<style>
.hidden {
  display: none;
}
</style>
<a href="javascript:window.close();">CLOSE WINDOW</a>
<br><br>
N873: sbyor ba yan lag drug pa zhes bya ba<br><table><tr><td>
<input type="button" onclick="location.href='tcompletep.php?id=N873&coll=TN&volcur=0';" value="show page break" />
<td width=150><td>
<input type="button" onclick="location.href='tcompletel.php?id=N873&coll=TN&volcur=0';" value="show line break" />

<td width=150><td>
<a href="tcompleteu.php?coll=TN&id=N873&volcur=0" style=font-size:25px;">བོད་ཡིག</a><td width=150><td>e-texts based on the ACIP/ALL <img src="../data/scanner/ALL.png" width=70> Input <a href="https://asianlegacylibrary.org/library/" target="_blank"><img src="../sub/link.png" width=20></table><hr><p style="font-size:18px;">mkhan po bud+d+ha ka ra b+ha dra dang/ lo tsA ba gyi co zla ba'i 'od zer gyis bsgyur ba'o// //sbyor ba yan lag drug pa zhes bya ba bzhugs so// //*/ /rgya gar skad du/ Sha Dang+ga yo ga nA ma/ bod skad du/ sbyor ba
 yan lag drug pa zhes bya ba/ dpal ldan sha ba ri pa la phyag 'tshal lo/ /sgrib pa'i sprin tshogs dang bral ba/ /grangs mthar rlung rtog kun 'gags pa'i/ /bar snang du ni spyan ras gzigs/ /gang ba'i zla ba 'char te mdzes/ /
 srid zhi'i dmigs dang bral yang gang/ /khyab byed de gnyis tha dang min/ /stong yang rnam pa kun dang ldan/ /sa rnams dbang phyug rab mi gnas/ /g.yo med rtog kun dang bral yang/ /mkhas la ma nyams
 bde pa ston/ /sems min las ni 'char ba'i mgon/ /'gro sems byin gyis rlob gyur cig /yong rtog rtag pa'i mthar gyur te/ /ma dpyad med rtag mnar med rgyu/ /grol lam de ltar gsu bas gyur la/ /gang zhig sems las
 'das pa yi/ /stong nyid thugs rje tha mi dad/ /nam mkha' i gzugs brnyan ston pa po/ /bla ma de la rab dga' bas/ /rtag tu gus par phyag 'tshal lo/ /de lta'i bla ma dngos chen gyis/ /bstod pa rang rtogs bstod pa nyid/ /'bar ba'i me
 ni med pa na/ /du ba'i rgyun ni gang la 'byung/ /rtogs brjod nga yis skyon yin mod/ /'jug par byed pas gzhan don rgyu/ /ston pas ma nges dngos po la/ /dgos don grub 'dod ga la 'jug /drang don rtogs pas khengs pa can/ /lam
 las 'khrul pa'i sngags pa rnams/ /dgag pa 'jug pa'i tshig sgo nas/ /ma rtogs rtogs phyir sangs rgyas kyi/ /bka' yis 'jig ten kun don phyir/ /go bla tshig gis 'jam dbyangs kyis/ /bka' bsdu'i tshul gyis shaM b+ha lar/ /
 dus 'khor bsdus rgyud legs par gsungs/ /thugs rje chen po'i sprul sku des/ /TI ka dri med 'od ces mdzad/ /de gsal nges don thob nas su/ /mkhas kun srid du sel zhing rol/ /gang du ji srid shes bya la/ /kun mkhyen zhes mtshan
 don dang ldan/ /dbang phyug che sogs kyis bshad don/ /'khrul zhing snying po med par gyur/ /shes rab pha rol phyin pa zhes/ /mkha' byung sangs rgyas yum gcig gis/ /skye 'dod ma lus rnam rtog tshogs/ /slar mi 'byung tshul
 'joms par mdzad/ /gang du dri med nam mkha' la/ /mig phyed brtan par btad pa na/ /bde chen stong rtogs rtog med las/ /du ba la sogs rtog med 'byung/ /de bas na rdzogs pa'i rim pa gsal bar byed pa/ phyag
 rgya chen po'i lam bsgom pa'i rjes su mthun pa/ dpal ldan dang po'i sangs rgyas la sogs pa'i rgyud nas gsungs pa/ yang dag par rdzogs pa'i sangs rgyas nyid kyi 'bras bu ster bar byed pa'i gsung rab rin chen 'dus par bya ste/
 sangs rgyas rin chen gyi za ma tog dang po'i sangs rgyas kyi rgyud kyi rgyal po las de gsungs pa/ nyams med bde ldan ye shes dbang can rnam pa kun ldan pa/ /'gro kun rgyu ma can gyi thig le rgyal ba'i dbang phyug gi /A li kA li nyi zla'i
 gdan ni rdo rje 'dzin pa'i min/ /hUM yig gyur pa'i sku gzugs dang ni phyag mtshan mi 'dod do/ zhes bya ba'o/ /de bas na las dang po pa'i rnal 'byor pa ma nyams pa'i mchog bsgrub par mngon par 'dod pa/ bla ma dam pa'i man ngag
 thob pa/ ma rungs pa'i grogs spangs pa/ du ba la sogs pa'i mtshan ma la goms pa rtsa dbu ma sbyangs pa/ sems can thams cad la bu gcig pa'i bsam pa can/ 'jig rten dang 'jig rten las 'das pa'i bden pa la
 brten pa/ rang lus dang bu dang chung ma la sogs pa la ltos pa med pa/ dgon pa dang gtsug lag khang dang bla ma'i nor gyi longs spyod las log pa/ sangs rgyas dang byang chub sems dpa' i lam bsten pa/ byams pa snying rje
 dga' ba btang snyoms tshangs pa'i gnas bzhi la gnas pa/ zhi ba la sogs pa 'jig rten gyi grub pa sgrub pa'i 'dod pa dang bral ba/ thams cad mkhyen pa'i go 'phang thob par 'dod pa/ chos kyi dbyings rnam pa thams
