དོ། །ཇི་ཙམ་དུས་གཞན་ཞིག་ན་སྐྱོང་བ་ན་བར་གྱུར་ནས་དེའི་ནད་གཡོག་བྲན་པ་བྱེད་པ་ན། སྐྱོང་བས་མཚན་མོ་སྒྲ་བསྒྲག་པར་བརྩམས་པ་དང ། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཁོ་བོ་བཀྲེས་སོ། །སྐོམ་མོ། བྲན་པས་སྨྲས་པ། ཚེ་དང་ལྡན་པ་སྐྱོང་བ་རབ་ཏུ་བྱུང་བའི་སེམས་ཉེ་བར་གཞག་པར་གྱིས་ཤིག་།གལ་ཏེ་ད་ལྟར་སྨན་ཡོད་དུ་ཟིན་ཀྱང་རེ་ཞིག་བྱིན་ལེན་སྟོབས་པ་ཡང་མེད་ན། ཁྱོད་ལ་སྨན་ལྟ་སྨོས་ཀྱང་ཅི་དགོས་ཏེ་མེད་དོ། །སྐྱོང་བ་དེ་སོ་སོར་རྟོག་པ་མི་མངའ་བ་ཡིན་པས་དེ་ཁོ་བོ་སྐོམ་མོ། །བཀྲེས་སོ། །ཞེས་སྒྲ་སྒྲོགས་བཞིན་པ་ལས་ནམ་ནངས་པ་དང ། བྲན་
Ca159b
པས་སྨྲས་པ། ཚེ་དང་ལྡན་པ་སྐྱོང་བ་ཁོ་བོས་སྨན་པ་ལ་དྲིས་ཏེ་འོང་གི་བར་དུ་ཁྱོད་ཀྱིས་རེ་ཞིག་སོ་ཤིང་འོར་ཅིག་།བྲན་པས་སྨན་པའི་གན་དུ་སོང་ཏེ་སྨྲས་པ། བཞིན་བཟང་གཞོན་ནུ་ཞིག་ན་ན་དེ་ལ་འཕྲོད་པའི་སྨན་སྟོན་ཅིག་།སྨན་པས་སྨྲས་པ། འཕགས་པ་དགེ་སློང་དེའི་སྨན་ནི་འདི་དང་འདི་ལྟ་བུ་ལགས་སོ། །བྲན་པ་སྨན་པའི་གན་དུ་ཇི་སྲིད་སོང་བ་དེའི་ཚེ་ན། ཚེ་དང་ལྡན་པ་སྐྱོང་བ་ཁྲི་ལས་ལངས་ཏེ། ཤམ་ཐབས་གྱོན་ནས་འདག་རྫས་དང་རི་ལ་བ་སྤྱི་བླུགས་དང་སོ་ཤིང་ཐོགས་ཏེ་བང་རིམ་དུ་བྱུང་ནས། སོ་ཤིང་དོར་པར་བརྩམས་པ་དང ། དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་མཚན་མོ་ཏེ་བོར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཚེ་དང་ལྡན་པ་དག་ཁོ་བོ་ཏེ་བོར་སྐོམ་པ་དང ། བཀྲེས་པར་གྱུར་ཏོ། །དེ་ནས་དགེ་སློང་ཞིག་གིས་སྨྲས་པ། ཚེ་དང་ལྡན་པ་སྐྱོང་བ་ཁོ་བོ་ལ་ཆུའི་ཐུག་པ་ཡོད་ན་ཅི་མི་འཐུང་ངམ། སྐྱོང་བས་སྨྲས་པ། མ་ནོངས་ཀྱིས་བཏུང་ངོ་ཞེས་དེས་དེ་འཐུངས་སོ། །དགེ་སློང་གཞན་དག་གིས་སྨྲས་པ། ཁོ་བོ་ཅག་ལ་འོ་ཐུག་དང ། ཞོ་ཐུག་དང ། འཁུར་བ་དང ། ཤ་དང ། སྤྱན་གཟིགས་དག་ཡོད་ན་ཅི་མི་ཟའམ། སྐྱོང་བས་དགེ་སློང་དེ་དག་ལས་ཚངས་པ་མཚུངས་པར་སྤྱོད་པ་རྗེས་སུ་བསྲུང་བ་དང་བརྐམ་ཆགས་ཉིད་ཀྱིས་ཅུང་ཟད་ཅུང་ཟད་ལོངས་སྤྱོད་པ་དང ། ཧ་ཅང་ཟས་དྲགས་ནས་དེ་གློས་ཕབ་སྟེ་ཉལ་ལོ། །བྲན་པ་ཡང་སྨན་པ་ལ་དྲིས་ནས་མྱུར་བ་མྱུར་བར་འོངས་ཏེ་དེ་ནས་སྨན་པས། ཇི་སྐད་བསྟན་པའི་སྨན་སྦྱར་ཏེ་སྨྲས་པ། ཚེ་
Ca160a
༄#། །དང་ལྡན་པ་སྐྱོང་བ་ལོངས་ལ་སོ་ཤིང་འོར་ཅིག་།སྐྱོང་བས་སྨྲས་པ། བོར་ཟིན་ཏོ། །བྲན་པས་སྨྲས་པ། མ་ཉེས་སོ་ཞེས་དེས་དཀྱིལ་འཁོར་བྱུགས་ཤིང་སྣོད་དང་ཁ་གཟར་བྱི་དོར་བྱས་ཏེ། ལོངས་ལ་ཟོ་ཞིག་ཅེས་སྨྲས་པ་དང ། སྐྱོང་བས་དེ་རྗེས་སུ་བསྲུང་བས་ལངས་སོ། །བྲན་པས་སྨན་བྱིན་ལེན་བྱེད་དུ་བཅུག་སྟེ་ཕུལ་བ་དང ། སྐྱོང་བས་ཁ་གཟར་དོའམ་གསུམ་བཀང་སྟེ་ཟོས་ནས། གློས་ཕབ་སྟེ་ཉལ་ལོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་མི་ཟ། སྐྱོང་བས་སྨྲས་པ། ཁོ་བོ་མི་འདོད་དོ། །བྲན་པས་སྨྲས་པ། ཁྱོད་ཀྱིས་མཚན་ཐོག་ཐག་ཏུ་ཁོ་བོ་བཀྲེས་སོ། །སྐོམ་མོ་ཞེས་ཁོ་བོ་ལ་མཐོ་བཙམས་ན། ད་ནི་ཁྱོད་མི་འདོད་དོ་ཞེས་ཟེར་ན། ད་ཁྱོད་དུས་ལ་བབ་བོ། །དགེ་སློང་རྣམས་ཀྱིས་བྲན་པ་ལ་སྨྲས་པ། ཚེ་དང་ལྡན་པ་བྲན་པ་འདི་ལ་བག་བྱོས་ཤིག་།འདིས་ཁོ་བོ་ཅག་ལས་ཆུའི་ཐུག་པ་དང ། འོ་ཐུག་དང་ཞོ་ཐུག་དག་འཐུངས་ཤིང ། འཁུར་བ་དང ། ཤ་དང་སྤྱན་གཟིགས་དག་ཟོས་སོ། ། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཁྱོད་ཀྱིས་དེ་ལྟ་བྱས་པ་བདེན་ནམ། སྐྱོང་བ་ཉེས་པ་དང་བཅས་པས་ཡིད་བསྒྱངས་ཏེ་སྨྲས་པ། བྱས་སོ། །བྲན་པས་སྨྲས་པ། ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན། ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། དེ་
Ca160b
ལྟར་མི་མཐུན་པ་ཟོས་པ་ནི་མ་ཡིན་ནོ། །སྐྱོང་བ་ངོ་ཚ་ནས། བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན། བདག་དེ་ལྟར་མི་མཐུན་པ་བྱེད་པས་བདག་གིས་དུག་ཟོས་པ་ནི་བླའི། དེ་ལྟར་མི་མཐུན་པ་བྱེད་པ་ནི་མ་ཡིན་པས། བདག་གིས་དུག་ཟའོ་སྙམ་དུ་བསམས་ནས། དེ་ལངས་ཏེ་སྣོད་དུ་བརྟགས་པར་བརྩམས་པ་དང ། དེས་པར་བུར་སྣོད་ན་དུག་གི་དུམ་བུ་མཐོང་ནས། དེས་དེ་ཟོས་པ་དང ། དེ་དུག་གིས་ཡོངས་སུ་འཁྲུགས་པར་གྱུར་པའི་སེམས་ཀྱིས་འཆི་བར་བརྩམས་ཏེ།་ཁ་ཆུ་འཛག། མིག་འགྱུར། བཞིན་བསྒྱུར་ཞིང་འདི་སྐད་ཅེས་བྲན་པ་ཁོ་བོ་ཤིའོ། །ཁོ་བོ་ཤིའོ་ཞེས་ཀྱང་ཟེར་རོ། །བྲན་པས་ཐོས་ནས། དེ་བརྟན་ཅིང་མྱུར་བ་མྱུར་བར་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་དེ་སྐད་ཀུ་ཅོ་འདོན་པར་བྱེད། སྐྱོང་བས་སྨྲས་པ། ཁྱོད་ན་རེ། ཚེ་དང་ལྡན་པ་སྐྱོང་བ་ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན། ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། ཁྱོད་ཀྱིས་དེ་ལྟར་མི་མཐུན་པ་ཟོས་པ་ནི་མ་ཡིན་ནོ་ཞེས་ཟེར་བས། བདག་ལ་བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན། བདག་དེ་ལྟར་མི་མཐུན་པ་
Ca161a
༄#། །བྱེད་པས་བདག་གིས་དུག་ཟོས་པར་གྱུར་པ་ནི་བླའི། དེ་ལྟར་མི་མཐུན་པ་ཟོས་པ་ནི་མ་ཡིན་པས། བདག་གིས་དུག་ཟའོ་སྙམ་པའི་བློ་སྐྱེས་ནས། བདག་གི་སྣོད་དུ་བརྟག་པར་བརྩམས་པ་དང ། བར་བུར་སྣོད་ན་དུག་གི་དུམ་བུ་མཐོང་ནས་བདག་གིས་དེ་ཟོས་སོ། །བྲན་པས་ཡི་ཆད་པའི་བཞིན་གྱིས་སྨྲས་པ། ཚེ་དང་ལྡན་པ་ཁྱོད་ཀྱིས་མ་ལེགས་པ་བྱས་སོ་ཞེས་སྨྲས་ཏེ། སྨན་པའི་དྲུང་དུ་སོང་བ་དང ། དུག་དེ་རྣོན་པོ་ཞིག་ཡིན་པས་གཟུང་བར་མ་ནུས་ཏེ་དེ་དུས་ལ་བབ་བོ། །བྲན་པས་སྨན་པ་ཁྲིད་དེ་འོངས་པ་ན། དེ་དུས་ལ་བབ་པ་མཐོང་ནས། བྲན་པ་བདག་གིས་འཆིར་བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ནད་པ་ལ་གང་ཐོས་ན་ནད་པ་འཆི་བའི་ཕྱིར་རྩོལ་བར་བྱེད་པ་དེ་ལྟ་བུའི་གཏམ་ཉེ་བར་བརྗོད་པས་ཉེ་བར་བརྗོད་པར་མི་བྱའོ། །དགེ་སློང་གིས་ནད་པ་ལ་གང་ཐོས་ན། ནད་པ་འཆི་བའི་ཕྱིར་རྩོལ་བར་འགྱུར་བ་དེ་ལྟ་བུའི་གཏམ་ཉེ་བར་བརྗོད་པ་ཉེ་བར་རྗོད་པར་བྱེད་ན། འགལ་ཚབས་ཅན་དུ་འགྱུར་རོ། །འདི་ནི་རེ་ཞིག་བྱུང་བ་ཡིན་གྱི། སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བ་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་
Ca161b
རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མཆུ་ཅན་དང་ཤི་རི་ཀ་ཞེས་བྱ་བ། གཏམ་འདྲེས་པ། ཕེབས་པར་སྨྲ་བ་འགྲོགས་བཤེས་སྨོས་འདྲིན་མཚུངས་པར་བརྗོད་པ་གཉིས་ཤིག་འཁོད་དོ། །མཆུ་ཅན་ནི་རྔོན་པ་ལས་རབ་ཏུ་བྱུང་བ་ཡིན་ལ། ཤི་རི་ཀ་ནི་ཁྱིམ་བདག་ལས་རབ་ཏུ་བྱུང་བ་ཡིན་ནོ། །ཇི་ཙམ་དུས་གཞན་ཞིག་ན་མཆུ་ཅན་གྱི་ཚ་བོ་གཉིས་ཤིག་ཕ་མ་དང་བྲལ་བས་དེ་དང་དེར་འཁྱམ་པ་ན། རྒྱལ་བྱེད་ཀྱི་ཚལ་དུ་ཕྱིན་ཏེ་སྒོ་ན་སྡོད་དོ། །མཆུ་ཅན་ཕྱིར་བྱུང་བ་དང ། དེས་དེ་གཉིས་བཞིན་གཟུགས་ལས་ངོ་ཤེས་ནས། དེས་དེ་གཉིས་ལ་སྨྲས་པ། ཁྱེད་གཉིས་ཀྱི་ཕ་མ་དག་གར་དོང ། དེ་གཉིས་ཀྱིས་སྨྲས་པ། དུས་ལ་བབ་བོ། །དེ་ཉེ་དུ་ལ་མཉེས་གཤིན་པས་ཐོས་ནས། མཆི་མ་དང་བཅས་པའི་སྐད་ཀྱིས་འདུག་པ་དང ། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མཆུ་ཅན། ཁྱེའུ་འདི་གཉིས་སུའི། མཆུ་ཅན་གྱིས་སྨྲས་པ། བདག་གི་ཚ་བོ་གཉིས་ཡིན་ནོ། །དགེ་སློང་རྣམས་ཀྱིས་སྨྲས་པ། ཅིའི་ཕྱིར་འདི་གཉིས་སྡུད་པར་མི་བྱེད། མཆུ་ཅན་གྱིས་སྨྲས་པ། བདག་ཀྱང་རེ་ཞིག་དཀའ་བས་བསོད་སྙོམས་སྒྲུབ་པར་བྱེད་ན། འདི་གཉིས་ཅི་ཞིག་གིས་བསྡུ་བར་བྱ། དགེ་སློང་དག་གིས་སྨྲས་པ། འདི་གཉིས་འདོད་ན་དགེ་སློང་རྣམས་ལ་འདབ་མ་དང་མེ་ཏོག་དང་འབྲས་བུ་དང་སོ་ཤིང་དག་འབུལ་དུ་ཆུག་ཅིག་དང ། དགེ་སློང་དག་གིས་ཀྱང་འདི་གཉིས་ལ་ལྷུང་བཟེད་ཀྱི་ལྷག་མ་སྦྱིན་པར་
Ca162a
༄#། །འགྱུར་རོ། །མཆུ་ཅན་གྱིས་དེ་གཉིས་བླངས་ནས། དེ་གཉིས་ཀྱང་གྲིམས་པ་ལེ་ལོ་མེད་པ་སྒྲུབ་ཕོད་པ་ཡིན་པས་དགེ་སློང་རྣམས་ལ་འདབ་མ་དང་མེ་ཏོག་དང་འབྲས་བུ་དང ། སོ་ཤིང་དག་འབུལ་བར་བྱེད་ནས། དགེ་སློང་རྣམས་ཀྱིས་ཀྱང་དེ་གཉིས་ལ་ལྷུང་བཟེད་ཀྱི་ལྷག་མ་སྦྱིན་པར་བྱེད་དོ། །དེ་གཉིས་གོས་དང་ཟས་བཟང་པོ་དུས་ཡུན་མི་རིང་བས་པགས་པ་དང་ཤ་དང་ཁྲག་རྟས་ཤིང་དེ་གཉིས་སྟོབས་དང་སྙེམས་པ་དང་ལྡན་པར་གྱུར་ཏོ། །དེ་གཉིས་དུས་གཞན་ཞིག་ན་རྒྱལ་བྱེད་ཀྱི་ཚལ་གྱི་སྒོ་ན་རྩེ་ཞིང་འཁོད་པ་དང ། དེ་གཉིས་ཀྱི་ཉེ་དུ་དག་ལག་ན་མདའ་གཞུ་ཐོགས་ཤིང་རྒྱལ་བྱེད་ཀྱི་ཚལ་གྱི་སྒོ་ནས། རི་དྭགས་ཤོར་དུ་འདོང་བ་དེ་དག་གིས་དེ་གཉིས་མཐོང་ནས་དེ་དག་གིས་སྨྲས་པ། ཁྱེའུ་གཉིས། ཁྱེད་གཉིས་ག་ལས་འདིར་འོངས། ཁྱེའུ་གཉིས་ཀྱིས་སྨྲས་པ། ཤཱཀྱའི་སྲས་ཀྱི་དགེ་སྦྱོང་གི་ནང་འདི་ན་བདག་ཅག་གཉིས་ཀྱི་ཞང་པོ་རབ་ཏུ་བྱུང་བ་དེའི་གནས་ན་འཁོད་དོ། །དེ་དག་གིས་སྨྲས་པ། ཁྱེད་གཉིས་ཀྱི་ཞང་པོ་དེ་ཡང་རེ་ཞིག་ཤཱཀྱའི་སྲས་ཀྱི་དགེ་སྦྱོང་ལས་མེད་པའི་ངང་ཚུལ་ཅན་རྣམས་ཀྱི་ནང་དུ་རབ་ཏུ་བྱུང་བ་ཡིན་ན། ཅི་ཁྱེད་གཉིས་ཀྱང་ལས་མེད་པའི་ངང་ཚུལ་ཅན་དུ་བྱེད་དམ། ཚུར་ཤོག་།ཕའི་ལས་རྗེས་སུ་སྒྲུབས་ཤིག་།དེ་གཉིས་ཀྱིས་སྨྲས་པ། ཁོ་བོ་ཅག་གཉིས་ལ་ཞང་པོས་ཕན་བཏགས་པས་ཇེ་དེ་ལ་དྲི་བར་བྱའོ། །ཞེས་དེ་གཉིས་ཚེ་དང་ལྡན་པ་མཆུ་ཅན་ག་ལ་བ་དེར་དོང་སྟེ་ཕྱིན་
Ca162b
ནས། ཚེ་དང་ལྡན་པ་མཆུ་ཅན་ལ་འདི་སྐད་ཅེས་སྨྲས་སོ། །ཞང་པོ་བདག་ཅག་གཉིས་ཕའི་ལས་རྗེས་སུ་སྒྲུབ་ཏུ་མཆིའོ། །མཆུ་ཅན་གྱིས་སྨྲས་པ། ཁོ་བོས་ཁྱེད་གཉིས་དད་པས་སྦྱིན་པར་བྱས་པས་བསྐྱེད་བསྐྱེད་ན། ད་ཅིའི་ཕྱིར་ཉེས་པར་སྤྱོད་པའི་ལས་འདི་ལྟ་བུ་བྱེད། དེ་གཉིས་ཀྱིས་སྨྲས་པ། ཞང་པོ་བདག་ཅག་གཉིས་མགོ་ལ་གསེར་གྱི་ཕྲེང་བས་བཅིངས་པ་ནི་ངོ་ཚའི། ཕའི་ལས་རྗེས་སུ་སྒྲུབ་པས་ནི་དེ་ལྟ་མ་ལགས་ཀྱིས་མཆིའོ་ཞེས་དེ་གཉིས་ཀྱིས་དེའི་ཚིག་ཚིག་མ་ཡིན་པར་བྱས་ཏེ་དོང་ནས། དེ་གཉིས་རི་དྭགས་གསོད་ཅིང་འཚོ་བར་བྱེད་དོ། །ཇི་ཙམ་དུས་གཞན་ཞིག་ན། ཤི་རི་ཀ་ན་བར་གྱུར་ནས། མཆུ་ཅན་དེའི་ནད་གཡོག་བྱེད་པ་ན་ཤི་རི་ཀ་སྡུག་བསྔལ་གྱི་ཚོར་བ་དག་གིས་ཉེན་ནས། བདག་རེ་ཞིག་ཚུལ་ཁྲིམས་དང་ལྡན་པས། བདག་ཡུལ་གཞན་དུ་སོང་ན་ལོ་ལེགས་ཤིང ། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་བས་རྣམ་པ་ཐམས་ཅད་དུ་བདག་ཉིད་གསད་པར་བྱའོ་སྙམ་དུ་སེམས་སོ། །ཡང་བདག་ཉིད་གསོད་པར་བྱེད་པ་ནི། སྡུག་བསྔལ་བ་ཡིན་གྱིས་གསོད་པར་བྱེད་པ་ཞིག་བཙལ་ལོ་སྙམ་དུ་སེམས་ཤིང ། དེ་བདག་གི་སྲོག་གཅོད་བར་བྱེད་པ་སུ་ཡོད་སྙམ་དུ་དཔྱོད་པ་ལ་ཞུགས་པ་དང ། དེ་ལ་མཆུ་ཅན་གྱི་ཚ་བོ་གཉིས་དྲག་ཤུལ་ཅན་ལག་པ་དམར་པ། བསྣུན་པ་དང་རབ་ཏུ་བསྣུན་པ་ལ་ཞུགས་པ། གཞན་གྱི་སྲོག་འཕྲོག་པ་གཞན་གྱི་སྲོག་གཅོད་དུ་འཇུད་པ།
Ca163a
