<style>
.hidden {
  display: none;
}
</style>
<a href="javascript:window.close();">CLOSE WINDOW</a>
<br><br>
N4099: bsgom pa'i rim pa<br><table><tr><td>
<input type="button" onclick="location.href='tcompletep.php?id=N4099&coll=TN&volcur=0';" value="show page break" />
<td width=150><td>
<input type="button" onclick="location.href='tcompletel.php?id=N4099&coll=TN&volcur=0';" value="show line break" />

<td width=150><td>
<a href="tcompleteu.php?coll=TN&id=N4099&volcur=0" style=font-size:25px;">བོད་ཡིག</a><td width=150><td>e-texts based on the ACIP/ALL <img src="../data/scanner/ALL.png" width=70> Input <a href="https://asianlegacylibrary.org/library/" target="_blank"><img src="../sub/link.png" width=20></table><hr><p style="font-size:18px;">rgya cher 'grel pa slob dpon bud+d+hA guptas mdzad pa rdzogs so// //slob dpon ka ma la shI las mdzad pa'i sgom? rim dang po'o// rgya gar skad du/ /b+hA ban kra ma/ bod skad du/ sgom pa'i rim pa 'jam dpal gzhon nur gyur pa la phyag 'tshal
 lo/ theg pa chen po'i mdo sde yi/ /tshul spyod las ni dang po pa/ /de las brtsams te sgom pa yi/ /rim pa mdo tsam brjod par bya/ /thams cad mkhyen pa nyid myur du thob par 'dod pas mdor na snying rje dang/ byang chub kyi sems dang/ sgrub pa dang/ gnas 'di gsum la
 'bad bar bya'o/ /de la sangs rgyas kyi chos ma lus pa'i rgyu'i rtsa ba snying rje kho na yin par shes par byas la de nyid la thog mar bsgom mo/ /de skad du 'phags pa chos yang dag par sdud pa las gsungs te/ de nas bcom ldan 'das la 'phags pa spyan ras
 gzigs dbang phyug gis 'di skad ces gsol to/ /bcom ldan 'das byang chub sems dpa' chos rab tu mang po la bslab par mi bgyi'o/ /bcom ldan 'das byang chub sems dpa' chos gcig rab tu gzung zhing rab tu rtogs par bgyis na sangs rgyas
 kyi chos thams cad de'i lag mthil du mchis pa lags so/ /chos gcig pa gang zhe na 'di lta ste/ snying rje chen po'o/ /bcom ldan 'das snying rje chen pos ni sangs rgyas kyi chos thams cad byang chub sems dpa' rnams kyi lag mthil du mchis pa lags
 so/ bcom ldan 'das dper bgyis na 'khor los sgyur ba'i rgyal po'i 'khor lo rin po che gang du mchis pa der dpung gi tshogs thams cad mchi'o/ /bcom ldan 'das de bzhin du byang chub sems dpa' i snying rje chen po gang du mchis pa der sangs rgyas
 kyi chos thams cad mchi'o/ /bcom ldan 'das dper bgyis na srog gi dbang po mchis na dbang po gzhan rnams 'byung bar 'gyur ro/ /bcom ldan 'das de bzhin du snying rje chen po mchis na byang chub sems dpa' i chos gzhan rnams kyang 'byung bar 'gyur ro zhes 'byung
 ngo/ 'phags pa blo gros mi zad pas bstan pa las kyang gsungs te btsun pa shA radwa ti'i bu gzhan yang byang chub sems dpa' rnams kyi snying rje chen po ni mi zad do/ /de ci'i phyir zhe na/ sngon du 'gro ba'i phyir ro/ /btsun pa shA radwA ti'i bu 'di lta ste dper na dbugs phyi nang
 du rgyu ba ni mi'i srog gi dbang po sngon du 'gro ba yin no/ /de bzhin du byang chub sems dpa' i snying rje chen po ni theg pa chen po yang dag par 'grub par bya ba'i phyir sngon du 'gro ba yin no zhes bya ba la sogs pa rgyas par bshad do/ /'phags pa ga ya go'i ri'i mdo las
 kyang gsungs te/ 'jam dpal byang chub sems dpa' rnams kyi spyod pa'i rtsom pa ni ci/ gnas ni gang/ 'jam dpal gyis smras pa/ lha'i bu byang chub sems dpa' rnams kyi spyod pa'i rtsom pa ni snying rje chen po'o/ /gnas ni sems can no zhes de la sogs/
 pa rgya cher 'byung ngo/ /de ltar snying rje chen pos bskyod? pas byang chub sems dpa' bdag nyid la mi lta bar gzhan la shin tu phan pa don du gnyer ba'i phyir tshogs bsags pa shin tu dka' zhing yun ring la dub par 'gyur ba la 'jug go /'phags pa
 dad pa'i stobs bskyed pa las gsungs pa lta bu ste/ de la snying rje chen po ni gang sems can thams cad yongs su smin par bya ba'i phyir sdug bsngal bskyed pa mi len pa ci yang med do/ /des bde ba skye ba mi 'dor ba ci yang med do zhe'o/ /da ltar shin tu dka' 
 ba la zhugs nas ring po mi thogs par tshigs yongs su rdzogs te gdon mi za bar thams cad mkhyen pa'i go 'phang thob par 'gyur ro/ /de bas na sangs rgyas kyi chos thams cad kyi rtsa ba ni snying rje chen po kho na'o/ /snying rje chen pos yongs su zin pas na sangs
 rgyas bcom ldan 'das kyis thams cad mkhyen pa'i ye shes go 'phang brnyes nas 'gro ba ma lus pa'i don mdzad cing bzhugs so/ /mi gnas ba'i mya ngan las 'das pa de lta bu yang bcom ldan 'das kyi thugs rje chen po'i rgyas?
 mya ngan las 'da' ba la mi gnas so/ /de yang sdug bsngal ba'i sems can la dmigs shing yid la byas pas skye bar 'gyur te/ sems can 'jig rten gsum na spyod pa thams cad sdug bsngal rnam pa gsum gyis ji ltar mthun pa bzhin du sdug
 bsngal lo zhes de ltar sems can thams cad la bsgom mo de la sems can dmyal ba de dag ni rgyun mi 'chad cing yun ring la tsha ba la sogs pa'i sdug bsngal sna tshogs kyi chu bor bying ngo zhes bcom ldan 'das kyis bka' stsal to/ /de bzhin
 du yi dags rnams kyang phal cher shin tu mi bzad pa'i bkres pa dang skom pa'i sdug bsngal gyi mes skams pa'i lus shin tu sdug bsngal mang po myong ste/ lo brgyar yang la las mchil ma'i thal ba dang/ mi gtsang ba tsam yang bzar mi rnyed
 do/ zhes bcom ldan 'das kyis bka' stsal to/ /dud 'gro rnams kyang gcig la gcig za ba/ khro ba dang rnam par 'tshe ba dang/ gsod pa la sogs pas sdug bsngal mang po myong ba kho nar snang ste/ 'di ltar kha cig sna 'bugs pa dang/ brdeg pa dang bcing
 ba dang/ gdags ba la sogs pa bdag la dbang med pa kun gyis bda' ba yin te/ mi 'dod bzhin du khal chen po lci ba bskur bas skyo zhing dal lo/ /de bzhin du dgon pa na 'khod pa yang nyes pa med par kha cig phyed du tshol zhing gsod de/ rtag
 tu 'jigs pas yid 'khrugs te phan tshun 'khor cing 'bros pa yang grangs med pa'i sdug bsngal dpag tu med pa kho nar snang ngo/ /de bzhin du mi la yang sems can dmyal ba'i sdug bsngal la sogs pa yod pa kho na ste/ 'di na rkun po la
 sogs pa gang dag yan lag btub pa dang/ gsal shing la skyon pa dang/ sbyangs te btags pa la sogs pas nyon mongs pa de dag ni sems can dmyal ba'i sdug bsngal kho na yin no/ /gang dag dbul zhing phongs pa de dag ni yi dags dang 'dra bar bkres
 shing skom pa la sogs pas sdug bsngal la/ /bran la sogs pa gang dag gzhan gyis lus la dbang byas pa dang/ gang dag mthus mnan te gnod par byed pa de dag na dud 'gro dang 'dra bar brdeg pa dang/ gdags pa la sogs pas sdug bsngal lo/ /de
 bzhin du btsal bar bya ba dang/ gcig la gcig gnod pa byed pa la sogs pa dang/ sdug pa dang bral ba dang/ mi sdug pa dang phrad pa la sogs pa de dag la sdug bsngal dpag tu med do/ /gang dag kha cig phyug cing skyid pa dang 'dra bar snang ba de dag kyang
 'byor pa'i mdza' ni rgud pa ste/ lta ba ngan pa sna tshogs gzing gzing bar nub cing sems can dmyal ba la sogs pa'i sdug bsngal myong bar 'gyur ba'i rgyu las dang nyon mongs pa bsags pas gad kan 'dug pa dang 'dra bar sdug bsngal gyi rgyur gyur pa
 yang yang dag par sdug bsngal ba kho na yin no/ /lha la yang gang dag 'dod pa'i khams na spyod pa de dag ni 'dod pa'i mes yid rab tu 'bar zhing sems 'khrugs pa dang 'dra bar gsha' mar mi 'dug la skad cig kyang sems mnyam par 'jog par mi
 'gyur te/ ra bzhi ba bde ba'i nor gyis dbul ba de dag la bde ba ci zhig yod/ /rtag tu 'chi 'pho ba dang ltung ba la sogs pa'i 'jigs pa'i mya ngan gyis non pa dag ste de dag ji ltar bde/ gang dag gzugs med pa na spyod pa de dag kyang sdug bsngal ba las 'das
 mod kyi/ 'on kyang de dag 'dod pa na spyod pa'i bag la nyal rnams shin tu ma spangs bas yang sems can dmyal ba la sogs par ltung ba yod pas 'gyur ba'i sdug bsngal yod ba nyid do/ /lha dang mi 'di dag thams cad ni las dang nyon mongs pa la sogs pa'i
 rgyu'i gzhan gyi dbang du gyur pas na 'du byed kyi sdug bsngal gyis sdug bsngal ba nyid do/ /de ltar 'gro ba thams cad sdug bsngal gyi me lce'i phreng ba'i sa yin par bltas la/ ji ltar bdag nyid kyi sdug bsngal mi sdug pa ltar
 gzhan dag gi yang de dang 'dra ba sems shing sems can thams cad la snying brtse ba kho na bsgom par bya ste/ thog ma kho nar mdza' bshes kyi phyogs la gong du smos pa'i sdug bsngal sna tshogs myong bar lta zhing bsgom par bya'o/ /de nas sems
 mnyam pas bye brag med par lta ste/ thog ma med can gyi 'khor ba lan brgyar yang bdag gi gnyen du ma gyur pa'i sems can gang yang med do snyam du sems pas phal pa la bsgom par bya'o/ /gang gi tshe mdza' bshes kyi phyogs dang 'dra bar
 'phel ba rnams la yang snying rje mtshungs par 'jug pa de'i tshe dgra'i phyogs la yang de bzhin du sems mnyam pa nyid la sogs pa yid la byed pas bsgom par bya'o/ /gang gi tshe mdza' bshes kyi phyogs dang 'dra bar dgral yang mnyam
 par 'jug pa de'i rim gyis phyogs bcu'i sems can thams cad la yang bsgom par bya'o/ /gang gi tshe yid du 'ong ba'i bu mi bde ba bzhin du sems can thams cad la yang sdug bsngal gtan nas dbyung bar 'dod pa'i snying rje rang gi ngang gis
 'jug pa bdag nyid kyis mtshungs par 'jug par gyur pa de'i tshe de rdzogs pa yin pas snying rje chen po'i ming thob ste/ 'phags pa blo gros mi bzad pas bstan pa'i ming las bsngags pa bzhin no/ /'di ltar snying rje bsgom pa'i go rim 'di ni bcom
 ldan 'das kyis chos mngon pa'i mdo la sogs pa las bka' stsal to/ /de ltar snying rje goms pa'i stobs kyis sems can ma lus pa drang bar dam bcas na bla na med pa yang dag par rdzogs pa'i byang chub tu smon pa'i rang bzhin gyis byang chub
 kyi sems sgrim? mi dgos 'khor nar skye ste/ 'phags pa chos bcu pa'i mdo las/ sems can mgon med pa/ skyabs med pa/ gling med pa dag mthong nas bla na med pa yang dag par rdzogs pa'i byang chub tu sems bskyed do zhes gsungs pa bzhin no/ /gzhan gyis yang
 dag par 'dzin du bcug pa las kyang byang chub sems dpa' la byang chub kyi sems bskyed mod kyi/ 'on kyang snying rje chen pos non te/ byang chub sems dpa' bdag nyid kyis byang chub tu sems bskyed pa khyad che bar bcom ldan 'das kyis 'phags pa de bzhin gshegs
 pa'o ye shes kyi phyag rgya'i ting nge 'dzin las bka' stsal to/ /byang chub kyi sems sgrub pa dang mi ldan yang 'khor ba'i nang na 'bras bu che bar bcom ldan 'das kyis de skad byams pa'i rnam par thar pa las bka' stsal te/ rigs kyi bu 'di lta ste dper na rdo rje rin po che ni chag
 kyang gser gyi rgyan khyad par du 'phags pa thams cad zil gyis gnon to/ /rdo rje rin po che'i ming yang mi 'dor zhing dbul ba thams cad kyang bzlog go /rigs kyi bu de bzhin du thams cad mkhyen pa nyid du sems bskyed pa'i rdo rje rin po che sgrub pa dang mi ldan pa yang nyan thos dang
 rang sangs rgyas kyi gser gyi rgyan thams cad zil gyis gnon to/ /byang chub sems dpa' ming yang mi 'dor zhing 'khor ba'i dbul ba yang zlog par byed do/ /zhes 'byung ngo/ /gang la pha rol tu (phyin pa rnams la rnam pa thams cad kyi rnam pa thams) cad du slob mi nus pa des kyang 'bras bu che ba'i phyir
 thabs kyis yongs su zin par byang chub tu sems bskyed par bya ste/ 'di ltar rgyal po chen po khyod ni bya ba mar byed pa mang ste/ thams cad kyi thams cad du sbyin pa'i pha rol tu phyin pa la bslab pa nas/ shes rab kyi pha rol tu phyin pa'i bar la slob mi bzod na 'di ltar
 rgyal po chen po rdzogs pa'i byang chub la 'dun pa dang dad pa dang/ don du gnyer ba dang/ smon pa 'di 'gro yang rung/ 'greng yang rung/ 'dug kyang rung/ nyal yang rung/ sad kyang rung/ za yang rung/ 'thung yang rung/ rtag tu rgyun mi 'chad par dran par gyis shig /yid la gyis
 shig/ bsgoms shig /sangs rgyas dang byang chub sems dpa' dang/ nyan thos dang rang sangs rgyas dang/ so so skye bo thams cad dang/ bdag gis 'das pa dang/ ma 'ongs pa dang/ ji ltar byung ba'i dge ba'i rtsa ba thams cad bsdus te/
 rjes su yi rang ba'i mchog gis rjes su yi rang bar gyis shig /rjes su yi rang nas kyang sangs rgyas dang/ byang chub sems dpa' dang/ rang sangs rgyas dang/ nyan thos rnams mchod par bya ba'i phyir dbul lo/ /phul nas kyang sems can thams cad dang thun mong du gyis shig /de
 nas sems can thams cad thams cad mkhyen pa nyid kyi bar du thob par bya ba'i phyir dang/ sangs rgyas kyi chos thams cad yongs su rdzogs par bya ba'i phyir nyin gcig bzhin du dus gsum du bla na med pa yang dag par rdzogs pa'i byang chub tu yongs su sngos shig
 rgyal po chen po khyod de ltar zhugs la rgyal po gyis shig /rgyal po'i srid kyang mi nyams so/ /byang chub kyi tshogs kyang yongs su rdzogs par 'gyur ro zhes de la sogs pa rgyas par bshad nas/ yang bka' stsal pa/ rgyal po chen po khyod yang dag par rdzogs pa'i byang
 chub kyi sems kyi dge ba'i rtsa ba de'i rnam par smin pas lan du ma da lha dang mir skye bar gyur to/ /lha dang mir skyes pa thams cad na yang dbang bar gyur to zhes rgyas par bka' stsal pa bzhin no/ /sgrub pa snying por byed pa'i byang chub sems kyi 'bras bu gang yin pa de
 shin tu rgya che bar grub ste/ 'phags pa dpas sbyin gyis zhus pa las/ byang chub sems kyi bsod nams gang/ /de la gal te gzugs mchis na/ /nam mkha' i khams ni kun gang ste/ /de ni de bas lhag par 'gyur/ zhes gsungs pa lta bu'o/ /sdong po bkod pa yas
 kyang bsngags te/ rigs kyi bu byang chub kyi sems ni sangs rgyas kyi chos thams cad kyi sa bon lta bu'o zhes rgyas pa bshad do/ /byang chub kyi sems de yang rnam pa gnyis te/ smon pa'i sems dang zhugs pa'i sems te/ 'phags pa sdong po bkod pa'i mdo las
 gsungs pa/ rigs kyi bu sems can gyi 'jig rten na gang dag bla na med pa yang dag par rdzogs pa'i byang chub tu sems kyi smon pa'i sems can de dag ni rnyed par dka' o/ /sems can gang dag bla na med pa yang dag par rdzogs pa'i byang chub tu yang dag par zhugs pa de dag ni de bas
 kyang shin tu rnyed par dka' o zhes 'byung ngo/ /de la 'gro ba mdza' dag la phan pa'i phyir sangs rgyas su gyur cig ces gang thog mar don du gnyer ba'i ni smon pa'i sems so/ /gang phan chad sdom pa bzung ste tshogs rnams la zhugs pa de ni zhugs pa'i sems so/ /sdom pa ni pha rol po
 mkhas pa mthu dang ldan pa sdom pa la gnas pa las mnod do/ /mthun pa med na sangs rgyas dang byang chub sems dpa' rnams mngon du byas la 'phags pa 'jam dpal rgyal po nam mkha' zhes bya bar gyur pa na byang chub tu sems bskyed pa de bzhin du bskyed par bya'o//
 de ltar sems bskyed pa'i byang chub sems dpa' bdag ma dul na gzhan mi dul bar shes nas bdag nyid sbyin pa la sogs pa sgrub pa la rab tu sbyor ro/ /sgrub pa med par byang chub mi thob bo/ /'di lta ste 'phags pa ga ya go'i ri las gsungs pa/ byang chub ni
 sgrub pa snying por byed pa'i byang chub sems dpa' sems dpa' chen po rnams kyi yin te/ log par sgrub pa snying por byed pa rnams kyi ni ma yin no zhe'o/ /'phags pa ting nge 'dzin rgyal po las kyang gsungs te/ de lta bas na sgrub pa snying por bya'o zhes gzhon nu khyod kyis
 bslab par bya'o/ /de ci'i phyir zhe na/ gzhon nu sgrub pa snying por byed pa la bla na med pa yang dag par rdzogs pa'i byang chub rnyed dka' ba ma yin pa'i phyir ro zhe'o/ /byang chub sems dpa' i sgrub pa de yang pha rol tu phyin pa dang/ tshad med pa dang/ bsdu ba'i dngos po la sogs
 pa'i bye brag yin par 'phags pa blo gros mi zad pas bstan pa dang/ dkon mchog sprin la sogs pa'i mdo las/ rgyas par bshad pa yin no/ /'di ltar 'jig rten gyi gzo la sogs pa'i gnas kyi bar dag la yang byang chub sems dpa' bslab par bya ba yin
 na 'jig rten las 'das pa'i bsam gtan la sogs pa lta ci smos te de lta ma yin na sems can gyi don gyi rnam pa thams cad ji ltar bya/ byang chub sems dpa' i sgrub pa de yang mdor na thabs dang shes rab kyi ngo bo yin te/ shes rab
 'ba' zhig kyang ma yin te/ thabs 'ba' zhig kyang ma yin no/ /de yang 'phags pa dri ma med par grags pas bstan pa las kyang shes rab dang bral ba'i thabs dang/ thabs dang bral ba'i shes rab ni byang chub sems dpa' i 'chid pa'o zhes gsungs so/ /thabs dang
 bcas pa'i shes rab dang/ shes rab dang bcas pa'i thabs ni thar pa'o zhes bsngags so/ /'phags pa ga ya go'i ri las kyang gsungs te/ byang chub sems dpa' rnams kyi lam ni mdor sdu na 'di gnyis te/ byang chub sems dpa' dag la lam 'di
 gnyis dang ldan na myur du bla na med pa yang dag par rdzogs pa'i byang chub mngon bar rdzogs par 'tshang rgya'o/ /gnyis gang zhe na/ 'di lta ste/ thabs dang/ shes rab bo zhe'o/ /de las shes rab kyi pha rol tu phyin pa ma gtogs par sbyin pa la sogs pa'i
 pha rol tu phyin pa dang/ bsdu ba'i dngos po la sogs pa zhing yongs su dag pa dang/ longs spyod chen po dang/ g.yog 'khor mang po phun sum tshogs pa la sogs pa dang/ sems can yongs su smin par byed pa dang/ sprul ba la sogs pa mngon par mtho ba'i
 chos sdud par byed pa'i dge ba thams cad ni thabs zhes bya'o/ /shes rab ni thabs de'i ngo bo nyid phyin ci ma log par rtogs pa'i rgyu yin te/ des yang dag par thabs kyi bye brag phyed nas phyin ci log med pas bdag dang gzhan gyo don ji lta ba bzhin du bsgrubs
 pas sngags kyis btab pa'i dug za ba dang 'dra ste/ kun nas nyon mongs par mi 'gyur ro/ /de skad du mdo sde de nyid las bka' stsal te/ thabs ni bsdu ba shes pa'o/ /shes rab ni yongs su spyod pa shes pa'o zhe'o/ /'phags pa dad ba'i stobs bskyed pa las kyang gsungs
 te/ thabs la mkhas pa ni chos thams cad yang dag par sdud pa gang yin pa'o/ /shes rab gang zhe na/ gang chos thams cad ma 'dres pa la mkhas pa'o/ /thabs dang shes rab 'di gnyis ni sar chud pa rnams kyis kyang dus thams cad bsten par bya ste/ shes rab
 'ba' zhig ni ma yin no/ /'di ltar byang chub sems dpa' i sa bcu'i po thams cad la yang pha rol tu phyin pa thams cad kun su spyod de/ sa bcu'i mdo la sogs las kyang lhag ma rnams kyang kun tu mi spyod pa na/ yin no zhes 'byung ngo/ /sa brgyad pa la byang chub sems
 dpa' zhi bar gnas pa la/ sangs rgyas bcom ldan 'das rnams kyis bslad ba dang yang 'gal te/ 'di ltar de las gsungs pa ni/ kye rgyal ba'i sras byang chub sems dpa' i sa mi g.yo ba 'di la gnas pa'i byang chub sems dpa' sngon gyi smon lam gyi stobs
 bskyed pa dang/ chos kyi sgo'i rgyun de la gnas pa de la sangs rgyas bcom ldan 'das rnams de bzhin gshegs pa'i ye shes nye bar sgrub par mdzad do/ /de la 'di skad ces kyang bka' stsal to/ /rigs kyi bu legs so legs so/ /sangs rgyas kyi chos thams cad
 rjes su rtogs par bya ba la 'di ni don dam pa'i bzod pa yang yin na/ 'on kyang gang nged kyi stobs bcu dang mi 'jigs pa la sogs pa sangs rgyas kyi chos phun sum tshogs pa de khyed la med kyi/ sangs rgyas kyi chos phun sum tshogs pa de yongs su btsal ba'i
 phyir brtson 'grus rtsems shig /bzod pa'i sgo 'di nyid kyang ma dor cig /rigs kyi bu khyod kyis de ltar zhi ba rnam par thar pa thob kyang byis pa so so'i skye bo ma zhi ba/ rab tu ma zhi ba/? nyon mongs pa sna tshogs kun 'byung bar 'gyur ba/ rnam par rtog pa rnam pa
 sna tshogs kyis g.yon sbro? ba 'di dag la sogs shig /yang rigs kyi bu sngon gyi smon lam dang/ sems can gyi don thob par bya ba dang/ ye shes kyi sgo bsam gyis mi khyab par dran par gyis shig /yang rigs kyi bu 'di ni chos rnams kyi chos nyid de/ de bzhin
 gshegs pa rnams byung yang rung/ ma byung yang rung/ chos kyi dbyings 'di ni gnas pa nyid de/ 'di ltar chos thams cad stong pa nyid dang/ chos thams cad dmigs su med pa'i/ /'dis ni de bzhin gshegs pa rnams nyi cha rab tu dbye
 par bya ba ma yin gyi/ nyan thos dang rang sangs rgyas thams cad kyang rnam par mi rtog pa'i chos nyid 'di thob po/ /yang rigs kyi bu nged kyi lus tshad med pa dang/ ye shes tshad med pa dang/ sangs rgyas kyi zhing tshad med pa dang/ ye shes mngon par sgrub pa tshad
 med pa dang/ 'od kyi dkyil 'khor tshad med pa dang/ dbyangs kyi yan lag rnam par dag pa tshad med pa la bltos te/ khyod kyis kyang de bzhin du mngon par sgrub pa skyed cig /rigs kyi bu gang khyod kyi chos thams cad la rnam par mi rtog pa'i snang ba 'di ni snang
 ba gcig pur zad do/ /rigs kyi bu de bzhin gshegs pa rnams la ni chos snang ba 'di 'dra ba mdza' yas par 'gyur te/ mdzad pa mdza' yas shing 'brel pa mdza' yas par 'gyur te/ gang dag grangs dang/ bgrang ba dang/ tshad dang dpe dang/ zla yang med pa