 cad dang ldan pa'i stong pa nyid kyi me long la bra phab pa bzhin du ma skyes pa'i chos mthong ba mig yor dang rmi lam lta bu rang bzhin can/ rdul phra rab kyi phung po'i chos kyi brtag dpyad dang bral ba/ chad pa'i stong nyid
 kyi? du byas pa/ nang gi bde ba rang rig pa'i chos la rjes su chags pa/ phyi'i dbang po'i bde ba yongs su spangs pa/ shes rab dang thabs kyi bdag nyid byang chub kyi sems brtan par byed pa kho na la brtson pa can/ bde ba chen po'i
 mchog shes rab ye shes kyi lam gyi man ngag thob pas rten dang brten can dang/ phyag mtshan dang/ mdog dang/ dbyibs dang/ dkyil 'khor gyi rtog pa mi 'dod ces bya'o/ /de bzhin du/ rgyal bas gsungs pa'i de nyid ni bcu drug
 bzhi du rab phye ba/ /sna tshogs rnam rtog lam gyis ni/ /rgyal lam med pas mi 'thob po/ /hUM phaT la sogs rtag pa can/ bskyed pa'i rim pa las 'das pa/ rdzogs rims sbyor ba de nyid ni/ /de nyid rgyu yin gzhan min no/ /me ni shing la
 gnas pa yang/ dum bur gtubs kyang mthong ba med/ /gtsub shing btsub stan gtsubs pa las/ /de nyid du ni mthong ba ltar/ /rnam rtog goms pa'i thabs kun gyis/ /sems kyi snang tshul mi mthong mod/ /ro ma brkyang ma gcig sbyor
 bas/ /de nyid du ni de snang 'gyur/ /du ba la sogs mtshan ma yin/ /dbu mar rgyu ba srog rtsol gyis/ /rig ma brtul zhugs rtag ma nyams/ /byang sems gyen du rgyu ba yis/ /sangs rgyas kun lam 'di yis ni/ /rnal 'byor bde ba
 thob 'gyur te/ /po nya kun gyi lhan skyes yang/ /ma nyams bde mchog thob 'gyur ro/ /gzugs la sogs pa'i rtog pa can/ /dkyil 'khor la sogs bsgom pa pos/ /'jig rten bsgrub pa 'grub mod kyi/ /'dod pa'i grub chen
 ga ?la 'byung/ /sems can snying rje gzhan don dang/ /rtag tu dge la brtson pa'o/ /rnam par dag pa'i slob ma yis/ /bla ma'i drin gyis lam mchog thob/ /lam mchog rin chen legs pa 'di/ /bag med mi la byin kyang ni/ /rang khyim nags su
 zhugs pa yis/ /spyod yul thag pas 'phrog par 'gyur/ /bag med le lo the tshom dang/ /gnyid dang 'gyod pa chom rkun gyis/ /nye du'i nags nang zhugs pa yis/ /grol lam mchog ni 'phrog 'gyur ro/ /srog gcod ma byin len dang rdzun/ /
 phra ma tshig rtsub gzhan bud med/ /ngag 'khyal brnab sems gnod sems dang/ log lta'i chom rkun gyis kyang 'phrog /bza' btung shin tu tshad med dang/ /longs spyod du ma'i chom rkun gyis/ /bag med brgyal 'gyur mongs pa'i ltar/ /brtson 'grus
 ldan pa'i yang 'phrog 'gyur/ /rin chen yin min mi shes pa/ /gzhan mi mkhas la ston par byed/ /rin thang med pa'i rin chen de/ /mi mkhas tshig gis skal med 'gyur/ /rin chen yon tan mkhas pa la/ /mi shes de ni bstan par bya/
 de yi rnam dag tshig gis ni/ /rang gi rin chen shes par bya/ /pha ma bu mo srid mo nu/ /spun dang yid 'ong chung ma dang/ /sangs rgyas byang sems kun gyi yang/ /gzugs kyis bdud ni gegs byed do/ /chom rkun nye du spangs nas su/ /'bad de
 slob mas rin chen lam/ /bla ma dam pa'i drin las byung/ /thos nas shin tu gsang bar bya/ /bdag byin brlab pa'i rim pa dang/ /dpa' bo rim pa thar lam min/ /shin tu rnam dag rim pa nyid/ /sangs rgyas kyis gsungs grol phyir ro/ /gang
 gis dbang bskur don nyid kyis/ /shes rab thabs dang ldan rgyud du/ /mtshams med lnga dang ldan rnams kyang/ /bde ba sangs rgyas kyis bsdu byas/ /dpa' bo'i rim pa phyi min te/ /lus la srog rlung zad byed yin/ /nam mkhar khams gsum
 snang ba gang/ /bdag byin brlab par ngo bshad do/ /'khor ba snying po med pa la/ /de zad pas ni de nyid las/ /chu shing zad pas de 'bras ltar/ /de zad pas ni de nyid las/ /sangs rgyas 'bras bu 'byung 'gyur ro/ /rta bla mo
 dang sdig srin ni/ /ma las skyes te ma gsong ngo/ /sgyu ma las byung rnal 'byor sems/ /de ltar sgyu ma gsod par byed/ /gnyis med mi g.yo sgyu med dang/ /yi dam ma nyams chags chen dang/ /dngos po dngos min ma yin pa/ /ye shes
 sems dpa' kun tu bzang/ /sgra med sgra chen lhan skyes dang/ /byang sems thig le 'dzin pa'i dpal/ /dus kyi 'khor lo'i rdo rje dang/ /rnal 'byor shes rab thabs dang ldan/ /de ltar rdo rje'i rnal 'byor gang/ /bde gshegs du mas bsten
 dang bshad/ /rdo rje 'dzin pa gsang sngags rig /byang sems kun gyis bka' bsdu mdzad/ /rdo rje'i theg gnas dam tshig ldan/ /rnyog pa dang bral 'dod pa med/ /bzod ldan lam gnas de nyid bsgom/ /dmyal ba'i 'jigs skyob slob ma
 la/ /lam ston don gyi tshangs par spyod/ /bdud 'joms rdo rje sems grags pa'i/ /bla ma thog mar bsten par bya/ /lha yi dmigs pa rnam pa gnyis/ /mngon sum ngang ni rjes su dpag /de nyid sbyor bas nam mkha' la/ /skar ma ltar ni
 mngon sum du/ /longs spyod rdzogs sku du ma snang/ /yongs su ma smin rnal 'byor la/ /goms phyir ri mo la sogs pa/ /don dam min pa'i rtog pa ni/ /shi ba'i ro ltar rjes dpag go /'dir sems can gyi bsam pa'i dbang gis
 rnal 'byor pa rnams la lha'i dmigs pa rnam pa gnyis te/ mngon sum dang ni rjes dpag go /de nyid las mngon sum ni de kho na nyid kyi sbyor bas nam mkha' la skar ma bzhin du longs spyod rdzogs pa'i sku du ma sgyu ma dang rmi lam lta bu dus
 gsum gyi srid pa gsum sha'i mig la sogs pa gzung ba'o/ /'dir dang po mngon shes med pas las dang po pa'i rnal 'byor pas sha'i mig gis sna tshogs gzugs brnyan mthong ngo/ /mngon shes byung nas lha'i mig gis mthong ngo/ /'dod
 chags dang bral bas na sangs rgyas kyi spyan gyis gzigs so/ /byang chub sems dpar gyur nas shes rab kyi mig gis so/ /yang dag par rdzogs par byang chub pa na/ /ye shes kyi mig gis te/ phung po lhag ma dang bral bas so/ /de ltar
 stong pa nyid mthong ba'i slad du de bzhin gshegs pas mig lnga ste sha'i mig la sogs pa'o/ /sems can gzhan stong pa nyid ma mthong ba la dmus long nyid yin no/ /zhes de kho na nyid bsgoms pa'i nges pa'o/ /de nyid ma yin pa'i sgrub pa ni
 mngon sum med par rjes dpag de shi ba'i lus dang 'dra ba don dam ma yin pa'i rtog par ri mo la sogs pas bstan par bya'o/ /de ltar lugs ma dang byas pa'i gzugs brnyan sangs rgyas byang chub sems dpa' rnams kyi dkyil
 'khor ram bris nas blos smon pa'i rnal 'byor la bsgom pa'i phyir nges pa'i rnam pa can brtan par bya ste rnam rtog tu bsgom pa'i nges pa'o/ /bsnyen pa bdud rtsi lnga sogs dang/ rdo rje bzhin sngags bzlas sogs kyis/ /nye sgrub so sor
 rtog sogs dang/ /pad rdor las byung bdud rtsis so/ /sgrub pa dga' ba la sogs dang/ /pad+mar ro gcig rdor gsum gyis/ /sgrub chen phra ba'i rnal 'byor dang/ /ma nyams rig ma'i sbyor bas so/ /'dir las dang po pas thogs
 mar sgrub thabs kyi tshogs bsnyen par bya ste/ /phyi'i bdud rtsi lnga ni bshad pa la sogs pa'o/ /sogs kyi sgras ni sgron ma lnga'o/ /nang gi bdud rtsi lnga ni phung po lnga'o/ /sogs pa'i sgras sgron ma lnga ni dbang po lnga'o/ /de dag la
 ltos pa med pa ni bsnyen pa ste lus dang nor gyi sred pa yongs su spong pa'o/ /bsnyen pa des lhas mchog sbyin te bshang ba la sogs pa zos pas ma yin no/ /rdo rje bzhi ni lus ngag yid gsum gyi longs spyod pa la
 ltos pa med pa dang/ nyams pa'i bde ba la ltos pa med pa ste lus ngag yid gsum dang tshangs par spyod pa'i brtul zhugs kyi don to/ /'dis lhas mchog sbyin gyi sred pa'i longs spyod la ltos pas ma yin no/ /sngags bzlas pa la
 sogs pa la bzlas pa ni srog rtsol te/ sogs pa'i sgras 'phang ba dang dgang ba dang gzhil ba'i sbyor ba ni/ bsnyen pa ste des lhas mchog sbyin gyi srog mnon pas ma yin no/ /zhes nges don to/ /sgrub pa thun mong gis phreng bas bzlas pa
 la sogs pa ni drang don to/ /nye ba'i sgrub pa ni so sor rtog pa la sogs pa ste/ 'khor ba pa'i zas ni mig la sogs pas gzugs la sogs pa gzung ba'o/ /de nas log pa ni so sor rtog pa ste stong nyid kyi gzugs brnyan la gzhan mig
 la sogs pas yul gzung ba'o/ /de bzhin du bsam gtan dang srog rtsol dang 'dzin pa'o/ /nges don du rdo rje dang pad+ma las byung ba'i bdud rtsis nye ba'i sgrub pa'o/ /drang don du 'khor gyi lha kun bskyed pa'o sgrub pa bshad de/ dga' ba
 la sogs pa'o/ /'dir dga' ba la sogs pa rdo rje gsum ni sku gsung thugs kyi thig le ste/ snying dang lte ba gsang ba'i pad+mar ro gcig tu gyur pa'i thig le bsgom pa ni bsgrub pa'o/ /sgrub pa chen po ni nges pa'i don du phra ba'i
 rnal 'byor ni rtsa dbu ma la gyen du rgyu pa'i sa bon gyis te/ shes rab ma'i sbyor bas ma nyams pa'i bde bas so/ /drang don du shes rab ma'i chos 'byung gi sna'i rtse mor thig le'i sbyor ba la sogs pa'o/ /stong nyid byang chub thog
 ma ru/ /de nas zla ba thig le 'dzin/ /de las sku ni skyed pa yin/ /dbang po'i byin brlabs rigs drug gis/ /'di ni bsnyen pa thun mong yin/ /nye ba'i bsgrub pa rdo rje bzhis/ /'dir thabs chung sogs rnam pa bzhi/ /bsgrub pa bsgrub chen dag la
 yang/ /'dir bskyed pa'i rim pas thog mar stong pa nyid las byang chub pa ni sems can rnams la tha mar phung po der ba las phung po gzhan ma blangs pa'i bar du stong pa'i mtshan nyid can srid gsum stong par mthong ba gang yin pa de ni
 stong pa nyid ces brjod do/ /de'i rjes su zla ba thig le 'dzin pa ni ma'i mngal du kun gzhi rnam shes kyi sa bon gyis thig le bzung ba'o/ /de las sku skyed pa ni zla ba bdun gyis gzugs rdzogs pa'o/ /rigs drug gis mig la sogs pa