༄#། །གཞན་གྱི་སྲོག་གཅོད་པས་འཚོ་བར་བྱེད་པ་ཡིན་པས་དེ་གཉིས་ཀྱི་བདག་གསོད་པར་ནུས་ཀྱི། གཞན་སུས་ཀྱང་མི་ནུས་སོ་སྙམ་པའི་བློ་སྐྱེས་ཤིང་རིག་ནས། ཚེ་དང་ལྡན་པ་མཆུ་ཅན་ལ་སྨྲས་པ། ཚེ་དང་ལྡན་པ་མཆུ་ཅན་ཁྱོད་ཀྱི་ཚ་བོ་དེ་གཉིས་མི་སྣང་ན་གར་དོང ། མཆུ་ཅན་གྱིས་སྨྲས་པ། ཁྱོད་དེ་གཉིས་ཀྱི་མིང་མ་འཛིན་ཅིག་།དེ་གཉིས་ནི་འདི་ལྟ་བུའི་སྡིག་པ་བྱེད་པ་ཡིན་ཏེ། དེ་གཉིས་ཁོ་བོས་དད་པས་སྦྱིན་པར་བྱ་བས་བསྐྱེད་བསྐྱེད་ན་དེ་གཉིས་ད་ཉེས་པར་སྤྱོད་པའི་ལས་བྱ་བ་ལ་ཞུགས་ཤིང་ཕའི་ལས་རྗེས་སུ་སྒྲུབ་པར་བྱེད་དེ། གཞན་གྱི་སྲོག་འཕྲོག་པར་བྱེད། གཞན་གྱི་སྲོག་གཅོད་པས་འཚོ་བར་བྱེད་དོ། །ཤི་རི་ཀས་སྨྲས་པ། དེ་གཉིས་ལ་ཀུན་ནས་མནར་སེམས་མ་སྐྱེད་ཅིག་།དེ་ནི་འདུ་འཛིའི་རིགས་པ་ཡིན་ཏེ། གང་གི་ཚེ་དེ་གཉིས་རྒྱལ་བྱེད་ཀྱི་ཚལ་ན་འཁོད་པ་དེའི་ཚེ་ན། དེ་གཉིས་ཀྱིས་གྲོག་སྤུར་ཕྲ་མོའི་སྲོག་ཀྱང་མ་བཅད་དོ། །དེ་གཉིས་དེ་ལྟ་བུ་དག་དང་ལྷན་ཅིག་གནས་པས་དེ་ལྟ་བུའི་ཉེས་པར་སྤྱོད་པ་དག་བྱེད་ན། དེ་གཉིས་དེ་དག་དང་ཤིན་ཏུ་དབྲལ་བར་བྱ་ཞིང་འདི་ལྟར་གང་གི་ཚེ་ཁྱོད་ག་ཤེད་དུ་འགྲོ་བ་དེའི་ཚེ་ན་ཁོ་བོ་སྲུང་བར་བྱེད་པ་འགའ་ཡང་མེད་པས། གལ་ཏེ་དེ་གཉིས་སྣང་ན་ཁོ་བོའི་གན་དུ་ཐོང་ལ་དེ་གཉིས་ཁོ་བོ་སྲུང་དུ་ཆུག་ཅིག་།ཇི་ཙམ་ན་མཆུ་ཅན་བསོད་སྙོམས་ལ་ཞུགས་པ་ན། དེའི་ཚ་བོ་དེ་གཉིས་ཚོང་འདུས་ན་ཤ་འཚོང་ཞིང་འདུག་པ་དེས་མཐོང་ནས། དེ་གཉིས་ལངས་ཏེ་དེའི་
Ca163b
རྐང་པ་གཉིས་ལ་གཏུགས་པ་དང ། དེས་སྨྲས་པ། ཁྱེའུ་གཉིས་ཁོ་བོ་ཁྱེད་གཉིས་ཀྱི་ཅིར་འོངས། ཞང་པོར་མཆིའོ། །ཤི་རི་ཀ་ཅིར་འོང ། དེ་ཡང་ཞང་པོར་མཆིའོ། །དེ་དུས་དེ་སྲིད་དུ་ན་ན་ཁྱེད་གཉིས་དེ་ལ་ལྟར་མ་དོང་ངམ། ཞང་པོ་བདག་ཅག་གིས་མ་འཚལ་ཏོ། །ད་དེང་ཞིག་།བདག་ཅག་གཉིས་ཀྱིས་བགྱི་བ་ཅི་མཆིས། དེ་ཅི་ཟེར་བ་དེ་བཞིན་དུ་གྱིས་ཤིག་།དེ་གཉིས་ཚེ་དང་ལྡན་པ་ཤི་རི་ཀ་ག་ལ་བ་དེར་སོང་སྟེ་ཕྱིན་ནས། དེའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཤི་རི་ཀས་སྨྲས་པ། ཁྱེའུ་གཉིས་མཆུ་ཅན་ཁྱེད་གཉིས་ཀྱི་ཅིར་འོང ། ཞང་པོར་མཆིའོ།། ཁོ་བོ་ཅིར་འོང ། ཞང་པོར་མཆིའོ། །ཁོ་བོ་དུས་དེ་སྲིད་དུ་ན་ན་ཁྱེད་གཉིས་ཀྱིས་ཁོ་བོ་ལན་འགའ་ཡང་མ་བལྟས་སོ། །ཞང་པོ་བདག་ཅག་གཉིས་ཀྱིས་མ་འཚལ་ཏེ། བདག་ཅག་གཉིས་ཀྱིས་ད་གཟོད་ཐོས་ནས། དེའི་སླད་དུ་བདག་ཅག་གཉིས་མཆིས་སོ། །ཚ་བོ་གཉིས་ཁྱེད་གཉིས་ཁོ་བོ་ལྷ་རྣམས་ཀྱི་ནང་དུ་སྐྱེ་བར་འདོད་དམ། ཞང་པོ་བདག་ཅག་གཉིས་གཞན་ཡང་ལྷ་རྣམས་ཀྱི་ནང་དུ་སྐྱེ་བར་འཚལ་ན།་ཞང་པོ་ལྟ་སྨོས་ཀྱང་ཅི་འཚལ། ཚ་བོ་གཉིས་གལ་ཏེ་དེ་ལྟ་ན་ཁོ་བོ་ཡུལ་གཞན་དུ་སོང་ན་ལོ་ལེགས་ཤིང ། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་ན་བདག་ལ་རྩོམ་པར་བྱེད་པ་སྡུག་བསྔལ་བ་ཡིན་གྱིས་ཁྱེད་གཉིས་ཀྱི་ཁོ་བོ་སོད་ཅིག་།ཞང་པོ་གལ་ཏེ་གཞན་འགའ་ཞིག་གིས་ཁྱོད་དགྲོངས་པར་
Ca164a
༄#། །བགྱིད་ན་ཡང་བདག་ཅག་གཉིས་ཀྱིས་དེ་དགུམ་པར་བགྱི་ན། བདག་ཅག་གཉིས་ཀྱིས་ཞང་པོ་དགྲོངས་པ་ལྟ་སྨོས་ཀྱང་ཅི་འཚལ། མཆུ་ཅན་གྱིས་ཁྱེད་གཉིས་ལ་ཇི་སྐད་བསྒོ། ཞང་པོ་ཅི་གསུང་བ་དེ་བཞིན་གྱིས་ཤིག་ཅེས་སོ། །ཚ་བོ་གཉིས་གལ་ཏེ་དེ་ལྟ་ན་ཁོ་བོ་འདི་སྐད་ཟེར་ཏེ། ཁོ་བོ་སྡུག་བསྔལ་གྱི་ཚོར་བས་ཉེན་གྱིས་ཁོ་བོ་སོད་ཅིག་།དེ་གཉིས་ཀྱིས་འདི་དང་ཞང་པོ་སྔར་བགྲོས་པར་གྱུར་གོར་མ་ཆག་སྟེ། དེས་ན་ཞང་པོས་བདག་ཅག་གཉིས་འདིའི་གན་དུ་བཏང་ངོ་སྙམ་དུ་བསམས་ནས། དེ་གཉིས་ལས་གཅིག་ཆེས་དྲག་ཤུལ་ཅན་ཡིན་པས་མཚོན་རྣོན་པོས་དེའི་མགོ་བཅད་ནས་དེའི་འོག་ཏུ་རས་ཀྱིས་གཡོགས་ཏེ་འཁོད་དོ། །མཆུ་ཅན་ཡང་སྤྱོད་ཡུལ་ནས་ཕྱིར་འོངས་ཏེ་དེས་དེ་རས་ཀྱིས་གཡོགས་པ་མཐོང་ནས་དེས་སྨྲས་པ། ཚ་བོ་གཉིས་ཁྱེད་གཉིས་འཁོད་བཞིན་དུ་ཡང་འདི་ཉལ་ལམ། ཞང་པོ་འདི་ལྟར་ནམ་ཡང་ལྡང་བར་མི་འགྱུར་བ་དེ་ལྟར་ཉལ་ལོ། །མཆུ་ཅན་གྱིས་འདི་གཉིས་སྔོན་མ་བྱུང་བའི་ཚིག་སྨྲ་ན་དྲིའོ་སྙམ་དུ་བསམས་ནས། དེས་དེ་གཉིས་ལ་དྲིས་པ་དང ། དེ་གཉིས་ཀྱིས་སྐབས་དེ་རྒྱས་པར་མཆུ་ཅན་ལ་བརྗོད་དོ། །མཆུ་ཅན་ཡིད་མི་བདེ་བ་སྐྱེས་ནས་རས་དེ་བཤུས་པ་དང ། དེ་མཐོང་ནས་དེ་བདག་གིས་མཚོན་ཐོགས་པ་གཉེར་བར་མ་གྱུར་ཏམ་སྙམ་དུ་འགྱོད་པ་ཡང་སྐྱེས། བཤེས་པ་དང་བྲལ་བས་འགྱོད་པས་གདུངས་པའི་སེམས་ཀྱིས་ཡིད་མི་བདེ་བར་གྱུར་ནས། དེས་སྐབས་དེ་དགེ་སློང་རྣམས་
Ca164b
ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ནད་པའི་ནད་གཡོག་མི་མཁས་པ་བཞག་སྟེ་འགྲོ་བར་མི་བྱའོ། །གལ་ཏེ་འགྲོ་དགོས་པའི་རྐྱེན་དེ་ལྟ་བུ་ཞིག་བྱུང་ན་ནད་གཡོག་མི་མཁས་པ་ལ་གལ་ཏེ་འདི་མེར་མཆོང་ངམ། དུག་ཟའམ། མཚོན་འབྱིན་ཏམ། བདག་ཉིད་གཡང་སར་མཆོང་ངམ། ཐག་པས་འཆིང་ངམ། གཞན་ཡང་མི་འཕྲོད་པ་ཟ་བར་བྱེད་ན་བཟློག་པར་བྱའོ་ཞེས་བསྒོ་སྟེ་འགྲོ་བར་བྱའོ། །དགེ་སློང་གིས་ནད་གཡོག་མི་མཁས་པ་ལ་མ་བསྒོ་བར་དེ་བཞིན་དུ་འགྲོ་ན་འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེའི་ལྷུང་བཟེད་ལ་བཙའ་ཞུགས་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་ལྷུང་བཟེད་འདི་བཙའ་ཞུགས་ན། ཅིའི་ཕྱིར་མི་སྲེག་།དེས་སྨྲས་པ། འདི་ལ་རྫ་བོ་དང ། ལྕི་བ་དང ། ཏིལ་གྱི་ཚིགས་མ་དང ། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅི། ལྷུང་བཟེད་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་ལྷུང་བཟེད་མེད་པས་
Ca165a
༄#། །འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན། དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ། ན་ཚབས་ཆེ་བ་ཡུན་མི་རིང་བར་དུས་བྱེད་པར་འགྱུར་བ་དེའི་ལྷུང་བཟེད་གསལ་བ་ཟླུམ་པ་ལོངས་སྤྱད་པར་བཟོད་པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་ལྷུང་བཟེད་ཀྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དགེ་སློང་དེ་ངོ་ཚ་བར་གྱུར་ནས། ཅང་མི་སྨྲ་བར་འདུག་གོ་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ལྷུང་བཟེད་ཀྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་ལྷུང་བཟེད་ཀྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་སྐྱེད་པར་བྱེད་ན། འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་ལྷུང་བཟེད་མིག་བཞིན་དུ་ཡོངས་སུ་བཅང་བར་བྱ་སྟེ། གླན་པར་འོས་པ་ནི་གླན་པར་བྱ། བསྲེག་པར་འོས་པ་ནི་བསྲེག་པར་བྱའོ། །དགེ་སློང་གིས་ལྷུང་བཟེད་གླན་པར་འོས་པ་གློན་པར་མི་བྱེད་དམ། བསྲེག་པར་འོས་པ་སྲེག་པར་མི་བྱེད་ན། འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་
Ca165b
མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེའི་སྣམ་སྦྱར་རྙིངས་ཤིང་དྲི་མས་གོས་ལ་རྡོལ་བར་གྱུར་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་སྣམ་སྦྱར་འདི་རྙིངས་ཤིང་དྲི་མས་གོས་ལ་རྡོལ་བར་གྱུར་ན། ཅིའི་ཕྱིར་འདི་མི་འཁྲུ་མི་འཚེམ། ཁ་བསྒྱུར་བར་མི་བྱེད། དེས་སྨྲས་པ། འདི་ལ་ཟངས་དང ། ཆུ་དང ། ཤིང་དང ། སྐུད་པ་དང ། ཚོན་དང ། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅི། སྣམ་སྦྱར་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་སྣམ་སྦྱར་མེད་པས་འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན་དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ་ནད་ཚབས་ཆེ་བ་ཡུན་མི་རིང་བར་དུས་བྱེད་པར་འགྱུར་བ་དེའི་སྣམ་སྦྱར་ཉིས་རིམ་དམར་སེར་ཚོན་སར་པས་ཁ་བསྒྱུར་བ་ལོངས་སྤྱོད་པར་བཟོད་པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་སྣམ་སྦྱར་གྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དེ་ངོ་ཚ་བར་གྱུར་ནས་ཅང་མི་སྨྲ་བར་འདུག་གོ་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་སྣམ་སྦྱར་གྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་
Ca166a
༄#། །དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་སྣམ་སྦྱར་གྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་སྐྱེད་པར་བྱེད་ན། འགལ་ཚབས་ཅན་དུ་འགྱུར་རོ། ། གཞན་ཡང་དགེ་སློང་གིས་སྣམ་སྦྱར་པགས་པ་བཞིན་དུ་ཡོངས་སུ་བཅང་བར་བྱ་སྟེ། བཀྲུ་བར་འོས་པ་ནི་བཀྲུ་བར་བྱ། བཙེམ་པར་འོས་པ་ནི་བཙེམ་པར་བྱ། ཁ་བསྒྱུར་བར་འོས་པ་ནི་ཁ་བསྒྱུར་བར་བྱའོ། །དགེ་སློང་གིས་སྣམ་སྦྱར་བཀྲུ་བར་འོས་པ་འཁྲུ་བར་མི་བྱེད་དམ། བཙེམ་པར་འོས་པ་འཚེམ་པར་མི་བྱེད་དམ། ཁ་བསྒྱུར་བར་འོས་པ་ཁ་བསྒྱུར་བར་མི་བྱེད་ན། འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་སྟོབས་སྡེ་ཞེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་འདུག་པ་དེས། རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན། སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ། བཙས་པ་ལས་ཁྱེའུ་གཟུགས་བཟང་བ་བལྟ་ན་སྡུག་པ་མཛེས་པ་ཞིག་བྱུང་ངོ ། །ཉི་མ་བདུན་
Ca166b
གསུམ་ཉི་ཤུ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་པ་ན། ཉེ་དུ་རྣམས་ཀྱིས་སྨྲས་པ། གང་གི་ཕྱིར་ཁྱེའུ་འདི་ཁྱིམ་བདག་སྟོབས་སྡེའི་བུ་ཡིན་པ་དེའི་ཕྱིར། ཁྱེའུ་སྡེ་པ་ཞེས་བྱའོ་ཞེས་དེའི་མིང་སྡེ་པ་ཞེས་བྱ་བར་བཏགས་སོ། །ཁྱིམ་བདག་སྟོབས་སྡེ་དེ་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་ཞིག་བཙས་ནས་དེའི་མིང་ནི་ཉེ་སྡེ་ཞེས་བྱ་བར་བཏགས་སོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེའི་ཆུང་མ་དུས་ལ་བབ་ནས་དེ་དེ་དག་གིས་གོས་སྔོན་པོ་དང་སེར་པོ་དང་དམར་པོ་དང་དཀར་པོ་དག་གིས་ཁྱོགས་བརྒྱན་ཏེ་དུར་ཁྲོད་དུ་བསྐྱལ་ནས། བསྲེགས་ཏེ་མྱ་ངན་བསངས་བ་བྱས་ཏེ་འཁོད་དོ། །ཁྱིམ་བདག་སྟོབས་སྡེས་དེའི་ཤིད་དག་བྱས་ནས། གལ་ཏེ་བདག་གིས་ཆུང་མ་གཞན་ཞིག་བླངས་པར་གྱུར་ན། ཁྱེའུ་གཉིས་སྡུག་བསྔལ་བར་འགྱུར་གྱིས། བདག་གིས་སྡེ་པའི་ཕྱི་མ་དབུབ་པར་བྱའོ་སྙམ་དུ་བསམས་ནས། དེས་དེའི་ཁྱིམ་ཕུབ་བོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེ་ན་བར་གྱུར་ནས། དེ་ལ་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུའི་སྨན་དག་གིས་བསྙེན་བཀུར་བྱས་ཀྱང་ནད་དེ་ཉེ་བར་ཞི་བར་མ་གྱུར་ཅིང་ཉམ་དམས་ནས། དེས་སྡེ་པ་དང་ཉེ་སྡེ་གཉིས་ལ་སྙིང་བཞོས་ནས། བསགས་པ་ཀུན་གྱི་མཐའ་འཛད་ཅིང ། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་པ་སྟེ། །གསོན་པོའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་
Ca167a