 de dag thob par bya ba'i phyir mngon par sgrub pa skyed cig /rigs kyi bu re shig phyogs bcu'i zhing tshad med pa dang/ sems can tshad med pa dang/ chos rnam par phye ba tshad med pa la ltos te/ ji lta ba bzhin bgrang bar gyis shig ces de skad bka' stsal to//
 kye rgyal ba'i sras dag de ltar byang chub sems dpa' de lta bu la sangs rgyas bcom ldan 'das de dag ye shes mngon par sgrub pa'i sad med pa de dag la sogs pa gang dag gis byang chub sems dpa' ye shes rnam par phye ba tshad med pa mngon par sgrub
 pa'i las mngon par sgrub pa dag nye bar sgrub par mdzad do/ /kye rgyal ba'i sras khyod mos par bya'o/ /khyed kyis khong du chud par bya'o/ /gal te sangs rgyas bcom ldan 'das de dag gis byang chub sems dpa' de de ltar thams cad mkhyen pa'i ye shes mngon par
 sgrub pa'i sgo dag la zhugs par ma mdzad du zin na de ni de nyid du yongs su mya ngan las 'da' bar 'gyur te/ sems can thams cad kyi bya ba yang rgyun chad par 'gyur ro zhes rgya cher 'byung ngo/ /'phags pa dri ma med par grags pas bstan pa dang/ ga ya go'i ri
 las gsungs pa gong du smos pa yang spyir bshad pa yin pas de dang yang 'gal lo/ 'phags pa chos thams cad shin tu rgyas par bsdus pa las bka' stsal pa de dang yang 'gal lo/ /de ni 'di skad bka' stsal te/ 'jam dpal dam pa'i chos spong
 ba'i las kyi sgrib pa ni phra'o/ /'jam dpal gang la de bzhin gshegs pas gsungs pa'i bka' la la ni bzang bar 'du shes/ la la ni ngan par 'du shes pa de ni dam pa'i chos spang ba'o/ /gang chos spong ba nges chos spangs pa de bzhin gshegs pa la skur pa
 yin no zhes rgyas par bka' stsal to/ /de las yang bka' stsal pa/ ma pham pa byang chub sems dpa' rnams kyi pha rol tu phyin pa drug yang dag par sgrub pa 'di ni byang chub kyi phyir yin na/ de la yang mi blun po de dag 'di skad du byang chub sems dpa' shes rab kyi
 pha rol tu phyin pa kho na la bslab par bya'o zhes zer zhing/ pha rol tu phyin pa lhag ma rnams la sun 'byin to/ /ma pham pa 'di ji ltar sems/ nga ka shi ka'i rgyal por gyur pa gang yin 'di ltar phug ron gyi phyir bdag gi sha khra la byin pa de/ shes rab 'chal ba
 yin nam/ byams pas gsol pa/ bcom ldan 'das de ni ma lags so/ bcom ldan 'das kyis bka' stsal pa/ byams pa nga byang chub sems dpa' i spyad pa spyod pa na/ pha rol tu phyin pa drug dang ldan pa'i dge ba'i rtsa ba dag bsags na dge ba'i rtsa ba de dag gis
 gnod par gyur tam/ byams pas gsol pa/ de ni ma lags so/ /bcom ldan 'das kyis bka' stsal pa/ ma pham pa khyod kyis bskal pa drug cur sbyin pa'i pha rol tu phyin pa yang dag par bsgrubs/ bskal pa drug cur tshul khrims kyi pha rol tu phyin pa
 dang/ bskal pa drug cur shes kyi pha rol tu phyin pa'i bar du yang dag par bsgrubs na/ de la mi blun po de dag 'di skad du tshul gcig kho nas byang chub ste/ 'di lta ste/ stong pa nyid kyi tshul gyis so zhes zer ro zhes rgyas par 'byung ngo//
 de lta bas na gnyis ka dus thams cad du yang byang chub sems dpa' bsten par bya ba kho na yin no/ /de ltar na de bzhin gshegs pa'i mi gnas pa'i mya ngan las 'das pa yang 'grub po/ /'di ltar sbyin pa la sogs pa'i thabs kyis gzugs kyi sku dang/ zhing dang
 g.yog 'khor la sogs pa longs spyod chen po 'bras bu phun sum tshogs pa yongs su 'dzin pas bcom ldan 'das mya ngan las 'das pa la yang mi gnas/ shes rab kyis phyin ci log yang dag par spangs pas 'khor ba la yang mi gnas te/ 'khor ba'i rtsa ba
 ni phyin ci log yin pa'i phyir ro/ /shes rab dang thabs kyi rang bzhin gyi lam 'dis sgro 'dogs pa dang skur pa'i mdza' rnam par spangs nas dbu ma'i lam bstan te/ shes rab kyis ni sgro 'dogs pa'i mdza' spong la/ thabs kyis ni skur pa'i mdza' spong ba'i phyir ro//
 de bas na 'phags pa chos yang dag par bsdud pa las kyang bka' stsal te/ mtshan dang dpe byang bzang po'i gzugs kyi sku yongs su grub pa la mngon par dka' ba yin gyi/ chos kyi sku mngon par rtogs pa tsam la mngon par dga' ba ni ma yin no zhes so/ /yang bka' 
 stsal pa/ de bzhin gshegs pa ni shes rab dang thabs kyis bskyed pa ste/ gzhan gyi dring la 'jog pa yang srid par shes par bya'o zhe'o/ /rnam par snang mdzad mngon par rdzogs par byang chub pa las kyang/ thams cad mkhyen pa'i ye shes de ni snying rje'i rtsa ba
 las byung ba yin/ byang chub kyi sems kyi rgyu las byung ba yin/ thabs kyi mthar phyin pa yin no zhes gsungs so/ /gang chos gzings dang 'dra bar shes pa rnams kyis chos nyid kyang spang bar bya na/ chos ma yin pa lta ci smos zhes gsungs pa de yang phyin ci
 log tu mngon par zhen pa spang ba'i phyir de la dgongs te spang ngo zhes bka' stsal gyi/ dgos pa sgrub pa'i phyir mi bsten pa yang ma yin no/ /yang 'di skad du gsungs te/ chos yongs su bzung mod kyi log par mi bzung zhes 'byung ba'i log par mi bzung ngo zhes bya ba ni lam log
 par bzung bar mi bya ba'i don to/ /kha cig las sbyin pa la sogs pa 'khor ba'i 'bras bu brjod pa gang yin pa de ni shes rab dang bral ba'i sbyin pa la sogs pa sngar brjod pa dang/ de tsam gyi dge ba'i rtsa bas chog par 'dzin pa rnams kyi dbang du mdzad nas gong nas gong du dge
 ba'i rtsa ba la spro bar bya ba'i phyir/ /de lta ma yin du zin na 'phags pa dri ma med par grags pas bstan pa la sogs pa sngar smos pa thams cad dang yang 'gal ba kho nar 'gyur ro/ /de lta bas na shes rab dang thabs gnyis ka bsten dgos pa kho nar gnas so/ /de la shes
 rab kyis yongs su zin pa'i sbyin pa la sogs pa pha rol tu phyin pa'i ming thob ste/ gzhan du ma yin no/ /de bas na sbyin pa la sogs pa yongs su dag par bya ba'i phyir mnyam par gzhag pa la gnas par byas la/ shes rab bskyed pa la je? 'bad par bya'o/ /de la thog mar re shig
 thos ba las byung ba'i shes rab bskyed par bya ste/ des re shig lung gi don kun tu 'dzin par byed do/ /de nas bsams pa las byung ba'i shes rab kyis nges pa dang drang ba'i don rnam par 'byed par byed do/ /de nas des bye brag phyed pa'i don la brten nas yang dag pa kho na'i don bsgom
 par bya'i yang dag pa ma yin pa de ni ma yin no/ de lta ma yin du zin na phyin ci log tu bsgoms shing the tsom yang ma bsal bas yang dag pa'i shes pa yang 'byung bar mi 'gyur te/ de'i phyir bsgom pa don med par 'gyur bas mu stegs can rnams kyis bsgom pa dang
 'dra'o/ bcom ldan 'das kyis ting nge 'dzin gyi rgyal po las kyang bka' stsal te/ gal te chos la bdag med so sor rtog /so sor de brtags gal te bsgom pa ni/ /de nyid mya ngan 'das thob 'bras bu'i rgyu/ /rgyu gzhan gang yin de ni zhi mi 'gyur zhe'o/ /de lta bas na bsams pa'i 
 shes rab kyis rigs pa dang lung gis brtags la yang dag pa kho na'i dngos po'i rang gi ngo bo bsgom par bya'o/ /yang dag ba'i dngos po'i rang gi ngo bo ni don dam par skye ba med pa kho na ste/ rigs pa dang lung gis gtan la dbab bo/ /de
 la lung ni 'phags pa chos yang dag par sdud pa las skye ba med pa ni bden no/ /skye ba la sogs pa'i chos gzhan ni mi bden no zhes ji skad du gsungs pa lta bu'o/ /de yang don dam pa dang mthun pa'i phyir skye ba med pa bden no zhes gsungs kyi/ /don dam par ni
 skye ba yang ma yin/ mi skye ba yang ma yin te/ de tha snyad thams cad las 'das pa'i phyir ro/ /yang de nyid las bka' stsal pa/ rigs kyi bu 'jig rten gnas pa ni 'jig pa dang 'byung ba la mngon par zhen te/ de'i phyir de bzhin gshegs pa thugs rje chen po
 dang ldan pas 'jig rten gyi skrag pa gnas bsal ba'i phyir tha snyad kyi dbang gis skye'o/ /'gag go zhes gsungs kyi/ /'di la ni chos gang yang skye ba med do zhe'o/ /'phags pa sangs rgyas 'gro ba las kyang bka' stsal te/ tshul bzhin du dra ba ni gang lags//
 tshul bzhin ni gang lags/ bka' stsal pa/ skye ba med pa ni tshul bzhin no/ /de 'dri ba ni tshul bzhin 'dri ba'o/ /zhe'o/ yang de nyid las bka' stsal pa/ chos thams cad ni ci'i sgo ste/ chi 'pho dang bral ba dag go /chos thams cad ni ngo bo nyid kyi sgo ste/ ngo bo nyid
 kyis stong pa nyid kyi phyir ro zhes 'byung ngo/ /'phags pa bden pa gnyis rnam par 'byed pa las kyang/ skye ba med par mnyam pa nyid kyis chos thams cad mnyam pa nyid do zhes brjod do/ /shes rab kyi pha rol tu phyin pa las kyang/ rab 'byor gzugs ni gzugs
 kyi ngo bo nyid kyis stong ngo/ /rnam par shes pa'i bar du rnam par shes pa'i ngo bo nyid kyis stong ste/ rang gi mtshan nyid kyis stong pa nyid kyi phyir ro zhes bka' stsal to/ /glang po'i rtsil las kyang/ gang la skye ba srid pa yi/ /dngos po gang yang mi dmigs te/
 'byung ba med pa'i dngos rnams la/ /byis pa dag ni 'byung bar 'dod ces gsungs so/ /yab dang sras mjal ba las kyang/ chos 'di dag thams cad ni dus gsum du mnyam pa nyid kyis mnyam pa dag ste/ /'das pa'i dus na yang chos thams cad ngo bo nyid med ba nas/ da
 ltar byung ba'i dus kyi bar du ngo bo nyid dang bral ba'o zhes bka' stsal te/ de ltar re shig lung gis brtag par bya'o/ /rigs pas brtag par byas na lung gi don gud du bkri mi nus te/ de bas na rigs pas so sor brtag par bya'o/ /de la rigs pa mdor brjod par
 bya ste/ dngos po rnams kyi skye ba rgyu med pa las 'byung ba zhig gam/ rgyu yod pa las 'byung ba zhig tu 'gyur grang na/ res 'ga' pa yin par snang ba'i phyir rgyu med pa las 'byung ba ma yin te/ rgyu la mi bltos par bye brag med pa'i phyir skye ba'i dus bzhin du
 thams cad du dngos po rnams ci'i phyir mi 'byung/ dngos po med pa'i dus dang yang bye brag med pas skye ba'i dus na yang 'byung ba'i mi rigs so/ /de ltar re zhig rgyu med pa las 'byung du mi rung ngo/ /rgyu yod pa las 'byung ba ma yin te/ 'di ltar mu stegs can rnams
 kyis dbang phyug la sogs pa rtag pa rgyur btags pa de las kyang dngos po rnams mi skye ste/ rim gyis 'byung bar snang ba'i phyir ro/ /rgyu ma tshang ba med pa'i 'bras bu ni rim gyis 'byung ba mi rigs te/ bltos pa med pa'i phyir ro/ /dbang phyug la sogs pa bdag nyid
 la mthu yod pa ni gzhan la bltos pa med de/ rtag pa yin pas de la gzhan dag gis phan gdags mi dgos pa'i phyir ro/ /phan mi 'dogs pa la bltos par mi rung ngo/ /de bas na dbang phyug la sogs pa nus pa thams cad kyis stong pa'i phyir mo gsham gyi
 bu la sogs pa bzhin du ngo bo nyid med pa kho na yin no/ /dngos po ni don byed nus pa'i mtshan nyid yin na/ de dag ni gang du yang 'bras bu rim gyis bskyed kyang mi nus te/ gang du brtags pa yin no/ /cig car yang mi skye ste/ 'di ltar 'bras bu thams cad bskyed nas