 byin brlabs ni gzugs la sogs pa'i yul la 'jug pa'o/ /'di dang 'dra bar las dang po pas lha'i bsgrub pa la yang rtog pa'i bdag nyid bsgom par bya'o/ /'di ni thun mong gi bsnyen pa'o/ /nye ba'i sgrub pa ni srog rlung yongs su rdzogs
 pa ste/ rdo rje bzhi ni lus ngag yid ye shes rdo rje rdzogs pas so/ /'dir thabs rnam bzhi ni bsnyen pa dang/ nye ba'i bsgrub pa dag bsgrub pa dang/ sgrub pa chen po ste/ lo bcu drug gi bar du'o/ /'dir chung ngu ni skyes ma thag gi byis pa'o/ /so skyes
 nas byis pa bar ma'o/ /so 'gog pa na gzhon nu'o/ /so skyes pa nas bcu drug bar dar la pab pa ste bu skyed pa'i phyir ro/ /de ltar lha rnams la yang yan lag bzhi bsgom par bya'o/ /zhes 'jig rten gyi bden pa'i nges pa'o/ /da ni don
 dam pa'i bden pas sangs rgyas kyi sku bskyed pa brjod do/ /thog mar stong pa nyid byang chub pa ni man ngag la ci yang mi sems pa'o/ /de nas zla ba thig le 'dzin pa ni thig le chen po'i bar du du ba la sogs pa'i mtshan ma 'byung ba'o/ /
 sku bskyed pa ni thig le de las kun mthong ba'o/ /rigs drug gis ni sgrib pa dang bral ba'i phung po drug gis te/ byin brlabs ni so so'i skye bo'i phung po dang khams dang skye mchod 'gog pa'o/ /de nas chung ngu la sogs
 pa'i dbye bas thob par 'gyur te sa bcu gnyis kyi dbang phyug gi bar ro/ /de nas bden don rnam pa bcu gnyis don/ /de nyid rnam pa bcu drug rig /rnam pa nyi shus byang chub pa/ /rnam pa sangs rgyas kun rig mchog /ces nges pa'o/ /nam mkha' du ba
 la sogs lam/ /bsgoms te sna tshogs gzugs kyi bar/ /de nas srog rlung thur ser gnyis/ /rtsa yi 'khor lor brtan par bya/ /rnal 'byor byang sems zla ba ni/ /rA hu la ltar 'gog par bya/ /gang 'dod skye ba 'di nyid du/ /zhag 'ga' 
 zhig gis thob par 'gyur/ /lam gyi rgyal po 'di rim pas bsgom pa'i gdams pa dang po'i sangs rgyas kyi mchog la bcom ldan 'das kyis gsungs pa 'di lta ste/ du ba la sogs bsgoms nas su/ sems ni logs su brtan
 par bya/ /rtsa dbu ma ni sbyangs nas su/ /ma nyams mchog ni bsgrub par bya/ /pad+mar rdo rje bzhag nas su/ /srog rlung thig ler gnas par bya/ /thig le rnams la 'khor los sgyur/ /rdo rje thig le 'gog par bya/ /rnal 'byor rtag tu rtags
 'greng ba/ /rtag tu byang sems gyen du rgyu/ /phyag rgya chen po'i sbyor ba yis/ /rdo rje dbab pas byin brlab pa/ /rgyal chen drug brgya dang bcas pa'i/ /stong phrag nyi shu gcig dang ldan/ /ma nyams bde ba'i skad cig ni/ /tshang bas rdo rje
 sems dbang 'gyur/ ji srid bcu ni ma skyes par/ /shes rab ma gzhan mi bya'o/ /phyi rol g.yeng ba mi 'byung phyir/ /mtshan ma rnams kyang bsgom pa'o/ /rdo rje sems nyid so sor rtog /bcu ste bsam gtan mi bskyod do/ /srog
 rtsol don 'grub rnam pa bcu/ /'dzin pa rin chen 'byung ldan yin/ /DoM b+hi la ni rjes su dran/ /'od dpag med de de bzhin no/ /rnam par snang mdzad ting nge 'dzin/ /yul dang yul can bcu po ni/ /'jug pa med pa so sor rtog /lus la shes rab
 bsam gtan ni/ /rtog pa rnam dpyod dga' ba dang bde ba'i sems ni rtse gcig go /srog rtsol lam gnyis spangs nas su/ /srog rlung dbu mar rgyu ba'o/ /'dzin pa rgyu ba gnyis med par/ /srog rlung thig ler 'jug pa'o/ /rjes dran lus dang
 nam mkha' du/ /gtum mo'i bar du snang ba 'byung/ /shes rab thabs dang sbyor ba yis/ /ma nyams bde bas ting nge 'dzin/ /so sor rtog gis yul brol zhing/ /byin brlabs pa 'byung sngags kun gyi/ /bsam gtan sbyor bas dag pa ni/ /mngon shes
 lnga ni thob par 'gyur ro/ /nyi zla dang bral srog rtsol dag /byang chub sems dpa' kun gyis bsngags/ /bdud dang nyon mongs srog bral ba'i/ /stobs bcur 'dzin pa'i stobs kyis 'jug /rjes su dran pas dag pas na/ /ye shes sku las 'od kor 'byung
 ting 'dzin dag zhag 'ga' zhig gis/ /ye shes sku ni 'grub par 'gyur/ /so sor rtog la sogs pa yis/ /sngags pas don grub ma gyur na/ /nA da goms pa btsan thabs kyis/ /pad+mar rdo rje'i nor bu la/ /thig le 'gog pas bsgrub
 par bya/ /bsnyen par thig le'i sbyor ba ni/ /'khor lo can gyi kho stangs kyis/ /nam mkha' rnam pa bcu yin no/ /nye ba'i bsgrub pa sbyor drug ni/ /bdud rtsi'i lam du gnas pa yi/ /bgegs mthar byed kyi blta bas so/ /shes rab sbyor byung thig le ni//
 rdo rje'i nor bur phyin nas su/ /ma nyams gsum 'gyur bsgrub par ro/ /ma nyams bde gcig zhi ba ni/ /lhan skyes ye shes sgrub chen bla/ da ni sbyor ba drug bshad de/ /so sor rtog ni las dang por rdo rje sems dpa' ste ye shes kyi phung po'o// 
 de yang mtshan ma'i dbye bas rnam pa bcu ste/ ngu ba/ smig rgyu/ srin bu me khyer/ mar me/ 'bar ba/ zla ba/ nyi ma/ rA hu la/ glog /thig le/ snang ba'i dbye bas ma brtags pa'i ye shes kyi phung po'o/ /bsam