༄#། །ཏོ། །དེ་ཁྱེའུ་གཉིས་ཀྱིས་གོས་སྔོན་པོ་དང་སེར་པོ་དང་དམར་པོ་དང་དཀར་པོ་དག་གིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས། བསྲེགས་ཏེ་དེའི་འོག་ཏུ་མྱ་ངན་བསངས་པ་བྱས་ནས་ཤིད་དག་བྱས་ཏེ་འཁོད་དོ། །སྡེ་པས་བསམས་པ། གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བ་བྱེད་ན། ད་ནི་དེའི་དུས་ལ་བབ་པས་ཁྱིམ་གྱི་བྱ་བ་སྦྱང་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན་ཉེ་དུ་རྣམས་ཀྱིས་ཁྲེལ་བར་འགྱུར་བས་བདག་ཟོང་ཐོགས་ཏེ་ཡུལ་གཞན་དུ་འགྲོའོ་སྙམ་དུ་རིག་ནས། ཉེ་སྡེ་ལ་སྨྲས་པ།་ནུ་བོ་གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བར་བྱེད་ན་ད་ནི་དེའི་དུས་ལ་བབ་པས་ཁྱིམ་གྱི་བྱ་བ་སྦྱང་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན། ཉེ་དུ་རྣམས་ཀྱིས་ཁྲེལ་བར་འགྱུར་གྱིས། ཁྱོད་ནི་འདི་ཉིད་ན་ཁྱིམ་གྱི་བྱ་བ་གྱིས་ཤིག་།ཁོ་བོ་ནི་ཟོང་ཐོགས་ཏེ་ཡུལ་གཞན་དུ་འགྲོའོ། །ཉེ་སྡེས་སྨྲས་པ། དེ་ལྟར་མཛོད་ཅིག ། སྡེ་བ་ཟོང་མང་པོ་ཐོགས་ཏེ། ཡུལ་གཞན་དུ་སོང་བ་དང ། དེས་དེར་ཁེ་སྤོགས་མང་པོ་གྲུབ་ནས། སྡེ་པས་ནུ་བོ་ཉེ་སྡེ་ལ་ནུ་བོ་ཁོ་བོས་ཁེ་སྤོགས་མང་པོ་གྲུབ་སྟེ། རིང་པོར་མི་ཐོགས་པར་འོང་གིས་བརྟན་པ་དང ། སྤུངས་དང ། སྤྲོ་བ་ཆེན་པོར་གྱིས་ཤིག་ཅེས་སྤྲིང་ཡིག་བསྐུར་རོ། །སྡེ་པས་ཕྱིར་ཞིང་ཡང་ཁེ་སྤོགས་མང་པོ་གྲུབ་ནས་དེས་ཕྱིས་ཀྱང་དེ་ཁོ་ན་བཞིན་དུ་སྤྲིང་ཡིག་བསྐུར་རོ། །ཡང་སྡེ་
Ca167b
པས་ཕྱི་ཕྱིར་ཞིང་ཡང་ཁེ་སྤོགས་མང་པོ་གྲུབ་ནས། དེས་ཡང་དེ་ཁོ་ན་བཞིན་དུ་སྤྲིང་ཡིག་བསྐུར་ཏེ་སྡེ་པ་དེ་དེ་བཞིན་དུ་དུས་དང་མཐུན་པའི་དུས་སུ་སྤྲིང་ཡིག་སྐུར་བར་བྱེད་དོ། །ཆོས་ཉིད་ཀྱིས་ན། གང་ཕྱིར་རྙེད་པ་དེ་ཕྱིར་ཆགས། །རྙེད་ལས་ཆགས་པ་སྐྱེ་བར་འགྱུར། །ཆགས་པས་ཟིལ་ནོན་མི་ཡིས་ནི། །བྱ་དང་བྱ་མིན་རྟོགས་མི་འགྱུར། །ཞེས་བྱ་བ་ཡིན་པས་སྡེ་པ་ཤིན་ཏུ་ཐག་རིང་པོར་སོང་ནས། ཕྱིན་ཆད་སྤྲིང་ཡིག་སྐུར་བར་མི་བྱེད་དོ། །དེ་ནས་སྡེ་པའི་ཆུང་མ་གོས་དང་ཟས་བཟང་བས་ཉོན་མོངས་པ་དག་གིས་གནོད་པར་གྱུར་ནས། དེས་ཉེ་སྡེ་ལ་མཚན་མ་སྟོན་པར་བྱེད་པ་དང ། ཉེ་སྡེས་དབང་པོ་རྣམས་ཕྱིར་བསླན་ཏེ་འདུག་།སྡེ་པའི་ཆུང་མ་དེ་ངོ་ཚ་མེད་པར་གྱུར་ནས། ཡང་སྨྲས་པ། ཉེ་སྡེ་ཚུར་སྤྱོན། འདི་དང་འདི་ལྟ་བུ་བགྱིའོ། །ཉེ་སྡེས་རྣ་བ་བཀབ་སྟེ་སྨྲས་པ། ཁྱོད་ཁོ་བོའི་མ་དང་འདྲས་ཕྱིན་ཆད་དེ་སྐད་མ་ཟེར་ཅིག་།བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས། སྡེ་པའི་ཆུང་མ་དེ་ཉེ་དུའི་ཁྱིམ་དུ་སོང་ནས། གོས་དྲི་མ་ཅན་དག་བགོས་ཏེ་ཁྲི་ཞིག་པ་ལ་འདུག་ཅིང་འདུག་གོ། དེ་ལ་མ་དང་ནང་མི་དག་གིས་སྨྲས་པ། ཁྱོད་ཅིའི་ཕྱིར་འདི་ལྟར་འདུག་།སྡེ་པའི་ཆུང་མས་སྨྲས་པ། ཅི་བུད་མེད་ཀྱི་ཡུལ་ལ་གང་གནོད་པ་དེ་མི་ཤེས་སམ། ཁོ་མོ་ཉོན་མོངས་པ་དག་གིས་ཤིན་ཏུ་གནོད་པར་གྱུར་ཏོ། །དེ་དག་གིས་སྨྲས་པ་ཁྱོད་ཀྱི་སྐུད་པོ་ཉེ་སྡེ་གཟུགས་བཟང་བ་བལྟ་ན་སྡུག་པ་མཛེས་པ་ཡིན་ན་ཅིའི་ཕྱིར་དེ་ལ་འཆོལ་བར་མི་བྱེད། སྡེ་པའི་ཆུང་མས་སྨྲས་པ། བདག་གིས་དེ་ལ་བཅོལ་
Ca168a
༄#། །ན་མ་གྲུབ་བོ། །དེ་དག་གིས་སྨྲས་པ། བུད་མེད་གཞན་གང་དག་ཁྱིམ་ཐབ་དག་ཆེས་ཡུན་རིང་ནས་དོང་སྟེ། དུས་སུ་མ་འཁོར་བ་དེ་དག་ཆེས་དཀའ་བ་བྱེད་པ་ཡིན་ནོ། །སྡེ་པའི་ཆུང་མས་སྨྲས་པ། དེ་དག་ལ་ནི་ཁྱིམ་ཐབ་དག་གིས་དུས་དང་མཐུན་པའི་དུས་སུ་གཏམ་རྨེད་པར་བྱེད་དེ། ཁོ་མོ་ལ་ཡང་གང་གི་ཚེ་ཁྱིམ་ཐབ་གསོན་པར་གྱུར་པ་དེའི་ཚེ་ན་ནི་དུས་དང་མཐུན་པའི་དུས་སུ་སྤྲིང་ཡིག་བསྐུར་བར་ཡང་གྱུར་ན། ད་སྐུར་བར་མི་བྱེད་པས་དུས་ལ་བབ་གོར་མ་ཆག་གོ་།དེ་དག་གིས་སྡེ་པའི་ཆུང་མ་དེ་ལ་ཐབས་དུ་མ་དག་གིས་ཡིད་བཞོས་ཀྱང་ཁྲི་ལས་ལྡང་བར་མི་བྱེད་ཅིང་དེས་སྨྲས་པ། གལ་ཏེ་ཁོ་མོ་གཞན་ལ་མི་སྦྱིན་ན། ཁོ་མོས་ངེས་པར་རིགས་གཉི་ག་ལ་མི་སྙན་པ་འབྱུང་བར་བྱའོ། །དེ་ནས་སྡེ་པའི་ཆུང་མའི་ཕ་མ་དང་ཉེ་དུ་དང་རྩ་ལག་གི་ཚོགས་དག་གིས་གྲོས་བྱ་བར་བརྩམས་ཏེ། འདི་དེ་ལྟར་ཟློག་ཏུ་མ་བཏུབ་པས་ངེས་པར་རིགས་གཉི་ག་ལ་མི་སྙན་པ་འབྱུང་བར་བྱེད་ཀྱིས། ཉེ་སྡེ་མགྲོན་དུ་བོས་ཏེ། ཟན་བྱིན་ལ་དེ་ལ་འདི་སྦྱིན་པར་བྱ་བ་ནི་འདིར་དུས་ལ་བབ་པ་ཡིན་ནོ་ཞེས་གྲོས་བྱས་ནས། དེ་དག་གིས་ཉེ་སྡེ་མགྲོན་དུ་བོས་ཏེ། ཟན་བྱིན་ནས་སྨྲས་པ། ཉེ་སྡེ་ཁྱོད་ཀྱི་ཕུ་བོའི་ཆུང་མ་འདི་ཉོན་མོངས་པ་ཀུན་ཏུ་སྤྱོད་པས་ཤིན་ཏུ་གཡེན་སྤྱོ་བར་གྱུར་པས་ངེས་པར་རིགས་གཉི་ག་ལ་མི་སྙན་པ་འབྱིན་པར་བྱེད་ན། གལ་ཏེ་ཁྱོད་འདི་དང་ལྷན་ཅིག་ཏུ་སྤྱོད་པར་བྱེད་ན། དེ་ལྟ་ན་ལེགས། གལ་ཏེ་མི་བྱེད་ན་བདག་ཅག་གིས་
Ca168b
འདི་གཞན་ལ་སྦྱིན་པར་བྱའོ། །ཉེ་སྡེས་བསམས་པ། འདི་བདག་ཅག་གིས་བྱིས་པ་ནས་བསྐྱེད་པ་ཡིན་པས། གལ་ཏེ་གཞན་དུ་འགྲོ་བར་འགྱུར་ཞིང་རིགས་གཉི་ག་ལ་མི་སྙན་པ་འབྱིན་པར་འགྱུར་ན།་མ་ལེགས་ཀྱིས་བདག་གིས་འདི་བདག་གིར་བྱའོ་སྙམ་དུ་རིག་ནས། དེས་དང་དུ་བླངས་པར་ཁས་བླངས་སོ། །དེ་ནས་ཉེ་སྡེས་སྡེ་པའི་ཆུང་མ་རང་གི་ཁྱིམ་དུ་ཁྲིད་ནས་དེ་དེ་དང་ལྷན་ཅིག་ཏུ་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་ལ་མངལ་ན་གནས་པའི་མཚན་མ་དག་བྱུང་བར་གྱུར་ནས། དེ་ལ་ན་ཟླ་དག་གིས་སྨྲས་པ། འདི་ག་ལས་འོངས། སྡེ་པའི་ཆུང་མས་སྨྲས་པ། ཁོ་མོ་ཚུལ་ཁྲིམས་དང་ལྡན་པ་ཁོ་ན་ཡིན་གྱིས་ཁྱེ་ཅག་རྫུན་གྱི་སྐུར་བས་ཁོ་མོ་ལ་ཀུན་ཏུ་མ་སྤྱོད་ཅིག་།དེའི་གྲོགས་མོ་ཆེས་མཛའ་བ་ཞིག་ཡོད་པ་དེས་སྨྲས་པ། ཅིའི་ཕྱིར་གསང་བར་བྱེད། འདི་གདོན་མི་ཟ་བར་གྲགས་པར་འགྱུར་གྱིས་སྨྲོས་ཤིག་།སྡེ་པའི་ཆུང་མས་སྨྲས་པ། ཉེ་སྡེ་ལས་སོ། །ལེགས་ཏེ་ཁྱིམ་ཐབ་ལས་སམ། སྐུད་པོ་ལས་ཀྱང་རུང་འདི་ལ་ཉེས་པ་འགའ་ཡང་མེད་དོ། །སྡེ་པའི་ཆུང་མ་དེ་སེམས་ཅན་དང་ལྡན་པར་གྱུར་པ་ན། སྡེ་པས་ཉེ་སྡེ་ལ་ནུ་བོ་བརྟན་པ་དང་སྤུངས་དང་སྤྲོ་བ་ཆེར་གྱིས་ཤིག་།ཁོ་བོ་ཡང་ཡི་གེའི་རྗེས་བཞིན་ཁོ་ནར་འོང་ངོ་ཞེས་སྤྲིང་ཡིག་བསྐུར་རོ། །ཉེ་སྡེས་ཐོས་ནས་ཉམ་ང་བར་གྱུར་ཏེ་བསམས་པ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱོད་པ་འདི་ལྟ་བུ་བྱས་ན་དེ་འོང་བར་གྱུར་ཏེ།
Ca169a
༄#། །འཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་འཁོན་ཐ་ཆད་ཡིན་པས། བདག་ལ་གནོད་པ་བྱེད་པར་གྱུར་པ་གང་ཡིན་པ་དེ་ལྟ་བུའི་གནས་ཡོད་ཀྱིས་བྲོས་ཏེ་འགྲོའོ་སྙམ་མོ། །ཡང་བསམས་པ། ཡུལ་ཡོངས་སུ་གཏོང་བར་བྱེད་པ་ནི་སྡུག་བསྔལ་བ་ཡིན་ཏེ། ཤཱཀྱའི་སྲས་ཀྱི་དགེ་སྦྱོང་འདི་དག་གིས། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་གཞོན་ནུའི་ཡོངས་སུ་སྤང་བ་ཐོབ་པས་དེ་དག་གི་ནང་དུ་རབ་ཏུ་བྱུང་ན་དེས་དེར་ཅི་ཞིག་བྱ་བར་འགྱུར་སྙམ་ནས། ཉེ་སྡེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་ཞིག་གི་གན་དུ་ཕྱིན་ནས་སྨྲས་པ། འཕགས་པ་དག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་བཟང་ལེགས་ཏེ་ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་ཕྱུང་ཞིག་།དགེ་སློང་དེ་ཉེ་སྡེ་རབ་ཏུ་ཕྱུང ། རྫོགས་པར་བསྙེན་པར་བྱས་ནས ། དེའི་འོག་ཏུ་ཉི་མ་གཉིས་སམ་གསུམ་ཀུན་ཏུ་སྤྱོད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟང་རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་རྒྱུས་ལ་འཚོ་བར་གྱིས་ཤིག་།ཉེ་སྡེ་མཁན་པོས་དེ་སྐད་བསྒོ་ནས་མཁན་པོ་བཀའ་བཞིན་འཚལ་ཞེས་སྨྲས་ཏེ། སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་སྤྱོད་ཡུལ་ལ་མི་མཁས་པས་གྲོང་རིམས་ཀྱིས་རང་གི་ཁྱིམ་དུ་ཞུགས་པ་དང ། སྡེ་པའི་ཆུང་མས་ཉེ་སྡེ་མཐོང་ནས་དེས་བྲང་བརྡུངས་
Ca169b
ཏེ་སྨྲས་པ། ཉེ་སྡེ་ཅིའི་སླད་དུ་ཁྱོད་ཀྱིས་ཁོ་མོ་སྤངས་ཏེ་རབ་ཏུ་བྱུང ། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཅིའི་སླད་དུ་ཁྱོད་ཀྱིས་ཁོ་མོ་སྤངས་ཏེ་རབ་ཏུ་བྱུང་ཞེས་ཟེར་རམ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། བདག་གིས་ཉེས་པར་སྤྱོད་པ་འདི་ལྟ་བུ་བྱས་ན་དེ་འོང་བར་འགྱུར་ཏེ། འཁོན་རྣམས་ཀྱི་ནང་ན་འདི་ལྟ་སྟེ་བུད་མེད་ཀྱི་འཁོན་ཐ་ཆད་ཡིན་པས། བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྡེ་པའི་ཆུང་མས་སྨྲས་པ། ཁྱོད་ཀྱིས་ནི་རེ་ཞིག་བདག་ཉིད་ཐར་བར་བགྱིས་ན། ཁོ་མོས་ཇི་ལྟར་བསྒྲུབ་པར་བགྱི། ཉེ་སྡེས་སྨྲས་པ། དེ་ནི་ཁྱོད་ཉིད་ཀྱིས་ཉོན་མོངས་པའི་དབང་གིས་རྣམ་པར་བསམས་པ་ཡིན་གྱི་ཁོ་བོ་ནི་མི་འདོད་བཞིན་བྱེད་དུ་བཅུག་པ་ཡིན་པས་ཁྱོད་ཉིད་ཤེས་སོ་ཞེས་སྨྲས་ཏེ་སོང་ངོ ། །ཉེ་སྡེའི་ཆུང་བོ་གྲོགས་སྔོན་སྨན་པ་སྤོས་འཚོང་གི་ཁྱེའུ་ཞིག་ཡོད་པ་དེ། སྡེ་པའི་ཆུང་མའི་ཁྱིམ་དུ་སོང་སྟེ། ཉེ་སྡེ་གར་སོང་ཞེས་དྲིས་པ་དང ། སྡེ་པའི་ཆུང་མས་སྨྲས་པ། ཉེ་སྡེས་ལམ་ལམ་པོར་བྱས་ཏེ་རབ་ཏུ་བྱུང ། གང་དུ་ཤཱཀྱ་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །གལ་ཏེ་ཡིད་མི་ཆེས་ན་རྒྱལ་བྱེད་ཀྱི་ཚལ་དུ་སོང་ལ་ལྟོས་ཤིག་།དེ་རྒྱལ་བྱེད་ཀྱི་ཚལ་དུ་སོང་བ་ན་རབ་ཏུ་བྱུང་བ་ཐམས་ཅད་ཆ་ལུགས་འདྲ་བས་དེ་གང་ཡིན་མི་ཤེས་ནས། དེས་དགེ་སློང་ཞིག་ལ་དྲིས་པ། འཕགས་པ་མཉན་ཡོད་པའི་ཁྱིམ་བདག་གི་བུ་ཉེ་སྡེ་ཞེས་བགྱི་བ་འདིར་རབ་ཏུ་བྱུང་ན་ག་ལ་མཆིས། དགེ་སློང་དེས་བསྟན་ནས། སྤོས་འཚོང་གི་
Ca170a
༄#། །ཁྱེའུ་དེ་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱོད་ཀྱིས་ཅི་ཞིག་རྗེས་སུ་བསྒྲུབས་ན། ཁོ་བོ་ལ་ཡང་མ་དྲིས་པར་རབ་ཏུ་བྱུང ། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཁྱོད་ཀྱིས་ཅི་ཞིག་རྗེས་སུ་བསྒྲུབས་ན། ཁོ་བོ་ལ་ཡང་མ་དྲིས་པར་རབ་ཏུ་བྱུང་ཞེས་ཟེར་རམ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་བལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱད་པ་འདི་ལྟ་བུ་བྱས་ན་དེ་འོང་བར་འགྱུར་ཏེ། འཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་འཁོན་ཐ་ཆད་ཡིན་པས། བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྤོས་འཚོང་གི་ཁྱེའུས་སྨྲས་པ། ཁོ་བོ་ཅག་སྤོས་འཚོང་གི་ཁྱེའུ་དག་ནི་སྨན་པའི་ཕྱེད་ཡིན་པས་ཁོ་བོས་རེ་ཞིག་མངལ་ན་གནས་པ་རླུགས་པར་བྱ་བ་དེ་ལྟ་བུ་དག་བྱིན་པར་གྱུར་ན། དེས་མངལ་ན་གནས་པ་དེ་དུམ་བུ་དུམ་བུར་ཞིག་པར་འགྱུར་བ་ཞིག་ན་ཁྱོད་ཀྱིས་ཁོ་བོ་ལ་ཅིའི་ཕྱིར་མ་སྨྲས། འདི་ལྟར་ད་ཡང་སྦྱིན་པར་བྱའོ། །ཉེ་སྡེས་དང་དུ་བླངས་སོ། །དེ་ནས་སྤོས་འཚོང་གི་ཁྱེའུ་དེས་རྫས་རྣོན་པོ་དག་ཕྱེ་མར་བྱས་ཏེ་བུ་མོ་ཞིག་གི་ལག་ཏུ་བྱིན་ནས་སྨྲས་པ། ཁྱོད་སོང་ལ་སྡེ་པའི་ཁྱིམ་དུ་སོང་སྟེ། སྡེ་པའི་ཆུང་མ་ལ་ཉེ་སྡེ་ན་རེ་ཕྱེ་མ་འདི་ཆུ་དྲོན་མོ་དང་སྦྱོར་ལ་འཐུང་ཞིག་དང ། ཁྱོད་སོས་པར་འགྱུར་ཞེས་ཟེར་རོ་ཞེས་གྱིས་ཤིག་།བུ་མོ་དེས་ཇོ་བོ་བཀའ་བཞིན་འཚལ་ཞེས་སྤོས་འཚོང་གི་ཁྱེའུ་ལས་མཉན་ནས། སྡེ་པའི་ཁྱིམ་ག་ལ་བ་དེར་སོང་
Ca170b
