Wylie

e-texts based on the ACIP/ALL Input

རྒྱ་གར་སྐད་དུ། ཏྲི་རཏན་སྟོ་སྟྲ་བྷི་ཏི། བོད་སྐད་དུ། དཀོན་མཆོག་གསུམ་ལ་བསྟོད་པའི་འགྲེལ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །སྲིད་པ་གསུམ་གྱི་བླ་མ་དཀོན་མཆོག་གསུམ་ལ་ཕྱག་འཚལ་བ་ལ་སོགས་པ་ནི་འགྲོ་བ་རྣམས་ཀྱི་མངོན ་པར་འདོད་པའི་འབྲས་བུ་མཛའ་དག་བསྐྱེད་པའི་རྒྱུ་ཡིན་པས་ན་དེའི་ཕྱིར་དེ་དག་ལ་ཕྱག་འཚལ་བ། སངས་རྒྱས་གཙོ་ལ་ཕྱག་འཚལ་ལོ་ཞེས་བྱ་བ་ལ་སོགས་པ་གསུངས་ཏེ། །མ་འདྲེས་པ་དང་མཚུངས་པར་ལྡན་པའི་མ་རིག་པ་དག་མ་ལུས་པར་སྤངས་པ་ནི་སངས་པ་སྟེ། ་གཉིད་རབ་ཏུ་སངས་པ་བཞིན་ནོ། །ཡང་ན་ཉོན་མོངས་པ་ཅན་མ་ཡིན་པའི་མི་ཤེས་པ་སྤངས་པས་ཤེས་བྱ་མཛའ་དག་ལ་བློ་རྒྱས་པས་རྒྱས་པ་སྟེ། པདྨ་རབ་ཏུ་རྒྱས་པ་ལྟ་བུའོ། །དེ་ལྟར་དེ་དག་ནི་སྤངས་པ་དང། །ཡེ་ཤེས་ཕུན་སུམ་ཚོགས་པས་བསྟོད་པ་སྟེ། ཉིད་ཀྱི ་དོན་ཕུན་སུམ་ཚོགས་པའོ། །གཞན་གྱི་དོན་ཕུན་སུམ་ཚོགས་པའི་དབང་དུ་བྱས་ཏེ། གཙོ་ཞེས་སྨོས་པ་ལས་ས་གསུམ་དབང་ཕྱུག་ཆེན་པོར་གྱུར་པས་ན་གཙོ་བོ་སྟེ། དེ་དག་མ་ལུས་པ་གནོན་པས་ལྕི་བར་གྱུར་པ་ནི། གཟུགས་ལ་ལ་ལྕི་བར་གྱུར་པ་ནི་སྲང་གི ་མགོ་མནོན་པ་ལྟ་བུའོ། །དེས་ནི་ཐམས་ཅད་ཟིལ་གྱིས་མནན་ནས་འདུལ་ཞེས་བསྟན་པར་འགྱུར་རོ། །ཡང་ན་ཕྱིན་ཅི་མ་ལོག་པའི་ཡོན་ཏན་རིན་པོ་ཆེ་སྦྱིན་པས་ན་བླ་མ་སྟེ། དེ་ལ་ཕྱག་འཚལ་ལོ་ཞེས་བྱ་བ་ནི་སྒོ་གསུམ་གྱིས་རབ་ཏུ་འདུད་པའོ། །སྐྱོབ་པ་ཆོས་ལ ་ཕྱག་འཚལ་ལོ་ཞེས་བྱ་བ་ནི། འདིས་ངན་འགྲོ་དང་སྲིད་པར་སྡུག་བསྔལ་བ་ལས་སྐྱོབ་ཅིང་སྡུག་བསྔལ་སེལ་ལ་བདེ་བ་སྦྱིན་པས་ན་སྐྱོབ་པ་ཞེས་བྱའོ། །དེ་ཉིད་ཀྱིས་ན་ཆོས་ཏེ་རྣམ་པར་ལྟུང་བ་ལས་འཛིན་པས་སོ། །དེ་ཡང་གང་གིས་དོན་དམ་པའི་ཆོས་དེ་རྟོགས ་ནས། སླར་ངན་སོང་དང་འཁོར་བར་མི་ལྟུང་བའི་ཕྱིར་རོ། །དེ་རྟོགས་པའི་རྒྱུད་པའི་རྒྱུ་ནི་བསྟན་པའི་ཆོས་ཡིན་ལ། དངོས་ཀྱི་རྒྱུ་ནི་ལམ་གྱི་ཆོས་ཡིན་པས་དེ་དག་ལའང་བཏགས་ཏེ་འཛིན་པ་ཞེས་བརྗོད་དོ། །ཡང་ན་སྐྱོབ་པ་ཞེས་བྱ་བས་ནི་གཞན་ལ་ཕན་འདོགས་པ་ཕུན ་སུམ་ཚོགས་པ་བསྟན་ལ། ཆོས་ཞེས་བྱ་བས་ནི་རང་གི་མཚན་ཉིད་རྣམ་པར་དག་པ་འཛིན་པ་ཕུན་སུམ་ཚོགས་པ་བསྟན་ཏོ། །དེ་ལ་ཕྱག་འཚལ་ལོ་ཞེས་བྱ་བ་ནི་སྔ་མ་བཞིན་ནོ། །དགེ་འདུན་ཆེ་ལ་ཕྱག་འཚལ་ལོ་ཞེས་བྱ་བ་ལ། འདི་དག་ནི ་ལྷའི་བུའི་བདུད་དག་གིས་ཀྱང་སྟོན་པ་དང་ལྟ་བ་མི་ཕྱེད་པས་ན་དགེ་འདུན་ཏེ། དེ་ལ་སྟོན་པ་མི་ཕྱེད་པ་ནི་ཤེས་ནས་དད་པ་ཐོབ་པས་སོ། །ལྟ་བ་མི་ཕྱེད་པ་ནི་བདག་མེད་པའི་ཡེ་ཤེས་རྣམ་པར་དགེ་བ་ཐོབ་པའི་ཕྱིར་རོ། །དེ་ཡང་ཉན་ཐོས་དང་རང་རྒྱལ་བ་དང། བྱང་ཆུབ་སེམས ་དཔའ་ཡང་རུང་སྟེ། ཀུན་ཏུ་སྦྱོར་བ་གསུམ་སྤངས་པའི་འཕགས་པ་རྣམས་ནི་སློབ་པ་དང། མི་སློབ་པ་ཡང་རུང་སྟེ། དགེ་འདུན་ནོ། །ཡང་དག་པར་རྫོགས་པའི་སངས་རྒྱས་ནི་ཤེས་བྱའི་སྒྲིབ་པ་མཛའ་དག་ཀྱང་སྤངས་ལ། །བསོད་ནམས་ཀྱི་ཚོགས་མཛའ་དག་ཀྱང་རྫོགས ་པས། དགེ་འདུན་གྱི་ནང་དུ་དྲང་བར་བྱ་བ་མ་ཡིན་ལ། །ས་གསུམ་གྱི་འགྲོ་བ་དམ་པ་དང། སློབ་པ་དང་མི་སློབ་པ་ཐམས་ཅད་ཀྱིས་མཆོད་པར་འོས་པས་དགྲ་བཅོམ་པ་ཆེན་པོ་ཞེས་བྱའོ། །དེ་ལྟར་མི་ཕྱེད་པ་ནི་རང་གི་དོན་ཐོབ་པ་ཡིན་ལ། གཞན་གྱི་དོན་ཐོབ་པར་བྱེད ་པའི་ཕྱིར་ན་ཆེ་ཞེས་སྨོས་ཏེ། འདི་དག་གཞན་གྱི་ཡོན་སྦྱོང་བ་ཆེ་བས་ན་ཆེན་པོ་སྟེ། ཕུལ་བ་དང་ཡོངས་སུ་ལོངས་སྤྱད་པ་གཉིས་ཀྱིས་འགྲོ་བའི་རྫས་ལས་བྱུང་བའི་བསོད་ནམས་མཆོག་འཕེལ་བའི་ཕྱིར་ཏེ། དེ་ཡང་སློབ་པ་དང་མི་སློབ་པ་དེ་དག་ཅི་རིགས་པར་སྲེད་པས་ཆ་ཤས ་ལྷག་མ་ལུས་པས་ཟས་དང་གོས་ལ་སོགས་པ་ལ་འདུན་པའི་འདོད་ཆགས་ཕྲ་མོ་བསྒོམ་པས་སྤང་བར་བྱ་བ་ཡོད་པ་དང། སྔོན་གྱི་རྣམ་པར་སྨིན་པའི་འབྲས་བུ་ཕུང་པོ་ལྔ་འཛིན་པ་ཟས་ལ་སོགས་པས་ད་དུང་གསོ་དགོས་པས་ལོངས་སྤྱོད་ཀྱི། སངས་རྒྱས་དང། ཆོས ་ནི་དེ་ལྟར་མ་ཡིན་པས་སོ། །དེ་དག་ལ་ཕྱག་འཚལ་ལོ་ཞེས་བྱ་བ་ནི་སྔ་མ་དང་འདྲའོ། །གསུམ་ལ་རྟག་ཏུ་བདག་ཕྱག་འཚལ། །ཞེས་བྱ་བ་ནི་དོན་གོ་སླའོ། །དེ་ལྟར་ཕྱག་འཚལ་བའི་རྣམ་པར་སྨིན་པའི་འབྲས་བུ་ནི་སངས་རྒྱས་ཀྱི་མཚན་བཟང་པོ་ཐམས་ཅད་ཀྱི་གཙོ་བོ་སྤྱི ་གཙུག་ལྟར་མི་མཐོང་བ་འཐོབ་པའོ། །རྒྱུ་མཐུན་པའི་འབྲས་བུ་ནི་འཁོར་བར་སྐྱེས་པ་ན་མགོ་བོ་གདུགས་ལྟ་བུར་འགྱུར་བ་དང། དཀོན་མཆོག་གསུམ་ལ་ཕྱག་འཚལ་བ་ལ་དགའ་བར་འགྱུར་བའོ། །དབང་གི་འབྲས་བུ་ནི་ཕྱི་རོལ་གྱི་དངོས་པོ་ཡིད་དུ་འོང་བ་རྣམས་དེའི་ཤེས་པའི ་ཡུལ་དུ་འདུད་པ་ལྟར་སྣང་ཞིང་འགྱེད་པ་དང། གཟུང་དུ་མི་རུང་བ་ལྟར་སྣང་བར་མི་འགྱུར་བའོ། །དེ་ལྟར་དཀོན་མཆོག་གསུམ་ལ་བསྟོད་པ་མདོར་གསུངས་པ་དེ་དག་རབ་ཏུ་གསལ་བར་བསྟན་པས་འགྲོ་བ་དམ་པ་རྣམས་དེ་བས་ཀྱང་ཤས་ཆེར་དད་པར་བྱས་པ་དང། རང་གི ་ཚོགས་དྲི་མ་མེད་པ་བསགས་པའི་ཕྱིར། སློབ་དཔོན་མ་ཏི་ཙི་ཏྲའི་ཞལ་སྔ་ནས་བསྟོད་པ་རྒྱས་པ་གསུངས་པ། ཚོགས་ཆེན་གཉིས་རྫོགས་མཁྱེན་བཞི་སྐུ་གསུམ་གྲུབ། ཅེས་བྱ་བ་ལ་སོགས་པ་བརྗོད་པ་ཡིན་ཏེ། འདིས་རྫོགས་པར་བྱེད་པས་ན་ཚོགས་དེ་སྦྱིན་པ་ལ་སོགས ་པ་ཕ་རོལ་ཏུ་ཕྱིན་པ་དྲུག་གོ་།དེ་བདག་ཉིད་ཆེན་པོ་སྟེ་རང་བཞིན་དཔག་ཏུ་མེད་པ་དང། བསྐལ་པ་དཔག་ཏུ་མེད་པ་དང། ཡུལ་དཔག་ཏུ་མེད་པ་ལ་སོགས་པའོ། །གཉིས་ཞེས་བྱ་བ་ནི་བསོད་ནམས་དང་ཡེ་ཤེས་སོ། །དེ་ཡང་སྦྱིན་པ་དང་ཚུལ་ཁྲིམས་དང་བཟོད་པ་ནི ་བསོད་ནམས་ཏེ། བསམ་གཏན་དང་ཤེས་རབ་ནི་ཡེ་ཤེས་སོ། །བརྩོན་འགྲུས་ནི་གཉི་གར་གཏོགས་སོ་ཞེས་འཕགས་པ་དགོངས་པ་ངེས་པར་འགྲེལ་པ་ལས་གསུངས་སོ། །དེ་གཉིས་རྫོགས་པ་ནི་བསྐལ་པ་ཆེན་པོ་གྲངས་མེད་པར་དང་པོ་སྦྱོར་བའི་ལམ་སྦྱངས་ཤིང། ་གཉིས་པར་ས་བདུན་པའི་བར་དང། གསུམ་པར་ས་བཅུ་པའི་བར་སྦྱངས་ཤིང་དག་པར་བྱས་པ་ནི། རྫོགས་ཤིང་མཐར་ཐུག་པའོ། །དེས་རྒྱུ་ཁྱད་པར་ཅན་བསགས་པ་བསྟན་ནས། ད་ནི་འབྲས་བུ་བསྟན་པའི་ཕྱིར་མཁྱེན་བཞི་ཞེས་བྱ་བ་ལ་སོགས་པ་སྨོས་ཏེ། །མཁྱེན ་པ་བཞི་ནི་མེ་ལོང་ལྟ་བུའི་ཡེ་ཤེས་ལ་སོགས་པ་བཞི་འོ། །དེ་ལ་མེ་ལོང་ལྟ་བུའི་ཡེ་ཤེས་ནི་ཀུན་བཞི་རྣམ་ཤེས་གནས་གྱུར་པ། ཤེས་བྱ་ཐམས་ཅད་ལ་སོགས་པ་མེད་པ་མཁྱེན་པའི་ཡེ་ཤེས་སོ། །མཉམ་པ་ཉིད་ཀྱི་ཡེ་ཤེས་ནི་ཉོན་མོངས་པ་ཅན་གྱི་ཡིད་གནས ་གྱུར་པ། བདག་མེད་པ་ལས་བདག་མེད་པར་མཁྱེན་པའི་ཡེ་ཤེས་སོ། །སོ་སོར་རྟོག་པའི་ཡེ་ཤེས་ནི་ཡིད་ཀྱི་རྣམ་པར་ཤེས་པ་གནས་གྱུར་པ་ཀུན་རྫོབ་ཀྱི་དངོས་པོ་མ་ལུས་པ་པདྨའི་འདབ་མ་ལྟར་མ་འབྲེལ་བར་མཁྱེན་པའོ། །བྱ་བ་སྒྲུབ་པའི་ཡེ་ཤེས ་ནི་སྒོ་ལྔ་རྣམ་པར་ཤེས་པ་གནས་གྱུར་པ་འགྲོ་བ་རྣམས་གདུལ་པའི་བྱ་བ་གང་ཡིན་པ་མ་ལུས་པར་མཛོད་མཁྱེན་པའོ། །དེ་དག་བསྡུས་པ་ནི་སྐུ་གསུམ་གྲུབ་ཅེས་བྱ་བས་བསྟན་ཏེ། དེ་ཡང་བསོད་ནམས་ཀྱི་ཚོགས་ཆེན་པོའི་འབྲས་བུས་ནི་གཟུགས་སྐུ་གཉིས་འགྲུབ ་ལ། །ཡེ་ཤེས་ཀྱི་ཚོགས་ཆེན་པོའི་འབྲས་བུས་ནི་ཆོས་ཀྱི་སྐུ་འགྲུབ་བོ། །དེ་ལ་མེ་ལྟ་བུའི་ཡེ་ཤེས་ནི་ཆོས་ཀྱི་སྐུ་སྟེ། གཟུང་བ་དང་འཛིན་པ་ལས་གྲོལ་ལ་རང་བཞིན་གྱིས་འོད་གསལ་བ་ཙམ་གྱི་ཡེ་ཤེས་སོ། །དེའི་ཆོས་ཏེ་སྟོབས་བཅུ་དང་མི་འཇིགས་པ་བཞི་པ ་སོགས་པ་ཡེ་ཤེས་ཐ་དད་པ་དུ་མ་ཚོགས་པས་ན་ཆོས་ཀྱི་སྐུ་ཞེས་བྱ་བ་ནི། །ཀ་ཡའི་སྒྲ་ཚོགས་ལ་འཇུག་པས་སོ། །ཡེ་ཤེས་དེ་ཡང་དངོས་སུ་ན་ལོངས་སྤྱོད་རྫོགས་པའི་སྐུའི་ཐུགས་གཉིས་སུ་མེད་པའི་ཡེ་ཤེས་སོ། །སོ་སོར་རྟོག་པ་དང་མཉམ་པ་ཉིད་ཀྱི་ཡེ་ཤེས་ནི ་ལོངས་སྤྱོད་རྫོགས་པའི་སྐུ་སྟེ། དེ་ཡང་སྐུ་དེའི་ནང་གི་ཡེ་ཤེས་སྐྱེ་མཆེད་ཐ་དད་པ་ལ་རག་ལས་པ་ལས་གྲོལ་བ་ཀུན་རྫོབ་སྣ་ཚོགས་མཁྱེན་པ་དང། བདག་མེད་པ་ལ་བདག་མེད་པར་མཁྱེན་པ་རྣམ་པར་དག་པའོ། །བྱ་བ་སྒྲུབ་པའི་ཡེ་ཤེས་ནི་སྤྲུལ་པའི་སྐུ་སྟེ ་ལོངས་སྤྱོད་རྫོགས་པའི་སྐུའི་སྐྱེ་མཆེད་ཐ་དད་པ་ལས་སྐྱེ་བ་འོད་ཟེར་གྱི་རྣམ་པར་སྣང་བས་འདོད་པའི་ཁམས་ལ་སོགས་པར། །ཤཱཀྱ་ཐུབ་པ་ལ་སོགས་པའི་སྐུར་སྣང་བས་གང་འདུལ་བར་འོས་པ་འདུལ་བའོ། །དེ་ནས་འདིར་སངས་རྒྱས་རྣམས་ཀྱི་སྐུ་ཐམས་ཅད ་ཀྱི་གཞི་ནི་རྣམ་པར་སྨིན་པའི་སྐུ་སྟེ། དེའི་མེ་ཏོག་པའི་ཡེ་ཤེས་དང་སྒོ་ལྔའི་ཡེ་ཤེས་ཀྱི་འོད་ཟེར་གྱི་སྣང་བ་ལས་ཆོས་དང་སྤྲུལ་པའི་སྐུར་བཞག་ཅིང་དེ་གཉིས་ཀྱི་རྟེན་ཡེ་ཤེས་གཉིས་དང་བཅས་པ་དེ་ཉིད་ལོངས་སྤྱོད་རྫོགས་པའི་སྐུ་ཞེས་བརྗོད་དོ། །ཡོད ་ནི་བསོད་ནམས་ཀྱི་ཚོགས་མཛའ་ཡས་པ་ལས་གྲུབ་པའི་ལུས་ཁྱད་པར་ཅན་དང། དེའི་འོད་ཟེར་གཟུགས་ཁྱད་པར་ཅན་སྣང་བའི་གཟུགས་ཀྱི་སྐུ་གཉིས་ཏེ། གང་མིག་གི་ཡུལ་དུ་གྱུར་པ་དེ་ཉིད་གཟུགས་སོ། །རང་བཞིན་གྱིས་འོད་གསལ་བའི་སྣང་བའི་ཡེ་ཤེས་ནི ་གཙོ་བོ་སྟེ། སྣ་ཚོགས་ཤེས་པ་དང་བདག་མེད་པར་ཤེས་པ་ཡང་ཡེ་ཤེས་ཀྱི་ཚོགས་ལས་བྱུང་བར་བརྗོད་པར་བྱའོ། །དེ་ལས་གཞན་པ་བདག་མེད་པ་ཙམ་དེ་ནི་དམ་པའི་ཆོས་དཀོན་མཆོག་དུ་བཞག་གིས་སངས་རྒྱས་སུ་མི་བཞག་སྟེ། དེ་ནི་རྒྱལ་བ་རྣམས་ཀྱི ་ཡེ་ཤེས་ཀྱི་ཡུལ་ཡིན་ལ། ཐོབ་པར་བྱ་བའི་འབྲས་བུར་བཞག་པར་བྱའོ། །དེས་ན་རང་གི་མཚན་ཉིད་དང་ལྡན་པའི་སྐུ་ནི་གསུམ་ཁོ་ནར་བརྗོད་པར་བྱའོ། །ང་ནི་སྐུ་གསུམ་པོ་དེ་དག་ཉིད་ལས་དཔེ་དང་མཚན་ཉིད་ཀྱིས་གསལ་བར་བསྟན་པའི་ཕྱིར། རྣམ་རྟོག ་མི་མངའ་ཅི་ཡང་ས་ལེ་མཁྱེན་ཅེས་བྱ་བ་ལ་སོགས་པ་གསུངས་ཏེ། རྣམ་པར་རྟོག་པའི་རིགས་གསུམ་འམ། བཞི་དང་བྲལ་བའི་ཕྱིར་རྣམ་རྟོག་མི་མངའ་བ་སྟེ། གཉིས་སུ་འཛིན་པ་མཛའ་དག་དྲུངས་ནས་ཕྱུང་བའི་ཡེ་ཤེས་ཆེན་པོའོ། །དེའི་ཕྱིར་མི་མངའ་ཞེས ་བྱ་བའི་དགག་པ་འདི་ནི་མ་ཡིན་པར་དགག་པ་སྟེ། རྣམ་པར་རྟོག་པའི་རིགས་དེ་དག་ནི་ཡོད་པ་མ་ཡིན་ལ། དེས་དབེན་པའི་ཡེ་ཤེས་རང་བཞིན་གྱིས་འོད་གསལ་བ་ནི་མངའ་བའོ། །དེས་ན་ཅིའང་སྟེ་ཅིའང་རུང་རྡུལ་ཕྲ་རབ་དང་རི་རབ་ལ་སོགས་པ་དེ་དག་ས་ལེ ་ཞེས་བྱ་བ་རབ་ཏུ་གསལ་བར་མཁྱེན་ཅིང་བ་སྟེ། ཅི་ལྟར་མཁྱེན་ཅེ་ན། སྒྲ་སྤྱིའི་རྣམ་པར་རྟོག་པས་སྒྲོ་བཏགས་པ་དང། བསྐུར་བ་བཏབ་པ་དང། བྲལ་ཞིང་ཕན་ཚུན་མི་སྒྲིབ་པ་ཐོགས་པ་མེད་ཅིང་མུན་པ་མེད་ལ་ཤེལ་དང་ལྷང་ཆོར་ལྟར་གསལ་བའི་རྣམ ་པར་དབྱེར་མེད་པ་མཁྱེན་ཏེ། དེ་ཉིད་ཡེ་ཤེས་དེའི་ལས་ཡིན་ནོ། །དེའི་དཔེ་བསྟན་པ་ནི་ཆོས་སྐུ་མཁའ་འདྲ་ཞེས་བྱ་བ་སྟེ། འདུས་མ་བྱས་ནམ་མཁའ་ཐོགས་པ་མེད་ཅིང་མི་སྒྲིབ་པ་ལྟར་མེ་ལོང་ལྟ་བུའི་ཡེ་ཤེས་ཀྱང་ཤེས་བྱ་ཐམས་ཅད་ལ་ཐོགས་པ་མེད་ཅིང ་སྒྲིབ་པ་མེད་ལ། དམིགས་པ་དང་རྣམ་པར་ཡོངས་སུ་མ་ཆད་པར་སྣང་བའོ་ཞེས་བྱ་བའི་དོན་ཏོ། །འདིར་ཡེ་ཤེས་ལྷག་མ་གསུམ་ནི་གཟུགས་ལ་སོགས་པ་དང། གང་ཟག་ལ་བདག་མེད་པ་ཙམ་དང། འདུལ་བའི་འགྲོ་བའི་བསམ ་པ་དང། བག་ལ་ཉལ་ལ་ཐོགས་པ་དང། འདུལ་བའི་ཐབས་ཤེས་པ་ལ་ཡུལ་སོ་སོར་ངེས་པའི་ཡེ་ཤེས་ཡིན་ལ། ཡེ་ཤེས་འདི་ནི་ཡུལ་དེ་དག་དང་བཅས་པའི་ཡེ་ཤེས་དེ་དག་ཉིད་ཀྱང་ཆོས་ཅན་དུ་གྱུར་པ་དང། དེའི་ཆོས་ཉིད་ལ་རང་བཞིན་གྱིས་འོད ་གསལ་བའི་སྤྱིའི་མཚན་ཉིད་དུ་གྱུར་བ་སྟེ། ཆོས་ཅན་དང་ཆོས་ཉིད་དུ་བཅས་པ་མཛའ་དག་མཁྱེན་པར་གྱུར་པའོ། །གཟུགས་སྐུ་མཛེས་སྐུར་ལྡན་ཞེས་བྱ་བ་ནི་མཚན་དང་དཔེ་བྱད་རབ་ཏུ་འབར་བའི་ལོངས་སྤྱོད་རྫོགས་པ་དང། སྤྲུལ་པའི་སྐུའོ། །སངས ་རྒྱས་ཀྱི་དོན་ནི་སྔར་བསྟན་པ་བཞིན་ནོ། །དཔག་བསམ་འདྲ་ཞེས་བྱ་བ་ནི་སྐུ་གསུམ་ཆར་གྱི་དཔེ་སྟེ། འགྲོ་བ་རྣམས་ཀྱིས་དཔག་ཤིང་བསམ་པ་ལྟར་ཡིད་ལ་རེ་བ་ཡོངས་སུ་རྫོགས་པར་བྱེད་པས་ན། ལྷའི་དཔག་བསམ་གྱི་ཤིང་ཆེན་པོ་རྣམ་པ་བཞི་པོ ་དང་འདྲ་བ་སྟེ། བསོད་ནམས་དཔག་བསམ་ཤིང་ཁྱོད་རིང་ག་ལ་བྱུང་ཞེས་བསྟོད་པ་ལྟ་བུའོ། །དེ་ཡང་སྐུ་དེ་དག་གསུམ་ཆར་ཡང་སྔོན་གྱི་སྨོན་ལམ་གྱི་ས་བོན་དཔག་ཏུ་མེད་པ་འཛིན་པའི་རང་བཞིན་དུ་གནས་པ་སྔོན་ཇི་ལྟར་སྨོན་ལམ་བཏབ་པ་བཞིན་ད ་ལྟ་གདུལ་བྱའི་དོན་ལ་འབད་པ་མེད་པར་འབྱུང་བ་ཡིན་ལ་ཁྱད་པར་དུ་གཟུགས་ཀྱི་སྐུ་ནི་ཐོགས་པ་མེད་པར་བྱང་ཆུབ་སེམས་དཔའ་དང། ཉི་ཚེ་བའི་གང་ཟག་དང། འགྲོ་བ་ཡོངས་སུ་སྨིན་པར་བྱེད་པ་ལ་སོང་བས་སུ་ཡང་འཇུག་གོ་།ཁ་ཅིག་ན་རེ་གཟུགས ་སྐུ་ཞེས་བྱ་བ་ནི་སྤྱིར་བསྟན་པ་སྟེ། མཛེས་སྐུར་ལྡན་ཞེས་བྱ་བ་ནི་ལོངས་སྤྱོད་རྫོགས་པའི་སྐུའོ། །དཔག་བསམ་འདྲ་ཞེས་བྱ་བ་ནི་སྤྲུལ་པའི་སྐུའོ། །སངས་རྒྱས་ཞེས་བྱ་བ་ནི་སྐུ་གསུམ་ཆར་གྱི་དབང་དུ་བྱས་པའོ་ཞེས་ཟེར་རོ། །དེ་ལྟ་བུའི་སྐུ་གསུམ་པོ་དེ ་དག་ལ་ལུས་ཞིང་གི་རྡུལ་སྙེད་དུ་མོས་པའི་སྤྲུལ་ཏེ། ཕྱག་འཚལ་ཞེས་བྱ་བ་ནི། ཚིག་གི་དོན་སྔར་ཇི་ལྟ་བ་བཞིན་ནོ། །ཆོས་ཉིད་རྒྱུ་མཐུན་གསུང་རབ་བཅུ་གཉིས་དང་ཞེས་བྱ་བ་སྟེ། བསྟན་པའི་ཆོས་ལ་བསྟོད་པ་སྟེ། ཆོས་ཉིད་ཞེས་བྱ་བ་ལ་ཆོས་ཉིད་བདག་རྣམ་པ ་གཉིས་ཀྱིས་སྟོང་པ་ཉིད་དོ། །བདག་མེད་པ་དང། བདག་དང་བྲལ་བའི་མཚན་ཉིད་རང་བཞིན་གྱིས་འོད་གསལ་བ་སྤྱིའི་མཚན་ཉིད་དོན་དམ་པའི་བདེན་པའི་ངོ་བོའོ། །དེའི་རྒྱུ་མཐུན་པ་ནི་བསྟན་པའི་ཆོས་བདག་མེད་པ་དང། །བསྟན་པའི་གསུང་རབ་ཏེ། །འདིར ་མཐུན་པའི་རྒྱུ་ནི་རྒྱུ་མཐུན་པ་སྟེ། བསྐྱེད་པར་རུང་བ་དང་ཐོབ་པར་ནུས་པའོ། །དེ་ལ་བསྐྱེད་པར་རུང་བ་ནི་རྒྱུ་དེས་ཕྱིན་ཅི་མ་ལོག་པར་ཡོངས་སུ་གྲུབ་པའི་ཡེ་ཤེས་བསྐྱེད་པའོ། །ཐོབ་པར་ནུས་པའི་ནི་ཡེ་ཤེས་དེ་སྐྱེས་པས་མི་འགྱུར་བར་ཡོངས་སུ་གྲུབ་པ་དེ་བཞིན་ཉིད ་དེ་ཐོབ་པར་ནུས་པའོ། །དེ་དག་ནི་རབ་ཏུ་ཕུལ་དུ་བྱུང་བའི་གསུང་ཡིན་པས་གསུང་རབ་སྟེ། ཕྱི་རོལ་པའི་ཚིག་ལ་ནི་སྔ་མ་ལྟ་བུའི་རུང་བ་དང་ནུས་པ་མེད་པས་རབ་མ་ཡིན་ནོ། །བཅུ་གཉིས་ནི་མདོའི་སྡེ་དང། དབྱངས་ཀྱིས་བསྙད་པ་དང། ལུང་དུ་བསྟན་པ་དང། ་ཚིགས་སུ་བཅད་པ་དང། ཆེད་དུ་བརྗོད་པ་དང། གླེང་གཞིའི་དང། རྟོགས་པ་བརྗོད་པ་དང། དེ་ལྟ་བུ་བྱུང་བ་དང། སྐྱེས་པ་རབས་དང། ཤིན་ཏུ་རྒྱས་པ་དང། རྨད་དུ་བྱུང་བ་དང། གཏན་ལ་ཕབ་པའི་སྡེ་ཞེས་བྱ་སྟེ། དེ་དག་དང་པོ་ནི་སྟོན་པའི་ཞལ་ནས ་གྲོག་གོ་།དེའི་འོག་ཏུ་གང་ཟག་གི་བློ་ལ་གནས་པའོ། །དེའི་འོག་ཏུ་གླེགས་བམ་དུ་བྲིས་བའོ། །དེ་ཡང་དང་པོ་དེ་ལ་དམིགས་ནས་ཐོས་པ་དང། ཤེས་རབ་སྐྱེ་ཞིང་དེ་ནས་སྒོམས་པས་ཆོས་ཉིད་དེ་ཐོས་པས་མཐུན་པའི་རྒྱུ་བརྒྱུད་པ་ཉིད་དུ་ངེས་པའོ། །དེ་བས་ན་སློབ་དཔོན ་བ་སུ་བན་དུས་བཤད་པ། སྟོན་པའི་ཞལ་ནས་བྱུང་བ་སྐྱེ་བོའི་མིག་ནི་ཞི་བར་མཛད་པ་བཀྲ་ཤིས་ཀྱིས། །འབྱུང་གནས་སེམས་ལ་ཞོག་ཅིག་གང་ཕྱིར་འདི་ནི་ལུས་ཅན་རྣམས་ཀྱི་རྣ་བའི་བདུད་རྩི་དེ། ཉོན་མོངས་པ་ཡི་དུག་ཀུན་སེལ་བར་མཛད་པ་ཡིན་པས་དེའི ་དོན་ཡང་དག་བསམ་པར་གྱིས། རྒྱུ་འདི་རྣམས་ཀྱིས་རྟག་ཏུ་གུས་པར་སངས་རྒྱས་ཀྱི་ནི་གསུང་དག་མཉམ་པའི་རིགས་ཞེས་སོ། །ཆོས་ལ་སྐྱེ་འགག་མེད་ཅིང་སྤྲོས་ལ་དབེན། དེ་ལ་དམིགས་ཏེ་ཡོན་ཏན་ཀུན་སྒྲུབ་པ། ཞེས་བྱ་བ་ནི་དོན་དམ ་པའི་ཆོས་ལ་བསྟོད་པ་སྟེ། ཆོས་ལ་དོན་དམ་པའི་ཆོས་སོ། །དེ་ལ་དོན་དམ་པར་སྐྱེ་བ་དང་འགག་པ་མེད་ཅིང་གཞན་ཡང་སྤྲོས་པ་སྟེ། རྟག་པ་དང་ཆད་པ་དང། འོང་བ་དང་འགྲོ་བ་དང། གཅིག་དང་ཐ་དད་པའི་སྤྲོས་པ་དེ་དག་ལས་དབེན་པའོ། །དེ་ཡང ་དོན་དམ་པའི་ཆོས་ནི་བདག་མེད་པའི་རང་བཞིན་ཡིན་ལ། སྤྲོས་པ་དེ་དག་ནི་བདག་ཏུ་འཛིན་པའི་དབང་གིས་བཏགས་པ་ཙམ་དུ་ཟད་པས་ན་བདག་ཏུ་འཛིན་པ་ལོག་མ་ཐག་ཏུ་དེ་དག་ཀྱང་ལྡོག་ལ། བདག་མེད་པའི་ངང་ལ་དེ་དག་དང་པོ་ནས་ཀྱང་མེད་ཀྱི་བཏགས ་པ་གློ་བུར་བར་ཟད་པས་སོ། །དེ་ལྟར་སྤྲོས་པ་དང་བྲལ་བ་བདག་མེད་པ་ལ་བདག་མེད་པར་ཤེས་རབ་རྣམ་པ་གསུམ་གྱིས་དམིགས་པས། བདག་ཏུ་འཛིན་པ་ལོག་པས་དེ་མ་ཐག་ཏུ་འཇིག་རྟེན་ལས་འདས་པའི་ཡོན་ཏན་འཕགས་པའི་འབྲས་བུ་རྣམ་པ་དུ་མ་དང། སྟོབས ་དང་མི་འཇིགས་པ་ལ་སོགས་པའི་ཡོན་ཏན་ཀུན་གྲུབ་པས་ན། འཕགས་པའི་གང་ཟག་རྣམས་ནི་འདུས་མ་བྱས་ལས་རབ་ཏུ་བྱུང་བ་ལྟ་བུའོ་ཞེས་གསུངས་པ་ལྟ་བུའོ། །ལེགས་རྒྱུ་དམ་པའི་ཆོས་ལ་ཞེས་བྱ་བ་ནི་ལམ་གྱི་ཆོས་ཀྱི་བསྟོད་པ་སྟེ། དེ་ལ ་ལེགས་པ་ནི་ངེས་པར་ལེགས་པ་སྟེ། ཉེ་བར་ཞི་བའི་བདེ་བའོ། །དེའི་རྒྱུ་ནི་སྐྱེས་པར་བྱེད་པ་སྟེ། དེས་བདག་མེད་པའི་ཡེ་ཤེས་བསྐྱེད་ལ་ངེས་ཀྱང་ངེས་པར་ལེགས་པ་དེ་འཐོབ་པས་སོ། །འདིར་ཟད་པ་དང་མི་སྐྱེ་བ་ཤེས་པའི་སྔོན་དུ་རྡོ་རྗེ་ལྟ་བུའི་ཏིང་ངེ ་འཛིན་སྐྱེས་པ་དེས་ནི་ལེགས་རྒྱུའི་མཐར་ཐུག་པ་ཡིན་ལ། དེས་མཇུག་བརྟུལ་བ་མཐོང་བའི་ལམ་གྱི་བར་གྱི་ལེགས་རྒྱུར་རིགས་པར་བྱའོ། །དེ་ཉིད་དམ་པ་སྟེ། འཕགས་པ་རྣམས་ཀྱིས་ཉམས་སུ་མྱོང་བར་གྱུར་པ་དང། ལྟུང་བ་ལས་བདག་ཏུ་འཛིན ་དེས་ན་དམ་པའི་ཆོས་ཞེས་བྱའོ། །དེ་ལ་ཕྱག་འཚལ་ལོ་ཞེས་བྱ་བ་ནི་སྔ་མ་བཞིན་ནོ། །ཉོན་མོངས་སྒྲིབ་དང་ཤེས་བྱའི་སྒྲིབ་པ་དང། །གཉེན་པོས་རིམ་པར་བསལ་ནས་སྔར་ཞུགས་པ་ཞེས་བྱ་བ་ལ་སོགས་པས་ནི་འཕགས་པའི་དགེ་འདུན་ལ་བསྟོད་པ་སྟེ། དེ་ལ་སེམས་ཀུན་ནས ་ཉོན་མོངས་པར་བྱེད་པས་ཉོན་མོངས་པ་སྟེ། འདོད་ཆགས་ལ་སོགས་པ་དྲུག་གོ་།དེ་དག་ཉིད་སྒྲིབས་ཏེ་ཟད་པ་དང་མི་སྐྱེ་བ་ཤེས་པའི་ཡེ་ཤེས་ལ་སྒྲིབ་པ་དང་མཐོང་བའི་གེགས་བྱེད་པས་སོ། །ཤེས་བྱ་ནི་ཆོས་ཀྱི་དབྱིངས་ཀུན་ཏུ་འགྲོ་བ་རང་བཞིན་གྱིས་འོད་གསལ་བའོ། ་དེས་སྒྲིབ་པ་ནི་བརྗོད་པར་བྱེད་པ་སྒྲའི་སྤྱི་ལ་ཡོད་པར་འཛིན་པ་སྟེ། དངོས་སུ་གཟུང་བ་དང་འཛིན་པའི་རྣམ་པར་རྟོག་པའི་རིགས་ཇི་སྙེད་པའོ། །སྒྲིབ་པ་དེ་གཉི་ག་ཡང་རབ་ཏུ་དབྱེ་བ་མང་པོ་དང་ལྡན་པས་ན་མང་པོའི་ཚིག་ཅན་ནོ། །གཉེན་པོས་ཞེས་བྱ་བ་ནི་བདག་མེད་ཤེས ་པའི་ཡེ་ཤེས་སོ། །རིམ་པར་བསལ་ནས་ཞེས་བྱ་བ་ནི་དེ་དག་ཅིག་ཅར་མི་སྤོང་གི་དང་པོ་མཐོང་བས་སྤོང་ལ་དེའི་འོག་ཏུ་སྒོམ་པས་སྤང་པར་བྱ་བ་སྤོང་བའི་ཕྱིར་རོ། །དེ་ལས་འབྲས་བུ་འཐོབ་པ་བསྟན་པ། སར་ཞུགས་པ་ཞེས་བྱ་བ་སྟེ། ས་ནི་འཇིག་རྟེན་ལས ་འདས་པའི་ས་སྟེ། བརྒྱད་པ་དང། མཐོང་བ་དང། བསྲབས་པ་དང། འདོད་ཆགས་དང་བྲལ་བའི་ས་དང་བྱས་པ་རྟོགས་པ་དང། རང་སངས་རྒྱས་ཀྱི་ས་ལ་ཞུགས་པ་དང། ཡང་རབ་ཏུ་དགའ་བ་དང། བྲི་མ་མེད་པ་དང། ཆོས་ཀྱི་སྤྲིན་གྱི་བར་ལ་ཞུགས ་པའོ། །འདིར་བདེན་པ་བཞིའི་རྣམ་པ་བཅུ་དྲུག་དག་ཡིད་ལ་བྱེད་པས་ཡེ་ཤེས་ཀྱི་སྐད་ཅིག་བཅུ་དྲུག་གིས་ཕྲ་རྒྱས་བརྒྱད་ཅུ་རྩ་བརྒྱད་སྤངས་པས་མཐོང་བའི་ལམ་ལ་བརྒྱད་པའམ། རབ་ཏུ་དགའ་བའི་ས་པའོ། །དེའི་འོག་ཏུ་ཚུལ་དེ་ཉིད་ཀྱིས་བསྒོམ ་པས་སྤང་བར་བྱ་བ་བཅུ་སྤངས་པ་ལས་ནི་ཉན་ཐོས་དང། རང་རྒྱལ་བའི་ལྷག་མ་དག་བཞག་པ་སྟེ། རྣམ་པ་གསུམ་པའི་བར་དང། འདོད་པའི་རྣམ་པ་དྲུག་པ་དང། དགུ་པ་དང། སྲིད་རྩེའི་དགུ་པ་ཟད་པ་ལས་མཐོང་བ་དང། བསྲངས་པ་དང། ་འདོད་ཆགས་དང་བྲལ་བ་དང། བྱས་པ་རྟོགས་པའི་ས་པའོ། །ཅིག་ཅར་ཁོ་ནར་སྤང་བ་དང། ལམ་རྫོགས་པ་ནི་བསེ་རུ་ལྟ་བུའི་ས་པའོ། །བྱང་ཆུབ་སེམས་དཔའ་ཨི་ས་ལྷག་མ་རྣམས་ནི་ཕ་རོལ་ཏུ་ཕྱིན་པ་རྣམས་ཡོངས་སུ་རྫོགས་པ་ལས་རྣམ་པར་བཞག་པར ་རིག་པར་བྱ་ཞིང། དེ་དག་ཉིད་ཉོན་མོངས་པའི་སྒྲིབ་པ་སྒོམ་པས་སྤང་བར་བྱ་བ་ནི། རྡོ་རྗེ་ལྟ་བུའི་ཏིང་ངེ་འཛིན་གྱིས་ཅིག་ཅར་སྤོང་ལ་ཤེས་བྱའི་སྒྲིབ་པ་ནི་ས་རེ་རེ་ལ་ཡང་རིམ་གྱིས་སྤོང་ངོ། །ལ་ལ་ནི་ཉོན་མོངས་པའི་སྒྲིབ་པ་ཡང་ས་རེ་རེ་ལ་རིམ་གྱིས་སྤོང་སྟེ། སྤོང་བྱེད་ནི་ཆོས་ལ ་བདག་མེད་པའི་ཡེ་ཤེས་ཀྱིས་ཞེས་ཟེར་རོ། །དེ་ལྟར་ཡེ་ཤེས་ཀྱི་ཚོགས་ལ་གནས་པ་བསྟན་ནས། །ད་ནི་བསོད་ནམས་ཀྱི་ཚོགས་ལ་གནས་པ་བསྟན་པའི་ཕྱིར། སེམས་ཅན་དོན་མཛད་སངས་རྒྱས་ཞིང་སྤྱོད་བ་ཞེས་སྨོས་ཏེ། སེམས་ཅན་རྣམས་ཀྱི་དོན་ནི་དགོངས་པ ་སྟེ། བདེ་བ་དང་ཕན་པའོ། །དེ་དག་མཛད་པ་ནི་བསྡུ་བའི་དངོས་པོ་དང་ཚད་མེད་པ་དང་ཕ་རོལ་ཏུ་ཕྱིན་པ་དག་གིས་ཇི་ལྟར་ནུས་པར་བྱེད་པའོ། །སངས་རྒྱས་རྣམས་ཀྱི་ཞིང་ནི་སྣོད་དང་བཅུད་དོ། །དེ་དག་སྦྱོང་བ་ནི་རྒྱལ་བའི་ཡུམ་ལས་གསུངས་པ་ལྟར་ཏེ། སེམས་ཅན ་གོས་ངན་པ་དག་མཐོང་ན། བདག་གི་སངས་རྒྱས་ཀྱི་ཞིང་དེར་ནི་སེམས་ཅན་རྣམས་ལུས་གོས་དང་རྒྱན་གྱིས་བརྒྱན་པར་གྱུར་ཅིག་ཅེས་སྨོན་ལམ་གདབ་པར་བྱའོ། །མེ་ཏོག་འབུལ་ན་བདག་གི་སངས་རྒྱས་ཀྱི་ཞིང་དེར་དུས་ཐམས་ཅད་པའི་མེ་ཏོག་རབ་ཏུ་རྒྱས་པར ་གྱུར་ཅིག་ཅེས་སྨོན་ལམ་གདབ་པར་བྱའོ་ཞེས་བྱ་བ་ལ་སོགས་པའོ། །མདོར་ན་སངས་རྒྱས་ཀྱི་ཞིང་ནི་སྨོན་ལམ་གྱི་མཐུས་སྦྱོང་བར་རིག་པར་བྱའོ། །འཕགས་པའི་དགེ་འདུན་ཆེ་ལ་ཞེས་བྱ་བ་ནི་སྡིག་པ་མི་དགེ་བའི་ཆོས་ལས་རིང་དུ་སོང་བས་ན་འཕགས་པ་སྟེ། ་དགེ་འདུན་ནི་སྔར་བཤད་པ་བཞིན་ནོ། །ཆེ་བ་ནི་གྲངས་དང་ཡོན་ཏན་གྱིས་ཆེ་བ་སྟེ། གྲགས་པ་མཛའ་ཡས་པ་དང། ལེགས་པར་ཞུགས་པ་ལ་སོགས་པའི་ཡོན་ཏན་ཆེན་པོ་མངའ་བའི་ཕྱིར་རོ། །ཕྱག་འཚལ་ལོ་ཞེས་བྱ་བ་ནི་བསྟོད་པ་དང་བཅས་པའི་ཡུལ ་གྱི་ཡན་ལག་ཐམས་ཅད་རབ་ཏུ་འདུད་པའོ། །དེ་ལྟར་ཡོན་ཏན་མཛའ་དག་མ་ལུས་པའི་དཀོན་མཆོག་གསུམ་ལ་ཕྱག་འཚལ་ནས། དེ་དག་ལ་སྐྱབས་སུ་སོང་ན། ངན་སོང་རྣམས་སུ་མི་སྐྱེ་བར་ལྷའི་ནང་དུ་སྐྱེ་སྟེ། གསུམ་པ་སྐྱབས་སུ་འགྲོ་བ་ནི་ཆོས་སྣང་བའི་སྒོ་སྟེ། ངན ་འགྲོ་ལས་ཡང་དག་པར་འདའ་བའ་ཨོ་ཞེས་གསུངས་པ་དང། འདི་ལྟར་ཤིན་ཏུ་དད་པའི་སེམས་དེ་ལ་ཡིད་ཞུགས་པ་གཞན་དུ་མ་ཡེངས་པའི་ཡིད་གསལ་བས། སངས་རྒྱས་སམ། ཆོས་སམ། དགེ་འདུན་ལ་སྐྱབས་སུ་སོང་ན་དེ་འཆི་བའི་དུས་བྱས་ན་བདེ་འགྲོ ་?་རིས་ཀྱི་འཇིག་རྟེན་ཟུར་ན་གནས་པ་ཞེས་བྱ་བ་ནི་དེར་ཤིན་ཏུ་དད་པའི་སེམས་དེ་སྐྱབས་སུ་སོང་བའི་རྒྱུས་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལུས་གཟི་བརྗིད་དང་ལྡན་ཞིང་རང་གི་ལུས་རང་གི་འོད་ཀྱིས་བརྒྱན་ལ་བདེ་བར་གནས་པར་འགྱུར་རོ་ཞེས་གསུངས་པ་ལྟ་བུའོ། ་གལ་ཏེ་ཕྱག་འཚལ་བ་དང་སྐྱབས་སུ་སོང་བའི་དགེ་བ་དེ་ཡོངས་སུ་བསྔོ་བ་དང་ལྡན་ན་ནི་ཇི་ལྟར་བསྔོས་པའི་ཐར་པའི་རྒྱུར་འགྱུར་བར་རིག་པར་བྱའོ།། །།དེ་ལྟར་ཉེས་པ་ཀུན་སྤངས་ཤིང། །ཡོན་ཏན་མཛའ་ཡས་གཏར་གྱུར་པ། །དཀོན ་མཆོག་གསུམ་པོའི་བསྟོད་པའི་ཚིག་།ཅུང་ཟད་བཤད་པས་དགེ་བའི་ཚོགས། །གང་རྣམས་དེ་ཡིས་འགྲོ་བ་རྣམས། །སངས་རྒྱས་ས་ལ་གནས་པར་ཤོག་།དཀོན་མཆོག་གསུམ་ལ་བསྟོད་པའི་འགྲེལ་བ། སློབ་དཔོན་རྒྱལ་བའི་སྲས་ཀྱིས་མཛད་པ་རྫོགས་སོ།། །། ་རྒྱ་གར་གྱི་མཁན་པོ་ཛྙཱ་ན་ཤནྟི་དང། བོད་ཀྱི་ལོ་ཙཱ་བ་བནདེ་དཔལ་གྱི་ལྷུན་པོའི་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།རྒྱ་གར་སྐད་དུ། ཏྲི་རཏན་སྟོ་ཏྲ། བོད་སྐད་དུ། དཀོན་མཆོག་གསུམ་གྱི་བསྟོད་པ། དཀོན་མཆོག་གསུམ་ལ་ཕྱག་འཚལ་ལོ། ་