 gtan mi bskyong ni rnam pa bcu ste/ rnam shes kyi phung po'o/ /yul dang yul can bcu ni sna tshogs gzugs la gcig tu gyur pa ni bsam gtan no/ /srog rtsol yang bcu ste don yod grub pa 'du byed kyi phung po g.yon dang g.yas kyi
 dkyil 'khor bcu ni gcig tu gyur pa'i phyir ro/ /'dzin pa rin chen 'byung ldan ni tshor ba'i phung po ste/ srog rlung 'dzin pa ni lte ba/ snying ba/ /mgul pa/ dpral ba/ spyi gtsug gi pad+ma la 'gro ba dang 'ong ba'i dbye bas rnam pa
 bcu'o/ /DoM b+hi la ni rjes su dran 'od dpag med 'du shes kyi phung po rnam pa bcu'o/ /rjes su dran pa ni DoM b+hi la ste/ rtsa dbu ma la 'dod pa'i gnas skabs bcu'i dbye ba yis so/ /rnam par snang mdzad ting nge 'dzin ni rnam pa bcu ste rlung
 bcu 'gog pas so/ /de ltar bcom ldan 'das rlung rnams mi rgyu bas rab tu mi gnas pa'i mya ngan las 'das pa'o/ /de ni so sor rtog pa la sogs pa'i mtshan nyid brjod de/ so sor rtog pa ni yul dang yul can bcu'i 'brel pas
 rnam par shes pa mi 'jug pa ste/ lus la shes rab ni nam mkha' i gzugs brnyan stong pa'i yul rnams su mig la sogs pa lnga gzhan gyis rab tu 'jug pa'o/ /de bzhin du yul de nyid la shes rab ni lta ba'o/ /rtog pa ni dngos por
 bzung ba'o/ /dpyod pa ni nges pa'o/ /dga' ba ni sna tshogs gzugs la zhen pa'o/ /bde ba mi g.yo ba ni sna tshogs gzugs dang sems gcig tu byed pa'o/ /de ltar gzung ba dang 'dzin pa'i dbye bas bsam gtan ni rnam pa
 bcu'o/ /srog rtsol lam gnyis spangs nas ni g.yon dang g.yas pa'i lam spangs pa ni 'gags nas lam dbu ma la 'jug pa'o/ /de yang bcu ste dkyil 'khor bcu 'gog pas so/ /thig ler ni dpral bar srog rlung 'jug pa'o/ /rgyu ba gnyis bral ni
 'gro 'ong dang bral ba'o/ /'dzin pa ni dpral bar srog rlung 'dzin pa ste/ sems rtse gcig go /gtum mo'i bar du snang ba ni nam mkhar srid pa gsum gyi snang ba rjes su dran pa ste/ rnam pa bcu ni sngar bshad pa nyid do/ /shes rab thabs dang sbyor pa
 yis ni shes par bya ba dang rnam shes gcig tu gyur pas ye shes kyi gzugs la ma nyams pa'i bde ba'i dbang gis ting nge 'dzin rnam pa bcu ste/ srog rlung la sogs pa rgyu ba med pas so/ /de ltar sbyor ba yan lag drug bsgrub pa'o/ /da ni so sor
 rtog la sogs pa'i phan yon brjod de/ so sor rtog pas dag par 'gyur ba ni sna tshogs gzugs brtan par gyur na ste/ de'i tshe sngags kun byin gyis brlabs par 'gyur ro/ /smras pa tsam gyis mchog sbyin la sogs pa ster ro/ /mngon shes
 lnga ni gang gi tshe mig btsum pa med par gyur pa de'i tshe lha'i mig 'byung ngo/ /de ltar bsam gtan gyis dag pas na lha'i rna ba 'ong ngo/ /srog rtsol gyis dag pas ni gang gi tshe nyi ma dang zla ba'i lam dang bral zhing rtag tu dbu mar rgyu ba de'i tshe
 srog rtsol gyis dag pas byang chub sems dpa' rnams kyis bsngags pa brjod par 'gyur ro/ /'jug pa bdud dang nyon mongs sogs bral ba'i stobs bcur ni stong pa'i gzugs brnyan ni gzung ba yin te/ de la 'dzin pa'i sems
 'jug pa ni 'dzin pa'i stobs kyis so/ /srog rlung gi 'gro 'ong zad pas ro gcig tu 'gyur ro/ /rjes su dran pas dag pa ni sems kyis gzugs brnyan 'khyud pa ste/ rnam rtog thams cad dang bral ba nyid do/ /de'i tshe dri ma
 med pa'i 'ong kor 'byung ngo/ /ba spu rnams las 'od zer lnga yang spro ba'o/ /ye shes sku las ni stod pa nyid kyi sku las so/ /ting nge 'dzin dag pa ni gzung ba dang 'dzin pa'i sems gnyis gcig tu gyur pas ma nyams
 pa'i bde ba de ni ting nge 'dzin te/ des dag pa ni bral bar gyur pa'o/ /zhag 'ga' zhig gis ni lo gsum dang phyogs gsum gyis 'grub pa'o/ /ye shes sku ni dbang bcu la sogs pa thob pa'i byang chub sems dpar 'gyur ro zhes so sor rtog
 pa la sogs pa'i nges pa'o/ /da ni btsan thabs kyi sbyor bas bshad de/ so sor rtog pa la sogs pas stong pa'i gzugs brnyan mthong na yang ma nyams pa'i skad cig mi skye na srog rlung mi nan pa'i phyir de'i tshe na nga goms pa btsan
 thabs kyis srog rlung dbu mar rgyu bar byas la/ /pad+mar rdo rje'i nor bu la byang sems thig le 'gog pas 'jog pa med par ma nyams pa'i skad cig bsgrub par bya'o zhes btsan thabs so/ /nA da la goms pa ni 'dir sgrub thabs kyi le'ur
 bcom ldan 'das kyis gsungs pa 'di lta ste/ nus pa gang 'gro lte ba las/ /mchog gnas bcu gnyis bcu drug mthar/ lte bar de thim dbyu gu'i tshul/ /glog me lta bu gyen du rgyu/ /dbu mar bskyod pa 'jam zhing rgyu/ /'khor lor
 gtsug tor bu ga gnas/ /khab bzhin phyi rol pags la reg /de dus thur sel gyen du bskyod/ /rlung gnyis bkag nas gtsug gtor ral/ /gzhan gyi lus la zhugs par 'gyur/ /de ltar rdo rje langs byas nas/ /sems ni gzung 'dzin