སྟེ་ཕྱིན་ནས། སྡེ་པའི་ཆུང་མ་ལ་སྨྲས་པ། ཉེ་སྡེའི་ཞལ་ནས་ཕྱེ་མ་འདི་ཆུང་དྲོན་མོ་དང་སྦྱོར་ལ་འཐུང་ཞིག་དང ། ཁྱོད་སོས་པར་འགྱུར་ཞེས་གསུང་ངོ ། །སྡེ་པའི་ཆུང་མ་དེས་ཕྱེ་མ་དེ་ཆུ་དྲོན་པོ་དང་སྦྱར་ཏེ་འཐུངས་པ་དང ། དེ་ནས་དེའི་མངལ་ན་གནས་པ་དེ་དུམ་བུ་དུམ་བུར་ཞིག་པར་གྱུར་ཅིང་མངལ་ན་གནས་པའི་མཚན་མ་དག་ཀྱང་མེད་པར་གྱུར་ཏོ། །ཡང་ན་ཟླ་དག་གིས་མཐོང་ནས་དེ་དག་གིས་སྨྲས་པ། ཁྱོད་ཀྱི་མངལ་ན་གནས་པ་དེ་གར་སོང ། སྡེ་པའི་ཆུང་མས་སྨྲས་པ། ཁོ་མོས་དང་པོ་ཉིད་ནས་ཁོ་མོ་ཚུལ་ཁྲིམས་དང་ལྡན་པ་ཉིད་ཡིན་གྱིས་ཁྱེད་ཅག་རྫུན་གྱི་སྐུར་བས་ཁོ་མོ་ལ་ཀུན་ཏུ་མ་སྤྱོད་ཅིག་ཅེས་མ་སྨྲས་སམ། དེའི་གྲོགས་མོ་ཆེས་མཛའ་བ་དེ་དེའི་གན་དུ་སོང་སྟེ་སྨྲས་པ། ཁྱོད་ཀྱིས་སྔར་འདི་སྐད་ཅེས་ཉེ་སྡེ་ལས་སོ་ཞེས་ཁོ་མོ་ལ་སྨྲས་པའི་མངལ་ན་གནས་པ་དེ་ད་གར་སོང ། སྡེ་པའི་ཆུང་མས་སྨྲས་པ། གང་ཁོ་ན་ལས་འོངས་པ་དེ་ཁོ་ནར་སོང་ངོ ། །ཇི་ལྟར་གྱུར། ཉེ་སྡེས་ཕྱེ་མ་རྣོན་པོ་དེ་ལྟ་བུ་བྱིན་པས་དེས་ན་མངལ་ན་གནས་པ་དེ་དུམ་བུ་དུམ་བུར་ཞིག་པ་འགྱུར་ཏོ། །དེ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ་།བྲམ་ཟེའོ་ཚུལ་ནི་ཚིག་སྟེ་འདི་ལྟར་མངལ་ན་གནས་པ་ཡང་རླུགས་པར་བྱེད་དོ་ཞེས་སྨོད་པར་བྱེད། ཕྱར་ཁ་གཏོང་བར་བྱེད། ཁ་ཟེར་བར་བྱེད་དོ། །ཉེ་སྡེས་སྡིག་པའི་ལས་འདི་དང་འདི་ལྟ་བུ་བྱས་སོ་ཞེས་བྱ་བའི་སྒྲ་དེ་ཡང་མཉན་ཡོད་ཀུན་ཏུ་གྲགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་སངས་རྒྱས་བཅོམ་ལྡན་འདས་ཀྱིས་ཚེ་
Ca171a
༄#། །དང་ལྡན་པ་ཉེ་སྡེ་ལ་རྨས་པ། ཉེ་སྡེ་ཁྱོད་ཀྱིས་སྡིག་པའི་ལས་དེ་ལྟ་བུ་དེ་བྱས་པ་བདེན་ནམ། བཙུན་པ་མ་བགྱིས་ཏེ། འདི་ལྟར་བདག་གིས་རྗེས་སུ་ཡི་རང་བར་ནི་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཉེ་སྡེ་ལ་ནི་ལྟུང་བ་མེད་དོ། །ཡང་དགེ་སློང་གིས་གནས་དེ་ལྟ་བུ་ལ་རྗེས་སུ་ཡི་རང་བར་མི་བྱའོ། །དགེ་སློང་གནས་དེ་ལྟ་བུ་ལ་རྗེས་སུ་ཡི་རང་བར་བྱེད་ན། འགལ་ཚབས་ཅན་དུ་འགྱུར་རོ། །དེའི་བར་སྐབས་སུ་སྡེ་པ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་ཕྱིན་ཏོ། །འཇིག་རྟེན་ནི་འབྱོར་པ་འདོད་ལ་རྒུད་པ་དང་མི་མཐུན་པ་ཡིན་པས། ཁ་ཅིག་གིས་མྱུར་བ་མྱུར་བར་དོང་སྟེ། སྡེ་པའི་ཆུང་མ་ལ་སྨྲས་པ། ཁྱོད་ཀྱི་ཁྱིམ་ཐབ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་འོངས་ཀྱིས་སྤྲོ་བ་སྐྱེད་ཅིག་།བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས་སྡེ་པའི་ཆུང་མ་དེ་ཡི་ཆད་པའི་སེམས་ཀྱིས་གོས་དྲི་མ་ཅན་དག་བགོས་ཏེ། ཁྲི་ཞིག་པ་ལ་འདུག་ཅིང་འདུག་གོ ། ཇི་ཙམ་ན་སྡེ་པ་མཉན་ཡོད་དུ་ཞུགས་ནས་ཟོང་མཛོད་དུ་མཁོས་སུ་ཕབ་སྟེ། རང་གི་ཁྱིམ་དུ་འོངས་པ་དང ། ཁྱིམ་མ་བྱུགས། བྱི་དོར་མ་བྱས། གསལ་བ་མེད་པ་མཐོང་ནས། དེས་བུ་མོ་མོ་མངག་གཞུག་མ་ལ་དྲིས་པ། ཁྱིམ་བདག་གི་ཆུང་མ་གར་སོང ། བུ་མོས་སྨྲས་པ། རྗེའི་སྲས་སྤྱོད་ལམ་བཅད་དེ་ཁྲི་ཞིག་པ་ལ་མཆིས་ཤིང་མཆིས་སོ། །དེ་ནས་སྡེ་པ་ཡི་མི་
Ca171b
བདེ་བ་སྐྱེས་ཏེ། ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཁོ་བོ་འོངས་པས་མི་བདེའམ། རྗེའི་སྲས་བདག་ཁྱོད་བྱོན་པས་མི་བདེ་བ་མ་མཆིས་ཏེ། འདི་ལྟར་རྗེའི་སྲས་ཀྱིས་སྲུང་མ་གང་ལགས་པ་དེ་དག་ཉིད་རྐུན་མ་དག་ལགས་སོ། །ཅི་ཞིག་བྱས། བཀག་བཞིན་དུ་ཉེ་སྡེས་ནན་གྱིས་ཁོ་མོ་བདག་གིར་བགྱིས་སོ། །བཟང་མོ་དེ་ནི་དེས་ཁྱོད་ཟིལ་གྱིས་མནན་པ་མ་ཡིན་གྱི་ཁོ་བོ་ཟིལ་གྱིས་མནན་པ་ཡིན་གྱིས། ལོངས་ཤིག་།ཁོ་བོས་དེ་ལ་མཚམས་གཅད་པར་བྱའོ། །བཟང་མོ་ཉེ་སྡེ་ག་ལ་འདུག་།རྗེའི་སྲས་ཁྱོད་བྱོན་པ་ཐོས་ནས་རབ་ཏུ་བྱུང་ངོ ། །གང་དུ་རྒྱལ་བྱེད་ཀྱི་ཚལ་དུ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །བཟང་མོ་ཅི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ། །འཇིག་རྟེན་ནི་མཛའ་བཤེས་དང་དགྲ་བོ་དང་བར་མ་ཡིན་པས། ཁ་ཅིག་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱེད་ཀྱི་ཕུ་བོ་འོངས་སོ། །ཉེ་སྡེས་སྨྲས་པ། ཇི་སྐད་ཟེར། དེ་དག་གིས་སྨྲས་པ། ཅི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ། དེ་ལ་མཚམས་ཆེན་པོ་གཅད་པར་བྱའོ་ཞེས་ཟེར་རོ། །ཉེ་སྡེས་ཐོས་ནས་ཉམ་ང་བར་གྱུར་ཏེ། བསམས་པ། བདག་འཇིགས་པ་དག་གིས་རབ་ཏུ་བྱུང་བ་དེ། འདིར་ཡང་འབྱུང་བར་མི་འགྱུར་རམ། འདི་ལྟར་བདག་ཅག་རྒྱལ་པོས་གཞོན་ནུའི་ཡོངས་སུ་སྤང་བ་བྱིན་མོད་ཀྱི་འོན་ཀྱང་བདག་ཉེས་པ་དང་བཅས་པ་ཡིན་པས། གལ་ཏེ་ན་བདག་ལ་འདིར་ཡང་གནོད་པ་བྱེད་པར་
Ca172a
༄#། །འགྱུར་བའི་གནས་ཡོད་ཀྱིས་བྲོས་ཏེ་འགྲོའོ་སྙམ་ནས། དེས་མཁན་པོ་ལ་མཁན་པོ་བདག་འཇིགས་པ་གང་གིས་རབ་ཏུ་བྱུང་བ་དེ། འདིར་ཡང་རྗེས་སུ་འབྲེལ་བར་གྱུར་ཏོ་ཞེས་བྱུང་བའི་མཐའ་དེ་རྒྱས་པར་བརྗོད་དོ། །མཁན་པོས་སྨྲས་པ། བུ་ཅི་ཉེས། མཁན་པོ་བདག་གི་ཕུ་བོ་དེ་མཆིས་ནས་ཏེ་པོར་མཆིད་འབོ་ཞིང ། ཇི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་ཞེས་མཆིའོ། །འདི་ལྟར་བདག་ཅག་རྒྱལ་པོས་གཞོན་ནུའི་ཡོངས་སུ་སྤང་བ་སྩལ་མོད་ཀྱི་འོན་ཀྱང་བདག་ནོངས་པ་དང་བཅས་པ་ལགས་པས། གལ་ཏེ་ན་འདིར་ཡང་བདག་ལ་གནོད་པ་བགྱིད་པར་འགྱུར་བའི་གནས་མཆིས་ཀྱིས། བྲོས་ཏེ་མཆིའོ། །བུ་གང་དུ་འགྲོ། མཁན་པོ་རྒྱལ་པོའི་ཁབ་ཏུའོ། །བུ་དེ་ན་ཁོ་བོ་མཛའ་བཤེས་དགེ་སློང་ཞིག་འདུག་གི་།དེ་ལ་སྤྲིང་ཡིག་བསྐུར་གྱིས། དེའི་དྲུང་ན་འདུག་ཅིག་དང ། དེ་ཁྱོད་ལ་བྱམས་པས་རྗེས་སུ་སྐྱོང་བར་འགྱུར་རོ། །མཁན་པོ་ལེགས་སོ། །དེས་དགེ་སློང་དེ་ལ་སྔར་བྲོ་རྨ་བ་དྲིས་ཏེ།་བདག་གི་ལྷན་ཅིག་གནས་པ་བདག་གིས་ཁྱོད་ཀྱི་གན་དུ་གཏང་སྟེ་འོང་གིས། དེའི་སླད་དུ་ཇི་ལྟར་འདི་ནི་མངོན་པར་དགའ་བ་བཞིན་དུ་བྱམས་པས་རྗེས་སུ་སྐྱོངས་ཤིག་ཅེས་སྤྲིང་ཡིག་བྲིས་ནས། ཉེ་སྡེས་སྤྲིང་ཡིག་དེ་མནོས་ཏེ་བག་ཚ་བས་ཡིད་མི་བདེ་ཞིང་ཕྱོགས་སུ་རྣམ་པར་ལྟ་བ་བཞིན་དུ་རྒྱལ་པོའི་ཁབ་ཏུ་འཕགས་ཏེ་མཐར་གྱིས་རྒྱལ་པོའི་ཁབ་ཏུ་སོང་ནས། ཐོས་པ་བརྒྱུད་པས་དགེ་སློང་དེའི་གན་དུ་
Ca172b
ཕྱིན་ནས་རྐང་པ་གཉིས་ལ་མགོ་བོས་ཕྱག་འཚལ་ཏེ། སྤྲིང་ཡིག་ཕུལ་ནས་མཐའ་གཅིག་ཏུ་འདུག་གོ་།དེ་ནས་དགེ་སློང་དེས་སྤྲིང་ཡིག་བཀླགས་ཏེ་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་ཁྱོད་དེའི་ཉེ་གནས་ཡིན་པ་དེ་བཞིན་དུ། ཁོ་བོའི་ཡང་ཡིན་གྱིས་བསླབ་པ་ལ་གུས་པར་གྱིས་ཤིག་དང ། ཁོ་བོས་ཁྱོད་ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ཀྱིས་མི་བྲེལ་བར་བྱའོ། །གཞན་ཡང་དགེ་སློང་གི་ལས་ནི་གཉིས་ཏེ། བསམ་གཏན་དང་ཀློག་པ་ཡིན་ན། ཁྱོད་བསམ་གཏན་དང་ཀློག་པ་གང་འདོད། བསམ་གཏན་འཚལ་ལོ། །བུ་ལེགས་སོ། །དེས་དེ་ལ་གདམས་ངག་བྱིན་ནས་ཉེ་སྡེ་བསིལ་བ་ཚལ་གྱི་དུར་ཁྲོད་དུ་སོང་སྟེ། བརྩོན་པ་དང་འབད་པ་དང ། བརྩལ་བས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང་མངོན་པར་ཤེས་པ་དང་སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །དེའི་བར་སྐབས་སུ་སྡེ་པ་ཡང་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་རྣམས་ལ་དྲིས་པ། འཕགས་
Ca173a
༄#། །པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། རབ་ཏུ་བྱུང་ངོ ། །དེ་ག་ལ་མཆིས། རྒྱལ་པོའི་ཁབ་ཏུ་སོང་ངོ ། །དེ་ཁྱེད་ཀྱི་ཅིར་འོང་ནུ་བོར་མཆིའོ། །སྡེ་པས་དགེ་སློང་དེ་དག་གི་རྐང་པ་ལ་ཕྱག་འཚལ་ཏེ་སོང་ནས་བསམས་པ། རྒྱལ་པོའི་ཁབ་ཀྱང་འཇིགས་པ་མེད་པའི་གྲོང་ཁྱེར་མ་ཡིན་གྱིས་བདག་དེར་ཡང་སོང་ལ། དེ་ལ་མཚམས་ཆེན་པོ་གཅད་པར་བྱའོ་སྙམ་ནས། དེ་ལམ་བརྒྱགས་མང་པོ་དང་ཀར་ཤ་པ་ཎ་དག་ཁྱེར་ཏེ་རྒྱལ་པོའི་ཁབ་ཏུ་སོང་ངོ ། །དེ་འོད་མའི་ཚལ་དུ་སོང་ནས་དགེ་སློང་རྣམས་ལ་དྲིས་པ། འཕགས་པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། འདིར་འོངས་སོ། །དེ་ཁྱོད་ཀྱི་ཅིར་འོང ། ནུ་བོར་མཆིའོ། །དེ་ག་ལ་མཆིས། བསིལ་བ་ཚལ་གྱི་དུར་ཁྲོད་ནའོ། །སྡེ་པ་དེ་བསིལ་བ་ཚལ་གྱི་དུར་ཁྲོད་དུ་སོང་བ་དང ། དེས་ཉེ་སྡེ་བྱིས་པའི་གནས་སྐབས་ན་མཐོང་བ་ཆེན་པོར་གྱུར་པས། མཁས་པ་དང་རྣམ་པར་གནོན་པ་ལས་ངོ་མ་ཤེས་མོད་ཀྱི་ཏེ་པོར་བརྟགས་པ་དང་བཞིན་གཟུགས་ལས་ངོ་ཤེས་པར་གྱུར་ནས། དེས་བསམས་པ། གལ་ཏེ་འདིས་བདག་ངོ་ཤེས་པར་གྱུར་ན། ངེས་པར་འདིས་བདག་གསོད་པར་བྱེད་པས་དེའི་ཐབས་སྦྱར་བར་བྱའོ་སྙམ་ནས། དེ་མཐའ་གཅིག་ཏུ་སོང་སྟེ་ཕྱོགས་སུ་རྣམ་པར་བལྟ་ཞིང་འདུག་གོ་།ཇི་ཙམ་ན་ལམ་དེར་རྔོན་པ་ལག་ན་མདའ་གཞུ་ཐོགས་པ་ཞིག་རི་དྭགས་བཤོར་བའི་ཕྱིར་འོངས་པ་དང ། སྡེ་པ་དེའི་གན་དུ་སོང་སྟེ་སྨྲས་པ། ཀྱེ་
Ca173b
གྲོགས་པོ་ཁྱོད་ལག་ན་མདའ་གཞུ་ཐོགས་ཏེ་གར་འགྲོ་།དེས་སྨྲས་པ། གྲོགས་པོ་རི་དྭགས་ཤོར་དུའོ། །དེ་ལས་ཁྱོད་ཀྱི་རྙེད་པ་ཇི་ཙམ་འགྲུབ། གྲོགས་པོ་ལན་འགའ་ནི་འགྲུབ། ལན་འགའ་ནི་མི་འགྲུབ་བོ། །གང་གི་ཚེ་འགྲུབ་པ་དེའི་ཚེ་ན་མང་ཉུང་ཇི་ཙམ། གྲོགས་པོ་ཀར་ཤ་པ་ཎི་ལྔ་བརྒྱ་ཙམ་མོ། །སྡེ་པས་སྨྲས་པ། གྲོགས་པོ་གལ་ཏེ་དེ་ལྟ་ན་རབ་ཏུ་བྱུང་བ་འདི་སོད་ཅིག་དང ། ཁོ་བོས་ཁྱོད་ལ་ཀར་ཤ་པ་ཎ་ལྔ་བརྒྱ་བྱིན་ནོ། །རྔོན་པ་དེ་འདོད་པས་དྲངས་པའི་ཡིད་དང་ལྡན་པས་དེས་སྡེ་པ་ལས་ཀར་ཤ་པ་ཎ་ལྔ་བརྒྱ་བླངས་ནས། དེའི་འོག་ཏུ་བསམས་པ། རབ་ཏུ་བྱུང་བ་འདི་དག་ནི་རྒྱལ་པོ་གཟུགས་ཅན་སྙིང་པོས་གཞོན་ནུའི་ཡོངས་སུ་སྤང་བ་བྱིན་པ་ཡིན་ལ། བདག་ནི་ཕྱོགས་འདིར་རྟག་ཏུ་རྒྱུ་བ་ཡིན་པས། གལ་ཏེ་བདག་གིས་རབ་ཏུ་བྱུང་བ་འདི་བསད་པར་གྱུར་ན། བདག་ཀྱང་བུ་དང་རྩ་ལག་དང་ཕྱུགས་དང་བཅས་ཏེ་ངེས་པར་བཙོན་རར་བཅུག་ཅིང་གསོད་པར་འགྱུར་རོ། །འདི་ལྟར་ཁྱིམ་བདག་འདི་ནི་ན་ལེ་ཤམ་དཀར་པོ་འབྱུང་བ་དང་འདྲ་བར་འདི་ག་ལས་འོངས་པ་སུས་ཀྱང་མི་ཤེས་པ་ཡིན་གྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། རྔོན་པ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བར་རྣ་དྲུང་དུ་ཐུག་པར་བཀང་སྟེ་སྡེ་པའི་གནད་དུ་བསྣུན་ཏོ། །སྡེ་པ་དེ་སྡུག་བསྔལ་གྱི་ཚོར་བ་དག་གིས་ཉེན་པས་བདག་བསད་པར་གྱུར་པ་གང་ཡིན་པ་དེ་ཐམས་ཅད་ངེས་པར་རབ་ཏུ་བྱུང་བ་འདིས་རྔོན་པ་འདི་དང་ལྷན་ཅིག་བརྡ་བྱས་པ་ཡིན་གྱི་
Ca174a
༄#། །གང་དུ་འདི་གསོད་པར་འགྱུར་བ་དེར་སྐྱེ་བ་བླང་ངོ་སྙམ་དུ་སེམས་དག་གསོ་བར་བྱེད་ཅིང ། དེས་སྨོན་ལམ་ལོག་པར་བཏབ་ནས། ཉེ་སྡེའི་གནས་ཁང་གི་སྒོ་གླེགས་འདྲུད་པའི་འོག་ཏུ་སྦྲུལ་དུག་མྱུར་དུ་ཁྱབ་པར་བྱེད་པ་ཞིག་ཏུ་སྐྱེས་སོ། །དགྲ་བཅོམ་པ་དག་ནི་མ་བསམས་པར་ཤེས་པ་དང ། མཐོང་བ་མི་འཇུག་པས། ཉེ་སྡེས་སྒོ་གླེགས་ཕྱེ་བས་སྦྲུལ་དུག་མྱུར་དུ་ཁྱབ་པར་བྱེད་པ་དེ་ཤི་བར་གྱུར་ཏོ། །དེ་ནས་སྒོ་གླེགས་འདྲུད་པའི་སྟེང་དུ་སྐྱེས་ནས་དེར་ཡང་ཤི་བར་གྱུར་ཏོ། །དེ་ནས་ཁྲིའི་རྐང་རྟེན་གཅིག་གི་འོག་ཏུ་སྐྱེས་ནས་དེར་ཡང་ཤི་བར་གྱུར་ཏོ། །དེ་བཞིན་དུ་ལན་གཉིས་ལན་གསུམ་ལན་བཞིར་འོག་ཏུ་སྐྱེ་ནས། དེར་ཡང་ཤི་བར་གྱུར་ཏོ། །ཇི་ལྟ་ཇི་ལྟར་འཆི་བར་འགྱུར་བ་དེ་ལྟ་དེ་ལྟར་དུག་ཤིན་དུ་རྣོ་བ་དང ། ལུས་ཤིན་ཏུ་ཕྲ་བས་ཉིང་མཚམས་སྦྱོར་བ་ལེན་པ་བྱེད་དོ། །ཇི་ཙམ་དུས་གཞན་ཞིག་ན་དེ་སྟེང་གི་སྤང་ལེབ་ཀྱི་བར་དུ་སྐྱེས་ནས། ཚེ་དང་ལྡན་པ་ཉེ་སྡེ་གཅིག་པུ་དབེན་པར་སོང་སྟེ་ནང་དུ་ཡང་དག་འཇོག་ལ་ཞུགས་པའི་ལུས་ལ་ལྟུང་བར་གྱུར་ཏོ། །དེ་ནས་ཚེ་དང་ལྡན་པ་ཉེ་སྡེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ་རྣོ་བ་དུག་དྲག་པ། འདི་ལྟ་སྟེ་དཔེར་ན་མིག་སྨན་གྱི་ཐུར་མ་ལྟར་ཕྲ་བ་ལྟུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐན་ཀོར་ནས་བཟུང་ལ། འདི་ཉིད་དུ་འདི་ལྟ་སྟེ་དཔེར་ན་སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་
Ca174b
ཁང་གི་ཕྱི་རོལ་དུ་ཕྱུང་ཞིག་།དེའི་ཚེ་ན་ཚེ་དང་ལྡན་པ་ཤཱ་རིའི་བུ། ཚེ་དང་ལྡན་པ་ཉེ་སྡེ་དང་ཧ་ཅང་མི་རིང་བའི་ཤིང་དྲུང་ཞིག་ན་རྟེན་ཅིང་ཉིན་མོ་གནས་པའི་ཕྱིར་འདུག་གོ་།ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ཚིག་བརྗོད་པ་རྣམ་པ་དེ་ལྟ་བུ་དེ་ཐོས་སོ། །ཐོས་ནས་ཀྱང་ཚེ་དང་ལྡན་པ་ཉེ་སྡེ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཉེ་སྡེ་ལ་འདི་སྐད་ཅེས་སྨྲས་སོ། ། བདག་གིས་ཚེ་དང་ལྡན་པ་ཉེ་སྡེ་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པ་མ་མཐོང་ན། འོན་ཀྱང་ཚེ་དང་ལྡན་པ་ཉེ་སྡེ་འདི་སྐད་ཅེས། ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པ། འདི་ལྟ་སྟེ་དཔེར་ན། མིག་སྨན་གྱི་ཐུར་མ་ལྟར་ཕྲ་བ་ལྷུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐན་ཀོར་ནས་བཟུང་ལ། འདི་ཉིད་དུ་འདི་ལྟ་སྟེ་དཔེར་ན། སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་ཁང་གི་ཕྱི་རོལ་དུ་ཕྱུང་ཞིག་ཅེས་ཟེར་རོ། །ཚེ་དང་ལྡན་པ་ཤཱ་རིའི་བུ་གང་ལ་འདི་ལྟར་མིག་བདག་ཡིན་ནོ། །མིག་བདག་གི་ཡིན་ནོ། །རྣ་བ་དང་སྣ་དང་ལྕེ་དང་ལུས་དང་ཡིད་བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང ། དྲི་དང ། རོ་དང ། རེག་བྱ་དང ། ཆོས་བདག་ཡིན་ནོ། །ཆོས་བདག་གི་ཡིན་ནོ། །སའི་ཁམས་བདག་ཡིན་ནོ། །སའི་ཁམས་བདག་གི་ཡིན་ནོ། །ཆུའི་ཁམས་དང ། མེའི་ཁམས་དང ། རླུང་གི་ཁམས་
Ca175a
༄#། །དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་བདག་གི་ཡིན་ནོ། །ཚོར་བའི་ཕུང་པོ་དང ། འདུ་ཤེས་ཀྱི་ཕུང་པོ་དང ། འདུ་བྱེད་ཀྱི་ཕུང་པོ་དང ། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་གི་ཡིན་ནོ་ཞེས་བྱ་བ་ཡོད་པ་དེ་ལ་ནི། བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པར་འགྱུར་གྱིས། ཚེ་དང་ལྡན་པ་ཤཱ་རིའི་བུ་ཁོ་བོ་ལ་ནི་འདི་ལྟར་མིག་བདག་ཡིན་ནོ། །མིག་བདག་གི་ཡིན་ནོ། །རྣ་བ་དང་སྣ་དང་ལྕེ་དང་ལུས་དང་ཡིད་བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང་དྲི་དང་རོ་དང་རེག་བྱ་དང་ཆོས་བདག་ཡིན་ནོ། །ཆོས་བདག་གི་ཡིན་ནོ། །སའི་ཁམས་བདག་ཡིན་ནོ། །སའི་ཁམས་བདག་གི་ཡིན་ནོ། །ཆུའི་ཁམས་དང་མེའི་ཁམས་དང་རླུང་གི་ཁམས་དང་ནམ་མཁའི་ཁམས་དང་རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་བདག་གི་ཡིན་ནོ། །ཚོར་བའི་ཕུང་པོ་དང ། འདུ་ཤེས་ཀྱི་ཕུང་པོ་དང ། འདུ་བྱེད་ཀྱི་ཕུང་པོ་དང ། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་གི་ཡིན་ནོ་ཞེས་བྱ་བ་མེད་པས། ཁོ་བོའི་བཞིན་
Ca175b
གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པ་ག་ལ་འགྱུར། ཚེ་དང་ལྡན་པ་ཉེ་སྡེ་ཡུན་རིང་པོ་ནས་བདག་ཏུ་འཛིན་པ་དང ། བདག་གིར་འཛིན་པ་དང ། ངའི་སྙམ་པའི་ང་རྒྱལ་དང ། མངོན་པར་ཞེན་པ་དང ། བག་ལ་ཉལ་བ་དག་སྤངས་ཤིང་ཡོངས་སུ་ཤེས་ལ་ཏཱ་ལའི་མགོ་བཞིན་དུ་དྲུངས་ནས་བཅད་ཅིང་གཞི་མི་སྣང་ལ་ཕྱིས་ཀྱང་མི་སྐྱེ་བའི་ཆོས་ཅན་དུ་གྱུར་པས། ཁྱོད་ལ་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུ་དགེ་སློང་རབ་ཏུ་མང་པོ་དག་དང་བཅས་པས། ཚེ་དང་ལྡན་པ་ཉེ་སྡེའི་ལུས་ཀྱི་ཐན་ཀོར་ནས་བཟུང་སྟེ། གཙུག་ལག་ཁང་གི་ཕྱི་རོལ་དུ་བསྐྱལ་ནས། ཚེ་དང་ལྡན་པ་ཉེ་སྡེའི་ལུས་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་རྣམ་པར་བརྒྱར་ཞིགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཚིགས་སུ་བཅད་པ་སྨྲས་པ། ཚངས་སྤྱོད་ལེགས་པར་སྤྱད་པ་དང ། ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །ནད་དང་བྲལ་བ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང ། །ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །དུག་སྣོད་སྤངས་པ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང ། །ལམ་ཉིད་ལེགས་པར་བསྒོམས་པ་ནི། །འབར་བའི་ཁྱིམ་ནས་ཐར་བ་ལྟར། །འཆི་བའི་མཐར་ནི་མྱ་ངན་མེད། །ཚངས་སྤྱོད་ལེགས་པར་སྤྱད་པ་དང ། །ལམ་ཉིད་ལེགས་པར་བསྒོམས་པ་ནི། །གང་ཚེ་འཇིག་རྟེན་ཤེས་རབ་ཀྱིས། །རྩཝ་དང་ཤིང་འདྲར་མཐོང་
Ca176a
༄#། །གྱུར་པ། །དེ་ཚེ་ཉིང་མཚམས་སྦྱོར་མེད་ལས། །གཞན་པ་འདོད་པར་མི་བྱེད་དོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ལུས་ལ་ལུས་ཀྱི་མཆོད་པ་བྱས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཙུན་པ་ཚེ་དང་ལྡན་པ་ཉེ་སྡེའི་ལུས་ལ་སྦྲུལ་དུག་མྱུར་དུ་ཁྱབ་པར་བགྱིད་པ། འབར་བ། རྣོ་བ། དུག་དྲག་པ་འདི་ལྟ་སྟེ་དཔེར་བགྱི་ན། མིག་སྨན་གྱི་ཐུར་མ་ལྟར་ཕྲ་བ་ལྷུང་ནས། དེའི་ལུས་འདི་ལྟ་སྟེ་དཔེར་བགྱི་ན། སྦུན་པའི་ཆང་བུ་ལྟར་ཞིགས་པར་གྱུར་ཏོ། །ཤཱ་རིའི་བུ་ཚེ་དང་ལྡན་པ་ཉེ་སྡེ་ལ་གལ་ཏེ་དེའི་ཚེ་ཚིགས་སུ་བཅད་པ་འདི་དག་དང ། གསང་སྔགས་ཀྱི་ཚིག་འདི་དག་སྣང་བར་གྱུར་ན། དེའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པས་ཚུགས་པར་མི་འགྱུར་ཞིང ། དེའི་ལུས་འདི་ལྟ་སྟེ་དཔེར་ན་སྦུན་པའི་ཆང་བུ་ལྟར་ཞིགས་པར་ཡང་མི་འགྱུར་རོ། །བཙུན་པ་ཚིགས་སུ་བཅད་པ་དེ་དག་དང ། གསང་སྔགས་ཀྱི་ཚིག་དེ་དག་གང་ལགས། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། ང་ནི་ཡུལ་འཁོར་སྲུང་ལ་བྱམས། །ས་སྲུང་བུ་ལ་བྱམས་པ་སྟེ། །ལ་བ་དང་ནི་མགྱོགས་མཆོག་དང ། །གཅོད་ལྡན་བུ་ལ་ང་བྱམས་སོ། །གོའུ་
Ca176b
ཏ་མ་ནི་ནག་པོ་དང ། །མིག་མི་བཟང་ལ་ང་བྱམས་ཏེ། །ཀླུ་གང་དགའ་བོ་ཉེ་དགའ་བོ། །དེ་གཉིས་ལ་ནི་ང་རྟག་བྱམས། །རྐང་མེད་རྣམས་ལ་ང་བྱམས་ཏེ། །རྐང་གཉིས་རྣམས་ལའང་ང་བྱམས་སོ།། རྐང་བཞི་རྣམས་ལ་ང་བྱམས་ཏེ། །རྐང་མང་རྣམས་ལའང་ང་བྱམས་སོ། །གང་དག་རྒྱ་མཚོར་རྟེན་པ་ཡི། །ཀླུ་རྣམས་ཀུན་ལ་ང་བྱམས་སོ། །སེམས་ཅན་གང་དག་མགུལ་གནས་པའི། །སེམས་ཅན་ཀུན་ལ་ང་བྱམས་སོ། །སེམས་ཅན་ཀུན་དང་སྲོག་ཆགས་ཀུན། །འབྱུང་པོ་ཀུན་དང་མ་འདྲིས་ཤོག་།ཐམས་ཅད་བདེ་བ་ཉིད་གྱུར་ཅིང ། །ཐམས་ཅད་ནད་ནི་མེད་གྱུར་ཅིག་།ཀུན་གྱི་བཟང་པོ་མཐོང་གྱུར་ཅིང ། །གང་ལའང་སྡིག་པར་མ་གྱུར་ཅིག་།སྦྲུལ་གྱིས་གང་བའི་བྱ་སྐྱིབས་སུ། །རྟག་ཏུ་བདག་གི་གནས་གྱུར་ཀྱང ། །དུག་མྱུར་ཁྱབ་དང་དུག་དྲག་པོས། །བདག་གི་སྲོག་ལ་གནོད་མི་འགྱུར། ། བདག་གི་བདེན་ཚིག་གང་གིས་ནི། །སྟོན་པ་འཇིག་རྟེན་བླ་ན་མེད། །བདག་གི་བདེན་ཚིག་དེ་ཡིས་ནི། །བདག་གིས་ལུས་ལ་དུག་མ་འཇུག་།འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་ཆོས་ནི་དུག་མི་མངའ། །ཆོས་ཀྱི་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་དགེ་འདུན་དུག་མི་མངའ། །དགེ་འདུན་བདེན་པས་
Ca177a
༄#། །དུག་བཅོམ་མོ། །དུག་དང་དྲག་པོའི་དུག་བཅོམ་སྟེ། །བསྲུང་བས་ཡོངས་སུ་བསྲུང་བ་བྱས། །སངས་རྒྱས་ཐམས་ཅད་དུག་བཅོམ་པས། །བྲང་འགྲོ་ཁྱོད་ཀྱི་དུག་བཅོམ་མོ། །དེ་ལ་གསང་སྔགས་ཀྱི་ཚིག་རྣམས་འདི་དག་ཡིན་ཏེ། ཏདྱ་ཐཱ། ཨོཾ་ཏུམ་པི་ལེ། ཏུམ་པི་ལེ། ཏུམ་པེ། པྲ་ཏུམ་པེ། ནད་ཏེ། སུ་ན་ཊ་ཊེ། ཀེ་པ་ཊ་ཊེ། མུ་ན་ཡེ། ས་མ་ཡེ། དན་ཏེ། དན་ཏི་ལེ། ནི་ལེ། ནི་ལ་ཀེ་ཤེ། བཱ་ལེ། བཱ་ལ་ཀོ་པེ། ཨོ་ལེ། ནྱང་གོ་ལེ་སཝཱ་ཧཱ། ཤཱ་རིའི་བུ་གལ་ཏེ་དེའི་ཚེ་རིགས་ཀྱི་བུ་ཉེ་སྡེ་ལ་ཚིགས་སུ་བཅད་པ་དེ་དག་དང ། གསང་སྔགས་ཀྱི་ཚིག་དེ་དག་སྣང་བར་གྱུར་ན། དེའི་ལུས་ལ་དུག་མྱུར་དུ་ཁྱབ་པར་བྱེད་པས་ཚུགས་པར་མི་འགྱུར་ཞིང་དེའི་ལུས་ལ་འདི་ལྟ་སྟེ་དཔེར་ན། སྦུན་པའི་ཆང་བུ་ལྟར་རྣམ་པ་བརྒྱར་ཞིགས་པར་ཡང་མི་འགྱུར་རོ། །བཙུན་པ་དེའི་ཚེ་ན་ཚེ་དང་ལྡན་པ་ཉེ་སྡེས་ཚིགས་སུ་བཅད་པ་དེ་དག་དང ། གསང་སྔགས་ཀྱི་ཚིག་དེ་དག་སྔོན་མ་ཐོས་པས་དེ་ལ་ད་ལྟར་བཅོམ་ལྡན་འདས་ལ་ཇི་ལྟར་བ་བཞིན་དུ་སྣང་བར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང ། རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།འདུལ་བ་རྣམ་པར་འབྱེད་པ། བམ་པོ་དགུ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་
Ca177b
ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཉེ་སྡེས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་ཞིག་བགྱིས་ན། དེས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་དུག་གིས་གཟིར་བའི་སྙུན་གྱིས་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ཉེ་སྡེ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ་འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཉེ་སྡེ་ཉིད་ཀྱི་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། ། འབྲས་བུ་དག་ཏུ་འགྱུར་པ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན། སངས་རྒྱས་རྣམས་འབྱུང་བ་མེད་པའི་ཚེ། རང་སངས་རྒྱས་དམན་པ་དང ། བཀྲེན་པ་ལ་རྗེས་སུ་སྙིང་བརྩེ་བ། བས་
Ca178a
༄#། །མཐའི་གནས་མལ་ལ་དགའ་བ་བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ ། །ཅི་ཙམ་ན་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་རི་དྭགས་དང་བྱ་མང་པོ་དག་གི་རྟེན་དུ་གྱུར་པ། མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དྭགས་དང་བྱ་མང་པོ་དག་དྲུངས་དབྱུང་བའི་ཕྱིར་དང ། ཉམས་པར་བྱ་བའི་ཕྱིར་དང ། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང ། རྙི་དང་རྙོང་མང་པོ་དག་འཇུག་པར་བྱེད་དོ། །དེའི་རྔོན་སྤྱད་དང་རྙི་དང་རྙིང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན། རི་བྲགས་དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས། དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས། བསམས་པ། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་གྱིས། རི་བྲགས་ཀྱི་ཕྱི་རོལ་གྱི་གནས་ཞིག་བ་ཞིག་ཏུ་བསོད་སྙོམས་བཟའོ་སྙམ་ནས་དེ་རི་བྲགས་ནས་བྱུང་སྟེ། འདི་ནི་ཞི་བའོ་འདི་ནི་ཞི་བའོ་ཞེས་མཚེའུ་དེ་ག་ལ་བ་དེར་སོང་སྟེ་ཕྱིན་ནས། ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ། རྐང་པ་གཉིས་པ་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ།
Ca178b
