བོད་ཡིག

e-texts based on the ACIP/ALL Input

rgya gar gyi mkhan po dI paM ka ra sh+rI dz+nyA na de nyid dang/ lo tsa ba dge bsnyen chen po rgya brtson 'grus seng ge dang/ dge slong tshul khrims rgyal bas bsgyur cing zhus te/ gtan la phab pa'o// (` dbu ma'i man ngag jo bo rjes mdzad pa bzhugs so/ //) rgya gar skad du/ ma d+hyA ma u pa de sha nA ma/ bod skad du/ dbu ma'i man ngag ces bya ba 'jig rten mgon po la phyag 'tshal lo/ /gang gi gsung gi 'od zer gyis/ bdag sogs rmongs pa ma lus pa'i/ /snying gi pad+ma kha 'byed pa'i/ /dam pa skyes mchog de la 'dud/ /theg pa chen po dbu ma'i man ngag ni 'di yin te/ /kun rdzob tu chos thams cad tshu rol mthong ba'i dor byas nas/ rgyu 'bras la sogs pa rnam par bzhag pa thams cad ji ltar snang ba bzhin du bden pa yin la/ don dam par na kun rdzob ji ltar snang ba de kho na gtan tshigs chen po rnams kyis gzhigs shing btsal na/ skra'i rtse mo brgyar bshags pa'i tshad tsam kyang bzung du med do zhes nges par khong du chud par bya'o/ /stan bde ba la skyil mo dkrung bcas te 'dug la/ 'di ltar re zhig dngos po ni gnyis te/ gzugs can dang gzugs can ma yin pa'o/ /de la gzugs can rnams ni rdul phra rab 'dus pa yin la/ de yang phyogs cha'i dbye bas phye zhing gzhigs na shin tu phra ba yang lus med cing shin tu snang ba yang med do/ /gzugs can ma yin pa ni sems yin la/ de yang 'di ltar 'das pa'i sems ni 'gags shing zhig /ma 'ongs pa'i sems ni ma skyes shing ma byung/ da ltar gyi sems ni 'di ltar yang shin tu brtag dka' ste/ kha dog med cing dbyibs bral ba/ nam mkha' dang 'dra bas ma grub pa 'am yang na gcig dang du ma dang bral ba'am/ yang na ma skyes pas sam yang de rang bzhin gyis 'od gsal ba la sogs pa rigs pa'i mtshon gyis dpyad cing gzhigs nas ma grub par rtogs so/ /de ltar gnyis pa ci'i ngo bor yang ma grub cing med tsam na so sor rtog pa'i shes rab de nyid kyang ma grub ste/ dper na shing gnyis phan tshun drung pas me byung ba'i rkyen gyis shing gnyis po nyid tshig cing med pa'i rjes la/ gang gi sreg par byed pa'i me de nyid kyang rang zhi ba de bzhin du rang dang spyi'i mtshan nyid kyis chos thams cad med par grub tsam na/ shes rab nyid kyang snang ba med cing 'od gsal ba ci'i ngo bor yang ma grub pas bying ba dang rgod pa la sogs pa'i skyon du gyur pa thams cad gsal te/ bar skabs der shes pa cir yang mi rtog cir yang mi 'dzin/ dran pa dang yid la byed pa thams cad spangs te/ ji srid du mtshan pa 'am rnam par rtog pa'i dgra 'am/ chom rkun ma langs kyi bar du de lta bu la shes pa gnas par bya'o/ /gang gi ldang bar 'dod na dal bus skyil mo krung bshig la langs te/ sgyu ma lta bu'i yid kyis lus dang ngag dang yid kyis dge ba ci nus kyis bya'o/ /de ltar gus pa dang yun ring ba dang rgyun mchad par sgrub na skal ba dang ldan pa rnams kyis tshe 'di nyid la bden pa mthong bar 'gyur te/ chos thams cad nam mkha' i dkyil lta bur 'bad pa dang rtsol ba med cing rang gi ngang gis grub par mngon sum du byed do/ /de'i rjes la thob pas ni chos thams cad sgyu ma la sogs par shes par bya'o/ /gang gi tshe rdo rje lta bu'i ting nge 'dzin mngon du byas phan chad ni rjes las thob pa yang mi mnga' ste/ dus thams cad du mnyam par bzhag pa'o/ /de lta ma yin na byang chub sems dpa' dang khyad par ci yod par la sogs pa'i rigs pa dang/ lus 'dir mi brjod do/ /gzhan gyi don bskal pa grangs med par tshogs bsags pa dang smon lam btab pa'i gdul bya rnams ji ltar 'dod pa bzhin du 'gyur ro/ /lung rigs pa shin tu mang mod kyi 'dir ma spros so/ /dbu ma'i man ngag ces bya ba slob dpon dpal mar me mdzad ye shes kyis mdzad de ba rdzogs so// //rgya gar gyi mkhan po de nyid dang/ zhus chen gyi lo tsA ba dge slong tshul khrims rgyal bas lha sa 'phrul snang du bsgyur cing zhus te gtan la phab pa'o// (//dbu ma'i man ngag gi 'brel pa slob dpon shes rab thar pas mdzad pa'o//) //rgya gar skad du/ ma d+hyA ma u pa de sha brit+ti/ bod skad du/ dbu ma'i man ngag ces bya ba'i 'grel ba/ 'phags pa 'jig rten dbang phyug