 bral ba'i tshe/ /mkha' la spyod par 'gro ba dang/ /mngon shes lnga ldan sna tshogs yum/ /nga ni stong nyid gzugs brnyan bsgrub bar bya ba'i phyir lta stangs bshad de/ 'dir bsnyen pa ni du ba la sogs pa'i mtshan ma bsgom pa ste/ der dang
 po'i sbyong ba ni du ba la sogs pa'i mtshan ma sems kyis gzung ba'o/ /de yang rnam pa bcu ste du ba la sogs pa dmigs pa'i ye shes bcu'o/ /de yang gtsug tor 'khor los sgyur ba khro bo'i lta stangs ni mig 'dzums pa med par gyen du
 blta bos mtshan ma 'byung ste/ mtshan mo'i sbyor ba rnam pa bzhi dang/ nyin mo'i sbyor ba rnam pa drug go /de bas gzugs brnyan gyi bar so sor rtog dang bsam gtan gyis bsnyen pa'i yan lag yin no/ /bdud rtsi'i lam la sogs pa la bgegs
 mthar byed ni bdud rtsi 'khyil pa ste/ de'i blta ba ni bdud rtsi'i gnas dpral ba ste/ der gtad pas der nye ba'i bsgrub pa la yan lag drug go /gzugs brnyan mthong ba na srog rtsol dang srog rlung 'dzin par bya'o zhes nye bar bsgrub pa'o/ /shes
 rab sbyor byung thig le ni shes rab ma'i chags pa las byung ba'i thig le rdo rje nor bur gnas pa'o/ /ma nyams pa gsum ni gsang ba dang/ lte ba dang/ snying gar ro/ /de ltar bsgrub pa'i yan lag bya'o/ /ma nyams bde gcig zhi ba ni byang
 chub sems kyi ma nyams pa'i skad cig ni zhi bar brjod do/ /lhan skyes ye shes sgrub chen ni ma nyams bde ba dang sems lhan cig tu gyur pa nyid bsgrub pa chen po'i yan lag bzhi pa'o/ /sgyu ma lta bu phyag rgya che/ /nam mkhar sems su med
 sems la/ /me long gzugs brnyan lta bur snang/ /khams gsum kun ni snang bar byed/ /glog ltar 'od zer du ma spro/ /sgyu ma'i sku las tha mi dad/ /yul dang dbang po'i dbye ba med/ /snang ba tsam ste nam mkhar gnas/ /sems su med sems
 gcig pu yang/ /'gro ba sna tshogs sems la 'khyud/ /rang sems las byung sems snang tsam/ /me long nang gi gzugs brnyan bzhin/ /rnal 'byor kun gyis bsten bya ba/ /sangs rgyas sras bcas kyis bsten byas/ /ye shes me de 'bar
 ba na/ /phung po la sogs dang bcas pa'i/ /rtog pa'i dra ba sreg par byed/ /rnal 'byor kun la lo gcig gis/ /lhan cig skyes bde thob par byed/ /shes rab 'dzin pa'i sems nyid yin/ /ye shes de yi gzung bya ste/ /snang tsam
 du ba la sogs bcu/ /phyi yul dang bral 'dzin pa de/ /gzung yul la thim dbang bskur yin/ /de las ma nyams lhan skyes dang/ /mya ngan las 'das bde ba ni/ /bzhi ba dpe med 'jig rten 'das/ /sangs rgyas gsung 'di gang snying la//
 zhal na yod de bla ma'i mchog /'dir shes rab ni 'dzin pa'i sems yin te/ /de'i snang ba du ba la sogs pa rnam pa bcu gzung bar bya ba pra phab pa dang/ me long gi gzugs brnyan lta bu'i gzung bya ni ye shes so/ /me long la rang gi mig gi
 gzung brnyan rang gi mig gi gzung bya yin no/ /gzung yul la thim dbang skur yin pa ni gzung cha'i ye shes la 'dzin pa'i shes rab rab tu 'jug pas phyi'i yul la mi 'jug pa ni so sor rtog pa dang/ bsam gtan dang/ srog rtsol dang 'dzin pa kun ni thim
 par brjod de yan lag drug la'o/ /de las ni thim pa las te ma nyams lhan skyes dang mya ngan las 'das pa'i bde ba ni bzhi ba'i bde ba ste/ byis pa dang dar la bab pa dang/ 'dzag pa'i bde ba mchog 'jig rten gyi dpe las 'das
 pa khams gsum gyi spyod pa las grol ba'i don to/ /rgod pa dang blta ba dang reg pa dang 'khyud pa dang lag pas bzung ba dang 'khrig pa dang bral ba/ las kyi phyag rgya dang yid kyi phyag rgya'i rgyu las ma byung ba/ stong pa nyid rnam pa thams
 cad so sor snang ba'i mtshan nyid can no/ /sangs rgyas kyi gsung 'di ye shes kyi thabs yin te slob dpon gang gi snying la gnas pa rang gis myong ba'i phyir zhal la yod pa slob ma rnams la ston pa'i phyir dus rtag tu yod pa de ni bla ma'i
 mchog ste rdo rje 'dzin pa'i don to/ /dbang po gnyis kyi bde ba rtogs pa gzhan ni ma yin no/ /nam mkhar sems chags mig mi 'dzum/ /rdo rje lam nang zhugs nas ni/ /rnal 'byor kun gyi nam mkha' las/ /du ba la sogs mtshan ma mthong/ /du ba
 smig rgyu srin me khyer/ /mar me 'bar ba zla nyi ma/ /rA hu la glog thig le snang/ /de nang gzugs brnyan yul med pa/ /longs spyod rdzogs sku du ma snang/ /de ni rang sems kyi snang ba la rab tu 'jug par brjod de/ sngags kyi theg pa dang pha rol tu
 phyin pa 'dir rnal 'byor bsgom pa gnyis te/ nam mkha' la rnal 'byor bsgom pa dang/ bla gab med par ro/ /nam mkha' la rnal 'byor byed pa ni mtshan mo bu ga med pa'i khang ba ru mun pa nag po la nam mkha' la sems chags pas du ba la sogs
