Wylie

e-texts based on the ACIP/ALL Input

བིདྱཱ་ཀ་ར་པྲ་བྷཱ་དང། ཞུ་ཆེན་གྱི་ལོཙྪ་བ་བནདེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། (།།འཕགས་པ་དཔུང་བཟང་གི་ཞུས་པའི་རྒྱུད་ཀྱི་དོན་བཞུགས་སོ།)་།!། །རྒྱ་གར་སྐད་དུ། ཨཱརྱ་སུ་བཱ་ཧུ་པ་རི་པྲ་ཙྪ་ནཱ་མ་ཏནྟྲ ་བིཎྜཱརྠ། བོད་སྐད་དུ། འཕགས་པ་དཔུང་བཟང་གིས་ཞུས་པའི་རྒྱུད་ཀྱི་བསྡུས་པའི་དོན། སངས་རྒྱས་དང་བྱང་ཆུབ་སེམས་དཔའ་ལ་ཕྱག་འཚལ་ལོ། །མདོ་སྡེ་འདི་ལས་ནི་སངས་རྒྱས་དང་བྱང་ཆུབ་སེམས་དཔའ་དང། འཇིག་རྟེན་པའི ་ལྷའི་བྱེ་བྲག་རྣམས་ཀྱིས་རིག་སྔགས་དང་གསང་སྔགས་བཤད་པ་གང་ཡིན་པ་དེ་དག་རིགས་གསུམ་པོ་དེ་བཞིན་གཤེགས་པ་དང། པདྨ་དང། རྡོ་རྗེ་དང། དེ་བཞིན་དུ་གཞན་ཡང་ནོར་ཅན་དང། ལྔ་རྩེན་དང་འཇིག་རྟེན་པའི་རིགས་སུ་ཡང ་དག་པར་བསྡུས་པར་སྟོན་ཏོ། །དེ་དག་གི་རིགས་དང། རིགས་སྔགས་དང། གསང་སྔགས་དང། ལས་ཀྱི་དབྱེ་བ་དང་མཉེས་པར་བྱ་བའི་ཐབས་ཁ་ཅིག་ཏུ་ནི་རྒྱས་པར་སྤྲོས་ལ། དེ་ལས་གཞན་དུ་ནི་ཅུང་ཟད་ཙམ་དུ་བསྟན་པ་དང། གཞན ་དག་ཏུ་ནི་མ་གསུངས་སོ་སྙམ་དུ་དགོངས་ནས། བཅོམ་ལྡན་འདས་རྡོ་རྗེ་འཆང་གིས་རིགས་ཐམས་ཅད་ཀྱི་མཉེས་པར་བྱ་བའི་ཐབས་སུ་གྱུར་པ། འཇུག་པ་དང། སྒྲུབ་པ་དང། སྒྲུབ་པའི་སྤྱོད་པ་བསྟན་པ་རྣམས་དཔུང་བཟང་གིས་ཞུས་པའི ་གསང་སྔགས་ཀྱི་མདོ་སྡེའི་ལེའུ་བཅུ་གཅིག་པོ་འདིར་གཏན་ལ་དབབ་པ་བསྟན་ཏོ། །དེ་ལ་ལེའུ་དང་པོ་ནི་དོན་བདུན་གྱིས་བཤད་པར་བསྟན་ལ། ཚིག་དང་པོའི་དོན་ནི་འདི་ལྟ་སྟེ་མདོ་སྡེ་དང། དེ་མཆད་པའི་ཞུ་བ་དང། འབྲེལ་པ་དང། ་བརྗོད་པར་བྱ་བ་དང། དགོས་པ་དང། དགོས་པའི་ཡང་དགོས་པ་རྣམས་ཀྱིས་བསྟན་ཏོ། །གནོད་སྦྱིན་བདག་པོ་ཉི་མ་སྟོང་གི་གཟི། །སྙིང་རྗེས་རྩེ་གཅིག་ཡིད་གྱུར་ཞེས་བྱ་བ་ནས་བརྩམས་ཏེ། དེ་ཕྱིར་མྱུར་དུ་རྩེ་གཅིག ་ཡིད་བྱས་དང། །གསང་སྔགས་མདོ་སྡེའི་ཚུལ་བཞིན་ངས་བཤད་དོ། །ཞེས་བྱ་བའི་བར་གང་གསུངས་པའོ། །དེ་བཞིན་དུ་ཟློས་པ་དང། སྒྲུབ་པ་དང། མི་སྒྲུབ་པ་རྣམས་ཀྱིས་ཀྱང་ཐུན་མོང་གི་བསླབ་པ་ལ་འཇུག་པ་བསྟན་པ་ན་དོན་གཉིས་པ ་སྟེ། གསང་སྔགས་བཟླས་བརྗོད་གང་དག་ངས་གསུངས་པ། །དེ་ཡི་བརྟུལ་ཞུགས་དང་པོར་ངས་བཤད་དོ། །ཞེས་བྱ་བ་ལ་སོགས་པ་ནས། དགེ་བཅུ་དག་གི་ཆོས་ཀྱི་ལམ་ལ་གནས་ན་ཞེས་བྱ་བའི་བར་གསུངས་པའོ། །དེ་བཞིན་དུ་དམ་ཚིག་གི ་དཀྱིལ་འཁོར་རྣམས་དང། གདོན་ལ་སོགས་པའི་དཀྱིལ་འཁོར་དུ་ཞུགས་པའི་ཕན་ཡོན་གསུངས་པ་ནི་དོན་གསུམ་པ་སྟེ། ལྷ་དང་ལྷ་མིན་ཤ་ཁྲག་ཟ་འཐུང་བ། །མཚན་མོར་རྒྱུ་བ་མི་བཟད་འཇིག་རྟེན་ན། །སེམས་ཅན་རྣམས་ལ ་གནོད་པ་བྱེད་ཅེས་བྱ་བ་ལ་སོགས་པ་ནས། དེ་ལས་གང་ཡང་རུང་བའི་དཀྱིལ་འཁོར་ནི། །གཅིག་ཙམ་ཞིག་ཀྱང་དད་པས་བལྟ་བར་བྱ་ཞེས་བྱ་བའི་བར་དུ་གང་གསུངས་པའོ། །སྒྲུབ་པ་པོས་ཁྱད་པར་དུ་དགེ་བའི་ཆོས་ཡང་དག་པར་སྡུད་པ་དང། ་སེམས་ཅན་གྱི་དོན་བྱ་བ་དང། སོ་སོར་ཐར་བའི་སྡོམ་པའི་ཚུལ་ཁྲིམས་ལ་གནས་པར་བསྟན་པ་དང། དེའི་ཕན་ཡོན་བསྟན་པ་ནི་དོན་བཞི་པ་སྟེ། གནོད་སྦྱིན་ཚོགས་དང་མཚན་མོ་རྒྱུ་བ་དག་།ས་བླ་པ་ཞེས་བྱ་བ་ལ་སོགས་པ་ནས ་དེ་བཞིན་ཚུལ་ཁྲིམས་བརྟེན་ནས། དེ་བཞིན་ཆོས་དཀར་མཆོག་།རྣམ་པར་སྐྱེ་ཞེས་བྱ་བའི་བར་གང་གསུངས་པའོ། །སོ་སོར་ཐར་པ་དང་སེམས་ཅན་གྱི་དོན་བྱ་བའི་བསླབ་པའི་ཐབས་ནི་དོན་ལྔ་པ་སྟེ། རྒྱལ་བ་ངས་གསུངས་སོ ་སོར་ཐར་པ་ཡི། །ཚུལ་ཁྲིམས་རྣམས་དག་འདུལ་བ་མ་ལུས་ལས་ཞེས་བྱ་བ་ལ་སོགས་པའོ། །དེ་བཞིན་དུ་དགེ་བའི་ཆོས་ཡང་དག་པར་བསྡུ་བའི་ཐབས་ནི་དོན་དྲུག་པ་སྟེ། བཟླས་པས་སྐྱོན་མདོ་སྡེ་བཀླགས་པར་བྱ་ཞེས་བྱ་བ་ལ་སོགས ་པའོ། དེ་བཞིན་དུ་གྲོགས་པོའི་མཚན་ཉིད་བསྟན་པ་ནི་དོན་བདུན་པ་སྟེ། ནམ་ཡང་འཁོར་ལོ་རྩིག་པའི་ཤིང་རྟ་ནི་ཞེས་བྱ་བ་ལ་སོགས་པ་གང་གསུངས་པའོ།། །།ད་བཞིན་དུ་ལེའུ་གཉིས་པ་ལ་དོན་བཅུ་སྟེ། དེ་ལ་གསང ་སྔགས་མཉེས་པར་བྱ་བའི་དོན་ནི་དང་པོ་སྟེ། རང་སངས་རྒྱས་དང་བདེ་གཤེགས་ཉིད་སྐྱེས་དང། །རྒྱལ་བ་སྔོན་ཆད་གང་ན་བཞུགས་བཞུགས་པ་ཞེས་བྱ་བ་ལ་སོགས་པ་ནས། དེར་ནི་ས་བརྐོས་སྦྱངས་ནས་གནས་རྩིག་པ་ཞེས་བྱ་བ་ལ་སོགས ་པའི་བར་གང་གསུངས་པའོ། །དེ་བཞིན་དུ་ལྷ་བཞག་པའི་དོན་ནི་གཉིས་པ་སྟེ། དྲི་གཙང་ཁང་པ་དེའི་ཕྱོགས་གཅིག་ཏུ། རྒྱལ་བ་ལམ་མཆོག་སྟོན་པ་ཞེས་བྱ་བ་ལ་སོགས་པ་ནས། དེའི་སྤྱན་སྔར་དངོས་གྲུབ་རྟག་ཏུ་བརྩམ་པར་བྱ་ཞེས་བྱ ་བའི་ཐར་གང་གསུངས་པའོ། །སྒྲུབ་པ་དང་རྗེས་སུ་མཐུན་པའི་ཆ་ལུགས་བསྟན་པ་ནི་དོན་གསུམ་པ་སྟེ། དེའི་ཕྱིར་གཙུག་ཕུད་བཞག་སྟེ། སྐྲ་ནི་བྲེགས་ནས་སུ་ཞེས་བྱ་བ་ལ་སོགས་པ་གསུངས་སོ། །དེ་བཞིན་དུ་སློངས་མོ་པའི་ལྷུང་བཟེད་ཀྱི་མཚན ་ཉིད་བསྟན་པ་ནི་དོན་བཞི་པ་སྟེ་ཇི་སྐད་དུ། ཀུ་བ་འམ་ལྕགས་སམ་འཇིམ་པ་ལས་བྱས་པ་ཞེས་བྱ་བ་ལ་སོགས་པ་གསུངས་སོ། །སྒྲུབ་པ་པོ་སློང་མོ་དང་རྗེས་སུ་མཐུན་པའི་ཡུལ་དུ་གནས་པའི་བྱ་བ་ནི་དོན་ལྔ་པ་སྟེ། དེ་བསྟན་པའི་ཕྱིར། བཟའ་ ་བཏུང་མོད་ཅིང་དམངས་རིགས?་མང་བ་ནང། འགྲོན་ལ་མཆོད་བྱེད་ལེགས་པར་གནས་པའི་གྲོང། ཧ་ཅང་མི་ཉེ་ཧ་ཅང་མི་རིང་ཞེས་བྱ་བ་ལ་སོགས་པ་ནས། དེ་ནི་སྡིག་པ་རྣམ་པར་བསལ་བ་དང། །བསོད་ནམས་མ་ལུས་ཡོངས་སུ་བཟུང་བས ་འདག་ཅེས་བྱ་བའི་བར་དུའོ། །ཟས་ལ་མ་ཆགས་པར་བྱ་བ་དང། ཟས་ཀྱི་ཚོད་ཟིན་པར་བྱ་བ་བསྟན་པ་ནི་དོན་དྲུག་པ་སྟེ། ཇི་ལྟར་རྨ་ནི་གསོ་དང་བསལ་བའི་ཕྱིར། །ནད་པ་ལ་ནི་སྨན་པས་སྦྱིན་པ་ལྟར། །དེ་བཞིན་འདིར་ཡང་བཀྲེས ་པའི་སྡུག་བསྔལ་དག་ཅེས་བྱ་བ་དང། བཟའ་བར་གསུངས་ཞེས་བྱ་བ་ལ་སོགས་པ་ནས། ལུས་ནི་ཆུ་ཞིང་བཞིན་དུ་རིག་བྱ་སྟེ། བཟའ་བཏུང་སོགས་ལ་སེམས་ནི་ཆགས་མི་བྱ་ཞེས་བྱ་བའི་བར་དུའོ། །སློངས་མོ་བྱེད་པའི་དུས་ན་སྤྱོད ་ལམ་བཅོས་པར་བསྟན་པ་ནི་དོན་བདུན་པ་སྟེ་དེའི་ཕྱིར། དབང་པོ་དྲུག་པོ་ཡུལ་ལ་འཕྲོ་བ་དག་།བདེ་གཤེགས་གསུངས་པའི་ཤེས་པས་བསྲུང་བར་བྱ། །ལྷུང་བཟེད་དེ་དག་ལན་ཅིག་ཐོགས་ནས་སུ། །གཉའ་ཤིང་གང་དུ་བལྟ་ཞིང་ཞེས་བྱ ་བ་ནས། དེ་བཞིན་གཞ?་རོལ་མོ་བྱེད་པ་རྣམས་།དེར་ནི་སྐྱེས་བུ་ནམ་ཡང་འགྲོ་མི་བྱ་ཞེས་བྱ་བ་ལ་སོགས་པའི་བར་དུའོ། །ཟས་བཟའ་བའི་རིམ་པ་དང། དུས་ངེས་པར་བསྟན་པ་ནི་དོན་བརྒྱད་པ་སྟེ། གང་གི་ཕྱིར། བསོད ་སྙོམས་ཅི་རྙེད་ཁྱེར་ཏེ་འོངས་ནས་ཀྱང་ཞེས་བྱ་བ་ལ་སོགས་པ་གང་གསུངས་པའོ། །དུས་གསུམ་དུ་བཟླས་བརྗོད་བྱ་བ་དང། དུས་གསུམ་དུ་ཁྲུས་བྱ་བ་དང་མཆོད་པ་བསྟན་པ་ནི་དོན་དགུ་པ་སྟེ། དེའི་ཕྱིར་དུས་གསུམ་དུ་ཁྲུས་བྱ་སྟེ། ་ཞེས་བྱ་བ་ནས། སྨྲ་བ་ཨ་རྐ་བིལྦ་འབྲི་ཏ་ཏི། །ཀུ་ཤ་དྲི་ངན་ཡིད་དུ་མི་འོང་སྤང་ཞེས་བྱ་བ་ལ་སོགས་པ་གསུངས་སོ། །སྒྲུབ་པ་པོས་སངས་རྒྱས་རྗེས་སུ་དྲན་པ་ལ་སོགས་པ་རྗེས་སུ་དྲན་པ་དྲུག་ལ་དམིགས་པའི་དུས་བསྟན་པ་ནི་དོན ་བཅུ་པ་སྟེ། འཕྲེང་དང་འདུག་དང་མ་ལོག་ཉལ་བ་དང། །འགྲོ་འཕྲེས་ཟ་ཀློག་བཟླས་བརྗོད་བྱེད་པ་ན། །རྗེས་སུ་དྲན་དྲུག་སོ་སོའི་ཡོན་ཏན་དང། །རིག་པར་བཅས་ཏེ་རྗེས་སུ་དྲན་པར་བྱ་ཞེས་གང་གསུངས་པའོ།། །། ་ལེའུ་གསུམ་པ་ལ་སྒྲུབ་པ་པོའི་དེ་ཁོ་ན་ཉིད་ལ་དམིགས་པ་ནི་དོན་དང་པོ་སྟེ་དེའི་ཕྱིར། འདོད་ཆགས་ལ་སོགས་ཉོན་མོངས་ཚོགས་ལྡན་པའི། །སེམས་ནི་འཁོར་བ་ཡིན་པར་ཀུན་ཏུ་བརྗོད། །ཉོན་མོངས་རྣམ་གྲོལ་ཤེལ་དང་ཟླ་འདྲ་བ། །སྲིད ་པའི་རྒྱ་མཚོ་ཐང་ནི་ཡོངས་སུ་གྲགས་ཞེས་བྱ་བ་ལ་སོགས་པ་གསུངས་པའོ། །བགྲང་ཕྲེང་གི་མཚན་ཉིད་བསྟན་པ་ནི་དོན་གཉིས་པ་སྟེ་དེའི་ཕྱིར། བོ་དེ་ཅོ་དང་དུང་ཤེལ་རུ་རག་ཤ་།ཞེས་བྱ་བ་ལ་སོགས་པ་གསུངས་པའོ། །བཟླས་བརྗོད་ཀྱི ་དུས་སུ་ལུས་དང། ངག་དང། ཡིད་བསྡམས་པ་ནི་དོན་གསུམ་པ་སྟེ། དེ་བསྟན་པའི་ཕྱིར། འདུག་ནས་དབང་པོ་ཡང་དག་བསྡམས་པ་དང་ལུས་ནི་དྲང་ཞིང་བསྟན་པར་བཞག་ནས་སུ། །ཕྱིས་ནི་མ་མཆུ་ཤིན་ཏུ་མཛེས་པར་ཡང། ་སྒུལ་ཞིང་གསང་སྔགས་ཅི་དགར་བཟླས་བརྗོད་བྱ་ཞེས་གསུངས་པའོ། །བཟླས་བརྗོད་ཀྱི་ཉེས་པ་སེམས་མི་བརྟན་པ་དང། གཉིད་ལ་སོགས་པ་དང། དེ་བཞིན་བཟླས་བརྗོད་ལ་གནོད་པ་ཡུལ་རྒྱུ་བ་ལ་སོགས་པའི་རྣམ་པར་རྟོག་པ་རབ་ཏུ་དགག ་པ་ནི་དོན་བཞི་པ་སྟེ་དེ་བསྟན་པའི་ཕྱིར། སེམས་ནི་གློག་དང་སྤྲིན་དང་རླུང་དང་མཚུངས། རྒྱ་མཚོ་ཆེན་པོ་ཡི་ནི་རླབས་དང་འདྲ། །སྒྱུ་ཅན་འདོད་དགུར་ཡུལ་ལ་མངོན་དགའ་བ། །གཡོ་ཞིང་འཆང་པ་ཞེས་བྱ་བ་ལ་སོགས་པ་ནས། ། ་གཉེན་པའི་དགའ་བའི་སེམས་ནི་རྣམ་རྟོག་གིས། །བཟློག་ནས་དགེ་ལ་བརྩོན་དང་ལྡན་པར་བཞག་ཅེས་བྱ་བ་ལ་སོགས་པའི་བར་གང་གསུངས་པའོ། །ཐུབ་པར་བྱ་བ་བསྟན་པ་ནི་དོན་ལྔ་པ་སྟེ་དང་པོར་ཟློས་ནས་བཟླས་བརྗོད་ཟིན་པར་དུ། བྲམ ་ཟེ་རྒྱལ་རིགས་རྗེའུ་དམངས་རིགས་ཞིང་པ་དང། བུད་མེད་མ་ནིང་ཁྱེའུ་བུ་མོ་དང། །སྔགས་པ་ཞེས་བྱ་བ་ལ་སོགས་པ་གསུངས་པའོ། །བཟླས་བརྗོད་བྱས་པ་ལ་སོགས་པ་ལས་བྱུང་བའི་བསོད་ནམས་ཡོངས་སུ་བསྔོ་བར་བསྟན ་པ་ནི་དོན་དྲུག་པ་སྟེ། དེའི་ཕྱིར། མེ་ཏོག་དྲི་བསྟོད་མར་མེ་ཕུལ་བ་དང། །ཚུལ་ཁྲིམས་བརྩོན་འགྲུས་དཀའ་ཐུབ་བྱས་པ་ཡི། །དགེ་བ་དེ་ཀུན་བླ་ན་མེད་པ་ཡི། །སངས་རྒྱས་བྱང་ཆུབ་བླ་མེད་མཆོག་ཏུ་བསྔོ་ཞེས་བྱ་བ ་ལ་སོགས་པ་གསུངས་སོ། །ལུས་དང་ངག་དང། ཡིད་ཀྱི་གནས་ངན་ལེན་དུ་གྱུར་པའི་འཇིག་རྟེན་གྱི་ཆོས་བརྒྱད་པོ་གང་ཡིན་པ་དང། སྟངས་དང། མཆོངས་པ་བྱེད་པ་ལ་སོགས་པ་རབ་ཏུ་དགག་པ་ནི་དོན་བདུན་པ་སྟེ། དེའི་ཕྱིར། ་གྲགས་དང་མ་གྲགས་རྙེད་དང་མ་རྙེད་དང། བདེ་དང་སྡུག་བསྔལ་ཞེས་བྱ་བ་ལ་སོགས་པ་ནས། ལེ་ལོ་དང་ནི་གཡོ་རྒྱུ་རྣམ་པར་སྤངས་ཞེས་བྱ་བ་ལ་སོགས་པའི་བར་གསུངས་པའོ། །ཁ་ཟས་མ་གནང་མ་སྤངས་པ་དང། གསང ་སྔགས་མཉེས་པར་འགྱུར་བ་དང། རྗེས་སུ་མཐུན་པའི་ཁ་ཟས་དཀར་པོ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། ཤ་ཆང་ཀིའུ་དང་བཙོང་དང་སྒོག་སྔོན་དང་ཞེས་བྱ་བ་ལ་སོགས་པ་ནས་ལྷ་མིན་བུ་མོའི་འཁྲུལ་འཁོར་འཇོམས་པའི ་ཚེ། །འབྲུ་མར་ཚིགས་མའི་ཁ་ཟས་མཆོག་ཏུ་བསྔགས་ཞེས་བྱ་བའི་བར་གསུངས་པའོ། །ཇི་སྐད་བསྟན་པའི་དུས་སུ་ཉལ་བའི་རིམ་པ་བསྟན་པ་ནི་དོན་དགུ་པ་སྟེ། ཇི་སྐད་དུ། དེ་ལྟར་བཟླས་བརྗོད་བྱེད་པའི་སྒྲུབ་པ་པོས། ཉིན ་གཅིག་བཞིན་དུ་བྱས་ནས་ཞེས་བྱ་བ་ལ་སོགས་པ་གསུངས་པའོ།། །།དེ་ནས་ལེའུ་བཞི་པ་ལ་རྡོ་རྗེ་རྣམས་ཀྱི་མཚན་ཉིད་བཏན་པ་ནི་དོན་དང་པོ་སྟེ། ཇི་སྐད་དུ། སྒྲུབ་པ་པོ་ནི་ངེས་པར་བཅད་པ་ཡི། །རྡོ་རྗེ་གང ་ཡིན་དེ་དག་བཤད་པར་བྱ་ཞེས་བྱ་བ་ལ་སོགས་པ་ནས་དེ་ལས་གཅིག་ཀྱང་རྙེད་པར་མ་གྱུར་ན། །ཁུ་ཚུར་བཅངས་ནས་རྩེ་གཅིག་སེམས་ཀྱིས་བཟླས་ཞེས་བྱ་བའི་བར་དུ་གསུངས་པའོ། །སྒྲུབ་པའི་རྫས་རྣམས་ཀྱི་གྲངས་བསྟན་པ་ནི་དོན ་གཉིས་པ་སྟེ། དེའི་ཕྱིར། ལྡོང་རོས་གི་ཝང་རལ་གྱི་ཨཉྫ་ན་ཞེས་བྱ་བ་ལ་སོགས་པའོ། །བགེགས་ཀྱི་རིགས་རྣམས་ཀྱི་གྲངས་བསྟན་པ་ནི་དོན་གསུམ་པ་སྟེ། དེའི་ཕྱིར་བགེགས་དང་ལོག་འདྲེན་གྲུབ་པར་མི་དགའ་བ། རིག་པའི་བདུན ་རྒྱུ་ཞེས་བྱ་བ་ལ་སོགས་པ་ནས། །སྒྲུབ་པ་པོ་ལ་འབྱོར་བར་མི་དགའ་བ། །བརྩེ་མེད་རང་རང་རིགས་ལ་བགེགས་ཀྱང་བྱེད་ཅེས་བྱ་བའི་བར་དུའོ། །བགེགས་རྣམས་བགེགས་བྱེད་པ་ན་ལྷ་ལ་ཕུལ་བའི་དྲི་ལ་སོགས་པ་མཆོད་པའི་ཡོ་བྱད་རྣམས ་འཕྲོག་པ་དང། གླགས་རྙེད་ནས་སྒྲུབ་པ་པོའི་ལུས་ལ་འཇུག་པར་བྱེད་དོ། །དེ་ལ་རྒྱུ་གང་གིས་ཡོ་བྱད་རྣམས་འཕྲོགས་པར་བྱེད་པ་དང། ཡོ་བྱད་རྣམས་པ་འཕྲོགས་པའི་ཉེས་པ་གང་ཡིན་པ་དེ་བསྟན་པ་ནི་དོན་བཞི་པ་སྟེ། དེའི་ཕྱིར། རང་གི ་གསང་སྔགས་གཟུགས་སུ་རྣམ་སྤྲུལ་ན། ཕྲེང་བ་དང་ནི་གཏོར་མ་མངོན་དུ་ལེན། ལྷ་ཡིས་ལོག་འདྲེན་གྱིས་བྱས་དེ་མཐོང་ནས། །ཁྲོས་ཤིང་འཁྲུགས་ནས་ཕྱིར་ཡང་ཕྱོགས་པར་འགྱུར་ཞེས་བྱ་བའོ། །བགེགས་རྣམས་དང་པོ་ནས་མི་འབྱུང་བར་བྱ་བ ་དང། ཞི་བར་བྱ་བའི་ཐབས་བསྟན་པ་ནི་དོན་ལྔ་པ་སྟེ། དེའི་ཕྱིར། སྔོན་ཆང་སེམས་ནི་རྨོངས་དང་འཇུངས་པ་ཡི། །ལྷ་ཡི་ལོག་འདྲེན་བགེགས་ཀྱི་ལུགས་འདི་གཏོད་ཅེས་བྱ་བ་ལ་སོགས་པ་ནས། བཟླས་བརྗོད་ཟིན་ནས་ལེགས་པར ་བསྲུང་བྱས་ཏེ། །དཀྱིལ་འཁོར་མང་བྱས་བསྒྲུབ་ལ་འཇུག་པར་བྱ་ཞེས་བྱ་བའི་བར་དུའོ། །སྤྱིར་བགེགས་ཐམས་ཅད་སྒྲུབ་པ་པོའི་རྒྱུད་ལ་འབྱུང་བའི་རྒྱུ་བསྟན་པ་ནི་དོན་དྲུག་པ་སྟེ། དེའི་ཕྱིར་གཞན་དུ་མཆོད་པའི་ཆོ་ག་མེད་པ་དང། །བཟླས ་བརྗོད་སྦྱིན་སྲེག་ཆོ་ག་བྲལ་བའམ། །གང་ཞིག་རྟག་ཏུ་སེམས་ནི་འདི་ལྟར་སེམས། །རིག་པ་གང་ཞིག་གིས་ནི་བསླབ་པར་བྱ། །ཡུལ་དང་རྒྱལ་སོགས་གཏན་ལ་ཆགས་པ་དེའི། །ལུས་ལ་ཐོགས་པ་མེད་པར་རབ་ཏུ་འཇུག་།ཅེས་བྱ་བ་ལ་སོགས ་པ་ནས། སྦྱིན་སྲེགས་བྱེད་པ་ན་ཡང་བགེགས་གཞན་འཇུག་ཅེས་བྱ་བའི་བར་དུའོ། །དེ་བཞིན་དུ་སྤྱིར་བགེགས་ཐམས་ཅད་སྒྲུབ་པ་པོའི་རྒྱུད་ལ་འདོད་ཆགས་སྐྱེད་པར་འགྱུར་བ་བསྟན་པ་ནི་དོན་བདུན་པ་སྟེ། དེའི་ཕྱིར། ཇི ་ལྟར་ཉི་ཟེར་མེ་ཤེལ་ལ་བབ་པའི། །རྐྱེན་གྱིས་མ་བཙལ་མེ་ནི་འབྱུང་བ་ལྟར། །དེ་བཞིན་བགེགས་ཀྱང་ལུས་ལ་ཞུགས་གྱུར་ན། །འདོད་ཆགས་མེ་ཆེན་ཀུན་ཏུ་སྐྱེད་པར་བྱེད་ཅེས་གསུངས་པའོ། །བགེགས་རྣམས་ཁྱད་པར་འབྱུང་བའི་རྒྱུ་དང། དེ ་དག་ཀྱང་སྒྲུབ་པ་པོའི་རྒྱུད་ལས་ཁྱད་པར་དུ་བྱེད་པ་གང་ཡིན་པ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། གཡོ་ཞིང་འགུལ་བ་ཞེས་ནི་བྱ་བ་ཡི། །བགེགས་ནི་ཆུ་དང་སྐྱེས་བུ་འཁྲུ་ཚེ་འཛིན། །བཀྲེས་ཤིང་ལུས་ལ་སྙོམ་ཞིང་གཉིད་ཀྱང་ཆེ། དེ ་བཞིན་ལུས་ལྕི་མཆོག་ཏུ་འཁྲུ་བར་འགྱུར་ཞེས་བྱ་བ་ལ་སོགས་པ་ནས། མེ་ཏོག་འབུལ་ཚེ་མེ་ཏོག་ཆེར་དགོས་པ། །རང་གི་གླགས་རྙེད་མོད་ལ་ལུས་ལ་འཇུག་།རིམས་དང་ཆམ་པ་རུ་ཤིང་རྣ་བ་དང། །གྲོག་པོ་དག་དང་རྣམ་པར་བྲལ་བར ་བྱེད། ཅེས་བྱ་བའི་བར་དུ་གསུངས་པའོ། །དེ་བཞིན་དུ་གཞན་ཡང་སྤྱིར་ན་འདི་ནི་བགེགས་ཐམས་ཅད་སྐྱོན་མེད་པར་བྱེད་པ་དེ་བསྟན་པ་ནི་དོན་དགུ་པ་སྟེ། ཇི་སྐད་དུ། བགེགས་ཀྱིས་བརླམས་པ་ཕྱོགས་ན་ལམ་མིན་ལམ་དུ་མཐོང། །སྤྱོད་པ་སྣ ་ཚོགས་བྱེད་ཅིང་འདོད་ཆགས་རྣམས་ཀྱིས་གདུངས། །བློ་བུར་སྨྲ་ཞིང་ཀློགས་ལ་དོན་མེད་ཀུན་ཏུ་འཕྱིན་ཞེས་པ་ལ་སོགས་པ་ནས། ཁྲོན་སྐམ་ཐོད་པ་རུས་གོང་ཕུང་པོ་དང། ལྕགས་དང་རྡོ་ཕུང་མི་གཙང་ཁང་རུལ་དང། །ཁ་བཞིན་བསྒྱུར་ཞིང་རལ་གྲི། ་མདུང་ཐོགས་པ། །རྨི་ལམ་འདི་རྣམས་རྨིས་པའི་མིང་ཡང་བརླམས་ཞེས་བྱ་བའི་བར་དུ་གསུངས་སོ། །བགེགས་ཐམས་ཅད་ཐོག་མ་ཉིད་ནས་མི་འབྱུང་བར་བྱ་བའི་རྒྱུ་བསྟན་པ་ནི་དོན་བཅུ་པ་སྟེ། དེའི་ཕྱིར། བགེགས་དང་ལོག་འདྲེན ་རྣམ་པར་གཞིག་པའི་ཕྱིར། །བདུད་རྩི་ཐབ་སྦྱོར་དྲག་ཤུལ་ལས་ཅན་སྦྱོར། །སྔགས་པ་དེའི་གསང་སྔགས་ལ་ཞུགས་པ། །བགེགས་དང་ལོག་འདྲེན་རྣམས་ཀྱིས་ཡོངས་མི་ཚུགས་ཞེས་གསུངས་པའོ། །སྒྲུབ་པ་པོའི་རྒྱུད་ལ་བགེགས་འབྱུང་བ ་དང། གཞན་ཡང་སྐྱེས་པ་དང་བུད་མེད་ལ་སོགས་པ་བགེགས་ཀྱིས་ཟིན་པ་དང། མ་ཟིན་པ་རྣམས་ཀྱི་སྡིག་པ་ཉེ་བར་ཞི་བར་བྱ་བ་དང། དབང་ཐང་ལ་སོགས་པ་བསྐྱེད་པའི་ཕྱིར། དེ་དག་དབང་བསྐུར་བའི་དཀྱིལ་འཁོར་དུ་དབང་བསྐུར་བསྟན་པ་དང། ་དེའི་ཆོ་ག་བསྟན་པ་ནི་དོན་བཅུ་གཅིག་པ་སྟེ། ཇི་སྐད་དུ། ཕྱུགས་ལྷས་ཤིང་གཅིག་ལྷའི་ཁང་པ་འམ། །ལམ་གྱིས་བཞི་མདོ་འམ་ཁང་སྟེང་ནགས་ཚལ་དུ། །དཀྱིལ་འཁོར་གྲུ་བཞི་ལྷམ་པ་གྲུ་བཞིའི་ཚད། ཚོན་རྩི་རྣམ་པ་སྣ་ཚོགས་རྣམས ་ཀྱིས་བྲི་ཞེས་བྱ་བ་ལ་སོགས་པ་ནས། སྒྲུབ་པ་པོ་ཡི་མིང་ནི་འབའ་ཞིག་ལ། །བགེགས་རྣམས་གཞིག་ཕྱིར་ཕན་པར་མ་ཟད་ཀྱི། །རྒྱལ་པོའི་འཁོར་དང་བུད་མེད་བུ་པོ་དང། །བུ་མོ་དག་དང་རོལ་མོ་མཁན་རྣམས་དང་ཞེས་བྱ་བ་ལ་སོགས་པ་ལེའུ་ལྔ ་པ་གསུངས་པའི་བར་དུའོ།། །།དེ་ལ་ལེའུ་ལྔ་པ་ལ་བགེགས་ཀྱིས་ཟིན་པ་ལས་ཐར་པའི་སྔགས་བསྟན་པ་ནི་དོན་དང་པོ་སྟེ། དེའི་ཕྱིར། བགེགས་ཀྱིས་བསོད་ནམས་མ་ལུས་ཟད་བྱེད་པས། །དེའི་ཕྱིར་མི་ལ་གསང་སྔགས་གྲུབ་མི ་འགྱུར། །ཇི་ལྟར་ཟླ་བ་སྤྲིན་ལས་རྣམ་གྲོལ་ལྟར། །དེ་བཞིན་བགེགས་ལས་གྲོལ་བ་རྣམ་པར་གསལ་ཞེས་གསུངས་པའོ། །བཟླས་བརྗོད་དང་མཆོད་པ་དང། སྡིག་པ་ཟད་པ་ལ་སོགས་པའི་ཚོགས་པ་དང་ལྡན་པ་བལྟོས་ནས་གསང་སྔགས་ཀྱི་འབྲས ་བུ་ཐོབ་པར་འགྱུར་གྱི་གཅིག་པུ་ཡིས་ནི་མ་ཡིན་ཏེ། འདི་ལྟར་དངོས་པོ་ཐམས་ཅད་ཚོགས་པ་ལ་སྐྱེའི། རྒྱུ་གཅིག་པུས་འགྲུབ་པ་ནི་ཅུང་ཟད་ཡང་ཡོད་པ་མ་ཡིན་ནོ་ཞེས་བསྟན་པ་ནི་དོན་གཉིས་པ་སྟེ། དེའི་ཕྱིར་ས་དང་ཆུ་དང་དུས་དང་རྣམ་བྲལ ་བའི། །སྣོད་ནས་འབྲས་བུ་ལ་ནི་མྱུ་གུ་མེད་ཅེས་བྱ་བ་ལ་སོགས་པ་གསུངས་སོ། །གསང་སྔགས་ཀྱི་འབྲས་བུའི་ཚོགས་བསྟན་པ་ནི་དོན་གསུམ་པ་སྟེ། དེའི་ཕྱིར། ཆོ་ག་ཉམས་ཤིང་ཡི་གེ་གུག་སྐྱེད་མེད། ། ་མཆོད་པ་མེད་ཅིང་མི་གཙང་བཟླས་བརྗོད་བྱས། །གུག་སྐྱེད་ཡི་གེ་ལྷག་པར་གྱུར་པ་ཡི། །གསང་སྔགས་དངོས་གྲུབ་རྒྱ་ཆེར་མི་སྟོར་རོ་།ཞེས་བྱ་བ་ལ་སོགས་པ་ནས། ཇི་ཙམ་སྡིག་པ་མང་པོས་རབ་གང་ཞིང། །ཇི་ཙམ་ལས་དཀར་བསོད་ནམས ་མ་བསགས་དང། །ཇི་ཙམ་ཆོ་ག་མེད་པར་བཟླས་བྱས་པ། །དེ་སྲིད་སྔགས་པས་དངོས་གྲུབ་མི་ཐོབ་པོ་ཞེས་པའི་བར་དུ་གསུངས་པའོ། །བག་མེད་པས་ཆོ་ག་ཉམས་བཞིན་དུ་བཟླས་པ་དང། ཟློས་པའི་བར་བཅད་ནས་རིག་པ་གཞན་བཟླས་པ་དང། ་བསྙེན་པ་ཡོངས་སུ་རྫོགས་ནས་བཟླས་པ་བཏང་ན། གསང་སྔགས་འབུམ་ལྷག་པར་བཟླས་པ་དང། སྦྱིན་སྲེག་བྱ་བ་དེ་བསྟན་པ་ནི་དོན་བཞི་པ་སྟེ། དེའི་ཕྱིར་ཆོ་ག་ཉམས་སམ་བར་བཅད་སྔགས་གཞན་བཟླས། །བཟླས་པ་བཏང་ངམ་གཞན ་ལ་བྱིན་གྱུར་ན། །དུས་གསུམ་མཆོད་པ་ལ་ནི་བརྩོན་བྱས་ནས། །སླར་ཡང་འབུམ་བཟླས་བསྒྲུབ་ལ་འཇུག་པར་བྱ་ཞེས་བྱ་བ་ལ་སོགས་པ་ནས། དེ་ལྟར་བྱས་ན་དངོས་གྲུབ་མྱུར་དུ་ཐོབ་ཅེས་བྱ་བའི་བར་དུ་གསུངས་པའོ། །གཞན་གྱི་གསང ་སྔགས་ཀྱིས་རང་གི་གསང་སྔགས་བཅད་དམ། བཅིངས་སམ། མནན་པར་གྱུར་པ་ན་ཡང། དངོས་གྲུབ་འདོད་པས་ཚིམ་པར་བྱ་བའི་སྦྱོར་བ་བསྟན་པ་ནི་དོན་ལྔ་པ་སྟེ། ཇི་སྐད་དུ། གསང་སྔགས་གཞན་གྱིས་བཅད་དམ་ཞེས་བྱ་བ་ལ ་སོགས་པ་ནས། ཞག་བཅུར་བཀྲུ། དེས་ན་ཞག་བདུན་བྱས་པས་གསང་སྔགས་དང། །བཅིངས་པ་དང་ནི་མནན་པ་ལས་གྲོལ་བར་འགྱུར་ཞེས་བྱ་བའི་བར་དུ་གསུངས་པའོ། །ཇི་སྐད་གསུངས་པའི་ཆོ་གས་གསང་སྔགས་བསྙེན་ཅིང་སྒྲུབ་པའི ་སྦྱོར་བའི་རྣམ་པ་ཐམས་ཅད་ཀྱིས་བསྒྲུབས་ཏེ་མ་གྲུབ་ན། རིག་པ་དེ་ཉིད་ལ་དྲག་པོའི་སྦྱོར་བའི་རྣམ་པར་བྱ་བར་བསྟན་པ་ནི། དོན་དྲུག་པ་སྟེ། དེ་བསྟན་པའི་ཕྱིར། མཆོད་པ་ལ་སོགས་ཆོ་གར་ལྡན་ཡང་ནི། །ཅི་སྟེ་གསང་སྔགས་འབྲས་བུ་མི ་སྟེར་ན། །དེའི་གཟུགས་དུག་དང་སྐ་ཅེས་བྱུག་ནས་སུ། །ཀི་ལི་ཀི་ལི་འགྲོ་ལྡིང་ལ་སོགས་པའི་སྔགས་ཀྱིས་དེ་ལ་ཡུངས་མར་ཚྭ་སྦྱར་བས། ཞེས་བྱ་བ་ལ་སོགས་པའི་བར་དུ་གསུངས་པའོ། །བདེ་བར་གཤེགས་པའི་གསང་སྔགས་རྣམས་ནི་འདོད་ཆགས ་ཞེ་སྡང་སྤངས་པ་ཡིན་ན། དེ་ཇི་ལྟར་གཞན་གྱི་གསང་སྔགས་ལ་གནོད་པར་བྱེད་དེ་དག་ཀྱང་གནོད་པ་ཐམས་ཅད་དང་བྲལ་བ་ཡིན་ན། གཞན་གྱི་གསང་སྔགས་ཀྱང་ཇི་ལྟར་གནས་པར་བྱ་ཞེས་བྱ་བའི་ཀླན་ཀ་ཡོངས་སུ་སྤང་བ་ནི་དོན་བདུན་པ་སྟེ། དེའི་ཕྱིར ་སྔོན་ནི་སྔགས་ལུགས་འཆང་བས་བསྟན་མོད་ཀྱི། །ཇི་ལྟར་རྒྱ་མཚོ་དུས་ལས་མི་འདའ་ལྟར། །སྔགས་ཀྱི་གཞན་གྱི་གསང་སྔགས་མི་མནན་ཅིང། །བཅིང་དང་བཅད་པ་ནམ་ཡང་མི་བྱའོ་ཞེས་བྱ་བ་སོགས་པ་ནས། དེ་བཞིན་སྔགས་པས་གང་ཡང ་རུང་བའི་སྔགས། །བཟླས་ནས་གཞན་གྱི་གསང་སྔགས་མནན་མི་བྱ་ཞེས་བྱ་བའི་བར་དུ་གསུངས་པའོ། །སྒྲུབ་པ་པོས་གསང་སྔགས་བཅད་པ་དང། གདོན་གྱི་ལས་དང་དབྱེ་བ་ལ་སོགས་པའི་ལས་ཕྲན་ཚེགས་རྣམས་མི་བྱ་བར་དགག་པ་ནི་དོན ་བརྒྱད་པ་སྟེ། ཇི་སྐད་དུ། གསང་སྔགས་བཅད་དང་མནན་པར་མི་བྱ་ཞིང་ཞེས་བྱ་བ་ལ་སོགས་པ་ནས། རྒྱ་མོ་ས་མདའ་རྙི་དང་འཛོལ?་བུ་ཡིས། །སེམས་ཅན་གནོད་པར་ནམ་ཡང་མི་བྱའོ་ཞེས་བྱ་བའི་བར་དུ་གསུངས་པའོ། །འཇིག་རྟེན་དང ་འཇིག་རྟེན་ལས་འདས་པའི་གསང་སྔགས་རྣམས་སྒྲུབ་པའི་ཡན་ལག་ལ་སོགས་པའི་གྲངས་ངེས་པར་བསྟན་པ་ནི་དོན་དགུ་པ་སྟེ། དེའི་ཕྱིར། དངོས་གྲུབ་ཕྱིར་ནི་རྣམ་པ་བཅུར་གསུངས་ཏེ། སྔགས་པ་དང་ནི་རང་སྔགས་གཡོག་དང་རྫས། །བརྩོན ་འགྲུས་ཕྱོགས་དང་ས་གཞི་དུས་དང་ནི། །ཡན་ལག་རྫོགས་པའི་ལྷ་དང་སེམས་སྟོབས་སོ་ཞེས་བྱ་བ་ལ་སོགས་པ་ནས་གུག་སྐྱེད་ཀླད་ཀོར་ཆོག་ཚང་ཟུར་ཕྱིན་ལ། །གསང་སྔགས་དག་ཅིང་ཤིན་དུ་ཆོ་གར་བཅས། །སངས་རྒྱས ་བྱང་ཆུབ་སེམས་དཔའ་བསྟེན་པ་ཡིས། །གནས་སུ་བཟློས་ན་ཡིད་འོང་དངོས་གྲུབ་ཐོབ་ཅེས་བྱ་བའི་བར་དུ་གསུངས་པའོ། །སྒྲུབ་པ་ཐ་མ་ལ་འཇུག་པའི་སྒྲུབ་པ་པོས་ཀྱང་ལུས་དང། ངག་དང། ཡིད་ཀྱི་བརྩོན་འགྲུས་ཆུང་བར་མི་བྱ་བ་དེ་བསྟན་པ་ནི་དོན ་བཅུ་པ་སྟེ། ཇི་སྐད་དུ། ཇི་ལྟར་རིགས་དང་དབང་པོ་བཀྲེས་པ་དང། །མཐུ་སྟོབས་ཆེན་པོས་གླང་ཆེན་བསོད་པ་དང། །དེ་བཞིན་སྦྱང་ཁུ་པག་དང་རི་དགས་དང་ཞེས་བྱ་བ་ལ་སོགས་པ་ནས། དེ་བཞིན་སྔགས་པ་སེང་གེ་ཚུལ་གྱིས་སུ། །རབ་དང་འབྲིང་དང ་ཐ་མའི་ལས་རྣམས་ལ། །བརྩོན་འགྲུས་ཆེན་པོ་དང་ནི་ལྡན་པ་དང། །འབད་པ་མཆོག་རྣམས་ཀྱིས་ཀྱང་བསྟེན་པར་བྱ་ཞེས་བྱ་བའི་བར་དུ་གསུངས་པའོ། །སེམས་གཡེང་བའི་རྒྱུ་རྣམས་དང། བཟླས་བརྗོད་ཀྱི་སྐྱོན་རྣམས་སྤངས་པ་ནི་དོན་བཅུ ་གཅིག་པ་སྟེ། དེའི་ཕྱིར། རྫ་རྔའི་སྒྲ་དང་དུང་དང་རྔ་སྒྲ་དང། །ཤིན་ཏུ་འཇིགས་བྱེད་སྐྱེ་བོའི་སྒྲ་དང་ནི། །སེམས་ནི་གཡེང་ཞིང་ཞེས་བྱ་བ་ལ་སོགས་པ་ནས། བཟླས་བརྗོད་བྱེད་ཚེ་མི་མྱུར་མི་ངལ་ཞིང། །སྒྲ་ཆེར་མི་འབྱུང་ཧ་ཅང་ཆུང་བའང་མིན། ་སྨྲ་བཞིན་མ་ཡིན་གཞན་དུ་གཡེང་བཞིན་མིན། །གུག་སྐྱེད་ཀླད་ཀོར་ཚེག་རྣམས་ཉམས་པ་མིན་ཞེས་བྱ་བའི་བར་དུ་གསུངས་པའོ། །གསང་སྔགས་ཀྱི་བཟླས་བརྗོད་ཕྱག་དང་བཅས་པར་བྱ་བའི་ཕན་ཡོན་དང། བཟླས་བརྗོད་བྱེད་པའི་ཚེ། གསང ་སྔགས་ཀྱི་ཡི་གེ་འམ། ལྷ་ཉིད་ཀྱི་གཟུགས་ལ་གསལ་བར་བསྟན་པ་ནི་དོན་བཅུ་གཉིས་པ་སྟེ། དེའི་ཕྱིར། ཇི་ལྟར་ཆུ་རླུང་ཉིན་མཚན་རྟག་ཏུ་ནི། །རྒྱུན་མི་འཆད་པར་འབབ་པར་འགྱུར་བ་ལྟར། །དེ་བཞིན་ཕྱག་བཅས་བཟླས་དང་བརྟུལ་ཞུགས ་ཀྱི། །བསོད་ནམས་ལུས་ཅན་ལ་ནི་འཕེལ་བར་འགྱུར། །ལེ་ལོ་འདོད་ཆགས་མི་དགེ་བཅས་པའི་སེམས། །གང་དང་གང་དུ་གཡེང་ཞིང་རྒྱུ་བ་དག་།རི?་དང་དེ་ནས་མྱུར་དུ་བཟློག་ནས་ནི། །གསང་སྔགས་ཡི་གེ་མཆོད་ལ་ལེགས་པར་སྦྱར་ཞེས ་བྱ་བ་གསུངས་སོ། །སེམས་ཀྱི་བརྟན་པ་ཇི་ལྟ་བུར་བྱས་ནས་བཟླས་བརྗོད་བྱ་བ་དེ་བསྟན་པ་ནི་དོན་བཅུ་གསུམ་པ་སྟེ། དེའི་ཕྱིར། སྣ་རྩར་བལྟ་ཞིང་རྣམ་པར་རྟོག་པ་སྤོང། །?ནས་ཞིག་བསྐྱོད་ཀྱང་རྣམ་པར་མི་གཡོ་བ། །དེ་ཚེ་དམིགས་ལ་གནས ་པ་ཐོབ་པ་སྟེ། །སེམས་ནི་ལས་སུ་རུང་བར་གྱུར་པར་ངེས། །རྩེ་གཅིག་སེམས་དང་ལྡན་པའི་མི་ལ་ནི། །ཡིད་ལས་བྱུང་བའི་དགའ་བ་རབ་ཏུ་སྐྱེ། །དགའ་བས་ལུས་ནི་ཤིན་ཏུ་སྦྱངས་པ་ཐོབ། །ལུ་སྦྱངས་པས་ནི་བདེ་བའི་སྐལ་ལྡན་འགྱུར། ལུས་བདེ་རྩེ་གཅིག ་སེམས་དང་ཏིང་འཛིན་གྱིས། །དེ་ཚེ་བཟླས་བརྗོད་དགོས་པ་མེད་པ་འགྲུབ་ཅེས་གསུངས་པའོ། །སྒྲུབ་པ་པོས་སེམས་མཉམ་པར་བཞག་སྟེ། བཟླས་བརྗོད་བྱས་པའི་ཕན་ཡོན་དང། སེམས་མཉམ་པར་གཞོག་པའི་ཕན་ཡོན་མངོན་པར་མཐོ ་བ་དང། ངེས་པར་ལེགས་པར་འབྲས་བུ་དང་བཅས་པ་གཞན་འབྱུང་བར་བསྟན་པ་ནི་དོན་བཅུ་བཞི་པར་བསྟན་པ་སྟེ། དེའི་ཕྱིར། ཚེ་རབས་གཞན་དུ་གང་དང་གང་བྱས་པའི། །སྡིག་པ་མ་ལུས་བཟླས་བརྗོད་བྱས་པས་འབྱང། །བཟླས་པས་སྡིག ་པ་མ་ལུས་བྱང་གྱུར་ན། །དང་བའི་ཡིད་ཀྱིས་དངོས་གྲུབ་ཐོབ་པར་འགྱུར་ཞེས་བྱ་བ་ལ་སོགས་པ་གསུངས་པའོ། །སེམས་མཉམ་པར་བཞག་པའི་འབྲས་བུའི་ཕན་ཡོན་ཡང་དག་པར་སྟོན་ཏེ། གསང་སྔགས་དངོས་གྲུབ་ཀུན་དང་ཐུན་མོང ་པ། །བདེ་བ་ཆུང་ཞིང་སྡུག་བསྔལ་བརྒྱ་དང་འབྲེལ། །ཉོན་མོངས་དུག་བཅས་རྣམ་པར་འཇིག་འགྱུར་བ། །དང་བའི་སེམས་ཀྱིས་ཐོབ་པར་གྱུར་པ་ཡིན་ཞེས་བྱ་བ་གསུངས་པའོ། །སྒྲུབ་པ་པོ་དབང་ཕྱུག་དང་བྱེད་པ་པོ་ལ་སོགས་པ་འཇིག ་རྟེན་པའི་ལྟ་བ་དགག་པ་ནི་དོན་བཅོ་ལྔ་པ་སྟེ། དེའི་ཕྱིར། འདོད་རྒྱལ་ལས་ཀྱང་མ་བྱུང་དུས་ལས་མིན། །རང་བཞིན་དབང་ཕྱུག་ལས་ཀྱང་བྱུང་མ་ཡིན་ཞེས་བྱ་བ་ལ་སོགས་པ་ནས། དེ་ལྟར་མཐོང་བ་ལྟ་བ་བཟང་པོ ་ཡིན། །གང་ཞིག་གཞན་གྱུར་དེ་ནི་ལྟ་ངན་གསུངས་ཞེས་བྱ་བའི་བར་དུ་གསུངས་པའོ། །སྒྲུབ་པ་པོས་ཀྱང་བཟླས་བརྗོད་ཁྱད་པར་ཅན་ལ་སོགས་པ་གོམས་པར་བྱས་པས་དང་པོར་གསང་སྔགས་ཉེ་བར་འགྱུར་རོ། །དེའི་འོག་ཏུ་བཟླས་བརྗོད་ལ ་སོགས་པ་ཉིད་ཀྱིས་བསྙེན་པ་བྱས་ན་དངོས་གྲུབ་ཉེ་བར་འགྱུར་ཏེ། ཉེ་བར་གྱུར་པ་དེ་དག་གི་མཚན་ཉིད་བསྟན་པ་ནི་དོན་བཅུ་དྲུག་པའོ། །དེ་ལ་གསང་སྔགས་ཉེ་བའི་དོན་གྱི་དབང་དུ་བྱས་ནས། དེ་ལྟར་ཟློས་པའི་གསང་སྔགས་ཉེ་གྱུར་ན། ། ་མཚན་མོ་ཉལ་ན་རྨི་ལམ་འདི་དག་མཐོང། །ཁང་བཟང་ལྗོན་ཤིང་རྒྱལ་མཚན་སེང་གེ་རྟ། །རི་བོ་ཤིང་རྟ་སྒྲ་ལྡན་སྤྲིན་དང་ཀླུ་ཞེས་བྱ་བ་ལ་སོགས་པ་ནས། ཟླ་བ་གཅིག་དང་ཟླ་ཕྱེད་ཉིན་ཞག་དང། །སྐད་ཅིག་གིས་ཀྱང་ཕྱི་ཕྱིར་ཉེ་བར་འགྱུར ་ཞེས་བྱ་བའི་བར་དུ་གསུངས་པའོ། །།ལེའུ་དྲུག་པ་ལ་དངོས་གྲུབ་འགྲུབ་པར་འགྱུར་བའི་མཚན་ཉིད་བསྟན་པ་ནི་དོན་དང་པོ་སྟེ། དངོས་གྲུབ་ཉེ་ན་ཟློས་ལ་དགའ་བ་དང། །སེམས་ནི་སྡིག་པ་ལ་ནམ་ཡང་འཇུག་མི་འགྱུར། །བཀྲེས ་སྐོམ་ཚ་གྲང་རླུང་དང་ངལ་བ་ཡི། །སྡུག་བསྔལ་དྲག་པོས་ཉེན་ཀྱང་གཡོ་མི་འགྱུར་ཞེས་བྱ་བ་ལ་སོགས་པ་ནས། གང་ཚེ་མཁའ་ལ་ལྷ་དང་གནོད་སྦྱིན་དང། །དྲི་ཟ་ལྟ་བུའི་བུ་མོ་ལུས་དང་སྒྲ། །དྲག་པོའི་ཡིད་མྱོས་མཐོང་ཐོས་ན། །དེ་ཚེ་ཤིན་ཏུ ་ཉེ་བར་གྱུར་པ་ཡིན་ཞེས་བྱ་བའི་བར་དུའོ། །དེ་ལྟར་བདག་ཉིད་ལ་དངོས་གྲུབ་ཉེ་བར་གྱུར་པ་རིག་པ་དང། ཉིན་ཞག་གཅིག་གམ་གཉིས་སམ། གསུམ་དུ་སྨྱུང་བ་བྱས་ནས། སྒྲུབ་པ་ལ་འཇུག་པར་བྱ་བ་དེ་བསྟན་པ་ནི་དོན་གཉིས་པ་སྟེ། ་དེ་ནི་ལུས་ནི་དྲི་མེད་དག་པར་རིག་པ་དང་ཞེས་བྱ་བ་ལ་སོགས་པས་བསྟན་ཏོ། །ཞེས་བྱ་བ་ནས། །དྲི་མ་ཟད་ནས་མི་ཡི་ལུས་དག་ན། །རང་གི་འབྱོར་ཕྱིར་སྒྲུབ་པ་བདེ་བར་འཇུག་ཅེས་བྱ་བའི་བར་དུའོ། །སྨྱུང་བར་བྱ་བའི་རྒྱུ་བསྟན་པ་ནི་དོན་གསུམ ་པ་སྟེ། གསུང་དེ་དཔུང་བཟང་གིས་ནི་སླར་གསོལ་བ། །ཟས་ཀྱིས་མི་འདག་ཅེས་ནི་སྔར་གསུངས་ན། །མཆོད་འོད་ཁྱོད་ཀྱིས་ལུས་ངག་བགྱི་ཕྱིར་ཡང། །ཅི་སླད་སྨྱུང་བ་མི་བཟང་བགྱི་བར་གསུངས་ཞེས་བྱ་བའི་བར་དག་གོ་།སྒྲུབ་པ་པོའི་འདོད་ཆགས ་ལ་སོགས་པ་རབ་ཏུ་ཞི་བར་བྱ་བའི་ཕྱིར་མི་གཙང་བ་བསྒོམ་པ་བསྟན་པ་དང། སྒྲུབ་པ་རབ་དང། འབྲིང་དང། ཐ་མ་རྣམས་སྒྲུབ་པའི་ཚེས་གྲང་ངེས་པར་བསྟན་པ་ནི་དོན་བཞི་པ་སྟེ། དེའི་ཕྱིར་འདོད་ཆགས་ཀྱིས་ནི་གདུངས་པར་གྱུར་ན་ཡང། །ལུས་ཀྱི་ཡན ་ལག་འདི་དག་ཐམས་ཅད་ལ། །དྲན་པ་རྩེ་གཅིག་མངོན་དུ་བྱས་ནས་ནི། །ཡེ་ཤེས་མིག་གིས་སོ་སོར་རྣམ་པར་བརྟག་ཅེས་བྱ་བ་ལ་སོགས་པ་ནས། ཡར་གྱི་ཚེས་བརྒྱད་དམ་ནི་བཅུ་བཞི་འམ། །ཡང་ན་བཅོ་ལྔ་ལ་ནི་བཟླས་བརྗོད་བྱ་ཞེས ་བྱ་བའི་བར་དུ་གསུངས་པའོ། །སྒྲུབ་པ་ལ་འཇུག་པའི་ཡོ་བྱད་བསྟན་པ་ནི་དོན་ལྔ་པ་སྟེ། ལྷ་ཡི་གནས་ཀྱི་ས་བདག་བསྟན་པའི་ཕྱིར། །ས་དང་གཅི་བར་བསྲེས་ལ་སོགས་པས་བྱུག་ཅེས་བྱ་བ་ལ་སོགས་པ་ནས་སྦྱིན་བླུགས་བརྒྱ་ཕྲག་བརྒྱར ་ཡང་སྲེགས་པར་བྱ་བའི་བར་དུའོ། །དེ་བཞིན་དུ་རྫས་ལས་བྱུང་བའི་དངོས་གྲུབ་དང། །རྫས་མ་ཡིན་པ་ལས་བྱུང་བའི་དངོས་གྲུབ་ཀྱི་མཚན་མ་ཅི་རིགས་སུ་བསྟན་པ་དང། དེ་ཉིད་ཀྱི་འབྲས་བུ་འབྱུང་བར་བསྟན་པ་ནི་དོན་དྲུག་པ་སྟེ། དེའི་ཕྱིར ་དྲོ་དང་དུད་འཐུལ་མེ་བཞིན་འབར་བ་དང། །རིམ་བཞིན་བཟློགས་ནས་བྱུང་ནའང་འགྲུབ་པར་གསུངས། །དྲོ་ལས་འགྲོ་བ་ཐམས་ཅད་དབང་འགྱུར་ཏེ། །དུད་པ་འཐུལ་བས་ལུས་ནི་སྣང་བར་འགྱུར། །འབར་བས་མཁའ་ལ་ཤིན་ཏུ་འགྲོ ་འགྱུར་ཏེ། ཞེས་བྱ་བ་ལ་སོགས་པ་ནས། གསང་སྔགས་གཟུགས་ནི་མངོན་དུ་མཐོང་ན་འགྲུབ་ཅེས་བྱ་བའི་བར་དུ་གསུངས་པའོ། །སྒྲུབ་པའི་དུས་ན་མཆོད་ཡོན་དབུལ་བའི་ཆོ་ག་དང། མཆོག་བསླང་བར་བསྟན་པ་དང། དེ་བཞིན ་དུ་མཆོག་ཐོབ་ནས་ཀྱང་ལྷ་ཉིད་སླར་གཤེགས་སུ་གསོལ་བར་བསྟན་པ་ནི་དོན་བདུན་པ་སྟེ། དེའི་ཕྱིར། མེ་ཏོག་མཉམས་དབྱིག་དང་ཆུར་བསྲེས་ཤིང། །བསྟོང་དང་བཅས་པ་མཆོད་པ་རྒྱུན་བསྲིངས་ནས། །རྩེ་གཅིག་ཡིད་ཀྱིས་མགོ་བཏུད ་ཕྱག་བྱས་ཏེ། །དད་པས་བསྟོད་ཅིང་མཆོད་ཡོན་ཕུལ་ནས་སུ། །གསང་སྔགས་བརྗོད་ཅིང་སླར་ཡང་གཤེགས་སུ་གསོལ། །གསང་སྔགས་ཀུན་ལ་ཚུལ་ནི་འདི་ཡིན་ནོ་ཞེས་གསུངས་སོ། །རོ་ལངས་སྒྲུབ་པ་པོའི་མཚན་ཉིད་དང། རོ་ལངས ་བསླངས་པའི་མཚན་ཉིད་དང། རོ་ལངས་འགྲུབ་པའི་གནས་བསྟན་པ་དང། རོ་ལངས་པའི་དངོས་གྲུབ་པའི་དཀྱིལ་འཁོར་རྣམས་ཁ་བསྟན་པ་དང། རོའི་ལུས་བྱི་དོར་བྱ་བ་དང། མཆོད་པ་རྣམ་པ་ལྔའི་ཡོ་བྱད་ཀྱི་ཆོ་ག་དང། གསང་སྔགས་བཟླས ་བརྗོད་བྱ་བའི་ཆོ་ག་དང། རོ་ལངས་པ་ལ་བགེགས་བྱུང་བ་རབ་ཏུ་ཞི་བར་བྱ་བ་དང། དངོས་གྲུབ་བ་སླང་བ་ནི་དོན་བརྒྱད་པ་སྟེ། དེའི་ཕྱིར། སེམས་སྟོབས་མཆོག་དང་ཡང་དག་ལྡན་པ་དེས། །འདིར་ནི་ཤིན་ཏུ་འཇིགས་པའི་ཡིད་ཀྱང་བྱ། །སེམས ་སྟོབས་ཆུང་བའི་མི་ལ་ཤ་ཟ་ཡིས། །གླགས་མཐོང་ནས་ནི་ཕུང་བར་བྱས་པར་གྱུར་ཞེས་བྱ་བ་ལ་སོགས་པ་ནས། གང་ཞིག་གསང་སྔགས་ཆོ་ག་ཞིབ་མོ་ལས། །མཐོང་བའི་དངོས་གྲུབ་དེ་ནི་ཐོགས་མེད་ངེས་ཞེས་བྱ་བ་འདིར་རྒྱས་པར་སྦྱར་རོ། །རོ ་ལངས་བསླང་པའི་གསང་སྔགས་ཀྱི་དངོས་གྲུབ་ཀྱི་གྲངས་བསྟན་པ་དང། སེམས་སྟོབས་མེད་པའི་སྒྲུབ་པ་པོ་རོ་ལངས་སློང་བའི་ཉེས་པ་བསྟན་པ་ནི་དོན་དགུ་པ་སྟེ། དེའི་ཕྱིར། གཏེར་གྱི་ཕྱོགས་དང་ཕུག་ཏུ་འགྲོ་བ་དང། །རལ་གྲི་ཨཉྫ་ན་བཞོན ་མངག་གཞུག་དང། །འབྱུང་ཀུང་གསེར་བསྒྱུར་རྩི་དང་བཅུད་ཀྱིས་ལེན། །མཁའ་ལ་འགྲོ་བ་དངོས་གྲུབ་རབ་ཏུ་སྟེར། །བསྲུང་བའི་སྟོབས་མེད་སྔགས་ཀྱི་སྟོབས་མེད་དང། །དཀའ་ཐུབ་སྟོབས་མེད་སེམས་སྟོབས་མེད་པ་ཡི། །བླ་གཞན་གང ་ཞིག་རོ་ལངས་དངོས་གྲུབ་ཚོལ། །དེ་ནི་མཚན་མོ་རྒྱུ་བ་རྣམས་ཀྱིས་བསད་ཅེས་གསུངས་པའོ།། །།ལེའུ་བདུན་པ་ལ་ཤ་ཆེན་པོ་བཙོང་བའི་ཆོ་ག་བསྟན་པ་ནི་དོན་དང་པོ་སྟེ། ཇི་སྐད་དུ། མི་གང་མི་ལ་ཤ་ནི་འཚོང་འདོད་དེས། །མར་གྱི ་ངོ་ལ་དུར་ཁྲོད་སོང་ནས་སུ། ཞེས་བྱ་བ་ལ་སོགས་པ་ནས། ཤ་ཡི་ཆོ་ག་ངས་གསུངས་དེ་དག་ནི། །གསང་སྔགས་མ་བསླབ་པ་ཡིས་བསྟེན་མི་བྱ། །རིག་མཆོག་གཙུག་ཏོར་སྟོབས་ཆེན་ལ་སོགས་པས། །དུར་ཁྲོད་དུ་ནི་བསྲུང་བ་ངས ་གསུངས་སོ་ཞེས་བྱ་བའི་བར་དུ་གསུངས་པའོ། །དེ་བཞིན་དུ་དབབ་པ་དང། བསྐྲད་པར་བྱ་བ་དང། མ་དག་གཞོམ་པ་དང། གྲོང་དང་གྲོང་ཁྱེར་དུ་གནོད་པ་བྱེད་པ་འབྱུང་བར་བྱ་བ་དང། ཤ་ཟ་དང་སྲིན་པོ་དང། ས་བླ་དང། གནོད་སྦྱིན་དང། ་མ་མོ་དང། དྲག་པོ་ལ་སོགས་པའི་ལྷ་རྣམས་ལ་མིའི་ཤ་དང། དེ་བཞིན་དུ་བ་ལང་དང། མ་ཧེའི་ཤ་ལ་སོགས་པ་ཤའི་སྦྱིན་སྲེག་གི་ཆོ་ག་བྱ་བར་བསྟན་པ་ནི། དོན་གཉིས་པ་སྟེ། དེའི་ཕྱིར། གསང་སྔགས་དྲག་པོ་གང་ཞིག་ཤ་ཟ་བ། །དེ ་ལ་དུར་ཁྲོད་མི་ཤ་སྦྱིན་སྲེག་བྱ་ཞེས་བྱ་བ་ལ་སོགས་པ་ནས་མི་ཡི་ཤ་ནི་རྙེད་པར་མ་གྱུར་ན། །བ་ལང་ཤ་ནི་སྦྱིན་སྲེག་དེ་བཞིན་ཤིས། །མ་ཧེའི་ཤ་འམ་ཁྱི་ཤ་མར་བསྲེས་པ། ཚེས་གྲངས་དག་ལ་སྨྱུང་བྱས་སྦྱིན་སྲེག་བྱ་ཞེས་བྱ་བའི་བར་དུ་གསུངས ་པའོ། །དེ་བཞིན་དུ་འཇིག་རྟེན་དང་འཇིག་རྟེན་ལས་འདས་པའི་རྒྱུད་དུ་གསུངས་པའི་གནོད་སྦྱིན་མོའི་གསང་སྔགས་ས་རྣམས་ཀྱི་མཆོག་ལ་སོགས་པའི་དབྱེ་བ་བསྟན་པ་དང། སྤྱིའི་མཆོད་པའི་ཡོ་བྱད་ཀྱི་མཚན་ཉིད་བསྟན་པ་ནི་དོན་གསུམ་པ་སྟེ། ཇི ་སྐད་དུ། གནོད་སྦྱིན་མོ་ཡི་ཆོ་ག་ཞིབ་མོར་ནི། །གསང་སྔགས་མཉེས་བྱས་གྲུབ་པའི་དེ་རྣམས་སྟེར། ཞེས་བྱ་བའི་རྒྱས་པར་བྱུང་བ་ན། །མ་དང་སྒྱུག་མོ་སྲུ་མོ་གང་ཡིན་དེ། །ཡིད་བཞིན་རིན་ཆེན་བཞིན་དུ་གྲུབ་པ་མཆོག་། ་ཡིད་འོང་གྲོགས་མོ་བུ་མོ་གྲུབ་པ་འབྲིང། །ཆུང་མ་མནའ་མ་གྲུབ་པ་ཐ་མར་བསྒྲགས། །དུས་གསུམ་དུ་ནི་མེ་ཏོག་ཕྲེང་བ་དྲི། །མར་རམ་འབྲུ་མར་མར་མེ་ཙན་དན་དང། ། ཀར་དྲི་ཞིམ་བདུགས་པས་མཆོད་པ་དང། །གཏོར་མ་སྣ་ཚོགས་རྟག ་ཏུ་མཚན་མོ་སྦྱིན་ཞེས་གསུངས་པའོ། །གནོད་སྦྱིན་མོ་མངོན་དུ་ཕྱོགས་པར་གྱུར་པའི་མཚན་མ་བསྟན་པ་ནི་དོན་བཞི་པ་སྟེ། དེའི་ཕྱིར། གནོད་པ་བྱེད་ཚེ་འགྲོ་པར་མི་བྱ་ཞིང། །རྙེད་པ་མང་ཉུང་ལ་ཡང་འདོད་མི་སྐྱེ། །སྔགས་ལས་མཚན་མོ ་ཁྲུས་ནི་དག་བྱས་ནས། །བརྩོན་འགྲུས་རབ་ཏུ་བསྐྱེད་དེ་བསྒྲུབ་པར་བྱ། །སྔགས་པ་སེམས་རྨོངས་པ་གཞན་ནི། བརྩམས་ན་ཕུང་བར་ཡང་ནི་འགྱུར་བ་ཉིད། ཅེས་བྱ་བ་གསུངས་སོ། །དེ་བཞིན་དུ་ཤ་ཟ་མོའི་གནོད་སྦྱིན་དང། ཀླུ་སྒྲུབ་པའི་ཆོ་ག་སྒྲུབ་པ་ནི་དོན ་ལྔ་པ་སྟེ། དེའི་ཕྱིར། ཤ་ཟའི་གནོད་སྦྱིན་མོ་འང་དེ་བཞིན་ཏེ། དེ་ལས་ཆོག་ལྷག་པ་འདི་རྣམས་བྱ། །ཤ་ཆང་ལ་ཕུག་ཚོད་མ་ཅུང་བདེ་དང། །ནས་ཆན་མ་ཤའི་ཆན་དང་འབྲས་ཆན་ཉ་ཞེས་བྱ་བ་ལ་སོགས་པ་ནས། ཕྲེང་བ་མེ་ཏོག་དྲུག་པ་སྔོན ་པོ་དག། ཅི་སྙེད་བྲང་གིས་འགྲོ་བ་རྣམས་ལ་དབུལ་ཞེས་བྱ་བའི་བར་དུ་གསུངས་པའོ། །གསལ་བར་སྟོན་པ་དབབ་པའི་ཕྱིར། །མཐེ་བོང་དང་མེ་ལོང་ལ་སོགས་པ་བཞི་རྣམས་བསྟན་པ་ནི་དོན་དྲུག་པ་སྟེ། དེའི་ཕྱིར། མཐེ་བོང་མེ་ལོང་རལ་གྲི་ཆུ་བར ་ཤེལ། །མར་མེ་ས་གཞི་བཅས་དང་ནམ་མཁའ་དང། །ལྷ་གཟུགས་ལྷུང་བཟེད་ནོར་བུ་མེ་འབར་བ། །འདི་ལ་གསལ་བར་སྟོན་པ་རྟག་ཏུ་འབྱུང་ཞེས་བྱ་བ་གསུངས་སོ། །གསལ་བར་སྟོན་པ་རྣམས་ཕེབས་པའི་གྲུབ་པ་བསྟན་པ་ནི་དོན་བདུན་པ་སྟེ། ཇི ་སྐད་དུ། འདས་པ་དང་ནི་མ་འོངས་ད་ལྟར་དང། །མཐོ་རིས་ས་རྙེད་དུས་དང་མི་ལྡན་དང། །ལྷ་དང་ལྷ་མི་དགེ་དང་མི་དགེ་བའི། །ལས་རྣམས་ཐམས་ཅད་གསལ་བར་སྟོན་པས་རྟོགས་ཞེས་བྱ་བ་གསུངས་སོ། །གསལ་བར་སྟོན་པ་རྣམས་མི་འབབ ་པའི་ཉེས་པ་གང་ཡིན་པ་དང། མཐེ་བོང་ལ་སོགས་པ་ལ་བབས་ན་ཡང་བདེན་བར་མི་སྟོན་པ་དང། ལོག་པར་སྟོན་པ་དང། ཅུང་ཟད་ཙམ་སྟོན་པར་བྱེད་པ་དེ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། ཆོ་ག་ཉམས་པ་འམ་ཡང་ན་ཕྱེད་བཟླས ་སམ། །ཡི་གེ་ཆད་དམ་ཡི་གེ་ལྷག་པ་དང། །བཟླས་བརྗོད་མ་བྱས་དད་པ་མེད་པ་དང། །མཆོད་པ་མེད་ཅིང་ས་གཞི་མི་གཙང་དང། །སྤྲིན་གྱི་ཚོགས་ཀྱིས་ཉི་ཟེར་བསྒྲིབས་པ་དང། །བྱིས་པ་ཡན་ལག་ཉམས་ཤིང་ལྷག་པ་དང། །དེ་ལྟ་བུ ་ལ་མི་ཡི་གསལ་སྟོན་པ། །འབབ་པར་མི་འགྱུར་དགོས་པ་ཡོང་མི་སྟོན་ཞེས་བྱ་བ་གསུངས་སོ། །གསལ་བར་སྟོན་པ་ཐམས་ཅད་དབབ་པའི་ཆོ་ག་གང་ཡིན་པ་དེ་བསྟན་པ་ནི་དོན་དགུ་པ་སྟེ། ཇི་སྐད་དུ། གསལ་སྟོན་དབབ་ཕྱིར་སྔོན་དུ་ཆོ་ག ་བཞིན། །བཟླས་ཤིང་ཚེས་གྲངས་བཟང་ལ་སྔགས་པ་ཡང། །བསྲུང་བྱས་གོས་དཀར་ས་དང་གཅི་བ་ཡིས། །བ་ཀོ་ཙམ་གྱིས་ས་གཞི་ལེགས་པར་བྱུག་།བྱུག་སྤོས་དང་ནི་བདུག་སྤོས་མེ་ཏོག་དང། །ལྷ་བཤོས་མར་མེ་དག་ཀྱང་ཕུལ་ནས་སུ།། ་བྱིན་པ་གཞོན་ནུ་སྟ་གོན་གནས་པར་བྱ། །དེ་ནས་ནང་པར་ཆོ་ག་འདི་ཀུན་བྱ། །གྲུས་བྱས་ལུས་ལ་གོས་དཀར་གཙང་བགོས་ཏེ། །ཤར་ཕྱོགས་ཁ་བལྟས་ཀུ་ཤའི་སྟན་སྟེང་དུ། །འདུག་ནས་གསང་སྔགས་རྗེས་སུ་དྲན་པར་བྱ། །མེ་ལོང་ཐལ་བ ་གཙང་མས་ལན་བདུན་ནམ། །བརྒྱད་དམ་ཡང་ན་བཅུར་ནི་ཕྱིས་ནས་སུ། །རྩེ་གཅིག་སེམས་ཀྱིས་གསང་སྔགས་ཟློས་བཞིན་དུ། །བྱིས་པ་གཞོན་ནུ་ནུབ་ཏུ་ཁ་བལྟས་པས། །ལྷ་ཡི་མིག་གིས་བལྟས་ན་འདས་པ་དང། །ད་ལྟར་དང་ནི་མ་འོངས ་མཐང་བར་འགྱུར། །མེ་ལོང་ཞེས་བྱའི་ཆོ་ག་མཛའ་དག་ནི། །རལ་གྲི་གསལ་བར་སྟོན་ལ་སྦྱར་བར་བྱ། །མཐེ་བོང་རྒྱ་སྐྱེགས་ཁུ་བས་བསྐུལ་ནས་སུ། །འབྲུ་མར་དྲི་ཞིམ་དག་གིས་གདབ་པར་བྱ། །བུམ་པ་གཅང་མ་ཆུས་བཀང་མི ་ཡོར་བཞག་།ས་ལྟར་ལྷུང་བཟེད་ནོར་བུ་ཆུས་ཡིས་གདབ། །སྐུ་གཟུགས་ལ་ནི་མེ་ཏོག་བྱུག་སྤོས་དབུལ། །དེ་ནས་བྱིས་པ་གཞོན་ནུས་བལྟ་བར་བྱ་ཞེས་གསུངས་སོ། །གསལ་བར་སྟོན་པ་དབབ་པའི་དགོས་པ་བསྟན་པ་ནི་དོན་བཅུ་པ་སྟེ། ཇི་སྐད་དུ། གསལ ་བར་བསྟན་དང་རྨི་ལམ་ལ་སོགས་ལས། །དངོས་གྲུབ་བརྟགས་ཏེ་དེ་ནས་བཟླས་བརྗོད་བྱ་ཞེས་བྱ་བ་གསུངས་སོ། །དེ་བཞིན་དུ་གལ་ཏེ་རྒྱུ་ཞིག་ལ་གསལ་བར་སྟོན་པ་ཕེབས་ཀྱང། མཆོད་པ་ཉམས་པ་ལ་སོགས་པའི་ཉེས་པས་སྒྲུབ་པ་ལ་སོགས་པ ་གཏན་ལ་?་བར་མ་གྱུར་ན། དེའི་ཚེ་སྔར་རིག་སྔགས་མི་སྡུག་པ་ཆོ་ག་བཞིན་དུ་བཟླས་བརྗོད་བྱས་ནས་ཁྱེའུ་དང་བུ་མོ་ལ་ཕབ་སྟེ། དངོས་གྲུབ་ལ་སོགས་པ་གཏན་ལ་དབབ་པར་དྲི་བ་དེ་ནི་དོན་བཅུ་གཅིག་པ་སྟེ། ཇི་སྐད་དུ། གལ་ཏེ་ཡིད་ནི་ཆེས ་པར་མ་གྱུར་ན། །དེ་ནས་རིག་སྔགས་མི་སྡུག་བཟླས་བརྗོད་བྱ་ཞེས་བྱ་བ་ལ་སོགས་པ་ནས། སྔ་མ་བཞིན་དུ་གསང་སྔགས་ཆོ་ག་དག། དམ་ཚིག་ཇི་བཞིན་མ་ལུས་སྦྱར་ན་ནི། །བདག་གི་ཡིད་དང་མཐུན་པའི་དངོས་གྲུབ་ཐོབ། །སྔགས་པ་ཡུན ་རིང་ཉོན་མོངས་མི་འགྱུར་རོ་ཞེས་བྱ་བའི་བར་དུ་གསུངས་སོ།། །།དེ་བཞིན་དུ་ལེའུ་བརྒྱུད་པ་འདིར་ནི། ཐར་པ་འདོད་པ་རྣམས་ཁོ་ནས། འཕགས་པའི་ལམ་ཡན་ལག་བརྒྱད་པ་ལ་སོགས་པའི་བསླབ་པའི་འཇུག་པ་དང་ལྡོག་པའི་བསླབ་པ ་ལ་བདག་ཉིད་མངོན་པར་བརྩོན་པར་བྱ་བ་མ་ཟད་ཀྱི་གསང་སྔགས་སྒྲུབ་པས་ཀྱང། འཇུག་ཅིང་གོམས་པར་བྱ་དགོས་སོ་ཞེས་གསུངས་པར་བསྟན་པ་ནི་དོན་དང་པོ་སྟེ། དེའི་ཕྱིར། སངས་རྒྱས་ཀྱིས་གསུངས་ཡན་ལག་བརྒྱད་ལམ་ནི། །ཡང་དག་འཚོ ་དང་ལས་མཛའ་ཞེས་བྱ་བ་ལ་སོགས་པ་ནས། ཡུལ་སའི་གཏམ་དང་མི་དབང་བརྟེན་པ་དང། །དམག་དང་གྱང་དང་ན་ཅུང་གཏམ་ངག་དང། །སྲུང་ལྡེབས་དང་ནི་སྔོན་གྱི་ལོ་རྒྱུས་གཏམ། །འདོད་ཆགས་དང་ནི་སྨད་འཚོང་གཏམ། །མི་བྱ་ཞེས་བྱ་བའི་བར་དུ་གསུངས ་པའོ། །དེ་བཞིན་དུ་སྒྲུབ་པ་པོ་ནི་རྣམ་པ་གཉིས་ཏེ། ལ་ལ་ནི་གནས་གཅིག་ཁོ་ནར་སྔར་བསྙེན་པ་ཡོངས་སུ་རྫོགས་པར་བྱ་བའི་བསམ་པས་མཆོད་ཡོན་ཕུལ་ཏེ། སྔོན་དུ་བསྙེན་པའི་བཟླས་བརྗོད་རྩོམ་པར་བྱེད་དོ། །གཞན་དག་ནི་དགུན་དང་དཔྱིད ་ཟླ་བརྒྱད་ལ་གནས་མ་ངེས་པ་ཉིད་དུ་སྔར་གཉེན་པའི་བཟླས་བརྗོད་བྱེད་ཅིང། དབྱར་ཟླ་གསུམ་ནི་གནས་གཅིག་ཏུ་སྔར་བསྙེན་པའི་བཟླས་བརྗོད་རྫོགས་པར་བྱ་སྟེ། སྒྲུབ་པར་བྱེད་དོ། །དེ་དག་ཀྱང་བསོད་སྙོམས་ལ་འགྲོ་བ་ལ་མ་གཏོགས་པར་ཟློས་པའི ་གནས་ལས། གཞན་གྲོང་དང་གྲོང་ཁྱེར་ལ་སོགས་པར་འཕྱན་དུ་འགྲོ་བ་དགག་པར་བསྟན་པ་ནི་དོན་གཉིས་པ་སྟེ། དེའི་ཕྱིར། སྔགས་པ་གསང་སྔགས་བཟླས་པ་ནོས་པ་ནི། །གྲོང་དང་གྲོང་ཁྱེར་ཁྱིམ་དང་གཙུག་ལག་ཁང། །མཆོད་རྟེན་དང་ནི ་བསྟི་གནས་དཀའ་ཐུབ་གནས། ཀུན་དགའ་ལམ་མམ་རྫིང་བུར་འགྲོ་མི་བྱ། །སྔར་བཤད་པ་ཡི་གནས་རྣམས་མ་རྙེད་ན། །ལྷ་ཁང་སྟོང་པ་དག་གམ་ཤིང་དྲུང་ངམ། །རི་དང་ཆུ་བོ་ཆུ་ཀླུང་འབབ་ཆུ་དང། །ནགས་ཚལ་སྟོང་པ་དང་ནི་ཡུལ་སྟོང་དང། ་གནས་གང་རུང་བར་སྔགས་པས་གནས་ཤིང་བཟླས་ཞེས་བྱ་བ་རྒྱས་པར་གསུངས་པ་དང། ཡང་ན་གནས་ནི་ངེས་པར་མ་བྱས་ན། །ཟླ་བ་བརྒྱད་པོ་འདི་ཡི་དུས་དག་ཏུ། གནས་འདི་གང་ཡང་རུང་བ་གཅིག་ཏུ་བསྟེན་ཞེས་བྱ་བ་རྒྱ་ཆེར་གསུངས་སོ། །སྒྲུབ ་པ་པོས་བསྙེན་པ་ཡོངས་སུ་རྫོགས་ཀྱང་དབྱར་གྱི་དུས་སུ་སྒྲུབ་པ་དགག་པ་དང། མ་གྲུབ་པའི་བར་དུ་བཟླས་བརྗོད་ཡོངས་སུ་མི་བཏང་བ་དང། བསྒྲུབ་པའི་དུས་སུ་དབང་བསྐུར་བའི་དཀྱིལ་འཁོར་དུ་དབང་བསྐུར་བ་དང། །བདག་ཉིད་བསྲུང་བར་བྱ་བ་དེ་བསྟན ་པ་ནི་དོན་གསུམ་པ་སྟེ། དེའི་ཕྱིར། སྔགས་པ་དབྱར་ནི་སྒྲུབ་པ་ལ་མི་འཇུག་པར། །བཟླས་བརྗོད་ཀྱིས་ནི་དུས་ཀྱང་འདས་པར་བྱ། །དབྱར་འདས་ནས་ནི་གསང་སྔགས་གཟི་བསྐྱེད་པས། །བདག་ཉིད་བསྲུང་བྱས་སྒྲུབ་ལ་འཇུག ་པར་བྱ་ཞེས་བྱ་བ་གསུངས་སོ། །དེ་བཞིན་དུ་ཞི་བ་ལ་སོགས་པའི་ཆོ་གའི་ལས་ཀྱི་ཁྱད་པར་གྱིས་སྦྱིན་སྲེག་གི་ཐབ་ལ་སོགས་པའི་མཚན་ཉིད་བསྟན་པ་ནི་དོན་བཞི་པ་སྟེ། དེའི་ཕྱིར། མེ་ཐབ་ཟླུམ་པོ་གྲུ་གསུམ་གྲུ་བཞི་དང། །པདྨ་ལྟ་བུར་བྱས་ཏེ ་དབྱིབས་ལེགས་ཤིང་ཞེས་བྱ་བ་ལ་སོགས་པ་ནས། ཟླུམ་པོར་དབང་ཐང་བསྐྱེད་དང་ནོར་དགུག་དང། །སྤྱན་དྲང་ཞི་བའི་ཆོ་ག་བྱ་བར་ཤིས། །གྲུ་གསུམ་དུ་ནི་དགར་བསྐྲད་བསད་པ་དང། །གཤེད་བྱེད་ལ་སོགས་དྲག་པོ་རྣམས་ཀྱང་བྱ། །གྲུ ་བཞི་པོར་ནི་ཀླུ་དང་གསང་བ་པོའི། །ལུས་གཞིག་པ་དང་བསྲེག་པར་བྱ་བ་ཡིན། །པདྨའི་དབྱིངས་སུ་བུད་མེད་བུ་མོ་གྲོང། །ཡུལ་འཐོབ་པ་འམ་དོན་ཀུན་སྒྲུབ་པར་ཤེས་ཞེས་བྱ་བའི་བར་དུ་གསུངས་པའོ། །དེ་ལྟར་སྔར་བསྙེན་པའི་སྦྱིན་སྲེག་གི་ཆོ་ག ་གསུངས་པ་དེའི་ཕྱིར། མེ་ཐབ་བསྟན་པར་བསྟན་པ་ནི་དོན་ལྔ་པ་སྟེ། ཇི་སྐད་དུ། མེ་ཐབ་ལྕི་བ་གཙང་མས་བྱུགས་ནས་ཀྱང་ཞེས་བྱ་བ་ལ་སོགས་པ་ནས། རླུང་ཡབ་ཀྱིས་ནི་མེ་ཡང་སྦར་བྱས་ནས་ཞེས་བྱ་བའི་བར་དུ་གསུངས་པའོ། །དེ་ལ ་སྔར་བསྙེན་པའི་དུས་ཀྱི་སྦྱིན་སྲེག་ཀྱང་རྣམ་པ་གཉིས་སུ་འདོད་དེ། དེ་ལ་གཅིག་ནི་བགེགས་རྣམས་ཞི་བར་བྱ་བའི་ཕྱིར་བདུད་རྩི་ཐབ་སྦྱོར་གྱིས་བྱ་བ་དང། དེ་ལས་གཞན་པའི་ནི་རང་གི་ལྷ་གཟི་བརྗིད་བསྐྱེད་པའི་ཆེད་ཡིན་པར་བསྟན་པ་ནི་དོན་དྲུག་པ ་སྟེ། དེ་ཇི་སྐད་དུ། སངས་རྒྱས་རྣམས་ལ་ཕྱག་བྱས་ཁྲོ་བོ་ནི། །བདུད་རྩི་འཁྱིལ་པས་མ་ཉམས་པདྨ་འམ། །མ་གྲུགས་ཏིལ་ནག་ལས་ནི་བདུན་ནམ་བརྒྱད། །བཅུ་འམ་ཉི་ཤུར་མེ་ལ་སྦྱིན་རེག་བྱ་ཞེས་བྱ་བ་ལ་སོགས་པ་ནས། མར་དང་སྦྲང ་རྩི་འོ་མ་ལས་བཏགས་ནས། རང་གི་གསང་སྔགས་འགྲུབ་ཕྱིར་སྦྱིན་སྲེག་བྱ་ཞེས་བྱ་བའི་བར་དུ་གསུངས་པའོ། །དེ་བཞིན་དུ་སྦྱིན་སྲེག་ཐམས་ཅད་ཀྱི་མེ་འབར་བའི་ཁ་དོག་དང། དབྱིབས་དང། སྒྲ་ལ་སོགས་པས་ལྷས་བཟང་ངན་བསྟན་པ་ནི་དོན་བདུན་པ་སྟེ། ་དེའི་ཕྱིར། མེ་ཡི་མཚན་ཉིད་ཉེ་བར་བརྟག་པ་ནི། །མེ་སྟག་དུ་བ་མེ་ལྕེ་སྒྲ་རྣམས་ཀྱིས། །འགྲུབ་པ་དང་ནི་མི་འགྲུབ་ཐམས་ཅད་ཀྱང། །སྔགས་ཀྱི་བྱིན་རླབས་མེ་ནི་སྟོན་པར་བྱེད། །དུ་བ་མེད་ཅིང་གསེར་གྱི་མདོག་ལྟར་གདང། །མེ་ལྕེ་རབ་ཏུ་ཆེ་ལ ་གཡས་སུ་འཁྱིལ་ཞེས་བྱ་བ་ལ་སོགས་པ་ནས། །མེ་ལྕེ་འཕྲོ་བས་སྦྱིན་སྲེག་བྱེད་པ་ཚིག་།མི་རོའི་དྲི་ང་དངོས་གྲུབ་མེད་པར་སྟོན་ཞེས་བྱ་བའི་བར་དུ་གསུངས་སོ། །སྒྲུབ་པ་པོ་གསང་སྔགས་མཉེས་པར་བྱ་བའི་སྤྱོད་པ་མ་རླབས་པ། སྔར་གསང་སྔགས་བསྙེན་པའི ་བཟླས་བརྗོད་ལ་སོགས་པ་རྫོགས་པར་བྱས་ཀྱང། རང་གི་ལྷ་ཉིད་ཀྱིས་སྐབས་དེར་ལུས་ལ་གནོད་པ་ལ་སོགས་པར་འབྱུང་བར་མཛད་པ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། ཇི་ལྟར་རལ་གྲི་སོ་ལ་འཛིན་པའི་མི། །ལེགས་པར་མ་བཟུང་ལག་པ ་ཆོང་པ་ལྟར། དེ་བཞིན་སྔགས་ཀྱང་ལེགས་པར་མ་བཟླས་ན། །འབྲས་བུ་མེད་པ་འམ་ཡང་ན་ཕུང་བར་འགྱུར། །མི་ནི་ཚུལ་ཁྲིམས་གཙང་སྦྲ་མི་ལྡན་ཡང། །གསང་སྔགས་ལྷ་ནི་ནམ་ཡང་གནོད་མི་མཛད། །ལྷ་ཡི་འཁོར་དུ་གྱུར་པ་གང་ཡིན ་རྣམས། །མི་ལ་གླགས་སྐབས་མཐོང་ནས་ཕུང་བར་བྱེད་ཅེས་བྱ་བས་བསྟན་ཏོ། །གཏོར་མའི་ལས་ནི་དང་པོ་སྔོན་དུ་བསྙེན་པ་རྩོམ་པའི་ཚེ། ས་དང་རི་ལ་སོགས་པ་ལ་གནས་པའི་གདོན་སྲིན་པོ་དང། ཤ་ཟ་དང། ཀླུ་ལ་སོགས་པ་རྣམས་དང། ་དབང་པོ་ལ་སོགས་པ་ཕྱོགས་སྐྱོང་བཅུ་རྣམས་ལ། གཏོར་མ་མང་ཞིང་རྒྱ་ཆེ་བ་བསྒྲིམས་ཏེ། དབུལ་བར་བྱ་བ་དང། མངོན་དུ་བསྙེན་པ་བྱེད་པའི་ཉི་མ་ཉིད་ལ། །གཞན་རྣམས་ལ་ཡང་ཅི་འབྱོར་པ་དབུལ་བ་དང། དེ་བཞིན་དུ་བསྒྲུབ་པ་ལ་བརྩོན་པའི་ཚེ། ་རྒྱ་ཆེ་ཞིང་མང་བའི་གཏོར་མ་བྱ་བ་དང། གྲུབ་ནས་ཀྱང་ཅི་སྦྱོར་བའི་གཏོར་མ་ཉིན་གཅིག་བཞིན་དུ་དབུལ་བའི་ལས་བྱ་བ་དེ་བསྟན་པ་ནི་དོན་དགུ་པ་སྟེ། དེའི་ཕྱིར། ལྷ་དང་ལྷ་མིན་གནོད་སྦྱིན་ལྟོ་འཕྱེ ་གྲུལ། ནམ་མཁའ་ལྡིང་དང་འདབ་བཟད་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང། །གང་དག་ས་ལ་གནས་པའི་རྫུ་འཕྲུལ་ཅན། །བུ་སྨད་གཡོག་འཁོར་ཚོགས་དང་བཅས་རྣམས་ལ། །བདག་གི་པུས་མོ་ས་ལ ་གཙུག་ནས་སུ། །ཐལ་མོ་སྦྱར་ནས་ཁྱེད་ལ་གསོལ་འདེབས་ཀྱིས། །གསན་ནས་ཕན་གདགས་ཕྱིར་ནི་འདིར་སྤྱོད་ཅིག་ཅེས་བྱ་བ་ལ་སོགས་པ་ནས། དེ་ལྟར་གང་ཞིག་མཚན་མོ་རྒྱུ་བ་ལ། །གཏོར་མ་གཏོང་བའི་ལས་རྣམས་བྱེད་པ་དེའི་ ་དངོས་གྲུབ་མྱུར་ཞིང་ཤིན་ཏུ་བགེགས་ཀྱང་མེད། །ཡིད་དུ་འོང་བའི་འདོད་པའང་ཐོབ་པར་འགྱུར་ཞེས་བྱ་བའི་བར་དུ་གསུངས་པའོ།། །།དེ་བཞིན་དུ་ལེའུ་དགུ་པ་ལ་མཚམས་མེད་པ་དང། མཚམས་མེད་པ་ལ་ཉེ་བ་དང། དམ་པའི ་ཆོས་ཀྱི་གླེགས་བམ་ཆུད་གསོན་ཅིང་སྤོང་བ་དང། སོ་སོའི་སྐྱེ་བོ་རྣམས་ཀྱི་དགེ་བའི་གཞིར་གྱུར་པ་དགེ་སློང་ལ་སོགས་པ་བསད་ན། དེས་ནི་ཕུང་པོ་འདི་ལ་དངོས་གྲུབ་མི་ཐོབ་པར་བསྟན་པ་ནི་དོན་དང་པོ་སྟེ། དེའི་ཕྱིར། གང་གི་དགྲ་བཅོམ་ཕ ་མ་གསོད་པ་དང། །ཐུབ་པའི་དགེ་འདུན་དབྱེན་ནི་བྱེད་པ་དང། །དེ་བཞིན་གཤེགས་ལ་གནོད་པའི་སེམས་ཀྱིས་སུ། །ནམ་ཞིག་མི་དག་སྐུ་མཚལ་འབྱིན་བྱེད་པ། །ཤིན་ཏུ་མི་བཟད་པ་ཡི་ལས་འདི་རྣམས་ཞེས་རྒྱས་པར་འབྱུང་བ་དང། ་གང་གི་རང་བཞིན་ཆགས་སྡང་རྣམས་བྲལ་ཡང། །གདུལ་བྱའི་དོན་ཕྱིར་ཁྲོ་ལ་ཁྲོ་བ་དང། །འདོད་ཆགས་ཅན་ལ་ཆགས་ཅན་ལྟར་སྟོན་པ། །བྱང་ཆུབ་མཆོག་གནས་དེ་ལ་ཕྱག་འཚལ་ལོ། །གང་ཞིག་ལས་དང་རྣམ་སྨིན་པ་མཁྱེན་པ་ཡིས། ། ་འགྲོ་བ་ཀུན་དང་ཇི་ལྟར་མཐུན་པ་ཡིས། །གསང་སྔགས་གཟུགས་ཀྱི་རྗེས་སུ་འཛིན་མཛད་པ། །སྔགས་ཀྱི་རྣམས་འདྲེན་དེ་ལ་ཕྱག་འཚལ་ལོ་ཞེས་བྱ་བའི་བར་དུ་གསུངས་པའོ།། །།ལེའུ་བཅུ་པ་ལ་སྒྲུབ་པའི་གསང་སྔགས་དང་ཕྱག་རྒྱ་གང་ཡིན་པ་དེ ་དག་འཕགས་པ་དཔུང་བཟང་གི་གསང་སྔགས་ཀྱི་མདོའི་ཚུལ་འདིར། རིག་སྔགས་དང་གསང་སྔགས་ཀྱི་དབྱེ་བས་བསྡུ་བར་བསྟན་པའི་དོན་ནི་དང་པོ་སྟེ། དེ་ལ་རེ་ཞིག་དེ་བཞིན་གཤེགས་པའི་རིགས་བསྡུ་བའི་དབང་དུ་བྱས་ནས། ལྷ་དང་ལྷ་མིན་མི་ལ་ཕན་གདགས ་ཕྱིར། །གསང་སྔགས་རིག་སྔགས་རྣམ་པ་སྣ་ཚོགས་ནི། །འབུམ་ཕྲག་ལྔ་དང་བྱེ་བ་ཕྲག་གསུམ་དང། །རིག་འཛིན་སྡེ་སྣོད་བཤད་པར་རྒྱལ་བས་གསུངས་ཞེས་བྱ་བ་གསུངས་སོ། །དེ་བཞིན་དུ་རྡོ་རྗེ་རིགས་ཀྱི་གསང་སྔགས་བསྡུ་བའི་དབང་དུ ་བྱས་ནས། ངས་ནི་གསང་བ་པ་རྣམས་གཞོམ་པ་དང། །དབུལ་བའི་སྡུག་བསྔལ་བསལ་བར་བྱ་བའི་ཕྱིར། །དཀྱིལ་འཁོར་བཅས་ཤིང་ཕྱག་རྒྱར་ལྡན་པ་ཡིས། །གསང་སྔགས་བྱེ་བ་ཕྲག་བདུན་རབ་ཏུ་བཤད་ཅེས་བྱ་བ་ལ་སོགས་པ་གསུངས ་པའོ། །པདྨའི་རིགས་ཀྱི་དབང་དུ་བྱས་ནས། སྤྱན་རས་གཟིགས་ཀྱིས་གསང་སྔགས་བྱེ་བ་ཕྲག་།གསུམ་དང་དེ་བཞིན་འབུམ་ཕྲག་ལྔ་རྣམས་བཤད་ཅེས་རྒྱས་པར་གསུངས་སོ། །ལྔས་རྩེན་གྱི་རིགས་ཀྱི་དབང་དུ་བྱས་ནས། ལྔས་རྩེན་གྱིས་ནི་སྟོང ་ཕྲག་ཉི་ཤུ་སྟེ། །དེ་ཡི་ཆུང་མས་དེ་ཡི་ཕྱེད་བཤད་དོ་ཅེས་གསུངས་སོ། །ནོར་གྱི་རིགས་ཀྱི་དབང་དུ་བྱས་ནས། ནོར་གྱི་བདག་པོས་སྟོང་ཕྲག་སུམ་ཅུ་སྟེ། གང་པོ་ཕ་ཡི་ཀྱང་ནི་འབུམ་བཤད་དོ། །ལྷ་དང་ལྷ་མིན་ལ་སོགས་རྒྱལ་བ་ལ། །དད་པ་རྣམས་ཀྱིས ་གཟུང་སྔགས་མཛའ་ཡས་བཤད། ཁ་ཅིག་པའི་རིགས་སུ་གཏོགས་པ་སྟེ། །ཁ་ཅིག་ནོར་གྱི་རིགས་སུ་གཏོགས་པ་ཡིན། །གཞན་ཡང་ཁ་ཅིག་གནས་མེད་རྣམ་པར་འཁྱམ། །ནོར་སྤྱོད་ཅེས་བྱ་ནོར་གྱི་རིགས་སུ་གསུངས། །ད་ནི་རྡོ་རྗེ་རིགས་ཞེས་ ་རབ་ཏུ་བསྟན། །སྤྱན་རས་གཟིགས་དབང་པདྨའི་རིགས་ཡིན་ཏེ། རིགས་བཞི་པར་ནི་འདིར་ཡང་ལྔས་རྩེན་ནོ། །གསང་སྔགས་མདོ་སྡེ་ངས་བཤད་གང་ཡིན་པ། །བཞི་པོ་འདིར་ནི་རྣམ་པར་སྦྱང་བར་བྱ། །གང་གཞན་ལ་ལ ་འདི་ན་གནས་མེད་པར། །བདེ་བར་གཤེགས་ལ་བརྟེན་ཅིང་ཡོངས་འཁྱམ་པ། །མདོ་སྡེ་འདིར་ནི་དེ་དག་ཐམས་ཅད་ཀྱང། །འབྱོར་པ་འདོད་པའི་མིས་ནི་རྣམ་པར་སྦྱར། །ལམ་འདི་ཉིད་དུ་ཞུགས་པའི་སྔགས་པ་ནི། །ཡིད་དང་མཐུན་པའི ་དངོས་གྲུབ་ཐོབ་པར་འགྱུར་ཞེས་བྱ་བ་གསུངས་སོ། །དེ་བཞིན་དུ་དེ་བཞིན་གཤེགས་པའི་རིགས་ཀྱི་གསང་སྔགས་ལ་དང་པོར། གསང་སྔགས་ཀྱི་མགོ་ལ་དཀོན་མཆོག་གསུམ་སྔར་བརྗོད་ནས། གསང་སྔགས་གདོན་པ་དང། པདྨ་དང། རྡོ་རྗེ་དང། ་ནོར་བུ་བཟང་པོའི་རིགས་ལ། སོ་སོའི་རིགས་ཀྱི་བདག་པོ་ལ་ཕྱག་འཚལ་བ་ཐོག་མར་བརྗོད་དེ། བཟླས་བརྗོད་བྱ་བ་དེ་བསྟན་པ་ནི་དོན་གཉིས་པ་སྟེ། དེའི་ཕྱིར། སྲིད་པ་གསུམ་ན་རྒྱལ་བ་དཀོན་མཆོག་སྟེ་ཞེས་བྱ་བ་ལ་སོགས་པ་ནས། ནོར་གྱི ་རིགས་དང་པདྨའི་རིགས་ལ་ཡང། རང་གི་གསང་སྔགས་བདག་པོར་བསྟན་པར་བྱ་ཞེས་པའི་བར་དུ་གསུངས་པའོ། །དེ་བཞིན་དུ་བཟླས་བརྗོད་དང། སྦྱིན་སྲེག་དང། མཆོད་པའི་ཆོ་གསང་སྔགས་པ་ཁ་ཅིག་རྡོ་རྗེ་ཐོགས་སུ་མི་གནང་བ་ཡིན་པས། ་དེ་ལྟ་བུའི་རྡོ་རྗེའི་ཐོགས་པའི་ཉེས་པ་དེ་གང་ཡིན་པ་དེ་བསྟན་པ་ནི། དོན་གསུམ་པ་སྟེ། དེའི་ཕྱིར་བདེ་བར་གཤེགས་མིན་ཉན་ཐོས་ལམ་ཞུགས་དང། །རང་རྒྱལ་རྣམས་ཀྱི་ལམ་ལ་ཞུགས་པ་དང། །དད་པ་མེད་ཅིང་ཚུལ་འཆོས་འཇུངས་པ ་ཡིས། །ང་ཡི་རྡོ་རྗེ་ཡང་ནི་བཅད་མི་བྱ། །གང་ཞིག་ཐེག་པ་མཆོག་ལ་ལྡང་བ་དང། །བདུད་ཀྱིས་བཤད་པ་ཡིན་ཞེས་ཟེར་བ་དང། །རྨོངས་ནས་ང་ལ་གནོད་སྦྱིན་ཞེས་སྨྲ་དང། །བྱང་ཆུབ་སེམས་དཔའ་འམ་ནི་མི་འདུས་པའི། དགེ་སློང་དགེ་སློང་མ ་དང་དགེ་བསྙེན་དང། །དགེ་བསྙེན་མ་དང་འཇིག་རྟེན་པ་རྣམས་ཀྱིས། །ང་ཡི་རིགས་ཀྱི་གསང་སྔགས་བཟླས་བརྗོད་ན། །མྱུར་དུ་དེ་ཡི་ལུས་ནི་ཞིག་པར་འགྱུར། །གང་ཞིག་ང་རིགས་རྗེས་སུ་འབྲང་བའི་གདོན། །འབྱུང་པོ་གནོད་སྦྱིན་ཀླུ་དང་ཤ་ཟ་ཡིས། ་ང་ཡི་སྔགས་བཟླས་རྡོ་རྗེ་ཐོགས་པ་དག་།མཐོང་ན་ཁྲོས་ནས་ཕུང་བར་བྱེད་པར་འགྱུར། ཞེས་བྱ་བ་གསུངས་སོ། །དེ་བཞིན་གསང་སྔགས་གྲུབ་པ་པོ་རྣམས་ཀྱི་དམ་ཚིག་དང། འདུལ་བ་དང་སྤྱོད་པ་གསུངས་པ་བཤད་པ་སྟེ། དེ་ལས་ཡན་ལག་ཁ་ཅིག ་ཉམས་སུ་ལེན་མ་ནུས་ཀྱང། ཁ་ཅིག་ཉམས་སུ་མི་བླང་དུ་མི་རུང་བ་གང་ཡིན་པ་དེ་བསྟན་པ་ནི་དོན་བཞི་པ་སྟེ། དེའི་ཕྱིར། གང་ཞིག་ཐེག་ཆེན་རྒྱ་ཆེན་ཀློག་པ་དང། །དེ་ལ་དད་ཅིང་དེ་ཉིད་འཆད་པར་སྤྲོ། །བརྩོན་འགྲུས་ཆེ་ཞིང་བྱང་ཆུབ་སེམས ་བརྟན་པ། །དེ་ལ་ང་ཡི་གསང་སྔགས་མཆོག་སྦྱིན་མཛད་ཅེས་བྱ་བ་གསུངས་སོ། །དེ་ལྟར་འདིས་ནི་དེ་བཞིན་གཤེགས་པ་ལ་སོགས་པ་རིགས་ཀྱི་བདག་པོ་རྣམས་ཀྱིས་གསང་སྔགས་དང། རིག་སྔགས་རྣམས་གསུངས་པའི་བར་རྣམས་འབུམ་དང། བྱ་བ་ཞེས་བྱ་བ ་ལ་སོགས་པར་དེ་དག་བསྡུས་ཏེ། རྒྱས་པར་བསྟན་པ་དང། དེ་ལྟར་མཉེས་པར་བྱ་བའི་ཆོ་ག་ཡང། སྤྲོས་པ་དང་བཅས་པར་བསྟན་པར་ཁོང་དུ་ཆུད་པར་བྱའོ། །དེ་ནི་འཇིག་རྟེན་ལས་འདས་པའི་གསང་སྔགས་ཀྱི་ཆོ་གའི་ཞར་ལ། དྲག་པོ་ལ་སོགས་པའི་འཇིག ་རྟེན་གྱི་ལྷ་ཁྱད་པར་ཅན་རྣམས་ཀྱིས་རིག་སྔགས་དང་གསང་སྔགས་ཀྱི། རང་རང་གི་གསང་སྔགས་ཀྱི་རྒྱུད་དང། ཆོ་ག་ཞིབ་མོ་བཤད་པ་དང་དེ་དག་གི་གྲངས་ཞར་ལ་བསྟན་པར་བྱ་བ་དང། སངས་རྒྱས་ཀྱི་དཀྱིལ་འཁོར་གྱི་སློབ་དཔོན་རྣམས་མང་དུ་ཐོས་པར་བསྟན་པའི ་དོན་ནི་ལྔ་པ་སྟེ། དེའི་ཕྱིར། དྲག་པོ་ཡིས་ནི་བྱེ་བ་དྲུག་ཅུ་བཤད། །ནོར་ལྷའི་བུས་ནི་སྟོང་ཕྲག་སུམ་ཅུ་སྟེ། །ཚངས་པ་ཡིས་ནི་སྟོང་ཕྲག་དྲུག་ཅུ་ཉིད། །ཉི་མས་ཀྱང་ནི་འབུམ་ཕྲག་གསུམ་བཤད་དོ། །ནམ་མཁའ་ལྡིང་གི་སྟོང་ཕྲག་བཅོ་བརྒྱད་དེ་ཞེས་བྱ་བ ་ལ་སོགས་པ་ནས། །རང་སྔགས་མདོ་སྡེའི་རྗེས་འབྲངས་དང་བསྐྱེད་ནས། །མ་བསྒྲིམས་བཞིན་དུ་ཐེ་ཚོམ་མེད་པར་འགྲུབ། །དེ་ལས་བཟློག་ན་དངོས་གྲུབ་མི་ཐོབ་ལ། །སྡུག་བསྔལ་མང་པོ་ཡང་ནི་ཐོབ་པར་འགྱུར། །ཞེས་བྱ ་པའི་བར་དུ་གསུངས་པའོ།། །།ལེའུ་བཅུ་གཅིག་པར་འདིར་ནི་གསང་སྔགས་སྨྲ་བ་དང། བཅུད་ཀྱི་ལེན་ལ་སོགས་པ་བརྟགས་པ་བརྒྱད་ཀྱི་མིང་བཤད་པ་དང། བསྟན་པ་དེ་རྣམས་ཀྱི་དངོས་གྲུབ་རབ་དང། འབྲིང་དང་ཐ་མའི་བྱེ་བྲག་བསྟན་པའི་དོན ་དང། གསང་སྔགས་སྨྲ་བའི་ཡོན་ཏན་གོང་མའི་ཡང་གོང་མར་བརྗོད་པར་བསྟན་པ་ནི་དོན་དང་པོ་སྟེ། དེ་ལ་བཅུད་ཀྱིས་ལེན་དང་གཏེར་དང་ཕུག་འགྲོ་དང། །ནོར་སྒྱུར་འབྱུང་ཀུན་སྔགས་ཀྱི་གསེར་སྒྱུར་རྩི། །རིན་ཐང་མེད་པའི་རིན་ཆེན་ནོར་སྦྱིན་ཏེ། ། ་བརྒྱད་པོ་བསྟན་པ་ཡོངས་སུ་བསྒྲགས་པ་ཞེས་བྱ་བ་གསུངས་སོ། །བསྟན་པ་དེ་དག་རབ་ལ་སོགས་པར་དབྱེ་བའི་དབང་དུ་བྱས་ནས། སྔགས་དང་ཕུག་ཏུ་འགྲོ་དང་བཅུད་ཀྱིས་ལེན། །སྡིག་པ་སྤངས་པར་བྱེད་པས་མཆོག་ཏུ་བསྟན། །རིན་ཆེན་དང་ནི ་གཏོར་དང་འབྱུང་ཁུངས་འབྲིང། །གསེར་འགྱུར་རྩི་དང་ནོར་བསྒྱུར་ཐ་མའོ། ཞེས་བྱ་བ་གསུངས་སོ། །དེ་དག་སྒྲུབ་པ་ལ་འཇུག་པ་རྣམས་མཆོག་ལ་སོགས་པར་དབྱེ་བ་ནི་འདི་ཡིན་ཏེ། མི་ནི་སེམས་སྟོབས་ལྡན་ཞིང་ཆོས་ལ་བརྩོན། །དཀའ་ཐུབ་ཀྱིས ་ཕྱུང་དང་པོར་བསྟན་པའི་སྣོད། རྡུལ་ཤས་ཆེ་བ་ལ་ནི་འབྲིང་པོར་གསུངས། །ཐ་མ་ལ་ནི་མུན་པ་ཅན་གྱིས་བསྟན། །གང་ཞིག་མཆོག་ཏུ་བསྟན་པ་དེ་སྟོན་པ། །དེས་ནི་ཐ་མ་བསྟན་པ་རྣམ་པར་སྤངས། །གལ་ཏེ་ནོར་ལ་སྲེད་ཅིང་སྡུག་བསྔལ་གྱིས ་གདུངས་ན་འབྲིང་པོ་ལ་ནི་བསྟན་པར་བྱ་ཞེས་བྱ་བ་གསུངས་སོ། །ད་ནི་བསྟན་པ་འདི་རྣམས་ཀྱི་དངོས་གྲུབ་དང་མཐུན་པའི་དཀའ་ཐུབ་དང་གསང་སྔགས་ཀྱི་བཟླས་བརྗོད་ལ་སོགས་པའི་ཐབས་བསྟན་པ་ནི། ལྷ་ཡི་བདེ་བ་དང་ནི་འབྱོར་པ་དང། །ཚེ་དང ་སྟོབས་གཟུགས་ཕུན་སུམ་ཚོགས་པ་དང། །ཐོས་མང་མདངས་བཟང་གཅིག་པུ་ཡིད་གཞུངས་དང། །དབང་ཐང་ཚེ་ཀུན་དཀའ་ཐུབ་སྟོབས་ཀྱིས་ཐོབ། །ཆགས་དང་རྣམ་བྲལ་དགེ་ལ་དགའ་བ་དང། །རྟག་ཏུ་དཀོན་ཆོག་གསུམ་ལ་གཞོལ་བ་དང། ། ་སྡིག་པ་སྤངས་ཤིང་བཟླས་བརྗོད་ལྡན་པ་ཡིས། །མི་ལ་ལྷ་རྫས་དངོས་གྲུབ་རིང་བ་མེད་ཅེས་བྱ་བ་གསུངས་སོ། །ད་ནི་བསྟན་པ་དེ་རྣམས་ཀྱི་ནང་ན། །གསང་སྔགས་བསྟན་པ་མཆོད་ཡིན་དང། །སྡུག་བསྔལ་སེལ་བར་བསྟན་པ་ནི། །རྡོ་རྗེ་མཚོན་མེད་གནམ་ལྕགས ་མཐུ་འདྲ་ཡི། །གསང་སྔགས་མི་ཡི་འཇིག་རྟེན་མཆོག་སྦྱིན་མཛད། །འཇིག་རྟེན་འདི་དང་ཕ་རོལ་ཉིད་ན་ཡང། །སྡུག་བསྔལ་སེལ་ཅིང་སྡིག་འཇོམས་གཞན་མེད་དོ། །གང་ཞིག་དཔག་བསམ་ལྗོན་པའི་ཤིང་ལྟ་བུར། །ལ་ལར་དངོས་གྲུབ་ལ་ལ་བསོད ་ནམས་དང། །གཞན་ལ་གདུགས་སྟོབས་ཚེ་དང་བདེ་བ་གང། །ཡིད་མཐུན་འབྲས་བུ་འདོད་པའི་མི་ལ་སྩོལ། །གསང་སྔགས་སྣ་ཚོགས་གཟུགས་སུ་རྣམ་སྤྲུལ་ནས། །གང་ཞིག་སྡུག་བསྔལ་གང་ཞིག་འཇིགས་སྐྲག་པ་འམ། །རྒྱལ་པོ་ཆོམ་རྐུན་ཐོག་གིས ་འཇིགས་སྐྲག་པའི། །འགྲོ་བའི་ཚོགས་ཆེན་མཛའ་དག་སྐྱོབ་མཛད་པ་ཞེས་བྱ་བ་གསུངས་སོ། །གཞན་ཡང་གསང་སྔགས་སྒྲུབ་པ་རྣམ་པ་གཉིས་ཏེ། ཇི་སྐད་དུ་གསུངས་པའི་གསང་སྔགས་སྒྲུབ་པ་པོའི་འཇུག་པའི་སྤྱོད་པ་དང། སྦྱོར་བའི་སྤྱོད་པ་དང། དངོས་གྲུབ ་སྒྲུབ་པ་པོའི་སྤྱོད་པ་དང། སྒྲུབ་པའི་སྤྱོད་པ་བསླབས་ནས་ཁྱིམ་ནས་བྱུང་སྟེ། ཇི་སྐད་དུ་གསུངས་པའི་གནས་རྣམས་སུ་འདུག་ནས། གསང་སྔགས་མཉེས་པར་བྱེད་པ་གང་ཡིན་པ་དེའི་དོན་དུ་མཉེས་པར་བྱ་བའི་རིམ་པ་བསྟན་པ་ནི་འདི་དག་ཐམས་ཅད་ཡིན་ནོ། །གང་ཡང་ཇི་སྐད ་གསུངས་པའི་འཇུག་པ་ལ་སོགས་པའི་སྤྱོད་པ་བསླབས་ནས་ཁྱིམ་ན་གནས་ཤིང་ཡུལ་སོགས་པ་འདོད་པ་ལ་ལོངས་སྤྱོད་ཅིང་ཇི་སྐད་གསུངས་པའི་གསང་སྔགས་མཉེས་པར་བྱ་བའི་རྗེས་སུ་འཇུག་ཅིང་ཉིན་གཅིག་བཞིན་དུ་བཟླས་བརྗོད་ལ་སོགས་པ་ཅི ་ནུས་སུ་བྱེད་པ་གང་ཡིན་པ་དེ་རྣམས་ཀྱང་ཡུན་རིང་ཞིག་ལེན་ནས། ཚེ་འདི་འམ་ཚེ་རབས་གཞན་དུ་དེ་མཉེས་པར་བྱས་པ་ལས་བྱུང་བའི་བསོད་ནམས་ཀྱི་བག་ཆགས་རྟས་ནས། ཚེ་རབས་གཞན་ལ་གྲུབ་པར་འགྱུར་བ་དེ ་བསྟན་པ་ན་དོན་གཉིས་པ་སྟེ། གང་ཞིག་ཡུལ་དང་ཁྱིམ་ལ་བརྟེན་ཀྱང་རུང། དཀའ་ཐུབ་མ་ཉམས་རྩེ་གཅིག་སེམས་ཀྱིས་ནི། །ཉིན་གཅིག་བཞིན་དུ་ཅུང་ཟད་སྔགས་ཟློས་པ། དེ་ཡི་གསང་སྔགས་དུས་ཞིག་ན་ནི་འགྲུབ་ཅེས་བྱ་བ་གསུངས། ་ང་ནི་སྒྲུབ་པ་པོ་རྣམས་གཉིས་ཀྱི་བཟླས་བརྗོད་གོམས་པར་བྱ་བའི་ཕྱིར། །སྔར་བསྙེན་པའི་བཟླས་བརྗོད་ཇི་སྐད་བསྟན་པའི་གྲངས་ལས་ལྷག་པར་འབུམ་ཕྲག་གཅིག་བསྒྲིམས་ནས་བཟླས་བརྗོད་བྱས་ནས་སྔར་བསྟེན་པ་བཞིན་དུ་ལྷུར་བླང་བར་བསྟན་པ་ནི་དོན ་གསུམ་པ་སྟེ། དེའི་ཕྱིར་ཆོ་ག་བཞིན་དུ་དང་པོར་འབུམ་བཟླས་ནས། །དེ་ནས་གསང་སྔགས་སྒྲུབ་ལ་འཇུག་པར་བྱ། །དེ་ནས་དངོས་གྲུབ་མྱུར་དུ་ཐོབ་འགྱུར་ལ། །གསང་སྔགས་ཆོ་ག་ཡུན་རིང་མི་ཉོན་མོངས་ཞེས་གསུངས་སོ། །དེ་བཞིན་བསྒྲུབ ་པ་པོའི་ཁྲུས་ཀྱི་ཆོ་ག་གཏན་ལ་དབབ་པ་དང། ཉེ་རེག་གི་ཆོ་ག་བསྟན་པ་ནི་དོན་བཞི་པ་སྟེ། དེའི་ཕྱིར། ལུས་ལས་ཡི་དྲིལ་ཕྱིས་བྱས་ནས་སུ། །ཆུ་ཆེན་རྙོག་མ་མེད་པར་ཞུགས་ནས་ཀྱང། །ཇི་ཙམ་འདོད་པའི་བར་དུ་ཁྲུས་བྱས་ཏེ། བྱུང་ནས་ཤིང ་ངམ?་བྱང་དུ་ཁ་བལྟས་ལ། །ཆུ་ཡིས་ལག་པ་རྐང་པ་བཀྲུས་ནས་ནི། བུས་མོའི་ཕྱི་རོལ་དུ་ནི་བསྟན་བྱས་ཏེ། །བར་དུ་ལག་བཞག་ཙོག་ཙོག་པོར་འདུག་ནས། །སྒྲ་མེད་དབུ་བ་མེད་པས་ཉེ་རེག་བྱ། །ལན་གསུམ་བར་དུ་ཆུ་ནི་འཐུངས་ནས་ཀྱང། ། ་མཆུ་ལ་ལན་གཉིས་ཡོངས་སུ་ཕྱི་བར་བྱ། །ཞེས་བྱ་བ་གསུངས་སོ། །དེ་བཞིན་དུ་སོ་ལ་ཆགས་པའི་ལྷག་མ་ཡོད་པར་ཚོར་བ་དང། རང་སྤྲིད་པ་བྱུང་ན་ཁ་འཁྲུལ་བའི་ཆོ་ག་བྱ་བ་དང། དེ་བཞིན་དུ་སྐྱེས་པ་དང་བུད་མེད་ཀྱི་ལུས་ལ་རེག་པ ་དགག་པ་བསྟན་པ་དང། བག་མེད་པས་དེ་དག་རྣམས་ཀྱིས་རེག་པར་གྱུར་ན་ཁྲུས་བྱ་དགོས་པ་བསྟན་པ་ནི་དོན་ལྔ་པ་སྟེ། དེའི་ཕྱིར་སོ་ལ་ཆགས་པ་ལྕེ་ཡིས་རེག་པ་དང། །སྲིད་པ་བྱུང་ན་ཁ་ཡང་བཀྲུ་བར་བྱ། །རབ་བྱུང་སྐྱེས་པ་བུད་མེད་གཞོན་ནུ ་དང། གཞོན་ནུ་མ་དང་རྒན་པོ་བྲམ་ཟེ་རྣམས། །དེ་ལ་སྔགས་པས་ནམ་ཡང་རེག་མི་བྱ། །སྔགས་པས་དེ་དག་རྣམས་ལ་མི་བསམ་མོ། །བརྒྱ་ལ་དེ་དག་རྣམས་ལ་རེག་གྱུར་ཏམ། །སྒྲུབ་པས་དེ་དག་རྣམས་ལ་རེག་གྱུར་ན། །སླར་ཡང ་ཁྲུས་དང་འཐོར་འཐུང?་བྱས་ནས་སུ། །དེ་ནས་ཕྱིར་ཡང་ཟློས་ལ་འཇུག་པར་བྱ། ཞེས་བྱ་བ་གསུངས་སོ། །གཙང་སྦྲ་དང་བཟླས་བརྗོད་དང། མཆོད་པ་ལ་སོགས་པ་ཇི་སྐད་གསུངས་པ་བཞིན་བྱས་ན། །མྱུར་དུ་གསང་སྔགས་ཀྱི་བྱིན་གྱིས་རློབ་པར ་མཛད་དོ། །ཞེས་བསྟན་པ་ནི་དོན་དྲུག་པ་སྟེ། དེའི་ཕྱིར། གཙང་སྦྲ་ལ་དང་ཟློས་དགའ་སྙིང་རྗེ་ཅན། རྟག་ཏུ་ལེན་པ་ལས་ནི་ལོག་པ་དང། །སློང་མོའི་ཟས་ཟ་ལྷ་ཡི་ལས་བརྩོན་པ། །དེ་ཡི་ལུས་ལ་གསང་སྔགས་འཇུག་པར་འགྱུར་ཞེས་བྱ་བ ་གསུངས་སོ། །དེ་བཞིན་དུ་སྒྲུབ་པ་པོའི་རྣམ་པ་ཐམས་ཅད་དུ་མི་བསླང་བར་བསྟན་པ་ནི་དོན་བདུན་པ་སྟེ། དེའི་ཕྱིར་འགའ་ཡིད་བུད་མེད་གོས་དང་ནོར་རྣམ་དང། །བཞོན་པ་རྒྱུན་དང་བྱུག་པ་བཟའ་བཏུང་དང། །མལ་སྟན་རྣམས་ནི་མིང་ཉུང་བྱིན་གྱུར་ན ་དེ་ལས་སྒྲུབ་ལ་གནས་པས་མ་བསླབ་བོ་ཞེས་བྱ་བ་གསུངས་སོ། །དེ་བཞིན་དུ་སྒྲུབ་པ་པོའི་ཕྱི་རོལ་ཆེ་ཆུང་གི་གཙང་སྦྲ་བསྟན་པ་ནི་དོན་བརྒྱད་པ་སྟེ། དེའི་ཕྱིར་ས་ཕུག་བཤད་སྒོར་ལྔ་སྟེ་མཚན་ལ་གསུམ། །གཡོན་ལ་གསུམ་སྟེ་ལག་པ་གཉིས ་ལ་བདུན། །ཡང་ན་ས་དང་ཆུ་ཡི་ཇི་སྲིད་དུ། །དྲི་མ་དྲི་བྲལ་དེ་སྲིད་པར་དུ་བྱ་ཞེས་གསུངས་སོ། །དེ་བཞིན་དུ་ཚུལ་ཁྲིམས་དང་ལྡན་པའི་སྒྲུབ་པ་པོས་བཟླས་བརྗོད་བྱས་པས་སྡིག་པ་འབྱང་བའི་རྒྱུར་འགྱུར་བ་དང། ཐོག་མ་མེད་པའི་དུས་ནས་བསགས ་པའི་སྡིག་པ་རྣམས་ཀྱང་བཟླས་བརྗོད་བྱས་པས་འབྱང་བར་འགྱུར་རོ། །ཞེས་བསྟན་པ་ནི་དོན་དགུ་པ་སྟེ། དེའི་ཕྱིར། སོས་ཀ་ནགས་མེ་མཆེད་པའི་མེ་ལྕེ་ཡིས། །མ་བསྒྲིམས་བཞིན་དུ་ཚང་ཚིང་ཀུན་སྲེག་ལྟར། །བཟླས་བརྗོད་མེ་ལ་ཚུལ ་ཁྲིམས་རླུང་གིས་སྤར། །བརྩོན་འགྲུས་ཆེན་པོ་མེ་ལྕེས་སྡིག་པ་བསྲེག་།ཇི་ལྟར་གངས་ལ་ཉི་མའི་འོད་ཟེར་གྱིས། །གདུངས་ན་གཟི་བརྗིད་མི་བཟོད་འཇུ་བ་བཞིན། །ཚུལ་ཁྲིམས་ཉི་མའི་འོད་ཟེར་བཟླས་བརྗོད་ཀྱིས། །གདུངས་ན་སྡིག་པའི་གྲངས་ཀྱང ་བཟང་པར་འགྱུར། །མུན་ནག་སྨག་ལ་མར་མེ་ཕྱུང་བ་ཡིས། །མུན་ནག་མ་ལུས་སེལ་བར་བྱེད་པ་ལྟར། །ཚེ་རབས་སྟོང་ནས་གནས་པའི་སྡིག་པའི་མུན། །བཟླས་བརྗོད་མར་མེས་མྱུར་དུ་སེལ་བར་བྱེད་ཅེས་བྱ་བ་གསུངས་སོ། །དེ་བཞིན་དུ་ཇི་ལྟར་གསུངས ་པའི་ཆོ་ག་བཞིན་དུ། སྔར་བསྙེན་པ་བྱས་ནས་བསྒྲུབས་ཀྱང་གསང་སྔགས་ཀྱི་འབྲས་བུ་མ་ཐོབ་ན། དེའི་ཚེ་སྡིག་པ་མ་ལུས་པ་ཟད་པར་བྱ་བའི་ཕྱིར། །མཆོད་རྟེན་འབུམ་གདབ་པར་བསྟན་པ་ནི་དོན་བཅུ་པ་སྟེ། དེའི་ཕྱིར་ཅི་སྟེ་སྦྱིན་སྲེག་ནང་གི་བཟླས ་བརྗོད་ཀྱིས། །གསང་སྔགས་བསྒྲུབས་ཀྱང་དངོས་གྲུབ་མ་ཐོབ་ན། །འཇིམ་པ་ལས་ནི་མཆོད་རྟེན་འབུམ་གདབ་པའམ། །ཡང་ན་ཆུ་འགྲམ་བྱེ་མ་དག་ལ་གདབ། །ངེས་ནི་དེ་ཡི་སྡིག་པ་སྲིད་ཞེན་ལ། །བྱས་པ་དེ་ནི་གང་ཡིན་ཟེར་གྱུར་ན། །དེས་ན ་གསང་སྔགས་མཐུ་ཡིས་འདི་ཉིད་དུ། །མཐོང་བའི་ཆོས་ལ་བསོད་ནམས་འབྲས་བུ་ཐོབ་ཅེས་བྱ་བའི་བར་དུ་གསུངས་སོ། །དེ་བཞིན་དུ་སྔར་སྦྱད་གི་ནང་དུ་འདུག་པའི་ས་བོན་གྱི་དཔེ་བསྟན་པས། གསང་སྔགས་བཟླས་བརྗོད་ལ་སོགས་པའི་ཚོགས་པ་ལ་བརྟེན ་ནས་གསང་སྔགས་ཀྱི་འབྲས་བུ་འབྱུང་གི་།གསང་སྔགས་ཀྱི་ལྷ་ལ་སོགས་པ་འབའ་ཞིག་ལས་ནི་མ་ཡིན་པས་དེའི་ཕྱིར་དེའི་ཚོགས་བསྟན་པ་ནི་དོན་བཅུ་གཅིག་པ་སྟེ། དེའི་ཕྱིར་གསང་སྔགས་རྩ་བ་དང་པོར་ཚུལ་ཁྲིམས་ཏེ། །དེ་ནས་བརྩོན་འགྲུས ་དང་ནི་བཟོད་པ་དང། །རྒྱལ་པོ་ལ་ནི་དད་དང་བྱང་ཆུབ་སེམས། །གསང་སྔགས་དང་ནི་ལེ་ལོ་མེད་པའོ། །ཞེས་བྱ་བར་རྒྱ་ཆེར་སྦྱར་རོ། །སྔར་བསྙེན་པ་རྫོགས་ནས། སྔགས་པས་རང་གི་ལྷ་མཉེས་པར་བྱ་བའི་དོན་དུ་སྦྱིན་སྲེག་བྱ་བ་དེ་བསྟན་པ་ནི་དོན་བཅུ་གཉིས་པ་སྟེ། ་དེའི་ཕྱིར། དང་པོར་བཟླས་བརྗོད་ཕལ་ཆེར་བྱས་ནས་སུ། །དེ་ཡི་འོག་ཏུ་འདི་ནི་སྦྱིན་སྲེག་བྱ། །སྦྱིན་སྲེག་གིས་ནི་གསང་སྔགས་མཆོག་མྱུར་སྩོལ། །ཡིད་དུ་འོང་བའི་འདོད་པའང་སྦྱིན་པར་མཛད། ཅེས་བྱ་བ་གསུངས་སོ། །དེ་བཞིན་དུ་གང་གིས་མིའི་ཆུང་མ་བཀུག་པ ་དང། གནོད་སྦྱིན་གྱི་བུ་མོ་གསང་སྔགས་ཀྱི་དབང་གིས་བཀུག་སྟེ། འདོད་པར་ལོངས་སྤྱོད་པ་དེ་ལ། ཕ་རོལ་གྱི་བུད་མེད་ལོངས་སྤྱད་པའི་ཕྱིར་འདོད་པས་ལོག་པར་གཡེམ་པ་ལ་སོགས་པ་བྱས་པའི་ཉེས་པས་གང་ཡིན་པ་དེ་ཡོངས་སུ་སྤང་བ་ནི་དོན་བཅུ་གསུམ་པ་སྟེ། ་དེའི་ཕྱིར། གང་གིས་དཔག་ཚད་བརྒྱ་ཡི་ཕ་རོལ་ནས། །གསང་སྔགས་མཐུ་ཡིས་བུད་མེད་བཀུག་ཀྱང་དེ། །བུད་མེད་མ་ཡིན་གནོད་སྦྱིན་བུ་མོ་སྟེ། །དེ་གཟུགས་ཆ་བྱད་ཀྱིས་ནི་སྔགས་པ་སྟེ། །འདོད་པའི་དོན་ཕྱིར་བསྒྱུར་བ་གང་ཡིན་དེ། །གྲུབ་ནའང་གནོད་སྦྱིན ་བུ་མོ་སྦྱིན་པར་བྱེད་ཅེས་བྱ་བ་ལ་སོགས་པ་ནས། གཞན་གྱི་ཚུང་མར་ཡིད་ལ་བསམ་ནས་སུ། །འདོད་པ་བསྟེན་པར་བྱེད་པ་གང་ཡིན་དེ། །མི་ཤེས་ཡིད་ཀྱིས་གཞན་གྱི་ཆུང་མ་ལ། །འདོད་པ་སྤྱད་པས་སྡིག་པ་མང་དུ་ཐོབ་ཅེས་བྱ་བའི་བར་དུ་གསུངས་སོ། །དེ ་བཞིན་དུ་འཇིག་རྟེན་པའི་གསང་སྔགས་ལྷ་དང་ཀླུ་དང་གནོད་སྦྱིན་ལ་སོགས་པས་ཇི་ལྟར་ཁོང་དུ་ཆུད་པ་བཞིན་དུ་སྨྲས་པ་དེ་ཡང། སངས་རྒྱས་དང་བྱང་ཆུབ་སེམས་དཔའ་དང། ཉན་ཐོས་དང། རང་སངས་རྒྱས་རྣམས་ཀྱིས་བྱིན་གྱིས་བརླབས་པའི ་ཕྱིར། དེ་རྣམས་ཀྱི་དངོས་གྲུབ་རབ་དང་འབྲིང་དང། ཐ་མའི་མཚན་ཉིད་ཇི་ལྟ་བ་བཞིན་བསྟན་པ་དེ་ནི་དོན་བཅུ་བཞི་པ་སྟེ། དེའི་ཕྱིར། རྒྱལ་བ་ལ་དང་གཞན་ལ་ཕན་བརྩོན་པའི། །ལྷ་དང་ལྷ་མིན་གནོད་སྦྱིན་དྲི་ཟ་དང། །གྲུབ་པར་བཅས་པས་སྔགས་བཤད ་གང་ཡིན་པ། ཞེས་བྱ་བ་ལ་སོགས་པ་ནས། དེ་དག་འབྲས་བཱུང་རབ་དང་འབྲིང་དང་ནི། །ཐ་མར་དབྱེ་བས་རྣམ་པ་གསུམ་དུ་བསྟན། ཞེས་བྱ་བ་ལ་སོགས་པ་རྒྱ་ཆེར་སྦྱར་རོ། །དེ་བཞིན་དུ་འཇིག་རྟེན་དང་འཇིག་རྟེན་ལས་འདས་པའི ་རིག་སྔགས་དང། གསང་སྔགས་ཀྱི་རྒྱུད་དང་ཆོ་ག་ཞིང་མོར་དུག་གི་ལས་ཀྱི་དབྱེ་བ་བཤད་པའི་མིང་བསྡུས་ནས་བསྟན་པ་ནི་དོན་བཅོ་ལྔ་པ་སྟེ། དེའི་ཕྱིར། བྱ་བ་དང་ཁུ་ཚུར་ཐལ་ལྕག་སྐྲ་དྲ་ང་དང། །རྣ་བར་བཟླས་དང་དབབ་དང་བསྐྲད་པ་དང། ཞེས་བྱ་བ་ལ ་སོགས་པ་ནས། དུག་གིས་སྒྲས་ནི་བསླང་པར་བྱ་བ་སྟེ། རྣམ་པ་འདི་དག་དུག་གི་ལས་སུ་བཤད་ཅེས་བྱ་བའི་བར་དུ་རྒྱས་པར་གསུངས་སོ། །དེ་བཞིན་དུ་སྤྲུལ་གྱི་རིགས་ཀྱི་བྱེ་བྲག་བསྟན་པ་ནི་དོན་བཅུ་དྲུག་པ་སྟེ། ས་ཡི་སྟེང་ན་སྤྲུལ་ནི་བརྒྱད་ཅུ་དག་།གཞན ་ལ་གནོད་པར་བྱེད་ཅིང་རྣམ་པར་འཁྱམ། །དེ་དག་རྣམས་ལས་ཉི་ཤུ་གདེངས་ཀ་ཅན། །འཁྱིལ་བ་དྲུག་དང་དུག་མེད་བཅུ་གཉིས་དང། །དེ་བཞིན་སྤྲུལ་ནི་ཁྲོ་བོ་བཅུ་གསུམ་སྟེ། སུམ་ཅུ་གང་ཡིན་དེ་ནི་རིགས་སུ་གཏོགས། །སྦལ་པ་གྷོ་དྷ་སྡིག་པ ་ཁ་བརྒྱད་དང། །རྣམ་པར་དབྱེ་ན་རབ་ཏུ་མང་པོ་ཡོད་ཅེས་བྱ་བ་གསུངས་སོ། །དེ་བཞིན་དུ་མི་ལ་སོགས་པའི་ལུས་ལ་སྤྲུལ་དེ་དག་དུག་གཏོང་བའི་སྦྱོར་བ་བསྟན་པ་ནི་དོན་བཅུ་བདུན་པ་སྟེ། དེའི་ཕྱིར་གཅིན་རྟུག་ཁ་ཆུ་རེག་དང་མཐོང་བ་དང། ་མཆེ་བ་བཙུགས་པ་ལས་ནི་དུག་ཀྱང་གཏོང། །དེ་ལས་དུག་གི་རྒྱུ་ལ་མཁས་པ་ཡིས། །རབ་འབྲིང་ཐ་མ་གསུམ་དུ་རྣམ་པར་དབྱེ་ཞེས་བྱ་བ་གསུངས་སོ། །དེ་དག་ལས་མི་ལ་སོགས་པ་ལ་ཟ་བར་བྱེད་པའི་རྒྱུ་བསྟན་པ་ནི་དོན་བཅུ་? ་པ་སྟེ། དེའི་ཕྱིར། དུག་བདེ་ཁྲོ་བའི་དབང་གྱུར་སྐྲག་པ་དང། །དེ་བཞིན་དངངས་པ་འམ་བཀྲེས་པའི་ཁ་ཟས་ཕྱིར། །ཤ་ཁོན་ཡོད་པ་འམ་གཤིན་རྗེས་བསྒོ་བ་འམ། །ལུས་ལ་བརྫིས་ནས་དེ་དག་ཟ་བར་བྱེད་ཅེས་བྱ་བ་ལ་སོགས་པ་གསུངས ་སོ། །དེ་ལ་མི་ལ་སོགས་པ་ལ་སྤྲུལ་དེ་དག་གིས་ཇི་ལྟར་མཆེ་བས་བཏབ་ནས་དུག་གཏོང་བར་བྱེད་པ་དང་དེ་དག་གིས་མཆེ་བས་བཏབ་པའི་མཚན་ཉིད་བསྟན་པ་ནི་དོན་བཅུ་དགུ་པ་སྟེ། དེའི་ཕྱིར། ཟོས་པ་དེ་ཡང་རྣམ་པ་བཞིར་འགྱུར་ཏེ། མཆེ་བས་ཟིན་དང ་སོས་བཅད་གཏང་པའོ། །གང་དུ་མཆེ་བས་གཅིག་གི་ཁྲག་བྱུང་རྗེས། །དེ་ནི་དུག་ཆུང་བས་ནི་ཟིན་པར་བཤད། །གང་དུ་མེ་འམ?་གཉིས་ཀྱིས་བཏབ་ནས་སུ། །ཁྲག་དག་བྱུང་བར་གྱུར་པ་ཟོས་པའོ། །གལ་ཏེ་མཆེ་བ་གསུམ་གྱིས་ཤ་བཅད་པ། །དེ་ནི་བཅད་པར ་གྱུར་པ་ཡིན་ཞེས་བསྟན། །གང་དུ་མཆེ་བ་བཞི་ཡིས་བཏབ་ནས་སུ། སྤྲུལ་གྱི་ལུས་ནི་བཟློག་པར་གྱུར་པ་སྟེ། །གཏད་ནས་ཟོས་པ་ཡིན་ཞེས་བཤད་པ་སྟེ། །དེ་ནི་སྨན་རྣམ་ཀྱིས་ཀྱང་བཟློག་པར་དཀའ་ཞེས་བྱ་བ་གསུངས་སོ། །དེ་ལ་གསང་སྔགས་ཀྱི་རྒྱུད ་ཐམས་ཅད་ལས་རྣམས་གཉིས་ཀྱིས་དུག་གསོ་བར་བསྟན་པ་ལས། །དེ་གཉིས་ལས་ཀྱང་སྔགས་ཀྱིས་གསོ་བ་གཙོ་བོར་བསྟན་པ་ནི་དོན་ཉི་ཤུ་པ་སྟེ། དེའི་ཕྱིར། མེ་ཡི་རང་བཞིན་གནད་དུ་འབེན་པའི་དུག་།མཚོན་དང་མེ་དང་འདྲ་ཞིང་མཚུངས་པ་དག་།ཇི ་ལྟར་སྔགས་ཀྱི་རབ་ཏུ་ཞི་འགྱུར་བ། །དེ་བཞིན་སྨན་གྱིས་ཞི་བར་མི་ནུས་སོ། །ཞེས་བྱ་བ་ལ་སོགས་པ་ནས། དུག་གི་མཐུ་སྟོབས་ཤེས་ནས་རབ་བསྒྲིམས་ཏེ། གསང་སྔགས་ཆོ་ག་བཞིན་དུ་བཟླས་སྒྲུབ་ན། །བ་ལང་ཁྱུ་ན་སེང་གེ་ཇི་ལྟ་པར། །དུག་དང་སྤྲུལ ་དང་དོན་མེད་ལྷན་ཅིག་རྩེ་ཞེས་བྱ་བའི་བར་དུ་གསུངས་སོ། །དེ་བཞིན་དུ་གདོན་གྱིས་ཟིན་པས་གསོ་བའི་དབང་དུ་བྱས་ནས། གདོན་རྣམས་ཀྱི་དབྱེ་བ་བསྟན་པ་ནི་དོན་ཉི་ཤུ་གཅིག་པ་སྟེ། དེའི་ཕྱིར། ལྷ་དང་ལྷ་མིན་གནོད་སྦྱིན་གྲུབ་པ་དང། །དྲི་ཟ་འབྱུང་པོ ་མཚུན་དང་གསང་བ་དང། །ཡི་དགས་ཤ་ཟ་དག་དང་ལུས་སྲུལ་པ། །སྨྱོ་བྱེད་མདངས་འཕྲོག་པ་དང་གྲིབ་གནོན་དག་།ས་ཡི་སྟེང་ན་གདོན་ནི་སྣ་ཚོགས་པ། །མི་ཤ་ཆིལ་ཡང་ཟ་ཞིང་ཁྲག་ཀྱང་འཐུང་ཞེས་བྱ་བ་གསུངས་སོ། །མི་ལ་སོགས་པ་དེ་དག་གི ་གླགས་སྐབས་བསྟན་པ་ནི་དོན་ཉི་ཤུ་གཉིས་པ་སྟེ། དེའི་ཕྱིར། མྱ་ངན་འདོད་གདུངས་ཁྲོ་བས་ཉམ་ཐག་པའི། །གླགས་སྐབས་རྙེད་ནས་ལུས་ལ་འདུག་པར་བྱེད་ཅེས་བྱ་བ་གསུངས་སོ། །གདོན་གྱིས་ཟན་པ་རྣམས་ཀྱི་སྤྱོད་པ་བསྟན་པ་ནི་དོན་ཉི་ཤུ ་གསུམ་པ་སྟེ། དེའི་ཕྱིར། དེ་དག་རྣམས་ཀྱིས་ཟིན་པའི་མི་འཕྱན་ཅིང། །གླུ་ལེན་གར་བྱེད་རྒོད་དང་ཁྲོ་བ་དང། །དགའ་ཞིང་རྔམ་པ་ཆེ་ལ་སྨྲ་འདོད་དང། །སྤྱོད་པ་སྣ་ཚོགས་བྱེད་པའི་ལྷ་རྣམས་དང། །ལྷ་མིན་ལྟར་འཆོས་སྐྱེ་བོ་བཞད་གང་བྱེད། ཅེས་བྱ་བ ་གསུངས་སོ། །མི་ལ་སོགས་པ་རྣམ་པ་གསུམ་གྱི་ཕྱིར་འཛིན་པར་བསྟན་པ་ནི་དོན་ཉི་ཤུ་བཞི་པ་སྟེ། དེའི་ཕྱིར་གཏོར་མ་འདོད་པ་འམ། རྩེད་མོ་བྱེད་འདོད་པ། བསད་པའི་དོན་དུ་ལུས་ལ་འབབས་ཤིང་འཇུག་ཅེས་བྱ་བ་གསུངས་སོ། །གདོན་གྱིས་ཟིན་པ་རྣམས་ཐར་པར་བྱ ་བའི་ཐབས་སུ་གྱུར་པ་གསང་སྔགས་རྣམས་དང། དེའི་ལས་བྱེད་པ་རྣམས་ཀྱི་མིང་བསྟན་པ་ནི་དོན་ཉི་ཤུ་ལྔ་པ་སྟེ། དེའི་ཕྱིར་གསང་བ་པ་རྣམས་གཞིག་ཕྱིར་རིགས་ཀྱི་མཆོག་།མཐུ་ཆེན་མཆོག་སྦྱིན་རྡོ་རྗེ་ལྕགས་ཀྱུ་འམ། །གཞན་ཡང་ངའི་རིགས་ལས ་བྱུང་རིགས་པ་འམ། །ཁྲོ་བོ་བདུད་རྩི་ཐབ་སྦྱོར་ལ་སོགས་པས་སོ་ཞེས་བྱ་བ་ལ་སོགས་པ་ནས། འབྱུང་པོའི་རིག་སྔགས་འདིར་ནི་ཀུན་མཐོང་དང། །གདོན་གྱི་སྤྱོད་པ་མ་ལུས་ཤེས་ནས་སུ། །ཕྱི་ནས་གདོན་རྣམས་དོག་མེད་འདུལ་ན་ནི། །གདོན་གྱིས ་མི་འཇིགས་སླར་ཡང་ཚུགས་པ་མེད་ཅེས་བྱ་བ་གསུངས་སོ། །དེ་བཞིན་དུ་སངས་རྒྱས་དང་བྱང་ཆུབ་སེམས་དཔའ་དང། རང་སངས་རྒྱས་དང། ཉན་ཐོས་ལ་མངོན་པར་དད་པ་རྣམས་ཀྱིས་གསང་སྔགས་བཤད་པ་གང་ཡིན་པ་དེ་དག་ལ། འཇིག་རྟེན་པའི ་ལྷས་སྨྲས་པའི་གསང་སྔགས་རྣམས་ཀྱི་མཐུས་མི་ཐུབ་པར་བསྟན་པ་ནི་དོན་ཉི་ཤུ་དྲུག་པ་སྟེ། དེའི་ཕྱིར། རིག་གསུམ་འཕེལ་དང་སྲིད་གསུམ་མཐར་ཕྱིན་པའི་ཞེས་བྱ་བ་ལ་སོགས་པ་ནས། འཇིག་རྟེན་ལྷ་ཚོགས་རྣམས་ཀྱི་སྔགས་པ་ཡིས།། ་གསང་སྔགས་མཐུ་ཡིས་དེ་ལ་སྐྱབ་དུ་མེད། ཅེས་བྱ་བའི་བར་དུ་གསུངས་སོ། །གསང་སྔགས་ཀྱི་མདོ་སྡེ་འདི་བཤད་པ་རྫོགས་པར་བསྟན་པ་ནི་དོན་ཉི་ཤུ་བདུན་པར་ཏེ། དེའི་ཕྱིར། རྡོ་རྗེ་འཆང་གི་གསུང་ཐོས་ལྷ་རྣམས་དང། །ཚངས་པ་ལྷ་མིན་གནོད་སྦྱིན་གྲུབ་པ་དང། ་རིག་འཛིན་ཀླུ་དང་གནོད་སྦྱིན་དྲི་ཟ་དང། །གསང་བ་པ་དང་མཚུན་དང་འབྱུང་པོ་རྣམས། །དད་པས་ཞབས་ལ་སྤྱི་བོས་ཕྱག་འཚལ་ཏེ། །གུས་པས་ཐལ་མོ་སྦྱར་ནས་ཚིག་གསོལ་པ་ཞེས་བྱ་བ་ལ་སོགས་པ་ནས། གཞལ་མེད་ཁང་དུ་མངོན་དུ་ཞུགས་ནས་ཀྱང། ཇི ་ལྟར་འོངས་པ་ནམ་མཁའ་ཨི་ལམ་ནས་དོང། ཞེས་བྱ་བའི་བར་དུ་རྒྱས་པར་སྦྱར་རོ། །དེ་བཞིན་དུ་ལྷ་རྣམས་དོང་ནས། ཕྱག་ན་རྡོ་རྗེ་ཡང་དཔུང་བཟང་ལ་བསྟན་པ་ནི་དོན་ཉི་ཤུ་བརྒྱད་པ་སྟེ། ལྷ་རྣམས་ཀུན་གྱིས་མདོ་འདི་ཤེས་ཟིན་གྱིས། །ཁྱོད་ཀྱིས་འཇིག་རྟེན་འདིར་ནི ་གྲགས་པར་གྱིས། ཞེས་བྱ་བ་ལ་སོགས་པ་གསུངས་སོ། །འཕགས་པ་དཔུང་བཟང་གིས་ཞུས་པའི་རྒྱུད་ཀྱི་བསྡུས་པའི་དོན་སློབ་དཔོན་སངས་རྒྱས་གསང་བས་མཛད་པ་རྫོགས་སོ། །།ཆོས་དབྱིངས་མཉམ་པ་ཉིད་ལ་རབ་ཏུ་ཞུགས་ཀྱང། ཐུགས་རྗེས་གཏན་དུ ་