 phyin chad kyang gal te de kho na bzhin du de nyid bskyed nus na ni de'i tshe nus pa'i rang bzhin rjes su 'jug pas snga ma bzhin du 'bras bu skye bar 'gyur ro/ /rjes su mi 'jug na ni snga ma'i ngo bo nyid bor bas mi rtag par 'gyur ro/ /de bas na rtag
 pa zhes bya ba'i dngos po gang yang med do/ /de nyid kyi phyir bcom ldan 'das kyis bka' stsal pa/ blo gros chen po 'di lta ste/ nam mkha' dang/ 'gog pa dang/ mya ngan las 'das pa la sogs pa ma byas pa'i dngos por mngon par zhen cing sgro 'dogs
 pa ni med pa las sgro 'dogs pa yin no zhe'o/ /de ltar re zhig de dag ni rtag pa las skyer mi rung ngo/ /mi rtag pa las kyang ma yin te/ de las 'das pa dang ma 'ongs pa ni dngos po med pas de las skyes shes byar mi rung ste/ rgyu med pa las skye bar
 'gyur ba'i phyir ro/ /dus mnyam pa dang mi mnyam pa de las mi skye ba'i phyir da ltar gyi las kyang mi skye'o/ /'di ltar re zhig dus mnyam pa las ma yin pa ni rgyu'i ngo bon nyid dang 'bras bar 'bras bu yang de dang dus dus gcig tu 'byung ste/ grub pa'i phyir ro//
 dus tha dad pa las kyang mi skye ste/ dus gzhan gyis mchod de skye na ni 'das pa la sogs pa las skye bar 'gyur ba'i phyir ro/ /bar du mchod par skye na gal te bdag nyid thams cad kyis bar du ma chod na ni skad cig gcig tu skad cig thams cad
 chud pas bskal pa yang skad cig tsam du 'gyur te/ dper na rdul phra rab rnams bdag nyid thams cad kyis 'dres nas gong bu rdul phra mo tsam nyid du 'gyur ba bzhin no/ /ji ste phyogs gcig gis phrad na ni de'i tsha skad cig la cha shas yod par
 'gyur ro/ /bdag nyid kyang mi skye ste rgyu med ba las byung ba kho na'i phyogs kyi nang du phyogs 'di 'dus pa'i phyir ro /bdag nyid la byed pa 'gal ba'i phyir ro/ /gnyis ka las kyang ma yin te/ phyogs gnyis ka'i skyon 'du bar 'gyur ba'i phyir ro/ /de lta
 bas na don dam par dngos po 'di dag thams cad ma skyes pa kho na yin la kun rdzob tu ni skye ba yod pas lung la sogs pa dang yang mi 'gal lo/ /de skad bcom ldan 'das kyis kyang bka' stsal te/ dngos po skye ba kun rdzob tu/ /dam pa'i don du rang bzhin med/ /rang
 bzhin med la 'khrul pa gang/ /de ni yang dag kun rdzob 'dod ce 'o/ /rigs pa 'di bcom ldan 'das kyis kyang dgongs te/ sA lu ljang pa la sogs pa las/ bdag dang gzhan dang gnyis ka dang rgyu med pa las skye ba bkag pa'i phyir ro/ /rnam pa gcig tu na 'di ltar
 rigs pas rnam par dpyad par bya ste/ dngos po rnams ni rnam pa gnyis te/ gzugs can dang/ gzugs can ma yin pa'o/ /de la re zhig gzugs can bum pas sogs pa de dag ni rdul phra mo tha dad pa'i ngo bo yin pas na rang bzhin gcig pa ma yin no/ /rdul phra mo
 shar nub na gnas pa rnams kyang shar la sogs ba'i phyogs dang ldan ba nyid kyis tha dad pa rnams kyang mi 'grub pa'i phyir rdul phra mo bsags pa'i bdag nyid du me'i rang bzhin yang ma yin no/ /gcig dang du ma'i ngo bo nyid las ma gtogs pa dngos po ngo
 bo nyid gzhan med pas dngos po gzugs can 'di dag ni rmi lam la sogs par dmigs pa'i gzugs la sogs pa bzhin du don dam par ngo bo nyid med pa kho na'o/ /de yang 'phags pa lang kar gshegs pa las bcom ldan 'das kyis bka' stsal pa
 blo gros chen po glang gi rwa yang rdul phra mor bshig na mi 'dug go /rdul phra mo rnams kyang so sor bshig na rdul phra mo'i mtshan nyid las mi gnas so zhe'o/ /gang dag gzugs med pa de dag kyang de bzhin du brtags na ngo bo nyid med pa kho na ste/ 'di ltar phyi rol gyi
 sngon po la sogs pa'i don med pa'i stobs kyis rnam par shes pa la sogs pa phung po gzugs can ma yin pa de dag nyid sngon po la sogs pa'i ngo bor khas blangs dgos so/ /bcom ldan 'das kyis kyang/ phyi rol gzugs ni yod min te/ rang gi sems ni phyi
 rol snang zhes bka' stsal to/ /de bas na sngon po la sogs pa sna tshogs kyi rnam par snang ba'i phyir dang/ gzung ba dang 'dzin pa'i rnam par snang ba'i phyir ngo bo nyid gcig tu mi rung ste/ gcig dang du ma mi mthun pa'i phyir gcig
 ni du ma'i ngo bor mi rung ngo/ /gang gi ngo bo nyid gcig tu ma grub pa'i phyir du ma'i ngo bor yang mi rung ste/ du ma nyid ni gcig 'dus pa'i ngo bo yin pa'i phyir ro/ /ji ste gzugs la sogs pa'i rnam pa 'di dag brdzun pa nyid du snang bar khas len na rnam par
 shes pa'ang mi bden par 'gyur te/ rnam par shes pa de'i ngo bo nyid dang tha dad pa ma yin pa'i phyir ro/ /bdag nyid rtogs pa'i ngo bo las gud na rnam par shes pa'i ngo bo med la/ gzugs la sogs pa'ang bdag nyid kyis snang bar byed na rnam par
 shes pa'i rang gi ngo bor gyur pa rnams brdzun pa nyid yin pas rnam par shes pa thams cad kyang brdzun pa nyid yin pas rnam par shes pa thams cad kyang brdzun pa yin par khas blangs par gyur to/ /rnam par shes pa ni sgyu ma dang 'dro'o zhes
 bcom ldan 'das kyis kyang bka' stsal to/ /de lta bas na gcig dang du ma'i ngo bo nyid kyis stong pa'i phyir dngos po 'di dag thams cad don dam par bden pa ma yin no zhes bya ba de nges so/ /de'i don bcom ldan 'das kyis kyang 'phags pa lang
 kar gshegs pa las/ ji ltar gzugs rnams me long la/ /gcig dang gzhan rnams rnam spangs par/ /snang yang de ni yod ma yin/ /de bzhin dngos rnams ngo bo nyid ces bka' stsal to/ /gcig pa nyid dang du ma nyid bral zhes bya ba'i tha
 tshig go /yang bka' stsal pa/ blo yis rnam par gzhigs na nag go /ngo bo nyid ni gzung du med/ /de phyir de dag brjod med cing/ /ngo bo nyid kyang med par bshad ce'o/ /de ltar bsams pa'i shes rab kyis yang dag pa'i don bye brag phyed pa byas la
 de mngon sum du bya ba'i phyir bsgom pa'i shes rab bskyed do/ /thos pa la sogs pa tsam gyis don mngon sum du mi 'gyur ro zhes 'phags pa dkon mchog sprin la sogs pa las bstan pa yin no/ /sgrub pa po rnams la yang nyams yod de/ shes pa'i snang ba rnams shin tu
 gsal ba 'byung ba med pa yang dag par sgrib pa'i mun pa mi spongs so bsgom pa lan mang du byas na yang dag pa ma yin pa'i don la shes pa shin tu gsal ba 'byung ste/ dper na mi sdug pa dang zad par sa la sogs pa la snyoms par zhugs pa rnams kyis shes
 ba 'byung ba lta bu yin na yang dag pa'i don la lta ci smos/ de ltar bsgom pa'i 'bras bu ni yongs su gsal ba'i shes pa yin pas 'bras bu dang bcas pa'i don yin par bcom ldan 'das kyis ting 'dzin gyi rgyal po las bka' stsal te/ khyod kyis khong du chud par
 bya mos par bya ji lta ji ltar mang du mis brtags na/ da la gnas pa'i rnam par rtog pa des de ltar de ltar de la sogs gzhol 'gyur zhes de la sogs pa rgya cher 'byung ngo/ /de lta bas na de kho na mngon sum du bya ba'i phyir bsgom pa la rab tu 'jug go /de la rnal 'byor
 pas sems gnas par bya ba'i phyir thog ma kho nar re shig zhi gnas bsgrub par bya'o/ /sems ni chu bzhin du g.yo ba'i phyir zhi gnas kyi gzhi med par gnas pa med do/ /mnyam par ma gzhag pa'i sems kyis ni yang dag pa ji lta bar shes par mi nus te/
 bcom ldan 'das kyis kyang mnyam par gzhag pas yang dag ba ji lta ba bzhin du shes so/ /zhes bka' stsal to/ /zhi gnas de ni rnyed pa la sogs pa 'dod pa la mi lta zhing tshul khrims la legs par gnas la sdug bsngal la sogs pa dang du len pa'i ngang tshul
 can du gyur la brtson grus brtsams na shin tu myur du 'grub bo/ /de bas na 'phags pa dgongs pa nges par 'grel pa la sogs pa las kyang sbyin pa la sogs pa gong ma'i yang gong ma'i rgyu nyid yin par bstan to/ /de ltar tshul khrims la sogs pa zhi gnas kyi tshogs
 rnams la gnas te/ yid du 'ong ba'i phyogs su sangs rgyas dang byang chub sems dpa' thams cad la phyag la sogs pa bya zhing sdig pa bshags pa dang/ bsod nams kyi rjes su yi rang ba yang byas nas/ snying rje chen po kho na mngon sum du
 byas bas 'gro ba mdza' dag gdon pa'i bsam pa can du gyur nas lus drang po srad la ston ba de ba'i steng du 'dug ste/ dkyil mo dkrung bcas la ting nge 'dzin mngon par sgrub bo/ /de la thog mar re zhig mdor bsdu na rnam pa ji snyed kyis rnam par dpyad par bya ba dngos por
 mdza' dag 'du bar 'gyur ba'i dngos po gang yin pa de la sems gzhag par bya'o/ /dngos po 'dus pa ni gzugs can dang/ gzugs can ma yin pa'i bye brag gis rnam pa gnyis te/ las dang po pa'i rnam par g.yeng ba'i nyes pa bsam pa'i phyir re shig 'dus ba
 de la ni dmigs pa'i rigs so/ /gang gi tshe yid la byed pa khugs par gyur pa de'i phung po dang khams la sogs pa'i bye brag gi rgyas par yang dmigs bar byed pa kho na ste/ 'di skad dgongs pa nges par 'grel pa la sogs pa las kyang rnal 'byor pa rnams
 kyi stong pa nyid bco brgyad la dmigs pa la sogs pa'i bye brag gis dmigs pa'i rnam pa kun tu bka' stsal to/ /de bas na bcom ldan 'das kyis thams cad la phan gdags pa'i phyir gzugs can dang gzugs can ma yin pa la sogs pa'i bye brag gis
 mdor bsdus pa dang bar ma dang/ rgyas ba dag gis dngos por rab tu dbye ba chos mngon pa la sogs pa las bstan to/ /de yang dngos po la sgro 'dogs pa dang skur ba spang ba'i phyir phung po dang khams la sogs par bsdus pa'i sgo nas 'grad do/ /de nas dngos po thams
 cad bsdus pa'i bye brag byed nas de nyid la sems yang dang yang rgyun du 'jug par bya'o/ /gang gi tshe bar skabs su 'dod chags la sogs pas sems phyi rol tu rnam bar g.yeng bar byed pa de'i tshe rnam par g.yeng bar shes par byas la mi sdug pa la sogs pa
 bsgom pas rnam par g.yeng bzhi bar byas shing myur du de nyid la sems phyi phyir gzhug par bya'o/ /mi sdug pa la sogs pa bsgom pa'i go rims 'dir yi ge mangs kyi dogs te ma bris so/ /gang gi tshe de la mi dga' bar mthong ba de'i tshe ting 'dzin gyi yon tan la lta bas de
 la dga' ba bsgom zhing rnam par g.yeng ba la nyes bar lta bas mi dga' ba rab tu zhi bar bya'o/ /ji ste gang gi tshe rmugs pa dang gnyid kyis non te/ dmigs pa 'dzin pa la mi gsal zhing sems byid bar gyur pa de'i tshe snang ba'i 'du shes bsgom pa 'am/ mchog tu dga' ba'i
 dngos po sangs rgyas la sogs pa'i yon tan yid la byed pas byid ba bsal la dmigs pa de nyid dam du bzung ngo/ /ji ste gang gi tshe de sngon rgod pa dang rtse ba la sogs pa dran zhing bar bar du sems rgod bar mthong ba de'i tshe mi rtag pa la sogs pa yid 'byung bar 'gyur ba'i