 pa'i mtshan ma mthong ba'o/ /rdo rje'i lam zhugs ni rtsa dbu mar srog rlung 'jug pa'o/ /mig mi 'dzum pa'i nam mkha' las/ du ba smig rgyu/ srin bu me khyer/ mar me zhes bya ba bzhi mtshan mo'i sbyor bas mthong ngo/ /de nas sbyin med pa'i
 nam mkha' mthong ste nam mkha' de las nyin mo'i sbyor bas/ /nam mkha' las byung rang 'byung ba/ /shes rab ye shes me po che/ /zhes bya ba sprin med pa'i nam mkha' 'bar bar mthong ngo/ /de ltar 'od chen rnam par snang bar byed/ /ye shes
 snang ba lam me ba ni zla ba'i snang ba'o/ /'gro ba'i mar me ni nyi ma'o/ /ye shes sgron ni rA hu la'o/ /gzi brjid chen po 'od gsal ba ni glog go /sngags drag mnga' bdag rig sngags rgyal ni thig le'o zhes pa ni mtshan ma bcu'o/ /gsang ba
 'dus pa la sogs par mtshan mo'i sbyor bas dang/ mtshan brjod las nyin mo'i sbyor bas bcom ldan 'das kyis gsungs so/ /de nas gsang sngags rgyal po don chen byed ces bya ba bum pa dang ras la sogs pa'i rnam pa thams cad
 dang ldan pa'i gzugs brnyan mthong ba'o/ /de nang gi ni thig le'i dbus su/ /gzugs brnyan yul med pa de'i dngos po med pas so/ /longs spyod rdzogs sku du ma ni gzugs brnyan gyi sbyor bas rang sgra gang yin pa
 de pos bar 'gyur ro/ /de ltar rtog pa med cing gzugs kyi snang ba ni sprul pa'i sku'o/ /sgra'i snang ba ni longs spyod rdzogs pa'i sku'o/ /sprin med nam mkha' rnal 'byor gyis/ /mig gnyis brtan pas blta bar bya/ /thig ler dri med 'od 'phro
 can/ /ri mo phra nag mthong ba'i bar/ /ri mo nag der kun mkhyen sku/ /rnyog med chu la nyi ma ltar/ /rang sems rnam pa kun dang ldan/ /yul med sna tshogs snang bar 'gyur/ /nyin mo'i sbyor ba 'dir sprin med pa'i nam mkha' la rnal 'byor pas
 mig brtan par blta bar bya ste/ /snga dro dang phyi dror nyi ma la rgyab bstan nas no/ /gzhan du na rab rib 'byung ste des de la gnod pas so/ /zhag re re zhing blta bar bya ste/ thig le'i nang du ri mo nag po skra'i tshad dri med 'od 'phro ba mthong
 ba'i bar du'o/ /a ba d+hu tIr ri mo nag po de'i nang du kun mkhyen gyi sku ma yin pa'i khams gsum chu la nyi ma ltar mdog sna tshogs rnyog pa med pa/ rang gi sems rnam pa kun dang ldan pa/ yul dang bral ba/ sems gzhan ma
 yin te/ gzhan gyi sems shes pa med pas so/ /'dir dang por rang sems kyi snang ba 'di rnal 'byor ba'i sha'i mig gis mthong ste/ lha'i mig la sogs pas gzhan gyi sems shes pa mthong/ chos bsdus pa las bcom ldan
 'das kyis mig ltar bshad de/ sha'i mig /lha'i mig /sangs rgyas kyi spyan/ shes rab kyi spyan/ ye shes kyi spyan ni goms pa'i stobs kyis 'byung bar 'gyur ro/ /de bas thams cad mkhyen pas ma gzigs pa mi srid do/ /sna
 tshogs gzugs kyi mtshan ma ni/ /sa yi rnam pa sra ba min/ /chu snang de ni chu min phyir/ /me ltar de min drod med pas/ /rlung nang de min mi g.yo'i phyir/ /mkha' ltar de min mthong phyir ro/ /mdog sna tshogs snang mdog ma yin/ /rnam pa kun ldan yang mi mthong/ /byis
 pas ma rig mun phyir ro/ /rlung mi 'gog na mtshan ma 'byung bar bshad de/ rang rlung chu yi rlung la thim/ /chu ni me la me rlung la/ /rlung mkhar nam mkhas mtshan ma bcu/ /de yang sna tshogs gzugs brnyan 'gyur/ /de yang ma nyams bde ba'i mchog /rang sgra ye
 shes sku ru 'gyur/ /ye shes las byung rdzu 'phrul kun/ /sgrub pa skye ba 'di nyid du/ /dbu mar srog rlung 'jug pa dang/ /g.yas g.yon nyi zla'i rgyu ba sdom/ /sems ni sna tshogs sku la chags/ /bde ba mchog gi rdo rje bslang/ /yang na pad+mar rdo rje'i
 sgra/ /rdo rje gsor ba rang lag gis/ /bde phyir sa bon 'dor mi bya/ /'chi 'jigs 'phrog gi bla ma'i zhal/ /'di ni phyag rgya chen po'i gdams ngag /dang po'i sangs rgyas las kyang gsungs/ /'di kho nas bsgrub par bya/ /bsam du med pa'i
 snang ba dang/ /du ba la sogs mtshan ma dang/ /shes rab gzugs brnyan mkha' dang mnyam/ /yod dang med pa las 'das pa'i/ /rang sems kyis ni myong ba'i don/ /rdul phra rab kyi tshogs pas ni/ /kun nas yongs su spangs pa yi/ /du ba smig rgyu
 srin me khyer/ /mar me 'bar ba zla nyi ma/ /rA hu la glog thig le che/ /sna tshogs gzugs brnyan 'od gsal ba/ /btsums dang ma btsums mig dag gis/ /stong par gang ni ma brtags pa/ /gzugs brnyan gang mthong rmi lam ltar/ /da ni rtag tu bsgom
 par bya/ /bsgom pa'i gzugs brnyan dngos med la/ /rnal 'byor pa yi bsgom ma yin/ /sems ngo dngos po med pa min/ /sku la rtog med mthong phyir ro/ /pra phab ltar ni me long la/ /dngos med las byung gzhon nus mthong/ /'das dang ma 'ongs pa yi
 chos/ /de nyid rnal 'byor nam mkha' mthong/ /de med pas ni dngos po min/ /dngos po stong pa'i don mthong phyir/ /dngos po med las don yod ni/ /sgyu ma'i dra ba rmi lam bzhin/ /chos can med pa'i chos kyi 'dir/ /skye
