Wylie

e-texts based on the ACIP/ALL Input

རྫོགས་སོ།། (།།རྡོ་རྗེ་རྣམ་པར་འཇོམས་པའི་གཟུངས་ཀྱི་བཤད་པ་བཞུགས་སོ།།)་།།རྒྱ་གར་སྐད་དུ། བཛྲ་བི་དཱ་ར་ཎཱ་ནཱ་མ་དྷཱ་ར་ཎི་བྱཱ་ཀ་ཁྱཱ་ན། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་རྣམ་པར་བཤད་པ། དཔལ ་ཕྱག་ན་རྡོ་རྗེ་ལ་ཕྱག་འཚལ་ལོ། །རྒྱལ་བ་ཀུན་གྱི་གསང་བའི་མཛོད་འཛིན་པ། རྒྱུད་ཀྱི་དོན་འབྱུང་སྟོན་པ་ངོ་བོ་ལ། །སྒོ་གསུམ་དང་བས་བཏུད་དེ་ཕྱག་འཚལ་ནས། མདོའི་རྣམ་བཤད་བདག་གིས་བྱ་བར་འདོད། །དེ་ལ་དང་པོར་རྒྱུད་ཀྱི་དོན་ལ་མོས ་པ་དང་དད་པ་རྣམས་ལ། མདོའི་དོན་ཕུན་སུམ་ཚོགས་པ་རྣམ་པ་ལྔ་ལ་རབ་ཏུ་མཁས་པར་བྱ་སྟེ། དེའི་འོག་ཏུ་ཇི་ལྟར་ཡོངས་སུ་ཤེས་པར་བྱ་བའི་གོ་རིམས་ལ་འཇུག་པར་བྱ་བའི་ཕྱིར་རོ། །དེ་ལ་དང་པོར་མདོའི་མཚན་གྱི་དོན་ཕུན་སུམ་ཚོགས་པ་ལ ་མཁས་པར་བྱ་སྟེ། དེ་ལ་རྡོ་རྗེ་ནི་ཡང་དག་པའི་ཡེ་ཤེས་ཀྱི་ཚིག་བླ་དགས་ཏེ། ཅིའི་ཕྱིར་ཞེ་ན། རྡོ་རྗེ་ལྟར་འདུས་མ་བྱས་པའི་ཕྱིར་དངོས་པོ་ལ་ཞེན་པ་རྣམས་དང་ལྟ་བ་ལོག་པའི་ཕྱོགས་ཐམས་ཅད་ཀྱིས་མི་བསྐྱོད་ཅིང། དངོས་པོ་དང་བྲལ ་བའི་དོན་ཏོ། །རྣམ་པར་ནི་རྒྱུ་མེད་པ་དང། རྒྱུ་དང་རྐྱེན་གྱི་བསྐྱེད་པ་དང། རྟག་པ་དང་མི་རྟག་པ་དང་བདེ་བ་དང་སྡུག་བསྔལ་བ་ལ་སོགས་ཏེ་མཚན་མའི་ཆོས་ཐམས་ཅད་སྨོས་པའི་ཕྱིར་རོ། །འཇོམས་པ་ནི་དེ་རྣམས་ཐུགས་ཡང་དག་པའི་ཡེ་ཤེས་ཀྱིས་འཇོམས ་པ་དང། ཐུགས་རྗེས་ཐབས་ཀྱི་བྱེ་བྲག་གི་འཇོམས་པའི་དོན་ཏོ། །གཟུངས་ནི་མི་འདའ་བའ་ཨི་ཕྱིར་དང་གཉིས་སུ་མེད་པའི་དོན་ཏོ། །དེ་ལྟར་མདོའི་དགོས་ཆེད་བསྟན་ནས། དེའི་འོག་ཏུ་དགོས་པ་དང་འབྲེལ་བའི་དོན་བསྟན་ཏོ། །ཅིའི་ཕྱིར་ཞེ་ན། དགོས་འབྲེལ་གྱི་སྒོ་ནས་འཇུག་པའི་ཕྱིར་རོ། ་མ་ནོར་བར་སྟོན་པའི་སྟོན་པ་ཕུན་སུམ་ཚོགས་པ་དང། ཡོངས་སུ་དག་པའི་འཁོར་ཕུན་སུམ་ཚོགས་དང། གང་དུ་བཤད་པའི་གནས་དང་མ་ནོར་བར་སྡུད་པའི་སྡུག་པ་པོ་དང་གང་བཤད་པའི་མདོའི་དགོས་པ་རྣམས་སུ་ཤེས་པར་བྱེད་པའི་ཐ་ཚིག་གོ་།དེ་ལ་ ་བྲེལ་པ་ནི་ཕུན་སུམ་ཚོགས་ནས་དགོས་པ་གྲུབ་ཅིང་དོན་གཏན་ལ་འབེབས་པའི་ཕྱིར་རོ། །དེའི་འོག་ཏུ་ཇི་ལྟར་ཡོངས་སུ་ཤེས་པར་བྱ་བའི་དོན་སྟོན་ཏེ། མདོའི་དོན་འབྱུང་བའི་གཏན་ཚིགས་དང། དཀྱིལ་འཁོར་གྱི་དོན་འབྱུང་བའི་ཐབས་དང། ་དགོས་ཆེད་ཕུན་སུམ་ཚོགས་པའི་དོན་རྣམས་སུ་ཤེས་པར་བྱ་བའི་ཕྱིར་རོ། །དེ་ལྟར་དགོས་ཆེད་ཀྱི་དོན་བསྟན་ནས། དེའི་འོག་ཏུ་བསྡུ་བའི་དོན་དང། གོ་རིམས་ལ་འཇུག་པའི་ཐབས་སྨོས་པའི་ཕྱིར་རོ། །སྟོན་པ་སངས་རྒྱས་བཅོམ་ལྡན་འདས ་མཛའ་གཉིས་ཀྱི་སྐྱོན་སྤངས་ཏེ། ཐུགས་མཉམ་པ་ཉིད་ཀྱི་ཏིང་ངེ་འཛིན་རྡོ་རྗེ་ལྟ་བུ་ལས་མ་གཡོས་ཀྱང། ཉིད་ཀྱི་ཆེ་བའི་དོན་ཆེད་དུ་ཐུགས་ཡང་དག་པའི་སྲས་གསང་བའི་བདག་པོ་བྱིན་གྱིས་བརླབས་ནས། རྒྱུད་ཀྱི་དོན་འདི་གསུངས་པའི་ཚེ ་སངས་རྒྱས་ཀྱི་ཞིང་མཛའ་ཡས་པ་ན་འདུས་པའི་འཁོར་རྣམས་ཀྱི་ནང་དུ་འཕགས་པ་འཇམ་དཔལ་གྱི་དེ་བཞིན་གཤེགས་པའི་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཀྱི་བྱིན་གྱིས་བརླབས་པས་འཕགས་པ ་དཔལ་རྡོ་རྗེ་རྣམ་པར་འཇོམས་པའི་དོན་འདི་རྣ་བའི་དབང་པོ་ཡོངས་སུ་དག་པས་དཔལ་ཕྱག་ན་རྡོ་རྗེ་ལ་རབ་ཏུ་ཐོས་པའི་ཕྱིར་འདི་སྐད་བདག་གིས་ཐོས་པའི་དུས་གཅིག་ན་ཞེས་གསུངས་པ་སྟེ། འདི་ལྟར་སྟོན་པ་སངས་རྒྱས ་བཅོམ་ལྡན་འདས་ཀྱི་རྒྱུད་ཀྱི་དོན་འདི་ལྟར་བཤད་དེ། ཏིང་ངེ་འཛིན་ཡེ་ཤེས་ཀྱི་ངོ་བོ་ལས་ཕྱག་ན་རྡོ་རྗེར་སྤྲུལ་ཏེ། ཡེ་ཤེས་ཀྱི་ངོ་བོ་སྔགས་ཀྱི་ཚིག་ཏུ་སྨྲས་ཏེ། འཁོར་རྣམས་དགའ་མགུ་བསྐྱེད་ནས་དད་པར་བྱ་བ་དང། སེམས་ཅན་ཐམས་ཅད་ཀྱི ་ཉོན་མོངས་པའི་སྡིག་པ་རྣམ་པར་སྦྱང་བ་དང། བླ་ན་མེད་པའི་བྱང་ཆུབ་ལ་དགོས་པའི་ཕྱིར་འདི་སྐད་ཅེས་བྱའོ། །བློ་རྣོ་ཞིང་ཤེས་རབ་མཆོག་ཏུ་གྱུར་པ་རྣམས་ཀྱི་དོན་གྱི་རྒྱལ་པོ་འདི་ཐོས་བདག་གིས་ཐོས་པས་ཞེས་བྱའོ། །སྟོན་པ་དང་འཁོར་དང ་སྡུད་པར་ལྡན་པ་ལ་དུས་ཞེས་བྱའོ། །ལན་གྲངས་མང་དུ་གསུང་བར་ལན་ཅིག་བརྒྱ་ལམ་དུ་གསུངས་པས་ན། གཅིག་ན་ཞེས་བྱ་བའོ། །བཅོམ་ལྡན་འདས་རྡོ་རྗེ་ལ་བཞུགས་ཏེ་ནི་རང་བཞིན་གྱི་སྟོན་པའི་དོན་ཏེ། ཉོན་མོངས་པའི་བདུད་སྡེ་བཅོམ ་སྟེ། ཐུགས་ཏིང་ངེ་འཛིན་གྱི་མཁྱེན་པའི་ཡོན་ཏན་སྣ་ཚོགས་ཀྱི་ལེགས་པ་དང་ལྡན་པ། སངས་རྒྱས་བཅོམ་ལྡན་འདས་མཛའ་གཉིས་ཀྱི་སྐྱོན་སྤངས་པའོ། །རྡོ་རྗེ་ནི་གནས་ཕུན་སུམ་ཚོགས་པ་སྟེ། རྡོ་རྗེ་གདན་བྱང་ཆུབ་ཀྱི་ཤིང་དྲུང་ངོ། ་རྣམ་པ་གཅིག་ཏུ་བཅོམ་ལྡན་འདས་རྡོ་རྗེ་ལྟ་བུའི་ཏིང་ངེ་འཛིན་ལ་ཐུགས་མཉམ་པར་བཞག་པ་ལ་བྱའོ། །བཞུགས་ཐབས་གསུམ་ལས་ནི་མཉམ་པའི་སྐྱིལ་མོ་ཀྲུང་ལས་ཆོས་སྟོན་པའི་ཚུལ་དུ་བཞུགས་པའོ། །ད་ནི་བྱིན་གྱི་བརླབས ་ཀྱི་སྟོན་པའི་དུས་གསུམ་གྱི་རྒྱལ་བ་ཐམས་ཅད་ཀྱི་ཐུགས་གསང་བའི་མཛོད་འཛིན་པའི་ཡེ་ཤེས་ཀྱི་ངོ་བོ་སྟེ་དེའི་རྟགས་རྡོ་རྗེ་འཛིན་པའོ། །སངས་རྒྱས་ཀྱི་མཐུས་ནི་ཕྱོགས་བཅུའི་སངས་རྒྱས་ཐམས་ཅད་ཀྱི་སྐད་དང། གསུང་དང ་ཐུགས་དང། ཡོན་ཏན་དང། ཕྲིན་ལས་ཀྱི་བྱིན་གྱིས་བརླབས་ཏེ། ཏིང་ངེ་འཛིན་ལ་སྙོམས་པར་བཞུགས་པའི་ཕྱིར་རོ། །ལུས་ཐམས་ཅད་རྡོ་རྗེར་བྱིན་གྱི་བརླབས་ནས་ནི། ཡང་དག་པའི་ཡེ་ཤེས་དེ་ནི་ཆོས་ཐམས་ཅད་ཀྱི་རང་བཞིན་འདུས་མ་བྱས་པའི ་དོན་ལུས་ངག་ཡིད་གསུམ་སྐུ་གསུང་ཐུགས་རྡོ་རྗེ་ལྟར་བྱིན་གྱིས་བརླབས་པའི་ཕྱིར་རོ། །རྡོ་རྗེའི་ཏིང་ངེ་འཛིན་ལ་སྙོམས་པར་བཞུགས་པ་ནི་ཡང་དག་པའི་ཡེ་ཤེས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པས་དོན་ཐམས་ཅད་ལ་ཐོགས ་པ་མེད་པའི་ཡེ་ཤེས་ཀྱི་ངོ་བོ་བདག་གནས་པའི་ཕྱིར་རོ། །དེ་ནས་ལག་ན་རྡོ་རྗེ་སངས་རྒྱས་ཀྱི་མཐུས་དང་ནི་སྐབས་ཀྱི་དེ་མ་ཐག་པ་སྟེ། སྙོམས་པར་ཞུགས་པའི་རྟིང་ཐོགས་སུ་ཕྱོགས་བཅུའི་སངས་རྒྱས་ཐམས་ཅད་ཀྱི་མཐུས་ཡེ་ཤེས་ཀྱི་འོད ་ཟེར་སྐུ་དང་གསུང་དང་ཐུགས་ལས་འཐོན་ཏེ་ལག་ན་རྡོ་རྗེ་ལ་ཕོག་པས་སྐུ་གསུང་ཐུགས་ཡེ་ཤེས་ཀྱི་དོན་སྨྲ་བའི་དབང་བསྐུར་ནས་ཐོགས་པ་མེད་པའི་ཡེ་ཤེས་ཀྱི་དོན་སྨྲ་བའི་དབང་བསྐུར་ནས་ཐོགས་པ་མེད་པའི་ཡེ་ཤེས་ཀྱི་ཚིག་སྨྲ་བའི ་ཕྱིར་རོ། །བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་ཀྱི་སྔོན་གྱི་སྐལ་པ་མཛའ་ཡས་པ་ནས། བྱང་ཆུབ་ཀྱི་སྤྱོད་པ་དཀའ་བ་ཉམས་སུ་བླངས་པའི་བྱིན་གྱིས་བརླབས་དང། སངས་རྒྱས་ཀྱི་ཞིང་ཁམས་མཛའ་ཡས་པ་ནི་བྱང་ཆུབ ་སེམས་དཔའ་རྣམས་ཀྱི་སྔོན་གྱི་དགེ་བའི་རྩ་བའི་ཚོགས་སུ་འཐུན་པས་བྱིན་གྱི་བརླབས་པ་ལ་མཐུ་སྤོང་བའི་ཕྱིར་རོ། །སངས་རྒྱས་ཀྱི་བྱིན་གྱིས་བརླབས་ཀྱི་ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་ཨི་བྱིན་གྱིས་བརླབས ་ནི་མ་དྲོས་ལྟར་མཐུ་སྟོབས་མཛའ་ཡས་པའི་ཚིག་སྨྲ་བའི་སྤོབས་པ་བསྐྱེད་པའི་ཕྱིར་རོ། །རྡོ་རྗེ་ཁྲོ་བོ་ལས་བྱུང་བ་ནི་དེ་ལྟར་ལག་ན་རྡོ་རྗེ་བྱིན་གྱིས་བརླབས་པའི་མཐུས་རྡོ་རྗེ་ལྟ་བུའི་ཡང་དག་པའི་ཡེ་ཤེས་ཀྱི་ཁམས་གསུམ་གྱི་གྲགས ་པ་ཅན་ལ་ཁྲོ་བོའི་ཐབས་ཀྱི་སྤྲུལ་པས་བདུད་རྣམས་འདུལ་བའི་ཕྱིར། འོག་ནས་འབྱུང་བའི་དཀྱིལ་འཁོར་གྱི་ལྷ་རྣམས་སྐུ་གསུང་ཐུགས་ལས་འབྱུང་བའི་ཕྱིར་རོ། །རྡོ་རྗེ་སྙིང་པོས་རབ་ཏུ་སྨྲས་ཏེ། ཞེས་བྱ་བ་ནི་སྐུ་གསུང ་ཐུགས་ཀྱི་རྡོ་རྗེ་ལྟར་འདུས་མ་བྱས་སེམས་ཅན་ཐམས་ཅད་ལ་ཕན་པའི་ཕྱིར་འོག་ནས་འབྱུང་བའི་དོན་སྨྲ་བའི་དཀྱིལ་འཁོར་དང། སྙིང་པོ་སྐྱོན་དང་བྲལ་བ་སྟོན་པས་གསུངས་པའི་ཕྱིར་རོ། །ད་ནི་ཁྲོ་བོ་རྣམས་ཀྱི་རང་བཞིན་གྱི་དོན་ཐུགས ་ཀ་ནས་སྟོན་པའི་དོན་སྟོན་ཏེ། མི་ཆོད་པ་མི་ཤིགས་པ། བདེན་པ་སྲ་བ་ཞེས་བྱ་བ་ནི་གཟུང་བའི་ཡུལ་དུ་མ་གྲུབ་པས། མཚན་མ་འཇོམས་པས་གཤིན་རྗེ་གཤེད་དུ་བསྟན། ཉོན་མོངས་པའི་སྐྱོན་འཇོམས་པའི་ཐོ་བ་རྣམས། བྱང་ཆུབ ་སེམས་སྐྱོན་མེད་པས་སྐུ་མདོག་དཀར་རྩ་བའི་ཡིག་འབྲུ་མ་ལས་བསྐྱེད་པས། མ་ཐ་བཛྲ་ཞེས་བྱ་བ་དག་གི་ལས་དང་ཆོ་ག་ཚང་བར་བྱས་ནས་སྒོམས་ན་དངོས་གྲུབ་ཡ་མཚན་ཅན་ཐོབ་བོ། །དངོས་གྲུབ་དེ་དང་བདུད་ཀྱི་བར་ཆད་དུ ་མི་ཆོང་བ། སྐུ་གསུང་ཐུགས་མཚན་མས་མི་ཤིགས་པས་མི་ཤིག་པ་ཞེས་གསུངས། །གསུང་གི་ངོ་བོ་བདེན་པ་དང་ལྡན་པས་ཚིག་གི་དངོས་གྲུབ་སྟེ། དེ་ལྟ་བུ་ནི་ཧཱུཾ་ཀ་ར་ཉིད་ཀྱི་རང་བཞིན་ཡང་ཡིན་ཏེ། ཅིའི་ཕྱིར་ཞེ་ན། གཅིག་གི་ངོ་བོར་ཀུན ་གྱུར་ཅིང་དབྱེར་མེད་པའི་ཕྱིར་རོ། །ཐུགས་བྱང་ཆུབ་རྣམ་པར་དག་པས་མཚན་མའི་སྐྱོན་གྱི་རབ་ཏུ་མི་ཆོད་པའི་རྟགས་སུ་བསྟན་ཏེ། དེ་ནི་ཏིང་ངེ་འཛིན་འབུམ་ཕྲག་གི་སྒོ་བའི་དོན་མཛད་པ་ལ་བར་མི་ཆོད་པའི་ཕྱིར་སྨོས་སོ། །སྐུ་གསུང་ཐུགས ་རྡོ་རྗེ་ལྟ་བུའི་མི་འགྱུར་བའི་བྱང་ཆུབ་ཀྱི་ཆེ་བ་མངའ་བ་བས་མི་ཤིགས་པ། བདེན་པའི་ཚིག་མི་འགྱུར་བས་ཆོས་སྟོན་པར་བདེན་པ། དེ་ལྟ་བུའོ་ཁྲོ་བོའི་རྒྱལ་པོ་དེ་བསྒོམས་པའི་ཕྱིར་ཕྲིན་ལས་རྣམ་བཞིའི་ལས་བྱས་ན་འགྲུབ་པོ། ཧཱུཾ་ཀ་རའི ་དོན་བཤད་ཟིན་ཏོ། །སྲ་བ་བརྟན་པ་ཐམས་ཅད་དུ་ཐོགས་པ་མེད་པ་ཞེས་བྱ་བ། ཉོན་མོངས་པའི་འཁོར་བ་ལས་རྒྱལ་བའི་ཕྱིར་ཡེ་ཤེས་ཀྱི་འཁོར་ལོ་རྣམས་སྐུ་གསུང་ཐུགས་རྡོ་རྗེ་ལྟར་སྲ་བས་སྲ། བྱང་ཆུབ་ཀྱི་སེམས་མི་འགྱུར་བས་བརྟན ་པ། ཐུགས་རྡོ་རྗེ་བརྩོན་འགྲུས་ཅི་ལ་ཡང་ཐོགས་པ་མེད་པ། རྩ་བའི་སྙིང་པོ་ཡིག་འབྲུ་དུ་ལས་བསྐྱེད་པས། དུ་ན་བཛྲ་ཞེས་གསུངས་ཏེ། རྫས་དང་ཆོ་ག་ཚང་བར་བྱས་ན་དངོས་གྲུབ་ཡ་མཚན་ཅན་ཐོབ་བོ། །དེ་ནས་བདུད་དང་བགེགས ་བྱེད་ཀྱིས་གླགས་མི་རྙེད་པས་སྲ་བའི་དངོས་གྲུབ་ཅི་བྱ་བ་འགྲུབ་ཐམས་ཅད་དབང་དུ་སྡུད་པའི་ཕྱིར་ཐོགས་པ་མེད་པའི་དངོས་གྲུབ་ཐོབ་པོ། །ཁམས་གསུམ་རྣམ་པར་རྒྱལ་བའི་དོན་བཤད་ཟིན་ཏོ།། །།ཐམས་ཅད་དུ་མ་ཕམ ་པ། སེམས་ཅན་ཐམས་ཅད་སྐྲག་པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པ་ནི་ཁམས་གསུམ་ཐམས་ཅད་དུ་བྱང་ཆུབ་སེམས་ཐུགས་རྗེའི་རང་བཞིན་དུ་གནས་པས་མ་ཕམ་པ། བདུད་གྲགས་བྱེད་ཐམས་ཅད ་ལས་རྒྱལ་བར་བྱེད་པས་ན་སྐྲག་པར་བསྟན། འདོད་ཆགས་ལ་སོགས་པའི་ཉོན་མོངས་པ་འཇིལ་བའི་ཕྱིར་ན་འཇིལ་བར་བསྟན། དེའི་རྟགས་ཐབས་ཐུགས་རྗེ་ཆེན་པོའི་པདྨ་བསྣམས་པ། དེ་ལྟ་བུའི་ཁྲོ་བོའི་རྒྱལ་པོ་ཧ་ཡ་གྲི་བ་སྐུ ་མདོག་དམར་པོ། །ཉོན་མོངས་པའི་སྐྱོན་གྱི་མ་གོས་པའི་ཕྱིར་ཡང་དག་པའི་ཡོན་ཏན་དང་ལྡན་པའི་རྩ་བའི་སྙིང་པོ་སྟེ། བྱང་ཆུབ་སེམས་ཀྱི་ཡིག་འབྲུ་དྷ་ལས་བསྐྱེད་པས་དྷ་ར་བཛྲ་ཞེས་བརྗོད་དོ། །འོག་ནས་འབྱུང་བ་ལྟར་བསྒོམ་ན་བཀྲ ་ཤིས་པར་འགྱུར་རོ། །ཧ་ཡ་གྲི་བའི་དོན་བཤད་ཟིན་ཏོ། །རིག་སྔགས་ཐམས་ཅད་གཅོད་པར་བྱེད་པ། རིག་སྔགས་ཐམས་ཅད་གནོན་པར་བྱེད་པ། ལས་ཐམས་ཅད་འཇོམས་པར་བྱེད་པ་ནི། ཕས་ཀྱི་རྒོལ་བའི་གནོད་པ་བྱེད་ཐམས་ཅད་དང ་དྲང་སྲོང་གི་གནོད་པ་རྣམས་དང། ཕྱིར་ལོག་གི་བྱེ་བྲག་རྣམས་དང། སྡུག་བསྔལ་གྱི་གནོད་པ་རྣམས་བྱ་བ་ནན་ཏན་གྱི་ཡེ་ཤེས་ཀྱི་ཐམས་ཅད་གཅོད་པར་བྱེད་པ། ཐམས་ཅད་གནོན་པའི་ཚུལ་དུ་གནས ་པས་ཡོན་ཏན་ཐམས་ཅད་མ་ལུས་པར་རྫོགས་པར་བྱེད་པ། ཡེ་ཤེས་ཀྱི་ངོ་བོ་ལས་མ་ཡིན་པ་ཐམས་ཅད་འཇོམས་པའི་རྟགས་སུ་ཁྲོ་བོ་བདུད་རྩི་འཁྱིལ་པས་མཁྱེན་པའི་ཡོན་ཏན་བྱང་ཆུབ་སེམས་ཀྱི་རང་བཞིན་ཡི་ནས་རྣམ ་པར་དག་པའི་ཕྲིན་ལས་སྣ་ཚོགས་པ་རྣམས་སོ། །རྩ་བའི་ཡིག་འབྲུ་ལས་བསྐྱེད་པས་དྷ་ར་ཡ་བཛྲ་ཞེས་གསུངས་སོ། །དེ་བསྒྲུབ་པའི་ཕྱིར་རྫས་དང་ཆོ་ག་དང། ཡོ་བྱད་ལ་སོགས་པ་ཚང་བར་བྱ་སྟེ། ལས་བྱས་ན་དམོད་པའི་བྱེ་བྲག་ཐམས་ཅད ་ལས་ཐར་བར་འགྱུར་རོ། །བདུད་རྩི་འཁྱིལ་པའི་དོན་བཤད་ཟིན་ཏོ། །ད་ནི་ཡ་མཱནྟ་ཀའི་དོན་བཤད་དེ། གཞན་གྱི་ལས་ཐམས་ཅད་འཇིག་པར་བྱེད་པ་གདོན་ཐམས་ཅད་རླགས་པར་བྱེད་པ་དང། གདོན་ཐམས་ཅད་ལས་ཐར་བར་བྱེད་པ་ནི ་ཕྱིར་རྒོལ་བ་རྣམས་མ་ལུས་པ་ཐམས་ཅད་ཐུགས་རྗེ་ཆེན་པོའི་ཡེ་ཤེས་ཀྱི་ཐམས་ཅད་འཇིག་པར་བྱེད་ཅིང། བྱང་ཆུབ་སེམས་ཀྱི་རང་བཞིན་དུ་འགྱུར་བས་གཞན་གྱི་ལས་ཐམས་ཅད་འཇིག་པར་གསུངས། གདོན་སྟོང་ཕྲག་བརྒྱད་ཅུ་རྩ ་བཞི་ཐུགས་རྗེ་ཆེན་པོའི་ཡེ་ཤེས་ཀྱི་ཞབས་ཀྱི་གནོན་ཅིང་གྲོལ་བར་བྱེད་པས་ན་གདོན་ཐམས་ཅད་རླག་པར་གསུངས། གནོད་པའི་བྱེ་བྲག་བྱེད་པའི་ཉམས་ལེན་ལ་སྣ་ཚོགས་དགེ་བའི་བར་དུ་བཅོད་པ་རྣམས་འདུལ་བར་མཛད་པ ་དང། གཞན་སེམས་ཅན་གང་ཞིག་ཉམ་ཐག་པ་སྣ་ཚོགས་ཚེ་དང་མདངས་འཕྲོགས་པ་ལས་ཐར་བར་མཛད་པས་ན་དེའི་ཕྱིར་གདོན་ཐམས་ཅད་ཐར་པར་བྱེད་པར་གསུངས་སོ། །དེའི་རྟགས་ཀྱི་ཆ་འཛིན་པ་ནི་ཁྲོ་བོའི་རྒྱལ་པོ ་ཡ་མཱནྟ་ཀ་སྟེ། དེ་བསྒྲུབ་པར་བྱ་བའི་ཕྱིར་ཏིང་ངེ་འཛིན་གྱི་བུམ་པ་བྷྲུཾ་ལས་གཞལ་ཡས་ཁང་དུ་བསྒོམ། རྩ་བའི་ཡིག་འབྲུ་བྱང་ཆུབ་སེམས་ཀྱི་རང་བཞིན་དུ་བསམ་སྟེ། དེ་འོད་དུ་ཞུ་བ་ལས་བྱང་ཆུབ་སེམས་ཀྱི་རང་བཞིན་དུ་གྱུར་ཏོ། །སྙིང་པོ་དང་རྒྱན་ཆས ་རྣམས་ལ་ཡེ་ཤེས་ཀྱི་ལྷ་འབར་བར་བསམ་ཏེ་འོད་དུ་ཞུ་བས་རྒྱན་དང་སྙིང་པོ་ལ་ཐིམ་པས་གཉིས་སུ་མེད་པར་གྱུར་ཏོ། །ཡེ་ཤེས་ཀྱི་ཆོ་འཕྲུལ་བསམ་གྱིས་མི་ཁྱབ་པ་བྱུང་ནས་དངོས་གྲུབ་སྣ་ཚོགས་པ་སྦྱིན་པར་བསམ། བདག་ཡ་མཱནྟ་ཀའི་ཏིང་ངེ་འཛིན་དུ ་ཞུགས་ལ་ཕྲིན་ལས་རྣམ་བཞི་གང་བྱེད་པ་སོའི་ཁ་དོག་ཏུ་བསྒྱུར་ཏེ་བུམ་པས་དབང་བསྐུར་ན་ཐམས་ཅད་འགྲུབ་པར་གསུངས་སོ། །རྩ་བའི་ཡིག་འབྲུ་ད་ལས་བསྐྱེད་པས་ད་ཧ་བཛྲ་སྟེ། བསྙེན་པ་གྲངས་མང་པོར་བརྗོད་ན་བཀྲ་ཤིས་པར ་འགྱུར་རོ། །ཡ་མཱནྟ་ཀའི་དོན་བཤད་ཟིན་ཏོ།། །།ད་ནི་ཊཀྐི་ར་ཛའི་དོན་བཤད་དེ། འབྱུང་པོ་ཐམས་ཅད་འགུགས་པར་བྱེད་པ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ནི་སེམས་ཅན་གྱི་རྣམ་པར་རྟོག་པ་ཕྱིན་ཅི་ལོག་གི་རྟོག་པ ་ལས་བྱུང་བས་ན། འབྱུང་པོ། བལ་སྣ་དྲུག་མགུལ་ལ་སོགས་པ་རྫས་ཀྱི་བྱེ་བྲག་ལས་བྱུང་བས་ན་འབྱུང་པོ། །དེ་འགུགས་པར་བྱེད་པས་ནི་ཊཀྐི་རཱ་ཛའི་རང་བཞིན་དུ་བསྟན་ཏེ། ཐབས་མཁས་པའི་ཐུགས་རྗེས་ཁམས་གསུམ་གྱི་འབྱུང ་པོའི་རིགས་ཐམས་ཅད་དབང་དུ་བསྡུས་ནས་འཁོལ་བས། དེའི་ཕྱིར་འབྱུང་པོ་ཐམས་ཅད་འགུགས་པར་བྱེད་གསུངས། གཞན་ཡང་དེ་བཞིན་གཤེགས་པའི་འཕྲིན་ལས་ལ་མངའ་བརྙེས་པས། ལེགས་པར་ཐམས་ཅད་ཀྱང་བྱེད་དུ་འཇུག ་ཅིང་གཞན་ལ་སྟོན་པ་དང་ཉམས་སུ་ལེན་པའི་ནུས་པ་དང་ལྡན་པས་རིག་སྔགས་ཀྱི་ལས་ཐམས་ཅད་བྱེད་དུ་འཇུག་པར་གསུངས། དེ་སྒྲུབ་པར་བྱ་བའི་ཕྱིར་བུམ་པ་ལ་ད་བསམ་ཏེ་འོད་དུ་ཞུ་བས། ཊཀྐི་རཱ་ཛཱའི་རང་བཞིན་དུ་བསམ། ནང་གི་ཆུ་ལ་ར་བསམས་ ་ཏེ་འོད་དུ་ཞུ་བ་ལས་བྱང་ཆུབ་སེམས་ཟླ་བའི་དཀྱིལ་འཁོར་བསམ། བུམ་པའི་རྒྱན་ཆས་ལ་ཡ་བསམས་ཏེ། འོད་དུ་ཞུ་བས་ཏིང་ངེ་འཛིན་གྱི་ཆོ་འཕྲུལ་འབྱུང་བར་བསམ་མོ། །དེ་ལྟར་བྱིན་གྱིས་བརླབས་པའི་བུམ ་པས་ཕྲིན་ལས་སོ་སོའི་ལས་བྱས་ན་འགྲུབ་པར་གསུངས། །ཊཀྐི་རཱ་ཛཱའི་དོན་བཤད་ཟིན་ཏོ། །ད་ནི་སྟོབས་པོ་ཆེའི་དོན་བཤད་དེ། མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པ། འདོད་པ་ཐམས་ཅད་རབ་ཏུ་སྦྱིན་པ་ནི ་གང་ཞིག་གིས་བསྒྲུབས་པར་གྱུར་ན་དངོས་གྲུབ་མ་གྲུབ་པ་རྣམས་གྲུབ་པར་བྱེད་པ་དང། ལས་གྲུབ་པ་རྣམས་ཆུད་ཀྱི་དབང་དུ་མི་གཏོང་བ་དང། འདོད་པ་ཐམས་ཅད་རབ་ཏུ་སྦྱིན་པའོ། །ཏིང་ངེ་འཛིན་གྱི་སྟོབས་དང་ལྡན་པ། གཞན་གྱི་ཕུན་སུམ ་ཚོགས་པ། སྒྲུབ་པ་ཁྲོ་བོའི་རྒྱལ་པོ་སྟོབས་པོ་ཆེར་བསྟན། དེ་བསྒྲུབ་པར་བྱ་བའི་ཕྱིར་བུམ་པ་ལ་དུ་བསམས་ཏེ། འོད་དུ་ཞུ་བ་ལས་བྱང་ཆུབ་སེམས་སྟོབས་པོ་ཆེའི་རང་བཞིན་དུ་བསམ་བུམ་པའི་ཆུ་ལས་སུ་བསམ་ཏེ། ་འོད་དུ་ཞུ་བ་ལས་བྱང་ཆུབ་སེམས་ཟླ་བའི་དཀྱིལ་འཁོར་དུ་བསམ། བུམ་པའི་རྒྱན་ཆས་ལན་བསམས་ཏེ་འོད་དུ་ཞུ་བས་ཏིང་ངེ་འཛིན་བསམ་གྱིས་མི་ཁྱབ་པའི་ཆོ་འཕྲུལ་འབྱུང་བར་བསམ། དེ་ལྟར་བྱིན་གྱི་བརླབས་པའི་བུམ་པ ་དེ་ཕྲིན་ལས་རྣམ་བཞི་གང་བྱེད་པ་སོ་སོའི་ཁ་དོག་དུ་བྱིན་གྱིས་བརླབས་པའི་བུམ་པས་དབང་བསྐུར་ན་ཐམས་ཅད་འགྲུབ་པར་གསུངས། དེའི་ཕྱིར་དཱ་རུ་ཎ་བཛྲ་ཞེས་པ་རྩ་བའི་བསྙེན་པ་གྲངས་མང་དུ་བརྗོད་ན་ལས་ཐམས་ཅད ་གྲུབ་པས་ཆུད་མི་ཟ་བར་གསུངས་སོ། །སྟོབས་པོ་ཆེའི་དོན་བཤད་ཟིན་ཏོ། །ད་ནི་ཨ་མོ་གྷ་པཱ་ཤའི་དོན་བཤད་དེ། སེམས་ཅན་ཐམས་ཅད་བསྲུང་བ་ནི་ཨ་མོ་གྷ་པཱ་ཤའི་དོན་ཏོ། །ཐུགས་རྡོ་རྗེ་ཆེན་པོ་བྱང་ཆུབ་སེམས་ཀྱི་རང་བཞིན ་ཡེ?་ཤེས?་ཐབས་མཁས་པའི་སྤྲུལ་པ་བྱུང་ནས་ཁམས་གསུམ་གྱི་སེམས་ཅན་ལ་ཐབས་མཁས་པའི་ཐུགས་རྗེའི་བྱེ་བྲག་སྣ་ཚོགས་བསྟན་ནས་ཉོན་མོངས་པའི་སྡུག་བསྔལ་ལས་ཕན་བཏགས་ནས་སེམས་ཅན་ཐམས་ཅད་བསྲུང་བའི་ཕྱིར་རོ།། ་དེའི་རང་བཞིན་ཨ་མོ་གྷ་པཱ་ཤ་སྟེ། དེ་ནི་སེམས་ཅན་ཐམས་ཅད་ལ་བྱང་ཆུབ་སེམས་ཐབས་མཁས་པས་བསྲུང་བར་བྱེད་དོ། །དེ་བསྒྲུབ་པར་བྱ་བའི་ཕྱིར་བུམ་པ་ལ་ད་བསམ་ཏེ་འོད་དུ་ཞུ་བས། ཨ་མོ་གྷ་པཱ་ཤའི་རང་བཞིན་དུ་བསམ་མོ། །བུམ ་པའི་ཆུ་ལ་རུ་བསམས་ཏེ་འོད་དུ་ཞུ་བས་ཡེ་ཤེས་ཀྱི་སྤྲུལ་པ་སྣ་ཚོགས་པའི་ཡོན་ཏན་དང་ལྡན་པར་བསམ་མོ། །དེ་ནས་ཨ་མོ་གྷ་པཱ་ཤ་བསྒྲུབ་པར་བྱ་བའི་ཕྱིར། ཕྲིན་ལས་རྣམ་པ་བཞི་གང་བྱེད་པའི་ཁ་དོག་སོ་སོའི་བྱེ་བྲག་ཏུ་བསྒོམས ་ནས་དབང་བསྐུར་ཞིང་ལས་བྱས་ན་ཐམས་ཅད་འགྲུབ་པར་གསུངས་སོ། ། མོ་གྷ་པཱ་ཤའི་དོན་བཤད་ཟིན་ཏོ།། །།ད་ནི་དབུས་ཀྱི་གཙོ་བོའི་དོན་བཤད་དེ། ཞི་བ་རྒྱས་པ་སེམས་ཅན་ཐམས་ཅད་རེངས་པར་བྱེད་པ་ཞེས་པ ་ནི་ཕྱིན་ཅི་ལོག་གི་ཉོན་མོངས་པ་ཐམས་ཅད་ལ་སྔོན་གྱི་བསོད་ནམས་ཀྱི་ཚོགས་དང། ཕྲིན་ལས་ཀྱི་ཐུགས་རྗེ་ཐབས་མཁས་པའི་བྱེ་བྲག་སྣ་ཚོགས་པ་གཞན་ལ་བསྟན་ནས་ཕྱིན་ཅི་ལོག་གི་ཉོན་མོངས་པ་ཐམས་ཅད་མེད་པར ་མཛད་ཅིང་ཡོན་ཏན་གྱི་ཚོགས་བསམ་གྱིས་མི་ཁྱབ་པར་མཛད་པ་དང། བདུད་དང་བགེགས་བྱེད་ཅན་རྣམས་སྐྲག་ཅིང་རེངས་པར་བྱེད་པའི་ཕྱིར་རོ། །གཞན་ཡང་བྱང་ཆུབ་ཀྱི་སེམས་མཆོག་ཆོས་ཉིད་ཞི་བའི་དོན་ལས་མ་གཡོས་ཀྱང། སྔོན ་གྱི་བསོད་ནམས་ཀྱི་ཁམས་གསུམ་གྱི་སེམས་ཅན་ཐམས་ཅད་ལ་ཐབས་མཁས་པའི་ཕྲིན་ལས་སྣ་ཚོགས་འབྱུང་བའི་ཕྱིར་ཆེ་བའི་ཡོན་ཏན་སྣ་ཚོགས་པ་བྱུང་ནས། སེམས་ཅན་རྣམས་ཀྱི་ཕོངས་པ་རྣམས་ཚིམ་ཞིང་བདེ་བར ་མཛད་པ་དང། འཇིག་རྟེན་གྱི་གྲགས་བྱེད་ཐམས་ཅད་ལ་ཏིང་ངེ་འཛིན་གྱི་ཆོ་འཕྲུལ་སྣ་ཚོགས་པ་བསྟན་ནས་བདེ་བ་ལ་བཀོད་པའི་ཕྱིར་རེངས་ཤིང་འདར་བར་མཛད་དེ་དབང་དུ་བསྡུས་ནས་ཕན་འདོགས་པའི་ཕྱིར་རོ། །དེ ་ལྟར་ཡོན་ཏན་དང་ལྡན་པའི་ཕྱག་ན་རྡོ་རྗེ་བསྒོམས་པའི་ཕྱིར་རོ། །བུམ་པ་ལ་ཨོཾ་བསྒོམས་པས་འོད་དུ་ཞུ་བས་ཕྱག་ན་རྡོ་རྗེའི་སྐུར་བསྒོམ། བུམ་པའི་ཆུ་ལས་ཧ་བསམ་ཏེ་ཆོ་ག་རྣམ་གསུམ་གྱི་ཚུལ་སྤྲོ་སྡུ་བྱས་པས་བྱང་ཆུབ ་སེམས་ཟླ་བའི་དཀྱིལ་འཁོར་དུ་བསམ་མོ། །བུམ་པའི་རྒྱན་ཆས་ལ་ད་བསམ་ཏེ། འོད་དུ་ཞུ་བས་ཡོན་ཏན་དཔག་ཏུ་མེད་པའི་རྒྱན་ཆས་དང་ལྡན་པར་བསམ་མོ། །ཐུགས་ཀྱི་རང་བཞིན་དཔལ་ཕྱག་ན་རྡོ་རྗེའི་སྐུར་བསྒོམ ་པའི་ཕྱིར་ཕྲིན་ལས་རྣམ་བཞིའི་ལས་ཀྱི་བྱེ་བྲག་ཚང་བར་བྱ་སྟེ། བསྙེན་པ་སྟོང་དང་འབུམ་ལ་སོགས་པ་ཕུལ་ན་དངོས་གྲུབ་ཡ་མཚན་ཅན་ཐོབ་བོ། །ལས་ཀྱི་ལྷག་ཆད་ཁ་སྐང་བའི་ཕྱིར་ཁྲོ་བོའི་རྟིང་ལ་གསུངས། དཀྱིལ ་འཁོར་གྱི་བདག་པོ་ཡིན་པའི་ཕྱིར་ཚོགས་ཀྱི་མཇུག་སྡུད་པའོ། །དབུས་ཀྱི་གཙོ་བོའི་དོན་བཤད་ཟིན་ཏོ།། །།ད་ནི་སྒོ་བའི་དོན་བཤད་དེ། རྨུགས་པར་བྱེད་པའི་གསང་སྔགས་ཀྱི་མཐུ་ཆེན་པོ་འདི་ཞེས་བྱ་བ་ནི་ཐུར ་རྗེ་ཆེན་པོས་ཁམས་གསུམ་གྱི་སེམས་ཅན་ཐམས་ཅད་ལ་ཐུགས་རྗེ་ཐབས་མཁས་པའི་བྱེ་བྲག་སྣ་ཚོགས་པ་བསྟན་ནས་ཡེ་ཤེས་བཞིའི་ངོ་བོས་ཕན་གདགས་པའི་ཕྱིར་སྒོ་བ་བཞིར་སྐུ་སྤྲུལ་ཏེ། བདུད་དང་གེགས ་བྱེད?་རླགས་དང་སྐབས་ཚོལ་བ་རྣམས་ལ་རྨུགས་པར་བྱེད་པའི་ཐབས་ཀྱི་འདུག་ཏུ་མ་སྟེར་ནས་གསང་སྔགས་ཀྱི་མཐུ་ཆེན་པོ་བསྟན་ནས་མི་གནས་པར་བྱེད་པའི་དོན་ཏོ། །དེའི་རྟགས་ཀྱི་ཆ་འཛིན་པ་ནི ་སྒོ་བ་ཆེན་པོ་བཞི་ཡིན་ཏེ། དེ་བསྒྲུབ་པར་བྱ་བའི་ཕྱིར་བདག་གི་བུམ་པ་ལ་ཧཱུཾ་བསམས་ཏེ། འོད་དུ་ཞུ་བས་སྒོ་བ་ལྕགས་ཀྱུའི་རང་བཞིན་དུ་བསམ་མོ། །བུམ་པའི་ཆུ་ལས་ལུ་བསམ་ཏེ་འོད་དུ་ཞུ་བས་བྱང་ཆུབ་སེམས་ཟླ་བའི་དཀྱིལ་འཁོར་དུ་གྱུར་པར་བསྒོམ། ་བུམ་པའི་རྒྱན་ཆས་ལ་ཛ་བསམས་ཏེ། ཡེ་ཤེས་ཀྱི་ཆོ་ག་རྣམ་པ་གསུམ་གྱི་སྤྲོ་བསྡུ་བྱ། ཡེ་ཤེས་ཀྱི་ལྕགས་ཀྱུས་ཕྱི་ནང་གི་བྱེ་བྲག་རྣམས་བསྡུས་ནས་བུམ་པ་མཛེས་པར་བསམ་མོ། །དེ་ནས་ལྷོ་ཕྱོགས་ཀྱི་བུམ་པ་ལ་ཏི་བསམས་ཏེ་འོད་དུ་ཞུ ་པས་ཞགས་པའི་རང་བཞིན་དུ་བསམ། བུམ་པའི་ཆུ་ལ་ཤཊ་བསམ་ཏེ་འོད་དུ་ཞུ་བས་བྱང་ཆུབ་སེམས་ཟླ་བའི་དཀྱིལ་འཁོར་དུ་བསམ་མོ། །བུམ་པའི་རྒྱན་ཆས་ལ་ཧཱུཾ་བསམས་ཏེ་ཆོ་ག་རྣམས་སུམ་གྱི་སྤྲོ་བསྡུ་བྱས་པས་ཏིང་ངེ་འཛིན་གྱི་རྒྱན ་ཆས་བསམ་གྱི་མི་ཁྱབ་པར་བསམ་མོ། །དེ་ནས་ནུབ་ཕྱོགས་ཀྱི་བུམ་པ་ལ་ལྷ་བསམ་ཏེ་འོད་དུ་ཞུ་བས་ལྕགས་སྒྲོག་གི་རང་བཞིན་དུ་བསམ་མོ། །བུམ་པའི་ཆུ་ལ་ད་བསམས་ཏེ། འོད་དུ་ཞུ་བས་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་དུ ་བསམ་མོ། །བུམ་པའི་ཆུ་ལ་བཾ་བསམ་ཏེ་ཆོ་ག་རྣམ་པ་གསུམ་གྱིས་སྤྲོ་བསྡུ་བྱས་པས་མཆོད་པའི་རྒྱན་ཆས་བསམ་གྱི་མི་ཁྱབ་པ་དང་ལྡན་པར་བསམ་མོ། །དེ་ནས་བྱང་ཕྱོགས་ཀྱི་བུམ་པ་ལ་ཧ་བསམ་ཏེ་འོད་དུ་ཞུ་བས་སྒོ་བ ་དྲིལ་བུའི་རང་བཞིན་དུ་བསམ་མོ། །བུམ་པའི་ཆུ་ལ་ཎྚ་བསམས་ཏེ་འོད་དུ་ཞུ་བས་བྱང་ཆུབ་སེམས་ཟླ་བའི་དཀྱིལ་འཁོར་དུ་བསམ་མོ། །བུམ་པའི་རྒྱན་ཆས་ལ་ཧོ་བསམས་ཏེ་ཆོ་ག་གསུམ་གྱི་སྤྲོ་བསྡུ་བྱས་པ་ཏིང་ངེ་འཛིན་གྱི ་ཆོ་འཕྲུལ་འབྱུང་བར་བསམ་མོ། །དེ་ལྟར་བསྒོམས་པའི་བུམ་པ་དེ་ལ་རང་བཞིན་གྱི་དཀྱིལ་འཁོར་ནས་འཕགས་པ་སྤྱན་དྲངས་ནས་མདུན་གྱི་ནམ་མཁའ་ལ་དམིགས་སོ། །བསྙེན་པ་དང་མཆོད་པ་ཕུལ་བས་རབ་ཏུ་མཉེས་ཏེ ་འོད་དུ་ཞུ་བས་བདག་གིས་བསྒོམ་པའི་བུམ་པ་ལ་ཐིམ་ནས་གཉིས་སུ་མེད་པར་བསམ་མོ། །དེ་ལྟར་ཐིམ་པས་བྱང་ཆུབ་སེམས་ཆོས་ཉིད་ཀྱི་ཡོན་ཏན་འབྱུང་བར་བསམས་ཏེ། བྱིན་གྱིས་བརླབས་པའི་བུམ་པ ་དེས། གང་ཞིག་བཀྲ་མི་ཤིས་པ་ལ་ཡེ་ཤེས་ཀྱི་འོད་ཟེར་ཁ་དོག་དཀར་པོ་སྟིམས་ནས་ཁྲུས་བྱས་ཏེ་ཞི་བའི་ལས་བྱས་ན་ཐམས་ཅད་ཞི་བར་འགྱུར་རོ། །གང་ཞིག་བདོག་པ་ཉམས་པ་ལ་ཡེ་ཤེས་ཀྱི་འོད་ཟེར་ཁ་དོག་སེར་པོ་སྟིམས ་ནས་ཁྲུས་བྱས་ཏེ་རྒྱས་པའི་ལས་བྱས་ན་ཐམས་ཅད་རྒྱས་པར་འགྱུར་རོ། །གང་ཞིག་ཚེ་ཉམས་པ་ལ་ཡེ་ཤེས་ཀྱི་འོད་ཟེར་ཁ་དོག་དམར་པོ་བསྟིམས་ནས་ཁྲུས་བྱས་ཏེ། དབང་གི་ལས་བྱས་ན་ཐམས་ཅད་དབང་དུ་འགྱུར་རོ། ་གང་ཞིག་ཡུལ་དང་མཁར་ཤར་བ་དང། བགེགས་ཀྱི་ཆོ་འཕྲུལ་དང་ལྷ་འདྲེའི་ཆོ་འཕྲུལ་གནོད་པ་རྣམས་ལ་ཡེ་ཤེས་ཀྱི་འོད་ཟེར་ཁ་དོག་ནག་པོ་བསྟིམས་ནས་ཁྲུས་བྱས་ཏེ། དྲག་པོའི་ལས་བྱས་ན་ཐམས་ཅད་ཕུངས་ནས ་འཇིག་པར་འགྱུར་རོ། །སྒོ་བའི་དོན་བཤད་ཟིན་ཏོ།། །།སངས་རྒྱས་ཀྱི་མཐུས་ལག་ན་རྡོ་རྗེ་ཞེས་བྱ་བ་ནི་གོང་དུ་ཁྲོ་བོའི་རང་བཞིན་བསྟན་པ་ལས། བྱང་ཆུབ་སེམས་དཔའ་ལག་ན་རྡོ་རྗེ་ལ་དུས་གསུམ་གྱི་སངས་རྒྱས ་ཐམས་ཅད་ཀྱི་ཐུགས་ཡང་དག་པའི་ཡེ་ཤེས་རྡོ་རྗེ་ལྟ་བུས་བྱིན་གྱིས་བརླབས་ནས། ལག་ཏུ་ཡེ་ཤེས་ཀྱི་རྟགས་རྡོ་རྗེ་བྱིན་ནས་མིང་གི་དབང་བསྐུར་ཏེ། སྲིད་པ་གསུམ་གྱི་མཐུ་ཅན་ཞབས་འོག་ཏུ་བསྡུས་ནས། དམ་ལ་གདགས ་པའི་ཕྱིར་དང་འོག་གི་ཁྲོ་བོའི་སྔགས་དང་ཕན་ཡོན་སྨྲ་བ་ལ་གཞུག་པའི་ཕྱིར་དང་དེ་བཞིན་གཤེགས་པས་བྱིན་གྱིས་བརླབས་ནས་ཆེ་བའི་ཡོན་ཏན་དང་ལྡན་པའི་ལག་པ་ན་དེ་བཞིན་གཤེགས་པའི་ཡེ་ཤེས་ཀྱི་ཚིག་གི་ཁམས ་གསུམ་གྱི་སེམས་ཅན་ལ་ཕན་གདགས་པའི་ཕྱིར་སྐུ་གསུང་ཐུགས་རྡོ་རྗེ་ལས་མཚོན་པའི་རྟགས་ཐུགས་རྡོ་རྗེའི་དཀྱིལ་འཁོར་གྱི་སྔགས་འདི་འབྱུང་བའི་དོན་ཏོ། །སྔགས་ཀྱི་དོན་འབྱུང་བའི་ཐབས་བཤད་ཟིན་ཏོ།། །།ད་ནི་ཕྱག་ན་རྡོ་རྗེའི ་ཕྲིན་ལས་ཀྱི་དོན་བཤད་དེ། ན་མོ་རཏན་ཏྲ་ཡཱ་ཡ་ཞེས་པ་ནི་དཀོན་མཆོག་གསུམ་ལ་ཕྱག་འཚལ་བའི་དོན་ཏོ། །ཕྱག་ན་རྡོ་རྗེ་ནི་དཀོན་མཆོག་གསུམ་གྱི་རང་བཞིན་དུ་གྱུར་བས་ན་ཡེ་ཤེས་ལས་བྱུང་བའི་ཕྱིར་རོ། །ན་མ་ཤཙཎྜ་བཛྲ་པཱ་ནཱ་ཡེ་ཞེས ་པ་ནི་རྡོ་རྗེ་གཏུམ་པོ་རིན་པོ་ཆེའི་ངོ་བོ་ཕྱག་ན་རྡོ་རྗེའི་ཡང་དག་པའི་ཡེ་ཤེས་ཀྱི་སྙིང་པོའོ། །མཧཱ་ཡཀྵ་སེ་ནཱ་བཏ་ཡེ་ཞེས་པ་ནི་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་བའི་དོན་ཏེ། གནོད་སྦྱིན་རྣམས་ཐུགས་རྡོ་རྗེས ་བཏུལ་བས་དེ་སྐད་ཅེས་བརྗོད་དོ། །ཏ་དྱ་ཐཱ་ཞེས་པ་ནི་འདི་ལྟ་སྟེ། གང་ལྟ་ཞེ་ན། འོག་ནས་འབྱུང་བའི་སྔགས་ཀྱི་ཚིག་སྨྲས་སོ། །ོཾ་ཏྲ་ཊ་ཏྲ་ཊ་ཞེས་པ་ནི་ཡེ་ཤེས་ལྔ་པོས་བདག་གིས་ཉོན་མོངས་པ་ཐམས་ཅད་སོད་ཅིག་པའི ་དོན། ཏྲོ་ཊ་ཡ་ཏྲོ་ཊ་ཡ་ཞེས་པ་ནི་ཕྱག་ན་རྡོ་རྗེའི་བྱིན་གྱིས་བརླབ་ལས་ཀྱིས་རབ་ཏུ་སྤྱོད་ཅིག་ལེགས་པར་སྤྱོད་ཅིག་པའི་དོན། སཕུ་ཊ་སཕུ་ཊ་ཞེས་པ་ནི་ཉོན་མོངས་པའི་ལས་རྣམས་ཡེ་ཤེས་ཀྱི་མེ་འབར་བས་སྲེག་པར་གྱིས་ཤིག་པའི ་དོན། སཕོ་ཊ་ཡ་སཕོ་ཊ་ཡ་ཞེས་པ་བྱང་ཆུབ་ཀྱི་སེམས་ཀྱི་རང་བཞིན་གྱི་ལེགས་པར་འབར་བར་གྱིས་ཤིག་པའི་དོན། གྷུརྞ་གྷུརྞ་ཞེས་པ་ནི་བདག་གི་བགེགས་རྣམས་ཟུང་ལ་སྲེགས་ཤིག་།ཡེ་ཤེས་མེས་མཚན་མ་བསྲེག་པའི་དོན ་གྷུརྞཱ་པ་ཡ་གྷུརྞཱ་པ་ཡ་ཞེས་པ་ནི་ཐུགས་རྗེ་ལྕགས་ཀྱུས་ཟུངས་ལ་ལེགས་པར་སྐྲོད་ཅིག་པའི་དོན། སརྦ་སཏྭ་ནི་ཞེས་པ་ནི་སེམས་ཅན་ཐམས་ཅད་ལ་ཐུགས་རྗེའི་ཐུགས་ཀྱི་གཟིགས་ཤིག་པའི་དོན། བོདྷ་བོདྷ་ཞེས་པ་ནི་ཁམས ་གསུམ་གྱི་སེམས་ཅན་ལ་བྱང་ཆུབ་ཏུ་སེམས་རབ་ཏུ་བསྐྱེད་ཅིག་པའི་དོན། སཾ་བོ་དྷ་ཡ་སཾ་བོ་དྷ་ཡ་ཞེས་པ་ནི་འགྲོ་བ་རྣམས་ལེགས་པར་བྱང་ཆུབ་མཆོག་ཏུ་སེམས་བསྐྱེད་ཅིག་པའི་དོན། བྷྲ་མ་བྷྲ་མ་ཞེས་པ་ནི ་བྱང་ཆུབ་སེམས་དང་མི་མཐུན་པའི་བགེགས་རྣམས་བསྐྲོད་ཅིག་པའི་དོན། སཾ་བྷྲ་མ་ཡ་སཾ་བྷྲ་མ་ཡ་ཞེས་པ་ནི་ཕྱིན་ཅི་ལོག་གི་ཉོན་མོངས་པ་རྣམས་ཐུགས་རྗེས་ལེགས་པར་བསྐྲོད་ཅིག་པའི་དོན། སརྦ་བུ་དྷ་ན་ཞེས་པ་ནི་སངས་རྒྱས་ཐམས་ཅད ་ཀྱི་ཐུགས་རྗེ་ཆེན་པོས་བདག་གི་སྡང་བ་ཐམས་ཅད་ཆོམ་ཤིག་པའི་དོན། ཀུ་ཊ་ཀུ་ཊ་ཞེས་པ་ནི་གདོན་འབྱུང་པོ་རྣམས་གཏུབས་ཤིག་གཏུབས་ཤིག་པ་འམ་ཐུགས་རྗེས་ཡེ་ཤེས་ཀྱི་སྤྱན་གྱི་གཟིགས་ཤིག་པའི་དོན། སཾ་ཀུ་ཊ་ཡ་སཾ་ཀུ་ཊ་ཡ ་ཞེས་པ་ནི་འཇིག་རྟེན་ན་གདོན་བར་ཆད་བྱེད་པ་རྣམས་བྱམས་པའི་ཐུགས་ཀྱི་ལེགས་པར་གཏུབས་ཤིག་པའི་དོན། སརྦ་ཤ་ཏྲུཾ་ནཾ་ཞེས་པ་ནི་བདག་ལ་གནོད་པ་བྱེད་པའི་བགེགས་རྣམས་ཡང་དག་པའི་ཡེ་ཤེས་ཀྱི་མཚན་མ་མེད་པའི ་དོན་ཡང་བསྟན། གྷ་ཊ་གྷ་ཊ་ཞེས་པ་ནི་བགེགས་དང་འབྱུང་པོ་རྣམས་ཐུགས་རྗེས་སྐྲོད་ཅིག་པའི་དོན། སཾ་གྷ་ཊ་ཡ་སཾ་གྷ་ཊ་ཡ་ཞེས་པ་ནི་ལེགས་པའི་ཡོན་ཏན་ཐམས་ཅད་འབྱུང་བར་བྱེད་པས་ན་ཐུགས་རྗེས་ཉོན་མོངས་པ་ཐམས་ཅད ་ལས་ཐར་གྱིས་ཤིག་པའི་དོན། སརྦ་བིདྱཱ་ཞེས་པ་ནི་རིག་སྔགས་ཀྱི་མཐུས་གང་ལ་བྱ་བའི་ལས་ཐམས་ཅད་གྲུབ་པར་བྱེད་པའི་དོན། བཛྲ་བཛྲ་སཕོ་ཊ་ཡ་ཞེས་པ་ནི་ཡེ་ཤེས་ཀྱི་རྡོ་རྗེ་འབར་བའི་མེ་ཆེན་པོས་བགེགས་རྣམས་རོལ ་ཅིག་པའི་དོན། བཛྲ་བཛྲ་ཀ་ཊ་ཞེས་པ་ནི་ཡེ་ཤེས་ལས་གྲུབ་པའི་རྡོ་རྗེས་འབར་བས་ཉོན་མོངས་པ་ཐམས་ཅད་ཆོད་ཅིག་པའི་དོན། བཛྲ་བཛྲ་མ་ཊ་ཞེས་པ་ནི་བྱང་ཆུབ་ཀྱི་སེམས་ཀྱི་རྡོ་རྗེས་བདག་ལ་གདུག་པ་རྣམས་གཏུབས་ཤིག་པའི ་དོན། བཛྲ་བཛྲ་མཱ་ཐ་ཞེས་པ་ནི་ཡང་དག་པའི་ཡེ་ཤེས་རྡོ་རྗེས་བགེགས་རྣམས་ཐུལ་ཅིག་པའི་དོན། བཛྲ་བཛྲ་ཨ་ཊ་ཊ་ཞེས་པ་ནི་ཡེ་ཤེས་ལས་གྲུབ་པའི་ཡང་དག་པའི་ཡེ་ཤེས་རྡོ་རྗེས་བདུད་རྣམས་གནས་དར་མ་གནས་པར་གྱིས་ལ་སྐྲོད་ཅིག་པའི ་དོན། ཧཱ་ས་ནཱི་བཛྲ་ཞེས་པ་ནི་རྡོ་རྗེ་རྣོན་པོ་མེ་དང་འདྲ་བས་བག་ཆགས་རྣམས་ཆོད་ཅིག་དྲོལ་ཅིག་པའི་དོན། སུ་བཛྲ་བཛྲ་ཡ་སྭཱ་ཧཱ་ཞེས་པ་ནི་ཐུགས་མཁྱེན་པའི་རྡོ་རྗེ་ཆོས་ཀྱི་དབྱིངས་རྣམ་པར་དག་པ་ལ་ལེགས་པར་སྦྱོར་ཅིག་པའི་དོན་ཏོ། །ཕྱག ་ན་རྡོ་རྗེའི་ཕྲིན་ལས་ཀྱི་དོན་བཤད་ཟིན་ཏོ། །ད་ནི་ཁྲོ་བོ་རྣམས་ཀྱི་འཕྲིན་ལས་ཀྱི་དོན་བཤད་དེ། ཧེ་ཕུ་ལུ་ནི་རུ་ཕུ་ལུ་ཞེས་པ་ནི་དེ་ལྟར་ཕྱག་ན་རྡོ་རྗེ་ཐུགས་ཀྱི་ངོ་བོ་གསུངས་ནས། རྡོ་རྗེ་ཁྲོ་བོ་ལ་སྦྱོར་བའི་ཕྱིར་རྡོ་རྗེ་ཁྲོ་བོ་འབར་བས་ཉོན་མོངས ་པའི་གཤིན་རྗེས་ཁམས་གསུམ་པ་ཐུགས་རྗེ་འབར་བར་བྱེད་པའི་དོན། གྲིཧྞ་ཀུ་ལླུ་ཞེས་པ་ནི་ཁམས་གསུམ་གྱི་གཤིན་རྗེ་གཤེད་ཀྱི་སྡུག་བསྔལ་རྣམས་འཇོམས་པའི་དོན་མི་ལི་ཙུ་ལླུ་ཀུ་རུ་ཀུ་ལླུ་ཞེས་པ་ནི་འཕགས་པ་རྟ་མགྲིན་སྔོན ་པོ་འབར་བས་སྡུག་བསྔལ་སྦྱོངས་ཤིག་པའི་དོན། བཛྲ་བི་ཛ་ཡཱ་ཡ་སྭཱ་ཧཱ། བཛྲ་བི་ཛ་ཡཱ་ཡ་སྭཱ་ཧཱ་ཞེས་པ་ནི་ཁྲོ་བོ་བདུད་རྩི་འཁྱིལ་པར་འབར་བས་ཉོན་མོངས་པ་ཐམས་ཅད་བདུད་རྩིར་བྱིན་གྱིས་བརླབས་ཤིག་པའི་དོན། ཀཱི་ལི་ཀཱི་ལཱ་ཡ་སྭཱ་ཧཱ ་ཞེས་པ་ནི་ཨརྱ་ཨ་ཙ་ལས་ཐུགས་ཀྱི་ཕྲིན་ལས་མཛད་པ་དང། སྟོབས་པོ་ཆེས་དྲག་ཤུལ་གྱི་ཕྲིན་ལས་མཛད་པའི་དོན། ཀ་ཊ་ཀ་ཊ་ཞེས་པ་ནི་ཡ་མཱནྟ་ཀ་ཁྲོ་བོའི་རྒྱལ་པོས་བདུད་རྣམས་སྤང་ཀོངས་ཤིག་པའི་དོན། མ་ཏྲ་མ་ཏྲ ་ཞེས་པ་ནི་ཁྲོ་བོ་ཧཱུཾ་ཀ་རས་ཉོན་མོངས་པ་རྣམས་ལས་ཐུགས་རྗེས་སྐྱོབས་ཤིག་པའི་དོན་ར་ཊ་ར་ཊ་ཞེས་པ་ནི་ཁྲོ་བོའི་རྒྱལ་པོ་པདྨ་འཁྱིལ་བས་ཉོན་མོངས་པ་རྣམས་ཞི་བར་མཛོད་ཅིག་པའི་དོན་མོ་ཊ་ན་པྲ་མོ་ཊ་ནཱ་ཡ་སྭཱ་ཧཱ། ་ཤེས་པ་ནི་ཡེ་ཤེས་ཀྱི་གནོད་སྦྱིན་འབར་བ་གཤིན་རྗེ་གཤེད་ཀྱིས་སྐྱོབས་ཤིག་པའི་དོན་ཙ་ར་ནི་ཙ་ར་ཞེས་པ་ནི་ཁྲོ་བོའི་རྒྱལ་པོ་ནཱཾ་ལ་དཎྜ་དང་སེམས་ཅན་ཐམས་ཅད་ལ་ཚེ་དང་དབང་ཐང་སྩོལ་ཅིག་པའི་དོན། ཧ་ར་ཧ་ར་ཞེས ་པ་ནི་ཡེ་ཤེས་ཀྱི་གཤོགས་པས་འཁོར་བའི་སྡུག་བསྔལ་སྐྱོངས་ཤིག་པའི་དོན། ས་ར་ས་ར་ཞེས་པ་ནི་ཏིང་ངེ་འཛིན་གྱི་དྲག་ཤུལ་གྱི་སེམས་ཉམས་པ་རྣམས་དྲན་པར་གྱིས་ཤིག་པའི་དོན། མཱ་རཱ་ཡ་མཱ་རཱ་ཡ་ཞེས་པ་ནི་ཉོན་མོངས ་པ་འཇོམས་པའི་རྡོ་རྗེས་བགེགས་རྣམས་སོར་ཅིག་པའི་ངང་ལས་དྲག་པོས་རྡུལ་དུ་མཐོར་ཤིག་པའི་དོན། བཛྲ་བི་དཱ་རཱ་ནཱ་ཡ་སྭཱཧཱ་ཞེས་པ་ནི་རྡོ་རྗེ་རྣམ་པར་འཇོམས་པས་སེམས་ཅན་གྱི་ལས་རྣམས་མཛོད་ཅིག་པའི་དོན། ཙྪིནད་ཙྪིནད་ཞེས་པ ་ནི་ཁྲོ་བོའི་རྒྱལ་པོ་ཧ་ཡ་གྲི་བས་ཉོན་མོངས་པ་རྣམས་སོད་ཅིག་པའི་དོན། བྷིནད་བྷིནད་ཞེས་པ་ནི་བདག་དང་སེམས་ཅན་རྣམས་ཀྱི་སྡུག་བསྔལ་ཤིག་ཅེས་པའི་དོན། མ་ཧཱ་ཀི་ལི་ཀི་ལཱ་ཡ་སྭཱ་ཧཱ་ཞེས་པ་ནི་ཁྲོ་བོའི་རྒྱལ་པོ་སྟོབས་པོ་ཆེས ་ལས་དང་ཉོན་མོངས་པ་ཐུགས་ཞི་བའི་སྒོ་ནས་ཞི་བར་མཛོད་ཅིག་པའི་དོན། བྷནདྷ་བྷནདྷ་ཞེས་པ་ནི་ཊཀྐི་རཱ་ཛ་སྟེ་ཁྲོ་བོའི་རྒྱལ་པོས་གདུག་པའི་བདུད་རྣམས་མགོ་ནས་ཆིངས་ཤིག་པའི་དོན། ཀྲོ་དྷ་ཀྲོ་དྷ་ཞེས་པ་ནི་ཁྲོ་བོའི་ཁྲོ་བོས་ཉོན་མོངས ་པ་རྣམས་ལ་རོལ་ཅིག་པའི་དོན། ཀཱི་ལ་ཀཱི་ལཱ་ཡ་སྭཱ་ཧཱ་ཞེས་པའི་བྱང་ཆུབ་སེམས་ཀྱི་རང་བཞིན་བདུད་རྩི་འཁྱིལ་པས་ཐམས་ཅད་ཞི་བར་མཛོད་ཅིག་པའི་དོན། ཙུ་རུ་ཙུ་རུ་ཞེས་པ་ནི་ཁྲོ་བོའི་རྒྱལ་པོ་ཨ་མོ་གྷ་པཱ་ཤས་དམ ་ཚིག་བཞིན་དུ་ཕྲིན་ལས་མཛོད་ཅིག་པའི་དོན། ཙནཌ་ལི་ཞེས་པ་ནི་ཁྲོ་བོའི་རྒྱལ་པོ་ཚུར་སྦྱོན་ཚུར་སྦྱོན་དམ་ཚིག་ལ་དགོངས་པའི་དོན། བཛྲ་ཀཱི་ལི་ཀཱི་ལཱ་ཡ་སྭཱ་ཧཱ་ཞེས་པ་ནི་བདུད་རྩི་འཁྱིལ་པས་ཐུགས་ཚད་མེད་པའི ་གསུང་སྒྲས་ཐམས་ཅད་བྱང་ཆུབ་སེམས་སུ་ཞི་བར་མཛོད་ཅིག་པའི་དོན། ཏྲཱ་ས་ཡ་ཏྲཱ་ས་ཡ་ཞེས་པ་ནི་ཁྲོ་བོའི་རྒྱལ་པོ་མ་ཧཱ་བ་ལས་བདུད་དང། བགེགས་བྱེད་རྣམས་སྐྲག་པར་གྱིས་ཤིག་པའི་དོན། བཛྲ་ཀཱི་ལི་ཀཱི་ལཱ་ཡ་སྭཱ་ཧཱ་ཞེས་པ་ནི ་ཡེ་ཤེས་ཀྱི་རྡོ་རྗེ་འབར་བས་ཐམས་ཅད་ཞི་བར་མཛོད་ཅིག་བའི་དོན། ཧ་ར་ཧ་ར་བཛྲ་དྷཱ་ར་ཡ་སྭཱ་ཧཱ་ཞེས་པ་ནི་རྡོ་རྗེ་ཡེ་ཤེས་འབར་བའི་སྒོ་བ་བཞིས་བགེགས་རྣམས་སོགས་ཤིག་སྐྲོགས་ཤིག་པའི་དོན། པྲ་ཧ་ར་པྲ་ཧ་ར་ཞེས་པ་ནི་ཁྲོ་བོའི་རྒྱལ་པོ་ཨ་མི ་ཏ་ཀུནཌ་ལིས་མཚན་མའི་དངོས་པོ་ཐམས་ཅད་ཞི་བར་མཛད་ནས་བྱིན་གྱིས་རློབས་ཤིག་པའི་དོན། བཛྲ་པྲ་བྷཉྫ་ནཱ་ཡ་སྭཱ་ཧཱ། ཞེས་པ་ནི་བྱང་ཆུབ་སེམས་ཀྱི་རང་བཞིན་རྡོ་རྗེ་བར་བས་ལས་དང་ཉོན་མོངས་པའི་བག་ཆགས་ཐམས་ཅད་ཞི་བར ་མཛོད་ཅིག་བའི་དོན། ཁྲོ་བོ་རྣམས་ཀྱི་ཕྲིན་ལས་ཀྱི་དོན་བཤད་ཟིན་ཏོ།། །།ད་ནི་ཁྲོ་བོ་རྣམས་ཀྱི་བསྲུང་བའི་དོན་ཏེ། མ་བིར?་བཛྲ་ཞེས་པ་ནི་བློ་བརྟག་པའི་རྡོ་རྗེས་བྱང་ཆུབ་སེམས་ཀྱི་རང་བཞིན་དང་ལྡན་པར་གྱིས་ཤིག་བའི ་དོན་དང། སུ་ཏིསྠི་ར་བཛྲ་ཞེས་པ་ནི་ཤིན་ཏུ་བརྟན་པའི་རྡོ་རྗེས་ལེགས་པའི་ཡོན་ཏན་ཐམས་ཅད་རྡོ་རྗེ་ལྟ་བུ་ཞི་བ་དང་ལྡན་པར་གྱིས་ཤིག་པའི་དོན། པྲ་ཏིསྠ་རི་བཛྲ་ཞེས་པ་ནི་སོ་སོར་བརྟན་པར་རྡོ་རྗེས་བདག་གི་ལུས་རྡོ་རྗེ་ལྟ་བུར ་ཞི་བར་མཛོད་ཅིག་པའི་དོན། མཧཱ་བཛྲ་ཞེས་པ་ནི་རྡོ་རྗེ་ཆེན་པོ་ཞི་བའི་ཚུལ་དུ་བདུད་ལས་རྒྱལ་བར་མཛོད་ཅིག་པའི་དོན། པྲ་ཏིསྠ་རི་བཛྲ་ཞེས་པ་ནི་རབ་ཏུ་བསྟན་པའི་རྡོ་རྗེས་བདག་ལ་ཡེ་ཤེས་ཀྱི་མཚོན་ཆ་སྩོལ་ཅིག་པ་སྟེ། གཞན་གྱི ་མུ་ཏིག་གཞོལ་བའི་ཕྱིར་རོ། ། མོ་གྷ་བཛྲ་ཞེས་པ་ནི་དོན་ཡོད་པའི་རྡོ་རྗེའི་ཞགས་བསམ་གཏང་བའི་དོན། ཨེ་ཧི་བཛྲ་ཞེས་པ་ནི་བདེན་པའི་བརྗོད་བདག་འཁོར་བ་ལས་དངོས་ཤིག་ཚུར་གཤེགས་ཚུར་གཤེགས་པའི་དོན། ཤཱི་གྷཾ་བཛྲ ་ཡ་དྷ་ར་ཡ་སྭཱ་ཧཱ་ཞེས་པ་ནི་དཔའ་བར་གྲལ་བས་རྡོ་རྗེ་ལ་གོར་རྒྱུག་པའི་ཕྱིར་བདག་གི་ལས་གྲུབ་པར་མཛོད་ཅིག་བའི་དོན། དྷ་ར་དྷ་ར་ཞེས་པ་ནི་སྒོ་བཞི་སྲུང་བ་བཤད་དེ། བྱང་ཆུབ་ཀྱི་རང་བཞིན་ཞི་བ་ཐམས་ཅད་ཁྱེར་ལ་གཟུངས ་སུ་གྱིས་ཤིག་པའི་དོན། དྷི་རི་དྷི་རི་ཞེས་པ་ནི་དབྱིངས་ཀྱི་རང་བཞིན་ཆོས་ཉིད་ཀྱིས་ལེགས་པར་ཐོགས་ཤིག་པའི་དོན། དྷུ་རུ་དྷུ་རུ་ཞེས་པ་ནི་ལུས་ཐམས་ཅད་ཐུགས་རྗེས་རབ་ཏུ་ཟུང་ལ་ཐོགས་ཤིག་པའི་དོན། སརྦ་བཛྲ་ཀུ་ལཾ་ཨཱ་བརྟ ་ཡ་སྭཱ་ཧཱ་ཞེས་པ་ནི་རྡོ་རྗེ་དང་བཅས་པས་བདག་ལ་བྱིན་གྱིས་རློབས་ཤིག། གནོད་པ་བྱེད་པའི་བྱེ་བྲག་ཐམས་ཅད་རབ་ཏུ་ཞི་བར་མཛོད་ཅིག་པའི་དོན། ཨ་མུ་ཀཾ་མཱ་ར་ཡ་ཕཊ་ཅེས་པ་ནི་བདག་དུས་མ་ཡིན་པའི་འཇིགས་པ་ལས་བཟློག ་ཤིག། བདུད་རྣམས་ཀྱི་འཇིག་པ་ལས་ཆོམས་ཤིག་པའི་དོན་ཁྲོ་བོ་དང་སྒོ་སྲུང་བ་བཤད་ཟིན་ཏོ།། །།ད་ནི་ཁྲོ་བོའི་ངོ་བོ་ཉིད་བསྟན་ཏེ། ན་མ་ས་མནྟ་བཛྲ་ཎཱཾ་ཞེས་པ་ནི་ཀུན་ཏུ་བཟང་པོ་ཡེ་ཤེས་ཀྱི་རྡོ་རྗེ་རང་བཞིན་གྱི་དབང་བའི་དོན ་ཏོ། །སརྦ་བ་ལཾ་ཞེས་པ་ནི་ཐམས་ཅད་ཀུན་གྱིས་རང་བཞིན་སྟོབས་པོ་ཆེས་དབང་བསྐུར་ཅིག་པའི་དོན། ཨ་བར་ཏ་ཡ་མ་ཧཱ་བ་ལེ་ཞེས་པ་ནི་མཉེས་པར་བྱེད་པའི་སྟོབས་པོ་ཆེ་མགྱོགས་པ་རླུང་དང་འདྲ་བས་དབང་བསྐུར་བའི་དོན། ཀ་ཏ་བེ་ཏ་ལེ་ཞེས་པ་ནི ་ཡེ་ཤེས་ཀྱི་མཆེ་བས་ཉོན་མོངས་པའི་བདུད་ཐུལ་ཅིག་པའི་དོན། ཨ་ཙ་ལེ་ཞེས་པ་ནི་ཁམས་གསུམ་རྣམ་པར་རྒྱལ་བའི་དཀྱིལ་འཁོར་གྱི་མངའ་བདག་གི་སྤྲུལ་པས་བདག་ལ་དབང་བསྐུར་ལ་སྐྱོབས་ཤིག་པའི་དོན། མནཌ་ལ་མཱ་ཡེ་ཞེས་པ་ནི ་དཀྱིལ་འཁོར་གྱི་བསྲུངས་མ་རྣམས་ཀྱི་སྤྲུལ་པའི་ངོ་བོ་ཉིད་ཀྱི་ཆེ་བ་སྣ་ཚོགས་སུ་སྣང་བའི་དོན། ཨ་ཏི་བཛྲ་ཞེས་པ་ནི་རྡོ་རྗེ་བཟང་པོས་གདོན་ཐམས་ཅད་ལས་བདག་ལ་སྐྱོབས་ཤིག་པའི་དོན། མ་ཧཱ་བ་ལེ་བི་གར་ཎ་ཞེས་པ་ནི ་སྟོབས་པོ་ཆེ་རླུང་དང་འདྲ་བ་མགྱོགས་པས་བདག་ལ་གནོད་པ་ཐམས་ཅད་ཞི་བར་མཛོད་ཅིག་པའི་དོན། ཨ་ཛི་ཏེ་ཛཝ་ལ་ཞེས་པ་ནི་ཡང་དག་པའི་ཡེ་ཤེས་ཀྱི་ཤེས་རབ་ཀྱི་བདུད་ཀྱི་གྲགས་པ་རྣམས་སྲེགས་ཤིག་པའི་དོན། འབར་བ་འབར་བས་ཉོན་མོངས་པ ་སྲོགས་ཤིག་པའི་དོན། །ཏི་ཊི་ཏི་ཊི། པི་ག་ལེ་ཞེས་པ་ནི་འབར་བས་སྐམ་པོ་སོ་སོར་འབར་བས་སྡུག་བསྔལ་ལས་སྐྱོབས་ཤིག་པའི་དོན། ད་ཧ་ད་ཧ་ཞེས་པ་ནི་བདག་གི་ཉོན་མོངས་པ་རྣམས་སྲེགས་ཤིག། ཡང་དག་པའི་ཡེ་ཤེས་འབར་བར་གྱིས་ཤིག་པའི ་དོན། ཏེ་ཛོ་བ་ཏི་ཞེས་པ་ནི་ཡང་དག་པའི་ཡེ་ཤེས་ཀྱིས་གཏི་མུག་གི་མུན་པ་ལས་འབར་བར་གྱིས་ཤིག་པའི་དོན། ཏི་ལི་ཏི་ལི་ཞེས་པ་ནི་བདག་གི་སྡུག་བསྔལ་ཐམས་ཅད་ཆོད་ཅིག་པའི་དོན། བནད་བནད་ཞེས་པ་ནི་བགེགས་འབྱུང་པོ་རྣམས་ཆིངས་ཤིག་པའི ་དོན། མ་ཧཱ་བ་ལེ་ཞེས་པ་ནི་སྟོབས་པོ་ཆེ་ལས་མཛོད་ཅིག་པའི་དོན། བཛྲཱ་ཀུ་ཤ་ཛཝ་ལཱ་ཡ་སྭཱ་ཧཱ་ཞེས་པ་ནི་རྡོ་རྗེ་མེ་དང་འདྲ་བས་མཚན་མ་ཐམས་ཅད་ཞི་བར་མཛོད་ཅིག་པའི་དོན། ཁྲོ་བོའི་ངོ་བོ་དབང་གི་དོན་བཤད་ཟིན་ཏོ། །ད་ནི་ཡེ་ཤེས་ཀྱི་ཁྲོ་བོ་ལག་ན ་རྡོ་རྗེས་མཚན་མ་འཇོམས་པ་དང་ཐུགས་ཁྲོ་བོའི་ཡེ་ཤེས་ཀྱི་སྙིང་པོ་ལས་རྣམ་བཞིའི་རང་བཞིན་དེ་དཀོན་མཆོག་གསུམ་ལ་ཕྱག་འཚལ་བའི་དོན་པས་ཕྱག་ན་རྡོ་རྗེའི་བདུད་རྩིའི་ངོ་བོའོ། །ན་མོ་རཏན་ཏྲ་ཡཱ་ཡ། ན་མཤཙཎྜ་བཛྲ་བཱ་ཎ་ཡེ་ཞེས་པ་ནི་ཁམས ་གསུམ་གྱི་གནོད་སྦྱིན་རྣམས་འདུལ་བའི་ཕྱིར་ན་ཕྲིན་ལས་ཁྲོ་བོའི་ཚུལ་དུ་ཞུགས་པས་རྡོ་རྗེ་ཁྲོ་བོར་བསྟན། མཧཱ་ཡཀྵ་སེནཱ་པ་ཏ་ཡེ་ཞེས་པ་ནི་གནོད་སྦྱིན་གྱི་སྡེ་དཔོན་ལག་ན་རྡོ་རྗེས་ཡེ་ཤེས་ཀྱི་ངོ་བོ་ཞེས་གསུངས་བའི་ཕྱིར་རོ། །ོཾ་ཧ་ར་ཧ་ར་བཛྲ ་ཞེས་གསུངས་པ་ནི་ཡེ་ཤེས་ལྔའི་ངོ་བོ་ཕྱག་ན་རྡོ་རྗེ་དབུས་ན་བཞུགས་ཏེ། ལུས་ནི་གནོད་སྦྱིན་དུ་བསྟན་པའི་དོན། མ་ཐ་མ་ཐ་བཛྲ་ཞེས་པ་ནི་ཁཱུཾ་ཀ་ར་གཤིན་རྗེ་གཤེད་ཀྱི་དོན་རྒྱས་པར་བསྟེན་པས་སྙིང་པོའི་རང་བཞིན་ནོ། །དྷུ་ན་དྷུ་ན་བཛྲ་ཞེས་པ་ནི་དངོས་པོ་ཐམས་ཅད ་འཇོམས་པས་ཁམས་གསུམ་རྣམ་པར་རྒྱལ་བའི་སྙིང་པོའོ། །ད་ཧ་ད་ཧ་བཛྲ་ཞེས་པ་ནི་ཡ་མཱནྟ་ཀ་ཁྲོ་བོའི་རྒྱལ་པོའི་སྙིང་པོ་བྱང་ཆུབ་སེམས་ཀྱི་རང་བཞིན་ནོ། །པ་ཙ་པ་ཙ་བཛྲ་ཞེས་པ་ནི་ནི་ལ་བཎྜའི་རང་བཞིན་རྟ་མགྲིན ་སྔོན་པོའི་རང་བཞིན་དུ་བསྟན། དྷ་ར་དྷ་ར་བཛྲ་ཞེས་པ་ནི་ཧ་ཡ་གྲི་བའི་རང་སྔགས་ཀྱི་ས་བོན་བྱང་ཆུབ་སེམས་ཀྱི་ངོ་བོའི་སྙིང་པོའོ། །དཱ་ར་ཡ་དཱ་ར་ཡ་བཛྲ་ཞེས་པ་ནི་བདུད་ཙི་འཁྱིལ་བའི་སྙིང་པོའི་རང་བཞིན་བྱང་ཆུབ་སེམས་ཀྱིས་མཚན་པའི ་རང་བཞིན་ནོ། །དཱ་རུ་ཎ་དཱ་རུ་ཎ་བཛྲ་ཞེས་པ་ནི་ཡང་དག་པའི་ཡེ་ཤེས་ཀྱི་སྟོབས་དང་ལྡན་པས། ཨ་མོ་གྷ་པཱ་ཤཱི་རང་བཞིན་བྱང་ཆུབ་སེམས་ཀྱི་སྙིང་པོར་བསྟན། ཙྪིནད་ཙྪིནད་བཛྲ་ཞེས་པ་ནི་མ་ཧཱ་བ་ལ་དང། ཧཱུཾ་ཀ་ར་གཉིས་ཀྱི་རང་བཞིན་དུ་བསྟན། བྷིནད་བྷིནད ་བཛྲ་ཧཱུཾ་ཕཊ་ཅེས་པ་ནི་པདྨ་འཁྱིལ་པའི་རང་བཞིན་ཏེ། ཡེ་ཤེས་ཀྱི་ཕྱག་རྒྱ་བཞིས་སྡོམས་ཤིག་པའི་རང་བཞིན་ཏེ། ཁྲོ་བོའི་རང་བཞིན་བཤད་ཟིན་ཏོ།། །།ད་ནི་ཕྱག་བཙལ་བའི་དོན་ཏེ། ན་མཤཙཎྜ་བཛྲ་ཀྲོ་དྷ་ཡ་ཞེས་པ་ནི་ཕྱག་བཙལ་བའི་དོན་ཏེ། ་ཨ་མྲི་ཏ་ཀུནཌ་ལིའི་སྙིང་པོ། །ཕྱག་ན་རྡོ་རྗེ་གཏུམ་པོ་བསྒྲུབ་པའི་དོན་པས་རྡོ་རྗེ་ཁྲོ་བོ་ཞེས་པའི་དོན་ནོ། །ད་ནི་སྒོ་བའི་དོན་ཏེ། ཧུ་ལུ་ཧུ་ལུ་ཞེས་པ་ནི་བགེགས་དང་འབྱུང་པོ་རྣམས་ཚུལ་བཞིན་དུ་དྲོངས་ཤིག་པའི་དོན། ཤར་ཕྱོགས་ཀྱི་ཁྲོ་བོ་ཨཾ་ཀུ་ཤའི་མེ་ལོང ་ལྟ་བུའི་ཡེ་ཤེས་ཀྱི་ཕྱག་རྒྱའོ། །ཏིཤཋ་ཏིཥྛ་ཞེས་པ་ནི་ཆིངས་ཤིག་ཆིངས་ཤིག་པའི་ལྷོ་ཕྱོགས་ཀྱི་སྒོ་བཞགས་པ་སྟེ། མཉམ་པ་ཉིད་ཀྱི་ཡེ་ཤེས་ཀྱི་ཕྱག་རྒྱས་ཉོན་མོངས་པ་རྣམས་དབང་དུ་བསྡུས་ཤིག་པའི་དོན་ཏོ། །བནདྷ་བནདྷ་ཞེས་པ་ནུབ་ཕྱོགས ་ཀྱི་སྒོ་བ་ལྕགས་སྒྲོག་སྟེ། སོ་སོར་ཀུན་ཏུ་རྟོག་པའི་ཡེ་ཤེས་ཀྱི་ཕྱག་རྒྱ་སྟེ་ལྕགས་སྒྲོག་གིས་བགེགས་དང་འབྱུང་པོ་རྣམས་སྡོམས་ཤིག་བའི་དོན། ཧ་ན་ཧ་ན་ཞེས་པ་ནི་བྱང་ཕྱོགས་ཀྱི་སྒོ་བ་དྲིལ་བུ་སྟེ། བྱ་བ་ནན་ཏན་གྱི་ཡེ་ཤེས་ཀྱི་ངོ་བོས ་དགེགས་དང་འབྱུང་པོ་ལོག་ལྟ་རྣམས་རྡུལ་དུ་རློག་ཤིག་པའི་དོན། ཨ་མྲི་ཏེ་ཧཱུཾ་ཕཊ་ཅེས་པ་ནི། དཀྱིལ་འཁོར་གྱི་སྔགས་གོང་དུ་གསུངས་པ་དང་སྔགས་འབྱུང་བ་རྣམས་ཡེ་ཤེས་ཀྱི་ངོ་བོ་བས་ལས་ཀྱི་ཁ་སྐྲད་པའི་ཕྱིར་བདུད་རྩིའི་ངོ་བོར་བྱིན་གྱིས་བརླབས ་པའི་ཐབས་སུ་ཤེས་པར་བྱའོ།། །།དེ་ལྟར་ཁྲོ་བོ་རྣམས་ཀྱི་དོན་བཤད་ནས་དེའི་འོག་ཏུ་ཡོན་ཏན་གྱི་རྣམ་གྲངས་ཆོ་གའི་ཐབས་ཀྱི་བྱེ་བྲག་བསྟན་ཏེ། སྡུག་བསྔལ་ཐམས་ཅད་ལས་ཐར་བར་བྱེད་པའོ། །སྡིག་པ་ཐམས་ཅད་བྱང་བྱས་ནས་ཞེས་པ་ནི ་དོན་རྣམ་པ་གཉིས་སུ་ཤེས་པར་བྱ་སྟེ། རྒྱུད་ཀྱི་དོན་ལ་འཇུག་པར་བྱ་བའི་ཕྱིར་སྡིག་པ་ཐམས་ཅད་བྱང་བར་བྱ་བ་དང། རྒྱུད་ཀྱི་དོན་རྟོགས་བས་སྡིག་པ་ཐམས་ཅད་བྱང་བ་དང། དེ་ལྟར་དོན་གཉིས་སུ་ཤེས་བར་བྱའོ། །རྒྱུད་ཀྱི་དོན་ལ་འཇུག་པར་བྱ་བའི ་ཕྱིར་སྡིག་པ་ཐམས་ཅད་སྦྱོང་བར་བྱེད་པ་ནི་ཉོན་མོངས་པའི་སྒྲིབ་པ་དང། ལས་ཀྱི་བསྒྲིབ་པ་དང། རྣམ་པར་སྨིན་པའི་སྒྲིབ་པ་དང། ཆོས་ཀྱི་སྒྲིབ་པ་དང། ལྟ་བ་ལོག་པ་ལ་སོགས་པ་རྣམ་པ་རྣམས་དཀྱིལ་འཁོར་གྱི་ལྷ་རྣམས་སྤྱན་དྲངས་ནས་མདུན་གྱི ་བར་སྣང་ལ་གསལ་བར་བྱ་ཏེ་མཆོད་པ་ཕུལ་ལ་འགྱོད་པས་སྐྱེད་དུ་གཞུག་གོ། ཡན་ལག་ལྔ་ས་ལ་གཏུགས་ལ། སེམས་རྩེ་གཅིག་ཏུ་གུས་པ་དང་ལྡན་པར་བྱས་ཏེ། བྱང་ཆུབ་མཆོག་ཏུ་སེམས་སྐྱེད་དེ། སྟ་གོན་ལ་གནས་པའི་ཆོ་ག་བྱ། དེ་ནས ་འཕགས་པ་རྣམས་ལ་མཁྱེན་པ་གསོལ་ཞིང་སྡིག་པ་རྣམས་ལ་འགྱོད་པ་བསྐྱེད་པའི་དོན་རྒྱུད་ཀྱི་དོན་རྟོགས་ནས་སྡིག་པ་སྤྱད་པ་ནི་དཀྱིལ་འཁོར་དུ་བཅུག་ནས་ལྷའི་གྲལ་རིམ་དང་བཞུགས་ཐབས་དང། །སྐུ་མདོག་དང་རྒྱན་ཆས ་དང་བསྟོད་པ་དང། མཆོད་པའི་བྱེ་བྲག་དང། རྒྱུད་ཀྱི་དོན་བསྟན་ཏེ། སེམས་སྒྲོལ་ནས་སྡིག་པ་བྱང་བར་གསུངས། དེ་ལྟར་སྡིག་པ་སྦྱང་བ་བྱས་ཏེ། དེའི་འོག་ཏུ་འབྲས་བུ་ཡོན་ཏན་ཐམས་ཅད་དང་ལྡན་པའི་དོན་ཏོ། ཅིའི་ཕྱིར་ཞེ་ན། སྡུག ་བསྔལ་ཐམས་ཅད་མེད་པར་བྱེད་ཅེས་གསུངས་ཏེ། དེ་ལྟར་རྒྱུད་དོན་ཉམས་སུ་བླང་སྟེ། བསྒྲུབས་པས་ཉོན་མོངས་པའི་སྡུག་བསྔལ་གསུམ་དང་བརྒྱད་ལ་སོགས་བ་སྡུག་བསྔལ་གྱི་བྱེ་བྲག་ཐམས་ཅད་མེད་པར་མཛད་པས ་དེ་སྐད་གསུངས། དེའི་འོག་ཏུ་རྒྱུད་ཐམས་ཅད་གྱི་རྩ་བའི་དོན་ཡིན་པ་སྟོན་ཏེ། ཅིའི་ཕྱིར་ཞེ་ན། རྒྱུད་དོ་ཅོག་གི་རྩ་བ་སྟེ། ཞེས་གསུངས་ཏེ། སྟོན་པའི་ཞལ་ནས་གསུངས་པའི་རྒྱུད་དེ་ཐམས་ཅད་ཀྱི་རྩ་བ། རྡོ་རྗེ་ལྟ་བུའི་ཏིང་ངེ་འཛིན་ཡིན ་པས་དོན་གྱི་རྩ་བ་ཡིན་པར་གསུངས། དེའི་འོག་ཏུ་རྒྱུད་ཀྱི་དོན་གྱི་དཔལ་གྱི་གཞིར་འགྱུར་བའི་ཐབ་སྟོན་ཏེ། ཅིའི་ཕྱིར་ཞེ་ན། དཔལ་ཀུན་གྱིས་ནི་ལེགས་པར་བརྒྱན། ཅེས་གསུངས་ཏེ། དཔལ་ནི་འཇིག་རྟེན་དང་འཇིག་རྟེན་ལས ་འདས་པའི་ལེགས་པའི་ཡོན་ཏན་ཐམས་ཅད་ལ་བྱ། ཀུན་ནི་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱང་འདིའི་དོན་རྟོགས་པ་ལས་བྱུང་བའི་ཐ་ཚིག་གོ། དེ་ལྟ་བུའི་དོན་དེ་ནི་ཉེས་པ་ཐམས་ཅད་སྤངས་ཤིང། ཡོན་ཏན་ཐམས་ཅད་ཀྱི ་ཕུལ་དུ་ཕྱིན་པའི་རྒྱུ་ཡིན་པས་ལེགས་པར་བརྒྱན་ཅེས་པའི་དོན་ཏོ། །དེའི་འོག་ཏུ་སེམས་ཅན་དབང་པོ་ཉམས་པ་ལ་ཕན་པའི་ཐབ་སྟོན་ཏེ། ཅིའི་ཕྱིར་ཞེ་ན། སེམས་ཅན་དབང་པོ་ཉམས་པ་དང་ཞེས་གསུངས་ཏེ། སེམས་ཅན་གྱི ་རྒྱལ་པོ་སྟོབས་ལྡན་སྙིང་པོ་ལ་སོགས་ཏེ། ཁམས་གསུམ་གྱི་སེམས་ཅན་ཀུན་ལ་བྱ་བའི་ཐ་ཚིག་གོ་།དེ་རྣམས་ལ་དབང་པོ་ཉམས་པའི་སྐྱོན་བཅོ་བརྒྱད་ཡོད་དེ། དེ་བཟློག་པའི་ཐབས་ནི་རྒྱུད་ནི་རྒྱུད་ནས་འབྱུང་བའི་འཕྲིན་ལས་རྣམས ་བཞི་ཚང་བར་བྱས་ནས་སྦྱང་བའི་ཕྱིར་རོ། །དེའི་འོག་ཏུ་ཚེ་ཉམས་པ་གསོ་བའི་ཐབས་སྟོན་ཏེ། ཅིའི་ཕྱིར་ཞེ་ན། ཚེ་ཟད་པ་དང་ཚེ་ཉམས་པ་དང། ཞེས་གསུངས་ཏེ། དེ་ནི་སྲོག་གོ། ཟད་པ་ནི་མེད་པ་སྟེ། ཚེ་ཟད་པའི་སྔ་ལྟས་ལྔ་ཡོད་པ་ལ། དེ ་གསོ་བའི་ཐབས་ནི་དཀྱིལ་འཁོར་གྱི་ལྷ་རྣམས་སྤྱན་དྲངས་ནས་སྔགས་དང་ཕྱག་རྒྱ་རྣམས་ཀྱིས་དབང་བསྐུར་ནས་སོས་པར་གསུངས། དེའི་འོག་ཏུ་བདོག་པ་ཉམས་པ་སྤེལ་བའི་ཐབས་སྟོན་ཏེ། དེ་ཅིའི་ཕྱིར་ཞེ་ན། ཕུན་སུམ་ཚོགས་མེད་གང་ཆགས་དང། ཞེས ་གསུངས་ཏེ། ཁམས་གསུམ་གྱི་སེམས་ཅན་རྣམས་བདེ་བ་དང་བྲལ་ཏེ། ཉོན་མོངས་པའི་སྡུག་བསྔལ་བཀྲེས་གྲང་ལ་སོགས་པ་གནོད་པའི་བྱེ་བྲག་རྣམས་ཀྱི་བདེ་བ་མི་ཆགས་ཏེ། སྡུག་བསྔལ་ཆགས་པ་དེ་སྦྱར་བའི་ཐབས་ནི་དཀྱིལ་འཁོར་གྱི་ལྷ ་རྣམས་སྤྱན་དྲངས་ཏེ་རྒྱས་པའི་ལས་བྱས་ན། བདེ་བ་ཕུན་སུམ་ཚོགས་པ་དང་ལྡན་པའི་ཐ་ཚིག་གོ་།དེའི་འོག་ཏུ་ཉོན་མོངས་པའི་ཕྱོགས་ཀྱིས་འཇིག་རྟེན་པའི་ལྷ་མི་དགའ་བ་སྟོན་ཏེ། ཅིའི་ཕྱིར་ཞེ་ན། ལྷ་རྣམས་རྒྱབ་ཀྱི་ཕྱོགས་པ་དང། ཞེས ་གསུངས་ཏེ། རྒྱལ་བའི་སྤྱན་སྔར་དམ་ཚིག་མནོས་པ་ལས། གཞུང་དང་མ་མཐུན་པས་མྱ་ངན་འདས་པའི་ལྷ་འཕགས་པ་རྣམས་མ་མཉེས་པ་དང། ཀུན་རྫོབ་ཀྱི་མི་མཐུན་པའི་ཕྱོགས་པས་ལྷ་རྣམས་འཕངས་པ་དང། དེ་ལ་སོགས ་ཏེ་ལྷ་རྣམས་རྒྱབ་ཀྱི་ཕྱོགས་པ་དེ་རྣམས་ཞི་བར་བྱ་བའི་ཐ་ཚིག་ནི། བདག་ཉིད་ལས་ཀྱི་ལྷའི་ཏིང་ངེ་འཛིན་དུ་ཞུགས་ཏེ། ལས་བྱ་བའི་ལྷ་དང་མཆོད་རྫས་ལ་སོགས་པ་འོད་དང་ཁ་དོག་དམར་པོར་བསྒྱུར་ཏེ། ཆགས་པའི་ཚུལ་གྱིས་དབང ་གི་ལས་བྱས་ན་འགྲུབ་པར་གསུངས། དེའི་འོག་ཏུ་ལྷ་མི་དགའ་ཨི་བའི་སྔ་ལྟས་སྟོན་ཏེ། ཅིའི་ཕྱིར་ཞེ་ན། མཛའ་སྡུག་སྐྱེ་བོ་སྡང་བ་དང། ཞེས་གསུངས་ཏེ། ལྷ་འཕངས་པའི་སྔ་ལྟས་བདག་ལ་མཛའ་པོ་དང། འཁོར་ལ་སོགས་པ ་རྣམས་བསམ་པ་དང་མི་མཐུན་པའི་ཕྱོགས་ཞེ་སྡང་དང་ངན་སེམས་ལ་སོགས་པའི་བྱད་སྟེམས་རྣམས་དྲག་པོའི་ལས་བྱས་ན་འགྲུབ་པར་གསུངས། དེའི་འོག་ཏུ་འཁོར་ལ་གནོད་པ་སྟེ། ཅིའི་ཕྱིར་ཞེ་ན། བྲམ་ཟེ་ལ་སོགས་གཙེས་པ་དང། ་ཞེས་གསུངས་ཏེ། རྒྱལ་པོ་སྟོབས་ལྡན་སྙིང་པོ་དང། ཁམས་གསུམ་གྱི་སེམས་ཅན་གཡོག་བྲན་དང། གཟའ་མི་ལ་སོགས་པ་ལ་གནོད་སྦྱིན་དང་བདུད་ལ་སོགས་པས་གཙེས་པའི་རྒྱུས་རང་རེའི་མི་མཐུན་པ་ལ་ལས ་བྱས་ན་འགྲུབ་པར་གསུངས། དེའི་འོག་ཏུ་མི་མཐུན་པ་སྟོན་ཏེ། ཅིའི་ཕྱིར་ཞེ་ན། ཕུན་ཚུན་མཐུན་པ་མ་ཡིན་པ་དང་ཞེས་གསུངས་ཏེ། གདོན་འབྱུང་པོས་བྱིན་གྱིས་བརླབས་པའི་མཐུས། སེམས་ཅན་རྣམས་ལ་ཕན་ཚུན་མི་མཐུན་ཏེ། དགྲ་བོ་ལྟ་བུར་སེམས ་པ་ལ་ཞི་བའི་ལས་བྱས་ན་འགྲུབ་པར་གསུངས། དེའི་འོག་ཏུ་མདོགས་པ་ཉམས་པ་སྟོན་ཏེ་ཅིའི་ཕྱིར་ཞེ་ན། ནོར་འགྲིབ་པས་ནི་གནོད་པ་དང་ཞེས་གསུངས་ཏེ། བདག་གི་གདོག་པ་ཕུན་སུམ་ཚོགས་པ་ཉམས་ནས་འཕོངས་པ་སྟེ། གཞན་ལ་རག་ལུས ་ནས་འཕོངས་པ་སྟེ་གཞན་ལ་རགས་ལུས་ནས་བདག་ཉོན་མོངས་པ་ལ་རྒྱས་པའི་ལས་བྱས་ན་བདོག་པ་ཡོད་པར་གསུངས། དེའི་འོག་ཏུ་མྱ་ངན་གྱི་གནོད་པ་སྟོན་ཏེ་ཅིའི་ཕྱིར་ཞེ་ན། མྱ་ངན་ངལ་ལས་གནོད་པ་དང་ཞེས་གསུངས་ཏེ། ཁམས ་གསུམ་གྱི་སེམས་ཅན་རྣམས་སེམས་ཀྱི་མྱ་ངན་སྣ་ཚོགས་དང་ལྡན་པས་ལུས་རབ་ཏུ་ངལ་ཏེ། སྡུག་བསྔལ་རྣམས་ཀྱི་རབ་ཏུ་གཟིར་བ་ལ་མྱ་ངན་གྱི་ཆོ་འཕྲུལ་ལ་སོགས་པ་ཞི་བའི་ལས་བྱས་ན་འགྲུབ་པར་གསུངས། དེའི་འོག་ཏུ་འཇིགས ་ཤིང་ཕོངས་པ་སྟོན་ཏེ། ཅིའི་ཕྱིར་ཞེ་ན། འཇིགས་པ་དང་ནི་ཕོངས་པ་དང་ཞེས་གསུངས་ཏེ། སེམས་ཅན་རྣམས་རྒྱལ་པོའི་ཆད་པའི་དང་གནམ་ལྕགས་ཀྱི་འཇིགས་པ་དང། རྐུན་པོས་འཇིགས་པ་དང་མེ་དང་ཆུས་འཇིགས་པ་དང། ་མཚོན་ཆས་འཇིགས་པ་དང། དུག་གི་འཇིགས་པ་དང། སྐར་མདའ་ལྟུང་བས་འཇིགས་པ་དང་བརྒྱད་དོ། །གཞན་ཡང་མགོན་སྐྱབས་མེད་ཅིང་ཕོངས་པའི་བྱེ་བྲག་རྣམས་ཕྲིན་ལས་རྣམ་བཞིའི་ལས་བྱས་ན་འགྲུབ་པར་གསུངས་དེའི ་འོག་ཏུ་བྱད་སྟེམས་བཤད་དེ་ཅིའི་ཕྱིར་ཞེ་ན། གཟའ་དང་རྒྱུ་སྐར་བྱད་སྟེམས་དང་ཞེས་གསུངས་ཏེ། འཇིག་རྟེན་གྱི་ཁམས་སུ་གཟའ་ཆེན་པོ་བརྒྱད་དང། རྒྱུ་སྐར་ཉི་ཤུ་རྩ་བརྒྱད་ལ་སོགས་པ་སེ་སཱོ་བྱད་སྟེམས་ཀྱི་ཛམྦུའི་གླིང་གི་སེམས་ཅན་རྣམས་ལ་ནི ་ནད་དང་ཕྱུག་ནད་དང། ཆོམ་རྐུན་དང་མདངས་འཕྲོག་པ་ལ་སོགས་པ་གནོད་པའི་བྱེ་བྲག་རྣམས་ལ། ཕྲིན་ལས་རྣམ་བཞིའི་ལས་བྱས་ན་འགྲུབ་པར་གསུངས། དེའི་འོག་ཏུ་གདོན་གྱིས་ཉེན་པ་སྟོན་ཏེ། ཅིའི་ཕྱིར་ཞེ་ན། མི་བཟད་གདོན་གྱིས་ཟིན་པ ་དང་ཞེས་གསུངས་ཏེ། འཇིག་རྟེན་གྱི་སེམས་ཅན་རྣམས་ལ་ཕུང་པོ་དང་ཁམས་མ་སྙོམས་པ་དང། སེམས་ཀྱི་རྣམ་པར་རྟོག་པ་ཉོན་མོངས་པའི་གདོན་དང། གཞན་ཡང་བི་ནཱ་ཡ་ཀ་ལ་ལ་སོགས་པའི་གདོན་སྟོང་ཕྲག་བརྒྱད་ཅུ་རྩ་བཞིས་ཉེན་པ་ལ ་ཕྲིན་ལས་རྣམ་བཞིའི་ལས་བྱས་ན་འགྲུབ་པར་གསུངས། དེའི་འོག་ཏུ་མྱ་ངན་ལས་བྱུང་བའི་རྨི་ལམ་སྟོན་ཏེ། ཅིའི་ཕྱིར་ཞེ་ན། མྱ་ངན་ངལ་ལས་བྱུང་བའི་རྨི་ལམ་སྡིག་པ་མཐོང་ན་ཡང་ཞེས་གསུངས་ཏེ། ཉོན་མོངས་པའི་སེམས་ཅན་ཕྱིན་ཅི་ལོག་གི་ལྟ ་བའི་བག་ཆགས་མྱ་ངན་གྱི་གདུངས་པ་ལངས་པའི་རྒྱུས་ལུས་དང་སེམས་ངལ་ཞིང་ཐང་ཆད་པས་བློ་གཏིབས་པས། གཉིད་ལོག་པའི་རྨི་ལམ་ན་ལྟས་ངན་གྱི་རྨི་ལམ་སྡིག་པའི་བག་ཆགས་ལས་བྱུང་བ་དམྱལ་བའི་སྲེག་བ་ལ་སོགས་པའི་རྨི་ལམ་སུམ་ཅུ ་རྩ་གཉིས་རྨིས་པས་རྣམས་ཕྲིན་ལས་རྣམས་བཞིའི་ལས་བྱས་ན་འགྲུབ་པར་གསུངས། དེའི་འོག་ཏུ་ཆོ་གའི་ཐབས་སྟོན་ཏེ། ཅིའི་ཕྱིར་ཞེ་ན། དེས་ནི་རབ་བཀྲུས་གཙང་མ་ཡིན། །མདོ་སྡེ་དམ་པ་མཉན་པར་བྱ་ཞེས་གསུངས་ཏེ། སློབ་དཔོན ་སློབ་མ་སྟ་གོན་ལ་གནས་པར་བྱ་བ་དང། ལྷ་དང་མི་སྟ་གོན་ལ་གནས་པར་བྱ་བ་དང། རྫས་དང་ཡོ་བྱད་ལ་སོགས་པ་སྟ་གོན་ལ་གནས་པའི་ཆོ་གའོ། །དེའི་འོག་ཏུ་སློབ་དཔོན་གྱིས་དཀྱིལ་འཁོར་གྱི་ཆོ་ག་རྫོགས་པར་བྱས་ལ། བདུད་རྩིའི་བུམ ་པས་སློབ་མ་ལ་སོགས་པའི་སྤྱི་བོ་ནས་དབང་བསྐུར་ཞིང་ཁྲུས་བྱ་བ་ནི་ཕྱི་ནང་གི་དྲི་མ་བཀྲུ་བའོ། །དེ་ལྟར་བདུད་རྩིའི་བུམ་པས་ཉོན་མོངས་པ་རྣམས་གཙང་བར་བྱིན་གྱིས་བརླབས་ནས། དེ་ནས་བྱང་ཆུབ་ཏུ་སེམས་བསྐྱེད་དེ། ་མདོ་སྡེའི་དོན་བཤད་ཅིང་ཉན་དུ་བཅུག་ལ། བསྒོམ་པའི་ལུང་དཔོག་ཅིང་ལྷའི་ངོ་བོ་བསྟན་པའི་ཐ་ཚིག་གོ་།དེའི་འོག་ཏུ་ཕྱི་ནང་གི་ཆོས་བསྟན་ཏེ། དེ་ཡང་ཅིའི་ཕྱིར་ཞེ་ན། གང་དག་ཡིད་དགེ་སེམས་དང་ཤིང། གཙང་མའི་གོས་ཀྱིས་རབ་བརྒྱན ་ཏེ་ཞེས་གསུངས་ཏེ། སློབ་མ་གཞི་དད་པ་དང་ལྡན་ཞིང། ཡིད་དགེ་བ་ལ་སེམས་དང་ཞིང་སྤྱོད་པ་ཚང་བ་དང། དཀའ་བློ་བདེ་བ་ལ་ངོ་རྟག་པ་དེ་ལྟ་བུ་དེ་སེམས་ཀྱི་དྲི་མ་དང་བྲལ་བར་བྱས་ཏེ། དེ་ནས་སློབ་དཔོན་གྱིས་སློབ་མ་དེ་ལྟ་བུ་ལ་ནི་རས་སམ་དང ་དཀར་པོ་ལ་སོགས་པའི་གོས་གཙང་མ་བསྐོན་ལ་དྲི་ཞིམ་པའི་མེ་ཏོག་གི་ཅོད་པན་ལ་སོགས་པའི་རྒྱན་མང་པོས་བརྒྱན་ལ། ཕྱི་ནང་གི་བརྒྱན་གྱིས་ལུས་སེམས་མཛེས་པར་བརྒྱན་ལ་དེའི་འོག་ཏུ་ཐེག་པ་ཆེན་པོའི་ཆོས་ཉན་པའི ་ཡོན་ཏན་བསྟན་ཅིང་བསྐུལ་བ་གདབ་སྟེ། ཅིའི་ཕྱིར་ཞེ་ན། ཟབ་མོ་སངས་རྒྱས་སྤྱོད་ཡུལ་པ། །མདོ་སྡེ་འདི་ནི་ཉན་བྱེད་ན་ཞེས་གསུངས་སོ། །དུས་གསུམ་གྱི་སངས་རྒྱས་ཐམས་ཅད་ཀྱི་མཁྱེན་པའི་ཡེ་ཤེས་ཀྱི་རང་བཞིན་རྡོ་རྗེ་རྣམ་པར ་འཇོམས་པའི་མདོའི་དོན་ཟབ་པ་རྒྱ་ཆེ་བ་སངས་རྒྱས་ཉིད་ཀྱི་སྤྱོད་ཡུལ། མདོ་སྡེ་ཐམས་ཅད་སྙིང་པོ་འདི་ཐེག་པ་ཆེན་པོའི་རིགས་ཅན། སློབ་པའི་རྒྱུན་ལ་ཞུགས་པ་གང་གིས་མཉན་པར་བྱེད་པ་དང་ཀློག་ཅིང་འཛིན་པ་དང། ་གཞན་ལ་དོན་ཉམས་སུ་ལེན་པའི་ཡོན་ཏན་སློབ་དཔོན་གྱིས་སློབ་མ་ལ་བསྟན་ཏེ། དེ་ལྟར་བསྟན་ནས་དེའི་འོག་ཏུ་ཉན་པའི་བསོད་ནམས་ཀྱི་ཕན་ཡོན་སྟོན་ཏེ། ཅིའི་ཕྱིར་ཞེ་ན། མདོ་སྡེ་འདི་ཡི་གཟི་བརྗིད་ཀྱིས། སྲོག་ཆགས ་དག་ནི་ཐམས་ཅད་ཀྱི་ཞེས་གསུངས། མདོ་སྡེ་འདི་མཉན་ཅིང་ཉམས་སུ་བླངས་པའི་ཡོན་ཏན་གྱི་གཟི་བརྗིད་ཀྱིས། ཁམས་གསུམ་གྱི་སེམས་ཅན་རྣམས་ཀྱི་ཉོན་མོངས་པའི་རྣམ་པར་རྟོག་པ་དང་སྡུག་བསྔལ་གྱི་བྱེ་བྲག་རྣམས་ལ་ཕན་པའི་ཐ་ཚིག་གོ་།ཅིའི ་ཕྱིར་ཞེ་ན། མི་ཟད་པ་ཡི་ནད་རྣམས་ཀྱང། དེ་དག་ཐམས་ཅད་ཞི་བར་ལྟ་ཞེས་གསུངས་ཏེ། ཁམས་གསུམ་གྱི་སེམས་ཅན་རྣམས་ལ་ལས་དང་ཉོན་མོངས་པའི་བག་ཆགས་རྒྱུ་དང་འབྲས་བུའི་ཚུལ་ཤིན་ཏུ་མི་བཟད་པའི་ནད་ཀྱི་རང་བཞིན་པས། དེ ་ཞི་བར་བྱ་བ་གོང་དུ་གསུངས་པ་ལྟར་བྱ་བའི་ཐ་ཚིག་གོ་།དེ་ལྟར་གནོད་པ་ཞི་ནས་དེའི་འོག་ཏུ་བདེ་བ་ཐོབ་པའི་ཐབས་སྟོན་ཏེ། ཅིའི་ཕྱིར་ཞེ་ན། ཚེ་དང་བསོད་ནམས་འཕེལ་བར་འགྱུར། སྡིག་པ་ཀུན་ལས་རྣམ་པར་ཐར་ཞེས་གསུངས་ཏེ། སེམས ་ཅན་གྱི་ལས་ཀྱི་བག་ཆགས་ཀྱི་མཐུས་ཚེ་ཟད་ཅིང་འཆི་བ་ལ་སོགས་པ་ལ་མདོའི་དོན་མཉན་པས་བསྒོམ་པའི་ཚུལ་མ་ནོར་བར་བྱས་ན་ཚེ་དང་བསོད་ནམས་ཚད་མེད་པ་འཕེལ་བར་འགྱུར་ཞིང། ཉོན་མོངས་པའི་སྡིག་པ་ཐམས་ཅད་ལས ་ཐར་བར་འགྱུར་བའི་ཐ་ཚིག་གོ། ཆོ་གའི་ཐབས་དང་ཕན་ཡོན་བཤད་ཟིན་ཏོ།། །།ད་ནི་བུམ་པའི་ཆོ་གའི་རྐྱེན་བསྟན་ཏེ། ཅིའི་ཕྱིར་ཞེ་ན། ནོར་བུ་ཡུངས་ཀར་དཱུར་བ་དང། ཞེས་གསུངས་ཏེ། ནོར་བུ་ནི་མུ་ཏིག་དང། བྱུ་རུ་དང། ་གཟི་དང། མཆོང་དང། རིན་པོ་ཆེ་དང། ཞེས་བྱ་བའི་ཐ་ཚིག་གོ། ཡུངས་ཀར་ནི་འབྲུ་སྣ་ལྔའི་གཙོ་བོ་སྟེ། དེའི་ཁོངས་སུ་བསྡུ་བ་ནི། ནས་གྲོ་ཏིལ་འབྲས་མོན་སྤང་ལ་སོགས་པའོ། །དཱུར་བ་ནི་ཁ་རྒྱན་གྱི་དོན་ཏེ། དེའི་ཁོངས་སུ་བསྡུ་བ ་ནི་བྱ་གྲི་སིང་གྲི་ཙན་དན་ལ་སོགས་པ་དྲི་ཞིམ་པོའི་ཤིང་ཙན་དན་ལ་སོགས་པ་ཡལ་ག་དང་བཅས་ཞེས་པ་ནི། ད་ནི་རིན་པོ་ཆེ་ལྔ་དང་སྙིང་པོ་སྟོན་ཏེ། རིན་ཆེན་རྨ་མེད་ཙན་དན་བཅས། ཞེས་པ་ནི་རིན་པོ་ཆེ་ནི་རྣམ་པ་ལྔ་སྟེ། བཻདཱུརྱ ་དང། གསེར་དང། ཤེལ་དང། ཨིནྡྲ་ནཱི་ལ་དང། བྱུ་རུ་ཞེས་པའི་དོན་ནོ། །རྨ་མེད་པ་ནི་དེ་རྣམས་ལ་སྐྱོན་ལ་སོགས་པ་མེད་པའོ། །ཙན་དན་ནི་གླ་རྩི་དང་གུར་གུམ་དང། སྤོས་དང། ཙན་དན་དང། ཨ་ཀ་རུ་ལ་སོགས་པའི་བྱེ་བྲག ་སྨོས་པའི་དོན་ཏོ། །ཤེལ་དང་རྡོ་རྗེ་མེ་ཏོག་དང་ཞེས་པ་ནི་ཤེལ་དང་རྡོ་རྗེ་གཉིས་ནི་སྙིང་པོར་ཤེས་པའི་དོན་ནོ། །ཤེལ་ནི་མེ་ཤེལ་དང་ཆུ་ཤེལ་གཉིས་ཀྱི་དོན་ནོ། །ད་ནི་སྙིང་པོ་ཕྱི་མ་གསུམ་གྱི་དོན་སྟོན་ཏོ། །འོ་མའི་སྙིང་པོ་མར་དང། ཤིང་གི ་སྙིང་པོ་བུ་རམ་དང། མེ་ཏོག་ནི་བུམ་པའི་གདན་གྱི་ཐ་ཚིག་གོ། དབྱར་ནི་མེ་ཏོག་གི་དཀྱིལ་འཁོར་བྱ། དགུན་ནི་ཆོན་སྣ་ལྔའི་དཀྱིལ་འཁོར་པདྨ་ལ་སོགས་པ་ལ་བྱ་བའི་དོན་ནོ། །གཞན་དུ་བུམ་པའི་ཁ་རྒྱན་ཏེ། མེ་ཏོག་ལ་སོགས་པ་དག་གི་ཁ ་རྒྱན་བྱ་བའི་ཕྱིར་སྨོས་སོ། །ཆུའི་གསེར་རམ་ཡང་ན་ནི། དངུལ་གྱི་བུམ་པ་དག་ཀྱང་རུང། གཙང་མའི་གོས་ཀྱི་དཀྲིས་ཤིང་དགང་ཞེས་པ་ནི་བུམ་པའི་རྒྱུ་སྟེ། རྒྱལ་པོས་ནི་གསེར་གྱི་བུམ་པ་བྱ། བློན་པོ་ནི་དངུལ་གྱི་བུམ་པ། ཀྱང་ནི་ཚིག་གི ་ལྷག་མ་ཅན་ཏེ། དམངས་ཕལ་པ་ནི་ཟངས་དང་ལྕགས་ལ་སོགས་པའི་བུམ་པ་བྱ་བའི་དོན་ཏོ། །གཞན་དུ་ན་ཕྲིན་ལས་སོ་སོའི་བྱེ་བྲག་ཏུ་ཤེས་པར་བྱའོ། །གཙང་མའི་གོས་ནི་རས་ཁ་ཚར་མ་ཉམས་པ་ཏིང་ངེ་འཛིན་བྱིན་གྱིས་བརླབས ་པའི་ཐ་ཚིག་གོ། དེའི་འོག་ཏུ་གྲངས་སྟོན་ཏེ། ཅིའི་ཕྱིར་ཞེ་ན། ལན་གྲངས་ཉི་ཤུ་རྩ་གཅིག་གམ། ཡང་ན་ལན་གྲངས་བརྒྱ་རྩ་བརྒྱད། །རྡོ་རྗེ་རྣམ་འཇོམས་བཟླས་ནས་ནི། ཞེས་གསུངས་ཏེ། གྲངས་ཀྱི་དོན་ཏེ། དམངས་ཀྱི་ནི་ཉི་ཤུ་རྩ་ ་གཅིག་ལ་སོགས་ཏེ། ཇི་ཙམ་འབྱོར་པའོ། །བློན་པོ་ནི་བརྒྱ་རྩ་བརྒྱད་ལ་སོགས་པ་སྟེ། འགྲུབ་ཚད་དོ། །རྒྱལ་པོ་ནི་བསོད་ནམས་ཆེས་པས་ཐ་མ་བརྒྱ་རྩ་བརྒྱད་དོ། །བློན་པོ་ཐ་མ་ཉི་ཤུ་རྩ་གཅིག་གམ། དམངས་ཀྱི་ཐ་མ་བདུན་ནོ། །དེ་ནི་གྲངས ་ཀྱི་བསྙེན་པའོ། །མཚན་མའི་བསྙེན་པ་དང། ཚིག་དང་དོན་བཟློག་པ་ནི་རང་བཞིན་གྱིས་ཤེས་པར་བྱ་བའི་ཐ་ཚིག་གོ། དེའི་འོག་ཏུ་ཁྲུས་བྱ་བའི་དམིགས་སྟོན་ཏེ། ཅིའི་ཕྱིར་ཞེ་ན། རྒྱལ་པོ་རྟག་ཏུ་ཁྲུས་གྱིས་ཤིག་ཅེས་གསུངས་ཏེ། རྒྱལ་པོ་སྟོབས་ལྡན ་སྙིང་པོ་ལ་སོགས་པ་རྒྱལ་པོའི་རིགས་སུ་གཏོགས་པ་རྣམས་སོ། །རྒྱལ་པོ་སྣ་ལ་སྨོས་པ་ཅིའི་ཕྱིར་ཞེ་ན། བསོད་ནམས་ཆེ་བ་ཡིས་བྱས་ན་སྣ་ཚོགས་ལ་སྨོས་པའི་ཕྱིར་རོ། །དེས་ཐམས་ཅད་དེ་བའི་ཕྱིར་རོ། །དམངས་ནི་རྒྱལ་པོའི་འཁོར་བས ་དོན་གྱིས་ཤེས་པར་བྱ་བའི་ཐ་ཚིག་གོ་།མདོ་ཡི་དོན་གྱི་དགོངས་པ་ལ། །རིགས་པའི་ཚུལ་གྱིས་འདི་གཞུང་འཆང། །འཕགས་པ་རྣམས་ལ་བཟོད་པར་གསོལ། །འདི་གྲུབ་བརྩམས་པས་འདི་གྲུབ་ཤོག། །།རྡོ་རྗེ་རྣམ་པར་འཇོམས ་པའི་གཟུངས་ཀྱི་དོན་རྣམ་པར་བཤད་པ། སློབ་དཔོན་བདེ་བའི་མྱུ་གུས་མཛད་པ་རྫོགས་སོ།། །། (!། རྡོ་རྗེ་རྣམ་འཇོམས་ཀྱི་འགྲེལ་བ་བཞུགས་སོ།)་།རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷ་ར་ཎི་པྲིཏྟི། བོད་སྐད་དུ། རྡོ་རྗེ་རྣམ་པར་འཇོམས་པ ་