 dngos po yid la byed bas rgod pa zhi bar bya'o/ /de nas yang dmigs pa de nyid la sems mngon par 'du byed pa med bar 'jug pa la 'bad par bya'o/ /gang gi tshe byed ba dang rgod ba gnyi ga dang bral te mnyam par 'jug cing sems rang gi ngang gis 'byung bar mthong ba de'i
 tshe rtsol ba klog de btang snyoms su bya'o/ /gal te mnyam par 'jug pa la rtsol ba byas na sems rnam par g.yeng bar 'gyur ro/ /gang gi tshe dmigs pa de nyid la mngon par 'du byed pa med par ji srid 'dod pa'i bar du sems 'jug bar 'gyur ba de'i tshe zhi gnas rdzogs pa yin
 par rig bar bya ste/ zhi gnas kyi ngo bo nyid ni sems rtse gcig pa tsam du zad pa'i phyir 'di ni zhi gnas thams cad kyi spyi'i mtshan nyid yin no/ /de'i dmigs pa la ni nges pa med do/ /zhi gnas kyi lam 'di ni shes rab kyi pha rol tu phyin pa la sogs pa las kyang bshad de
 bka' stsal ba/ de dang de la sems 'jug rgyun du 'jog go /blan te 'jog go /nye bar 'jog go /dul bar byed do/ /zhi bar byed do/ /rnam par zhi bar byed do/ /rtse gcig tu byed do/ /mnyam par 'jog go zhes rtsig dgu smos so/ /de la 'jog ces bya ba ni dmigs pa la sems 'dogs pa'o/ /rgyun tu 'jog ces bya ba'i
 dmigs pa de nyid la rgyun du 'jog pa'o/ /blan te 'jog ces bya ba ni rnam par g.yeng ba shes nas de stong? pa'o/ /nye bar 'jog ces bya ba ni rnam par g.yeng ba spangs nas phyi phyir brtun te dmigs pa de nyid la 'jig pa'o/ /'dul bar byed de zhes bya ba ni dga' 
 bskyed pa'o/ /zhi bar byed do zhes bya ba ni rnam par g.yeng ba'i nyes pa mthong nas mi dga' bar rab tu zhi bar byed do/ /rnam par zhi bar byed pa ni rmugs pa dang/ gnyid la sogs pa langs pa rnams sel ba'o/ /rtse gcig tu byed pa ni mngon par tu byed pa med pas 'jug par 'bad
 par byed pa'o/ /mnyam par 'jog ces bya ba ni sems mnyam par gyur pa na btang snyoms su byed pa ste/ mnyam par 'dzin zhes bya ba'i tha tshig go tshig 'di rnams kyi don 'di ni 'phags pa byams pa dang/ sngon gyi mkhan po rnams kyis bshad do/ /mdor na ting nge 'dzin thams
 cad kyi nyes pa drug yod de/ le lo dang dmigs pa brjed pa dang/ bying ba dang rgod pa dang/ mi rtsol ba dang/ rtsol ba'o/ /de rnams kyi gnyen po spong ba'i 'du byed brgyad bsgom mo/ /'di lta ste/ dad pa dang/ 'dun pa dang/ rtsol pa dang/ shin tu sbyangs pa dang/ dran pa dang/ shes
 bzhin dang/ sems pa dang/ btang snyoms so/ /de la gong ma bzhi ni le lo'i gnyen po ste/ 'di ltar ting nge 'dzin gyi yon tan dag la mngon par yid ches pa'i mtshan nyid dang ldan pa'i dad pa rnal 'byor pa rnams de la 'dod pa skye'o/ /de nas 'dod pas brtson 'grus rtsom mo//
 de brtson 'grus kyi stobs kyis lus dang sems las su rung ba nyid byed do/ /de nas lus dang sems shin tu sbyang bar gyur pas le lo ldog ste/ de bas na dad pa la sogs pa ni le lo spong ba'i phyir bsgom mo/ /dran pa ni dmigs pa brjed pa'i gnyen po'o/ /shes bzhin ni bying
 ba dang rgod pa'i gnyen po ste/ des bying ba dang rgod pa yang dag par rtogs pa'i phyir ro/ /bying ba dang rgod pa rab tu zhi ba'i dus na mi rtsel ba nyes pa ste/ de'i gnyen por sems pa bsgom mo/ /bying ba dang rgod pa rab tu zhi ste/ gang gi tshe sems rnal du 'jug pa de'i tshe rtsol bar
 nyes pa yin te/ de'i gnyen por de'i tshe btang snyoms sgom mo/ /spong ba 'du byed brgyad po de dag dang ldan na ting nge 'dzin shin tu khugs pa yin te/ des rdzu 'phrul la sogs pa yon tan rnams sgrub par byed do/ /de lta bas na mdo sde las spong ba'i 'du byed brgyad dang ldan pa'i rdzu 'phrul
 gyi rkang pa bsgom mo zhes bka' stsal to/ /sems rtse gcig pa de phyi phyir las su rung ba nyid dang ldan zhing dmigs pa la sogs pa'i yon tan gyi khyad par thob pas bsam gtan dang/ gzugs med pa'i snyoms par 'jug pa dang/ rnam par thar pa dang sogs pa'i mang thob pa
 'di ltar gang gi tshe btang snyoms kyi tshor ba dang ldan zhing rtog pa dang bcas pa dang/ dpyod pa dang bcas par gyur pa de'i tshe mi logs pa med pa zhes bya ste/ bsam gtan dang po'i sbyor ba'i sems so/ /gang gi tshe 'dod pa'i sred pa dang/ sdig pa'i chos rnams dang bral zhing
 rtog pa dang/ spyod pa dang/ dga' ba dang/ bde ba dang ldan par gyur pa de'i tshe bsam gtan dang po zhes bya'o/ /bsam gtan dang po de nyid las rtog pa tsam med pa de ni bsam gtan khyad par can zhes bya'o/ /gang gi tshe rtog pa dang dpyad pa dang bral te bsam gtan dang
 po'i sa'i sred pa dang bral bar gyur nas dga' ba dang bde ba dang/ nad yongs su dad pa dag dang ldan par gyur pa de'i bsam gtan gnyis pa zhes bya'o/ /gang gi tshe bsam gtan gnyis pa'i sa'i sred pa dang bral bar gyur te bde ba dang/ btang snyoms dang/ dran pa dang/ shes
 bzhin dang ldan par gyur pa de'i bsam gtan gsum pa zhes bya'o/ /gang gi tshe bsam gtan gsum pa'i sa'i sred pa dang bral te sdug bsngal yang ma yin bde ba yang ma yin zhing/ btang snyoms dang/ dran pa dag dang ldan par gyur pa de'i tshe bsam gtan bzhi pa zhes
 bya'o/ de bzhin du gzugs med pa'i snyoms par 'jug pa dang/ rnam par thar pa dang/ zil gyis gnon pa'i skye mched la sogs pa yang dmigs pa dang rnam pa la sogs pa'i bye brag gi sbyar bar bya'o/ /de ltar dmigs pa de la sems brtan par byas nas shes
 rab kyis rnam pa dpyad par bya ste/ 'di ltar shes pa'i snang ba byung bas kun tu rmongs pa'i sa bon shin tu spong bar 'gyur ro/ /de lta ma yin na mu stegs can rnams kyi bzhin du ting nge 'dzin tsam gyis nyon mongs pa spong bar mi 'gyur
 ro/ mdo sde las ji skad du/ ting nge 'dzin de bsgom par byed mod kyi/ /de ni bdag tu 'du shes 'jig mi byed/ /de yi nyon mongs phyir zhing rab 'khrug ste/ /lhag spyod 'di ni ting 'dzin bsgom pa bzhin zhes gsungs pa lta bu'o/ /de la 'phags pa lang kar gshegs
 pa las shes rab sgom pa'i rim pa mdor bka' stsal te/ sems tsam la ni rab brten nas/ /phyi rol don la mi brtag go /de bzhin nyid kyi dmigs gnas nas/ /sems tsam las kyang bzla bar bya/ /sems tsam las ni bzlas nas su/ /snang ba med las bzla
 bar bya/ /snang med gnas pa'i rnal 'byor pa/ /de yis theg pa chen po mthong/ /zhi ba lhun gyis grub pa'i gnas/ /smon lam dag gis rnam par sbyangs/ /ye shes dam pa bdag med par/ /snang ba med pas mthong bar 'gyur/ /de la don ni 'di yin te/ thog
 mar rnal 'byor pas chos gzugs can gang dag gzugs la sogs pa phyi rol gyi don du gzhan dag gis brtags pa de dag la ci 'di dag rnam par shes pa las gzhan zhi yin nam/ /'on te rnam par shes pa de nyid de ltar snang ste/ rmi lam gyi gnas skabs
 ji lta ba bzhin nam zhes dpyad par bya'o/ /de la rnam par shes pa las phyi rol brdul phra rab tu bshig ste/ rdul phra rab rnams kyang cha shas kyis so sor brtags na rnal 'byor pas do de dag mi mthong ngo/ /des de dag ma mthong bas 'di snyam du 'di dag
 thams cad ni sems tsam ste phyi rol gyi don med do snyam du sems so/ /'di ltar sems tsam la ni rab brten nas/ /phyi rol don la mi brtag go zhes de skad 'byung ba ni chos gzugs can la rnam par rtog pa spong ba'o zhes bya ba'i tha tshig go /dmigs su rung ba'i mtshan
 nyid du gyur pa de dag la rnam par spyad na mi dmigs pa'i phyir ro/ /de ltar chos gzugs can rnam par bshig nas gzugs can ma yin pa rnam par bshig par bya ste/ de la sems tsam gang yin pa de yang gzungs ba med na 'dzin par mi rung ste/ 'dzin pa ni gzung ba la ltos pa'i
 phyir ro/ /de lta bas na sems ni gzung ba dang 'dzin pa las dben zhing gnyis su med pa kho na yin par rnam par dpyad nas gnyis su med pa'i mtshan nyid/ de bzhin nyid kyis dmigs nas/ sems tsam las kyang bzla bar bya/ /'dzin pa'i rnam pa las shin tu bzla bar bya ste/ gnyis su
 snang ba med pa gnyis med pa'i shes pa la gnas par bya zhes bya ba'i tha tshig go /de ltar sems tsam las bzlas nas gnyis snang ba med pa'i shes pa las kyang bzla bar bya ste/ bdag dang gzhan las dngos po rnams skye ba mi 'thad pa'i phyir gzung ba dang 'dzin pa
 brdzun pa ko na yin la/ de dag las de yang gung na med pa'i phyir de yang bden pa nyid ma yin par brtags la gnyis med pa'i shes pa de la yang dngos por zhen pa dor bar bya ste/ gnyis med pa'i shes pa snang ba med pa'i shes pa kho na la gnas par bya zhes
 bya ba'i tha tshig go /de ltar na chos thams cad la ngo bo nyid med par rtogs pa la gnas pa yin no/ /de la gnas pas yang dag pa nyid kyi chos la zhugs pas rnam par mi rtog pa'i ting nge 'dzin la zhugs pa yin no/ /de ltar rnal 'byor pa gang gi tshe gnyis med pa'i shes
 pa snang ba med pa'i shes pa la gnas par gyur pa de'i tshe/ mthong ba'i dam pa la gnas pas theg pa chen po mthong ngo/ /de kho na dam pa mthong ba gang yin pa de nyid theg pa chen po zhes bya'o/ /de kho na dam pa mthong ba de ni chos thams cad shes rab kyi mig gis brtags te
 yang dag pa'i ye shes kyi snang ba shar na ci yang mthong ba med pa gang yin pa'o/ /de skad mdo las kyang gsungs te/ don dam pa mthong ba gang zhe na/ chos thams cad mthong ba med pa gang yin pa'o zhes 'byung ngo/ /'dir de lta bu'i mthong ba med pa la dgongs te/ mi
 mthong ba zhes bka' stsal gyi/ mig btsums pa dang/ dmus long la sogs pa lta bu rkyen ma tshang ba dang/ yid la mi byed pas mi thong ba ni ma yin no/ /de bas na dngos por mngon par zhen pa la sogs phyin ci log gi bag chags ma
 spangs pas 'du shes med pa'i snyoms par 'jug pa la sogs pa las langs pa bzhin du dngos po la sogs pa mngon par zhen pa'i rtsa ba can 'dod chags la sogs pa nyon mongs pa'i tshogs yang 'byung ba'i phyir rnal 'byor pa ma grol ba nyid du 'gyur
 ro/ 'dod chags la sogs pa'i rtsa ba ni mngon par zhen pa yin no/ /zhes 'phags pa bden pa gnyis bstan pa las kyang bka' stsal to/ /rnam par mi rtog pa la 'jug pa'i gzungs las yid la mi byed pas gzugs la sogs pa'i mtshan ma spang ngo zhes
 gsungs pa gang yin pa de yang shes rab kyis brtags na mi dmigs pa gang yin pa der yid la mi byed pa dgongs kyis/ yid la byed pa med pa tsam ni ma yin te/ 'du shes med pa'i snyoms par 'jug pa la sogs pa ltar thog ma med pa'i dus nas
 gzugs la sogs pa la mngon par zhen pa'i yid la byed pa spangs pa tsam gyis spong ba ni ma yin no/ /the tshom ma spangs par ni sngon dmigs pa'i gzugs la sogs pa la mngon par zhen pa'i yid la byed pa yongs su spang bar mi nus te/ me ma spangs bar tshe?