 bar 'dir ni rab tu bstan/ /mdza' yas sems tshim pa'i yid bzhin nor bu ji bzhin no/ /sngar ma mthong ba'i gzhon nu mas/ /pra phab pas ni rkun po mthong/ /phyogs gcig gi ni mig dag gis/ /sgrub pa bos ni phyin na mthong/ /gal
 te yod pa'i gzugs mthong na/ /rang gi gdong pa cis mi mthong/ /gal te med pa'i gzugs mthong na/ /ci ste ri bong rwa mi mthong/ /gzhan gyi mig gis mi mthong la/ /rang gi mig gis kyang mi mthong/ /ji ltar gzhon nu ma yi bu/ /ma skyes pa yang
 mthong 'gyur ro/ /gsang 'dus kyi rgyud phyi ma las kyang/ /so sor sdud dang bsam gtan dang/ /srog rtsol de bzhin 'dzin pa dang/ /rjes su dran dang ting nge 'dzin/ /sbyor ba yan lag drug tu 'dod/ /'dir so sor sdud ni phyi'i gzugs la sogs pa la mig la sogs pa'i
 mig gi rnam par shes pa la sogs pa mi 'jug par nang gi yul rnams la lha'i mig la sogs pa'i lha'i mig gi rnam par shes pa la sogs pa rab tu 'jug pa ste/ nang gi stong pa nyid la dmigs pas pra phab pa'i gzhon nu mas mthong
 ba ltar stong pa la ma brtags pa'i dngos po thams cad mthong ba ni so sor rtog par brjod de/ khams gsum gyi sku mthong ba'i phyir ro/ /bsam gtan ni chos thams cad stong par mthong ba ste/ shes rab ni de dag la sems rab tu 'jug
 pa'o/ /rtog pa ni sems kyi dngos po gzung ba'o/ /dpyod pa ni dngos po so sor rtog pa'o/ /dga' ba ni dngos po thams cad la sems gnas pa'o/ /mi g.yo ba'i bde ba ni dngos po thams cad las bde ba phun sum tshogs pa'o/ /de ltar bsam
 gtan yan lag lnga ldan no/ /de nas srog rtsol ni brkyang ma dang ro ma g.yon pa dang g.yas pa'i lam 'gags te/ A ba d+hU tI dbu ma'i lam la srog rlung rtag tu 'jug pa ste/ dgang ba dang/ bum pa can dang/ 'phang pa'i sbyor bas dbu ma la oM yig gis
 'gog pa dang/ A:yig gis phyir mi 'byung ba ste/ zla ba dang/ rA hu la dang/ nyi ma'i tshul gyis rnal 'byor gyis byed do/ /de nas 'dzin pa ni srog gi sa dang chu dang me dang rlung gi dkyil 'khor lte ba dang snying ga dang mgul pa dang dpral bar 'jug
 cing phyi rol du mi 'byung zhing/ thig ler srog rlung 'jug pa ni 'dzin pa'i yan lag tu brjod do/ /rjes su dran pa ni rang gi yi dam gyi lha'i gzugs brnyan rtog pa med par mthong ba dang/ de las 'od zer rnam pa sna tshogs pa'i 'od kor dang/ khams gsum
 gyi spro ba rnam pa du ma ni rjes su dran par brjod do/ /de nas ting nge 'dzin ni yi dam gyi lha la rjes su chags pas ma nyams pa'i bde ba gang yin pa de dang sems gcig tu gyur cing gzung 'dzin dang bral ba ting nge 'dzin du brjod do/ /bsnyen pa'i dus su nam mkha' 
 chos 'byung la sems kyi rdo rje rab tu bzhag la so sor rtog gis bsgoms te/ bsam gtan gyis brtan par bya'o/ /de la bcom ldan 'das kyis dam bcas pa/ bsam pa thams cad yongs spangs nas/ gang zhig yongs su brtag par bya/ gal te
 yid ches ma byung na/ /de tshe de tshig bdag gi brdzun zhes bya'o/ /'dir yid ches pa ni du ba la sogs pa'i mtshan ma yin te/ sngags la sogs pa gzhan ni nyin gcig gis mi 'grub pas ci ste yid ches par 'gyur/ de bas the tshom ma byas par
 blo rten med par byas la stong pa nyid zab mo la dmigs pa med pa'i ye shes 'byung ngo/ /khyi sogs ba la sha yi mig /lha yi mig ni lha sogs la/ /rang sangs rgyas dang nyan thos la/ /sangs rgyas spyan ni gsum pa 'byung/ /byang sems la ni
 shes rab spyan/ /sgrib pa med cing kun tu gzigs/ /ye shes spyan ni sangs rgyas la/ /dang po'i mtshan ma ni du ba la sogs pa sna tshogs kyi gzugs rdzogs pas ma nyams pa'i skad cig thob pa'o/ /mtshan ma bar ma ni
 ma nyams pa'i skad cig brgya phrag bco brgyad kyis sa dang po thob pa dang/ mngon shes lnga dang ma mthong ba'i don mthong ba dang/ 'jig rten gyi grub pa thob pa'o/ /tha ma'i mtshan ma ni ma nyams pa'i skad cig stong phrag nyi shu gcig dang/ drug brgyas
 sa bcu gnyis thob pas sangs rgyas nyid rdo rje 'dzin pa phyag rgya chen po 'grub po zhes bya ba thog ma'i dang po'i sangs rgyas kyi rgyud la sogs par gsungs pa sbyor ba yan lag drug pa rdzogs so// //grub pa thob pa'i paN+Di ta
 chen po sh+rI a nu pA ma rak+Shi ta pA da naM gis mdzad pa rdzogs so// //la stod ding ri'i glang skor mkhan pa khrod du/ rgya gar shar phyogs dza ga b+ha la'i paN+Di ta chen po bi b+hU ti tsan+d+ra dang/ gnyal gyi lo tsa ba mi mnyam bzang
 pos bsgyur ba'o// (//sbyor ba yan lag drug gi 'grel pa paN+Di ta chen po nyi ma dpal ye shes kyis mdzad pa bzhugs so//) //*/ /rgya gar skad du/ Sha Dang+ga yo gi TI kA/ bod skad du/ sbyor ba