ལག་པ་གཉིས་བསྙལ་ནས་ཁ་བཀྲུས་ཏེ། ལྷུང་བཟེད་དང་ཆུ་ཚགས་གནས་ཇི་ལྟ་བ་བཞིན་དུ་བཞག་ནས། རྐང་པ་གཉིས་བཀྲུས་ཏེ། ཤིང་དྲུང་ཞིག་ཏུ་བརྟེན་ནས། བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར། སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བར་འདུག་པ་དང ། དེའི་ཉིན་མོ་མིའི་དྲིས་རི་དྭགས་གཅིག་ཀྱང་མ་ཟིན་ཏོ། །དེ་ནས་རྔོན་པ་དེ་ནང་པར་སྔར་ལངས་ཏེ། མཚེའུ་དེ་ག་ལ་བ་དེར་སོང་ནས། དེས་རྔོན་སྤྱད་དང ། རྙི་དང་རྙིང་དེ་དག་བྱུལ་བར་བརྩམས་པ་དང ། རི་དྭགས་གཅིག་ཀྱང་མ་མཐོང་ནས། དེ་འདི་སྙམ་དུ་སེམས་ཏེ། བདག་གི་རྔོན་སྤྱད་དང ། རྙི་དང་རྙིང་འདི་དག་དོན་ཡོད་པ་ཡིན་ན། གང་གི་ཕྱིར་དེང་རི་དྭགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐན་ཀོར་བྱུལ་བར་བརྩམས་པ་དང ། མིའི་རྗེས་མཐོང་ནས། དེ་རྗེས་དེའི་ཕྱི་བཞིན་དུ་སོང་བ་དང ། རང་སངས་རྒྱས་སྤྱོད་ལམ་ཞི་བར་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས། གལ་ཏེ་བདག་གིས་འདིའི་སྲོག་གཅད་པར་མ་བྱས་ན། འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་དེས། མདའ་དུག་ཅན་གྱིས་གཞུ་རྔའི་དབྱིབས་འདྲ་བ་རྣ་དྲུང་དུ་ཐུག་པར་བཀང་སྟེ། རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་
Ca179a
༄#། །མོངས་པ་འདི་ཧ་ཅང་སྨས་པ་དང་ཉམས་པར་གྱུར་ན་མི་རུང་གིས་འདི་ལག་ནས་དྲང་བ་སྦྱིན་ནོ་སྙམ་ནས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས། འབར་བ་དང ། གསལ་བ་དང ། ཆར་འབེབས་པ་དང ། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས། རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ། རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར། སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ་རྨ་ལྷན་གྱི་གླན་ནས་སྨྲས་པ། འཕགས་པ་སྡུམ་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པ་ཀླན་པར་མཛད་ན། དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་བསམས་པ། བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས། དེའི་ཕྱིར་ད་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས། དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ། ཆོ་འཕྲུལ་རྣམ་པ་སྣ་ཚོགས་དག་རྣམ་
Ca179b
པར་བསྟན་ནས། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས། དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་གཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་བརྩིག་ཏུ་བཅུག་སྟེ། གདུགས་དང་རྒྱལ་མཚན་དང ། བ་དན་དག་བསྒྲེང་ཞིང ། དྲི་དང་ཕྲེང་བ་རྒྱུ་བ་དང ། བདུག་སྤོས་དང ། ཕྱེ་མ་དང ། སིལ་སྙན་དག་གིས་མཆོད་པ་བྱས་ནས། རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་བར། མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས། བདག་ཕྱུག་པ་ནོར་མང་བ། ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ། བལྟ་ན་སྡུག་པ། མཛེས་པར་སྐྱེ་ཞིང ། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་དེའི་ཚེ་དེའི་དུས་ཀྱིས་རྔོན་པ་གང་ཡིན་པ་དེ་ནི་ཉེ་སྡེ་འདི་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་གྱི་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས། ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་དུག་གིས་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་
Ca180a
༄#། །བཅོམ་པ་ཐོབ་ཀྱང ། དེ་དུག་གིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ་ལྟ་ན་སྡུག་པ་མཛེས་པར་སྐྱེས་ཤིང ། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་དུ་བྱས་ཤིང ། འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། ། དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །འདི་ཡང་རེ་ཞིག་བྱུང་བ་ཡིན་གྱི། སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཚོང་དཔོན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་
Ca180b
རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེ་ལ་བུ་བཙས་ནས། དེ་བཙས་པའི་རིམ་གྱིས་རིགས་དང་མཐུན་པའི་མིང་བཏགས་ཏེ། དེ་བསྲིངས་ཤིང་བསྐྱེད་ནས་ཆེན་པོར་གྱུར་ཏོ། །ཇི་ཙམ་ན་ཚོང་དཔོན་དེའི་ཆུང་མ་དུས་ལ་བབ་ནས། དེས་ཆུང་མ་གཞན་ཞིག་བླངས་ཏེ། ཚོང་དཔོན་དེས་ཆུང་མ་དེ་ལ་སྨྲས་པ་བཟང་མོ་གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱི་མི་མཐུན་པར་སྐྱེས་པས་ནི་མི་ནུས་པས། ཁྱེའུ་འདི་ཁྱོད་ཀྱི་བུ་ཡིན་གྱིས། ཁྱོད་ཀྱིས་འདི་ལ་མཁོ་བ་བསྟབ་པར་བྱའོ། །ཇི་ཙམ་དུས་གཞན་ཞིག་ན་ཆུང་མ་གཉིས་པ་དེ་ལ་ཡང་སེམས་ཅན་ཞུགས་པར་གྱུར་ནས། དེས་བསམས་བ། བདག་ལ་ཡང་བུ་ཡོད་པར་གྱུར་པས་ཁྱེའུ་འདི་དེའི་ཟླ་བོར་འགྱུར་གྱིས་འདི་བསྟོད་པར་མི་བྱའོ་སྙམ་ནས། དེས་ཁྱེའུ་དེ་ཟས་ངན་པ་དང ། གོས་ངན་པ་བསྲེལ་དུ་འཇུག་ཅིང་ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེ་ཕའི་གན་དུ་སོང་སྟེ་སྨྲས་པ། ཡབ་བདག་ལ་མ་ཡར་མོ་འདིས་ཟས་ངན་པ་དང ། གོས་ངན་པ་བསྲེལ་དུ་སྩོལ་ཅིང ། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་དོ། །ཚོང་དཔོན་དེས་སྨྲས་པ། བུ་ཅི་ནས་ཀྱང་ཕྱིན་ཆད་དེ་ལྟར་མི་བྱེད་པར་བཟློག་པར་བྱའོ། །ཚོང་དཔོན་དེས་ཆུང་མ་ལ་སྨྲས་པ། བཟང་མོ་ཁོ་བོས་ཁྱོད་ལ་དང་པོ་ཉིད་ནས་གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱིས། མི་མཐུན་པར་སྐྱེས་པས་ནི་
Ca181a
༄#། །མི་ནུས་པས་ཁྱེའུ་འདི་ཁྱོད་ཀྱི་བུ་ཡིན་གྱིས་ཁྱོད་ཀྱིས་འདི་ལ་མཁོ་བ་བསྟབ་པར་བྱའོ་ཞེས་མ་སྨྲས་སམ། ཅིའི་ཕྱིར་ཁྱོད་ཀྱིས་འདི་ལ་ཟས་ངན་པ་དང ། གོས་ངན་པ་བསྲེལ་དུ་འཇུད་ཅིང ། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད། ཆུང་མས་སྨྲས་པ། རྗེའི་སྲས་བདག་གིས་འདི་བསླབ་པར་བགྱི་སྟེ། འདི་ནི་ཚོང་དཔོན་གྱི་བུ་ལགས་པས། གལ་ཏེ་མ་བསླབས་ན་རྗེའི་སྲས་ཉིད་ལ་ཡང་འཇིག་རྟེན་དག་ངེས་པར་སྨོད་པར་འགྱུར་རོ། །ཚོང་དཔོན་གྱིས་སྨྲས་པ། ཁྱོད་འདི་སློབ་པར་མ་བསྐོས་ཀྱིས། ཕྱིན་ཆད་འདི་ཟས་ངན་པ་དང་གོས་ངན་པ་བསྲེལ་དུ་མི་གཞུག་ཅིང ། ཁུ་ཚུར་དང་ཐལ་ལྕག་གིས་ཡང་དང་ཡང་དུ་མ་རྡེགས་ཤིག་།ཆུང་མ་དེ་ཚོང་དཔོན་དེའི་ཤིན་ཏུ་གནང་ཆེན་ཡིན་པས། ཆུང་མ་དེས་ཁྱེའུ་དེ་ཕྱིར་ཞིང་ཤས་ཆེར་གོས་ངན་པ་དང ། ཟས་ངན་པ་བསྲེལ་དུ་འཇུད་ཅིང ། ཁུ་ཚུར་དང་ཐལ་ལྕག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེས་བསམས་པ། བདག་གི་ཕས་མ་ཡར་མོ་འདི་དྲག་ཏུ་མ་བཟློག་པས། དེས་ན་མ་ཡར་མོ་འདི་བདག་ལ་ཕྱིར་ཞིང་ཤས་ཆེར་ཟས་ངན་པ་དང ། གོས་ངན་པ་བསྲེལ་དུ་འཇུད་ཅིང ། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་ཀྱིས་བདག་རབ་ཏུ་འབྱུང་དུ་འགྲོའོ་སྙམ་ནས། ཁྱེའུ་དེས་ཕ་ལ་ཡབ་ཁྱོད་ཀྱིས་བདག་གི་མ་ཡར་མོ་འདི་བཟློག་ཀྱང་འདིས་སླར་ཞིང་ཤས་ཆེར་བདག་ཟས་ངན་པ་དང་གོས་ངན་པ་བསྲེལ་དུ་
Ca181b
དུ་སྩལ་ཅིང ། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་ཀྱིས་བདག་རབ་ཏུ་འབྱུང་དུ་མཆིའོ་ཞེས་ཅི་ནས་ཅིར་བརྒྱུད་དེ་གསོལ་བ་བྱས་སོ། །ཚོང་དཔོན་དེ་ཆུང་མ་དེ་ལ་ཧ་ཅད་བྱམས་ཤིང་དེའི་སེམས་སྲུང་བས། དེ་དྲག་ཏུ་བཟློག་པར་མ་ནུས་ནས། དེས་སྨྲས་པ། བུ་ཁྱིམ་བདག་གི་ཆུང་མ་འདི་གཏུམ་པ་བརྟུན་ངས་པ་དྲག་ཤུལ་ཆེ་བ་ཡིན་གྱིས་སོང་ལ་རབ་ཏུ་བྱུང་ཞིག་དང་ཁྱོད་གསོན་པ་མཐོང་བར་ཡང་འགྱུར་གྱི། གལ་ཏེ་ན་ཁྱོད་ལ་གནོད་པ་བྱེད་པར་འགྱུར་བའི་གནས་ཀྱང་ཡོད་དོ། །ཁྱེའུ་དེ་ཕས་གནང་ནས་རྒྱལ་བྱེད་ཀྱི་ཚལ་དུ་སོང་སྟེ། དགེ་སློང་གི་དྲུང་དུ་སོང་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་བཟང་ཁྱོད་ཀྱིས་སེམས་བསྐྱེད་པ་ལེགས་ཏེ། ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་བྱུང་ཞིག་།དགེ་སློང་དེས་ཁྱེའུ་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་སྨྲས་པ། བཞིན་བཟང་དགེ་སློང་གི་ལས་ནི་གཉིས་ཏེ། བསམ་གཏན་དང ། ཀློག་པ་ཡིན་ནོ། །ཁོ་བོ་ནི་བསམ་གཏན་པ་ཡིན་ན། ཁྱོད་བསམ་གཏན་དང ། ཀློག་པ་གང་བྱེད། དེས་སྨྲས་པ། མཁན་པོ་ཀློག་པའོ། །བུ་ལེགས་ཀྱིས་ཁྱོད་ཀྱིས་སྡེ་སྣོད་གསུམ་པོ་དག་བཀླག་པར་བྱའོ། །དེས་བསམས་པ། གཞུང་མ་ལ་མཁན་པོ་རྗེས་སུ་བསྲུང་དགོས་པས་འདི་ན་བདག་ལ་ཀློག་ཏུ་འཇུད་པ་མེད་ཀྱིས། ཡུལ་གཞན་དུ་འགྲོའོ་སྙམ་ནས་དེ་ཡུལ་གཞན་དུ་སོང་ངོ ། །དེས་དེར་སྡེ་
Ca182a
༄#། །སྣོད་གསུམ་པོ་དག་བཀླགས་ཤིང་སྡེ་སྣོད་གསུམ་དང་ལྡན་པ་ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །དེས་བསམས་པ། བཅོམ་ལྡན་འདས་ཀྱིས་དགེ་སློང་དག་བུའི་ཕ་མ་སྙོད་པར་བྱེད་པ། གསོ་བར་བྱེད་པ། སྐྱེད་པར་བྱེད་པ། ནུ་མ་སྣུན་པར་བྱེད་པ། འཛམ་བུའི་གླིང་སྣ་ཚོགས་སྟོན་པར་བྱེད་པ་གཉིས་ནི་དཀའ་བ་བྱེད་པ་དག་ཡིན་ཏེ། བུས་ཕྲག་པ་གཅིག་གིས་ནི་ཕ། ཅིག་ཤོས་ཀྱིས་ནི་མ་ལོ་བརྒྱ་ཐམ་པར་ཡོངས་སུ་པང་བ་བྱས་སམ། ས་ཆེན་པོ་འདིར་ནོར་བུ་དང ། མུ་ཏིག་དང ། ་དང ། མན་ཤེལ་དཀར་པོ་དང ། བྱི་རུ་དང ། དངུལ་དང ། ས་ལེ་སྦྲམ་དང ། རྡོའི་སྙིང་པོ་དང ། སྤུག་དང ། དམར་པོ་དང ། གཡས་སུ་འཁྱིལ་དང ། དེ་ལྟ་བུའི་དབང་ཕྱུག་གི་བདག་པོ་ལ་བཀོད་པར་གྱུར་པ་གང་ཡིན་པ་དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང ། ཉེ་བར་བྱས་པར་མི་འགྱུར་གྱི། དེ་ཕ་མ་མ་དད་པ་གཉིས་དད་པ་ཕུན་སུམ་ཚོགས་པ། ཡང་དག་པར་འཛིན་དུ་བྗུད་\་འJཱུཌ?\་འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད། ཚུལ་ཁྲིམས་འཆལ་པ་གཉིས་ཚུལ་ཁྲིམས་ཕུན་སུམ་ཚོགས་པ་དང ། སེར་སྣ་ཅན་གཉིས་གཏོང་བ་ཕུན་སུམ་ཚོགས་པ་དང ། ཤེས་རབ་འཆལ་བ་གཉིས་ཤེས་རབ་ཕུན་སུམ་ཚོགས་པ་ཡང་དག་པར་འཛིན་དུ་འཇུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་ན། དེ་ཙམ་གྱིས་ནི་བུས་ཕ་མ་
Ca182b
གཉིས་ལ་བྱས་པ་དང ། ཉེ་བར་བྱས་པར་འགྱུར་རོ་ཞེས་གསུངས་པས་བདག་གི་ཕ་དེ་ཡང་མ་དད་པ་ཡིན་གྱིས་བདག་སོང་ལ་དེ་ལ་ཆོས་བསྟན་པར་བྱའོ་སྙམ་ནས་དེ་ལྷུང་བཟེད་དང་ཆོས་གོས་ཐོགས་ཏེ།་མཉན་ཡོད་ག་ལ་བ་དེར་རྒྱུ་ཞིང་སོང་བ་ན། མཐར་གྱིས་མཉན་ཡོད་དུ་ཕྱིན་ནས། དེ་མཉན་ཡོད་དུ་འཇུག་པ་ཉིད་ན་རྒྱལ་བྱེད་ཀྱི་ཚལ་དུ་སོང་ངོ ། །མཉན་ཡོད་ཀུན་ཏུ་ཚོང་དཔོན་ཆེ་གེ་མོའི་བུ་ཞིག་ལྗོངས་ནས་སྡེ་སྣོད་གསུམ་བཀླགས་ཏེ་རྒྱལ་བྱེད་ཀྱི་ཚལ་དུ་འོངས་སོ་ཞེས་བྱ་བའི་སྒྲས་ཁྱབ་པར་གྱུར་པ་དེ་ཚོང་དཔོན་དེས་ཐོས་ནས་བདག་གི་བུ་སྡེ་སྣོད་གསུམ་བཀླགས་ཏེ་ལྗོངས་ནས་རྒྱལ་བྱེད་ཀྱི་ཚལ་དུ་འོངས་ཀྱིས། དེ་ཡང་དག་པར་རབ་ཏུ་དགའ་བར་བྱེད་དུ་འགྲོའོ་སྙམ་ནས། ཚོང་དཔོན་དེ་རྒྱལ་བྱེད་ཀྱི་ཚལ་དུ་སོང་བ་དང ། དེས་བུ་དེ་མཐོང་ནས་སྨྲས་པ། བུ་ཁྱོད་ཀྱིས་ཁོ་བོ་སྤངས་ཏེ་རབ་ཏུ་བྱུང་མོད་ཀྱི། ཁྱོད་དགེ་སློང་དུ་རེད་ཅིང་མང་དུ་ཐོས་པར་གྱུར་པ་ལེགས་ཏེ་བདག་ཀྱང་ཡོངས་སུ་དགའོ་ཞེས་སྨྲས་ནས་དེའི་མདུན་དུ་འདུག་གོ་།དགེ་སློང་དེས་ཚོང་དཔོན་དེ་ལ་གང་གིས་ཚོང་དཔོན་དེ་དད་པ་སྐྱེས་པས་སྐྱབས་སུ་འགྲོ་བ་དང ། བསླབ་པའི་གཞི་དག་གཟུང་བར་གྱུར་པ་དེ་འདྲ་བའི་ཆོས་བསྟན་པར་བྱས་སོ། །ཚོང་དཔོན་དེས་བུའི་རྐང་པ་གཉིས་ལ་ཕྱག་འཚལ་ཏེ། ཕྱི་དེ་ཉིན་པར་ཟན་ལ་མགྲོན་དུ་བོས་པ་དང ། བུ་དེས་ཀྱང་ཅང་མི་སྨྲ་བས་དང་དུ་བླངས་སོ། །དེ་ནས་ཚོང་དཔོན་དེས་བུའི་རྐང་པ་གཉིས་ལ་ཕྱག་འཚལ་ཏེ་སོང་པ་དང ། དེ་ལ་ལམ་ཁར་བློ་སྐྱེས་པ།