 ba spang du mi rung ba bzhin no/ /'di ltar gzugs la sogs pa rnam par rtogs pa logs pa 'di dag tsher ma la sogs pa bzhin du sems las lag pas dbyung zhing bsal du mi rung ste/ the tshom gyi sa bon spang dgos pa'i phyir ro the tshom gyi sa bon de yang rnal
 'byor ba'i ting nge 'dzin gyi snang ba byung ste/ shes rab kyis mig gis brtags na gzugs la sogs bsdang dmigs pa dmigs su rung ba'i mtshan nyid du gyur pa de dag mi dmigs pa'i phyir thag pa las sbrul du shes pa bzhin du spang gi/ gzhan du ma yin no
 de'i me the tshom gyi sa bon dang bral bas gzugs la sogs pa'i mtshan ma yid la byed pa spong nus par 'gyur te/ gzhan du ma yin no/ /de lta ma yin te/ ting nge 'dzin gyi snang ba ma byung/ shes rab kyi mig gis ma bltas na/ mun khung nA 'dug pa'i mi dang/ khyim phyi nang na
 yod pa'i bum pa la sogs pa som nyi za bar gyur pa bzhin du rnal 'byor ba yang gzugs la sogs pa yod par som nyi zab ldog par mi 'gyur/ /de ma log na mig rab rib kyi skyon ma bsal ba bzhin du/ gzugs la sogs pa mi bden la mngon par zhen pa 'byung
 ste cis kyang mi zlogs so/ /de lta bas na ting nge 'dzin gyi lag gis sems gzung ste shin tu cha phra ba'i shes rab kyi mtshan gyis gzugs la sogs pa log par rtog pa'i sa bon gyis zug rngu sems de la/? lang ba bsal bar bya'o/ /de ltar byas na rtsa ba nas byung ba'i shing dag
 sa las mi skye ba bzhan rtsa ba med pas na log par rnam par rtog pa'i sems yang skye bar mi 'gyur ro/ /de bas na sgrib pa spangs ba'i phyir zhi gnas dang lhag mthong zung ngu 'brel bar 'jug pa'i lam bcom ldan 'das kyis bka' stsal to/ de gnyis ni yang dag pa'i ye shes
 rnam par mi rtog pa'i rgyu yin pa'i phyir ro/ /de skad du/ tshul khrims la ni gnas nas ting nge 'dzin thab ste/ ting nge 'dzin theb nas kyang shes rab bsgom par byed/ shes rab kyi ni ye shes rnam par dag pa 'thob/ /ye shes rnam par dag pas tshul khrims phun sum tshogs zhes bka' 
 stsal to/ /'di ltar gang gi che zhi gnas kyis dmigs pa la sems bstan par byas pa de'i tshe shes rab kyis rab tu brtags na/ yang dag pa'i ye shes kyi snang ba 'byung ste/ de'i tshe snang ba byung bas mun pa bsal ba bzhin du sgrib pa 'byung ngo/ /de gnyis ka yang mig
 dang snang ba bzhin du yang dag pa'i ye shes 'byung ba la phan tshun mthun par gnas pa yin gyi/ snang ba dang mun pa bzhin du mi mthun pa ma yin no/ /ting nge 'dzin ni mun pa'i ngo bo nyid ma yin te/ ci zhe na/ sems rtse gcig pa'i mtshan nyid do/ /de ni mnyam par gzhag na yang
 dag pa ji lta ba bzhin du shes so zhes bka' stsal pa'i phyir de shes rab dang shin tu mthun pa yin gyi/ mi mthun pa ma yin no/ /de lta bas mnyam par bzhag pa'i shes rab kyis brtags na chos thams cad mi dmigs pa gang yin pa de nyid dmigs
 pa'i dam pa'o/ /rnal 'byor pa rnams kyi gnas skabs kyi mtshan nyid de 'dra ba de ni lhun gyis grub pa yin te/ de'i pha rol tu lta bar bya ba gzhan med pa'i phyir ro/ /zhi ba ni yod pa dang med pa la sogs pa rnam par rtog pa'i mtshan nyid kyi spros pa thams cad nye bar zhi ba'i
 phyir ro/ /'di ltar gang gi tshe rnal 'byor pas shes rab kyis brtags na dngos po'i ngo bo nyid gang yang mi dmigs pa de'i tshe de la dngos po rnam par rtog pa mi 'byung ba nyid do/ /dngos po med pa rnam par rtog pa yang de la med pa nyid de/ gal te brgya la dngos po
 'ga' zhig mthong bar gyur na ni/ de lta na ni bkag pas dngos po med pa rnam par rtog pa 'byung ngo/ /gang gi tshe rnal 'byor pas shes rab kyi mig gis brtags na dus gsum du yang dngos po mi dmigs pa de'i tshe ci zhig bkag pas dngos po med par rnam par
 rtog par byed/ de bzhin du rnam par rtog pa gzhan dag kyang de'i tshe de la mi 'byung ba nyid de/ yod pa dang med pa rnam par rtog pa gnyis kyis rnam par rtog pa thams cad la khyab pa'i phyir te/ khyab par byed pas khyab par bya ba yang med pa'i phyir ro/
 de ni rnam par mi rtog pa'i rnal 'byor dam pa yin te/ /de la gnas pa'i rnal 'byor pa ni rnam par rtog pa thams cad nub pas/ nyon mongs pa'i sgrib pa yang dag par spong ngo/ /'di ltar nyon mongs pa'i sgrib pa
 ni ma skyes pa dang ma 'gags pa'i dngos po rnams la dngos po la sogs par phyin ci log pa'i rtsa ba ste/ rgyu yin no zhes 'phags pa bden pa gnyis bstan pa la sogs pa las bcom ldan 'das kyis bka' stsal to/ /rnal 'byor goms pa 'dis
 dngos po la sogs pa rnam par rtog pa thams cad spangs pa'i phyir dngos po la sogs par phyin ci log pa ma rig pa'i ngo bo nyid nyon mongs pa'i sgrib pa'i rtsa ba spong ste/ de'i phyir rtsa ba bcad pas nyon mongs pa'i sgrib pa'i rtsa ba yang dag par spong ngo/ /ji skad du
 yang 'phags pa bden pa gnyis bstan pa las gsungs te/ 'jam dpal ji ltar nyon mongs pa rnams 'dul bar 'gyur/ ji ltar nyon mongs pa rnams yongs su shes pa yin/ 'jam dpal gyis smras pa/ don dam par shin tu ma skyes pa dang/ ma byung ba dang
 dngos po med pa'i chos thams cad la kun rdzob tu yang dag pa ma yin pa'i phyin ci log go /yang dag pa ma yin pa'i phyin ci log de las kun tu rtag pa dang/ rnam par rtog pa'o/ /kun tu rtog pa dang/ rnam par rtog pa de las tshul bzhin ma yin pa yid la
 byed pa'o/ /tshul bzhin ma yin pa yid la byed pa de las bdag tu sgro 'dogs pa'o/ /bdag tu sgro 'dogs pa de las lta ba kun nas ldang ngo/ /lta ba kun nas ldang ba de las nyon mongs pa rnams 'byung ngo/ /lha'i bu don dam par chos thams cad shin tu ma skyes pa dang
 ma byung ba dang/ dngos po med par rab tu shes pa gang yin pa de don dam par phyin ci ma log pa'o/ /gang don dam par phyin ci ma log pa de mi rtog /rnam par mi rtog go /gang mi rtog rnam par mi rtog pa de tshul bzhin la zhugs pa'o/ /gang tshul bzhin la zhugs pa de
 bdag tu sgro 'dogs par mi 'gyur ro/ /gang bdag tu sgro 'dogs par mi 'gyur ba de lta ba kun nas ldang ba mi 'gyur te/ don dam par mya ngan las 'das par lta ba'i bar gyi lta ba kun nas ldang ba'i par gyi lta ba kun nas ldang ba yang 'byung bar mi 'gyur ro/ /de ltar skye ba
 med par gnas pa de'i nyon mongs pa rnams shin tu thul bar lta bar bya ste/ de ni nyon mongs pa 'bul ba zhes bya'o/ /lha'i bu gang gi tshe nyon mongs pa rnams snang ba med pa'i shes rab kyis don dam par shin tu stong pa dang/ shin tu mtshan ma med
 po med par rab tu shes pa de'i tshe lha'i bu nyon mongs pa rnams yongs su shes pa yin no/ /lha'i bu 'di lta ste dper na gang sprul gdug pa'i rigs rab tu shes pa des sprul gdug pa de'i dug zhi bar byed do/ /lha'i bu de bzhin du nyon mongs pa rnams
 kyi rigs rab tu shes pa de'i nyon mongs pa rnams rab tu zhi bar 'gyur/ /lha'i bus smras pa/ 'jam dpal nyon mongs pa gyur pa rnams kyi rigs 'jam dpal gyis smras pa/ lha'i bu don dam par shin tu ma skyes pa dang/ ma byung ba dang/ dngos po med pa med
 pa'i chos thams cad la kun tu rtog pa gang yin pa de ni nyon mongs pa rnams kyi rigs yin no zhes rgya cher 'byung ngo/ /dngos po la sogs par phyin ci log pas phyin ci log pa mdza' dag la khyab pa'i phyir/ de spangs na phyin ci log thams cad spong bar
 'gyur ba'i phyir shes bya'i sgrib pa yang 'dis yang dag par spong bar 'gyur te/ sgrib pa ni phyin ci log gi mtshan nyid yin pa'i phyir ro/ /shes bya'i sgrib pa spangs na gags? med pa'i phyir nyi ma'i 'od sprin dang bral ba'i nam mkha' la thams cad du thogs pa
 med par snang ba bzhin du ye shes kyi snang ba 'byung ngo/ /'di ltar rnam par shes pa ni dngos po'i ngo bo nyid rtogs pa yin na/ de yang dngos po nye bar gnas su zin kyang gags yod pas gsal bar mi 'gyur ro/ /gags med par gyur na ni mthu'i khyad
 par bsam gyis mi khyab pa thob pas ci'i phyir dngos po mdza' dag ji lta ba bzhin du gsal bar mi 'gyur/ re? bas na kun rdzob pa dang/ don dam pa'i tshul gyis dngos po mdza' dag ji lta ba bzhin du shes pas thams cad mkhyen pa nyid thob po/ /de'i phyir
 'di nyid sgrib pa spangs pa dang/ thams cad mkhyen pa nyid thob par 'gyur ba'i lam mchog yin no/ /nyan thos la sogs pa'i lam gang yin pa des ni phyin ci log thams cad spong bar mi 'gyur ba'i phyir sgrib pa gnyis legs par mi spongs so/ /
 de skad 'phags pa la dkar gshegs pa las kyang bka' stsal pa ste/ gzhan dag ni chos thams cad rkyen la rag las par mthong nas mya ngan las 'das pa'i blor 'gyur te/ chos la bdag med par mthong ba med pa'i phyir/ blo gros chen po de dag la thar pa
 med do/ /blo gros chen po nyan thos kyi theg pa mngon par rtogs pa'i rigs can ni nges par 'byung ba ma yin pa la nges par 'byung ba'i blor 'gyur te/ blo gros chen po 'di la lta ba ngan pa las bzlog pa'i phyir brtsan par bya'o zhes 'byung ngo/ /de nyid kyi phyir
 lam gzhan gyis thar par 'gyur ba med pas theg pa gcig kho na'o zhes bcom ldan 'das kyis bka' stsal to/ /nyan thos la sogs pa'i lam bstan pa las ni gzhug pa la ldem por dgongs nas khye?  'us khye'u 'byung ba bzhin du bstan par zad do/ /'di
 ltar 'di dag ni phung po la sogs pa'i chos tsam du zad de/ bdag med par bsgoms nas nyan thos gang zag bdag med pa la 'jug go /khams gsum rnam par shes pa tsam du bsgoms pas rnam par shes par smra ba'i phyi rol gyi don bdag med ba la
 'jug go /tshul 'dis ni gnyis med pa'i shes pa de yang bdag med pa nyid du 'jug pas bdag med pa nyid mchog la zhugs pa yin no/ /rnam par rig pa tsam la 'jug pa ni de kho na la 'jug pa ma yin te/ sngar bshad pa bzhin no/ /'phags pa 'jig
 rten las 'das pa'i le'u las kyang gsungs te/ kye rgyal ba'i sras gzhan yang khams gsum ni sems tsam du rtogs te/ sems de yang mdza' dang dbus med par rtogs so zhes 'byung ste/ skye ba dang 'jig pa'i mtshan nyid mdza' gnyis dang/ gnas
 pa'i mtshan nyid dbus med pa'i phyir sems mdza' dang dbus med do/ /de lta bas na gnyis med pa'i shes pa la zhugs pa'i de kho na la zhugs pa nyid yin no/ /rnal 'byor pa rnams kyi gnas skabs de cis rnam par dag ce na/ smon lam dag gis rnam par
 sbyangs zhes gsungs te/ snying rje chen pos sems can mdza' dag gi don la lta bar byang chub sems dpa' smon lam btab pa gang yin pa'i smon lam de'i stobs kyis phyi phyir zhing sbyin pa la sogs pa dge ba la goms par
 byas pas gnas skabs de de ltar yongs su dag par 'gyur te/ des chos thams cad ngo bo nyid med pa nyid du shes kyang sems can mdza' dag la lta bar go bzlog cing/ 'khor ba'i nyes pa rnams kyis mi gos par 'khor ba ji srid par gnas pa yin no//
 de ltar lhun gyis grub cing zhi ba yin zhe na/ ye shes dam pa bdag med par/ /snang ba med pas mthong bar 'gyur/ zhes 'dir bka' stsal to/ /'di ltar nang gi shes bya smra ba rnams kyis gnyis med pa'i mtshan nyid kyi shes pa dam pa mchog yin
 par 'dod pa gang yin pa de yang bdag med do/ /ngo bo nyid med par rnal 'byor pas gnyis med par snang ba med pa'i ye shes kyis mthong ngo/ /de phan chad lta bar bya ba med pas na lhun gyis grub pa'o/ /rnam par rtog pa sna tshogs thams cad dang bral
 pas zhi ba'o/ /gal te ji snyed de'i tshe gang de ltar mthong ba'i rnal 'byor pa de su yod ce na/ bden te don dam par na bdag la sogs pa rang dbang yod pa'i rnal 'byor pa gang yang med do/ /mthong ba ci yang med do/ /de lta mod kyi kun rdzob tu ji ltar
 gzugs la sogs pa yul gyi rnam pa'i shes pa 'byung ba tsam gyis rnam par shes pa nyid la de lta de ltar 'jig rten na lha sbyin nam mchod sbyin gyi shes pas mthong zhes tha snyad 'dogs te/ bdag la sogs pa ni gang yang med do de bzhin du 'dir
 yang gnyis med pa'i ye shes snang ba med pa'i shes pa kho na 'byung ba na snang ba med pa'i ye shes kyis mthong ngo zhes de ltar ming 'dogs so/ /chos thams cad don dam par ngo bo nyid med mod kyi/ kun rdzob tu rnal 'byor pa'i shes pa 'am/ so so'i skye
 bo'i shes pa gzhan yang rung ste/ mi 'dod pa ma yin no/ /de skad 'phags pa bden pa gnyis bstan pa las bka' stsal te/ de don dam par shin tu dngos po med kyang kun rdzob tu lam bsgom par byed do zhes bya ba la sogs pa 'byung ngo/ /de lta ma
 yin na nyan thos dang/ rang sangs rgyas dang/ byang chub sems dpa' dang/ sangs rgyas dang/ so so'i skye bo la sogs pa'i bye brag kyang cis dbye/ 'di ltar gang la kun rdzob du yang rgyu med pa de ni kun rdzob tu yang mi skye ste/ ri bong gi rwa la sogs
 pa bzhin no/ /gang la rgyu yod pa de don dam par rdzun pa yin kyang skye ba kho na ste/ sgyu ma dang/ gzugs brnyan dang/ brag cha la sogs pa bzhin no/ /sgyu ma la sogs pa kun rdzob tu rten cing 'brel par 'byung ba yin yang de dag brtag mi bzod
 pas don dam par dngos po yod pa nyid du mi 'gyur ro/ /de bas na 'gro ba thams cad sgyu ma lta bu kho na'o/ /zhes gsungs so/ /de la 'di ltar nyon mongs pa dang las sgyu ma'i dbang gis sems can gyi skye ba sgyu ma 'byung ngo/ /de bzhin du rnal 'byor pa
 rnams kyis bsod nams dang ye shes kyi tshogs sgyu ma'i dbang gis rnal 'byor pa'i ye shes sgyu ma 'byung ba nyid do/ /de skad du 'phags pa shes rab kyi pha rol tu phyin pa las kyang bka' stsal te/ rab 'byor 'di ltar chos thams cad ni sprul pa yin te
 la la ni nyan thos kyi sprul pa'o/ /la la ni rang sangs rgyas kyi sprul pa'o/ /la la ni byang chub sems dpa' i sprul pa'o/ /la la ni de bzhin gshegs pa'i sprul pa'o/ /la la ni nyon mongs pa'i sprul pa'o/ /la la ni las kyi sprul pa'o/ /rab 'byor rnam grangs
 'dis chos thams cad sprul pa lta bu'o zhes 'byung ngo/ /rnal 'byor pa rnams dang so so'i skye bo rnams kyi bye brag ni 'di yin te de dag ni sgyu ma mkhan bzhin du sgyu ma de ji lta ba bzhin du yongs su shes pas bden pa nyid mngon par zhen pa med do//
 des na de dag rnal 'byor pa zhes bya'o/ /gang dag byis pa ltad mo pa bzhin du de la bden pa nyid du mngon par zhen pa de dag ni phyin ci log tu mngon par zhen pa'i phyir/ byis pa zhes bya ste/ de dag thams cad 'gal ba med do/
 de skad 'phags pa chos yang dag par sdud pa las kyang bka' stsal te/ dper na sgyu ma'i mkhan po zhig /sprul pa thar par bya phyir brtson/ /des ni snga nas de shes pas/ /sprul pa de la chags pa med/ /srid gsum sprul pa 'dra bar ni/ /rdzogs pa'i byang
 chub mkhas pas shes/ /'gro ba'i ched du go bgos te/ /'gro ba de ltar snga nas shes zhes gsungs so/ /de ltar bsgom pa'i rim pa 'dis de kho na bsgom par bya'o/ /de la bying ba dang rgod pa la sogs pa byung na sngar bstan pa bzhin du zhi bar bya'o//
 gang gi tshe chos thams cad ngo bo nyid med par dmigs pa la bying ba dang rgod pa la sogs pa dang bral zhing mngon par 'du byed pa med par shes pa 'jug par gyur pa de'i tshe zhi gnas dang lhag mthong zung du 'brel par 'jug pa'i lam rdzogs
 pa yin no/ /de'i tshe ji srid du nus pa de srid du mos pa'i stobs kyis mos pas spyod pa'i sa la gnas pas bsgom par bya'o/ /de nas ji ltar 'dod pa bzhin du skyil mo krung ma bshig par langs la 'di snyam du bsam par bya ste/ yod ni chos
 'di dag thams cad don dam par ngo bo nyid med pa yin mod kyi/ kun rdzob du yod par bsam mo/ /de skad dkon mchog sprin las kyang bka' stsal te/ ji ltar byang chub sems dpa' bdag med pa la mkhas pa yin zhe na/ rigs kyi bu 'di la byang
 chub sems dpa' yang dag pa'i shes rab kyis gzugs la so sor rtog /tshor ba dang 'du shes dang/ 'du byed rnams dang/ rnam par shes pa la so sor rtog ste/ de gzugs la so sor rtog pa na gzugs kyi skye ba mi dmigs kun 'byung ba
 mi dmigs/ 'gog ba mi dmigs so/ /de bzhin du tshor ba dang/ 'du shes dang/ 'du byed rnams dang/ rnam par shes pa'i skye ba mi dmigs so/ /de yang don dam par skye ba med par gnas pa'i shes rab kyis yin gyi/ tha dad pa'i ngo bo nyid kyis ni ma yin no zhes rgya
 cher 'byung ngo/ /byis pa'i blo can 'di dag ngo bo nyid med pa'i dngos po rnams la mngon par zhen pa'i dbang gis 'khor pa na kun tu 'khyam zhing sdug bsngal sna tshogs dag nyams su myong ngo snyam du snying rje chen po mngon du byas la 'di snyam du bsam par bya ste/ ci
 nas bdag gis thams cad mkhyen pa nyid thob nas 'di chos nyid khong du chud par byed par 'gyur ba de ltar bya'o snyam du bsam mo/ /de nas sangs rgyas dang byang chub sems dpa' thams cad la mchod pa dang bstod pa gsol te/ 'phags pa bzang po
 spyod pa la sogs pa'i smon lam chen po gdab po/ /de nas stong pa nyid dang snying rje'i snying po can gyi sbyin pa la sogs pa bsod nams dang ye shes kyi tshogs mdza' dag sgrub pa la 'jug par bya'o/ /de skad 'phags pa chos yang dag par sdud pa las kyang bka' 
 stsal te/ yang dag pa ji lta ba bzhin du/ mthong ba'i byang chub sems dpa' sems can rnams la snying rje chen po 'jug go /de yang 'di snyam du bdag gis chos thams cad yang dag pa ji lta ba bzhin du mthong pa'i ting nge 'dzin gyi sgo 'di sems can thams cad
 ya? bsgrub par bya'o snyam du sems te/ de'i snying rje chen po des bskul bas/ lhag pa'i tshul khrims dang/ lhag pa'i sems dang/ lhag pa'i shes rab kyi bslab pa yongs su rdzogs par byas nas bla na med pa yang dag par rdzogs pa'i byang chub mngon par rdzogs
 par 'tshong rgya 'o zhes 'byung ngo/ /thabs dang shes rab zung du 'brel par 'jug pa 'di ni byang chub sems dpa' rnams kyi lam yin te/ 'di ltar don dam pa mthong yang kun rdzob mi gcod la/ kun rdzob ma bcad pas snying rje chen po sngon du 'gro zhing phyin ci
 log med pa sems can gyi don byed pa la sogs pa la 'jug go /de skad 'phags pa dkon mchog sprin las kyang bka' stsal te/ ji ltar na byang chub sems dpa' theg pa chen po la mkhas pa yin zhe na/
 /'di la byang chub sems dpa' bslab pa thams cad la bslab pa de yang mi dmigs/ bslab pa'i lam yang mi dmigs/ gang slob pa de yang mi dmigs te/ rgyu de dang gzhi des chad par lta bar mi ltung ngo zhes
 'byung ngo/ /'phags pa chos yang dag par sdud pa las kyang bka' stsal te/ byang chub sems dpa' rnams kyi sgrub pa gang zhe na/ bcom ldan 'das kyis byang chub sems dpa' rnams kyi lus kyi las gang ci lags pa dang/ ngag gi las gang ci lags
 pa dang/ yid kyi las gang ci lags pa de dag thams cad ni sems can thams cad la lta bas 'jug pa lags so/ /snying rje chen po sngon du 'gro ba lags so/ /snying rje chen po'i dbang du gyur pa lags so/ /sems can thams cad la sman pa dang bde bar bgyi
 ba'i lhag pa'i bsam pa las byung ba lags so/ /de ltar sman par bgyi ba'i bsam pa dang ldan pa de 'di snyam du 'du shes bgyid de/ sems can thams cad la phan pa bsgrub pa'i bsgrub pa gang yin pa de bdag gis bsgrub bar bya'o/ /snyam lags
 so/ de phung po rnams la sgyu ma lta bur so sor rtog pa yang bsgrub la phung po yongs su 'dor ba yang mi 'tshal/ khams rnams la sprul gdug pa lta bur so sor rtog pa yang bsgrub la khams yongs su 'dor ba yang mi 'tshal/ /skye mched rnams la grong stong
 ltar so sor rtog pa yang bsgrub la skye mched yongs su spong ba yang mi 'tshal/ gzugs la dbu ba sngos ba ltar so sor rtog pa yang bsgrub la de bzhin gshegs pa'i gzugs kyi sku rnam par sgrub pa yang mi 'dor/ tshor ba la chu'i chu bur ltar so sor rtog pa yang
 bsgrub la de bzhin gshegs pa'i bsam gtan dang ting nge 'dzin la snyoms par 'jug pa'i bde ba bsgrub pa'i sbyor ba mi rtsom pa yang ma lags/ 'du shes la smig rgyu lta bur so sor rtog pa yang bsgrub la de bzhin gshegs pa'i ye shes sgrub pa mi bsgrub pa
 yang ma lags/ 'du byed rnams la chu shing ltar so sor rtog pa yang bsgrub la sangs rgyas kyi chos mngon par 'du bgyi ba mi bsgrub pa yang ma lags/ rnam par shes pa la sgyu ma lta bur so sor rtog pa yang bsgrub la/ ye shes thog mar 'gro ba'i lus dang
 ngag dang yid kyis las mi bsgrub pa yang ma lags so zhes bya ba la sogs pa rgyas par 'byung ngo/ /de ltar mdo sde de dang de dag la thabs dang shes rab kyi tshul sgrub pa mdza' yas pa 'byung ba khong du chud par bya'o/ /'jig rten las 'das pa'i shes rab kyi
 gnas skabs na thabs la brten pa mi 'byung mod kyi/ thabs bsten pa'i dus na byang chub sems dpa' sgyu ma mkhan ltar phyin ci ma log pa'i phyir 'jig rten las 'das pa'i ye shes la sbyor ba'i rjes las byung ba dngos po'i don gyi de kho na ji lta ba bzhin
 du rtogs pa'i shes rab nyid de/ thabs dang shes rab zung du 'brel par 'jug pa'i lam de kho na yin no/ /'phags pa blo gros mi zad pas bsten pa las kyang bsam gtan mi zad pa'i skabs nas thabs dang shes rab zung du 'brel par 'jug pa'i lam 'byung
 ba khong du chud par bya'o/ /rim pa 'di lta bu 'dis byang chub sems dpa' thabs dang shes rab rtag tu gus par yun ring du goms par bsgoms na gnas skabs kyi bye brag bcu gnyis su 'gyur ro/ /gnas skabs de dag ni gong ma gong ma'i yon tan gnas
 pa'i phyir sar rnam par bzhag ste/ mos pas sbyod pa'i sa nas sangs rgyas kyi sa'i bar du'o/ /de la ji srid du gang zag dang chos la bdag med pa'i de kho na mngon sum du mi byed mod kyi/ mos pa shin tu brtan pa tsam du zad de bdud la sogs pas mi phyed la gang
 gi tshe mos ba'i stobs kho nas bsgom par byed pa de'i tshe mos pa brtan pa'i sgo nas mos pas spyad pa'i sar rnam par gzhag go /sa 'di la gnas pa'i byang chub sems dpa' ni so so'i skye bo yin mod kyi/ byis pa'i phongs pa thams cad
 las yang dag par 'das te ting 'dzin dang/ gzungs dang/ rnam par thar pa dang/ mngon par shes pa la sogs pa'i yon tan grangs med pa dag dang ldan pa 'phags pa dkon mchog sprin las 'byung ba yin no/ /'di nyid tha ma dang/ 'bring dang/ rab dang/