Ca183a
༄#། །བདག་གིས་བུ་དེ་མ་བགྲོས་པར་གྱ་ཚོམ་དུ་མགྲོན་དུ་བོས་ན། བདག་གི་ཆུང་མ་དེ་ཡང་གཏུམ་པ་བརྟུན་ངས་པ་དྲག་ཤུལ་ཆེ་བ་ཡིན་པས་བུ་དེ་ལ་བསྙེན་བཀུར་བྱེད་པར་མི་འགྱུར་ན། དེ་ལ་ཇི་ལྟར་བསྒྲུབ་པར་བྱ་སྙམ་མོ། །ཡང་བསམས་པ། ད་ནི་དེ་མགྲོན་དུ་བོས་ཟིན་པས་ཅི་བྱར་ཡང་མེད་ཀྱིས། བདག་གིས་གང་གིས་ཆུང་མ་དེ་འཁྲུགས་པར་མི་འགྱུར་བར་རྣམ་པ་ཐམས་ཅད་དུ་དགའ་བ་དང་སྙན་པའི་ཚིག་དག་གིས་ཐབས་བཤམས་པར་བྱའོ་སྙམ་ནས། དེ་ཁྱིམ་དུ་སོང་སྟེ་ཆུང་མ་ལ་སྨྲས་པ། བཟང་མོ་འཁྱམས་པ་དང ། ཤི་བ་དང ། རབ་ཏུ་བྱུང་བ་ཞེས་བྱ་བ་དག་དོན་གཅིག་གམ། འོན་ཏེ་ཐ་དད་དུ་བྱ་བ་ཅུང་ཟད་ཡོད། ཆུང་མས་སྨྲས་པ། རྗེའི་སྲས་ཐ་དད་དུ་བགྱི་བ་ཅུང་ཟད་ཀྱང་མ་མཆིས་སོ། །ཚོང་དཔོན་གྱིས་སྨྲས་པ། བཟང་མོ་གཞན་དག་ན་རེ། ཁྱོད་ཀྱི་བུ་ཡར་པོ་དེ་དགེ་སློང་བཟང་པོར་རེད་དེ་ལྗོངས་ནས་སྡེ་སྣོད་གསུམ་བཀླགས་ནས་རྒྱལ་བྱེད་ཀྱི་ཚལ་དུ་འོངས་ཏེ། སྡེ་སྣོད་གསུམ་དང་ལྡན་པ་འབའ་ཞིག་ཏུ་ཡང་མ་ཟད་ཀྱི། ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་དུ་ཡང་གྱུར་ཅེས་ཟེར་རོ། །ཆུང་མས་སྨྲས་པ། རྗེའི་སྲས་གལ་ཏེ་དེ་ལྟ་ན་ཅིའི་སླད་དུ་འཚལ་མ་ལ་གཡར་མི་དྲང ། བཟང་མོ་མགྲོན་དུ་བོས་ཀྱིས་ཟས་སྟ་གོན་གྱིས་ཤིག་།ཆུང་མ་དེ་དེ་ལ་ཞེ་སྡང་གི་ཀུན་ནས་དཀྲིས་པ་དང་བྲལ་ནས་དེས་ཟས་བསིལ་བའི་རོ་དང་ལྡན་པ་གང་
Ca183b
དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། ཟས་དྲོ་བའི་རོ་དང་ལྡན་པ་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་ནས། བཙུན་པ་གདུགས་ཚོད་གཡར་གོང་འཚལ་ལགས་ན་དེའི་དུས་ལགས་པར་དགོངས་སུ་གསོལ་ཞེས་གཡར་འདྲེན་པའི་མི་བཏང་ངོ ། །དགེ་སློང་དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ནས་ཕའི་ཁྱིམ་ག་ལ་བ་དེར་སོང་སྟེ། ཕྱིན་ནས་སྟན་བཤམས་པ་ཉིད་ལ་འདུག་གོ་།དེ་ནས་ཚོང་དཔོན་དེ་ཆུང་མ་དང་བཅས་པས་རང་གི་ལག་ནས་ཟས་བསོད་བས་དགེ་སློང་དེ་ཚིམ་པར་བྱས་ཤིང་རང་གི་ལག་ནས་བསྟབས་སོ། ། ཚིམ་པར་བྱས་ཤིང་བསྟབས་ཏེ་ཟོས་ཟིན་པར་རིག་ནས། ལག་པ་བསྙལ་ཅིང་ལྷུང་བཟེད་བཞག་པ་ན་རྐང་པ་ལ་ཕྱག་འཚལ་ཏེ། ཆོས་མཉན་པའི་ཕྱིར་མདུན་དུ་འདུག་གོ་།དེས་མ་ཡར་མོ་དེ་ལ་ཡང་གང་ཐོས་ནས་དེས་ཀྱང་སྐྱབས་སུ་འགྲོ་བ་དང་བསླབ་པའི་གཞི་དག་གཟུང་བར་གྱུར་པའི་རྣམ་པ་དེ་ལྟར་ཆོས་བསྟན་པར་བྱས་སོ། །དེས་ཁྱིམ་དེ་ཇི་ལྟར་དགེ་སློང་རྣམས་དང ། དགེ་སློང་མ་རྣམས་ཀྱིས་ཁྲོན་པ་ལྟ་བུར་གྱུར་པ་དེ་ལྟར་བཏུལ་ནས། དེ་དག་སྦྱིན་པ་དང་བྱ་བར་སེམས་པ་གང་ཡིན་པ་ཅི་ཡང་རུང་སྟེ། དེ་ཐམས་ཅད་དགེ་སློང་རྣམས་དང་དགེ་སློང་མ་རྣམས་ལ་སེམས་སོ། །ཇི་ཙམ་དུས་གཞན་ཞིག་ན་ཚོང་དཔོན་དེའི་འབྱུང་བ་ཆེན་པོ་མ་སྙོམས་པས་ན་བར་གྱུར་ནས། དེའི་བུས་བདག་གི་ཕན་པར་གྱུར་ཏོ་ཞེས་ཐོས་ནས་དེ་འདི་སྙམ་དུ་སེམས་ཏེ། བདག་སོང་
Ca184a
༄#། །ལ་ཕ་དེ་ལ་མཆོག་ཏུ་དགའ་བར་འགྱུར་བའི་ཆོས་བསྟན་པར་བྱའོ་སྙམ་ནས། དགེ་སློང་དེ་དེའི་དྲུང་དུ་དུས་དང་མཐུན་པའི་དུས་སུ་སོང་ནས་འདི་སྐད་ཅེས།་ཡབ་ཁྱོད་ཀྱིས་མི་བགྱིས་པར་མི་བགྱི་སྟེ། འདི་ལྟར་ཁྱོད་ཀྱིས་དགེ་བའི་བཤེས་གཉེན་བདག་ལ་བརྟེན་ནས་སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིང་བསླབ་པའི་གཞི་དག་བླངས། སྦྱིན་པ་དག་བྱིན། བསོད་ནམས་དག་བྱས་པས། ཁྱོད་ཡུལ་གཞན་དུ་སོང་ན་ལོ་ལེགས་ཤིང ། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ནས་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཆོས་སྟོན་པར་བྱེད་དོ། །ཚོང་དཔོན་གྱིས་སྨྲས་པ། བུ་དེ་དེ་བཞིན་ནོ། ། དེ་དེ་བཞིན་ཏེ། བདག་གིས་དགེ་བའི་བཤེས་གཉེན་ཁྱོད་ལ་བརྟེན་ནས། སངས་རྒྱས་ལ་སྐྱབས་སུ་སོང ། ཆོས་དང་དགེ་འདུན་ལ་སྐྱབས་སུ་སོང་ཞིག་བསླབ་པའི་གཞི་དག་བླངས། སྦྱིན་པ་དག་བྱིན། བསོད་ནམས་དག་བྱས་པས། བདག་ཡུལ་གཞན་དུ་སོང་ན་ལོ་ལེགས་ཤིང ། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཚོང་དཔོན་དེའི་བུ་དེས། ཕ་ལ་དེ་ལྟར་ཆོས་བསྟན་ནས་སོང་ངོ ། །ཚོང་དཔོན་དེ་ལ་བློ་སྐྱེས་པ་བདག་གི་བུ་སྡེ་སྣོད་གསུམ་
Ca184b
དང་ལྡན་པ། ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་དེ་གཞན་དུ་སྨྲ་བར་མི་འགྱུར་བས་བདག་སྡུག་བསྔལ་གྱི་ཚོར་བས་ཉེན་པ་ནི་ཐུན་མོང་མ་ཡིན་པས་བདག་གིས་བདག་ཉིད་གསད་པར་བྱའོ་སྙམ་མོ། །ཡང་བསམས་པ། བདག་ཉིད་ལ་རྩོམ་པར་བྱེད་པ་ནི་སྡུག་བསྔལ་བ་ཡིན་ན། དེའི་ཕྱིར་བདག་སྲོག་དང་བྲལ་བར་བྱེད་ནུས་པ་སུ་ཡོད་སྙམ་ནས། དེ་ལ་བྲན་མོ་མངག་གཞུག་མ་སྐྱོང་མ་ཞེས་བྱ་བ་སྦོམ་མོ་གླེན་མ་དམན་པ་ཞིག་ཡོད་ནས། ཚོང་དཔོན་དེས་བསམས་པ། སྐྱོང་མ་འདི་ནི་སྦོམ་མོ་གླེན་མ་དམན་པ་ཡིན་པས་འདིས་བདག་སྲོག་དང་བྲལ་བར་བྱེད་ནུས་ཀྱིས། གཞན་གྱིས་ནི་མི་ནུས་སྙམ་མོ། །ཚོང་དཔོན་དེའི་ཁྱིམ་དང་ཧ་ཅང་ཐག་མི་རིང་བ་ཞིག་ན། ཁྱིམ་བདག་ཅིག་གི་བུས་བག་མ་བླངས་པ་དེར། ཚོང་དཔོན་དེའི་ཆུང་མ་བྲན་མོ་མངག་གཞུག་མ་སྐྱོང་མ་དང་བཅས་ཤིང་མགྲོན་དུ་བོས་ཏེ་སོང་ངོ ། །བག་མ་བླངས་པ་དང ། སྟོན་མོ་ཟིན་ནས། ཚོང་དཔོན་གྱི་ཆུང་མས་སྐྱོང་མ་ལ་སྨྲས་པ། སྐྱོང་མ་ཁྱོད་སོང་ལ་ཚོང་དཔོན་གཉིད་ལོག་པར་མི་འགྱུར་བར་སྲུང་ཤིག་།ཁོ་མོ་ཡང་ཕྱི་བཞིན་འོང་ངོ ། །སྐྱོང་མས་ཇོ་མོའི་ཚིག་མཉན་ཏེ། ཁྱིམ་དུ་སོང་ནས་ཚོང་དཔོན་གྱི་དྲུང་དུ་ཕྱིན་པ་དང ། ཚོང་དཔོན་གྱིས་སྨྲས་པ། སྐྱོང་མ་ཁྱོད་ག་ལས་འདིར་འོངས། སྐྱོང་མས་སྨྲས་པ། རྗེའི་སྲས་ཁྱིམ་བདག་ཆེ་གེ་མོའི་བུས་བག་མ་བླངས་པ་དེ་བདག་གིས་བལྟས་ཏེ་འཚལ་མ་འཚལ་ནས་མཆིས་སོ། །སྐྱོང་མ་བག་མ་ལེན་པ་བཟང་ངམ། རྗེའི་
Ca185a
༄#། །སྲས་བཟང་ངོ ། །གལ་ཏེ་ངས་ཁྱོད་དེ་ལྟར་བག་མར་གཏང་བར་བྱ་ན་ཁྱོད་དགའམ། རྗེའི་སྲས་དགའོ། །གལ་ཏེ་དེ་ན་ཁོ་བོ་ཅི་ཟེར་བ་དེ་བཞིན་དུ་བྱེད་ན། ཁོ་བོ་ཁྱོད་དགའ་བར་འགྱུར་བ་ཤེས་སོ། །སྐྱོང་མས་སྨྲས་པ། རྗེའི་སྲས་དེ་བཞིན་དུ་བགྱིའོ། །སྐྱོང་མ་གལ་ཏེ་དེ་ལྟ་ན་ཁོ་བོའི་ལྟོར་མི་མ་ཡིན་པ་ཞིག་ཞུགས་ཀྱིས་དེ་སོད་ཅིག ། རྗེའི་སྲས་གོ་རིམས་ཇི་ལྟར་བགྱི། སྐྱོང་མ་དང་པོར་ངའི་རྐང་པ་གཉིས་ཚིར་ཅིག་།དེའི་འོག་ཏུ་བྱིན་པ་གཉིས། དེའི་འོག་ཏུ་པུས་མོ་གཉིས། དེའི་འོག་ཏུ་བརླ་གཉིས། དེའི་འོག་ཏུ་རྐེད་པ། དེའི་འོག་ཏུ་ལྟོ་བ། དེའི་འོག་ཏུ་བྲང ། དེའི་འོག་ཏུ་གྲེ་བར་ཚིར་ལ་གལ་ཏེ་ཁོ་བོ་མགུལ་ན་མ་བཏང་ཞིག་།སྐྱོང་མ་གླེན་མ་དེས་དེ་བཞིན་དུ་བྱས་ཏེ་དེས་དམ་དུ་བཙིར་བ་དང ། ཚོང་དཔོན་གྱིས་བསམས་པ། ཀྱེ་མའོ་བདག་སྐྱོང་མ་འདིས་བཏང་ཡང་ཅི་མ་རུང་སྙམ་ན། སྐྱོང་མས་དེ་བས་ཀྱང་ཆེས་དམ་དུ་བཙིར་ཏོ། །ལྷས་ཚིགས་སུ་བཅད་པ་སྨྲས་པ། བློ་ངན་གྱིས་ནི་གང་འཛིན་པ། ། རུས་སྦལ་གྱིས་ནི་གང་འཛིན་བཞིན། །སྐྱོང་མས་ཟིན་པར་གྱུར་པས་ན། །ཁྱོད་ནི་འཚོ་བར་མ་མཐོང་ངོ ། །ཚོང་དཔོན་དེ་དུས་ལ་བབ་ནས། །སྐྱོང་མས་རས་ཀྱིས་གཡོགས་ཏེ་བཞག་གོ། དེ་ནས་ཚོང་དཔོན་གྱི་ཆུང་མ་ཕྱི་བཞིན་འོངས་ནས་དེ་སྨྲས་པ། སྐྱོང་མ་ཁྱོད་འདུག་བཞིན་དུ་ཚོང་དཔོན་ཉལ་དུ་བཅུག་གམ་ཞེས་ཚོང་དཔོན་གྱི་ཆུང་མ་དེས་ཚོང་དཔོན་བསླང་བར་བརྩམས་པ་དང །
Ca185b
སྐྱོང་མས་སྨྲས་པ། ངན་བུས་འདིའི་ལྟོ་ན་དགྲ་བོ་མཆིས་པ་ཕྱུང་བས། དེས་ན་འདི་ཉལ་བར་གྱུར་གྱིས་འདི་མ་བསླངས་ཤིག་།ཚོང་དཔོན་གྱི་ཆུང་མས་བསམས་པ། འདིའི་དགྲ་བོ་ཅི་འདྲ་བ་ཞིག་ཡིན་པ་དེ་བལྟའོ་སྙམ་ནས། དེས་བརྟག་པར་བརྩམས་པ་དང ། དུས་ལ་བབ་པ་མཐོང་ངོ ། །ཚོང་དཔོན་གྱི་ཆུང་མ་དེ་ལ་བློ་སྐྱེས་པ། འདི་ནི་སྐྱོང་མའི་སྤོབས་པ་མ་ཡིན་གྱི་འདི་ནི་བུ་ཟན་མོའི་བུ་སྡེ་སྣོད་གསུམ་དང་ལྡན་པ་དེའི་སྤོབས་པ་ཡིན་ཏེ། དེས་སྡེ་སྣོད་གསུམ་བཀླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས། ད་ནི་འདིའི་ལུས་ཀྱང་ཞིག་།ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག་།ཁོ་མོ་དང་ལྷན་ཅིག་དགའ་མགུར་སྤྱོད་ཅིག་།ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག་།ཅེས་ཆུང་མ་སྡུག་བསྔལ་གྱི་ཚོར་བས་ཉེན་པ་ངེས་ཚིག་ཏུ་བརྗོད་ནས། དེའི་འོག་ཏུ་གོས་སྔོན་པོ་དང་སེར་པོ་དང་དམར་པོ་དང་དཀར་པོ་དག་གིས་ཁྱོགས་བརྒྱན་ནས་མཉན་ཡོད་ཀྱི་ཕྱི་རོལ་གྱི་དུར་ཁྲོད་དུ་བསྲེགས་ཏེ། དེ་ནས་མྱ་ངན་བསངས་པ་བྱས་ཏེ་འདུག་གོ་།ཆུང་མ་དེ་བར་བར་དུ་ཡང་དེ་སྐད་ཤ་སྟག་ཟེར་བས་དགེ་སློང་སྡེ་སྣོད་གསུམ་པ་དེས་བདག་གི་ཕ་དུས་ལ་བབ་པར་ཐོས་ནས། དེས་བསམས་པ། འདི་ནི་འདུས་བྱས་རྣམས་
Ca186a
༄#། །ཀྱི་ཆོས་ཉིད་ཡིན་མོད་ཀྱི་འོན་ཀྱང་མ་ཡར་མོ་དེའི་མྱ་ངན་བསང་བ་བྱར་འགྲོའོ་སྙམ་ནས། དེ་སོང་བ་དང ། མ་ཡར་མོ་དེས་ཐག་རིང་པོ་ཁོ་ན་ནས་དགེ་སློང་དེ་མཐོང་ངོ ། ། མཐོང་ནས་ཀྱང་ཡང་བུ་ཟན་མོའི་བུ་སྡེ་སྣོད་གསུམ་དང་ལྡན་པས་སྡེ་སྣོད་གསུམ་བཀླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས་ད་ནི་འདིའི་ལུས་ཀྱང་ཞིག། ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག་ཁོ་མོ་དང་ལྷན་ཅིག་དགའ་མགུར་སྤྱོད་ཅིག། ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག་ཅེས་སྨྲ་བར་བརྩམས་པ་དང ། དགེ་སློང་དེ་ཉམ་ང་ནས་དེ་ཉིད་ནས་ཕྱིར་ལོག་གོ་།དེ་བདག་གིས་འཆིར་བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དོ། །ཡང་དགེ་སློང་གིས་ནད་པ་ལ་གང་ཐོས་ན་ནད་པ་འཆི་བར་སེམས་པ་དེ་འདྲ་བའི་ཆོས་བསྟན་པར་མི་བྱའོ། །དགེ་སློང་གིས་ནད་པ་ལ་གང་ཐོས་ན་ནད་པ་འཆི་བར་སེམས་པ་དེ་འདྲ་བའི་ཆོས་སྟོན་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ཡང་རེ་ཞིག་
Ca186b
བྱུང་བ་ཡིན་གྱིས་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་སྤོང་བྱེད་དག་ན་ཆུ་ཀླུང་ཡིད་འོང་ལྡན་གྱི་འགྲམ་ན་སྒྲོན་ཤིང་གི་ཚལ་གསེབ་ན་བཞུགས་སོ། །དེ་ན་བཅོམ་ལྡན་འདས་དགེ་སློང་གི་དགེ་འདུན་ལ། དགེ་སློང་དག་མི་སྡུག་པ་སྒོམས་ཤིག་།མི་སྡུག་པ་བསྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང་མི་སྡུག་པ་སྒོམ་པའི་བསྔགས་པ་བརྗོད་པར་ཡང་མཛད་དོ། །བཅོམ་ལྡན་འདས་ཀྱིས་དགེ་སློང་དག་མི་སྡུག་བ་སྒོམས་ཤིག་།མི་སྡུག་པ་བསྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་གསུངས་པས་དེའི་ཚེ་ན་དགེ་སློང་དག་མི་སྡུག་པ་སྒོམ་པར་བྱེད་དེ། དེ་དག་མི་སྡུག་པ་སྒོམ་པར་བྱེད་པ་དེའི་ཚེ། རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བྱེད་པ་ན་མཚོན་ཡང་འབྱིན་པར་བྱེད། དུག་ཀྱང་ཟ་བར་བྱེད། ཐག་པས་འཆིང་བར་བྱེད་འཆི་བར་བྱེད། གཡང་སར་ཡང་མཆོང་བར་བྱེད་ཅིང་འདི་ལྟར་དགེ་སློང་གིས་ཀྱང་དགེ་སློང་ལ་རྩོལ་བར་བྱེད་དོ། །དེ་ནས་དགེ་སློང་གཞན་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བྱེད་པ་ན་རི་དྭགས་ཟློག་དགེ་སྦྱོང་