 rab kyi mchog gi gnas skabs bzhin nges par 'byed pa'i cha dang mthun pa bzhir rnam par bzhag ste/ 'di ltar gang gi tshe phyi rol gyi don rnam par 'jig pa na shes pa'i snang ba cung zad gsal ba byung ba de'i tshe nges par 'byed pa'i cha dang mthun pa dro bar gyur
 pa yin no/ /de ni theg pa chen po 'dir snang ba thob pa'i ting nge 'dzin zhes bya'o/ /gang gi tshe shes pa'i snang ba de nyid 'bring tsam du gsal bar gyur pa de'i tshe nges par 'byed pa'i cha dang mthun pa rtse mo zhes bya ba yin no/ /snang ba mchad? pa'i ting nge 'dzin zhes kyang bya'o
 gang gi tshe de nyid ches gsal bar gyur te phyi rol gyi don mi snang ba'i shes pa'i snang ba byung ba de'i tshe rnam par shes pa tsam la gnas pa'i nges par 'byed pa'i cha dang mthun pa bzod pa zhes bya ba yin no/ /phyogs gcig la zhugs pa'i ting nge 'dzin zhes
 kyang bya ste/ gzung ba'i rnam pa mi dmigs par zhugs pa'i phyir ro/ /gang gi tshe 'dzin pa'i rnam pa dang gnyis su med pa'i shes pa yang rnam par 'jig pa de'i tshe nges par 'byed pa'i cha dang mthun pa chos kyi mchog ces bya ba yin no/ /de ma thag pa'i ting
 nge 'dzin zhes kyang bya ste/ de ma thag kho nar de kho na la 'jug pa'i phyir ro/ /de'i bar du ni mos pas spyod pa'i sa yin no/ /gzhan dag ni mdor na yan lag bcu gcig yongs su rdzogs pa'i sgo nas rnam par gzhag go /de la sa dang po ni thog mar gang
 zag dang chos la bdag med pa'i de kho na rtogs pa'i yan lag yongs su rdzogs pa las rnam par gzhag ste/ 'di ltar gang gi tshe chos kyi mchog gi 'jug thogs kho nar chos thams cad ngo bo nyid med par mngon sum du byed pa'i ye shes shin tu gsal
 ba 'jig rten las 'das pa spros pa thams cad dang bral ba thog ma byung ba de'i tshe byang chub sems dpa' yang dag pa nyid skyon med pa la zhugs pas mthong ba'i lam skyes pa'i phyir sa dang por chud pa yin no/ /de bas na de khong du chud pas 'di la thog mar
 khong du chud pa'i phyir byang chub sems dpa' i sa rab tu dga' ba yin te/ des na sa de rab tu dga' ba zhes bya'o/ /sa der mthong bas spang bar bya ba'i nyon mongs pa brgya rtsa bcu gnyis spong ngo/ /sa lhag ma rnams ni bsgom pa'i lam gyi ngo bo nyid de/ de dag tu
 bsgom pas spang bar bya ba khams gsum pa'i nyon mongs pa'i nyon mongs pa bcu drug spong ngo/ /sa der byang chub sems dpa' chos kyi dbyings kun tu 'gro ba nyid rtogs pas bdag gi don dang 'dra bar gzhan gyi don la 'jug pa'i phyir sbyin pa'i pha rol tu
 phyin pa shin tu shas che ba yin no/ /byang chub sems dpa' nges de kho na khong du chud kyang ji srid du ltung ba'i 'khrul pa cha phra ba rnams la shes bzhin du gnas par byed mi nus pa de srid pa dang po'o/ /gang gi tshe nus pa de'i yan lag de yongs su rdzogs pas sa
 gnyis par rnam par bzhag go /de bas na sa de la ltung ba'i 'khrul ba cha phra ba kun tu mi spyod pas tshul khrims kyi pha rol tu phyin pa shin tu shas che ba yin no/ /'chal pa'i tshul khrims kyi dri ma thams cad dang bral ba'i phyir sa de dri ma med pa zhes bya'o/ /ltung ba'i
 'khrul pa cha phra ba rnams la shes bzhin du gnas pa yang yin no/ /ji srid du 'jig rten pa'i ting nge 'dzin mdza' dag la snyoms par 'jug pa dang/ ji skad thos pa'i don kun tu 'dzin mi nus pa de srid du sa gnyis ba kho na'o/ /gang gi tshe nus pa de'i tshe yan
 lag de yongs su rdzogs pas sa gsum par rnam par bzhag go /sa de la byang chub sems dpa' thos pa gzung ba'i phyir dang/ 'jig rten pa'i ting nge 'dzin thams cad mngon par sgrub pa'i phyir sdug bsngal thams cad bzod pas na  
 bzod pa'i pha rol tu phyin pa shin tu shas che ba yin no/ /ting nge 'dzin de dag thob pas sa de ni 'jig rten las 'das pa'i ye shes kyi snang ba med pa byed pas 'od byed pa zhes bya'o/ /de 'jig rten pa'i ting nge 'dzin mdza' dag thob kyang ji srid du ji ltar thob
 pa'i byang chub kyi chos rnams kyi lan mang du gnas par byed pa dang/ chos dang snyoms par 'jug pa'i sems btang snyoms su byed mi nus pa de srid dus gsum pa'o/ /gang gi tshe nus pa de'i tshe yan lag de yongs su rdzogs pas sa bzhi par rnam par bzhag
 go/ sa de la byang chub dpa' rgyun mi 'chad par ngag dang yid kyi brjod pa las yang dag par bzla ba'i phyir byang chub kyi phyogs kyi chos rnams kyis gnas pas na brtson 'grub kyi pha rol tu phyin pa shin tu shas che ba yin no/ /sa de ni nyon mongs pa'i shing mdza' 
 dag bsreg par nus pa'i byang chub kyi phyogs kyi chos kyi 'od 'phro ba shin tu byung bas 'od 'phro ba can zhes bya'o/ /de byang chub kyi phyogs kyi chos kyis rgyun mi 'chad par gnas pa yang yin no/ /ji srid du bden pa rnams bsgom pa na 'khor ba la mi phyogs pa
 dang/ mya ngan las 'das pa la mngon du phyogs pa las sems bzlog ste/ thabs kyis zin pa'i byang chub kyi phyogs bsgom mi nus pa de srid du sa bzhi pa'o/ /gang gi tshe nus pa de'i tshe yan lag de yongs su rdzogs pas sa lnga par rnam par bzhag go /de bas 
 na sa de la thabs kyis zin pa'i byang chub kyi phyogs bsgom pa de yongs su rdzogs par byed pa ni shin tu sbyang bar dka' bas na shin tu sbyang dka' zhes bya'o/ /sa de la bden pa'i rnam pa sgom pa lan mang du byed pas bsam gtan gyi pha rol tu phyin pa shin tu
 shas che ba yin te/ de thabs kyis zin pa'i byang chub kyi phyogs kyis mang du gnas pa yang yin no/ /ji srid du 'khor par 'jug pa la so sor rtog pas skyo ba dang ldan pas sems kyi rgyud kyis mtshan ma med par gnas pa la mnyam par 'jog mi nus pa
 de srid du sa lnga pa'o/ /gang gi tshe nus pa de'i tshe yan lag de yongs su rdzogs pas sa drug pa rnam par bzhag go /sa de la byang chub sems dpa' rten cing 'brel bar 'byung ba bsgoms pas gnas pas na shes rab kyi pha rol tu phyin pa shin tu shes che ba yin
 no/ de bas na shes rab kyi pha rol tu phyin pa shin tu shas che ba'i phyir sa de la sangs rgyas kyi chos thams cad mngon du gyur pa zhes bya'o/ /de mtshan ma med par gnas pa thob pa yang yin no/ /ji srid du skabs med par mtshan ma med par gnas pa la
 mnyam par 'dzog mi nus pa de srid du sa drug pa'o/ /gang gi tshe nus pa de'i tshe yan lag de yongs su rdzogs pas sa bdun par rnam par bzhag go /sa de la byang chub sems dpa' mtshan ma thams cad mtshan ma med par khong du chud la mtshan mar byas
 pa'i tha snyad kyang 'gog par mi byed do/ /de bas na sa de la thabs kyi pha rol tu phyin pa shin tu shas che ba yin no/ /sa 'di lhun gyis grub pa'i lam dang/ 'brel pa'i phyir shin tu ring du song bas na ring du song ba zhes bya'o/ /de skabs med pa mtshan
 ma med pa la gnas pa yang yin no/ /ji srid du lhun gyis grub pas 'jug pa'i mtshan ma med par gnas pa la mnyam par 'jog mi nus pa de srid du sa bdun pa'o/ /gang gi tshe nus pa de'i tshe yan lag de yongs su rdzogs pas sa brgyad par rnam
 par bzhag go /sa de la lhun gyis grub par dge ba'i phyogs la sbyor bas na smon lam gyi pha rol tu phyin pa shin tu shas che ba yin no/ /mtshan ma med pa la rtsol bas mi bskyod pa'i phyin de mi g.yo ba zhes bya'o/ /de lhun gyis grub par mtshan ma
 med pa la gnas pa yang yin no/ /ji srid du rnam grangs dang/ nges pa'i tshig la sogs pa'i rab tu dbye bas rnam pa thams cad du chos ston pa la dbang bsgyur bar mi nus pa de srid du sa brgyad pa'o/ /gang gi tshe nus pa de'i tshe
 yan lag yang de? yongs su rdzogs pas sa dgu par rnam par bzhag go /sa de la byang chub sems dpa' so so yang dag par rig pa'i khyad par thob pas shes rab kyi stobs kyi khyad par dang ldan pas na stobs kyi pha rol tu phyin pa shas che ba yin no/ /rnam
 pa thams cad du chos ston pa la mkhas pa'i phyir kha na ma tho ba med pa'i blo gros kyi khyad par thob pa legs pa'i blo gros zhes bya'o/ /de so sor yang dag par rig pa bzhi thob pa yang yin no/ /ji srid du sangs rgyas kyi zhing dang 'khor dang/ sprul pa la
 sogs pa bstan pa dang/ chos yongs su rdzogs par longs spyad pa dang/ sems can yongs su smin par byed mi nus pa de srid du sa dgu pa'o/ /gang gi tshe nus pa de'i tshe yan lag yongs su rdzogs pas sa bcu rnam par gzhag go /de la sprul pa la sogs pas
 sems can yongs su smin par bya ba la mkhas pa'i khyad par dang ldan pas byang chub sems dpa' ye shes kyi pha rol tu phyin pa shin tu shas che ba yin no/ /de ni chos ston pa'i sprin rnams kyis 'jig rten gyi khams mdza' yas pa rnams su chos kyi char
 'bebs pas na chos kyi sprin zhes bya'o/ /gzhan yang phung po yongs su dag pa la sogs pa'i rnam par bzhag pa rnams kyis sa rnams rnam par bzhag pa yod de/ yi ge mangs kyis dogs nas ma bris so/ /des sprul pa la sogs pa'i dbang thob kyang
 ji srid du shes bya thams cad la rnam pa thams cad du chags pa med pa dang/ thogs pa med pa'i ye shes bskyed par mi nus pa de srid du sa bcu pa'o/ /gang gi tshe nus pa de'i tshe yan lag de yongs su rdzogs pas sangs rgyas kyi sar rnam par bzhag go /
 sa rnam par bzhag pa 'di ni 'phags pa dgongs pa nges par 'grel pa las bstan to/ /sangs rgyas kyi sa 'di ni phun sum tshogs pa rnam pa thams cad mdza' dag rab kyi mthar phyin pa'i phyir 'di las gong na rnam pa gzhan med pas de phan chad sa rnam
 par bzhag pa med do/ /sangs rgyas kyi sa de'i yon tan gyi phyogs rab tu dbye ba dpag tu med pas rnam pa thams cad brjod pa ni sangs rgyas rnams kyis kyang mi spyod na bdag 'dra bas lta smos kyang ci dgos/ ji skad du 'phags pa sdang po bkod pa
 las kyang/ shin tu brtags kyang rang byung gi /yon tan rnams kyi phyogs gcig mdza' / /mi rtogs sangs rgyas rnams dang ni/ /chos rnams bsam gyis mi khyab po zhes bka' stsal pa lta bu'o/ /mdor 'di tsam zhig brjod par nus te/ bdag dang
 gzhan gyi don phun sum tshogs pa rab kyi mthar phyin pa nyes pa ma lus pa bsal ba'i mthar thug pa brnyes nas sangs rgyas bcom ldan 'das rnams chos kyi sku la bzhugs te longs spyod rdzogs pa dang sprul pa'i skus 'gro ba ma lus pa'i don lhun
 gyis grub pa'i tshul gyis mdzad cing 'khor ba ji srid par bzhugs so/ /de lta bas na rtog pa dang ldan pa rnams kyis yon tan thams cad kyi 'byung gnas bcom ldan 'das rnams la dad pa bskyed la de dag gi yon tan yongs su bsgrub pa'i phyir rnam
 pa thams cad kyis rab tu 'bad par bya'o/ /sku gsum la sogs pa'i rnam par dbye ba ni yi ge mangs kyi dogs te ma bris so/ /mdo sde dag gi tshul gyi lugs mthun pa/ /rgyal ba'i sras kyi lam 'di legs bshad pas/ /bdag gi bsod nams mi
 chud gang thob des/ /'gro ba shes gzhan blo mchog myur thob shog /sa'i mnga' bdag dpal lha btsan pos bka' stsal nas ka ma la shi las sgom pa'i rim pa mdor bsdus pa 'di bgyis so/ /sgom rim dang po rdzogs so// //
 rgya gar gyi mkhan po pradz+nyA warmma dang/ zhu chen gyi lo tsa ba band+he ye shes sde la sogs pas bsgyur cing zhus te gtan la phab pa'o// (//kma la shI las mdzad pa'i sgom rim par pa bzhugs so//) //