Ca187a
༄#། །སྦེད་ག་ལ་བ་དེར་སོང་སྟེ་ཕྱིན་ནས་རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟང་ཚུར་ཤོག་།ཁོ་བོ་སྲོག་དང་ཕྲོལ་ཅིག་དང ། ཁོ་བོའི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་རོ། །དེ་ནས་རི་དྭགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་ཁྱེར་ཏེ་ཆུ་ཀླུང་ཡིད་འོང་ལྡན་ག་ལ་བ་དེར་སོང་ནས་ཕྱིན་པ་དང ། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་འདུག་སྟེ་རལ་གྲི་ཁྲག་གིས་གོས་པ་འཁྲུ་བར་བྱེད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་འདུག་ནས། རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟང་ལེགས་སོ་ལེགས་སོ། །འདི་ལྟར་ཁྱོད་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང ། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ། ། དེ་ལྟར་དེ་ལ་རི་དྭགས་ཟློག་དགེ་སྦྱོང་སྦེད་འདི་སྙམ་དུ་འདི་ལྟར་བདག་དགེ་སྦྱོང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་པར་བྱེད།
Ca187b
དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་མོད་བདག་ལ་བསོད་ནམས་མང་དུ་སྐྱེ་ཞིང ། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་བདག་གིར་འགྱུར་བ་འདི་ཡང་བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དྭགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་གིས་ཁྱེར་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང ། ལམ་གོལ་བར་རྗེས་སུ་རྒྱུ་བ་ན། དགེ་སློང་དེ་དང་དེ་དག་མཐོང་ནས་འདི་སྐད་ཅེས་སྨྲས་སོ། །དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ། མ་རྒལ་བ་རྒལ་བར་བྱ་བ། མ་གྲོལ་བ་དགྲོལ་བར་བྱ་བ།་དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན། དེས་ན་དགེ་སློང་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང་སྨོད་པ་ན་གནས་ནས་ཕྱིར་ཕྱུང་སྟེ་རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟང་བདག་མ་རྒལ་བ་ཡིན་གྱིས་སྒྲོལ་ཅིག་།བདག་མ་གྲོལ་བ་ཡིན་གྱིས་ཁྲོལ་ཅིག་།བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཞིག་།བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལས་ཟློས་ཤིག་།དེ་ནས་རི་དྭགས་ཟློག་དགེ་སྦྱོང་སྦེད་ཀྱིས་
Ca188a
༄#། །དགེ་སློང་དེ་སྲོག་དང་བྲལ་བར་བྱས་ཏེ་དེ་བཞིན་དུ་གཉིས་དང་གསུམ་ནས་དགེ་སློང་དྲུག་ཅུའི་བར་དག་སྲོག་དང་བྲལ་བར་བྱས་སོ། །དེའི་ཚེ་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྡོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་ཏོ། །དེ་ནས་བཅོམ་ལྡན་འདས་དེ་ཉིད་ཀྱི་ཚེས་བཅོ་ལྔའི་གསོ་སྦྱོང་ལ་དགེ་སློང་གི་དགེ་འདུན་གྱི་གུང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་འཁོར་ཐམས་ཅད་ལ་རྣམ་པར་གཟིགས་ཏེ། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྡོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་དུས་གཅིག་ན་བཅོམ་ལྡན་འདས་དགེ་སློང་གི་དགེ་འདུན་ལ་དགེ་སློང་དག་མི་སྡུག་པ་སྒོམས་ཤིག་།མི་སྡུག་པ་སྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང་མི་སྡུག་པ་སྒོམ་པའི་བསྔགས་པ་བརྗོད་པར་ཡང་མཛད་དོ། །དེའི་ཚེ་ན་དགེ་སློང་དག་མི་སྡུག་པ་སྒོམ་པར་བགྱིད་དེ། དེ་དག་མི་སྡུག་པ་སྒོམ་པར་བགྱིད་པའི་ཚེ་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བགྱིད་པ་ན་མཚོན་ཡང་འབྱིན་པར་བགྱིད། དུག་ཀྱང་འཚལ་བར་བགྱིད། ཐག་པས་འཆིང་བས་ཀྱང་འགུམ་པར་བགྱིད།
Ca188b
གཡང་སར་ཡང་མཆོང་བར་བགྱིད་ཅིང ། དགེ་སློང་གིས་ཀྱང་དགེ་སློང་ལ་རྩོལ་བར་བགྱིད་དོ། །དེ་ནས་དགེ་སློང་གཞན་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བགྱིད་པ་ན། རི་དྭགས་ཟློག་དགེ་སྦྱོང་སྦེད་ག་ལ་བ་དེར་མཆིས་ཏེ་ཕྱིན་ནས། རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས། བཞིན་བཟང་ཚུར་ཤོག་།ཁོ་བོ་སྲོག་དང་ཕྲོལ་ཅིག་དང ། ཁོ་བོའི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་རོ་ཞེས་མཆིའོ། །དེ་ནས་རི་དྭགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་འཚལ་ཏེ། ཆུ་ཀླུང་ཡིད་འོང་ལྡན་ག་ལ་བ་དེར་མཆིས་ནས་ཕྱིན་པ་དང ། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་མཆིས་ཏེ། རལ་གྲི་ཁྲག་གིས་གོས་པ་འཁྲུ་བར་བགྱིད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་མཆིས་ནས་རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས་བཞིན་བཟང་ལེགས་སོ་ལེགས་སོ། །འདི་ལྟར་ཁྱོད་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་བ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང ། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ་ཞེས་མཆི་ནས། དེ་
Ca189a
༄#། །ལྟར་དེ་ལ་རི་དྭགས་ཟློག་དགེ་སྦྱོང་སྦེད་འདི་སྙམ་དུ། ད་ལྟར་བདག་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་མོད། བདག་ལ་བསོད་ནམས་མང་དུ་སྐྱེ་ཞིང་དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་བདག་གིར་འགྱུར་བ་འདི་ཡང་བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དྭགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་གིས་འཚལ་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང ། ཤུལ་གོལ་བ་རྗེས་སུ་རྒྱུ་བ་ན། དགེ་སྦྱོང་དེ་དང་དེ་དག་མཐོང་ནས་འདི་སྐད་ཅེས་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ། མ་རྒལ་བ་རྒལ་བར་བྱ་བ། མ་གྲོལ་བ་གྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ།་ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན་ཞེས་མཆིའོ། །དེ་ནས་དགེ་སློང་ཞིག་རྣག་གི་ལུས་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པ་ན་གནས་ནས་སླར་བྱུང་སྟེ་རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས། བཞིན་བཟང་བདག་མ་རྒལ་བ་ཡིན་གྱིས་སྒྲོལ་ཅིག་།བདག་མ་གྲོལ་བ་ཡིན་གྱིས་ཁྲོལ་ཅིག །
Ca189b
བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཞིག་།བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལ་ཟློས་ཤིག་ཅེས་མཆིའོ། །དེ་ནས་རི་དྭགས་ཟློག་དགེ་སྦྱོང་སྦེད་ཀྱི་དགེ་སློང་དེ་སྲོག་དང་བྲལ་བར་བགྱིས་ཏེ། དེ་བཞིན་དུ་གཉིས་དང་གསུམ་ནས་དགེ་སློང་དྲུག་ཅུའི་བར་དག་སྲོག་དང་བྲལ་བར་བགྱིས་པས། བཙུན་པ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྡོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དགེ་སློང་ཡང་དགེ་སློང་ལ་རྩོལ་བ་བྱེད་དམ། བཙུན་པ་རྩོལ་བར་བགྱིད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ་ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་སྨད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ་དགེ་འདུན་བསྡུ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང ། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་
Ca190a
༄#། །བའི་ཕྱིར་དང ། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མིའམ་མིར་ཆགས་པ་ལ་བསམས་བཞིན་དུ་རང་གི་ལག་བདར་ཏེ་སྲོག་བཅད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས་ཀྱེ་མི་ཁྱེད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་ཟེར་ཞིང་སེམས་ཀྱི་འདོད་པ་དང ། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེའང་རྩོམ་པ་དེས་དུས་བྱས་ན་དགེ་སློང་དེའང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི། དགེ་སློང་རྣམ་པ་བཞི་པོ་མིང་གི་དགེ་སློང་དང ། ཁས་འཆེ་བའི་དགེ་སློང་དང ། སློང་བའི་ཕྱིར་དགེ་སློང་དང ། ཉོན་མོངས་པ་བཅོམ་པའི་ཕྱིར་དགེ་སློང་ལས། མིང་གི་དགེ་སློང་གང་ཞེ་ན། གང་གི་མིང་དང་མིང་དུ་བརྗོད་པ་དང ། ཚིག་གཉིས་པ་དང ། ཚིག་བླ་དྭགས་དང ། འདུ་ཤེས་དང ། བོད་པ་དང ། གདགས་པ་དང་ཐ་སྙད་
Ca190b
དགེ་སློང་ཞེའམ། དགེ་སློང་གི་རིགས་ཤེའམ་དགེ་སློང་དང་འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་ཞེས་བྱའོ། །ཁས་འཆེ་བའི་དགེ་སློང་གང་ཞེ་ན། གང་དགེ་སློང་མ་ཡིན་བཞིན་དུ་བདག་ཉིད་དགེ་སློང་ངོ་ཞེས་ཁས་འཆེ་བར་བྱེད་པ་དང ། རྐུ་ཐབས་སུ་གནས་ཤིང་དགེ་སློང་དུ་དམ་འཆའ་བར་བྱེད་པ་དེ་ནི་ཁས་འཆེ་བའི་དགེ་སློང་ཞེས་བྱའོ། །སློང་བའི་ཕྱིར་དགེ་སློང་གང་ཞེ་ན། གང་ཆོས་དང་ལྡན་པས་སློང་མོ་སྤྱོད་པས་འཚོ་བར་བྱེད་པ་དེ་ནི་སློང་བའི་ཕྱིར་དགེ་སློང་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་གང་ཞེ་ན། གང་གི་ཟག་པ་ཀུན་ནས་ཉོན་མོངས་པར་བྱེད་པ་ཡང་སྲིད་པར་བྱེད་པར་རིམས་ནད་དང་བཅས་པ་རྣམ་པར་སྨིན་པ་སྡུག་བསྔལ་བ་ཕྱི་མ་ལ་སྐྱེ་བ་དང ། རྒ་བ་དང ། འཆི་བར་འགྱུར་བ་གང་དག་ཡིན་པ་དེ་དག་སྤངས་པ་དང ། ཡོངས་སུ་ཤེས་པ་དང ། རྩ་བ་ནས་བཅད་པ་དང ། ཤིང་ཏཱ་ལའི་མགོ་བཞིན་དུ་གཞི་མི་སྣང་བ་དང ། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་ནི་ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །དོན་འདིར་ནི་གསོལ་བ་དང་གཞིའི་ལས་མི་གཡོ་བ་བཞག་པར་མི་འོས་པས་བསྙེན་པར་རྫོགས་པ་གང་ཡི་པ་དེ་དགེ་སློང་དུ་དགོངས་ཏེ། དེས་ན་ཡང་དགེ་སློང་གང་ཞེས་གསུངས་སོ། །མི་འམ་ཞེས་བྱ་བ་ནི། གང་གིས་མའི་ལྟོར་དབང་པོ་དྲུག་པོ་འདི་ལྟ་སྟེ། མིག་གི་དབང་པོ་དང ། རྣ་བའི་དབང་པོ་དང ། སྣའི་དབང་པོ་དང ། ལྕེའི་དབང་པོ་དང ། ལུས་ཀྱི་དབང་པོ་དང ། ཡིད་ཀྱི་དབང་པོ་ཐོབ་པར་གྱུར་པའོ། །མིར་ཆགས་
Ca191a
༄#། །པ་ལ་ཞེས་བྱ་བ་ནི། གང་གིས་མའི་ལྟོར་དབང་པོ་གསུམ་པོ་འདི་ལྟ་སྟེ། ལུས་ཀྱི་དབང་པོ་དང ། ཚོར་བའི་དབང་པོ་དང ། ཡིད་ཀྱི་དབང་པོ་ཐོབ་པར་གྱུར་པ་ལའོ། །བསམས་བཞིན་དུ་ཞེས་བྱ་བ་ནི་རྣམ་པར་བརྟགས་པ་ནས་སོ། །རང་གི་ལག་དར་ཏེ་ཞེས་བྱ་བ་ནི་ལག་པས་ལག་དར་ཏེའོ། །སྲོག་བཅད་དམ་ཞེས་བྱ་བ་ནི་དེའི་སྲོག་བཅད་པར་གྱུར་ནའོ། །དེ་ལ་མཚོན་བྱིན་ནམ་ཞེས་བྱ་བ་ནི། རལ་གྲིའམ་སྤུ་གྲིའམ་ཆུ་གྲིའོ། །དེ་ལ་མཚོན་ཐོགས་པ་གཉེར་ཏམ་ཞེས་བྱ་བ་ནི། སྐྱེས་པའམ། བ